В 20-й день
Свята́го великомученика Артемия
На Го́споди, воззва́х: стихиры на 6, глас 4.
Подо́бен: Я́ко до́бля:
Многообра́зными му́ками лю́тых ран,/ преда́в казни́ти многострада́льное и терпели́вейшее тело твое́, Богомудре Артемие,/ не отве́рглся еси Христа, ни куми́ром поже́рл еси,/ но терпе́л еси, я́коже ино́му стра́ждущу,/ ожида́я будущих воздая́ний/ и безсме́ртнаго благосла́вия.
Пове́шен, стру́жемь и ка́мением сдробля́емь,/ и желе́зом отвсю́ду изнуря́емь, и мече́м усека́емь,/ непоколеби́м пребы́л еси,/ на ка́мени мы́сленнем водрузи́в души́ твоея́ стопы́, сла́вне./ Сея́ ра́ди побе́ды А́нгелом и мучеником сочетался еси,/ Света неизрече́ннаго исполня́емь.
Исцеле́ний благода́ти лю́бящим тя/ всегда источа́ют, славне, твоя́ мо́щи,/ и потопля́ют стра́сти и неду́ги, Арте́мие,/ и прого́нят лука́вых де́монов полки́, напая́ют же верных сердца́,/ прозяба́ющая доброде́телей плоды́ Божественныя/ и благочестия знание.
Сла́ва, глас 2. Студи́тово:
Разу́мнаго светильника веры, Артемия почтим,/ я́ко обличи́ царя́ ме́рзскаго,/ и кровию муче́ния его Церковь Бог обагри́./ Тем и прия́т исцелений благодать незави́стную/ исцеля́ти неду́ги верно приходящих к ра́це моще́й его.
И ны́не, Богоро́дичен или́ Крестобогоро́дичен.
Подо́бен: Егда́ от Дре́ва:
Егда́ Нескве́рная А́гница ви́де Своего А́гнца,/ на заколе́ние, я́ко человека, волею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе, Рождшую Тя,/ что сие́ сотвори́л еси, Изба́вителю всяческих,/ оба́че воспева́ю и сла́влю Твою́, ю́же па́че ума́ и сло́ва,/ крайнюю благость, Человеколюбче.
На стиховне Окто́иха. Сла́ва, глас 6:
За Христа законно пострада́в, Артемие,/ и с чу́вственным царе́м у́мнаго низложи́в врага,/ достойно приял еси от Страстополо́жника Спа́са вене́ц/ и ны́не на Небесе́х со Ангельскими ра́дуешися чи́ны,/ Вы́шняго светоли́тия наслажда́яся я́сно/ и Триипоста́сному и Первому Свету причаща́яся оби́льно./ Темже и мы, благове́рнии лю́дие и любому́ченицы,/ пе́сньми вопие́м ти:/ радуйся, адама́нте непобеди́мый душе́ю и крепкий ору́жниче Христов;/ радуйся, ле́сти и́дольския потреби́телю/ и истины побо́рниче светлый./ Но моли́ся Господу/ и нам житием Боголюби́вым/ с тобо́ю получи́ти стоя́ние/ при Престо́ле Величествия Его.
И ны́не, Богоро́дичен или́ Крестобогоро́дичен.
Подо́бен: Тридневен:
Ви́дящи Тя распина́ема, Христе, Тебе́ Ро́ждшая вопия́ше:/ что стра́нное е́же вижу та́инство, Сы́не Мой;/ ка́ко на Дре́ве умира́еши, плотию повешен, Жизни Подателю.
Тропа́рь, глас 4:
Истинною бо Христовою верою/ утве́рждься, страстотерпче,/ мучителя злочести́ва царя/ победил еси со идольским того возноше́нием./ Тем от Царя Великаго, вечно царствующаго,/ пресветлым венцем победным одаре́н бысть,/ вся исцеляяй болящия и призывающия тя, Артемие великий,/ моли Христа Бога/ спасти души на́ша.
Сла́ва, и ны́не, Богоро́дичен или́ Крестобогоро́дичен.
НА У́ТРЕНИ
Оба канона Окто́иха, без мученичнов.
И свята́го канон на 6, егoже краегране́сие: Твою́ подаждь ми богатную благодать, блаженне. Иосиф. Глас 2.
Песнь 1
Ирмо́с: Во глубине́ постла́ иногда́/ фараони́тское всевоинство Преоруже́нная Сила,/ вопло́щшееся же Сло́во всезлобный грех потреби́ло есть,/ Препрославленный Господь, славно бо прославися.
По́двигом, мучениче, добрым я́ко подвиза́вся и све́тлыя венцы́ прии́м,/ Свету предстои́ши, просвеща́емь по прича́стию Невеще́ственному,/ тем молим тя: просвети́ нас моли́твами твоими.
Светлый твой, мучениче, праздник/ вся созва́ ра́достно на трапе́зу днесь,/ предложи́в страдания твоих боре́ния, му́жество и противле́ние,/ и́миже насы́щшеся, верою тя и любовию ублажаем.
Умерщвле́на на Кресте́, преблаже́нне,/ Недомы́сленнаго плотию поразуме́л еси Го́спода, Жизни Вино́вника,/ во́льную возлюбил еси ме́ртвость, юже от страда́ний:/ тем безсме́ртную славу получил еси.
Богоро́дичен:
Воплоти́вся из Тебе́ боголепно Слово Безплотное/ премно́жеством человеколюбия, Пречи́стая,/ к страсте́м прибли́жися и безстрастие челове́ком источи́/ Препрославленный Господь,/ славно бо прославися.
Песнь 3
Ирмо́с: Процвела́ есть пусты́ня, я́ко крин, Го́споди,/ языческая неплодя́щая церковь,/ пришествием Твоим,/ в нейже утверди́ся мое сердце.
Му́ченическими украси́тися венцы́, славне, жела́я,/ я́звы понесл еси и растерза́ния горьких боле́зней,/ Божественною благода́тию.
Не потрясе́ столпа́ твоего́ се́рдца, всемудре,/ люте́йшее приложе́ние мук,/ утверди́ся бо на Разу́мнем Ка́мени неподви́жнем.
На дре́ве пове́шен и ча́стыми отвсю́ду терза́нии окружа́емь,/ твои́ми очесы́ к Могу́щему спасти́ взира́л еси, достославне.
Богоро́дичен:
Вопло́щся хотением от крове́й, Владычице, Твоих пречистых, Господь/ спасает человечество и мно́жества мучеников собра́.
Седален, глас 8.
Подо́бен: Премудрости:
Царю веко́в угожда́я,/ царя беззаконнаго всякий совет отрази́л еси, славне,/ и истука́нным не поже́рл,/ того ра́ди жертву тебе́ сама́го принесл еси пожре́нному Слову,/ пострада́в крепко./ Тем и чудес источа́еши струи́,/ стра́сти исцеля́я верно приходя́щих к тебе́,/ страстотерпче Артемие,/ моли Христа Бога грехо́в оставле́ние пода́ти/ чту́щим любовию святую память твою́.
Сла́ва, и ны́не, Богоро́дичен:
Солнца о́блаче умнаго,/ Божественнаго Света светильниче златокова́нный,/ Нескве́рная, Небла́зная, Всенепорочная Владычице,/ омраче́нную ду́шу мою́ ослепле́нием страсте́й,/ безстра́стия заре́ю просвети́, молюся,/ и оскверне́нное мое се́рдце омы́й пото́ки умиле́ния,/ покая́ния же слеза́ми, и от тиме́ния мя очи́сти дел моих,/ да любовию зову́ Ти:/ Богородице Приснодево,/ моли Христа Бога прегрешений оставле́ние пода́ти ми,/ Тебе́ бо име́ю надежду, раб Твой.
Крестобогоро́дичен:
А́гнца и Па́стыря, и Изба́вителя А́гница зря́щи на Кресте́,/ восклица́ше, пла́чущи и горько рыда́ющи, вопия́ше:/ мир у́бо радуется, прие́мля Тобою избавле́ние,/ утро́ба же Моя гори́т, зря́щи Твое́ распя́тие,/ е́же терпи́ши за милосердие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ верою пою́щим Божественныя стра́сти Твоя.
Песнь 4
Ирмо́с: Прише́л еси от Девы не хода́тай, ни Ангел,/ но Сам, Го́споди, вопло́щся,/ и спасл еси всего мя человека,/ тем зову Ти: сла́ва силе Твое́й, Го́споди.
Уподо́бився Распя́тому,/ на древе во́лею возвы́сился еси,/ протяза́емь и суро́вейше стру́жемь,/ совлача́яся ко́жных риз умерщвле́ния.
Боле́зни твоя плотски́я и лю́тых просте́ртие/ неболе́зненный поко́й, мучениче, я́ве тебе́ исхода́таиша,/ егoже ны́не насыщайся, всяку болезнь облегча́еши от душ наших.
Равноа́нгельну бы́вшу тебе́ страда́ний све́тлостьми,/ руко́ю Ангеловою посылает тебе́ пищу, Небесный Хлеб,/ Жизнь на́ша, укрепля́ющую тя, мучениче достославне.
Бога́тыми тя украси́ благодать Духа дарова́нии, всемудре,/ тем вся́ческия неду́ги, мучениче всече́стне, отго́ниши,/ верою прибега́ющих ти.
Богоро́дичен:
Деву Тя по рождестве́, Нескве́рная, Нетле́нну Христос соблюде́,/ благоволи́вый во утро́бе Твое́й всего мя человека восприя́ти/ кра́йнею бла́гостию.
Песнь 5
Ирмо́с: Хода́тай Бо́гу и человеком был еси, Христе Боже,/ Тобою бо, Владыко, к Светоначальнику, Отцу Твое́му,/ от но́щи неве́дения/ приведе́ние и́мамы.
Свеща́ светоза́рная ви́ден был еси Духом, Артемие,/ ве́рныя просвеща́ющи и лука́вствия разгоня́щи/ мрачных и тьмы испо́лненных духо́в.
На Ка́мени Живо́тнем душе́вныя стопы́ водрузи́в,/ ка́мением сгнета́емь и боле́зньми окружа́емь,/ и́стинный страстотерпец непрекло́нен пребы́л еси.
Ты честны́ми вооруже́н Духа си́лами,/ трезу́бцев остроты́, мучениче доблему́дренне, небре́гл еси,/ в ни́хже спопра́в жа́ла вра́жия.
Богоро́дичен:
Крест и погребе́ние, из Тебе́ волею нас ра́ди Рожде́йся претерпе́в, Владычице,/ свиде́теля крепча́йша Артемия Своих страда́ний,/ я́ко Крепкий, соде́лал есть.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего призыва́ю бе́здну:/ от тли, Боже, мя возведи́.
Агнец и заколе́ние всеце́лое,/ мучениче, прине́слся еси, Артемие,/ во́льное распя́тие в наше Прии́мшему воззва́ние.
Неосла́бными я́звами сокруша́емо/ тело твое́, Артемие, терпели́вейшее,/ душевное благоро́дие соблю́л еси,/ ве́рою неврежде́нное.
Неду́гов нас изба́ви, мучениче,/ искушений страсте́й же, и скорбе́й,/ к тебе́ притека́ющия,/ подража́телю Спасов, Артемие.
Богоро́дичен:
Обурева́емаго в пучи́не скорбе́й/ и потопля́ема наше́ствиями треволне́ний,/ спаси́, Богородице Дево, раба Твоего.
Конда́к, глас 2:
Подобен: Твердыя:
Благочести́ваго и венцено́снаго мученика,/ на враги́ побе́ды взе́мшаго одоле́ние,/ соше́дшеся, достойно песньми восхва́лим Артемия,/ превели́каго в мученицех,/ чуде́с же да́теля пребога́таго,/ мо́лится бо Господу о всех нас.
Икос:
Кто по́двиги твоя довле́ет изглаго́лати, страстотерпче,/ или болезни твоя, я́же му́жески претерпел еси за веру Господню,/ и дарова́ния, и́хже сподо́бился еси,/ не довле́ют уста́ человеческая пове́дати,/ му́дростию бо укра́шен и мужеством,/ богатство возненави́дев и досто́инство привре́менное,/ во́ин явился еси и́скреннейший,/ моля́ся у́бо Го́споду о всех нас.
Песнь 7
Ирмо́с: Богопротивное веле́ние беззако́ннующаго мучи́теля/ высо́к пла́мень вознесло́ есть./ Христос же простре́ Богочести́вым отроко́м ро́су духовную:/ Сый благословен и препрославлен.
Непобеди́мь смысл неруши́мою души́ тве́рдостию, Артемие, стяжа́в,/ вра́жия кова́рства, мучениче, упраздни́л еси,/ поя́ изря́днейше:/ Сый благословен и препрославлен.
Струя́ми крове́й твоих/ возвышенный мук огнь угаси́л еси, блаженне,/ и росо́ю Духа облия́емь, радуяся взывал еси:/ Сый благословен и препрославлен.
Исцеле́ний дарова́ния источа́я,/ страсте́й разжже́ния угаша́еши Божественною благодатию,/ отгоня́еши же ду́хи присеще́нием твоим,/ воспевая, присносло́вый:/ Сый благословен и препрославлен.
Богоро́дичен:
Мертвым Источи́вшаго безсмертие,/ Дево Всенепорочная, Боголепно родила́ еси./ Того у́бо моли́ умертви́ти на́ша стра́сти телесныя, Чистая,/ и вечныя сподо́битися жизни.
Песнь 8
Ирмо́с: Пещь иногда́ о́гненная в Вавилоне де́йства разделя́ше/ Божиим велением, халде́и опаля́ющая,/ ве́рныя же ороша́ющая, поющия:/ благословите вся дела Господня Господа.
Язвами лю́тыми тело твое́, трезу́бцы же изнуря́емо, претерпел еси,/ взира́яй на воздая́ние будущее,/ е́же подае́т тебе́ зову́щу, славне,/ всяческих Бог, Владыка же и Господь.
Кровьми́ твоими земля освяти́ся,/ и врачевство́ яви́ся тело твое́ многострадальное,/ всякий неду́г, вся́ко озлобле́ние и всякий де́монский всегда вред отгоня́/ от верно прибегающих к тебе́.
Украше́ние страдальцев явился еси,/ яже в мире благочестному́дренно отри́нув/ и па́че премирная худе́йшим искупу́я/ честно́ю же, прехвальне, кровию, воспевая:/ благословите вся дела Господня Господа.
Богоро́дичен:
Исте́кшия ны горьким дре́ва вкушением/ и па́дшия поползнове́нием возста́вила еси, Пречистая,/ Содетеля ро́ждши Слово Ипоста́сное, Чистая./ Ему́же вопие́м:/ благословите вся дела Господня Господа.
Песнь 9
Ирмо́с: Безначальна Родителя Сын, Бог и Господь,/ вопло́щся от Девы, нам яви́ся,/ омраче́нная просвети́ти, собра́ти расточе́нная;/ тем Всепетую Богородицу велича́ем.
Ви́дети восхоте́в добро́ты Небе́сныя,/ ви́димыя добро́ты мира прете́кл еси,/ и, добротворе́ньми страдальцев украси́вся, мучениче доблему́дренне,/ добрых кра́йнейшее, веселя́ся, восприя́л еси.
Я́ко у́тро, я́ко солнце,/ память твоя, просвеща́ющи верных сердца́, блаженне, возсия,/ ты бо и Света и Дне светови́дный явился еси насле́дник,/ разоряяй, Артемие, мглу душ наших.
Взыгра́им, челове́цы, духовно ликовству́юще,/ Артемия память, Божественнаго мученика,/ поем Бо́гу с похвало́ю,/ Чу́дному су́щу во святых/ и освяща́ющу верою Того честву́ющия.
Ра́ка твоя, точа́щи непрестанно исцеле́ния,/ ве́рныя созыва́ет любовию почерпа́ти/ на теле́сное здравие и душевное истинно спасение,/ всеблаженне Артемие,/ молитвенниче о благохва́лящих тя.
Богоро́дичен:
Светом мя просвети́ лица Твоего, Го́споди,/ уны́ния тьмою покрове́ннаго,/ име́я молящую Тя, Сло́ве,/ Истинную Чистую Матерь Твою́,/ и Ангельский силы, и преславнаго Артемия.
Светилен.
Подо́бен: Свете неизменный:
Свет в се́рдцы твое́м возсия́в, Артемие страстотерпче,/ горча́йшия му́ки претерпе́вшу мужественно;/ и исцелений благодать прия́л еси свыше,/ немощныя исцеля́ти всегда.
Богоро́дичен:
Свет просия́вый безле́тно из Отца прежде веко́в,/ в лето ны́не напосле́док из Тебе́, Дево, прозябе́ на спасение мира,/ к Немуже не оста́ви о мире молитися.
На стиховне Окто́иха. Сла́ва, глас 6:
Днесь вселе́нная вся страстотерпца просвеща́ется заря́ми,/ и Божия Церковь цве́ты украша́ема, Артемие, вопие́т ти:/ уго́дниче Христов и предста́телю те́плый,/ не преста́й моля́ся о рабе́х твои́х.
И ны́не, Богоро́дичен или́ Крестобогоро́дичен.
Подобен: Тридневен:
Ви́дящи Тя распина́ема, Христе, Тебе́ Ро́ждшая вопия́ше:/ что стра́нное е́же вижу та́инство, Сы́не Мой;/ како на Дре́ве умира́еши, плотию повешен, Жизни Подателю.
На Литургии: Блаженна, Окто́иха на 4: и мученика песнь 3, на 4. Прокимен, глас 7: Возвеселится праведник о Господе и уповает на Него. Стих: Услыши, Боже, глас мой, внегда молитимися к Тебе́. Апостол к Тимофею, зачало 292. Аллилуиа, глас 4: Праведник, я́ко финикс, процветет: Евангелие от Иоанна, зачало 52. Причастен: В память:
В той же день. Праведнаго Арте́мия Верко́льскаго
Тропа́рь, глас 2:
Вышняго повеле́нием тучено́сным облако́м небо помрачи́вшим,/ и молниям блиста́ющим,/ грому же возшумевшу с преще́нием,/ испусти́л еси душу твою́ в ру́це Господеви, прему́дре Артемие,/ и ны́не предстоиши Престолу Владыки всех,/ о иже верою и любовию приходящим к тебе́, подая исцеление всем неотло́жно,/ и моляся Христу Бо́гу, спастися душам нашим.
Конда́к, глас 8:
Возсия́ днесь пресветлая память премудраго Артемия;/ Богоданная благодать, я́ко ре́ки, изливает от целебных мощей его, ди́вная исцеления,/ и́миже от многоразличных неду́г избавляемся с верою приемлюще я и взывающе:/ радуйся, Артемие Богомудре.
Молитва
святому Артемию Веркольскому, чудотворцу
Святый угодниче Божий, праведный Артемие, при́сный хранителю святыя веры Православныя, и близкий защитниче всего севернаго края Российския страны́! При́зри милостивно на усердную молитву нас, грешных, и твоим благомощным предстательством испроси нам у Господа прощение согрешений наших, преспе́яние в вере и благочестии и ограждение от козней диавольских. Моли Господа, да хранит в здравии и непременя́емем благополучии верных людей Своих, да подаст стране нашей мир и тишину, а нам нелицемерное послушание; да сподобит всех нас получити, по христианстей кончине, Небесное Царствие, идеже вси праведнии вместе с тобою вечно славят Отца, и Сына, и Свята́го Духа. Аминь.