23-й день

Свята́го апостола Иа́кова, брата Бо́жия

Свята́го праведнаго Иа́кова Борови́тскаго, чудотворца, пренесение мощей

На Го́споди, воззва́х: стихи́ры на 6, глас 4.

Подо́бен: Дал еси́ знамение:

Приидите, па́мять Богобрата почтим священно, о Богомудрии./ Иго бо взем Христово усердно,/ Евангелия благости Его́ и Царствия проповедник показался,/ и Того неизреченное строение уверяет./ Темже им, Всесильне, очищение нам даруй.

Вся огласи́ вселенныя концы глагол твои́х вещание,/ имиже просвещаемся доброде́телей Боже́ственная ко вся́кому виду/ и наставляеми верно Святыя Троицы к познанию./ Тем молим тя я́ко иерарха:/ моли́ся Иисусу Человеколюбцу спасти́ души на́ша.

Издале́ча прозри́ твое́ жительство, Иакове,/ брата тя прия Христос Человеколюбец, премудрый провидец,/ Иерусалима священноявле́нника верна/ и пастыреначальника поставляет,/ и таи́нника неизреченная священноде́йствующа та́инства./ Егóже и ны́не моли́ спасти́ся душам нашим.

Сла́ва, глас 6. Самогла́сен:

Кровию мучения священство украси́л еси́, священномучениче апостоле:/ на криле́ бо святи́лища представ,/ Бо́га Слова проповедал еси́, Творца су́ща всего./ Тем от иудей све́ржен,/ Небесных чертогов сподо́бился еси́, Богобрате Иакове,/ Христа́ Бо́га моли́ спасти́ся душам нашим.

И ны́не, Богоро́дичен: Кто тебе́ не ублажит:

На стихо́вне стихи́ры, глас 1.

Подо́бен: Небе́сных чино́в:

Благоче́ствующих множества,/ ны́не священный праздник радостно совершающе,/ воскликнем вси, верно восхваля́юще во псалме́х и пениих,/ Богобрата днесь и ученика Господня:/ при́сно бо молит спасти́ся нам.

Стих: Во всю землю изыде вещание их/ и в концы вселенныя глаголы их.

Еже по плоти Господня желания, мудре,/ брат показался еси́,/ ученик и самовидец Боже́ственных таин,/ бе́гаяй с Ним и в Египте быв со Иосифом,/ Материю же Иисусовою:/ с Нимиже моли́ спасти́ся нам.

Стих: Небеса поведают славу Божию,/ творение же руку́ Его́ возвещает твердь.

Апостольский лик тебе́ избра́/ священствовати пе́рвее в Сионе святе́м/ Христу́ Благодетелю,/ я́ко суща Того по плоти сро́дством и брата,/ спутешественника и наследника следо́в Того, Иакове.

Сла́ва, глас 8:

Началопа́стыря Христа́ брат был еси́ и преемник/ и во апостолех знамени́т,/ еже за Того умре́ти возлюбил еси́/ и мучения не устыде́лся еси́,/ Иакове славне:/ Того моли́ непрестанно спасти́ души на́ша.

И ны́не, Богоро́дичен:

Влады́чице, приими́ молитвы раб Твоих/ и изба́ви нас/ от вся́кия ну́жды и печа́ли.

Тропа́рь, глас 2:

Я́ко Го́сподень ученик восприял еси́, праведне, Ева́нгелие,/ я́ко мученик и́маши еже неопи́санное,/ дерзновение я́ко брат Божий,/ еже моли́тися я́ко иерарх:/ моли́ Христа́ Бо́га спасти́ся душам нашим.

Сла́ва, и ны́не: Вся па́че смысла:

НА У́ТРЕНИ

На Бог Господь: тропа́рь два́жды.

Сла́ва и ны́не, Богоро́дичен.

По 1-й стихологии седа́лен, глас 1.

Подо́бен: Гроб Твой:

Апостоле Христов, и самовидче, и мучениче,/ Иакове премудре, брате Божий блаже́нне,/ верою празднующия честну́ю твою́́ память/ свободи́ от обдержащих прегрешений моли́твами твои́ми,/ Небеса насле́дуяй силою духа.

Сла́ва, и ны́не, Богоро́дичен:

Купину́, юже Моисей неопа́льну виде,/ го́ру Божию, святый облак, сень нескверную,/ Богоприятную трапе́зу, палату Высокаго Царя,/ всесветлую и непроходимую дверь,/ Де́во, пое́м Тя.

По 2-й стихологии седа́лен, глас 5.

Подо́бен: Собезначальное:

Ученик Словесе́, Истины проповедник,/ я́ко стрела по́слан был еси́,/ просвещая сущия во тьме лю́тей, святе апостоле,/ и безбожия мглу отгоня́ от земли,/ вся благове́рующия сы́ны дне показа́л еси́,/ Христов ви́дче, святе Иакове.

Сла́ва, и ны́не, Богоро́дичен:

Иже упование на Тя, Де́во Пречистая,/ непреткнове́нное иму́ще,/ покров су́щи от различных напастей и обстоя́ний,/ и бед лю́тых свободи́ ны,/ моля́щи Сы́на Твоего́́ со апостолы Его́,/ и спаси́ вся, воспева́ющия Тя.

Оба кано́на Окто́иха, без му́ченичнов. И апостола кано́н на 6. Феофа́ново. Глас 4.

Песнь 1

Ирмо́с: Моря чермну́ю пучи́ну/ невлажными стопами,/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победил есть.

Дая́нию благо́му, Иакове,/ и дару соверше́нну от Отца светов человеком подая́тися, учи́ши я́ве,/ Емуже причасти́тися, апостоле, тя поющим помоли́ся.

Светом просвеще́н, до́блий, Божественнаго Духа/ и с Ним законы изложи́в,/ Церкви управляеши язы́ков, я́ко Христов апостол, священнотаи́нниче всеблаженне.

Лик апостольский, всемудре, я́ве украси́л еси́,/ я́ко первый иерарх быв, самодейством Слова пома́зан я́ко ученик и брат Божий,/ священнопроповедник свяще́ннейший.

Богоро́дичен: Исто́чник Тя исцелений иму́ще,/ почерпа́ем, я́ко Исто́чник рождшую жизни, Богоро́дице Де́во Чи́стая,/ и душ врачевство́, и телес обновле́ние.

Катавасия: Отве́рзу уста моя

Песнь 3

Ирмо́с: Веселится о Тебе́ Це́рковь Твоя́́, Христе́́, зову́щи:/ Ты моя кре́пость, Го́споди,/ и прибе́жище, и утвержде́ние.

Веселится о тебе́ колено Иудово днесь,/ Христовыми светлостьми́ ви́де тя све́тло облистающа.

Звезду Богосия́нну Церковь язы́чная иму́щи тя,/ благославнаго проповедателя,/ и Боже́ственным Светом озаряется.

Закон ты жизни Церкви Христове положил еси́,/ Жизнодательным Духом ты законополагая и вещая.

Богоро́дичен: Егóже родила еси́ плотию, о Богомати,/ из Отца Возсия́вшаго,/ Того, Чи́стая, Иаков я́ко Бо́га всех пропове́да.

Седа́лен, глас 8.

Подо́бен: Прему́дрости:

Сродник по плоти Иисусов был еси́,/ и от Него, апостоле, благода́ть многу приял еси́/ и всем препо́дал еси́ просвещение и разум, всемудре Иакове,/ и и́дольскую лесть из ко́рене исто́ргнув./ Тем, и́же тьмы предстатели и лестцы́, неправедно тя убивают, Спаса пропове́дающа./ Сего ра́ди вопие́м ти:/ моли́ Христа́ Бо́га грехов оставле́ние дарова́ти чтущим любо́вию святу́ю па́мять твою́́.

Сла́ва, и ны́не, Богоро́дичен:

Солнца о́блаче разу́мнаго,/ Божественнаго Света свети́льниче златокова́нный,/ Нескве́рная, Небла́зная, Всенепоро́чная Влады́чице,/ омраче́нную душу мою ослеплением страстей,/ безстрастия заре́ю просвети, молюся,/ и оскверне́нное мое се́рдце омы́й потоки умиления,/ покаяния же слезами и от тиме́ния мя очисти дел моих,/ да любо́вию зову Ти:/ Богоро́дице Приснодево, моли́ Христа́ Бо́га прегрешений оставле́ние пода́ти ми,/ Тебе́ бо имею надежду, раб Твой.

Песнь 4

Ирмо́с: Любве́ ра́ди, Ще́дре, Твоего́́ о́браза,/ на Кресте Твое́м стал еси́,/ и раста́яшася язы́цы:/ Ты бо еси́, Человеколюбче,/ кре́пость моя и хваление.

Ввел еси́ в море Твоя́ ко́ни, апостолы, Спасе,/ и просвети́ша язы́ки, к Твое́му познанию привле́кше, Владыко.

Нескверно, я́ко зерца́ло, я́влься,/ и перводетельныя лучи Несозда́нныя Троицы известно прие́м,/ всем возсиял еси́.

Валяемаго тя ка́меня пророчество освященное зрит/ и сокрушающа прелести гнилое су́етство/ силою Духа.

Богоро́дичен: Вшед, о Богомати, во чрево Твое́ Превечное Слово,/ родивыйся из Отца неизреченно,/ Иакова апостола являет.

Песнь 5

Ирмо́с: Ты, Го́споди, мой свет,/ в мир пришел еси́,/ Свет Святый, обраща́яй из мра́чна неве́дения/ верою воспева́ющия Тя.

Ты, Го́споди, Свет,/ блистание Иакова яви́л еси́ светя́ща/ и земны́я неве́дения и тьмы изменя́юща.

Тя, Го́споди, гласом свобо́дным пропове́да/ праведный брат Твой,/ подражатель же страсти бысть, убиваем.

Кий земны́й ум похвал пения тебе́ принести может,/ доброде́телей просвеще́нному благода́тьми, Иакове.

Богоро́дичен: Тя истинно Боже́ственное обре́т жили́ще,/ вселися, о Де́во, наше спасе́ние, Слово, промышля́я.

Песнь 6

Ирмо́с: Пожру́ Ти со гла́сом хваления, Го́споди,/ Церковь вопие́т Ти,/ от бесо́вския кро́ве очи́щшися,/ ради милости от ребр Твоих/ истекшею Кровию.

Одеждею законною облече́ тя лучшею/ и иерарха являет, Аарона древняго честне́йша,/ и́же милости ра́ди в братство прие́мый тя.

Орга́н, де́йствы ударяемь Духа,/ все помышление наслаждая и Бо́гу привед спасаемыя от рабо́ты люте́йшия,/ был еси́ изря́днейший.

Возжажда́в, жи́зненныя испил еси́ воды́,/ и ре́ки источаеши Богоглаголиваго твоего́ чрева,/ текущия вселе́нней Боже́ственным Духом.

Богоро́дичен: Ева убо преслуша́нием смерть роди́,/ Богородица же, Жизнь заче́нши, роди́ Нестаре́ющуюся/ и древний за всех отдаде́ долг.

Конда́к, глас 4.

Подо́бен: Вознесы́йся:

Отчее Единородное Бог Слово,/ пришедшее к нам в последняя дни,/ Иакове Божественне,/ пе́рваго тя показа́ Иерусали́млян па́стыря и учителя,/ и вернаго строителя та́инств духовных:/ те́мже тя вси чтим, апостоле.

И́кос:

Рождение тя Ио́сифово, Иерусалима перваго иерарха, Иакове Боговидче, и Господня брата/ песньми похвальными воспое́м верно и к тебе́ возопие́м:/ да́руй нам дар соверше́н от Отца све́тов/ и отжени скорбь, настоящую от множества прегрешений,/ поднесо́ша бо врази на ны пя́ту и обступи́ша нас исма́ильтяне,/ ихже сокруши́ вскоре лу́ки, священноявле́нне, я́ко да тя вси почитаем, апостоле.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ нежели пла́менем опаляеми, взыва́ху:/ благословен еси́ в храме славы Твоея́, Го́споди.

Я́ко в пещи́, на го́рнице просвещаемь Боже́ственным пришествием Духа, та́инственно,/ Богоглаголиве, возопил еси́:/ благословен еси́ в храме славы Твоея́, Го́споди.

Свыше дыха́ние зе́льное/ апостола язы́ком огнеобра́зным веща́ти Бо́жия величествия устро́и:/ благословен еси́ в храме славы Твоея́, Го́споди.

Виде́ния деятельнаго излагая дщи́цу,/ от скрижа́ли же, я́ко духовныя, человеки научи́л еси́:/ благословен еси́, Боже мой, зовый, Го́споди.

Богоро́дичен: Возсозда́вый мир во утро́бе Твое́й, Богоневесто,/ Божественнаго служения показует соверши́теля Иакова, взывающа:/ благословена Ты в жена́х, Всенепоро́чная Влады́чице.

Песнь 8

Ирмо́с: Руце распросте́р Даниил,/ львов зия́ния в ро́ве затче́,/ огненную же си́лу угаси́ша,/ доброде́телию препоя́савшеся,/ благоче́стия рачи́тели,/ о́троцы, взыва́юще:/ благословите вся дела Господня Го́спода.

Ру́це распростер крепкия,/ апостолы Твоя́, Спа́се, благословил еси́, восходя, Владыко, к Безначальному Отцу́ Твое́му,/ и устроил еси́ ты́я с веселием вопи́ти:/ благословите вся дела Господня Го́спода.

Я́коже обещался еси́, нело́жно апостолом Твоим Ду́ха послал еси́,/ Сего Иаков, Владыко, све́тлостию просвеща́ем,/ вселенную молниями просвещает я́ве и вопие́т Тебе́:/ благословите вся дела Господня Го́спода.

Мудрость, Иакове му́дре, Ипоста́сную имел еси́ Учи́теля,/ уча́щу тя неизреченным и неизглаго́ланным тайнам,/ и к благочестию люди зва́ти воздвигл еси́:/ благословите вся дела Господня Го́спода.

Богоро́дичен: Го́ру явле́нну мысленную, Де́во Чи́стая, пророк виде Тя,/ из Тебе́ бо пречестны́й Камень отсече́ся,/ спасая вселенную воистину, Боже́ственно поющую:/ благословите вся дела Господня Го́спода.

Песнь 9

Ирмо́с: Камень нерукосечный/ от несеко́мыя горы Тебе́, Де́во,/ краеугольный отсече́ся,/ Христос, совокупи́вый разстоя́щаяся естества:/ тем, веселя́щеся, Тя, Богоро́дице, величаем.

Приидите, первопрестольника вси, Це́ркве свети́льника,/ священными, Иакова, пе́сньми, я́ко иерарха и Христопроповедника,/ тезоименне праведнаго именова́нна, величаем.

Божественнаго о́бщника, я́ко я́вльшася Безконечнаго Царствия,/ и Бо́жия нарече́нна брата,/ и житие́м и́стинствующа, именова́ние прие́мша,/ священнотаи́нника тя величаем, Иакове.

Престо́лу предстоя́, блаже́нне, венценосец Троицы,/ верою почитающих твою́́ память, нетлеющих наслади́тися че́стей,/ я́ко иерарх, Иакове, благоприятен,/ твоего́ Владыку умоли.

Богоро́дичен: Ты, от Девы Рожде́ннаго неискусобра́чно, Богоявле́нне,/ учении твои́ми я́ве чести́ Бо́га научаеши, Воплощенное Слово,/ в Негoже мы верующе ны́не, досто́йно величаем.

Свети́лен.

Подо́бен: Духом во святи́лищи:

Я́ко Господня брата бывша, блаже́нне Иакове Богодохновенне,/ ве́рнии по долгу хвалим тя,/ сла́вяще светлую и всечестную, и светоносную твою́́ память:/ моли́ся прилежно за чту́щих тя.

Сла́ва, и ны́не, Богоро́дичен:

Молитвенницу Тебе́ приводим и теплую Предстательницу,/ Чистую Матерь Твою́, ве́рнии, по до́лгу:/ сподо́би рабы Твоя́ причаститися славы Твоея́, и праведных ча́сти,/ и сладости райския, и улучи́ти нам Небесное Царствие.

На хвалитех стихи́ры на 4, глас 8.

Подо́бен: Го́споди, аще и на судищи:

Го́споди, а́ще и на криле́ предста́ святи́лища Иаков,/ но, дерзнове́нием возопив, Бо́га Слова Тя пропове́да,/ Соде́теля всех, в мир пришедшаго:/ Егóже моли́твами и ны́не подаждь просвещение душам нашим.

Го́споди, аще и дре́вом глава́ апостолова сокруше́на бысть,/ но в раи́ древо жизненное ему даде́ся/ и, от привременных отреши́вся, вечно веселится:/ егóже моли́твами Це́рквам мир Твой низпосли́.

Го́споди, Тя испове́дав на земли́ до́блественне, брат Божий,/ Сы́на Бо́га Вы́шняго, искренно приснопамятный,/ злославныя враги посрами́ и укроти́:/ сего ради и пострадав, Тебе́ предстои́т, радуяся.

Го́споди, аще и сверго́ша иудеи с высоты́ праведнаго,/ но Небесных черто́гов с веселием сподо́бися,/ и в пи́щи наслаждения досто́йно весели́тся:/ тем у́бо подае́ши мир душа́м на́шим.

Сла́ва, глас 1. Византи́ево:

Во о́гненней зари́ Божественнаго Ду́ха просвети́вся,/ благоче́стия яви́лся еси́ Боже́ственный ревни́тель,/ бра́те Божий Иакове./ Тем и оде́ждею тя законнаго священства,/ я́ко Аарона древняго, честнейшею оде́я,/ и́же милосердия ради в братство тя прие́мый./ Того моли, апостолов похвало́,/ спасти́ся душа́м на́шим.

И ны́не, Богоро́дичен. Славосло́вие великое, и отпу́ст.

НА ЛИТУРГИ́И

Блаженна от кано́на апостола, песнь 3 и 6. Проки́мен, глас 8: Во всю землю изыде вещание их. Стих: Небеса поведают славу Божию: Апостол к Галатом, зача́ло 200. Аллилуия, глас 1: Исповедят Небеса чудеса́ Твоя́, Го́споди. Ева́нгелие от Матфе́я, зача́ло 56. Причастен: Во всю землю изыде вещание их:

Святой Иаков, апостол от 70-ти

ВЕ́ЧЕР

Блажен муж: На Го́споди, воззвах: стихи́ры, глас 5.

Подо́бен: Ра́дуйся:

Ра́дуйся, Великий Но́вграде,/ красу́йся и лику́й, Церковь Бо́жия,/ днесь бо свети́ло великое нам явися,/ многоцеле́бныя мо́щи блаженнаго Иакова,/ и мир весь просвеща́ют Богодарованными чудесы́,/ я́ко источник неисчерпаемый показа́шася,/ и я́ко струи́ точа́т исцеления/ верою приходя́щим к блаженным моще́м его:/ да́рует бо здра́вие неоску́дно,/ боля́щим во гресе́х великое врачева́ние,/ и Христа́ мо́лит дарова́ти душа́м нашим мир и ве́лию ми́лость.

Ра́дуйся, Богому́дре о́тче Иакове,/ твоя́ бо мо́щи всечестны́я и святыя/ оби́льно всегда источа́ют исцеления верно приходя́щим,/ благоуха́ния всех исполня́юще духовнаго/ и тьму демонскую далече отгоня́юще./ Темже мо́лим тя, раби́ твои́,/ всякаго наве́та вра́жия нас изба́вити:/ я́ко да радостною душею и чистым сердцем,/ святое твое́ пренесе́ние духовно пра́зднующе,/ мо́лимся дарова́ти душа́м нашим мир и ве́лию ми́лость.

Ра́дуйся, премудре о́тче Иакове,/ А́нгельское на земли житие́ пожи́л еси́,/ ду́хови плоть повину́л еси́,/ пощением же и воздержа́нием свет ми́рови яви́лся еси́,/ украси́лся бо еси́, блаже́нне,/ и Святе́й Троице оби́тель себе соде́лал еси́,/ и дарова́ния чуде́с от Нея сподо́бися/ исцеля́ти различныя неду́ги/ приходящим с верою к моще́м твои́м, и пра́зднующим святое пренесе́ние./ Моли́ дарова́ти душа́м нашим мир и ве́лию ми́лость.

Сла́ва, глас 4:

Преблаженне о́тче наш Иакове,/ благода́тию Божественнаго Духа/ обильно всегда источа́еши исцеления/ с верою приходя́щим к мощем твои́м,/ ю́же прия́л еси́ от всех Царя Христа́ Бога./ Егóже де́телию ду́хи лукавыя от человек отгоня́еши,/ исцеля́еши стра́сти неисце́льныя/ и просвещаеши верных сердца́ блистанием чудес твои́х./ С Вы́шними же ли́ки ны́не на Небесех водворя́ешися, Богому́дре,/ и ра́дости неизрече́нныя наслажда́ешися./ Темже днесь пра́зднующе пренесение твое́,/ моли, мо́лим тя, моли́твами твои́ми/ дарова́ти нам пособие на враги/ и мир ми́рови испроси́,/ належа́щих нам скорбе́й душевных и телесных страсте́й/ свободи́ моли́твами твои́ми.

И ны́не, Богоро́дичен: И́же тебе́ ради:

Вход. Проки́мен дне. И чтения три преподо́бническая.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На лити́и стихи́ры, глас 4. Самогласны:

Приидите, ве́рнии, хвала́ми, соше́дшеся,/ ны́не соста́вим торжество в честне́м пра́зднице/ честна́го пренесения блаженнаго Иакова,/ духовно пра́зднующе,/ к нему возопие́м:/ моли́, мо́лимся, нам победите́льная на враги дарова́ти,/ тебе́ бо молитвенника ко Влады́це те́пла стяжа́хом,/ подающаго мирови ве́лию ми́лость.

Возсия́́ днесь пресветлая па́мять твоя́, Богому́дре Иакове,/ созыва́ющи ны празднолю́бцы к похвале́нию/ и сла́ве Христа́ Бо́га нашего./ Тем, притека́юще к моще́м твои́м,/ исцеления дар прие́млем,/ и тебе́, прославльшаго Спаса Христа, воспевае́м во веки,/ непрестанно сла́вяще.

Отче преблаже́нне Иакове,/ днесь любо́вию соше́дшеся к тебе́,/ све́тло торжеству́юще гла́сы пе́сненными,/ псаломски вопию́ще, глаголем:/ блажен муж, бояйся Го́спода,/ непоро́чно бо в за́поведех Господних ходи́л еси́,/ те́мже ны́не с пра́ведными на Небесех водворя́ешися,/ с ни́миже моли́ся Го́сподеви спасти́́ся душа́м на́шим.

Сла́ва, глас 4:

Духовною благода́тию отъе́млеши неду́ги страсте́й/ и отго́ниши ду́хи лука́выя,/ и исцеля́еши стра́сти неисце́льныя, Иакове всеславне,/ и просвещаеши сердца́ верных блиста́нии чудес твои́х./ Темже днесь гла́сы немо́лчными воспева́ем/ пресве́тлую и светоносную па́мять твою́́.

И ны́не, Богоро́дичен: При́зри на моления:

На стихо́вне стихи́ры, глас 8.

Подо́бен: О, преславнаго чудесе́!

О, пресла́вное чу́до!/ Божиим манове́нием рака твоя́, блаже́нне,/ на кре³¹ пришедши, ста недви́жимо,/ ве́рнии же лю́дие, обретше тя, радостию и любо́вию прие́мляху./ Моли́твами Твоего́́ уго́дника, Христе́́ Боже,/ спаси́ ду́ши на́ша я́ко Милосерд.

Стих: Честна́ пред Го́сподем/ смерть преподо́бных Его́́.

О, пресла́вное чудо!/ Сиянием Ду́ха Пресвята́го просвещаеши весь мир,/ притекающих к моще́м твои́м Богому́дре Иакове./ Темже, ве́рнии, сошедшеся в твое́ пренесение, Го́сподеви вопие́м:/ Иисусе Царю, спаси́ ду́ши на́ша я́ко Милосерд.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О, пресла́вная и́стинная чудеса́ блаженнаго Иакова!/ Како возмо́жем похвали́ти или ясно изглаго́лати,/ подае́т бо различная исцеле́ния/ не то́кмо притека́ющим к мощем его,/ но и везде́ призывающим имя его,/ никогда́же ску́дны своих чуде́с оставля́ет./ И ны́не моли́ся, блаже́нне Иакове,/ дарова́ти нам ве́лию ми́лость.

Сла́ва, глас 6:

Возсия́́ днесь пресветлое торжество́,/ о́тче Богому́дре Иакове,/ ты бо от младе́нства Бо́гу прилепи́лся/ и Того стопа́м последовал еси́,/ мирски́й мяте́ж, а́ки ну́ждное волне́ние, преплы́л еси́,/ и ны́не на Небесех царствуеши./ Мы же, покланя́ющеся моще́м твои́м,/ верно от души Христа́ славосло́вим,/ давшаго нам тебе́, те́пла молитвенника к Бо́гу:/ к Нему́же о нас моли́ся,/ чту́щих и верно пра́зднующих твое́ пренесе́ние,/ спасти́ся душа́м нашим.

И ны́не, Богоро́дичен: Творе́ц и Изба́витель мой:

Тропа́рь, глас 1:

Боже́ственною благода́тию просвети́вся,/ и по смерти да́руеши исцеле́ние/ притека́ющим к тебе́, премудре Иакове:/ те́мже и мы ны́не чтим честны́х моще́й твои́х пренесе́ние,/ веселяще вку́пе ду́ши и телеса́./ Тем вси вопие́м:/ Сла́ва Давшему ти кре́пость!/ Сла́ва Венча́вшему тя!/ Сла́ва Де́йствующему тобо́ю всем исцеления!

Сла́ва, и ны́не. Богоро́дичен: Гаврии́лу вещавшу:

НА У́ТРЕНИ

По 1-м стихосло́вии седа́лен, глас 4.

Подо́бен: Явился еси́:

Пресветлую твою́́ па́мять днесь торжествующе,/ Спаса и Го́спода моли́ти прилежно/ тя молим, о́тче Иакове,/ всем пода́ти согрешений прощение.

Сла́ва, и ны́не, Богоро́дичен:

Теплое заступление сущим в беда́х, и Помощницу нашу, и к Бо́гу пременение,/ Еюже тли изба́вихомся,/ Богоро́дицу ве́рнии ублажаем.

По 2-м стихосло́вии седа́лен, глас 1.

Подо́бен: Лик А́нгельский:

Житие́́ на земли благоче́стно скончав,/ прия́телище Ду́ха Свята́го явился еси́,/ просвещая к тебе́ верою притека́ющия, блаже́нне./ Темже моли́ Владыку и Го́спода/ просвети́ти ду́ши на́ша, воспева́ющих тя,/ Иакове Богоблаженне, о́тче наш.

Сла́ва и ны́не, Богоро́дичен:

Всех Творца и Го́спода, и Зижди́теля,/ Всенепоро́чная, Чи́стая,/ Духом Боже́ственным в ложесна́х заче́нши,/ без истления родила́ еси́,/ Егóже славяще, Тя воспеваем, Де́во,/ я́ко палату всех Царя и ми́рови спасе́ние.

По Хвали́те Имя Господне: припев:

Ублажаем тя,/ святый праведный Иакове,/ и чтим святу́ю па́мять твою́́,/ ты бо молиши за нас/ Христа́ Бо́га нашего.

Псалом избранный: Терпя потерпех Го́спода:

По полиеле́и седа́лен, глас 8.

Подо́бен: Прему́дрости:

Плотски́я страсти воздержа́нием, отче, увяди́л еси́/ и благода́ть духо́вную восприя́л еси́,/ тем и сосу́д достоин был еси́,/ и по кончине явился еси́, страсти очищая,/ о́тче Иакове, моли́ Христа́ Бога,/ грехо́в оставле́ние дарова́ти,/ честву́ющим любо́вию святое твое́ пренесе́ние.

Сла́ва, и ны́не, Богоро́дичен:

Я́ко Де́ву и Едину в жена́х,/ Тя, без се́мене ро́ждшую Бо́га плотию,/ вси ублажа́ем, роди человече́стии,/ Огнь бо вселися в Тя Божества́́,/ и я́ко Младенца дои́ши Зижди́теля и Го́спода./ Тем А́нгельский и человеческий род/ досто́йно сла́вим пресвятое Рождество Твое́ и согласно вопие́м Ти:/ моли́ Христа́ Бога/ согрешений оставле́ние дарова́ти покланя́ющимся верою пресвято́му Рождеству Твое́му.

Та́же степе́нна, 1-й антифо́н 4-го гла́са. Проки́мен: Честна́ пред Го́сподем: Стих: Что возда́м Го́сподеви: Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, вси лю́дие,/ хвалу́ принесем блаженному, вопию́ще:/ радуйся, пресветлый сто́лпе,/ просвеща́яй нас чудес светлостьми́./ Ра́дуйся, росоно́сный облаче,/ пла́мень погашающь страсте́й и орошающь верных мысли./ Ра́дуйся, моляйся Христу,/ еже пода́ти воинству на́шему победы на пога́ныя враги/ и умири́ти мир, и спасти́ ду́ши на́ша.

Канон Богоро́дицы, со ирмо́сом на 6. И свята́го кано́н на 8. Егóже краегране́сие по алфавиту до девятыя песни: Совершен же списавшаго именем. Глас 5.

Песнь 1

Ирмо́с: Спаси́телю Бо́гу,/ в мо́ри люди немо́крыми ногами наста́вльшему/ и фараона со всево́инством пото́пльшему,/ Тому Единому пои́м, я́ко просла́вися.

Агнче Божий, Слове, даждь ми слово недостойному Твое́му рабу,/ да возмогу́ воспе́ти в па́мять пренесения моще́й блаженнаго Иакова торжество, взывая:/ Тому Единому воспоим, я́ко прославися.

Безвестная и тайная последнему роду явле́на быша честныя мо́щи твоя́́, премудре Иакове,/ к ни́мже прикасающеся, освящение прие́млем, Го́сподеви поюще:/ Того Единаго воспоим, я́ко прославися.

Всесвятая твоя́ па́мять возсия́ ми́рови, я́ко солнце, просвещая ду́ши благоче́стно пою́щих тя,/ в нейже моли́ся,блаженне, пода́ти очищение грехов Го́сподеви зовущим:/ Того Единаго воспоим, я́ко прославися.

Богоро́дичен: Господороди́тельнице Чи́стая, Небесный вхо́де,/ горо́ несеко́мая, дверь непроходи́мая,/ апостолом сла́ва, мучеником веселие, преподобным красота,/ приими́ моление наше, еже Ти приносим/ в па́мять блаженнаго Иакова, Го́сподеви поюще:/ Того Единаго воспоим, я́ко прославися.

Катавасия: Отверзу уста моя:

Песнь 3

Ирмо́с: Водрузи́вый на ничесо́мже зе́млю повелением Твоим/ и пове́сивый неодержи́мо тяготе́ющую/ на недви́жимем, Христе́, ка́мени заповедей Твоих,/ Церковь Твою́ утверди, Едине Блаже и Человеколюбче.

День пра́зднственный днесь празднуют наро́ди Великаго Нова́гра́да,/ обрето́ша бо мощи блаженнаго Иакова, я́ко некое сокровище бога́тно,/ непрестанно Христу́ зовуще:/ Церковь Твою́ утверди, Едине Блаже и Человеколюбче.

Естество́ тле́нное нивочто́же вмени́в,/ житие чистое на земли пожи́л еси́/ и сего ради наследовал еси́ Небесное селение./ Моли и нам получити та́мошнее блаженство, празднующим твое́ пренесение,/ да непрестанно Христу́ зовем:/ Церковь Твою́ утверди, Едине Блаже и Человеколюбче.

Житие́ твое́, я́ко солнце, в сердца́ верных возсия́, зарю́ чуде́с испуща́я,/ те́мже и нас невече́рним Светом озари́, всечестное твое́ пренесение почитающих,/ да непрестанно Христу́ зовем:/ Церковь Твою́ утверди, Едине Блаже и Человеколюбче.

Богоро́дичен: Зело́ лю́те погружа́емую ду́шу мою в пучи́не житейских страстей/ и бу́рею одержи́мую безме́рных согрешений,/ спасения ми простри́ ру́ку, Пречистая, и изведи из глубины́ зол моих,/ да, радуяся, сла́влю Тя, Всенепорочную.

Седа́лен, глас 5

Пресветлая и светоносная, о́тче Богому́дре Иакове,/ приспе́ твоя́ память, созывающи верных множество/ прославити и пети твое́ честно́е пренесение,/ просим от Христа́ прияти велию ми́лость.

Сла́ва и ны́не, Богоро́дичен:

Яви́лася еси́ вы́шши Небесных сил,/ Владыку и Го́спода рождши, Богоро́дице:/ земны́х естество возвела еси́, Богоневестная./ Темже Тя, вои́стинну, Богородительнице,/ сердцем и душе́ю ве́рнии сла́вим.

Песнь 4

Ирмо́с: Дела́ смотре́ния Твоего́, Го́споди,/ ужаси́ша пророка Аввакума:/ изше́л бо еси́ на спасе́ние людей Твоих,/ спасти́ пома́занныя Твоя́́ пришел еси́.

Зе́млени бо есмы́ и пе́рстни челове́цы,/ верно припа́даем к пречестны́м моще́м твои́м, блаже́нне Иакове, прося́ще отпуще́ния грехов:/ моли́ся о верно празднующих твое́ честно́е пренесение.

Иже крест взем, блаже́нне, и желаемаго ти отечества достиг, Горняго Иерусалима,/ и в нем со А́нгелы лику́еши, Иакове премудре:/ моли́ся о чту́щих твое́ честно́е пренесение.

Ны́не на Небесе́х с праведными весели́шися, преблаже́нне Иакове,/ с нимиже моли́ся, Христу́ предстоя́, мир ми́рови дарова́ти/ и благочестивому народу на́шему здравие, и на враги побеждение,/ и всем скорбя́щим утеше́ние.

Богоро́дичен: Кто не удиви́тся или кто не почуди́тся человеколюбию Божию,/ сшед бо с Небесе́ и воплоти́ся нас ради из Тебе́ без Отца, Едина Всепетая:/ Егóже моли́ изба́витися рабо́м Твоим от всякия скорби.

Песнь 5

Ирмо́с: Окая́нную душу мою, нощеборю́щуюся со тьмою страсте́й,/ предвари́в, уще́дри/ и возсияй, мысленное Солнце, днесве́тлыя звезды́ во мне,/ во еже раздели́ти нощь от света.

Любовию чту́ще твое́ пренесение, прилежно тя молим, премудре Иакове,/ не преста́й моля́ся Христу́ Бо́гу,/ да прии́мем грехов просты́ню и да озари́т нас в нощи́ свет.

Множество народа Великаго Нова́гра́да, сошедшеся днесь в твое́ пренесение, блаже́нне Иакове,/ и прикаса́ющеся честны́м моще́м твои́м, от них исцеления почерпа́ем, непрестанно зову́ще:/ да озарит нас в нощи́ свет.

Не то́кмо в житии сый, но и по смерти мно́га чудеса/ от честныя ти раки содева́ются приходящим с верою, всеблаженне Иакове,/ неду́ги прогоняеши и от бед избавляеши силою Христовою./ К Нему́же непрестанно зовем:/ да озарит нас в нощи́ свет.

Богоро́дичен: Он, вселукавый, по вся дни к го́ршим влече́т мя,/ и в ров погибели влага́ет, и во отчаяние мя влече́т;/ но того мя ловле́ния, Чи́стая, исхи́ти,/ и творити волю Божественную Сы́на Твоего́́ и Бо́га на́шего настави,/ и в час страшнаго пришествия Его́ избави мя всякаго осуждения.

Песнь 6

Ирмо́с: Обы́де мя бездна,/ гроб мне кит бысть:/ аз же возопих к Тебе́, Человеколюбцу,/ и спасе́ мя десни́ца Твоя́, Го́споди.

Прииди́те, соберитеся, Великаго Нова́гра́да народи,/ све́тло празднуем пренесение моще́й блаженнаго Иакова,/ мо́лится бо ко Влады́це и Бо́гу нашему, да избавит нас от всякаго озлобле́ния,/ к Нему́же, воспева́юще, глаголем:/ спасе́ нас десни́ца Твоя́, Го́споди.

Ра́ка мощей твои́х, премудре Иакове, дража́йши сапфира показася,/ чудотвори́ва бо бе, исцеле́ния источа́ющи./ Тя ублажающе́, ве́рнии радостно от души Христу́ зове́м:/ спасе́ нас десни́ца Твоя́, Го́споди.

Светлыми сиянии обрето́шася на кре честны́я твоя́ мо́щи, Иакове пречудне,/ ны́не, аки заря пресветлая, просвещают и освещают чту́щих тя верно/ и радостно от души Христу́ зову́щих:/ спасе́ нас десни́ца Твоя́, Го́споди.

Богоро́дичен: Тебе́, Чистую Де́ву Нескве́рную,/ Едину и́мам сте́ну непреобори́му,/ прибежище и покров кре́пок и оружие спасения,/ да мя не пре́зриши окаяннаго,/ надежда ненадежным, скорбя́щим радость и заступление.

Конда́к, глас 8.

Подо́бен: Взбранной:

Верою и любовию/ твое́ честно́е пренесение пра́зднующих, блаже́нне,/ сохрани и соблюди от всякия зло́бы и соблазна змии́на,/ и́маши бо дерзновение ко Влады́це всех, Христу́ Бо́гу./ Eгoже моли́ спасти́ православныя люди,/ молящия тя, да вси вопие́м ти:/ радуйся, о́тче Иакове,/ всея Российския земли удобрение.

И́кос:

Ангел на земли житием показався,/ А́нгелы удивил еси́, бесы же устраши́л еси́,/ и человеки просветил еси́ заря́ми чудес твои́х, Богоносе и преблаже́нне, о́тче наш Иакове./ И ны́не нас вразуми́ воспевати песнь к твое́му хвалению,/ радостным гла́сом си́це глаго́лющих:/ радуйся, оста́вивый тле́нное мудрова́ние и прие́мый нетленный венец;/ радуйся, терпеливый душею, и́же злокозненнаго врага под нога́ми стерл еси́;/ радуйся, ни́жнее мудрование оставль и Вы́шняго Царствия достиг;/ радуйся, цели́телю болезней и отгони́телю страсте́й;/ радуйся, о́тче Иакове, всея Российския земли удобрение.

Песнь 7

Ирмо́с: Огня гаси́лище, отроко́в моли́тва,/ орошающая пещь проповедница чудесе́,/ не опаля́ющи, ниже́ сожига́ющи/ песносло́вцы Бо́га отец на́ших.

Уста́ви ны́нешнюю бурю, обдержащую нас, блаже́нне,/ и укроти́ моли́твами твои́ми,/ и варварское нахождение низложи́,/ и нас, раб твои́х, на сопостаты укрепи, да, радующеся, поем:/ Боже, благосло́вен еси́.

Фарисейски не лицеме́руем, но, со смирением и радостию прикасающеся к мощем твои́м, премудре Иакове,/ просим прощения грехов, Христу́ от души вопиюще:/ Боже, благословен еси́.

Храни́тель бу́ди великия России, христолюби́вому народу нашему, Богому́дре Иакове,/ сохраняяй от пога́ных нашествия и междоусобныя бра́ни, гла́да же и па́губы,/ да моли́твами твои́ми изба́вльшеся, радостно от души Христу́ зове́м:/ Боже, благословен еси́.

Богоро́дичен: Отчаявшимся еси́ ве́лие прибежище, обуреваемым тихое пристанице еси́, Богоро́дице./ Темже и мы, припа́дающии, да не постыдимся, Ма́ти Истиннаго Живота, Тебе́ благодаря́ще и пою́ще:/ благословенна Ты в жена́х, Всенепоро́чная Влады́чице

Песнь 8

Ирмо́с: Ороси́вшаго пещь и отроки сохра́ншаго посреде́ горящаго пла́мене,/ о́троцы, славосло́вите,/ священницы, благослови́те,/ лю́дие, превозноси́те во вся ве́ки.

Молитвенника тя тепла стяжавше и скораго помощника,/ и я́ко сте́ну тве́рду, и забра́ло недвижи́мо и необурева́емо,/ не забу́ди молитвенник твои́х, избавляй нас от всякия ну́жды и печали, да, радующеся, Христу́ зове́м:/ лю́дие, превозносите Его́ во веки.

Чудес источник мо́щи твоя́ явися, Иакове преблаже́нне,/ от нихже обильно вси притекающии приемлют телесе́м здравие и душа́м спасе́ние твои́ми моли́твами,/ да, радующеся, Христу́ зовем:/ лю́дие, превозноси́те Его́ во веки.

Шествие твое́ до́бре скончал еси́ и мирски́й мяте́ж, аки безбурное пристанище, преплы́л еси́,/ и А́нгельски на земли пожи́л еси́, плоть твою́́ ду́хови повину́л еси́./ И ны́не на Небесех предстоя всех Царю Христу,/ поминай чту́щих твое́ пренесение, Емуже зовем:/ лю́дие, превозноси́те Его́ во веки.

Богоро́дичен: Щедраго и Человеколюби́ваго Спаса рождши, Чи́стая,/ Того моли́ уще́дрити раба Твоего́́ и к пока́яния пути́ настави,/ лукаваго соблазны от се́рдца моего отжени́, и того́ изба́ви ловле́ния,/ и огня́ вечнаго исхити́,/ я́ко да непрестанно пою Тя, Чистую, во вся ве́ки.

Песнь 9

Ирмо́с: Иса́ие, лику́й,/ Дева име́ во чреве и роди́ Сы́на Емману́ила,/ Бо́га же и Человека, Восток Имя Ему,/ Eгoже величающе, Де́ву ублажаем.

Исто́чник исцеления испуща́я, врачевание же безме́здно,/ ковчег священия твои́х мо́щей рака явися:/ от нихже почерпа́ем здравие присноживо́тное, притека́ющии верно, блаже́нне Иакове,/ и тебе́ Даровавшаго в пе́снех величаем.

Возвели́чил еси́ на земли́ твоего́ Владыку,/ тем и в твое́ пренесение глубину́ чудес показа́ и струю́ неоскудева́ему, раку моще́й твои́х, Иакове премудре,/ слепым еже ви́дети дарова́ся, прокаженным очище́ние/ и одержи́мыя нечистыми ду́хи целому́дренны твори́ши./ Темже тя величаем.

Недостойною моею рукою принесо́х ти таковое сло́ва изви́тие, Богомудрый Иакове,/ не пре́зри, но приими́ сие́ с любо́вию и моли́ за мя Творца, твоего́ Владыку и Го́спода/ та́мошняго мя изба́вити мучения и ми́лость обрести́ в день страшнаго испыта́ния.

Богоро́дичен: Влады́чице мира, Богоро́дице,/ во глубине́ зол поги́бели мене, погруже́ннаго злоу́мно сластьми́ плотски́ми,/ и пристра́стием вещьми́ жития́,/ изведи́, Пресвята́я Де́во, Твоим милосердием,/ ибо не и́мам надежды:/ весь бо есмь, Чи́стая, во отчаянии, да Тя непрестанно величаю.

Свети́лен.

Подо́бен: Жены́, услышите:

Я́коже солнце облиста́я, чудеса́ испуща́еши, просвещая верных сердца́,/ твое́ славное пренесение верно творя́щия спасай, Богому́дре Иакове, о́тче наш.

Сла́ва, и ны́не, Богоро́дичен:

Тя Предстательницу и́мамы гре́шнии, о Пресвята́я Де́во!/ Ты благопреме́нна сотвори Сы́на Твоего́́ и Бо́га нашего/ Ма́терними Твоими моли́твами.

На хвалитех стихи́ры на 4, глас 4.

Подо́бен: Я́ко до́бля:

Прииди́те, ве́рнии, хвала́ми соше́дшеся,/ ны́не составим торжество,/ в честне́м пра́зднице честна́го пренесения блаженнаго Иакова/ духовно пра́зднующе, к нему возопиим:/ моли, молимся, нам победи́тельная на враги дарова́ти,/ тебе́ бо ко Влады́це те́пла молитвенника стяжа́хом,/ подаю́щему ми́ру ве́лию ми́лость.

Возсия́́ днесь пресветлая па́мять твоя́,/ Богому́дре Иакове,/ созывающи ны, празднолю́бцы,/ к похвалению и сла́ве Христа́ Бо́га нашего./ Тем притека́юще к моще́м твои́м исцеления дар прие́млем/ и тебе́ прославльшаго Спаса Христа́ воспеваем во веки,/ непрестанно сла́вяще.

Отче преблаже́нне Иакове,/ днесь любо́вию сошедшеся к тебе́ чудотворцу,/ све́тло торжеству́юще,/ гла́сы пе́сненными псаломски вопию́ще, глаголем:/ блажен муж, бояйся Го́спода,/ непорочно бо в заповедех Господних ходил еси́./ Темже ны́не с праведными на Небесех водворя́ешися;/ с нимиже моли́ся Го́сподеви/ спасти́ся душа́м нашим.

Сла́ва, глас 6:

Прииди́те, вси Великаго Нова́гра́да народи,/ сошедшеся, возвеличим Христова рачи́теля:/ сей бо измла́да покори́ плоть духу/ и по Господним стопа́м изво́ли ходити,/ на земли́ жесто́ко житие показа́./ А́нгелы убо удиви́, демоны же устраши́ и человеки просвети́./ К немуже си́це рцем:/ радуйся, терпеливый душе́ю,/ и́же оставив тленное мудрова́ние и прием нетленный венец./ Ра́дуйся, свети́льниче многосве́тлый и к Бо́гу молитвенниче теплый,/ и́же злоко́зненнаго врага до конца под нога́ми стерл еси́;/ радуйся, Иакове предивный, Небесный человече, земный А́нгеле,/ и ны́не на Небесех у Престола предстои́ши Всецаря Христа,/ к Нему́же за ны моли́ся,/ верою и любо́вию пра́зднующия твое́ честно́е пренесение,/ спасти́ся душа́м нашим.

И ны́не: Богоро́дице, Ты еси́ лоза: Славословие великое.

Праведный Иаков Боровичский, Новгородский, чудотворец