9-й день

Свята́го апостола Иа́кова Алфе́ева. И преподо́бнаго отца́ на́шего Андрони́ка и жены его святыя Афана́сии

Свята́го праведнаго Стефа́на, де́спота Се́рбскаго

НА ВЕЧЕ́РНИ

Блажен муж: 1-й антифо́н. На Го́споди, воззва́х: стихи́ры апостола, на 8, глас 4

Подо́бен: Дал еси́ зна́мение:

Возсия́л еси́, апо́столе,/ светови́ден, я́ко солнце, зарями Духа/ и всю просветил еси́ вселенную, блаже́нне, Богознанием,/ и отгна́л еси́ мрак многобожный Боже́ственным пропове́данием,/ тем твое́ пресветлое и достохва́льное днесь совершающе торжество,/ благоче́стно тя сла́вим.

Возгремел еси́, премудре,/ вселе́нней учения священная и спаси́тельная/ и всю очистил еси́ идолонеи́стовства тварь, Богомудре,/ и просвети́л еси́ люди Богозна́ния сия́нием./ Идольская же тре́бища разоряя благода́тию,/ церкви на похваление Бо́га на́шего воздвигл еси́.

На высоте седяй Богозна́ния, Иа́кове,/ приял еси́ Ду́ха благода́ть,/ явльшуюся тебе́ огненным видом,/ и язы́ком огненным всю попалил еси́ я́ве злочестия ти́ну многобо́жную./ Тем тя, я́ко апостола и Богоглагольника, хвалим,/ святое твое́ днесь совершающе торжество.

Сла́ва, глас то́йже, самогласен. Феофа́ново:

Божественнаго Ду́ха я́ве благода́ть прием,/ священнейшему лику апостольскому причтен, Иакове, был еси́./ Тем и с Небес пришествие иногда́ сильное одохновение,/ огненным язы́ком просветив тя,/ языческое отерновле́нное попалил еси́ безбожие./ Христа́ Бога, Богопропове́дниче, моли/ спасти́ся душа́м нашим.

И ны́не, Богоро́дичен: И́же тебе́ ради:

Вход, прокимен дне, и чтения три, и лития, ищи́ сего месяца в 6-й день

На стихо́вне стихи́ры, глас 4.

Подо́бен: Дал еси́ знамение:

Приял еси́, апостоле, над демоны непобедимую власть и си́лу/ о Имени Христове/ начала тьмы сих отгони́ти;/ и прошел еси́ землю, просвещая, я́коже солнце, и вся страны́ научи́,/ первое, сла́вне, Христово пропове́дал еси́ спаси́тельное пришествие.

Стих: Во всю землю изы́де вещание их/ и в концы вселенныя глаго́лы их.

Пе́рвей благости и естественному, и пребожественному житию́ подо́бяся,/ муж был еси́ благ, Иа́кове, по существу/ и благода́ти Божественныя сын именуем,/ нравов твои́х благостию и ума чистотою/ Христов показался еси́ ученик и́скренний.

Стих: Небеса поведают славу Божию,/ творение же руку́ Его́ возвещает твердь.

Орга́н до́бре составлен Боже́ственным окормлением, апостоле Иа́кове, быв,/ язы́ков званию ты вве́рился еси́,/ к познанию Христову наставляя словесы́ и деянии,/ и вся просветил еси́, испове́дати истинное Иисусово Божество,/ Спаса душ на́ших.

Сла́ва, глас 5:

Верно торжествуем пречестны́й день/ твоея́ памяти, Иа́кове славне,/ не я́ко Алфе́ева тя сына, но я́ко апостола Христова почита́юще/ и проповедника Того неизреченнаго воплощения,/ тем Владычню Престо́лу/ со Безплотными всегда предстоя и апостол и мученик лики,/ прилежно моли́ся спасти́ ны Спаси́телю и Бо́гу нашему.

И ны́не, Богоро́дичен: Храм и Дверь еси́:

Тропа́рь, глас 3:

Апо́столе святы́й Иа́кове,/ моли́ Ми́лостиваго Бо́га,/ да прегрешений оставление/ подаст душам нашим.

Сла́ва, и ны́не, Богоро́дичен воскре́сен.

Преподобному Андрони́ку пое́м на повечерии

Тропа́рь, глас 1:

Пустынный житель и в телеси́ А́нгел и чудотворец показался еси́,/ Богоносне о́тче наш Андрони́че,/ постом, бдением, молитвою Небе́сная дарования приим,/ исцеляеши недужныя и души верою притекающих к тебе́./ Сла́ва Давшему тебе́ кре́пость,/ Сла́ва Венча́вшему тя,/ сла́ва Действующему тобо́ю всем исцеления.

Канон, глас 8

Песнь 1

Ирмо́с: Колесницегонителя фараоня погрузи/ чудотворяй иногда/ Моисейский жезл, крестообра́зно порази́в/ и разделив море,/ Израиля же беглеца́, пешеходца, спасе́,/ песнь Бо́гови воспева́юща.

Предочи́стив твою́́ душу, Андрони́че,/ до́блими доброде́тельми/ и Божественныя любве разжегся у́гльми,/ плотски́х уклонился еси́ распалений,/ ро́су бо Божественную свыше имел еси́,/ тя орошающую всегда.

Владычним повелением повинуяся,/ я́ко патриарх иногда Авраам, отче,/ твою́́ землю оставил еси́/ и сродники небрег;/ жены́ же и богатства дале́че быв,/ и в пустыню, блаже́нне,/ вселился еси́, уединя́ем.

Господню заповедь исполнил еси́,/ вся прода́в твоя́/ и нищим разда́в, имиже ку́плю би́сера обрел еси́ честна́го,/ и сей прием,/ обогатился еси́ обильно/ бога́тным ми́ров источением.

Богоро́дичен: Созидается волею во утробе Твое́й/ Адамов Содетель/ и дланию носяй, Богоро́дице, всяческая/ Твоими руками носи́тся, о страшнаго та́инства, и Младенец является,/ всех святы́х Господь.

Песнь 3

Ирмо́с: Утверждей в начале небеса разумом/ и землю на вода́х основа́вый,/ на камени мя, Христе́, заповедей Твоих утверди,/ я́ко несть свят, па́че Тебе́, едине Человеколю́бче.

Изгна́н от Еде́ма советом Евиным Адам,/ ты же, веровав совету сопру́жницы твоея́, му́дре,/ рая́ был еси́ внутрь/ и с нею радуешися всегда, блаже́нне Андрони́че.

Иже тайно и мудре устроя́я вся до́бре Слово и земныя ко спасению направля́я,/ от земли на Небеса/ любимыя преставляет дети ваша два,/ стезю́ праву являя вам.

О маловременней и тлеющей небре́гше любви,/ на земли́ сущим оста́вльше сию,/ связа́стеся любо́вию духовною, блаженнии,/ те́мже ны́не водворяетеся, идеже праведных селения.

Богоро́дичен: Безсосужде́нно Херувим и Серафим пребо́льши,/ Яже Бо́га несказа́нно Рождшая,/ и земным клятву на благословение преложившая,/ песньми всегда да почитается,/ Та бо наше упование.

Седа́лен, глас 8.

Подо́бен: Прему́дрости:

Иго Господне ле́гкое вседушно на ра́мена восприем,/ Тому после́довал еси́, Богоно́се Андрони́че,/ и мирских мяте́жей до́бре возненавидел еси́,/ в пустыню, блаже́нне, усердно вселься,/ идеже течение постническое, отче, без порока совершил еси́,/ Бо́гу совокупля́яся,/ сего ради вопие́м ти:/ моли́ Христа́ Бо́га грехов оставле́ние дарова́ти чтущим любо́вию святу́ю па́мять твою́́.

Песнь 4

Ирмо́с: Услышах, Го́споди,/ смотрения Твоего́́ та́инство,/ разумех дела Твоя́/ и прославих Твое́ Божество.

По́ты трудов твои́х, от плоти твоея́ ка́плющии, священнейше Андрони́че,/ в воню́ мира преложи́шася.

Я́коже фи́никс высокора́сленный, ты в пустынях, отче, процве́л еси́/ и Бо́гу плодоноси́л еси́ сладчайшия болезни трудов твои́х.

Сле́зными одожде́нии пустынную землю оросил еси́,/ плодоносну же яви́л еси́ душу твою́́ боле́зньми по́стническими.

Богоро́дичен: Не истощив Господь Отеческих недр,/ в Твою́ вселися утробу, Отрокови́це, пречистую,/ и мир весь обнови́.

Песнь 5

Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бог наш,/ разве Тебе́ иного не ве́мы.

Воспои́м Андрони́ка песньми вси ве́рнии/ и того сопру́жницу Афана́сию просла́вим.

Отнюд, я́коже есть пи́сано, не дал еси́ сна твои́ма очи́ма,/ ни дремания твои́ма ве́ждома, Андрони́че.

Прослави ми́ры тя Господь, блаже́нне,/ твоя́ труды восприемый,/ я́ко жертву су́щне благоприятную

Богоро́дичен: Единаго от Троицы родила еси́, Отрокови́це, страшно/ и млеко́м питала еси́ земных естество Питающаго.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многомилостиве Христе́́ Боже наш.

Естественная слабость ника́коже предложения притупи́,/ еже стяжа́ла еси́ к боле́знем, о преподобная, страдания.

Премени́вши одея́ние я́ве, естество утаи́ла еси́,/ тем несумне́нно путь спасения совершила еси́.

Уве́девши супруга твоего́ путьше́ствующа, емуже и последствовала еси́,/ ника́коже что к нему беседовавши.

Богоро́дичен: Глас Гаврии́лов тебе́, Отрокови́це, ны́не прино́сим:/ радуйся, Господь с Тобою, Благословенная, вопиюще Ти.

Конда́к, глас 4:

Благоро́дия нравом тя честно похва́лим, Андрони́че,/ и́же Господь в лик преподобным отцем сочета,/ я́ко вои́стинну благоро́дия Божественныя славы венец улучи́.

Песнь 7

Ирмо́с: Отроцы еврейстии в пещи́/ попра́ша пламень дерзнове́нно/ и на ро́су огнь преложи́ша, вопиюще:/ благословен еси́, Го́споди Боже, во веки.

Дре́вле хвалящагося безмерно злоначальнаго одержа́ти всю тварь,/ я́ко пти́чицу ху́ду, низложи́л еси́, силою защити́вся Ду́ха и Креста́ всеоружием.

Нося на ра́мех крест твой, последовал еси́ Господу вседушно/ и славы Его́ получил еси́ Божественныя, я́ко испо́лнитель, Андрони́че, Того за́поведей.

Являет благода́ть ми́ров еже ко Господу твое́ дерзновение,/ вода́м бо лия́нию подобится, на спасе́ние всегда верных пролива́ема.

Богоро́дичен: Да обожи́т мое естество́, Всесовершенный неизреченно младе́нствует,/ из Тебе́, Чистыя, происходит, И́же словом приведы́й всяческая, и содержа́, и укрепляя.

Песнь 8

Ирмо́с: Царя Небе́снаго,/ Егóже поют во́и А́нгельстии,/ хвали́те и превозноси́те во вся ве́ки.

Слезными струя́ми напои́в Твою́ душевную ни́ву,/ пожа́л еси́ еже от чудодея́ний воздаяние бога́тное.

Остру́пльшуюся душу мою согрешеньми/ молитв твои́х Боже́ственным врачева́нием сию исцели́, уго́дниче Госпо́день.

Тро́ичен:

Пребезнача́льную, ве́рнии, воспои́м благоче́стно Троицу Всесвятую,/ из не сущаго приведшую всяческая.

Богоро́дичен: Дании́л Тя прови́де, го́ру, Отрокови́це, несеко́мую,/ от неяже отсече́ся Камень, сокруши́вый хра́мы идольския.

Песнь 9

Ирмо́с: Вои́стину Богоро́дицу/ Тя исповедуем,/ спасеннии Тобою, Де́во Чи́стая,/ с Безплотными ли́ки Тя велича́юще.

Источаеши ми́ров благода́ть неистощимую/ и притекающим всем подае́ши верно неду́гов разрешение, о́тче Андрони́че.

Преложился еси́ от привре́менных, радуяся, к вышним и со отцы́ святыми вселився,/ нас, па́мять твою́́ творящих, отче, поминай всегда.

Приими́ мое пение, о дво́ице преподобных,/ и отдание ми подаждь твои́м к Бо́гу молением,/ прегрешений изба́вити мя.

Богоро́дичен: Прописа́ Твою́ утро́бу древле три о́троки не опали́вшая пещь, Отрокови́це Чи́стая,/ ибо неопа́льно прия́ла еси́ Огнь Божества́.

Стихи́ры, глас 6.

Подо́бен: Все отло́жше:

Все отложи́вше/ житейское томление/ и богатство возненави́девше,/ и сладость текущую презре́вше,/ крест взя́сте,/ я́ко иго Боже́ственное,/ и Христу́ после́довасте/ и к Небесному покою чудно вселистеся,/ в немже свеселя́щеся,/ поминайте нас, верою поминающих вы/ и любо́вию совершающих благоговейно/ священную и честну́ю па́мять вашу, святии.

Весьма возлю́бльшая Тебе́, Владыку, от души,/ во след Тебе́ потече́ дво́ица приснопамятная,/ и единосопру́жная,/ и вся красная, и ю́зу нерешимую, я́ко паучину, прето́рже,/ тем и получи Царствие Твое́, Безсмертне./ Тех убо моли́твами очищение, Щедрый, подаждь нам согрешений/ и яви́ ны вышшия страстей,/ смущающих нашу душу, Владыко, всегда.

Детей лише́ни бы́сте любезныя дружбы,/ по́двигом бо́льшим в житии пребывающе неуте́шни,/ глас испуща́сте до́блественнейший И́овль, взывающе:/ Господь даде́, Господь и паки взя,/ тем и желаемое вами дело удобно совершисте/ и к любезнейшим местом святым, радостно преходяще, яви́стеся,/ сопру́же священнейший.

Сла́ва, и ны́не, Богоро́дичен:

Ра́дуйся, ко́реню летора́сленный,/ радуйся, же́зле Боже́ственный Ааро́нов,/ прозябы́й цвет неувядающий,/ благопло́дный раю́,/ древо жизненное,/ от ко́рене Иессе́ева, Чи́стая, процве́тши, Отрокови́це,/ и земны́я кормя́щи хлебом разумным./ Ра́дуйся, багряни́це всечестна́я,/ всех Царя Богоневесто,/ увязе́ние светлое,/ архиере́ев благоле́пие./ Ра́дуйся, едина Пречистая.

Крестобогоро́дичен. Подобен то́йже:

А́гнца Своего́ А́гница Нескве́рная древле/ и Непорочная Владычица/ на Древе Кре́стнем я́ко узре́,/ ма́терски восклицаше и, дивящися, вопияше:/ Чадо Сладчайшее,/ что зрение сие новое и пресла́вное?/ како сонм безблагода́тный суди́щу Пила́тову предаде́ Тя/ и осуждает на смерть, Живота всяческих?/ но воспева́ю Твое́ неизреченное, Сло́ве, снисхождение.

НА У́ТРЕНИ

На Бог Госпо́дь: Тропа́рь апостола два́жды.

Сла́ва и ны́не, Богоро́дичен: Тя Ходатайствовавшую:

По 1-й кафизме седа́лен, глас 2:

Улови́в язы́ки апостол славный/ и научив концы земныя Тебе́ кла́нятися, со Отцем и Духом, Христе́́ Боже./ Того ради утверди Церковь Твою́/ и ве́рным низпосли благословение Твое́,/ Едине Милостиве и Человеколюбче.

Сла́ва, и ны́не, Богоро́дичен:

Божественнаго бы́хом о́бщницы естества́ Тобою, Богоро́дице Приснодево:/ Бо́га бо нам Воплотившагося родила́ еси́./ Темже по до́лгу Тя вси благоче́стно величаем.

По 2-й кафизме седа́лен, глас 4.

Подо́бен: Скоро предвари:

Я́ко лучу́, Солнце правды испусти́ тя Христос,/ просвети́ти всю землю, апостоле славный Иакове,/ Божественными твои́ми моли́твами озаряеши/ и Боже́ственным светом невече́рним всех просвещаеши,/ верою совершающих святу́ю па́мять твою́́.

Сла́ва, и ны́не, Богоро́дичен:

Надеждо непостыдная надеющихся на Тя,/ едина рождшая па́че естества́ плотию Христа́ Бо́га нашего,/ Того со святыми апостолы моли́ пода́ти вселе́нней очищение прегрешений,/ и всем нам прежде конца жития исправление.

По полиеле́и седа́лен, глас 8

Подо́бен: Прему́дрости:

Мре́жею словес Боже́ственных ры́бы уловля́я слове́сныя,/ и сия́ принесл еси́ нача́тки Бо́гу нашему,/ и во Христовы язвы желая облещи́ся,/ подо́бник страстей Его́ явился еси́./ Тем сошедшеся по долгу, чтим тя, апостоле славне,/ и согласно вопие́м ти:/ моли́ Христа́ Бога/ грехов оставле́ние пода́ти чтущим любо́вию святу́ю па́мять твою́́.

Сла́ва, и ны́не, Богоро́дичен:

Мысленная врата́ Жизни, Пречистая Богоро́дице,/ притекающия к Тебе́ верно/ избави от бед,/ да сла́вим пресвятое Рождество Твое́ во спасе́ние душ на́ших.

Степе́нна, 1-й антифо́н 4-го гла́са. Проки́мен, глас 4: Во всю землю: Стих: Небеса поведают: Вся́кое дыха́ние: Ева́нгелие от Иоанна, зача́ло 67.

По 50-м псалме́ стихи́ра, глас 4:

Подо́бен: Жены́, услы́шите:

Я́ко таи́нник, и апостол,/ и служитель изря́дный Христа, Единаго Владыки, Иакове Богопропове́дниче,/ Сего моли́ подати православным победи́тельная/ и очищение, всехва́льне, грехов,/ совершающим всесвяту́ю па́мять твою́́.

Канон Богоро́дицы со ирмосо́м на 6, и апостола, глас 6, на 8, егóже краегране́сие: Христова ученика сына Алфеева почитаю. Феофа́ново.

Песнь 1

Ирмо́с: Яко по су́ху пешеше́ствовав Израиль/ по бездне стопами,/ гони́теля фарао́на/ ви́дя потопляема,/ Бо́гу победную песнь/ поим, вопияше.

Ру́ку ми даждь, Богови́дче и учениче Христов, Иакове,/ честны́й твой праздник похвали́ти устремившуся,/ и свет се́рдцу моему твои́ми моли́твами возсия́й.

Струя́ми Божественныя мудрости напое́н,/ река истекл еси́ от рая́ сладости/ и земное лице теченьми благоче́стия истинно я́ве напоил еси́.

Священнейшему ли́ку ученик Христовых счета́лся еси́, Иакове,/ исполняя число двонадеся́тных;/ с нимиже, Влады́це предстоя́, нас поминай.

Богоро́дичен: Тя, Пречистая Де́во, небо прострый Господь/ и землю основавый,/ небо земное нам явил есть,/ из Тебе́ прошед плотию.

Катавасия: Отверзу уста моя:

Песнь 3

Ирмо́с: Несть свят,/ я́коже Ты, Го́споди Боже мой,/ вознесы́й рог верных Твоих, Блаже,/ и утверди́вый нас на ка́мени/ испове́дания Твоего́.

Божественнаго Ду́ха я́ве прие́м зарю́,/ во тьме су́щим, я́ко утро, показался еси́ све́тло,/ Солнца мысленнаго возвещая всем явле́ние.

Нога твоя́ ста явственно в правости, блаже́нне,/ у Царя Праваго же и Благаго,/ ликующи Боголепно и ше́ствующи стезю́ Небесную.

Сы́на Безначальна Бо́жия, вся творящаго Боже́ственною властию,/ неле́стна Тайноучи́теля, зна́ния истины тя науча́юща, имел еси́, Иакове.

Богоро́дичен: Марие, всех надеждо на Тя надеющихся,/ рождши Слово, воплощенное нас ради,/ различных мя напа́стей и бед, Пречистая, избави.

Седа́лен, глас 8.

Подо́бен: Прему́дрости:

Мудрость истинно учителя имев,/ тя научающую сущим па́че ума,/ мудрость объюро́дил еси́ е́ллинскую, Богодухнове́нне;/ и язы́ком был еси́ светильник Боже́ственный,/ благоче́стия словесы́ направляя безумныя./ Тем изба́вленнии тобо́ю от пре́лести,/ досто́йно пое́м тя и верно ублажаем, Богоглаго́ливе Иакове:/ моли́ Христа́ Бо́га грехов оставле́ние подати/ чтущим любо́вию святу́ю па́мять твою́́.

Сла́ва, и ны́не, Богоро́дичен:

Солнца о́блаче разумнаго,/ Божественнаго Света Светильниче златокова́нный,/ Нескве́рная, Неблазная, Всенепоро́чная Влады́чице,/ омраченную душу мою ослеплением страстей,/ безстрастия зарею просвети, молюся;/ и оскверненное мое се́рдце омый пото́ки умиления, покаяния же слезами,/ и от тиме́ния мя очисти дел моих,/ да любо́вию зову Ти:/ Богоро́дице Приснодево, моли́ Христа́ Бо́га прегрешений оставле́ние подати ми,/ Тебе́ бо имею надежду, раб Твой.

Песнь 4

Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чи́ста о Го́споде празднующи.

Сам тя Господь, Един Святый,/ честно́му лику учеников, блаже́нне, сочете́,/ честно́е и светлое жития́ твоего́ прови́девый.

Чудес испо́лнен Божественнаго Ду́ха быв, Богопропове́дниче,/ чудотвори́ши бо, неду́ги отгоняя,/ и лукавства духо́в человеки свободи́л еси́.

Боже́ственное сияние, нашедшее сердцу твое́му, блаже́нне,/ Богосветло сие соде́ла/ и приятно па́че ума дарований сотвори́.

Богоро́дичен: Божественным Твоим Рождеством, Де́во Всечистая,/ А́нгельстии чи́ни и земных собо́ри совокупишася;/ миронача́льника бо Христа́ и Спаса всех родила еси́.

Песнь 5

Ирмо́с: Божиим све́том Твоим, Блаже,/ у́тренюющих Ти ду́ши любо́вию озари́, молюся,/ Тя ве́дети, Слове Божий,/ Истиннаго Бога,/ от мрака греховнаго взывающа.

Солнцу, блаже́нне, у́мному собеседник быв, лучи́ ты оттуду приемля,/ еже по существу первый Той есть, вторый по благода́ти был еси́, славне.

Ум чисте́йший имев, све́тло же и чисто се́рдце ты стяжав,/ воплощшагося Бо́га видел еси́, непостижимаго разумом.

Уступает ти, учениче́, вся́ко пророчество, и вся́ко законоположе́ние, пребога́те;/ те́ми бо древле Пропове́даемаго самови́дно сподо́бился еси́, блаже́нне, ви́дети.

Богоро́дичен: Се, Де́во, проро́чески имела еси́ во чреве Твое́м, Сущаго над всеми Владыку и Го́спода,/ и неизреченно Сего, Чи́стая, родила́ еси́, Де́во, по рождестве нетле́нна пребы́вши.

Песнь 6

Ирмо́с: Житейское море,/ воздвизаемое зря напастей бурею,/ к тихому пристанищу твое́му прите́к, вопию Ти:/ возведи́ от тли живот мой,/ Многомилостиве.

Ноги твоя́ кра́сныя мир неле́стно я́ко благовеству́юще,/ мир су́що преестественный, и ум преимущий, учениче́ Христов всече́стне.

Разумети та́инство/ и проповедати страшное Бо́жия воплощения сподо́бился еси́, Иакове,/ перводе́льныя лучи прие́мый от Самаго Высочайшаго, приснопамятне.

Неизрече́ннаго света сияя светлостьми достойно,/ верховный Христов апостоле, прилежно моли́ся о творящих па́мять твою́́, славне, пречестну́ю.

Богоро́дичен: Всеми влады́чествующа тва́рьми я́ко Бо́га Благаго рождши,/ согрешений моих, Пречистая, стру́пы до конца потреби́,/ благоутробна содева́ющи Рождшагося из Тебе́.

Конда́к, глас 2

Подо́бен: Твердыя:

Твердо мудрости догма́ты в ду́ши благочести́вых вложившаго/ похвала́ми да ублажи́м я́ко Боговеща́теля вси Иа́кова:/ Престо́лу бо славы Владычню предстоя/ и со всеми А́нгелы ра́дуется,/ моля́ непре́станно о всех нас.

И́кос:

Я́ко ученик Христов и друг Невещественным лико́м спребываяй присно,/ и, Светом озаряем невечерняго светодая́ния, ума моего тьму разреши, всеблаженне:/ я́ко да Твою́ светоносную па́мять воспою,/ юже поет вся тварь, благоче́стно празднующи днесь;/ всех бо верных наставник и светильник был еси́, Иакове,/ моля́ непрестанно о всех нас.

Песнь 7

Ирмо́с: О́троцы в Вавилоне,/ пе́щнаго пла́мене не убоя́шася,/ но посреде́ пламене вве́ржени, ороша́еми, поя́ху:/ благословен еси́, Го́споди, Боже отец на́ших.

Све́тлостьми и сияньми Ду́ха просвещеннаго,/ язы́к множество семя Боже́ственное тя именует, зовуще:/ благословен еси́, Го́споди, Боже отец на́ших.

Мудростию укра́шен Богодарова́нною ти/ разорил еси́ мирскую мудрость,/ Богомудренно зовы́й, апостоле:/ благословен еси́, Го́споди, Боже отец на́ших.

Во всю землю изы́де вещание твое́, апостоле Иакове,/ еже возвести́л еси́, я́ко гром, всем страна́м, премудре,/ Воплощенное Слово досто́йно пропове́дая.

Богоро́дичен: Святых святе́йши, Де́во Мати, Ты была еси́,/ я́ко рождши Бо́га несказа́нно,/ Егóже воспева́юще, непрестанно зовем:/ благословен еси́, Го́споди, Боже отец на́ших.

Песнь 8

Ирмо́с: За зако́ны оте́ческия/ блаженнии в Вавилоне юноши, предбе́дствующе,/ царю́ющаго оплева́ша повеле́ние безу́мное/ и, совоку́плени имже, не сваришася огнем,/ Держа́вствующему достойную воспева́ху песнь:/ Го́спода пойте дела/ и превозноси́те во вся ве́ки.

Священноученик, Небе́сным науче́н истинно, блаже́нне, та́инством,/ прошел еси́ всю вселенную, апостоле,/ проповедая велегла́сно слово веры Христо́вы/ и научая неизреченною благода́тию:/ Го́спода воспевайте дела и превозноси́те во вся ве́ки.

Богат был еси́ и блаже́н, сподобле́н всякаго блаженства,/ я́ко собеседник и сообита́тель быв Влады́це,/ и конечное истинно жребием до́бре обога́щся,/ и Слову, свеселя́ся, воспева́ше:/ Го́спода пойте дела и превозноси́те во вся ве́ки.

За мир молитвенник изя́щнейший ко Спасу ста́ни, блаже́нне апостоле,/ прося свыше богатнаго мира Це́рквам,/ и хва́лящим тя верно прегрешений оставление,/ и душам спасе́ние, вопию́щим:/ Го́спода пойте дела и превозноси́те во вся ве́ки.

Богоро́дичен: Ты спасения всем Хода́таица, Богомати,/ яви́лася еси́, Едина Всепетая, Спаса рождши Бо́жия,/ Бо́га Слова, избавльшаго нас древния клятвы/ и благословение даровавшаго верою зовущим:/ Го́спода пойте дела и превозноси́те во вся ве́ки.

Песнь 9

Ирмо́с: Не рыда́й Мене, Мати,/ зря́щи во гробе,/ Егóже во чре́ве без се́мене зачала́ еси́, Сына:/ востану бо, и просла́влюся/ и вознесу́ со славою непрестанно я́ко Бог/ верою и любо́вию Тя величающия.

Явился еси́ миру, я́коже молния претека́я,/ во тьме древле и сени неведения седящия,/ влеки́й ко Све́ту незаходимому Воплощшагося Единороднаго Сына,/ Егóже самовидец и действенный слуга был еси́, блаже́нне;/ Егóже величаем.

Бурное, блаже́нне, от небесе носимое дыха́ние прием/ и язы́ком огнедохнове́нным обога́щся,/ пожига́еши, я́ко терние, безбожную мирскую мудрость,/ свеща́тельными зарями проповедают Христова сияя/ и мра́к разоря́я, Богоблаженне.

Приими́, Богогла́се апостоле Иакове, молебную песнь,/ юже ти прино́сим, Твою́ пра́зднующе пречестну́ю и пресветлую память;/ избави от грехов рабы твоя́, верховный Христов апостоле,/ прилежно моля́ся,/ да досто́йно тя величаем.

Богоро́дичен: Я́ко неискусому́жно во чреве Твое́м прие́мши Слово,/ пребыла́ еси́ Нетленна, Пречистая Де́во,/ и рождши нам Еммануила, сущаго вку́пе Бо́га и Человека./ Сего сугуба естеством ве́дуще, Тя величаем.

Свети́лен.

Подо́бен: Духом во святи́лищи:

Не я́ко сына Алфеева, но я́ко ученика Слова,/ разумеем тя, Иакове, апостолов славо:/ ибо Боже́ственное сияние явственно приял еси́/ и благода́ть чудес отгоня́ти неду́ги от человек,/ верою совершающих всесвященную па́мять твою́́.

Сла́ва, и ны́не, Богоро́дичен:

Я́ко имущи благоутробие и ми́лость великую,/ Богоро́дице Де́во,/ при́зри, Пренепорочная, на мое смирение/ и страстну́ю бурю и печалей нахождения разжени́, Чи́стая,/ и огня геенскаго избави мя Твоими моли́твами.

На хвалитех стихи́ры на 4, глас 4.

Подо́бен: Я́ко до́бля:

Тростию благода́ти/ от глубины су́етства человеки/ извлекл еси́, досточудне,/ Учителя ма́нием повинувся, Иакове,/ просвещшаго по всему́ твое́ разумение,/ и апостола, и че́стна Богоглагольника,/ тя, всеблаженне, показавша,/ Того непости́жнаго Божества́.

Духа сияние на тя сни́де во о́гненне ви́де/ и тя, блаже́нне, Боже́ственное приятелище соде́ла,/ скоро отгоня́ща безбожия мглу/ и мир просвещающа/ сиянием всемудрых твои́х словес,/ тайноглагольниче, апостолов украше́ние,/ Христов самовидче, блаже́нне.

Молниями проповедания/ во тьме седящия неведения,/ славне, просветив,/ показа́л еси́ сы́ны/ Владыки и Бо́га веры ради,/ Егóже страстем ревновал еси́ и смерти,/ и славы был еси́ наследник,/ я́ко мудр и Богоглаголив,/ я́ко ученик и́стиннейший.

Сла́ва, глас 2:

Оставив земная, последовал еси́ Христу,/ и, зна́менався дохнове́нием Свята́го Духа,/ по́слан быв от Него в язы́ки поги́бшия/ обраща́ти человеки в свет Богозна́ния, апостоле Иакове;/ и, скончав подвиги Божественныя твоея́ страсти и мук различных,/ душу твою́́ Христу́ пре́дал еси́/ Того моли, всеблаженне,/ дарова́ти нам велию ми́лость.

И ны́не: Все упование мое:

Славословие великое. И отпуст.

НА ЛИТУРГИ́И

Блаженны апостола, песнь 3 и 6. Проки́мен, глас 8: Во всю землю изыде вещание их и в концы вселенныя глаголы их. Стих: Небеса поведают славу Божию: Апостол к Коринфяном, зача́ло 131. Аллилуия, глас 2: Исповедят Небеса чудеса́ Твоя́, Го́споди: Ева́нгелие от Луки, зача́ло 51. Причастен: Во всю землю изыде:

Святой апостол (от 12-ти) Иаков

Преподобные Андроник и супруга его Афанасия

Тропа́рь, глас 4:

Процвете́ нам весна благода́ти,/ Стефана Новаго память,/ пра́здновати того Просла́вльшаго/ призывает бо всех праздниколю́бцев,/ возсылати благодарение Бо́гови,/ сохранившу тело его/ во гро́бе цело и неруши́мо и чудесы́ удивля́емо,/ мо́лится бо о людех своих я́ко отечестволю́бец/ и о творящих па́мять его.

Конда́к, глас 3:

Прииди́те, Стефана восхва́лим вси/ и Божественными пе́сньми просла́вим,/ не дале́че бо от апостол,/ и к му́чеником прибли́жися,/ и преподобных, и праведных блаженство насле́дова,/ и воня́ми моще́й его нас облагоуха́ет,/ и мо́лится Го́сподеви о душа́х на́ших.