3-й день

Свята́го священному́ченика Диони́сия Ареопаги́та

Преподобнаго Диони́сия Затворника, в Да́льних пеще́рах почива́ющаго

На Го́споди, воззва́х: стихи́ры на 6, глас 1

Подо́бен: Небе́сных чино́в:

Во вну́треннейший мрак непристу́пнаго Света/ ты разу́мно вшед,/ навы́кл еси́ Боже́ственная недоуме́нная Сло́ва,/ учениче́ Христов, свяще́нне Диони́сие,/ и А́нгельския чины на земли/ я́вственно изъясни́л еси́.

Трисия́нною заре́ю просвети́в Твою́ ду́шу/ и огне́м веще́ственным, изнуря́ющим тело,/ к невеще́ственней преста́вился еси́́, о́тче, Све́тлости,/ со А́нгелы совокупи́лся еси́́:/ с ни́миже моли́ся непреста́нно за нас/ спасти́́ ду́ши на́ша.

Па́стырски преизя́ществовав в Це́ркви Бо́жией,/ се́рдце твое́, о́тче,/ прия́тельно благода́ти Ду́ха соде́лал еси́́./ Те́мже и нам источа́еши, я́ко во́ды,/ от честны́я твоея́ ра́ки всегда́,/ Диони́сие, исцеле́ния.

И́ны стихи́ры, глас то́йже

Подо́бен: Всехва́льнии:

У́дицею благода́ти, мудре,/ Па́вел Боже́ственный, народовеща́в, улови́ священноявле́нна/ и неизрече́нных зрителя соде́ла,/ тя, сосу́д избра́нный, ви́дев./ С ни́мже моли, благоглаго́ливе Диони́сие/ спасти́ любо́вию пою́щия тя.

А́нгелом равноче́стен ум, о́тче Диони́сие,/ доброде́тели ра́ди соделав,/ преми́рное священнонача́льства благочи́ние, всему́дре,/ сих священноповествова́л еси́,/ и́миже учини́л еси́ Церковная составле́ния,/ Небе́сным чино́м подо́бяся.

Любомудре́йше Бо́гу, блаже́нне Диони́сие,/ я́ко мо́щно подо́бяся,/ именова́ний твое́ та́инственно Боже́ственных/ благоче́стно распросте́рл еси́/ Боже́ственное, Богомудре, сказа́ние,/ едине́нием лу́чшим навы́к, яже па́че мысли,/ и научил еси́ мира концы́.

Сла́ва, глас 2. Андре́я Иерусали́мскаго:

Прииди́те, ве́рнии,/ согла́сно ле́тнюю па́мять иера́рхов похва́лим,/ Диони́сия же и Киприа́на:/ ов бо оплева́в сто́иков филосо́фов/ и сосу́дом избра́нным научився,/ неизрече́нных та́ин зна́тель бысть;/ ов же, добрыя ради девы Иустины ,/ по́мысл просвети́в, де́монския пре́лести избеже́/ и волше́бныя книги огне́м изже́г,/ Евангельский проповедник бысть./ Тем и мы, гре́шнии,/ просла́вльшему сия́ Спасу славосло́вяще, возопии́м:/ И́же Твоя́ страстоте́рпцы славою венча́вый, Христе́́ Боже,/ тех моли́твами спаси́ души на́ша.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда Нескве́рная А́гница ви́де Своего́ А́гнца,/ на заколение, я́ко человека, волею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, Рождшую Тя,/ что́ сие сотворил еси́, Изба́вителю всяческих;/ оба́че воспева́ю и сла́влю Твою́, юже па́че ума и сло́ва,/ кра́йнюю благость, Человеколюбче.

На стиховне Окто́иха. Сла́ва, глас 4:

Небе́снаго зна́ния невидимую глубину́ тебе́ нарече́м,/ светле́йший мучениче Христов,/ я́ко бо ору́жника/ и тве́рда побо́рника Церкве воспеваем тя, мудре:/ огне́м бо чисте́йшим просиял еси́,/ сподо́бився вку́пе с Вы́шними воинствосло́вии/ све́тлою оде́ждею облещи́ся Христа/ и озари́в ум све́тлостию Ду́ха Свята́го, Диони́сие./ Тем Твою́ всеми́рную па́мять торжеству́им ве́рно,/ сла́вяще просла́вльшаго тя Го́спода.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Па́стыря, Тя на Древе я́ко виде,/ А́гница ро́ждшая рыда́ше и ма́терски Ти веща́ше:/ Сы́не Возжеле́нне, ка́ко на Дре́ве Кре́стнем пове́шен еси́, Долготерпели́ве?/ ка́ко ру́це и но́зе Твои, Слове, пригвозди́шася от беззаконных,/ и Кровь Твою́ излия́л еси́, Влады́ко?

Тропа́рь, глас 4:

Бла́гости научи́вся и трезвя́ся во всех,/ благо́ю со́вестию священноле́пно обо́лкся,/ поче́рпл еси́ от сосу́да избра́ннаго неизрече́нная/ и, ве́ру соблю́д, ра́вное течение совершил еси́,/ священномучениче Диони́сие,/ моли́ Христа́ Бо́га спасти́́ся душа́м нашим.

Сла́ва, и ны́не, Богоро́дичен или́ Крестобогоро́дичен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен или́ Крестобогоро́дичен. Оба кано́на Окто́иха со ирмосом на 8 без му́ченичнов и свята́го на 6, его́же краегране́сие: Ум хвалю́ му́дрых уче́ний. Феофан. Глас 8

Песнь 1

Ирмо́с: Во́ду проше́д, я́ко су́шу,/ и египетскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Павлом Боже́ственным науче́н, Небесных, Диони́сие, ви́дцем,/ Небесный таи́нник а́бие и Боговеща́тель был еси́.

Иже благода́тию Божиею озари́вся,/ просвети́, блаже́нне, пою́щих тя ду́ши/ твоя́ разуме́ти Богодухнове́нная учения, Диони́сие.

Умом преочище́нным и душе́ю/ Небесных удобре́ний сия́ния уве́дети сподо́бился еси́/ и тех ликостояния, Диони́сие.

Богоро́дичен: Черто́г светоно́сный па́че ума воплоще́ния яви́лася еси́ всех Соде́теля:/ из тебе́ бо плоть, Богомати, нашу оде́ял есть.

Песнь 3

Ирмо́с: Небе́снаго круга Верхотво́рче, Го́споди,/ и Церкве Зижди́телю,/ Ты мене утверди́ в любви Твое́й,/ жела́ний кра́ю,/верных утвержде́ние,/ Едине Человеколюбче.

Небесных круго́в превозше́д, отче, преми́рных чины , и во́инства, и све́тлости,/ высоковеща́ньми слове́с и всемудрыми уче́нии всем изъясни́л еси́.

Высокаго виде́ния насы́щся, преподо́бне,/ име́н Боже́ственных Боже́ственное разумение Богосло́вил еси́,/ Тро́ичный Богослов быв благода́тию, Богоблаже́нне Диони́сие.

Умертви́вся ны́нешним желанием, еже к Бо́гу,/ и любому́дрию крепко научи́вся,/ су́щим па́че ума животво́рным дарова́нием Богоносный орга́н, отче, был еси́.

Богоро́дичен: Дея́нием, Де́во, Вседе́тельнаго Духа,/ тело Влады́це всех плодоноси́ла еси́,/ в Немже осуди́ся мира грех и Жизнь источи́ся ве́чнующая.

Седа́лен, глас 8.

Подо́бен: Прему́дрости:

В пучи́не премудрости уча́, Ду́ха глубины́,/ Тро́ицы Едино Божество́ пропове́дал еси́, преподо́бне,/ списа́в вся А́нгельския чины и тайная тех сия́ния, Богомудре./ Тем и нижнюю иера́рхию счиня́я,/ ко единому вся возве́л еси́ еди́нству, иерарше Диони́сие./ Моли Христа́ Бо́га прегрешений оставле́ние дарова́ти/ честву́ющим любо́вию святу́ю па́мять Твою́.

Сла́ва, и ны́не, Богоро́дичен:

Солнца о́блаче разу́мнаго,/ Божественнаго Света свети́льниче златокова́нный,/ Нескве́рная, Небла́зная, Всенепоро́чная Влады́чице,/ омраче́нную душу мою ослепле́нием страсте́й/ безстра́стия заре́ю просвети́, молюся./ И оскверне́нное мое се́рдце омы́й пото́ки умиления, покаяния же слеза́ми,/ и от тимения мя очисти дел моих, да любо́вию зову Ти:/ Богоро́дице Приснодево, моли́ Христа́ Бога, прегрешений оставле́ние пода́ти ми,/ Тебе́ бо имею надежду, раб Твой.

Крестобогоро́дичен:

А́гнца, и Пастыря, и Изба́вителя А́гница зрящи на Кресте, восклицаше, плачущи,/ и, горько рыда́ющи, вопия́ше:/ мир убо радуется, прие́мляй Тобо́ю избавле́ние,/ утроба же Моя горит, зря́щи Твое́ распятие,/ еже терпи́ши за милосердие милости./ Долготерпеливе Го́споди, милости бе́здно и исто́чниче неисчерпаемый,/ умилосе́рдися и даруй согрешений оставле́ние/ верою пою́щим Боже́ственная Стра́сти Твоя́.

Песнь 4

Ирмо́с: Ты моя кре́пость, Го́споди,/ Ты моя и сила,/ Ты мой Бог, Ты мое ра́дование,/ не оста́вль не́дра Отча/ и нашу нищету́ посети́в./ Тем с пророком Авваку́мом зову Ти:/ си́ле Твое́й сла́ва, Человеколюбче.

Церковное благочиние украси́л еси́:/ в них бо, отче, живописа́л еси́ зра́чныя о́бразы/ явственно священнопи́санием Безо́бразных сил;/ имиже тайново́дятся и просвеща́ются вся верных, Богомудре, собо́ры.

Струи́ твоего́ Богословия, Богоприятне, цветники́ напая́ют словесныя,/ присноцвету́щия зело и насажде́нныя на правости Богословия:/ единство бо Существа в Трие́х Ли́цех, честно́е Единонача́лие пропове́дал еси́.

Ангельскаго священноначальства сильное, святите́лю, желание и раче́ние, еже к Бо́гу,/ и неуклонное ма́ние к высоте́ Божественней и непостижи́мей,/ научил еси́ Богомудренно верою вопию́щия:/ си́ле Твое́й сла́ва, Человеколюбче.

Богоро́дичен: Священноде́йствитель спасения бысть Сын Твой всем поющим Тя,/ и Наставник, и Просвети́тель, и Правда, Де́во, и избавление./ Тем Тя, Богоро́дицу, истинно и госпо́дьственно ве́рнии единому́дренно сла́вим.

Песнь 5

Ирмо́с: Вску́ю мя отри́нул еси́/ от лица Твоего́, Све́те незаходи́мый,/ и покрыла мя есть чужда́я тьма, окаяннаго,/ но обрати́ мя и к свету за́поведей Твоих/ пути моя напра́ви, молю́ся.

Глагол твои́х веща́ние, я́ко некий Небесный шум носимь,/ безбожныя разумы огроми́ словом благода́ти/ и велений Боже́ственных зарями светле́йшими верных сердца́ просвети.

Уподобился еси́ купцу, ищущему добрыя бисеры, всебогате,/ и обрел еси́ един бисер, истинно многоценен,/ и, уди́влься его Боготво́рну световерже́нию, святите́лю, Бо́га испове́дал еси́.

Исто́чник мудрости, любому́дрейше отче, возлюбил еси́,/ и, тоя́ рачением и любо́вию одержимь, велик был еси́,/ и ре́ки Боже́ственных веле́ний всегда то́чиши, Богогласе.

Богоро́дичен: Я́ко Обрадованная, добротворя́щее прияла еси́ благоле́пие,/ вся еди́нем хотением Сотво́ршаго,/ и Боже́ственною добро́тою и просвещением благоверия, Богомати, нас Удобри́вшаго.

Песнь 6

Ирмо́с: Очи́сти мя, Спасе,/ мно́га бо беззакония моя/ и из глубины́ зол возведи́, молю́ся:/ к Тебе́ бо возопи́х и услы́ши мя,/ Боже спасе́ния моего.

Законно любому́дрствуя, мудрости дар получил еси́,/ Божественне Богосло́вя Православныя догма́ты, всеблаженне, оста́вил еси́,/ ихже наслаждающеся, ве́рнии, тя блажи́м.

Разумом Боголепным, Богомудре, удобряем,/ Боже́ственному учителю слух твой приклони́л еси́/ и преми́рную от Него мудрость навыкл еси́, Диони́сие.

Житие́ твое́ чу́дно, слово же ди́внейше,/ язык твой светоза́рен, уста огнедухнове́нна и духодви́жима,/ ум же твой испы́тен, отче, Богоблаженне.

Богоро́дичен: Глас Ти Гаврии́лов радостно, Де́во, взываем ве́рнии,/ из Тебе́ бо неизрече́нно нам Живоначальный Творе́ц изше́л есть/ и примеси́ся человеком, Человеколюбец.

Конда́к, глас 8

Подо́бен: Взбра́нной:

Небесная врата проше́д духом я́ко ученик/ до тре́тияго Небесе́ дости́гшаго апостола, Диони́сие,/ неизрече́нных обогатился еси́ всяким разумом/ и озари́л еси́ во тьме неве́дения седя́щия./ Темже зовем:/ радуйся, о́тче всемирный.

И́кос:

Ангел от человеков, доброде́тельми быв великий Дионисий,/ весь, я́ко крила́т, навы́че умом Небе́сныя разумы./ Тем пе́сньми, я́ко А́нгела, почтим, вопию́ще к нему такова́я:/ радуйся, уве́девый Христа́ Павлом;/ радуйся, многия ко Христу́ обрати́вый;/ радуйся, многобожия храмо́в губителю;/ радуйся, Богоразумнаго совета смотрение;/ радуйся, книго Богоначерта́нная тайных сокровищ;/ радуйся, скрижа́ль Богозра́чная и зерца́ло Небесное;/ радуйся, я́ко Страсть Госпо́дню видел еси́;/ радуйся, я́ко усердно Того ради закала́ешися;/ радуйся, источниче, источа́я разум;/ радуйся, капле, угаша́ющи безумие;/ радуйся, стезе́ неле́стная спасения;/ радуйся, прегра́до нечестивых прехода;/ радуйся, о́тче всемирный.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего ради о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благословен еси́, Боже отец на́ших.

Я́ко туча Небе́сная землю жаждущую,/ твоя́ учения верных сердца́ при́сно жела́ющая умаща́ют/ и несы́тно вопи́ти науча́т:/ отец на́ших Боже, благословен еси́.

Разумом Богому́дренным безплотныя умы́: расписал еси́/ и тех, преблаже́нне, песнословия, Божествен быв, Церковь пети наказал еси́:/ благословен Бог отец на́ших.

Прия́телище Ду́ха Всесвята́го явился еси́ благоключи́мое/ и, Того вдохнове́ния и явления проро́чески провозглаша́я, му́дре Диони́сие, вопия́ше весело:/ благословен Бог отец на́ших.

Богоро́дичен: Се ны́не исполнися Иса́ии Богоглаго́ливаго проречение:/ Дева бо во чре́ве Бо́га Слова име́/ и породи́ла есть Жизнодавца, Емуже вси зове́м:/ благословен Бог отец на́ших.

Песнь 8

Ирмо́с: Седмери́цею пещь/ халде́йский мучитель/ Богочести́вым неи́стовно разжже́,/ силою же лу́чшею спасе́ны сия́ ви́дев,/ Творцу и Изба́вителю вопия́ше:/ о́троцы, благослови́те,/ священницы, воспо́йте,/ лю́дие, превозноси́те во вся ве́ки.

Све́тел, я́ко зерца́ло, быв, Диони́сие,/ и вмести́телен чистых явлений ум соделав,/ доброде́телию, всебогате, лучи́ па́че ума сияния приемля, вопия́л еси́:/ священницы, благослови́те, лю́дие, превозноси́те во вся ве́ки.

Обильнейшая благода́ть излия́ся во устна́х твои́х,/ тем Боже́ственная учения предложил еси́,/ и тех ра́зумы па́че смысла нам простира́я и ясне́е и светло отверза́я, верою поющим:/ священницы, благослови́те, лю́дие, превозноси́те во вся ве́ки.

Зна́емейша бысть тобою, Диони́сие, Афинская всеславная митрополия,/ Христу́ прине́сшая тя начаток всесвященный, Всецарю всегда пою́щи:/ о́троцы, благослови́те, священницы, воспойте, лю́дие, превозноси́те во вся ве́ки.

Богоро́дичен: Мати Бо́жия Всенепоро́чная, души́ моея́ струны и греховныя я́звы потреби́/ Сы́на бо родила́ еси́, власть иму́щаго/ свя́занныя плени́цами греховными удобь осла́бити от уз нереши́мых,/ Единаго Благодетеля и Единаго Жизнода́вца.

Песнь 9

Ирмо́с: Ужасе́ся о сем Небо,/ и земля́ удиви́шася концы́,/ я́ко Бог яви́ся человеком пло́тски,/ и чрево Твое́ бысть простра́ннейшее небес:/ тем Тя, Богоро́дицу,/ А́нгелов и человек чинонача́лия величают.

Святых апостол сподо́бился еси́ ви́дитель быти/ и сострадалец, и соо́бщник был еси́ славы,/ и с теми на виде́ние потщался еси́ телесе́/ истинно Живоначальныя Единыя Богоро́дицы и Честнейшия,/ Ю́же досто́йно величаем.

Божественнаго Царствия на Небесех наследник был еси́ я́ко законен архиерей, отче,/ я́ко непобеди́мь страдалец священства ма́стию кровь сраствори́л еси́ мученическую./ Тем сугубым венцем сподо́бился еси́ достойно, священнотаи́нниче Диони́сие.

Я́ко имея дерзновение ко Христу, иерарше, мудре Диони́сие,/ всегда моли́ избавитися от искушения благоче́стно поющим тя,/ учениче́ неизреченных виде́ний, я́ко тайноуче́нныя и Богоначальныя священноявле́нник благости.

Богоро́дичен: Победившу е́реси хра́брски, честну́ю Церковь яви,/ юже Христос честно́ю Своею Кровию я́ко Благ стяжа́, Обрадованная, Сын Твой истинно,/ и спаси́ от бед и от обстоя́ния, одержа́щего нас, Влады́чице.

Свети́лен.

Подо́бен: Учеником зрящим:

Доброде́тельми восходя́, возвысився на Небеса, Богоприя́тне,/ и познал еси́ А́нгелов чины , и всех Вышних стоя́ния,/ и Трисолнечную зарю, навы́к от Павла.

Богоро́дичен: Иже жизни Божественней и блаже́нней/ позави́дев ми древле в раи́,/ враг прелука́вый и злоко́зненный, и от Еде́ма изгнав мя,/ умерщвля́ется Рождеством Твоим, Богоро́дице.

На стиховне Окто́иха. Сла́ва, свята́го, глас 8

Германово:

Во святителех и мученицех,/ преизя́ществовав, преподо́бне,/ ве́рен явился еси́ пастырь,/ и, Христову испив чашу,/ тем во обои́х благоугоди́в Тому,/ моли́ся о всех нас,/ с Го́рними служи́тельми во Свете ны́не водворяемый.

И ны́не, Богоро́дичен или́ Крестобогоро́дичен.

Подо́бен: Мученицы:

Ю́ница Нескве́рная,/ Юнца́ ви́дящи на Древе пригвожда́ема волею,/ рыда́ющи жа́лостне:/ увы Мне, вопия́ше, Люби́мейшее Чадо,/ Что́ Ти сонм воздаде́ безблагода́тный евре́йский,/ хотя Мя обезча́дствовати от Тебе́, Вселюбе́зне.

НА ЛИТУРГИ́И

Блаженны Окто́иха на 4 и свята́го песнь 3-я на 4. Проки́мен, глас 8: Восхвалятся преподо́бнии во сла́ве и возра́дуются на ло́жах своих.Стих: Воспойте Го́сподеви песнь но́ву. Апостол Деяний, зача́ло 40, от полу. Аллилу́ия, глас 2. Стих: Свяще́нницы Твои́ облекутся правдою: Ева́нгелие от Матфе́я, зача́ло 55 от полу. Причастен: В па́мять вечную будет праведник:

Священномученик Дионисий Ареопагит, епископ Афинский

Тропа́рь, глас 4:

Жертву Безкро́вную приноси́вый Го́сподеви непоро́чне/ и служи́вый Ему по званию своему́ многое время неле́ностне,/ священне Диони́сие,/ моли́ся о нас,/ любо́вию чту́щих тя.

Конда́к, глас 2:

Священноде́йствовавшаго на земли священноле́пно/ и потруди́вшагося в чи́ну своем до́бре,/ ны́не же на Небесех лику́еши све́тло,/ священными похваляем тя пе́сньми, Диони́сие, и молим:/ моли́ Христа́ Бо́га непрестанно о всех нас.

Преподобный Дионисий, затворник Печерский