19-й день
Свята́го пророка Ио́иля и свята́го мученика Уа́ра
Пренесение мощей преподо́бнаго Иоа́нна Ры́льскаго, чудотворца
Свята́го благовернаго царевича Дими́трия Углечскаго
Свята́го священномученика Садофа и с ним 128 мученик, при Савории царе в персех
Свята́го пророка Ио́иля и свята́го мученика Уа́ра
Стихи́ры пророка, глас 8.
Подо́бен: О пресла́внаго чудесе́:
Боже́ственный Дух излия́ся,/ я́ко честны́й Ио́иль, проро́чествуя, сказа́,/ от Него́ дви́жимь, на ны, ве́рующия,/ и та́йнам Боже́ственным явле́ние открыва́ет, и проро́чествуют,/ и́же де́йство Его́ прие́мшии,/ и Боже́ственною заре́ю просвеща́еми,/ и Боже́ственною благода́тию.
Боговеща́ния испо́лнен ди́вный Ио́иль,/ я́ко исто́чник, исхо́дит, ду́ши напая́ющий,/ от до́му Твоего́́, Влады́ко,/ весь сла́дость нам иска́па,/ помышле́ния ослажда́ющую,/ весь высо́к быв ду́хом,/ доброде́телию возноси́мь к Боже́ственней высоте́.
Проро́ческим дерзнове́нием твои́́м/ и разу́мным к Бо́гу, Ио́иле, приближе́нием,/ и́мже Небе́сная зри́ши виде́ния,/ о нас Того́ уми́лостиви,/ соверша́ющих ве́рою па́мять твою́́,/ разреше́ния прося́ прегреше́ний, сла́вне,/ и прича́стия Боже́ственных наслажде́ний,/ и ве́лия ми́лости.
И́ны стихи́ры, му́ченика, глас 6.
Подо́бен: Все отло́жше:
Страда́ния ви́дев добропобе́дных му́чеников,/ дерзнове́ния Боже́ственнаго испо́лнен быв,/ вше́л еси́́ на три́знище/ и Христа́, Уа́ре, нас ра́ди Челове́ка бы́вша,/ пропове́дал еси́́, не устраши́вся сме́рти,/ ниже́ предлежа́щих муче́ний./ Тем уязвляемь и неми́лостивно раздробляемь,/ ра́довался еси́́ соверше́нным ра́зумом,/ смотря́я, му́дре, пребыва́ющее добросла́вие/ Бо́га возлюби́вшим.
Пло́ти с кровьми́, па́дающия ви́дя,/ и я́ко ино́му стра́ждущу, страда́льче,/ пребыва́л еси́́ до́блественнейше:/ привя́зан бо ко дре́ву,/ терза́ния терпе́л еси́́ беззако́нных пожда́ннейше./ Бо́гу же в ру́ки дух твой пре́дал еси́́,/ ужаси́в ви́дящия тя непрекло́нными противле́нии./ Тем тя почита́ем,/ вельми́ му́жествовавша, му́дре,/ и низложи́вша мучи́теля́,/ Уа́ре, боле́зньми твои́́ми.
Помазу́ющи ми́ры тя, чу́дная Клеопа́тра/ под зе́млю положи́/ и храм тебе́ святы́й возсозда́,/ пра́здник творя́щи, ди́вне Уа́ре,/ и ве́рно тя моля́щи./ Ея́же де́тище у́мному во́инству причета́л еси́́/ и сла́вою удобри́л еси́́,/ и лико́м святы́х сочета́л еси́́./ Его́́же ча́сти сподо́би ны,/ твое́ соверша́ющия благоче́стно торжество́,/ му́чениче досточу́дне.
Сла́ва, и ны́не, Богоро́дичен. Подобен то́йже:
Ра́дуйся, ко́рене ро́сный,/ ра́дуйся, же́зле Ааро́нов,/ прозябы́й Цве́т неувяда́ющий и присноживы́й,/ благопло́дный раю́, Жи́зни дре́во,/ из Иессе́ева ко́рене, Чи́стая,/ просия́вши, Отрокови́це,/ и земны́х пита́ющи Хле́бом разу́мным./ Ра́дуйся, багряни́це всечестна́я,/ всех Царя́ Богоневе́сто,/ ве́нче всесве́тлый,/ архиере́ев благоле́пие,/ ра́дуйся, Еди́на Пречи́стая.
Крестобогоро́дичен. Подобен то́йже:
А́гнца Своего́ А́гница Нескве́рная дре́вле/ и Непоро́чная Влады́чица/ на Дре́ве Кре́стнем я́ко́ узре́, ма́терски восклица́ше/ и, дивя́щися, вопия́ше:/ Ча́до Сладча́йшее,/ что зре́ние сие́ но́вое и пресла́вное?/ ка́ко со́нм безблагода́тный/ суди́щу Пила́тову предаде́ Тя/ и осужда́ет на смерть Живота́ вся́ческих?/ но воспева́ю Твое́ неизрече́нное,/ Сло́ве, снизхожде́ние.
Тропа́рь пророку, глас 2:
Предве́дый Божие пришествие во пло́ти/ и наи́тие Ду́ха Свята́го и гряду́щий Суд предсказа́вый,/ пророче Ио́иле:/ спасай моли́твами твои́ми/ чтущия тя от всех скорбе́й.
Тропа́рь мученику, глас 4:
Во́инством святы́х страстоте́рпец стра́ждущих законне,/ зря о́нех, показа́л еси́ му́жески кре́пость свою./И устреми́вся на страсть во́лею,/ и умре́ти вожделе́ за Христа,/ И́же приял еси́ по́честь побе́ды твоего́ страдания, Уаре,/ моли́ спасти́ся душам нашим.
Сла́ва, и ны́не, Богоро́дичен или́ Крестобогоро́дичен.
НА У́ТРЕНИ
Канон Окто́иха един, и святы́х два.
Кано́н проро́ка, его́же краегране́сие: Пророчеством Ио́иля пророка дивлюся. Творение Феофа́ново. Глас 2.
Песнь 1
Ирмо́с: Гряди́те, лю́дие, пои́м песнь Христу́ Бо́гу,/ разде́льшему море и наста́вльшему лю́ди,/ и́же изведе́ из рабо́ты еги́петския,/ я́ко просла́вися.
Лик нам проро́ческий свесели́тся,/ похваля́ему тебе́ небому́дренну, Ио́иле Богогла́се,/ с ни́миже спасти́́ся нам моли́, блаже́нне.
Глаго́лы Бо́жия предвозвеща́я, Богодухнове́нне,/ лю́тый проре́кл еси́́ гнев и пра́ведный,/ и́же от нече́стия прибы́вший лю́дем твои́́м суему́дренным.
Чу́дное, и светоно́сное Ду́ха, и животворя́щее вдохнове́ние тебе́ присени́/ и бу́дущих зна́ние вдохне́,/ проро́че блаже́ннейше.
Богоро́дичен: Тя ски́ния свиде́тельства прописа́, многови́дно образу́ема,/ явля́ющи от Тебе́ вопло́щшагося неизме́нно,/ Богома́ти Пречи́стая, Влады́чице.
Ин кано́н мученика, егóже краегране́сие: Стра́сти похваля́ю Уа́ра, сла́ву вели́кую. Иосифово Глас 6.
Песнь 1
Ирмо́с:Яко по су́ху пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.
Яви́лся еси́́ на высоте́ Христо́вы Це́ркве, Уа́ре,/ я́коже со́лнце све́тлое,/ блиста́ньми просвеща́я твои́́х боре́ний, блаже́нне, земна́я исполне́ния.
Божественныя любве́, всеблаже́нне, объя́т сла́дким раче́нием,/ отве́рглся еси́́ себе́/ и ко вся́кой му́це пло́тстей устреми́лся еси́́,/ кре́пко подвиза́вся.
Смы́сленно Боже́ственных подви́жник ю́зами связа́в себе́, страстоте́рпче,/ и ле́стныя разори́л еси́́ у́зы кре́пким терпе́нием мно́гих мук.
Богоро́дичен: Пресу́щественное Сло́во во твое́м чре́ве па́че сло́ва всели́ся и, роди́вся Боголе́пно,/ му́ченическия ли́ки, Чи́стая, приведе́,/ с ни́миже песносло́вим Тя.
Песнь 3
Ирмо́с: Утверди́ нас в Тебе́, Го́споди,/ Дре́вом умерщвлей грех,/ и страх Твой всади́/ в сердца́ нас, пою́щих Тя.
Учи́ми твои́́ми му́дрыми догма́ты,/ пост, проро́че, и служе́ние благоче́стно пропове́дуем,/ в дом Госпо́день ходя́ще.
Твои́м уче́нием после́дующе от всего́ се́рдца и помышле́ния,/ пла́чем же и моли́твами Бо́га взыску́ем, достохва́льне.
Изъяви́в нам Всеще́драго Влады́ки, проро́че, долготерпе́ние,/ и Боже́ственную же благосты́ню/ изъясни́л еси́́ Того́, и благода́ть.
Богоро́дичен: Зачала́ еси́́, Пречи́стая, Бо́га/ и родила́ еси́́ Сло́во, неизрече́нно вопло́щшееся,/ во проро́цех глаголавшее и испо́лнившее тех пропове́дания.
Ин
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бли́же,/ и утверди́вый нас на ка́мени/ испове́дания Твоего́́.
Вшел еси́́ ра́зумом кре́пким в му́жественныя по́двиги,/ утверди́вся наде́ждами бу́дущих благи́х/ и му́чеников Христо́вых всему́дрыми, блаже́нне, поуче́нии.
Во́инство святы́х страстоте́рпец, стра́ждущих зако́нне зря,/ о́нех показа́л еси́́ му́жескую кре́пость,/ примеша́яся многообра́зным, Уа́ре, му́кам.
В полце́ священнем, Уа́ре, я́ко до́блий во́ин, обре́лся еси́́/ и ссе́к мно́жество му́жества мечо́м, му́дре, ра́тным,/ побе́дами сла́вим.
Богоро́дичен: Де́во Ма́ти Бо́жия,/ моего́ уны́ния глубоча́йшую тьму и о́блаки страсте́й/ просвеще́нием, е́же в Тебе́, молю́ Тя, благода́ти, отжени́.
Конда́к пророка, глас 4:
Просвети́вшееся Духом чистое твое́ се́рдце/ проро́чества бысть светле́йшаго прия́телище:/ зриши бо, я́ко настоя́щая, дале́че су́щая,/ сего ради тя почитаем, проро́че, блаже́нне Ио́иле, славне.
Седа́лен пророка, глас 2
Подо́бен: Страстотерпцы Господни:
Богоглаго́ливе пророче,/ вдохнове́нием испо́лнився Уте́шителевым,/ изъясня́л еси́ в после́дняя времена́ бы́вшее язы́ком осия́ние./ Сего́ ра́ди ны́не благоче́стно тя похваля́ем/ и, твою́́ па́мять соверша́юще, вопие́м ти:/ Христа́ Бо́га моли́ о душа́х на́ших.
Сла́ва, мученика, глас 1.
Подо́бен: Гроб Твой:
Стра́сти честны́х ви́дев му́чеников/ и тех лобза́в у́зы любо́вию,/ на высоту́ востекл еси́́ свиде́тельства, всечу́дне,/ на дре́ве бо пове́шен, ра́ны претерпе́л еси́́,/ до́ндеже в ру́ки Госпо́дни ду́ха пре́дал еси́́.
И ны́не, Богоро́дичен:
Упова́ние христиа́н, Пресвята́я Де́во,/ Eгoже родила́ еси́ Бога, па́че ума́ и слова,/ непреста́нно моли́ о воспева́ющих Тя/ пода́ти оставле́ние грехо́в на́ших всех и исправле́ние жития́,/ ве́рою и любо́вию при́сно сла́вящим Тя.
Крестобогоро́дичен:
Зря́щи Тя, Христе́, Всенепоро́чная Мати,/ ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что неизрече́нное Твое́ сие смотре́ние,/ и́мже спасл еси́ пречи́стых рук Твоих, Ще́дре, созда́ние.
Песнь 4
Ирмо́с: Услы́шах, Го́споди,/ слух Твоего́́ смотре́ния,/ и просла́вих Тя,/ Еди́не Человеколюбче.
Ми́лостив бу́ди, Го́споди,/ чи́сто к Тебе́ ка́ющимся,/ я́ко един Щедр и Многоми́лостив.
Я́коже провозвести́́л еси́, сла́вне,/ от Бо́га излия́ся Дух/ на вся́ку плоть ве́ровавших.
Сни́тие Ду́ха,/ ученики́ Госпо́дни умудри́вшее,/ Твоя́ Богоглаго́ливая словеса́ испо́лни.
Богоро́дичен: Изба́вльшеся, Пречи́стая, из мрачных а́довых боко́в,/ Боже́ственным Твоим Рождество́м,/ Тя ублажа́ем.
Ин
Ирмо́с: Христос моя́ сила,/ Бог и Господь,/ Честна́я Церковь/ Боголе́пно пое́т, взыва́ющи,/ от смысла чи́ста, о Го́споде пра́зднующи.
Святы́ми я́звами удобряемь,/ красне́йший яви́лся еси́́,/ и Бо́гу, Уаре, возлю́блен, Венча́вшему твой верх, досточу́дне.
На кресте́, сла́вне, растяза́емь и на земли́ простира́емь,/ лю́тыя боле́зни претерпе́л еси́́./ Тем неболе́зненную жизнь насле́довал еси́́, веселя́ся.
Зако́нно ви́дяще Боже́ственнии му́ченицы стра́ждуща тя, блаже́нне,/ терпе́ния словесы́ укрепля́ху,/ с ни́миже стра́сти до́лгая соверши́в, ублажи́лся еси́́.
Хвала́ми венча́ем Боже́ственныя му́ченики,/ яже́ венча́ благода́ть Боже́ственная Боже́ственными увязе́нии,/ низло́жших вра́жия высо́кая мудрова́ния.
Богоро́дичен: От тины страсте́й, Влады́чице, возведи́,/ и стра́стных помышле́ний, отчужда́ющих мя Бо́га Единаго Чи́стаго,/ да ве́рою ублажа́ю Тя.
Песнь 5
Ирмо́с: Но́щи преше́дшей прибли́жися день,/ и Свет ми́ру возсия́:/ сего́ ра́ди хва́лят Тя А́нгельстии чи́ни/ и славосло́вят Тя вся́ческая.
Христо́во прише́ствие Ио́иль Боже́ственный я́вственно всем прорече́,/ я́ко прии́дет и спасе́т род челове́ческий/ от и́дольскаго льще́ния.
Весь ты возни́кнув, проро́че сла́вне, на преу́мный же и вы́ше по́мысла Свет,/ проро́чествия благода́ть извле́кл еси́́ отту́ду/ и пра́вду пропове́дал еси́́.
О пою́щих тя моли́ся спасти́ от всякаго озлобле́ния,/ пребога́те Ио́иле,/ и Боже́ственныя благода́ти и зари́ сподо́битися, умоли́.
Богоро́дичен: Пресвята́я Де́во, Влады́чице ми́ра,/ Тя, Богоро́дицу, испове́дающим от безчи́сленных грехо́в моли́ спасти́́ся и жите́йских обстоя́ний.
Ин
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ Истиннаго Бо́га,/ от мра́ка грехо́внаго взыва́юща.
Укрепля́ешися манове́ньми Боже́ственными/ и неосла́бная терза́ния терпи́ши до́блим смы́слом, Уа́ре,/ растерза́я гордаго се́рдце, зло́бу соде́лавшаго.
Сла́вный му́ченик, ви́дя отпа́дающия на зе́млю своя́ пло́ти,/ ра́довашеся, ве́чнующая ума́ све́тлостию/ и Боже́ственная возда́ния предпрозира́я.
Пою́ Тя, Го́споди Бо́же, и славосло́влю, и покланя́юся,/ благи́х сподобля́яся, угото́ванных Тебе́ возлю́бльшим,/ му́ченик в страда́нии те́пле зовя́ше.
Богоро́дичен: Я́вльшися Херуви́м и Серафи́м я́ко вои́стину святе́йши, Всенепоро́чная,/ вся, ве́рно Тя ны́не освяща́ющия, освяти́/ и спаси́ хода́тайством Твои́м.
Песнь 6
Ирмо́с: Бе́здна мя мно́га грехо́вная окружа́ет,/ и вопию́ Ти, проро́ка подража́яй:/ от тли мя, Го́споди, возведи́.
Ка́плют твои́́х глаго́л исто́чницы,/ Боговеща́ния и душепи́щную сла́дость точа́ще, сла́вне,/ напая́ющую ве́рно приходя́щия.
Го́ру тя проро́чества, сла́дость источа́ющую,/ и Богоче́стия, Ио́иле, пропове́дника всему́дра зна́ем,/ Богоглаго́ливе проро́че.
Богоро́дичен: Просвети́, Свет Ро́ждшая незаходя́щий,/ сердца́ славосло́вящих Тя верно, Пречи́стая Влады́чице,/ и из Тебе́ Ро́ждшагося неизрече́нно.
Ин
Ирмо́с: Жите́йское море,/ воздвиза́емое зря напа́стей бу́рею,/ к ти́хому приста́нищу Твое́му прите́к, вопию́ Ти:/ возведи́ от тли живо́т мой,/ Многоми́лостиве.
Глаго́лов небре́гл еси́́ пребеззаконнаго врага́/ и пла́мень претерпе́л еси́́ нестерпи́мых боле́зней терпели́вно, многострада́льне Уа́ре,/ моле́бниче о хва́лящих тя ве́рою.
Не преста́ше мучи́тель пребезу́мный, ра́нами неми́лостивно сдробля́я тя,/ до́ндеже в ру́ки Бо́жия свяще́нную твою́́ ду́шу преда́л еси́́,/ добро́тами просве́щшуся по́двиг твои́́х.
Возвы́сился еси́, подо́бяся на дре́ве Христу́, и на том ви́ся,/ твою́́ ду́шу пре́дал еси́́ Бо́гу, тя венчава́ющу,/ страстоте́рпче, зако́нно до́блествовавша.
Богоро́дичен: Упра́ви, Влады́чице, в пучи́не лю́тых, обурева́емую всегда́ смире́нную ду́шу мою́,/ и к ти́хому приста́нищу напра́ви,/ несомне́нным ра́зумом Тя блажа́щую.
Конда́к мученику, глас 4:
Христу после́дуя, му́чениче Уа́ре,/ Того́ испи́в ча́шу,/ и муче́ния венце́м увязе́ся,/ и со А́нгелы ликовству́еши:/ моли́ непреста́нно за ду́ши на́ша.
Песнь 7
Ирмо́с: Пещь дре́вле всегремя́щую угаси́вый/ и о́троки ту́чею духо́вною ороси́вый,/ благослове́н еси́́, Бо́же оте́ц на́ших.
Исходя́щий от до́му Госпо́дня и напая́ющий исто́чник,/ я́коже проре́кл еси́́, произы́де,/ проро́че всече́стне.
Пото́к сито́вный пшени́цоносен соде́лал еси́́ пи́щный исто́чник,/ я́коже Ио́иль прорече́:/ благослове́н еси́́, Боже оте́ц на́ших.
Богоро́дичен: И́же вся Сотвори́вый ро́ждся от Девы,/ спасе́ мир, благоче́стно пою́щий:/ благослове́н еси́́, Боже оте́ц на́ших.
Ин
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:/ благослове́н еси́́, Боже оте́ц на́ших.
Просвеще́на тя подвиго́в приложе́ньми,/ предо́брая Клеопа́тра, Уаре, ску́тала есть,/ обре́тши сла́ву тобо́ю, ве́ры досто́йну я́ве,/ ю́же показа́ те́пле в твое́ сконча́ние.
Излива́ющи на тя сле́зы и ми́ры тя честны́ми помазу́ющи,/ сокрыва́ет тя под земле́ю всечестна́я жена́,/ погре́бшаго пре́лесть лука́вую и из гро́ба блиста́ньми просвеща́юща нас.
Не престая́ше, преподо́бне, угожда́ющи тебе́ Христо́ву уго́днику, приснопа́мятная,/ до́ндеже яви́лся еси́́ хода́тай ей, му́дре, Ца́рствия Небе́снаго,/ его́же сподо́бися тобо́ю с любе́знейшим сыном.
Богоро́дичен: Сокруше́на мя безчи́сленными согреше́нии, Де́во, хода́тайством Твои́м обнови́,/ уврачу́ющи мою ду́шу и сло́во подаю́щи, вопи́ти:/ благослове́на, Яже Бо́га пло́тию ро́ждшая.
Песнь 8
Ирмо́с: Дре́вле оросившаго евре́йския о́троки в пла́мени,/ и опалившаго, Го́спода, халде́и пресла́вно в нем,/ воспое́м, глаго́люще:/ благослови́те и превозноси́те Его́́ во ве́ки.
Показа́л еси́́, сла́вне, покая́ния о́бразы я́ве Благоутробнаго Го́спода,/ прие́млюща ве́рою к Нему́́ приходя́щия и пою́щия:/ благослови́те дела́ Госпо́дня Го́спода.
Служи́тель быв ты Госпо́день, проро́че Ио́иле,/ Того́ та́йны вручи́лся еси́́ прорица́ти лю́дей, хва́лящим и пою́щим:/ благослови́те дела́ Госпо́дня Го́спода.
Оставле́ние источа́ют Иу́дови чуде́с ре́ки, я́же суть апо́столи пресла́внии Госпо́дни,/ я́коже проро́чествова Ио́иль, вопию́щих напая́юще:/ благослови́те вся дела́ Госпо́дня Го́спода.
Богоро́дичен: Ипоста́сь, сло́жну во двою́ существу́, Христа́,/ Всенепоро́чная, родила́ еси́́, пребы́вши Дева Чи́стая,/ Ему́же пою́ще, зове́м:/ благослови́те дела́ Госпо́дня Го́спода.
Ин
Ирмо́с: Из пла́мене преподо́бным ро́су источи́л еси́́/ и пра́веднаго же́ртву водо́ю попали́л еси́́,/ вся бо твори́ши, Христе́́, то́кмо е́же хоте́ти:/ Тя превозно́сим во вся ве́ки.
Ма́терних послу́шав, му́чениче, моле́б,/ Небе́сному во́инству све́тло во́инствуя,/ о́трока честна́го и твоего́ неотсту́пна показа́л еси́́ благосла́вия/ неизрече́нным милосе́рдием.
От Еги́пта тя бога́тство я́коже многоце́нное принесе́, му́чениче,/ разбогатя́щи многоце́нными дарми́,/ Клеопа́тра, целе́нии всю Палести́ну,/ любо́вию тя почита́ющую.
Веселя́ся, по́двиги твоя́́ соверши́л еси́́,/ во́ине до́блий Вседержи́теля,/ и я́ко победи́тель от Него́ венча́лся еси́́, Уа́ре всеблаже́нне,/ му́чеников вели́кая сла́во.
Богоро́дичен: Грехи́ прилага́ю ко грехо́м и бу́дущаго не бою́ся Стра́шнаго Суда́:/ победи́, Чи́стая, души́ моея́ ослепле́ние/ и, мольбо́ю Твое́ю обрати́вши, мя спаси́.
Песнь 9
Ирмо́с: На Небесе́х благослове́нная/ и на земли́ славосло́вимая,/ радуйся, Неве́сто/ Неневе́стная.
Со проро́ки, я́ко проро́к,/ ра́достно ны́не в Небе́сных весели́шися оби́телех.
Свы́ше ны назира́еши ны́не,/ благогове́йно тя славосло́вящия,/ Богоглаго́ливе всебога́те.
Сокраще́н путь спасе́ния/ Ио́иль покая́нием/ богому́дренно показа́.
Богоро́дичен: Возвела́ еси́́ ны, па́дшия, Ма́ти Бо́жия,/ благоутро́бнаго Владыку и Спаса ро́ждши.
Ин
Ирмо́с: Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю бо, Всечистая, яви́ся челове́ком/ Сло́во воплоще́нно,/ Его́́же велича́юще,/ с Небе́сными вои́/ Тя ублажа́ем.
Кре́пость низложи́л еси́ ратобо́рца,/ Боже́ственною я́ве си́лою препоя́сався, страда́льче до́блий Уа́ре./ Тем тя хва́лим, врачева́ние оби́льное от твои́́х моще́й, ве́рнии, почерпа́юще.
Я́ко све́т, я́ко у́тро, я́ко вели́кое со́лнце/ в земны́я простре́ся па́мять твоя́́ концы́,/ светоно́сными просвеща́ющи сия́ньми/ твои́́х честны́х по́двиг вся, прехва́льне,/ и мрак серде́ц отгоня́щи.
С тобо́ю сия́юща ви́девши сла́вою мно́гою/ своего́ сы́на чадолюби́вая, всех Бо́га велича́ше;/ тебе́ же и́скреннейше, му́чениче,/ сла́вяше, величайшаго предста́теля,/ я́вственно обогати́вшися.
Земля́, на не́йже терпели́вейшее те́ло твое́, му́дре, лежи́т,/ Боже́ственне освяти́ся,/ но даждь моли́твами твои́́ми нам разреше́ние грехо́в,/ жития́ исправле́ние, Уа́ре,/ и всех неудо́бных избавле́ние.
Богоро́дичен: Явлься, Де́во,/ из Тебе́ Госпо́дь, све́тлаго о́блака,/ еги́петския куми́ры вся́ческой па́губе предаде́;/ мно́жество же страстоте́рпцев Сего́ носи́ти сподо́би,/ Сего́ подража́тели честны́м Его́ страда́нием.
И́на служба, бденная, святому мученику Уа́ру, емуже дана бысть благода́ть умоли́ти за умершия Клеопа́трины прародители, не сподо́бльшияся прияти свята́го Креще́ния
Служба удалена, см. пояснение: О святом мученике Уаре и церковной молитве за неправославных.
Пренесение мощей преподо́бнаго Иоа́нна Ры́льскаго, чудотворца
НА МА́ЛОЙ ВЕЧЕ́РНИ.
На Го́споди, воззвах: поставим стихов 4 и пое́м стихи́ры, глас 8:
Подо́бен: О пресла́внаго чудесе́:
Разума све́тлостию украша́яся/ и за́поведьми Божественными/ просвети́в ду́шу твою́́,/ о тле́нных и мимотеку́щих небре́гл еси́/ и зе́млю с земны́ми оставил еси́,/ в пусты́нях же жи́ти изво́лил еси́/ и Христа́ па́че всех возлюби́л еси́,/ Иоа́нне преблаже́нне,/ Егóже моли, да спасе́т ду́ши на́ша я́ко милосерд.
Любе́зне Влады́це после́довал еси́,/ от млады́х ногте́й Того́ соверша́я повеле́ния,/ и благода́тию па́че,/ не́жели млеко́м, воспита́н,/ возра́сл еси́ в целому́дрии и чистоте́/ и, в дом Божий приходя́ и поуча́яся,/ Христа́ обре́л еси́,/ Иоа́нне преблаже́нне,/ Егóже моли́, да спасет ду́ши на́ша я́ко милосерд.
Поще́нием и бде́нием/ ум свой очи́стив, возше́л еси́ на высоту́ Небесную/ лестницею добродетелей/ и, в сла́ве со А́нгелы при́сно водворя́яся,/ на враги́ Небе́сную побе́ду нам испроси́/ у Царя́ веко́в, Христа́ Бо́га нашего,/ Иоа́нне преблаже́нне,/ Егóже моли, да спасе́т ду́ши на́ша я́ко милосерд.
Весели́ся, пусты́не Рыльская,/ прие́мши в себе свети́ло мы́сленное,/ светолу́чными сия́ньми весь мир просвеща́ющее/ и чудесы́ лю́ди ко Христу́ приводя́щее,/ исцелений бо оби́льно пото́ки излива́ет/ и боле́зни вся исцеля́ет./ Но моли́ся Христу́ Бо́гу,/ Иоа́нне преблаже́нне,/ да спасе́т ду́ши на́ша я́ко милосерд.
Сла́ва, глас 6:
Гла́са послу́шав Влады́чня,/ преподо́бне Иоа́нне,/ Спасу глаго́лющу:/ и́же хо́щет вслед Мене́ идти́,/ да отве́ржется себе/ и, крест свой взем, да последует Мне;/ оставил еси́ житие́ тле́нное/ и самаго́ себе сраспя́л еси́,/ я́ко па́стырю овча́, Христу́ последовал еси́/ и в Еде́мскую па́жить, радуяся, вселился еси́.
И ны́не, Богоро́дичен:
Не вве́ри нас человеческому предста́тельству,/ Пресвята́я Влады́чице,/ но приими́ моле́ние рабо́в Твоих./ Скорбь бо одержи́т ны,/ терпе́ти не можем де́монскаго стреля́ния;/ покро́ва не и́мамы, ниже́ где прибе́гнем, окая́ннии,/ всегда́ побежда́еми,/ и утеше́ния не и́мамы,/ ра́зве Тебе́, Влады́чице мира,/ упова́ние и предста́тельство ве́рных,/ не пре́зри моле́ния нашего,/ но поле́зно сие́ сотвори́.
На стихо́вне стихи́ры, глас 2
Подо́бен: До́ме Евфра́фов:
Яви́лся еси́/ от ма́терних пеле́н/ освяще́н сосу́д,/ Богоно́се Иоа́нне,/ и дом Пресвята́го Духа.
Стих: Честна́ пред Го́сподем смерть преподо́бных Его́́.
Ле́сти лука́вых бесо́в/ посрами́л еси́/ силою кре́стною/ и уясни́л еси́ славу Христову,/ о́тче Иоа́нне.
Стих: Блажен муж, боя́йся Го́спода,/ в за́поведех Его́ восхо́щет зело́.
Взят был еси́,/ я́коже Илия,/ на колесни́це добродетелей/ и преше́л еси́ нехода́тайственне к Троице,/ Иоа́нне всемудре.
Сла́ва и ны́не, Богоро́дичен, глас и подобен то́йже:
Горе́ Тя ли́цы/ А́нгельстии, Де́во,/ поют с до́льними,/ славяще непреста́нно/ Рождество Твое́ пречистое.
Тропа́рь, глас 1:
Покая́ния основа́ние, прописа́ние умиле́ния,/ о́браз утеше́ния, духовнаго соверше́ния/ равноа́нгельное житие́ твое́ бысть, преподо́бне./ В моли́твах у́бо и в поще́ниих и в слеза́х пребыва́вый,/ о́тче Иоа́нне,/ моли́ Христа́ Бо́га о душа́х на́ших.
Сла́ва и ны́не, Богоро́дичен:
Гаврии́лу веща́вшу Тебе́, Де́во, радуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Давид;/ яви́лася еси́ ши́ршая Небе́с,/ поноси́вши Зижди́теля Твоего́./ Сла́ва Всельшемуся в Тя,/ Сла́ва Прошедшему из Тебе́,/ Сла́ва Свобо́ди́вшему нас Рождество́м Твоим!
И о́тпуст.
НА ВЕЛИ́ЦЕЙ ВЕЧЕ́РНИ
Первыя кафизмы первый антифо́н: Блажен муж:
На Го́споди, воззвах: поставим стихов 8 и пое́м стихи́ры, глас 1:
Подо́бен: Небе́сных чино́в:
В по́стницех возсия́вшаго прообразова́ние, пусты́нное воспита́ние/ Ры́льскаго светильника/ словесы́ и пе́сньми вси ве́рнии да восхва́лим,/ зову́ще и глаго́люще:/ радуйся, вели́кая сла́во,/ я́же в на́ша дни яви́ся,/ Иоа́нне преблаже́нне.
Всю наде́жду возложи́в Творцу твое́му и Бо́гу,/ самаго́ себе́ приве́л еси́ Влады́це,/ И́же не́дра отве́рз, млеко́м тя воспита́/ ду́шу пита́ющих писа́ний/ и Небе́снаго Царствия насле́дника тя сотвори́,/ всеми ве́рными почита́ема,/ Иоа́нне преблаже́нне.
Посреди́ двою́ животу́/ разумне Богоугодно ме́рило поставил еси́, отче,/ ибо тле́ющая оставил еси́;/ разумев же при́сно пребывающа Христа́ Бога,/ и Тому правило души твоея́/ усердно, блаже́нне Иоа́нне, прилепи́л еси́.
Ра́дуешися, ви́дев соверше́ние трудо́в твои́́х,/ и́хже бо о́ко не ви́де,/ ни у́хо слы́ша/ добро́ты ра́йския восприя́л еси́,/ све́тлое воздая́ние подвиго́в твои́х,/ и ра́ка твоя́́ на земли́ благода́ть источае́т,/ тело твое́ неруши́мо иму́щи,/ Иоа́нне преблаже́нне.
И́ны стихи́ры, глас 4:
Подо́бен: Свыше званный:
Заря́ми Ду́ха просвети́вся,/ егда тя Боже́ственное жела́ние распали́/ и ду́шу впери́/ Того вожделе́ти любве́ вои́стину крепча́йше,/ тогда преоби́дел еси́ плоть и кровь,/ и вне ми́ра изше́л еси́,/ мно́гим воздержа́нием и безмо́лвием Сему́ соединя́яся./ Те́мже испо́лнился еси́ отту́ду благи́х,/ я́коже проси́л еси́,/ и просия́л еси́, я́ко звезда́,/ озаря́я души на́ша, Иоа́нне.
Бесо́в лука́вых стре́лы сокруши́л еси́ благода́тию Боже́ственною/ и ловле́ния их всем уясни́л еси́/ уче́ньми твои́́ми;/ Ду́ха же сия́ньми облиста́ем,/ мона́шествующих Богоза́рен светильник явился еси́,/ и пустыни Рыльския пе́рвое украше́ние,/ и боля́щих иску́снейший безме́здный врач,/ и доброде́тельнаго жития́/ первообра́зное начерта́ние, Иоа́нне.
Светода́тельными заря́ми исцеле́ний/ ты пресла́вно просвеща́еши подсо́лнечную,/ неду́гов отгоня́я тьму глубокую;/ те́мже тя солнце друго́е познава́ем,/ и и́ноков утвержде́ние,/ и наста́вника спаса́емых Боже́ственным Духом./ И ны́не па́мять твою́́ соверша́ем/ све́тлую и спаси́тельную,/ прегреше́ний разреше́ние тобо́ю прие́млюще, Иоа́нне.
Сла́ва, глас 6:
Прииди́те, православных собо́ри,/ духо́вне возра́дуемся днесь, иде́же Богомудрый Иоанн/ в па́мять свою собра́л ны есть, к нему вопию́щих:/ радуйся, пусты́нная красото́ и А́нгелов совсе́льниче./ Ра́дуйся, Рыльская похвало́ и болга́ром сограждани́не./ Не преста́й моля́ся Христу́ Бо́гу/ о и́же ве́рою и любо́вию почита́ющих/ присночестну́ю и всепра́здненственную па́мять твою́́.
И ны́не, Богоро́дичен, глас 6:
Кто Тебе́ не ублажи́т, Пресвята́я Де́во?/ Кто ли не воспое́т Твоего́́ пречи́стаго Рождества?/ Безле́тно бо от Отца возсия́вый Сын Единородный,/ То́йже от Тебе́, Чи́стыя, про́йде, неизрече́нно вопло́щся,/ естество́м Бог сый и естество́м быв человек нас ради,/ не во двою́ лицу́ разделя́емый,/ но во двою́ естеству́ несли́тно познава́емый./ Того́ моли́, Чи́стая Всеблаженная,/ поми́ловатися душа́м нашим.
Вход, прокимен дне и паремии три преподобническия.
Прему́дрости Соломоновы чтение (главы́ 5 и 6):
Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.
Прему́дрости Соломо́новы чтение (глава́ 3):
Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.
Прему́дрости Соломо́новы чтение (глава́ 4):
Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.
На лити́и стихи́ры самогласны, глас 2:
Воздержа́тельное обуче́ние на земли́ собра́в,/ преподо́бне о́тче Иоа́нне,/ и страсте́й прило́ги вся угаси́в течением слез твои́х,/ ле́ствица Боже́ственная и честна́я, на Небо возводя́щая,/ всем яви́ся Богоприятное житие́ твое́;/ благоче́стия бо плоды́ показу́я,/ исцеля́еши не́мощи страсте́й ве́рно тебе́ вопию́щих:/ радуйся, восто́ка звездо́ светоза́рная/ и мона́шествующих до́брый па́стырю;/ радуйся, пресла́вное пусты́нным овца́м кре́пкое огражде́ние/ и Це́ркве честно́е утвержде́ние;/ радуйся, заблуждшим вели́кий наста́вниче/ и вселе́нней све́тлое ра́дование.
Земна́го А́нгела и Небе́снаго челове́ка,/ ми́рови благоукраше́ние,/ сла́дость доброде́телей и наслажде́ние благи́х,/ по́стников похвалу́, Иоанна почти́м./ Насажде́н бо в дому́ Бо́жии пра́ведно,/ я́ко кедр в пусты́ни,/ умно́жи ста́до Христовых ове́ц/ в преподо́бии и пра́вде.
Глас 4:
Возсия́́ днесь пресве́тлая па́мять твоя́́,/ Богому́дре Иоа́нне,/ нас созыва́ющи к похвале́нию Христа́ Бо́га нашего./ Темже притека́юще к ра́це моще́й твои́́х/ и исцеле́ния да́ры прие́млюще,/ Спа́са, тя просла́вльшаго, воспева́ем во веки.
Чи́стый душе́ю и се́рдцем,/ А́нгеле земны́й и челове́че Небе́сный,/ де́вства учи́телю и воздержа́ния изве́стное ме́рило,/ Иоа́нне блаже́нне,/ живы́й с Влады́кою твои́́м/ и немо́лчное славосло́вие/ со А́нгелы и преподо́бными Тому принося́,/ творя́щия твою́́ свяще́нную па́мять/ спасай непреста́нными моли́твами твои́́ми!
Глас 5:
Преподобне о́тче Иоа́нне,/ ты вои́стину яви́лся еси́ по́стником похвала́́,/ кре́пость Правосла́вию и вселе́нней свети́ло незаходи́мое,/ льсти́ваго врага́ не убоя́вся/ и устраше́ний его не смути́вся,/ но благода́тию Боже́ственною прему́дренно/ попра́л еси́ всю лесть его,/ от нея́же и нас изба́ви, мо́лим тя!
Сла́ва, глас 5:
Ра́дуйся, пусты́нное украше́ние,/ благоуха́ния вселе́нную исполня́ющее,/ и гору Рыльскую пе́нием оглаша́ющее,/ и Церковь Болга́рскую венча́ющее:/ А́нгелом бо был еси́ сожи́тель,/ полко́в бесо́вских прогони́тель,/ ересе́й же разори́тель и вся́кия ле́сти из ко́рене потреби́тель./ Темже в Вы́шнее всели́вся жили́ще,/ преподо́бне о́тче Иоа́нне,/ Христу́ Бо́гу моли́ся/ дарова́ти душа́м на́шим мир и ве́лию ми́лость!
И ны́не, Богоро́дичен:
Храм и дверь еси́, пала́та и Престо́л Царе́в,/ Де́во Всечестна́я,/ Еюже Изба́витель мой, Христос Господь,/ во тьме спя́щим яви́ся, Со́лнце сый пра́вды,/ просвети́ти хотя,/ я́же созда́ по о́бразу Своему́́ руко́ю Свое́ю./ Темже, Всепетая,/ я́ко ма́терне дерзнове́ние к Нему́́ стяжа́вшая,/ непреста́нно моли́/ спасти́́ся душам нашим.
На стихо́вне стихи́ры, глас 8
Подо́бен: О пресла́внаго чудесе́:
Преподобне о́тче Иоа́нне,/ ты я́же на земли́ су́етная оста́вив,/ Христу́ Бо́гу твоему́ усе́рдно после́довал еси́,/ не предпоче́т тле́нных па́че пребыва́ющих;/ в пусты́ни же, я́коже во гра́де, живы́й,/ де́монский полки́ победи́л еси́./ О, кто возмо́гл бы изрещи́/ твоея́ души́ вои́стину пламене́ющую теплоту́/ яже ко Го́споду, присносла́вне.
Стих: Честна́ пред Го́сподем/ смерть преподо́бных Его́.
Преподобне о́тче Иоа́нне,/ ты вои́стину яви́лся еси́/ пра́вило избра́нное мона́шествующих,/ и правосла́вных услажде́ние,/ и всея́ вселе́нныя свети́льник;/ врага́ бо лука́ваго не ужаси́лся еси́ страхова́ний,/ в пеще́ре живы́й./ О, дарова́ния Ду́ха су́щаго в тебе́,/ имже вся́кое попра́л еси́ де́монов кова́рство, присноблаже́нне.
Стих: Блажен муж, бояйся Го́спода,/ в за́поведех Его́ восхо́щет зело́.
Преподобне о́тче Иоа́нне,/ ты вои́стину ко Го́споду Бо́гу твое́му/ ду́шу твою́́ кре́пце впери́л еси́/ и поще́нием чу́вства очи́стил еси́,/ и непреста́нными твои́́ми моли́твами/ безсме́ртныя жи́зни сподо́бился еси́./ О, удобре́ния по́стников,/ егoже́ Христос, ра́дующася, прия́т преи́скренне/ в неве́щественныя оби́тели, Богомудре!
Сла́ва, глас 4:
Пусты́нное возлюби́в житие́/ и А́нгельское воспри́им служе́ние,/ ми́ра возненави́дел еси́ ле́сть вре́менную/ и яви́лся еси́ Це́ркви свети́ло пресве́тлое,/ А́нгелом соприча́стник и пусты́нным Боже́ственное украше́ние,/ скорбя́щим ра́дость,/ немощны́м исцеле́ние и всем ве́рным спасе́ние./ Но моли́ся Христу́ Бо́гу, всеблаже́нне Иоа́нне,/ мир вселе́нней дарова́ти и душа́м на́шим ве́лию ми́лость.
И ны́не, Богоро́дичен:
При́зри на моле́ние/ Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи;/ Тя бо Еди́ну тве́рдое и изве́стное утвержде́ние и́мамы/ и Твое́ предста́тельство стяжа́хом,/ да не постыди́мся, Влады́чице,/ Тя призыва́ющии./ Потщи́ся на умоле́ние Тебе́ верно вопию́щих:/ радуйся, Влады́чице, всех по́моще,/ ра́досте и покро́ве,/ и спасе́ние душ на́ших.
На благослове́нии хле́бов тропа́рь преподо́бнаго два́жды, пи́сан на ма́лой вече́рни, и Богоро́дице Де́во: еди́ножды.
НА У́ТРЕНИ
На Бог Господь тропа́рь преподо́бнаго два́жды и Богоро́дичен еди́ножды.
По первом стихосло́вии седа́лен, глас 4.
Подо́бен: Вознесыйся на Крест:
Зва́нию Го́спода твоего́ после́довав,/ мир оста́вил еси́ и вся мира прекра́сная,/ преблаже́нне о́тче Иоа́нне;/ претерпе́л же еси́ усе́рдно озлобле́ние пусты́нное/ и му́жески отрази́л еси́ полки́ бесо́вския./ Темже при́сно твою́́ память/ пе́сньми восхваля́ем ве́рно.
Сла́ва и ны́не, Богоро́дичен, глас и подобен то́йже:
Обнови́ла еси́, Чи́стая,/ Боже́ственным Рождеством Твоим/ истле́вшее страстьми́/ земноро́дных ме́ртвенное существо́/ и возвела́ еси́ вся от сме́рти к жи́зни нетле́нней./ Темже Тя по до́лгу восхваля́ем вси,/ Де́во препросла́вленная,/ я́коже прорекла́ еси́.
По втором стихосло́вии седа́лен, глас 5.
Подо́бен: Собезначальное Слово:
Пресе́льник быв от земли́ оте́чества твоего́/ и любо́вь всю земну́ю оста́вив,/ на Го́ру возше́л еси́/ и до Небе́с возвы́сился еси́ сто́лп,/ челове́ки наставля́яй на путь спасе́ния./ Темже и всели́лся еси́ в зе́млю кро́тких,/ Иоа́нне, преподо́бне о́тче наш.
Сла́ва и ны́не, Богоро́дичен, глас и подобен то́йже:
Стра́нное Девы та́инство/ ми́рови яви́ся спасе́ние,/ из Неяже роди́ся Бог без Се́мене/ и пло́тию пока́зася кроме́ тле́ния:/ всех ра́досте, Го́споди,/ сла́ва Тебе́.
По полиеле́и седа́лен, глас 8.
Подо́бен: Премудрость и Слово:
Па́стырскую хи́трость восприи́м,/ разу́мне упа́сл еси́/ ста́до твое́, преподо́бне,/ Христо́ва бо вседу́шно вожделе́л еси́ уче́ния,/ в не́мже просвети́лся еси́/ и к ре́вности А́нгельскаго жити́я/ всех воздви́гл еси́/ единому́дренно прославля́ти Го́спода,/ Богоносе Иоа́нне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́́.
Сла́ва и ны́не, Богоро́дичен, глас и подобен то́йже:
Пречи́стая Де́во, Ма́ти Бо́жия,/ души́ моея стра́сти лютыя/ исцели́, молю́ся,/ и проще́ние да́руй мои́х прегреше́ний,/ и́же безу́мне соде́ях,/ ду́шу и те́ло оскверни́х, окая́нный./ Увы́ мне, что сотворю́ в час он,/ внегда́ А́нгели ду́шу мою́ разлуча́т/ от стра́стнаго моего́ телесе́?/ Тогда́ Помо́щница ми бу́ди/ и Предста́тельница тепле́йша,/ Тя бо и́мам наде́жду, раб Твой.
Та́же степе́нна, 1-й антифо́н, глас 4. Проки́мен, глас 4: Честна́ пред Го́сподем смерть преподо́бных Его́́.
Стих: Что возда́м Го́сподеви о всех, я́же воздаде ми? Вся́кое дыха́ние: Ева́нгелие от Матфе́я, зача́ло 43: Вся Мне предана суть:
По 50-м псалме́ стихи́ра самогласна, глас 6:
Возсия́́ днесь пресве́тлое торжество́/ честныя па́мяти твоея́, Богому́дре о́тче Иоа́нне,/ и́же от младе́нства Бо́гу прилепи́вся/ и Того стопа́м после́довав,/ мирски́й мяте́ж, а́ки ну́ждное волне́ние, преплы́л еси́/ и в Царство Небесное дости́гл еси́./ Темже покланя́ющеся моще́м твои́́м,/ верно Христа́ славосло́вим, да́вшаго тя нам те́пла о нас моли́твенника,/ чту́щих любо́вию честну́ю па́мять твою́́.
Кано́н преподо́бному, глас 8, егóже краегране́сие: Ра́дуйся Иоа́нне, свети́льниче пресветлый.
Песнь 1
Ирмо́с: Во́ду проше́д, я́ко су́шу,/ и египетскаго зла избежа́в,/ израильтя́нин вопия́ше:/ Изба́вителю и Бо́гу на́шему пои́м.
Разу́мный свет му́дрости возсия́й ми ны́не,/ молю́ся ти, преподо́бне отче,/ пе́ти начина́ющу ми твое́ честно́е житие́,/ и Боже́ственныя благода́ти испо́лни уста́ моя́.
Ангелу подо́бяся вои́стину, удали́лся еси́ всех я́же в ми́ре/ и, бежа́в те́лом и душе́ю, водвори́лся еси́ в пусты́ни,/ я́коже Моисей Боговиде́ния, бога́тно наслажда́яся.
Довольно источника пив Евангельскаго вод оби́льных,/ из чре́ва ны́не ре́ки чуде́с источа́еши, преподо́бне Иоа́нне,/ и напая́еши ве́рою к тебе́ притека́ющия.
Богоро́дичен: Утро́бу Твою́ обита́ Бог Сло́во, Де́во Чи́стая,/ я́коже капля сошед, ка́плющая на землю/ и естество́ человеческое, пла́менем зло́бы горевшее,/ обнови́ ороше́нием.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных/ и пое́т Тя дух мой.
Испо́лнь Ду́ха и ум на Небо просте́р,/ о тле́нней пи́щи не попе́клся еси́,/ но хле́бом А́нгельским пита́лся еси́.
Струя́ми слез твои́́х зе́млю пусты́нную напои́л еси́/ и плод приноси́ти тебе́ слану́тка29 неора́нно утучни́л еси́.
Я́ко птене́ц, к Бо́гу возлете́ти жела́я, преподо́бне о́тче,/ гнездо́ себе́ в дре́ве сотвори́л еси́,/ от земны́х облегчи́вся.
Богоро́дичен: Иисуса, Сы́на Твоего́,/ ми́лостива мне сотвори́, зло́е творящему, Пречистая,/ во е́же не ви́дети ми Того́ лице́ отвраща́юща.
Седа́лен, глас 6.
Подо́бен: Милосердия двери:
По́стническия по́двиги понесл еси́/ и страда́льческим венце́м увяза́лся еси́:/ с безплотными бо враги́ в телеси́ боря́ся/ и во́инства их низлага́я,/ удиви́л еси́ терпением твои́м А́нгелы,/ ихже житию́ во пло́ти поревнова́л еси́́./ Но моли́ся Христу́ Бо́гу, о́тче Иоа́нне,/ спасти́́ся нам.
Сла́ва и ны́не, Богоро́дичен:
Милосе́рдия две́ри отве́рзи нам,/ Благослове́нная Богоро́дице,/ наде́ющиися на Тя да не поги́бнем,/ но да изба́вимся Тобо́ю от бед,/ Ты бо еси́ спасе́ние/ ро́да христианскаго.
Песнь 4
Ирмо́с: Услы́шах, Го́споди, смотре́ния Твоего́́ та́инство,/ разуме́х дела́ Твоя́/ и просла́вих Твое́ Божество́.
Обре́л еси́ Бо́га утвержде́нна на версе́ Боже́ственныя ле́ствицы доброде́телей,/ е́юже возше́д, почи́л еси́ от трудо́в и боле́зней.
Агня́ тя добраго Па́стыря,/ в горе́ крыю́щееся, преподо́бне отче, яви́ша овча́та,/ от своей огра́ды убежа́вшая.
На тя наше́дшии па́стырие/ всем пропове́даша стра́нное терпе́ние твое́/ и Бо́гу в вы́шних сла́ву возсыла́ху.
Богоро́дичен: Неневе́стная Ма́ти,/ Тобо́ю уве́дана бы́ша ше́ствия Бо́га на́шего,/ от Твоих пречи́стых крове́й прии́мшаго челове́чество.
Песнь 5
Ирмо́с: У́тренююще, вопие́м Ти,/ Го́споди, спаси́ ны,/ Ты бо еси́ Бог наш,/ ра́зве Тебе́ ино́го не ве́мы.
Ели́цы Боголюби́вии, преподо́бне отче,/ глаго́лов послу́шающе па́стырских,/ на виде́ние твое́ в пустыню прихожда́ху.
Сла́ва твоя́́ дале́че су́щия к тебе́ созыва́ше,/ я́коже глас в пусты́ни вопию́щаго всю́ду пронося́щися.
В дре́ве уедини́вся, я́коже пти́ца, преблаже́нне отче,/ оправда́ния Бо́жия де́лая, не почива́л еси́́,/ ниже́ Го́сподеви моля́ся.
Богоро́дичен: Еди́наго в Тебе́, я́коже в глави́зне кни́жней напи́саннаго,/ Бо́га поноси́вши, Чи́стая,/ в пра́ведных мя Кни́зе напиши́.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Твори́ши дела́ Фесви́тянина Илии́, преподо́бне отче:/ ма́лым бо хле́бом мно́гих пита́еши/ и в сытость чу́дом корми́ши.
Изво́лиша мно́зи с тобо́ю жи́ти, блаже́нне,/ ми́ра сего́ преоби́девше сла́дость/ и твоему́ началообра́зному поревнова́вше житию́.
Лече́бную си́лу от Бо́га прии́м,/ слепы́м свет дае́ши, глухи́м слы́шание, хромы́м хожде́ние/ и всем ве́рою приходя́щим здра́вие.
На главу́ твою́́ ми́ро сни́де и на браду́ твою́́ ма́сло ра́дости,/ е́же свещу́ се́рдца твоего́ неугаси́мо соблюде́, преподо́бне.
Богоро́дичен: Избра́нная Агнице Чи́стая,/ Льва стра́шнаго ро́ждшая, и Агнец бывшаго,/ и на заколе́ние безгла́сна приведе́ннаго,/ и беззако́ния моя́ на Ся восприи́мшаго.
Конда́к, глас 8
Подо́бен: Взбранной Воеводе:
Ангельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́́/ и, Того́ за́поведьми огражда́яся,/ яви́лся еси́́ столп непоколеби́м от вра́жиих нападе́ний./ Тем зове́м ти:/ ра́дуйся, о́тче Иоа́нне, свети́ло пресве́тлое.
И́кос:
В словесе́х и де́лех на земли́ возсия́вшаго и Спа́сово уче́ние соверши́вша,/ земна́го А́нгела и Небе́снаго челове́ка, Иоа́нна сла́внаго,/ соше́дшеся, похва́лим, вси ве́рнии, си́це пою́ще и к нему́ глаго́люще:/ ра́дуйся, Среде́чское прозябе́ние;/ ра́дуйся, пусты́нное воспита́ние./ Ра́дуйся, от ю́ности Бо́га возлюби́вый;/ ра́дуйся, вся всего́ ми́ра ни во что́же вмени́вый!/ Ра́дуйся, и́же высо́кое житие́ по́стническими труды́ показа́вый;/ ра́дуйся, злокозненнаго зми́я копие́м терпе́ния твоего́ низложи́вый!/ Ра́дуйся, на гора́х, я́ко со́лнце, возсия́вый;/ ра́дуйся, го́ры и хо́лмы благоуха́ния испо́лнивый!/ Ра́дуйся, гра́ды и ве́си просвети́вый чудесы́;/ ра́дуйся, вся стра́ны озари́вый доброде́тельми!/ Ра́дуйся, ста́ду твоему́ тве́рдое огражде́ние;/ ра́дуйся, благочести́вым побе́дное венча́ние!/ Ра́дуйся, о́тче Иоа́нне, свети́ло пресве́тлое!
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́́.
Честну́ю це́рковь воздви́гл еси́́, я́коже огра́ду овца́м,/ себе́ це́рковь жи́ву сотвори́в, Го́сподеви поя́:/ отце́в Бо́же, благослове́н еси́́.
Е́же ми́ру распя́тие претерпе́в и я́же на земли́ у́ды умертви́в,/ нектому́ ты жил еси́́, но Христо́с в тебе́, Ему́же взыва́л еси́́:/ отце́в Бо́же, благослове́н еси́́.
Пра́вило души́ твое́й разруши́ти не возмого́ша/ ни по́тове ниже́ боле́зни, ни теле́сное изможде́ние, ни ста́рость претружде́нная,/ но Влады́ки твоего́ жела́я, неуста́нно взыва́л еси́́:/ отце́в Бо́же, благослове́н еси́́.
Богоро́дичен: Руно́ ороше́нное, Де́во, пла́мень грехо́в мои́х угаси́,/ купино́ неопали́мая, страсте́й мои́х те́рние попали́,/ подаю́щи ми на воде́ жи́ти упокое́ния и гее́нскаго мя огня́ свобожда́ющи.
Песнь 8
Ирмо́с: Седмери́цею пещь/ халдейский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся́ ве́ки.
Егда́, со́лнце пресве́тлое, на за́паде жи́зни земны́я себе́ уразуме́л еси́́,/ ученики́ наказа́в и во стра́се Бо́жии утверди́в, возвести́́л еси́́ боле́зней твои́́х возме́здие и, ра́дуяся, дух твой Го́сподеви пре́дал еси́́.
Смерть не лиши́ телесе́ твоего́ живу́щия в тебе́ благода́ти Боже́ственныя,/ но, преше́дшим днем четы́редесятым, сам явля́ешися, и в зе́млю погребсти́ тя повелева́еши,/ и чуде́с струи́ источа́еши.
Ви́дяще пучи́ну чуде́с твои́́х, храм твой сокро́вище проразумева́ем многоце́нное:/ вси бо, неду́гом одержи́мии, в той притека́юще, ско́ро от гро́ба твоего́ здра́вие прие́млют,/ тя, прославльшаго Бо́га, сла́вяще.
Богоро́дичен: Еще́ светле́е све́та солнечнаго/ проразумева́ем де́вства Твоего́́ све́тлое сия́ние, Пречи́стая:/ Све́та бо безле́тнаго и со́лнцу Творца́ во чре́ве Твое́м име́ла еси́́,/ из Тебе́ возсия́вшаго и тьму пре́лести разгна́вшаго,/ и весь мир све́том Богоразу́мия просвети́вшаго.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Те́ло твое́ честно́е во гро́бе положе́нное/ разре́шшуся соузу есте́ственному и тебе́ Бо́гу дух преда́вшу/ облагоуха́ет вся приходя́щия и Бо́га прославля́ет чудесы́, Иоа́нне преблаже́нне.
Ли́ку мона́шествующих и мно́жеству ве́рных те́плый обрета́ешися засту́пник,/ и́же зло́бу разруша́яй и проше́ния исполня́яй./ Бог бо возвели́чи тя, при́снаго раба́ Своего́, челове́ки и скоты́ тобо́ю исцеля́я.
Испо́лни се́рдца моего́ жела́ние, чуде́с исто́чниче:/ да́руй ми благода́ть твою́́, от вся́каго искуше́ния мя избавля́я,/ на Суде́ же гряду́щем во Еде́мстей мя всели́ па́жити моли́твами твои́́ми,/ от горя́ща се́рдца тебе́ песнь прине́сшаго.
Богоро́дичен: Изря́дно предочи́стившися во свята́я святы́х вселе́нием и А́нгельскою руко́ю пита́нием,/ челове́ком Бо́га породила́ еси́́, от Твои́х Пречи́стых крове́й плоть прии́мшаго/ и я́коже пре́жде рождества́ Де́ву Тя соблю́дшаго.
Свети́лен, глас 2.
Подо́бен: Жены́ услы́шите:
Ра́дуйся, пусты́не Рыльская./ Весели́ся, и́ноков сосло́вие./ Прииди́те, вси ве́рнии,/ ра́ку обступи́вше преподо́бнаго,/ то́ки пролива́ющую исцеле́ний,/ пе́сненными похвала́́ми/ воззове́м к нему́, глаго́люще:/ радуйся, Среде́чское прозябе́ние/ и пусты́ни до́брое воспита́ние.
Сла́ва и ны́не, Богоро́дичен:
Непроходи́мую дверь еди́ную,/ плодови́тую ма́слину,/ кади́льницу всезлату́ю, Боже́ственный Огнь нося́щую,/ ста́мну Небе́сныя Ма́нны/ и светоно́сный облак,/ Богоро́дицу святу́ю вси просла́вим.
На хвалитех стихи́ры, глас 4.
Подо́бен: Зва́нный свыше:
Ми́лости ра́ди многия/ и безмернаго благоутро́бия/ род челове́ческий спасти́́ восхоте́вшаго/ глаго́лы послу́шал еси́́, всеблаже́нне,/ и о су́етных небре́гл еси́́,/ но вско́ре зе́млю оста́вил еси́́ оте́чества твоего́,/ и сро́дник сожи́тельство/ и вре́менное наслажде́ние,/ и стопа́м после́довал еси́́ Христа́ Бо́га на́шего,/ Его́́же моли́ спасти́́/ и просвети́ти ду́ши на́ша.
Ничто́же возмо́же тя разлучи́ти/ от любве́ Христо́вы, всеблаже́нне:/ ни мирско́е украше́ние,/ ни оте́ческое стяжа́ние,/ ни бли́жних пристра́стие,/ ни су́етная сла́ва,/ но сия́ вся ни во что́ же вмени́в,/ я́коже еле́нь, распали́лся еси́́ жа́ждею/ и поте́кл еси́ на исто́чник воды́ живы́я Христа́ Бо́га на́шего,/ Его́́же моли́ спасти́́/ и просвети́ти ду́ши на́ша.
Избра́ тя Госпо́дь во святы́х изря́дна,/ и в по́стницех преподо́бна,/и в рабе́х ве́рных тала́нт возрасти́вша,/ те́мже ны́не дух твой весели́тся/ в ра́дости Го́спода твоего́,/ честно́е же те́ло твое́ нам предлежи́т,/ воню́ благоуха́ния испуща́ющее/ и цельбы́ подаю́щее благода́тию Христа́ Бо́га на́шего,/ Его́́же моли́ спасти́́/ и просвети́ти ду́ши на́ша.
Разу́мной души́ покори́л еси́́/ стра́сти теле́сныя воздержа́нием/ и, безстра́стия кри́лы укра́шен,/ благода́ть прия́л еси́́/ челове́ков не́мощи цели́ти/ и духо́в лука́вствия прогоня́ти./ Те́мже ли́цы блажа́ще тя и́ночествующих/ и ве́рных собо́ри, Твою́ па́мять пра́зднующе,/ воспева́ем просла́вльшаго тя Христа́, Бо́га на́шего,/ Его́́же моли́ спасти́́/ и просвети́ти ду́ши на́ша.
Сла́ва, глас 8:
Христо́во избра́нное ста́до,/ прииди́те, стеце́мся к честне́й па́мяти/ преблаже́ннаго Иоа́нна,/ в Ры́льстей пусты́ни просия́вшаго./ Се предлежи́т нам честно́е его́ те́ло,/ ве́ры на́шея утвержде́ние,/ преподо́бных удобре́ние,/ ерети́чествующих посрамле́ние, не ве́рующих воскресе́нию:/ сей бо по сме́рти слепы́м подае́т прозре́ние,/ хромы́м хожде́ние, сля́ченныя исправля́ет,/ разсла́бленныя стяза́ет,/ бе́сы прогоня́ет и благове́рных на сопроти́вныя укрепля́ет./ Ду́хом же предстоя́ Престо́лу Влады́чню,/ мо́лится всегда́ ко Го́споду/ о и́же ве́рою и любо́вию/ пра́зднующих всечестну́ю па́мять его́.
И ны́не, Богоро́дичен:
Влады́чице, приими́ моли́твы ра́б Твои́х/ и изба́ви нас/ от вся́кия ну́жды и печа́ли.
Славосло́вие вели́кое и о́тпуст. И быва́ет пома́зание бра́тии еле́ем от лампа́ды преподо́бнаго.
НА ЛИТУРГИ́И
Блаже́нны от кано́на преподо́бнаго песни 3-я и 6-я. Проки́мен глас 7: Честна́ пред Го́сподем смерть преподо́бных Его́́. Стих: Что возда́м Го́сподеви о всех, я́же воздаде́ ми? Апостол к Галатом, зача́ло 213: Плод духовный есть: Аллилу́ия, глас 6: Блаже́н муж, бояйся Го́спода, в заповедех Его́ восхо́щет зело. Стих: Сильно на земли будет семя его. Ева́нгелие от Луки, зача́ло 14. Причастен: В па́мять вечную будет праведник:
Свята́го благовернаго царевича Дими́трия Углечскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Прехвальнии:
Завистию богоме́рзскою неправеднаго властолюби́теля убиен бысть, Богомудре,/ тебе́ бо неве́дущу лукаваго его умышления,/ но я́ко незло́бив младенец сам себе на заколение приведе,/ благоприятными жертвы Бо́гови обретеся.
Не воспротивися, благородне, неправедному властолю́бцу и губителю,/ но отступа́ше ему земнаго царствия маловре́мянную славу,/ единаго же Небе́снаго Царствия взыскал еси́, егóже и наследова,/ тем Христу́ о нас моли́ся, страстоте́рпче Дими́трие.
Лука́вый раб и льстец Борис тщашеся погубите тебе́/ чароде́йственным волхова́нием и убийством неправедным,/ но сам убо вскоре увязе́ в сети своей от Бога,/ и разрушися его непра́ведное царство./ Ты же, благоверный, со Христом царствуеши во веки.
Сла́ва, глас 6:
Возсия́ днесь па́мять твоя́, Богоприя́тне,/ в нейже Богодарова́нными ти чудесы/ ду́ши и телеса просвеща́еши верных,/ любе́зно и радостно припа́дающих к ти./ Темже хвалами псаломски вопием, рекуще:/ радуйся, свята́я отрасль Боголюби́вая,/ породившаяся от благочести́ваго корене,/ радуйся, порожденное святым Крещением,/ пома́занное Ду́хом Святы́м,/ радуйся незлобивый а́гнече,/ неправедно закла́нный от врага вку́пе и злаго раба./ И сего ради точиши/ Богодарованныя ти чудеса́ неисчетныя приходящим ти с верою./ Темже, благоверный царевичу Димитрие,/ не престай моляся Христу́ Бо́гу/ сохранити отечество твое́, град и люди от враг ненаве́тны.
И ны́не, Богоро́дичен. На стихо́вне стихи́ры, глас 2.
Подо́бен: До́ме Евфра́фов:
Я́ко вои́стинну/ благочести́ваго ко́рене свята́я о́трасль/ от младенства Богом избра́нная,/ Егóже и возлюби́в,/ непра́ведное заколе́ние претерпе́л еси́.
Стих: Ра́дуйтеся, пра́веднии, о Го́споде,/ пра́вым подоба́ет похвала́.
Днесь радуется Церковь Бо́жия/ в нейже реки чудес/ многоцеле́бныя ти мощи/ источают ве́рным благолепие,/ Дими́трие Боголюбе́зне.
Стих: Насаждени в дому́ Господни/ во дворех Бо́га на́шего процветут.
Земное царство оставль,/ в Небесное Царство кротостию и незло́бием,/ я́ко на колесницу, возшел еси́,/ своею кровию, я́ко багряницею царскою, одеян./ Тем проси нам у Христа́ мира и ве́лия ми́лости.
Сла́ва, глас 2:
Приидите, вси русстии народи,/ христоимени́тое стадо Богослове́сное,/ благове́рнии князи со святители и всеосвяще́нный Собо́ре со всем народным мно́жеством,/ воспоем Христа́ Спаса прославляющаго святы́х Своих,/ я́коже и сего солнцесве́тлаго и благороднаго царевича Дими́трия,/ от младых ногтей крепкодушнаго покоя вооружника,/ поборника благоверию,/ заступника и помощника оте́честву своему́,/ и́же святым его именем дерзнувшаго нарещи себе розстри́га Гришка ерети́к,/ и царство, аки волк, восхити́вша,/ злопреле́стника и врага Церкви Бо́жия силою Божиею победи́вшаго/ пришествия ради святы́х мощей своих во град Москву./ Егóже в помощь призва́вше, непрестанно вопием:/ о, первомучеником сострадальче, благове́рный царевичу Дими́трие,/ моли́ Христа́ Бо́га таковаго безчества избавити/ и спасти́ся душа́м нашим.
Тропа́рь, глас 2:
Я́ко благочести́ваго ко́рене Боголюби́вый произыде плод,/ я́ко а́гня незлобиво, неповинно во младенстве за́клан бысть/ от властолю́бца вку́пе и злаго раба./ Тем, я́ко златы́ми крылы,/ душевною чистотою и младенческим незлобием/ к Небесней высоте возлетел еси́, страстоте́рпче Димитрие./ И ны́не кровь твоя́ от земли тайно вопие́т к Бо́гу,/ я́ко Авеля праведнаго./ Сего ради покланя́емся верою ти,/ славяще прославльшаго тя Бога,/ Егóже моли́ стране нашей Богоуго́дне быти/ и сыново́м русским спасти́ся.
Сла́ва, ин тропа́рь, глас 1:
Всеоружеством Ду́ха благода́ти вооруже́н быв/ и необорим столп и утверждение отечеству своему́ показа́ся,/ я́ко а́гнец незло́бивый, от врага неправедно заклан быв/ и в жертву непорочну Го́сподеви принесе́ся./ И ны́не дар благода́ти от всех Подвигополо́жника прием,/ источаеши всем исцеле́ние, достохвальне благоверный царе́вичу княже Дими́трие./ Сла́ва Восприи́мшему тя от земных в Небесная,/ Сла́ва Венча́вшему тя венцем неувядаемым,/ Сла́ва Действующему тобо́ю всем исцеле́ние.
И ны́не, Богоро́дичен.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5.
Подо́бен: Ра́дуйся:
Ра́дуйся, Церковь Бо́жия дивная впра́вду,/ приемшая сокровище безценное,/ многочуде́сныя мощи благородныя,/ от нихже реки чудес проливаются,/ к ни́мже прибега́я/ и всяк с верою, не погрешит своего́ упования,/ но вскоре получит егoже, аще просит,/ к немуже верно вопием:/ достохва́льный великий царевичу Димитрие,/ Христу́ моли́ся дарова́ти душам нашим мир и велию ми́лость.
Ра́дуйся и веселися великохра́брый победоносче Димитрие,/ Боголюбивая твоя́ душа/ не прелести тлеющаго мира красоту, ни земнаго царства вожделе́,/ но Единому Бо́гу от младенства душею прилепися/ и, Того взыскуя,/ кровь свою, я́ко воду, неповинно пролиял еси́./ Тем ны́не со А́нгелы ликовству́еши, Христу́ моли́ся/ дарова́ти душам нашим мир и велию ми́лость.
Ра́дуйся, предивный граде присноцвету́щий Москва,/ приобреты́й паки чудотворныя мощи,/ и́же внутрь тебе́ порожде́нии бысть,/ от нихже течет источник исцелений неоскуде́емых,/ имиже изчезает бесо́вское множество,/ и многоле́тнии недузи и страсти исцеляются,/ и прогонимы бывают нечестивых шата́ния/ пособием благовернаго царевича Димитрия,/ тем, благоверный, Христу́ помоли́ся/ дарова́ти душам нашим мир и велию ми́лость.
Сла́ва, глас 8:
Приидите, новопросве́щеннии лю́дие,/ давидски Божественными песньми новаго страстоте́рпца восхвалим,/ той бо от младенства в осмоле́тном возрасте, я́ко а́гня незлобиво, непра́ведное приим заколение/ от неправеднаго властолюбца и злаго раба,/ мужеу́мным смыслом и благонадежным упованием непорочну жертву предложи себе Богови,/ и о́наго убо злаго господоубийцу суд Божий постиже́,/ и неправедно его царство разрушися,/ и от злаго преле́стника врага Бо́жия побежден быв./ Мы же, ве́рнии, возопием:/ о страстоте́рпче великий царевичу Димитрие,/ Христу́ моли́ся стране нашей на враги одоление дарова́ти/ и душа́м нашим спасе́ние и велию ми́лость.
И ны́не, Богоро́дичен, глас то́йже.
Паремии мученическия.
Пророчества Исаиина чтение (глава́ 43):
Тако глаго́лет Госпо́дь:/ вси язы́цы собра́шася вку́пе, и соберутся кня́зи от них, кто возвести́́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся, и да услы́шат, и да реку́т истину./ Бу́дите Ми свидетели, и Аз свиде́тель, глаголет Господь Бог и о́трок, егóже избра́х./ Да познаете и веруете Ми,/ и разуме́ете, я́ко Аз есмь:/ прежде Мене́ не бысть ин бог, и по Мне не будет./ Аз есмь Бог и несть, ра́зве Мене, спаса́яй./ Аз возвести́́х и спасо́х, уничижи́х и не бе в вас чу́ждий./ Вы Мне свиде́тели, и Аз Господь Бог,/ и еще от начала Аз есмь, и несть от рук Моих избавля́яй./ Сотворю, и кто отвратит то?/ Си́це глаголет Господь Бог, избавля́яй вас Святый Израилев.
Прему́дрости Соломоновы чтение (главы́ 5 и 6):
Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.
Прему́дрости Соломо́новы чтение (глава́ 3):
Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.
На лити́и стихи́ры, глас 8:
Па́че плотскаго благоро́дия духовное я́ко Божие получил еси́,/ Христу́ Бо́гу от младенства душею прилепи́ся,/ вся́ко наслаждение мирское я́ко не суще оставль,/ достигл еси́ на Небесех перворо́дных множество,/ идеже с ними Троице, всех Бо́гу предстоиши, со А́нгелы веселя́ся,/ от Негoже нетле́нными венцы венчася я́ко страстоте́рпец непобедим,/ Егóже моли́ о нас Единаго Человеколюбца.
Я́коже Давид похваляя вопиет:/ из уст младенец совершил еси́ хвалу,/ ты же, благородне Димитрие, сему словеси исполнитель быв/ свои́м Боголюбным чистым житием, неповинною кровию./ Тем силою Свята́го Ду́ха свершил еси́ к Бо́гу свое́ течение/ неповинным свои́м кровопролитием,/ и́же нещадно заклан бысть, я́ко о́гня незлобив,/ и ны́не вопиет кровь твоя́ к Бо́гу, я́ко Авеля праведнаго,/ тем Христу́ моли́ся помиловатися душам нашим.
Ди́вны чудеса́ Твоя́, Го́споди, ди́вны впра́вду/ и ни единоже слово довольно к похвалению чудес Твоих,/ я́ко удивляеши святыя Своя,/ како кости но́ги источают исцеления,/ я́коже и сего новоявленнаго чудотворца Дими́трия/ одарил еси́ цело тело его во гробе лежаще, я́ко жи́во,/ чудеса́ творит неисче́тныя всем его чтущим,/ неоскудно многоразличная подает исцеления,/ славу и благодарение возсылающим/ Единому чудодействующему Бо́гу,/ прославляющему святыя Своя.
Сла́ва, глас 6:
Я́ко многоценное ми́ро,/ Христу́ Бо́гу кровь свою принесл еси́,/ от Негoже мзду твоего́ страдания прият венец нетленный,/ действием Свята́го Ду́ха чудоде́еши,/ неисчетная чудеса, приходящим с верою к тебе́/ и сего ради вопие́м:/ победоносче благоверный царевичу Дими́трие,/ моли́ непрестанно Христа/ отечество твое́ во благоде́нствии устроити и врагом одолительно/ и спасти́ души на́ша.
И ны́не, Богоро́дичен.
На стиховнах стихи́ры, глас 8.
Подо́бен: Что вас наречем:
Что тя наречем, Димитрие благородне,/ вышних желая до́льняя презрел еси́,/ и конец жития осмоле́тным возрастом мученически соверши́в,/ венцем царским от Бо́га венчался еси́/ я́ко сын царе́в и мученик непобедим,/ и вместо земных и тленных на Небеси нетленная восприял еси́,/ моли́ спасти́ся душам нашим.
Стих: Праведник, я́ко финикс, процветет,/ и я́ко кедр, и́же в Лива́не, умножится.
Что тя наречем, прехва́льне,/ звезду, сияеши бо чудесы́,/ реку ли источа́еши бо недугом исцеления,/ всем человеком даруеши здравие и чудес дарование,/ и к Бо́гу о всех ходатай,/ моли́ спасти́ся душам нашим.
Стих: Насаждени в дому́ Господни/ во дворех Бо́га на́шего процветут.
Что тя именуем, страстотерпче,/ родителя земнаго оставил еси́,/ и Небе́снаго Бо́га Отца получил еси́,/ Вышний Иерусалим, матерь всех, возлюбил еси́,/ идеже со Христом ны́не царствуеши,/ великое твое́ страдание, а бо́льшая дарова́ния,/ моли́ спасти́ся душам нашим.
Сла́ва, глас 6:
Ра́дуйся и веселися, преименитый граде присноцветущий Москва,/ израстивый таковаго благороднаго страстотерпца,/ произшедшаго из царских чресл,/ от сосцу матере младенческим незлобием/ и мужеумным смышлением от Бога,/ от души возлюбившаго Божественныя пении,/ и к Церкви Божии тщанием Боголюбивую душу свою просветив,/ милостынями и нищелюбием светло украшен,/ егóже Богоугодному житию позави́дев диавол,/ воздвиже на него уготованнаго себе сосу́да,/ злаго властолюбца и губителя Бориса,/ он же научением диаволим/ закла тебе́ благороднаго, я́ко агня незлобиво./ Но сий убо, неповинно закланным, на Небесех царствует,/ а заклавый его во веки мучится в геенне огненней,/ но убо, Боголюбивый победоносче,/ Христу́ моли́ся помиловати люди/ и спасти́ души на́ша.
И ны́не, Богоро́дичен.
Тропа́рь, глас 2:
Велика обрете тебе́ целебника в последнем роде,/ люди твои́, рустии народи,/ новый страстотерпче Христов, благоверный царевичу княже Дими́трие,/ возсия бо на земли чудесы своими, я́ко звезда небосветлая,/ но, созрелый убо клас Христу, испив чашу,/ я́ко а́гнец непорочен, заклан бысть в жертву чисту,/ принесе себе Влады́це всех,/ от Негoже победным венцем увязе́ся,/ просия мирови, я́ко солнце,/ прелести вся угасил еси́/ и Соборную обогащаеши Церковь чудотворении,/ стране нашей на враги поборник,/ одержимым же различными неду́ги врач,/ всех нас освящаеши богатными даровании, всехвальне,/ и моли́твами, святе, твои́ми всем даеши Боже́ственное исцеле́ние.
Сла́ва, ин тропа́рь, глас 4:
Царскою диаде́мою одеян, Богому́дре мучениче,/ за скипетр крест в руку приим,/ явися я́ко победоносец/ и всесожжения жертву священну себе принесл еси́, Димитрие,/ показася изряден врач русской стране,/ образ в себе чудотворения нося,/ я́ко агнец непорочен, от раба заколение прият,/ убивающаго тело, души же коснутися не могуща./ Да плачется убо злый властолюбец,/ ты же, радуяся, предстоиши Святе́й Троице,/ моли́ся стране нашей Богоугодне быти/ и сыновом русским спасти́ся.
И ны́не, Богоро́дичен по гласу.
НА У́ТРЕНИ
На Бог Госпо́дь: тропа́рь святому два́жды.
Сла́ва, и ны́не, Богоро́дичен.
По 1-й кафизме седа́лен, глас 1:
От чресл царских произшед, цвет чистоты произникнут,/ плод благоверия возрасте́ осмоле́тным возрастом/ жилище бысть Пресвятому Духу,/ Божественными чудесы сияя, благородне Димитрие,/ мир мирови испроси и душам нашим велию ми́лость.
Сла́ва, и ны́не, Богоро́дичен:
Упование христиан, Пресвята́я Де́во,/ Егóже родила еси́ Бо́га па́че ума же и слова,/ непрестанно моли́ с Вы́шними Силами и со благоверным Димитрием/ да́ти оставле́ние грехов на́ших всех и исправление жития/ верою и любо́вию присносла́вящим Тя.
По 2-й кафизме седа́лен, глас 4:
Кровь свою, я́коже алава́стр мира, Христу́ принесл еси́,/ благоверный царевичу Димитрие,/ тем и Великий Преблагий Дародатель прослави тя и возвыси чудесы Своими благода́тными,/ и сего ради па́мять твою́́ радостно почитаем, досточудне.
Сла́ва, и ны́не, Богоро́дичен:
Дево Всенепоро́чная, я́коже Пресу́щнаго Бо́га рождшая,/ с новоя́вленным чудотворцем Димитрием Того непрестанно моли/ оставле́ние прегрешений и исправление жития да́ти нам прежде конца,/ верою и любо́вию поющим Тя по долгу, Едина Всепетая.
По полиелее, седа́лен, глас 8:
От младенства душею к Бо́гу прилепися/ и сего ради венцем мучения от Него венчася я́ко предобр страдалец всече́стен,/ тем с мученическими лики веселяся и Небесныя дары приемлеши,/ имиже подаеши от вся́ких недуг здравие приходящим к тебе́ с верою и любовию,/ чтущим святу́ю и многоцелебную па́мять твою́́.
Сла́ва, и ны́не, Богоро́дичен:
Я́ко Де́ву и Едину в жена́х Тя без семене рождшую Бо́га плотию, вси ублажаем роди человечестии,/ ибо Огнь Божества́ вселися в Тя, я́ко Младенца дои́ши и Зиждителя, и Го́спода,/ те́мже А́нгельский и человеческий род, досто́йно сла́вим пресвятое Рождество Твое́ и согласно вопие́м Ти:/ моли́ Христа́ Бо́га согрешений оставле́ние дарова́ти воспева́ющим досто́йно славу Твою́.
Степе́нна, 1 антифо́н, глас 4. Проки́мен: Возвеселится праведник о Го́споде/ и уповает на Него. Стих: Насаждени в дому́ Господни/ во дворех Бо́га на́шего процветут. Вся́кое дыха́ние: Ева́нгелие от Луки, зача́ло 63 (12, 2–12).
По 50-м псалме́ стихи́ра, глас 8. Самогла́сен:
Из младенства и́згнан бысть земнаго царства,/ но Небесному Царствию от Бо́га сподо́бися,/ и ны́не благода́тный дар от Подвигоположника Христа́ совершенно восприи́м,/ неоскудно источаеши всем исцеления,/ и сего ради заклан бысть, я́ко а́гня,/ не сотворив зла никоегoже, ни супротивися супостату своему́,/ но, я́ко птенец, последуя закланию его,/ и ны́не, со А́нгелы ликовствуя, Христу, Димитрие, моли́ся,/ я́ко да милостив будет нам в день Страшнаго Его́ Пришествия.
Канон святому Димитрию, глас 8.
Песнь 1
Ирмо́с: Воду прошед, я́ко сушу,/ и египетскаго зла избежав,/ израильтя́нин вопияше:/ Изба́вителю и Бо́гу на́шему пои́м.
Многомилостивыя Твоея́, Христе́, помощи прошу,/ страстотерпца Твоего́́ Дими́трия моли́твами/ отве́рзи ми устне́ и просвети́ разум,/ да воспою светоносную его па́мять че́стно.
Пое́м Христа́ Бо́га нашего, просла́вльшаго благороднаго Своего́ уго́дника,/ Емуже, Дими́трие, моли́ся/ помиловати нас, рабы твоя́.
За́клан бысть в изгна́нии, идеже и венец прият от Бога,/ но паки возвратил еси́ многоцелебныя ти мощи в природное твое́ отечество,/ идеже струи́ исцелений неоскудно источаеши нам.
Богоро́дичен: Заступнице христиа́ном, Помощнице скорбящим,/ Богоро́дице Препетая, спаси́ Тебе́ почитающих.
Песнь 3
Ирмо́с: Несть свят, я́ко Господь,/ и несть праведен, я́ко Бог наш,/ Егóже поет вся тварь:/ несть праведен, па́че Тебе́, Го́споди.
От младых ногтей житие стяжа непорочно, добре преочи́стив свою душу,/ на высоту востече отроческих добродея́ний,/ тем, благородне, со Христом царствуеши во веки.
От враждебнаго раба и безчеловечнаго пролиял еси́ кровь свою неповинно, благоверный Димитрие,/ и сего ради вселися в вечная благая,/ яже уготова Бог любящим Его́.
Кровь свою, я́ко алава́стр мира, принесе Тебе́ уго́дник Твой Димитрий,/ егóже моли́твами, Христе́,/ возвыси рог христианский и стране нашей победы на враги даруй.
Богоро́дичен: Тебе́ вси и́мамы прибежище, стену и помощь христиане,/ и Тебе́ сла́вим немолчно, Безневестная.
Конда́к, глас 8:
Возсия́ днесь благоцвету́щая отрасль благочести́ваго ко́рене,/ от благоверных Российския страны доброра́сленный грозд израсте́/ и Христо́ви красен плод прозябе́./ Темже от земли Воззва́вый тя к вечным обителем,/ соблюдает и по убиении твое́м невредимо тело твое́,/ страдальчески обагрено кровию;/ благородне святе Димитрие,/ соблюдай отечество свое́ и град твой невредим,/ тому бо еси́ утверждение.
Седа́лен, глас 8:
Вседушно измлада Христа́ возлюбив, Того премудростию наставляем,/ уступил еси́ земное царство заклавшему тя неправедно властолюбцу и губителю,/ и сего ради ны́не на лоне Авраа́мле почиваеши, со А́нгелы веселяся, Дими́трие благородне,/ моли́ Христа́ Бо́га грехом оставле́ние дарова́ти, чтущим любо́вию святу́ю па́мять твою́́.
Сла́ва, и ны́не, Богоро́дичен:
Безневестная Чи́стая Де́во Богоро́дице, Едина ве́рным Предста́тельнице и покрове,/ бед, и скорбей, и лю́тых обстоя́ний всех нас избави,/ и́же на Тя надежду имущих,/ и спаси́ души на́ша Божественными Своими моли́твами.
Песнь 4
Ирмо́с: Услышах, Го́споди,/ смотре́ния Твоего́́ та́инство,/ разумех дела Твоя́/ и прославих Твое́ Божество.
Во цвете ю́ностном, во младенческом незлобии мира красоту́ оставил еси́,/ пролия́ кровь свою неповинно,/ и ны́не Небесных благ наслаждаешися с первородными множествы, Димитрие.
Всемы́сленно последуя сродником своим,/ Роману и Давиду, самобра́тным по плоти,/ неправедно заклан бысть, я́коже и о́на,/ с ними же моли́ся благостроину быти отечеству твое́му.
Завистию властолю́бною разжен бысть раб, убийца твой,/ закала́ет тя, я́ко а́гня незлобиво,/ сам же праведнаго возмездия не убежа́.
Богоро́дичен: Вышшу Тя всех и святейшу Небесных чинов прославляем/ и велегласно вопием:/ о Ма́ти Бо́жия, певцы Своя сохрани и поганых нашествия разру́ши.
Песнь 5
Ирмо́с: Го́споди Боже наш, мир даждь нам,/ Го́споди Боже наш, стяжи́ ны,/ Го́споди, разве Тебе́ иного не вемы,/ Имя Твое́ именуем.
Господь и Бог наш услыша воздыхание твое́ и слезы,/ прият кровь твою́́, я́коже Авеля праведнаго,/ сего ради с ним безконечно царствуеши.
Тезоименитно мирото́чцу, Димитрие, от Бо́га стяжа́ именова́ние,/ с ним же моли́ся покорити под нозе стране нашей варварская стремления.
Я́ко крин, мученическою светлостию процвел еси́,/ действием Пресвята́го Ду́ха благовонную благода́ть изцелений источаеши верным/ от цельбоноснаго ти гроба.
Богоро́дичен: Укрепи, Влады́чице, присносла́вящих Тя, на супротивныя враги,/ я́ко праведнаго царя Давида на Голиафа,/ да Тебе́ славяще воспеваем:/ радуйся, покрове и Заступнице христиа́ном.
Песнь 6
Ирмо́с: Очисти мя, Спа́се,/ многа бо беззакония моя,/ и из глубины зол возведи, молюся:/ к Тебе́ бо возопих и услыша мя,/ Боже спасения моего.
Всеоружством духа благода́ти вооруже́н быв,/ и непобедим заступник отечеству своему́ показался еси́,/ егoже, благоверне, сохраняй от враг ненаветно.
В непорочну жертву принесе́ себе,/ в неправедно вда себе заколе́ние, я́ко а́гня незлобиво,/ и сего ради со А́нгелы ликуеши, Небесных благ наслаждаяся.
Иже светлый твой праздник совершающих, Богомудре,/ моли́ град твой необорим сохранити,/ и отечеству на враги одоление дарова́ти.
Богоро́дичен: Душевныя ми страсти, Богоро́дице, исцели,/ И́же безстрастия бывши источник и просветивши лики благоверных Рождеством Своим.
Конда́к, глас 8:
Светило явися пресветлое днесь Боже́ственная па́мять твоя́,/ Богодарованная ти чудеса́ от вся́ких многоразличных недуг подают исцеления/ с верою призывающим тя,/ созывающи нас к похвалению прославльшаго тя Бога,/ Егóже моли, страстотерпче благоверный Димитрие,/ мир мирови дарова́ти/ и от видимых враг люди невредны сохранити, да зовем ти:/ радуйся, ты бо еси́ утверждение граду нашему.
И́кос:
Славу земную, я́ко истле́ющую оставль, нетленную на Небесех наследовал еси́,/ чистый бо сосу́д Святому Духу от младых ногтей быв,/ и закла́н бысть, я́ко непорочное а́гня,/ отнюду же Мздовозда́тель Бог, ви́дев кротость твою́́, незлобие, да́ром чудес обогати тя,/ тем ны́не пребываеши со А́нгельскими лики и с перворо́дными множествы в неизглаголанней радости, Богому́дре Дими́трие страстоте́рпче,/ моли́ непрестанно без вреда сохранити отечество твое́ и люди твоя́, да зовем ти:/ радуйся, ты бо еси́ утверждение граду нашему.
Песнь 7
Ирмо́с: Божия снизхождения/ огнь устыде́ся в Вавило́не иногда́,/ сего ради о́троцы в пещи́ ра́дованною ногою,/ я́ко во цве́тнице, ликующе, поя́ху:/ благословен еси́, Боже отец на́ших.
Ни земнаго царства благородием, ни материя разлучения я́ко младенец не внимаше,/ но мужеу́мным смыслом вся сия́ предал еси́ в руце Богови,/ сам же на заколе́ние вдаде себе, вопия́ше:/ отец на́ших Боже, благослове́н еси́.
Всенародный глас ти приносим и мольбу, к тебе́ припа́дающе, благоверный Дими́трие,/ просим мира и грехом оставле́ние поющим:/ отец на́ших Боже, благослове́н еси́.
Лучею крови твоея́ ту́чу бесо́вскаго озлобле́ния изсушил еси́,/ чудоде́йственным дея́нием потопил еси́ пламень недуг и страсте́й на́ших, Богоблаженне.
Богоро́дичен: Закона, Де́во, пременила еси́ естество Боже́ственным Свои́м зачатием,/ па́че естества́ родила еси́ Бога, вопию́щим:/ благослове́н Бог отец на́ших.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ силою же лу́чшею спасе́ны сия́ ви́дев,/ Творцу и Изба́вителю вопия́ше:/ отроцы, благословите,/ священницы, воспойте,/ лю́дие, превозносите во вся ве́ки.
Волнующеся море заклания твоего́ Боже́ственным окормлением невредно преплыл еси́,/ зависть тлетворнаго змия глубиною кро́ве твоея́, Дими́трие, потопил еси́,/ тем райская небурная пристанища достигл еси́, вопиюще:/ отроцы, благословите, священницы, воспойте, лю́дие, превозносите во вся ве́ки.
Не доволен бяше убийца твой о закла́нии твое́м,/ но тщашеся от всех утаити злое умышление свое,/ но бысть всем я́ве,/ праведнаго же Суда Бо́жия не може́ избежати.
Псаломския песни, я́ко венец, в па́мять твою́́ приносим ти, блаже́нне,/ молим тя подви́гнутися на мольбу́ к общему Влады́це всех,/ просити мира мирови, град же и люди твоя́ избавити от вся́ких бед и напастей.
Богоро́дичен: Гордыню и шата́ния, Богоро́дице, низложи и советы неправедных разори,/ и зачина́ющих ра́ти погуби, и благове́рных десницу возвыси,/ да Твой, Пресвята́я Де́во, праздник сла́вим.
Песнь 9
Ирмо́с: Вои́стинну Богоро́дицу/ Тя исповедуем,/ спасе́ннии Тобою, Де́во Чи́стая,/ с Бесплотными лики Тя велича́юще.
Удо́брен добро́тою страданий твои́х,/ победы на главе венец нося, на Небо востече я́ко преудо́брен победи́тель,/ тем нас всегда поминай, да тя непрестанно величаем.
Твоя к Бо́гу дерзновения пропове́дают бывающая от гроба чудеса́ твоя́, благоверне,/ тем и нам свыше даждь помощь,/ уставля́юще на́ша болезни, и поганых шата́ния низложи.
О Троице Пресвятая, благоприятно малое сие песнословие сотвори,/ и шу́яго мя стояния на Суде избави, и плени́цу согрешений моих расто́ргни/ моли́твами благовернаго Дими́трия, да Тя непрестанно величаем.
Богоро́дичен: Бо́га рождшая, Де́во,/ уязвленную грехми душу мою/ и вечнаго мя пламени избави моли́твами Своими.
Свети́лен.
Я́ко цвет краснейший, от благовернаго прозябл еси́ корене, благочестне Дими́трие,/ обагрением страдания твоего, я́ко царскою порфирою, обагрился еси́ кровию,/ тем Божественную ти па́мять любо́вию творящих от бед спасай.
Сла́ва, и ны́не, Богоро́дичен:
Стоящи окрест Тебе́, девы Богомудрыя, Богороди́тельнице Мари́е,/ я́коже царевы дщери, Сыну Твое́му приведо́шася, Невесто Лепопречи́стая, я́ко Царю всяческих, Егóже, Ма́ти Де́во Отрокови́це, о нас моли.
На хвалитех стихи́ры, глас 2.
Подо́бен: Киими похвальными:
Киими духовными похвала́ми восхва́лим благовернаго царевича Димитрия,/ законнаго наследника и священнаго собора сына свету и дни,/ А́нгелом собеседника, первому́чеником удобре́ние,/ страстотерпцем похвалу святоле́пную,/ и́же от благаго ко́рене святое порождение благоче́стием сияющаго,/ мучеником добро́ту необоримую,/ сосу́да Богоизбраннаго Святому Духу,/ Емуже моли́ся спасти́ души на́ша.
Киими смире́нными пе́нии воспои́м страстотерпца, незлобиваго птенца́,/ неповинным заколением непорочну жертву принесшаго себе Бо́гови,/ звезду пресветлую, благоверным похвалу благочестивую,/ Церквам единомышление и благостоя́ние,/ святителем украше́ние святолепное,/ христиа́ном славу велехвальную,/ Христу́ молитвенника о душа́х на́ших.
Киими недостойными устна́ми возвеличим благовернаго царевича Дими́трия,/ егóже Христос прослави чудесными дарова́нии/ и от различных недуг показа того цели́теля,/ реку чудес неисчерпаемых Христо́вым пособием и мужеу́мным смышлением,/ крепкаго во бранех помощника,/ врагом победителя, бесо́м прогонителя/ и молитвенника о душах на́ших.
Сла́ва, глас 8:
Приидите днесь, рустии собори,/ и видите незлобиваго а́гнца,/ закла́ннаго неповинно, победоносца Дими́трия,/ телом убо во гробе положен бысть я́ко мертв,/ душею же на Небесех со А́нгелы и мученики ликовствует,/ нетленно обретеся святое тело его и Богодарова́нная его чудеса,/ емуже поюще возопие́м:/ страстоносче Христов Дими́трие,/ смолебники прием А́нгельския лики и мученики,/ моли́ся Пресвятей Троице верно чтущим тя мир и здравие дарова́ти,/ на враги одоление и спасти́ души на́ша.
И ны́не, Богоро́дичен:
Влады́чице, приими́ молитву раб Твоих/ и избави нас/ от всякия нужды и печали.
Свята́го священномученика Садофа и с ним 128 мученик, при Савории царе в персех
Тропа́рь, глас 4: И нравом причастник:
Конда́к, глас 4:
Владычню речению усердно в подобстве последова,/ я́ко убо пастырь до́брый душу свою за Христовы овцы положил еси́,/ священномучениче Садофе, молим тя, многострадальне,/ моли́ пастырем начальника Христа/ и нас причести деснаго овец стояния,/ да воспоем ти:/ радуйся, священный о́тче Садофе,/ и́же за Христа́ кровь свою излиявый.
* * *
слану́тка – сладкий стручец, турецкий боб.