Аднаго прасіў я ў Госпада, і гэтага буду шукаць: каб жыць мне ў доме Гасподнім ва ўсе дні жыцця майго, бачыць хараство Гасподняе і наведваць святы храм Яго.

Бо Ён схаваў мяне ў скініі Сваёй у дзень бедстваў маіх; захаваў мяне ў тайнай скініі Сваёй, на скалу ўзнёс мяне.

І цяпер, як толькі ўзняў Ён галаву маю над ворагамі маімі, я абыйшоў ахвярнік і прынёс у скініі Яго ахвяру хвалы і славаслоўя; буду спяваць і апяваць Госпада.

Пачуй, Госпадзі, голас мой, якім клічу я; памілуй мяне і пачуй мяне.

Табе сказала сэрца маё: "Госпада шукаю"; Цябе шукала аблічча маё, аблічча Твайго, Госпадзі, я буду шукаць.

Не адвярні аблічча Твайго ад мяне, не адхіліся ў гневе ад раба Твайго; будзь мне памочнікам, не праганяй мяне і не пакінь мяне, Божа, Спасіцель мой!

Таму што бацька мой і маці мая пакінулі мяне, а Гасподзь прыня́ў мяне.

Навучы мяне закону, Госпадзі, на шляху Тваім і вядзі мяне сцяжынаю прамою наперакор ворагам маім.

Не аддай мяне ў рукі ганіцеляў маіх; бо паўсталі на мяне сведкі няправедныя, і салга́ла няпраўда сама сабе.

Веру, што ўбачу я даброты Гасподнія на зямлі жывых.

Спадзявайся на Госпада, будзь мужным, і няхай умацуецца сэрца тваё; і спадзявайся на Госпада.

Давідаў. Радуйцеся, праведныя, у Госпадзе; праведнікам належыць усхваля́ць Яго.

Праслаўляйце Госпада на гуслях, на псалтыры дзесяціструнным спявайце Яму.

Спявайце Яму песню новую; добра спявайце Яму, з ускліканнем.

Бо праўдзівае слова Госпада, і ўсе справы Яго справядлівыя.

Любіць міласціну і суд Гасподзь; міласцю Гасподняю напоўнена зямля.

Словам Гасподнім нябёсы ўмацаваны, і духам вуснаў Яго — уся сіла іх.

Ён збірае, нібы ў мех, воды марскія; змяшчае бездані ў сховах.

Няхай баіцца Госпада ўся зямля; няхай трымцяць перад Ім усе, хто жыве на свеце,

бо Ён сказаў — і здзейснілася, Ён загадаў — і стварылася.

Гасподзь разбурае задумы народаў; руйнуе намеры людзей; знішчае задумы правіцеляў;

а воля Госпада навек застаецца; намеры сэрца Яго — з роду ў род.

Блажэнны народ, для якога Гасподзь — гэта Бог яго, той народ, які Ён выбраў у спадчыну Сабе.

З неба паглядзеў Гасподзь, убачыў усіх сыноў чалавечых;

з усталяванай абіцелі Сваёй паглядзеў на ўсіх, што жывуць на зямлі,

Той, Хто стварыў сэрца кожнага з іх, Хто ўнікае ва ўсе справы іх.

Не ўратуецца цар шматлікім войскам; і волат не ўратуецца вялікаю сілаю сваёю.

Ненадзейны конь для выратавання, вялікаю сілаю сваёю не ўратуе ён.

Вось, вочы Гасподнія на тых, хто баіцца Яго, хто спадзяецца на міласць Яго,

каб збавіць ад смерці ду́шы іх і пракарміць іх у час голаду.

Душа наша чакае Госпада, бо Ён — памочнік і абаронца наш;

бо Ім радуецца сэрца наша і на імя святое Яго мы спадзяёмся.

Няхай будзе міласць Твая, Госпадзі, на нас, бо мы спадзяёмся на Цябе

Давідаў. Не раўняйся на тых, хто робіць зло, і не зайздросці тым, хто чы́ніць беззаконне,

бо яны, як трава, хутка засохнуць, і, як зялёная расліна, хутка прападу́ць.

Спадзявайся на Госпада і рабі дабро, і жыві на зямлі і будзеш ускормлены багаццем яе.

Суцяшайся Госпадам, і Ён дасць табе тое, што просіць сэрца тваё.

Адкрый перад Госпадам шлях твой і спадзявайся на Яго, і здзе́йсніць Ён:

і зробіць яўнай, як святло, праўду тваю, і лёс твой — як поўдзень.

Скарыся перад Госпадам і малі Яго; і не зайздросці таму, хто паспяховы на шляху сваім, чалавеку, які чы́ніць беззаконне.

Спыні гнеў, і адкінь ярасць, і не імкніся рабіць зло,

бо тыя, хто робіць зло, будуць знішчаны, а тыя, хто цвёрда трымаецца Госпада, унасле́дуюць зямлю.

Яшчэ трохі, і не стане грэшніка; і будзеш шукаць месца, дзе ён быў, і не знойдзеш.

А лагодныя ўнасле́дуюць зямлю і ўсцешацца мірам вялікім.

Назірае грэшнік за праведным і скрыгоча на яго зубамі сваімі;

Гасподзь жа пасмяецца з яго, таму што прадбачыць, што прыйдзе дзень яго.

Меч дасталі грэшнікі, нацягнулі лук свой, каб нізры́нуць беднага і ўбогага, каб закалоць тых, у каго праведнае сэрца;

меч іх няхай увойдзе ў сэрцы іх, і лукі іх няхай зламаюцца.

Лепш нямногае ў праведніка, чым вялікае багацце грэшнікаў,

таму што рукі грэшных будуць злама́ны, а праведных умацоўвае Гасподзь.

Ведае Гасподзь шляхі беззаганных, і здабытак іх застане́цца навечна;

не будуць яны пасаромлены ў час ліхі і ў дні голаду насыцяцца.

Бо грэшнікі загінуць, і ворагі Гасподнія ў час праслаўлення і ўзвышэння іх прападуць, як дым, знікнуць.

Бярэ пазыку грэшнік і не вярта́е, а праведны шчодра дае;

бо хто благаслаўляе Яго, тыя ўнасле́дуюць зямлю, а хто праклінае Яго, будуць вы́нішчаны.

Госпадам крокі чалавека накіроўваюцца, і Ён вельмі спрыяе шля́ху яго;

калі упадзе ён, то не разаб’ецца, бо Гасподзь падтрымлівае за руку́ яго.

Я быў малады і вось састарыўся, але не бачыў праведніка пакінутым, і нашчадкаў яго, якія просяць хлеба;

штодзень міласць праяўляе і ў пазыку дае праведнік, і нашчадкам яго благаславенне будзе.

Ухіляйся ад зла і рабі дабро — і жыць будзеш вечна,

бо Гасподзь любіць правасуддзе і не пакіне праведных Сваіх, навекі яны ахаваны будуць; а беззаконныя будуць вы́гнаны, і нашчадкі бязбожных знішчаны будуць.

Праведныя ж унаследуюць зямлю і будуць жыць на ёй вечна.

Вусны праведніка будуць навуча́цца мудрасці, і язык яго будзе абвяшчаць праведны суд.

Закон Бога ў сэрцы яго; і не спатыкнуцца ногі яго.

Падсцерага́е грэшнік праведніка і шукае, як забіць яго,

але Гасподзь не аддасць яго ў рукі таго, і не асу́дзіць яго, калі будзе судзíць яго.

Спадзявайся на Госпада і трымайся шля́ху Яго, і Ён узвы́сіць цябе, каб ты ўнаследаваў зямлю; і знішчэнне грэшнікаў ты ўбачыш.

Бачыў я бязбожніка, які выхваляўся і ўзвышаў сябе, нібы кедры ліванскія;

і прайшоў я міма, і вось, не стала яго, і я шукаў яго і не знайшоў месца, дзе ён быў.

Захоўвай нявіннасць і трымайся праведнасці, бо ёсць будучыня ў чалавека мірнага;

а беззаконныя ўсе знішчаны будуць; астанкі бязбожных будуць знішчаны.

Спасенне ж праведнікам — ад Госпада, і Ён — абарона ім у час бяды;

і дапаможа ім Гасподзь, і ўратуе іх, і збавіць іх ад грэшнікаў, і захавае іх, бо яны спадзяваліся на Яго.