В 22-й день

Празднование Пресвяте́й Богоро́дице ради Каза́нския иконы Ея

В той же день. Свята́го равноапостольнаго Аве́ркия, епископа Иерапо́льскаго, чудотворца и святых седми отроко́в, иже во Ефесе

Преподобных Фео́дора и Па́вла Ростовских

НА МА́ЛОЙ ВЕЧЕ́РНИ

На Го́споди, воззва́х: стихиры на 4, глас 1.

Подо́бен: Небесных чинов:

Небесныя Силы радуются,/ преславно служа́ще чу́дныя иконы Богоматере,/ и к веселию земны́я духом призывают,/ спасение ми́рови сию показу́ют// и всей стране Российстей твердое ограждение и заступление.

Твоего, Владычице, явления непостижимаго,/ тре́петни бывше людие,/ вку́пе же и радостни,/ я́ко чудесе́м сокровище, пречистый Твой образ яви́ся,/ благодатию просвеща́ющ всяческая/ и от бед избавля́ющ присно.

С преславными чинми Ангельскими днесь,/ ве́рнии, духо́вне весели́мся,/ све́тло празднующе пресветлое торжество Богоматере,/ Юже пречистый Ея образ, я́ко источник приснотеку́щий, явися,/ исцелений незави́стныя дары присно источа́ющ.

Сла́ва, и ны́не, глас 3:

Страшно чудо явления Твоего, Владычице,/ и несказанно удивляет Преми́рная и ужаса́ет земна́я,/ вкупе же и просвещает светоно́сною благодатию пречистаго Твоего образа/ и рождшагося от Тебе́ Христа Бога нашего./ Того моли, Чистая, в Божественнем торжестве Твое́м/ подати нам просвещение и велию милость.

На стиховне стихиры, глас 2.

Подо́бен: Доме Евфрафов:

О Всенепорочная Дево,/ что Ти благодарение принесе́м,/ я́ко светоза́рным явлением пречистыя Твоея́ иконы и Превечнаго Младенца/ всех от неведения к свету Богоразу́мия возвела́ еси.

Стих: Помяну имя Твое́/ во вся́ком роде и роде.

О Пресвятая Госпоже Владычице,/ не забу́ди нас, Твоих раб,/ верно покланя́ющихся чудотворной Твое́й иконе/ и благочестно воспева́ющих Тя,/ изба́ви, Госпоже, от всяких бед и напастей.

Стих: Лицу Твое́му помо́лятся/ богатии лю́дстии.

О Всепетая Мати,/ умилосе́рдися на моление наше,/ Твое́ бо есмы достояние,/ всех спаси́ и помилуй,/ да Тя вси ро́ди непрестанно величаем.

Сла́ва, и ны́не, глас и подобен тойже:

Тихое пристанище/ обитель Твоя, Богоневесто,/ явися всем притекающим,/ иму́ще в себе пречестную Твою́ икону,/ всем неоскудно благодать подающи.

Тропа́рь, глас 4: Заступнице усердная: (зри на велицей вечерни).

НА ВЕЛИ́ЦЕЙ ВЕЧЕ́РНИ

Блажен муж: На Го́споди, воззвах: стихиры на 8, глас 4.

Подо́бен: Я́ко до́бля:

Я́ко прекрасная Сло́ва палата/ и Престол Светоноси́вый, Богородице Владычице,/ Сопресто́льное Слово Отчее во Твоих ложесна́х вмести́ла еси/ и, рождши Свет незаходимый, наше омрачение просветила еси,/ лесть змии́ну отгна́ла еси и тление потребила еси,/ жизнь вечную миру дарова́ла еси Твоим Рождеством,/ врата рая́ отве́рзла еси/ и вся благая человеческому естеству дарова́ла еси./ Но и ны́не, Госпоже, Твоими моли́твами/ избавляй рабы Твоя от всех бед.

Я́ко вели́ка сущи Царица и Мати/ на Небеси Превысоких Сил Царя,/ пречистыя Твоя ру́ки просте́рши,/ молебно за ны предстои́ши/ и на земли́ я́ко державная Помощница/ Божественною Твое́ю иконою/ и духом с Твоими рабы пребываеши,/ и весело спаса́еши, и избавля́еши от всякия напасти/ благочестно Богородицу Тя испове́дающия.

Я́ко златоза́рный рай/ и место прекрасное и Богопросвеще́нное,/ и древо святое, Духом Святым осене́нное,/ вместилище Света невечерняго,/ Тебе́ ве́дущим,/ ясно немерца́ющися Божественною луче́ю,/ Младенцем Твоим, све́тиши всей твари,/ Eгoже моля́щи, Царице Богородице,/ спаси́ град Твой и люди,/ к Тебе́ прибега́ющия, от всех бед.

Я́ко порфи́рою царскою и ви́ссом,/ иконою Твое́ю и Твоего Сына, Богородице,/ Церковь Божия просвети́вшися, красу́ется чудесы́./ Днесь явлением вся созывает праздновати,/ па́че сияния солнечнаго благодатию Свята́го Духа блиста́ющися,/ на болящих и неду́жных исцеления источники источа́ющи/ и всем да́рующи богатую милость.

Ины стихиры, глас 8:

Высокий Царю Непостижимый,/ со Отцем седя́й на Престоле и Божественным Духом,/ благоволивый роди́тися на земли́/ от Девы Неискусобра́чныя, Иисусе,/ ущедря́я Твое́ создание, человеческое естество, неизреченными добро́тами,/ приими Твоея́ Матере приноси́мыя Тебе́ за ны молитвы/ и не помяни́ беззаконий наших,/ но помилуй и спаси́ души на́ша, я́ко Милосерд.

Преклонив Небеса, Царь Славы сни́де/ обнови́ти Адама, преступлением всего истле́вшаго,/ всели́ся в Тя, Чистая Дево,/ и роди́ся, ключе́й девства не руши́в,/ и на руках Твоих смире́н Младенец,/ Иже Архангелов Царь ноша́шеся;/ и ны́не Твою́ молитву прие́млет/ и прошение Твое́ во всем исполняет, Богородице,/ я́ко Твой Сын и Бог,/ Емуже усердно моли́ся:/ да спасет ду́ши на́ша, я́ко Милосерд.

Па́че ски́нии Моисе́евы,/ по образу Небесному сотворе́нныя,/ всю Тя Бог освяти́, Богородице, Духом Святым,/ весь всели́ся в Тя, всего человека оживи́./ Тем и Твоя икона, па́че Ааро́ня киво́та,/ напо́лнися благодати Божия и/ источает освящение душа́м и телесе́м./ Ейже любезно покланя́ющеся,/ просим от Тебе́ великия милости:/ да спасеши души на́ша, Благословенная Помощнице.

Сла́ва, и ны́не, глас 8:

Прииди́те, возрадуемся державней Заступнице рода нашего,/ Царице Богородице,/ прииди́те к тихому Ея чу́дному,/ почита́емому Ангелы,/ честно́му поклони́мся о́бразу./ Да́рует бо Богородица верным обильныя да́ры целе́бныя,/ от неистощимаго источника святыя иконы неоскудную благодать источа́ющи:/ тьмы избавляет нас искушений и бед, и всякаго греха,/ благочестно и Богоприятно прославля́ющих и чтущих/ светлую и чу́дную Богоматере святую икону./ Тем, воспева́юще, воззовем Первообра́зней:// радуйся, любезная миру по́моще/ во спасение душ наших.

Вход. Прокимен дне,

И чтения 3 (зри страницы 6–7)

На литии стихиры, глас 2, самогласны:

Я́ко воистину древняго киво́та пречестне́е,/ егда́ Давид, собрав чи́ны, ликовствова́ше,/ ны́не Твоя, Богородице, икона,/ ейже предстоят архиереев собори,/ и с чи́нми Ангел священницы и все христоимени́тых людей множество/ достойно блажа́т Тя, Матерь Божию,/и прославляют раболе́пно, и честву́ют,/ и покланя́ются, и молятся Тебе́ по Бо́зе:/ да мир умири́ши в Православии, и Церковь утверди́ши,/ и спасеши от всех зол Твоя рабы,/ я́ко едина Благословенная.

Предстоят Ти, Госпоже Богородице,/ пред Твоим, Пречистая, образом/ архиереев сословие и священницы/ и вси людие, мона́си и прости́и,/ ве́дуще Тя воистинну Помощницу сильну и непобедиму,/ моления Тебе́ приноси́ти от всея души́ подвиза́ют/ и поуща́ют на молитву к Бо́гу, требующе Твоея́ помощи,/ да простре́ши Богоносныя Твоя руки и умо́лиши за мир./ Вонми́ и услыши, Владычице,/ и подаждь утешение рабом Твоим,/ до́ндеже не одоле́ют ны грехи наши тяжкия и лютыя:/ Твоея́ бо всегда требуем вси помощи.

Глас 8:

Пе́рвее написавшейся Твое́й иконе/ Евангельских та́ин благовестником/ и к Тебе́, Царице, принесе́нней,/ да усво́иши ту и си́льну соде́лаеши спасти честву́ющия Тя,/ порадовалася еси, и я́ко су́щи милостива спасения нашего Соде́тельница,/ я́ко уста́ и глас иконе бывши,/ я́коже и Бога внегда́ зачинающи во чреве,/ песнь воспела еси:/ Се отны́не ублажа́т Мя вси ро́ди!/ И, на ту зрящи, глаголала еси со властию:/ С сим образом благодать Моя и сила./ И мы истинно веруем,/ я́ко се рекла́ еси, Госпоже,/ сим образом с нами еси./ Тем благоговейно предстояще,/ поклоняемся Тебе́ раби Твои,/ посети́ ны Твоими ма́терними щедротами.

Глас 7:

Гора еси великая и преславная/ па́че горы Сина́йския, Богородице;/ она бо не терпя́щи сни́тия Славы Божия/ во о́бразех и се́нех, огне́м возгара́шеся,/ и гро́ми и молнии тамо быша./ Ты же весь Боже́ственный Огнь сущ/ Божие Слово во чреве Твое́м неопа́льно носила еси/ и от сосе́ц Твоих млеко́м питала еси/ ма́нием Носящаго вся./ И ны́не, ма́тернее дерзновение к Нему иму́щи,/ помози́, Владычице,/ верно празднующим Твой честны́й праздник/ и не забу́ди, ми́лостивно посеща́ющи:/ прия́ла бо еси от Бога дар/ стро́ити и покрывати христоимени́тое стадо, рабы Твоя.

Сла́ва, и ны́не, глас 6:

Тебе́ вси ро́ди человечестии/ хва́льныя да́ры прино́сят, Владычице,/ и мо́лятся я́ко Царице и Матери Божии./ Пророцы Тя премудро пропове́даша,/ леви́ти благослови́ша, апостоли и мученицы испове́даша,/ священницы покланяются, архиерее проповедают,/ мона́си и прости́и благогове́ют,/ богатии и убо́зии, сироты́ и вдовы́,/ и всяк возраст, и вся́ко преспе́яние,/ старческое и младенческое,/ под кров Твой державный с верою прибегаем:/ покрый и соблюди, Госпоже, моли́твами Твоими// и спаси́ от бед души на́ша.

На стиховне стихиры, глас 2:

Вместилище чистое Света пречистаго, Богородице,/ ка́ко Тя, раби, достойно воспева́ем,/ я́ко явлением пречистыя Твоея́ иконы/ и Превечнаго Младенца вся освеща́еши.

Стих: Помяну имя Твое́/ во вся́ком роде и роде.

О Дево Нескве́рная, Богора́дованная,/ что Ти когда таково́ благодарение принесе́м,/ я́ко блаженнаго Твоего Рождества всесия́ющею луче́ю/ всех от тления к жизни возвела еси.

Стих: Слыши, Дщи, и виждь,/и приклони́ ухо Твое́.

О Дево Госпоже, Мати Зижди́телева,/ Небесных еси чино́в ра́дование/ и человеческому роду благословенная Помощнице,/ моли о спасении душ наших.

Сла́ва, и ны́не, глас 5:

Воспое́м, людие, све́тло Дави́дскую песнь/ Отроковице, Невесте Божии и Матери Царя Христа:/ предста́ Царица одесную Тебе́, Владыко, ря́сны златы́ми оде́яна/ и преукра́шена Божественными благоле́потами./ Сию убо я́ко избра́нную и добрую в жена́х, па́че всего мира удобри́в, благоволил еси роди́тися из Нея великия ради милости,/ и Сию Помощницу лю́дем Твоим даровал еси/ спасати и покрывати от бед/ всемогущею Твое́ю и Божественною силою,/ Еяже моли́твами, Христе Боже, помилуй нас.

Тропа́рь, глас 4:

Заступнице усердная,/ Мати Господа Вышняго,/ за всех мо́лиши Сына Твоего Христа Бога нашего/ и всем твори́ши спастися,/ в державный Твой покров прибегающим./ Всех нас заступи, о Госпоже Царице и Владычице,/ иже в напастех и ско́рбех, и в болезнех, обремене́нных грехи́ многими,/ предстоящих и моля́щихся Тебе́/ умиле́нною душе́ю и сокруше́нным сердцем,/ пред пречистым Твоим о́бразом со слезами,/ и невозвра́тно надежду иму́щих на Тя/ избавле́ния всех зол./ Всем полезная да́руй/ и вся спаси́, Богородице Дево:// Ты бо еси Боже́ственный покров рабо́м Твоим.

НА У́ТРЕНИ

На Б ог Госпо́дь: тропа́рь трижды.

По 1-м стихословии седален, глас 3:

Лю́дие благочестивии, правове́рнии собо́ри христоимени́тии,/ приступите верно вси,/ Божественному припа́дающе Божия Матере образу:/ Та́я бо исцеление боля́щим радостно подае́т,/ уязвля́ет же злосла́вныя, я́ко стрела́ от лу́ка,/ нас всех веселит светови́дно/ и благодатию озаря́ет моли́твами Своими.

Сла́ва, и ны́не:

Всю Тя Бог освяти́, Деву До́брую и Непорочную в жена́х,/ пророки прообрази́в че́стно, иере́и благослови́в, во святая святых всели́,/ А́нгелом воспита́, с Небесе́ пищу хлеб подая́./ Сам же Преблагий, Единородное Бог Слово,/ всели́ся в Тя и плотию про́йде из Тебе́./ Темже Ти покланяемся и чтим,/ я́ко воистинну истинную сущую Богородицу.

По 2-м стихословии седален, глас 4:

Да ликовству́ет све́тло верных все множество,/ рыдает же демонское во́инство,/ видяще многоиме́нныя сия́ющия праздники Божия Матере,/ ублажа́ему Божию Матерь Божественными пе́сньми,/ иде́же бо Богоприя́тно славится/ Преблагословенная Богородица Владычица, Богоизбранная Отроковица,/ неприя́зни паде́ние,/ христианом же крепкое утвержде́ние.

Сла́ва, и ны́не:

О Всеблагословенная Богородице Владычице,/ Богоизбранная Отроковице,/ све́тлое проро́ческое сбытие́,/ апостольская похвало́, и мученическое испове́дание и ве́нче,/ Ангелы чти́мая и человеческими ро́ды многопе́тая,/ и всего мира вожделе́нная Помощница,/ избави рабы Твоя осуждения будущаго и е́зера огненнаго,/ едина Благословенная.

Величание:

Величаем Тя, Пресвятая Дево,/ и чтим образ Тво́й святый,/от него же истекает благодатная помощь// всем, с верою притекающим к нему.

По полиелеи седален, глас 1:

Правове́рно чтущия Тя людие, к Тебе́ прибега́ющия/ и иконе Твое́й святе́й любезно покланя́ющияся,/ о Божия Мати, спаси́ и не даждь в расхище́ние сопоста́том,/ ниже́ наи́дут на ны вся злая,/ яже грехи на́ша угото́ваша нам,/ ниже́ беззакония на́ша превзы́дут на главы́ на́ша,/ но да Твоя матерняя к Бо́гу преодолеет/ за ны Богоприя́тная молитва.

Сла́ва, и ны́не:

Пречистая Твоя икона, Богородице Дево,/ врачевство́ всему миру духо́вное,/ к нейже прибега́юще, Тебе́ поклоняемся и почитаем, и лобызаем, и чтим,/ исцелений благодать почерпа́юще от нея,/ и неду́г теле́сных и душевных страсте́й Твоими моли́твами свобожда́емся.

Таже степенна, 1-й антифон 4-го гласа. Прокимен: Помяну имя Твое́ во вся́ком роде и роде. Стих: Слыши, Дщи, и виждь, и приклони ухо Твое́. Вся́кое дыхание: Евангелие от Луки, зачало 4. По 50-м псалме стихира, глас 8: Приидите, возрадуемся (писана на Го́споди, воззвах:).

Канон Одигитрии Пресвятыя Богоро́дицы со ирмо́сом на 6, творение иеромонаха Игнатия, глас 4.

Песнь 1

Ирмо́с: Отве́рзу уста́ моя/ и напо́лнятся Ду́ха,/ и слово отры́гну Царице Матери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Радостно, Чистая, ны́не наста́вшее хвале́ние приноша́ю, ра́дуяся,/ и тихим гла́сом, Одигитрие, вопию́ Ти:/ радуйся и испо́лни мя ра́зума, пе́ти начина́юща.

Христа родившая, радость нам вечную,/ о радуйся, Всепетая, православных наде́ждо,/ Одигитрие, всепетая Деви́це:/ радости испо́лни мя, ми́рови жела́нныя.

Лику́ют вси челове́цы и Ангелы,/ всегда согласно вопию́ще на Небеси́ и на земли́, Одигитрие, радуйся, Деви́це,/ радости бо Рождеством Твоим вся́ческая испо́лнила еси.

Радость, Одигитрие,/ со страхом Ти вопию́щих ра́дости сподо́би,/ Мати су́щия радости, избавля́ющи скорбе́й всяческих,/ и всех помилуй, к Тебе́ прибега́ющих.

Ин канон праздника на 8, глас тойже.

Песнь 1. Ирмо́с тойже.

Благогове́ют Ти, Богородице, Ангелов нача́льницы, и святых чи́ни че́стно слу́жат,/ праведнии красу́ются, Небесных Хода́таицу блажа́т Тя./ Ку́пно же и земля и Небо в веселии све́тло восхваля́ют Тя,/ и мы, гре́шнии, милости просим:/ озари́ на́ша сердца́, Владычице, воспе́ти песнь святыя Твоея́ иконы явлению.

Прииди́те, собери́теся, христоимени́тии людие, умы́ тайно очи́стившеся, во святую церковь Матере Христа Бога нашего:/ источает бо нам неоску́дно от святыя иконы источник духо́вен,/ целе́бен душа́м и те́лом, песнь вопиющим:/ благословен из Тебе́ рождейся Бог наш.

Диви́т, Пренепорочная, и ужаса́ет всяк слух странно чудо Божественнаго Твоего Рождества:/ како Херуви́мскаго Творца зачала́ еси;/ како Огнь нестерпи́мый во утро́бе носи́ла еси;/ како Су́щую Жизнь плотию облекла еси и Живо́т всему миру родила́ еси,/ Бога ку́пно и человека.

Под кров Твой, Дево Госпоже, прибега́ем вси ро́ди человечестии:/ просвети ны светом Рождества Твоего, грешныя рабы Твоя,/ моля́щияся прилежно и кла́няющиися пречистей Твое́й иконе,/ прося́ще от Тебе́ прия́ти великия милости.

Катавасия: Отверзу уста моя:

Песнь 3

Ирмо́с: Твоя песносло́вцы, Богородице,/ живы́й и незави́стный исто́чниче,/ лик себе совоку́п льшия, духо́вно утверди́,/ в Божественней Твое́й славе/ венце́в славы сподо́би.

Христа, Вышняго Царя, о радуйся, непоколебимая, чистая и одушевле́нная пала́то,/ радуйся, Одигитрие, радуйся:/ Тобою бо неруши́м наш град сохраняется.

Вмести́ти Eгoже не возмо́же тварь,/ во утро́бу неискусобра́чную, Одигитрие Девице, телесно вмести́ла еси:/ темже Ти, радуйся, пое́м, по до́лгу велича́юще.

Радость многопетая ми́рови,/ радостно Ти пою́ще присно, ве́чнующия, Чистая, радости сподобля́емся/ Твои́ми матерними моли́твами к Ро́ждшемуся из Тебе́, Одигитрие.

Злату́ю Тя ста́мну, и све́щник, и жезл, и трапе́зу, Чистая, призыва́ем, Одигитрие,/ и глас, еже радуйся, Тебе́ при́сно привноша́ем/ с си́миже имены́.

Ин. Ирмо́с тойже

Ку́ю Ти достойную похвалу́ наше принесе́т коне́чное неможе́ние,/ я́ко явле́нием пречистыя Твоея́ Божественныя иконы незави́стныя источники целе́бныя источа́еши/ верно прибега́ющим к Тебе́ рабом Твоим.

Божественныя Твоея́ иконы святое явление, Богородице Дево,/ я́ко светоза́рное возсия́ нам солнце, преславных чуде́с лучи́ пуща́ющи,/ тьмы лю́тых обстоя́ний отгоня́ющи/ священными Твоими, Владычице, предстательствы.

Испо́лнила еси благода́ти иногда́ первопи́санную Твою́ икону, Госпоже Дево Богородице,/ и ны́не та же благодать и́стинствует сия́нием веры чудес, я́ко тоя́ ра́ди первопи́санныя,/ ко спасению верно к Тебе́ по Бо́зе прибегающим.

Покланяемся, Богородице, Твое́му пречистому о́бразу и пресладкому Твое́му Младенцу,/ превечному и незаходимому Свету, Христу,/ Имже спасла́ еси от лю́тых зол и тле́ния смертнаго все человеческое естество́.

Седален, глас 8.

Подо́бен: Премудрости:

Божественнии Сло́ва апостоли,/ Евангелия Христова велегла́снии вселе́нныя благове́стницы,/ Божественную церковь созда́вше в пресвятое Твое́ имя, Богородице,/ и к Тебе́, Госпоже, прихо́дят, моля́ще Тя приити́ на тоя́ освяще́ние./ Ты же, о Богомати, рекла еси:/ иди́те с миром и Аз с вами та́мо есмь./ Они же, ше́дше, обрета́ют та́мо на стене́ церкве Твоего, Владычице, о́браза подо́бие,/ Божественною пи́сано силою шаро́вными подо́бии,/ и, ви́девше, поклони́шася Ти и просла́виша Бога./ С нимиже и мы Божественней Твое́й покланяемся иконе,/ прося́ще от Тебе́ великия милости:/ да́руй согрешений оставле́ние рабом Твоим, Едина Благословенная.

Сла́ва, и ны́не, тойже седален.

Песнь 4

Ирмо́с: Седя́й в славе на Престоле Божества во о́блаце ле́гце,/ прии́де Иисус Пребоже́ственный/ нетле́нною дла́нию/ и спасе́ зову́щия:/ сла́ва, Христе, силе Твое́й.

Радуйся, чудо чудес, Одигитрие Владычице./ Радуйся, всех радосте градо́в и ве́сей,/ непобеди́мое христианское в беда́х храни́лище,/ и предгра́дие, и на враги побежде́ние.

Радуйся, радуйся людей православных похвало́ и христолюбивых пастырей, покров пребываеши всех, Царице./ Радуйся, Одигитрие, прибежище всем нам и утверждение.

Радуйся, всем скорое в беда́х избавле́ние./ Радуйся, готовое всем скорбя́щим утеше́ние./ Радуйся, Всепетая, радуйся, Одигитрие Всеблагословенная,/ всем немощны́м Исцели́тельнице.

Радуйся, Еяже вели́чия вся тварь/ сла́вити у́бо спеши́т по достоянию, но не возмога́ет, Одигитрие,/ и сего ради зове́т Ти:/ радуйся, Владычице, Боговместимое жилище.

Ин. Ирмо́с тойже

Почтим, лю́дие, Чистыя в чистоте икону Девы Богоро́дицы/ и Тоя́ Божественнаго Младенца, Христа Бога нашего,/ и лобыза́ем и прославля́ем со страхом и трепетом:/ почитаем бо икону благоче́стно,/ па́че же почитаем Са́мую Ту́ю сущую Чистую Богоматерь.

Давид, Боже́ственный и чу́дный пророк, издале́ча прови́дя, глаго́ла:/ лицу́ Твоему́ помо́лятся богатии лю́дие./ Мы же, ве́рнии, покланя́емся и лобыза́ем честну́ю икону,/ душа́ми ку́пно и телесы́ освяща́емы.

Евангелия Христова Богогла́сный списа́тель Лука/ Божиим манове́нием всенепорочный Твой напису́ет образ, Богородице,/ и Младенца Превечнаго на рука́х Твоих вообрази́в,/ к немуже притекающия напастей и бед избавля́еши,/ и вся покрыва́еши, и спаса́еши Твое́ю милостию.

Ты еси похвало́ и вене́ц святым всем, о Царице!/ Ты упование наше и Помощница по Бозе,/ и на Тя надежду спасения нашего возложи́хом вси./ Тебе́ мо́лимся, я́ко Божии Матери:/ одожди́ грешным рабо́м Твоим богатыя Твоя душеспаси́тельныя ми́лости.

Песнь 5

Ирмо́с: Ужасо́шася всяческая/ о Божественней славе Твое́й,/ Ты бо, Неискусобра́чная Дево,/ имела еси во утро́бе над всеми Бога/ и родила́ еси Безле́тнаго Сына,/ всем воспева́ющим Тя/ мир подава́ющая.

Благосты́ни бездно и щедро́там еси, радуйся, Одигитрие Девице,/ радуйся, всем радость творя́щи верным./ О, радуйся, сущим в беда́х, скорбя́щим пребыстрая Заступнице.

Радости от исполнения величия чудес Твоих зря́ще исполняемся вси,/ не зря́щии, слышаще же, ве́рнии./ Темже, радуйся, Тебе́ присно,/ всюду и вси, Одигитрие, пое́м.

Христа Бога нашего, о радуйся, Одигитрие, жили́ще/ и дом неизрече́нней и пребоже́ственней, Дево, Славе Его./ О, радуйся, пала́то преукраше́нная,/ радуйся, гра́де одушевле́нный, присноца́рствующий.

Радость неоску́дную Тя разсмотря́юще,/ я́ко мо́ре, Отроковице, Одигитрие Девице,/ радующеся вси, радуйся, вопие́м Ти/ и, пою́ще, Боже́ственных даро́в неви́димо присно от Тебе́ ожидаем.

Ин. Ирмо́с тойже

Вся́ко, Пречистая, существо воспе́ти недоуме́ет Тя,/ па́че бо Горних умо́в превозвы́силася еси,/ рождши неприступнаго и страшнаго Всецаря и Бога,/ но, я́ко Ми́лостива и скорая человеком Помощница,/ вонми́ моле́нию раб Твоих и да́руй Твою́ помощь.

Иде́же осени́т благодать Твоя, Богородице, стра́хом исчезают демони/ и разруша́ется злоко́зненное тех мечта́ние, бе́гают ду́си те́мнии,/ радуется же верных все мно́жество, Тебе́ песнь хва́льну от сердца вопию́ще:/ радуйся, Боже́ственный покро́ве душ наших.

Безоче́сным сладкое зре́ние дае́тся, глухи́м слы́шание,/ немы́м благоглаго́лание, хромым хождение, прокаже́нным очищение,/ де́монствуемым целому́дрие и в боле́знех су́щим различных исцеление/ осене́нием Пречистыя Твоея́, Богородице, иконы.

Не умолчи́м никогда́же, Богородице, псалмы́ и пе́сньми воспева́ти вели́чия Твоя, Обрадованная:/ Бога бо воистинну воплотившагося родила́ еси,/ во спасение наше всемирное и избавление.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богомудрии, Богоматере,/ прииди́те, руками воспле́щим,/ от Нея ро́ждшагося Бога сла́вим.

Христа, Чистая, прие́млющи,/ глас, еже радуйся, Одигитрие Девице, слышала еси,/ Eгoже неизреченно ро́ждши, и, радуйся, от всех слы́шиши всегда.

Радости вся испо́лнила еси,/ Вышняя и нижняя Ты совокупи́ла еси, Одигитрие,/ темже радостно и согла́сно ны́не Небо и вся земля зове́т Ти.

Вдова́м, о радуйся, Всепетая, и всем си́рым, Одигитрие, утеше́ние,/ радуйся, всем источа́ющи ни́щим богатство неистощи́мое.

Зла́та всякаго блиста́ема и у́тра солнечнаго светле́йши,/ жили́ще Христово, радуйся, Одигитрие, радуйся, Девице,/ радуйся, Невесто Неневестная.

Ин. Ирмо́с тойже

Божественнаго Твоего Рождества́, Дево Госпоже, пребога́тая благодать,/ юже дре́вле изглаше́нием предала́ еси пречистому Твое́му образу,/ неоску́дне де́йствовати великая же и пресла́вная во спасение на Тя наде́ющимся.

Иде́же прославля́ется святое имя Обрадованныя Богоро́дицы,/ та́мо всяческих благи́х исто́чницы пролива́ются;/ прииди́те в чистоте́, челове́цы,/ се бо явление Божественныя Девы иконы сказу́ет Царицы пришествие во спасение всех верных.

Целения боле́зней, отгна́ние же страстей и душепита́тельное спасение,/ грехо́в проще́ние и вечное избавле́ние от пречистыя Твоея́ иконы, Владычице,/ верно приходя́ще, прие́млем, Богомати Всенепорочная.

К Тебе́, Госпоже, прибегают ро́ди правоверных, про́сят великия ми́лости/ и прие́млют неоску́дно су́щии в неду́зех исцеление, в страсте́х премене́ние, в печа́лех утеше́ние./ Источи́ и мне, Владычице, ка́плю душеспаси́тельную,/ да со всеми и аз пою́ Твое́ величие.

Конда́к, глас 8.

Подо́бен: Взбранной:

Притеце́м, людие, к тихому сему́ и доброму пристанищу,/ скорой Помощнице, гото́вому и те́плому спасению, покро́ву Девы,/ ускори́м на молитву и потщи́мся на покая́ние:/ источает бо нам неоску́дныя милости Пречистая Богородица,/ предваря́ет на помощь и избавляет от великих бед и зол/ благонравныя и Богобоя́щияся рабы Своя.

Икос:

Смысл очи́стивше и ум, притеце́м к Богородице,/ све́тло пе́сньми ублажа́юще Ю,/ и пречи́стую икону Ея прославля́ем и чтим,/ и, припа́дающе, покланя́емся я́ко Само́й су́щей о́ной:/ честь бо иконы на Первообра́зное восхо́дит,/ и почита́яй и покланя́яйся ей почитает са́мое Первообра́зное,/ я́коже Божественнии отцы реко́ша. И аще кто не чтит Пресвятыя Богоро́дицы и не покланяется иконе Ея, ана́фема да будет:/ посрамля́ет бо и погубля́ет не чту́щия Ю,/ избавляет же от великих бед и зол благонра́вныя и Богобоя́щияся рабы Своя.

Песнь 7

Ирмо́с: Не послужи́ша тва́ри Богомудрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отцев Господь и Бог,/ благословен еси.

Радуйся, радуйся. Богородице Одигитрие,/ всех и всегда наставля́ющи верных ше́ствовати ко вся́кому пути́ спаси́тельному,/ радуйся, Владычице, Тобою бо присно избавляемся настоя́щия ва́рварския беды́.

Радуйся, радуйся, Одигитрие,/ бдя́щи и моля́щися о нас к Бо́гу,/ и всякия злобы хода́тайством Твоим всяческих скорбе́й,/ Богородительнице, всех людей избавля́ющи.

Радуйся, радуйся, Пресвятая Одигитрие,/ проше́ния на́ша к пользе нам исполня́ющи/ и хотя́щи всем при́сно всегда любодру́жное благое единство, спешное же во изя́щных.

Радуйся, радуйся, корабле́м, Одигитрие, ну́ждно пла́вающим, избавля́ющи верных/ и всем избавле́ние от всякия ско́рби и неду́ги/ пестро́тныя и ме́дленныя разреша́ющи вскоре.

Ин. Ирмо́с тойже

Прииди́те, почерпе́м отпуще́ние от неистощи́маго источника,/ точа́щаго святы́ню Пречистыя Девы/ и Тоя́ Пречистаго Младенца, Божия Слова, нас ради вочеловечшагося./ К Нему возопии́м:/ Тво́рче Изба́вителю,/ препрославленный со Отцем и Духом, Боже, благословен еси.

Неусы́пную, Чистая, и Богоприятную иму́щи молитву,/ и непреодоле́емую держа́ву кре́пости,/ врагов наших дерзость, яже на ны, разори́/ и вы́я их под но́зе верному народу нашему низложи́,/ да возвесели́мся о Тебе́, раби́, Сыну Твое́му вопию́ще:/ отец наших Боже, благословен еси.

Радуемся и веселимся, ве́рнии лю́дие, чу́дному явле́нию иконы Пречистыя Владычицы Богоро́дицы:/ река́ бо яви́ся неисчерпа́ема, целебную во́ду точа́щи,/ слепы́м бо ви́дети дае́т и глухим слы́шание,/ хромым хождение и всем сущим в неду́зех безме́здное исцеле́ние.

Неиспы́тана глубина́, недове́домо таинство, непостижи́м образ, Дево, зачатия Твоего,/ зачатия без се́мене, без мужа рождество./ Безплотный воплоти́ся, Превечный младе́нствует,/ Сын Божий, Сын Тебе́, Девы, бывает, Емуже вопие́м:/ Боже, благословен еси.

Песнь 8

Ирмо́с: О́троки благочестивыя в пещи́/ Рождество́ Богоро́дичо спасло́ есть,/ тогда у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Господа пойте дела/ и превозноси́те Его во вся веки.

Радуйся, Всеблагословенная Марие,/ из Тебе́ бо Всеблагословенный Бог оде́яся во всего́ мя человека/ и, оде́явся, соедини́ Своему Божеству неизрече́нным соединением, Дево Одигитрие;/ радуйся, Обрадованная, радосте всего мира.

Радуйся, лукавых духо́в Прогонительнице;/ радуйся, Богородице Одигитрие;/ радуйся, Юже Небе́сная неви́димая во́инства славосло́вят всегда и велича́ют я́ко Матерь Божию бывшую;/ радуйся, Я́же нижняя сочета́вши с Вышними.

Радуйся, всех Небесных сил без разсужде́ния превосходя́щая;/ радуйся, Одигитрие;/ радуйся, вся́кия тва́ри я́ко Бога Рождшая госпо́дствующи, ей, Владычице Всепетая;/ радуйся, пребыва́еши Дева Чистая и по рождестве́.

Радуйся, жена́м всем сла́во, хра́ме преосвяще́нный Бога нашего;/ радуйся, Одигитрие;/ радуйся, душеспаси́тельная всей вселенней;/ радуйся, покрывающий о́блаче, Небе́с ши́ршая;/ радуйся, мирополо́жнице, Божественнаго ми́ра полна́.

Ин. Ирмо́с тойже

Ум Ангельский и человеческий ужаса́ется, Богородице,/ како Бога Небе́снаго, ложесна́ми объе́мши, воплоти́ла еси,/ како, Младенца ро́ждши, я́ко Сына на руку́ но́сиши/ Eгoже ужаса́ется тварь и трепе́щут Горнии Престоли, вопию́ще непрестанно:/ Свят, Свят, Свят еси, Боже, препе́тый и превозносимый во веки.

Радуйся, су́щая ра́досте всего мира,/ со Арха́нгелом Гавриилом вопие́м Ти, Богородице;/ радуйся, вмести́лище Невмести́маго;/ радуйся, Благодатная, носи́ло Божества всего;/ радуйся, Ада́мово воззва́ние, с Тобою Господь, и Тебе́ ради с нами, спасая нас,/ Eгoже поем и превозно́сим во веки.

Корень Иессеев освяще́нный, корень греха́ нашего исто́ргнула еси;/ жезл Ааронов процве́тший, Жизнодателя цвета израсти́вши Христа;/ ста́мно манноприе́мная, смерти всю силу сокруши́ла еси/ и в поро́ду жизни возвела́ еси род человеческий:/ темже Тя поем, добрых виновную.

Ты похвала́ христианом еси, Владычице,/ Ты оружие на враги и стена́ к Тебе́ прибега́ющим./ Тя и ны́не на помощь призываем, Госпоже,/ не даждь враго́м вознести́ся на люди Твоя,/ иже Тебе́ не хва́лят, ни Сына Твоего, Богородице, и Твое́й иконе не кла́няются:/ сих победи́ и ду́ши на́ша спаси́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́ем,/ да торжеству́ет же Безпло́тных умо́в естество́,/ почита́ющее священное торжество Богома́тере,/ и да вопиет: радуйся, Всеблаженная Богородице,/ Чистая Приснодево.

Радуйся, свеще́, Свет невечерний поне́сшая,/ и в Рождестве Твое́м многобожия тьму разруши́вшая,/ и а́довы про́пасти изба́вльшая люди;/ радуйся, Одигитрие Богородице, добро́т всех Предхода́таице.

Радуйся, земле́, из нея́же Клас прозя́бши Небесный верным,/ и мира всего душегу́бнаго гла́да изба́ви, разу́мная и одушевле́нная;/ о радуйся, виногра́де, иже Грозд живо́тный ро́ждшая,/ Богородице Чистая, Одигитрие.

Радуйся, тайных цвето́в прекрасный су́щий раю́;/ радуйся, Мати Дево, Неви́димых ра́зум чистото́ю странноле́пно побе́ждши, Богороди́тельнице;/ радуйся, Отроковице;/ радуйся, Одигитрие, всеми́рное чу́до и слышание.

Лето живота́ нашего про́чее сохрани́ неврежде́нно поможе́нием Твоим, Дево Отроковице,/ и сподо́би коне́ц благи́й получи́ти нам, воспева́ющим Тя и взыва́ющим:/ радуйся, Всеблаженная Богородице, Чистая Одигитрие.

Ин. Ирмо́с тойже

Тебе́, тве́рдую Помощницу ро́ду челове́ческому, Богородице Марие, лик пророческий многообра́зно провозвести́,/ сень святу́ю, Небе́с простра́ннейшую,/ скрижа́ль Богопи́санную и купину́ неопали́мую,/ дверь Богопрохо́дную, го́ру же и ле́ствицу, и мост, и жезл процве́тший:/ мы же воистину Богородицу Тя величаем.

Тайна глубины́ Рождества Твоего ум Ангельский ужаса́ет, Дево,/ и пречи́стая икона де́моны прого́нит,/ и ли́ца нечести́вых омрача́ет, и в студ порева́ет:/ не терпя́т бо взира́ти на си́лу ея́, бе́гают же и исчеза́ют./ Мы же любезно покланя́емся и лобыза́ем, и Тя, Богородицу, величаем.

Предста́тельница су́щи неотсту́пна к Вышнему Царю,/ я́ко иму́щи матерне дерзнове́ние непосты́дно,/ в мире глубо́це православных житие́ утверди́ и отечество наше возвы́си,/ и вся поле́зная да́руй всегда рабо́м Твоим,/ да Тя, Богородице, величаем.

О Всемилостивая христиа́ном Помощнице,/ не может Тя воспе́ти достойно ум человеческий и Ангельский,/ я́ко всея́ тва́ри честне́йши, Небе́сных и земны́х сла́внейши:/ всех бо родила́ еси Творца и Бога,/ но, о Владычице,/ приими́ ми́лостивно ю́же Тебе́ от сердца возложи́хом песнь,/ спасай нас всегда, на Тя бо наде́емся.

Светилен:

Да почти́тся Всепетая Мати Божия,/ Жизнь Су́щую ро́ждши, Христа Бога нашего,/ райских дверей отверзе́ние и всего мира очище́ние, к животу́ возведе́ние:/ Сей есть проро́ком глаго́лавый,/ Тому поклони́мся, Бо́гу и Спасу душ наших.

Сла́ва, и ны́не, глас 6:

Прииди́те, ве́рнии, с чистото́ю возвели́чим Пречистыя Матере Бога нашего чу́дную икону/ и Божественнаго Младенца, Спаса Христа,/ Eгoже я́ко рождшая на руку́ носи́вши/ и ма́терне дерзновение к Нему иму́щи,/ непреста́нно мо́лит за ны и подае́т рабом Своим богатыя милости.

На хвалитех стихиры на 4, глас 4:

Просла́вим, ве́рнии, Обра́дованную Богородицу,/ па́че же во усте́х наших имамы всегда/ святое и благословенное имя Ея,/ непреста́нно прибега́юще к пречи́стей Ея и цельбоно́сней иконе:/ то́ю бо обрета́ем яже на земли́ вся благая и полезная/ и су́щих на возду́се от демонов запина́ний избавляемся,/ я́ко Мати, рождшая всех Творца́,/ спасает от бед души на́ша.

Да рыдает вечно сонм злочести́вых,/ не испове́дающих Тя в рождестве Чистую Богородительницу/ и не покланя́ющихся пречи́стей Твое́й иконе./ Ве́рнии же лю́дие, ра́дующеся,/ испове́даем Тя истинную Деву Богородицу,/ я́ко вои́стину родила́ еси пло́тию Христа Бога нашего,/ тление Адамово попра́ла еси/ и от греха весь мир очистила еси,/ жизнь безконечную дарова́ла еси,/ райский вход верным отве́рзла еси/ Божественным Твоим Рождеством;/ Eгoже моли спасти́ся нам,/ пою́щим верно Твое́ та́инство.

Радуется убо и весели́тся/ неизрече́нною радостию все мно́жество благочестивых:/ припа́дающе же покланя́ются,/ вси благогове́ют Божии Матери с боя́знию,/ благодаря́ще Сию́ по Бо́зе я́ко Бога,/ толи́ких превели́ких благ Хода́таицу,/ в ни́же желают Ангели прини́кнути,/ дарова́ Богородицею верным Христос Бог наш,/ имеяй премно́жество щедрот и великую пребогатую милость.

Сла́ва, и ны́не, глас 8:

Святая Твоя и сообра́зная икона, Богородице Дево,/ благода́тию Твое́ю пребога́тый су́щий источник,/ кипя́щий всей подсо́лнечней/ и светя́щий всему́ миру/ светолу́чными Свята́го Духа сия́ньми и исцеле́ний светлостьми./ Ты бо Бога Слова плотию несказа́нно родила́ еси,/от Архангела Гавриила сицева́я слы́шавши:/ радуйся, Обрадованная, Господь с Тобою,/ и Дух Святый осени́т Тя к зачатию./ Та́кожде рекла́ еси к первопи́санной Твое́й иконе, на ту зря́щи:/ с то́ю Моя благодать,/ и слово Твое́ со вла́стию иконе бысть./ И о́браз, и глас, и сила, и дело, и всяк ум/ превосходя́щая Божественная благодать, спребыва́ющи вечно,/ зна́мения и чудеса́ непрестанно содева́ет/ и душеполе́зное исцеление всем верно приходя́щим подае́т/ Твоими Богоматерними непреста́нными к Бо́гу моли́твами.

Славословие великое, и отпуст.

На Литургии служба Богоро́дицы.

Аще прилучится в неделю – зри устав 23 июня

На Го́споди, воззва́х: стихиры святителю, глас 2.

Подо́бен: Егда́ от Дре́ва:

Боже́ственных учений блиста́ньми/ разруши́л еси многобо́жную нощь, отче Аве́ркие,/ утро же возсия́в, сы́ны дне совершил еси,/ во мра́це сущия прежде, иерарше,/ чудеса преславная показа́в,/ тем святую твою́ память верою празднуем вси,/ песносло́вяще тя, Богодухновенне.

В сосу́де еди́нем чудодействуя,/ вино бо и елей, отче, и вид други́й совокупи́л еси,/ блюдо́ма внегда требовати несме́шена Божественною благодатию,/ теплых же вод дарова́ние/ молитвою истещи́ сотворил еси,/ неду́ги исцеляя всяческия,/ приходя́щих тебе́ верою/ и блажа́щих тя, Аве́ркие.

Весь прилежа́ Бо́гу,/ Боже́ственных испо́лнитель учений явился еси, Аве́ркие,/ благодать же прие́м от высоты́, преподобне,/ неду́ги отгна́л еси различныя человеков,/ тре́бища и́дольская разорил еси,/ знание насади́л еси Боже́ственное,/ неве́дением окая́нно прежде бе́дствующим, блаженне.

Ины стихиры мучеников, глас 4.

Подо́бен: Я́ко до́бля:

Пребеззаконная веле́ния,/ Бо́гу поко́ршеся, о́троцы блаженнии небрего́ша/ и, свя́зани бывше, разреши́ша пре́лести соу́з,/ и, сан мирски́й отвергше, прияша славу,/ яже тех преславно соверши́вшу/ и Горняго исхода́таившу Царствия наслажде́ние.

К по́двигом себе страдания, святии,/ крепко обучи́вше,/ скры́стеся в верте́пе,/ моле́ньми непрестанными ко Господу моля́щеся/ крепость пода́ти и силу,/ и́миже судьба́ми, Человеколюбец весть,/ усну́ти в мире всем вам Богонача́льно повелева́ет.

Богособранный полк, лик блаженный,/ мученическое собрание неудобопобори́мое,/ Це́ркви Божественней кра́сное торжество́,/ нерасте́рзное совокупле́ние, во́инство непобедимое,/ незы́бленное благочестия основание,/ прииди́те вси, воспоим усердно, благочестия свидетели.

Сла́ва, глас 3. Иоа́нна монаха:

Архиерее преподобне, всеблаженне отче,/ чудотворче угодниче Христов, Аве́ркие,/ пророческим житие́м возсия́вый/ и апостольских сподо́бился еси даро́в,/ Спасу служа́ со Ангелы непрестанно,/ моли́ избавитися от всякаго преще́ния душа́м нашим.

И ны́не, Богоро́дичен или́ Крестобогоро́дичен.

Подо́бен: Велия Креста:

Оружие сердце Твое́ про́йде, Пречистая,/ егда Сына Твоего на Кресте́ видела еси и вопия́ла еси:/ небезча́дну Мя покажи,/ Сы́не Мой и Боже Мой,/ соблюды́й Мя по Рождестве́ Деву.

Тропа́рь святителю, глас 4:

Истины проповедник и чудотворец дивен показался еси,/ сирот отец и нищих заступник,/ бодрый пастырь словеснаго стада, бесом страшен,/ всех убо от тех нападений заступай, вопиющих ти:/ Аверкие отче наш,/ моли Христа Бога,/ да спасет души на́ша.

И святым отроко́м тропа́рь, глас 8:

Благочестия проповедники и воскресения умерших изобразители,/ Церкви столпы седмочисленныя,/ о́троки всеблаженныя песньми восхвалим:/ тии бо по многих ле́тех нетления, аки от сна воставше,/ всем возвестиша яве мертвых востание.

НА У́ТРЕНИ

Канон Окто́иха един и святителя канон на 4, егoже краегране́сие: Аверкиеву воспою великую славу. Иосиф.

Глас 2

Песнь 1

Ирмо́с: Гряди́те, лю́дие, пои́м песнь Христу Бо́гу,/ разде́льшему море и наста́вльшему люди,/ яже изведе́ из рабо́ты египетския,/ я́ко просла́вися.

Заре́ю светлою Трисолнечнаго Божества́ озаре́н быв, Аве́ркие,/ свет был еси,/ су́щия во тьме просвеща́я и все де́монское разруша́я омраче́ние.

Житие́ на земли имел еси, преблаженне, Небесное,/ с пло́тию, я́ко безпло́тен, жительствовав/ и стра́сти умертви́в, и священства дар прие́м.

Имея в тебе́, отче, Слово веща́ющо,/ безслове́сия разруши́л еси суему́дренных,/ де́монския хра́мы и куми́ры преле́стныя низложи́в.

Богоро́дичен:

Вити́йстии язы́цы глаго́лати недоумеют Твоего па́че сло́ва зача́тия:/ Бога бо родила́ еси плотию, Всечистая,/ нам уподо́бльшася за благосты́ню.

Ин канон мучеников. Глас 8.

Песнь 1

Ирмо́с: Колесницегони́теля фараоня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в море,/ Израиля же беглеца́, пешехо́дца, спасе,/ песнь Бо́гови воспева́юща.

Седми́чным число́м честву́еми, сняти́и о́троцы седмь,/ све́тлии зве́зды, на тверди Церко́вней сияюще,/ иже свиде́тельством на Небесная все́льшеся,/ помяни́те верою чту́щия вас.

Седмосве́тлым сия́нием Духа,/ вообража́юще златоза́рную свещу́, мученицы седмочи́сленнии,/ мрак ума́лили есте́ пре́лести/ и светом благочестия вся ны́не седмеросугу́бно просвеща́ете.

Богоро́дичен:

На Тя, Дево, надежду полага́ю спасения моего,/ грехо́вныя ти́ны всего мя омы́й и чи́ста мя соде́лай,/ Сыну Твое́му изя́щне благоугожда́юща и де́юща Того всесвятую волю.

Песнь 3

Ирмо́с: Утверди́ нас в Тебе́, Го́споди,/ Дре́вом умерщве́й грех,/ и страх Твой всади́/ в сердца́ нас, пою́щих Тя.

И словесы́ свяще́нными и показа́нии чуде́с, Аве́ркие,/ пре́лести море плавающия,/ преславно ко пристанищу спасения наставил еси.

Цельбы́ содева́я, совершая изря́дная,/ де́монов отгоня́я мечтания,/ спасения всем виновник, богатым предстатель ты был еси.

Слово священное, житие́ Боже́ственное,/ нрав, чудесы́ сияющь,/ жизнь твоя, отче, сла́вна и смерть честна́ бысть.

Богоро́дичен:

Сый Бог, прежде невидимый, ви́дим бысть, Дево,/ за благоутро́бие из чрева Твоего воплощаемь:/ тем Тя верою ублажаем.

Ин

Ирмо́с: Утвержде́й в начале Небеса разумом/ и зе́млю на вода́х основа́вый,/ на ка́мени мя, Христе, заповедей Твоих утверди́,/ я́ко несть свят, па́че Тебе́, Едине Человеколюбче.

Я́вльшеся на земли́, седмосве́тлии, я́ко светильницы добродетелей/ и по́двигов зарею, и чудес блиста́ньми све́тло просвети́вше,/ свет Богозна́ния всему миру просия́ете.

От пеле́н ма́терних возложи́вшеся Творцу,/ Того ра́ди небрего́сте о сла́ве и че́сти царской, и богатстве мимотеку́щем,/ от Негoже нетленных че́стей славу получи́сте.

Богоро́дичен:

Умерщвле́нный мой ум, Жизни де́йством, я́вльшияся из Тебе́, ми́ру воздви́гни,/ язвы и о́бразы потре́бльши грехо́вныя,/ Едина Богороди́тельнице, Всенепорочная.

Конда́к отроков, глас 4.

Подо́бен: Вознесыйся:

Прославивый на земли святыя Твоя,/ прежде Втораго и страшнаго пришествия Твоего, Христе,/ преславным воста́нием отроко́в показал еси Воскресение неве́дящим е,/ нетле́нна одея́ния и телеса́ яви́в,/ и царя уве́рил еси вопи́ти:/ воистинну есть мертвых востание.

Икос:

Чу́дное и высокое отроко́в воскресение ви́дев, иерарх Ефесский иногда́/ удиви́вся ра́зумом, пишет со тща́нием ве́рнейшему царю тех востание:/ приити́ сподо́би державе твое́й, владыко,/ зде да ви́диши Бога твоего силу, юже показа́ тебе́./ Абие воста́в великий победоносец, ше́ствие творя́ще радуяся,/ вторы́й явився Илия́ колесни́чник, вопи́я:/ воистинну есть мертвых востание.

Седален святителю, глас 8

Подо́бен: Премудрости:

Иерарх явился еси, ма́стию честно́ю обложе́н, отче, Богоде́тельно/ и вся совершая благодатию священнейше,/ даро́в же Боже́ственных и чудес све́тлостию украшаемь,/ Святым и Божественным Духом, всехвальне, неду́ги исцеляя и де́моны попаля́я,/ и множества прельщаемых обращая, Аве́ркие./ Сего ра́ди вопие́м ти:/ моли Христа Бога грехо́в оставле́ние пода́ти/ чту́щим любовию святую память твою́.

Сла́ва, отроко́м, глас 4.

Подо́бен: Скоро предвари́:

Я́ко столпи́ су́ще Церкве Христовы,/ сте́ны разори́сте неве́рствия кре́пко,/ седмобра́тнии мученицы./ Тем пре́жде смерти е́ллинскую ярость/ и паки по смерти ерети́ческую бурю разруши́сте,/ молящеся о душа́х наших.

И ны́не, Богоро́дичен:

Чистая, Всенепоро́чная и Неискусому́жная,/ Яже Едина Безле́тнаго Сына и Слова Божия в лето рождши:/ Сего́ со святыми и честны́ми патриархи, и мученики, и пророки, и преподобными моли́/ дарова́ти нам очищение и ве́лию милость.

Крестобогоро́дичен:

Дево Всенепорочная, Мати Христа Бога,/ оружие про́йде Твою́ пресвятую душу,/ егда́ распина́ема видела еси волею Сына и Бога Твоего./ Eгoже, Благословенная, моля́щи не преста́й, прощение прегрешений нам дарова́ти.

Песнь 4

Ирмо́с: Пою́ Тя, слу́хом бо, Го́споди, услышах и ужасо́хся,/ до мене́ бо и́деши, мене́ ища́, заблуждшаго./ Тем многое Твое́ снизхождение, еже на мя,/ прославляю, Многоми́лостиве.

Вельми́ престо́л, преподобне, украси́л еси, святителю,/ великими бо чудесы́ преле́потствовал еси и житие́м светлым./ Сего́ ра́ди Превеликий Бог наш вельми́ тя прослави.

Милости Воли́теля Господа ве́дый, Богоносе,/ те́пле Его умоли́л еси/ на исцеление и спасение многих/ те́плых вод всечу́дное сотвори́ти истечение.

Плодови́ты безча́дныя сотворил еси Божиею благодатию,/ совершил еси помышления,/ вложи́в бо тем, Аве́ркие, сло́ва се́мя я́ве,/ я́ко добрый сеятель, пожа́л еси кла́сы стори́цею, блаженне.

Богоро́дичен:

Исцели́ла еси сокрушение, Всенепорочная, и дре́внее окая́нство земноро́дных,/ рождши Господа и Царя Христа,/ понесшаго неду́ги на́ша за благоутробие неизглаго́ланное, Богоневесто.

Ин

Ирмо́с: Ты моя кре́пость, Го́споди,/ Ты моя и си́ла,/ Ты мой Бог, Ты мое ра́дование,/ не оста́вль не́дра Отча/ и нашу нищету́ посети́в./ Тем с пророком Авваку́мом зову́ Ти:/ силе Твое́й сла́ва, Человеколюбче.

Бра́тским совокупля́еми союзом и Боже́ственным желанием распаляеми,/ согласием истиннаго, мученицы Господни, испове́дания и веры/ посрами́сте мучителей суему́дренный ра́зум и пре́лести многобо́жное учение.

За Христа и со Христом гони́ми,/ в верте́пех, гора́х же и про́пастех земны́х скрыва́еми./ Того ра́ди сном живоносным вместо смерти усну́ли есте́ на ле́та должа́йшая,/ я́вственно утверждающе общее земны́х Воскресение.

Богоро́дичен:

Да о́браз, засы́панный страстьми́, обнови́ши богатством благосты́ни, в Де́вственную вселился еси утробу,/ из нея́же Мудрость храм Божий созда́л еси,/ Еюже с человеки пожи́л еси, Щедрый, и спасл еси мира концы.

Песнь 5

Ирмо́с: Просвеще́ние во тьме лежащих,/ спасение отча́янных, Христе Спа́се мой,/ к Тебе́ у́тренюю, Царю мира,/ просвети́ мя сиянием Твоим,/ ино́го бо, ра́зве Тебе́, бога не знаю.

Поста́вив твоя но́ги на ка́мени сердца, Богомудре,/ падшия поги́белию и че́сти камению подаю́щия, блаженне,/ Божественными словесы́ чествова́ти научил еси Камень,/ Иисуса Христа и Бога нашего.

Врача́ разли́чно неду́гующих, путевожда́ всех, прельще́нных злосове́тием,/ мирополо́жницу честны́х дарова́ний, прия́телище Божественнаго Духа,/ священноучителя почтим Аве́ркия.

Вино повеле́нием твоим в едином сосу́де со елеем, ви́ды же другая вложе́нныя,/ во время свое несме́сно преславно изливаются,/ преизоби́лующую благодать Твою́ явля́юще я́ве, священне.

Богоро́дичен:

Зако́ни в Тебе́ пресла́вно, Дево, обновля́ются,/ ражда́еши бо безсе́менно Бога Спаса/ и пребываеши де́вствующи па́ки,/ стра́нно чу́до./ Тем Тя, Матерь Емману́илеву,/ благочестно возвещаем.

Ин

Ирмо́с: Вску́ю мя отри́нул еси/ от лица твоего, Све́те незаходи́мый,/ и покрыла мя есть чужда́я тьма, окаяннаго,/ но обрати́ мя и к свету заповедей Твоих/ пути моя направи, молюся.

Умертви́вшеся миру, вся жите́йская кра́сная отринули есте́,/ Живот Держащему живот свой преда́вше,/ живоносный сон, на до́лга ле́та влеку́ще, общаго воскресения образ.

Страдальцы житием яви́стеся, до́лгая гонения претерпе́вше,/ в гла́де и жа́жди, в разных беда́х и ско́рбех, и злоиму́ществах за Христа терпя́ще,/ и богатя́щеся су́що воспокое́нием.

Богоро́дичен:

В Тебе́, стене́, обогаща́емии и предста́тельством Твоим сохраня́емии,/ Твое́ю Божественною славою хва́лящеся, Тя ублажаем:/ Ты бо, Пресвятая, душа́м нашим источаеши веселие и радость.

Песнь 6

Ирмо́с: В бе́здне грехо́вней валя́яся,/ неизследную милосердия Твоего призываю бе́здну:/ от тли, Боже, мя возведи́.

От востока к западу пришел еси,/ де́монския и лютыя страсти царицу, преподобне, отрешая/ силою Духа.

Стра́нен мира явился еси, священнейше,/ странная и страшная совершая чудеса́,/ и ходя́ в телеси́, и отсюду отшед, Аверкие.

Молниезра́чен, отче, ви́димь, де́монския победил еси полки́,/ терпе́ти не могу́щия твоего, Аве́ркие, прещения, Богодухновенне.

Богоро́дичен:

Тобою, Всесвятая Богоневесто,/ умерщвле́ннии, жизни сподо́бихомся/ и, тле́нию работающии, нетлением я́ве обогати́хомся.

Ин

Ирмо́с: Очисти мя, Спа́се,/ мно́га бо беззакония моя/ и из глубины́ зол возведя́, молюся:/ к Тебе́ бо возопи́х и услы́ши мя,/ Боже спасения моего.

Любовию, яже к Бо́гу, Ефесскаго отечества, мудрии,/ род светлый, богатство же пресветлое и славу пречестну́ю оставили есте́,/ наследие Небесное произбра́вше.

Седмочи́сленный страдальцев лик, Божественне совокупля́емь,/ низложи́ враго́в множество многочисленное/ и славу прия́ша испове́дания, и венцы страдания.

Богоро́дичен:

Возсия́ от Сиона Вышняго благолепие/ приятием пло́ти, по соединению неизрече́нному,/ из Тебе́, Неискусобрачная, оде́ян, и мир просвети́.

Конда́к, глас 8:

Подо́бен: Яко начатки:

Я́ко священника превели́каго и апостолов совсе́льника,/ Церковь почита́ет тя, вся верных, Аверкие:/ юже твоими моли́твами соблюда́й, блаженне,/ непобеди́му и необурева́ему от всякия е́реси, и нескверну,/ я́ко приснопамятный.

Икос:

Мира всего суету́ помышляя, мира учуже́нный/ и, страсти Христовы подражая, плотски́я страсти умертви́л еси/ и, крест твой взем, последовал еси, блаженне, Творцу твое́му,/ и, пребывая с Ним, ны́не молися за чту́щия тя истинно,/ я́ко приснопа́мятный.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои о́троцы небрего́ша безбожнаго веления;/ посреде́ же огня вве́ржени, ороша́еми, поя́ху:/ благословен еси, Боже отец наших.

Я́ко Боже́ственный па́стырь, я́ко чуде́с самотво́рец,/ слепы́м е́же зре́ти молитвою́, отче, пода́л еси, и слышати глухи́м,/ очище́ние же прокаже́нным, и благотече́ние хромым, воспева́ющим:/ благословен еси, Боже отец наших.

Пропове́дает твое́ чудодея́ние, му́дре, во век те́плых вод искипе́ние/ и столп, у гроба твоего лежащий,/ егoже от Рима, великаго града, принесе́ лукавый дух, изгна́нный тобою, отче Аве́ркие.

Лю́дем смире́нным вождь был еси,/ высо́к в виде́ниих, и де́йствиих же, и силах яви́вся, священнейше,/ и Высочайшаго Царя угодник, Емуже взываем:/ благословен еси, Боже отец наших.

Богоро́дичен:

Роди́ся из тебе́, Eгoже роди́ Отец пре́жде денни́цы,/ во двою́ существу́ и хоте́нию, я́ко Бог же и Человек, Отроковице, знаемь всем, верою зовущим:/ Благословенная, Бога плотию рождшая.

Ин

Ирмо́с: Божия снизхожде́ния/ огнь устыде́ся в Вавилоне иногда́,/ сего ради о́троцы в пещи́ радованною ного́ю,/ я́ко во цве́тнице, лику́юще, поя́ху:/ благословен еси, Боже отец наших.

Бо́гу покаря́ющеся, Божественным законом наказу́еми о́троцы,/ разумом пра́вым пребеззако́нная повеле́ния мучителей злых укори́ли есте́,/ смертию жизнь приобре́тше и нетление, ме́ртвым обога́щшеся те́лом.

Смертную чашу за Творца пи́ти жела́юще верно безсмертия ради и нетления,/ погребение претерпе́сте теле́с,/ изъясня́юще воста́ние пресла́вным воста́нием вашим, мученицы.

Богоро́дичен:

Я́ко утро возсияла еси, правды Солнце иму́щи,/ от тьмы ми́ра неве́дения изымающаго Богове́дением,/ Емуже поем, Пречистая:/ благословен еси, Боже отец наших.

Песнь 8

Ирмо́с: В пещь о́гненную ко отроко́м еврейским снисше́дшаго/ и пла́мень в ро́су прело́жшаго Бога,/ пойте дела, я́ко Господа,/ и превозноси́те во вся веки.

Преславный па́стырь, неистощи́мый исто́чник исцелений,/ Це́ркве столп, верных утвержде́ние,/ великий светильник, многосве́тлый священноучи́тель да почти́тся Аве́ркий.

Ты, я́коже фи́никс, псало́мски процве́л еси во дво́рех Бога Жива́го;/ умно́жился еси, я́ко кедр и я́ко ма́слина, му́дре, показался еси,/ ма́стию дел твоих всех умаща́я ли́ца ве́рою.

Горы́ верху́ действи́тельным жи́тельством я́вственне, я́коже град познался еси стоящь,/ и погру́жшийся дре́вле пре́лестию град твой, преподобне,/ Града Вышняго явля́еши наследника.

Богоро́дичен:

Се одр Соломо́нов, егoже обстоя́т си́льнии,/ Богодухнове́ннаго Писания ны́не прорица́ния,/ на немже Христос Бог воплощением Божественным почи́л есть,/ Благословенная и Обрадованная.

Ин

Ирмо́с: Седмери́цею пещь/ халдейский мучитель/ Богочестивым неи́стовно разжже́,/ силою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Седмери́чно облиста́ па́мять ваша днесь,/ солнечных луч обра́зно просвеща́ющи, му́дрии, подсо́лнечную/ страда́льческими све́тлостьми, чудоде́йственными же блиста́ньми и Боже́ственных догма́тов заря́ми,/ имиже уверя́ете всем воста́ние теле́с и мертвых нетление.

Авимеле́хово прежде на селе́ сохране́ние положи́ Бог,/ я́ко не ви́дети гра́да иногда запусте́ния./ Вас же соблюде́ ле́ты множа́йшими в верте́пе спящия/ на увере́ние всех воскресения, о́троцы,/ веко́в седмочи́сленных равночи́сленнии свети́льницы.

Богоро́дичен:

Освятившися Духом, Богородице Всенепорочная,/ и́стинно прия́ла еси во чре́ве Безначальнаго Сына и Присносущнаго,/ в Тебе́, Чистая, воплоще́ннаго на благодея́ние верою вопиющих:/ о́троцы, благословите, священницы, воспойте,/ людие, превозносите во вся веки.

Песнь 9

Ирмо́с: От Бога Бога Слова,/ неизрече́нною мудростию прише́дшаго обнови́ти Адама,/ я́дию в тле́ние падшаго лю́те,/ от Святыя Девы неизреченно воплотившагося нас ради,/ ве́рнии единому́дренно пе́сньми велича́ем.

Я́ко светоза́рно твое́ житие́, я́ко красны́ но́ги,/ я́ко зело́ чу́дно е́же к Бо́гу маа́ние³⁰ же вку́пе и бли́жность,/ я́ко велича́йшая благодать, свы́ше да́нная тебе́, му́дре./ Сего ради верою почитаем тя, Аве́ркие.

Тя, сожительника всех святых мученик и ревнителя Боже́ственных ученик,/ патриархов равноче́стна, пророков и преподобных,/ и Небесных слуг собеседника верою славим, Аве́ркие.

Пресвятая твоя память, простира́ющися в мире,/ просвещает челове́к ду́ши светом, богатым в благодати,/ ю́же соверша́юще любовию,/ страсте́й нас и тьмы напа́стныя/ моли́твами твоими изба́ви, молимся, Аве́ркие.

Богоро́дичен:

Све́тла Тя свети́льника проро́к прови́де,/ свещу́ Божественную и́стинно в Себе нося́щую, Всесвятая Дево,/ Единаго Пресущнаго Бога,/ за благоутробие милости из Тебе́ вочеловечшася.

Ин

Ирмо́с: Ужасе́ся о сем Небо/ и земли удиви́шася концы,/ я́ко Бог яви́ся челове́ком пло́тски/ и чрево Твое́ бысть простра́ннейшее Небе́с:/ тем Тя, Богородицу,/ Ангелов и челове́к чинонача́лия величают.

Удиви́ся о сем всяк земноро́дный, почуди́ся же и всяк ум,/ я́ко ме́ртвии, по многовре́меннем погребе́нии, в верте́пе лежа́ще, аки в вечер усну́вше и у́тре обычно востаю́ще, яви́шася,/ уверя́юще мертвых общее востание.

Седмочи́сленнии мучеников све́тлии свети́льницы,/ ефе́сская свети́ла присносве́тлая,/ мира всего молитвенницы и предста́теле те́плии,/ общаго воскресения пропове́дницы и храни́телие верных,/ испроси́те тишину нам,и спасение, и мир всем концем.

Богоро́дичен:

Я́ко Мати Пострадавшаго о нас, душетленных мя страсте́й изба́ви;/ я́ко Милосе́рдая, разреши́ прегрешений у́зы;/ я́ко Благая, ублажи́ ны́не озло́бленную мою ду́шу де́монскими прило́ги, Дево Богородице,/ да пою Тя, Всепетую.

Светилен.

Подо́бен: Жены, услышите:

Потещи́ тя пону́ди блазноде́латель демон к Риму гра́ду,/ вше́дый в царе́ву дщерь лука́вно, из неяже изгнал пса,/ обремене́нна послал еси и столп нося́ща во Иерапо́ль, Аверкие Богогласе.

Сла́ва, мучеников:

Ору́жием Честна́го Твоего́ Креста́ огра́ждшеся, страстотерпцы Твои, Сло́ве,/ проти́вныя си́лы крепко победи́ша и мучителей посрами́ша,/ и о Тебе́ пострада́ша,/ и Тебе́, Христе мой, Всецарю́, сца́рствуют ку́пно.

И ны́не, Богоро́дичен:

О та́ин Твоих! О чуде́с Твоих!/ Како по рождестве Дева пребыла́ еси, я́ко прежде рождества,/ како Бога вмести́ла еси, нигдеже вместимаго,/ но вои́стинну несказа́нна суть Твоя вся,/ Благословенная Марие.

На Литургии: Блаженны Окто́иха на 4 и свята́го песнь 3-я на 4. Прокимен, глас 1: Уста моя возглаголют премудрость и поучение сердца моего разум. Стих: Услышите сия, вси язы́цы: Апостол к Евреем, зачало 318. Аллилуия, глас 2: Уста праведнаго поучатся премудрости. Стих: Закон Бога его в сердце его, и не за́пнутся стопы́ его. Евангелие от Иоанна, зачало 36. Причастен: В память вечную:

Тропа́рь, глас 8:

Звездам заря послушания жизнь лучших показа,/ я́ко два светила сияюще нам,/ Феодор и Павел Богомудрии, Ростовская похвало,/ житием чистым Бо́гу присвоишася.

Молитва

О преподобныи отцы, пастырие и учителие наши, блаженнии авво Феодоре и авво Павле! В лета древняя путе́м заповедей Господних ше́ствовати изво́ливше, притекли́ есте в место пустынное, идеже благословением и моли́твами началовождя своего, преподобнаго и Богоноснаго Сергия, чудотворца Радонежскаго, преславную обитель святых страстотерпцев Бориса и Глеба возградили есте, во устроение благочестия иноческаго жительства, и противу невидимых врагов спасения нашего тамо подвизастеся, и тако угодницы бысте Богови, верою, надеждою и любовию благолепне украшающеся, постом же и бдением и моли́твами Бо́гу благоугождающе, и во вся́ком благочестии ко временному житию и вечному спасению о́брази нам явльшеся. И ны́не убо, преподобнии отцы наши, не забудите посещати чада своя, во еже отразити от нас наве́ты вражия: наставите же и утвердите нас в по́двизех добрых, к жизни вечней души на́ша руководствующе. Молитеся милости Подателю и Господу всяческих, да спасет нас, имиже весть судьбами, и наследники сотворит с вами вечнаго наслаждения, да непрестанно славим Всесвятое Имя Отца, и Сына, и Свята́го Духа в безконечныя веки веков. Аминь.