Наколькі вялікае мноства добрасці ў Цябе, Госпадзі, якую Ты захаваў для тых, хто баіцца Цябе, падрыхтаваў для тых, хто спадзяецца на Цябе перад сынамі чалавечымі!

Ты захаваеш іх пад покрывам аблічча Твайго ад абурэння чалавечага, дасі ім сховішча ад ліхіх языкоў.

Благаславёны Гасподзь, што дзівосна явіў міласць Сваю, захаваўшы мяне быццам ва ўмацаваным горадзе.

Я ж сказаў ва ўзрушэнні маім: “Адкінуты я прэч ад вачэй Тваіх”; таму Ты пачуў голас малітвы маёй, калі я паклікаў Цябе.

Узлюбíце Госпада, усе праведнікі Яго, бо ісціны патрабуе Гасподзь, а ганарліўцаў карае грозна.

Будзьце мужныя, і няхай мацуецца сэрца ваша — усе, хто спадзяецца на Госпада!

Псалом Давіда, для настаўлення. Блажэнныя тыя, чые беззаконні адпу́шчаны і чые грахі праба́чаны;

блажэнны чалавек, якому Гасподзь не залічыць граху і ў вуснах якога няма падману.

Калі я маўчаў, аслаблі косці мае, бо я стагнаў увесь дзень;

бо дзень і ноч нада мною цяжа́р рукі Тваёй; я цярпеў пакуты, калі ўпілíся ў мяне церні.

Беззаконне маё я ўсвядоміў і граху майго я не ўтаіў, сказаў я: "Прызна́ю беззаконне маё перад Госпадам "; і Ты прабачыў грэх сэрца майго.

Таму будзе маліцца Табе кожны праведнік у час належны, і тады ў час разліву воды многія да яго не наблізяцца.

Ты — маё сховішча ад скрухі, якая ахапіла мяне; радасць мая, збаў мяне ад тых, што акружылі мяне.

"Настаўлю цябе на розум і скірую цябе на шлях той, па якім ты пойдзеш; звярну да цябе вочы Мае".

Не будзьце, як конь і мул, у якіх няма розуму, якіх прыцягваюць аброццю і цуглямі ў сківіцах, калі яны не ідуць за табой.

Многія кары будуць грэшнаму; а таго, хто спадзяецца на Госпада, міласць акру́жыць.

Весяліцеся ў Госпадзе і радуйцеся, праведныя; і хваліцеся Ім ўсе шчырыя сэрцам.

Давідаў. Не раўняйся на тых, хто робіць зло, і не зайздросці тым, хто чы́ніць беззаконне,

бо яны, як трава, хутка засохнуць, і, як зялёная расліна, хутка прападу́ць.

Спадзявайся на Госпада і рабі дабро, і жыві на зямлі і будзеш ускормлены багаццем яе.

Суцяшайся Госпадам, і Ён дасць табе тое, што просіць сэрца тваё.

Адкрый перад Госпадам шлях твой і спадзявайся на Яго, і здзе́йсніць Ён:

і зробіць яўнай, як святло, праўду тваю, і лёс твой — як поўдзень.

Скарыся перад Госпадам і малі Яго; і не зайздросці таму, хто паспяховы на шляху сваім, чалавеку, які чы́ніць беззаконне.

Спыні гнеў, і адкінь ярасць, і не імкніся рабіць зло,

бо тыя, хто робіць зло, будуць знішчаны, а тыя, хто цвёрда трымаецца Госпада, унасле́дуюць зямлю.

Яшчэ трохі, і не стане грэшніка; і будзеш шукаць месца, дзе ён быў, і не знойдзеш.

А лагодныя ўнасле́дуюць зямлю і ўсцешацца мірам вялікім.

Назірае грэшнік за праведным і скрыгоча на яго зубамі сваімі;

Гасподзь жа пасмяецца з яго, таму што прадбачыць, што прыйдзе дзень яго.

Меч дасталі грэшнікі, нацягнулі лук свой, каб нізры́нуць беднага і ўбогага, каб закалоць тых, у каго праведнае сэрца;

меч іх няхай увойдзе ў сэрцы іх, і лукі іх няхай зламаюцца.

Лепш нямногае ў праведніка, чым вялікае багацце грэшнікаў,

таму што рукі грэшных будуць злама́ны, а праведных умацоўвае Гасподзь.

Ведае Гасподзь шляхі беззаганных, і здабытак іх застане́цца навечна;

не будуць яны пасаромлены ў час ліхі і ў дні голаду насыцяцца.

Бо грэшнікі загінуць, і ворагі Гасподнія ў час праслаўлення і ўзвышэння іх прападуць, як дым, знікнуць.

Бярэ пазыку грэшнік і не вярта́е, а праведны шчодра дае;

бо хто благаслаўляе Яго, тыя ўнасле́дуюць зямлю, а хто праклінае Яго, будуць вы́нішчаны.

Госпадам крокі чалавека накіроўваюцца, і Ён вельмі спрыяе шля́ху яго;

калі упадзе ён, то не разаб’ецца, бо Гасподзь падтрымлівае за руку́ яго.

Я быў малады і вось састарыўся, але не бачыў праведніка пакінутым, і нашчадкаў яго, якія просяць хлеба;

штодзень міласць праяўляе і ў пазыку дае праведнік, і нашчадкам яго благаславенне будзе.

Ухіляйся ад зла і рабі дабро — і жыць будзеш вечна,

бо Гасподзь любіць правасуддзе і не пакіне праведных Сваіх, навекі яны ахаваны будуць; а беззаконныя будуць вы́гнаны, і нашчадкі бязбожных знішчаны будуць.

Праведныя ж унаследуюць зямлю і будуць жыць на ёй вечна.

Вусны праведніка будуць навуча́цца мудрасці, і язык яго будзе абвяшчаць праведны суд.

Закон Бога ў сэрцы яго; і не спатыкнуцца ногі яго.

Падсцерага́е грэшнік праведніка і шукае, як забіць яго,

але Гасподзь не аддасць яго ў рукі таго, і не асу́дзіць яго, калі будзе судзíць яго.

Спадзявайся на Госпада і трымайся шля́ху Яго, і Ён узвы́сіць цябе, каб ты ўнаследаваў зямлю; і знішчэнне грэшнікаў ты ўбачыш.

Бачыў я бязбожніка, які выхваляўся і ўзвышаў сябе, нібы кедры ліванскія;

і прайшоў я міма, і вось, не стала яго, і я шукаў яго і не знайшоў месца, дзе ён быў.

Захоўвай нявіннасць і трымайся праведнасці, бо ёсць будучыня ў чалавека мірнага;

а беззаконныя ўсе знішчаны будуць; астанкі бязбожных будуць знішчаны.

Спасенне ж праведнікам — ад Госпада, і Ён — абарона ім у час бяды;

і дапаможа ім Гасподзь, і ўратуе іх, і збавіць іх ад грэшнікаў, і захавае іх, бо яны спадзяваліся на Яго.

Псалом Асафа. Бог багоў Гасподзь прамовіў і заклíкаў зямлю ад усходу сонца да захаду.

З Сіёна заззяла хараство Яго.

Бог ная́ве прыйдзе, Бог наш, і не будзе маўчаць; агонь перад Ім загарыцца, і вакол Яго — бура вялікая.

Ён заклíча неба з вышыні і зямлю і будзе судзíць народ Свой.

Збярыце Яму праведных Яго, якія прынялí запавет Яго пра ахвяры.

І абве́сцяць нябёсы праўду Яго, таму што Бог — Суддзя.

Слухай, народ Мой, і буду Я гаварыць табе, Ізраіль, і засведчу табе: Я Бог, твой Бог.

Не за ахвяры твае буду Я дакараць цябе, усеспаленні твае перада Мною заўжды;

не прыму ад дому твайго цяльцоў і са статкаў тваіх казлоў.

Бо Мае ўсе звяры лясныя, скаціна ў гарах і валы́,

Я ведаю ўсіх птушак нябесных, і хараство палёў — перада Мною.

Калі б Я галодны быў, то не сказаў бы табе, бо Мне належыць сусвет і ўсё, што напаўняе яго.

Хіба ем Я мяса быкоў ці п’ю кроў казлоў?

Прынясі Богу ахвяру хвалы́ і выканай перад Усявышнім абяцанні твае;

і пакліч Мяне ў дзень смутку твайго, і Я збаўлю цябе, і ты праславіш Мяне.

А грэшніку сказаў Бог: “Нашто абвяшчаеш ты пра ўстанаўленні Мае і гаворыш пра запавет Мой вуснамі сваімі?

Ты ж узненавідзеў настаўленне і адкінуў словы Мае прэч.

Калі бачыў ты злодзея, то ішоў разам з ім, і з пралюбадзеем ты быў супольнікам.

Вусны твае памнажалі зло, і язык твой сплятаў падманы;

ты сядзеў і на брата свайго ўзводзіў паклёп, на сына маці тваёй наводзіў спакусу.

Ты зрабіў гэта, а Я прамаўчаў; і ты падумаў беззаконнае, нібы́та Я буду падобны табе; але Я вы́крыю цябе і вы́яўлю перад абліччам тваім грахі твае.

Зразумейце ж гэта вы, хто забывае Бога, каб Ён не забраў у вас жыццё, і тады не будзе каму вызваліць вас.

Ахвяра хвалы́ праславіць Мяне, і гэта шлях, праз які Я адкрыю яму спасенне Маё”.

У канец, для настаўлення, Давідаў, 2. калі прыйшоў Даíк Ідуме́янін, і абвясціў Саулу, і сказаў яму: “Давід прыйшоў у дом Авімеле́ха”.

Чаго хвалішся злом, дужы? Беззаконнае робіш увесь дзень;

няпраўду выдумляў язык твой; як брытва навостраная стала каварства тваё.

Ты ўзлюбіў зло больш за дабро, няпраўду — больш, чым гаварыць праўду;

ты ўзлюбіў усякія словы пагібельныя, язык каварны.

За гэта Бог знішчыць цябе да канца, вырве цябе і пераселіць цябе з жытла твайго і корань твой — з зямлі жывых.

Убачаць праведнікі і ўстраша́цца, і з яго пасмяюцца і скажуць:

“Вось чалавек, які не палічыў Бога памочнікам сваім, а спадзяваўся на мноства багацця свайго і закаснеў у марнасці сваёй”.

Я ж, як маслíна пладавітая ў доме Божым; спадзяюся на міласць Божую вавек і на векі вякоў.

Буду славіць Цябе вавек за тое, што Ты здзейсніў, і буду спадзявацца на імя Тваё, бо яно — дабро для праведнікаў Тваіх.