7-й день
Святых мученик Се́ргия и Ва́кха
На Го́споди, воззва́х: стихи́ры на 6, глас 6.
Подо́бен: Все отложше:
Все презре́вше земное могу́тство/ и плоть возненави́девше,/ Бо́га Свята́го возлюби́сте,/ и, одея́ние безче́стное руга́тельне нося́ще,/ с Небесе прия́сте света одежду/ и ризу нерастерза́емую,/ с неюже ликующе,/ венценосцы пребогатии,/ покров нам всем бу́дите и одея́ние,/ жизни обнаженным змии́ным прельщением.
Се́ргие преславный/ и прехва́льный Ва́кше,/ сосу́ди Духа,/ пото́цы, источа́юще всем целе́ния,/ наши храни́телие/ и крепцыи побо́рницы Церкве бывше,/ самовольныя жертвы и заколе́ния честна́я,/ свети́льницы, озаряюще светом благоче́стия концы,/ разрешите тьму належащую душа́м нашим/ и мрак злобный весь отжени́те.
Незаходи́мая селе́ния,/ и разумное веселие,/ и Свет Невече́рний,/ и жизнь безпеча́льную и неги́блемую,/ от тле́ннаго телесе́ страдальцы сла́внии изше́дше, восприя́сте./ Но молитеся сих и нам улучи́ти,/ стра́сти умертви́вшим и греха укло́ншимся,/ Се́ргие и Ва́кше,/ предста́теле и приста́нища верных,/ со дерзнове́нием моля́щеся о душа́х на́ших.
Сла́ва глас 4:
Сергий и Вакх, светлая мучеников и сугу́бая заря,/ мучителей бо свире́пство низложи́сте,/ и́дольскую же лесть упраздни́сте/ и Богоразумия соверше́нную тайну,/ светлым гласом высоковеща́юще, пропове́дасте;/ ихже моли́твами, Христе́, сих Законода́вче,/ Подвигополо́жниче же и Венцеда́телю,/ и нас сподо́би на неви́димыя и лукавыя силы/ державно увязти́ся.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
Распина́ема Христа́ Человеколюбца ви́дящи Пречистая/ и ре́бра ископова́ема копие́м,/ плачущи, вопия́ше:/ что сие, Сы́не Мой?/ что Ти безблагода́тнии лю́дие возда́ша,/ за яже сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивляюся, Благоутробне,/ Твое́му во́льному распятию.
На стиховне Окто́иха. Сла́ва, глас 8:
Укрепи́ся Христовых мученик на враги́ ополче́ние,/ в нихже, я́ко светильницы мирсти́и, све́тят,/ благосла́внии и изря́днейшии страстотерпцы, Сергий и Вакх./ Сим обрати́ плещи́ лукавое ополче́ние де́монское./ Сим почуди́шася мучителие, и удиви́шася А́нгели,/ ви́дяще безплотнаго от пло́тных попира́ема./ Верных же Церковь, всепра́зднственный праздник/ и мирску́ю радость совершающи, вопие́т:/ И́же не́мощию плотско́ю Связа́вый кре́пкаго,/ моли́твами святы́х Твоих спаси́ ду́ши на́ша.
И ны́не, Богоро́дичен или́ Крестобогоро́дичен.
Подо́бен: О пресла́внаго чудесе́:
Что зри́мое видение,/ еже Моима очи́ма видится, о Владыко!/ Содержа́й всю тварь,/ на Древо воздви́жен быв,/ и умира́еши, всем дая́й жизнь,/ Богородица пла́чущи, глаго́лаше,/ егда узре́ на Кресте возноси́ма,/ из Нея неизреченно возсия́вшаго Бо́га и Человека.
Тропа́рь, глас 5:
Удобре́ние Христовых страстоте́рпец/ и очи Христовы Церкве,/ о́чи просвети́те душ на́ших,/ Сергие многострада́льне и Вакше пресла́вне:/ моли́теся ко Господу,/ я́ко да убежи́м тьмы греховныя/ и Света яви́мся общницы невече́рняго/ моли́твами вашими, святии.
НА У́ТРЕНИ
Канон святы́х на 6, глас 1, егóже краегране́сие: Сергия страстотерпца и Вакха приснопамятнаго пою. Феофа́ново.
Песнь 1
Ирмо́с: Твоя победи́тельная десни́ца/ Боголепно в кре́пости просла́вися:/ та бо, Безсмертне,/ я́ко всемогу́щая противныя сотре́,/ изра́ильтяном путь глубины́ новосоде́лавшая.
Сергие, угодниче Христов,/ смоле́бника прии́м и спомо́щника Вакха приснопамятнаго,/ с ни́мже страсти Богомудренно совершил еси́,/ слово мне мудрости, вас пою́щу, даруйте.
На недви́жимем Христовы ка́мени веры,/ святии мученицы, положи́вше основание,/ на тве́рдем степе́ни утвержде́ни,/ забра́ло и столпи́ благоче́стия яви́стеся.
Глаго́лом ве́ровавше Христовым и к Нему́ неуклонно взира́юще,/ все оплева́сте преходя́щее благосла́вие, святии,/ славы же присносу́щныя уя́звени бы́сте раче́нием.
Ро́да, и оте́чества, и че́сти Христа́ ради обнажившеся, веселя́стеся;/ и, оде́яни в женоле́пное одея́ние,/ мужему́дренно нетления оде́ждею све́тло облеко́стеся.
Богоро́дичен: Ми́лостива быти ве́рным и благоуве́тлива,/ Богомати, умоли́ Слова,/ Eгoже родила́ еси́ теле́сно, к нам пришедшаго:/ Тя бо Предста́тельницу и спасе́ние стяжа́хом.
Песнь 3
Ирмо́с: Едине Ве́дый человеческаго существа́ не́мощь/ и милостивно в не́ вообра́жся,/ препоя́ши мя с высоты си́лою,/ еже вопи́ти Тебе́, Святый:/ одушевленный хра́ме неизреченныя Славы Твоея́, Человеколюбче.
Един Ве́дый я́ко Бог вся прежде бытия́,/ к Нему́ ваша ны́не ви́дев предложения,/ мудрости словом, и Боже́ственнаго зна́ния, и твердаго смы́сла обильно испо́лни,/ я́ко Своя во́ини, блаже́ннии.
Законно уго́дницы Христу́ пострада́ти изво́ливше,/ тлеющую славу и текущую, и мира всего, и мироде́ржца/ по́мыслом Богому́дрым страстотерпцы му́ченицы возненави́десте, любо́вию Зижди́теля.
Пречистыми ума́ приложе́нии Господу предстоя́ще,/ и от та́мо су́щия зари́ исполня́еми,/ и неизреченнаго блаженства я́ве наслаждающеся,/ вас чтущия от напа́стей, страстотерпцы, изба́вите.
Богоро́дичен: Смертию держи́м пе́рвее Адам,/ ны́не избавися Твоим Рождеством, Едина Богоневесто:/ Жизнь бо истинно Ипоста́сную, соедине́ну плоти, Чи́стая,/ по Ипоста́си па́че естества́ и сло́ва родила́ еси́.
Седа́лен, глас 8.
Подо́бен: Прему́дрости:
Мучениколю́бцы, прииди́те,/ разумныя би́серы Госпо́дни и страстоте́рпцы Сергия почти́м и Вакха святыя,/ я́ко вра́жию лесть му́жески попра́вшия и и́дольскую всю кре́пость разори́вшия,/ те́мже досто́йно с Небесе венцы побе́ды прие́мше, со А́нгелы ликуют./ К ни́мже вси возопии́м:/ моли́те Христа́ Бо́га прегрешений оставле́ние дарова́ти/ чтущим любо́вию святу́ю па́мять вашу.
Сла́ва, и ны́не, Богоро́дичен:
В напа́сти многоплете́нныя впад от враг видимых и невидимых,/ бурею одержи́м безчисленных согрешений моих/ и, я́ко к теплому заступлению и покрову моему, Чи́стая,/ ко пристанищу притекаю Твоея́ благости./ Темже, Пречистая, из Тебе́ Воплоще́нному безсе́менно моли́ся прилежно о всех рабе́х Твоих,/ непрестанно моля́щихтися, Богоро́дице Пречистая,/ моля́щи Его́ при́сно согрешений оставле́ние дарова́ти/ воспева́ющим досто́йно славу Твою́.
Крестобогоро́дичен:
А́гнца, и Пастыря, и Изба́вителя/ А́гница зря́щи на Кресте, восклица́ше, пла́чущи,/ и, горько рыда́ющи, вопия́ше:/ мир убо радуется, прие́мля Тобо́ю избавле́ние,/ утроба же Моя гори́т, зря́щи Твое́ распятие,/ еже терпи́ши за милосердие милости./ Долготерпели́ве Го́споди, милости бездно и источниче неисчерпа́емый,/ умилосе́рдися и даруй согрешений оставле́ние/ верою поющим Боже́ственныя Страсти Твоя́.
Песнь 4
Ирмо́с: Го́ру Тя, благода́тию Божиею приосене́нную,/ прозорли́выма Авваку́м усмотри́в очи́ма,/ из тебе́ изы́ти Изра́илеву/ провозглаша́ше Святому/ во спасе́ние наше и обновле́ние.
Свети́ла два от запада возсия́вша,/ противно зе́млю тогда держа́щу нечестивому, творя́ща ше́ствие,/ к твое́му же восто́ку приидоша светоно́сному, Христе́, и спаси́тельному.
Ни огнь, ни меч, ни гонения, ниже́ раны благочести́ваго ра́зума о Бозе разлучи́ вас,/ жизнь бо преоби́десте конча́емую, Его́ ради, достосла́внии,/ и прия́сте блаженную сладость и неги́блющую.
Свети́льницы истинно неле́стнии/ твердь Церкве Христовы озаря́ют светом Божественнаго сия́ния/ и ду́ши благочестивых возвеселя́ют, чудес зари испуща́юще.
Вакх Боже́ственный и преизя́щный Сергий,/ ле́тным премене́нием благоче́стия рачи́тели и мучениколюбцы духовно на пи́ршество призывают,/ до́блести своя предлагающе.
Богоро́дичен: Оружие, двери Еде́мския храня́щее, уступает ны́не верным/ и приемлет све́тло Честно́ю Кровию/ из Твоего́́ чрева Ро́ждшагося, Всенепоро́чная,/ зна́менаныя ви́дящее и благода́тию.
Песнь 5
Ирмо́с: Просвети́вый сиянием/ пришествия Твоего́, Христе́,/ и освети́вый Крестом Твоим мира концы,/ сердца́ просвети́ светом Твоего́́ Богоразумия/ православно пою́щих Тя.
Прогна́вше лесть истины оружием, и мучи́телей раны крепко претерпе́вше,/ и победителе бы́сте, от Христа́ венча́вшеся,/ и ны́не досто́йно веселитеся.
Укрепля́еми непобедимою силою и благода́тию Троицы,/ дво́ица мученик низложи тьмы князя и тому порабоще́ныя,/ тем че́стно ублажаются.
Терпением, и душевным му́жеством, и крепостию помысла/ дво́ица мученик славная превзы́де всю гонителей горькую ярость/ и со А́нгелы водворя́ется.
Богоро́дичен: Возсия́́ла еси́, Богомати, я́ко утро,/ Солнце незаходи́мое, соедине́ное плотию по Ипостаси,/ на руку́ нося́щи, И́стинныя Пра́вды:/ тем Тя вси прославляем.
Песнь 6
Ирмо́с: Обы́де нас последняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ люди Твоя́, Боже наш:/ Ты бо кре́пость немощству́ющих и исправление.
Целе́ний источники мученик мо́щи богатно источа́ют;/ почерпе́м усердно, убо ве́рнии, и страстотерпцы ублажи́м,/ сла́внаго Сергия и Вакха приснослову́щаго.
Ненави́дяще беззаконных совселе́ния и пре́лесть упраздня́юще,/ Небесное шествие благостоя́нно Сергий и Вакх шествоваху/ и ко Христову достиго́ша приста́нищу невла́емому.
Отверзаются страстоно́сцем мучеником врата́ Небесная,/ благогове́юще стра́сти честне́й,/ подо́бней Бо́га на́шего благода́тней и прогоня́ющей де́монския полки́.
Богоро́дичен: И́стинно Тя, Матерь Божию, Пречистая, му́дрствующе, возвеща́ем:/ Безначальнаго бо Сы́на Единороднаго, прежде век возсия́вшаго из Отца,/ несказа́нно, Де́во, родила́ еси́.
Конда́к, глас 2:
Подо́бен: Вышних ища́:
Разум на враги́ му́жески вооружи́вше,/ всю тех лесть разруши́сте,/ и, победу свыше прии́мше, мученицы всехва́льнии,/ единомы́сленно вопию́ще:/ добро́ и красно́ еже бы́ти с Богом.
И́кос:
На Небесех, Христе́, живу́ще Сергий же и Вакх/ и Боже́ственнаго Света от Тебе́ исполня́еми,/ мене́, во тьме неве́дения ходя́щаго, предвари́ скоро/ и страсте́й исхити́, Едине Безсмертне,/ одежду мне покаяния низпосла́в,/ я́ко да светлым умом светоно́сный сих праздник воспою́ и возопию́, весели́ся:/ добро́ и красно́ еже быти с Богом.
Песнь 7
Ирмо́с: Тебе́ у́мную, Богоро́дице, пещь/ разсмотря́ем ве́рнии,/ я́коже бо о́троки спасе́ три Превозноси́мый,/ мир обнови́ во чреве Твое́м всеце́л,/ хвальный отцев Бог и препрославлен.
Ра́дуйся, дво́ице страстоте́рпцев славная;/ радуйся, победившая све́тло мучительская преще́ния;/ радуйся, соверши́вшая тече́ние блаженное;/ радуйся, пи́ще, всегда внутрь пребывающая;/ радуйся, я́сне предстоя́щая Бо́гу, Богоблаженная.
Всесве́тлии на земли́ ходя́ще,/ де́монская очеса́ и лица гонителей мученицы омрачи́сте светом благода́ти и зарями страда́ния,/ хва́льнаго воспева́юще Бо́га и пресла́внаго.
Хра́ми Бо́га бывше одушевле́ннии Живущаго/ и, живу́ще, страда́льцы, силою Божиею укрепля́еми истинно,/ полки́ победи́сте врагов, всеблаженнии,/ кре́пкаго во бране́х Бо́га пе́сньми восхваляюще.
Богоро́дичен: Пречистый Ты храм была еси́ и пресвяты́й киво́т,/ прие́мши Творца неопи́саннаго и непостижи́маго,/ во утробе Твое́й вмести́вши, Единороднаго Бо́га Слова,/ Благослове́нная Всечи́стая Влады́чице.
Песнь 8
Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те вся дела́ Госпо́дня Го́спода,/ пойте и превозноси́те во вся ве́ки.
И́же росо́ю дре́вле отроко́м пла́мень Прохлади́вый,/ стоя́щия в по́двизех укрепи́ Твоя́ му́ченики, пою́щия:/ благослови́те вся дела Господня Го́спода,/ пойте и превозноси́те во вся ве́ки.
Ядови́тая и душевре́дная ласка́ния мучи́тельская умно страстотерпцы отрази́ша,/ Христу́ вопию́ще и глаго́люще:/ благослови́те вся дела Господня Го́спода,/ пойте и превозноси́те во вся ве́ки.
Действи́тельны храни́тели нам, Сергия и Вакха,/ и́стинно вене́чники, Христос показа́, храня́щия и пою́щия:/ благослови́те вся дела Господня Го́спода,/ пойте и превозноси́те во вся ве́ки.
Напра́ви мою, Владыко Христе́, моли́твами мученик стезю́ доброде́телей/ и удобно Тебе́ взыва́ти сподо́би:/ благослови́те вся дела Господня Го́спода,/ пойте и превозноси́те во вся ве́ки.
Богоро́дичен: Блажу́ Тя, Истинную Бо́га на́шего Матерь,/ радуйся, со А́нгелом принося́ Ти, Чи́стая, Всенепоро́чная Влады́чице:/ Тя бо непреста́нно вся дела Господня поют/ и превозно́сят во вся ве́ки.
Песнь 9
Ирмо́с: О́браз чи́стаго Рождества Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.
Всего Христа́ стяжа́ли есте́, мир бо весь Того ра́ди оста́вили есте́,/ и ны́не, мученицы, в Небесных водворя́етеся,/ лики Вы́шних сил и муже́й блаже́нных ви́дяще све́тлости.
Дае́ши сопряже́ние всеизря́днейшее похвале́ния любо́вию Тебе́ принося́щим,/ благода́ть свыше и прегреше́ний оставле́ние,/ моля́щи Единаго Милосе́рдаго, к Нему́́же тща́шеся, низоре́вностных небрегли́ есте́.
Заре́ю Трисия́ннаго Божества́́ просвеще́ни, непобедимии мученицы,/ многобо́жное преле́стное безбожие и мучителей страх отри́нуша;/ и ны́не нетленныя наслажда́ются сладости ра́йския.
Тече́ние доброе соверши́вше, благочести́ву же веру сохрани́ти потща́вшеся,/ недви́жимое прияти сподо́бистеся Царствие, преславнии мученицы,/ венце́м добро́ты и благолепия увязе́ни.
Богоро́дичен: О па́че ума чудес Твоих! Божие бо Слово, плоть бывшее,/ Едина родила́ еси́ преесте́ственно, Ма́ти Де́во,/ всяческая Боже́ственным хоте́нием содержа́щаго му́дре и окормля́юща.
Свети́лен.
Подо́бен: Учеником:
Светоза́рную дво́ицу страстоте́рпец, Сергия и Вакха, похва́лим:/ ран бо стремле́ния претерпе́ша/ и гордыню низложи́ша всезло́бнаго мучителя Троическою силою.
Богоро́дичен: Херувим яви́ся сла́внейши/ и Серафим показа́ся вы́шши, я́ко Бо́га рождши воплоще́нна,/ земны́м же показавша стези́ правыя наступа́ти, ко спасению приводя́щия.
На хвалитех стихи́ры на 4, самогласны, глас 1. Ге́рманово:
Дави́дски вопия́ху Се́ргий и Вакх мученицы:/ се ны́не что добро́ или что красно́,/ но е́же жи́ти братии вку́пе,/ не связу́еми естества́ любовию, но веры нра́вом./ Темже святии врага попра́ша,/ и, крест взе́мше, Христу́ после́доваша,/ и мо́лятся Царю и Бо́гу/ дарова́ти душа́м нашим ве́лию ми́лость.
Глас 4:
Проро́чески святым, соше́дшеся, песнь возопии́м:/ се ны́не что добро́ или что красно́,/ но еже пребывати братии вку́пе,/ не сро́дства после́дством,/ но веры совокупле́нием Свята́го Духа,/ тле́нная бо отверго́ша вся,/ взе́мше крест на ра́мена,/ и после́доваша Христу́ Сергий и Вакх, до́блии мученицы./ На Небесех же дерзновение иму́щи,/ молятся всегда о нас дарова́ти нам ве́лию ми́лость.
Обу́выйся Сергий/ во угото́вание Ева́нгельскаго мира гвозде́й обуве́ния,/ кро́вию от ног теку́щею,/ зми́я, наблюдающаго пя́ту нашу, ослепи́/ и свидетельства венец прия́./ Тем моли́твами их, Христе́́ Боже,/ пригвозди́ стра́ху Твое́му пло́ти на́ша и помилуй нас.
Сла́ва, глас 3:
Коль добро́ и коль красно́,/ самобра́тная мысль мученик Твоих, Го́споди,/ ихже бо естество плотско́е братий не сотвори́,/ сия́ вера братолю́бная му́дрствовати до кро́ве сотвори́./ Тех моли́твами, Христе́́ Боже, помилуй нас.
И ны́не, Богоро́дичен или́ Крестобогоро́дичен.
Подо́бен: Ве́лия мученик:
Оружие се́рдце твое́ про́йде, Пречистая,/ егда Сы́на Твоего́́ на Кресте́ видела еси́ и вопия́ла еси́:/ небезча́дну Мя покажи́, Сы́не Мой и Боже Мой,/ соблюды́й Мя по рождестве Де́ву.
На стиховне Окто́иха. Сла́ва, святых, глас 2.
Анато́лиево:
Ви́дящи дре́вле Церковь Бо́жия/ ваша подвиги, мученицы всеми́рнии,/ днесь све́тло украшается/ и верно пра́зднует в памяти вашей,/ я́ко у́тварь царскую, нося́щи срамоту́,/ на Божественныя ваша вы́я наложе́нную руга́тельне;/ еюже славы сподо́бистеся Небесныя/ и безконечнаго блаженства.
И ны́не, Богоро́дичен или Крестобогоро́дичен:
Подо́бен: Егда́ от Дре́ва:
Егда Нескве́рная А́гница/ виде Своего́ А́гнца,/ на заколе́ние, я́ко человека, волею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, рождшую Тя./ Что сие сотворил еси́, Изба́вителю всяческих?/ Обаче воспева́ю и сла́влю/ Твою́, юже па́че ума и слова,/ кра́йнюю благость, Человеколюбче.
НА ЛИТУРГИ́И
Блаженны Окто́иха и святы́х песнь 3-я на 4. Проки́мен, глас 4: Святым, и́же суть на земли Его́, удиви́ Господь вся хоте́ния Своя в них. Стих: Предзре́х Го́спода предо мно́ю выну, я́ко одесную мене́ есть, да не подви́жуся. Апостол ко Евреом, зача́ло 330. Аллилу́ия, глас 2: Се ны́не, что добро́, или что красно́, но еже жи́ти братии вку́пе. Ева́нгелие от Луки, зача́ло 106. Причастен: Ра́дуйтеся:
Преподобнаго отца на́шего Се́ргия Обно́рскаго, Волого́дскаго чудотворца, ученика преподо́бнаго Се́ргия Ра́донежскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Егда́ вслед Бо́га возгоре́ся духом, преподо́бне,/ тогда, я́коже древле Авраа́м праведный,/ уме́ты вмени в мире сущая/ и, отечество свое, Святую Го́ру, оставив,/ преселися в страну Богопросвеще́нную,/ идеже обрете великаго свети́льника преподо́бнаго Се́ргия,/ емуже и последова,/ Христу́ Бо́гу угоден был еси́,/ Егóже моли, блаже́нне Се́ргие,/ спасти́ и просветити души на́ша.
Егда любы Бо́жия воспали́ душу твою́́, премудре,/ тогда мира красоты́ отве́ржеся, пребога́те,/ и удалися в пусты́ню дальную,/ идеже на высоту взы́де добродетелей,/ пресветлое светило показа́ся ми́рови,/ озаряя весь мир чудесными сия́нии,/ о нем же моля Христа́ Бога/ стадо твое́ сохранити от напа́стных нахождений,/ и спасти́, и просветити души на́ша.
Егда Христовым желанием уязви́ся, Се́ргие,/ тогда плотска́я мудрова́ния обузда́в, блаже́нне,/ Христу́ последова невозвратным по́мыслом,/ в пусты́ню вселися, в нейже подвизася,/ плоть свою покори ду́хови/ и ученик стадо собра, Христу́ привел еси́,/ Eгoже моли́ спасти́ и просветити души на́ша.
И́ны стихи́ры, глас 2.
Подо́бен: Киими похвальными:
Ки́ими похвальными песньми восхвалим преподо́бнаго,/ теплаго рачи́теля,/ Боже́ственных А́нгел собеседника, и бесо́м прогонителя,/ и преподобным и праведным единокро́вника,/ и о нас молитвенника нело́жна, и хода́тая непреста́нна,/ те́мже Ему о нас прилежно моли́ся/ поми́ловати души на́ша.
Ки́ими блаженными хвалами ублажим блаженнаго,/ ублаже́ннаго Богом преподо́бнаго Сергия,/ дивнаго в чудесе́х, источника Боже́ственных даров неизреченных,/ прехвальнаго в терпении,/ столпа непреложнаго,/ Божественнаго Христова рачи́теля,/ молящася Го́сподеви,/ да́рующаго душам нашим смирение и велию ми́лость.
Ки́ими смиренными устна́ми воскли́кнем святому/ и псало́мски воспле́щем духовными руками,/ Христов яре́м, имя возложшему/ и стопам преподо́бнаго Сергия последовавшему,/ похвале земли нашей Российстей,/ церковному украшению,/ иноком удобрению вку́пе и утверждению,/ предстателю сущим в беда́х и ско́рбех,/ путешествующим прави́телю,/ сирота́м и обидимым заступника и больным врачу безмездну,/ молящуся Господу о душах на́ших.
Сла́ва, глас 8:
Преподобне и Богоблаже́нне о́тче Се́ргие,/ воистину уподобися Божественныя жизни,/ постом и бдением изнуряя свою плоть,/ и благими делы образ бысть иноком./ Аще бо и телесный язык умолче́,/ но чудеса́ твоя́ свидетельствуют о предстательстве твое́м,/ лю́дие бо, чтуще честну́ю па́мять Твою́,/ велегласно прославляют прославльшаго тя Го́спода,/ Емуже моли́ся непрестанно/ дарова́ти православным христиа́ном на враги одоление,/ и вселе́нней смирение,/ и душам нашим велию ми́лость.
И ны́не: Царь Небесный:
Та́же вход. Проки́мен дне.
Паремии преподобническия.
Прему́дрости Соломоновы чтение (главы́ 5 и 6):
Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.
Прему́дрости Соломо́новы чтение (глава́ 3):
Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.
Прему́дрости Соломо́новы чтение (глава́ 4):
Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.
На лити́и стихи́ры, глас 6:
Блажен еси́ воистину, о́тче Се́ргие,/ я́ко истинным постом плоть свою умертви́л еси́,/ душу же оживотвори́л еси́,/ с веселием и радостию по стопам Владыки Христа́ ше́ствовавый/ и узкий путь и прискорбный изво́ливший./ Темже пространства о́наго Небе́снаго насле́дствовавый,/ и со Христом царствуя в безконечныя веки,/ и со А́нгельскими лики веселяся,/ с ними же о нас прилежно моли́ся/ помиловати души на́ша.
Преподобен еси́, Богоно́се Сергие,/ любве́ ради Христовы вся оставил еси́,/ красоту́ тлеющую и богатство мира сего нивочто́же вмени́в,/ в пусты́ню вселися безмолвную и многoжеланную,/ в ней же, простираяся простирании Боже́ственными,/ безплотных враг победил еси́/ и никакоже тех устраша́яся злоковарств и устраше́ний./ Аще бо и многа́жды на тя подвизающе/ злонравных человек устремле́ния,/ хотяще тя изгнати от свята́го места сего,/ ты же тех моли́твами победи,/ Христу́ моля́ся непрестанно/ спасти́ся душам нашим.
Верою и любовию, о празднолюбцы,/ сошедшеся днесь, псалмы и песньми восхвалим,/ той бо на земли сей человек Небесный показася и земный А́нгел,/ в пустынях и горах со зверьми живяше,/ взыская Го́спода своего́ день и нощь,/ Егóже обрете доброде́тельми своими,/ освящен дом Пресвята́го Ду́ха соде́яся,/ от Него же возсия, я́ко пресветлое солнце,/ чудесными сия́нии просвещь весь мир,/ к немуже возопие́м:/ о всенепорочная душе,/ я́ко имея дерзновение к Бо́гу,/ моли́ спасти́ся душам нашим.
Сла́ва, глас 6:
Приидите правоверных собори,/ и́ночествующих множества,/ днесь благочестию подражателя, Се́ргия,/ пеньми и песньми восхвалим, к нему глаголюще:/ радуйся, пресла́вне о́тче Се́ргие, отечеству пресветлый свети́льниче;/ радуйся, я́ко чисте́йшему Све́ту совоку́плься;/ ра́дуйся, Тро́ице предстоя со А́нгелы,/ Ю́же моли́ непрестанно/ дарова́ти православным христиа́ном на враги побеждение,/ и ми́ру смирение,/ и душам нашим велию ми́лость.
На стихо́вне стихи́ры, глас 1.
Подо́бен: Небе́сных чино́в:
Я́ко в зерца́ле пресветле,/ душевным свои́м оком взираше к будущему,/ Бо́гу скорбным путем и тесным шествоваше,/ слезами своими землю омака́ше,/ я́ко финик, процвете во дворех Боже́ственных,/ моли́ся о и́же творящих пресвятую па́мять Твою́.
Стих: Честна́ пред Го́сподем/ смерть преподо́бных Его́́.
К Бо́гу все свое́ желание умное,/ преподо́бне, простерл еси́/ и сего ради не дал еси́ сна свои́ма очи́ма,/ ни веждома дремание,/ тем орга́н бысть Святому Духу,/ подавая тобо́ю всем исцеления,/ приходящим к тебе́ с верою.
Стих: Блаже́н муж, боя́йся Го́спода,/ в за́поведех Его́́ восхо́щет зело́.
Ре́вностию духовною уязви́ свою́ ду́шу,/ святы́х А́нгел житию́ на земли подражал еси́/ и на страсти телесныя подвизался еси́,/ мужественне плоть свою покорил еси́ ду́хови/ и сего ради наставник бысть и́ноком,/ Се́ргие преподо́бне,/ моли́ Христа́ Бо́га спасти́ души на́ша.
Сла́ва, глас 8:
И́нок множество наставника тя чтим, о́тче Се́ргие,/ тобо́ю бо стезю право ходи́ти познахом,/ блажен еси́, я́ко, Христови работав,/ и вражию разруши́л еси́ си́лу,/ А́нгелом собеседниче/ и преподобным единокровне и праведным,/ с ними же моли́ся Го́сподеви помиловатися душам нашим.
И ны́не, Богоро́дичен: Безневе́стная Де́во:
Тропа́рь, глас 8:
Желанием духовным разгара́шеся, пребога́те,/ слез твои́х течением душу свою напои́л еси́/ и еже из глубины́ воздыхании уязвля́ше се́рдце свое,/ и бодренными моли́твами, и всено́щным предстоянием Влады́це Христу/ многодоброде́телен плод принесе́ сам себе./ И сего ради я́ко Божий уго́дник све́тло ми́ру показа́ся,/ сия́я чудесы́, Сергие о́тче наш,/ теплый моли́твенниче к Бо́гу, всегда о нас Того моли́,/ да спасет души на́ша.
Сла́ва, и ны́не: И́же нас ради:
НА У́ТРЕНИ
По 1-й кафизме седа́лен, глас 1:
Наста днесь светоносная па́мять преподо́бнаго Сергия,/ приидите, ве́рнии, дави́дски воскликнем,/ Божественными песньми воспои́м блаженнаго,/ да прии́мем от него дары нетленныя,/ ибо он благоухает безсмертием,/ душам источает нетление, телесем подает здравие,/ моляся непрестанно о душах на́ших.
Сла́ва, и ны́не, Богоро́дичен:
Тя песньми немолчными ублажаем, Де́во,/ я́ко от Тро́ицы Единаго родила еси́, Богоро́дице,/ и но́сиши на Божественную руку́ пребогатое Слово непременно и неизменно,/ Едина Благословенная.
По 2-й кафизме седа́лен, глас 4-й:
Преподобне о́тче Се́ргие,/ от юности возжелав Богови и сего ради удалився,/ бе́гая, водворися в пустыню,/ в ней же основание добродетелем на камени наздал еси́,/ душу же свою непорочну соблю́л,/ Христу́ предложил еси́, соверши́в, яже Тем заповеданная,/ и сего ради Ду́хом Святы́м наставляем,/ ученик стада́ собра,/ научив их чтити Троицу Единосущную.
Сла́ва, и ны́не, Богоро́дичен:
Херувим и Серафим превыше еси́, Богоро́дице,/ Небеси и земли пространнейше,/ и видимыя же твари и невидимыя явися преимуще и неразсудным разсуждением,/ Егóже бо пространствия Небес не вмещают,/ в Своем чреве вмести́ла еси́, Чи́стая,/ Eгoже моли́ спасти́ся рабом Твоим.
По полиелее седа́лен, глас 8.
Подо́бен: Повеленное тайно:
Возгнуша́вся маловременныя славы красоты мира сего,/ смирением же и нищетою Христу́ последова,/ многи болезни, и скорби, и напа́сти во внутренней пусты́ни сей подъял еси́/ и сего ради всяку добродетель Божественную в души́ собра,/ моли́твами же и пощением Го́сподеви приближися,/ от Негoже и по кончине нестаре́емую благода́ть восприял еси́,/ во гробе бо лежа́, я́ко жив, чудеса́ твориши непрестанно,/ прогоняеши духи и исцеляеши неду́ги/ с верою приходящим и припа́дающим к тебе́,/ Богоблаже́нне Сергие,/ моли́ Христа́ Бо́га согреше́нием оставле́ние дарова́ти чтущим святу́ю па́мять твою́́.
Сла́ва, и ны́не, Богоро́дичен:
Я́ко Всенепоро́чная Невесто Творцу,/ я́ко Неискусому́жняя Ма́ти Изба́вителя,/ приятелище я́ко сущи Уте́шителя, Препетая,/ беззаконию мя суща скверно жилище и бесом игралище бывша,/ в разуме потщися и сих злодействия мя избавити,/ светло жилище доброде́тельми соделавши,/ светоприе́мнице нетленная,/ разжени о́блак страсте́й,/ Вы́шняго прича́стия сподо́би/ и Све́ту Невечернему моли́твами Своими.
Степе́нна, первый антифо́н 4-го гла́са. Проки́мен: Честна пред Го́сподем: Стих: Что воздам: Вся́кое дыха́ние: Ева́нгелие от Матфе́я, зача́ло 53.
По 50-м псалме́ стихи́ра, глас 6:
Приидите, празднолюбцы, сошедшеся днесь,/ песньми и похвала́ми воспоем блаженнаго:/ и́ноком наставника, отцем похвалу,/ источника исцеле́нием, ве́рным заступника велика,/ бесо́м потребителя, страсте́м искоренителя,/ светильника пресветлаго, чудотворца великаго./ К нему возопие́м:/ о всечестне Сергие преподо́бне,/ непрестай моляся Христу́ Бо́гу/ спасти́ся душам нашим.
Канон Богоро́дице на 6, Многими содержим:
Кано́н преподо́бному на 8, глас 8.
Песнь 1
Ирмо́с: Воду прошед я́ко сушу/ и египетскаго зла избежав,/ изра́ильтянин вопия́ше:/ Изба́вителю и Бо́гу на́шему пои́м.
Воду страсте́й моих изсуши, Боже,/ источник безстрастия излия души моей,/ и дай же пети чистою душею и устнами Твоего́́ преподо́бнаго Сергия,/ я́ко да пою присно:/ Изба́вителю Бо́гу на́шему пое́м, я́ко прославися.
Любовию Христовою уязвися, Сергие преподо́бне,/ вслед Того усердно от души последовал еси́,/ восприя житие А́нгельское, поя Бо́гу:/ Изба́вителю Бо́гу на́шему пое́м, я́ко прославися.
Утверди весь помысл в Боже́ственная запове́дания,/ житейских молв отвергся, в пустынех скитался,/ преподобному Павлу собеседник, блаже́нне, бысть,/ с ним пояше:/ Изба́вителю Бо́гу на́шему пое́м, я́ко прославися.
Богоро́дичен: Уста́ви неуста́вное смуще́ние помышле́ний моих, Богоро́дице Де́во,/ и́же Сыну Твое́му направля́ющих движения, и сердечную болезнь утоли́ воспева́ющих:/ Изба́вителю Бо́гу на́шему поем, я́ко прославися.
Другий кано́н, глас 2.
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ Вопло́щшееся же Сло́во всезло́бный грех потреби́ло есть,/ препросла́вленный Господь, славно бо просла́вися.
Тленная яже на земли оставив, востече́ к Небе́сным обителем,/ Престо́лу всех Владыки предстои́ши,/ Емуже о нас моли́ся, преподо́бне Сергие, восхваляющих при́сно па́мять твою́́.
От ю́ности Бо́гови освятися, преподо́бне,/ и к Нему́ приближаяся доброде́тельми, полки́ бесо́вския потребил еси́,/ но и ны́не отгоня́еши нечистыя ду́хи от человек, молящихтися с верою.
Я́ко крин, в пустыне Дави́дски процве́л еси́, преподо́бне,/ оби́тель яви́ся Пресвятому Духу и сего ра́ди славна показа тя вселенней,/ у Негoже нам испроси́ оставле́ние прегрешением нашим, тя, преподо́бне, восхваляющим.
Богоро́дичен: Всесвятая Богоро́дице, Соде́теля и Спаса всех рождши, поющим Тя,/ спаси́ град Свой и оби́тель Свою,/ не престай моля́щи за ны Сы́на Своего́ и Бо́га нашего.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ты, преподо́бне, нача́ло премудрости прием, страх Божий,/ и сего ради положи́ в души своей основание доброде́тели/ и на сем основании утверди́ вся помышления, Го́сподеви вопия́ше:/ поет Тя дух мой.
Мудрованием до́льним высоту и смирение возлюбил еси́/ и на гору безстрастия взыде,/ умертвив душетленныя страсти.
В предстоянии ти молитвеннем бодро имея душе́вное свое́ око,/ во еже прозирати грядущая, я́ко настоящая,/ сего ради сказова́ше собеседнику своему́, преподобному Павлу, хотящая ему по́слежде быти.
Богоро́дичен: Премудрость и Слово о́тчее несказанно родила еси́, Богоро́дице,/ души моей лютую язву исцели/ и сердечную болезнь утоли.
Ин
Ирмо́с: Процвела есть пустыня, я́ко крин, Го́споди,/ языческая неплодящая Церковь/ пришествием Твоим,/ в нейже утвердися мое сердце.
Я́ко фи́ник, процвете во юдо́ле плаче́вне,/ в месте, идеже источники слез проливая,/ возраста́я Ду́хом Святы́м,/ от Него же незави́стная чудеса́ подаваеши нам.
Не восхоте́ славы сия́ тленныя, но взыску́я Небесныя/ и сего ради оставль вся, в пустыню вселися,/ постом и моли́твами угождаше Бо́гови/ и сего ради прият от Него нетленную почесть трудов своих.
Тесный и прискорбный путь на земли ше́ствовавше, Богомудре,/ простра́нствия онаго Небе́снаго достигл еси́,/ отнюдуже с верою приходящим ти источаеши чудеса́ преславная.
Богоро́дичен: Спасение Тя на вся́ко время и место призываю,/ не пре́зри мене́, Всенепоро́чная,/ Яже Бо́га рождшая, Изба́вителя, вку́пе и Спаса моего.
Седа́лен, глас 4:
Житейских молв удалися в пустыню, Го́спода, избавльшаго тя от лют, преподо́бне, при́сно чая,/ и Тому прилепися, жизнь А́нгельскую на земли поживе́ с плотию/ и сего ради приял еси́ нестареющееся блаженство,/ в немже ны́не водворяяся, поминай нас, чту́щих пресвятую па́мять твою́́.
Сла́ва, и ны́не, Богоро́дичен:
Пречи́стеи руце Твои, Богоро́дице, Де́во Мати, просте́рши,/ покрый уповающия на Тя, Сыну Твое́му зовущия,/ всем же подай милости Твоя́.
Песнь 4
Ирмо́с: Услы́шах, Го́споди,/ смотре́ния Твоего́́ та́инство,/ разуме́х дела́ Твоя́/ и просла́вих Твое́ Божество.
Вменя́ше в се́рдцы́ своем, еже при́сно прилепля́тися Бо́гови благо есть,/ и сего ради на безмолвия по́прище прии́де,/ в немже при́сно с Богом пребывая, вопияше:/ си́ле Твое́й сла́ва, Человеколюбче.
В пустынном озлобле́нии и скорбех зело обрета́яся, прибежище и си́лу имеяше Бога,/ те́мже на Того возложи́ упование,/ вся победил еси́ творя́щая ти напасти, блаже́нне.
Желающу ти, преподо́бне, во дворы́ Госпо́дни скончати жизнь свою,/ день и нощь в моли́твах и во бде́ниих не даде покоя телеси своему́,/ дóндеже достиже присножелаемаго ти блаженства.
Богоро́дичен: Просвети мя, Влады́чице, заря́ми милости Твоея́,/ и́же во тьме прегрешений моих сущи, Деви́це,/ и к свету покаяния настави мя, молюся,/ и спасе́ние жизни испроси у Христа́ Бо́га нашего.
Ин
Ирмо́с: Пришел еси́ от Девы не ходатай, ни А́нгел,/ но Сам, Го́споди, воплощся,/ и спасл еси́ всего мя человека./ Тем зову Ти: сла́ва си́ле Твое́й, Го́споди.
Я́ко птищ, обрете себе пусты́ню безмолвия,/ в нейже подвизася, в слезах и умилении препроводи жизнь свою,/ те́мже свету и радости о́ноя сын бысть, моли́ о чту́щих тя.
Я́ко жив, с нами водворяяся,/ тако и ны́не, с преподобными Влады́це предстоя,/ моли́ избавитися всем всякаго гнева, и прещения,/ и будущаго грешных томления.
Стадо, еже стяжа́ труды своими, отче,/ не остави, но посещай я́ко отец чадолюбив,/ всем же, притекающим к чудотворным твои́м моли́твам,/ подаждь согреше́нием разрешение.
Богоро́дичен: Евина клятва упразднися Тобою, Богомати Всенепоро́чная,/ Воплоще́нно Слово родила еси́ Присносу́щное,/ И́же благословеньми мир венчавшаго.
Песнь 5
Ирмо́с: Просвети нас повелении Твоими, Го́споди,/ и мышцею Твое́ю высокою,/ Твой мир подаждь нам,/ Человеколюбче.
В моли́твах и во бде́ниих прилежа́ Богови/ и сле́зными источники тело с душею Чистому представил еси́,/ тем и по смерти твое́й сподо́бися Небесных дарований.
Обре́т тя равноангельна, преподо́бне Павле,/ во внутренней пустыни кры́ющася, сподру́г твой и собеседник Сергий преподобный,/ тем вку́пе и подвиза́стася, и клевре́та быста ближняя.
Облекся во Христово смирение и, я́ко я́гня незлобиво, Тому принесе себе,/ тем и землю кротких наследова,/ идеже водворяяся, сла́виши Го́спода.
Богоро́дичен: Спасение Тя на вся́ко время и место призываю,/ не пре́зри мене, Всенепоро́чная,/ Яже Бо́га рождшая, Избавителя вку́пе и Спаса моего.
Ин
Ирмо́с: Ходатай Бо́гу и человеком был еси́, Христе́́ Боже;/ Тобо́ю бо, Влады́ко, к Светоначальнику Отцу́ Твое́му/ от но́щи неве́дения/ приведе́ние и́мамы.
Ум свой к Бо́гу впери́в, вся, яже на земли сущая, преоби́дел еси́/ и сего ради, водворяяся ны́не во обителех Небесных,/ подавай нам при́сно спасе́ние и избавление,/ да вси тя, блаже́нне, воспеваем присно.
Светлость жити́я твоего, преподо́бне Се́ргие, всех просвещает,/ слепым прозрение, хромым течение дарует,/ всем же, празднующим пресвятую па́мять Твою́, от грех разрешение.
Потоки сле́зныя гаси́ло стяжа стра́стных разгорений,/ огнем же любве́ Бо́жия росе́ совокупи́ся безстрастия,/ Христу́ Бо́гу нашему,/ Емуже непрестанно о нас моли́ся, подавай нам велию ми́лость.
Богоро́дичен: Се во чреве, Богоро́дице Пречистая,/ Христа́ Бо́га па́че слова имела еси́, я́коже Исаия предъизрече́,/ па́че естества́ бо Сего, Богородительнице, родила еси́.
Песнь 6
Ирмо́с: Моли́тву пролию́ ко Господу/ и Тому возвещу́ печа́ли моя,/ я́ко зол душа моя испо́лнися,/ и живо́т мой а́ду прибли́жися,/ и молю́ся, я́ко Иона:/ от тли, Боже, возведи́ мя.
Званию Христову после́дова и, Того святое иго на себе взем,/ вечный покой постиже,/ иде́же празднующих глас безконечный и непрестающая радость,/ еже уготова Бог любящим Его́ повеления.
Го́рлица пустыннолю́бная был еси́ в жизни сей, блаже́нне,/ безпрестанныя слезы точа́щи, взыскал Го́спода своего́ день и нощь,/ Егóже обрете, ны́не всякаго вреда лукаваго избавля́й пою́щих тя.
Благода́ть твоя́, преподо́бне Се́ргие,/ благоухает арома́ты Боже́ственных дарований,/ свет благоче́стия испущает верным.
Богоро́дичен: Без семени заче́нши Бога,/ Зиждителя естеству нетленно родила еси́,/ Того моли, Богомати, спасти́ся нам.
Ин
Ирмо́с: В бе́здне грехо́вней валя́яся,/ неизсле́дную милосе́рдия Твоего́́ призыва́ю бе́здну:/ от тли, Боже, мя возведи́.
От ю́ности, блаже́нне, имел еси́ житие свое́ чисто и того ради Пречистому Влады́це прилепи́ся,/ предстои́ши ны́не со А́нгельскими лики,/ при́сно источа́еши преславная чудеса́ и исцеления/ с верою приходящим к тебе́.
Всякаго навета вражия избавити потщися,/ я́ко да твою́́ всесвяту́ю па́мять светло празднуем.
В пустыни безмолвия единствующу ти, Богоносе,/ лукавый враг злонравных разбойник на тя воображает, хотя изловити Боголюбивую твою́́ душу,/ Бог же внят молитве твое́й/ победити того и ловления его.
Богоро́дичен: Во утробу Твою́ вселися/ и, все человеческое существо восприим, обожи́, Чи́стая,/ преподобных множество священное привлече́.
Конда́к, глас 8
Подо́бен: Взбранной:
Я́ко звезда пресветлая, от Святыя Горы провозшедши,/ добро́ты чудес твои́х весь просветил мир,/ Христов бо крест взем, последова Ему,/ в пустынном озлобле́нии, в моли́твах же и пощениих,/ во бде́ниих же и злостраданиих изнурив плоть свою,/ тем и Христос даром чудес одари́ тебе́,/ Емуже о нас моля́ся, посещай чад своих, да зовем ти:/ радуйся, Сергие о́тче наш, пустынный жителю.
И́кос:
Закону Божию повину́яся, от младе́нства путем прискорбным, блаже́нне, шествовал еси́,/ вся бо, яже в мире сладкая и красная, преобидев, вселися в пустыню,/ в ней же крест свой взят, распя себе ми́рови, и мир тебе́ бысть ра́спят./ Темже от всех слышаще:/ радуйся, я́ко презрел еси́ текущая и тленная;/ радуйся, я́ко, Богом наставляем, пустыню достигл еси́;/ радуйся, я́ко в Нем подвизався, Бо́гу угодил еси́ и врага победил еси́;/ радуйся, я́ко собра ученик ста́до, имиже и доны́не Бог прославляем есть;/ радуйся, я́ко пресве́тлым житием свои́м святы́х А́нгел удиви́ и человек по́льзова;/ радуйся, я́ко на Небеси со А́нгелы ликовствуе́ши, Троице предстоя, и о нас мо́лишися;/ радуйся, источниче чудесем неисчерпаемым;/ радуйся, Сергие о́тче наш, пустынный жителю.
Песнь 7
Ирмо́с: Бо́жия снизхожде́ния/ огнь устыде́ся в Вавилоне иногда́,/ сего ради о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благословен еси́, Боже отец на́ших.
В черто́зех Небесных водворяяся,/ одежду светови́дну нося́ и мно́гими доброде́тельми преукрашену,/ моли́ обрести нам ми́лость, поющим:/ отец на́ших Боже, благословен еси́.
Лучших по́мыслом плоти вне быв, преподо́бне,/ страсти удержав и бе́сом шата́ния разори́,/ и ны́не, с преподобными всеми в Небесных селех живый,/ вся чтущая тя спасай.
На горах добродетелей, я́ко еле́нь, пребывая,/ ко Христу́ Камени неотторжено прирази́ся,/ у Него же ро́су прие́м устуже́ний духовных желаний.
Богоро́дичен: Телесныя болезни и душевныя грехи, Богороди́тельнице,/ прилежно приступающим к крову Твое́му исцели́ти сподо́би,/ Яже нам Спаса Христа́ рождшая.
Ин
Ирмо́с: Богопроти́вное веле́ние беззако́ннующаго мучи́теля/ высо́к пламень вознесло́ есть,/ Христос же простре́ Богочести́вым отроко́м ро́су духо́вную,/ Сый благословен и препрославлен.
Сердце стяжа́в чисто, вмести́лище бысть Свята́го Духа,/ и сего ради многоцеле́бныя ти мощи святыя/ источник исцелений изливают поющим:/ отец на́ших Боже, благословен еси́.
Молитвенника Ти, Владыко, приводим преподо́бнаго Сергия,/ тем просяще от грех свободи́тися/ и Твоим всеору́жием сохране́ным бы́ти от наве́т вражиих.
Плотско́е взыгра́ние воздержа́нием увяди́л еси́, блаже́нне,/ тем пастырь показа́ся Боголюбе́знаго ти ста́да,/ о немже не преста́й моляся Христу́ Бо́гу.
Богоро́дичен: Святых Свята́го, И́же во святы́х Почивающаго, свято породи́ла еси́, Де́во Всенепоро́чная,/ за милосердие многое Человека бывша,/ из Тебе́ воплощенна прежде Безплотнаго.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ силою же лучшею спасе́ны сия́ ви́дев,/ Творцу и Изба́вителю вопия́ше:/ о́троцы, благословите,/ священницы, воспо́йте,/ лю́дие, превозноси́те во вся ве́ки.
Любовию, еже ко Христу, распала́емь,/ усердно вся, яже в пусты́ни сей, скорбная ше́ствия претерпе́л еси́/ и бесо́в лю́тая устремле́ния вся победив,/ тем и достойным венце́м от Бо́га венча́ся,/ с преподобными ликовству́я, пое́ши:/ Го́сподеви пойте и превозноси́те Его́ во веки.
Плотско́е мудрова́ние, о́тче Се́ргие, умертви́л еси́/ и сего ради на Небесех со А́нгелы жи́ти сподо́бился еси́,/ идеже святы́х собо́ри ликовству́ют, непрестанно поюще с тобою:/ Го́спода пойте и превозноси́те Его́ во веки.
Сле́зным тече́нием просвети́л еси́ душу,/ очистив ум свой от страстных приложений,/ Пресвятыя Троицы дом показа́ся, с ли́ки святы́х вопие́ши:/ Го́спода пойте и превозноси́те Его́ во веки.
Богоро́дичен: Умертве́ния ми плод, и́же дре́вле естеством рай,/ Жизни Ты Плод, Боже́ственный рай, Богоро́дице, процвела́ еси́,/ имже пита́яся, не ктому́ смерти порабоще́н буду.
Ин
Ирмо́с: В пещь о́гненную ко отроко́м евре́йским снизше́дшаго/ и пламень в ро́су прело́жшаго Бога,/ пойте дела́ я́ко Го́спода,/ и превозноси́те во вся ве́ки.
Твердым помыслом на ра́мо крест взем, последова Христу́ я́ко инок преблаг,/ и сего ради благода́ть твоя́ изливает преславная чудеса/ благоче́стно Христа́ славословящим, блаже́нне Сергие.
Утверждься крепостию Духа, всю вражию си́лу смирил,/ кре́пость и победи́тель быв,/ верных души просвещаеши Божественными чудесы и знаменьми.
Подвигом Божественным, отче, в пусты́ни подвизася/ и сего ради предлежит тебе́, преподо́бне, добраго делания венец,/ тем Христу́ моляся не престай о и́же верою чту́щих тя.
Богоро́дичен: Уныл имея помысл и душу, сластьми отягчену,/ к Тебе́ прибегаю, Богородительнице Чи́стая, вопию Ти:/ воздвигни и спаси́ убо мя, отчаяннаго и осужденнаго.
Песнь 9
Ирмо́с: Ужасе́ся о сем Небо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с,/ тем Тя, Богоро́дицу,/ А́нгелов и челове́к чинонача́лия велича́ют.
Взирании непрестанными, отче, и́же к Бо́гу, умертвил еси́ плоть, победил еси́ врага/ и ны́не преставися к Небе́сным обителем,/ идеже со А́нгелы Бо́гови предстоя, сла́виши Сего присно.
Стопам последовал еси́ преподо́бнаго Сергия,/ я́ко солнце возсиявшаго в России,/ егóже от Бо́га избавление стяжа́л еси́,/ с ни́мже ны́не Христови предстоиши, приемля богатыя дары.
Блаженства Божественнаго воистину сподо́бися, Богомудре,/ волею бо Обнищавшему нас ради последова,/ Егóже ради вся сущая в мире преобидел еси́,/ и сего ради Той прослави тя Божественными прославлении.
Богоро́дичен: Спаси́ мя, Ма́ти Бо́жия, Яже ми́рови Спасение рождшая,/ от многообразных ми нахождений,/ на Тя бо надежду спасения моего возложих верно, раб Твой.
Ин
Ирмо́с: Безнача́льна Роди́теля Сын, Бог и Господь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
На горы святы́х заповедей восте́к, я́коже Моисей древле,/ тем Христа́ зриши ны́не яве, я́ко и́же в купине он,/ отнюду источаеши нам, я́ко миро благода́тное, животворныя воды исцелений.
Манове́нием Боже́ственным удобряем, Сергие,/ страсти всякия бысть непричастен и безстрастием, я́ко во одежду, облечеся,/ тем и ны́не пречистому Све́ту причащаяся, поминай нас, верно блажащих тя.
Освященный сосу́де Христа́ Бо́га нашего,/ А́нгелом собеседниче и преподобным единокровниче и праведным,/ приими́ сие, и́же от недостойных уст приносимое,/ испроси от грех моих избавление.
Богоро́дичен: Светоносну дверь Тя предзрящи Иезекииль,/ Еюже про́йде Свет Истинный, Христос Бог наш,/ Егóже прилежно моли́, Чи́стая, покаяния ми дверь отверзти, молюся.
Свети́лен.
Подо́бен: Жены́, услы́шите:
Мирска́го веселия я́ко от скверны уклонился еси́,/ постом и моли́твами плоть увя́дил,/ души своей кре́пость, преподо́бне, обновил еси́,/ славою обогатился еси́ Небесною, славне,/ те́мже моля не престай о нас Го́спода.
Богоро́дичен: Воистину Тя, Богоро́дице, исповедуем, Влады́чице,/ и́же Тобо́ю спасшиися,/ и Бо́га неизреченно родила еси́, разоршаго Крестом смерть,/ к Себе же привлекши преподобных соборы,/ с ними же Тя восхваляем, Де́во.
На хвалитех стихи́ры, глас 8.
Подо́бен: О, преславнаго чудесе:
О, пресла́вное чу́до,/ преблаже́нне Се́ргие,/ я́ко от нетленна источника,/ от Тебе́ источаются преславная чудеса́ исцелений,/ приходящим ти с верою человеком,/ бесы прогоняеши и/ различныя неду́ги исцеляеши моли́твами,/ сшедшеся, любо́вию па́мять Твою́ почитаем.
О, пресла́вное чу́до,/ мно́гими ле́ты землею покрове́но бысть святое тело твое́/ и забвено бысть на долго время/ неизреченными судьбами Божиими,/ по сих же убо я́ве сотвори тебе́,/ я́ко светильника вознесе тя/ на свещник благотворений человеческому роду,/ те́мже молим тя, преподо́бне Сергие,/ посещай нас, тя почитающих.
О, пресла́вное чу́до,/ по мнозех временех преставления твоего/ воистину, я́ко жив,/ являешися некоему иноку,/ повелеваеши ему возвести́ти настоятелю святыя ти обители,/ да потребит и очистит место святы́х твои́х мощей,/ он же, презрев твое́ явление,/ наказание прием своего́ ослушания,/ ты же того паки помилова,/ те́мже празднуем пресвятую Твою́ память.
Сла́ва, глас 2:
Пустыни, и́же прежде имущи жилище бесовская,/ ны́не же вселение бысть стаду ученик твои́х,/ собрание инок, веселящеся, украшается,/ в себе бо имея честныя мощи твоя́,/ освящается различными добро́тами живото́чных чудес твои́х,/ созывающе весь мир к высоте Божиих славословлений./ Темже, сошедшеся днесь,/ тебе́ предстояще, умильно вопиюще, молимся:/ Сергие преподо́бне,/ Христу́ предстояще, испроси́ Церквам единомыслие дарова́ти/ и православным христиа́ном на враги одоление,/ и ми́ру смирение,/ и душам нашим велию ми́лость.
И ны́не, Богоро́дичен:
Славословие великое.
На Литургии: Блаженны преподо́бнаго.
Преподобный Сергий Обнорский, Вологодский
Обре́тение мощей преподо́бнаго Мартиниа́на Белоезе́рскаго
Тропа́рь, глас 7:
От ю́ности, отче, избра́н и возлюблен был еси́ Господом Богом,/ Иже, прови́дя до́брое твое́ произволе́ние,/ научи́ тя приити преподобному уго́днику Своему́, Кириллу всеблаже́нному,/ от негoже наста́влен быв на путь спасения,/ в стра́се Божии и чистоте́ душе́вней,/ в благогове́нии же и непрестанных к Бо́гу моли́твах/ житие́ твое́ непоро́чно преше́л еси́/ и ны́не, со дерзнове́нием предстоя́ на Небесех Престо́лу Христову,/ о́тче Мартиниа́не всеблаженне,/ не преста́й моля Христа́ Бо́га спасти́ и помиловати души на́ша.
Конда́к, глас 8:
Благоизво́лив, преподо́бне,/ от юнаго возраста рабо́тати Го́сподеви день и нощь,/ в стра́се Божии и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же, злострада́ниих тело твое́ изнурив,/ вся доброде́тели духовныя испра́вил еси́/ и образ хотя́щим по тебе́ спасти́́ся явился еси́./ Темже ны́не, при́сно зря на Небесех Пресвятую Троицу,/ моли́ся, всеблаженне, дарова́ти душа́м нашим спасе́ние/ и житию́ на́шему исправле́ние,/ да вси верою вопие́м ти:/ радуйся, преподо́бне Мартиниа́не, о́тче наш.