25-й день
Святых мученик и нотари́й Маркиа́на чтеца и Мартири́я иподиакона
Преподобнаго Марти́рия диакона, в Да́льних пеще́рах почива́ющаго
Святых мученик и нотари́й Маркиа́на чтеца и Мартири́я иподиакона
На Го́споди, воззва́х: стихи́ры глас 4.
Подо́бен: Я́ко добля:
Течение соверши́вше и веру соблю́дше,/ муче́ния венцем увязо́стеся, Маркиане и Мартирие,/ столпи́ непоколеби́мии Церкве,/ сосцы́, млеко́ неле́стное источающие,/ светлии би́серы, светильницы,/ и́же тварь светлостьми́ благоче́стия просвещающе.
Един разум внося́ще и едино соглаша́юще, двоица Боже́ственная,/ разделение Ариево разрушили есте́,/ научающе чествова́ти Соприсносущна Отцу́ Сы́на и Собезначальна, и Духу,/ во Еди́нице Троицу и Троицу во Еди́нице,/ Едино Естество́ Треми́ Ли́цы Нераздельно.
После́дователие и единонра́внии,/ подо́бницы и единоревни́телие/ священнопропове́дника Павла явистеся,/ и излиянием кро́ве враги потопи́сте,/ и лю́тых ересе́й изсуши́сте пото́к,/ и явистеся река благоче́стия, напаяющая Церковь Христову,/ Маркиане и Мартирие.
Сла́ва, глас 1.
Ге́рманово:
Ученицы́ и после́дователие бывше/ Единосущныя Троицы проповедника и исповедника,/ и с ним за Ню гони́ми, блаженнии,/ ме́чную смерть ерети́ческих языкобо́лий предсуди́сте./ Тем и мученическими венцы́ украси́вшеся от Бога/ и дерзновение приемше,/ моли́те избавитися от бед чтущим па́мять вашу.
И ны́не, Богоро́дичен или́ Крестобогоро́дичен.
Подо́бен: Всехва́льнии мученицы:
А́гнца, А́гница и Всенепоро́чная Владычица,/ на Кресте́ я́ко ви́девши, зра́ка не иму́ща, ни добро́ты,/ увы Мне, плачущи глаго́лаше:/ где добро́та Твоя́ за́йде, Сладчайший,/ где благолепие, где благода́ть сияющая о́браза Твоего́,/ Сы́не Мой Любезнейший.
На стиховне Окто́иха.
Сла́ва, глас 3:
Разумнии Церкве светильницы и Троице поборницы,/ Маркиан и Мартирий, щито́м веры е́реси низложивше,/ Православия светом мир просветиша,/ Павлу повинующеся, равноапостолу, па́стырю и учителю истинно догма́тов,/ Ариево и Несто́риево низложиша разделение,/ Саве́ллиево и Севи́рово сли́тие отражающе,/ Троически Богосло́вяще Еди́ницу/ и от Девы Воплощшася Бога,/ во двою́ существу Единаго Христа,/ благоче́стно всем воспевати, Всехва́льнии, проповедаша./ Тем венцы́ победы с Небесе приемше, Богоглаго́ливии,/ просят нам ве́лия ми́лости.
И ны́не, Богоро́дичен или́ Крестобогоро́дичен:
Оружие се́рдце Твое́ про́йде, Пречистая,/ егда́ Сы́на Твоего́́ на Кресте́ видела еси́ и вопияла еси́:/ небезчадну Мя покажи, Сы́не Мой и Боже Мой,/ соблюды́й Мя по Рождестве Де́ву.
Тропа́рь, глас 1:
Мученик двоица единонравная,/ Маркиан с Мартирием славным, Ариево нечестие разрушиша/ и Соприсносущна Сы́на Отцу́ и Духови веровати научиша,/ Павлу повинующеся истинных повелений учителю,/ те́мже мечем убиени, умроша;/ и при́сно со Христом живуще,/ о нас Того молят/ спасти́ души на́ша.
НА У́ТРЕНИ
Оба кано́на Окто́иха. И святы́х кано́н на 4. Егóже краегране́сие: Двум приношу мучеником пения. Иосиф. Глас 4.
Песнь 1
Ирмо́с: Триста́ты кре́пкия,/ Рожде́йся от Девы,/ безстрастия во глубине/ души тричастное потопи́, молюся:/ да Тебе́, я́ко в тимпа́не, во умерщвлении телесе/ победное воспою пение.
Превесьма́ светом Святыя Троицы осия́еми присно,/ светильницы непреле́стнии бываете, святии,/ тем, верою светоносный праздник ваш днесь совершающе,/ све́тло веселимся.
Видети, на земли возсиявшее Слово, из Девы нас ради желающе, страдальцы,/ Отцу́ Единосущна Сего испове́дающе,/ ну́жднейшую смерть, по́мыслом крепчайшим, пострадасте.
Павла мудраго, Богоглаго́льницы, я́вльшеся после́дователе и ученицы́,/ Единоче́стна Отцу́ Сы́на проповедасте,/ Тем, мечи́ ссече́ни бывше,/ излиянием кро́ве, страстотерпцы, землю освяти́сте.
Богоро́дичен: Безначальнаго Сы́на Бо́жия заче́нши, воплотила еси́, Чи́стая,/ бываема Человека за ми́лость неизглаго́ланную:/ тем, Тому покланяющеся,/ благоче́стно Тя сла́вим, Вину всех обожения.
Песнь 3
Ирмо́с: Не му́дростию и силою, и богатством хвалимся,/ но Тобою, Отчею Ипоста́сною Мудростию, Христе́:/ несть бо свят, па́че/ Тебе́, Человеколюбче.
Православия просвещаеми Боже́ственным Духом,/ Ариево омрачение отню́д прогнасте,/ свидетели бывше Вседержителя.
Ра́вно Слово Отцу́ догма́тствующе, святии,/ разсуди́сте умре́ти, Маркиане и Мартирие,/ и к безконечней Жизни преидосте.
Воинствосло́вием священным А́нгелом сочисли́стеся/ и мученик лико́м пресве́тло совокупи́стеся,/ тем честну́ю вашу па́мять похваляем.
Богоро́дичен: Упещре́на ря́сны златыми я́ко Царица,/ Царя и Бо́га одесну́ю ны́не предстоиши, Влады́чице,/ молящи о рабех Твоих.
Седа́лен, глас 3.
Подо́бен: Божественныя веры:
Повеление Боже́ственное испове́дающе даже до кро́ве,/ еже о Нем приясте, мученицы славнии,/ зловерных пре́лесть обличи́вше и Православную веру соблюдше,/ но моли́теся Христу́ Бо́гу непрестанно/ дарова́ти нам ве́лию ми́лость.
Сла́ва, и ны́не, Богоро́дичен:
Божественнаго естества́ не отлу́чся,/ плоть быв во чреве Твое́м,/ но Бог вочеловечся и пребысть,/ И́же по рождестве, Матерь, Тя Де́ву,/ я́ко прежде рождества,/ сохранив Всенепоро́чну Един Господь./ Того прилежно моли́ дарова́ти нам велию ми́лость.
Крестобогоро́дичен:
Нескве́рная А́гница Сло́ва, Нетленная Дева Мати,/ на Кресте́ зрящи повешена из Нея без болезни Прозябшаго,/ ма́терски подобно, рыдающи, вопияше:/ увы́ Мне, Чадо Мое,/ како стра́ждеши волею,/ хотя избавити от страсте́й безчестия человека.
Песнь 4
Ирмо́с: Седя́й в сла́ве на Престо́ле Божества́,/ во облаце ле́гце/ прии́де Иисус Пребоже́ственный/ нетленною дла́нию, и спасе́ зовущия:/ сла́ва, Христе́, си́ле Твое́й.
До́блим помы́слом и совершенною мудростию Православия, мученицы Господни, утверди́вшеся,/ мученически по́двиг соверши́сте,/ ерети́ческую тьму отгна́ли есте́.
Иже Сло́ва не проповедав Отцу́ Единосущна,/ разгневався несмы́сленно на мученики,/ удави́ся жи́лами священных ваших по́двиг и погрузи́ся кро́вными теченьми, Божиею благода́тию.
Во́инствовавше Господу верою, святии, и пострадавше,/ Небе́сным во́инством сочисли́стеся,/ тем ублажа́етеся,/ укрепление наше и просвещение бывающе.
Сосцы́ Церковнии,/ млеко́ источающии Православия и благочести́выя питающии,/ Маркиан до́блий и Мартирий,/ да похва́лятся радостными песнопении.
Богоро́дичен: Священный дре́вле пророк го́ру Божественную нарече́,/ доброде́тельми, Де́во Пречистая, весьма́ осене́ну:/ из Неяже Слово спаси́тельное явися/ на обновление и просвещение душа́м нашим.
Песнь 5
Ирмо́с: Нечести́вии не у́зрят Славы Твоея́, Христе́,/ но мы Тя, Единородне,/ Отеческия Славы сияние Божества́́,/ от но́щи у́тренююще,/ воспеваем Тя, Человеколюбче.
Прему́дрых яви́стеся догма́тов последователи/ Павла, священноде́теля Божественнаго,/ егóже нра́вы, мученицы, подражавше,/ терпеливно пострадасте и законно венча́стеся.
Я́ко зве́зды сияете на высоте́ честныя Церкве све́тло,/ тьму глубочайшую отгоняюще Ариевы е́реси,/ мученицы до́блественнейшии.
Удалившеся, святии, жития́ красот, прибли́жистеся Христу,/ мале́йшею же кровию недви́жимое Царство,/ славнии страстотерпцы, насле́довасте.
Богоро́дичен: Истинна родила́ еси́ Сы́на на земли,/ Единосу́щна Отцу́ и Боже́ственному Духу, Богородительнице:/ Егóже непрестанно моли́/ уще́дрити ду́ши на́ша.
Песнь 6
Ирмо́с: Приидо́х во глубины́ морския,/ и потопила мя есть буря многих грехов,/ но я́ко Бог из глубины возведи живот мой,/ Многоми́лостиве.
Глаголом последующе па́стыря, премудраго Павла,/ Православную веру соблюдо́сте/ и, я́ко агнцы, кровопи́иц мечи́ закалаетеся, радующеся.
Честна́ пред Го́сподем, благославнии,/ ваша смерть явися, мудрии ору́жницы,/ тем почестьми́ ле́тними, святии, от всех ублажа́етеся.
Вас, до́блия страстотерпцы, Маркиане всеблаженне и Мартирие,/ источник чудес Христова Церковь иму́щи,/ вечно веселится.
Богоро́дичен: Усты́ и язы́ком Матерь Тя всеи́стинно, Де́во,/ Бо́га на́шего испове́дуем:/ Того, Чи́стая, прилежно моли́ спасти́ся душа́м нашим.
Конда́к, глас 4.
Подо́бен: Вознесыйся:
Подви́гшеся до́бре от младенства,/ Маркиане с мудрым Мартирием,/ отсту́пника А́рия низложи́сте,/ невредно сохранше Православную ве́ру,/ Павлу последующе, мудрому учителю,/ те́мже с ним обретосте живот,/ я́ко Троицы побо́рницы изря́днейшии.
И́кос:
Я́ко служителие благоче́стия Бо́га Человеколюбца,/ двоице благословенная, предвари́те мя скоро и лю́тых избавите,/ слово ми мудрости подаю́ще, ваше похвали́ти страдание,/ еже за ве́ру, святии, нравом несомне́нным пострадавше, венцы прия́сте Небесныя./ Лико́м страдальцев, и апостолов, и учи́телей, и честны́х архиере́ев свесели́теся,/ я́ко проповедницы Бо́жия Слова и Троицы поборницы изря́днейшии.
Песнь 7
Ирмо́с: Авраамстии иногда́ в Вавилоне о́троцы/ пе́щный пла́мень попра́ша, пе́сньми взывающе:/ отец на́ших Боже, благословен еси́.
После́дующе до́бре священнаго па́стыря, Православием удобряеми,/ руками закла́ни бы́сте злославных всу́е,/ преславнии ору́жницы.
Законоположе́ние Божие невредимо верно сохранше,/ мученицы Божественнии,/ законно пострада́сте от рук беззаконных,/ ку́пно закла́ни бывше.
По погребе́нии священнем приходя́щим с верою ко гро́бу вашему/ неду́ги погребаете, святии,/ еже к Жизнодателю святым хода́тайством вашим.
От источников та́инственно священных почерпа́юще Божественную благода́ть целе́ний,/ верныя напоя́ете,/ неду́г вся́кое изсуша́юще умноже́ние.
Богоро́дичен: Изба́влении Твоим Рождеством, Богомати, вечнаго осуждения,/ радуйся, зовем Ти,/ при́сно Благослове́нная и Обра́дованная.
Песнь 8
Ирмо́с: Изба́вителю всех, Всесильне,/ посреде́ пламене благоче́ствовавшия,/ снизшед, ороси́л еси́/ и научил еси́ пети:/ вся дела́ благословите, пойте Го́спода.
Я́коже два а́гнца, закала́етеся,/ А́гнца Бо́жия, Единосущна Отцу́ проповедающе,/ и, Трапе́зе Вышней принесе́ни бывше, страдальцев собору сочетава́етеся.
Укрепля́еми силою Духа, искорени́сте пре́лести свере́пство/ и, крепко пострадавше, лю́те осла́бленныя немощми́,/ мудрии исцеляете мученицы.
Вра́чеве страсте́й бывше душ на́ших, святии мученицы,/ лютыя неду́ги и привоста́ния противная/ разреши́те Божественными моли́твами.
Воспеваем Отца Нерожденнаго, и Сына, и Ду́ха Свята́го,/ Едино Существо Несозда́нно и Божество́ Едино, и вопие́м согласно:/ вся дела благословите Господня Го́спода.
Богоро́дичен: Умерщвле́нныя ны оживила еси́,/ Жизнь всех рождшая, Богороди́тельнице Влады́чице,/ мучеников сла́ва и праведных,/ и прегрешений теплое очисти́лище.
Песнь 9
Ирмо́с: Ева убо неду́гом преслушания/ клятву вселила есть,/ Ты же, Де́во Богоро́дице,/ прозябением чревоноше́ния, мирови благословение процвела́ еси́:/ тем Тя вси величаем.
Крепостию вжиля́еми Боже́ственною, смерти, страстотерпцы, не убоя́стеся,/ но, усердно подло́жше мече́м вы́и,/ испо́лнисте до́блественно по́двиг Боже́ственный, тем досто́йно блажите́ся.
Я́ко два светильника све́тла, просвещаете вселенныя исполнения/ Божественными страданий светлостьми́, Маркиане мудре и Мартирие,/ тьму мрачныя е́реси Ариевы отгоня́ще.
Венцы́ славы от Бога, победивше слепоумнаго Македония, приясте достойно;/ и Престо́лу Владычню предстояще,/ прегрешений нам проси́те разрешение совершенно, достославнии.
Память Боже́ственная ваша возсия солнца светлейши,/ всех просвещающи сердца сию́ совершающих, блаженнии,/ в нейже умоли́те Го́спода тьмы согрешений нас избавити.
Богоро́дичен: Света жили́ще, Чи́стая, су́щи,/ души моей зе́ницы просвети, очерне́вшия небрежением/ и тьмою неве́дения глубочайшею всегда одержи́мыя, Всенепоро́чная,/ я́ко да верою ублажаю Тя.
Свети́лен.
Подо́бен: Духом:
Павла всеблаженнаго последователи бывше, течение совершисте,/ Христова Царствия и Славы безсмертныя с ним получи́сте со всеми святыми,/ и предстои́те ку́пно Троице Честне́й,/ славосло́вяще Ю досто́йно.
Сла́ва, и ны́не, Богоро́дичен:
Похваляют Рождество Твое́ Безплотных чи́ни,/ радости бо сущия на земли́ Ты исполнила еси́ едина,/ тем Тя, Пренепорочную, ве́рнии сла́вим, пе́сньми славословяще:/ Свет бо сущим во тьме возсияла еси́, я́ко утро возсиява́ющее день.
НА ЛИТУРГИ́И
Проки́мен, глас 4: Дивен Бог во святы́х Своих, Бог Израилев. Апостол к Ефесеем, зача́ло 224, от полу́. Аллилуия, глас 4: Воззваша пра́веднии: Ева́нгелие от Матфе́я, зача́ло 34, от полу́. Причастен: Ра́дуйтеся:
Святыя праведныя Тави́фы
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 4:
Церковь Христова чудо днесь страшное прославляет:/ едина от дщерей Адама гробом прие́млется,/ я́ко земля в землю отходит, исполняющи веление Зиждителя,/ но Той я́ко смерти Потребитель апостолом Свои́м провещава́ет, глаголя:/ тебе́ сказую, Тави́фо, востани и будеши паки жити,/ да уразумеют вси тебе́ ра́ди, я́ко Аз есмь Воскресение и Жизнь,/ и всяк веруяй в Мя не у́мрет во веки.
Востания егда твоего́ слух, Тави́фо, обы́де пределы Иоппийския,/ тогда вера Христова утвердися во мно́зех/ разумеша бо вси владычество Го́спода,/ И́же и́мать власть возставляти мертвыя,/ сие бо есть едино от образо́в сбытие́,/ я́ко пожерта бысть смерть победою Сы́на Бо́жия,/ и Той есть Владыка и жизни Податель,/ обновляяй и просвещаяй души на́ша.
Иже есть всех человеков спасе́ние,/ посла́ ученики Своя по вселенней,/ да проповедают Его́ Воскресение,/ и аще не воскре́се Господь, су́етно упование жизни вечныя./ Верховный же от апостол прииде во Иоппию, повелевает Тавифе воскреснути от мертвых,/ да вси ве́рнии уразумеют воистину, я́ко жительствует жизнь воскре́сением Христовым./ Мы же, несумне́нно верующе чудеси́ и воскре́сению,/ припа́даем в молитве ко Вседержителю:/ Многомилостиве и Милосерде,/ моли́твами святыя Твоея́ спаси́ души на́ша.
Сла́ва, глас той же:
Яже се́рна нарицаемая, воистину той уподо́билася еси́, Тавифо,/ егда со тщанием скоро устремилася еси́ уклонитися всякаго нечестия,/ ближния своя возлюбила еси́, и украси́лася еси́ преизобильно милосердием./ Отону́дуже сия́ царица доброде́телей возведе тя к жизни Небесней,/ обаче Христос Царь Славы, видя тя, мудрую деву,/ со украшенным светильником в деснице,/ паки тя воздвизает к жизни временней,/ да наставиши и нас ходити во свете,/ являюще достойное звания своего́ во плоти жительство,/ и да будем совершени воистину,/ и сподо́бимся райския сладости Иерусалима Горняго/ твои́ми моли́твами ко Спасу нашему.
И ны́не: Догматик гласа или во глас той же: И́же тебе́ ради:
Вход и чтения три преподо́бническая.
Прему́дрости Соломоновы чтение (главы́ 5 и 6):
Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.
Прему́дрости Соломо́новы чтение (глава́ 3):
Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.
Прему́дрости Соломо́новы чтение (глава́ 4):
Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.
На лити́и стихи́ры, глас 1:
Блажен праведник, пребываяй в благода́ти,/ уподо́бися бо древу при исхо́дищих вод,/ еже плоды изобильны приносит во времена своя,/ егóже лист не отпаде́т./ Сия́ глаголы Давидовы видим сбываеми на тебе́, Тавифо:/ утвердила бо еси́ спасе́ние твое́ на твердом ка́мени,/ и́же есть попрание грехолюбия,/ поставила еси́ но́зе на путь доброде́тели/ и востекла́ еси́ в Небесныя обители,/ идеже седи́ши во сла́ве невечерней,/ тамо вознеси молитвы ко Престо́лу Триединаго Безсмертнаго,/ да разрешит плени́цы греховныя,/ имиже растле́хом образ Его́, живущий в нас,/ и утвердит ны в благочестии.
Исполнися ны́не рече́ние Премудраго,/ я́ко добрая жена имать славу и честь;/ во всю землю изы́де веща́ние о тебе́, Тавифо,/ вси бо и́мут тя образ благоче́стия, еже подоба́ет в житии́ стяжа́ти,/ да исполнится высочайшая заповедь./ Любы́ твоя́ простира́шеся на человеки, по повелению Божию,/ сего ради и Господь возлюби тя и возстави от гроба./ Не забуди нас, совершающих па́мять твою́́,/ и моли́ Владыку всех Христа́ Бо́га нашего,/Иже есть Любы́ совершенная,/ да мир Его́ воцарится в нас и по всей земли,/ и пребудем при́сно в любви Его́.
Сла́ва, глас 5:
Днесь гла́сы хвалебными вдовицы славу поют Бо́гу,/ с ними же и вси земнороднии веселятся:/ тии бо прияша от мертвых воставшую жену добродетелей,/ яже бе и пребудет им прибежище в ско́рбех и нуждах,/ сии же радуются чудеси пресла́вному,/ я́ко востанут кости сухия и плоть человеча в День Судный/ прияти славу или осуждение Мздовоздая́теля./ Потщимся убо десны́м сочета́тися,/ поревну́ем не жертве, а милости,/ Го́сподеви предлагающе предстательство праведныя Тавифы,/ во спасе́ние душ на́ших.
И ны́не, Богоро́дичен, глас 8:
Влады́чице и Ма́ти Изба́вителя рода человеческаго,/ к Тебе́ припа́даем и Тебе́ молимся:/ моли́ся, Пречистая, Сыну Твое́му всех Бо́гу,/ да воздвигнет люди Своя умерщвленныя грехми/ к жизни и плодоношению духовному,/ я́коже дре́вле Тавифу повелением апостола,/ да благодарно зовем Ему:/ сла́ва си́ле Твое́й, Го́споди.
На стихо́вне стихи́ры, глас 2:
Сын и Слово Отца Безначальнаго,/ явивыйся на земли возсоздати па́дшыя,/ предлагает путь ко спасению, глаголя:/ и́же хощет спасти́ся, да будет милостив./ Вышния милости восхотевши, Тавифо,/ напитала еси́ алчущия хлебом, утолила еси́ жажду тре́бующих,/ пребыла́ еси́ сирым и вдовицам утеше́ние,/ больным и безкровным прибежище была еси́,/ научи и нас подражатели тебе́ быти/ и моли́ спасти́ся душам нашим.
Егда праотец помышля́ше себе па́че Бо́га быти,/ тогда яви́лася есть смерть греха обро́цы./ Ты же, преда́вши се́рдце Создателю, Тавифо,/ возлюбила еси́ созда́нныя по о́бразу Создавшаго,/ тем убо исполнила еси́ заповедь Новаго Адама,/ И́же разруши́ клятву прародителя,/ смертный же искус прияла еси́,/ но востала еси́ от мертвых силою Безсмертнаго,/ да яви́тся сла́ва Бо́жия верным/ и уве́дят вси лю́дие,/ я́ко Господь и в жизни сей венчает праведники/ и прославляет Своя уго́дники.
Радость вдови́ча в плач преложи́ся о успении твое́м, Тавифо:/ никтоже бо гряды́й к тебе́ тощь оты́де,/ но удовли́ла еси́ во Имя Господне всяку потре́бу человечу,/ словом се́рдца твоего́ осушила еси́ слезы скорбя́щих,/ к сему и дело рук твои́х приложила еси́,/ и сию обою́, я́ко крила́ми, возлетела еси́ к Престо́лу Го́спода Вышних Сил,/ моли́ Его́ спасти́ся нам.
Не имамы инаго утеше́ния, я́коже преставльшаяся Тавифа,/ возопи́ша вдовицы камню веры,/ сия́ бо предаде́ ру́це своя на служение наше,/ укрыла есть многия от зноя и хлада,/ в дом свой введе́ неимущыя,/ болящим вся ко врачеванию подаю́щи,/ ты же, верховен посланник Всемогущаго,/ повели́, да востанет от мертвых на радость нашу и славу Божию.
Сла́ва, глас то́йже:
Аще и зри́те Тавифу во гробе, не рыдайте, не пла́чите,/ глаголет сын Ио́нин со дерзнове́нием,/ Боже́ственный Учитель наш, посылая ны возвещати Его́ Благовестие,/ даде́ власть всякия пло́ти:/ больныя и неду́жныя врачевати,/бесы изгоняти и прокаже́нныя очищати,/ к сему же и мертвыя воскрешати,/ да утвердится исповедание Воскресшаго от мертвых,/ верующим бо вся возможна суть у Бога,/ тем убо, видя веру вашу, взывая вопию́:/ Тавифо, востани от мертвых.
И ны́не: Богоро́дичен.
Тропа́рь, глас 4:
Днесь вера Христова утверждается камнем веры,/ и ликовствует в веселии Иоппи́я,/ псаломски славословят Жизнодавца Сы́на Бо́жия ве́рнии,/ ви́дяще совершаемо велие чудо:/ первоверховный апостол глаголет,/ и умершая востает от гроба,/ юже Низложитель смерти дарует Церкви,/ да украшаются во образ ея доброде́тельми люди./ Приидите убо, христиане,/ принесем ко святей моления на́ша:/ блаженная Тавифо и милосердная,/ вознеси на́ша воздыхания Пресвятей Троице/ и моли́ся со дерзнове́нием,/ да сынове Света Превечнаго будем,/ да сподо́бимся Бо́жия милости,/ да пребываем в любви Божественней,/ и да царствует мир во вселенней.
НА У́ТРЕНИ
По первом стихосло́вии, седа́лен, глас 3:
Един от Троицы, воплотивыйся нас ра́ди,/ воздвиза́ет от гроба умершую плотию словом первопрестольника апостолов,/ да торжеством доброде́тели воцарится в сердцах человеческих исповедание Его́;/ к Нему́ же припа́дающе взываем:/ спаси́ ны, Всесильне, предстательством Тавифы.
Стих: Апостол верховный/ о Имени Спасове воздви́же Тавифу, во гробе лежащую,/ Сей бо есть воистину праздник благоче́стия,/ имже поучающеся зовем:/ дивен Бог во святы́х Своих.
Сла́ва и ны́не, Богоро́дичен:
Безневестная Де́во,/ рождшая преесте́ственне Слово Божие,/ Имже вселенная и жизнь утверждается,/ радосте на́ша и упование, мольбы Тавифы блаженныя приими/ и теми спасти́ся нам сотвори, тебе́ вопию́щим:/ радуйся, Невесто Неневестная.
По втором стихосло́вии седа́лен, глас 7:
Радуется днесь человеческий род,/ вселенная ликовствует в веселии,/ несть бо в земнородных страха истления:/ Христос Воскресый дарует жизнь, и востает Тавифа от гроба./ Мы же, зряще велие чудо, вопием:/ воскреси́ и нас и сподо́би славы Твоея́, Человеколюбче.
Стих: Аще, возшед на Небо,/ и царствует одесную Отца Низложи́тель смерти и ада,/ но неразлучно пребывает в Церкви Своей, я́коже Апостолом обещался есть,/ ны́не словом ученика Тавифу здравою возставляет от мертвых,/ научая верных Своих доброде́тели.
Сла́ва и ны́не, Богоро́дичен:
Ра́дуйся, скиние Бо́жия, радуйся, свята́я святых,/ в нейже, я́ко на Херувимех, пребы́сть сияние Славы Отчия, зрак рабий волею взе́мшее,/ радуйся, породи́вшая Животворящаго вся,/ ны́не Тавифу силою Своею глаголом ученика воздвигшаго от гроба.
По 50-м псалме́ стихи́ра, глас 6:
Егда преставле́ние Тавифы совершися,/ скорбию ве́рнии Иоппии одержи́ми бяху,/ наипа́че вдовицы слезя́ще,/ я́ко оты́де от земных едина,/ многих доброде́телей исполненная,/ обетования воистину наследница,/ яже творяще милостыню великую./ Обре́тшуся же ту первоверховному,/ глаголаху к нему вси люди церковныя;/ претвори печаль и слезы всех в радость,/ я́ко благовеству́еши Низложителя смерти./ Петр же ста посреде́ и воздви́же глас свой,/ воззва по молитве со властию:/ не ктому пребуди в мертвых, усопшая.
Канон глас 4, егóже краегране́сие: Памяти и востанию твое́му, Тавифо, пое́м вси.
Песнь 1
Ирмо́с: Несть Тебе́ подобен, препрославленный Го́споди,/ рукою бо крепкою избавил еси́ люди,/ яже стяжа́л еси́, Человеколюбче.
Приспе́ светоносный днесь праздник,/ радости исполняяй вселенную,/ Тавифа от смертнаго сна востает к жизни сей,/ указу́ющи путь ко спасению.
Аще, возшед на Небо, и царствует одесную Отца Низложитель смерти и ада,/ но неразлучно пребывает и в Церкви Своей по неложному обещанию,/ ны́не ученицу, доброде́тельми украшенную,/ здравою возставляет посреде́ от мертвых словом апостола,/ ве́рным Свои́м указуя путь ко спасению.
Милости источник сый,/ обещавый помиловати благосерда,/ возлюбившую ближния Тавифу блаженную/ в назидание всем воскреси от истления,/ житием тоя указуя путь ко спасению.
Богоро́дичен: Яже принесшая во вселенную радость, мир и спасе́ние,/ Де́во Всепетая, моли́ Сы́на Своего́ Вседержителя с Тавифою милосердною,/ да помилует люди Своя,/ Сам бо есть ве́рным Свои́м путь ко спасению.
Песнь 3
Ирмо́с: С высоты снизшел еси́ волею на землю/ превышше всякаго начала/ и смиренное вознесл еси́/ из ада преисподняго естество человеческое;/ несть бо свят, па́че Тебе́, Человеколюбче.
Творе́ц всея твари, обнищав нас ра́ди,/ сниде даже до Креста и погребения,/ но воскресе Боголепно, со славою, возставляя сущия во гробе́х,/ Той и ны́не воздви́же Тавифу от мертвых словом верховнаго Апостола,/ те́мже славно прославися.
Исполнив все смотрение, еже о нас,/ посла Неботаи́нники апостолы Своя всем язы́ком,/ возвещати спасе́ние всех земнородных,/ Владыка жизни и смерти рече́нием камене веры воскрешает Тавифу умершую,/ те́мже славно прославися.
Искус смертный прие́мшую Тавифу милосердную/ воздвиза́ет от тления Животворя́й вся,/ утверждая веру ученик Своих чудом благовестника,/ в немже славно прославися.
Богоро́дичен: Вышшую небес и чистшую всея твари,/ явльшую в мир Еммануила,/ И́же спасе́ нас и приусво́и, и соедини с Собою, и воздви́же от смерти вечныя,/ благодарно вси и славно просла́вим.
Седа́лен, глас 3:
О, чуда преестественнаго!/ О, величества Бо́жия!/ Воскресением Содетеля жизнь утвердися и смерть низложися./ И Той во апостолех вся чудодействует,/ я́коже и ны́не зрим востание Тавифы от мертвых словом Петровым.
Песнь 4
Ирмо́с: Сей Бог наш от Девы воплощься/и естество обожив,/ Егóже воспева́юще, вопием:/ сла́ва си́ле Твое́й, Го́споди.
Зна́мение всемирнаго воскре́сения в день оный ны́не зрим в Иоппи́и,/ апостол повелевает, и мертвая паки обретает жизнь, назидающи всех в доброде́тели,/ к нейже, припа́дающе, воззовем:/ Тавифо блаженная, моли́ спасти́ся всем нам.
Силою Воскресшаго Спаса,/ Петровым гласом возбуди́лася еси́ от сна смертнаго,/ да паки поживе́ши в правде по заповеди Милосерднаго Спаса,/ Егóже моли, Тавифо блаженная, спасти́ся всем нам.
Таинство смертное токмо коснуся тебе́, Тавифо блаженная,/ повеле́ бо Спас глаголом ученика воскре́снути тебе́ от мертвых,/ да знают вси земнороднии, я́ко входы и исходы жизни нашея в деснице Вседержителя,/ Eгoже моли́ спасти́ся всем нам.
Богоро́дичен: Арха́нгел Гаврии́л благовести́ Тебе́, Де́во, вопияше,/ я́ко низложи́ Сын Твой смерть и воскресе боголепно,/ подая избавление людем Своим, вопию́щим к Тебе́ усердно:/ Влады́чице, упование наше, моли́ спасти́ся всем нам.
Песнь 5
Ирмо́с: Ны́не востану, пророчески рече Бог,/ ны́не просла́влюся, ны́не вознесуся,/ падшаго прием от Девы,/ и к свету умному возносяй Моего Божества́.
Никтоже поставляет под спудом светильник горящий,/ но на свещнице, да светит всем./ Тако и ны́не, Тавифо блаженная, Человеколюбец Господь воздвизает тя,/ елеем милости исполненную и светом Христовым сияющую, глаголом первоверховнаго./ Моли Жизнодавца Спаса, да просветит души наша.
Имеяй власть судити живым и мертвым/ посылает ученики воскрешати мертвыя во утверждение Евангельскаго благовестия./ Сего ради и Тавифа возбуждается паки от смертнаго сна,/ к нейже припаде́м вопиюще:/ моли́ Воскресшаго нас ради, да просветит души на́ша.
Юже воздви́же от гроба первопрестольник апостолов,/ восхвалим вси песньми достодо́лжными:/ Тавифо блаженная, милости Бо́жия сосу́де избра́нный,/ моли́ Благосердаго Человеколюбца, да просветит души на́ша.
Богоро́дичен: Тя величаем, Богоро́дице Де́во,/ Ты еси́ свеще́ умная, явльшая ми́ру Свет неприступный,/ Имже вси озари́хомся в купели Крещения, оба́че помрачи́хомся прегреше́ньми,/ умоли Его́, плоть от Тебе́ Приемшаго, да просветит души на́ша.
Песнь 6
Ирмо́с: Приидо́х во глубины морския/ и потопила мя есть буря многих грехов,/ но я́ко Бог из глубины возведи живот мой,/ Многомилостиве.
Вся тварь ны́не ужаса и радости исполняется,/ ви́дящи смерть низлагаему воскрешением Тавифы человеком, приемшим повеление Богочеловека,/ Низложи́теля ада и смерти, к Нему́же воззовем:/ Твой мир даждь нам, Всесильне.
О Тавифо блаженная!/ Воставши от мертвых веща́нием гласа апостольскаго,/ егóже Господь посла чудеса́ совершати во умножение веры,/ воззови, Емуже предстои́ши и Егóже зриши непрестанно по втором твое́м успении:/ мир Твой, Всесильне, даруй людем Твоим.
Егда апостольский глас в слух уха твоего́ прия́ла еси́, блаженная,/ востала еси́ от смертнаго ложа/ и, поживши благочестно, паки преставилася еси́ к Горней Славе,/ идеже помоли́ся, Тавифо, Господу всяческих,/ да дарует всем нам мир, я́ко Всесилен.
Богоро́дичен: Мати Бо́жия, Радосте на́ша и Прибежище спасения!/ Обурева́еми есмы прегрешеньми и напа́стьми житейскими, к Тебе́ припа́даем,/ приносяще сокрушения сердечная, и Тя на помощь призываем:/ мир подаждь мирови Твоими моли́твами.
Конда́к, глас 4:
Ужасахуся Иоппи́йстии лю́дие, и дивля́хуся А́нгели Божии,/ егда исцеливый Еннея воззва от мертвых серну нарицаемую, милосе́рдием преукра́шенную,/ о нейже к нему взываху вдовицы неиму́щыя./ И ны́не, Тавифо блаженная, услыши молитвы на́ша, к тебе́ приноси́мыя,/ и испроси у всяческих благ Подателя милости и щедроты ве́рным Его́,/ да, блажаще тя, вопие́м ти:/ радуйся, доброде́тели нас научающая.
И́кос:
Ты еси́ прибежище сирым и вдовицам, Тавифо, рабо Господня./ Сотворила еси́ блага́я людем, законы Евангельския исполнила еси́/ и научила еси́ человеки не себе жи́ти, но ближнему угождати во благое./ Сего ради насле́дница Царствия Небе́снаго яви́лася еси́/ и пребыла́ еси́ на земли, иму́щи любовь Небесную,/ ейже причастники сотвори молитвою твое́ю и нас, чту́щих тя верно и вопиющих:/ радуйся, доброде́тели нас научающая.
Песнь 7
Ирмо́с: В начале Безначальное Слово/ со Отцем и Духом, Сын Единородный, благословен еси́,/ и превозноси́мый, Боже отец на́ших.
Апостольский лик разсе́яся в поднебесней, словом Евангельским вся концы земли́ просвеща́я./ Петр убо воздви́жением Тавифы от мертвых вселенную утверди исповедати воскре́сение Христа́ Жизнодавца,/ Егóже превозносим во веки.
Воскреснут мертвии, и востанут сущии во гробе́х,/ глаго́лаше древле пророк, прови́дяй духом попрание ада./ Сие же явле́но бысть и твои́м успением и востанием, Тавифо;/ те́мже и мы, чтуще верно па́мять твою́́,/ Христа́ Жизнодавца превозносим во веки.
Испове́дающи Го́спода Иисуса усты твои́ми, блаженная Тавифо,/ се́рдце твое́ отдала́ еси́ Тому́, и заповеди Его́ потщилася еси́ исполнити,/ и служила еси́ де́лы рук твои́х неимущым./ Доброде́телию же, я́ко лествицею, взошла еси́ в чертоги Небесныя./ Мы же, видяще тя сияющую светом Евангельским,/ Христа́ Жизнодавца пое́м и превозносим во веки.
Богоро́дичен: Фома иногда прии́де на гроб Твой, Влады́чице,/ ви́дев пояс един, уразуме́, я́ко воскре́сла еси́ от гроба благода́тию и силою Сы́на Твоего́./ Тогда убо апостоли прославиша Го́спода и Тебе́, Заступницу нашу./ Теми убо науче́ни, и мы веруем, я́ко при́сно с нами еси́ неотступна,/ сподо́би ны грешныя, не имущыя елея милости,/ предстояти Престо́лу Христа́ Жизнодавца, я́коже Тавифа, с лики избра́нных,/ да превозносим Его́ во веки.
Песнь 8
Ирмо́с: Изба́вителю всех, Всесильне,/ посреде́ пламене благоче́ствовавшия,/ снизшед, ороси́л еси́/ и научил еси́ пети:/ вся дела благословите, пойте Го́спода.
Обиталище Ду́ха Всесвята́го яви́лася еси́, досточудная,/ исто́ргла бо еси́ от сердца твоего́ вся мудрования греховная,/ наипа́че же страх Го́сподень стяжала еси́/ и воздвигла еси́ в души твое́й храмину благоче́стия, Богове́дения же и человеколюбия,/ и ны́не, радующися в Небесных чертозех,/ моли́ся о нас, чту́щих тя верно.
Плод мира и радости о Дусе Святе духовен есть,/ и любы, яже есть союз совершенства,/ долготерпение же с благостию и милосердием./ Иму́щи же вся сия,/ сотворила еси́ в себе пребывалище благода́ти Бо́жия, Тавифо достохва́льная,/ и была еси́ образ доброде́тели,/ житием твои́м благовеству́ющи Ева́нгелие Царствия Небе́снаго./ Молися убо о нас, чту́щих тя верно.
Образ и утешения и долготерпения, блаженная Тавифо, явила еси́ в житии о Го́споде,/ вся бо дела твоя́ растворила еси́ милостию,/ яже излияся от сердца твоего, в немже благода́ть вселися./ Даждь убо и нам от елея сего, я́ко да светильницы наши не угаснут,/ чтущим тя верно.
Богоро́дичен: Еже, Де́во, от века та́инство открыся,/ егда в сбытие́ Сове́та Превечнаго благовести Тебе́ Гаврии́л рождество Еммануила – Бо́га Истиннаго и Человека,/ И́же совоскреси́ всех с Собою и обожи́./ Того моли, Преблагословенная Заступнице на́ша,/ дарова́ти радость вечную чтущим Тя верно.
Песнь 9
Ирмо́с: Сокровенное Божие неизрече́нное/ в Тебе́ совершается явственное та́инство,/ Де́во Пречистая,/ ибо Бог из Тебе́ воплотися за милосердие./ Темже Тя я́ко Богоро́дицу величаем.
Милость, о Тавифо, возлюбила еси́ по слову Господню/ и принесла еси́ Ему в жертву чи́сту се́рдце твое́, блаженная,/ еже очистила еси́ огне́м любве Божественныя,/ и, взирающи на люди, разумела еси́ в тех образ Божий/ и творила еси́ им такожде, я́коже запове́да Спас мира./ Даждь убо и нам от любве твоея́ и моли, Егóже возлюбила еси́,/ дарова́ти нам жизнь безконечную.
Веселятся концы земли и радуется Иоппи́я, ны́не свершаемо зря́ще чудо пресла́вное,/ я́ко воста́ от гроба жена блаженная и пра́ведная сущи,/ ученица Поправшаго си́лу смерти и врата ада,/ Того убо моли, Тавифо, о всех нас.
Славословие и песни, Тавифо блаженная, приносим Единому Исто́чнику безсмертия,/ воскресившему тя Апостола Своего́ рече́нием и веру утвердившему/ и научившему нас, како вни́ти в Его́ чертоги Небесныя стезе́ю милости, еюже востекла́ еси́./ О сем, радости испо́лнени,/ приносим Ему песни усердныя и молитвы:/ светом Твоим просвети́ всех нас.
Богоро́дичен: И Небе́сная и земна́я поют Тебе́, Богомати, гласы хваления,/ я́ко Тобо́ю Бо́га позна́хом и обрето́хом жизнь вечную:/ Твой бо Сын Боже́ственный узы смертныя разори́ Своею смертию и воскре́сением./ Темже востание Тавифы от смертнаго сна гласом первоверховнаго апостола почита́юще, молим Тя, Влады́чице:/ мир Церкви и ми́ру Твое́му, Богоро́дице, даруй,/ утоли́ церковныя собла́зны и постави ны с лики избра́нных Твоих.
Свети́лен, глас 7:
Свет, из гроба Воплотившагося Превечнаго Слова возсиявый,/ озари́ всю вселенную блиста́ньми воскре́сения, имже попрася смерть./ Апостол же, нося́й сияние сего Света живоно́снаго, воззва от мертвых Тавифу во Иоппи́и,/ утвердив исповедание Воскресшаго,/ Емуже взываем:/ просвети́ нас Твое́ю истиною.
Сла́ва, глас то́йже:
Троице Трисия́нная,/ света Твоего́́ зарями просвети́ омраченныя прегрешеньми/ и воздвигни до́лу поверженныя и земли преклоньшияся,/ да не у́мрем во веки, но востанем от греховнаго тления, я́коже Тавифа от гроба,/ вси бо аще и согрешаем, но несумне́нно православно исповедаем Отца и Сы́на и Ду́ха Свята́го.
И ны́не:
Пречистая и Преблагословенная Де́во,/ Ма́ти Сияния славы Отца Безначальнаго,/ восприя́вши свет Солнца правды,/ просвети, я́ко пресветлая луна, люди Твоя́,/ да разыдется всякий мрак от сердец их,/ вси бо и́мут Тя Заступницу, покров и прибежище.
На хвалитех стихи́ры, глас 8:
Блаженна еси́, свята́я Тавифо,/ возрасшая в винограде Христове, и́же есть Церковь Бо́жия./ От Лозы́ истинныя Иисуса Сладчайшаго почерпла еси́ Божественныя токи благода́ти,/ имиже уплодоноси́лася еси́ от земли к Небе́сным./ Я́ко грозд винный, напитай нас и увесели́ подражанием тебе́ в добрых делех,/ да сподо́бимся неизреченных благ.
Пропове́да иногда Господь,/ я́ко аще зе́рно пшеничное, пад на землю, не у́мрет, то едино пребывает,/ аще же у́мрет, сотворит плод изобильный:/ успение твое́, Тавифо, явися плодоносно,/ востала бо еси́ от мертвых за слезы вдови́чи,/ не токмо ра́ди твоея́ доброде́тели, яже ны́не во услышание Церкви всей,/ и явися образ достоподражательный многим,/ наипа́че же сие сотворися во утверждение веры Христовы,/ отверзающия человеком райския двери,/ да Небе́сная с земны́ми сочетаются./ Мы же в добродетелех оскуде́вшии,/ молитвы твоея́ ко Всещедрому просим,/ да спасет и помилует души на́ша,/ мирови же подаст мир и велию ми́лость.
Днесь соборы верных ликовству́ют,/ прославляюще величие доброде́тели,/ юже Господь яви́ в житии Своея учени́цы,/ яже процвете́, я́ко финикс, преумноживши таланты Господни.
Испроси, о Тавифо, блажащим тя/ оставле́ние прегрешений.
Сла́ва, глас то́йже
Глас Владыки Христа́ услышавши,/ бу́дите убо соверше́ни, я́коже совершен есть Вышний Отец ваш,/ Боже́ственным глаго́лом последовала еси́, Тавифо,/ в сердцы твое́м, я́ко в до́брей земли, произрастила еси́ семя жизни вечныя,/ и плоды его явила еси́ пред человеки,/ я́же прославляют Прославльшаго тя,/ и научаются жити по о́бразу твое́му;/ моли́ о всех, творящих па́мять твою́́.
И ны́не: Богоро́дичен.
Славословие великое, ектении и отпу́ст.
НА ЛИТУРГИ́И
Блаженны от кано́на святыя песнь 3 и песнь 6. Апостол Деяний, зача́ло 23. Ева́нгелие от Матфе́я, зача́ло 104.
Преподобнаго Марти́рия диакона, в Да́льних пеще́рах почива́ющаго
Тропа́рь, глас 1:
Служивый в чи́ну диаконства Го́сподеви добре,/ честный иеродиаконе Марти́рие,/ и тамо я́ко слуга Го́сподень обретыйся,/ идеже и Господь твой,/ моли́ся Ему и о нас,/ да подаст нам велию ми́лость.
Конда́к, глас 2:
Диаконе честный, иночествующим похвало/ и преподобным сопричастниче всеблаженне Марти́рие,/ моли́ся Го́сподеви непрестанно о всех нас.
Преподобный Мартирий, диакон Печерский, в Дальних пещерах (XIII–XIV).