Азбука веры » Би́блия » הושע » гл.7

הושע, Глава 7

Толкования

Толкования главы

7:1

см.:Иер.17:14;Иер.51:9;Ос.12:1;

7:2

см.:Иов.24:15;Рим.1:32;

7:3

7:4

7:5

см.:Исх.32:5;Мф.14:6;

7:6

7:7

см.:Пс.13:3;

7:8

см.:4Цар.17:8;Пс.105:35;

7:9

см.:Иез.7:21;

7:10

см.:Ос.5:5;

7:11

см.:4Цар.16:7;Ос.5:13;Ос.8:9;

см.:4Цар.17:4;

см.:Пс.72:27;

см.:Ис.29:13;

см.:Ис.42:20;

7:16

Еврейский

Языки

כְּרָפְאִי לְיִשְׂרָאֵל, וְנִגְלָה עֲוֹן אֶפְרַיִם וְרָעוֹת שֹׁמְרוֹן, כִּי פָעֲלוּ שָׁקֶר; וְגַנָּב יָבוֹא, פָּשַׁט גְּדוּד בַּחוּץ׃

וּבַל־יֹאמְרוּ לִלְבָבָם, כָּל־רָעָתָם זָכָרְתִּי; עַתָּה סְבָבוּם מַעַלְלֵיהֶם, נֶגֶד פָּנַי הָיוּ׃

בְּרָעָתָם יְשַׂמְּחוּ־מֶלֶךְ; וּבְכַחֲשֵׁיהֶם שָׂרִים׃

כֻּלָּם מְנָאֲפִים, כְּמוֹ תַנּוּר, בֹּעֵרָה מֵאֹפֶה; יִשְׁבּוֹת מֵעִיר, מִלּוּשׁ בָּצֵק עַד־חֻמְצָתוֹ׃

יוֹם מַלְכֵּנוּ, הֶחֱלוּ שָׂרִים חֲמַת מִיָּיִן; מָשַׁךְ יָדוֹ אֶת־לֹצְצִים׃

כִּי־קֵרְבוּ כַתַּנּוּר לִבָּם בְּאָרְבָּם; כָּל־הַלַּיְלָה יָשֵׁן אֹפֵהֶם, בֹּקֶר הוּא בֹעֵר כְּאֵשׁ לֶהָבָה׃

כֻּלָּם יֵחַמּוּ כַּתַּנּוּר, וְאָכְלוּ אֶת־שֹׁפְטֵיהֶם; כָּל־מַלְכֵיהֶם נָפָלוּ, אֵין־קֹרֵא בָהֶם אֵלָי׃

אֶפְרַיִם בָּעַמִּים הוּא יִתְבּוֹלָל; אֶפְרַיִם הָיָה עֻגָה בְּלִי הֲפוּכָה׃

אָכְלוּ זָרִים כֹּחוֹ, וְהוּא לֹא יָדָע; גַּם־שֵׂיבָה זָרְקָה בּוֹ, וְהוּא לֹא יָדָע׃

וְעָנָה גְאוֹן־יִשְׂרָאֵל בְּפָנָיו; וְלֹא־שָׁבוּ אֶל־יְהוָה אֱלֹהֵיהֶם, וְלֹא בִקְשֻׁהוּ בְּכָל־זֹאת׃

וַיְהִי אֶפְרַיִם, כְּיוֹנָה פוֹתָה אֵין לֵב; מִצְרַיִם קָרָאוּ אַשּׁוּר הָלָכוּ׃

כַּאֲשֶׁר יֵלֵכוּ, אֶפְרוֹשׂ עֲלֵיהֶם רִשְׁתִּי, כְּעוֹף הַשָּׁמַיִם אוֹרִידֵם; אַיְסִרֵם כְּשֵׁמַע לַעֲדָתָם׃ ס

אוֹי לָהֶם כִּי־נָדְדוּ מִמֶּנִּי, שֹׁד לָהֶם כִּי־פָשְׁעוּ בִי; וְאָנֹכִי אֶפְדֵּם, וְהֵמָּה דִּבְּרוּ עָלַי כְּזָבִים׃

וְלֹא־זָעֲקוּ אֵלַי בְּלִבָּם, כִּי יְיֵלִילוּ עַל־מִשְׁכְּבוֹתָם; עַל־דָּגָן וְתִירוֹשׁ יִתְגּוֹרָרוּ יָסוּרוּ בִי׃

וַאֲנִי יִסַּרְתִּי, חִזַּקְתִּי זְרוֹעֹתָם; וְאֵלַי יְחַשְּׁבוּ־רָע׃

יָשׁוּבוּ לֹא עָל, הָיוּ כְּקֶשֶׁת רְמִיָּה, יִפְּלוּ בַחֶרֶב שָׂרֵיהֶם מִזַּעַם לְשׁוֹנָם; זוֹ לַעְגָּם בְּאֶרֶץ מִצְרָיִם׃