5-й день
Собор святителей Московских Петра́, Алекси́я, Ио́ны, Фили́ппа и Ермогена, всея России чудотворцев
НА МАЛОЙ ВЕЧЕРНИ
На Господи воззвах: стихи́ры глас 8.
Подо́бен: О, преславнаго чудесе:
Святи́телие, отцы всечестни́и,/ Пе́тре, Алекси́е, Ио́но, Фили́ппе и Ермоге́не,/ слепым даете свет, болящим исцеления и хромым хождение,/ милостивно преклоняющеся/ приходящим с верою к храму вашему/ и просящим помощи вашея:/ вас бо, заступники, и предстатели, и хранители,/ ве́рнии вси обретохом.
Святителие, отцы преблаженнии,/ Петре, Алексие, Ионо, Филиппе и Ермогене,/ доброде́тельми вшедше, я́ко на колесницу,/ к Бо́гу востеко́сте,/ победныя приемлюще почести,/ я́ко ми́лоть нам телеса ваша, положе́на во гробе, святителие, оста́висте,/ источати исцеления/ и прогони́ти духи лукавыя,/ те́мже блажи́м вас, прехва́льнии.
Лико́м святительским сочета́стеся,/ по́стническим житие́м украси́вшеся,/ Петре, Алексие, Ионо, Филиппе и Ермогене,/ ны́не в Небесных живете́, веселящеся,/ идеже предстоите́ Христу,/ со А́нгелы ликовствующе,/ светом Боже́ственным обожа́еми,/ поминайте выну блажа́щих вас на земли́/ и пречестно́е ваше творящих пра́зднество.
Сла́ва, глас 6:
Возсия́́ солнцеобра́зно святителей Христовых память,/ верных сердца́ разумно просвеща́ющи,/ юже мы, светло совершающе днесь, молебно возопие́м:/ радуйтеся, пастырие и учителие/ христоименитым людем Российския земли,/ радуйтеся, церковное украше́ние,/ архиере́ев добро́та, монахов похвала́,/ святителие Христовы Петре, Алексие, Ионо, Филиппе и Ермогене,/ Христа́ Бо́га моли́те спасти́ся душам нашим.
На стихо́вне стихи́ры, глас 2.
Подо́бен: До́ме Евфрафов:
Дом духовный/ поспеше́нием благода́ти/ Петр явися./ Темже ны́не сошедшеся,/ того воспоим.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Святителем похвала́/ и священником сла́ва,/ правило монашествующим,/ Алексие святе,/ радуйся, Церкве утверждение.
Стих: Честна́ пред Го́сподем/ смерть преподо́бных Его́́.
Храм всесветел/ Трисо́лнечныя зари́ сый,/ озаряеши ду́ши/ питающихся словесы/ твои́ми, Ионо.
Стих: Уста праведнаго поучатся премудрости,/ и язык его возглаголет суд.
Дом Ду́ха Свята́го был еси́,/ благода́тию исполнен/ Боже́ственных учений,/ имиже напоя́еши мир,/ премудре Филиппе.
Сла́ва, глас то́йже:
Граде Москва,/ се́рдце Руси православныя,/ граде великих святителей,/ красуйся новым чудотворцем Ермогеном.
И ны́не, Богоро́дичен:
Ра́дуйся, Богоро́дице Де́во;/ радуйся, похвало́ всей вселенней,/ радуйся, Чи́стая Мати,/ Бо́гу Благословенная.
НА ВЕЛИЦЕЙ ВЕЧЕРНИ
Блажен муж: На Го́споди, воззвах, стихи́ры, глас 4.
Подо́бен: Я́ко до́бля:
Я́ко зве́зды многосветлыя,/ утвержде́ни прехвальнии,/ мир украси́сте, всечестни́и,/ и сей лучами просвещаете/ догма́ты благоверна,/ и ереси тьму отго́ните, святителие./ Молитеся от тли и бед изба́витися/ верою творящим всечестную па́мять вашу.
Сиянии духовными просветивше вселенную,/ светодательная солнца явистеся,/ я́ко лучи велений/ во вся концы простирающе,/ верных сердца́ просвещаете, треблаженнии,/ отгоняще тьму ересей, Богоносцы,/ силою от Девы Возсия́вшаго.
Апостолом равнопропове́дателие,/ святителем единомудреннии,/ постником сподвижницы,/ пастырие суще избра́нии,/ милости благоутробнии подателие,/ Российстии первопрестольницы,/ досто́йно восхваляем вас, святителие,/ А́нгелом собеседницы и молитвенницы о душах на́ших.
И́ны стихи́ры, глас 6.
Подо́бен: Все отложше:
Воистинну священнейшии и Богоноснии/ явльшеся пома́зание Боже́ственное, святии,/ Святым Духом обложе́ни,/ и светло всегда входя́ще, славнии, во свята́я святых,/ и светлостьми́ Богоначальными облистаеми благода́тию,/ и поучающеся спаси́тельным тайнам,/ я́ко священнотайныя суще первопрестольнице Российстии,/ со дерзнове́нием моли́теся о душах на́ших.
Житие́ ваше просия́ добродетельными блиста́ньми,/ и верныя просвети́сте,/ прелести бурю разве́ясте,/ поистинне явистеся светозарное солнце,/ священноначальницы всеблаженнии, вселистеся, идеже Свет сияет невече́рний,/ сы́нове дне благода́тию Свята́го Ду́ха бывше./ И тем вашу па́мять Божественную/ и светоносный праздник совершаем/ и, веселящеся, вас ублажаем.
Нощь потребльше еретическую всю,/ священноначальницы всемудрии,/ Петре, Алексие, Ионо, Филиппе и Ермогене, блиста́ньми духовными просвеща́еми,/ и ве́рным всем, славнии,/ помышления озаривше благода́тию,/ и Троицу Несозданную славити научивше./ Тем светозарную вашу память/ совершающе радостно, просим:/ моли́теся Христу, Преблагому Бо́гу,/ неотступно, Всехва́льнии, о душах на́ших.
Сла́ва, глас 6:
Человецы Божии и ве́рнии раби,/ служителие Господни,/ му́жие желания,/ сосу́ди избраннии,/ столпи и утверждение Церкве,/ Царствия наследницы,/ не премолчите, еже о нас вопити ко Господу.
И ны́не: Кто Тебе́ не ублажит:
Вход. Проки́мен дне. Чтения 3 святительския.
При́тчей чте́ние (глава́ 3):
Па́мять пра́веднаго с похвала́́ми,/ и благослове́ние Господне на главе́ его./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея есть./ Долгота́ бо дней и лета живота́ в десни́це ея,/ в шу́йце же ея бога́тство и сла́ва./ От у́ст ея исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о чада!/ честна́я бо реку́,/ и блаже́н челове́к, и́же пути моя сохрани́т./ Исхо́ди бо мои́, исхо́ди живота,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим:/ я́ко аз прему́дрость устро́их,/ сове́т, и ра́зум, и смы́сл аз призвах./ Мой совет и утверждение,/ мой разум, моя же кре́пость./ Аз мене́ любящия люблю,/ и́щущий же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честная бо реку́,/ и отве́рзу от усте́н правая,/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́но./ Вся пра́ва суть разумева́ющим,/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ваша,/ и испо́лнитеся Духа.
Прему́дрости Соломо́новы чте́ние (глава́ 10):
Уста́ праведнаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавляе́т их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т,/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Господь преподобная сердца́,/ прия́тни же Ему́ вси́ непоро́чнии в пути́./ Му́дрость Господня просвеща́ет лице́ разу́мнаго./ Постига́ет бо жела́ющий ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней, не утруди́тся,/ и бдя́й ея ра́ди, вско́ре без печа́ли бу́дет./ Я́ко досто́йных ея́ сама́ обхо́дит и́щущи,/и в стезя́х ея явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея,/ и возлюби́х ю, и поиска́х от ю́ности моея́,/ и взыска́х неве́сту привести́ себе́,/ я́ко все́х Влады́ка возлюби́ ю./ Таи́бница бо есть Бо́жия хи́трости,/ и обрета́тельница дел Его́./ Труды ея́, су́ть доброде́тели,/ целому́дрию же и ра́зуму та́ учи́т,/ пра́вде и му́жеству, и́хже потре́бив ничто́же есть в житии́ челове́ком./ Аще же и многоиску́сства жела́ет кто́, ве́сть дре́вняя/ и бы́ти хотящая разсмо́трит./ Све́сть извития слове́с и разреше́ния гада́ний,/ зна́мения и чудеса́ проразуме́ет/ и сбытия времен и лет./ И всем сове́тник есть благ,/ я́ко безсме́ртие есть в ней и благосла́вие во обще́нии словес ея́./ Сего́ ра́ди бесе́довах ко Господу, и помоли́хся Ему,/ и рех от всего́ се́рдца моего́:/ Боже отце́в и Го́споди ми́лости,/ сотвори́вый вся сло́вом Твоим и му́дростию Тво́ею устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Да́ждь ми Твоим Престо́лом приседя́щую прему́дрость/ и не отлучи́ мене от о́трок Твоих,/ я́ко аз раб Твой и сын рабы́ни Твоея́./ Посли́ ю с Небес от свята́го жили́ща Твоего́́,/ и от Престо́ла Сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве сво́ей./ Помышле́ния бо сме́ртных вся боязлива/ и погреши́тельна умышле́ния их.
Прему́дрости Соломоновы чтение (глава́ 4):
Похваля́ему пра́веднику, возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от человек,/ и уго́дна Го́сподеви душа́ его./ Возлюби́те у́бо, о му́жие, му́дрость и поживете́:/ восхощи́те ея и нака́зани бу́дете./ Нача́ло бо ея любы́ и соблюде́ние зако́на./ Почти́те прему́дрость, да во ве́ки царствуете./ Возвещу́ вам и не скры́ю от вас таин Божиих,/ я́ко Той му́дрости На́ставник есть, и мудрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух Разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та́я дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я угожда́ющих ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ я от ловя́щих, и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие,/ и никогда́же премо́жет зло́ба му́дрости,/ ниже́ пре́йдет злыя облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному, и не пощади́м преподо́бства его,/ ни усрами́мся седи́н ста́рости многоле́тны./ Бу́дет бо нам кре́пость зако́н/ и улови́м пра́веднаго,/ я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Божий,/ и о́трока Господня себе имену́ет./ Бысть нам на обличе́ние помышле́ний на́ших/ и тя́жек нам есть и ви́дим,/ я́ко неподо́бно иным житие́ его, и измене́ны стези́ его./ В поруга́ние вмени́хомся ему,/ и удаля́ется от путе́й на́ших, я́ко от нечисто́т,/ и блажи́т последняя праведных./ Уви́дим убо, а́ще словеса его́ и́стинна суть,/ иску́сим, яже сбыва́ются ему́./ Руга́нием и му́кою истяжем его,/ да разуме́ем кро́тость его и иску́сим беззлобство его,/ сме́ртию безобра́зною осу́дим его,/ бу́дет бо посеще́ние от слове́с его./ Сия́ помы́слиша и прельсти́шася, ослепи́ бо я зло́ба их,/ и не разуме́ша таин Божиих и не разсуди́ша,/ я́ко Ты еси́ Бог Еди́н, живота́ име́яй и сме́рти власть,/ и спаса́яй во вре́мя ско́рби, и избавля́яй от всякаго зла́./ Ще́др и Ми́лостив, и дая́й преподо́бным Свои́м благода́ть,/ и Сво́ею мы́шцею го́рдым противля́яйся.
На лити́и стихи́ры, глас 2:
Приидите, верных собори,/ псало́мски воспле́щем руками/ печальным уте́шителей,/ о грешных ко Господу молитвенники,/ и́же вси везде теплых предстателей воспева́юще,/ святителей Петра, Алексия, Иону, Филиппа и Ермогена,/ похвалу земли Российстей/ и всего священства украше́ние,/ ре́ки милости вои́стинну,/ Божественнаго Христова смирения ревнителей,/ подающаго ми́ру велию ми́лость.
Имеюще дерзновение ко Господу,/ пастырие всесвященнии и святителие, ве́рным утверждение,/ и́же любо́вию творящим всечестную па́мять вашу,/ молите избавитися всякаго обстояния и варварскаго нахождения/ ко Влады́це вашими моли́твами.
Разумнии церковнии светильницы,/ Троице поборницы, Российстии первопрестольницы,/ мглу прелести отгнавше и православия светом мир просветивше,/ те́мже и сподо́бистеся Божественней сла́ве быти причастницы,/ моли́теся Христу́ Бо́гу непрестанно/ дарова́ти нам велию ми́лость.
Сла́ва, глас 5:
Востру́бим трубою песней,/ взыграим пра́зднественная и ликовствуим, радующеся,/ в молебное торжество мудрых священноначальник./ ве́рнии люди да стеку́тся, и Церкве Христовы светильником восплещут в песнех./ Пастырие и учителие добраго Пастыря,/ сих мудрых священнота́инник, сошедшеся, восхвалим,/ светильники светозарныя, светоприе́мныя свещи́,/ столпы́ церковныя,/ веры крепкая основания, ла́стовицы, Божественную ве́сну провозвеща́ющия спасения,/ трубы́, мусики́йски возглашающия,/ песньми Божественными восхваляюще, сице рцем:/ святии чудотворцы, Петре, Алексие, Ионо, Филиппе и Ермогене,/ скоро предварите, и избавите нас/ от нахождений иноплеменных и междоусобныя брани,/ и спаси́те стадо свое́ моли́твами вашими.
И ны́не, Богоро́дичен:
Востру́бим трубою песней:/ преклоншися бо свыше, Всецарица, Ма́ти Дева,/ благословеньми венчава́ет воспева́ющих Ю./ ве́рнии люди да стекутся,/ и Царице да восплещут в песнех,/ Царя рождшей,/ И́же смертию одержимыя пе́рвее разрешити человеколюбно благоизволившаго./ Пастырие и учителие,/ добраго Пастыря Пречи́стую Матерь, сошедшеся, восхвалим,/ све́щник златозарный, светоносный о́блак,/ Небес простра́ннейшую,/ одушевленный же киво́т, огнезрачный Владычень Престол,/ манноприемную златую ста́мну,/ заключе́нную Сло́ва дверь,/ всех христиан прибежище,/ песньми Богогла́сными похваляюще, сице рцем:/ пала́то Слова, сподо́би смиренных нас Небе́снаго Царствия:/ ничтоже бо невозможно ходатайству твое́му.
На стихо́вне стихи́ры, глас 2:
Ки́ими песненными добро́тами/ воспоем Христовых святителей,/ Евангелию проповедников светлейших,/ церковных хранителей и заступников земли Российстей,/ наставников ко свету Богоразумия,/ ихже моли́твами Христос врагов шатания низложи,/ имеяй велию ми́лость.
Стих: Честна́ пред Го́сподем/ смерть преподо́бных Его́́.
Ки́ими бо́дренными устна́ми похва́лим Богомудрых святителей,/ Христо́ве Церкви светлое украше́ние,/ священства венцы, благоче́стия управление,/ источников Боже́ственных исцелений неисчерпа́емых,/ пролитие дарований духовных,/ ре́ки многих чудес, землю Российскую веселящия течением,/ Петра, Алексия, Иону, Филиппа и Ермогена,/ отечеству теплыя пособники,/ ихже ради Христос врагов шатания низложи,/ имеяй ве́лию ми́лость.
Стих: Свяще́нницы Твои́ облекутся в пра́вду,/ и преподобныя Твои́ возра́дуются.
Ки́ими украше́нными гла́сы воспоем святители,/ дивныя в чудесех,/ Петра, Алексия, Иону, Филиппа и Ермогена,/ освященныя от пеле́н, столпы Церкве неподви́жимыя,/ безплотныя сожители, правды исправление,/ обидимым заступники, немощны́м врачи безмездныя,/ ихже ради дарова Христос Церквам соединение,/ мир и велию ми́лость.
Сла́ва, глас 3:
Святителие всечестни́и,/ преблаженнии отцы и чудотворцы, угодницы Христовы,/ Российстии первопрестольницы,/ Петре, Алексие, Ионо, Филиппе и Ермогене,/ и́же пророческим житием просия́вше,/ апостольских сподо́бистеся даро́в,/ Спасу служаще со А́нгелы непрестанно,/ моли́те избавитися нам от всякаго прегрешения,/ и душам нашим подати мир и велию ми́лость.
И ны́не, Богоро́дичен.
Тропа́рь, глас 4:
Первопрестольницы Российстии,/ истиннии хранителие апостольских преданий,/ столпи́ непоколебимии, православия наставницы,/ Петре, Алексие, Ионо, Филиппе и Ермогене,/ Владыку всех моли́те/ мир вселе́нней дарова́ти/ и душам нашим велию ми́лость.
Сла́ва, и ны́не, Богоро́дичен.
НА У́ТРЕНИ
На Бог Господь: тропа́рь то́йже.
По 1-м стихосло́вии седа́лен, глас 5
Подо́бен: Собезначальное Слово:
Я́ко царское украше́ние Церкве,/ святителей Господних восхвалим,/ преданием сокровище неоскуде́емо,/ си́ми бо тии наказаше нас Троицу чести́ Святую,/ соедине́ну убо Существом,/ разделену же Ипоста́сьми.
Сла́ва, и ны́не, Богоро́дичен:
Пресвятая Де́во, помилуй нас,/ прибегающих верою к Тебе́, Милосердой/ и прося́щих теплаго Твоего́́ заступления,/ можеши бо я́ко Блага вся спасти́,/ я́ко сущи Ма́ти Бо́га Вы́шняго,/ Ма́терними Твоими моли́твами при́сно объе́млющи, Богора́дованная.
По 2-м стихосло́вии седа́лен, глас 3.
Подо́бен: Божественныя веры:
Столпи бысте Церкве/ и богатство некра́домое благоче́стия,/ явилися есте́ Богослове́снии святителие,/ в безстрастии осияли есте́ житие́ свое/ и Троическая изъясняете учения повелений,/ отцы преподо́бнии,/ Христа́ Бо́га моли́те о спасении душ на́ших.
Сла́ва, и ны́не, Богоро́дичен:
Божественнаго естества́ не отлу́чься,/ плоть быв во чреве Твое́м,/ но Бог вочелове́чься и пребысть,/ И́же по рождестве Матерь Тя Де́ву,/ я́ко прежде рождества сохранив Всенепорочну,/ Един Господь, Того прилежно моли/ дарова́ти нам велию ми́лость.
По Хвалите Имя Господне: величание:
Величаем вас,/ святителие Христовы,/ Петре, Алексие, Ионо, Филиппе и Ермогене,/ и чтим святу́ю па́мять вашу,/вы бо молите за нас/ Христа́ Бо́га нашего
Псалом избра́нный: Услышите сия́ вси язы́цы:
По полиеле́и седа́лен, глас 4:
Премудрии учителие вселенней,/ и́же Бо́га славяще словесы́ и де́лы на земли,/ да возвели́чатся днесь,/ я́ко спасения всем нам подателие.
Сла́ва, и ны́не, Богоро́дичен:
Предстательнице нера́тная, Богородительнице,/ и молитвою готовая притекающим к Тебе́,/ от бед мя избави/ и не пре́зри мене, всех заступление.
Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́́. Стих: Что воздам Го́сподеви о всех,/ яже воздаде́ ми? Вся́кое дыха́ние: Ева́нгелие от Иоанна, зача́ло 36.
По 50-м псалме́ стихи́ра, глас 6:
Боже́ственная благода́ть осеня́ет/ всечестны́е раки мощей ваших, преблаженнии,/ те́мже и в воню́ мира чудес ваших притекающе,/ неду́гом исцеления почерпаем,/ но, о святителие Христовы, Петре, Алексие, Ионо, Филиппе и Ермогене,/ Христа́ Бо́га моли́те о душах на́ших.
Канон Богоро́дице со ирмо́сом на 6, таже святителей, на 8, глас 8
Песнь 1
Ирмо́с: Воду прошед, я́ко сушу,/ и египетскаго зла избежав,/ израильтянин вопияше:/ Изба́вителю и Бо́гу на́шему поим.
Многими содержи́ми напа́стьми,/ к вам прибегаем спасе́ние получити,/ о велиции святителие, Петре, Алексие, Ионо, Филиппе и Ермогене!/ От лютыя ну́жды и бед спаси́те нас.
Страсте́й прило́зи/ и многия печали и беды́ погубляют мою душу;/ умири́те, святии святителие, к Бо́гу вашими моли́твами,/ и от печали на веселие преложи́те.
Спаса Христа́ моли́те, вели́ции чудотворцы и избра́ннии,/ Петре, Алексие, Ионо, Филиппе и Ермогене,/ избавитися нам от бед и скорбей/ и варварскаго нахождения вашими моли́твами.
Богоро́дичен: В скорби ны и болезни суща,/ посещения Божественнаго и промышления/ еже от Тебе́ сподо́би, о Богомати, Влады́чице.
Катавасия: Отверзу уста моя:
Песнь 3
Ирмо́с: Небе́снаго кру́га Верхотво́рче, Го́споди,/ и Церкве Зижди́телю,/ Ты мене́ утверди́ в любви Тво́ей,/ желаний краю,/ верных утверждение,/ Едине Человеколюбче.
Заступницы и покрови́телие граду Москве вы есте́ по Бо́зе,/ Божии угодницы,/ направите нас на приста́нище спасения:/ вы бо есте́ ве́рным ограждение.
Молим вас, святии чудотворцы, Петре, Алексие, Ионо, Филиппе и Ермогене,/ душе́вное смущение и печали бурю разорите нам/ и тишину подати/ к Бо́гу вашими моли́твами.
Благоро́днейшии и благим подража́телие бывше,/ от Бо́га чудесы́ обогатившеся,/ всем помога́йте, молящеся Бо́гу,/ вас прославляющему, Своя уго́дники.
Богоро́дичен: Лютыми неду́ги/ и болезненными тяжкими варварскими нахо́ды истязаемым,/ Де́во Богоро́дице, Ты нам помози/ и печаль на радость преложи́.
Седа́лен, глас 4:
Простри́те ваша длани, святии отцы, ко всех Влады́це,/ и́миже до́бре потруди́стеся, и Бо́гу угоди́сте,/ и требующим неоску́дно пода́сте,/ и устно́ ваша на молитву отве́рзите,/ и́миже Бо́га славосло́висте,/ и люди на Богоразумие наста́висте,/ ускори́те убо на помощь нашу,/ и от находя́щих на нас бед и зол/ и всякия нужды избавите нас вашими моли́твами к Бо́гу.
Сла́ва, и ны́не, Богоро́дичен:
Дево Всенепоро́чная,/ Яже Пресу́щнаго Бо́га рождшая,/ со святители Того непрестанно моли,/ оставле́ние прегреше́ний/ и исправление жития да́ти нам прежде конца,/ верою и любо́вию поющим Тя по долгу,/ Едина Всепетая.
Песнь 4
Ирмо́с: Услы́шах, Го́споди,/ смотрения Твоего́́ та́инство,/ разуме́х дела Твоя́/ и просла́вих Твое́ Божество.
Страстей моих смущение/ и многих бед нахождения бурю утиши́ти/ моли́теся, святии отцы, к Бо́гу вашими моли́твами.
Милосердия бездну простри́те нам, святии отцы,/ призывающим вас на помощь,/ я́ко Милосе́рдаго Бо́га и́мате, послушающа ваших молитв.
Надежду имуще вас, святии отцы,/ Петре, Алексие, Ионо, Филиппе и Ермогене,/ и я́ко сте́ну недви́жиму к Бо́гу ваша молитвы,/ зол и всех бед избавляемся.
Богоро́дичен: Исцели, Чи́стая, душевныя на́ша немощи и страсти телесныя,/ поспеши, Госпоже́, здравие подати моли́твами Твоими.
Песнь 5
Ирмо́с: Просвети́ нас повеле́нии Твоими, Го́споди,/ и мы́шцею Твое́ю высо́кою/ Твой мир пода́ждь нам,/ Человеколюбче.
Испо́лните, святии отцы, веселия живот наш,/ избавляюще нас варварскаго нахождения и междоусобныя брани.
Избавите нас от бед, святии чудотворцы,/ я́ко предста́телие теплии и молитвенницы о душах на́ших.
Разруши́те мглу прегрешений моих и безместных деяний/ вашими к Бо́гу моли́твами.
Богоро́дичен: Я́ко сте́ну нерушиму и пристанище стяжахом,/ и душа́м Тя совершенное спасе́ние,/ и простра́нство в ско́рбех, о Влады́чице,/ ны́не нас от страстей и бед спаси́.
Песнь 6
Ирмо́с: Моли́тву пролию́ ко Господу/ и Тому́ возвещу́ печа́ли моя,/ я́ко зол душа́ моя испо́лнися,/ и живо́т мой аду прибли́жися,/ и молю́ся, я́ко Ио́на:/ от тли, Боже, возведи́ мя.
Смерти и тли, и варварскаго пленения изба́вите,/ и огненнаго запале́ния свой град сохрани́те/ к Бо́гу вашими моли́твами.
Заступники вас ве́мы и твердыя хранители граду нашему,/ святителие Господни,/ тем к вам прибегающе, ми́лость приемлем и бед избавляемся.
Я́ко сте́ну и пристанище стяжа́хом вас, святии чудотворцы,/ пространство в ско́рбех/ подтверждение и спасе́ние душам нашим.
Богоро́дичен: Заступницу Тя живота вем и Хранительницу тверду, Де́во,/ напастей решащу молвы и налоги бесов отгоняющу/ и молюся всегда страстей мя избавити, Всенепоро́чная.
Конда́к, глас 3
Подо́бен: Дева днесь:
Во святителех благоче́стно пожи́сте/ и люди к Богоразумию наста́висте, и до́бре Бо́гу угоди́сте,/ сего ради от Него нетлением и чудесы прославистеся,/ я́ко ученицы́ Бо́жия благода́ти.
И́кос:
Первозва́ннаго наме́стницы и Российстии первопрестольницы,/ велиции светильницы, Петре, Алексие, Ионо, Филиппе и Ермогене,/ Троице поборницы, православию наставницы,/ в мире благоче́стно пожи́сте и учением свои́м вселенную просветисте,/ сего ради Царствию Небесному наследницы бы́сте, нетлением и чудесы́ прославистеся, я́ко ученицы́ Бо́жия благода́ти.
Песнь 7
Ирмо́с: От Иуде́и доше́дше о́троцы,/ в Вавило́не иногда́/ верою Тро́ическою пламень пе́щный попра́ша, пою́ще:/ отцев Боже, благословен еси́.
Наше спасе́ние, я́коже восхотел еси́, Спа́се, устроити,/ прославляеши Твоя́ уго́дники чудесы́, вопиющия Ти:/ отец на́ших Боже, благословен еси́.
Воли́теля милости, Егóже роди́ Мати,/ моли́те, святии Христовы святителие, Петре, Алексие, Ионо, Филиппе и Ермогене,/ избавити нас от прегрешений, и бед, и зол, зовущих:/ отец на́ших Боже, благословен еси́.
Сокровище спасения и источник исцеления,/ наставницы покаяния вы есте́, Божии уго́дницы, вопию́щим:/ отец на́ших Боже, благословен еси́.
Богоро́дичен: Сокровище спасения, и источник нетления,/ Тебе́ рождшую/ и столп утверждения, и дверь покаяния вопию́щим показа:/ отец на́ших Боже, благословен еси́.
Песнь 8
Ирмо́с: Царя Небе́снаго,/ Его́́же поют во́и А́нгельстии,/ хвали́те и превозноси́те во вся ве́ки.
Помощи вашея требующия не пре́зрите, святии отцы и наставницы Православия,/ пою́щия и превозносящия Христа́ во веки.
Неможение душ на́ших исцеля́ете и от телесных болезней возставляете/ вопиющих и превозносящих Христа́ во веки.
Исцелений богатство источаете к вам притекающим, Божиим уго́дником,/ и верно поющим, и превозносящим Христа́ во веки.
Богоро́дичен: Напа́стныя Ты прило́ги отгоняеши и страстныя находы, Де́во,/ я́ко да Тя пое́м и превозносим Чистую во веки.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобою, Де́во Чи́стая,/ с Беспло́тными ли́ки Тя величающе.
Точе́ния слез не пре́зрите, молим вас, святии отцы,/ Петре, Алексие, Ионо, Филиппе и Ермогене,/ и всем утеше́ние подати, блажа́щим вас.
Радости сердца́ на́ша испо́лните вашими к Бо́гу моли́твами,/ святии отцы и заступницы те́плии.
Светильницы пресветлии, Троицы побо́рницы,/ Петре, Алексие, Ионо, Филиппе и Ермогене,/ труды́ и подвиги вашими мрак неведения отгоняшеся, благоверно вас ублажающих.
Богоро́дичен: Света Твоего́́ заря́ми просвети, Де́во,/ мрак неведения отгоняющи и лю́тых бед спасающи,/ и́же благоверно Богоро́дицу Тя исповедающих.
Свети́лен.
Светоза́рныя светильники па́че солнечных луч/ от Светонача́льныя Троицы и Трисо́лнечныя Еди́ницы па́че естества́ сме́шены,/ Богоно́сныя восхвалим отцы.
Богоро́дичен:
Тебе́ песньми немо́лчными ублажаем, Де́во,/ Яже от Троицы Единаго во чреве прие́мши, Богоро́дице,/ Божественными руками Пресу́щное Слово носи́вши,/ непреложно и неизменно.
На хвалитех стихи́ры на 6, глас 8.
Подо́бен: О пресла́внаго чудесе́:
Имеяй душу милостиву/ и чист помысл, и се́рдце несмуще́нно,/ и веру непорочну,/ и любо́вь нелицеме́рну,/ учительство изрядно,/ и святительства достоинство,/ и ны́не лико́м святителей сопричта́лся еси́ на Небесех,/ сего ради почитаем тя, святите́лю Петре,/ священными пе́сньми благоче́стно вси ублажаем.
О пречестны́й отче, досточудне премудре Алексие,/ ты иноческим житие́м Бо́гу угодил еси́,/ тя Бог прежде избра́ от юности/ па́стыря овцам словесным и учителя велика;/ ты священником наказа́тель явился еси́/ и всей стране Российстей звезда пресветлая,/ осиявающи чудесы всех,/ верою припа́дающих к раце мощей твои́х,/ тем первосвятителей лик тя восприят,/ с нимиже моли́ся, прося стаду твое́му грехов оставление.
Отче Ионо, Богому́дре святите́лю,/ ты измла́да Христа́ возлюбив,/ и Того любви прилепился еси́,/ и от Него Пресвята́го Духа/ Божественными зарями се́рдце твое́ просветив,/ светови́ден вои́стинну был еси́,/ те́мже и́же ко храму твое́му притекающия/ прошения ко спасению сподо́би/ и моли́ Христа́ Бо́га спасти́ся душам нашим.
Течение совершил еси́ и веру соблюл еси́,/ святите́лю блаже́нне Филиппе,/ сего ради Христос тя венча́ светлым венце́м правды/ и украси́ твое́ исповедание, досточудне./ Тем Небесное наследие прием,/ Спасу моли́ся о воспева́ющих па́мять Твою́.
Глас 7:
Сотворите в песнех суд напи́сан:/ сла́ва сия́ будет великому Ермогену,/ той бо есть Православия ревнитель/ и всея Руси хранитель,/ я́ко орел, птенцы своя покрываяй.
Глас 8:
О пречестни́и досточуднии отцы,/ Петре, Алексие, Ионо, Филиппе и Ермогене!/ Поруче́нный вам талант умно́живше,/ радости сподо́бистеся Го́спода своего/ и ны́не предстоите́ с лики святителей,/ укра́шени благода́тию Божественнаго сияния,/ те́мже верою и любовию/ пресветлую вашу па́мять восхваляем,/ Христа́ величающе,/ прославльшаго Своя уго́дники.
Сла́ва, глас 6:
До́брии раби́, блази́и и ве́рнии,/ и добрии де́латели винограда Христова,/ вы тяготу дневную понесли есте́,/ и данный вам талант возрасти́вше,/ и по вас пришедшим не зави́девше,/ те́мже и дверь Небе́сная вам отве́рзеся,/ внидите в радость Владыки Христа,/ молящеся о нас, святии учителие.
И ны́не: Богородице, Ты еси́ лоза истинная:
НА ЛИТУРГИ́И
Блаженны, песнь 3-я и 6-я. Проки́мен: Честна́ пред Го́сподем смерть преподо́бных Его́́. Стих: Что воздам Го́сподеви о всех, яже воздаде ми? Апостол ко Евреом, зача́ло 335. Аллилуия: Свяще́нницы Твои́ облекутся в пра́вду, и преподо́бнии Твои́ возра́дуются. Стих: Внидем в селения Его́: Ева́нгелие Матфе́я, зача́ло 11. Причастен: Ра́дуйтеся, пра́веднии:
Святители Московские Петр, Алексий, Иона, Филипп и Ермоген
Святыя мученицы Харитины
На Го́споди, воззвах: стихи́ры, глас 4.
Подо́бен: Я́ко до́бля:
Радости я́ко тезоимени́тая,/ радостию пресели́лася еси́ в Черто́г, всечестная, Небесный,/ идеже твое́ возлюбила еси́ стяжа́ти жити́е,/ претерпевши огня болезненное истинно мучение,/ зубо́в убо и ногте́й всех искорене́ния,/ страстоте́рпице Харити́но, девому́ченице многострада́льная.
Львов сломила еси́ че́люсти, многострада́льная,/ че́люстей терпящи сокруше́ния,/ и ногте́й истерза́ния до́блественно терпела еси́,/ искореняющи лю́тая пре́лести свире́пства,/ в морския же вве́ржена глубины́,/ зло́бу потопля́ему творящи/ лукаваго ратобо́рца.
По кончине блаже́нней,/ в море тя вве́ржену,/ твой родитель, славная, прия́т тя, вопия́ со у́жасом:/ ка́ко ны́не облагода́тствися,/ священнейшее мое́ и любимое рождение,/ му́ками честна́го страдания/ и нарече́ние и́стинное соде́лала еси́,/ прообрази́вшее благода́тию?
Сла́ва, и ны́не, Богоро́дичен:
Ту́чами Ду́ха Пресвята́го, Пречистая,/ мою мысль ороси́,/ яже ка́плю рождшая, Христа, неизче́тно,/ безме́рная беззакония человеков щедро́тами измы́вшую,/ изсуши источник страсте́й моих/ и пото́ка мя сподо́би/ пищи Живыя при́сно моли́твами Твоими.
Крестобогоро́дичен, подобен то́йже:
А́гнца и Пастыря, Тя, на Древе я́ко виде,/ А́гница рождшая рыда́ше и ма́терски Ти веща́ше:/ Сы́не Возжеле́нне, како на Дре́ве Кре́стнем повешен еси́, Долготерпеливе?/ како ру́це и но́зе Твои, Слове, пригвоздишася от беззаконных/ и Кровь Твою́ излиял еси́, Владыко?
Тропа́рь, глас 4:
А́гница Твоя́, Иисусе, Харити́на/ зове́т ве́лиим гласом:/ Тебе́, Женише́ мой, люблю/ и, тебе́ и́щущи, страда́льчествую,/ и сраспина́юся, и спогреба́юся крещению Твое́му,/ и стражду́ Тебе́ ра́ди, я́ко да царствую в Тебе́,/ и умираю за Тя, да и живу́ с Тобою;/ но, я́ко жертву непорочную, приими́ мя с любовию, поже́ршуюся Тебе́./ Тоя моли́твами,/ я́ко Милостив, спаси́ души на́ша.
НА УТРЕНИ
Оба кано́на Окто́иха и святыя кано́н на 4, егóже краегране́сие: Харитины благода́ть пою любовию. Иосиф. Глас 4
Песнь 1
Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победил есть.
Твоими, о Харити́но, дарова́нии ум мой облагода́тельствуй,/ облагода́тившися страда́ньми священными,/ священно воспева́ти тя я́ко страстоно́сицу, и му́ченицу,/ и девством сияющую.
Благода́ть Пресвята́го Ду́ха тя одарова́вши,/ радостотво́рными украси́ плетеньми/ и радость вечнующую насле́дити укрепи, мужему́дренно пострадавшую.
На Кресте́ Тя воздви́жена, Владыко,/ разумевши благосла́вная Твоя́ мученица, раны терпи́т боле́зненныя,/ укрепляема силою твое́ю, наше естество укрепи́вшаго.
Богоро́дичен: Село́ вмести́тельно была еси́ Боже́ственнаго Естества, Богородительнице Чи́стая./ Тем Харитина, лю́бящи Тя, девственно всле́дствовавши Тебе́,/ Сыну Твое́му приведе́ся.
Песнь 3
Ирмо́с: Весели́тся о Тебе́ Це́рковь Твоя́́, Христе́́, зову́щи:/ Ты моя кре́пость, Го́споди,/ и прибе́жище, и утверждение.
Вже́гшее твою́́ душу желание Боже́ственное/ плотская́ раче́ния и лю́тая вре́ния мук погаси.
Разсе́дшася пред нога́ми твои́ми му́ченическими врага зря́ще Христовою благода́тию,/ хваления Ему приносим.
Крепостию вседе́тельною враждебную главу сокрушила еси́,/ твоея́ главы претерпе́вши, мученице, крепко пожже́ние.
Богоро́дичен: Еди́ну в жена́х, Благословенную Тя, Чи́стая, лю́бящи,/ Твоими благи́ми благода́тьми му́ченица Харитина просла́вися.
Седа́лен, глас 4.
Подо́бен: Удивися Иосиф:
Облагода́тствивши душу твою́́ Богода́нными доброде́тельми,/ просветилася еси́ истинно мучением твои́м, честна́я,/ и уневе́стилася еси́ Творцу твое́му, нетленна чистото́ю пребывши, Харитино,/ тем врага попра́ла еси́, многови́дная страда́ния же и болезни преодоле́нно претерпе́вши./ Сего ра́ди верою пресвятую твою́́ па́мять торжеству́ем.
Сла́ва, и ны́не, Богоро́дичен:
Удивися Ио́сиф, е́же па́че естества́ зря, и внимаше мыслию,/ и́же на руно́ дождь, в безсе́менном зача́тии Твое́м, Богоро́дице,/ купину́, огнем неопали́мую, жезл Ааро́нов прозя́бший,/ и, свидетельствуя, обру́чник Твой и хранитель свяще́нником взыва́ше:/ Дева ражда́ет и по рождестве паки Дева пребывает.
Крестобогоро́дичен:
Дева и А́гница, ви́девши на Кресте́ без се́мени из Нея А́гнца рождшагося/ и копие́м прободе́на,/ печали уя́звена стрела́ми, вопия́ше, боле́зненно восклица́ющи:/ что новое та́инство? ка́ко умираеши, И́же Живота Един Господь?/ Темже воскресни́, падшаго воздвиза́я пра́отца.
Песнь 4
Ирмо́с: Вознесе́на Тя ви́девши Церковь на Кресте́,/ Солнце пра́ведное,/ ста в чи́не своем,/ досто́йно взыва́ющи:/ сла́ва си́ле Твое́й, Го́споди.
Жертву я́ко непоро́чну,/ к заколению тя из отеческих, мученице страстоно́сице, восхи́тиша рук мучители,/ Отца Небе́снаго зело́ возлюби́вшую.
Отрокови́цам мудрым после́довавши,/ душевную свещу́ Твою́ бога́тно кровьми́ напои́ла еси́, всесла́вная,/ и Боже́ственный наследовала еси́,/ му́ченице радостоимени́тая, чертог.
Сердце твое́, раче́нием Женихо́вым распаля́емо,/ у́глие пре́лести, доблему́дренная, проли́тием погаси́ кро́ве/ и море многобо́жия изсуши́.
Богоро́дичен: Воплощеннаго родила́ еси́ Бо́жия Слова, Богороди́тельнице Чи́стая;/ Егóже Харитина, лю́бящи теплейше,/ огню́ противоополчи́ся и многови́дным му́кам.
Песнь 5
Ирмо́с: Ты, Го́споди, мой свет,/ в мир прише́л еси́,/ Свет Святый, обраща́яй из мра́чна неве́дения/ верою воспева́ющия Тя.
Главы́ остриже́нием и у́глия разжже́нием оскорбляюще тя, Богому́драя,/ разума твоего́ кре́пости никакоже поколеба́ша.
Гво́здие Твое́ и заколе́ние прообразу́ющи, Го́споди,/ разжже́нных рожно́в терплю́ болезнь,/ мученица вопияше.
Отто́рженным рук твои́х и ног, дево чистая, ногте́м,/ теку́щею честно́ю твое́ю кровию верный освяти́ла еси́/ и демонския кро́ве мир христоподо́бно очи́стила еси́.
Богоро́дичен: Ум земны́й твоего́ па́че естества́ зача́тия не может разумети,/ Ма́ти Де́во, Отрокови́це:/ Бо́га бо родила́ еси́.
Песнь 6
Ирмо́с: Пожру́ Ти со гла́сом хвале́ния, Го́споди,/ Церковь вопие́т Ти,/ от бесо́вския кро́ве очи́щшися,/ ра́ди милости от ребр Твоих/ исте́кшею Кро́вию.
Благода́тьми и зна́мении Христос венча́ священную Твою́ главу́,/ за Негoже пострада́ти изво́лила еси́, страстоте́рпице,/ радости Боже́ственныя тезоимени́тая.
Ио́ну из глубины́ Изба́вивый/ и тебе́, в морскую пучи́ну вве́рженную, спасает жи́ву, Богому́драя,/ и глубино́ю крове́й твои́х врага погрузи́л есть.
Оружием терпения враги умертви́ла еси́́/ и, терпя́щи зубо́в всеконечное истерза́ние, сла́вная,/ львов безплотных че́люсти сломи́ла еси́.
Богоро́дичен: Крепость Тя обре́тши, Де́во, и утвержде́ние,/ Харитина страстоте́рпица му́ки крепко терпи́т/ и, ра́дующися, во след Тебе́, всех Влады́це, приво́дится.
Конда́к, глас 2:
Подо́бен: Вышних ища́:
Крепким разумом, Харити́но,/ душу утве́рждши верою,/ бори́теля врага я́ве посрами́ла еси́,/ у Христа́ предста́, всеблаженная,/ червлени́цу от крове́й твои́х нося́щи,/ и при́сно со А́нгелы ра́дуешися,/ моли́ за ны, страстоте́рпице.
Песнь 7
Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:/ благословен еси́ в храме Славы Твоея́,/ Го́споди.
Юныя три о́троки от пе́щи Изба́вивый/ спасает от колесе́ тя, мученице, огневи́днаго, благода́рственно воспева́вшую:/ благословен еси́ в храме Славы Твоея́, Го́споди.
С девами, свещено́сица, на Небе́сная восхо́диши,/ огненныя свещи́ кре́пко, внегда пе́ти, терпе́ла еси́:/ благословен еси́ в храме Славы Твоея́, Го́споди.
Обличе́н терпением твои́м пребеззаконный,/ ру́це связует и но́зе, и во глубины́ вмета́ет тя, поющую:/ благословен еси́ в храме Славы Твоея́, Го́споди.
Словом твои́м Боже́ственным безслове́сие врагов обличи́ла еси́,/ страсте́й страстьми́, мученице, животво́рных исполнила еси́ лише́ние,/ благословен еси́, зову́щи, Боже мой, Го́споди.
Богоро́дичен: Де́ву Едину, я́ко Чи́сту Тя и Нетленну, Слово Чистое возлюби́/ и из Тебе́ возсозда́ Воплоща́емый, Отроковице, всего человека,/ Харитину прославив чудесы́.
Песнь 8
Ирмо́с: Ру́це распросте́р Дании́л,/ львов зия́ния в ро́ве затче́,/ о́гненную же си́лу угаси́ша, доброде́телию препоя́савшеся,/ благоче́стия рачи́тели,/ о́троцы взыва́юще:/ благословите вся дела Господня Го́спода.
Красна́ добро́тами твои́х язв была еси́/ и причта́лася еси́, дево, нетленна пребывши, красному Слову, всечестна́я,/ от Девы нас ради воплоще́нному Христу, Емуже вопием:/ благословите вся дела Господня Го́спода.
Всеми бори́ма прило́ги му́чащих тя,/ до́блественно претерпе́ла еси́ колесе́ паля́ща лю́тость, рожно́в разжжения,/ в глубину вверже́ние и зубо́в, честна́я, и ногте́й искорене́ния,/ Христа́ величающи во веки.
Но́зе твои́ добро́тами болезней, славная, украси́стеся,/ тем, на во́ды ступа́ющи, не омокри́стеся,/ с тобо́ю пребывающим, дево мученице, славным Божиим А́нгелом,/ с нимиже вопия́ла еси́:/ благословите вся дела Господня Го́спода.
Чудо, удивляющее всяк ум по сконча́нии,/ како родителю издаде́ мо́щи твоя́ глубина́ приемшая, яже погребе́ отечески,/ сокро́вищствует благода́ть от Тебе́, Харитино,/ Царство прии́м Небесное.
Богоро́дичен: Яви́лася еси́ превы́шшая Небес, Бо́га Небе́снаго поро́ждши,/ онебеси́вшаго земноро́дных, Пречи́стая, все смеше́ние/ и Харитины честну́ю па́мять просвети́вша, Емуже пои́м:/ благословите вся дела Господня Го́спода.
Песнь 9
Ирмо́с: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христос, совокупи́вый разстоя́щаяся естества́:/ тем, веселящеся, Тя, Богоро́дице, величаем.
Да венце́в славы, я́ко нетленная, де́во мученице, получи́ши,/ вся́ких мучений вид претерпе́ла еси́,/ веселя́щися духом и разума твердостию.
Я́ко удобре́ная, и кра́сная, и Богоугодная дева,/ я́ко непобеди́мая мученица и Владычня невеста непорочная,/ златови́дными крилы́ к Небе́сным возлете́ла еси́.
Ты, светови́дная страстоте́рпице, возсия́ла еси́ луча́ми,/ мрак лукавствия де́монов и страсте́й отго́ниши/ Богода́нными ти всегда чудоде́йствы, досточу́дная.
Радостный твой день, веселя́щися, люди совокупля́ет твоя́ до́блести воспети,/ и по́двиги, и борения, и мужественное страда́ние,/ великомученице радостотезоимени́тая.
Богоро́дичен: Свет нам возсия́ из утро́бы неискусобра́чныя Твоея́: Де́во,/ Егóже сия́ньми озари́вшися Боже́ственно,/ свет бысть радости, тезоимени́тая,/ Богородительнице Неискусобра́чная.
Преподобных отец на́ших Дамиа́на пресвитера, Матфе́я и Иереми́и прозорливых, в Ближних пещерах почивающих
НА ВЕЧЕ́РНИ
На Го́споди, воззвах: стихи́ры на 6, глас 4
Подо́бен: Я́ко до́бля:
Одержи́ма мя боле́зньми душевными и телесными,/ еле́ем милости твоея́,/ я́ко пома́зание имы́й священное свыше,/ Дамиа́не преподо́бне,/ скоро исцели вопию́ща к тебе́ от сердца,/ и моли́твами теплыми к Бо́гу/ даждь смирение сердцу моему,/ согнившияся же души моея стру́ны очисти,/ да чистыми устнами принесу Бо́гу хваление,/ прославляющемуся во святы́х Своих.
Духа Пресвята́го благода́тию/ озарив свою душу, Иереми́е прехвальне,/ приял еси́ дар от Бога/ будущая, я́ко настоящая, провозвещати,/ и, древнему подобяся пророку,/ неложне вся предска́зовал еси́,/ и провидел еси́ тайны человеческаго сердца,/ озаре́нием твои́м и на́ша сердца просвети/ и испроси от Христа́ Бо́га велию ми́лость.
Матфе́ю, Слова Бо́жия провозвестнику,/ последовал еси́ чу́дне,/ я́коже бо той ефио́пския непокаряющияся люди/ дерзновенно обличаше,/ тако и ты, блаже́нне,/ подземных лукавых ефиопов/ посрамил еси́ хитроплетенныя козни./ И ны́не молим тя, отче,/ мысленне очерняющия умы на́ша/ бесо́вския полки прожени́,/ и избави от бед души на́ша.
Сла́ва, глас 2:
Троицу достоблаженных отец,/ Троицы предстателей,/ Дамиа́на, и Иереми́ю, и Матфе́я,/ приидите, лю́дие, хвалами почтим/ и принесем славосло́вие в Вышних Сущему Бо́гу,/ давшему уго́дники Своя Российстей земли́ в помощь,/ и молитвенники о душах на́ших.
И ны́не, Богоро́дичен.
На стиховне в Октоихе.
Сла́ва, глас 6:
Светлая и светоносная возсия днесь па́мять ваша,/ отцы наши всеблаженнии,/ светло бо облиста́ете чудес лучами, к вам приходя́щих/ и просящих от вас те́плаго заступления./ Тем убо и мы припа́даем к мощем вашим,/ усердно тыя лобызающе,/ и сла́вим Бога, давшаго вам толи́ка дарования,/ имиже и нас обогати́те/ и испроси́те от Христа́ велию ми́лость.
И ны́не, Богоро́дичен:
Тропа́рь, глас 1:
Христовых повелений светом сердца́ своя просвети́вше,/ страстный мрак прогнасте,/ те́мже Троицы селение бысте тричисленнии отцы,/ Дамиа́не, Иереми́е с Матфе́ем,/ от Неяже благода́ть приемше,/ недужныя исцеляете, будущая возвещаете/ и, А́нгелом сопричастницы суще,/ моли́теся Христу́ Бо́гу дарова́ти нам причастие святых.
Кано́н преподо́бным отцам, глас 5.
Песнь 1
Ирмо́с: спаси́телю Бо́гу,/ в мо́ри люди немо́крыми ногами наста́вльшему/ и фарао́на со всево́инством пото́пльшему,/ Тому Единому поим, я́ко прославися.
Спаси́телю Бо́гу хваление принесе́м,/ славословяще уго́дника Его́ преблаженнаго Дамиа́на, недужным мудраго врача,/ и возопиим Давшему таковая дарования, я́ко прославися.
Наставника своего́ равноангельному житию подражал еси́ ревностию непреста́нною,/ от негoже наста́влен, украси́лся еси́ доброде́телию,/ немолчно во хвалении по вся но́щи без сна пребывая и взывая Бо́гу, я́ко прославися.
С пророки предстоя ны́не Спаси́телю Бо́гу, я́ко дерзновение имы́й,/ моли́ся благода́тию облиста́ти сердца́, с верою тя, Богодухновенне Иереми́е, блажащих/ и Спаси́телю вопиющих, я́ко прославися.
Разумное око Божие всевидящее, видя твое́ чистое сердце, блаже́нне Матфе́е,/ даде́ тебе́ дар тайны человеческия ве́дати и открывати на пользу всем,/ да тобо́ю наставля́еми поют Бо́гу, я́ко прославися.
Богоро́дичен: Разумное солнце сущи Тричисленнаго Божества́, Де́во Чи́стая,/ на́ша умы помраченныя страстьми́ и сластьми́ озари,/ да Тобо́ю просвещаеми, пое́м Бо́гу, я́ко прославися.
Песнь 3
Ирмо́с: Силою Креста Твоего́, Христе́́,/ утверди́ мое помышление,/ во еже пети и сла́вити/ спаси́тельное Твое́ вознесение.
Силою Божиею укрепля́ем, был еси́, блаже́нне, кроток и молчалив,/ к Бо́гу беседуя теплыми моли́твами, и упражняяся прилежным чтением Святых Писа́ний, и тем утверждаяся о Го́споде,/ я́коже сожительствующии о тебе́ ясно поведаху.
Брашно твое́ и питие бысть Слово Божие, имже пита́л еси́ душу твою́́, преподо́бне,/ тело же твое́ хлебом токмо и водою, и сим питался еси́ до дне смерти своея,/ вся духу покоряя востающия страсти.
В старости масти́те, исполнив лета своя, Иереми́е,/ приял еси́ дар прови́дети тайны сердечныя, и обличал еси́ на едине́ лукавая человеческая помышле́ния,/ и наставлял блюстися от диаволя совета.
К первонача́льным отцем Печерским пришед, вселился еси́ с ними/ и, иночествуя, вся похоти телесныя победил еси́,/ те́мже приял еси́ от Бо́га дарование, я́ве зрети лица подземных ефио́пов, Матфе́е чудне.
Богоро́дичен: Преобразу́ющийся в различныя виды лукавыя ефиопы и действующия мысленне во удесе́х на́ших, Богоро́дице,/ посещением лица Твоего́́ устрани́ и прожени́,/ да без смущения пое́м Твою́ спаси́тельную си́лу.
Седа́лен, глас 8:
Я́ко сугу́бую приемый благода́ть от Бога, Дамиа́не,/ сугу́быя исцеляеши страсти душевныя прилежными моли́твами,/ телесныя же возложением руки и пома́занием свята́го елеа;/ нас, стра́ждущих обои́ми неду́ги,/ уврачуй, и отжени ураня́ющия ны страсти,/ и моли́ся Христу́ Бо́гу/ получити вечный живот почитающим святое успение твое́.
Сла́ва, и ны́не, Богоро́дичен:
Всенепоро́чная Невесто, пространное селение Бо́жия Слова,/ страсте́й мя, суща скверное селение, очисти и светлое обита́лище доброде́телей покажи,/ прожени́ тьму беззаконий и прича́стия сподо́би Света невечерняго моли́твами Твоими,/ да пою Твою́ несказа́нную ми́лость.
Песнь 4
Ирмо́с: Услышах слух силы Креста,/ я́ко рай отве́рзеся им,/ и возопих:/ сла́ва си́ле Твое́й, Го́споди.
Благово́нный грозд винограда Бо́жия Ма́тере показался еси́,/ напое́н росою учений преподобных отец,/ и иска́паеши вино́ исцелений всем,/ к тебе́ с верою притекающим, Дамиа́не, Божий служителю.
Оружием веры и любве́ пламенем огражден быв, блаже́нне,/ отгнал еси́ врагов, вредя́щих недугами человеки;/ прилежная бо твоя́ моли́тва, о́блаки преходящи, прогоняше болезни, досточудне Дамиа́не.
Я́ко провидец человеческих помышлений, предзрел еси́ плещи́ дающих врагом и хотящих изы́ти от святыя сея́ ограды,/ растворенным любве словом нака́зовал еси́, Иереми́е,/ стати к боре́нию крепко и про́тиву врагов непоколебиму быти.
Открове́нными очи́ма яве узрел еси́ единою в церкви обходя́ща бе́са во образе воина/ и мета́юща на братию от воскрилия риз лепко́выя цве́тцы,/ да исходят прежде благословения сном омраче́нны,/ тех, отче, нака́зовал еси́ стояти неленостно и крестным оружием себе ограждати.
Богоро́дичен: Обстои́ма мя демонскими полки́/ и устреля́ема ласкосе́рдствующими страстьми́, Ма́ти Бо́жия,/ укрепи и подаждь ми благода́ть победити тех ле́стныя козни,/ да пребуду поя Твою́, Чи́стая, помощь.
Песнь 5
Ирмо́с: У́треннююще, вопие́м Ти,/ Го́споди, спаси́ ны:/ Ты бо еси́ Бог наш,/ разве бо Тебе́ иного не знаем.
О всех, в болезни приходя́щих, блаженный твой наставник Феодо́сий повелеваше тебе́ молитву творити,/ ты же смирен сый и благопокорив недостойна себе вменял еси́ исцеления дара,/ но повеление творя отца своего, молитвою и елеем подавал еси́ здравие болящим.
Я́ко добр путник, до́бре шествовал еси́ жизни сея путь, подтверждая себе иноческими подвиги,/ егда же доспел еси́ кончины своея, недостаточное болезнию навершив,/ чист па́че злата отшел еси́ в покой безболе́зненный.
Прозрением от Бо́га тебе́ данным, что либо видел еси́, блаже́нне,/ не ложно вся́кому ска́зовал еси́, и сбывашеся слово твое́ в пра́вду;/ тем, я́ко пророком славу и преподобным состоя́теля, досто́йно тя ублажаем, Иереми́е.
Никогдаже изходил еси́ из церкве прежде окончания пения, но всегда последи́,/ несытное имея желание во славосло́вии Божии пребывати;/ сего ради Бог прослави тя пред А́нгелы и человеки, Богоносне Матфе́е.
Богоро́дичен: Святую гору Божию и дом Славы Вы́шняго ве́дуще Тя, Чи́стая Де́во,/ во смирении припа́дая, молюся:/ возведи мя на высоту добродетельнаго жития́/ и сотвори мя чистый храм к восприятию Боже́ственных дарований.
Песнь 6
Ирмо́с: Обы́де мя бездна,/ гроб мне кит бысть,/ аз же возопи́х к тебе́, Человеколюбцу,/ и спасе́ мя десни́ца Твоя́, Го́споди.
Шествовав на земли правыя стези,/ при кончине молитву к Венцеда́вцу растворил еси́ слезами,/ прося Того благость, еже не лишити тя Царствия Небе́снаго/ и сожития отца твоего́ преподо́бнаго Феодо́сия.
В Свете неприступнем с преподобными прича́стия не лишитися жела́я,/ со смирением ко Христу́ возсылал еси́ мольбы и получил еси́, еже просил;/ мудрый бо Содетель извести́ тебе́, извещением чу́дным,/ я́ко да благонадежден отидеши в покой праведных почити.
В старости глубоце обнови́ся юность твоя́ духовне, преподо́бне Иеремие,/ оставль бо ветхий покров теле́сный, в новое отшел еси́ душею селение,/ к древним пророком на зрение Славы Бо́жия.
Седяй еди́ною под церковным билом,/ узрел еси́ биющую во двери сердец на́ших великую толпу мрачных бесов/ и, вопросив, уве́дал еси́ их к некоему брату идущих,/ сего ради многих от братии любе́зно сам нака́зовал еси́, како о́ных блюстися;/ научи убо и нас, блаже́нне, да не внидут в двери сердец на́ших.
Богоро́дичен: Избави мя, Влады́чице, бесо́вских страстей обстоя́ний,/ да не внидут в дом души моея тех лукавыя то́лпы,/ загради мысленныя двери се́рдца страхом/ и даждь ми бодрствовати и внимати спасению моему.
Конда́к, глас 2:
Я́коже древнии проро́цы благода́ть проро́чествия приемше/ и неложне духом предзре́вше, прорекоша наити́ хотящая,/ тако и вы в жизни нашей злая, грехов ради на́ших на ны грядущая, предвозвести́́сте;/ и ны́не да не постигнут ны злая,/ испросите от Христа́ Бо́га исправление дело́м нашим и велию ми́лость.
И́кос:
Тезоимени́тым свои́м подражавше и А́нгельски на земли поживше, великих дарований сподо́бистеся Иереми́е и Матфее,/ предвозвещающе бо будущая, многих ко исправлению приведосте, бе́сы посрамисте, человеки удивисте;/ и ны́не по временной жизни в безконечной с А́нгельскими лики живуще,/ просите у Христа́ Бо́га исправления дело́м нашим и ве́лия ми́лости.
Песнь 7
Ирмо́с: В пещи́ огненней/ песносло́вцы спасы́й о́троки:/ благословен Бог/ отец на́ших.
Предста тебе́ А́нгел Божий, святе Дамиа́не, во образе преподо́бнаго Феодосия/ и, пад на перси твоя́, лобызаше любе́зно, я́ко любимаго Бо́гу, человеком же и А́нгелом,/ ты же воспел еси́, благословен Бог отец на́ших.
Явлейся рекл есть:/ се чадо, о немже мо́лишися Го́сподеви, послан есмь известити тебе́,/ я́ко по прошению твое́му будет ти и водворишися в Царствии Божии со святыми./ Сия́ словеса слышав, радостно воспел еси́, Дамиа́не:/ благословен Бог отец на́ших.
Что есть сладча́е и что есть бо́льшее, я́ко еже жити со святыми вкупе,/ идеже живет Христос, во Свете невечернем,/ тамо и тебе́ уготовася упокоения место, Дамиа́не, еже и нам получити, моли́ся, поющим:/ благословен Бог отец на́ших.
В ли́це со святыми, в чести с пророки, в стоянии со А́нгелы сподо́блен еси́, учинен, Иереми́е, быти от Бога,/ Емуже моли́ся и нам чисте предстати без воздушных препятий поющим:/ благословен Бог отец на́ших.
Любовь имея ко братии присно, Матфе́е, вся откровенная тебе́ открывал еси́ на пользу всем/ и нака́зовал еси́ келлии приседе́ти, плакатися же о гресех своих и пети:/ благословен Бог отец на́ших.
Богоро́дичен: Изба́вленнии Тобою, Пречистая, от всех бесо́вских наве́тов,/ непрестанно Рождшемуся из тебе́ зовем:/ благословен Бог отец на́ших.
Песнь 8
Ирмо́с: Из Отца прежде век рожде́ннаго Сы́на и Бога/ и в последняя ле́та воплоще́ннаго от Девы Матере,/ священницы, пойте,/ лю́дие превозносите во вся ве́ки.
Явльшагося тебе́ от Отца Светов по́сланна, разумел еси́ быти наставника твоего́ Феодо́сия Богоноснаго,/ егóже пригласив, известил еси́, что представый глаго́лаше и что тебе́ обеща, Дамиа́не;/ то́йже пове́даемым удивляшеся и превозносяше Го́спода во веки.
С веселием истя́зовал еси́ обещания от наставника твоего́ и отца, глаголющи:/ будет ли, отче, еже на прошение мое обещал ми еси́?/ Той же отвеща́: не вем, чадо, о немже вопрошаеши мя,/ А́нгел бо Божий бысть, обещавый тебе́,/ и той вселит тя тамо, идеже поют святии Го́сподеви во веки.
Радостен и благонадежден сый от сицева́го извеще́ния,/ отшел еси́ в светоно́сная места светоно́сными проводим ангелы,/ с нимиже и поеши Го́спода во веки.
Вся́кое твое́ ве́дение бяше спаса́ющимся в наказание, преподо́бне Матфе́е,/ ниже́ начальствующий отрину твое́ наказание, имже возбужде́н доспе́ скорее блаженства,/ идеже святии превозносят Го́спода во веки.
По многих открове́ниих отшел еси́ в старости глубоце, Матфе́е,/ откровенным лицем Престо́лу Божию предстояти:/ моли́ся же и о нас, святе, да с тобо́ю сподо́бимся Го́спода ви́дети и превозносити хвалами во веки.
Богоро́дичен: Един Сый существо́м от Троицы Бог Слово,/ в Твою́, Чи́стая Де́во, утробу вселися и нам соесте́ствен плотию явися,/ Eгoже благословяще превозносим во веки.
Песнь 9
Ирмо́с: Тя па́че ума и словесе́ Матерь Божию,/ в лето Безлетнаго/ неизреченно рождшую,/ ве́рнии единомудренно величаем.
Что тя нареку, блаженное сие место:/ твердь ли Небесную, на нейже троица отец, аки звезды, чудесы сияют/ и озаряют честну́ю их па́мять празднующих, и песньми благоче́стно их ублажающих.
От временнаго света к Вечному преставльшеся Све́ту,/ светоношении вашими на́ша сердца просветите/ и испросите моли́твами вашими,/ да в свете заповедей Господних ходяще, узрим с вами Свет невече́рний.
Благода́ть исцелений от Бо́га святии еще в жизни сей приемше,/ нас страстьми одержимых скоро исцели́те,/ верно бо притекаем к мощем вашим и, молящеся, песньми величаем.
Просла́вим Бога, святы́х Своих Дамиа́на, Иереми́ю и Матфе́я прославльшаго,/ и́же Его́ в телесех, аки А́нгелы поживше, прославиша,/ Егóже и молим, да па́мять их днесь хвалами величающих,/ не лишит нас с ними Небесныя Своея Славы.
Богоро́дичен: Доспех кончины стихословия святым твои́м в память/ и помянух кончину, егда приидет время разрешится мне от соуз плотски́х,/ трепе́щу, я́ко грядет день Судный, от негoже кто мя избавит, аще не Ты, Чи́стая Де́во?/ Темже к Тебе́ выну во хвалении прибегаю.
Свети́лен:
Свято поживше на земли, святи есте и на Небеси и с А́нгельскими лики предста́сте Бо́гу;/ от Негoже приемше возмездие трудом своим, нас не забу́дите,/ но, руководяще, наставите на путь прав,/ да тем ходяще, обрящем ми́лость в день Судный.
Богоро́дичен: Свят храм Твой зде и дивен в пра́вду,/ Сама бо, сущи храм Бо́жия славы, Свои́м промыслом создала́ еси́/ и украси́ла еси́ отец святы́х равноангельным житием на́шего ради жительства;/ злообразие наше в благолепие претвори́,/ да вожделеет Царь добро́ты душ на́ших и излиет на ны великую Свою ми́лость.
На хвалитех стихи́ры, глас 4.
Подо́бен: Дал еси́ знамение:
Светлое приятие бысте Ду́ха Пресвята́го,/ отцы всеблаженнии,/ и, от Того просвеща́еми Боговидно,/ пророчествия даром обогати́стеся,/ и будущих предуведение и разум истинный стяжасте;/ те́мже молим вы, моли́теся о нас/ Иису́су Человеколюбцу и Спасу душ на́ших.
Я́коже истиннии пророцы,/ нело́жными указании вся предрекосте наити хотящая/ и провозвести́сте, преподо́бнии отцы,/ Матфе́е и Иереми́е с Дамиа́ном досточу́дным,/ весть бо Дух Святый просвеща́ти чистыя сердцем/ и подаяти благода́ть откровения;/ сего ради прославляем вас прославльшаго/ Иису́са Человеколюбца и Спаса душ на́ших.
Любовию Боже́ственною распалаеми/ и желанием благ грядущих,/ любе́зно тесный путь проидо́сте,/ нивочтоже вменивше того скорби,/ тем ны́не в прохладне месте ликующе,/ любо́вию вас почитающим дадите от дарований ваших/ и молите о нас, Дамиа́не и Иереми́е с Матфе́ем,/ Иису́са Человеколюбца и Спаса душ на́ших.
Сла́ва, глас 6:
Троицу преподобных отец,/ ве́рнии, сошедшеся, ублажим,/ оваго, я́ко исцеления дар приемшаго,/ оваго же, пророчествия истиннаго исполненнаго,/ оваго же, невидимая прозрящаго,/ ихже торжества день, почита́юще,/ сла́вим Бо́га нашего/ и молим, еже умирити мир/ и спасти́ души на́ша.
И ны́не, Богоро́дичен: Богоро́дице, Ты еси́ Лоза:
Преподобный Дамиан, пресвитер и целебник Печерский