29-й день

Святыя преподобному́ченицы Анастаси́и Ри́мляныни и преподо́бнаго отца́ на́шего Авраа́мия Затво́рника

Преподобнаго отца на́шего Авраа́мия Ростовскаго, чудотворца

Преподобнаго Авраа́мия Затворника,

На Го́споди, воззвах: стихи́ры мученицы, глас 8.

Подо́бен: Что вас наречем:

Му́ченице страстоте́рпице всехвальная,/ воздержа́нием стра́сти низложи́вши плотски́я,/ страданием зми́я умертви́ла еси́ врага,/ А́нгелы удиви́вши боле́зньми твои́́ми,/ человеки обвесели́вши страда́нии твои́́ми,/ мона́шествующих удобре́ние,/ де́вства сосу́д./ Моли́ спасти́́ и просвети́ти ду́ши на́ша.

Что тя возъимену́ем, славная?/ Девства добро́тами невесту просия́вшу Христову,/ дщерь избра́нну Вы́шняго Иерусали́ма,/ сожи́тельницу А́нгелов и собесе́дницу,/ черто́га мысленнаго наслажда́ющуся,/ Анастасие многострада́льная,/ мона́шествующих удобрение./ Моли́ спасти́ и просвети́ти ду́ши на́ша.

Терпе́ла еси́ зубо́в искорене́ние,/ рук отсече́ние, и ног, и сосце́в,/ ссека́ема на у́ды от беззаконных мучителей,/ к добро́те Жениха взира́ющи/ и болезни па́че естества́ терпя́щи,/ Анастаси́е многострада́льная,/ невесто Христова нетленная,/ моли́ спасти́ и просвети́ти ду́ши на́ша.

И́ны стихи́ры преподо́бнаго, глас то́йже.

Подо́бен: О пресла́внаго чудесе́:

Отче Богому́дре Авраамие,/ Авраа́му подо́бник быв ду́хом,/ пресе́льник был еси́ земли оте́ческия, блаже́нне./ Плоти пожела́ния отве́рг/ и, в хи́жине ма́лей заключи́в, радуяся, тело твое́,/ душу же впери́л еси́́ к Небеси,/ идеже житие́ я́ве стяжа́л еси́́.

Преподобне о́тче Авраа́мие,/ Авраамскую душу тезоиме́нно стяжа́в,/ напа́сти претерпе́л е́си,/ ве́рою Боже́ственною укрепля́емь/ и любо́вию Бо́гу соединя́емь,/ обетова́ния зе́млю насле́довал еси́,/ украша́емь доброде́телей светлостьми́./ Темже, веселящеся, Твою́ па́мять торжеству́ем.

Преподобне о́тче Авраамие,/ пре́лестьми лю́те поглоще́нную зми́ем/ и попо́лзшуюся поги́бели в ров/ Про́мыслом Боже́ственным возвле́кл еси́/ и спаса́ему Бо́гу предста́вил еси́./ Ея́же покаянию вси удиви́шася,/ благоче́стно Го́спода сла́вящии Преблага́го.

Сла́ва, и ны́не, Богоро́дичен:

Ра́дуйся, Света Божественнаго носи́ло,/ пресве́тлый све́щниче, Пресвята́я Богоневе́сто:/ Свет нам возсия́ла еси́ от пречи́стою боку́ Твое́ю,/ просвеща́я мира концы́/ и освяща́я Свое́ю бла́гостию./ Ра́дуйся, нача́ло на́шего спасе́ния, Чи́стая./ Ра́дуйся, страшное слы́шание и глаголание наде́ющихся на Тя.

Крестобогоро́дичен:

Что зри́мое виде́ние,/ еже Мои́ма очи́ма ви́дится, о Владыко!/ Содержай всю тварь, на Древо воздви́жен быв,/ и умираеши, всем дая́й жизнь;/ Богородица, пла́чущи, глаго́лаше,/ егда́ узре́ на Кресте́ возноси́ма,/ из Нея неизрече́нно возсия́вшаго/ Бо́га и Человека.

Тропа́рь святыя, глас 4:

А́гница Твоя́, Иисусе, Анастаси́я,/ зове́т ве́лиим гла́сом:/ Тебе́, Женише́ мой, люблю́/ и, Тебе́ и́щущи, страда́льчествую,/ и сраспина́юся, и спогреба́юся Крещению Твое́му,/ и стражду́ Тебе́ ра́ди, я́ко да ца́рствую в Тебе́,/ и умираю за Тя, да и живу́ с Тобою;/ но, я́ко же́ртву непоро́чную, приими́ мя с любо́вию, поже́ршуюся Тебе́./ Тоя́ моли́твами/ я́ко Ми́лостив спаси́ ду́ши на́ша.

Сла́ва, преподо́бнаго, глас 8:

В тебе́, отче, известно спасеся е́же по образу:/ прии́м бо крест, последовал еси́́ Христу/ и, де́я, учил еси́ презира́ти убо плоть, преходит бо,/ прилежа́ти же о души, ве́щи безсмертней./ Темже и со А́нгелы сра́дуется, преподо́бне Авраамие, дух твой.

НА У́ТРЕНИ

Кано́н преподо́бныя.

Егóже краегране́сие: Мужеския твоя́, мученице, восхвалю болезни. Творение Иосифово. Глас 8.

Песнь 1

Ирмо́с: Пои́м Го́сподеви,/ проведшему люди Своя сквозе́ Чермно́е море,/ я́ко един славно прославися.

Сию́ светоно́сную па́мять твою́́ почита́ющему, Богомудрая,/ просвещение ми подаждь, души моея тьму отгоня́щи.

Всю от пеле́н тебе́ саму́ю возложила еси́ Зижди́телю твое́му/ и огне́м воздержа́ния теле́сныя стра́сти попали́ла еси́́.

К высоте́ муче́ния, мученице, возшла́ еси́, непощаде́вши пло́ти,/ и черто́гов мысленных, я́ко дева, сподо́билася еси́.

Богоро́дичен: Тя, небоме́рную Ле́ствицу,/ на нейже Бог утвердися, человеки Небе́сны соде́лав,/ Отроковице, почитаем.

Ин кано́н преподо́бнаго. Егóже краегране́сие: Твое́ честву́ю всесветлое житие́, блаже́нне. Иосиф. Глас то́йже.

Песнь 1

Ирмо́с: Во́ду прошед, я́ко сушу,/ и египетскаго зла избежа́в,/ израильтянин вопия́ше:/ Изба́вителю и Бо́гу на́шему пои́м.

Божественными сияя блистании,/ светоносный твой совершающия праздник,/ страсте́й омраче́ния, всеблаженне, моли́твами твои́ми, Авраамие, изба́ви.

Боже́ственное разжже́ твою́́ душу, блаже́нне, желание,/ угаси плотска́я разжже́ния, отче,/ и невещественно на земли тя жи́ти сотвори.

Умертви́в у́ды, и́же на земли, пощением и всякими злострада́нии, о́тче мудре,/ Жизни сподо́бился еси́́ лучшия на Небесех,/ Богоносе Авраамие.

Богоро́дичен: От крове́й Твоих священных/ Бо́га Отца Слово воплотися преесте́ственно, Де́во Марие,/ Егóже моли́ плотска́я моя умертви́ти взыгра́ния.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных/ и поет Тя дух мой.

Стояла еси́ пред суди́щем мучителя,/ Христа, славная, Творца всех и Владыку,/ Бо́га Слова пропове́дающи.

Добро́та сердечная видимым зра́ком, славная, изда́вшися,/ тя, красне́йшую, зря́щим явила есть.

Богатство неистощи́мо исцелений тебе́ подаде́, отроковице, Христос,/ Егóже нищету́ вольно возлюбила еси́́.

Богоро́дичен: Вещь грехо́в мои́х/ Твои́х молитв огнем попали́, Ма́ти Света,/ ро́су ми Боже́ственную оставле́ния нося́щи.

Ин

Ирмо́с: Небе́снаго круга Верхотворче, Го́споди,/ и Церкве Зижди́телю,/ Ты мене утверди́ в любви Твое́й,/ желаний кра́ю, верных утверждение,/ еди́не Человеколюбче.

Всеобра́зно возжеле́в желаний коне́чное,/ мира и пло́ти, Богоносе, вне был еси́,/ тем восприя́л еси́ премирную славу и ве́чнующее, отче, наслаждение.

Храм жив явился еси́ вседе́тельнаго Духа, отче,/ в хи́жине тело заключи́в, преподо́бне./ Темже облиста́л еси́́ доброде́телей луча́ми, священно обожа́емь, блаже́нне Авраамие.

Де́ланием болезней, доброде́телей зрел, преподо́бне,/ израсти́л еси́ клас стори́чествующь, имже питаются че́стно/ честно́е твое́ успение торжеству́ющии.

Богоро́дичен: В тебе́, Всесвята́я,/ всего Виновный за премногое милосердие хотя́ вселися и освяти́ человеческое существо́,/ преступлением пе́рвее попо́лзшееся.

По 3-й песни конда́к Анастасии, глас 3.

Подо́бен: Дева днесь:

Де́вства вода́ми очище́нна, преподобная,/ му́ченичества кровьми́, Анастасие, венча́вшися,/ подае́ши су́щим в ну́ждах неду́гов исцеле́ние и спасе́ние, приступа́ющим от сердца,/ кре́пость бо тебе́ подае́т Христос,/ источа́я благода́ть приснотеку́щую.

Седа́лен, глас 8.

Подо́бен: Прему́дрости:

Воздержания росо́ю страсте́й погаси́ла еси́ пла́мень ю́ношески,/ огне́м же крове́й твои́х всю пре́лесть попали́ла еси́/ и Жениху Слову, я́ко дар, принесла́ еси́ честно́е девство и до́блественное страда́ние./ Темже в чертог введе́ тя славы, све́тле до́бльствовавшую и зми́я поправшую./ Анастаси́е многострада́льная, моли́ Христа́ Бога/ грехо́в оставле́ние пода́ти чтущим любо́вию святу́ю па́мять твою́́.

Сла́ва, преподо́бнаго, глас 1.

Подо́бен: Гроб Твой:

И́же древнему Авраа́му подо́бяся, отче,/ удалился еси́ сродников по пло́ти,/ повину́яся, Авраамие, глаголу Бо́га нашего./ Темже, постився, и душу светле́йшу показа́л еси́ со́лнечных лучь,/ Богому́дре всеблаженне.

И ны́не, Богоро́дичен:

Настави ны на путь покая́ния,/ уклоншияся при́сно к безпу́тием зол и Преблагаго прогне́вавшия Го́спода,/ Неискусобра́чная, Благословенная Марие, прибе́жище отча́янных человеков,/ Божие обита́лище.

Крестобогоро́дичен:

Нескве́рная А́гница,/ А́гнца и Пастыря, пове́шена на Дре́ве, ме́ртва зря́щи,/ плачущи веща́ше, матерски восклицающи:/ ка́ко претерплю́ Твое́, еже па́че слова, Сы́не Мой, сни́тие и вольныя страсти, Боже Преблаги́й?

Песнь 4

Ирмо́с: Услы́шах, Го́споди,/ смотре́ния Твоего́́ та́инство,/ разуме́х дела́ Твоя́/ и просла́вих Твое́ Божество́.

Тя, и́го легчайшее Христово, мученице, понесшую от юности,/ железное у́же носи́ти пребеззако́ннующии осуди́ша.

Ка́пли крове́й твои́х многобожия угаси́ша у́глие,/ лучи́ же чудес твои́х страсте́й вещь попали́ша.

Не обнажи́ благода́ти, те́ло твое́ обнажи́в, лука́внейший,/ истка́ну же па́че свыше нераздра́ну ри́зу исхода́таи тебе́.

Богоро́дичен: По рождестве пребыла́ еси́ нетленна Дева,/ я́коже прежде рождества,/ Ю́на бо Младенца родила́ еси́, прежде век познава́ема.

Ин. Ирмо́с то́йже

Струя́ми, отче, слез твои́х душевныя скве́рны омы́в,/ Боже́ственное был еси́ Ду́ха и честно́е, всеблаженне, жили́ще.

Бде́ние всено́щно, молитву непреста́нну,/ безпристра́стие и любовь нелицеме́рну,/ и соверше́нну веру удержа́л еси́́.

Исцеля́ти стра́сти и отгони́ти, преподо́бне, ду́хи,/ благода́ть прия́л еси́́, Авраамие,/ я́ко Божий уго́дник и́стиннейший.

Богоро́дичен: Унынием одержи́ма и грехо́м ны́не погруже́на,/ мольбо́ю Твое́ю избави мя,/ Богоро́дице, Ма́ти Присноде́во.

Песнь 5

Ирмо́с: У́тренююще, вопие́м Ти,/ Го́споди, спаси́ ны:/ Ты бо еси́ Бог наш,/ разве Тебе́, ино́го не ве́мы.

Не изнуре́на огне́м веще́ственным яви́лася еси́,/ му́ченице Анастаси́е,/ огнь бо тя сердечный Божественныя любве ороша́ше.

Ударе́ньми лица́, мученице Анастаси́е, украси́вшися,/ врагов отразила еси́ ме́рзское неразумие.

Протяже́на на дре́ве, Богомудрая Анастаси́е,/ любо́вию Жениха твоего́ Боже́ственную страсть образова́ла еси́.

Богоро́дичен: Поем Тя, Всепетая Влады́чице Богоро́дице,/ Бо́га бо препе́таго/ пло́тию родила́ еси́, Пречистая.

Ин

Ирмо́с: Вску́ю мя отри́нул еси́/ от лица́ Твоего́, Свете незаходи́мый,/ и покры́ла мя есть чуждая тьма окаяннаго;/ но обрати́ мя и к свету за́поведей Твоих/ пути моя напра́ви, молюся.

Я́ко плодови́тая розга́,/ гро́зды израсти́л еси́, о́тче Авраамие, доброде́телей Боже́ственных,/ умиления вино точа́щия и страсте́й пия́нство от душ отгоня́щия,/ и сердца́ верных веселя́щия.

Напа́сти тебе́ различны/ змий вселука́вый, отче, воздви́же,/ но того оружием креста, Богоносе, умертви́л еси́,/ и победы венец от Бо́га пра́ведным судо́м прия́л еси́, Богому́дре Авраамие.

Святы́ни дом, о́тче,/ Божественнаго Ду́ха верою быв,/ созда́л еси́ дом священный/ и, несвященный собо́р несвяще́нныя ле́сти преложи́в наказа́ньми,/ всех Бо́гу освяти́л еси́.

Богоро́дичен: Матерь, Де́ву Отроковицу,/ Боже́ственным просвеща́еми Духом, Пречистая,/ священнии пророцы священными Тя гла́сы провозвести́́ша,/ из Неяже Бог Слово, па́че вины́ же и слова, воплоти́ся за милосердие безчи́сленное.

Песнь 6

Ирмо́с: Ри́зу мне пода́ждь све́тлу,/ одея́йся светом, я́ко ризою,/ Многоми́лостиве Христе́, Боже наш.

Сокруша́емо тело/ ра́нами явля́ше правость твоея́ совести, страстотерпице,/ ко Христу́ Бо́гу нашему.

Ви́сящи высоко́, раны, мученице, терпя́щи/ и не уя́звлено храня́щи души благородие, достохва́льная.

Претерпе́ла еси́ зубо́в, и рук, и ног отъя́тие, мученице многострада́льная,/ взирающи ко Христу, Жениху твое́му.

Богоро́дичен: Человеколю́бца рождши, Бога, Благолюбивая Влады́чице,/ Того моли́ геенны огня́ изба́витися нам.

Ин

Ирмо́с: Молитву пролию́ ко Господу/ и Тому возвещу́ печали моя,/ я́ко зол душа моя испо́лнися/ и живот мой аду приближися,/ и молюся, я́ко Ио́на:/ от тли, Боже, возведи́ мя.

Светильника, тя, су́щии во тьме пре́лести, неле́стно наставля́юща,/ обре́тше к путе́м жизни, Богоно́се,/ неве́дения тьму отложи́ша и яви́шася светови́дни верою Боже́ственною, Авраамие.

Бо́дренно, умоли́в Бога,/ посылаеши просвещение спасения/ сущим в нощи́ идолонеи́стовства одержимым,/ Богому́дре Авраамие,/ и показа́л еси́ вся сы́ны Света и Дне благода́тию.

Безмолвно твою́́ жизнь соверши́в, яже в житии́ треволне́ния, всеблаженне,/ Божиими надеждами прешел еси́/ и к тихим приста́нищем достигл еси́, Авраамие,/ Небе́снаго Царства и Божественныя светлости.

Богоро́дичен: Отягче́на мя дреманием уныния,/ возстави Твоим хода́тайством, Ма́ти Бо́жия,/ и не даждь уснути в смерть греха́, Де́во,/ предста́тельницу бо и путевожда́ моей жизни напису́ю Тя.

Конда́к Авраамия, глас 3.

Подо́бен: Дева днесь:

Во пло́ти, я́ко А́нгел, на земли явился еси́,/ и пощением был еси́, я́ко древо насажде́нное,/ водою воздержа́ния до́бре возрасти́вся,/ и тече́ньми твои́х слез скве́рну омы́в:/ сего ра́ди явился еси́ приятелище Боже́ственное, Авраамие, Духа.

И́кос:

Тле́нная презре́в, нетленныя восприя́л еси́́ красоты́/ сла́сти плотски́я возненави́дел еси́, мудре,/ измла́да возлюбив чистоту́./ Тем, чертога мирска́го отбежа́в,/ сопру́жницы же благосла́вныя и родителей уклонився,/ Еди́наго Бо́га ясно, Рачителя, возжела́в/ и возлюби́в от всея, отче, души и сердца истинно:/ сего ра́ди показался еси́ девства и чистоты́ приятелище Боже́ственное, Авраамие, Духа.

Песнь 7

Ирмо́с: Отроцы евре́йстии в пещи́/ попраша пла́мень дерзновенно/ и на ро́су огнь преложи́ша, вопию́ще:/ благословен еси́, Го́споди Боже, во веки.

Шум гла́са празднующих иде́же есть ликуеши, страстоте́рпице,/ с девами Бо́гу Зижди́телю песнопою́щи:/ благословен еси́, Го́споди Боже, во веки.

У́ды сокруша́емы зря́щи и ногте́й истерза́ние терпящи,/ принеслася еси́ Бо́гу жертва, песнопою́щи:/ благословен еси́, Го́споди Боже, во веки.

Яви́лася еси́́, я́ко лоза́, Богому́драя,/ ру́це и но́зе, я́ко ветви, ре́жемы и нам мысленно вино источа́ющи,/ сердца́ утеша́ющее и страсте́й отрева́ющее пиянство.

Богоро́дичен: Во всего человека обле́кся Нескве́рный, кроме́ греха,/ из утробы Твоея́, Чи́стая, про́йде Плотоно́сец,/ Егóже умоли верою Тя честву́ющия спасти́.

Ин. Ирмо́с то́йже

Да вы́шнее Царство получи́ши и славу неизрече́нную,/ славу же попира́емую, мудре, и тленную/ я́ко смыслен и разумен преоби́дел еси́ му́дренно.

Егда́ волк лукавый а́гницу твою́́ расто́ргне льстивне,/ тогда сего, мудре, че́люсти сокруши́л еси́/ сию же я́ко пастырь изря́днейший к жизни привел еси́́.

Законом повину́яся Владычним, заблу́ждшее взыскал еси́ и обре́л еси́,/ и, на ра́мена твоя́ взем, всеблаженне,/ я́ко пастырь ввел еси́ во огра́ду покая́ния.

Богоро́дичен: Едина Еди́наго от Троицы родила́ еси́ во дву существу,/ Ипоста́си же единей Ви́димаго, Де́во./ Емуже песнопое́м:/ благословен еси́, Го́споди Боже, во веки.

Песнь 8

Ирмо́с: Седмери́цею пещь/ халде́йский мучитель/ Богочестивым неи́стовно разжже́,/ силою же лучшею спасе́ны сия́ ви́дев,/ Творцу и Изба́вителю вопияше:/ о́троцы, благословите,/ священницы, воспойте,/ лю́дие, превозноси́те во вся ве́ки.

Ю́ношески до́бльствовавши, страстоно́сице всехва́льная,/ и на пре́лесть воздви́гла еси́ побе́ды/ рук бо лише́ния и ног терпела еси́,/ сосце́в же и зубо́в твои́х искорене́ние, мученице, претерпе́ла еси́, в радости песнопою́щи:/ лю́дие, превозноси́те Христа́ во веки.

Всесветла́, я́ко солнце, де́вства све́тлостьми/ и муче́ния добро́тами облиста́ла еси́,/ и мир просвети́ла еси́ светолу́чными сия́нии твоего́ терпения, страстоте́рпице, вопиющи:/ о́троцы, благословите, священницы, воспойте,/ лю́дие, превозноси́те Христа́ во веки.

Оскверне́нную страстьми́ душу мою, Богоневесто,/ и очерне́нную прило́ги зми́я твои́ми мольба́ми от лю́тых очисти,/ и светлым осене́нием твои́м, мученице Анастаси́е, озари́ вопи́ти:/ священницы, пойте, лю́дие, превозноси́те Христа́ во веки.

Богоро́дичен: Тя, Чистую и Непоро́чную, дева жела́ющи,/ непорочно и тело и душу соблюде́,/ страсте́й подпале́ния терпением испепели́вши, искушение же многих претерпе́вши мук,/ и ны́не в Небесных черто́зех ликует с Тобою, веселя́щися во вся ве́ки.

Ин

Ирмо́с: Победи́тели мучи́теля и пла́мене/ благо́датию Твое́ю бы́вше,/ заповедем Твоим зело́ прилежа́ще,/ о́троцы вопия́ху:/ благослови́те вся дела Госпо́дня Го́спода.

В погибели ров чи́стую све́рже голуби́цу твою́́ злоде́йственный змий,/ но сию́ извел еси́, отче, всему́дренно,/ благослови́те, поя, дела Го́спода и превозноси́те Его́ во веки.

И в житии́ обходя́, о́тче Авраамие,/ и по кончине врач боля́щих явился еси́ Ду́ха благода́тию Боже́ственною,/ благослови́те, поя, дела Го́спода и превозноси́те Его́ во веки.

Незлобием, блаже́нне, правдою же и целому́дрием, и верою просия́в,/ А́нгелом, преподо́бне, счи́слился еси́,/ благослови́те, поя, дела Го́спода и превозноси́те Его́ во веки.

Богоро́дичен: Струи́ живыя яви́лася еси́ всесвято́е селе́ние,/ от Неяже пию́ще, умертви́вшиися, Жизнь насле́дуем, вопиюще:/ благослови́те дела вся Го́спода и превозноси́те Его́ во веки.

Песнь 9

Ирмо́с: Ужасе́ся о сем Небо/ и земли́ удиви́шася концы,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с:/ тем Тя, Богоро́дицу,/ А́нгелов и человек чинонача́лия величают.

На дре́ве повешена была еси́,/ Слова Бо́жия образу́ющи страсть блаже́нную,/ и отсече́ние терпе́ла еси́ рук твои́х и ног,/ зубо́в искорене́ние, язы́ка же отре́зание и сосце́в, чистая Анастаси́е,/ мона́шествующих славо и мучеников украше́ние.

Я́ко невеста, украси́лася еси́ добро́тою,/ обручи́вшися Жениху страданьми добротво́рными,/ внутрь же чертогов светови́дных, я́ко избра́нная, вселилася еси́, нося́щи свещу́ де́вственную./ И ны́не ца́рствуеши с Живу́щим во веки, Анастаси́е, сия́ющи.

Иска́пают болезни твоя́ сладость, греха́ горесть отъемлющу;/ рака же то́чит исцеле́ний ре́ки/ и потопляет вся стра́сти, и неду́ги лютыя в славу Спасову, честна́я Анастаси́е,/ и́же по достоянию тя сла́вят.

До́блествоваша жены́, Твоим Крестом укре́пльшеся, Христе́́ Всесильне,/ и вра́жию главу́ многоко́зненную му́жески, Слове Божий, сокруши́ша,/ и, рая́ радостно селение получи́вше, обоже́ние прияша дивное, воспева́юще Тя.

Богоро́дичен: Понесшаго Тя плоть от Жены, я́ко позна́ мученица Твоя́, Го́споди,/ де́вственными укра́шена луча́ми и муче́ния кро́вию обагрена́,/ Тебе́, Бо́гу, во след Матере Твоея́, славно приведе́ся,/ я́ко ца́рствующему тва́рию.

Ин

Ирмо́с: Вои́стинну Богоро́дицу/ Тя испове́дуем,/ спасеннии Тобою, Де́во Чи́стая,/ с Безплотными ли́ки Тя величающе.

Ви́дети сподо́бился еси́, о́тче Богоносе,/ чрез надежду тебе́ дре́вле жела́емая,/ ихже о́ко не ви́де и ухо не слыша.

Красе́н явился еси́,/ Божественными доброде́телей луча́ми сияя, Авраамие,/ и красному Влады́це, радуяся, предстои́ши.

Совокупи́лся еси́ лико́м всех преподобных,/ и с ними обоже́ния, преподо́бне, получив,/ моли́ е́же спасти́́ся всем нам.

День веселия приво́дит радостно,/ священное твое́, Авраамие, успе́ние,/ Церковь честву́ющи житие́ твое́.

Богоро́дичен: Благолюби́вая Де́во,/ озло́бленную грехо́м душу мою ублажи́/ и благ Небесных причастника сотвори.

НА ЛИТУРГИ́И

Проки́мен, глас 7: Честна́ пред Го́сподем смерть преподо́бных Его́́. Стих: Что воздам Го́сподеви о всех, яже воздаде ми. Апостол к Галатом, зача́ло 213. Аллилуия, глас 6: Блажен муж: Стих: Сильно на земли́ будет семя его. Ева́нгелие от Матфе́я, зача́ло 43. Причастен: В па́мять вечную:

Святая преподобномученица Анастасия Римляныня

Преподобный Авраамий затворник и блаженная Мария, племянница его

НА МА́ЛОЙ ВЕЧЕ́РНИ

Стихи́ры на 4. Самогласны, глас 4:

Ве́рою и любовию, празднолю́бцы, соше́дшеся,/ псалмы́ и пе́сньми восхва́лим днесь/ Небе́снаго человека и земна́го А́нгела,/ к немуже возопии́м:/ о всеблаже́нне и преподо́бне, по́стников похвало́!/ о нас моли́ся ко Господу,/ Авраа́мие, о́тче наш,/ поми́ловатися душа́м нашим.

Честны́й и светоно́сный, преподо́бне, твой пра́здник/ испо́лнен ра́дости и веселия духовнаго./ Те́мже соше́дшеся мона́хов мно́жества/ и христоимени́тии лю́дие,/ любо́вию восхваля́юще,/ блажи́м Боже́ственная дея́ния твоя́/ а́ко бо крин во удо́лии процвел еси́/ и благово́ниши душе́вная на́ша чу́вства,/ Авраамие, о́тче наш,/ моли́ спасти́́ся душа́м на́шим.

Я́ко уязви́лся еси́ жела́нием Боже́ственным,/ преподо́бне о́тче наш Авра́амие,/ взем бо крест твой,/ после́довал еси́́ Влады́це Христу́./ Тогда вся плотска́я мудрова́ния умертви́л еси́/ и насле́довал еси́ вои́стинну кро́тких землю,/ прича́стием обожа́емь,/ неизрече́ннаго о́наго веселия наслажда́яся,/ помина́й нас, творя́щих всесвяту́ю и пречестну́ю твою́́ память.

Сла́ва, глас 8:

Преподо́бне и Богоблаже́нне о́тче наш Авра́амие,/ вои́стинну сподо́бился еси́ Боже́ственныя жизни,/ посто́м бо и бде́нием изнури́л еси́́ тело твое́,/ те́мже и о́браз был еси́ монахов./ Аще бо и теле́сный язы́к умолче́,/ но чудеса́ свиде́тельствуют./ Град же Ростов, пропове́дуя, хва́лится:/ имею в себе, глаго́ля, неистощи́мое сокровище./ Сами бо зря́ще мно́гая и преславная твоя́ чудеса, от мощей бываема,/ и́же прославляют просла́вльшаго тя Го́спода,/ Емуже моли́ся дарова́ти вселе́нней мир и ве́лию ми́лость.

И ны́не, Богоро́дичен.

На стихо́вне стихи́ры, глас 2:

Ду́ха Свята́го теплотою, му́дре,/ желание се́рдца твоего, е́же к Бо́гу, согре́яв,/ и зи́му страсте́й умертви́в,/ многоко́зненную же си́лу и́дола Веле́са низложи́л еси́,/ в конец не́мощна сего показа́в./ Небе́сная же во́инства удиви́л еси́ терпением твои́м,/ я́ко по́стников подража́тель и преподобных сожи́тель,/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́́.

Крест твой взем, преподо́бне Авра́амие,/ кре́пко после́довал еси́́ Христу,/ нас ра́ди на Кресте распе́ншемуся;/ и Того́ ра́ди любве́ вся оставил еси́́,/ и Того еди́наго возлюби́л еси́:/ Емуже и со А́нгелы предстоя́,/ моли́ уще́дрити мир и спасти́́ ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко прие́м, отче, Небесное се́мя,/ плод стори́чествующь доброде́тели принесл еси́,/ Авра́амие о́тче наш,/ пита́я благоче́стно гла́дом та́ющия доброде́тели,/ отону́дуже исцеления верою приходя́щим подае́ши./ Темже, я́ко име́я дерзнове́ние ко Христу,/ моли́, преподо́бне о́тче наш Авраамие,/ спасти́́ся верою и любо́вию честву́ющим па́мять твою́́.

Сла́ва, глас 8:

Прииди́те, мона́хов множества, днесь,/ псаломская пе́ния и цве́ты духовныя принесе́м,/ я́ко вои́стинну мона́шескому удобре́нию и преподобных сожи́телю./ Егóже хва́ляще, си́це рцем:/ радуйся, свети́льниче многосве́тлый, приведы́й ко Христу́ монахов множества./ Ра́дуйся, гра́да Росто́ва похвала́́ и утвержде́ние/ и всех ве́рных благоути́шное приста́нище,/ и очищение боля́щих во гресе́х,/ на Боже́ственная ты́я возвыша́я раче́ния./ Тем, в пречестну́ю па́мять твою́́, святу́ю и ангелогове́йную,/ собравшеся, преподо́бне о́тче наш Авраа́мие,/ и Боже́ственнаго человеколюбия про́сим получи́ти твои́ми моли́твами,/ ми́ру мир дарова́ти и душа́м нашим ве́лию ми́лость.

И ны́не, Богоро́дичен.

Тропа́рь, глас 1:

Просвети́вся Боже́ственною благода́тию,/ неверныя люди наставил еси́ к свету Богоразумия:/ и по смерти сия́я светлостию жития твоего,/ источа́еши исцеления притекающим с верою к тебе́,/ Авраамие о́тче наш,/ Христа́ Бо́га моли́ дарова́ти нам велию ми́лость.

Сла́ва, и ны́не, Богоро́дичен воскре́сен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, на 8, глас 1.

Подо́бен: О дивнаго чудесе:

О пресла́внаго чудесе́!/ Исто́чник благоче́стия в Ростове явля́ется/ и ле́ствица к Небеси́ Авраамий бывает нам;/ весели́тся град Ростов, имея в себе мощи того./ Радуется православных мно́жество,/ Авраамия иму́ще в беда́х засту́пника,/ и к нему вопию́ще:/ преподо́бне, радуйся/ и Господу моли́ся/ дарова́ти душа́м нашим мир и ве́лию ми́лость.

О ди́внаго чудесе́!/ Ветвь благода́ти в России воспитова́ется/ и кипари́с доброво́нный в Ростове возраста́ет,/ и столп непоколе́блемь православным утверждается,/ и крепкий адама́нт душе́ю бывает Авраамий Богоблаженный./ Тем Богомудрых собе́ри на высоту́ ду́хом вознеси́теся,/ преподобному вопию́ще:/ о́тче Авраамие, радуйся/ и Господу помоли́ся/ дарова́ти душа́м нашим мир и ве́лию ми́лость.

Ди́вны твоя́ тайны, Христе́́ Боже,/ я́ко дарова́л еси́ нам такова́го свети́льника,/ Авраамия предо́бляго,/ православному отечеству на́шему на сопроти́вныя побо́рника,/ Веле́са погуби́вшаго и храм Имени Твое́му святому воздвигшаго,/ в немже Имя Твое́ прославля́ется/ и ве́рнии укрепля́емся,/ припа́дающе к Тебе́, всех Влады́це,/ прося́ще, Человеколюбче,/ дарова́ти душа́м нашим мир и ве́лию ми́лость.

Сла́ва, глас 5:

Доброде́тели подража́теля похва́лим днесь,/ Авраамия, похвалу Российскую,/ и па́мять его светло торжеству́им,/ верных собо́ри соше́дшеся в це́рковь Госпо́дню,/ и к нему си́це вопию́ще:/ прииди́ ны́не, преподо́бне,/ и о нас непрестанно моли́ся,/празднующих твое́ торжество́,/ да твои́ми моли́твами дарует нам Христос/ велию и богатую ми́лость.

И ны́не, Богоро́дичен: В Чермнем мори:

Вход. Проки́мен дне. Чтения 3.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На лити́и стихи́ры, глас 6:

Прииди́те, празднолю́бцы/ и по́стник сосло́вие,/ верою соше́дшеся,/ я́ко и́стиннаго постника почти́м Авраамия днесь,/ ше́ствовавшаго по стопа́м Владыки своего/ узкий путь, и безстра́стную жизнь,/ и верою возопии́м:/ о всеблаженне сожи́телю преподобных/ и по́стников похвало́,/ о нас моли́ся ко Господу/ поми́ловатися душа́м нашим.

Преподобне о́тче Богоно́се Авраамие,/ от ма́терних пеле́н Бо́гу возложе́н еси́/ и любве́ ра́ди Того вся оста́вил еси́,/ и, и́дола Веле́са сокруши́в,/ кова́рства его вся стерл еси́,/ и, оби́тель соста́вив, мно́жество монахов собрал еси́/ сла́вити многопетую Троицу,/ Ю́же моли́, блаже́нне,/ спасти́́ся душам нашим.

Иже на земли́ А́нгела/ и на Небесе́х человека Бо́жия,/ ми́ра благо́е украше́ние,/ пи́щу благих добродетелей,/ по́стников похвалу́,/ Авраамия, почти́м:/ насажде́н бо в дому́ Божии,/ процвете́ праведно,/ я́ко кедр в пусты́ни,/ в преподо́бстве и правде.

Сла́ва, глас 8:

Мона́хов множества/ наста́вника тя почита́ем, о́тче наш Авраамие,/ твое́ю бо стезе́ю вои́стинну пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче,/ преподобных соприча́стниче и праведных./ С ними же моли́ся Го́сподеви/ поми́ловатися душа́м нашим.

И ны́не, Богоро́дичен: Безневе́стная Де́во:

На стихо́вне стихи́ры, глас 1.

Подо́бен: Небе́сных чино́в:

Небесных чино́в ревни́тель,/ тех житие пожи́в,/ в ме́ртвеннем телеси́, я́ко А́нгел, показался еси́./ Сего ради, от Христа́ Бо́га дар чудес прие́м,/ и нам обильно исцеления подава́еши,/ и от вся́ких скорбе́й спасаеши к тебе́ притекающия,/ я́ко на тя упование возлагаем/ и твои́ми моли́твами от бед избавля́емся,/ о́тче Авраамие.

Стих: Блаже́н муж, боя́йся Го́спода,/ в за́поведех Его́ восхо́щет зело

Небесных чино́в ра́дование/ твое́ житие́, святе Авраамие,/ и на земли́ челове́ком скорый в беда́х заступниче,/ моли́ся о нас, к тебе́ притекающих/ и твое́ преставление празднующих,/ я́ко на тя упование возлагаем/ и твои́ми моли́твами от бед спасаемся.

Стих: Пра́ведник, я́ко фи́никс, процвете́т,/ я́ко кедр, и́же в Ливане, умно́жится.

Небесный человек яви́ся нам и земный А́нгел/ проповедуется днесь Авраамий освяще́нный,/ егóже житию удиви́шася А́нгели/ и вострепета́ша ду́си лукавии,/ той нами празднуется днесь./ И того торжество́ ликовству́юще, вопие́м:/ моли, преподо́бне, Христа́ Бога,/ да твои́ми моли́твами от враг свободи́мся.

Сла́ва, глас 6:

Днесь верных собо́ри сошедшеся,/ восхва́лим отца нашего,/ духовно веселя́щеся и па́мять его све́тло пра́зднующе,/ я́ко вра́жия полки́ прогнавшаго/ и де́мона посрами́вшаго,/ и злаго и́дола Веле́са искорени́вшаго,/ и град Ростов купе́лию Свята́го Ду́ха обно́вльшаго,/ и ны́не сия́юща чуде́сы́, Авраамия предобляго;/ я́ко да того моли́твами да́рует нам Христос/ велию и богатую ми́лость.

И ны́не, Богоро́дичен.

Тропа́рь, глас 1: Просветився Боже́ственною благода́тию: пи́сан на ма́лой вече́рни

НА У́ТРЕНИ

Тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Крепкий душе́ю адама́нт явился еси́, преподо́бне,/ непоколе́блемо основание в вере име́яй, о́тче Авраамие./ Сего́ ради гнуснаго и́дола разори́л еси́/ и в нем де́монския полки́ победи́л еси́ я́ко добр воин Христов./ Ему же моли́ся, да спасет тебе́ ради души на́ша.

Сла́ва, и ны́не, Богоро́дичен:

Ра́дуйся, Влады́чице, Небе́сная Цари́це,/ Бо́га пло́тию нам рождшая,/ единаго А́гнца, за нас волею поже́ршагося./ Того моли́, Всеблаженная,/ да Твоими моли́твами спасе́т ду́ши на́ша.

По 2-м стихосло́вии седа́лен, глас 2:

Молитв твои́х требуем, гре́шнии,/ и ты́я нам подаждь, о́тче Авраамие,/ я́ко да, наставля́еми и́ми, пре́йдем к небу́рному приста́нищу/ и венцы́ Небесныя улучи́м,/ и тебе́ воспеваем:/ радуйся, о́тче отце́в,/ похвала́ на́ша и утверждение.

Сла́ва, и ны́не, Богоро́дичен:

Молитвы Твоих раб приими́, Богоро́дице,/ Заступнице на́ша и прибежище:/ к кому бо прибе́гнем, ра́зве Тебе́, Влады́чице,/ Ты покров наш и заступление./ И ны́не не остави нас до конца поги́бнути,/ да Твоими моли́твами от бед сохраня́емся,/ на Тя бо упова́ние с Богом, Богоро́дице, возложи́хом.

По полиеле́и седа́лен, глас 5:

Апостолов ревни́тель быв, преподо́бне,/ сего ради и Богослову бесе́довати сподо́бился еси́/ и, сего жезл прии́м, Веле́са разруши́л еси́/ и того ко́зни до конца искорени́л еси́,/ и неве́рныя ко Христо́ве вере привел еси́./ ны́не же Христа́ Бо́га моли́ о чту́щих па́мять твою́́,/ дарова́ти нам мир и велию ми́лость.

Сла́ва, и ны́не, Богоро́дичен:

Храни́телище нело́жное Соде́теля нашего, Влады́чице Богоро́дице,/ сохрани́ град и люди, имя Твое́ святое сла́вящия,/ и покры́й покровом милости Твоея́:/ Тя бо те́плу Предстательницу и́мамы/ ко из Тебе́ рождшемуся Христу, Бо́гу нашему,/ да Твоими моли́твами спасет души на́ша.

Степе́нна, 1-й антифо́н, 4-го гла́са. Проки́мен: Честна́ пред Го́сподем смерть преподо́бных Его́́. Стих: Что воздам Го́сподеви о всех, яже воздаде́ ми. Вся́кое дыха́ние: Ева́нгелие, Матфе́я, зача́ло 43.

По 50-м псалме́ стихи́ра, глас 8:

Прииди́те, монахов множества,/ прииди́те пусты́нное воспита́ние,/ прииди́те и лик составим,/ днесь бо трапе́за поставляется/ и па́че благовонных арома́т/ облагоухает нам па́мять преблаженнаго Авраамия./ Прииди́те, стеце́мся к преподобному,/ обильно нам источник чуде́с источа́ющему,/ и любе́зно целуем икону его, и к нему возопии́м:/ о́тче Авраамие,/ твои́ми моли́твами проси нам у Христа/ мира и ве́лия ми́лости.

Канон Богоро́дицы на 6

и преподо́бнаго на 8. Глас 1.

Песнь 1

Ирмо́с: Го́рькия рабо́ты изба́влься Израиль,/ непроходи́мое про́йде, я́ко су́шу,/ врага зря потопля́ема,/ песнь я́ко Благодетелю поет Бо́гу, чудодеющему мы́шцею высокою,/ я́ко прославися.

Лю́тыми страстьми́ побеждаем есмь, окая́нный,/ и сего ради молю Тя, Христе́́ Боже, от сих изба́вити мя,/ я́ко да по достоя́нию возмогу́ воспети Твоего́́ уго́дника, Авраамия преподо́бнаго.

Лю́тых смущений свободи́ мя, отче,/ да наставляем твои́ми моли́твами,/ све́тло воспою́ твое́ торжество, Богоносе Авраамие.

Лю́таго и́дола искорени́л еси́, о́тче преблаже́нне,/ и ко Христу́ привел еси́ неверных собо́рища,/ и ты́я, я́ко кедр, и́же в Лива́не, умно́жил еси́ твои́ми моли́твами,/ во сто плодонося́щия и врага попира́ющия.

Богоро́дичен: Лю́тых напа́стей и многих прегрешений свободи́ мя, Влады́чице,/ и прощение подаждь ми,/ я́ко дерзну́х написати моею скверною десни́цею святое Твое́ имя.

Катавасия: Отверзу уста моя:

Песнь 3

Ирмо́с: Да утверди́тся се́рдце мое в воле Твое́й, Христе́́ Боже,/ И́же над вода́ми небо утвержде́й второе,/ и основа́вый на вода́х зе́млю, Всесильне.

Да утверди́тся се́рдце мое моли́твами твои́ми, святе,/ и научи мя, недостойнаго, похвали́ти по достоинству преславную па́мять твою́́,/ Богоносе о́тче наш Авраамие.

Да утверди́ши ны, Богомудре, на безплотныя враги́, еже прогони́ти ты́я,/ твою́́ же па́мять велича́ти и Христа́ прославляти,/ тебе́ прославльшаго, о́тче Авраамие.

Да утверди́мся на ка́мени непоколеби́мем твои́х молитв,/ да не поколе́блют нас прило́зи льстиваго/ и ум наш просвети́ светом заповедей Христовых,/ я́ко да верою воспеваем тя, преблаже́нне Авраамие.

Богоро́дичен: Да утвержде́н буду милостию Твое́ю, Влады́чице,/ и покрове́н кровом крил Твоих, Богоро́дице,/ и избе́гну сете́й лукаваго, воспевая пресла́вное Твое́ торжество.

По 3-й песни седа́лен, глас 5:

Апостолов ревни́тель быв, преподо́бне,/ сего ради и Богослову бесе́довати сподо́бился еси́/ и, сего́ жезл прии́м, Веле́са разруши́л еси́/ и того козни до конца искоренил еси́,/ и неверныя ко Христове вере привел еси́./ Ны́не же Христа́ Бо́га моли́ о чту́щих па́мять твою́́,/ дарова́ти нам мир и ве́лию ми́лость.

Сла́ва, и ны́не, Богоро́дичен:

Победу иму́ще крепкия силы на Тя любо́вию верно надеющиися,/ Чи́стая Царице Де́во Богоро́дице, враги́ покаря́юще, побо́рницу иму́щи Тя, веселимся.

Песнь 4

Ирмо́с: Разуме́х, Всесильне,/ Твое́ смотрение,/ и со страхом просла́вих Тя, Спасе.

Разумех, преподо́бне, мое недостоинство/ и со страхом косну́хся к твое́му хвале́нию,/ но ты, святе, приими́, я́ко убо́гия две ца́те, с верою тебе́ приноси́мое хваление, всехвальне о́тче Авраамие.

Разумел еси́, о́тче преблаже́нне, кова́рствия лукаваго Веле́са/ и сего до конца низложил еси́,/ нас на молитву воздви́гни днесь,/ да верно ликовству́ем, преблаже́нне, в памяти твое́й, о́тче Авраамие.

Разумел еси́, святе, де́мона во умыва́льницу твою́́ вше́дша и пакость тебе́ сотворити хотя́ща,/ сосу́д крестом покрыв, того опалил еси́:/ ны́не же нас спаси́ от его ловления твои́ми моли́твами, о́тче Авраамие.

Богоро́дичен: Разумела еси́, Влады́чице, воплотившагося из Тебе́ Христа́ Бо́га нашего,/ Того моли, Богоблаженная,/ да Твоими моли́твами сохрани́т нас от всякаго наве́та льстиваго.

Песнь 5

Ирмо́с: От но́щи у́тренююще, воспеваем Тя, Христе́́ Боже,/ обнищавшаго нас ради/ и Крест, и смерть плотию претерпевшаго.

Из но́щи тьмы глубо́кия возве́л еси́ люди твоя́/ и, покаяния светом просвети́в, ко Христу́ привел еси́, Богоносе Авраамие,/ и нас просвети́, блаже́нне, сиянием твоея́ благода́ти, я́ко да при́сно тя ублажа́ем.

Из но́щи идолонеи́стовства извле́кл еси́, отче, множество людей/ и сих погруже́нием благода́ти озари́л еси́ духовныя;/ и ны́не нас озари́ светом невещественным, и моли́твами твои́ми просвети, я́ко да по долгу величаем тя.

Из но́щи страсте́й моих возведи мя, святе, и да́руй ми свет мы́сленный,/ да возмогу, недостойный, от грубаго ума́ моего худо́е сие́ плете́ние принести к похвалению чудес/ преславнаго твоего́ торжества, Богоносе Авраамие.

Богоро́дичен: Из но́щи а́да преисподняго изведе́ ны Сын Твой, Пречистая,/ и рая́ жители паки соделав:/ сего ради, покланя́ющеся Ему, Тебе́, Де́во, ублажаем.

Песнь 6

Ирмо́с: Отве́ргл мя еси́ во глубины́ се́рдца морска́го/ и спасл еси́ мя, Спа́се, от рабо́ты сме́ртныя,/ и разреши́л еси́ у́зы беззаконий моих.

Отверго́шася неразу́мнии твоего́ учения, блаже́нне,/ и к Веле́су, глу́ху и́долу, ниже́ глаго́лющу, ниже́ осяза́ющу притека́ху./ И егда сего пробо́л еси́ тро́стию Богосло́вовою,/ тогда и сих к ра́зуму благоче́стия наста́вил еси́, о́тче Авраамие.

Отве́ржен есмь в ров неча́яния, многостра́стный,/ но ты возведи́ мя, святе, на стезю́ покаяния,/ я́ко да отве́ргу вся моя злая деяния/ и облекуся светом молитв твои́х, о́тче Авраамие блаже́нне.

Отве́ржен быв окая́нный де́мон, восхоте́ спо́ну тебе́ сотвори́ти,/ преобразу́ется в воина лукавый,/ и предстает тогда владу́щему благоверному князю Владимиру, и того на тя вооружает./ Ты же, сего прогнав, вя́щше прославля́ешися и князя в вере утвержда́еши.

Богоро́дичен: Отве́рзи мне, Влады́чице, двери милости Твоея́,/ я́коже Сын Твой отве́рзе разбойнику и блудни́це, и блу́дному двери милосердия;/ я́ко да и аз Твоими моли́твами улучу́ жизнь вечную, воспева́я Твою́ благость.

Конда́к, глас 2:

Иго Христово прие́м, Авраамие,/ и Того крест на ра́мо взем,/ последовал еси́ Ему,/ насажде́н быв в дому́ Господни/ и процве́л еси́, я́ко фи́никс и я́ко кедр, и́же в Ливане,/ умножил еси́ чада твоя́, муж жела́ний духовных:/ от возлюбленнаго же апостола Иоанна Богослова благода́ть восприим,/ жезло́м сокрушил еси́ и́дола/ и рассы́пал еси́ его, я́ко прах,/ и чудотворец убо ве́лий явился еси́, преподо́бне./ Темже Христа́ Бо́га моли/ непрестанно о всех нас.

И́кос:

Авраамие Богомудре, житие непорочно стяжа́л еси́,/ и кий язык челове́ч довле́ет когда к похвале пове́дати, яже о тебе́;/ оба́че воспоем Божию мудрость и твоя́, преподо́бне, стра́сти и подвиги, я́же на земли́,/ я́ко светильника тя я́вльшася всем челове́ком и многим терпением в ли́це А́нгельстем возсия́вша./ Тем в песнех вопие́м ти си́це:/ радуйся, Авраамие преподо́бне и Богоносе, Небесный человече и земный А́нгеле./ Ра́дуйся, Ду́ха Свята́го оби́телище./ Ра́дуйся, я́ко из мла́да последовал еси́ Святе́й Троице./ Ра́дуйся, целомудрия сто́лпе, низложи́вый демона многокова́рственнаго./ Ра́дуйся, я́ко от млады́х ногте́й последовал еси́ Христу./ Ра́дуйся, свети́льниче многосве́тлый, приведы́й ко Христу́ монахов множества./ Ра́дуйся, разори́вый и́дола и воздви́гнувый Христову Церковь./ Ра́дуйся, и́же идолопокло́нники сотвори́л еси́ Пресвятей Троице поклонники./ Ра́дуйся, я́ко моли́твами твои́ми де́мони побеждаются./ Ра́дуйся, граду Ростову похвала́,/ я́ко первую общую оби́тель воздви́гл еси́, и в ней мно́гия монахи, я́ко виноград Христов, насадил еси́/ и Троицу славити научил еси́./ Ра́дуйся, православному отечеству на́шему похвала́ и утверждение,/ егóже соблюди́ моли́твами твои́ми от враг ненаве́тно, да зовем ти:/ радуйся, о́тче Авраамие блаже́нне,/ и Христа́ Бо́га моли́ непрестанно о всех нас.

Песнь 7

Ирмо́с: Явле́йся в купине́ законоположнику огне́м,/ и рождество Девы проображей в ней,/ благословен еси́ Го́споди, Боже отец на́ших.

Явился еси́ в России светильник пресветлый, о́тче Авраамие,/ Трисолнечными светосиянии к Богознанию нас приводя́ и пе́ти науча́я:/ благословен Бог отец на́ших.

Явился еси́ река́ медото́чных учений, Богоносе,/ верныя напая́я, грехи́ же потопля́я/ и к познанию благоче́стия всех возводя, и научая пети:/ благословен Бог отец на́ших.

Явлься тебе́ ученик Христов Богословеснейший и девственник возлю́бленный,/ трость тебе́, блаже́нне, дарова́, е́юже диавола пробо́л еси́/ и к тому неви́дима сего сотворил еси́, и челове́ки научил еси́ вопити:/ благословен Бог отец на́ших.

Богоро́дичен: Явле́йся я́ко Человек Сын Твой, Богоневесто,/ нас обожи́ и к ра́зуму милости возведе́,/ и во свете неприступнем ликова́ти устро́и воспева́ющия и глаголющия:/ благословен Бог отец на́ших.

Песнь 8

Ирмо́с: Песнь Тебе́ прино́сим безплотных,/ я́коже о́троцы в пещи́, и, пою́ще, глаголем:/ благословите вся дела Господня Го́спода.

Песнь тебе́ приношу́, о́тче Богоносе Авраамие,/ е́юже пропове́даю твоя́ по́двиги и чудеса́,/ и прославляю твое́ величество, вопия:/ благословите вся дела Господня Го́спода.

Песнь прино́сиши Христу, ликуя со А́нгелы, о́тче Авраамие,/ тех бо житию́ поревнова́л еси́/ и нас в па́мять твою́́ ликова́ти устро́ил еси́, поющих:/ благословите вся дела Господня Го́спода.

Песнь пое́ши Херувимскую, имже и подо́бник был еси́,/ кри́ла о́гненная восприе́м, и́миже Горняго Иерусалима дости́г,/ о нас моли́ся, о́тче Авраамие, пою́щих верно:/ благословите вся дела Господня Го́спода.

Богоро́дичен: Песнь приими́, Влады́чице, от несоверше́ннаго ума́ нашего/ и моли́ся Сыну Твое́му и Бо́гу нашему, пода́ти нам оставля́ние грехо́в,/ я́ко да воспеваем Тя во вся ве́ки.

Песнь 9

Ирмо́с: Живоприе́мный источник приснотеку́щий,/ светоносный светильник благода́ти,/ храм одушевле́нный,/ сень пречистую,/ Небесе́ и земли́ простра́ннейшую,/ Богоро́дицу, ве́рнии, величаем.

Живоно́сный источник благода́тных вод яви́лся еси́, Авраамие Богоблаженне:/ подаждь ми источник слез,/ да омы́ю душевныя моя стра́сти и убелю́ светом покаяния очерне́вшую душу мою.

Живоно́сный Крест на ра́мо взем, преподо́бне,/ распе́ншемуся на нем Христу́ последовал еси́, о́тче Авраамие,/ и вра́жия полки́ прогнал еси́,/ и нам проси́ милости, торжествующим твое́ празднество, Богоносе.

Живоносным Крестом врага́ опали́л еси́/ и, сего в сосу́де запеча́тав, ученико́м работати отше́л еси́,/ показу́я смире́ния о́браз, и сих науча́я любому́дренно последовати тебе́.

Богоро́дичен: Исто́чник ро́ждши нам, Влады́чице,/ житие мирно рабо́м Твоим испроси́/ и православному во́инству на́шему на иноплеме́нники посо́бствуй,/ я́ко Ты еси́ спасе́ние наше,/ Богоневестная.

Свети́лен.

Подо́бен: Жены услышите:

По́стнически пожи́в, о́тче Авраамие, и на враги́ власть прии́м,/ я́ко и в сосу́де ты́я затворя́ти и кресто́м опаля́ти;/ и человеки от неду́г исцелева́еши, притекающия с верою к тебе́ и почитающия, Богоносе, всечестную па́мять твою́́.

Сла́ва, и ны́не, Богоро́дичен:

Зачала́ еси́ во утро́бе Бога,/ Егóже трепещут вся Небесныя силы:/ Сего, Де́во, родила́ еси́ плотию, наше естество́ обожившаго./ Егóже моли, Богоблаженная, с преподобным Авраамием,/ да спасет Тебе́ ради души на́ша.

На хвалитех стихи́ры, на 4, глас 2.

Подо́бен: Егда́ от Дре́ва:

Терпел еси́ гонения от неверных,/ радовался еси́ наде́емыми,/ яже угото́ва Бог лю́бящим Его́./ Сего ради, преподо́бне, ве́тхаго совле́клся еси́ человека/ и ве́тхаго искорени́в и́дола,/ благода́тию же Крещения просвети́л еси́ град Ростов/ и в нем, я́ко солнце, сия́я чудесы́,/ Российскую страну от бед спасаеши/ и от варварскаго нахождения./ Сего ради молим тя, о́тче Авраамие:/ моли́ Христа́ Бо́га спасти́ся душам нашим.

Терпел еси́ от идолопокло́нников гонения/ и радовался еси́ от Владыки Христа́ воздая́нием,/ и к неверным вопия́л еси́:/ ну́ждно страда́ние, но радостно возме́здие;/ мно́ги ско́рби, но сла́док рай./ И сего ради они́, оста́вльше окая́ннаго Веле́са,/ к тебе́ притека́ху, глаголюще:/ моли́ Христа́ Бога, о́тче Авраамие,/ да твои́ми моли́твами спасет души на́ша.

Терпел еси́ от врага́ ско́рби/ и, радуяся, вене́ц от Христа́ прие́млеши,/ Престо́лу славы предстоя́, со А́нгелы лику́еши./ О нас непрестанно моли́ся, преподо́бне,/ да твои́ми моли́твами от бед и скорбе́й изба́вимся./ Тя бо те́пла предстателя к Бо́гу и́мамы,/ я́ко да тебе́ ради, о́тче Авраамие,/ спасет души на́ша.

Сла́ва, глас 8:

Прииди́те, празднолю́бных собори,/ приидите, православных торжество́,/ приидите, монахов Богосочета́нный ли́че,/ приидите, насы́титеся ны́нешняго пра́зднства./ Приидите, овча́та, Господня духовныя огра́ды./ Приидите, да лику́им све́тло в па́мять отца нашего,/ днесь бо Богоносный Авраамий/ ликует со Безплотными си́лами,/ предстоя́ Престо́лу всех Царя Христа́ Бога,/ и мо́лится о душах на́ших.

И ны́не, Богоро́дичен:

Влады́чице, приими́ молитвы раб Твоих,/ и изба́ви нас/от всякия ну́жды и печали.

Славословие великое. И отпуст.

НА ЛИТУРГИ́И

Блаженны свята́го от кано́на, песнь 3-я и 6-я. Проки́мен, глас 7: Честна пред Го́сподем смерть преподо́бных Его́́. Стих: Что воздам Го́сподеви о всех, яже воздаде́ ми. Апостол к Галатом, зача́ло 213. Аллилуия: Блажен муж, бояйся Го́спода: Стих: Сильно на земли будет семя его. Ева́нгелие от Матфе́я, зача́ло 10. Причастен: В па́мять вечную:

Преподобный Авраамий, архимандрит Ростовский

Тропа́рь, глас 2:

Ве́лия веры исправле́ния,/ в пеще́рнем затворе, я́ко на воде упокое́ния,/ преподо́бне о́тче Авраа́мие, радовался еси́,/ огнем бо любве́ Боже́ственным распала́ем,/ бдением и молитвою безстрастия достигл еси́/ и явился еси́ равноангельный на земли,/ того моли́твами, Христе́́ Боже, спаси́ души на́ша.

Конда́к, глас 3:

Во плоти я́ко А́нгел на земли явился еси́,/ и поще́нием, я́ко древо насажде́нное при вода́х воздержа́ния, до́бре возрос еси́,/ тече́ньми же твои́х слез скверну омыв, Авраа́мие,/ явился еси́ селение Боже́ственное Свята́го Духа.