30-й день

И́же во святы́х отце́в на́ших и вели́ких иера́рхов Васи́лия Вели́каго, Григо́рия Богосло́ва и Иоа́нна Златоу́стаго и свята́го священному́ченика Ипполи́та, Па́пы Ри́мскаго

Собор святых Вселенских учителей и святителей Василия Великого, Григория Богослова и Иоанна Златоустого

Священномученик Ипполит, мученики Кенсорин, Савин, мученица Хрисия-дева и прочие 20 мучеников

Преподо́бнаго Зино́на По́стника, в Да́льних пеще́рах почива́ющаго

Преподобный Зинон

Возсле́дование его́ пое́тся на пове́черии.

НА МА́ЛОЙ ВЕЧЕ́РНИ

Стихи́ры на 4, глас 4.

Подо́бен: Я́ко до́бля:

На высоту́, Васи́лие,/ Христо́вы любве́ возше́д,/ узре́л еси́ неизрече́нныя Его́/ и Боже́ственныя та́йны,/ я́же откры́в, изъясни́л еси́ лю́дем,/ я́ко благоче́стия пропове́дник му́дрый./ Те́мже моли́ от тли и бед изба́витися/ ве́рно возсле́дующим/ твои́м уче́нием, преподо́бне.

Связа́ния разреши́л еси́ ересе́й, преподо́бне,/ му́дростию слове́с и уче́ний твои́х/ и во единомы́слие собра́л еси́/ правосла́вныя ве́ры/ в благоразу́мии Христа́ хва́лящия, Григо́рие./ Его́же моли́/ от тли и бед изба́витися/ ве́рно прие́млющим твоя́ Боговеща́нная уче́ния.

Неразори́мо тя основа́ние/ Христо́с утверди́/ Свое́й Це́ркви, о́тче преподо́бне,/ соблюда́юща сию́ непозы́блему и необори́му вра́жиими прило́ги,/ Богоглаго́ливе Златоу́сте,/ и моля́щася от страсте́й душетле́нных изба́витися/ жа́ждущим твои́х слове́с и пучи́ны разуме́ний.

Тро́ицы избра́ние,/ нетле́ннаго же злачника́ цве́ти мирово́ннии/ и зело́ красне́йшия,/ мы́сленнаго же я́ко су́ще со́лнца лучи́,/ просвеща́ющия зе́млю/ свои́ми Боже́ственными осия́нии,/ да восхва́лим Иоа́нна вели́каго/ с Боже́ственным Богосло́вом Григо́рием/ и высокоу́мнаго Васи́лия.

Сла́ва, глас 6:

Челове́цы Бо́жии и ве́рнии раби́,/ служи́телие Госпо́дни, му́жие жела́ний,/ сосу́ди избра́ннии, столпи́ и утвержде́ния Це́ркве,/ Ца́рствия насле́дницы,/ не премолчи́те е́же вопи́ти о нас ко Го́споду.

И ны́не: Богоро́дице, Ты еси́ лоза́:

На стихо́вне стихи́ры, глас 6.

Подо́бен: Тридне́вен:

Благода́ть превозмо́же,/ ве́ра преукрепи́ся,/ испо́лнишася вся ра́зума Бо́жия/ апо́столов и учи́телей ра́ди,/ и спасе́нием обогати́хомся.

Стих: Восхва́лятся преподо́бнии во сла́ве/ и возра́дуются на ло́жах свои́х.

Небе́сных та́инств/ и челове́ческих уче́ний,/ благода́тей стече́ние всеразли́чных со исправле́ньми,/ побежда́ющими вся́ко ерети́ческое сло́во,/ три святы́я Твоя́ удиви́л еси́, Го́споди.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Васи́лий, Боже́ственный ум,/ Григо́рий, Боже́ственный глас,/ Иоа́нн, всекра́сный свети́льник,/ трие высоча́йшии уго́дницы Тро́ицы и служи́телие/ да спросла́вятся.

Сла́ва, глас 6:

До́брии раби́, блази́и и ве́рнии,/ блази́и де́лателие виногра́да Христо́ва,/ и́же и тяготу́ дневну́ю поне́сшии,/ и да́нный вам тала́нт возрасти́вшии,/ и по вас прише́дшим незави́девшии,/ те́мже и врата́ вам Небе́сная отверзо́шася./ Вше́дше у́бо в ра́дость Влады́ки Христа́,/ моли́те о нас, святи́и учи́телие.

И ны́не, Богоро́дичен: Никто́же, притека́яй к Тебе́:

Тропа́рь, глас 4: Я́ко апо́столов единонра́внии: Пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Благода́ти орга́ны,/ гу́сли Ду́ха,/ благознамени́тыя трубы́ пропове́дания,/ стра́шныя и достослы́шанныя,/ с высоты́ шумя́щия гро́мы/ и сла́ву Бо́жию сказу́ющия конце́м/ три пропове́дники вели́кия Тро́ицы,/ Иоа́нна и Васи́лия/ досто́йно с Григо́рием просла́вим.

Тро́ицы побо́рницы,/ благоче́стия забра́ла,/ и́же по двана́десятих трие́ апо́столи,/ из Еде́ма точа́щия во́ду живу́щую ре́ки/ и лице́ земли́ живото́чными напая́ющия/ Боже́ственными струя́ми,/ вели́кия стихи́и,/ ве́ру, я́коже тварь, соста́вльшия,/ достодо́лжно да почту́тся.

Не суть ре́чи, глаго́лет,/ ниже́ словеса́ глаго́лема,/ и́хже не слы́шатся гла́си их:/ во всю зе́млю бо и мо́ре/ веща́ние протече́/ Боже́ственных и му́дрых учи́телей тва́ри./ Отону́дуже изря́днейшия/ тех Боже́ственными зако́ны содержа́тся и собира́ются/ во еди́но Правосла́вие концы́.

Орга́ны Ду́ха Свята́го,/ и́стинныя трубы́,/ ри́торы Сло́ва/ восхва́лим пе́сненными гла́сы,/ догма́том их возсле́дующии,/ моля́щеся им,/ я́ко дерзнове́ние иму́щим ко Го́споду,/ дарова́ти мир кре́пкий у́бо при́сно вселе́нней,/ нам же всем проще́ние.

И́ны стихи́ры, глас 2.

Подо́бен: Ки́ими:

Ки́ими похва́льными венцы́ венча́ем учи́тели,/ разделе́нныя телесы́ и совоку́пленныя ду́хом?/ Богоно́сныя предста́тели Тро́ицы Единочи́сленныя и служи́тели,/ свети́ла, вселе́нную просвеща́ющая,/ церко́вныя столпы́,/ я́же венцы́ сла́вы, я́ко победи́вшия,/ венча́ет Христо́с Бог наш,/ име́яй ве́лию ми́лость.

Ки́ими пе́сненными добро́тами/ венча́ем Богоно́сныя Небе́сныя таи́нники и пропове́дники?/ Правосла́вия су́щия зело́ изря́днейшия Богосло́вы:/ Вели́каго священноявле́ннаго Васи́лия,/ Боже́ственнаго Богоглаго́ливаго Григо́рия/ и Иоа́нна, зело́ злата́го язы́ком,/ я́же просла́ви Тро́ица досто́йно, Госпо́дь,/ име́яй ве́лию ми́лость.

Ки́ими похва́льными глаго́лы похва́лим святи́тели,/ равноапо́стольныя благода́тию/ и единоче́стныя дарова́ньми?/ Нече́стия разори́тели,/ спаси́тели и наста́вники сло́вом и де́лом,/ па́стыри Христоподо́бныя ве́рою,/ земны́я А́нгелы, Небе́сныя челове́ки,/ я́же почествова́ Христо́с сла́вы Госпо́дь,/ име́яй ве́лию ми́лость.

Ки́ими похва́льными венцы́ венча́ем Златосло́ва,/ вку́пе с Васи́лием Григо́рия?/ Честна́я прия́телища Ду́ха,/ тве́рдыя ве́ры побо́рники,/ столпы́ Церко́вныя, ве́рных утвержде́ние,/ всех согреша́ющих утеше́ние,/ исто́чники, точа́щия во́ду,/ от нея́же почерпа́юще, услажда́емся душа́ми,/ прося́ще проще́ния прегреше́ний/ и ве́лия ми́лости.

Сла́ва, глас 6:

Та́йныя днесь Ду́ха трубы́,/ Богоно́сныя отцы́ да восхва́лим,/ воспе́вшия посреде́ Це́ркве песнь сли́чную Богосло́вия,/ Тро́ицу Еди́ну непреме́нную,/ Существо́ же и Божество́,/ низложи́тели А́риевы и правосла́вных побо́рники,/ моля́щияся всегда́ Го́споду/ поми́ловатися душа́м на́шим.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния.

Втора́го зако́на чте́ние (глава́ 1):

Во днех о́нех/ рече́ Моисе́й к сыно́м Изра́илевым:/ ви́дите, преда́х пред лице́м ва́шим зе́млю,/ вше́дше, насле́дуйте ю, ю́же кля́тся Госпо́дь отце́м ва́шим,/ Авраа́му, и Исаа́ку, и Иа́кову, да́ти им и се́мени их по них./ И реко́х к вам во вре́мя о́но, глаго́ля:/ не возмогу́ еди́н води́ти вас/ Госпо́дь Бог ваш умножи́л вы есть,/ и се есте́ днесь, я́ко зве́зды небе́сныя, мно́жеством./ Госпо́дь Бог оте́ц на́ших да приложи́т вам, я́ко да бу́дете ты́сящами сугу́бо,/ и да благослови́т вас, я́коже глаго́ла вам./ И взят от вас му́жи му́дры, и худо́жны, и смы́сленны,/ и поста́вих их владе́ти над ва́ми,/ тысященача́льники, и стонача́льники,/ и пятдесятонача́льники, и десятонача́льники,/ и писмовводи́тели судия́м ва́шим,/ и запове́дах судия́м ва́шим во вре́мя о́но, глаго́ля:/ разслу́шайте посреде́ бра́тий ва́ших/ и суди́те пра́ведно, посреде́ му́жа,/ и посреде́ бра́та его́, и посреде́ прише́льца его́./ Да не позна́ете лица́ в суде́,/ ма́лому и вели́кому су́диши,/ и не устыди́шися лица́ челове́ческа,/ я́ко суд Бо́жий есть.

Втора́го зако́на чте́ние (глава́ 10):

Во днех о́нех/ рече́ Моисе́й к сыно́м Изра́илевым:/ се Го́спода Бо́га твоего́ не́бо/ и Не́бо небесе́, земля́ и вся, ели́ка суть на ней./ Оба́че отцы́ ва́ши произво́ли Госпо́дь люби́ти их/ и избра́ се́мя их по них, вас, па́че всех язы́к, в день сей./ И обре́жите жестосе́рдие ва́ше,/ и вы́я ва́ша не ожесточи́те ктому́./ И́бо Госпо́дь Бог ваш,/ Сей Бог бого́в и Госпо́дь господе́й,/ Бог вели́кий, и кре́пкий, и стра́шный,/ И́же не диви́тся лицу́, ниже́ взе́млет дар./ Творя́й суд прише́льцу, и си́ру, и вдови́це/ и лю́бит прише́льца, да́ти ему́ хлеб и ри́зу./ И возлюби́те прише́льца,/ прише́льцы бо бе́сте в земли́ Еги́петстей./ Го́спода Бо́га твоего́ да убои́шися, и Тому́ Еди́ному послу́жиши,/ и к Нему́ прилепи́шися, и И́менем Его́ клене́шися./ Той хвала́ твоя́, и Той Бог твой,/ И́же сотвори́л ти есть вели́кая и сла́вная сия́,/ я́же ви́десте о́чи твои́.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

На ли́тии стихи́ры, глас 2. Ни́ла Ксанфопу́ла:

Прииди́те, Небе́сныя Тро́ицы служи́телие,/ земну́ю тро́ицу святы́х иера́рхов да восхва́лим:/ Васи́лия, ца́рствия тезоиме́ннаго,/ Григо́рия, Богосло́вии наимено́внаго,/ и Иоа́нна, вои́стинну благодатноимено́внаго,/ глубины́ му́дрости Ду́ха испыта́вших,/ струи́ океа́новы, исто́чники приснотеку́щия,/ во́ду жи́ву ска́чущую,/ проза́рныя би́серы, земна́я свети́ла,/ Церко́вная корми́ла, светлоплодови́тая древеса́,/ строи́тели благода́ти,/ Христа́ моего́ уста́/ и Тро́ицы побо́рницы,/ от Нея несре́дственно осиява́емыя/ и моля́щияся непреста́нно о душа́х на́ших.

Возжже́ная у́глия от Нестерпи́маго Огня́,/ и́же те́ми просвети́вшеся,/ ве́рно да восхва́лим:/ ти́и бо, е́же к Нему́ соедине́нием разже́гшеся,/ свети́льницы ми́ра бы́ша,/ живо́тная ни́щим показа́вшеся си́ла,/ Отца́, и Сы́на, и Свята́го Ду́ха/ благоче́стно я́ве пропове́даша./ И́мже и мы да прирце́м:/ ра́дуйся, Тро́ицы тро́ице Богому́драя.

Глас 6:

Тро́ице Свята́я и покланя́емая,/ сла́ва му́дрому промышлению Твоему́,/ я́ко три вели́кия свети́льники челове́ком от челове́к дарова́ла еси́,/ све́том просвеща́ющии Твоего́ позна́ния/ и заре́ю осиява́ющия спаси́тельных Твои́х и честны́х хоте́ний,/ и́миже вселе́нная, све́том ра́зума обогаща́ющися,/ Твое́ю сла́вою осиява́ема есть/ и к блаже́нному Твоему́ Ца́рствию тщи́тся./ Тех нас Боже́ственных послу́шати увеща́ющи уче́ний,/ и Сама́, Тро́ице Свята́я,/ моли́тв тех, я́же о нас, услы́ши,/ я́ко Бог Всеще́дрый,/ и ду́ши на́ша спаси́, Человеколю́бче.

Сла́ва, глас 6:

Святи́тели Христо́вы и отце́в сла́ву,/ столпы́ ве́ры и ве́рных учи́тели и храни́тели,/ соше́дшеся, о празднолю́бцы,/ пе́сненными похвала́ми воспои́м, глаго́люще:/ ра́дуйся, Церко́вное свети́ло,/ Васи́лие прему́дре, и сто́лпе непревра́тный;/ ра́дуйся, у́ме Небе́сный,/ архиере́ю превелича́йший, Богосло́ве Григо́рие;/ ра́дуйся, о Златосло́ве, всезлаты́й Иоа́нне,/ покая́ния я́сный пропове́дниче./ Но, о отцы́ пребога́тии!/ Не преста́йте при́сно моли́тися Христу́/ о ве́рою и любо́вию соверша́ющих/ ва́ше всесвяще́нное и Боже́ственное торжество́.

И ны́не, Богоро́дичен, глас то́йже:

Де́вственную добро́ту, и у́мное весе́лие,/ еди́ну Богоро́дицу,/ и ве́рных тве́рдую огра́ду,/ соше́дшеся, о празднолю́бцы,/ пе́сненными похвала́ми воспои́м, глаго́люще:/ ра́дуйся, Ма́ти Де́во Чи́стая,/ свети́льниче светоза́рный и дверь Небе́сная;/ ра́дуйся, ски́ние свяще́ния,/ Бо́га вме́щшая во утро́бе Твое́й, Всечи́стая;/ ра́дуйся, всех Небе́сных чино́в превы́шшая без разсужде́ния./ Те́мже, Ма́ти безму́жная, Влады́чице,/ не преста́й храня́щи рабы́ Твоя́,/ ве́рою и любо́вию воспева́ющия Тя при́сно/ и Рождеству́ Твоему́ покланя́ющияся безсе́менному.

На стихо́вне стихи́ры, глас 1.

Подо́бен: Всехва́льнии му́ченицы:

Таи́нники духо́вныя вку́пе,/ слове́сныя трубы́ Бо́жия,/ Боже́ственная зерца́ла/ восхва́лим днесь досто́йно,/ Вели́каго Васи́лия,/ Боже́ственнаго и огнедохнове́ннаго Григо́рия,/ точа́щаго златостру́йная уче́ния нам/ Иоа́нна, и́стинно Златоу́стаго.

Стих: Восхва́лятся преподо́бнии во сла́ве/ и возра́дуются на ло́жах свои́х.

Степе́нь ве́ры,/ ум Боже́ственный и бо́дрый,/ река́ златостру́йная,/ всесветле́йшии и честни́и свети́льницы,/ Тро́ицы побо́рницы,/ прия́телища благода́тей Ду́ха,/ столпи́ непоколе́бленнии,/ Це́ркве утвержде́ния/ досто́йно песньми да восхва́лим.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ду́ха орга́ны,/ гро́ма Боже́ственнаго трубы́,/ мо́лнии пропове́дания,/ све́щницы всесве́тлии,/ злати́и и светоно́снии о Бо́зе,/ треблаже́нне Васи́лие,/ Григо́рие всему́дре,/ всезла́те и всече́стне Иоа́нне,/ честву́ющия вас спасти́ Христа́ моли́те.

Сла́ва, глас 2:

Днесь ду́ши земноро́дных возно́сятся от земны́х,/ днесь Небе́сныя быва́ют в па́мяти святы́х,/ и́бо врата́ Небе́сная взе́млются,/ и нам Влады́чня сказу́ема быва́ют,/ Сло́ва словеса́ пропове́дуют,/ и язы́ки чудеса́ пою́т./ Мы же ко Спа́су возопие́м:/ сла́ва Тебе́, Христе́ Бо́же,/ ве́рным бо мир те́ми бысть.

И ны́не, пра́здника:

Днесь Христо́с во святи́лище прино́сится/ я́ко Младе́нец,/ днесь под зако́ном быва́ет,/ И́же Моисе́ю зако́н да́вый./ А́нгельская удиви́шася во́инства/ на руку́ ста́рческу Держи́му,/ И́же вся́ческая Содержа́щаго зря́ще./ Симео́н гове́ния испо́лнен быв/ и ра́достне вопия́ше:/ ны́не отпусти́ мя, Спа́се, от привре́меннаго живота́/ к нестаре́ющемуся поко́ю:/ ви́дех бо Тя и возвесели́хся.

На благослове́нии хле́бов тропа́рь, глас 4:

Я́ко апо́столов единонра́внии/ и вселе́нныя учи́телие,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость. (Два́жды)

И Богоро́дице Де́во, ра́дуйся: еди́ножды.

НА ПОВЕЧЕ́РИИ

Пое́тся возсле́дование священному́ченика Ипполи́та

Кано́н, глас 4. Иоа́нна мона́ха.

Песнь 1

Ирмо́с: Колесни́цы фарао́новы/ и си́лу его́ вве́рже в мо́ре Кре́пкий во бране́х./ Воспое́м песнь но́вую, я́ко просла́вися.

Гряди́те, му́ченическими воспое́м песньми священному́ченика,/ Богоза́рною зря́ще благода́тию све́тло просия́вша,/ Христа́ сла́вяще всегда́.

Ты за ста́до слове́сное, от Христа́ вруче́нное,/ Сего́ подража́я, в беде́ су́щия изря́дне, о́тче, ду́шу положи́л еси́/ и сугу́бым венце́м украси́лся еси́.

Свяще́нным от повеле́ния Бо́жия ра́дования пома́зався еле́ем му́ченическим, Ипполи́те,/ назна́менался еси́ кровию.

Богоро́дичен: Неопальну Моисе́й в горе́ Сина́йстей купину́ зря́ше,/ Тя прописа́вшую, Де́во,/ заре́ю неопа́льшуся Боже́ственнаго огня́, и́бо Бо́га родила́ еси́.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

А́гнцы слове́сныя упа́сл еси́/ и, я́коже а́гня ове́ц, предпоже́рлся еси́,/ всех Первопа́стыря и Бо́жия А́гнца подража́я.

Млеко́м слове́сным, Ипполи́те, пасо́мыя Богодохнове́нно напои́л еси́,/ Христо́ва же свиде́тельства, ра́дуяся, испи́л еси́ ча́шу.

Собо́ры страда́льцев водя́й,/ за благоче́стие прия́л еси́ муче́ние,/ еди́наго сла́вя Бо́га Отца́ с Сы́ном и Боже́ственным Ду́хом.

Богоро́дичен: Ра́дуйся, Ма́ти Неискусобра́чная,/ я́же Бо́га Сло́ва во утро́бе Твое́й вмести́вшая/ и ро́ждшая Воплоще́ннаго, я́ко Бо́га ку́пно и Челове́ка.

Песнь 4

Ирмо́с: Твоего́ на земли́ явле́ния, Христе́ Бо́же,/ пропове́дая проро́к прише́ствие, с весе́лием вопия́ше:/ сла́ва си́ле Твое́й, Го́споди.

Доброде́телей твои́х я́ко многоплете́нная Боже́ственная плени́ца,/ я́ко па́стырь бо и свиде́тель, Ипполи́те,/ от Бо́га почествова́лся еси́, зело́ о Не́м веселя́ся.

Приноше́ние А́велево превозше́л еси́,/ слове́сныя бо а́гнцы приве́л еси́ Бо́гу,/ и твое́ю кро́вию, ра́дуяся, Влады́це предста́л еси́.

Ерети́чествующих па́ки глаго́льное зломы́слие Ду́хом победи́в, блаже́нне,/ священному́ченик изря́ден любо́вию Влады́ки был еси́.

Богоро́дичен: Я́ко ви́деша А́нгели, Де́во Чи́стая,/ от утро́бы Твоея́ произше́дшаго Сы́на Бо́жия, с весе́лием глаго́лаху:/ сла́ва Рождеству́ Твоему́, Влады́чице.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты му́ченик и́стинен свяще́нником был еси́ и му́чеником святи́тель/ и сугу́быми блиста́еши дарова́ньми, Ипполи́те.

Ка́мение у́бо златоза́рное и ле́потное, Ипполи́те,/ заре́ю же твоего́ священнонача́льства украси́ся твое́ страда́ние.

Ба́сни е́ллинския благоче́стно ты изобличи́л еси́, о изря́дне в му́ченицех!/ и пребеззако́нную лесть евре́ев Боже́ственною благода́тию.

Богоро́дичен: Тя ору́жие непобеди́мое на враги́ предлага́ем,/ Тя, упова́ние и наде́жду на́шего спасе́ния, Богоневе́сто, стяжа́хом.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х исте́кшею кро́вию.

Поже́рл еси́ Спа́су же́ртву хвале́ния в Це́ркви преподо́бных,/ я́ко Бо́гу хода́тай же и челове́ком,/ и усе́рдно ду́шу твою́ приве́л еси́ кро́вию.

Прия́л еси́ дарова́ний мно́жество Ду́хом, священному́чениче, от Бо́га/ во отверзе́нии Боже́ственных усте́н твои́х/ и приво́диши, благода́рно тебе́ умерщвля́я.

Я́ко Боже́ственно страда́льцев Твои́х, Христе́, собра́ние,/ о наде́жди лежа́щих, я́ко настоя́щими уже́ пита́ющеся,/ и сладча́е жи́зни вменя́ющим смерть.

Богоро́дичен: О, чу́до, всех чуде́с нове́йшее!/ Я́ко Де́ва, во утро́бе вся́ческая Содержа́щего неискусому́жно заче́нши, не тесновмести́.

Седа́лен, глас 1.

Подо́бен: Гроб Твой, Спа́се:

Свети́льник присносия́нен яви́лся еси́ ми́ру,/ просвеща́я мо́лниями Боже́ственных твои́х слове́с/ ве́рных помышле́ния, святи́телю Ипполи́те./ Те́мже вси свяще́нную твою́ и Боже́ственную па́мять/ днесь ра́достно соверша́ем и ве́рно почита́ем.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Му́ченическими светлостьми́ и свяще́нническими просвеща́еши, священному́чениче явле́ние,/ вопию́щия Христу́ в па́мяти твое́й:/ препе́тый Го́споди, Бо́же оте́ц на́ших, благослове́н еси́.

Предве́дящаго издале́ча страда́ние свяще́ннейшее, о́тче,/ муче́ния зря, предстоя́ща тебе́, ра́дуяся, взыва́л еси́:/ препе́тый Го́споди, Бо́же оте́ц на́ших, благослове́н еси́.

Ра́ны претерпе́в от разжже́нныя любве́ муче́ния,/ терпели́вно со дерзнове́нием вопия́ше Ипполи́т:/ препе́тый Го́споди, Бо́же оте́ц на́ших, благослове́н еси́.

Богоро́дичен: Безсе́менно во утро́бе и преесте́ственно прие́мшую непреме́ннаго Бо́га,/ за милосе́рдие к челове́ком прише́дша,/ препе́тый Го́споди, Бо́же оте́ц на́ших, благослове́н еси́.

Песнь 8

Ирмо́с: Во о́бразе А́нгела я́влъшагося в пещи́ о́гненней песносло́вцем/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки.

Я́ко мягка́ и тучна́ же́ртва:/ до́брый бо па́стырь, я́ко овча́, приво́дится Христу́, взыва́я:/ свяще́нницы, благослови́те, лю́дие, превозноси́те во вся ве́ки.

Му́ченическим венце́м блиста́я, Це́ркви Твое́й, Христе́, иера́рх возсия́,/ по́йте, о́троцы, ра́дуяся, взыва́я,/ лю́дие, превозноси́те во вся ве́ки.

По преще́ннем отве́те сме́ртнем Христо́в страда́лец,/ ра́дуяся, Ипполи́т вопия́ше:/ о́троцы, Христа́ благослови́те,/ лю́дие, превозноси́те во вся ве́ки.

Богоро́дичен: Неизглаго́ланно и безсе́менно заче́ншую/ и Ро́ждшую ра́дость вселе́нней, Христа́ Бо́га,/ по́йте, о́троцы, свяще́нницы, благослови́те/ и превозноси́те во вся ве́ки.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко плотоно́сец яви́ся на земли́/ и с челове́ки поживе́./ Тя, Богоро́дице, тем вся велича́ем.

Я́ко всесла́вен священному́ченик, сугу́бою уясни́л еси́ заре́ю Христо́ву Це́рковь/ и весели́ши сердца́ тя пою́щих./ Те́мже тя вси досто́йно блажи́м.

Исто́чник источи́в уче́ний, всеблаже́нне, Христо́ве Це́ркви,/ из му́ченических крове́й пото́ки ре́чно Бо́гу прино́сиши,/ те́мже тя вси блажи́м, Ипполи́те.

Научи́л еси́ Еди́ному, Богоглаго́ливе, Бо́гу покланя́тися в Тро́ице,/ Зижди́телю всех ви́димых же тва́рей и неви́димых,/ му́ченическим же украси́лся еси́ венце́м.

Богоро́дичен: Блиста́яй Тебе́ А́нгел предста́/ и луча́ми де́вства Твоего́ вельми́ просвети́ся,/ себе́ сама́го я́ко сво́йственныя забы́ сла́вы,/ е́же ра́дуйся, со стра́хом Тебе́ веща́ше.

Стихи́ры, глас 1.

Подо́бен: Небе́сных чино́в:

Свяще́нства благода́ть, о́тче, прие́м,/ Боже́ственными уче́нии просвети́л еси́ вся,/ Ипполи́те Богому́дре,/ и свяще́нными списа́ньми истолкова́л еси́/ проро́ков Боже́ственная словеса́,/ уясня́я нам я́же отту́ду быва́ющая.

Испове́дания Боже́ственным венце́м украша́емь,/ ка́плями твои́х крове́й/ свяще́нства оде́жду украси́л еси́,/ весь све́тел и красе́н предста́л еси́ Царю́ и Влады́це и Творцу́,/ всеблаже́нне Ипполи́те.

Я́ко дерзнове́ние, всеблаже́нне,/ ко Спа́су Христу́ ны́не стяжа́в,/ вся, ве́рно тя чту́щия, спаса́й/ от бед, и напа́стей, и лю́тых обстоя́ний,/ и от страсте́й, и паде́ний, и нужд/ благоприя́тными моли́твами твои́ми.

Сла́ва, и ны́не, Богоро́дичен:

Жезло́м Твоего́ заступле́ния, Богоро́дице Чи́стая,/ зве́рския стра́сти окая́нныя души́ моея́ отжени́,/ отсю́ду ми́рно к жи́зни мя наставля́ющи,/ и свято́му мя ста́ду избра́нных Твои́х ове́ц сопричти́.

НА У́ТРЕНИ

На Бог Госпо́дь: тропа́рь святы́х, два́жды. Сла́ва, и ны́не, Богоро́дичен.

По 1-й кафи́зме седа́лен, глас 5.

Подо́бен: Собезнача́льное:

Я́ко ца́рское украше́ние Це́ркве, Васи́лия вси восхва́лим,/ догма́тов сокро́вище неоскуде́емо,/ си́ми бо сам наказа́ нас Тро́ицу чествова́ти Святу́ю,/ соедине́ну у́бо Существо́м, разделе́ну же Ипоста́сьми.

Сла́ва, глас 4.

Подо́бен: Ско́ро предвари́:

Свети́льницы пресве́тлии Це́ркве Христо́вы,/ мир просвети́сте уче́ньми ва́шими, отцы́ Богому́дрии,/ изсуши́вше е́реси всех злосла́вных/ и угаси́вше пламенови́дная ху́льных смуще́ния./ Те́мже, я́ко святи́телие Христо́вы, моли́теся спасти́ся нам.

И ны́не, Богоро́дичен:

Де́во Всепе́тая, Ма́ти Христа́ Бо́га,/ Мари́е Богоневе́сто и Неискусобра́чная,/ ве́рных предста́тельство,/ изба́ви от вся́кия беды́ и вся́кия ну́жды, Влады́чице Богоро́дице,/ ве́рою и любо́вию покро́ву Твоему́ прибега́ющия,/ Еди́на Богоневе́стная.

По 2-й кафи́зме седа́лен, глас 3,

Подо́бен: Боже́ственныя ве́ры:

Столп был еси́ Це́ркве,/ бога́тство некра́домое благоче́стия яви́лся еси́, Богосло́ве Григо́рие,/ в безстра́стии осия́л еси́ житие́ твое́/ и Тро́йческия изъясни́л еси́ догма́ты./ О́тче преподо́бне, Христа́ Бо́га моли́ о спасе́нии душ на́ших.

Сла́ва, глас 4.

Подо́бен: Удиви́ся Ио́сиф:

Во цве́тнице писа́ний, я́коже пче́лы му́дрыя, прилета́юще,/ вы объя́сте до́бре, и от цвето́в изря́днейшая,/ и ме́д всем ве́рным уче́ний ва́ших предста́висте вку́пе во всенаслажде́ние их,/ и сего́ ра́ди всяк наслажда́яйся с весе́лием зове́т:/ предста́ните па́ки и по сме́рти и́же вас восхваля́ющим, блаже́ннии.

И ны́не, Богоро́дичен:

Треволне́нии страсте́й безсо́вестный аз обурева́емь, Пречи́стая,/ призыва́ю Тя те́пле, да не пре́зриши мя, окая́ннаго, поги́бнути,/ бе́здну ми́лости ро́ждшая:/ ра́зве бо Тебе́, ины́я наде́жды не и́мам./ Да не у́бо враго́м обра́дование и смех,/ наде́явся на Тя, явлю́ся,/ и́бо мо́жеши, ели́ка и хо́щеши, я́ко Ма́ти су́щи всех Бо́га.

По полиеле́и седа́лен, глас 4.

Подо́бен: Яви́лся еси́:

Прему́дрии учи́телие вселе́нныя,/ и́же Бо́га просла́вльшии де́лы и словесы́ на земли́,/ да возвели́чатся днесь, я́ко спасе́ния нам су́ще хода́таи.

Сла́ва:

Пра́зднует днесь Це́рковь честно́е торжество́ учи́телей трие́х,/ и́бо ти́и утверди́ша Це́рковь Боже́ственными свои́ми догма́ты.

И ны́не, Богоро́дичен:

Предста́тельнице необори́мая оскорбля́емых/ и те́плое заступле́ние упова́ющих на Тя,/ от бед мя изба́ви:/ Ты бо еси́ всех помо́щница.

Та́же степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Уста́ моя́ возглаго́лют прему́дрость, и поуче́ние се́рдца моего́ ра́зум. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Излия́ся благода́ть во устна́х ва́ших,/ преподо́бнии отцы́,/ и бы́сте па́стырие Христо́вы Це́ркве,/ уча́ще слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

Кано́н Богоро́дицы со ирмосо́м на 6, глас 2, и святы́х два кано́на на 8. Иоа́нна Евхаи́та.

Песнь 1

Ирмо́с: Гряди́те, лю́дие, пои́м песнь Христу́ Бо́гу,/ разде́льшему мо́ре и наста́вльшему лю́ди, я́же изведе́ из рабо́ты еги́петския,/ я́ко просла́вися.

Благоче́стно Тя, Чи́стую Богоро́дицу, и́стинно испове́дающаго, Пречи́стая, душе́ю и те́лом,/ от лю́тых бед, и неду́гов, и прегреше́ний Ты мя спаси́.

Всю в Тебе́ дарова́ний бе́здну лежа́щу уве́дехом,/ те́мже, прибега́юще, Богоро́дице, усе́рдно к покро́ву Твоему́ Боже́ственному, спаса́емся.

О нас, Тя пою́щих, Пречи́стая, моли́ Воплоще́ннаго из пречи́стых и честны́х Твои́х крове́й,/ изба́вится от прегреше́ний и боле́зней го́рьких.

Ин кано́н святы́х, его́же краегране́сие: Трисо́лнечнаго Све́та три возвыша́ю со́лнца. Творе́ние того́же Иоа́нна.

Песнь 1. Глас и ирмо́с то́йже.

Ко́е благодаре́ние, ко́е противовоздая́ние, подоба́ющее на́шим, челове́цы, принесе́тся от нас благоде́телем,/ и́миже ко е́же до́бре бы́ти наставля́емся?

Вити́йстии язы́цы, и хи́трости, и кова́рства, и вся слове́с си́ла/ ны́не в вину́ да сподви́гнутся еди́ну/ и, честву́юще взаи́м, да почту́т.

Сво́йственнаго у́бо им не терпя́ху,/ дабы́ что стяжа́ти на земли́, Небому́дреннии,/ храни́телие же яви́шася о́бщества и предста́телие,/ о́бщих у́бо и похва́л да сподо́бятся.

Богоро́дичен: Тя, о́бщее любоче́стие, Всенепоро́чная, на́шего естества́, вси сла́вим,/ уста́ еди́ны бы́вше и еди́но согла́сие соверши́вше.

Други́й кано́н святы́х. Творе́ние того́жде, глас 8.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Не челове́ческого тща́ния исправле́ние сие́ начина́ние,/ но Твоему́ престо́лу приседя́щая, Человеколю́бче, Прему́дрость да споспешеству́ет ми,/ сло́ва благода́ть даю́щи,/ е́юже просла́вити возмогу́, и́хже сама́ до́бре предпросла́ви.

Я́коже ча́ша, преисполня́ется, Влады́ко, благода́ть Твоя́,/ и мно́гое бога́тство человеколю́бия Твоего́ излия́ется/ и потече́, я́коже и и́ны А́нгелы в соста́ве пло́ти показа́ти,/ ны́не предлежа́щия в похвалу́.

С Небесе́ Небе́сным подоба́ше бы́ти и похвала́м,/ А́нгельское пе́ние, Боже́ственным прили́чное:/ бо́зи бо прича́стием, и́же естество́м и Еди́наго и́стиннаго Бо́га иму́ще в себе́,/ живу́ща и веща́юща.

Богоро́дичен: Па́мять преподо́бных Богому́дрое сосло́вие с похвала́ми соверша́ет,/ с ни́миже и Бо́жия Ма́терь, я́ко тех глава́,/ в ле́поту спрославля́ется, коне́чный, и пе́рвый, и сре́дний чин содержа́щи/ и благохвале́ния причаща́ющися.

Катава́сия: Су́шу глубороди́тельную зе́млю:

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Моли́твами Твои́ми, Чи́стая,/ Бо́га, Его́же родила́ еси́, пода́ждь благопреме́нна Твои́м рабо́м,/ притека́ющим к покро́ву Твоему́/ и ве́рно покланя́ющимся Твоему́ Рождеству́.

Всю мою́ жизнь окорми́, Де́во,/ упова́ние мое́ и Предста́тельнице,/ искуше́ний и обстоя́ний избавля́ющи лю́тых мя, Присноде́во.

Прему́дрость Бо́жию Ипоста́сную на объя́тиих я́ко поне́сши, Богоро́дице,/ от неве́дения и заблужде́ния изба́вится пою́щим Тя моли́.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Труба́ вели́кая Це́ркве, свети́льник, просвеща́яй вселе́нную,/ пропове́дник, веща́нием объе́мляй вся концы́,/ великоимени́тый Васи́лий сподвиза́ет собра́ние сие́.

Све́тел от жития́ и веще́й,/ све́тел от слове́с и уче́ний,/ во всех пресиява́я па́че всех, я́коже друго́е па́че звезд со́лнце,/ многопе́тый Богосло́в днесь блажи́тся.

Се свет ми́ра ми́ру све́тит,/ се земли́ соль зе́млю услажда́ет,/ се дре́во жи́зни безсме́ртия плоды́ предлага́ет, Златоу́стый святы́й./ И́же умре́ти не хотя́щии, прииди́те, наслажда́йтеся.

Богоро́дичен: Вся от небытия́ в бытие́ Сотвори́вый/ и естество́ Да́вый коему́ждо бы́вших,/ То́йже и да́нная естества́ прелага́ти весть, я́коже хо́щет,/ Отону́дуже и слы́шимо есть, я́ко и Де́ва ро́ждши,/ кто не удиви́тся?

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

И́же нра́вов испра́вителие и душ строи́телие, спаси́телие о́бщии всех,/ и́же и дея́ний нам и слове́с о́бразы показа́вше,/ наказа́телие жития́ све́тлии, све́тле да восхва́лятся.

Дух Бо́жий испо́лни Васи́лия худо́жества;/ о́гненных же имя́ше язы́ков еди́н Григо́рий/ и огне́м высокоре́чия дхне;/ Христо́ва же уста́ во Иоа́нне глаголаху.

Ны́нешняго ве́ка му́дрость бу́йство про́поведи я́ве упражня́емую и́мать,/ повину́ющуюся ему́ и ра́бски служа́щую:/ пропове́дники бо благода́ть му́дрыя предлага́ет ри́торы.

Богоро́дичен: Во утро́бе Чи́стыя Де́вы Всели́выйся/ ду́ши Богоно́сных святы́х жили́ще твори́т/ и о́ных устна́ми е́же о Ма́тери сказу́ет та́инство.

Катава́сия: Утвержде́ние на Тя наде́ющихся:

Седа́лен, глас 8.

Подо́бен: Прему́дрости:

Вели́кия свети́льники светоза́рныя,/ Це́ркве столпы́ неразори́мыя согла́сно да восхва́лим,/ и́же до́брых наслажда́ющиися/ и слове́с тех, ку́пно и благода́ти:/ прему́драго Златоглаго́лива и Вели́каго Васи́лия/ с Григо́рием све́тлым Богосло́вом./ К ни́мже и возопии́м, от се́рдца зову́ще:/ святи́телие тревелича́йшии, моли́теся Христу́ Бо́гу/ прегреше́ний оставле́ние дарова́ти пра́зднующим любо́вию святу́ю па́мять ва́шу.

Сла́ва:

Прему́дрость прие́мше от Бо́га, я́ко апо́столи ини́и трие́ Христо́вы,/ сло́вом ра́зума составля́ете догма́ты,/ я́же пре́жде словесы́ просты́ми низлага́ху, ры́барие в ра́зуме си́лою Ду́ха,/ подоба́ше бо та́ко про́стей на́шей ве́ре составле́ние стяжа́ти./ Отню́дуже вси вопие́м вам:/ моли́теся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять ва́шу.

И ны́не, Богоро́дичен:

Ду́шу мою́, Де́во, смире́нную,/ бу́рею жития́ искуше́ний ны́не я́ко кроме́ управле́ния бы́вшую,/ потопля́емую волна́ми, грехо́в бре́менем я́вльшуся преиспо́лнену/ и во дно а́дово приити́ бе́дствующу,/ предвари́, Богоро́дице, моли́тв Твои́х ми́лостию,/ тишину́ подаю́щи и бед изыма́ющи./ Приста́нище бо Ты еси́ небу́рное,/ моля́щися Сы́ну Твоему́ и Бо́гу/ прегреше́ний оставле́ние дарова́ти ми:/ Тя бо и́мам наде́жду, недосто́йный раб Твой.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Язв мои́х душе́вных, Влады́чице, и плотски́х неду́гов,/ Бо́га ро́ждшая, разреше́ние пода́ждь ми.

От обстоя́ния изба́ви мя, Ма́ти Бо́жия,/ и бу́ри, и бед Твои́ми моли́твами, Еди́на Всепе́тая.

Обурева́ема волна́ми жите́йскими исхи́ти, Де́во,/ ко Твоему́ приста́нищу наставля́ющи мя.

Ин

Ирмо́с: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Разу́мливы от ни́жния му́дрости бы́вше,/ правле́ние, пресла́внии, от Боже́ственныя стяжа́ете,/ те́мже, я́ко рабы́ню, сию́ о́ной всему́дре покори́сте.

Любому́дрии, му́дрыя а́ще лю́бите, умудри́теся/ и глаго́лати научи́теся вси, и́же словесе́м чудя́щиися,/ дея́ния опа́сству и виде́ния отту́ду обуча́ющеся.

Богоро́дичен: Я́ко по́зден дождь, напоследи́ бы́вый, у́тренний,/ вод и веко́в Соде́тель, во чре́во Твое́ ука́нув, Всенепоро́чная,/ во вре́мя прохлажда́яй оскудева́ющия.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Столп о́гнен, лю́дем ве́рным предваря́ющий и опаля́ющий враги́ ве́ры,/ племена́ же спаса́яй, изве́стно после́дующия,/ Вели́кий яви́ся Васи́лий,/ да дерза́ет и побежда́ет Христо́ва Це́рковь,/ толи́ким обогати́вшися побо́рником.

Язы́ка сла́дость и слу́ха вся́каго услажде́ние,/ твое́ сло́во бысть, Григо́рие,/ ма́нна жи́зни, роса́ сла́дкости, мед, и́же из ка́мене,/ А́нгельский хлеб Небе́сный, несы́тно насыща́тися услажде́ния его́ увещева́я/ и исполня́яй сла́дости причаща́ющияся.

Река́ дарова́ний духо́вных напо́лнися да́же и до разли́тия,/ и до́брое лице́ земли́, я́ко сла́достный пото́к,/ от златы́х напая́ет уст, веселя́щи и утучня́ющи Христо́в вся́кий град/ Боже́ственных волн струя́ми.

Богоро́дичен: Естество́, про́сто стерпе́вшее сложе́нию/ и я́вльшееся вы́шше сли́тия в Твое́м, Влады́чице, Сы́не,/ трие́ Богоно́снии учи́телие испове́даша, от двою́ во́лю и сугу́баго де́йства,/ сугу́ба по естеству́ пропове́давше.

Катава́сия: Покры́ла есть Небеса́:

Песнь 5

Ирмо́с: Све́та Пода́телю/ и веко́в Тво́рче, Го́споди,/во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Ору́жие непобеди́мое на разли́чная искуше́ния вра́жия иму́ще,/ вся́каго вражде́бных озлобле́ния избавля́емся при́сно,/ и́же Тя, Богоро́дицу Чи́стую, веду́щии.

Зако́на исполне́ние, я́же вы́шшая Херуви́мов,/ родила́ еси́ Бо́жия из Тебе́ воплоще́нна Сы́на Единоро́дна,/ Его́же о рабе́х Твои́х умоли́.

Вся́ческих Творца́ на руку́ Твое́ю поне́сши,/ Сего́ нам Твои́ми моли́твами благопреме́нна дава́й,/ ны́не от се́рдца к Тебе́ прибега́ющим.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра, просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Ты исто́чник Твои́х дарова́ний испи́ти весьма́, Человеколю́бче, дал еси́ святы́м,/ умале́н ника́коже истоща́нием, мир же весь упои́в/ и́же от чре́ва их Боже́ственными пото́ки.

Что́ ми зла́то?/ Что́ ми бога́тство, и сла́ва, и могу́тство?/ Ды́мове, расходя́щиися по возду́ху:/ вся да изче́знут, вся да прено́сит ветр./ Мне бога́тство еди́но многорачи́тельно – учи́телей тро́ица вити́йствующая.

То́чит река́ нетле́нную пи́щу и Боже́ственное питие́,/ то́чит а́лчущим безсме́ртное бра́шно и жа́ждущим нетле́нное питие́,/ вода́ жива́ во ве́ки и содержа́щая жи́вы пию́щия:/ вси многотеку́щия жи́зни насы́титеся.

Богоро́дичен: Имя́ше кре́пость на ны зло́ба, но не в коне́ц:/ изнемо́же бо по Де́ве, в кре́пости Си́льнаго ро́ждшей,/ подъе́мшаго плотску́ю не́мощь и си́льнаго в зло́бе умертви́вша.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

И́же Боже́ственных веще́й и челове́ческих му́дрыя хитрецы́,/ и́же су́щих естества́ любои́стинне я́ве нам извести́вший/ и Зижди́теля тех всем сказа́вший я́ко ле́по,/ благода́рными гла́сы восхва́лим.

Го́рькое и те́рпкое я́же ко спасе́нию лече́б/ услади́ша му́дрыми слове́с уче́ньми же, и хитростьми́, и благода́тьми,/ душ Боже́ственнии лечи́телие:/ наслажда́йтеся, вси благочести́вии, и, красу́еми, спаса́йтеся.

Молчи́т вся́ко сло́во, Богопропове́дником глаго́лющим Боже́ственная,/ и удержава́ет над Ве́тхим заве́том Но́вый,/ предлага́ющий честны́я скрижа́ли, и́же в нем законополага́ющих,/ к ни́мже причита́ется все ве́рных сосло́вие.

Богоро́дичен: Безсме́ртное естество́ сме́ртное претече́ во святы́ню,/ и Де́ва Отрокови́ца безпло́тныя А́нгелы превзы́де,/ я́ко Бо́га ро́ждшая, Царя́ А́нгельскаго,/ на Него́же зре́ти о́нем невозмо́жно.

Катава́сия: Я́ко ви́де Иса́ия:

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Спасе́ния приста́нище ве́дый тя, пла́вая многопеча́льнаго жития́ пучи́ну,/ призыва́ю Тя, Влады́чице,/ Ко́рмчая души́ мое́й бу́ди.

Чи́стаго жития́ отпадо́х ле́ностьми, окая́нный,/ но возведи́, Благослове́нная Всечи́стая,/ повеле́нием Сы́на Твоего́ сочета́вши.

Ми́лости Твое́й, Богоро́дице, сподо́би мя,/ преми́лостиваго Сло́ва поро́ждшая,/ И́же Свое́ю кро́вию от тли челове́ки изба́вльшаго.

Ин

Ирмо́с: Бе́здна мя мно́га грехо́вная окружа́ет,/ и вопию́ Ти, проро́ка подража́яй:/ от тли мя, Го́споди, возведи́.

Сво́йства в Тро́ице три сбогосло́вите:/ нерожде́ние Отца́, Сло́ва же рожде́ние/ и Ду́ха исхожде́ние Сама́го.

Днесь до́му сему́ светоявле́нное спасе́ние:/ два бо и три собра́нныя Христо́с, во И́мя Свое́ почеству́яй,/ посреде́ прису́тствует сих.

Неиспы́танна земна́я глубина́ к Небе́сной высоте́,/ но от земли́ святы́я вознесе́ вы́шше небе́с Небе́сное жела́ние.

Богоро́дичен: Нов Тя исто́чник, Де́во,/ и вину́ та́ин иму́ще, трие́ Богоглаго́льницы/ но́выми предложе́ньми новоле́пное прили́чествуют нарече́ние.

Ин

Ирмо́с: Очи́сти мя, Спа́се, мно́га бо беззако́ния моя́,/ и из глубины́ зол возведи́, молю́ся:/к Тебе́ бо возопи́х, и услы́ши мя,/ Бо́же спасе́ния моего́.

Тро́ицу еди́нственную богосло́вити научи́хомся,/ Еди́ницу Тро́ичную пе́ти прия́хом,/ покланя́тися навыко́хом от отце́в Еди́ному Естеству́ Триипоста́сному.

Сло́во бе в нача́ле, ко Отцу́ Собезнача́льное,/ и Дух Бо́жий Бог бе Пребезнача́льный,/ про́сто, единосу́щно, соесте́ственно Божество́,/ я́ко Боже́ственнии глаго́лют пропове́дницы.

Совокупля́ю, и разделя́ю, я́же совокупле́ние разделя́емая,/ Еди́но Неразде́льно помышля́ю и Три мню:/ учи́тели прие́млю три Богоно́сныя, та́ко увещева́ющия мя ве́ровати.

Богоро́дичен: Безма́терний пре́жде пло́ти,/ безо́тчий же по воплоще́нии,/ Сын О́тчий и Ма́терний, и́же сия́ нарица́яй па́че ума́ обоя́:/ Бо́гу бо подоба́ют чуде́с пресла́вная.

Катава́сия: Возопи́ к Тебе́:

Конда́к, глас 2.

Подо́бен: Тве́рдыя:

Свяще́нныя и Боговеща́нныя пропове́дники,/ верх учи́телей, Го́споди,/ прия́л еси́ в наслажде́ние благи́х Твои́х и упокое́ние:/ труды́ бо о́нех и смерть прия́л еси́ па́че вся́каго всепло́дия,/ Еди́не, прославля́яй святыя Твоя́.

И́кос:

Кто́ дово́лен своя́ устне́ разве́рста/ и подви́гнута язы́к к ды́шущим огне́м си́лою Сло́ва и Ду́ха?/ Оба́че толи́ко рещи́ дерзну́:/ я́ко все преидо́ша челове́ческое естество́ си́и трие́ мно́гими и вели́кими дарова́ньми,/ дея́нием же и виде́нием, по обоему́ све́тлы превозше́дше./ Те́мже зело́ вели́ких даро́в ты́я сподо́бил еси́,/ я́ко ве́рныя Твоя́ служи́тели,/ Еди́не, прославля́яй святы́я Твоя́.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

На Кресте́ пригво́жден, И́же из Тебе́ Воплоти́выйся, Богороди́тельнице,/ Ада́мово раздра́ рукописа́ние./ Его́же ны́не моли́, Всенепоро́чная,/ всех бед изба́вится ве́рою зову́щим:/ благослове́н еси́, Бо́же оте́ц на́ших.

Наде́жда блага́я, Засту́пница же ве́рных еси́, Влады́чице,/ и ны́не мо́лимся Тебе́, дарова́ти сострада́тельства пучи́ну всем,/ на Тя упова́ющим и Сы́ну Твоему́ зову́щим:/ благослове́н еси́, Бо́же оте́ц на́ших.

Кра́сною оде́ждею спаси́тельных за́поведей, креще́нием оде́явся,/ оскверни́х ле́ностию, окая́нный,/ ны́не же Ти притека́ю, Де́во,/ оде́ждею прося́ весе́лия Тобо́ю па́ки облещи́ся.

Ин

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Побежда́ется, блаже́ннии, и отбега́ет я́же пре́жде непостоя́нная де́рзость ересе́й:/ воск же, раста́яваемый от лица́ огня́,/ любоде́ичное вся́кое уче́ние показу́ется,/ ва́шим приража́ющееся огнедохнове́нным веща́нием.

Лжи́вых у́бо уклони́шася е́ллинских буесло́вий,/ увеще́ние же томи́тельство, е́же в челове́цех, еди́но избра́ша,/ под ни́мже и́стину си́и трие́ утверди́вше,/ си́це весь сонм ве́рных побежда́ют словесы́ и увещева́ют.

Богоро́дичен: В Тебе́ вся́ко прорече́ние воспочи́/ и коне́ц прия́ше удивля́ющее глаго́лющия:/ из Тебе́ же светле́е и прорече́ний чудеса́ то́чат, Чи́стая,/ му́дрыя явля́юща сказа́тели.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Молча́щии и зову́щии, ви́димии же и слы́шимии,/ доброде́тели и му́дрости, Богоглаго́ливии, столпы́ бы́ша,/ де́лом и сло́вом вопи́ти повелева́юще:/ благослове́н Бог оте́ц на́ших.

Бо́жия гла́сы, свы́ше возгреме́вшия нам пречу́дно,/ мо́лнии же лучи́, и́же ва́ша веща́ния прие́млюще, всему́дрии,/ ку́пно у́бо пое́м с ва́ми:/ благослове́н Бог оте́ц на́ших.

Испуще́ни бу́дут гра́ди от каменопра́щных язы́ков,/ сокруша́ющии гнила́я уче́ний,/ а́ще кто посреде́ де́рзнет суесло́вников, пра́вая не веща́я:/ благослове́н Бог оте́ц на́ших.

Богоро́дичен: В Тя, Де́во, всели́ся и по рождестве́ Де́ву оста́ви/ И́же устроя́яй стихи́и и претворя́яй естества́,/ я́коже хо́щет, Богороди́тельнице Мари́е./ К Нему́же вопие́м с Тобо́ю, Всенепоро́чная:/ благослове́н Бог оте́ц на́ших.

Катава́сия: Тебе́ во огни́:

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Столп кре́пости тве́рд, и степе́нь, и Храни́тельницу, и Предста́тельницу/ стяжа́вше Тя ве́рою, спаса́емся ны́не./ Пое́м Рождество́ Твое́, Пречи́стая, и превозно́сим во вся ве́ки.

Безсме́ртия проза́рный ве́мы Тя исто́чник, Богоро́дице,/ я́ко ро́ждшую Сло́во безсме́ртнаго Отца́,/ Е́же вся от сме́рти избавля́ющее, превознося́щая Его́ во ве́ки.

Струю́ исцеле́ний нам всегда́, ве́рным, то́чиши,/ ея́же незави́стную благода́ть взе́млюще, ны́не воспева́ем Рождество́ Твое́, Пречи́стая,/ и превозно́сим во вся ве́ки.

Ин, ирмо́с то́йже.

Разумева́ем благоче́стно и прославля́ем единоче́стно Еди́но Естество́,/ безмерномо́щную Еди́ницу же и Тро́ицу,/ вся сия́ словесы́ пра́вящую лу́чшими./ Та́ко бо сла́вити трие Богоно́снии преда́ша,/ с ни́ми́же покланя́емся Ей во ве́ки.

Соедини́шася трие́ Богопропове́дницы, соедини́вши Тро́ицу/ и Неразде́льное во всех соблю́дшии, Боже́ственным естество́м:/ еди́ну от Тоя́ восприя́ша неразде́льную сла́ву,/ в похвале́ние еди́но созыва́ющую превознося́щии Ю во ве́ки.

Богоро́дичен: Прие́м, е́же по нам, возда́в же Свое́ Благоде́тель,/ соде́я то́кмо, не пострада́ же, Де́во:/ твори́т бо, но не в тле́ние устроя́ет,/ па́че же и стражда́ во́лею, стра́стию стра́сти реши́т,/ я́коже трие́ отцы́ нас тайноуча́т.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Я́же Бог соедини́ в единоче́стнем едине́нии,/ похвали́тель да не разлуча́ет челове́к,/ но ра́вны негоду́я в те́хже дарова́ниях,/ ра́вных и пе́ний песнопоя́й да сподо́бит:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Си́льнии и непобори́мии Божества́ спобо́рницы/ и и́стины нелжи́вии споспе́шницы,/ глубины́ Ду́ха до́бре испыта́вше,/ Боголе́пная о Бо́зе разуме́ния отту́ду составля́ют и уча́т пе́ти:/ лю́дие, превозноси́те Христа́ во вся ве́ки.

С Небесе́ у́бо велича́йшая два свети́ла просвеща́ют/ по прее́мству друг дру́га подсо́лнечную;/ от земли́ же светле́е всю вселе́нную озаря́ют три по тому́жде превели́кая свети́ла,/ светя́ще с друг дру́гом и пою́ще ку́пно:/ лю́дие, превозноси́те Христа́ во ве́ки.

Богоро́дичен: Нас ра́ди воплоще́ние и стра́сти честны́я,/ нас ра́ди Бог с ме́ртвыми бысть,/ сме́рти у́бо невку́сен, я́ко страсте́й свобо́ден,/ к пло́ти же сме́ртней обще́нием глаго́лемый,/ и стра́сти причасти́ся, и сме́рти,/ с не́юже превозно́сим Христа́ во ве́ки.

Катава́сия: Нестерпи́мому Огню́:

На 9-й пе́сни Честне́йшую: не пое́м, но пое́м припе́в:

Велича́й, душе́ моя́,/ Честне́йшую Небе́сных во́инств,/ Де́ву Пречи́стую Богоро́дицу.

Та́же ирмо́с. Посе́м то́йже припе́в пое́м и к про́чим Богоро́дичным тропаре́м.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно песньми велича́ем.

Богоблаже́нная Отрокови́це, наде́жду мою́ всю усе́рдно возлага́ю на Тя:/ спаси́ мя, Ма́ти и́стииныя Жи́зни,/ и сла́дости присносу́щныя насы́тится моли́, Чи́стая,/ ве́рою и любо́вию Тя песньми велича́юща.

Я́вльшися, Де́во, дверь Боже́ственнаго Све́та,/ души́ моея́ мрак Све́та Твоего́ невеще́ственными блиста́нии озари́/ и ве́чнаго огня́ изба́вится мне умоли́, Чи́стая,/ ве́рою и любо́вию Тя песньми велича́ющему.

Во чре́во Твое́ всели́ся,/ Его́же из чре́ва пре́жде веко́в Оте́ц роди́ Сы́на,/ соверше́н бысть Челове́к,/ и исто́чник дарова́ний Тя, Богома́ти,/ показа́ нам,/ ве́рно поклоня́ющимся несказа́нному Твоему́ Рождеству́.

Ин

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

К кано́ном же святы́х на ки́йждо тропа́рь пое́м припе́вы сии́:

Велича́й, душе́ моя́,/ во иера́рсех свети́ла три вели́кая.

Се ва́ше де́лание и па́ства,/ за ю́же велича́йшия боле́зни претерпе́сте, во еди́но соше́дшеся,/ ку́пно же три вы соприе́мше,/ о́бщую и́мать похвалу́ ва́ше сладча́йшее соедине́ние.

Велича́й, душе́ моя́,/ трисия́тельныя Христо́вы Це́ркве.

Не обоюдоо́стрый меч благода́ть,/ но трео́стрый на ра́тников тоя́ предлага́ет:/ еди́н небокова́нен меч, треми́ крепостьми́ изощре́н,/ при́сно побо́рствуяй по Трисия́нном Еди́ном Божестве́.

Велича́й, душе́ моя́,/ просвеща́ющия Христо́ву Це́рковь.

Ва́ше жи́тельство на Небесе́х бя́ше, пресла́внии,/ и плоть нося́щих во ве́ки нескве́рну,/ в ни́хже всесоверше́нне ны́не живу́ще,/ су́щим на земли́ нам пребыва́ющим/ Вы́шняя моли́те и мы́слити, и де́яти.

Велича́й, душе́ моя́,/ Честне́йшую Небе́сных вои́нств,/ Де́ву Пречи́стую Богоро́дицу.

Богоро́дичен: Тесни́т мя широта́ Твои́х вели́чий, Влады́чице,/ подавля́ющи сло́во от ча́стости,/ и пресла́вно ми случа́ется е́же недоумева́тися от благомо́щества,/ те́мже толи́ко Тя Возвели́чившаго сла́вим.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Велича́й, душе́ моя́,/ Пресвяты́я Тро́ицы три па́стыри.

Возвы́сися Тро́ичная доброде́тель и вся́ческая сла́вы испо́лни,/ ину́ю лучу́ нам возсия́вши трисве́тлу, я́ко свое́ осия́ние, Небе́сныя тайноводи́тели,/ и́миже на Боже́ственное о́ныя виде́ние, благоче́ствующе, наставля́емся.

Велича́й, душе́ моя́,/ от Трисо́лнечнаго Свети́ла три вели́кая.

Не есть вто́рство в трие́х сих,/ старе́йшинства бо ки́йждо их но́сит,/ пе́рвый не сый, и единочестны́я превышша́я:/ присвоя́ют же па́че друг дру́га побе́ду прера́достно,/ не вмеща́ется бо зде за́висти де́рзость, растлева́ющия единомы́слие.

Велича́й, душе́ моя́,/ Триипоста́снаго и Неразде́льнаго Божества́ держа́ву.

Отце́в благоче́стие, своя́ перворо́дныя сы́ны показа́вшее,/ ча́да возражда́ет све́ту при́сная/ и непоро́чная те́ми, соверша́емая Ду́хом,/ жизнь глаго́лавшим в них,/ и цел соблюда́ти испроша́ет до конца́ мир,/ его́же от них насле́дствова.

Велича́й, душе́ моя́,/ Честне́йшую Небе́сных вои́нств,/ Де́ву Пречи́стую Богоро́дицу.

Сы́на Бо́га жива́го му́дрых учи́телей верх пропове́да,/ Твоего́ Сы́на, от открове́ния О́тча,/ не от пло́ти и кро́ве сие́ тайноуве́дав, Ма́ти Бо́жия./ Те́мже Тя и Де́ву просла́вив,/ Ма́терь и Богоро́дицу возвели́чи.

Катава́сия: В зако́не се́ни и писа́ний:

Свети́лен.

Подо́бен: Све́те неизме́нный:

Три светоза́рныя свети́льники, па́че со́лнечных луч/ от Светонача́льныя Тро́ицы и Трисо́лнечныя Еди́ницы,/ преесте́ственно сме́шены,/ Богоно́сныя восхва́лим отцы́.

Сла́ва:

Подо́бен: Не́бо звезда́ми:

Све́та прия́телища, светолу́чныя мо́лнии,/ Васи́лия ны́не Вели́каго, Григо́рия Богосло́ва, Златоу́стаго Иоа́нна,/ да восхва́лим вси.

И ны́не:

Еди́нственное Божество́, О́тче, Сы́не и Ду́ше,/ мольба́ми Васи́лия, Григо́рия и Иоа́нна и Пречи́стыя Богоро́дицы/ да не отлучу́ся Твоея́ сла́вы.

На хвали́тех стихи́ры, Глас 5. Ни́ла Ксанфопу́ла.

Подо́бен: Ра́дуйся:

Ра́дуйся, святи́телей тро́ица,/ Це́ркве вели́кая забра́ла,/ столпи́ благоче́стия, ве́рных утвержде́ние,/ ерети́чествующих низпаде́ние,/ Христо́вы упа́сшии лю́ди Боже́ственными уче́нии/ и разли́чными доброде́тельми воспита́вшии,/ благода́ти я́снии пропове́дницы,/ зако́ны произложи́вшии Христо́ву исполне́нию,/ вожди́ к Вы́шним, ра́йстии вхо́ды,/ Христа́ умоли́те/ низпосла́ти душа́м на́шим ве́лию ми́лость.

Ра́дуйся, святи́телей тро́ица,/ небоше́ственнии земни́и А́нгели,/ ми́ра спасе́ние, челове́ков ра́дость/ и вселе́нныя учи́телие,/ Сло́ва побо́рницы,/ вра́чеве прему́дрии неду́гов душе́вных и теле́сных,/ приснотеку́щия ре́ки духо́вныя,/ словесы́ напая́ющии земно́е все лице́,/ Богосло́внии степе́ни, златосло́ви Боже́ственнии,/ Христа́ умоли́те/ низпосла́ти душа́м на́шим ве́лию ми́лость.

Ра́дуйся, святи́телей тро́ица,/ земны́я тве́рди со́лнца,/ лучи́ и свети́ла от Трисо́лнечнаго озаре́ния,/ помраче́нных прозре́ние,/ цве́ти благово́ннии рая́ красне́йшии,/ Богосло́ве, му́дрый же Васи́лие, Златоу́сте,/ дщи́цы Ду́ха, скрижа́ли Богоначерта́нныя,/ сосцы́, источа́ющии спасе́ния млеко́,/ му́дрости украше́ние,/ Христа́ умоли́те/ душа́м на́шим дарова́ти ве́лию ми́лость.

Сла́ва, глас 5:

Востру́бим трубо́ю пе́сней,/ да ликовству́им пра́зднственная и взыгра́ем, ра́дующеся,/ в пречестно́е торжество́ учи́телей на́ших./ Святи́телие и лю́дие да стеку́тся и воспле́щут в пе́снех,/ я́ко уче́ний источи́вшия ре́ки превели́кия три,/ доброто́чныя присноживо́тныя Ду́ха/ па́стырие и учи́телие,/ Пречестны́я Тро́ицы трегу́быя священнотаи́нники,/ соше́дшеся, да восхва́лим./ Филосо́фи – му́дрыя, иере́и – па́стыри,/ гре́шницы – предста́тели, ни́щии – обогати́тели,/ су́щия в ско́рбех – утеши́тели,/ пу́тницы – спутеше́ственники,/ и́же в мо́ри – ко́рмчии/ и вси, и́же везде́ те́пле предваря́ющия,/ боже́ственныя архиера́рхи похваля́юще, та́ко рцем:/ пресвяти́и учи́телие,/ потщи́теся изъя́ти ве́рныя от жите́йских собла́знов/ и изба́вити ве́чных мук моли́твами ва́шими.

И ны́не, Богоро́дичен. Ге́рмана Патриа́рха:

Востру́бим трубо́ю пе́сней,/ прекло́ншися бо свы́ше, Всецари́ца Ма́ти Де́ва/ благослове́ньми венчава́ет воспева́ющия Ю./ Ве́рнии лю́дие да стеку́тся/ и Цари́цу да воспле́щут в пе́снех,/ Царя́ ро́ждшую,/ сме́ртию одержи́мыя пе́рвее разреши́ти человеколю́бно благоизво́лившаго./ Па́стырие и учи́телие,/ до́браго Па́стыря Пречи́стую Ма́терь, соше́дшеся, да восхва́лим,/ све́щник златоза́рный, светоно́сный о́блак,/ Небе́с простра́ннейшу,/ одушевле́нный же киво́т, огнезра́чный Влады́чень престо́л,/ манноприе́мную злату́ю ста́мну,/ заключе́нную Сло́ва дверь,/ всех христиа́н прибе́жище,/ песньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо невозмо́жно хода́тайству Твоему́.

Славосло́вие вели́кое и отпу́ст.

НА ЛИТУРГИ́И:

Блаже́нны от кано́на 1-го песнь 3-я и от кано́на друга́го песнь 6-я. Проки́мен, глас 8: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол ко Евре́ем, зача́ло 334. Аллилу́йя, глас 4: Испове́дят Небеса́ чудеса́ Твоя́, Го́споди: Ева́нгелие от Матфе́я, зача́ло 11: Вы есте́ свет ми́ра: Прича́стен: Ра́дуйтеся, пра́веднии:

Подоба́ет ве́дати, а́ще случи́тся трие́х святи́телей, Васи́лия Вели́каго, Григо́рия Богосло́ва и Иоа́нна Златоу́стаго, в неде́лю мытаре́ву, или́ блу́днаго, или́ мясопу́стную:

На ма́лой вече́рни стихи́ры воскре́сны 4. Сла́ва, святи́телей. И ны́не, Богоро́дичен гла́са, ма́лыя вече́рни. На стихо́вне стихи́ра воскре́сна еди́на и святи́телей стихо́вна вели́кия вече́рни со стихи́ свои́ми. Сла́ва, святи́телей. И ны́не, Богоро́дичен в то́йже глас. По Ны́не отпуща́еши: и по О́тче наш: тропа́рь воскре́сен. Сла́ва, святы́х. И ны́не, Богоро́дичен. Ектени́я ма́лая и отпу́ст.

ЗРИ На вели́цей вече́рни: По кафи́зме, на Го́споди, воззва́х: стихи́ры воскре́сны 3, и Трио́ди 3, и святы́х 4. Аще ли неде́ля мясопу́стная: Стихи́ры воскре́сны 3, и Трио́ди 4, и святы́х 3. Сла́ва, Трио́ди. И ны́не, Богоро́дичен 1-й, гла́са. На литии́ стихи́ра хра́ма, та́же Трио́ди хвали́тныя. Сла́ва, святы́х. И ны́не, Трио́ди. На стихо́вне стихи́ры воскре́сны. Сла́ва, святы́х. И ны́не, Трио́ди. На благослове́нии хле́бов тропа́рь, Богоро́дице Де́во: два́жды, и святы́х, еди́ножды, и чте́ние.

На у́трени: На Бог Госпо́дь: тропа́рь воскре́сен два́жды. Сла́ва, святы́х. И ны́не, Богоро́дичен 1-й, в то́йже глас. По кафи́змах седа́льны воскре́сны, с Богоро́дичны их, и чте́ние во Ева́нгелии толково́м, и полиеле́й святы́х.

ЗРИ А́ще ли неде́ля блу́днаго или́ мясопу́стная: Прилага́ем и тре́тий псало́м: На ре́ках Вавило́нских: Та́же седа́льны святы́х о́ба, по еди́ножды, без Богоро́дичное. Сла́ва, седа́лен полиеле́йный. И ны́не, Богоро́дичен и чте́ние святы́х. Степе́нна и проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во: и про́чая. Кано́н воскре́сен со ирмосо́м на 4, и Богоро́дицы на два, и Трио́ди на 4, и святы́х на 4. Катава́сия: Су́шу глубороди́тельную зе́млю:

А́ще ли неде́ля мясопу́стная: Кано́н воскре́сен на 4, и Трио́ди на 6, и святы́х на 4. Катава́сия Трио́ди. По 3-й пе́сни конда́к святы́х, и и́кос, и седа́лен их. И ны́не, Трио́ди и чте́ние. По 6-й пе́сни конда́к Трио́ди, и и́кос, и чтем про́лог. На 9-й пе́сни пое́м Честне́йшую: Свети́лен воскре́сен. Сла́ва, святы́х. И ны́не, Трио́ди. На хвали́тех стихи́ры воскре́сны 4 и святы́х со Сла́вным 4, с припе́вы их.

ЗРИ А́ще ли неде́ля мясопу́стная: Тогда́ по стихи́рах святи́телей глаго́лем стих: Воскресни́, Го́споди Бо́же мой: и пое́м стихи́ру самогла́сну Трио́ди. Сла́ва, ту́южде. И ны́не, Преблагослове́нна еси́:

ЗРИ А́ще ли несть неде́ля мясопу́стная: Тогда́ в Трио́ди стиха́ не глаго́лем. Но по стихи́рах святы́х, Сла́ва, Трио́ди. И ны́не, Преблагослове́нна еси́, Богоро́дице: Славосло́вие вели́кое. По трисвято́м тропа́рь воскре́сен то́чию, и ектении́, и отпу́ст. И исхожде́ние обы́чное в притво́р. Сла́ва, и ны́не, стихи́ра Ева́нгельская, и час 1-й. На часе́х тропа́рь воскресе́н. Сла́ва, святы́х. И ны́не, Богоро́дичен часо́в. По О́тче наш: конда́ки, воскре́сен и Трио́ди и святы́х, пременя́юще, глаго́лем.

На Литурги́и: Блаже́нны гла́са на 4, и Трио́ди песнь 3-я на 4, и святы́х 6-я на 4. По вхо́де тропа́рь воскре́сен и святы́х. Та́же, конда́к воскре́сен. Сла́ва, святы́х. И ны́не, Трио́ди. Проки́мен, Апо́стол, аллилу́йя, Ева́нгелие и прича́стен дне и святы́х.

А́ще ли случи́тся трие́х святи́телей в суббо́ту мясопу́стную и пое́м слу́жбу их в пято́к, пре́жде, во все́м непреме́нно.

ЗРИ А́ще ли случи́тся триех святи́телей в понеде́льник, или́ во вто́рник, или́ в четверто́к сы́рныя неде́ли:

В неде́лю ве́чера пое́м Блаже́н муж: 1-й антифо́н (в про́чия же дни сы́рныя се́дмицы глаго́лем кафи́зму рядову́ю). На Го́споди, воззва́х: стихи́ры святы́х на 6, Сла́ва, святы́х. И ны́не, Богоро́дичен 1-й по гла́су самогла́сна святы́х. Вход, проки́мен дне, и чте́ние святы́х, и ектении́. На стихо́вне Трио́ди самогла́сен дне, два́жды, и му́ченичен, припе́вы же глаго́лем обы́чныя: К Тебе́ возведо́х: Сла́ва, святы́х. И ны́не, Богоро́дичен воскре́сен. По Ны́не отпуща́еши: и по трисвято́м, тропа́рь святы́х. Сла́ва, и ны́не, Богоро́дичен и отпу́ст. На повече́рии по Досто́йно: и по трисвято́м, конда́к святы́х.

ЗРИ А́ще же па́мять сих триех святи́телей случи́тся в четверто́к сы́рныя неде́ли, тогда́ в сре́ду на часе́х по Осла́би, оста́ви: и по покло́нех быва́ет звон во вся, по обы́чаю. И а́бие глаго́лем: Прииди́те, поклони́мся: три́жды, и псало́м обы́чный, и ектени́я, и стихи́ры, по предпи́санному. По вхо́де проки́мен паремии́ дне и паремия́ Трио́ди, и по ней проки́мен: Да упова́ет Изра́иль на Го́спода: Та́же паремии́ святы́х. Пото́м Сподбо́и, Го́споди: На стихо́вне Трио́ди самогла́сен дне, два́жды, и му́ченичен. Сла́ва, святы́х: И ны́не, Богоро́дичен. По Ны́не отпуща́еши: по О́тче наш: тропа́рь святы́х, и ектения́, и три вели́кия покло́ны. Та́же, Всесвята́я Тро́ице: и Бу́ди И́мя Госпо́дне: три́жды, и псало́м 33. Досто́йно есть: И отпу́ст. И вхо́дим в трапе́зу, и разреша́ем на сыр и я́ица.

На у́трени: На Бог Госпо́дь: тропа́рь святы́х, два́жды. Сла́ва, и ны́не, Богоро́дичен. По 1-й кафи́зме седа́лен Трио́ди, два́жды, пи́сан по 2-й кафи́зме. Сла́ва, и ны́не, Богоро́дичен его́ и чте́ние дне. По 2-й кафи́зме седа́льны святы́х о́ба, по еди́ножды. Сла́ва, и ны́не, Богоро́дичен втора́го седа́льна. Пе́рваго же седа́льна Богоро́дичен оставля́ется, и чте́ние дне. Та́же полиеле́й святы́х: и седа́льны их, и Богоро́дичен, и чте́ние. Посем степе́нна, 1-й антифо́н, 4-го гла́са. Проки́мен, Ева́нгелие и стихи́ра святы́х. Кано́н Богоро́дице со ирмосо́м на 6, ирмосы́, по два́жды, и святы́х два кано́на на 8. Катава́сия: Су́шу глубороди́тельную зе́млю: о́ба ли́ка вку́пе. А иде́же трипе́сно, пое́м кано́ны святы́х со ирмосо́м на 6 и трипе́сно на 8. Катава́сия Трио́ди. По 3-й пе́сни седа́льны святы́х, и Богоро́дичен их, и чте́ние святы́х. По 6-й пе́сни конда́к и и́кос святы́х, и чтем про́лог. По 9-й пе́сни свети́лен святы́х, два́жды: Сла́ва, и ны́не, Богоро́дичен. На хвали́тех стихи́ры святы́х на 4, и Сла́ва, и ны́не. Та́же псало́мщик глаго́лет: Сла́ва Тебе́, показа́вшему нам свет. И Сла́ва в Вы́шних Бо́гу: Посе́м ектения́: Испо́лним у́треннюю моли́тву на́шу: И пое́м на стихо́вне Трио́ди самогла́сен дне, два́жды, и му́ченичен. Припе́вы же глаго́лем обы́чныя: Исполнихомся зау́тра ми́лости Твоея́, Го́споди: Сла́ва, святы́х, глас 6: Святи́тели Христо́вы: И ны́не, Богоро́дичен: Де́вственную добро́ту: пи́саны на литии́. Та́же, Бла́го есть: и Трисвято́е. По О́тче наш: тропа́рь святы́х. Сла́ва, и ны́не, Богоро́дичен воскре́сен. Посем ектения́: Поми́луй нас, Бо́же: и возгла́с. Та́же иере́й глаго́лет: Сый благослове́н: кли́рицы же: ами́нь. Утверди́, Бо́же: и час 1-й.

На часе́х тропа́рь и конда́к святы́х.

На Литурги́и: Блаже́нны от кано́нов, 1-го песнь 3-я со ирмосо́м на 4, и друга́го песнь 6-я, на 4. По вхо́де тропари́ хра́ма Христо́ва, или́ Богоро́дицы, и святы́х. Та́же конда́к хра́ма Христо́ва. Сла́ва, святы́х. И ны́не, хра́ма Богоро́дицы, или́ Предста́тельство христиа́н: Проки́мен, Апо́стол, аллилу́ия, Ева́нгелие и прича́стен дне и святы́х.

А́ще ли случи́тся трие́х святи́телей в сре́ду или́ в пято́к сы́рныя неде́ли: Пое́м слу́жбу всю, ве́чер и у́тро, во вто́рник или́ в четверто́к тоя́же сы́рныя седми́цы.

Моли́тва

О пресве́тлии свети́льницы Це́ркве Христо́вы, Васи́лие, Григо́рие и Иоа́нне, све́том правосла́вных догма́тов вся концы́ земли́ озари́вшии и ме́чем сло́ва Бо́жия ху́льных смуще́ния и шата́ния ересе́й угаси́вшия! Припа́дающе к ва́шему милосе́рдию с ве́рою и любо́вию из глубины́ души́ вопие́м: предстоя́ще престо́лу Пресвяты́я, Единосу́щныя, Животворя́щия и Неразде́льныя Тро́ицы, за Ню́же сло́вом, писа́нием и житие́м до́бре подвиза́стеся и ду́ши своя́ полага́сте, всегда́ моли́теся Ей, да укрепи́т и ны в правосла́вии и единомы́слии, и непоколеби́мем да́же до сме́рти испове́дании ве́ры Христо́вы, и во вседуше́внем послуша́нии Его́ Це́ркви Святе́й; да препоя́шет ны с высоты́ си́лою на вся неви́димыя и ви́димыя враги́ на́ша; да соблюде́т Це́рковь Свою́ незы́блему от неве́рия, суеве́рия, ересе́й и раско́ла; да да́рует наро́ду на́шему долгоде́нствие и во все́м благо́е поспеше́ние; па́стырем на́шим да пода́ст духо́вное трезве́ние и ре́вность о спасе́нии пасо́мых, власте́м суд и пра́вду, во́ином терпе́ние, му́жество и одоле́ние на враги́, си́рым и вдови́цам заступле́ние, боля́щим исцеле́ние, ю́ным благо́е в ве́ре возраста́ние, ста́рцам утеше́ние, оби́димым заступле́ние и всем вся, ко вре́менней и ве́чней жи́зни потре́бная, я́ко да в ми́ре и покая́нии, жела́нием спасе́ния горя́ще, Го́сподеви рабо́тающе, до́брым по́двигом подвиза́ющеся, тече́ние на́ше сконча́ем и сподо́бимся в Небе́снем Ца́рствии ку́пно с ва́ми всегда́ пе́ти и сла́вити пресвято́е и великоле́пое И́мя Отца́ и Сы́на и Свята́го Ду́ха во ве́ки веко́в. Ами́нь.

В Константинополе долго происходили споры о том, кому из трех святителей следует отдавать предпочтение. Одна часть людей превозносила святителя Василия (†1 января 379), другая стояла за святителя Григория Богослова (†25 января 389), третья почитала святителя Иоанна Златоуста (†14 сентября 407).

Из-за этого среди христиан произошли церковные раздоры: одни называли себя василианами, другие – григорианами, третьи – иоаннитами.

По воле Божией, в 1084 году митрополиту Евхаитскому Иоанну явились три святителя и, объяснив, что они равны пред Богом, повелели прекратить споры и установить общий день празднования их памяти: «Объяви, чтобы христиане оставили спор. Мы как во время жизни старались о единодушии, так и по преставлении своем всего более желаем единомыслия...» Сведения о святителе Василии Великом смотри 1 января, о святителе Григории Богослове 25 января, о святителе Иоанне Златоустом 27 января.

Пострадали за веру Христову в 269 году в Риме при императоре Клавдии П. Первым из них был взят по доносу об исповедании христианства советник в Римском сенате Кенсорин. В суде он не стал отрекаться от веры в Христа, которую ранее исповедовал тайно, и его бросили в темницу. Там, по молитве святого Кенсорина, Господь вернул жизнь одному умиравшему узнику. Двадцать стражников, свидетелей этого чуда, потрясенные до глубины души, уверовали и исповедали Христа Спасителя. Они были обезглавлены вместе с мучеником Кенсорином.

Страшные муки приняла за веру молодая христианка Хрисия, которую пытали по тайному доносу. Палачи подвесили девушку, били ее воловьими жилами и опаляли ребра пламенем свеч. Наконец, измученную, бросили ее в темницу. Спустя несколько дней святую Хрисию вывели оттуда, разбили камнем челюсти и тяжелым молотком раздробили плечевой пояс, после чего утопили в море, с привязанным к шее тяжелым грузом.

Блаженный Савин также подвергся избиению молотом; затем его повесили на дереве, подпаливая изуродованное тело пламенем свеч. Святой Савин преставился ко Господу во время пыток, сохранив твердое исповедание веры Христовой.

Узнав об этих преступлениях, святитель Ипполит, епископ Остии, Римской пристани при устье Тибра, пришел к наместнику Клавдия Ульпию Римлянину и, называя его кровопийцем, обличил в жестокости и бесчеловечности. Святитель Ипполит мужественно заступился за пострадавших христиан, открыто исповедуя свою веру в Господа Иисуса Христа. По распоряжению наместника, слуги схватили святого Ипполита, били его по глазам и, подвергнув другим издевательствам и мукам, бросили связанного в море. Так священномученик Ипполит разделил участь тех, кого он хотел спасти, не пожалев своей жизни. Святой Ипполит, ученик святого Иринея, епископа Лионского, был выдающимся христианским богословом, автором многих полемических сочинений против различных ересей – ноэтианской, феодотианской, монтанистской, маркионитской и других. Из его сочинений известны также Канон пасхальный, знаменитое сочинение о Христе и Слово об антихристе. Полностью дошли до нас также две его проповеди, замечательные образцы искусства гомилетики: Слово на Богоявление и Слово о пророке Данииле. Многочисленные толкования священномученика Ипполита на Священное Писание сохранились во фрагментах.

Мощи священномученика Ипполита находятся ныне в Риме, в церкви во имя священномученика Лаврентия и святителя Дамаса, Папы Римского

Тропа́рь, глас 4:

Преподо́бне о́тче Зино́не,/ преподо́бне и че́стне житие́ твое́ на земли́ препроводи́вый/ и тем Бо́гови по премно́гу благоугоди́вый,/ моли́ о нас,/ чту́щих па́мять твою́.

Конда́к, глас 8:

Восхваля́яся днесь, преподо́бне Зино́не,/ я́ко преподо́бен во сла́ве,/ и ра́дуяся дави́дски на ло́жи свое́м во Ца́рствии Небе́снем,/ не премолчи́ о нас мольбу́ принести́ ко Го́споду.

Постник и трудолюбец, подвизался в Дальних пещерах Киево-Печерского монастыря в XIV веке. В 3-й песни Канона преподобным в Дальних пещерах он прославляется как «сияющий постом». Память его празднуется также 28 августа и во 2-ю Неделю Великого поста. В «Сказании о житиях святых, в пещере преподобного Феодосия почивающих», говорится: «Преподобный Зинон, постник и трудолюбец, многими добродетельными иноческаго жития подвиги, постом, молитвами, смирением, послушанием благоугоди Богови». Афанасий Кальнофойский писал о преподобном Зиноне: «Почил после трудов своих благословенный инок Зинон; в теле целом лежит». Мощи святого Зинона открыто почивают в Дальних (Феодосиевых) пещерах.