Целому́дрия тезоимени́т,/ от Боже́ственнаго проразуме́ния/ про́зван быв, Софро́ние,/ целому́др был еси́ в де́лех и пра́веден,/ му́жествен и разу́мен,/ доброде́тельми ро́дными до́бле венча́емь,/ и пребы́л еси́, процвета́я во обои́х,/ душе́ю же и те́лом/ я́коже строи́тель изря́днейший.

Из уст Богослове́сных/ богосло́вна возгреме́л еси́ уче́ния,/ Софро́ние всеблаже́нне,/ богосло́вив ясне́йше Отца́ Безнача́льна,/ и Собезнача́льна Сы́на,/ и Ду́ха Свята́го Соприсносу́щна,/ во Еди́нице Тро́ицу/ и Еди́ницу в Тро́ице,/ Бо́га Еди́наго суще́ственным то́ждеством.

Пло́ти по ипоста́си/ соеди́ншася безпло́тнаго/ и Отцу́ Собезнача́льнаго Сло́ва, всему́дре,/ кроме́ преложе́ния и слия́ния,/ му́дре научи́л еси́,/ де́йствующа же сугу́бо/ обои́ми естествы́,/ из ни́хже слежи́т и в ни́хже зри́тся,/ Еди́н Сый, неразде́лен Существо́м,/ в сем и о́ном разумева́емый.

Сла́ва, и ны́не, Богоро́дичен, глас и подо́бен то́йже:

Ту́чами Ду́ха Пресвята́го, Пречи́стая,/ мою́ мы́сль ороси́,/ я́же ка́плю ро́ждшая – Христа́, неизче́тно/ безме́рная беззако́ния челове́ков/ щедро́тами измы́вшую,/ изсуши́ исто́чник страсте́й мои́х/ и пото́ка мя сподо́би/ пи́щи живы́я при́сно/ моли́твами Твои́ми.

Крестобогоро́дичен. Подо́бен то́йже:

На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся/ и – что виде́ние сие́? – взыва́ше,–/ Сы́не вожделе́нне,/ сия́ Ти непокори́вый собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному соше́ствию Твоему́, Влады́ко.

Кано́н, его́же краегране́сие: Целому́дрия пою́ тезоимени́таго искрению же́ртву. Кир Феофа́на. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Целому́дренно преплы́л еси́ целому́дрия пучи́ну,/ ве́тры духо́вными направля́емь,/ и собра́л еси́ мно́го бога́тства,/ му́дрости дарова́ния, о́тче Софро́ние.

Я́ко А́нгел был еси́ Христо́ва воскресе́ния/ и председа́тель Боже́ствен, Боже́ственнаго гро́ба,/ обогати́вшаго исто́чником безсме́ртия, Христа́,/ воздви́гшаго паде́ние ро́да на́шего.

Све́тлостию слове́с твои́х и ума́ острото́ю мир уясни́л еси́,/ богосло́вив я́сно Триипоста́снаго Божества́ Существо́,/ Еди́ницу Тричи́сленную, о́тче Софро́ние.

Глаго́л веща́ние твое́ и уче́ний благознамени́тая гу́сль протече́ земны́я концы́,/ та́инству строе́ния сло́ва уча́щая, о́тче Софро́ние.

Богоро́дичен: Сый естество́м несозда́нен, и Отцу́ соприсносу́щен,/ и време́н превы́шший, и преве́чный,/ из Тебе́, Влады́чице, зиждемь,/ и под ле́том я́ко Челове́к быва́ет, спаса́я челове́ка.

Песнь 3

Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ не́сть бо свят, па́че Тебе́, Человеколю́бче.

Утвержда́ема па́лицею слове́с твои́х, преподо́бне,/ стремле́ния злочести́вых и богобо́рных ересе́й/ отража́ет, отгоня́щи, Це́рковь Христо́ва.

Побо́рствовав по честне́м, Богоно́се, пропове́дании,/ показа́лся еси́ победи́тель по́мощию Ду́ха,/ му́дре укрепля́емь, о́тче Софро́ние.

Умертви́в все тле́емое пло́ти сладостра́стие,/ нетле́нную ду́шу благоче́стием оживи́л еси́/ и сию́ показа́л еси́ Боже́ственный орга́н.

Богосло́вный, и кра́сный, и медото́чный язы́к твой/ сло́ва ре́ки источа́ет, богоприя́тне,/ Боже́ственная уче́ния всем излива́я.

Богоро́дичен: Тя, ро́ждшую Бо́га, Богоро́дицу сла́вим,/ Рождеству́ Твоему́ именова́нием сли́чествующе/ и зва́ния по обоему́, Пречи́стая Влады́чице.

Седа́лен, глас 4.

Подо́бен: Ско́ро предвари́:

Словесы́ украси́л еси́ Це́рковь Христо́ву,/ де́лы соблю́д е́же по о́бразу Бо́жию, Софро́ние преподо́бне,/ просия́ бо в ми́ре, е́же в тебе́ целому́дрие,/ благода́ть уче́ний облиста́ющая всем,/ любо́вию пра́зднующим, о́тче, па́мять твою́.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ ка́ко, Жи́знь всех, вкуша́еши сме́рти,/ оживи́ти уме́ршия хотя́, я́ко Благоутро́бен?

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Еди́но Безнача́льное Существо́ в Трех Ипоста́сех/ сво́йствы соверше́нными ты, о́тче, му́дре пропове́дал еси́,/ разделя́емое непресеко́мо, совокупляемо же неслия́нно/ во́лею еди́ною и Божество́м.

Име́я целомудренну мы́сль и ум целому́дрейший,/ не смеше́ние мудрова́л еси́, о́тче, ни преложе́ние,/ ниже́ слия́ние соедине́нных непрело́жно/ двои́х есте́ств во еди́ном Христе́ Единоро́днем, всеблаже́нне.

Просвеща́емь Боже́ственне просвеще́нием Ду́ха,/ лю́тое неи́стовство Несто́риево разори́л еси́/ то́южде во́лею и ра́зумом/ и́же соедине́ние пропове́давшаго Христо́ву обою́ естеству́.

Пи́рра попали́л еси́, Богому́дре, огне́м уче́ний твои́х,/ отмета́юща два бы́ти Христо́ва хоте́ния/ разли́чными существы́, я́же по себе́,/ де́йства же вку́пе сугу́ба, о́тче преподо́бне.

Богоро́дичен: Украси́лася еси́ па́че всего́ А́нгельскаго благоле́пия,/ я́ко ро́ждши сих, Отрокови́це,/ Творца́ же и Го́спода, от Твои́х пречи́стых крове́й воплоща́ема,/ избавля́ющаго вся, Того́ сла́вящия.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Честно́е воскресе́ние и Гроб жи́зни неукло́нною любо́вию зря,/ Боговиде́ния поче́рпл еси́ тайноуче́ния/ и ве́рным препо́дал еси́, святи́телю, сия́ния.

Вся́чески возлюби́л еси́ еди́наго Блага́го, разже́гся заре́ю мы́сленною,/ и исто́чник возлюби́л еси́ нетле́ния,/ виде́ньми, всему́дре, к Нему́ простира́яся.

Храм жив и одушевле́н был еси́ Бо́жий,/ умертви́вся всем, су́щим на земли́,/ сло́ва трапе́зу оби́льную стяжа́в, преподо́бне, и свети́льник ве́ры.

Богоро́дичен: Во двою́ разумева́ема существу́, Христа́,/ Сы́на Единоро́днаго Бо́жия, Безнача́льнаго пло́ть бы́вша,/ па́че сло́ва родила́ еси́, Богома́ти Присноде́во.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию.

Бога́тно излия́ся благода́ть Ду́ха Всесвята́го, Богому́дре, во устна́х твои́х,/ те́мже веща́ние твои́х слове́с ре́чным подо́бится тече́нием.

Я́ко фи́никс, в дому́ Госпо́дни процве́л еси́, благопло́дием слове́с/ и чи́стым житие́м наслажда́я се́рдца, святи́телю, ве́рно чту́щих тя.

Умерщвля́ется живи́тельным ору́жием слове́с твои́х ерети́ческий собо́р/ и свере́пое ополче́ние богобо́рец, закала́емо,/ умерщвля́ется уче́ний твои́х мечи́.

Богоро́дичен: Пое́м, Богоро́дице, чи́стое рождество́ Твое́,/ и́мже спаса́емся вси сме́рти се́тей и лю́таго греха́/ и уз а́довых избавля́емся.

Конда́к, глас 8.

Подо́бен: Взбра́нной:

И́же Боже́ственною ре́вностию подви́гся/ и и́стинных повеле́ний устне́ распросте́р,/ церко́вная основа́ния благоузако́нив/ и та́мо су́щим мона́шеским соста́вом преда́в,/ прему́дрый в Патриа́рсех Иерусали́мский Софро́ние,/ всему́драя словеса́ во свет изве́л еси́,/ и́миже наставля́еми, зове́м ти:/ ра́дуйся, све́тлая правосла́вных похвало́.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших, благослове́н еси́.

Свы́ше манове́нием, ерети́ческим языкобо́лием противля́яся, му́дре,/ победоно́сец быв, вопия́л еси́, веселя́ся:/ препе́тый Го́споди, Бо́же оте́ц, благослове́н еси́.

Весь возложе́н Бо́гу, по́стных садоде́лательства прелета́я, му́дре,/ цветни́к твои́ми насади́л еси́ доброде́телей поуче́ньми,/ Бо́гу, Су́щему в Вы́шних, освяти́в.

Зако́ну повину́яся Христо́ву,/ твоего́ худо́жества бога́тство тре́бующим/ благоче́стно, Богому́дре, разда́л еси́, воспева́я:/ препе́тый Го́споди, Бо́же оте́ц, благослове́н еси́.

Богоро́дичен: Освяти́вши ду́шу и предочи́стивши те́ло,/ наи́тием на Тя Свята́го Ду́ха, Всенепоро́чная,/ Вы́шняго Си́лу во утро́бе Твое́й заче́нши, родила́ еси́ безсе́менно.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Иера́ршескаго священноде́йства ми́ром освяти́лся еси́ благода́ти,/ иде́же яви́ся ми́ра спасе́ние,/ архиере́йствовав, всему́дре о́тче Софро́ние, зовы́й:/ Го́спода по́йте, дела́, и превозноси́те Его́ во вся ве́ки.

Прему́дрость почита́я лу́чшую, венце́м благода́тей венча́лся еси́,/ сла́ву неувяда́ему и бога́тство неотъе́млемо,/ прему́дрости, сла́вне, дар прие́м/ и, Го́спода по́йте,– зовы́й,– и превозноси́те Его́ во вся ве́ки.

Священноле́пно, священнотаи́нниче, в Боже́ственную пра́вду оде́явся,/ упра́вил еси́, всеблаже́нне о́тче, пра́веднейшими Влады́чне ста́до словесы́ и дея́нии,/ Го́спода по́йте,– науча́я,– и превозноси́те Его́ во вся ве́ки.

Великоле́пно и па́че сло́ва/ Сло́во, Отцу́, о́тче, Собезнача́льно, сло́во тебе́ дарова́,/ словеса́ развраща́ющо, и языкобо́лия сла́бящо ересе́й,/ Го́спода по́йте, вопия́, и превозноси́те Его́ во вся ве́ки.

Богоро́дичен: Святоле́пный показа́лася еси́ храм Сло́ва,/ всю тва́рь освяща́ющаго, гора́ ту́чная свята́я,/ гора́ пресве́тлая, Благослове́нная Влады́чице, еди́на всепе́тая./ Тем Тя, Богома́ти, пое́м и превозно́сим во вся ве́ки.

Песнь 9

Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем веселя́щеся, Тя, Богоро́дице, велича́ем.

Рече́ния, из усте́н твои́х Боже́ственных происходя́ща, Богоглаго́ливе,/ благочести́вых мы́сли услажда́ют благода́тию,/ я́коже сот, ка́плющий разуме́ний благоле́пие.

Вну́трь Небе́сных незаходи́мых живе́ши, Богоглаго́ливе, у всех Влады́ки и Царя́,/ иде́же лику́ют А́нгельския све́тлости и святы́х во́инства.

Жи́знь проходя́, о́тче, на земли́ А́нгельскую,/ А́нгельскаго на Небесе́х сподо́бился еси́ блаже́нства,/ иде́же Христа́ моли́ спасти́ся всем, пою́щим тя.

Я́коже арома́тнии фиа́лы,/ лани́те твои́, Богому́дре, на́рда пистики́и многоце́нны,/ прему́дрости испо́лнь яви́ся алава́стр,/ Те́ло Христо́во честно́е арома́тствуя твои́ми уче́нии.

Богоро́дичен: О́блак Тя лего́к, Де́во, Иса́ия зря́ше:/ на Тя бо Госпо́дь наше́д, низложи́ вся рукотворе́нная/ и Свое́ разуме́ние Тя пою́щим яви́л е́сть.

Святи́тель Софро́ний, Патриа́рх Иерусали́мский

Святитель Софроний, Патриарх Иерусалимский родился в Дамаске около 580 года от благочестивых родителей, которых звали Плинт и Мира. С юных лет он отличался благочестием и любовью к наукам. Получив блестящее образование, он особенно преуспел в изучении философии, за что его стали называть «Премудрым». Стремясь к духовной мудрости, будущий святитель стал посещать различные монастыри и беседовать с пустынножителями. Так, он прибыл в Иерусалим, в обитель святого Феодосия, и там сблизился с иеромонахом Иоанном Мосхом, став его духовным сыном и другом. Оба праведника вместе странствовали по разным обителям, записывая жития и поучения, которые составили их знаменитую книгу «Лимонарий» («Цветник», или «Луг духовный»), высоко оцененную Седьмым Вселенским Собором (787).

Спасаясь от опустошительных набегов персов, святые Иоанн и Софроний оставили Палестину, удалившись в Антиохию, а оттуда – Египет. В Египте святой Софроний тяжко занемог. В это время он принял монашеский постриг от Иоанна Мосха. После выздоровления святого Софрония оба праведника решили остаться в Александрии и были с любовью приняты Патриархом Иоанном Милостивым († 620), которому они оказали большую помощь в борьбе против монофелитов. Святой Софроний написал несколько житий, из которых особенно известны жития святых целителей-бессребреников Кира и Иоанна и житие преподобной Марии Египетской.

Шло время, и варвары стали угрожать Александрии. Патриарх Иоанн в сопровождении святых Софрония и Иоанна Мосха направился в Константинополь, но по дороге святитель Иоанн умер (на острове Кипр). Тогда святые Иоанн Мосх и Софроний с одиннадцатью другими монахами отправились в Рим.

В Риме преподобный Иоанн Мосх скончался. Тело его было перевезено святым Софронием в Иерусалим и похоронено в обители святого Феодосия Великого.

После заключения мира между греками и персами в 628 году из персидского плена вернулся Иерусалимский Патриарх Захария (609–633). По смерти Патриарха Захарии в течение двух лет патриарший престол занимал святой Модест (633–634). После кончины святителя Модеста Патриархом был избран святой Софроний. Святитель Софроний более десяти лет неустанно трудился на благо Иерусалимской Церкви (634–644). Он много боролся с ересями монофелитов и монофизитов.

В конце жизни святитель Софроний со своей паствой пережил двухлетнюю осаду Иерусалима магометанами. В 636 году Иерусалим был взят: изнуренные голодом христиане согласились открыть городские ворота, с условием, что противник пощадит христианские святыни. Однако это обещание было нарушено, и святой Патриарх Софроний умер в глубокой скорби о поругании великих христианских святынь.

До нас дошли сочинения патриарха Софрония по догматике, а также «Объяснение на Литургию», «Чинопоследование великого водоосвящения», «Трипеснцы» (не вошедшие в Триодь Постную), около 1000 тропарей, стихиры от Пасхи до Вознесения Христова, «Послание к VI Вселенскому Собору» и другие.

Святителем Софронием пересмотрен и исправлен «Устав» монастыря преподобного Саввы Освященного (память 5 декабря).

Я́же во святы́х отца́ на́шего Евфи́мия, архиепи́скопа Новгоро́дскаго, чудотво́рца

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

От ю́ности му́дрости прилежа́в,/ святи́телю Евфи́мие,/ и Боже́ственное Писа́ние я́ко извы́к, преподо́бне,/ отложи́л еси́ вся, я́же ю́ности веду́щая сла́сти,/ Христо́в яре́м носи́ти изво́лил еси́,/ отону́дуже показа́лся еси́ сосу́д избра́н./ И сего́ ра́ди суд Бо́жий/ тя святи́теля лю́дем Свои́м поставля́ет,/ в правосла́вии наставля́юща ста́до твое́, преосвяще́нне.

Прему́дрости и ра́зума/ я́ко испо́лнен быв, Богоблаже́нне,/ христоимени́тым лю́дем/ изря́дный па́стырь был еси́,/ тех на па́жити благоче́стия наставля́я,/ непокаря́ющияся же прему́дре исправля́я./ Те́мже ны́не ча́да твоя́, святи́телю Евфи́мие,/ па́мять твою́ пра́зднующе,/ воспева́ем Христа́ Бо́га на́шего,/ тебе́ просла́вльшаго.

Благоче́стно житие́ на земли́,/ я́ко А́нгел, пожи́в, святи́телю,/ Це́рковь Боже́ственную украси́л еси́/ твои́ми честны́ми уче́нии,/ лю́ди, тебе́ Бо́гом вруче́нныя,/ му́дре наставля́еши к Того́ разуме́нию./ Те́мже и Христо́с тебе́ не то́кмо в животе́,/ но и по преставле́нии прославля́ет/ и даро́в чуде́с сподобля́ет,/ еди́н Человеколю́бец.

Сла́ва, глас 6:

Столп непоколеби́м Це́ркве Христо́вы, о́тче, был еси́,/ те́мже, Боже́ственною ре́вностию разже́гся дерзнове́нно,/ непра́ведное сочета́ние пра́ведно разоря́еши/ и науча́еши всех апо́стольским и оте́ческим преда́нием после́довати/ и от лю́боде́йствия, я́ко от зми́я, отбега́ти;/ непокаря́ющияся же твоему́ свято́му уче́нию/ суду́ Бо́жию ты́я предае́ши./ Его́же моли́, архиере́ю Евфи́мие,/ спасти́ся всем, и́же любо́вию почита́ющим/ свяще́нную па́мять твою́.

И ны́не, Богоро́дичен: Кто Тебе́ не ублажи́т:

Вход. Проки́мен дне. Чте́ния 3.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же е́сть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́занный же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в де́нь я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́нии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых се́ть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многол́етна,/ ниже́ в числе́ лет исчита́ется./ Седи́на же е́сть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии́ стихи́ра, глас 6:

Челове́че Бо́жий,/ ве́рный ра́бе, слуго́ Госпо́день,/ му́же жела́ний, сосу́де избра́нный,/ сто́лпе утвержде́ния Це́ркве,/ Ца́рствию насле́дниче,/ не премолчи́ о нас, вопия́ ко Го́споду.

Сла́ва, глас 8:

Прииди́те, празднолю́бцы, в наро́читом пра́зднице/ до́браго па́стыря и учи́теля духо́вне торжеству́ем,/ честны́я твоя́ мо́щи любе́зно зря́ще/ и те́плою ве́рою взыва́юще:/ преблаже́нне святи́телю Евфи́мие,/ моли́ Христа́ Бо́га/ о творя́щих святу́ю па́мять твою́.

И ны́не, Богоро́дичен.

На стихо́вне стихи́ры, глас 1.

Подо́бен: Небе́сных чино́в:

Богому́дре святи́телю Евфи́мие,/ ты твои́ми моли́твами и посто́м,/ бде́нием же и ми́лостынею Бо́гови соедини́лся еси́,/ те́мже Ду́ху Пресвято́му дом и жили́ще показа́лся еси́./ Отону́дуже архиере́й Це́ркви Христо́ве, о́тче, был еси́,/ моли́ спасти́ся душа́м на́шим.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Повину́яся за́поведи Бо́га Вседержи́теля,/ от ю́ности твоея́ Того́ стопа́м, святи́телю, после́довал еси́./ Те́мже от Него́ благода́ть прия́л еси́/ де́йствовати пресла́вная чудеса́/ и ду́хи прогони́ти лука́выя/ от всех, любо́вию чту́щих тя.

Стих: Услы́шите сия́, вси язы́цы,/ внуши́те, вси, живу́щия по вселе́нней.

Кро́ток и незло́бив/ во всей жи́зни твое́й был еси́,/ святи́телю Евфи́мие,/ сего́ ра́ди обре́л, я́коже жела́л еси́,/ на Небесе́х со святы́ми поко́й./ Те́мже почита́ем святу́ю па́мять твою́,/ ве́рою пра́зднующе, Богоблаже́нне и всече́стне.

Сла́ва, глас 4:

Вели́каго архиере́я Евфи́мия блаже́ннаго/ свяще́нную па́мять дне́сь соверша́юще,/ Боже́ственными пе́сньми, прииди́те, вси почти́м/ о нас всегда́ моля́щася/ низпосла́ти мно́жество щедро́т/ и спасе́ние душа́м на́шим.

И ны́не, Богоро́дичен: При́зри на моле́ния:

Тропа́рь, глас 4:

Избра́н быв Бо́гови от ю́ности,/ святи́телю Евфи́мие,/ и, сего́ ра́ди архиере́йства са́ном почте́н быв,/ упа́сл еси́ лю́ди, и́же тебе́ Бо́гом вруче́нныя;/ те́мже и по преставле́нии чуде́с дарова́ния от Го́спода прия́л еси́/ исцеля́ти разли́чныя неду́ги./ Того́ моли́ о нас,/ соверша́ющих честну́ю па́мять твою́,/ да тебе́ вси непреста́нно ублажа́ем.

Сла́ва, и ны́не, Богоро́дичен: Е́же от ве́ка утае́ное:

НА У́ТРЕНИ

По 1-й кафизме седа́лен святи́теля, глас 1.

Подо́бен: Ка́мени запеча́тану:

Уче́ньми твои́ми и де́лы Це́рковь Христо́ву украси́л еси́, Евфи́мие святи́телю,/ отону́дуже в ми́ре просия́ твое́ доброде́тельное житие́:/ в моли́твах, и поще́ниих, и бде́ниих о́браз ученико́м был еси́./ Те́мже вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Даю́щему тобо́ю всем исцеле́ние.

Сла́ва:

Егда́ к Боже́ственному жела́нию восклони́вся,/ горе́ мудрова́ния име́л еси́:/ до́лу влеку́щая отри́нув, и я́же на земли́ вся возненави́дев,/ и Христу́, блаже́нне, присво́ился еси́,/ Его́же моли́ о пою́щих тя.

И ны́не, Богоро́дичен:

Наста́ви ны на пу́ть покая́ния, укло́ншияся при́сно к безпу́тием зол/ и преблага́го прогне́вавшия Го́спода,/ неискусобра́чная Благослове́нная Мари́е,/ прибе́жище отча́янных челове́ков, Бо́жие жили́ще.

По 2-й кафизме седа́лен, глас 4:

Смиренному́дрие предпочита́я был еси́, Евфи́мие святи́телю,/ и отсю́ду просла́вился еси́ я́ко Боже́ственный архиере́й,/ принося́ же́ртвы поже́ршемуся во́лею Христу́ Бо́гу на́шему,/ Его́же моли́ спасти́ся душа́м на́шим.

Сла́ва:

Зе́млю се́рдца твоего́ моли́твенным ра́лом обнови́в,/ и боле́зньми по́стническими, я́ко безпло́тен, пожи́в,/ и архиере́йства па́ству до́бре упа́с,/ и сего́ ра́ди пресели́вся в преми́рная,/ моли́ спасти́ся душа́м на́шим.

И ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

А́ще ли прилучится в по́стный день, глаго́лем седа́льны по 1-й кафизме и по 2-й Трио́ди, а по 3-й кафи́зме глаго́лем седа́льны о́ба святи́теля.

По полиеле́и седа́лен святи́теля, глас 8.

Подо́бен: Прему́дрости:

Я́ко доброде́телен и кро́ток, Це́рковь Христо́ву уясни́л еси́,/ де́лы соблю́д е́же по о́бразу Бо́жию, архиере́ю вели́кий Евфи́мие,/ просия́ бо доброде́тельное твое́ житие́ в ми́ре и от всех сла́вится./ Те́мже вси, благодаря́ще, вопие́м ти:/ Богоблаже́нне святи́телю, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и Еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35 от полу́.

По 50-м псалме́ стихи́ра, глас 6:

Благоуха́ет честна́я ра́ка моще́й твои́х,/ Евфи́мие святи́телю,/ всем ве́рным исцеле́ние душа́м и телесе́м да́рующи./ Те́мже тя мо́лим,/ богодарова́нное твое́ ста́до в ми́ре соблюсти́,/ да вси тя я́ко и́стиннаго па́стыря и моли́твенника к Бо́гу/ непреста́нно велича́ем.

Кано́н святи́теля Евфи́мия. Творе́ние Пахомия, и́же от Святы́я Горы́. Глас 2.

Песнь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Я́ко река́ прему́дрости и ра́зума, святи́телю Евфи́мие, был еси́,/ ка́плю и мне да́руй,/ да возмогу́ и аз ма́лое руки́ моея́ хвале́ние твоему́ вели́честву принести́, блаже́нне.

Судо́м Бо́жиим и челове́ческим избра́нием/ архиере́йства ма́стию пома́зан быв, святи́телю Евфи́мие,/ па́стырь преизря́ден был еси́,/ же́ртвы Бо́гу вся́чески принося́, свяще́нне.

Источа́ют прему́драя уче́ния устне́ твоя, святи́телю,/ Боже́ственную сла́дость иму́ще,/ е́юже напита́вшеся, ча́да твоя́,/ тебе́ любо́вию непреста́нно почита́ем.

Богоро́дичен: И́же нас ра́ди из Тебе́, Де́во,/ в челове́ка премно́гою бла́гостию облеки́йся,/ свяще́нных собо́ры, Того́ возлю́бльшия, просла́вил е́сть.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в се́рдца нас, пою́щих Тя.

Житие́ по Бо́зе стяжа́в, святи́телю,/ в посте́ и моли́тве мно́го вре́мя пребы́л еси́,/ вери́ги тя́жки нося́ на те́ле твое́м,/ я́же ны́не зря́ще, чуди́мся терпе́нию твоему́.

Де́лы и словесы́ Боже́ственными укра́шен быв, святи́телю Евфи́мие,/ Це́рковь Христо́ву благоче́стно упа́сл еси́,/ те́мже и ра́дости сподо́бился еси́ Го́спода твоего́,/ нас помина́й, тебе́ сла́вящих.

Житие́ твое́, блаже́нне, доброде́тельми уясни́л еси́,/ те́мже твоя́ исправле́ния по мно́гим страна́м проповедаются, о́тче,/ и, от земли́ преше́д, дости́гл еси́ е́же та́мо со святы́ми пребыва́ния.

Богоро́дичен: Пала́ту кра́сную неизрече́ннаго бога́тства, Де́во, зна́ем/ и по до́лгу Тя сла́вим,/ спа́сшиися рождество́м Твои́м, Всенепоро́чная.

Седа́лен, глас 8.

Подо́бен: Прему́дрости:

У́мная очеса́, святи́телю, я́ко всегда́ име́я к Бо́гу просте́рта,/ у́жем желе́зным обложи́в себе́, блаже́нне,/ мно́гажды всю но́щь без сна пребы́л еси́,/ удруча́я пло́ть твою́, преблаже́нне,/ вери́ги же, я́же на тебе́, не позна́ны бы́ша, да́же до исхо́да е́же отсю́ду./ Те́мже и Христо́с, Его́же ра́ди жесто́кое житие́ претерпе́л еси́,/ да́рует тебе́ неболе́зненное е́же на Небесе́х житие́./ Того́ моли́, святи́телю Евфи́мие, согреше́ний оставле́ние дарова́ти/ чту́щим любо́вию свяще́нную па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Прише́л еси́ от Де́вы/ не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Храни́тель бу́ди оте́честву твоему́ и лю́дем, святи́телю,/ избавля́я враг наше́ствия, гла́да же и па́губы,/ да, моли́твами твои́ми спа́сшеся, тебе́ вси я́ко засту́пника велича́ем.

Любому́дренно душе́вный кора́бль в ти́хое приста́нище управля́я, святи́телю,/ моли́твам и ми́лостыни прилежа́л еси́,/ тле́нное бога́тство в нетле́нное, Богоблаже́нне, прелага́я./ Те́мже и прия́л еси́ Небе́сное бога́тство.

Чи́сто о́ко душе́вное име́я, зрительно Небе́снаго восхо́да,/ те́мже на земли́ жи́знь твою́ до́бре упра́вил еси́, святи́телю./ Сего́ ра́ди Це́рковь Бо́га Жива́го, Евфи́мие, был еси́.

Богоро́дичен: Бог, из Тебе́ роди́вся, Госпоже́ Всенепоро́чная,/ от облада́юща врага́ мир Тебе́ ра́ди изба́ви,/ святи́тельский же лик, же́ртву Тому́ принося́щий, возвели́чи.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Блаже́нную жи́знь, святи́телю Евфи́мие, на земли́ пожи́л еси́/ и отсю́ду к Небе́сному житию́ сла́вно преше́л еси́./ Те́мже и, по преставле́нии твое́м ра́ку твою́ обстоя́ще/ и любе́зно покланя́ющеся тебе́, свяще́ние почерпа́ем.

Преосвяще́нствован душе́ю и те́лом, о́тче, был еси́,/ све́тло Влады́чней трапе́зе предстои́ши, Же́ртву Тому́ Безкро́вную принося́./ Те́мже я́ко священнотаи́нник приле́жно о нас моли́ся.

Дре́вняго Корни́лия моли́тве и ми́лостыни подо́бяся,/ ми́лостив к тре́бующим, о́тче, был еси́./ Тем от Христа́ Бо́га досто́йно слы́шиши:/ моли́твы твоя́ и ми́лостыни взыдо́ша предо Мно́ю./ Сего́ гла́са и нам услы́шати, блаже́нне, помоли́ся.

Богоро́дичен: Свяще́нными гла́сы Тя, добро́ту Иа́ковлю, пое́м,/ пло́тски ро́ждшую ми́рови Свет, И́же от Све́та,/ просвеща́ющий архиере́йския собо́ры.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Сын Све́та и дне, святи́телю, был еси́,/ те́мже и всели́лся еси́, иде́же Свет Невече́рний и поко́ища пра́ведных,/ того́ Све́та моли́ получи́ти всем, па́мять твою́ пра́зднующим.

Свяще́нныя и пречестны́я хра́мы в сла́ву святы́х мно́гия воздви́гл еси́,/ те́мже и мно́гия святы́я име́л еси́ хода́таи, промышля́ющия тебе́ поле́зная,/ но, я́ко с ни́ми водворя́яся, о нас моли́ся.

Све́тло лице́ в жи́зни име́я, блаже́нне,/ потща́лся еси́ светле́йшу и ду́шу твою́ Христу́ предста́вити,/ е́же и получи́л еси́, Евфи́мие./ Те́мже бу́ди те́плый моли́твенник, я́ко святи́тель о чту́щих тя.

Богоро́дичен: Во утро́бу Твою́ всели́вся, все челове́ческое существо́ обожи́/ и святи́телей лик мно́жество свяще́нно привлече́/ сла́вити Тя, Богоневе́сто.

Конда́к, глас 8.

Подо́бен: Избра́нной:

Я́ко архиере́ем сопресто́льник/ и святи́телем изря́дный побо́рник был еси́, святи́телю Евфи́мие,/ не преста́й сохраня́я оте́чество твое́,/ град же и лю́ди, и́же тебе́ ве́рою почита́ющия/ и честны́м моще́м твои́м покланя́ющияся,/ да велегла́сно тебе́ вси вопие́м:/ ра́дуйся, святи́телю Богому́дре.

И́кос:

Ева́нгельскому словеси́ внят, преподо́бне,/ душе́вный ра́зум впери́в к просвеще́нию светолу́чныя зари́,/ душетле́нныя стра́сти до конца́ потреби́л еси́./ Доброде́тельным же житие́м А́нгелом и челове́ком преди́вен показа́лся еси́./ И сего́ ра́ди вели́каго Нова́гра́да архиере́йства сподо́бився,/ Це́рковь украси́л еси́, лю́ди просвети́л еси́/ и до конца́ в правосла́вии утверди́л еси́,/ да вси велегла́сно вопие́м ти:/ ра́дуйся, Евфи́мие, святи́телю Богому́дре.

Песнь 7

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я А́нгел:/ услы́шася уже́ уст ва́ших моли́тва.

Вели́кий Но́вград, и́же в себе́ тебе́ стяжа́вый,/ ра́достию ра́дуется, святи́телю Евфи́мие:/ тя бо, я́ко сте́ну име́я тве́рду и столп необори́м,/ Христа́ воспева́ет, тебе́ сему́ дарова́вшаго.

И́же пре́жде тебе́ бы́вшим архиере́ом красота́ был еси́, блаже́нне,/ святи́телей удобре́ние, мона́хов о́браз,/ Христо́вы же Це́ркве преизря́дный па́стырь яви́лся еси́,/ Богоблаже́нне о́тче Евфи́мие.

Илиину́ ре́вность восприи́м, святи́телю,/ те́мже ни преще́ния, ни моле́ния согреша́ющих возмого́ша увеща́ти тя,/ е́же тех о согреше́ниих не облича́ти./ Ты же не преста́л еси́, до́ндеже коне́чнее о́нех испра́вил еси́.

Богоро́дичен: Кра́сную обре́т и до́брую в жена́х Тя, Пречи́стая,/ прекра́сное Сло́во всели́ся в пречи́стое чре́во Твое́,/ вся ли́ки святи́телей освя́щ, зову́щия:/ благослове́н Бог оте́ц на́ших.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Судо́м Бо́жиим и всенаро́дным избра́нием/ отню́дуже при́зван был еси́, преподо́бне, на престо́л вели́кия Це́ркве,/ та́мо па́ки отхо́диши промышле́нием твоего́ Влады́ки,/ да отню́дуже сия́ прия́л еси́,/ па́ки та́мо чи́ста того́ с душе́ю Бо́гу преда́си.

Пречестна́я ра́ка, Богоблаже́нне, иде́же положено́ бы́сть честно́е те́ло твое́, святи́телю,/ благово́ние и освяще́ние всем, ве́рою приходя́щим, испуща́ет,/ от души́ Христу́ вопию́щим:/ благослови́те, вся дела́, Го́спода и превозноси́те Его́ во ве́ки.

Христо́с тя святи́теля избра́,/ я́ко не́кое свети́ло, могу́ща тве́рдь церко́вную просвеща́ти/ и свои́ми уче́ньми лю́ди, тебе́ вруче́нныя, наставля́ти Творцу́ вопи́ти:/ благослови́те, вся дела́, Го́спода и превозноси́те Его́ во ве́ки.

Богоро́дичен: Уны́л име́я по́мысл и ду́шу, сластьми́ отягче́ну,/ к Тебе́ прибега́ю, Богороди́тельнице Чи́стая, и вопию́ Ти:/ воздви́гни и спаси́ мя, окая́ннаго и осужде́ннаго.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Оби́тель, в не́йже сподо́бился еси́ яре́м Христо́в прия́ти,/ та́мо вся дни твоя́ ве́рою и ду́хом кроме́ телесе́/ неразлу́чен, о́тче, пре́был еси́,/ те́мже и по преставле́нии та́мо повелева́еши положи́тися,/ иде́же и чуде́с дарова́ния от Го́спода, святи́телю Евфи́мие, прия́л еси́.

Руко́ю мое́ю недосто́йною приноси́мое тебе́ с трудо́м хвале́ние,/ святи́телю Евфи́мие, не пре́зри, но приими́/ и моли́ Творца́ твоего́ и Влады́ку/ та́мошняго мя изба́вити ве́чнаго муче́ния, тебе́ ве́рою почита́юща.

Певцы́ твоя́, тебе́ и́скренно воспева́ющия/ и твою́ па́мять честну́ю, святи́телю Евфи́мие, ве́рою прославля́ющия,/ освяти́ и просла́ви и от бед избавля́й, и напа́стей, и та́мо ве́чнаго муче́ния,/ да тебе́ всегда́ воспева́ют.

Богоро́дичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во о́гнь, да не я́ростию обличи́ши мене́,/ мо́лит Тя Де́ва, Тебе́ ро́ждшая, Христе́,/ А́нгельстии собо́ри и святи́телей совокупле́ния.

Свети́лен.

Подо́бен: Посети́л ны е́сть:

Дне́сь святи́теля Евфи́мия све́тлая наста́ па́мять,/ ве́рныя просвеща́ет и тьму́ пре́лести разоря́ет/ ве́рою приходя́щим к честны́м того́ моще́м.

Богоро́дичен:

Свет возсия́ безле́тный от Отца́ пре́жде век,/ в ле́то ны́не напосле́док, из Тебе́, Де́во, яви́ся на спасе́ние ми́ра./ К Нему́же не преста́й о лю́дех Твои́х моля́щися.

На хвали́тех стихи́ры на 4, глас 8.

Подо́бен: О, пресла́внаго чудесе́:

Неукло́нно, преблаже́нне,/ пу́ть жи́зненный ше́ствовал еси́:/ по́стническими боре́нии/ вся плотска́я мудрова́ния умертви́л еси́,/ кра́сная ми́ра оста́вил еси́,/ Небе́сную красоту́ возлюби́л еси́,/ иде́же со А́нгелы при́сно весели́шися./ Святи́телю Евфи́мие,/ моли́ спасти́ся душа́м на́шим.

В ю́ности целому́дрие стяжа́л еси́,/ в ста́рости ра́зум обостри́л еси́,/ ду́шу пресве́тлу сотвори́л еси́,/ архиере́йства сан восприе́м,/ Це́рковь добро́тами украси́л еси́,/ лю́ди твоя́ просвети́л еси́./ Сего́ ра́ди тя почита́ем,/ святи́телю Богому́дре,/ моли́ о творя́щих па́мять твою́.

Собери́теся, празднолю́бцы, дне́сь,/ в па́мять Евфи́мия святи́теля,/ и сию́ ку́пно вси торжеству́йте:/ сей бо благоче́стия подража́тель/ и о ста́де свое́м те́плый моли́твенник,/ Росси́йския земли́ удобре́ние,/ вели́каго же Нова́града похвала́ и утвержде́ние,/ к нему́же приле́жно возопие́м:/ моли́ Христа́ Бо́га о чту́щих па́мять твою́.

Сла́ва, самогла́сен, глас то́йже:

Дне́сь воспое́м святи́теля,/ благоче́стия наста́вника,/ Це́ркве столпа́ непоколеби́ма,/ исто́чника исцеле́ний неисчерпа́ема,/ проли́тие дарова́ний духо́вных,/ вели́каго же Нова́гра́да просвети́теля/ и о всех моли́твенника те́пла./ К нему́же возопии́м:/ святи́телю Евфи́мие,/ не преста́й моля́ся за ду́ши на́ша.

И ны́не: Влады́чице, приими́ моли́твы раб Твои́х:

А́ще ли суббо́та, пое́м Славосло́вие вели́кое. А́ще ли пост, на стихо́вне в Трио́ди.

Сла́ва, святи́теля, глас 6:

О́трок яви́лся еси́ смире́н,/ беззло́бием украша́яся,/ сего́ ра́ди Христо́с Бог овца́м Свои́м па́стыря тя поста́ви/ и я́ко неисче́тно бога́тство Свои́х щедро́т/ яви́ тя вели́кому Нову́гра́ду,/ обурева́емым во ско́рбех ти́хое приста́нище./ И ны́не, святи́телю, не премолчи́,/ вопия́ за ны ко Го́споду.

И ны́не: Богоро́дице, Ты еси́ лоза́ и́стинная:

А́ще ли среда́ или́ пято́к, Крестобогоро́дичен:

Ви́дящи Тя распина́ема, Христе́,/ Тебе́ ро́ждшая вопия́ше:/ что стра́нное/ е́же ви́жу та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

На Литурги́и, а́ще суббо́та, Блаже́нны святи́теля, пе́сни 3-я и 6-я, и про́чая слу́жба святи́тельская.

Моли́тва

О́тче святи́телю Евфи́мие! Ты от ю́ности твоея́ Христа́ возлюби́л еси́ и, благода́тию Его́ укрепля́емь, вся плотска́я мудрова́ния умертви́л еси́, чи́стым житие́м и кро́тким нра́вом угоди́л еси́ Го́сподеви, и по благода́ти Его́ на престо́ле святи́тельства был еси́, и яви́лся еси́ па́стве Христо́вей Вели́каго Нова́гра́да па́стырь изря́ден, полага́я ду́шу твою́ о ста́де твое́м. Те́мже и по сме́рти твое́й просла́ви тя Пастыренача́льник Христо́с подая́нием чуде́с, от Тебе́ истека́ющих, подая́ нам тебе́ о́браз доброде́тельнаго жития́ и те́плаго моли́твенника. Те́мже и аз, гре́шный и уны́лый, припа́дая к моще́м твои́м, молю́ся тебе́ усе́рдно: уго́дниче Христо́в, да́ждь ми ру́ку по́мощи, воздви́гни мя моли́твами твои́ми из глубины́ грехо́вныя. Се бо волна́ми страсте́й плотски́х и уны́ния и ины́ми тьмочи́сленными жите́йскими треволне́нии обурева́юся и погиба́ю. Бу́ди у́бо мне, многогре́шному, те́плый ко Христу́ предста́тель и моли́твенник, да и аз, от потопле́ния грехо́внаго изба́влен, ко приста́нищу непоро́чнаго жития́ благода́тию Христо́вою дости́гну, и чи́стым житие́м просла́влю Спаси́теля моего́, Кро́вию Свое́ю мене́ искупи́вшаго, и, та́ко житие́ сконча́в, получу́ живо́т ве́чный во Ца́рствии Небе́снем, иде́же сла́вится пречестно́е и великоле́пое И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

Святи́тель Евфи́мий, архиепи́скоп Новгородский

Святитель Евфимий, архиепископ Новгородский в миру Иоанн, родился в Великом Новгороде в последней четверти XIV века. Отец его, священник Михей, служивший в новгородском храме во имя святого великомученика Феодора Стратилата, и благоверная супруга его Анна, долго не имея детей, дали обет посвятить своего первенца Богу. Этим первенцем и был младенец, нареченный во святом Крещении Иоанном.

В детстве святой Иоанн сторонился суетных игр, рос задумчивым и кротким. Он постоянно посещал храм, прислуживал за богослужением своему отцу. Отданный учиться, мальчик заметно преуспевал в изучении Священного Писания.

Достигнув пятнадцатилетнего возраста, отрок Иоанн взял родительское благословение и присоединился (не ранее 1411 года) к четырем инокам, основавшим незадолго до того обитель в урочище Вяжище (Вежище) в окрестностях Новгорода. Игумен обители Пахомий, который был прозорливым, с радостью принял нового инока, посланного Богом, и постриг его с именем Евфимий. Несколько лет подвизался святой инок Евфимий в Вяжищском монастыре, во всем проявляя смирение и послушание, усиленно предаваясь молитве и посту. Молва о его добродетелях дошла до святителя Симеона, архиепископа Новгородского (1415–1421), который призвал инока Евфимия и назначил его своим экономом (вероятно, тогда же святой Евфимий был возведен в сан иеромонаха). В новой и весьма ответственной должности святой Евфимий не только честно и исправно вел хозяйственные дела огромной епархии, но и не оставлял своих иноческих подвигов, вызывая всеобщее изумление. Так продолжалось и при преемнике святителя Симеона, нареченном архиепископе Феодосии (1421–1423).

При архиепископе Новгородском Евфимии Брадатом (1423–1428) святой Евфимий отпросился на безмолвие в Хутынский монастырь. Вскоре по просьбе иноков Лисицкого (основан в конце XIV в.) Рождество-Богородицкого монастыря он принял игуменство в этой обители (в семи верстах к северу от Новгорода). В течение пяти лет игумен Евфимий управлял Лисицким монастырем, подавая всем инокам пример духовной мудрости, простоты и добросердечия.

После кончины архиепископа Евфимия Брадатого († 1 ноября 1428) новгородцы единогласно избрали на вече своим архиепископом игумена Лисицкого монастыря святого Евфимия. В течение нескольких лет (1429–1434) священноинок Евфимий оставался нареченным епископом, так как его посвящение затруднялось различными внешними обстоятельствами. В это время святой Евфимий укрепил крепостные сооружения Новгорода и Порхова и, обеспечив безопасность Новгородской земли от нападений литовцев, немцев и шведов, приступил к благоустроению своей епархии. В 1433 году он построил сохранившуюся поныне Владычную палату (ее обычно называют Грановитой палатой). В следующем году святой Евфимий получил посвящение в сан архиепископа в Смоленске, от митрополита Киевского и всея Руси Герасима († 1435). Первым делом после посвящения святитель Евфимий урегулировал и упрочил дружественные отношения Новгорода с Псковом (с этой целью он посетил в 1435 году Псков), что имело большое значение для отражения возможной агрессии с северо-запада. В 1448 году совместные новгородско-псковские силы нанесли поражение немцам и шведам и отстояли северозападные границы Руси. В то же время, верный долгу миротворчества, святитель Евфимий стремился уладить конфликты с великим князем Московским Василием II мирным путем. Так, в 1456 году в местечке Яжелбицах в результате переговоров святителя Евфимия с Василием II был заключен мирный договор, ставший поворотным моментом в истории московско-новгородских отношений. Несмотря на то, что в Новгороде были сторонники активных военных действий против Василия II, политика умиротворения, которую проводил святитель Евфимий, одержала верх.

Благодаря миру и общественному спокойствию в Новгородской земле, святитель Евфимий предпринял и успешно завершил целый ряд строительных и реставрационных начинаний. Каждый год его продолжительного святительства был ознаменован сооружением или реставрацией храмов и других строений; среди них Софийский собор и Часозвоня, церкви Бориса и Глеба, Жен-мироносиц, Ивана на Опоках, Ильи пророка на Славне, 12-ти Апостолов, Иоанна Златоуста и многие другие в Новгороде, Спасо-Преображенский собор в г. Старой Руссе, Никольский храм в Вяжищском монастыре, храм во имя Трех Святителей в Отенской пустыни, храм во имя святого Григория Великого, просветителя Армении, в Хутынском монастыре, Изборская и Староладожская крепости.

По откровению свыше, святитель Евфимий установил в 1439 году общее празднование новгородским святителям, почивающим в Софийском соборе (4 октября и 10 февраля), обрел мощи святителя Иоанна, первого Новгородского архиепископа († 1185), освидетельствовал мощи преподобного Варлаама Хутынского († 6 ноября 1192). По существу это было первое на Руси освидетельствование («смотрение») святых мощей.

Дорожа верою предков и свято их почитая, святитель Евфимий ревностно заботился и об умножении душеполезных книг, и о сохранении памяти народной, запечатленной в летописании. Под его руководством в Новгороде собирались исторические и агиографические материалы, велась интенсивная работа по переписке старых и созданию новых летописных сводов. Наиболее значительным письменным памятником той поры, оказавшим влияние на все последующее русское летописание, стал Новгородско-Софийский летописный свод 1448 года.

При дворе святителя Евфимия жил и работал в 1438–1440 годах выдающийся агиограф Средневековья Пахомий Логофет (Серб), который написал в Новгороде несколько житий и служб русским святым, а впоследствии, после кончины святителя Евфимия, составил его жизнеописание.

Святитель Евфимий не жалел средств на собирание, хранение и переписку различных рукописей, особенно богослужебных сборников. По его инициативе значительно расширилось книгохранилище новгородской библиотеки при Софийском соборе.

Приближаясь к концу своей земной жизни, святитель Евфимий по милости Божией сохранил ясный ум и твердую волю, продолжал весьма плодотворную деятельность. Он многое сделал для благоустроения далекой Соловецкой Спасо-Преображенской обители, основанной по его благословению преподобными Савватием († 1435), Германом († 1479) и Зосимой († 1478) Соловецкими. Будучи доступным и милосердным для нищих и бедных, отличаясь исключительной отзывчивостью, душевной добротой и смирением, святитель Евфимий в то же время был весьма строг во всем, что касается соблюдения заповедей Господних и церковных установлений. Для него не было в этом отношении разницы между богатым и неимущим, ибо все должны ответить Господу за свои грехи. «Если кто, сильный властью и богатством, хотел сделать что-либо законопреступное, с твердостию сопротивлялся владыка Евфимий; если же опять кто-либо думал молением и дарами или молвою народною его преклонить, чтобы не обличал и не запрещал, никогда не мог обрести в нем послабления...» Особую ревность проявлял святитель Евфимий против незаконных браков и блуда. Духовный авторитет его был весьма велик благодаря личной аскезе и молитвенным бдениям. Слово святителя являлось решающим во многих исключительных случаях.

Предчувствуя приближение кончины, святитель Евфимий поспешил примириться со святителем Ионой, Митрополитом Московским, который был недоволен тем обстоятельством, что в Новгороде несколько лет тому назад нашел приют князь Димитрий Шемяка, враждовавший с царем Василием II.

При наступлении Великого поста 1458 года святитель Евфимий оставил Новгород и затворился в своей келлии в Лисицком монастыре. Во все дни первой седмицы Великого поста он ходил на соборное служение. Перед самой кончиной святитель Евфимий простился с братией обители. Приобщившись Святых Тайн, он преставился ко Господу 11 марта 1458 года. Тело святителя Евфимия, оплаканного всем Новгородом, было перенесено в Софийский собор Новгорода, где совершилось торжественное отпевание. По завещанию святителя, его погребли в соборном храме во имя Святителя Николая в Вяжищском монастыре. Тяжелые вериги, которые святитель тайно носил на себе, были положены при его гробе.

Вскоре после этого у раки с мощами святителя Евфимия стали получать чудесные исцеления многие больные, притекавшие с верою в его помощь. К началу 60-х годов XV века относится составление службы и молитвы святителю Евфимию.

В 1983 году Русская Православная Церковь торжественно отпраздновала 525-летие со времени его преставления.

Литература:

1. Житие святителя Евфимия, архиепископа Новгородского. СПб., 1869; СПб., 1875; Новгород, 1887.

2. Служба и житие иже во святых отца нашего Евфимия, архиепископа Новгородского, чудотворца. СПб., 1907.

3. Протоиерей П. И. Тихомиров. Кафедра Новгородских святителей со времени введения христианства в Новгороде до покорения его Московской державе. Т. I. Новгород, 1891.

4. А. С. Хорошев. Церковь в социально-политической системе Новгородской феодальной республики М., изд. МГУ, 1980.

5. В. А. Никитин. Житие и труды святителя Евфимия, архиепископа Новгородского (к 525-летию со времени преставления). – Богослоские труды, сборник 24, издания Московской Патриархии, 1983, с. 260–306.

Святи́теля Софро́ния, епи́скопа Вратча́нскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 4.

Подо́бен: Я́ко до́бля:

Я́ко со́лнце пресве́тлое, возсия́в,/ Це́рковь Бо́жию озари́л еси́, лю́ди просвеща́я/ и отгоня́я тьму́ неве́дения све́том Богоразу́мия,/ вене́ц нетле́ния от Бо́га прии́м, о́тче Софро́ние,/ моли́ изба́витися нам страсте́й лю́тых,/ ве́рою и любо́вию воспева́ющих тя.

Доброде́тельными светлостьми́ просла́вися и́мя твое́ на земли́,/ столп и утвержде́ние был еси́, о́тче Софро́ние,/ ду́ши ве́рных укрепля́я/ и тьму́ грехо́вную отгоня́я./ Те́мже, светоно́сную твою́ па́мять пра́зднующе дне́сь, мо́лим:/ моли́ спасти́ся душа́м на́шим.

Бо́жия благода́ти сосу́д избра́н яви́лся еси́,/ ве́ру Христо́ву пропове́дуя,/ жа́ждущия ду́ши напая́я и немощны́я укрепля́я,/ ста́до твое́ сохрани́л еси́ невреди́мо от волко́в./ Те́мже мо́лим тя:/ моли́ спасти́ся душа́м на́шим.

Исто́чник прему́дрости соде́ла тя му́дрость Бо́жия:/ ре́ки прему́дрости потеко́ша из чре́ва твоего́/ и напои́ша жа́ждущия лю́ди водо́ю благода́ти Бо́жия,/ ве́рою укрепля́еми,/ с ра́достию воспева́ют тя:/ моли́ спасти́ся душа́м на́шим.

Сла́ва, глас 8:

Скоропи́сная тро́сть рука́ твоя́ бы́сть:/ писа́ньми твои́ми лю́ди, во тьме́ неве́дения седя́щия, просвети́л еси́/ и, к и́стинному све́ту позна́ния приве́д,/ ду́ши поги́бшия спасл еси́,/ Христо́во Ева́нгелие пропове́дая,/ ага́рянское нече́стие истреби́л еси́, о́тче Софро́ние,/ моли́ спасти́ся душа́м на́шим.

И ны́не, Богоро́дичен: Изба́ви нас от нужд на́ших,/ Ма́ти Христа́ Бо́га,/ ро́ждшая всех Творца́,/ да вси зове́м Ти:/ ра́дуйся, еди́но предста́тельство душ на́ших.

На стихо́вне стихи́ры, глас 1.

Подо́бен: Небе́сных чино́в:

Бо́жиею си́лою укрепля́ем,/ вра́жия ко́зни препобеди́л еси́,/ ве́ру Христо́ву пропове́дуя,/ пога́нския обы́чаи искорени́л еси́./ Просвети́вый бо́лгарский наро́д, иера́рше Софро́ние,/ моли́ Христа́ Бо́га спасти́ся душа́м на́шим.

Стих: Честна́ пред Го́сподем/ сме́рть преподо́бных Его́.

Христо́ва иера́рха тя восхваля́ем,/ ра́достно торжеству́юще дне́сь,/ па́мять твою́ почита́ем./ Те́мже мо́лим тя:/ не забу́ди лю́ди твоя́,/ но моли́ся при́сно,/ от враг ви́димых и неви́димых/ изба́витися нам моли́твами твои́ми.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Я́ко звезда́, возсия́л еси́ над земле́ю Бо́лгарскою,/ святи́телю Софро́ние,/ озаря́я лю́ди све́том позна́ния Ева́нгелия Христо́ва./ И ны́не, зря́ще на Небеси́ сла́ву Бо́жию,/ не преста́й моли́тися о душа́х на́ших.

Сла́ва, и ны́не, Богоро́дичен, глас то́йже:

Ра́дуйся, Богоро́дице Де́во;/ ра́дуйся, похвало́ всея́ вселенныя;/ ра́дуйся, Пречи́стая Ма́ти Бо́жия Благослове́нная.

Тропа́рь пи́сан на вели́цей вече́рни. Сла́ва, и ны́не, Богоро́дичен: Тя, хода́тайствовавшую:

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры самогла́сны, глас 2.

Подо́бен: Ки́ими похва́льными:

Ки́ими похва́льными пе́сньми/ воспое́м святи́теля Софро́ния?/ Безпло́тных сожи́теля,/ Небе́снаго граждани́на,/ незы́блемаго столпа́ церко́внаго,/ весе́лие земли́ Бо́лгарския,/ свети́льника заблу́ждшихся, сиро́т пита́теля,/ ю́ных учи́теля, оби́димых засту́пника/ и та́инств Христо́вых назира́теля,/ и ны́не мо́лится о душа́х на́ших.

Ки́ими похва́льными венцы́/ увязе́м святи́теля Софро́ния?/ Свяще́нства вене́ц благоче́стия,/ све́тлое Це́ркве украше́ние,/ исто́чника Боже́ственныя му́дрости,/ ре́ку, благода́тныя во́ды точа́щую,/ зе́млю Бо́лгарскую напая́ющую,/ ду́ши ве́рных веселя́щую,/ мра́ка грехо́внаго отгоня́ющаго/ и подаю́щаго нам ве́лию ми́лость.

Вся́кими доброде́тельми укра́шен,/ яви́лся еси́ свети́льник пресве́тел, в епа́рхии Вратча́нския служа́,/ сло́во Бо́жие всем лю́дем пропове́дал еси́,/ гре́шных ду́ши просвеща́я и наставля́я./ Мно́ги ра́ны и бие́ния от ага́рянов прие́м,/ не отступи́л еси́ от Христа́ Бо́га./ И ны́не на Небесе́х со А́нгели весели́шися при́сно,/ не преста́й моля́ся о нас, чту́щих тя.

И́ны стихи́ры, глас 8.

Подо́бен: О, пресла́внаго чудесе́:

Иера́рше блаже́нне Софро́ние,/ по́двизи и страда́ния твоя́ кто испове́сть,/ я́же за Христа́ Бо́га подъя́л еси́,/ стопа́м Его́ после́дуя./ Не дал еси́ сна очи́ма твои́ма,/ ни ве́ждома твои́ма дрема́ния,/ до́ндеже недре́млющаго врага́ победи́л еси́./ Зе́млю Бо́лгарскую обходя́,/ преще́ния врага́ не убоя́лся еси́,/ долгове́чнаго и́га не терпя́,/ и́го Христо́во на ра́мех нося́,/ Моаме́довы зако́ны попра́л еси́,/ зако́ну Бо́жию лю́ди уча́./ В Небе́сныя оби́тели вшел еси́, ра́дуяся,/ Христа́ о нас моли́ всегда́.

О́тче преблаже́нне Софро́ние,/ ты, измла́да Христа́ возлюби́в,/ вся земна́я оста́вил еси́,/ путе́м и́стины ше́ствуя,/ возве́л еси́ о́вцы слове́сныя твоя́ на па́жити ту́чныя,/ сохраня́я их от волко́в губи́телей,/ житие́ ди́вное во страда́нии препроводи́л еси́,/ о́браз всем доброде́телей собо́ю показу́я./ Архиере́й незло́бив и преподо́бен быв,/ Ве́чному Архиере́ю ны́не предстоя́,/ Того́ моли́ о душа́х на́ших.

Богому́дре иера́рше Софро́ние,/ ты возше́л еси́ на ле́ствицу Боже́ственнаго ра́зума/ и, к Бо́гу приближа́яся,/ житие́ Влады́це твоему́ име́л еси́ подо́бно,/ кро́ток и незло́бив быв,/ с Вы́шними совокупля́яся во́инствы./ Ве́сь укра́шен доброде́телей светлостьми́,/ ны́не сия́еши на Небеси́,/ Христа́ у́бо моли́ всегда́ о нас.

И́ны стихи́ры, глас 5.

Подо́бен: Ра́дуйся:

Ра́дуйся, архиере́ев похвало́,/ Це́ркве Бо́лгарския утвержде́ние, Софро́ние,/ ты бо научи́л еси́ лю́ди твоя́ непоколеби́мы бы́ти в ве́ре Христо́ве./ Страда́ния, муче́ния и у́зы не устраши́ша тя,/ ага́ряны вся посрами́л еси́,/ писа́ньми и словесы́ наставля́я всех храни́ти ве́ру оте́ческую./ Кни́ги Богодухнове́нныя написа́л еси́,/ язы́к бо́лгарский прославля́я и утвержда́я./ И ны́не к Бо́гу предстоя́,/ о нас моли́ся, всеблаже́нне.

Ра́дуйся, ро́де бо́лгарский,/ лику́йте, христоно́снии лю́дие./ Дне́сь возсия́ на Небеси́ све́тлый лик па́стыря на́шего Софро́ния./ А́нгели с ним ра́дуются,/ и лик святи́телей торжеству́ет,/ земна́я с Небе́сными ликовству́ют:/ и́го долговечное отве́ржено бы́сть/ и ве́ра Христо́ва пропове́дуется./ Того́ моли́твами, Христе́ Бо́же,/ поми́луй и спаси́ нас.

Сла́ва, глас 6:

Прииди́те дне́сь, о празднолю́бцы,/ да восхва́лим пе́сненно святи́теля на́шего:/ ра́дуйся, о́тче Софро́ние,/ Це́ркве Христо́вы свети́льниче./ Ра́дуйся, иера́рхов удобре́ние,/ ра́дуйся, ни́щих зажи́тниче ²⁰,/ ра́дуйся, неве́дящих просвеще́ние,/ малоду́шных укрепле́ние/ и всем бо́лгарским лю́дем покро́в и спасе́ние./ Ты бо процве́л еси́ на Небеси́, я́ко фи́никс,/ и, я́ко кедр, и́же в Лива́не, умно́жил еси́ ча́да твоя́./ А́ще и на Небеси́ живе́ши ны́не,/ не оста́ви и нас на земли́,/ но моли́ся Христу́ Бо́гу/ умири́ти мир и спасти́ ду́ши на́ша.

И ны́не, Богоро́дичен: Кто Тебе́ не ублажи́т:

Вход, проки́мен дне и чте́ния святи́тельская.

При́тчей чте́ние (гла́вы 10, 3 и 8):

При́тчей чте́ние (гла́вы 10 и 11):

Прему́дрости Соломо́ни чте́ние (глава́ 4):

На лити́и стихи́ры самогла́сны, глас 1:

Ве́сь от ю́ности благонра́вием Христу́ прилепи́лся еси́,/ от Него́же святи́тельства досто́инство прие́мши,/ лю́ди твоя́ упа́сл еси́/ и све́том Ева́нгелия просвети́л еси́ я,/ мрак неве́дения отгоня́я./ Се́мя благоче́стия в них моли́твами твои́ми насади́л еси́,/ иера́рше Софро́ние,/ ве́чным благи́м насле́дник яви́лся еси́,/ по́чести трудо́в ра́ди твои́х от Христа́ прие́м,/ Того́ моли́ о душа́х на́ших.

Глас 2:

Я́ко труба́ Богогла́сная,/ возгреме́ глас твой,/ спя́щих сердца́ возбужда́я./ Бо́лгарский наро́д от и́га долгове́чнаго воскреси́л еси́/ и к позна́нию язы́ка ма́терняго обрати́л еси́ всех./ И́стины Ева́нгельския уясня́я им,/ се́рдца ве́рных укрепи́л еси́,/ не убоя́лся еси́ злочести́вых ага́рян,/ де́рзостию изоблича́я их,/ лю́ди твоя́ невре́дно сохрани́л еси́./ И ны́не Бо́гу при́сно предстоя́,/ моли́ изба́витися нам, ве́рно пою́щим тя.

Глас 3:

Я́ко Моисе́й Изра́иля в пусты́ни/ от зве́рей и гла́да сохрани́,/ та́ко и ты, стра́ждущий наро́д бо́лгарский пи́щею духо́вною напита́в,/ сохрани́л еси́ его́ от звере́й ага́рянских,/ ве́рою и любо́вию укрепля́я его́,/ неве́дящия писа́ния научи́в,/ малоду́шныя сло́вом укрепи́л еси́,/ гоне́ния и муче́ния не убоя́лся еси́./ И ны́не на Небеси́ со А́нгелы лику́еши,/ непреста́нно моля́ся о душа́х на́ших.

Сла́ва, глас 5:

Иера́рше блаже́нне Софро́ние,/ не терпя́ зре́ти ста́до твое́ погиба́ющее,/ па́стырей и́стинных не иму́щее,/ сам прия́л еси́ на себе́ и́го Христо́во,/ во е́же спаса́ти ду́ши заблу́ждшия./ Благода́ть и му́дрость от Бо́га прие́м,/ писа́ния но́вая ко Христо́ву позна́нию изложи́л еси́,/ язы́к бо́лгарский обнови́л еси́,/ и неве́дущим лю́дем Бог тобо́ю позна́н бы́сть./ Слова́ Богодухнове́нная сочини́в,/ ве́ру Христо́ву в лю́дех утверди́л еси́./ Те́мже мо́лим тя:/ моли́ся о нас, ве́рою и любо́вию сла́вящих тя.

И ны́не, Богоро́дичен, глас то́йже: Храм и две́рь еси́: зри в Богоро́дичнах

На стихо́вне стихи́ры, глас 8.

Подо́бен: Возше́л еси́:

Сокро́вище прему́дрости быв,/ Софро́ние свяще́нне,/ сердца́ стра́ждущих люде́й уче́нием твои́м/ му́дростию Бо́жиею просвети́л еси́,/ благоче́стия се́мена насади́в./ Те́мже тя вси, я́ко учи́теля прему́дра,/ достодо́лжно по досто́инству ублажа́ем и мо́лимся:/ моли́ся Христу́ Бо́гу/ изба́витися нам от наве́тов вра́жиих/ и спасти́ся душа́м на́шим.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Пропове́дует, иера́рше Софро́ние,/ твоя́ страда́ния ны́не ве́сь бо́лгарский наро́д:/ гоне́ния и бие́ния от пога́нских ага́рян/ претерпе́л еси́ ве́ры ра́ди,/ нас от боле́зней и скорбе́й ве́чных избавля́я твои́ми моли́твами,/ пита́тель вдов, учи́тель дете́й,/ оте́ц сиро́т, помо́щник су́щим в ско́рбех,/ пла́чущим утеше́ние,/ па́стырь и наста́вник всем заблу́ждшим,/ Софро́ние прему́дре, быв./ Но моли́ся Христу́ Бо́гу/ грехо́в оставле́ние дарова́ти/ ве́рою и любо́вию чту́щим святу́ю па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Благода́ть Бо́жия сни́де на тя бога́тно,/ сни́де, я́ко ми́ро, на главе́ твое́й,/ я́ко роса́ аермо́нская,/ ороша́ющая ка́плями доброде́телей твои́х/ всех, притека́ющих к тебе́ усе́рдно./ Па́стырь всеизря́ден был еси́,/ ста́до твое́ сохраня́я от волко́в губи́телей/ и огражда́я его́ моли́твами твои́ми./ Ны́не же стоя́ на Небеси́ и призира́я на зе́млю,/ моли́ спасти́ся душа́м на́шим.

Сла́ва, глас 8, самогла́сен:

Боже́ственною ре́вностию разже́гся,/ столп непоколеби́м был еси́ ве́рующим Бо́гу,/ Софро́ние Богому́дре,/ Це́рковь Бо́жию украси́л еси́ твои́ми му́дрыми уче́ньми./ Лю́ди, тебе́ Бо́гом вруче́нныя,/ му́дре наста́вил еси́ ве́ровати в Того́./ И́же, по Па́влу вели́кому,/ уста́ и ум насле́довав Христо́в,/ кни́ги написа́в Богодухнове́нныя,/ неве́рующия умудри́л еси́,/ к све́ту позна́ния вся приводя́,/ пу́ть спасе́ния показу́я им./ Те́мже моли́ся о нас, воспева́ющих тя при́сно.

И ны́не, Богоро́дичен: Безневе́стная Де́во:

На благослове́нии хле́бов тропа́рь свята́го, два́жды, и Богоро́дице Де́во: еди́ножды.

Тропа́рь, глас 1:

Щито́м ве́ры вооружи́вся,/ мече́м словесе́ безбо́жныя ага́ряны посека́я,/ ста́до твое́ упа́сл еси́ на земли́./ В Небе́сней же оби́тели всели́вся,/ Христа́ моли́ дарова́ти наро́ду на́шему/ мир и ве́лию ми́лость.

Ин тропа́рь свята́го, глас 3:

Бо́жиим изволе́нием архипа́стырь и учи́тель был еси́/ утружде́нному ага́рянами наро́ду твоему́/ и неусы́пен о нем к Бо́гу моли́твенник./ За ве́ру Христо́ву ревнова́вый,/ мно́жество страда́ний терпе́л еси́,/ па́ству же твою́ от нече́стия охраня́л еси́,/ в благоче́стии и чистоте́ ве́ры наставля́л еси́,/ просвеща́я ю словесы́ и списа́ньми твои́ми,/ те́мже вопие́м ти, святи́телю о́тче наш Софро́ние:/ Христу́ Бо́гу моли́ся/ дарова́ти наро́ду мир и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен: Тя, хода́тайствовавшую:

По 1-м стихосло́вии седа́лен, глас 4.

Подо́бен: Яви́лся еси́ дне́сь:

Да́нный от Бо́га тебе́ тала́нт стокра́тно обогати́л еси́,/ уче́ньми твои́ми лю́ди просвеща́я, ко Христу́ вся приве́л еси́./ Нищ сый, нището́ю твое́ю вся обогаща́я бога́тством бла́гости Боже́ственныя./ Небе́снаго венца́ ны́не сподо́бился еси́,/ не преста́й моля́ся о душа́х на́ших.

Сла́ва, и ны́не, Богоро́дичен, глас и подо́бен то́йже:

Де́во Всенепоро́чная, Пресу́щественнаго Бо́га ро́ждшая,/ со святи́телем Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

По 2-м стихосло́вии седа́лен, глас 8.

Подо́бен: Прему́дрость и Сло́во:

И́мже о́бразом жела́ет еле́нь на исто́чники водны́я,/ си́це возжела́л еси́, блаже́нне,/ и ко Исто́чнику – Спа́су на́шему прите́к, водо́ю жи́зни напа́яем,/ ре́ки благода́тныя из чре́ва твоего́ потеко́ша/ и напои́ша жа́ждущия лю́ди уче́нием слове́с твои́х./ Те́мже воспева́ем тя:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен, глас и подо́бен то́йже:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших и исправле́ние жития́/ ве́рою и любо́вию при́сно тя сла́вящим.

По полиеле́и седа́лен, глас 8.

Подо́бен: Прему́дрость и Сло́во:

Гоне́ния и муче́ния от нечести́вых ага́рян претерпева́я му́жески,/ дави́дским гла́сом вопия́л еси́:/ на хребте́ мое́м де́лаша гре́шницы и продолжи́ша беззако́ние свое́./ Преще́ния и ран не убоя́вся,/ от Бо́га не отступи́л еси́, ве́ру чи́сту соблюда́я./ Сего́ ра́ди пое́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен, глас и подо́бен то́йже:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 35.

По 50-м псалме́ стихи́ра, глас 6, самогла́сна:

Иера́рше блаже́нне Софро́ние,/ по и́мени твоему́ та́ко и житие́ твое́ бы́сть:/ дар прему́дрости и ра́зума от Бо́га прие́м,/ Боже́ственныя та́йны Ева́нгелия уясни́л еси́ писа́нием/ и словесы́ наста́вил еси́ лю́ди в ве́ру Бо́жию./ Пропове́дник преизря́ден быв,/ ста́до твое́ просвети́л еси́./ И ны́не Триипоста́сней Му́дрости предстоя́,/ не преста́й моли́тися о нас,/ ве́рою и любо́вию тя воспева́ющих.

Кано́н Богоро́дицы на 6, глас 8. Ирмо́с: Колесницегони́теля: и кано́н свята́го со ирмосо́м на 8, глас 4.

Песнь 1

Воспе́ти ми жела́ющу иера́рха Софро́ния, Го́споди,/ просвети́ мой ра́зум осия́нием Свята́го Ду́ха/ и да́руй ми свет прему́дрости Твоея́,/ да досто́йно воспою́ и возвели́чу и́мя его́.

Без отца́ и без ма́тере измла́да оста́вся,/ ко Христу́ прите́кл еси́/ и, Того́ за́поведьми огражда́яся, злоко́зненнаго врага́ не убоя́лся еси́./ Си́рыя и ни́щия возлюби́в, наста́вил еси́ на пу́ть спасе́ния,/ помина́й и нас, гре́шных, святи́телю Софро́ние.

Благода́тию Бо́жиею води́м,/ Це́рковь Святу́ю возлюби́л еси́/ и, сан архиере́йский прие́м, па́стырь и́стинный яви́лся еси́ слове́снаго ста́да Христо́ва,/ наста́вник и учи́тель ве́ры быв, Софро́ние, о́тче наш./ Сего́ ра́ди вене́ц нетле́ния от Бо́га прия́л еси́,/ Того́ моли́ о душа́х на́ших.

И́га ага́рянскаго не терпя́ зре́ти/ и язы́к гре́ческий отри́нув из це́рквей,/ язы́ком слове́нским сло́во Христо́во пропове́дал еси́ ве́рующим./ Моли́ изба́витися и нам от и́га грехо́внаго и от наше́ствия иноплеме́нник.

Богоро́дичен: Мари́ю Чи́стую, прииди́те вси, воспои́м,/ еди́ну, украси́вшую челове́чество и ро́ждшую Бо́га воплоще́нна,/ Де́ву же пребы́вшую неврежде́нну.

Катава́сия: Отве́рзу уста́ моя́:

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Ре́вностию Бо́жиею, я́ко Илия́ проро́к, распаля́ем, иера́рше Софро́ние,/ обходя́ гра́ды и ве́си бо́лгарския,/ ве́ру Христо́ву пропове́дуя и обы́чаи ага́рянския в лю́дех искореня́я,/ не убоя́лся еси́ свире́паго врага́./ Моли́ изба́витися нам от неви́димых враг.

Нечести́вый враг на тя разгне́вася зело́, ища́ зле погуби́ти тя,/ но ты, бе́гая гне́ва его́, к Бо́гу дави́дски взыва́л еси́:/ изми́ мя, Го́споди, от челове́ка лука́ва, от му́жа непра́ведна изба́ви мя./ Изба́ви и нас, Го́споди, от вся́каго греха́ моли́твами святи́теля Твоего́.

Сугу́бую благода́ть архиере́йскаго служе́ния прие́м от Бо́га,/ усугу́бил еси́ по Бо́зе ре́вность твою́./ Усе́рдно ста́до твое́ пася́ и храня́,/ деви́цу от сластолюби́ваго ага́рянина спасл еси́,/ супру́гу ве́рному венча́л еси́ ю и научи́л еси́ я пе́ти:/ сла́ва си́ле Твое́й, Го́споди.

Враг челове́ческий искони́ не терпя́ зре́ти тя, по Бо́зе житие́ иму́щу, блаже́нне,/ воздви́же на тя гоне́ния, я́ко на втора́го Па́вла, от сро́дников и лжебра́тии,/ сего́ ра́ди бе́гая, водвори́лся еси́ в де́брех и пеще́рех вратча́нских,/ гла́дом и мра́зом му́чим, ду́шу твою́ спасл еси́.

Богоро́дичен: Све́тлыми сия́ньми, Пречи́стая Ма́ти Бо́жия, озари́ мой ум,/ тьмо́ю лю́таго неразу́мия одержи́мый:/ я́ко улучи́в Боже́ственное просвеще́ние,/ вели́чия Твоя́ возвещу́, Присноде́во.

Седа́лен, глас 4:

Я́ко заря́ у́тренняя с небесе́,/ возсия́ нам всечестна́я па́мять твоя́, святи́телю Софро́ние,/ ве́рных озаря́ющи и слове́нский род вку́пе созыва́ющи./ Те́мже и мы дне́сь согла́сно вопие́м ти:/ моли́ Христа́ Бо́га о душа́х на́ших.

Сла́ва, и ны́не, Богоро́дичен:

Я́ко невозде́ланная, Де́во, лоза́,/ красне́йший Грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Изба́вивый дре́вле Дании́ла проро́ка от че́люстей Льво́вых,/ та́ко и тебе́ изба́ви, о́тче Софро́ние, от султа́на нечести́ваго и сластолюби́ваго,/ хотя́щаго погуби́ти тя неви́нна су́ща./ Ве́лиим стра́хом обдержи́м, вопия́л еси́:/ сла́ва си́ле Твое́й, Го́споди.

Обходя́ зе́млю Бо́лгарскую и утеша́я стра́ждущия лю́ди,/ ра́ны, бие́ния и в темни́це затворе́ния пра́вды ра́ди претерпева́я, Софро́ние блаже́нне,/ не отступи́л еси́ от ве́ры, Бо́гу тя укрепля́ющу,/ я́ко не оста́вит Госпо́дь жезла́ гре́шных на жре́бий пра́ведных./ Сего́ ра́ди, изба́влен, вопия́л еси́:/ сла́ва си́ле Твое́й, Го́споди.

Тя́жким страда́нием искуше́н был еси́, о́тче Софро́ние,/ и, я́ко зла́то в горни́ле, очи́стился еси́,/ сего́ ра́ди досто́йно Вратча́нский престо́л прие́м, жезл пра́вости в ру́це нося́,/ ста́до разу́мно упа́сл еси́ и вопия́л еси́, изба́влен:/ сла́ва си́ле Твое́й, Го́споди.

В моли́тве бо́дрствуя, святи́телю Софро́ние,/ не дал еси́ ве́ждома твои́ма дрема́ния и поко́й скраниа́ма ²¹ твои́ма./ Непреста́нно Бо́гу моля́ся о избавле́нии ро́ду бо́лгарскому от и́га долгове́чнаго,/ си́це вопия́л еси́:/ сла́ва си́ле Твое́й, Го́споди.

Возненави́деша тя ту́не ²² и погна́ша тя врази́ твои́,/ но ты, возлага́я на Го́спода печа́ль твою́, си́це вопия́л еси́:/ Го́споди, Бо́же мой, на Тя упова́х, спаси́ мя от всех, гоня́щих мя,/ я́ко не возда́х воздаю́щим ми зла́я:/ сла́ва си́ле Твое́й, Го́споди.

Богоро́дичен: Украси́лася еси́ па́че всего́ А́нгельскаго благоле́пия,/ я́ко ро́ждши всех, Отрокови́це, Творца́ же и Го́спода,/ от Твои́х пречи́стых крове́й воплоща́ема,/ избавля́ющаго вся, Того́ сла́вящия.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ти́хое и необурева́емое приста́нище души́ твоея́ ища́,/ до Афо́на дости́гл еси́,/ слеза́ми и те́плыми моли́твами ду́шу свою́ очи́стив,/ па́ки во оте́чество свое́ возврати́лся еси́,/ взыска́ти и спасти́ хотя́ лю́ди заблу́ждшия./ Ко и́стинному све́ту приве́д вся,/ к Бо́гу, ра́дуяся, взыва́л еси́:/ сла́ва си́ле Твое́й, Го́споди.

Я́ко ла́стовица от ю́га, Паи́сию преподо́бному долете́вшу,/ с ве́лиею ра́достию прие́м его́ и любому́дренно с ним бесе́довал еси́./ Исто́рию славянобо́лгарскую от него́ прие́м,/ прописа́в ю и к прочита́нию наро́ду бо́лгарскому отда́л еси́ ю./ Те́мже и мы, язы́ком свои́м к Бо́гу ны́не пою́ще,/ тебе́ при́сно ублажа́ем.

Столпи́ незы́блемии Це́ркве Бо́лгарския показа́стеся, о Паи́сие преподо́бне и Софро́ние свяще́нне:/ уче́ньми и писа́ньми ва́шими зе́млю Бо́лгарскую просвети́сте/ и лю́ди вся ко и́стинней ве́ре наста́висте./ Сего́ ра́ди ве́сь славя́нский род, любо́вию вас чту́ще, велича́ет.

Иера́рше Софро́ние, ты воздви́гл еси́ уче́ньми твои́ми лю́ди,/ во тьме́ неве́дения и се́ни сме́ртней седя́щия,/ сы́ны све́та сотвори́в я, пу́ть спасе́ния показу́я им./ Сего́ ра́ди венца́ Небе́снаго сподо́бился еси́,/ не преста́й моля́ся о душа́х на́ших.

Не терпя́ зре́ти му́чиму бы́ти бо́лгарскому наро́ду от нечести́вых ага́рян,/ писа́нием и словесы́ о́гненными противоста́л еси́ им, не убоя́вся лю́таго преще́ния./ Ра́ны мно́ги и гоне́ния ве́ры ра́ди претерпева́я до́блестно,/ к Бо́гу взыва́л еси́:/ спаси́, Го́споди, лю́ди Твоя́ и благослови́ достоя́ние Твое́.

Богоро́дичен: Тя ору́жие на враги́ предлага́ем,/ ско́рби вся́кия лю́тых обстоя́ний отрева́ем/ и возмуще́ния ерети́ческаго, Ма́ти Бо́жия, избега́ем.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Излия́ся благода́ть Свята́го Ду́ха во устна́х твои́х, иера́рше Софро́ние,/ ре́ки медото́чных слове́с из тебе́ потеко́ша,/ сердца́ ве́рных напая́ющи и све́том Ева́нгелия ду́ши всех просвеща́ющи./ Обновле́нный род славя́нский дне́сь лику́ет,/ Бо́га сла́вяще, тебе́ велича́ет.

Да воспое́м дне́сь ра́достно церко́внаго свети́льника, столпа́ ве́ры незы́блемаго,/ Правосла́вия учи́теля, благоглаго́ливаго пропове́дника благоче́стия, иера́рха Софро́ния,/ прославля́ющего Бо́га всех, смиреному́дренно да просла́вим от чи́ста се́рдца.

Проро́ческими очи́ма прови́дев ско́рое избавле́ние от и́га ага́рянскаго,/ до́брыми словесы́ лю́ди в це́рквах поуча́л еси́./ Ота́й ²³ же зе́млю Бо́лгарскую обходя́, му́дрыя писа́ния лю́дем раздава́я,/ Бо́жиею му́дростию озаре́н был еси́./ Не забу́ди и ны́не нас на земли́,/ любо́вию и ве́рою тя песносло́вящих.

Я́ко го́лубь чи́стый, пожи́л еси́ посреде́ гре́шник,/ ле́сть же ду́шу твою́ не прельсти́./ Пра́ведно поживе́, и пра́вда Бо́жия изба́ви тя от сме́рти./ К ве́чному животу́ преше́л еси́,/ со А́нгели на Небеси́ лику́еши при́сно,/ моли́ изба́витися нам от ве́чных мук.

Я́ко па́стырь преизря́ден яви́лся еси́, И́стинному Па́стырю после́дуя,/ ста́до слове́сное на па́жити ту́чныя изве́л еси́, пи́щею духо́вною напита́в./ Не оста́ви и нас, чту́щих тя.

Богоро́дичен: Притеце́м, ве́рнии, в це́рковь Бо́жия Ма́тере,/ и, ве́рно моля́щеся, возопие́м Ей:/ поми́луй, Влады́чице, Твое́ достоя́ние/ и от враг изба́ви нас моли́твами Твои́ми.

Конда́к, глас 3.

Подо́бен: Да веселя́тся:

Архиере́ев похвала́ и страда́льцев украше́ние быв,/ святи́телю Софро́ние,/ доброде́тельми просла́вився,/ возсия́л еси́, я́ко со́лнце,/ нас просвеща́я и грехо́вную тьму́ неве́дения отгоня́я./ Но, я́ко име́я дерзнове́ние к Бо́гу,/ мир испроси́ душа́м на́шим и ве́лию ми́лость.

И́кос:

Се возшуме́ша врази́ твои́,/ лю́ди лука́вноваша и воздвиго́ша главу́ свою́ на тя, святи́телю Софро́ние,/ но не убоя́лся еси́ и, благода́тию Бо́жиею укрепля́емь, си́це вопия́л еси́:/ да постыдя́тся и посра́мятся вку́пе и́щущии ду́шу мою́,/ да возвратя́тся вспя́ть и постыдя́тся мы́слящии ми зла́я./ Главу́ врага́ злоко́зненнаго сокруши́в моли́твами твои́ми,/ ста́до твое́ сохрани́л еси́ неврежде́нно./ Те́мже тя ве́сь бо́лгарский наро́д сла́вит, воспева́юще твоя́ труды́ и страда́ния,/ Богому́дре Софро́ние, мир испроси́ душа́м на́шим и ве́лию ми́лость.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Обходя́щу всю зе́млю Бо́лгарскую,/ лю́ди, спя́щия от сна долгове́чнаго и́га, воздви́гл еси́./ И нас ны́не воздви́гни, святи́телю Софро́ние, от сна грехо́внаго,/ я́ко да возвели́чим возвели́чившаго тя Христа́, Бо́га на́шего.

Духо́вная уче́ния возлюби́в и во чте́нии Свяще́нных Писа́ний упражня́яся,/ ум Бо́гу просвети́вшу ти, я́ко фи́никс, в дому́ Госпо́дни, процве́л еси́,/ благопло́дия слове́с насажда́я бога́тно в сердца́х ве́рно пою́щих ти:/ благослове́н Бог оте́ц на́ших.

Благода́тию Бо́жиею просвеща́ем,/ я́ко со́лнце на небеси́, возсия́л еси́,/ те́плыми луча́ми озаря́я зе́млю и лю́ди,/ доброде́тели в сердца́ люде́й насажда́я./ Сего́ ра́ди научи́л еси́ я пе́ти:/ благослове́н Бог оте́ц на́ших.

Бо́жиим манове́нием дре́вле Моисе́й Изра́иля изведе́ от рабо́ты еги́петския,/ вторы́й Моисе́й яви́лся еси́, Софро́ние, о́тче наш,/ изводя́ лю́ди своя́ от рабо́ты ага́рянския,/ изба́ви и нас от фарао́на мы́сленнаго./ Те́мже тя пое́м во вся ве́ки.

Я́ко безпло́дную смоко́вницу, ду́шу мою́ не посецы́, Спа́се,/ но обогати́ ю стокра́тными плоды́ духо́вными гобзова́нием щедро́т Твои́х./ Обогати́вый святи́теля Твоего́ доброде́тельми, Го́споди,/ изба́ви и нас ве́чных мук моли́твами его́.

Богоро́дичен: Светороди́тельнице Де́во,/ души́ моея́ стра́сти отжени́/ и да́ждь ми чи́сто зре́ти, Влады́чице,/ спаси́тельную добро́ту Возсия́вшаго неизрече́нно из Твоея́ пречи́стыя утро́бы/ во свет язы́ков, Всепе́тая.

Песнь 8

Архиере́ю Бо́жию тя бы́ти ве́дяще,/ к Ве́чному Архиере́ю Безкро́вныя же́ртвы о людски́х неве́дениих приноси́л еси́,/ нас от грехо́в искупи́вшему./ Те́мже тя превозно́сим во вся ве́ки.

Бога́тства земна́я в ничто́же вмени́в,/ Ева́нгелие еди́но сокро́вище некра́домо име́л еси́./ Нищ сый, нището́ю нас обогаща́я благода́тию обнища́вшаго нас ра́ди и зрак раба́ прии́мшаго,/ Того́ пое́м и превозно́сим во вся ве́ки.

Бе́гающу Иа́кову гне́ва бра́та своего́, в зе́млю чужду́ю оты́де,/ та́ко и ты, страда́льче Софро́ние, в зе́млю Вла́шскую удали́лся еси́,/ бе́гая гне́ва ага́рянскаго, пе́снь спаси́тельную поя́:/ Го́спода по́йте, дела́, и превозноси́те Его́ во вся ве́ки.

Я́ко пришле́ц на земли́ чужде́й быв,/ Иереми́евым пла́чем пла́кался еси́ о ста́де твое́м, Софро́ние, о́тче наш./ Кни́ги Богодухнове́нныя написа́в им, благи́ми словесы́ уте́шил еси́ их,/ Бо́жие избавле́ние от долговеко́внаго и́га обещава́я им./ Те́мже и мы ны́не, изба́вленнии, пое́м:/ Изба́вителю Бо́же, благослове́н еси́.

Богоро́дичен: Благослове́н Плод, Пречи́стая, чре́ва Твоего́,/ И́мже, земни́и вси, кля́твы изба́вихомся, Благослове́нная Всечи́стая,/ несказа́нное чу́до, неве́домое слы́шание, всех же ве́рных спасе́ние.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Бо́жиим милосе́рдием дре́вний Изра́иль от еги́петскаго зла избежа́,/ ны́не и бо́лгарский наро́д Бо́жиим промышле́нием от и́га ага́рянскаго изба́влен бы́сть./ Те́мже и мы ра́достно зове́м:/ пои́м Го́сподеви, сла́вно бо просла́вися.

Ре́вностию Илиино́ю обдержи́м быв, святи́телю Софро́ние,/ не устраша́яся преще́ния, ра́ны и гоне́ния,/ дерзнове́нно врага́ безбо́жнаго изобличи́л еси́/ и, в темни́це затворя́ем, к Бо́гу взыва́л еси́:/ Изба́вителю Бо́же, благослове́н еси́.

Пе́сненно дне́сь да почти́м иера́рха Христо́ва Софро́ния,/ от земли́ Бо́лгарския возсия́вшаго/ и пу́ть спасе́ния нам озаря́я луча́ми све́тлыми доброде́телей./ Того́ моли́твами, Христе́ Бо́же наш,/ сподо́би и нас чи́стым се́рдцем сла́вити Тя во вся ве́ки.

Житие́ свое́ многострада́льное сконча́в на земли́,/ к Небе́сному Престо́лу возше́л еси́, нося́ ве́тви благоде́лания./ Тле́нными нетле́нная до́бре приобре́тши,/ Ца́рство Небе́сное от Христа́ прия́л еси́./ Того́ моли́ сподо́битися нам жи́зни ве́чныя моли́твами твои́ми.

Богоро́дичен: Яви́ся нам из Тебе́, Богороди́тельнице, Пра́вды све́тлое Со́лнце,/ просвеща́ющее вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода.

Свети́лен, глас 3.

Подо́бен: Пло́тию усну́в:

Све́тло дне́сь пра́зднуем святу́ю па́мять твою́, иера́рше Софро́ние,/ зря́щу ти ны́не на Небеси́ свет лица́ Бо́жия:/ моли́ о нас, пою́щих тя.

Сла́ва, и ны́не, Богоро́дичен, глас то́йже:

По Бо́зе упова́ние на́ше иму́ще на Тя, Пречи́стая Богоро́дице, мо́лим Ти ся:/ моли́ся о нас ко из Тебе́ Ро́ждшемуся,/ невре́дны нас да́же до конца́ сохрани́те,/ притека́ющих к покро́ву Твоему́.

На хвали́тех поста́вим стихо́в 4 и пое́м стихи́ры, глас 6, самогла́сны:

Прииди́те, лю́дие, све́тло торжеству́юще,/ да восхва́лим святи́теля Софро́ния,/ от земли́ Бо́лгарския возсия́вшаго/ и просвети́вшаго род наш писа́нием и уче́нием свои́м./ Ны́не на Небеси́ лику́ет,/ Боже́ственным сия́нием озаря́ем,/ лучи́ благода́тныя испуска́я,/ вся концы́ земны́я освяща́ет./ Той бо мо́лится о нас Христу́ Бо́гу,/ спасти́ся душа́м на́шим.

Возсия́ дне́сь пресве́тлая па́мять твоя́,/ святи́телю Софро́ние,/ А́нгели бо лику́ют на Небеси́/ и лик святи́телей ра́дуется./ Це́рковь Бо́лгарская, кровьми́ му́ченик обагре́нная,/ украси́ся сла́вным и́менем твои́м./ Сего́ ра́ди и мы согла́сно вопие́м ти:/ сла́ва Просла́вльшему тя на земли́/ и Спа́сшему нас те́плыми твои́ми моли́твами.

Святи́телю Софро́ние,/ мрак безбо́жия и тьму́ неве́дения/ мо́лниями про́поведей, писа́ний твои́х и уче́нием твои́м отгна́в,/ пу́ть спасе́ния лю́дем показа́л еси́,/ ага́рянская муче́ния и гоне́ния претерпева́я,/ неви́нныя от сме́рти спасл еси́,/ о́трасли но́выя возрасти́л еси́/ от му́ченическия кро́ви, зе́млю Бо́лгарскую напои́вшую./ И ны́не на Небеси́ пребыва́я,/ моли́ Христа́ Бо́га,/ да спасе́т ду́ши на́ша.

Сла́ва, глас то́йже:

Иера́рше Софро́ние,/ житие́ и страда́ние свое́ сам написа́в,/ заве́т нам оста́вил еси́,/ да после́дуем стопа́м твои́м,/ я́коже и ты Христу́ Бо́гу подража́тель был еси́,/ прославля́я Его́ в души́ и телеси́ свое́м,/ вене́ц нетле́ния от Него́ прие́м,/ со А́нгелы ны́не на Небеси́ лику́еши,/ о нас при́сно моли́ся,/ да сподо́бимся Ца́рствия Христо́ва моли́твами твои́ми.

И ны́не, Богоро́дичен, глас то́йже.

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

Славосло́вие вели́кое, тропа́рь и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилуи́я, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Святитель Софроний, епи́скоп Врачанский

Святитель Софроний, епископ Врачанский, родился в 1739 году в болгарском селении Котеле в семье лфасола (торговца скотом) Владислава и жены его Марии. Мальчик, названный во Святом Крещении именем Стояко, лишился матери в возрасте трех лет. Когда ему было 11 лет, умер отец. В это время отрок Стояко учился в греческом училище в Котеле. За два года обучения святой Стояко усвоил греческую грамоту и изучил Октоих, проявив заметные способности, усердие и прилежание. Осиротевший мальчик был взят на попечение дядей (братом отца) и отдан в обучение ремеслу. В возрасте 18 лет юноша женился, а еще через пять лет, 1 сентября 1762 года, был рукоположен во священника.

В конце 1764 – начале 1765 года Котел посетил основоположник новой болгарской литературы афонский иеромонах преподобный Паисий Хилендарский (XVIII в., память 19 июня), автор знаменитой «Истории славено-болгарской» (1762). Священник Стояко Владиславов имел с ним несколько встреч и снял копию с его истории (ныне хранится в Болгарской национальной библиотеке в Софии). Эта встреча имела важное значение в судьбе будущего святителя. Под влиянием преподобного Паисия Хилендарского, отец Стояко отправился на Святую Гору Афон, по-видимому, в 1774 году. Здесь он провел 6 месяцев, учась у святогорцев опыту монашеской жизни, подвигу молитвы и богомыслия. После возвращения с Афона святой Стояко продолжал священнослужение в родном селении еще 20 лет.

Многолетнее священнослужение святого Стояко в Котеле протекало в трудных обстоятельствах, в атмосфере турецкого владычества и засилья. Несмотря на это, отец Стояко ревностно исполнял свой пастырский долг. Он совершал богослужения и требы, проповедовал каждое воскресенье в храме, назидал взрослых и детей, организовал и руководил Котелским Духовным училищем.

Из-за постоянных преследований турецкой администрации, святой Стояко в 1792 году перешел в Анхиалскую епархию в г. Карнобат, но преследования не прекращались и здесь. В 1793 году начались его тяжелые скитания по болгарским селам. В 1794 году отец Стояко переехал в селение Арнабаси, где жили его дети. К этому времени он уже овдовел. Здесь, в местном монастыре, он принял монашество с именем Софроний. Вскоре Тырновский митрополит Матфей предложил ему занять епископскую кафедру в г. Враце.

Иеромонах Софроний смиренно отказался, считая себя недостойным архиерейского сана, но ради церковной пользы должен был согласиться. 17 сентября 1794 года он был хиротонисан во епископа Врачанского. Врачанский район в это время превратился в театр военных действий между султанским войском и мятежными отрядами паши Пазвант-оглу. Святитель Софроний мужественно переносил выпавшие на его долю испытания, но вскоре был вынужден бежать от янычар сначала в Плевен, затем в Никополь на Дунае, а оттуда в г. Видин. В Плевене святитель Софроний обошел весь город и окрестные села, совершая молебны с водосвятием и окропляя жителей святой водой во время эпидемии чумы. В Видине святитель Софроний в течение 2 лет (1800 – июнь 1803 гг.) оказался задержанным турками и находился в униженном положении «последнего слуги».

Из Видина святитель Софроний отправился в Бухарест, где в так называемой Бейской академии (высшее греческое учебное заведение) учились два его внука, Стефан и Атанас.

В Бухаресте святитель Софроний был дружелюбно встречен духовными и светскими властями правительства Румынии во главе с Константином Ипсиланти и нашел приют у митрополита Угро-Валахийского Досифея. Митрополит Досифей испросил у Патриарха Константинопольского Каллиника V отпускную грамоту, которая освобождала святителя Софрония от управления Врачанской епархией. Святитель Софроний активно включился в церковно-общественную деятельность Угро-Валахии. За сравнительно небольшой срок, с 14 декабря 1802 по 7 октября 1809 года, святитель Софроний по поручению митрополита Досифея совершил 60 хиротоний. Здесь же развернулась его весьма плодотворная литературная деятельность. Святитель Софроний стал писать на новоболгарском языке, который сделал орудием национального просвещения. Первой печатной книгой на новоболгарском языке явился написанный им сборник церковных поучений на все воскресные дни и великие Господни праздники «Кириакодромион сиреч Неделник», изданный в 1806 году в г. Рымнике (ныне г. Вылча).

Из литературных произведений святителя Софрония широкую известность приобрела его автобиографическая исповедь «Житие и страдание грешного Софрония». Кроме того, святитель Софроний составил, перевел и снабдил комментарием «Исповедание Православной веры» (1805), «Недельное евангельское толкование и Катехизис» (1806), «Театрон политикон, сиречь Гражданское позорище» (1809).

Вслед за преподобным Паисием Хилендарским святитель Софроний указал в своих трудах пути и средства к разрешению национальной проблемы: болгарский язык, Болгарская Церковь и болгарская государственность. Святитель Софроний был убежденным поборником славянского единства и считал, что только с помощью России Болгария добьется освобождения от османского гнета.

Во время русско-турецкой войны 1806–1812 годов святитель Софроний вернулся в Болгарию. Он призывал болгарский народ оказывать всемерную помощь русским освободителям, организовывать отряды болгарских добровольцев.

10 января 1808 года святитель Софроний обратился с посланием к Русскому правительству, в котором описывал зверства османских поработителей и ходатайствовал о принятии Болгарии под власть единоверной и братской России. Аналогичное послание святитель Софроний вручил в феврале 1808 года князю Куракину для передачи Александру I.

В июне того же года святитель Софроний у села Сентеши встретился с генералом М. А. Милорадовичем, который ободрил его заверением, что болгары могут надеяться на всестороннюю помощь России. Обращения святителя Софрония были направлены также русскому министру иностранных дел графу Н. П. Румянцеву и Главнокомандующему Дунайской армией генералу А. А. Прозоровскому.

В октябре 1810 года, перед наступлением русских войск, святитель Софроний обратился к православным болгарам с патриотическим Воззванием, в котором призвал их к сплочению и единству в союзе с великим русским народом. 29 мая 1811 года святитель Софроний представил фельдмаршалу М. И. Кутузову «Просьбу от всех находящихся здесь болгар» – документ, который являлся по существу первой программой болгарского освободительного движения.

Осложнившаяся международная обстановка и последующее вторжение Наполеона в Россию отсрочили освобождение Болгарии. В сентябре 1813 года святитель Софроний скончался в Бухаресте. Существует предположение, что он был погребен в монастыре Шербан Вода, вблизи Бухареста. Русское правительство высоко ценило патриотические усилия святителя Софрония и до последних дней его жизни рассматривало его как духовного вождя болгарского народа. «Ради многострадальных подвигов, сопряженных с архипастырскими трудами», определением Священного Синода Болгарской Православной Церкви 31 декабря 1964 года святитель Софроний был причислен к лику святых. Определением Священного Синода Русской Православной Церкви 22 февраля 1965 года имя святителя Софрония было внесено в месяцеслов Русской Православной Церкви. Канонизация святителя Софрония с удовлетворением была воспринята всей Православной Полнотой. Служба святителю Софронию составлена архимандритом Софронием и отредактирована митрополитом Словенским Никодимом

Источники и литература:

Софроний Врачанский. Избрани творения. Под редакциета на П. Динеков. София, 1946. Академик Н. С. Державин. Софроний Врачанский. Его жизнь и литературная деятельность (1739–1813) – «Сборник статей и исследований в области славянской филологии». М.Л., 1941, с. 125–169; А. Н. Робинсон, Н. М, Дылевский. Софроний Врачанский и его жизнеописание. – В кн.: «Житие и страдания грешного Софрония». Л., изд. Наука, 1976, с. 69–146; Архимандрит Кирилл (Христов). Памяти святителя Софрония Врачанского. – Журнал Московской Патриархии, 1983, №6, с. 61–63

Свята́го му́ченика Епима́ха

(слу́жбу зри 31 октября́)

Тропа́рь, глас 4:

Му́ченик Твой, Го́споди, Епима́х/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Конда́к, глас 4.

Подо́бен: Яви́лся еси́ дне́сь:

Многообра́зныя ра́ны претерпе́л еси́/ и вене́ц прие́м от Христа́ Бо́га,/ Ему́же о нас моли́ся, блаже́нне Епима́ше,/ ве́рно соверша́ющих па́мять твою́,/ да спасе́т ду́ши на́ша.

Свято́й му́ченик Епима́х

Святой мученик Епимах (греч. – воинствующий) был родом из Египта. Вступив на иноческий путь, он несколько лет подвизался отшельником на горе Пелусийской (до наших дней сохранились руины древнего поселения Пелузиум на севере Синайского полуострова). Во время гонений, воздвигнутых в Египте на христиан около 250 года, святой Епимах явился в Александрию. Разрушив языческих идолов, он обличил распространившиеся в то время ложные учения и с пламенной ревностью исповедал истинную веру Христову.

За это святой Епимах был схвачен и предан мучительным пыткам, которые перенес мужественно и твердо. Среди свидетелей его казни стояла женщина с больным глазом. Капля крови мученика, упавшая на болящую, исцелила ее. После жестоких истязаний святой Епимах был усечен мечом (по другим сведениям, сожжен) около 250 года.

Память его мученической кончины совершается Церковью 31 октября. 11 марта празднуется перенесение святых мощей мученика Епимаха в Константинополь.

Преподо́бнаго Софро́ния Затво́рника, в Да́льних пеще́рах почива́ющаго

Тропа́рь, глас 1:

Простра́нна пути́, веду́ща в па́губу,/ блаже́нне Софро́ние, угонза́я ²⁴,/ затвори́лся еси́ в те́мне ме́сте пеще́рнем,/ иде́же де́нь и но́щь в моли́твах и слеза́х/ и в ручно́м де́ле подвиза́яся,/ обре́л еси́ ве́чный живо́т и наслажде́ние.

Конда́к, глас 4:

Яви́лся еси́ дре́вним отце́м ревни́тель,/ в те́мней пеще́ре све́тлым житие́м я́сно просия́в,/ и озари́л еси́ сердца́ пою́щих тя,/ Богому́дре о́тче Софро́ние.

Ин конда́к, глас 8:

В те́сней и те́мней кле́ти затвори́вся,/ власяни́цею и по́ясом желе́зным умерщвля́я те́ло твое́,/ псалмопе́нии непреста́нно благославосло́вил еси́,/ тем Све́та ве́чнаго и оби́тели Небе́сныя сподо́блься,/ и, а́нгельскими пе́нии наслажда́яся,/ моли́ся Го́сподеви, да не лиши́т и нас ве́чных красо́т.

Преподобный Софроний

Преподобный Софроний затворник Печерский, подвизался в Киево-Печерском монастыре в ХIII веке. Строгий подвижник и молитвенник, он всю жизнь носил на себе власяницу и тяжелый железный пояс. Ежедневно преподобный прочитывал всю Псалтирь. Мощи святого почивают в Дальних (Феодосиевых) пещерах Киево-Печерской Лавры.

* * *

²⁰

зажи́тниче – заготовляющий питание.

²¹

скраниа́ма – щеки, виски.

²²

ту́не – без оснований.

²³

о́тай – тайно.

²⁴

угонза́я – избегая, убегая.

10-й день12-й день

Источник: Минея - М. : Издательский Совет Русской Православной Церкви, 2002-. 12 том. / Минея март. - 2002. / Ч. 1. – 424; Ч. 2. - 400 с.

Telegram-каналы

Комментарии для сайта Cackle