2-й день

Свята́го священному́ченика Киприа́на и святы́я му́ченицы Иустины

Свята́го Андре́я, Христа́ ради Юро́диваго, чудотво́рца

Преподо́бнаго отца на́шего и благовернаго князя Константи́на Ри́млянина, во и́ноцех Кассиа́на У́глечскаго, чудотворца, и́же на У́чме

Преподобныя и благоверныя великия княгини А́нны Ка́шинския.

Мучеников Каза́нских Иоа́нна, Стефа́на, Петра́, Бори́са, Иа́кова, Фео́дора, Сильва́на, Фео́дора, Васи́лия, Фео́дора, Дими́трия, Михаи́ла, Иоа́нна и Васи́лия

На Го́споди, воззва́х: стихи́ры глас 4.

Подо́бен: Я́ко до́бля:

Свяще́нническим пома́занием и му́ченическою кро́вию/ Бо́гу прибли́жился еси́,/ соверше́ннейше Киприа́не всесла́вне,/ цве́те естества́, добро́то слове́с,/ му́дрости верхо́вниче,/ пра́вости догма́тов ме́рило,/ кано́нов всесли́чная правота́/ и Церквей благоле́пие.

Стра́ждущим благосла́вие, му́чеником вене́ц подпису́я,/ уве́рил еси́ Богому́дрыя дерза́ти до́блественнейше/ на различныя му́ки и у́зы,/ и темницы, и теле́с обнаже́ния,/ и вяза́ния, и сту́дени люте́йшия,/ и на раны, и смерть по́слежде,/ Киприа́не всече́стне.

На чарова́ния де́монская/ пе́сньми Ду́ха и Креста́ зна́мением проти́вльшися,/ де́вство соблюла́ еси́/ и му́ченица непобеди́мая привела́ся еси́ Христу,/ свяще́ннейшее заколе́ние./ Тем получи́ла еси́ венцы́ побе́дныя, Иусти́но,/ де́вам и му́чеником украше́ная све́тлость.

Сла́ва, глас 2:

Уче́ния пре́лесть и знание и́долов отвергл еси́ и́стинно/ и Креста оде́ялся еси́ ору́жием на спасе́ние,/ Киприа́не всеблаженне,/ пове́рг книги волше́бныя,/ человека отложи́л еси́ ве́тхаго,/ и всели́ся в тя Богозна́ние Троицы Единосу́щныя:/ Сию́ моли́, иера́рше, со А́нгелы, еже спасти́ся нам.

И ны́не, Богородичен или Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се, пригвожде́на зрящи,/ Неискусобра́чная, пла́чущи, глаго́лаше:/ Ча́до Сладча́йшее,/ почто́ оставил еси́ Мене, Ро́ждшую Тя, Еди́ну,/ Све́те непристу́пный Пребезнача́льнаго Отца,/ потщи́ся и просла́вися,/ я́ко да славу получа́т Божественную/ Божественныя Стра́сти Твоя́ сла́вящии.

На стиховне Окто́иха. Сла́ва, глас 2:

Свети́льника Богосия́ннаго,/ Па́влова собеседника и дело́м соприча́стника,/ Киприа́на восхва́лим:/ со А́нгелы бо весели́тся,/ прии́м венец нетле́ния от Единаго Бога,/ и мо́лится спасти́ся душа́м нашим.

И ны́не, Богородичен или Крестобогоро́дичен:

Подо́бен: Егда́ от Дре́ва:

Егда Нескве́рная А́гница/ ви́де Своего́ А́гнца,/ на заколе́ние, я́ко человека, во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, Рождшую Тя,/ что сие сотворил еси́, Изба́вителю вся́ческих,/ оба́че воспева́ю и сла́влю Твою́, юже па́че ума же и сло́ва,/ кра́йнюю благость, Человеколюбче.

Тропа́рь, глас 4:

И нра́вом прича́стник,/ и престо́лом наме́стник апостолом быв,/ дея́ние обре́л еси́, Богодухнове́нне,/ в виде́ния восхо́д:/ сего ради, сло́во истины исправля́я,/ и веры ради пострада́л еси́ даже до кро́ве,/ священномучениче Киприа́не,/ моли́ Христа́ Бога/ спасти́́ся душа́м нашим.

НА У́ТРЕНИ

Оба кано́на Окто́иха без мученичнов и святы́х кано́н, егóже краегране́сие: Пою, блаже, светозарную твою́́ благода́ть. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

С Преми́рными чи́нми ны́не водворя́яся, о свяще́нная и Боже́ственная главо́,/ с Небесе́ при́зри на благоче́стно пою́щия тя/ и твои́ми моли́твами сохраня́й.

Во мра́це неве́дения, преподо́бне, лю́те одержи́м/ и душегу́бными страстьми́ пло́ти невоздержа́нием ты разжига́ем,/ преложе́ние пресла́вно обрел еси́ внеза́пу, всеблаженне.

Губи́телей убо на седа́лищи прежде, отче, седе́л еси́/ и на седа́лищи пресви́теров паки Христа́ прославил еси́,/ измени́вся явле́нно Влады́чнею Боже́ственною благода́тию.

Богоро́дичен: Дева по рождестве пребыла́ еси́:/ Сама́го бо ро́ждши Творца всех и Го́спода,/ необычно и странно нам я́вльшася те́лом,/ Богородительнице Ма́ти Присноде́во.

Песнь 3

Ирмо́с: Весели́тся о Тебе́ Це́рковь Твоя́́, Христе́́́, зову́щи:/ Ты моя кре́пость, Го́споди,/ и прибе́жище, и утвержде́ние.

Я́ко Павел, ко Христу́ душе́вную любовь преложи́в, Киприане всему́дре,/ того ученик был еси́.

Обруча́ет ти Христос,/ вместо риз стра́стных одея́ние славы да́руя и возрождения одежду.

Поу́стник¹ по́стнический прежде бы́вый терпели́в,/ по́слежде, Киприа́не всехва́льне,/ свидетель Истины был еси́.

Богоро́дичен: Госпо́дьственно и истинно Тя, Богоро́дицу, ве́рнии почита́ем,/ Ты бо Бо́га родила́ еси́, плоть бывша, Всенепоро́чная.

Седа́лен, глас 8.

Подо́бен: Прему́дрости:

Нака́зан в пре́лести приле́жно,/ я́ко Павел, зван бысть с Небесе́,/ Крестом наставля́емь к свету зна́ния,/ честны́я бо девы любо́вию разжигаемь,/ тоя́ ради сочета́лся еси́ Зижди́телю человеков./ Тем обличи́в не́мощь вражию,/ с нею сподо́бился еси́ ли́ку мучеников,/ Киприа́не, архиере́ев удобре́ние,/ моли́ Христа́ Бо́га грехов оставле́ние пода́ти/ честву́ющим любо́вию святу́ю па́мять твою́́.

Сла́ва, и ны́не, Богоро́дичен:

В напа́сти многоплете́нныя впад/ от враг видимых и невидимых,/ бурею одержи́м безчисленных согрешений моих,/ и, я́ко к теплому заступлению и покро́ву моему, Чи́стая,/ ко приста́нищу притека́ю Твоея́ бла́гости./ Темже, Пречистая, из Тебе́ Воплоще́нному без Се́мене/ моли́ся приле́жно о всех рабе́х Твоих,/ непреста́нно молящихтися, Богоро́дице Пречистая,/ моля́щи Его́ при́сно согреше́ний оставле́ние дарова́ти/ воспева́ющим досто́йно славу Твою́.

Крестобогоро́дичен:

А́гнца и Пастыря, и Изба́вителя А́гница зря́щи на Кресте, восклица́ше, пла́чущи,/ и, горько рыда́ющи, вопия́ше:/ мир убо ра́дуется, прие́мля Тобо́ю избавле́ние,/ утро́ба же Моя гори́т, зря́щи Твое́ распя́тие,/ еже терпи́ши за милосе́рдие ми́лости./ Долготерпели́ве Го́споди, ми́лости бе́здно и источниче неисчерпаемый,/ умилосе́рдися и да́руй согрешений оставление/ верою поющим Божественныя Страсти Твоя́.

Песнь 4

Ирмо́с: Вознесе́на Тя ви́девши Церковь на Кресте́,/ Солнце пра́ведное,/ ста́ в чине своем,/ досто́йно взыва́ющи:/ сла́ва си́ле Твое́й, Го́споди.

Возбну́в², Богогла́се, от неи́стовства перваго,/ демонскую лесть и душетле́нную пре́лесть всю обличил еси́ и, радуяся, взывал еси́:/ сла́ва си́ле Твое́й, Го́споди.

До́блественно Иустина укрепля́ема/ и Чистую Де́ву и Обрадованную зело́ моля́щи,/ се́тей избеже́ и ко́зней же вражиих.

Укрепляема верою твоего́ Жениха/ и Крестною силою оде́яна,/ де́моны нея́тна, вопиющи, пребыла́ еси́:/ сла́ва си́ле Твое́й, Го́споди.

Богоро́дичен: Иже естеством свободен Сый,/ о́бразом раба обнища́ богатством благости, Ма́ти Присноде́во,/ из Тебе́ по Ипостаси все приемь человечество.

Песнь 5

Ирмо́с: Ты, Го́споди, мой свет/ в мир пришел еси́,/ Свет Святый, обращаяй из мра́чна неве́дения/ верою воспева́ющия Тя.

Побо́рницу имущи я́ве Чистую Богоматерь, обога́щшися, Иустино,/ честно́е де́вство сохранила еси́ невре́дно.

Одушевле́нный Христов и красне́йший образ, почти́м Иустину,/ сокровенную добро́ту и некра́домое возложе́ние.

Невеста Христова при́сная и нескве́рная,/ страданием и поще́нием восприе́мши, пра́ведно сугу́б венец носит.

Богоро́дичен: Ум А́нгельский и человеческий не может сказати/ неизреченнаго и преславнаго чудесе Рождества Твоего́,/ Всечистая.

Песнь 6

Ирмо́с: Пожру́ Ти со гла́сом хваления, Го́споди,/ Церковь вопие́т Ти,/ от бесо́вския кро́ве очищшися,/ ради милости от ребр Твоих/ исте́кшею Кровию.

Зло́бы дна преиспо́дняго дошел еси́,/ к кра́йнейшей же паки доброде́тели, отче,/ возшел еси́ на высоту,/ пресла́вно измени́вся Боже́ственным Крещением.

Был еси́ служитель де́монов пе́рвее,/ но Христов Богоявле́нный ученик показался еси́,/ присною любо́вию желание возлюбив последнее.

Многия ты Влады́це привел еси́ му́ченики,/ ку́плей величайшую являя,/ кровию малейшею Царство Небесное, Богому́дре, купи́ти.

Богоро́дичен: Расто́ргни моя плени́цы согрешений, Богоневе́сто, греховнаго закона,/ Жизни законом свободу да́рующи,/ Владыку закона рождшая.

Конда́к, глас 1.

Подо́бен: Лик А́нгельский:

От худо́жества волше́бнаго обратился, Богомудре,/ к познанию Боже́ственному,/ показался еси́ ми́ру врач мудре́йший,/ исцеления да́руя честву́ющим тя, Киприане со Иустиною:/ с неюже моли́ся Человеколюбцу Влады́це/ спасти́ ду́ши на́ша.

И́кос:

Целе́ний твои́х, свя́те, дарования мне низпослав,/ и неду́гующее мое се́рдце гно́ем греховным/ моли́твами твои́ми исцели,/ я́ко да слово пения от скверных усте́н моих ны́не принесу ти/ и воспою болезни твоя́, яже показа́л еси́, священномучениче,/ покая́нием добрым и блаженным и Бо́гу приближающимся./ Того бо удержа́н рукою,/ направился еси́, я́ко по лествице, к Небе́сным,/ непрестанно моляся спасти́ ду́ши на́ша.

Песнь 7

Ирмо́с: Спасы́й во огни́ Авраа́мския Твоя́ о́троки/ и, халде́и убив,/ яже правда праведно уловля́ше,/ препетый Го́споди,/ Боже отец на́ших, благословен еси́.

На священнонача́льство вшед,/ священнейший образ священнонача́льником себе и правило явил еси́, взыва́я:/ препе́тый Го́споди, Боже отец на́ших, благослове́н еси́.

Живонача́льныя тебе́ десни́цы истинно изменение, отче, нашедшее,/ му́дра тя сотвори Боговеща́теля, поюща:/ препе́тый Го́споди, Боже отец на́ших, благословен еси́.

Ору́жие непобедимое нам на противнаго, блаже́нне, ты явился еси́,/ того облича́я ле́сти, пою́щим:/ препе́тый Го́споди, Боже отец на́ших, благослове́н еси́.

Богоро́дичен: Небе́снии ли́цы и Пренебе́снии собо́ри/ песносло́вят из Тебе́, Богоро́дице, Рожде́ннаго, зовуще:/ препе́тый Го́споди, Боже отец на́ших, благослове́н еси́.

Песнь 8

Ирмо́с: Веселися, Иерусалиме, торжествуйте, лю́бящии Сио́на:/ ца́рствуяй бо во веки, Господь Сил прии́де./ Да благогове́ет вся земля от Лица Его́/ и да вопие́т:/ благослови́те вся дела Господня Го́спода.

Премудро е́ллинския мудрости небре́гл еси́, сла́вне,/ апостолов же Боже́ственное веща́ние, Духом бряца́емо, отче,/ и о́гненными язы́ки ясно изглаша́емо, вопия́л еси́:/ благослови́те вся дела Господня Го́спода.

Восте́кл еси́ на высокая и преми́рная све́тло селе́ния,/ Христу́ кровию, я́ко же́ртвою непорочною, приносим, отче, заколе́ние живо, приятно и благоугодно, воспевая:/ благослови́те вся дела Господня Го́спода.

Побежда́еми от в тебе́ все́льшияся благода́ти,/ де́монстии полцы́ отгоняются и отбега́ют стра́сти неду́гующих, Богомудре,/ ве́рнии же Божественнаго света насыща́емся, вопию́ще:/ благослови́те вся дела Господня Го́спода.

Богоро́дичен: Лику́ют со А́нгельскими, Пречистая, си́лами о Рождестве Твое́м, Богомати,/ и Богоро́дицу верою Тя имену́ющии:/ Ты бо Владыку и Изба́вителя нам родила́ еси́, Емуже пое́м:/благослови́те вся дела Господня Го́спода.

Песнь 9

Ирмо́с: Ева убо неду́гом преслуша́ния/ клятву всели́ла есть,/ Ты же, Де́во Богоро́дице,/ Прозябе́нием чревоноше́ния ми́рови благослове́ние процвела́ еси́,/ тем Тя вси велича́ем.

Свыше нас, благоче́стно пою́щих тя, назира́еши Боже́ственною благода́тию,/ твои́ми моли́твами, Богоглаго́льниче, и оружием благоволе́ния венчава́я,/ мир и спасе́ние даруй нам, я́ко священнонача́льник Божественнейший.

Тече́ние исцеле́ний обильно персть твоя́ лю́бящим тя воздае́т;/ тебе́ же, Киприа́не, жены́ Богоносны я́ко Боже́ственно сокровище прие́млют и усе́рдно являют сокрове́ннаго,/ да вси тебе́ наслади́мся.

Напра́вити наше ко Христу, пребога́те, ше́ствие дея́нием,/ и Богоугодным житие́м, и чисте́йшим очище́нием/ су́що Божию ти́хость умоли, я́ко иерарх сострада́тельнейший.

Богоро́дичен: Укрепи́ нашу душе́вную не́мощь, Богомати, силою Твое́ю,/ разреши тяготу́, Пресвятая, налага́емую рабо́м Твоим,/ ми́ру правды Солнце несказа́нно возсия́вшая.

Свети́лен.

Подо́бен: Жены́, услышите:

В волхва́х несосужде́нна³ и еди́наго пребо́льша,/ преме́ншаго нрав и попали́вшаго книги, наставля́ющия ко пре́лести,/ и свидетельства венец странноле́пно прие́мшаго,/ Киприа́на похва́лим, страдальцев зерца́ло.

Богоро́дичен: Древле божества́ наде́ждею прельсти́вый мя злоко́зненный,/ пло́тным предложе́нием прему́дренно паки прельща́ется от Девы Возсия́вшаго;/ и си́це осуждение пло́тное пло́тию разреши́ся,/ смерти умертви́вшейся.

На стиховне Окто́иха. Сла́ва, глас 8:

Иже зло́бы прежде опасный побо́рник,/ Церкве по́слежди истинный учитель,/ и́же служи́тель пре́лести и́долов,/ священнонача́льник веры явися,/ и блу́дный целому́дрен, честны́я ради девы:/ обои́х моли́твами спаси́ ны, Го́споди.

И ны́не, Богоро́дичен или́ Крестобогоро́дичен:

Что́ зри́мое виде́ние,/ еже Мои́ма очи́ма ви́дится, о Владыко?/ Содержа́й всю тварь/ на Древе воздви́жен быв/ и умира́еши, всем дая́й Жизнь:/ Богородица, пла́чущи, глаго́лаше,/ егда узре́ на Кресте возноси́ма, из Нея́ неизрече́нно возсия́вшаго/ Бо́га и Человека.

НА ЛИТУРГИ́И

Блаженны Окто́иха, на 4. И святы́х песнь 3-я, на 4. Проки́мен, глас 7: Честна пред Го́сподем: Стих: Что́ воздам: Апостол к Тимофею, зача́ло 280. Аллилуия, глас 2. Стих: Свяще́нницы Твои́ облекутся: Ева́нгелие от Иоанна, зача́ло 36. Причастен: В па́мять вечную:

Священномученик Киприан, мученица Иустина и мученик Феоктист.

Стихи́ры, глас 8.

Подо́бен: О пресла́внаго чудесе́:

О пресла́внаго чудесе́,/ я́ко во изступле́нии ума́/ соверши́ся духо́вная мудрость в тебе́, о́тче Андре́е./ Вся бо уме́ты вмени́л еси́,/ да Христа́ приобря́щеши, и Царство Небесное возлюби́л еси́, еже и получи́л еси́:/ ны́не со А́нгелы стоя́, свя́те,/ моли́ся о чту́щих прилежно па́мять твою́́.

О пресла́внаго чудесе́,/ пло́тску сердцем Безпло́тныя показа́л еси́/ и сокрове́нная открыл еси́ уго́днику Твое́му, Андрею,/ бывшему юро́ду Тебе́ ради/ и земны́я стра́сти претерпе́вшему,/ крест взе́мшему и после́довавшу Тебе́, Влады́це и Бо́гу./ Егóже моли́твами, Христе́́ Боже,/ я́ко Милостив, спаси́ души на́ша.

О пресла́внаго чудесе́,/ в бре́ннем те́ле ходя́ на земли́,/ Тебе́ ради, Го́споди, я́ко безпло́тен пребывая,/ уго́дник Твой Андрей ве́лие нестяжа́ние стяжа́,/ обеща́нных Твоих возжела́в,/ егóже ни о́ко ви́де, ни ухо слы́ша,/ ни на се́рдце человека взы́де,/ угото́ванных любящим Тебе́:/ того моли́твами спаси́ души на́ша, я́ко Милостив.

Сла́ва, глас 6:

До Небесе́ восхище́н был еси́/ и, неизрече́нныя глаголы слышав,/ невидимая же увидел еси́/ и, Честна́го Креста образ ви́дев,/ с любо́вию того целовал еси́/ и Божественныя сладости исполнился еси́,/ и ра́йская блага́я открове́на тебе́ бы́ша:/ от молнии изтка́ною ри́зою облеклся еси́,/ Христу́ последовав,/ свя́те Андрее досточу́дне.

Тропа́рь, глас 1:

Глас апостола Твоего́́ Павла услышав, глаго́лющ:/ мы юро́ди Христа́ ради,/ раб Твой, Андрей, юро́д бысть на земли́/ Тебе́ ради, Христе́́ Боже./ Темже ны́не па́мять его почита́юще,/ Тебе́ мо́лимся, Го́споди, спаси́ души на́ша.

Канон святому, глас 4

Песнь 1

Ирмо́с: Отве́рзу уста́ моя/ и напо́лнятся Духа,/ и слово отры́гну Царице Матери,/ и явлюся, светло торжествуя,/ и воспою́, радуяся, Тоя́ чудеса́.

Отве́рзи мои устне́, подви́гни мой язык/ и испра́ви мой смысл, вся умудря́яй, Боже,/ да похвалю́ уго́дника Твоего́́ Андре́я,/ юро́да бывшаго на земли́ Тебе́ ради.

Андре́е блаже́нне, ты измла́да Христа́ возлюбил еси́/ и к Нему́ единодушно возжеле́л еси́:/ како же тя по достоянию похва́лим,/ на диа́вола вооружи́вшася и сего ко́зни победивша силою Христовою.

Моли́твами Бо́гу моля́ся и диаволу досажда́я,/ и многаго его толца́ния в двери хи́жины твоея́ аще вма́ле и устраши́вся,/ но неподви́жен умом пребыл еси́, силою Христовою укрепляемый.

Богоро́дичен: О Пресвята́я Госпоже Де́во Богоро́дице,/ покры́й ны чу́дным Твоим омофо́ром/ и сохраня́й град Твой от бед и скорбей,/ я́коже Тя преблаженный ви́де Андрей, во Влахе́рнстей церкви молящуюся.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе совоку́пльшия, духовно утверди́,/ в Божественней Твое́й славе/ венце́в славы сподо́би.

Со ефио́пом бра́вся, победи́л еси́ того́,/ от Христа́ дерзновение прии́м, мно́гу печаль де́моном сотворил еси́,/ святым же А́нгелом веселие и радость,/ с нимиже ны́не водворя́ешися.

Во сне Христа́ прежде видел еси́,/ на де́моны тя укрепля́юща/ и венец тебе́ подаю́ща, и со ефио́пом бра́тися поуча́юща:/ ны́не же не сновиде́нием, но в неизрече́ннем свете Славы Его́ ви́дя, за ны моли́ся.

Христа́ послу́шал еси́,/ повелевшаго тебе́ юро́ду бы́ти и Царство Небесное обещавша:/ Тому после́довав, неизрече́нная блага́я Его́ восприя́л еси́, Андре́е досточу́дне.

Богоро́дичен: Прииди́ ны́не во сла́ве в це́рковь Твою́, Богоро́дице,/ с соборы святых,/ я́коже Тя ви́де святый Андрей на возду́се све́тле, за христианы молящуюся,/ и пода́ждь нам, Госпоже́, ве́лию ми́лость.

Седа́лен, глас 8:

У́зы и желе́зы свя́зан, в церкви седя́, Андрее,/ многи страхи от демонов подъя́л еси́/ и помощника себе обре́л еси́ апостола Христова, возлюбленнаго Иоанна,/ и́же повеле́ тебе́ терпе́ти Христа́ ради./ С ни́мже ны́не водворя́ешися, за ны моли́ся, чтущия па́мять твою́́.

Сла́ва, и ны́не, Богоро́дичен:

В напа́сти многоплете́нныя впад, от враг видимых и невидимых,/ бурею одержим безчисленных согрешений моих,/ и я́ко к теплому заступлению и покро́ву моему, Чи́стая,/ ко приста́нищу притекаю Твоея́ бла́гости./ Темже, Пречистая, из Тебе́ Воплоще́нному безсе́менно/ моли́ся прилежно о всех рабе́х Твоих, непрестанно моля́щихтися, Богоро́дице Пречистая,/ моля́щи Его́ при́сно согрешений оставле́ние дарова́ти/ воспева́ющим досто́йно славу Твою́.

Крестобогоро́дичен:

А́гнца и Пастыря, и Изба́вителя А́гница зря́щи на Кресте́, восклицаше, плачущи,/ и, горько рыдающи, вопия́ше:/ мир убо радуется, прие́мляй Тобо́ю избавле́ние,/ утро́ба же Моя горит, зря́щи Твое́ распятие,/ еже терпи́ши за милосердие милости,/ Долготерпеливе Го́споди, милости бе́здно и исто́чниче неисчерпа́емый,/ умилосе́рдися и да́руй согрешений оставле́ние верою поющим Божественныя Стра́сти Твоя́.

Песнь 4

Ирмо́с: Седя́й в сла́ве на Престо́ле Божества́,/ во о́блаце ле́гце/ прии́де Иисус Пребоже́ственный/ нетле́нною дла́нию и спасе́ зовущия:/ сла́ва, Христе́, си́ле Твое́й.

Седя́ща на Престо́ле Христа́ Царя видел еси́,/ горькия сея́ жизни о́браз разсмотри́л еси́,/ горча́йш пелы́ни⁴ сущий,/ потом же нетле́нныя сла́дости вкус прия́л еси́.

Тогда во сне и в восто́рзе Христа́ видел еси́,/ ны́не же, со Безплотными Силами водворя́яся,/ Славу Божию ви́диши непостижи́мую и неизглаго́ланную:/ поминай нас, Андрее, чту́щих па́мять твою́́.

От виде́ния ра́зумов уве́рившагося Андрея похва́лим, ве́рнии,/ на земли́ бывша юро́да Христа́ ради,/ на Небесе́х же ны́не прему́дра духовною благода́тию,/ со А́нгелы предстоя́ща всех Бо́гу.

Богоро́дичен: Кто изглаго́лати может Твоего́́ Рождества та́инство;/ или кто испове́сть Твоея́ молитвы си́лу;/ аще не бы Сама Ты показала еси́ Андрею юро́дивому/ в церкви Влахе́рнстей честны́й Твой Покров.

Песнь 5

Ирмо́с: Ужасо́шася вся́ческая/ о Божественней сла́ве Твое́й:/ Ты бо, Неискусобра́чная Де́во,/ имела еси́ во утро́бе над всеми Бога/ и родила́ еси́ Безле́тнаго Сына,/ всем воспева́ющим Тя/ мир подава́ющая/.

Удивле́ние бысть всем ви́дящим Андре́ево житие́:/ на сме́тьищи лега́ние и посреде́ гра́да обнаже́ние,/ и колесни́чное попра́ние,/ но сия́ вся бысть ему пути́ правле́ние в Небесное Царствие.

Удиви́шася вси, ви́дящии терпение твое́:/ мученицы бо во едино время страсть претерпе́ша,/ ты же вся дни живота твоего́ злыя му́ки терпел еси́,/ в Небесное Царство желая всели́тися,/ еже получив ны́не, ра́дуешися безконечною радостию.

Сокрове́нная бы́ша тебе́ открове́на/ и вся Безпло́тныя, аки плотски́я, видел еси́: ничтоже бо земны́х возлюбил еси́./ Темже и Небе́сная врата отверзо́шася тебе́,/ в неизглаго́ланную радость Го́спода твоего, блаже́нне, вшел еси́.

Богоро́дичен: Поют Тя Чины А́нгельстии и славят Тя земны́х ро́ди:/ Ты бо, Небе́сная Царице, Андрею яви́лася еси́,/ покрывающи люди в церкви нетленным Твоим Покро́вом,/ за вся пою́щия Тя непрестанно молящися.

Песнь 6

Ирмо́с: Боже́ственное сие и всечестно́е/совершающе празднество,/ Богому́дрии, Богоматере,/ прииди́те, руками воспле́щим,/ от Нея́ ро́ждшагося Бо́га сла́вим.

Апостола Павла испо́лнися глас на тебе́, отче:/ слово Кре́стное погибающим убо юро́дство вмени́ся,/ тебе́ же, спаса́ющемуся, сила Бо́жия бысть, Андре́е всехва́льне.

Христов глас исполнися на тебе́, рече́нный:/ блаже́ни нищии духом, я́ко тех есть Царство Небесное./ Ты бо обнища́л еси́ духом/ и Царство Небесное восприя́л еси́.

Епифа́ния иногда, ю́ношу су́ща, на путь пра́вый наста́вил еси́/ емуже и проре́кл еси́ архиерею бы́ти и люди учи́ти:/ вся бо будущая, я́ко пред очесы́ су́щая, видел еси́.

Богоро́дичен: Припа́даем тебе́, Богоро́дице, мы, гре́шнии,/ да и на нас ны́не простре́ши невидимый Покров Твой,/ к Сыну твое́му и Бо́гу на́шему да принесе́ши молитвы Твоя́ за ны,/ я́коже Тя дре́вле Андрей ви́де.

Конда́к, глас 4:

Подо́бен: Вознесыйся:

Во юро́дство претвори́вся волею,/ мира сего красоты́ отню́д возненави́дел еси́,/ плотска́я мудрова́ния увяди́л еси́ посто́м и жа́ждею, и зно́ем,/ и сту́дению мра́за,/ от дождя́ и сне́га, и от прочия воздушныя тя́готы никогда́же уклони́вся,/ очи́стил еси́ себе, я́ко злато в горни́ле,/ Андре́е блаже́нне.

И́кос:

Прииди́те, христолю́бцы, прииди́те, нищелю́бцы,/ восхва́лим блаженнаго страдальца,/ премудраго Андрея, бывша юро́да Христа́ ради,/ волею мир и яже в нем уме́ты вмени́вша, по апостолу,/ и во след Христа́ усердно поте́кша,/ плоть же свою постом и жа́ждею, и зно́ем,/ и дождем и сне́гом, возду́шною тя́гостию смири́вша,/ ду́шу же от страсте́й свобо́дну соблю́дша/ и све́тлу доброде́тельми соде́лавша,/ и Небесное житие́ со всеми святыми вечно насле́довавша,/ и молящася Христу́ Бо́гу о чту́щих Его́ верою и любовию./ К немуже возопии́м:/ радуйся, угодниче Христов, Андре́е блаже́нне.

Песнь 7

Ирмо́с: Не послужи́ша тва́ри Богомудрии/ па́че Создавшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Господь и Бог, благослове́н еси́.

Ничто́же изво́лив люби́ти на земли́ па́че Зижди́теля,/ но посреде́ храмо́в скита́яся, блаже́нне Андре́е, радовался еси́, поя́:/ препе́тый отце́в Господь и Бог, благослове́н еси́.

Не пощаде́ плоти своея́, но предаде́ ю́ на подвиги и труды́, и ну́ждное пребывание./ Тем ко́зни де́монския му́жески попра́ блаженный Андрей, поя́:/ препе́тый отце́в Господь и Бог, благослове́н еси́.

Ничтоже земны́я славы восхотел еси́,/ Христа́ же па́че возлюбил еси́, блаже́нне Андре́е,/ и к Нему́ восте́кл еси́, радуяся,/ боле́зней твои́х прие́мля воздаяние и поя́ присно:/ благослове́н Бог отце́в на́ших.

Богоро́дичен: Блаженне Андрее, моли́ся и ны́не Царице Богоро́дице,/ Ю́же видел еси́ за мир молящуюся,/ да нас покры́ет непобедимою Своею милостию:/ Тоя́ бо Покро́вом вси ве́рнии сохраняемся.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть./ Тогда убо образу́емое,/ ны́не же де́йствуемое,/ вселенную всю воздвиза́ет пети Тебе́:/ Го́спода пойте дела/ и превозносите Его́ во вся ве́ки.

Бога́таго уме́рша иногда видел еси́,/ с ви́димою честию провожда́ема,/ невидимо же зле своди́ма во глубину́ а́дову, блаже́нне Андрее,/ и о нем пла́чася и моляся Господу.

Безпло́тнаго А́нгела, печа́лующаго о погибели души́ богатаго,/ в жити́и сем не пока́явшася,/ от печали премени́л еси́, Андре́е блаже́нне, с ни́мже пое́ши:/ Го́спода пойте дела и превозноси́те Его́ во вся ве́ки.

Сребролюбца монаха видел еси́,/ от зла́го зми́я стужа́ема, Андре́е блаже́нне,/ и того, от сребролю́бнаго неду́га изба́вив,/ вразуми́л еси́ пети и превозноси́ти Го́спода во вся ве́ки.

Богоро́дичен: От Андре́ева виде́ния Покров Твой уве́девше, Царице Богоро́дице,/ мо́лимся Тебе́ приле́жно:/ покрый ны милостию Твое́ю пою́щия Сы́на Твоего́/ и превознося́щия Его́ во вся ве́ки.

Песнь 9

Ирмо́с: Всяк земнородный/ да взыгра́ется, Духом просвеща́ем,/ да торжествует же Безпло́тных умо́в естество́,/почита́ющее священное торжество Богоматере,/ и да вопие́т:/ радуйся, Всеблаженная/ Богоро́дице, Чи́стая Приснодево.

По Христову словеси́ за бию́щия тя моли́лся еси́, свя́те:/ те́мже Небе́сная врата́ отве́рзста/ и ду́ши праведных во о́бразе ла́стовиц лета́ющия видел еси́,/ с нимиже ны́не водворя́ешися, Андре́е блаже́нне.

Христа́ Бо́га истинно возлюби́в, тебе́ сама́го отве́рглся еси́/ и тому после́довал еси́, я́коже Он рече́:/ любя́й ду́шу свою спасти́́, погуби́т ю./ Темже ду́шу твою́́ в Жизнь вечную соблю́л еси́, достохва́льне святе Андре́е.

Великая и пресла́вная ны́не сбы́шася тебе́ в Небеснем Царствии,/ аще и юро́д был еси́ миру,/ но Христу́ мудр явился еси́, достохва́льне:/ призира́й с Небе́снаго круга на ны, почита́ющия па́мять твою́́.

Богоро́дичен: Всяк земноро́дный покрывается Покро́вом Твоим,/ преславная Заступнице Богоро́дице,/ я́коже блаженный Андрей Тя ви́де,/ за мир молящуюся Несозда́нному Существу́,/ в созда́нное естество от Тебе́ обле́кшемуся.

НА МА́ЛОЙ ВЕЧЕ́РНИ

Стихи́ры на 4, глас 4. Самогла́сен:

Верою и любовию, празднолюбцы, соше́дшеся,/ в памяти блаже́ннаго отца на́шего Кассиа́на,/ псалмы и песньми восхва́лим днесь/ Небе́снаго человека и земна́го А́нгела,/ по́стником похвалу/ и новонача́льным всем преизящна наставника и руководителя му́дростнаго,/ и ны́не о нас моли́ся ко Господу, Кассиане о́тче наш,/ поми́ловатися душам нашим.

Честный и светоносный, преподо́бне, твой праздник/ испо́лнен радости и веселия духодарова́ннаго,/ и ны́не сошедшеся, и́нок множество и христоимени́тии лю́дие,/ любо́вию восхваля́юще, воспое́м Боже́ственная де́лания твоя́,/ ты бо, преблаже́нне, я́ко крин во юдо́ли, в пусты́ни сей благоде́ланьми процвел/ и благоуха́еши душе́вная на́ша чувства, Кассиане, о́тче наш,/ моли́ спасти́ся душам нашим.

От ю́ности уязви́ся желанием Божественным, о́тче преподо́бне Кассиане,/ взем бо крест свой, последовал еси́ Влады́це своему́, Христу,/ тогда и вся плотска́я мудрова́ния умертвил еси́/ и наследовал еси́ вои́стинну кротких зе́млю,/ и ны́не священная чада твоя́, сошедшеся,/ па́мять твою́́ духовно пра́зднующе,/ прославляем Го́спода,/ И́же тебе́ пресла́вно прославльшаго.

Сла́ва, глас 8:

Преподобне и преблаже́нне о́тче наш Кассиане,/ ты бо вои́стинну сподо́бися Божественныя жизни,/ посто́м бо и бдением умерщвля́я вы́ну тело свое,/ те́мже и образ бысть иноком./ Аще бо и теле́сный язык умолче́,/ но чудеса́ твоя́ свидетельствуют,/ и Богоспасаемый град У́глеч, тя проповедуя, вельми хва́лится:/ имею бо близ себе, рече́, неистощимое сокровище,/ сами бо, зря́ще чудеса́ бываемая,/ прославляют просла́вльшаго тя Го́спода,/ Емуже, пресвя́те, моли́ся дарова́ти вселе́нней мир/ и душам нашим велию ми́лость.

И ны́не, Богоро́дичен, глас то́йже:

Арха́нгела Гаврии́ла глас восприе́мше, рцем:/ радуйся, Ма́ти Бо́жия,/ Яже Жизнодавца Христа́ ми́рови ро́ждши.

На стихо́вне стихи́ры, глас 2.

Подо́бен: До́ме Евфра́фов:

Дом доброде́телей ты показа́ся/ и прия́телище дарова́нием, о́тче Кассиане,/ я́ко от земных к Небе́сным оби́телем пресла́вно, святе,/ преше́л еси́ и та́мо праведных чести сподо́бися,/ с ними же моли́ся спасти́ся душам нашим.

Стих: Честна́ пред Го́сподем/ смерть преподо́бных Его́́.

Теле́сная чувства воздержа́нием, отче, умертви́л еси́,/ страсте́й же вся́ческим бысть истерза́тель/ и плоти томи́тель, и языку молча́нии затворник,/ тем и учени́к ты множества Христо́ви привел еси́.

Стих: Блажен муж, боя́йся Го́спода,/ в заповедех Его́ восхо́щет зело́.

Стадо твое́, и́же тебе́ почитающих,/ Кассиа́не, преподо́бне о́тче наш,/ и твое́ успе́ние празднующих,/ на Боже́ственное тех возвышая раче́ние/ и в Божественную жизнь всели́ твои́ми моли́твами.

Сла́ва, глас то́йже, самогла́сен:

Храм прече́стен Бо́жией Матери,/ я́коже Сама восхоте́,/ в пренесе́нии обители воздвигл еси́,/ иде́же множества у́ченик собра́/ в нем воспевати Владычицу Богоро́дицу./ Ейже моли́ся, мо́лимся, преподо́бне Кассиане,/ не оставити нас си́рых, я́коже обеща́ся/ священное твое́ стадо избавля́ти от сете́й вра́жиих,/ да тебе́ вси, я́ко чадолюби́ва отца,/ пе́сньми непрестанно почитаем,/ прося́ще от Христа́ Бо́га прия́ти тобо́ю велию ми́лость.

И ны́не, Богоро́дичен, глас то́йже:

Обрадованная, радуйся,/ Яже Радость ми́ру рождши,/ Христа́ Жизнодавца,/ и прама́тернюю, Де́во, печаль отъе́мшая.

Тропа́рь, глас 4:

Ветхаго Ри́ма име́я воспитание,/ державу отечества своего, град Мангупский, оставль,/ и нивочто́же вмени́л еси́ княже́ние/ и славу маловре́менную су́етнаго века Христа́ ради,/ и па́че земна́го богатства избра́ богатство себе Небесное и славу вечную,/ возвы́сив ум свой к Бо́гу,/ и житие́ свое́ со А́нгелы вожделе́л еси́ восприя́ти,/ промышлением Божественнаго разума направля́ем,/ и Богоспаса́емаго У́глеча гра́да дости́гл еси́,/ и близ в преде́лех о́бласти его над Во́лгою реко́ю в пусты́ню всели́вся,/ и оби́тель пресла́вну в честь Бо́жия Ма́тере воздви́гл еси́,/ и в ней те́ло свое́ предложи́в я́ко дар освяще́н./ Тем мо́лим тя, о́тче Кассиа́не,/ моли́ Христа́ Бога,/ да спасе́т ду́ши на́ша.

Сла́ва, и ны́не, глас то́йже: Еже от века утаенное.

НА ВЕЛИЦЕЙ ВЕЧЕРНИ

Блажен муж: На Го́споди, воззвах: стихи́ры на 8, глас 8, самогласен:

Преподобне и преблаже́нне о́тче наш Кассиа́не,/ поуча́яся в за́поведех Господних день и нощь,/ тем и в законе Его́ досто́йно ходи́л еси́,/ обрете́ мзду трудов своих,/ ле́ствицу преми́рную Небе́снаго восхода,/ по ней же возше́д, достиже́ Горняго Иерусалима,/ от болезней и по́двиг достойную по́честь прие́мля,/ ны́не с Вы́шними ра́дуешися,/ Божественнаго наслажда́яся вы́ну зрения/ от Царя бо царствующим Христа,/ венцем нетле́ния увязе́ся/ и Царствия Его́ снаследник и́стинен показа́ся,/ но я́ко имея дерзновение ко Христу,/ мир ми́рови испроси́ и душа́м нашим ве́лию ми́лость.

Преподобне отче, Богоносе Кассиа́не,/ силою Креста свята́го утве́рждься,/ страстна́я взыгра́ния отрази́л еси́/ и, радуйся, достигл еси́,/ идеже глас пра́зднующих слы́шашеся кра́снаго о́наго веселия,/ тем и светлыми тя венцы́ Христос обогати́,/ чудотворче всечестне́, исцелений изливаеши неоску́дный источник/ верою приходящим к тебе́, Кассиа́не, о́тче наш,/ и дае́ши слепы́м зрение, хромым хождение,/ разслабленным и бесну́ющимся челове́ком всем здравие./ Сего ради, со страхом и с верою предстояще, молимся,/ моли́ся, преблаже́нне о́тче наш,/ спасти́ся душам нашим.

Честно́е и пречестно́е прия́телище яви́ся Духу Пресвятому,/ Кассиа́не преподо́бне,/ Безплотным бо во плоти подо́бяся,/ и тех житию́ подражал еси́,/ и сего ради от Вседержителя венча́ся десни́цы,/ и чудес дар живоно́снаго исцеления от Него прияти сподо́бися,/ и аще и от земли преста́вися,/ но Бо́гови жив и в Горних со А́нгелы Ему предстои́ши,/ моляся о душах на́ших.

И́ны стихи́ры, глас 6:

Мирски́я молвы́, преподо́бне, возненави́дев,/ Христа́ Единаго возлюбил еси́́/ и Того крест, на ра́мо взем, понесл еси́,/ Боже́ственно вооружи́вся,/ зми́я вселукаваго сле́зными ту́чами потопи́л еси́,/ плотски́я стра́сти воздержа́нием му́дре умертви́л еси́,/ терпением же и постом, и частыми моли́твами/ плоть свою ду́хови покори́л еси́,/ безстрастием души́ и ума́ чистото́ю/ по́двиг трудов своих от Него стяжа́л еси́,/ те́мже пра́зднующе па́мять твою́́, молим тя,/ моли́ся Го́сподеви помиловатися душам нашим.

Преподобне о́тче Кассиа́не,/ любве́ ради Христо́вы/ вся, яже на земли́, оставил еси́,/ по́стническими труды́ свое́ житие уясни́л еси́,/ воздержа́нием и слеза́ми душе́вное око очи́стил еси́́,/ и ум свой безстрастием просветил еси́́,/ и Боже́ственным смирением украси́л еси́,/ собрал еси́ и́ночествующих множества/ и учении своими, я́ко не́коею лествицею восхо́дною на Небо,/ на высоту́ доброде́телей возвел./ Темже ны́не чада твоя́ любе́зно вопие́м ти:/ моли́ся Го́сподеви, преблаже́нне,/ поми́ловатися душам нашим.

Богомудре о́тче Кассиа́не,/ от Ри́ма, я́ко солнце, нам возсия́л еси́,/ и Божиим смотре́нием Богоспаса́емаго ты гра́да У́глеча дости́гл еси́́,/ и храм прече́стен Бо́жией Ма́тери близ его воздвигл/ и учени́к множество собрал еси́ в нем/ воспева́ти Владычицу Богоро́дицу,/ и оби́тель прекра́сну созда́л еси́,/ в нейже трудолю́бно подвиза́ся постом и бдением,/ и злострада́нием, и еже на земли́ лега́нием,/ чистоту имея душевную и телесную и па́мять смертную,/ преподо́бне о́тче наш,/ моли́ спасти́́ся душам нашим.

Сла́ва, глас 8:

Прииди́те, и́нок множества,/ днесь псало́мская пения и цветы духовныя принесем,/ я́ко вои́стинну и́ноком удобре́нию и преподобным спожителю,/ хваляще, си́це рце́м:/ радуйся, свети́льниче многосве́тлый, возводя́ ко Христу́ и́нок множества:/ радуйся, граду У́глечу похвала́ и утверждение,/ и всем ве́рным благоути́шное приста́нище,/ и очище́ние боля́щим во гресе́х,/ на Боже́ственное тех возвыша́я раче́ние,/ и притекающих ти с верою/ от бесну́ющихся человек отгони́ши духи лукавыя;/ и гордых и немилостивых непра́ведно лицемерством зложиву́щих на земли́,/ во смире́ние и в покая́ние приводиши,/ вся́кия тем душетле́нныя страсти исцеляеши,/ множества же бесо́вская отражающи,/ и ста́до и́нок своими чудесы́ удивляеши./ Темже пречестну́ю твою́́ и святую, и А́нгелом гове́йную, па́мять пра́зднующе,/ преподо́бне о́тче наш Кассиане,/ Божественнаго человеколюбия про́сим получи́ти/ твои́ми к Бо́гу моли́твами,/ и ми́ру смире́ние испроси́/ и душам нашим велию ми́лость.

И ны́не, Богоро́дичен: Царь Небесный:

Та́же вход. Проки́мен дне. Чтения три, преподо́бническая.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На лити́и стихи́ры, глас 6:

Возсия́́ днесь пресветлая и всепра́зднественная па́мять твоя́,/ преподо́бне Кассиане,/ созыва́ющи многочи́сленное постник сосло́вие/ и преподобных ликостоя́ния,/ А́нгелы со челове́ки,/ я́ко вои́стинну к похвале́нию И́же в Троице покланяемаго Бо́га нашего,/ сего ради с верою притекающе к тебе́,/ исцеления оби́льна прие́млем,/ те́мже молим тя:/ душе́внаго нам здравия при́сно подавай,/ тебе́ верно ублажа́ющим.

Днесь похвальную песнь в памяти твое́й, отче,/ тебе́ приносим,/ приими́ и предвари́ к Бо́гу моли́твами твои́ми,/ и изба́ви нас от шуйяго стояния,/ и десна́го предстоя́ния сподо́би,/ и да тебе́ вси я́ко те́пла засту́пника досто́йно ублажаем:/ радуйся, я́ко ты днесь взы́де к Небе́сным ликостоянием веселитися безконечно/ и нам оттуду источаеши/ присноживоно́сный цельбоно́снаго да́ра источник;/ радуйся, я́ко Безсмертному Царю Христу́ Бо́гу/ во свете Его́ Божества́ выну предстои́ши/ и за град свой, и за всю Русскую землю мо́лишися непрестанно;/ радуйся, треблаже́нне о́тче наш Кассиа́не.

Днесь Богоспасаемый град Углеч,/ я́ко новаго Авраа́ма пресе́льника,/ тя, пресла́вне отче, прие́м, радуется,/ блаженна же всесвятая па́мять твоя́,/ юже пра́зднующим источа́еши благода́ть независтно всем,/ му́дрствующим Церковная догма́ты правосла́вно,/ блаженни же и ученицы́ твои́,/ и́же себе такова́го учителя духоно́сна стяжа́вше,/ греческаго восточнаго благоче́стия,/ Кафоли́ческия веры сына и чудоно́сна отца ча́да нареко́шася,/ Кассиа́не дароточи́ве,/ молитвенниче о душах на́ших.

Столп непоколеби́м Христове Церкви, отче, был еси́,/ те́мже Боже́ственною ревностию разже́гся,/ дерзнове́нно непра́ведное начина́ние/ пра́ведно разори́ти тща́шеся/ и, разде́льшияся любо́вию князи,/ па́ки ту́ю прия́ти има́ моли́ши,/ и брата на брата своего́ воста́юща, гневом Божиим прети́ши,/ и злаго насилия, я́ко гордаго фараони́та непра́вду, облича́еши,/ и преста́ти от таковаго повелева́еши/ непокаря́ющаяжеся твое́му праведному наказа́нию,/ суду́ Божию о́наго предае́ши./ Озлобле́ннаго же князя и у́зы, и темни́цею/ того добле сконча́ти таковый подвиг увещава́еши/ и блаженный вечный о́намо поко́й ему прияти обещава́еши./ И ны́не, наставниче наш Кассиа́не,/ моли́ спасти́ся всем, и́же любо́вию почитающим священную па́мять твою́́.

Сла́ва, глас то́йже:

Светлая и всепразднественная днесь возсия́ нам,/ я́коже второе солнце,/ всех празднолюбных соборы просвещает/ и тьму отго́нит древняго помраче́ния/ честна́я па́мять Кассиа́на чу́днаго,/ и Богоспасаемый У́глеч град,/ созывая к честне́й и чудотворней его иконе,/тем со страхом и радостию облобызающе, молимся,/ я́коже кроткому Давиду, благоверным на сопроти́вныя одоление дарова́ти/ и мира мирови испросити/ и душам нашим велию ми́лость.

И ны́не, Богоро́дичен: Богородице, Ты еси́ лоза истинная:

На стихо́вне стихи́ры, глас 1. Самогласен:

Преподобне о́тче Кассиа́не,/ сошедшеся любо́вию в па́мять твою́́,/ прии́мем дре́вле лиющияся от Тебе́ целебныя благода́ти/ и, светло торжествующе, во гла́сех песненных поюще Дави́дски, глаголем:/ блажен муж, бояйся Го́спода,/ непорочен бо в путех Господних ходил еси́,/ тем же с преподобными водворя́яся,/ с ними же Го́сподеви моли́ся/ поми́ловатися душам нашим.

Стих: Честна́ пред Го́сподем/ смерть преподо́бных Его́́.

Днесь в па́мять сошедшеся, братие, принесем веру и духовно почтим/ честна́го отца на́шего Кассиа́на,/ вси хотя́щии исцелитися/ да никакоже усумни́мся предстоя́ще,/ христоимени́тии лю́дие и мона́си со страхом,/ но почерпи́те вино́ Небе́снаго некта́ра, ду́ши веселящее,/ всем бо нам ны́не явно открыся благода́ть Бо́жия,/ моли́твами великаго чудотворца Кассиа́на,/ изливает бо всем, к нему с верою приходящим,/ неоскудное душам нашим и телесем живоносное здравие/ и всем в нуждах поможение и заступление,/ су́щим в беда́х и в болезнех скорый и теплый везде предстатель,/ и зубны́я болезни преизя́щный целитель,/ и всяким неисцельным недугом оздравитель,/ и́же всегда дарует нам мир и велию ми́лость.

Стих: Блажен муж, боя́йся Го́спода,/ в заповедех Его́ восхо́щет зело́.

Исто́чник приснотекущий, враче́вство безмездное,/ гроб знаменоноснаго отца на́шего Кассиа́на,/ всяк бо, приходя́й к нему, приемлет исцеле́ние./ О, великая благода́ть от силы живоно́снаго мертвеца,/ преблаженнаго отца на́шего Кассиа́на, но и по пресвяте́м его преставле́нии/ от благоуха́нных мощей его,/ исте́кши дародательный сий/ и никогда же изсыхающий животный источник,/ от него же, вси пию́ще, жизнь бла́гу и́мут,/ его же моли́твами, Иисусе Христе́, Царю всех,/ спаси́ души на́ша, я́ко Милосерд.

Сла́ва, глас 6:

Приидите празднолюбцы,/ и приидите и не заме́длите,/ и приимите, братие,/ драга́го да́ра, лию́щияся нам благода́ти/ от предивнаго отца на́шего Кассиа́на,/ и вси, сошедшеся,/ усердно и светло торжествуем вкупе/ со псалмы́ и пе́сньми,/ и пеньми духовными/ в честней памяти пресветлаго и светозарнаго,/ великаго в чудесех светильника,/ сияюща нам в пусты́ни Учме, и преименитаго гра́да У́глеча проповедника,/ преподо́бнаго отца́ просла́вим,/ и любо́вию ны́не вси почтим всепразднественный памяти его рождения день,/ и насладимся ны́нешняго благода́тнаго торжества́ бисера бесценнаго,/ се бо звание прии́де сей его праздник,/ возвещающий нам день жизни вечныя./ Сего ради со страхом предстояще ему и молящеся,/ облобызаем честну́ю его чудотворную икону с любо́вию и целомудрием, бодренно,/ и всечестное, и равноангельное его житие восприимше, восхвалим, глаголюще:/ о пресла́вне Кассиа́не,/ радуйся, отечеству своему́ свети́льниче пресветлый, радуйся, всей Ру́сстей земли радость немерцающа/ и похвала́ Углечу граду неотъемлема,/ радуйся, я́ко чи́сте Чисте́йшему Трисия́нному Света Божеству Нераздельному/ со А́нгелы предстатель яви́ся Троицы благоговейный,/ радуйся, свети́льниче многосве́тлый всем нам,/ учеником твои́м и ве́рным чадом,/ и́ноком и христоимени́тым лю́дем предстательство неложное и спасе́ние нам, грешным,/ невидимым твои́м ходатайством ко Влады́це и молением о душах на́ших.

И ны́не, Богоро́дичен воскре́сен, глас то́йже.

Тропа́рь, глас 4:

Днесь пресве́тло красу́ется сла́внейший У́глеч град,/ це́рковь же Бо́жия Ма́тере вельми́ радуется,/ име́я многоцеле́бныя в себе мо́щи великаго чудотворца,/ преподо́бнаго Кассиа́на, возсия́вшаго от Ри́ма,/ я́коже солнце, всему́ ми́ру издале́ча просвеща́я верных сердца́,/ и́мже украси́ Бог це́рковь Ма́тере Своея,/ те́мже ны́не мо́лим тя:/ бу́ди покровитель и засту́пник непобеди́мый/ от вся́ких бед гра́ду нашему/ и всем ве́рным храни́лище,/ притека́ющим в дом Бо́жия Ма́тере и кла́няющимся тебе́,/ преподо́бне уго́дниче Христов Кассиа́не,/ моли́ Христа́ Бо́га спасти́́ся душа́м нашим.

Сла́ва, и ны́не, Богоро́дичен.

На благослове́нии хле́бов о́ба тропаря́ преподо́бному по еди́ножды.

Та́же: Богоро́дице, Де́во, ра́дуйся:

НА У́ТРЕНИ

На Бог Госпо́дь: тропари́ сия́ о́ба по еди́ножды.

Сла́ва, и ны́не, Богоро́дичен: Еже от века утаенное:

По 1-м стихосло́вии, седа́лен, глас 1:

И́ноческое житие измла́да, преподо́бне, возлюби́в/ и Христу́ от души́ после́довав,/ Богому́дре и Богоблаже́нне о́тче наш Кассиа́не,/ благода́тию Свята́го Ду́ха ум свой озари́в,/ от него же пресве́тлыми заря́ми се́рдце свое́ просвети́в,/ светови́ден вои́стину весь добродетельным свои́м житие́м просия́в,/ в моли́твах и поще́ниих в бде́ниих и́ноком о́браз был еси́ великий,/ искуси́теля же воздержа́нием победи́л еси́́./ И ны́не на Небесе́х лику́еши со А́нгелы и со всеми святы́ми,/ тем же вопие́м ти:/ сла́ва Давшему ти кре́пость,/ сла́ва Венча́вшему тя,/ сла́ва Даю́щему тобо́ю всем исцеле́ние.

Сла́ва, и ны́не, Богоро́дичен:

Упование христиа́ном, Пресвята́я Де́во,/ Его́́же родила́ еси́, Бога, па́че ума́ же и слова,/ непрестанно моли́ с Вы́шними си́лами/ да́ти оставле́ние грехо́в на́ших всех и исправле́ние житию́,/ и́же верою и любо́вию при́сно Тя сла́вящим.

По 2-м стихосло́вии седа́лен, глас 8:

От земны́х на Небе́сная помы́слив и де́лом соверши́ ко Господу любовь, подобяся молнии,/ от востока до запада преходя,/ я́ко други́й Авраа́м от отечества своего́ во Египет преселився,/ тако и ты, Богоблаже́нне Кассиа́не,/ по Боже́ственному смотре́нию от гра́да Мангупска к граду Москве прии́де,/ и Богоспаса́емаго У́глеча гра́да достиже́,/ и храм пречуден Бо́жия Ма́тере созда́,/ и оби́тель прекра́сну воздви́же в славу Христу́ Бо́гу, и и́нок множества собра́,/ но егда́ бя́ше в жизни, печа́шеся и́ми я́ко при́сный отец,/ тако и ны́не, о́тче Кассиане,/ собранное ти Боголюбе́зное стадо инок от наве́т вражиих и вся́ких бед свободи́/ и моли́ Христа́ Бо́га на́шего согреше́нием оставле́ние дарова́ти/ пра́зднующим любо́вию святу́ю па́мять твою́́.

Сла́ва, и ны́не, Богоро́дичен:

Небе́сную дверь и ковче́г,/ всесвяту́ю го́ру и светлый о́блак воспоем, неопали́мую купину́, слове́сный рай,/ Е́вино воззва́ние,/ вселе́нней всей вели́кое прия́телище,/ я́ко спасе́ние всем соде́яся ми́рови и оставле́ние древним прегреше́нием;/ тем же вопие́м Ей:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся пресвято́му Рождеству Твое́му.

По полиеле́и седа́лен, глас 4:

Днесь в па́мять сошедшеся, братие,/ духовно почте́м честна́го отца на́шего Кассиа́на,/ и́же посто́м тело свое́ изнури́в,/ воздержа́нием же страсти умертвив и бдением ум очистив,/ моли́твою же душу просвети́в, нищетою на Небесех сокровище себе некрадо́мо стяжа́в,/ послушанием Бо́га благопослу́шлива име́,/ чистотою жилище Пресвята́го Ду́ха быв,/ Его́ же ради и Богоспасаемый У́глеч град/ торжествует о Бо́зе досто́йно в па́мять твою́́, о́тче Кассиане,/ моли́твами бо твои́ми спасаеми от искушений и бед/ и всякаго прещения, находящаго на ны,/ и паки, преподо́бне, не престай моляся Христу́ Бо́гу/ спасти́ся душам нашим.

Сла́ва, и ны́не, Богоро́дичен:

Мно́гими прегреше́нии/ аз, блу́дный, ум помрачи́в,/ вопию Твое́му крепкому заступлению, Богоро́дице,/ просвети́ души́ моея зе́ницы,/ возсия́ ми покаяния светлую зарю,/ и облецы́ мя во оружие Света,/ Де́во Богороди́тельнице Чи́стая.

Та́же степе́нна, антифо́н 1-й 4-го гла́са. Проки́мен: Честна́ пред Го́сподем смерть преподо́бных Его́́. Стих: Блажен муж, боя́йся Го́спода: Вся́кое дыха́ние:Ева́нгелие от Матфе́я, зача́ло 43.

По 50-м псалме́ стихи́ра, глас 8:

Прииди́те, инок мно́жества,/ прииди́те, пустынное воспитание,/ прииди́те, гра́да У́глеча небора́сленныя ветви,/ испущающия и возращающия цветы благоуха́нныя инок светоно́сивых./ Прииди́те, христоно́снии, новии израильты, и с нами вку́пе лик составим,/ днесь бо всем нам духо́вная поставля́ется трапе́за,/ и па́че благовонных аромат облагоухает нас/ па́мять преподо́бнаго отца́ на́шего Кассиа́на./ Приидите, стеце́мся и любе́зно целуем чудотворнаго образа его подобие,/ и благоговейне к нему воззовем:/ о́тче духоносне Кассиа́не,/ твои́ми моли́твами испроси́ нам у Христа/ мира и ве́лия ми́лости.

Та́же кано́н Богоро́дицы с ирмо́сом на 6, и преподо́бному отцу́ на́шему Кассиа́ну два кано́на на 8.

Кано́н преподо́бному, егóже краегране́сие сицево: Даждь ми, Христе́́ мой, восхвали́ти Твоего́́ уго́дника. Глас 2.

Песнь 1

Ирмо́с: Гряди́те, лю́дие, пое́м песнь Христу́ Бо́гу,/ разде́льшему мо́ре и наста́вльшему люди,/ я́же изведе́ из рабо́ты еги́петския,/ я́ко просла́вися.

Агнче незло́бивый, отве́рзи ми устне́ недосто́йнии и язык мой уясни́, и се́рдце мое просвети́,/ и ум мой озари́ светом твоего́ Богоразу́мия,/ да возмогу́ воспева́ти па́мять преподо́бнаго Кассиа́на,/ его же на земли́ удивил еси́.

Мно́гим милосе́рдием и щедро́тами, Соде́телю твари и веко́в Творче,/ моле́бное пе́ние приими́ и прощение нашим согреше́нием да́руй,/ Твоего́́ уго́дника, преподо́бнаго отца́ на́шего Кассиа́на, молением и тишину сердцу моему.

Светлое и Богоугодное житие́ твое́ я́ко свет вои́стинну на земли показа́ся,/ Божественную ви́дети Све́тлость, Кассиа́не, сподо́бися,/ те́мже и ви́димая вся оставил еси́ и Непостижимаго зре́ти сподо́бися.

Богоро́дичен: Мои́х прегреше́ний, Влады́чице, плени́цу расто́ргни,/ Своего́ Сы́на и Го́спода моля́щи,/ и томя́щий мя грех, Присноде́во, низложи́,/ я́ко да воспева́ю Тя всегда́, Всенепоро́чная.

Ин кано́н, глас 4.

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Боже́ственнаго и Пресвята́го Ду́ха блиста́яся благода́тию, и́же светоно́сное, Кассиа́не,/ и честно́е соверша́ющих твое́ успе́ние,/ све́тлою моли́твою твое́ю страсте́й мглу очи́сти.

От ю́ности, преподо́бне, и́ноческаго о́браза возжеле́в/ и сподо́бися его в сре́днем жития́ твоего́ красоли́тии в Русстей держа́ве получи́ти,/ иде́же и яре́м Госпо́день восприе́м, и в бразда́х своего́ се́рдца пшени́цу се́ял еси́ духо́вную, и пожа́л еси́ клас, утвержда́ющ ду́шу, Богоблаже́нне.

Светоно́сная па́мять твоя́ гра́ду У́глечу днесь возсия́, я́ко со́лнечныя лучи́,/ Кассиа́не, преблаже́нне о́тче наш,/ исправле́нии твои́́ми страсте́й на́ших отъе́млюще о́блак,/ ея́же сотворя́юще, ве́рою тя и любо́вию ублажа́ем.

Богоро́дичен: Зачала́, Пречи́стая, неизрече́нно Сло́во,/ содержа́щаго земныя концы́,/ и Сего́ родила́ еси́,/ Егóже моли́ приле́жно поми́ловати нас.

Песнь 3

Ирмо́с: На ка́мени мя веры утвердив,/ расшири́л еси́ уста́ моя на враги моя,/ возвесели́бося дух мой, внегда́ пе́ти:/ несть свят я́коже Бог наш,/ и несть пра́веден, па́че Тебе́, Го́споди.

Жезлом доброде́телей страстное море пресек/ и гордаго врага, я́коже друга́го фарао́на, моли́твами твои́ми погрузи́в,/ и избра́нное твое́ ста́до, но́ваго Изра́иля, невредно соблюди́, Кассиа́не преподо́бне.

Возлюби́в, блаже́нне, всенощное бде́ние и моли́тву непреста́нну, и любо́вь нелицеме́рну,/ си́ми очища́я ум свой, душу же просвещая, и тело свое́ смиряя,/ и ко дневны́м трудо́м благопоко́рно устроя́я.

Храм тя, вси ве́рнии, Ду́ха Пресвята́го ве́мы,/ и храм Боголе́пен Бо́жией Ма́тери воздвигл еси́,/ и оби́тель прекра́сну устроив, и в ней и́нок ста́до Боголю́бне совокупи́л,/ в нем же ны́не всяк недуг моли́твами твои́ми отгоняется.

Богоро́дичен: Во ины́х жена́х мати до́ндеже дева непозна́ся,/ ни мати по рождестве де́вствовати сподо́бися,/ на Тебе́ же, Де́во Мати, обое́ сбы́стся,/ тем веселием духа воспева́ю:/ несть непорочней, па́че Тебе́, Влады́чице.

Ин

Ирмо́с: Весели́тся о Тебе́ Це́рковь Твоя́́, Христе́́, зовущи:/ Ты моя кре́пость, Го́споди,/ и прибе́жище, и утвержде́ние.

Доброде́тельно изнача́ла показа́л еси́ житие, о́тче пребогате,/ банею пакибытия́ дар духовный от младе́нчества в души своей прием, благолепне Кассиа́не,/ солнца светлейши от ужаснаго Божественнаго видения просвещь вся чу́вства и, я́ко чу́ден, ра́зум благи́й стяжа́л еси́,/ и́ночество иму́щим житие небла́зненно показа́л еси́.

Кто твоя́ по́двиги изрещи́ возмо́жет,/ ты бо пути́ жесто́кия из оте́чества своего́ в чуждых страна́х,/ в пусты́ни, глаго́лемей У́чме, шествуя, взем суро́во, о́вощие, я́годич ядяше,/ вкушение же отлага́ше сла́достныя пи́щи боле́зньми воздержа́ния.

Я́ко ма́слина плодови́та, в дому́ Госпо́дни прозябл еси́,/ в пределех гра́да У́глеча просвети́вся ма́слом трудов твои́х, Кассиа́не духоно́сне,/ умаща́я на́ша ли́ца благода́тию Ду́ха Пресвята́го, пою́щих тя,/ преподо́бне и Богоблаженне, вся ны посети, моляся Человеколюбцу.

Богоро́дичен: Из Тебе́, Чи́стая, Цвет неувядаемый,/ благоухая все человечество, Боже́ственным миром естества́ Своего,/ И́же Отцу́ Собезнача́льный,/ из Тебе́ быв под ле́том, Де́во Всенепоро́чная.

Конда́к, глас 4:

Я́коже пресве́тлое солнце,/ возсия́ нам от Ри́ма и к ца́рскому гра́ду дости́гл еси́,/ преблаже́нне о́тче Кассиа́не,/ и А́нгельски в Ру́сстей земли́ пожи́л еси́,/ и дре́вних по́стник на высоту́ воздержа́ния востече́,/ и в пусты́ни Учме, близ Богоспаса́емаго гра́да Углеча,/ оби́тель пресла́вну и́ноком во спасе́ние сооружи́,/ и храм благоле́пен Пречи́стей Богома́тери Духом Божиим уясни́,/ и в ней тобо́ю Бог прославля́ется,/ и ны́не моли́тися Го́сподеви не преста́й о ста́де свое́м,/ и́же мно́гими по́ты и труды́ стяжа́л еси́́/ изба́вити его от всех обстоя́ний лука́ваго,/ и от вся́ких скорбе́й и бед невреди́му сохрани́тися,/ и нам, рабо́м твои́́м, грехо́в проще́ние моли́твами твои́ми получи́ти,/ и гра́ду твоему́ У́глечу от напа́стей вся́ческих/ и находя́щих паде́ний, гне́вом Божиим пра́ведным, свободи́тися умоли́,/ преподо́бне и Богому́дре о́тче Кассиа́не.

Седа́лен, глас 8:

По́стничеством вооружи́вся, блаже́нне Кассиа́не,/ страсти победив и плоть свою покорив ду́хови,/ бесо́м прогони́тель показа́ся и неду́ги целя,/ те́мже любо́вию священную па́мять твоего́ живоно́снаго успе́ния почита́юще,/ про́сим восприя́ти исправле́ние житию́ и ми́ру смире́ние/ вопию́щим к тебе́, преподо́бне Кассиа́не, о́тче наш,/ моли́ Христа́ Бо́га грехов оставле́ние дарова́ти/ прославля́ющим всесвяту́ю па́мять твою́́.

Ин седа́лен, глас то́йже.

Подо́бен: Прему́дрости:

Ангельски на земли́ пожив, Богому́дре о́тче Кассиа́не,/ ликом по́стническим примеси́ся/ и, взем крест на ра́мо свое, после́дова Влады́це своему́, звавшему тя, Христу́ Бо́гу,/ и в пустыню вселився, в труде́х же и посте́х тело свое́ изнури́л еси́,/ иде́же тя па́стыря Свои́м овцам добре устрояет Всебогатый Господь,/ сосу́де Бо́жия Ду́ха чистый, Кассиа́не преблаже́нне./ Темже моли́ Христа́ Бо́га грехов оставле́ние дарова́ти/ празднующим любо́вию пречестну́ю и святу́ю па́мять твою́́.

Сла́ва, и ны́не, Богоро́дичен:

Я́ко Всенепоро́чная Невеста Творцу,/ я́ко Неискусомужняя Ма́ти Избавителя,/ я́ко приятелище сущи Утешителя, Всепетая,/ беззаконию мя су́ща скверно жили́ще и бесом игралище в разуме бывша, потщися и сих злодействия мя избавити,/ светло жилище доброде́тельми соде́лавши,/ Светодательна и Нетленна, отжени́ о́блак страсте́й/ и Вы́шняго прича́стия сподо́би/ и Све́ту невечернему моли́твами Твоими.

Песнь 4

Ирмо́с: Пришел еси́ от Девы не хода́тай, ни А́нгел,/ но Сам, Го́споди, вопло́щся,/ и спасл еси́ всего мя человека,/ тем зову ти: сла́ва си́ле Твое́й, Го́споди.

Умертви́в себе ми́рови, жизнь равноа́нгельну на земли пожил еси́, пресла́вне,/ и я́ко дар освящен Влады́це, Кассиа́не, свою душу чисту представил еси́/ и Божественнаго Царствия достойно, отче, получил еси́.

Место прошения, отче, со тщанием исполняя,/ храм Боголепен Бо́жией Ма́тери воздвиже,/ в нем же ны́не праздничною радостию инок собрание веселится,/ славяще усердно твое́ в Небесныя круги невечерняго Света возшествие,/ па́мять твою́́ священную духовно почитаем.

Богоспасаемый Углеч град ны́не веселием, отче,/ красуется, имея мощи твоя́ близ себе, преподо́бне Кассиа́не,/ ученицы́ же твои́ житию твое́му ревну́юще и твое́й памяти радующеся, молебно вопиют ти:/ не забу́ди стадо свое, еже собрал еси́, мудре, и в жизни сей упасе́ благоче́стно,/ и ны́не потщися, о́тче наш Кассиа́не, да привлече́ши его во ограду Небесную.

Богоро́дичен: Управи ум мой, Влады́чице,/ труждающийся в пучине скорбе́й/ и потопляемый нашествием тлетворных страстей,/ спаси́ к Тебе́ прибегающаго,/ иныя бо помощи, Чи́стая, разве Тебе́, не знаем.

Ин

Ирмо́с: Вознесена Тя ви́девши Церковь на Кресте,/ Солнце пра́ведное,/ ста в чине своем,/ досто́йно взывающи:/ сла́ва си́ле Твое́й, Го́споди.

Обретая, о́тче Кассиа́не, сам себе, всеблаженне, всю нощь стояше, я́ко безплотен,/ недреманно око имел еси́ и чисто, я́коже зерца́ло, духовною зарею,/ и Божественнаго явления чистым помыслом приемля.

Пребыти внутрь мира никакоже восхотел еси́, премудре о́тче Кассиа́не, имея наставляющаго тя Бо́жия Ду́ха си́лу,/ в пусты́ни У́чме вселися, безмолвно пожил еси́ и со зверьми мысленными вы́ну брань имел еси́,/ но Божиею силою тех ополчения, я́ко дым и прах, по воздуху во исчезновение разгоняя.

Я́ко Боже́ственный зрится рай, премудре, храм Бо́жия Ма́тере,/ цветы испуща́я чудес мироуха́ния,/ имиже сердца́ наслаждаются верою, Кассиа́не, при́сно хвалящих тя.

Богоро́дичен: Святая Богоро́дице, освяти нас,/ Яже Пресвята́го Бо́га рождши,/ плотию уподобитися восхотевша человеком,/ и Небе́снаго жития вся покажи, Пречистая,/ причастники моли́твами Твоими.

Песнь 5

Ирмо́с: Све́та Пода́телю и веко́в Тво́рче, Го́споди,/ во свете Твоих повеле́ний наста́ви нас,/ ра́зве бо Тебе́, иного бога не зна́ем.

Ветри́лом, отче, воздержа́ния окрыля́ем, страстныя тьмы отбежав/ и к безстрастию путем наставляем, востече к зрению Трисолнечнаго, Нераздельнаго Божества́,/ от Него озарився, нетления богатство живоносной благода́ти твое́й нам оставил еси́.

Возсия́́ в тебе́ Господь, Егóже от души возжелел еси́, преподо́бне Кассиа́не,/ жилище свое́ возлюби в Русстей име́ти земли́,/ в пусты́ни Учме, близ преименитаго гра́да Углеча, любве ради Христовы подвизаяся в терпении вся́цем/ и Того славы духом наслаждаяся, и ны́не в Небеснем Царствии безконечно веселишися.

Единей Христовой любве, преблаже́нне Кассиа́не, приложився/ и Того смотрением Боже́ственным в на́ших пределах великия реки Во́лги/ и пустыни Учме провозсияв, я́ко пресветлое солнце, украшаяся заповедьми Спаса Христа,/ сего ради и прия от Него благода́ть изгоняти духи́ нечистыя от беснующихся человек чудозри́тельно.

Богоро́дичен: Упра́ви ум мой, Влады́чице, потопляемый нашествием скорбей и тлетворных страсте́й,/ спаси́ к Тебе́ прибегающаго, иныя помощи, Чи́стая, разве Тебе́, не знаем.

Ин

Ирмо́с: Ты, Го́споди, мой свет/ в мир прише́л еси́,/ Свет Святый, обраща́яй из мра́чна неве́дения/ верою воспева́ющия Тя.

Законом Боже́ственным последуя, премудре Кассиане,/ и повелением повинуяся Сотворшаго, законоположник явися иноком и правило известнейшее,/ наказатель безумным и злонравным человеком/ и наставник заблуждшим и светильник, и́же во тьме неведения, пресла́вне.

Огнь искушений и страсте́й пещь слезами твои́х, отче, течений и духовною росою богатно угасил еси́,/ соблюде́ся неопалимь, опаля́емь бо любо́вию всех Царя,/ ве́щная увяди́л еси́ желания, Боголю́бче Кассиа́не, о́тче наш.

Я́ко очи́стившу помышления, преподо́бне,/ благода́ть тебе́ дастся я́ко пророку будущая, я́ко настоящая глаголати, зрети же дальняя я́ко ближняя,/ и еже князя на князя гра́да твоего́ У́глеча востаю́ща непра́ведное насилие дерзновенно обличил еси́/ и, смерть онаго прови́дев, странну быти ему прорекл, Кассиа́не, Божие обиталище.

Богоро́дичен: Житейская не могут уста по достоянию Тя пети, Всепетая,/ высшу сущу Херувим и всякия твари./ Тем же с Боже́ственным Кассиа́ном Владыку о всех нас умоли́,/ Всечистая Влады́чице.

Песнь 6

Ирмо́с: В бе́здне грехо́вней валя́яся/ неизсле́дную милосе́рдия Твоего́́ призыва́ю бе́здну,/ от тли, Боже, мя возведи.

От земных к Небе́сным обителем пресла́вно вшел, Богому́дре Кассиане,/ и в Божественную жизнь вселился еси́, и тамо зрети неизрече́нных сподо́бися, ихже о́ко не ви́де, ухо не слы́ша и на се́рдце человеку грешну не взыде,/ яже угото́ва Бог любящим Его́.

Великаго святителя Иоаса́фа и чу́днаго отца Паи́сия, блаже́нне Кассиа́не,/ благословения сподо́бився и духовнаго наказания поучение от них восприи́м,/ и бу́рею греха́ не погрузи́ся,/ тем и в тихое пристанище достигл Небе́снаго Царствия,/ и тамо ясно наслаждаешися Божественнаго видения.

Твои, всеблаженне Кассиа́не, живоносныя и всечестныя мощи, лежащия во гробе, и в земных недрех нетленныя познахом и я́ко источник сладких и живых вод при́сно нам чудотворении издает благода́ть, цельбы́ точа́щи: слепыя просвещая, хромых ходити устроя́я,/ разслабленных о Христе́́ оздравляя и нечистии ду́си от бе́сных прогоняя.

Богоро́дичен: Души́ моея́ стра́сти, Пречистая, исцели,/ Яже безстрастия бывши источник,/ Ма́ти Бо́жия, просвети́ Рождеством Твоим,/ преподобных молитвы приемля.

Ин

Ирмо́с: Пожру́ Ти со гла́сом хвале́ния, Го́споди,/ Церковь вопиет Ти,/ от бесо́вския кро́ве очищшися,/ ради ми́лости от ребр Твоих/ истекшею Кровию.

Неболезненную жизнь в болезнех восприял еси́/ и болезнем лютым уставляеши озлобления/ и́же верою просящим прияти избавление неисцельным недугом, Кассиа́не всечестне,/ тем разреши на́ша болезни душевныя и телесныя.

Ра́це твое́й священней приступающе,/ благоухания Божественнаго разума исполняемся, преблаже́нне Кассиане,/ смрада избавляющеся страстей, и́же любо́вию тя чтущия, о́тче преподо́бне.

Я́ко терпя́щу ти вельми́ по́ты трудов твои́х/ в благовселенней ти Богоспаса́емаго У́глеча града, пусты́ни У́чме, преподо́бне Кассиа́не,/ удо́бь воздержа́нием, чу́дный отче, явлься Владыка тебе́ Христос в день твоего́ преставления,/ вручи́ си́лу Божественну и сим ти неду́ги повеле́ цели́ти.

Богоро́дичен: Ной я́ко праведный явлься и от потопа ду́ши праведных спасе,/ тако ты, блаже́нне Кассиа́не, от наводне́ния реки Волги собранное ти стадо ученик/ Божественными же поученьми дивно ты́я от нашествия душетленных страсте́й спасл еси́/ и, я́ко ски́нию, оби́тель кинови́и на превы́шшее место, всечестне, изволением Всечистыя пренесе́,/ юже и превозрастил еси́ боле́зньми и по́ты своими,/ весь возложился еси́ Пречи́стей Ма́тери Божии.

Конда́к, глас 5:

Я́ко многосве́тлая звезда́,/ возсия́л еси́́ в Ру́сстей земли́, о́тче Кассиа́не,/ и я́ко бога́тство драгоце́ннаго би́сера/ прии́де к нам от ве́тхаго Ри́ма/ и доше́д Богоспаса́емаго гра́да У́глеча,/ и близ его́ Боже́ственным смотре́нием/ оби́тель всече́стну возгради́л,/ и це́рковь Матере Бо́жия чуднови́дну созда́,/ и созва́ и́нок мно́жества,/ с ни́ми же моли́ся Христу́ Бо́гу/ изба́вити град сей от ва́рварскаго плене́ния,/ и междоусобныя бра́ни, и огненнаго запале́ния невреди́ма соблюди́,/ преподо́бне и Богому́дре о́тче Кассиа́не.

И́кос:

Кто не удиви́тся или не почуди́тся человеколюбию Божию/ и кто не прославит или не испове́сть неизочтенную и несказанную смотрения твоего, Христе́́ Боже,/ еже к нам излия́ днесь, благоутробия Свою ми́лость,/ я́ко яви́л еси́ последнему ро́ду на́шему уго́дника Твоего́, преподо́бнаго отца́ Кассиа́на,/ земли́ Ру́сстей и гра́ду на́шему У́глечу великое свети́ло и сокро́вище благода́тное,/ те́мже вопие́м ему си́це: о пренебесный о́тче Кассиане,/ радуйся, я́ко пресветлая звезда, от запада возсиявшая и к востоку благоче́стия истиннаго пришедши,– от ветхаго Ри́ма к царскому граду, преблаже́нне, достигл,/ отонудуже и Богоспасаемый У́глеч град Божественными детельми наполнил еси́;/ княжение и отечествие свое, град Мангу́пский, оставль,/ и Христа́ Единаго всем сердцем возлюбил еси́, и невозвратным желанием Ему последовал еси́,/ и я́ко невеществен разум стяжа́л еси́ смирением и любовию, и милостынею, еже ко всем тихостию,/ радуйся, я́ко житие свое́ в чуждых странах, в пусты́ни У́чме препроводил еси́ зе́льным воздержа́нием трудов своих;/ радуйся, я́ко ту близ гра́да У́глеча оби́тель святолепну и храм Бо́жия Ма́тере прече́стен на служение иноком возгради́л еси́/ и в нем я́ко человек был еси́ естеством, но ангельски и пожил еси́, и Вы́шняго Иерусалима согражданин явился еси́;/ радуйся, я́ко бывый, я́коже столп, страстьми непотрясо́м, обогащшийся верою крепкаго упования;/ радуйся, отечеству твое́му похвала́ и преименитому У́глечу граду просвещение, и всей Русстей земли удобрение;/ радуйся, я́ко благочестива отца преславная отрасль и благоговейныя матере ветвь многоплодна;/ ра́дуйся, целому́дрия и́ноком увеща́ние сладкогла́сное;/радуйся, па́стырю Христовы ограды, словесных овец вводя́щий в Божий разум;/ радуйся, красное доброде́телей хранилище и в печали унывающим благое утеше́ние;/ радуйся, я́ко А́нгелом собеседник быти сподо́бися и вся бесовския полки́ посрамил еси́;/ радуйся, ты бо во всех стра́нах и во своем отечествии прославлен бысть о Христе́́ много в Ру́ссии,/ и в пусты́не У́чме твори́ши чудеса, и по реце Волге плавающим тихое пристанище от обуреваний дивно уставляеши;/ радуйся, я́ко по отшествии мира сущим в различных бедах и искушениях/ готов сый предстатель обретаяся и везде призывающих тя быстро предваряяй;/ радуйся, я́ко вои́стинну обрете Божию благода́ть и со А́нгелы при́сно зрети сподо́бися лицем к лицу Святую Троицу,/ радуйся, я́ко второе солнце, сияя чудесы, и всем, приходящим к тебе́ при́сно животну исцелений;/ радуйся, преподо́бне и Богому́дре о́тче наш Кассиа́не.

Песнь 7

Ирмо́с: О́бразу злато́му на по́ле Деи́ре служи́му,/ трие́ твои́ о́троцы небрего́ша безбожнаго веле́ния,/ посреде́же огня́ вве́ржени, ороша́еми, поя́ху:/ благословен еси́, Боже отец на́ших.

От гра́да и отечества своего́ пресе́льник был еси́,/ к Бо́гу ру́це простирая, спасе́ние обре́те,/ водам же, послужившим тебе́, Божиим смотрением Богоспаса́емаго У́глеча гра́да достигл еси́, идеже бя́ше угодно Влады́це,/ Ему же радостно ны́не поеши:/ благословен Бог отец на́ших.

Преименитаго гра́да Ростова архиерея Иоасафа благословение А́нгельскаго образа восприял еси́/ и в нем боголюбезнаго князя Андрея и христолюбивых людей гра́да Углеча множества,/ чуднаго же отца Паисия и вся кинови́йския и́ноки радости исполнил еси́ и духовнаго веселия/ твои́м по реце Волге дивно шествием, спутника, отче, Христа́ обрел еси́,/ к Нему́ же ны́не радостно зове́ши:/ благословен Бог отец на́ших.

Ликуют собрания и́ночествующих множества,/ и веселятся народов Богоспасаема У́глеча гра́да пространствия в честнем преставлении Кассиа́на преблаженнаго,/ молебный совершающе праздник, радостно от души вопиют:/ благословен Бог отец на́ших.

Богоро́дичен: Пещь преобразова́ше Твое́ Рождество, Всенепоро́чная,/ отроки бо не опали́,/ я́коже ложесна́ Твоя́, огнь непостоянный./ Тем же молим Тя:/ огня вечнаго избави рабы́ Своя.

Ин

Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ не́жели пла́менем опаля́еми, взыва́ху:/ благословен еси́ в храме славы Твоея́, Го́споди.

Освя́щся от младенства доброгласною трубою молитвы Твоея́/ и неплодныя утробы многоплодны сотворил еси́,/ явися отец си́рым, вдови́цам заступник милостив,/ и сми́рен, и благоуте́шителен ко всем, Кассиа́не всечестне, был еси́;/ сего ради с Небес благода́ть приял еси́ исцелений:/ слепым подае́ши прозрение и хромым благотечение, и зубныя болезни облегчение.

Водрузи́вый прежде крест и келлию, идеже ны́не, Боголепне/ Боголюбезная кинови́я в пусты́ни У́чме тобою, освящение, сияет, Кассиа́не Богомудре,/ в ней молитвы своя возсылая Вышнему,/ я́ко Христа́ Царя Славы со А́нгелы мысленныма очима, Богоносе, вы́ну зря́ще/ и в пусты́ни сей великодревесней водворяяся с Го́сподем,/ Боже́ственною тя благода́тию осеняюща.

Я́ко звезду, тя, Кассиа́не, всемирну,/ иноком светило незаходимое, помощника в бедах и грешником великое покаяний прибежище вемы,/ хода́тая и молитвенника предлагаю Влады́це Христу́ тя, всечестне.

Богоро́дичен: Ви́дети желая Твой уго́дник Кассиа́н/ Твоего́́ Сы́на и Бо́га неизреченную Славу, Богородительнице,/ Сего честны́й крест на ра́мо взем,/ после́дова живоносным стопа́м Его́.

Песнь 8

Ирмо́с: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бога/ пойте дела я́ко Го́спода/ и превозноси́те во вся ве́ки.

Авраа́мский стяжа́в нрав, премудре, от страны́ Римския пресе́льник быв к царскому граду,/ отонудуже и Богоспаса́емаго У́глеча гра́да достигл еси́/ и та́мо Бо́гу послужил еси́, обещава́вшу ти воздание богатно;/ тем, веселяся, усердно Христо́ви вопие́ши:/ благословите вся дела Го́спода и превозноси́те Его́ во веки.

На земли́ пожив я́ко А́нгел с плотию, я́ко безплотен безплотныя враги под ногама покори́,/ чистоту же, я́ко Небесный свет, стяжа́л еси́,/ постом и бдением и моли́твами в Горняя востече́,/ иде́же со А́нгелы на Небесех ликуя светло, Христови вопие́ши:/ благословите вся дела Го́спода и превозноси́те Его́ во веки.

Римския стра́ны и град Мангу́пск, отечество твое́, проповедует, преподо́бне,/ и сла́внейший Углеч град тобо́ю хвалится,/ прии́м от Бо́га сокровище некрадо́мо, помощника бо велика, блаженнаго Кассиана восприят,/ и с ликом мни́шеским ны́не веселяшися, тем па́мять твою́́ пра́зднующе, радостно вопием:/ благословите вся дела Го́спода и превозноси́те Его́ во веки.

Богоро́дичен: Великому таинству Рождества Твоего́/ кто не удивится, Богоро́дице,/ или кий язык земны́й или ум безплотных изрещи возможет,/ па́че бо естества́ и смысла, Богоро́дице,/ Зижди́теля родила еси́.

Ин

Ирмо́с: Ру́це распросте́р Даниил,/ львов зия́ния в ро́ве затче́,/ о́гненную же си́лу угасиша, доброде́телию препоя́савшеся/ благоче́стия рачи́тели,/ о́троцы, взыва́юще:/ благословите вся дела Господня Го́спода .

Ум от страсте́й очистив, беседовал Го́сподеви Вседержителю,/ от Него же неизглаго́ланно, преподо́бне, научаем,/ пророчески предглаголал востаю́щему неправедно князю на праведнаго князя, всеблаженне;/ тем тя, я́ко вели́ка просветителя душа́м нашим,/ согласно, Кассиане премудре, ве́рнии похваляем, поюще:/ благословите вся дела Господня Го́спода.

Подавая тебе́ яже проти́ву любве́ Зижди́тель,/ от юности соблюдая тя десницею Боголепно,/ я́ко от младенства вся́ко похотение попра́вша,/ тем, я́коже молния, всем возсия́ великими блистании,/ жития твоего́ воздержа́нии сия́юще, Кассиа́не премудре,/ и́же благоче́стно Зижди́телю зовущим:/ благословите вся дела Господня Го́спода.

Я́ко струя́ Божественна исцелений происходит от живоносныя ти благода́ти,/ вся исцеляет и омывает скверны страсте́й, и гное́ние язв лю́тых очищает,/ и верных животворно напая́ет всех сердца,/ Кассиа́не благода́теточи́ве, и́же любо́вию поющих:/ благословите вся дела Господня Го́спода.

Богоро́дичен: Я́коже Иса́ия древле в Карми́ле всели́ся,/ тако и ты в пусты́ни великолесней Учме вселитися вожделел еси́/ особь с Богом упражнятися и, Богоначальными озарився светолитии, уго́дник явися Богоро́дицы, вопия Ей:/ радуйся, Обрадованная, Господь с Тобо́ю и Тебе́ ради с нами.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святыя Девы неизрече́нно воплоти́вшагося нас ра́ди,/ ве́рнии единому́дренно пе́сньми велича́ем.

Четвероле́тне пра́зднующемуся Кассиа́ну Ри́млянину тезоимени́т был еси́, блаже́нне Кассиа́не,/ и того житию подражая, в Русстей земли́ равноангельно в созда́нней ти обители Пресвятыя Богоро́дицы пожи́л еси́,/ тем же и ра́вну почесть от Бо́га сподо́бился еси́ прия́ти,/ с ни́мже ны́не на Небесех весели́шися и нас поминай, празднующих священную па́мять твою́́, да тя непрестанно величаем.

Память священная ти днесь, я́ко солнце, возсия́, Кассиа́не преблаже́нне,/ и́же благочести́вых сердца́ озаряющи, болезней твои́х и чудес сиянием я́ко вои́стинну просвещаеши, отче,/ в нюже вся ны помяни́, верою почитающия тя.

Твоя священная и живоносная благода́ть многоразли́чныя болезни исцеляет/ и попаля́ет полки́ бесо́вския всегда, Богоносе Кассиа́не,/ Божиим Промыслом то́чиши всем исцеления, верно тя при́сно блажа́щим.

Богоро́дичен: Глас Гаврии́лов приносим Ти, радующеся:/ радуйся, глаголюще, место священия;/ радуйся, преподобным славо и всем ве́рным спасе́ние,/ Ея́же ради обожи́хомся, Богоро́дице Приснодево.

Ин

Ирмо́с: Камень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христос,/ совокупи́вый разстоя́щаяся естества́:/ тем, веселя́щеся, Тя, Богоро́дице, величаем.

Стопам последуя, преподо́бне и Богоносне, Владыки Христа,/ и́же благоче́стно пожи́в на земли́, кро́ток, незло́бив яви́ся,/ милостив и смирен, и благоуте́шителен, Кассиа́не пресвяте, и любве́ исполнь Божественныя,/ сего ради тя верно восхваляем.

Исплете́ся тебе́ венец, я́ко победителю, Кассиа́не всеблаженне,/ живоносною и вседержительною Десницею, отче,/ и ны́не поющим всесвященную па́мять твою́́,/ сподо́би, блаже́нне, улучи́ти оставле́ние согреше́нием и прияти ми́лость, пресла́вне.

Примеси́ся Безплотному воинству и преподобным ликом сочетася,/ и со избранными всеми лику́еши, претворься и́стинным обоже́нием и безсмертною, отче, жизнию,/ с ними же непрестанно о нас своего́ Владыку моли,/ да подаст и нам тобо́ю Жизнь вечную.

Богоро́дичен: Храм освяще́н, вместен Единому от Троицы сый,/ храм Твой, Влады́чице, уго́дник Тоя́, духоно́сец Кассиа́н, че́стен воздвиже во славу Твою́ и честь,/ в немже непрестай моляся,/ дарующи нам помощь моли́твами Твоими.

Свети́лен, глас 7. Самогласен:

Светильника свыше просвещаемаго/ озаре́ние детельми приемлюще,/ ны́не светоносною памятию твое́ю,/ Богоносне Кассиа́не, о́тче наш,/ ду́ши на́ша освящающаго, достодолжно почте́м;/ радуйся, я́ко ты днесь, Христову Престо́лу предстоя́, преподо́бне, с Богома́терию Пречистою Де́вою,/ моляся непрестай, победы на варвары христолюбивому народу на́шему дарова́ти/ и всем верующим душе́вное спасе́ние/ моли́твами твои́ми просим улучи́ти, Кассиа́не Богомудре.

Сла́ва, глас то́йже.

Подо́бен: Духом провидя:

Благода́ть преизбы́сть Бо́жия в души́ твое́й, Богому́дре Кассиа́не,/ и я́ко безплотен на земли́ пожив,/ тем почитающих тя любовию,/ страсте́й изба́ви темных облак, и к тихому пристанищу Боже́ственному приведи,/ и отгони ополчения бесо́вская,/ и испра́ви к падению преклоньшихся душетленнаго потопления/ дивным ти и нечаемым предстательством и заступлением, Богоблаженне.

И ны́не:

Сотворь воистину с Тобо́ю величие/ Сын Превечный Отчим Советом,/ Жизнь бо нетленную без стра́сти родила́ еси́/ и пребысть, я́коже прежде рождества, Дева,/ ма́терских избе́гши болезней,/ и по рождестве Де́вою пребывша,/ те́мже зовем Ти со А́нгелы:/ Богоневесто, радуйся, Ма́ти Бо́жия и Неискусому́жная,/ черто́г и дверь, и Престо́л о́гнен,/ и гора Бо́жия несеко́мая, и купина́ неопали́мая,/ Всемилостивая Влады́чице.

На хвалитех стихи́ры на 4, глас 8.

Самогла́сен:

Боже́ственная и светоносная наста́ па́мять твоя́ днесь,/ и́же в постницех, великий Кассиа́не, о́тче наш,/ ду́шу и тело духом веселящи,/ те́мже приидите, празднолюбцы,/ я́ко да насладимся ны́нешняго торжества,/ се бо наше звание преи́де/ и всей Русстей земли́ удобрение,/ и гра́ду на́шему Углечу похвала́ и утверждение,/ сонаследник бо Христов явися,/ и Безплотных житию подражатель был еси́, Кассиа́не всечестне,/ и моли́ся Спасу всех/ умирити мир и спасти́ души на́ша.

Отче Богому́дре Кассиа́не,/ тебе́ Бог показа́ в на́ших странах/ па́стыря словесному Своему́ стаду,/ и украсил еси́, пречудне, це́рковь Бо́жия Ма́тере,/ и, я́ко свещи́, в ней возжегл еси́ светоносных служа́щих Бо́гови и́ноков,/ идеже и священное ти тело сложив,/ душею же в Небе́сная взы́де ликостояния./ И ны́не всесвятая твоя́ благода́ть/ Духом Божиим чудновидно живоносная исцеления/ всем, с верою притекающим, обильно источает;/ тем моли́ся ны́не, Кассиа́не пресвяте,/ дарова́ти душам нашим мир и велию ми́лость.

Я́ко А́нгел земны́й и Небесный человек был еси́, премудре,/ умертвил еси́ плоти мудрование Божественными разуме́нии/ и телесных превыше страсте́й был смешен до́льними,/ нося начерта́ние Божие,/ источник умиления и щедро́там струя незави́стна,/ явися пучина чудес и грешником споручник,/ ма́слина вои́стинну Бо́жия плодови́та,/ маслом трудов твои́х, Кассиа́не чудне,/ умаща́я верно восхваля́ющих тя.

Преподобне и Богоносне Кассиа́не,/ житие свое́ прошед нескверно,/ терпение же, и кротость, и любо́вь нелицеме́рну,/ всенощно́е стояние, и́нокующим украше́ние,/ веру и надежду истинну,/ изображая в себе Божественными доброде́тельми,/ весь световиден показася действом Свята́го Духа/ и источник чудесем яви́ся днесь, и река дарований,/ притекающим к тебе́, Кассиа́не Богомудре,/ еже слепым видети, прокаженным очищатися,/ и одержимыя нечистыми духи/ от тех власти избавляеши и целомудрие им твориши,/ сия́ тебе́ дарова Господь, о́тче наш,/ ты же тая́ нам раздаеши неоскудно, всебогате.

Сла́ва, глас то́йже:

Духа Божественнаго благода́тию/ в па́мять священнаго отца собраннии благове́рнии празднолюбцы/ Кассиа́на, благочестию подражателя, веселящеся, восхвалим,/ Церкви пресветлаго светильника,/ Божественнаго Ду́ха сосу́д преочи́щен и избран,/ чудотворца дивнаго и дародателя живоно́снаго,/ днесь, сошедшеся к нему, стадо и́нок/ и христоименитых людей множества со архиерейскими лицы,/ и чудесы его точа́щими в нас ны́не ясно удивля́емся/ и возвеличим отца нашего, сице глаголюще:/ радуйся, Кассиа́не, постником светило многосветлое,/ и́ноком звезда незаходимая,/ архиере́ом красота и пастырем сла́ва, преподобным совсельниче;/ радуйся, Святыя Троицы пресветлое жилище:/ радуйся, любве́ и милования исто́чниче:/ радуйся, преосия́нный свети́льниче разсуждений;/ радуйся, правило доброде́телей истинное;/ радуйся, сто́лпе одушевле́нный Бо́жия Ма́тере,/ вои́стинну угодниче и проповедниче неизреченный;/ радуйся, преименитому У́глечу, граду нашему, похвала́ и утверждение.

И ны́не, Богоро́дичен:

Влады́чице, приими́ молитвы раб Твоих/ и изба́ви нас/ от всякия ну́жды и печали.

Славословие великое и отпуст.

НА ЛИТУРГИ́И

Блаженны песнь 3-я и 6-я, таже прокимен, глас 4: Честна пред Го́сподем смерть преподо́бных Его́́. Стих: Что воздам Го́сподеви о всех, яже воздаде ми. Апостол, зача́ло 213: Аллилуиа. Стих: Блажен муж, бояйся Го́спода: Стих: Сильно на земли будет семя Его́: Ева́нгелие от Матфе́я, зача́ло 43. Причастен: В па́мять вечную:

Преподобный Кассиан Угличский

Службу ея зри 12 июня, на пренесение честных мощей

Тропа́рь, глас 3:

Днесь восхваляем тя, преподобная мати,/ великая княгине инокине Анно:/ я́ко бо лоза плодови́та посреде терния,/ процвела еси́ во граде Кашине твои́ми доброде́тельми,/ всех удивила еси́ чудным твои́м житием,/ те́мже Христу́ Бо́гу угодила еси́,/ и ны́не, радующися и веселящися,/ пребываеши с лики преподобных жен,/ наслаждающися райския красоты́ и веселия./ Молим убо тя, моли́ о нас/ Человеколюбца Христа́ Бо́га нашего,/ дарова́ти нам мир и велию ми́лость.

Конда́к, глас 4:

Подо́бен: Вознеслся еси́:

Я́ко пресветлая звезда яви́лася еси́ в Российстей земли,/ во граде Кашине, преподобная мати Анно./ Во всех благочестивых и верных женах,/ я́ко крин, процвела еси́ чистым и непорочным твои́м житием,/ во инокинях же совершенными твои́ми труды и подвиги/ и взошла еси́ к Вышнему граду, радующися и веселящися,/ я́ко добре соверши́вши твое́ течение,/ и ны́не честныя твоя́ мощи, аки бисерие драгое,/ явишася на исцеле́ние всем приходящим с верою./ Тем и вопие́м ти:/ радуйся, всекрасная душею, и моли́ Христа́ Бо́га о спасении душ на́ших.

Тропа́рь, глас 1:

Моли́твами Твоих мучеников, Го́споди,/ благочестие в стране Каза́нстей насади́ся,/ и, я́ко пла́менем о́гненным,/ Православной верой Восток озари́ся,/ и ны́не их предста́тельством, Человеколюбче,/ не помяни́ беззаконий на́ших,/ но утверди нас в вере истинней/ и мир подаждь, молимся Ти.

Конда́к, глас 1:

Моли́твами святы́х мучеников Казанских/ умоле́н буди, Го́споди,/ и вся на́ша болезни исцели́,/ и мир умири́, Многомилостиве.