24-й день

Празднование Пресвято́й Богоро́дице святыя ради иконы Ея, именуемыя «Всех скорбя́щих Радости»

Свята́го мученика Аре́фы и и́же с ним 4299 святы́х мученик

Святителя Афана́сия, Патриарха Царяградскаго

Преподобнаго Аре́фы, в Ближних пещерах почивающаго

Свята́го блаженнаго Елезво́я, царя Ефио́пскаго

НА МА́ЛОЙ ВЕЧЕ́РНИ

На Го́споди, воззвах: стихи́ры, глас 4.

Необоримую сте́ну стяжавше, ве́рнии, Богоро́дицу Марию,/ приидите, поклонимся и припадем к Ней:/ дерзновение бо и́мать к Ро́ждшемуся из Нея/ и мо́лится, и спасает от гнева и смерти души на́ша.

Ве́лия сила чудес Твоих, Чи́стая:/ избавляеши бо от бед, и спасаеши от смерти,/ и восхища́еши от напастей неча́емых, и скорби разрешаеши,/ и согрешения человеков отъе́млеши.

Тебе́ ве́рным покров показа И́же всяческих Бог,/ вопло́щься от крове́й Твоих, Пречистая,/ и Предстательницу и Побо́рницу сущим в ну́ждах и обстояниих,/ и в бури пристанище благоути́шное./ Ты убо спаси́ от всякия ско́рби и туги́/ вся притекающия к Боже́ственному покрову Твое́му.

Изба́ви нас от нужд на́ших,/ Ма́ти Христа́ Бога, рождшая всех Творца,/ да вси вопие́м Ти:/ радуйся, еди́но предстательство душ на́ших.

Сла́ва, и ны́не, глас 5:

Святе́йшую Херувим и вышшую Серафим, Пречистая,/ Богоро́дицу Тя испове́дающе,/ и́мамы, гре́шнии, Заступницу/ и обрета́ем во время напастей спасе́ние./ Темже не преста́й о нас моля́щи,/ державо и прибежище душам нашим.

Свете Тихий:

Проки́мен дне. Сподоби, Го́споди:

На стихо́вне стихи́ры, глас 5:

Теплая Предстательнице и непобедимая,/ упование известное и непостыдное,/ стено́ и покро́ве,/ и пристанище прибегающим к Тебе́, Присноде́во Чи́стая,/ Сы́на Твоего́́ и Бо́га моли/ умире́ние да́ти ми́рови,/ и спасе́ние, и велию ми́лость.

Стих: Помяну́ и́мя Твое́/ во вся́ком роде и роде.

Скорый Твой покров, и помощь,/ и ми́лость покажи на рабы Твоя́,/ и волны, Чи́стая, укроти суетных помыслов,/ и падшую мою душу возстави, Богоро́дице:/ вем бо, вем, Де́во, я́ко можеши, ели́ка хо́щеши.

Стих: Слы́ши, Дщи, и виждь,/ и приклони́ у́хо Твое́.

Те́бе, Чистую Де́ву Нескверную,/ едину имам сте́ну непреобориму,/ прибежище и покров крепкий, и оружие спасения:/ да мя не пре́зриши отчаяннаго,/ надеждо ненадежным, скорбящим Радосте и заступление.

Сла́ва, и ны́не, глас то́йже:

Блажим Тя, Богоро́дице Де́во,/ и сла́вим Тя, ве́рнии, по долгу,/ град непоколебимый, стену необоримую,/ твердую Предстательницу и прибежище душ на́ших.

Тропа́рь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покаянии зовуще из глубины души́:/ Влады́чице, помози, на ны милосердовавши,/ потщися, погибаем от множества прегрешений,/ не отврати Твоя́ рабы тщи,/ Тя бо и едину надежду имамы.

Сла́ва, и ны́не: ин тропа́рь, глас 4:

Не умолчим никогда, Богоро́дице,/ силы Твоея́ глаголати недостойнии:/ аще бо Ты не бы предстояла моля́щи,/ кто бы нас избавил от толи́ких бед;/ кто же бы сохранил доны́не свободны;/ не отсту́пим, Влады́чице, от Тебе́:/ Твоя́ бо рабы спасаеши при́сно от вся́ких лю́тых.

НА ВЕЛИ́ЦЕЙ ВЕЧЕ́РНИ

Блажен муж: На Го́споди, воззвах: стихи́ры на 8, глас 2:

Всем предста́тельствуеши, Благая,/ прибега́ющим с верою в держа́вный Твой покров:/ иного бо не и́мамы гре́шнии к Бо́гу в бедах и скорбех при́сно избавления,/ обременени грехи мно́гими,/ Ма́ти Бо́га Вы́шняго./ Темже Ти припа́даем:/ избави от всякаго обстояния рабы Твоя́.

Всех скорбя́щих Радосте,/ и оби́димых Заступнице,/ и алчущих Питательнице,/ странных утеше́ние,/ обуреваемых пристанище,/ больных посещение,/ немощны́х покро́ве и Заступнице,/ же́зле старости,/ Ма́ти Бо́га Вы́шняго Ты еси́, Пречистая:/ потщися, молимся, спасти́ся рабом Твоим.

Глас 4:

Ра́дуйся, Богомати Пречистая;/ радуйся, ве́рным надеждо;/ радуйся, ми́ру очищение;/ радуйся, избавляющая от вся́ких скорбе́й рабы Твоя́;/ радуйся, пристанище обуреваемым;/ радуйся, всемирный свете;/ радуйся, Утешительнице и Заступнице христиан;/ радуйся, прибежище и спасе́ние всех блажа́щих Тя, Богоневесто.

Ра́дуйся, добро́то Иа́ковля,/ Ю́же избра́ Бог, Ю́же возлюби,/ дверь спаса́емых, клятвы разрешение, Всеблагословенная,/ чрево Боговместимое, падших возведение,/ святейшая Херувим и тварей преиму́щая,/ огнезрачный Престо́ле Владычний,/ всемирная радосте и славо,/ колеснице Слова, облаче, из негoже возсия Солнце,/ сущим во тьме подая велию ми́лость.

Глас 8:

Ра́дуйся, А́нгелов радосте;/ радуйся, человеков славо;/ радуйся, верных надеждо и предстательство,/ стено и заступление, Влады́чице Богомати Пречистая,/ Яже Бо́га плотию неискусому́жно рождшая, Избавителя миру;/ не пре́зри рабы Твоя́,/ но мольбами Твоими от одержащих нас избави искушений, и бед, и обстоя́ний,/ всех скорбя́щих Радосте,/ едина христиан прибежище.

Ра́дуйся, Богоро́дице Всепетая;/ радуйся, источниче, живот ве́рным источаяй;/ радуйся, всех Влады́чице и Госпоже твари, Благословенная;/ радуйся, Всенепоро́чная, Препрославленная;/ радуйся, Всепречистая;/ радуйся, купино неопалимая;/ радуйся, горо святая;/ радуйся, саде живоносный,/ радуйся, раю́ одушевленный;/ радуйся, Ма́ти Де́во;/ радуйся, Богоневесто.

Ра́дуйся, Богоро́дице, Ма́ти Христова;/ радуйся, едина надеждо, человеков Заступление;/ радуйся, све́щниче Света пресветлый;/ радуйся, свеще́ освященная;/ радуйся, огнезрачный черто́же Сло́ва;/ радуйся, Боже́ственное селение;/ радуйся, радости источниче,/ источаяй во́ды благода́ти притекающим к Тебе́.

Ра́дуйся, вселенныя похвало́;/ радуйся, храме Го́сподень,/ радуйся, горо́ приосене́нная;/ радуйся, всех прибежище,/ радуйся, све́щниче златы́й;/ радуйся, славо православных честна́я;/ радуйся, Марие, Ма́ти Христа́ Бога;/ радуйся, раю́; радуйся, Боже́ственная трапе́зо;/ радуйся, се́не́; радуйся, ста́мно всезлатая;/ радуйся, всех упование.

Сла́ва, и ны́не, глас 6:

Приидите, празднолю́бных собори,/ святу́ю Де́ву Богоотроковицу ублажи́м:/ радости бо и спасения Ходатаица бысть ми́рови,/ я́ко рождшая Христа́ Бога./ Сию́ бо Отец Пребезначальный,/ от всех родов едину избранную, Дщерь Себе именова́;/ Сын Собезначальный и Соприсносущный в Матерь избра́;/ Дух же Святый я́ко Пречи́стую Невесту Себе Боголепно сочета́./ Сию́ я́ко Богоизбранную и Благословенную в жена́х/ Вышния силы немолчными песньми величают,/ Гаврии́ла имуща Чиноначальника:/ Благодатная, радуйся, с Тобо́ю Господь./ Сию́ патриа́рси, пророцы и вси святии/ со пророком Давидом радостными гласы венчавают:/ предста Царица одесную Тебе́, Владыко,/ ря́сны златы́ми одеяна/ и преукрашена Божественными благоле́потами./ Сию, я́ко державную Заступницу рода нашего,/ и мы, недостойнии, воспоим, глаголюще:/ радуйся, Церкве чу́дное украше́ние/ и всему́ ми́ру предивный покро́ве;/ радуйся, похвало́ и радосте всех земнородных;/ радуйся, Боже́ственное утеше́ние всех скорбя́щих и оби́димых;/ радуйся, Обрадованная, с Тобо́ю Господь,/ подаяй ми́рови Тобо́ю велию ми́лость.

На лити́и стихи́ры, глас 8:

Предстательнице верных, Богороди́тельнице,/ скорбя́щих Радосте и плачущих великое утеше́ние,/ моли́ Сы́на Твоего́, Христа́ Бо́га нашего,/ со А́нгелы, и Апостолы, и всеми святыми/ избавити нас в час испытания лютаго осуждения,/ да Тобо́ю спасе́ние улучи́вше,/ во веки сла́вим Тя, Преблагословенную.

Верою притекаю к покрову Твое́му, Богородительнице Пречистая:/ от напастей, и бед, и страстей томле́ния,/ и бесовскаго озлобления спаси́ мя,/ я́ко милости имущи пучину и спасения явльшися Ходатаица,/ Влады́чице, Яже Бо́га рождши Милостиваго,/ единаго Всещедраго и Многоблагоутробнаго.

Красную Тя, Всечистая,/ едину от века обре́т добро́ту Иа́ковлю Пребезначальное Слово/ и, вселився в Тя благоутробия ради,/ обнови человеческое естество:/ Егóже моли́ непрестанно/ от вся́ких бед и скорбей избавитися нам,/ Тя радость и спасе́ние мира почитающим.

Небе́сную дверь и киво́т,/ всесвяту́ю гору, светозарный облак воспои́м,/ Небе́сную лестницу, слове́сный рай,/ Е́вино избавление, вселенныя всея великое сокровище,/ я́ко спасе́ние в Ней соделася мирови/ и оставле́ние древних согрешений./ Сего ради вопие́м Ей:/ моли́ Сы́на Твоего́́ и Бо́га прегрешений оставле́ние дарова́ти/ благоче́стно покланяющимся Тебе́/ и с веселием торжествующим Твой всечестны́й праздник,/ славо и радосте на́ша, Богомати Благословенная.

Сла́ва, и ны́не, глас 5:

Воструби́м трубо́ю песней:/ преклонши бо Ся свыше, Всецарица Ма́ти Дева/ благословеньми увенчава́ет воспева́ющия Ю./ Православные да стекутся/ и Царице да восплещут в песнех, Царя рождшей,/ смертию одержи́мыя первее разрешити человеколюбно благоволившаго./ Пастырие и учителие, Добраго Пастыря Пречи́стую Матерь, сошедшеся, восхвалим,/ небес пространнейшую, одушевленный Го́сподень Кивот,/ огнезрачный Владычень престол, манноприемную златую стамну,/ заключенную Слова дверь, всех христиан прибежище./ И вси лю́дие, песньми благоглаголивыми похваляюще Ю, сице рцем:/ Ма́ти Слова Бо́жия,/ сподо́би смиренныя ны Небе́снаго Царствия,/ ничтоже бо невозможно ходатайству Твое́му.

На стихо́вне стихи́ры, глас 2:

Я́ко всех вы́шшу сущую Небесных и земных,/ Херувим сла́внейшую и всея твари честне́йшую,/ Тебе́, Заступницу и покров держа́вен, христианскому роду Христос дарова/ покрывати и спасати люди согрешшия, к Тебе́ прибегающия;/ те́мже прибежище всем Тебе́ воспеваем, Влады́чице,/ и честный и благознаменитый Твой праздник,/ обра́дованная радосте всех, празднуем све́тло,/ Христа́ моляще дарова́ти нам Тобо́ю велию ми́лость.

Глас 5:

Стих: Слы́ши, Дщи, и виждь,/ и приклони́ у́хо Твое́.

Воспоим, лю́дие,/ све́тло Дави́дскую песнь Отроковице Богоневесте,/ Ма́тери всех Царя Христа:/ предста Царица одесную Тебе́, Владыко,/ ря́сны златыми одеяна/ и преукрашена Божественными ле́потами./ Сию́ бо, избранную в жена́х, па́че всего мира удобрив,/ благоизво́ли родитися из Нея великия ради милости,/ и Сию́ Помощницу людем Свои́м дарова́/ строити и покрывати от всех бед рабы Своя,/ едину Благословенную.

Глас 7:

Стих: Лицу Твое́му помо́лятся/ богатии лю́дстии.

Го́ра еси́ велика и преславна, па́че горы Синайския, Богоро́дице:/ тая́ бо, не терпящи снития Славы Бо́жия во образех и сенех, огнем возгарашеся,/ и громи, и молния тамо быша./ Ты же во чреве твое́м Божие Слово,/ весь Боже́ственный Огнь сущее,/ неопально носила еси́,/ манием Носящаго вся./ Темже не престай, Влады́чице, рабы Твоя́ при́сно милостию посещати:/ прияла бо еси́ от Сы́на Твоего́́ и Бо́га дар/ стро́ити и покрывати христоименитое стадо Твое́.

Сла́ва, и ны́не, глас 4:

При́зри на моления Твоих раб, Всенепоро́чная,/ утоляющи лютая на ны востания,/ всякия скорби нас изменяющи:/ Тя бо едину, твердое и известное утверждение, имамы/ и Твое́ предстательство стяжа́хом,/ да не постыдимся, Влады́чице, Тя призывающии./ Потщися на умоление Тебе́ верно вопиющих:/ радуйся, Влады́чице, всех помоще, радосте и покрове, и спасе́ние душ на́ших.

Тропа́рь, глас 8:

Ко источнику приснотекущему милосердия,/ Пречи́стей Деве Богоро́дице,/ притецем, лю́дие вси, священницы же и иноцы,/ мужие, и жены, и чада, здравии и болящии,/ в покаянии вопиюще и умильно глаголюще:/ Влады́чице, помози грешным рабом Твоим,/ яви я́ко Благая славу Твою́,/ при́сно потщися умилосердитися на ны,/ испросити очищение душ и телес на́ших/ от Исто́чника жизни нашея, Бога,/ Eгoже родила́ еси́, едина Благословенная.

Ин тропа́рь, глас 4:

Днесь пресветло красуется славнейший град Москва,/ имея чудотворную икону Владычицы нашея Богоро́дицы:/ та бо, ве́рным являющи чудеса,/ низпосылает да́ры целебныя./ Сего ради и мы с верою припадающе молимся,/ и на Тоя́ пречистый образ взирающе,/ я́ко истинную Самую зрим Владычицу нашу Приснодеву Богоро́дицу,/ и умильно глаголем:/ воззри, Ма́ти Бо́жия, оком милости,/ простри́ к нам руце Твои́ пречистыя,/ я́коже на иконе Твое́й сие зрится,/ и подаждь всем скорбящим радость,/ больным от всех недугов исцеле́ние и от бед избавление,/ я́ко Ты еси́ ско́рая Предстательница о душа́х на́ших.

Стихи́ра, певаемая вместо тропаря, глас 2:

Всех скорбя́щих Радосте,/ и оби́димых Заступнице,/ и алчущих Питательнице,/ странных утеше́ние,/ обуреваемых пристанище,/ больных посещение,/ немощных покрове и Заступнице,/ же́зле старости,/ Ма́ти Бо́га Вы́шняго Ты еси́, Пречистая:/ потщися, молимся, спасти́ся рабом Твоим.

НА У́ТРЕНИ

По 1-м стихосло́вии седа́лен, глас 5:

Утоли́ болезни многовоздыхающия души моея,/ утолившая вся́ку слезу от лица земли:/ Ты бо человеков болезни отгоняеши/ и грешных скорби разрешаеши,/ Тебе́ бо вси стяжа́хом надежду и утверждение,/ Пресвята́я Ма́ти Де́во.

Сла́ва, и ны́не, то́йже.

По 2-м стихосло́вии седа́лен, глас 6:

Упование мира, Благая Богоро́дице Де́во,/ Твое́ и единое страшное предстательство просим:/ умилосердися на люди безпомощныя/ и моли́ Милостиваго Бога/ избавитися душа́м нашим от всякаго преще́ния, едина Благословенная.

Сла́ва, и ны́не, то́йже.

На полиелеи величание:

Достойно есть величати Тя,/ Богоро́дице,/ честнейшую Херувим/ и славнейшую/ без сравнения Серафим.

По полиеле́и седа́лен, глас 6:

Преложение скорбя́щих,/ премене́ние болящих еси́, Богоро́дице Всепетая:/ спаси́ град Твой и люди,/ бори́мых умирение, обуреваемых тишино,/ едина Предстательнице верных.

Сла́ва, и ны́не, то́йже.

Та́же, степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́ во вся́ком роде и роде. Стих: Слы́ши, Дщи, и виждь,/ и приклони́ у́хо Твое́. Вся́кое дыха́ние: Ева́нгелие от Луки, зача́ло 4: Псалом 50-й; Сла́ва: Моли́твами Богоро́дицы: И ны́не: то́йже. Помилуй мя, Боже:

Стихи́ра, глас 6:

Арха́нгельски воспоим, ве́рнии,/ Небесный чертог и дверь запеча́тану воистину:/ радуйся, Ея́же ради отрасте́ нам Спас всех Христос, Жизнодавец и Бог:/ низложи, Влады́чице, мучители, враги на́ша,/ рукою Твое́ю, Пречистая, упование христиан.

Канона два. Первый кано́н, глас 4.

Песнь 1

Ирмо́с: Отве́рзу уста моя,/ и наполнятся Духа,/ и слово отры́гну Царице Матери,/ и явлюся, светло торжествуя,/ и воспою, радуяся, Тоя чудеса.

Кую Ти достойную песнь принесет наше неможение,/ точию обрадовательную, ейже нас Гаврии́л тайно научил есть:/ радуйся, Богоро́дице Де́во, Ма́ти Неневестная.

Ра́дуйся, благода́ти источниче; радуйся, лестнице и дверь Небесная;/ радуйся, све́щниче, и ста́мно златая, и горо́ несеко́мая, Яже Жизнодавца Христа́ мирови рождшая.

Всея моея жизни Предстательнице, от бед многих избави мя,/ да благодарственный глас воспева́ю Ти, Богоневесто Пречистая,/ и будущия мя исхити муки.

Яже всем удобь послушная в скорби/и в печали помогающая, Богоро́дице Благая,/ благода́ть подаждь пети Тя дерзающим, Влады́чице, скорбя́щих Радосте.

Многобога́тную благода́ть стяжа́вши, Влады́чице,/ дерзновенною Твое́ю молитвою пресла́вно изми мя от напастей,/ убогаго раба Твоего́, скорбя́щих Радосте.

Яже едина в напастех и скорбех защищающая,/ под кров Твой, Пречистая, прибегающих тепле,/ приими́ я́ко Преблагая, яже от сердца моления.

Ин кано́н, глас 8.

Ирмо́с: Поим Го́сподеви,/ проведшему люди Своя сквозе Чермное море,/ я́ко един славно прославися.

Моря житейскаго волнами потопляем и напастьми лютыми одержим,/ ко пристанищу устремихся невла́емому, покрову Твое́му:/ те́мже мя избави, Богоро́дице, от лю́тых.

Положи Тя пристанище сущим в бедах, Чи́стая, Бог, И́же от Тебе́ благоволивый восприяти плоть./ Темже Ти, припадающе, взываем:/ даруй помощь Твою́ рабом Твоим.

Едина Благословенная и Богорадованная,/ Яже Радость человеком рождши неизреченную,/ печали отими души моея, молюся, и возвесели се́рдце мое.

Избави мя, Пречистая, бесовския прелести,/ озлобления же, и вреда, и искушения,/ да верою Тя сла́влю, сущую по Бозе Заступницу и покров мой.

Яже ненадеющихся надежда, падших исправление,/ печальных утеше́ние, Свет Боже́ственный рождшая,/ душу мою, сущую во тьме, просвети.

Я́ко Гаврии́л Деве, приидите, ве́рнии, и мы вопие́м благоговейно:/ вои́стинну укра́шена еси́, Чи́стая, рождшая Радость; радуйся, Благословенная.

Катавасия: Отве́рзу уста моя:

Песнь 3

Ирмо́с: Твоя́ песнословцы, Богоро́дице,/ живый и независтный источниче,/ лик себе совоку́пльшия, духовно утверди/ в Божественней Твое́й славе,/ венцев славы сподо́би.

Утверждение буди, и прибежище, и покров, Де́во Богородительнице,/ верою к тебе́ прибегающим и Божию Тя Матерь испове́дающим.

Крепость моя, и радость, и веселие, и стена твердая,/ и Предстательница Ты еси́, Всенепоро́чная,/ искушений и бед избавляющи мя.

Милостивным и кротким Твоим оком, Богородительнице,/ зрящи мя во обстоя́нии и скорби одержима, вскоре свободи:/ Тя бо призываю на помощь.

Кропи́ши исцелений струи болящим, Де́во, всюду:/ Тя бо источника показа милосердия, Влады́чице, И́же милости Господь,/ из Тебе́ рожде́йся па́че ума.

Исто́чник милости, подаяй скорбящим утеше́ние, Ты еси́;/ темже, Влады́чице, и мне молитвенных Твоих вод источник источи и угаси страстей пещь.

Отчаявся по́мощи всякия,/ к Тебе́, Пренепорочная, державней Хранительнице и покрову, притеко́х:/ не отри́ни убо мене от Божественнаго покро́ва Твоего́.

Ин

Ирмо́с: Ты еси́ утверждение/ притекающих к Тебе́, Го́споди,/ Ты еси́ свет омраченных,/ и поет Тя дух мой.

Ты еси́ земнородных упование, и помощь, и радость, покров и прибежище, Влады́чице, Ма́ти Живота./ Темже Тя молим: Твою́ помощь низпосли́ всем поющим Тя, Пречистая.

Иже Тобо́ю избавльшеся от бед/ и Тебе́ ради радость получивше, Ма́ти Безневестная,/ я́ко Подательницу благую и Заступницу благохва́льну вси прославляем.

Благословен Плод чрева Твоего́, Де́во Богоро́дице, всех радосте:/ Радость бо всему́ ми́ру родила еси́ и Веселие,/ разгоняющее печаль греховную, Богоневесто.

Тя Хранительницу, Пресвятая, в напастех стяжах;/ Тебе́ по Бозе мою Предстательницу и́мам неусы́пну;/ Тебе́ да обрящу, Пречистая, избавляющую мя в день Суда́ всякаго осуждения.

Возвеличи ми́лость и заступление, Пречистая, Твоих молитв на мне/ и избави мя от напастей и скорбе́й,/ Радость ми́ру рождшая.

Яже радости приемшая исполнение, приими́ от нас, раб Твоих, целова́ние Арха́нгелово:/ радуйся, Радость рождшая миру;/ радуйся, ста́мно, из Неяже манна Небе́сная всем ве́рным даровася;/ радуйся, Благословенная.

Седа́лен, глас 7:

Ра́дуйся, Солнца облаче мысленнаго и неизреченнаго, Влады́чице;/ радуйся, всесветлая свеще́; радуйся, све́щниче всезлаты́й;/ Тобою, Пресвятая, Ева избавися от клятвы./ Но я́ко имущая дерзновение ко Благопременному Сыну Твое́му и Бо́гу,/ ма́тернею молитвою не оскудей о нас моли́тися, Пречистая.

Сла́ва, и ны́не, то́йже.

Песнь 4

Ирмо́с: Седяй в сла́ве на Престо́ле Божества́,/ во облаце легце/ прии́де Иисус Пребоже́ственный/ нетленною дланию и спасе зовущия:/ сла́ва, Христе́, си́ле Твое́й.

Надеждо ненадежных, помощнице сирых,/ плачущих утеше́ние, согрешающих очищение,/ Руководительнице заблудших, болящих Целе́бнице и исправление падающих,/ Влады́чице, спаси́ рабы Твоя́.

Не неприча́стни есмы, Влады́чице, Твоего́́ заступления в ско́рбех;/ те́мже и ны́не нам помози́ вскоре, люте обуреваемым, руку простирающи, Чи́стая:/ буди милостива болезнем нашим, Ма́ти Бо́жия, радость скорую подающи.

Вся Благая и теплая Заступница сущи грешником и смиренным, Богородительнице Пречистая Влады́чице,/ от бед и скорбей, и грехов спасай рабы Твоя́.

Преславную Твою́ Матерь, Христе́́, приими́ молящуюся о мире, милостивно Тебе́ зовущую:/ Сы́не Мой, приими́ мольбу Мою и ути́ши гнев, належа́щий земли.

Кров и заступление, и прибежище буди ми, Де́во, рабу Твое́му,/ и избави мя от безмерных зол, воспевати Тя, Пречистая:/ сла́ва неизреченному Рождеству Твое́му.

Надежда и щит, и утверждение Ты мне еси́, Благая,/ и лю́тых избавление, и просвещение души моей,/ и хвала, и стена, и держава.

Ин

Ирмо́с: Из горы приосене́нныя, Слове, пророк/ единыя Богоро́дицы,/ хотяща воплотитися, Боговидно усмотри́/ и со страхом славословяще си́лу Твою́.

От великих и различных прегрешений же и напастей всегда спасаеши мя;/ те́мже Тя я́ко рождшую Го́спода молю/ и к Тебе́ прибегаю, непобедимей по́мощи скорбящим:/ от бед изведи мольбами Твоими.

Боже мой Милосе́рде, Боже Человеколюбче, Воли́телю милости,/ ны́не на мя излий Твою́ ми́лость:/ молит Тя надежда и Заступница моя, Ма́ти Твоя́.

Милость Твою́ и милосердие на рабы Твоя́, Чи́стая, простри́,/ при́сно молящия Тя всякия скорби и муки избавляющи моли́твами Твоими.

Ра́дуйся, красная пала́то Слова, девственный чертоже Царя;/ радуйся, похвало всех Безплотных;/ радуйся, человеков радосте и помоще и упование.

Спасение подаждь ми душе́вное и теле́сное, Пренепорочная,/ и недугующему даруй цельбу́ и лю́тых избавление.

О соде́яниих моих лукавых и прегрешениих многих кто возможет умолити Судию,/ аще не Ты, Чи́стая, едина согрешающих Заступнице.

Песнь 5

Ирмо́с: Ужасо́шася всяческая/ о Боже́ственной сла́ве Твое́й:/ Ты бо, Неискусобрачная Де́во,/ имела еси́ во утробе над всеми Бога/ и родила еси́ Безлетнаго Сына,/ всем воспева́ющим Тя/ мир подавающая.

Ты кре́пость моя, Ты похвала́, и радование, и Хранительница ми еси́,/ и заступление, и прибежище, и Предстательница непобедима, Пресвята́я Богоро́дице Де́во:/ те́мже спаси́ раба Твоего́.

Спаси́ мя, Влады́чице, из глубины напастей, и скорбе́й, и печалей, и страстей телесных/ и в тишине Божественней сохрани душу мою.

Молитвеннице неложная, упование христиан, Обрадованная,/ приими́ мольбы от нас, прилежно призывающих и молящихся Тебе́.

Покров мой еси́ Ты и присное хваление, о Влады́чице Богоро́дице:/ никакоже бо презираеши к Тебе́ прибегающих.

Дом Тя Славы, го́ру Божию святую, Чи́стая,/ Невесту, чертог, храм освящения/ Сын Божий, в Тя вселивыйся, и рай сладости присносущныя нам соде́ла.

Сте́ну необори́му, Чи́стая, молитву Твою́ стяжавше, вопие́м Ти:/ умилосердися, о Влады́чице, и видимыя и невидимыя враги прожени́.

Ин

Ирмо́с: Мрак души моея разжени, Светодавче Христе́́ Боже,/ началоро́дную тьму изгнав бездны,/ и даруй ми свет повелений Твоих, Слове,/ да утренюя, сла́влю Тя.

Добро́ту Тя Иаковлю возлюби Бог, Де́во Отроковице,/ украшая вся Тобою, омрачившияся преступлением пе́рвее.

Душу мою сохрани, я́ко зе́ницу ока, под кровом крилу́ Твое́ю, Благая Пречистая,/ и от духо́в лукавых томления и мучения избави.

Избавльшеся Тобо́ю праматерния печали, Богородительнице, утешения исполнени быхом,/ Веселие всем рождшая и всемирную Радость:/ темже, Всепетая, Твоя́ песнословцы от бед Твоими моли́твами соблюди.

Благодарим Тя, избавльшеся Тобо́ю грехов многих, и немощей, и болезней, и недуг лю́тых, Пречистая Влады́чице:/ надежда бо еси́ тверда́ Твоим ве́рным рабом.

С Боже́ственным сошедшеся Гаврии́лом, возопиим Богоро́дице верно:/ радуйся, Де́во Святая, Благодатная, Господь с Тобою,/ И́же Тебе́ ради, потребив печаль, подаде́ ми́ру радование.

Болящую душу мою исцели,/ рождшая всех Вземлющаго неду́ги, Пречистая Влады́чице.

Песнь 6

Ирмо́с: Боже́ственное сие и всечестно́е/ совершающе пра́зднество,/ Богомудрии, Богоматере,/ приидите, руками воспле́щем,/ от Нея рождшагося Бо́га сла́вим.

Болящих Целительницу, падающих востание, согрешающих очищение, Богоро́дице,/ Тебе́ молю, со слезами припадаю и зову Ти:/ я́ко сильна́ Сама мя спаси́, погибающаго.

Ты еси́ стена нерушима, Ты еси́ покров тверд, Богоро́дице Благая,/ Ты еси́ Предстательница крепка́ рабу Твое́му:/ сего ради призываю Тя при́сно и притекаю к покро́ву Твое́му.

Мирови радость сущи, Богоро́дице Чи́стая, радуйся, Тебе́, Де́во, зовем со А́нгелом верно:/ Твоея́ радости сподо́би ны и печаль нашу разори.

Сладость А́нгелов, скорбя́щих Радость,/ христиан Предстательница Ты еси́, Де́во Ма́ти Господня:/ заступи нас и избави вечных мук.

В день печали, егда имам телесных соу́з разрешитися, предстани ми, Богородительнице,/ и обдержа́ния бесовскаго исхити́.

При́зри, Влады́чице, на мя, смиреннаго, и па́че надежды спаси́ мя:/ Ты бо еси́ упование и покров ми,/ жизнь и свет сердцу моему, Богоро́дице, и утверждение.

Ин

Ирмо́с: Содержи́ма мя приими, Человеколюбче, грехи мно́гими/ и припадающа щедротам Твоим,/ я́ко пророка, Го́споди, и спаси́ мя.

В нощи́ и во дни, я́ве и втай под Твой прибегаем кров, Пречистая Де́во,/ и́же Тя верно славословящии.

В напастех Заступницу Тя и́мамы тверду,/ в скорбех крепкое спасе́ние, покой в печалех,/ в беда́х помощь, Приснодево.

Добро́та честных святы́х А́нгел,/ радование человек всех Ты еси́, Богоро́дице Де́во:/ Ты мя к животу настави.

Палата Царя Славы и огнезрачный была еси́ Престол, Де́во,/ Херувим превышши и Серафим:/ те́мже Тя вся́кое дыха́ние славит, я́ко Матерь Зижди́теля.

Ра́дуйся, клеще́ Угля Божественнаго;/ радуйся, пророков печать и апостолов похвало́, Пречистая Богоро́дице,/ Ея́же ради от истления свободи́хомся,/ бе́здну щедро́т ро́ждши, Богоро́дице Де́во,/ ско́рбных жития́ душу мою спаси́/ и радости духовныя двери отве́рзи ми:/ на Тя бо едину надежду возложи́х.

Конда́к, глас 6:

Не и́мамы иныя помощи,/ не и́мамы иныя надежды,/ разве Тебе́, Влады́чице./ Ты нам помози́:/ на Тебе́ надеемся и Тобо́ю хвалимся,/ Твои́ бо есмы раби,/ да не постыдимся.

И́кос:

Простри́ дла́ни Твоя́, имиже всех Владыку я́ко Младенца прияла еси́ за множество благости:/ не остави нас, всегда надеющихся на Тя, бо́дренною Твое́ю молитвою́,/ и неисчетною просты́нею уще́дри нас,/ и подаждь душам нашим милосердие Твое́, во веки источающи,/ Тебе́ бо имамы гре́шнии Заступницу от находящих на ны бед и зол./ Но я́ко имущи милосердия щедроты,/ ускори́ на молитву и потщися на умоление,/ предстательствующи присно, Богоро́дице, чту́щих Тя.

Песнь 7

Ирмо́с: Не послужи́ша твари Богомудрии/ па́че Создавшаго,/ но огненное прещение мужески поправше,/ радовахуся, поюще:/ препетый отцев Господь и Бог, благословен еси́.

Страстьми́ престаре́вся и неосла́бными напастьми, и скорбьми/ и, доспев к за́падом жития моего, добродетелем непричастен, леностию снеде́н быв,/ вопию Ти, Влады́чице:/ утеше́ние земным, помилуй мя.

Ра́дуйся, источниче присноживо́тныя воды;/ радуйся, раю́ пи́щный;/ радуйся, стено верных;/ радуйся, Неискусобрачная;/ радуйся, всемирная радосте,/ Еюже нам возсия́ хва́лимый отцев Бог и препрославлен.

Всем, сущим в мире, Заступница еси́/ и стена христиа́ном, и прибежище непостыдно, Чи́стая Марие./ Темже верою Тя чтуще, вопие́м Христу:/ отец на́ших Боже, благословен еси́.

О благоутробия Твоего́, Де́во Чи́стая!/ Реши́ши бо безмерныя печали и напасти, призывающим в нужде и обстоянии:/ те́мже и ны́не помози, Благословенная, Тя восхваляющим.

Едино упование и помощь ве́рным сущи, Богородительнице,/ потщи́ся помощи́ рабом Твоим, погружаемым скорбьми и в болезнех сущим,/ и прибегающим к Тебе́ с любо́вию души́.

Радование благодарственное Тебе́ приносим, Ма́ти Бо́жия,/ я́ко воистину Тобо́ю изба́влени всякаго злаго начинания,/ и согласно Тебе́ поем: благословенна еси́.

Ин

Ирмо́с: Бо́жия снизхождения/ огнь устыде́ся в Вавилоне иногда:/ сего ради о́троцы в пещи́ радованною ногою,/ я́ко во цве́тнице, лику́юще, поя́ху:/ благословен еси́, Боже отец на́ших.

Водвори́хомся в вечер в плачи печалей и чаянии злых,/ но Твоим Боголепным кровом, Де́во, обоже́ни бывше,/ обретохом радость заутра:/ Ты бо спасла еси́ нас.

Я́ко Боже́ственное прибежище покров Твой, Влады́чице, вси стяжавше к Бо́гу,/ в напастех и гонениях, и гресе́х к Тебе́ прибегаем/ и Тобо́ю изменение прие́млем, Пречистая.

Грешников прибежище, низверженных исправление Ты еси́, Влады́чице:/ сего ради притекаю к покро́ву Твое́му,/ спаси́ мя, Богоневесто.

В недоумении и печали сый и в беда́х, Пречистая,/ Тя призываю те́пле от се́рдца моего:/ предвари, и избави мя, и подаждь, Чи́стая, мне утеше́ние.

Благословенная Де́во, Радосте скорбя́щих всех верных,/ от всякаго искушения и печали, и злобы завидящих мне изми/ и от грех и различных неду́г мя избави.

Вся еси́ светоносна, Свет незаходимый, Де́во, приемши и просвещающи, Чи́стая, верою Тебе́ вопиющия:/ Благословен, Пречистая, Плод Твоего́́ чрева.

Песнь 8

Ирмо́с: Отроки благочестивыя в пещи́/ Рождество Богоро́дичо спасло есть:/ тогда убо образуемое,/ ны́не же действуемое,/ вселенную всю воздвизает пети Тебе́/ Го́спода пойте дела́/ и превозноси́те Его́ во вся ве́ки.

Ра́дуйся, Престо́ле славный Божий;/ радуйся, верных стено́, Еюже сущим во тьме возсия́ Свет, Христос,/ Тебе́ блажащим и вопию́щим:/ вся дела Господня, Го́спода пойте и превозносите во вся ве́ки.

Поем Тя, Пречистая и Ма́ти Бо́жия,/ и кто не славит Тя, воистину Благую, сущую надежду душ на́ших,/ темже, Пречистая, и мою мольбу приими́.

Ты еси́ спасе́ние всех человек, Яже Бо́га рождшая неизреченно;/ Ты еси́ верных спаси́тельница, Богоро́дице, и слепых наставница, и падающих исправление./ Темже Тя восхваляюще, Христу́ зовем:/ благословите вся дела Го́спода, пойте и превозносите Его́ во вся ве́ки.

Струи́ исцелений нам всегда, верным, Чи́стая, источаеши:/ те́мже незави́стную благода́ть взе́млюще,/ воспеваем Рождество Твое́, Чи́стая, и превозносим во вся ве́ки.

На Тя возложих, Влады́чице, сердце, и душу, и тело: не и́мам бо иныя надежды, разве Тебе́, еюже получу ми́лость./ Темже подаждь ми богатую Твою́ благода́ть.

На мольбу мою ны́не умилосердися и радость в печали место даруй ми,/ да пою Тя, Влады́чице, и вопию Сыну Твое́му:/ благословите, вся дела Господня, Го́спода.

Ин

Ирмо́с: На горе святей прославльшася/ и в купине́ огнем/ Присноде́вы Моисеови тайну явльшаго,/ Го́спода пойте/ и превозносите во вся ве́ки.

Вся еси́ Чи́стая и Божественныя славы исполнена, Ближняя Моя,/ рече Дух Божий, Тя провозвещая, Пречистая./ Ю́же песньми воспеваем, поюще:/ тебе́ подоба́ет ра́доватися, Бо́га Человека рождшей.

Ангелов похвало́ и человеков спасе́ние,/ и Спору́чница буди ми, Ма́ти Бо́жия:/ я́ко да обращу́ся и прииму разрешение прежде согрешенных в ве́дении и не в ведении.

Тя по Бозе упование спасения в напастех иму́ще, ве́рнии, взываем:/ вся дела Господня, Го́спода пойте/ и превозносите Его́ во веки.

Приими́ песнь от худых усте́н, Де́во Всепетая, вопиющих Ти:/ радуйся, болящим телесем врачевство́ и отчаянным душам спасе́ние.

В болезнех и напастех одержимыя не пре́зри, Благая:/ но мольбу худую услышавши, свободи нас от скорбей великих,/ да верно Твою́ ми́лость и заступление, Чи́стая, воспеваем.

Стоящих утверждение еси́ и падших исправление, Де́во:/ те́мже мя, падшаго, возстави,/ да Тя сла́влю, Благословенную и Обрадованную.

Песнь 9

Ирмо́с: Всяк земнородный/ да взыграется, Духом просвещаем,/ да торжествует же Безплотных умов естество,/ почита́ющее священное торжество Богоматере,/ и да вопиет:/ радуйся, Всеблаженная Богоро́дице,/ Чи́стая Приснодево.

Ра́дуйся, Марие, великое всея твари чудо;/ радуйся, Дщи убо Давидова, Господня же Мати;/ радуйся, пение Гаврии́лово;/ радуйся, прибежище и утверждение, и помощь всем, Пресвятая, сущим на земли грешником.

Юже изво́лил еси́, Владыко, приими́ милостивно Молитвенницу, Матерь Твою́, о нас,/ и Твоея́ благости всяческая исполнятся:/ да Тя вси я́ко Благодетеля величаем.

О Де́во Благая! О мира радосте и прибежище!/ О хранилище верных и избавление скорбе́й!/ Ты предста́ни ми в час смерти и избави от бесо́в, ищущих поглоти́ти мя.

Ты еси́ А́нгелов радость, Ты еси́ праведников добро́та,/ Ты еси́ верных надежда, Ты еси́ соблюдение наше,/ Ты еси́ мост, к жизни нестаре́ющейся преводя́й верою и любо́вию Тя величающия.

О Ма́ти всяческих Творца,/ всесветлая печальных уте́хо, оскорбляемых Предстательнице и немощны́х Заступнице,/ сохрани мя, Благая, от бед и прилог вражиих.

Едина болящих посещение, Едина падших исправление, Влады́чице,/ Едина к Бо́гу Руководительнице и входе,/ Едина Ходатаице вечных благ,/ помилуй мя единаго, па́че всех согрешившаго.

Ин

Ирмо́с: Благословен Господь Бог Израилев,/ воздвигнувый рог спасения нам/ в дому́ Давидове, Отрока Своего:/ в нихже посети нас Восток с высоты/ и направил ны есть на путь мира.

Радости нам вечныя и жизни яви́лася еси́ преесте́ственне, Богородительнице, Хода́таица, Чи́стая,/ Спаса всех рождшая, от лица земнаго вся́ку сле́зу я́ве отъемшаго и всем радость подавшаго.

Радость и веселие, и радование Боже́ственное, Де́во Неискусомужная, нам умно́жися Божие:/ се бо, плачущиися лю́те, радуемся моли́твами Твоими.

Под твое́ милосердие прибегающии верою избавляются скорбных бед жития́:/ те́мже и аз ко Твое́му покро́ву прибего́х, Богоро́дице.

Псалмы Тя воспеваем, Благодатная,/ и немолчно, еже радуйся, приносим:/ Ты бо источи́ла еси́ всем Радость.

Иска́пающая Божественную сладость, всех Сладость рождшая,/ душу мою услади́, ядом змииным огорченную,/ отчуждающи мя горькаго вре́да всегда ходатайством Твоим,/ Предстательнице и радосте верных, Влады́чице.

Благословя́, благословлю́ Тя, Пречистая, и величаю те́пле:/ благослови мя убо, Твоего́́ певца,/ и всяческих нуждных и печальных избави, и сохрани Твоими дланьми непобедима.

Свети́лен.

Подо́бен: Чертог Твой:

Под кров Твой, Де́во Госпоже, прибегаем/ вси ро́ди человечестии:/ просвети́ ны светом Рождества Твоего́,/ грешныя рабы Твоя́,/ молящияся прилежно и покланяющияся Тебе́,/ и просящия умирения ми́рови/ и душам нашим ве́лия ми́лости.

На хвалитех стихи́ры на 4, глас 2:

Приидите, возрадуемся державней Заступнице рода нашего,/ Царице Богоро́дице,/ приидите к тихому и чудному Ея Покро́ву, веселящеся./ Дарует бо Богородица ве́рным обильныя да́ры целебныя/ от неистощимаго источника милости;/ тьмы избавляет нас искушений и бед, и обстоя́ний,/ благоче́стно и Богоприятно прославляющих и чту́щих Ю/ я́ко Всеблагословенную и Пречи́стую Матерь Христа́ Бога./ Темже радостно к Ней воззовем:/ радуйся, палато Слова;/ радуйся, Невесто Неневестная;/ радуйся, радосте на́ша;/ радуйся, Ма́ти Живота,/ благословен Плод чрева Твоего́.

Ра́дуйся, Всеблагословенная Марие, Ма́ти Христова;/ радуйся, сущая радосте всего мира;/ радуйся, Всеблагая христиа́ном Помощнице;/ радуйся, оби́димых Заступнице;/ радуйся, недугующим скорое и известное прибежище;/ радуйся, сирым и вдовицам Боже́ственное утеше́ние;/ радуйся, всех алчущих покрове и Питательнице;/ радуйся, всем сущим в беда́х скорое избавление;/ радуйся, Богоневесто Влады́чице, упование христиан.

Ра́дуйся, всех христиан надеждо и покро́ве, Богомати Всенепоро́чная,/ всея твари честне́йшая, Небесных и земных сла́внейшая:/ всех бо родила еси́ Творца и Бога./ Но, о Влады́чице, приими́ милостивно моления на́ша/ и спасай нас всегда я́ко Благая и Милостивая:/ да с веселием лобызаем пресвятую Твою́ икону/ и присно, радующеся, восхваляем и величаем Тя,/ Обрадованная Радосте верных раб Твоих.

Сла́ва, и ны́не, глас 6:

Днесь собо́ри верных,/ сошедшеся, духовно да торжествуем/ и Богоотроковицу Де́ву и Богоро́дицу/ песньми благохвальными ублажи́м, глаголюще:/ радуйся, едина Избра́нная от всех родо́в в Матерь Превечнаго Слова;/ радуйся, вместилище Невместимаго всеми;/ радуйся, А́нгелов и Серафимов радосте;/ радуйся, пророков проповедание и похвало́;/ радуйся, Апостолов и святителей удобрение;/ радуйся, мучеников крепосте и всех праведных славо;/ радуйся, державный покрове верных;/ радуйся, скорбя́щих Боже́ственное утеше́ние;/ радуйся, в беда́х и напастех сущим скорое избавление;/ радуйся, грешников всех прибежище и Благая Заступнице;/ радуйся, Благодатная и Обрадованная, с Тобо́ю Господь,/ подаяй ми́рови Тобо́ю велию ми́лость.

Празднование Пресвятой Богородице, ради Ее иконы «Всех скорбящих Радость»

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Еврейскому свере́пству твое́ му́жество противоположи́л еси́,/ мучениче Аре́фо всехвальне,/ и Боже́ственною благода́тию победоно́сец явился еси́/ и лик приве́л еси́ мучеников, Христу́ во́инствующий,/ от всякаго, славне, во́зраста совокупля́ем,/ и от ро́да всякаго составля́ем.

Аре́фо всеславне,/ красный лик соста́вив священных сому́чеников твои́х,/ с нимиже подвизался еси́, до́брый по́двиг и течение соверши́в/ твоего́ му́жественнейшаго страдания./ Тем Христа́ моли́ дарова́ти душа́м на́шим мир и ве́лию ми́лость.

Девы, Богому́дрыя мученицы, Христовым раче́нием распаля́еми,/ не́мощи естественныя забывше/ и, силою Боже́ственною я́ве укрепля́еми,/ льще́ние вра́жие попра́ша, не устрашившеся мучения болезней/ и пе́щи огненныя не убоя́шася.

Сла́ва, глас 4. Анатолия:

Пе́сненно пастыреначальника днесь, ве́рнии, единомы́сленно почтим,/ Аре́фу сла́внейшаго с су́щими его:/ я́ко обличи́ царя пребеззако́нновавша и кровь излия́ за Христово испове́дание,/ отону́дуже и огненный о́блак попаля́ше на лицы́ земли́,/ обличая пребеззаконных нечестие./ Тем, Христе́́ Боже, Твоя́ страстотерпцы укрепи́в к Твое́му славословию,/ и нас соблюди́, я́ко всех Владыка,/ от искушений и скорбе́й моли́твами святы́х Твоих.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Пастыря Тя на Древе я́ко ви́де,/ А́гница Рождшая рыдаше и ма́терски Ти веща́ше:/ Сы́не возжеле́нне, ка́ко на Древе Крестнем пове́шен еси́, Долготерпеливе;/ како ру́це и но́зе Твои, Сло́ве,/ пригвозди́шася от беззаконных,/ и Кровь Твою́ излия́л еси́, Владыко.

На стиховне Окто́иха. Сла́ва, глас 8:

Лукавое и неверное злосове́тие еврейское проразуме́вше,/ де́рзостию духа за Христа́ пострадати подвиза́стеся./ Я́ко бо дре́вле в законе, И́же от Египта Спасшаго,/ в пусты́ни прогне́ваша/ и Того Кресту осуди́ша,/ тако ны́не и в вас де́лом Слово преидо́ша,/ неве́рствием неду́говавше,/ вас огню́ осуди́ша./ Вы же, купному́дренне, му́жески терпением пострада́вше,/ стра́шни в му́ченицех показа́стеся./ Дерзновение иму́ще к Бо́гу,/ моли́те от прегрешений лю́тых избавитися душа́м на́шим.

И ны́не, Богоро́дичен или́ Крестобогоро́дичен.

Подо́бен: О пресла́внаго чудесе́́!

Что зримое виде́ние,/ еже Мои́ма очи́ма видится, о Владыко:/ Содержа́й всю тварь,/ на Древо воздви́жен быв,/ и умираеши, всем дая́й жизнь,/ Богородица, плачущи, глаго́лаше,/ егда узре́ на Кресте́ возноси́ма/ из Нея неизреченно возсиявшаго/ Бо́га и Человека.

Тропа́рь, глас 1:

Мужествовавше во Христе́́ противу безбожнаго царя,/ мученицы святии,/ и того неверие иудейское во Христа́ обличивше,/ прияша мук томление и главам усечение;/ тем восхвалиша тя А́нгели,/ и верных роди тя прославляют, Арефо,/ и пострадавших с тобою,/ я́ко молящихся при́сно о душах на́ших.

Сла́ва, и ны́не, Богоро́дичен или́ Крестобогоро́дичен.

НА У́ТРЕНИ

Оба кано́на Окто́иха, и мучеников, на 4.

Егóже краегране́сие:

Мученический собор Богокрасне воспоем песньми.

Творение Феофа́ново. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу нашему,/ свободившему Изра́иля от работы,/ песнь победную поюще и вопию́ще:/ пои́м Тебе́, Единому Влады́це.

Мучениче, страстотерпче Христов, Аре́фо всеблаженне,/ моли́твами твои́ми и су́щих с тобо́ю мучеников ум мой просвети́:/ я́ко да воспою́ вашу светоно́сную и Божественную память.

Выспрь житие́ я́ве на Небесе́х стяжа́в, Богоблаженне, Христовым подобием,/ себе пре́дал еси́ желанием мучения/ беззаконным евреем, Богомудре.

Глагол преступи́в Божий,/ евре́ин пребеззако́нный и непра́веднейший/ Богоизбра́нное стадо Христово погуби́:/ оба́че восприя́ше суд праведным и Боже́ственным Про́мыслом.

Стезю́ ше́ствовав неуклонно, к Небеси веду́щую,/ Христу́ приве́л еси́ мученический собор, Аре́фо всехвальне,/ всякаго возраста и ро́да всякаго со́бранный.

Богоро́дичен: Пе́сньми Пресвятую, ве́рнии, Марию похва́лим,/ Богоматерь Обрадованную,/ покров Боже́ственный, тихое пристанище,/ всех верных Предстательницу.

Песнь 3

Ирмо́с: Небе́снаго кру́га Верхотворче, Го́споди,/ и Церкве Зижди́телю,/ Ты мене утверди́ в любви Твое́й,/ желаний кра́ю, верных утверждение,/ Едине Человеколюбче.

Утвержде́нну зря́ще Креста благода́тию Твою́ Церковь,/ еврейстии о́троцы пребеззако́ннии,/ завистию та́юще,/ и ра́нами многообра́зными неща́дно му́чаху,/ Едине Человеколюбче.

Ядоме́тный язы́к злове́рнии иму́ще и Тя ху́ляще,/ сих прароди́тели Избавльшаго древняго мучительства,/ в Тя верующия, Спа́се, закла́ша.

Создавый наедине́ Богодейственным ма́нием человеческая сердца́,/ кто Про́мысла Твоего́́ глубину́ возможет пости́гнути,/ я́ко стадо, еже, Христе́, собрал еси́,/ волко́м пре́дал еси́.

Богомудрое твое́ стадо,/ ва́рварскими мечи́ ссека́емо,/ усердно призываше Тя:/ приими́ ду́хи и ду́ши на́ша, Спа́се,/ и к свету наста́ви Царствия Твоего́.

Богоро́дичен: Умерщвле́на мя дре́вле, к жизни, Пречистая, па́ки возвела́ еси́,/ едина Ипостасную Жизнь рождшая,/ Ейже прирази́вшися, расто́ржеся я́ве враждебнейшая смерть.

Седа́лен, глас 8.

Подо́бен: Прему́дрости:

Креста силою вооружи́вся и верою огради́в град твой,/ де́лы посрами́л еси́ мучителево свере́пство,/ терпения же образ Божественнаго быв,/ привел еси́ Христу́ мученики./ Тем, сошедшеся, по до́лгу почтим, Арефо прехвальне,/ всепра́зднственную па́мять твою́́,/ страстоносче всеславне, моли́ Христа́ Бо́га грехо́в оставле́ние пода́ти/ честву́ющим любо́вию святу́ю па́мять твою́́.

Сла́ва и ны́не, Богоро́дичен:

В напа́сти многоплете́нныя впад от враг видимых и невидимых,/ бурею одержи́м безчисленных согрешений моих,/ и, я́ко к теплому заступлению и покрову моему, Чи́стая,/ ко приста́нищу притекаю Твоея́ благости./ Темже, Пречистая,/ из Тебе́ Воплощенному безсе́менне, моли́ся прилежно о всех рабе́х Твоих,/ непрестанно моля́щихтися, Богоро́дице Пречистая,/ моля́щи Его́ при́сно согрешений оставле́ние дарова́ти/ воспева́ющим досто́йно славу Твою́.

Крестобогоро́дичен:

А́гнца и Па́стыря, и Изба́вителя/ А́гница зрящи на Кресте́, восклица́ше, пла́чущи,/ и, горько рыда́ющи, вопияше:/ мир у́бо радуется, прие́мля Тобо́ю избавле́ние,/ утро́ба же Моя гори́т, зрящи Твое́ распятие, еже терпи́ши за милосердие милости./ Долготерпели́ве Го́споди, милости бе́здно и источниче неисчерпаемый,/ умилосердися и даруй согрешений оставле́ние,/ верою поющим Божественныя страсти Твоя́.

Песнь 4

Ирмо́с: Ты моя кре́пость, Го́споди,/ Ты моя и сила,/ Ты мой Бог, Ты мое радование,/ не оставль не́дра О́тча/ и нашу нищету посети́в./ Тем с пророком Аввакумом зову́ Ти:/ си́ле Твое́й сла́ва, Человеколюбче.

Собор, укрепляем благода́тию,/ и лик Боже́ственный и пресветлый,/ мученически множество стражда́, во́инство победоносное,/ Арефу иму́ще чиноначальника,/ да пое́тся любо́вию че́стно песнопою́щими:/ си́ле Твое́й сла́ва, Человеколюбче.

Твоим содержа́щся разумом Богомудрый град твой, пребогате,/ седи́ною светя́щяся честно́ю,/ к пребеззаконным му́жески подвиза́ся,/ и, победу взем, песнопое́т Спа́су:/ си́ле Твое́й сла́ва, Человеколюбче.

Законом новым Животворящаго Ду́ха огражда́ем,/ закон пи́смене попира́я,/ благоче́стный град/ преодоле́ душевною чистотою и нравом благородия, Христу́ песнопоя́:/ си́ле Твое́й сла́ва, Человеколюбче.

Воистину град Божий явился еси́ пречестны́й/ и мучеников Боже́ственное жили́ще,/ и о тебе́ поются светло ны́не преславная, ве́лия же и ди́вная,/ лик бо пою́щих Влады́це приво́диши:/ си́ле Твое́й сла́ва, Человеколюбче.

Богоро́дичен: Из Давидова царскаго прозя́бши сро́дства,/ Всецарствующаго прежде век,/ из Отца Слова неизреченно и па́че ума́ возсиявшаго, родила́ еси́, Де́во./ Тем Тя, Богоро́дицу, Богомудренно ве́рнии ублажа́ем.

Песнь 5

Ирмо́с: Вску́ю мя отри́нул еси́/ от лица Твоего́, Свете незаходимый,/ и покрыла мя есть чужда́я тьма, окаяннаго,/ но обрати́ мя и к свету заповедей Твоих/ пути моя напра́ви, молю́ся.

Богозванный собор и Богоблаженный,/ подвиза́яся, и те́пле друг друга укрепляюще, и способствующе,/ от беззаконных Христа́ ради заклатися,/ благославно, добропобеднии, изво́лиша.

Укре́пльшеся верою и благоче́стия ре́вностию распаля́еми,/ уго́дницы Твои, Христе́,/ пребеззаконных страха не убоя́шася,/ и, Твое́ю любо́вию целомудренно свя́зани,/ сами волею преда́шася.

Бо́га Боже́ственным Промышле́нием/ и неизбежным Про́мысла судьба́м всю жизнь свою возложи́вше,/ собор Боже́ственный,/ к пребеззаконным еврейским скверноубийством благоде́рзостно,/ до́блии, устреми́шася.

На Тя надеющеся и ве́ровавше ны́не Воскресению твое́му,/ Твои, Спасе, мученицы, не ретя́щеся, ниже́ во́пляще,/ беззаконными за Твое́ исповедание убие́ни быша,/ до́блественнейшии.

Богоро́дичен: Божие Бог Слово,/ прежде век Отцу́ Соприсносу́щный,/ благоутробия богатством во утро́бу Твою́ всели́вся,/ обнища́, и Человек яви́ся на земли́, плоть быв,/ Де́во Богоро́дице Всепетая.

Песнь 6

Ирмо́с: Очисти мя, Спа́се,/ мно́га бо беззакония моя,/ и из глубины зол возведи, молюся:/ к Тебе́ бо возопи́х, и услы́ши мя,/ Боже спасения моего.

Кровию Христовою зна́менавшеся, святии,/ кро́ви своя́ усердно излия́ша, славнии мученицы,/ и ны́не ца́рствовати с Ним сподо́бишася.

Мир пророчески глаго́лаху язы́цы немотству́ющии,/ пропове́даху Христа́ младенцев немова́ния,/ девы Богомудрыя за благочестие сами себе́ Бо́гу принесо́ша.

Отдели́ся тебе́ свет,/ возсияющ исцеления бога́тно от Христа,/ Арефо Богоглаголиве,/ к Нему́же изшел еси́,/ еще иска́пая по́ты страдания.

Множество Тебе́ мученическое/ Боже́ственно, Спа́се, приведе́ся:/ о́крест тебе́ ли́цы святых, лику́юще,/ просят оставления грехов/ тех при́сно прославля́ющим.

Богоро́дичен: Возсия́́ от Сиона высочайшаго Благолепие/ приятием плоти по соединению неизреченно/ из Тебе́, Неискусобрачная, оде́ян,/ и мир просвети́.

Конда́к, глас 4.

Подо́бен: Явился еси́ днесь:

Веселия хода́тай нам наста́/ светоносный днесь страстотерпец праздник,/ егóже совершающе, сла́вим в Вышних сущаго Го́спода.

И́кос:

Ум мой просвети́, Христе́,/ зарею подвигов Арефы до́бляго/ и всех святых, с ним пострадавших:/ первый бо всех явися верный,/ мужески ополчи́вся на отме́щущих воплощение,/ Тебе́, па́че естества́ вопло́щшагося и ро́ждшагося,/ да нас изба́виши от ле́сти/ и пока́жеши небла́зненно хотящим ше́ствовати путь свидетельства, имже страдальцы ходи́ша,/ Тя пою́ще в Вышних сущаго Го́спода.

Песнь 7

Ирмо́с: Божия снизхождения/ огнь устыде́ся в Вавилоне иногда,/ сего ради о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благословен еси́, Боже отец на́ших.

Крове́й пото́цы страдалец Твоих источают исцеления,/ верою тех па́мять похваля́ющим,/ и Тебе́, Творцу, усердно зовущим:/ благословен еси́, Боже отец на́ших.

Посрами́ша весь, победоносцы, беззаконных совет,/ я́ко Боже́ственным разумом и остроумием украша́еми,/ и, веселящеся, закала́еми поя́ху:/ благословен еси́, Боже отец на́ших.

Матери щедрыя, я́ко уя́звлени Твое́ю любовию, Христе́,/ не пощаде́ша детей, но в пещи́ попаляемыя,/ Тебе́, Влады́це, взывающе поя́ху:/ благословен еси́, Боже отец на́ших.

Свещи́ страдания де́вства светло вже́гше,/ в Божии черто́зе, Богоноснии,/ веселя́щеся с мудрыми девами, зовут:/ благословен еси́, Боже отец на́ших.

Богоро́дичен: Душ очищение и спасения Ходатаица еси́,/ верою Тя и любовию, Божию Матерь, возвеща́ющим/ и Сыну Твое́му согласно зовущим:/ благословен еси́, Боже отец на́ших.

Песнь 8

Ирмо́с: Седмери́цею пещь/ халде́йский мучитель/ Богочестивым неи́стовно разжже́,/ силою же лу́чшею спасе́ны, сия́ ви́дев,/ Творцу и Изба́вителю вопия́ше:/ о́троцы, благослови́те,/ священницы, воспойте,/ лю́дие, превозноси́те во вся ве́ки.

Не в законе бысть я́ве соверше́ние, но в Христе́́ спасе́ние даде́ся,/ вопия́ху мученицы, богоубийцам глаголюще./ Тем, ра́дующеся, закала́емся вси/ и умираем усердно, Тому песнопою́ще:/ лю́дие, превозносите Христа́ во веки.

Тайнонауча́ет младенец и учи́т безумныя к Твое́му о́бразу зре́ти пречистому, Христе́,/ и веру прия́ти пришествия Твоего́́ на земли́,/ и утаи́вся пребеззаконных рук, в пла́мень вни́де с рождшею, поя́:/ лю́дие, превозноси́те Его́ во веки.

На земли́ мученицы благоче́стно подвиза́вшеся,/ на Небесе́х от Христа́ венцы досто́йно прия́ша,/ радостно отше́дше, иде́же веселящихся жили́ще,/ верою песнопою́щих и вопию́щих непрестанно:/ лю́дие, превозноси́те Его́ во веки.

Победи́вше, святи́и, лю́таго миродержца и служа́щия того хотением,/ ко Вседержителю и всех Господу со дерзнове́нием и радостию неизрече́нною преидо́сте, вопию́ще:/ свяще́нницы, воспо́йте, лю́дие, превозноси́те Его́ во веки.

Богоро́дичен: За ны моли́ся Сыну Твое́му и Господу,/ чисто и истинно пою́щия Тя/ и Тя, Богоматерь, исповедающия, Пречистая,/ грехо́в прося́щи разреше́ния,/ получи́ти же спасе́ние верно поющим:/ свяще́нницы, благослови́те,/ лю́дие, превозноси́те Его́ во веки.

Песнь 9

Ирмо́с: Устраши́ся всяк слух/ неизрече́нна Бо́жия снизхождения,/ я́ко Вышний волею сни́де даже и до плоти,/ от Девическаго чрева быв Человек:/ те́мже Пречи́стую Богоро́дицу, ве́рнии велича́ем.

Прича́стницы славы Христовы, общева́вшеся смерти бы́сте, святии мученицы,/ и Царствия диади́мою украси́стеся све́тло./ Бо́гу же предстои́те, нам просяще спасения душевнаго, достославнии.

Законнии яви́стеся Христо́ви во́ини и непобеди́мии мученицы,/ Аре́фо всемудре и со страда́вшими с тобо́ю усердно,/ со страстоте́рпицами жена́ми, девы отрокови́цы,/ те́мже мо́лим:/ прилежно о нас моли́теся.

Упра́ви, Сло́ве Божий, жизнь мою́ и окорми́, Владыко,/ уго́дников Твоих моле́ньми лю́бящих Тя,/ и сподо́би тех соприча́стнику бы́ти, грехи́ моя́ презира́я/ я́ко Благ и Человеколюбец.

Богоро́дичен: Селе́ние была еси́ Божие, Невместимаго во чреве вмещшая/ и, прежде Безплотнаго, воплоще́нна нам порождшая./ Егóже ны́не умоли́, Чи́стая, прегреше́ний оставле́ние всем дарова́ти,/ верою Тя при́сно величающим.

Свети́лен.

Подо́бен: Жены услышите:

Аре́фина пророчества Бог Испо́лнитель бысть,/ возста́вив на падение нечестиваго Омири́та Елезвоя мужественнаго,/ гоня́ща и убива́юща нечестивых полки́,/ Негра́н же вознося́ща и веселия исполня́юща.

Сла́ва, и ны́не, Богоро́дичен:

Су́щую Богоро́дицу Тя испове́даем, Влады́чице, спа́сшиися Тобою:/ Бо́га бо неизрече́нно родила́ еси́,/ разруши́вшаго Кресто́м смерть,/ к Себе же привле́кша мучеников мно́жества:/ с ни́миже Тя восхваля́ем, Де́во.

НА ЛИТУРГИ́И

Проки́мен, глас 4: Святым, и́же суть на земли Его́: Стих: Предзре́х Го́спода предо мно́ю вы́ну: Апостол ко Евреем, зача́ло 330. Аллилуия, глас 4: Воззва́ша пра́веднии, и Господь услы́ша их. Ева́нгелие от Матфе́я, зача́ло 38. Причастен: Ра́дуйтеся, пра́веднии, о Го́споде:

Святой мученик Арефа и 4299 пострадавших с ним, и блаженный Елезвой, царь Ефиопский

Тропа́рь, глас 1:

Чистоты́ жития́ светом страстное те́рние попали́л еси́/ и тече́нием слез безплодную зе́млю напои́л еси́,/ многопло́дну ни́ву душевную соде́лав,/ Афана́сие треблаже́нне,/свети́ло Царюгра́ду, Патриа́рхом удобре́ние,/ моли́ Христа́ Бо́га спасти́́ся душам нашим.

Конда́к, глас 2:

В светлую свяще́ния оде́жду оде́явся,/ мы́сленно в Небесныя радостно дости́гл еси́ Царства./ Тем восприя́ша тя селе́ния праведных,/ иде́же есть неизглаго́ланно веселие,/ и слова́, и всех святы́х ли́цы,/ святите́лю Афана́сие,/ моли́ непрестанно о всех нас.

Святитель Афанасий I, Патриарх Константинопольский

Тропа́рь, глас 2:

Бога́тство твое́ душе́вное погуби́ти хотя́ враг,/ помрачил тя бя́ше богатством тленным испе́рва,/ но всех спаса́яй Господь/ бога́тство ги́бнущее окра́сти попусти́,/ душе́вное же невре́дно соблю́д,/ Небесных сокровищ наследника тя показа, Аре́фо,/ тем тя чтим и ублажаем.

Конда́к, глас 2:

И́ова терпеливоду́шнаго ревну́я благодаре́нию,/окраде́ний тленнаго своего́ име́ния претерпе́л еси́ благодарне, преподо́бне Аре́фо,/ тем с ним обре́т нетленное имение на Небеси́,/ моли́ Христа́ Бо́га о всех нас.

Преподобные Арефа, Сисой и Феофил, затворники Печерские

Тропа́рь, глас 4:

Иже Боже́ственным раче́нием подви́гся/ на отмщение проли́тыя кро́ви праведных,/ я́ко Дави́д от Самуи́ла,/ ты же от Зино́на предивнаго,/ пророчески я́же сбы́тися тебе́ предре́кша,/ еже обещанием к нему́,/ и того благослове́нием победы на враги́ и одоления показа́вшу,/ отнюду же со отложе́нием царства/ постных селений горы жизнь соверши́, Елезво́е царю́,/ моли́ Небе́снаго Царя Христа/ спасти́́ души на́ша.

Конда́к, глас 4:

Подо́бен: Вознесыйся:

Высоту́ земна́го царства, и венца венец све́тлости,/ и багряницу отло́жшаго любве́ ради Царя Христа,/ от Негoже на Небесех славно венчана, Елезво́я царя мудраго,/ и́же тленным царством и мимоходя́щим, Царство Вечное изме́ншаго,/ в пениих песненных восхвалим,/ молитвенника о мире велика.