Сiя́ глаго́летъ Госпо́дь: за три́ нече́стiя сыно́въ Иу́диныхъ и за четы́ри не отвращу́ся и́хъ, поне́же отри́нуша зако́нъ Госпо́день и повелѣ́нiй его́ не сохрани́ша, и прельсти́ша и́хъ су́етная и́хъ, я́же сотвори́ша, и́мже послѣ́доваша отцы́ и́хъ вслѣ́дъ и́хъ:

и послю́ о́гнь на Иу́ду, и поя́стъ основа́нiя Иерусали́мля.

Сiя́ глаго́летъ Госпо́дь: за три́ нече́стiя Изра́иля и за четы́ри не отвращу́ся его́, поне́же прода́ша пра́веднаго на сребрѣ́ и убо́гаго на сапозѣ́хъ,

ходя́щихъ на пра́сѣ земнѣ́мъ, и бiя́ху пя́стiю во главы́ убо́гихъ, и пу́ть смире́нныхъ совраща́ху: и сы́нъ и оте́цъ его́ вла́зяста ко еди́нѣй рабы́ни, я́ко да оскверна́вятъ и́мя Бо́га своего́:

и ри́зы своя́ связу́юще у́жами, и завѣ́сы творя́ху держа́щыяся тре́бища, и вино́ от оболга́нiй пiя́ху въ дому́ бо́га своего́.

А́зъ же отверго́хъ Аморре́а от лица́ и́хъ, его́же бѣ́ высота́ я́коже высота́ ке́дрова, и крѣ́покъ бя́ше я́коже ду́бъ, и изсуши́хъ пло́дъ его́ съ верха́ и коре́нiе его́ изъ ни́зу.

А́зъ же изведо́хъ вы́ изъ земли́ Еги́петскiя и обводи́хъ вы́ въ пусты́ни четы́редесять лѣ́тъ, е́же прiя́ти въ наслѣ́дiе зе́млю Аморре́йску.

И поя́хъ от сыно́въ ва́шихъ во проро́ки и от ю́нотъ ва́шихъ во освяще́нiе: еда́ нѣ́сть си́хъ, сы́нове Изра́илевы? глаго́летъ Госпо́дь.

И напая́сте освяще́нныя вино́мъ и проро́комъ заповѣ́дасте глаго́люще: не прорица́йте.

Сего́ ра́ди, се́, а́зъ повращу́ подъ ва́ми, я́коже врати́тся колесни́ца полна́ тро́стiя:

и поги́бнетъ бѣ́гство от скоротеку́щаго, и крѣ́пкiй не удержи́тъ крѣ́пости своея́, и хра́брый не спасе́тъ души́ своея́,

и стрѣля́яй изъ лу́ка не постои́тъ, и бы́стрый нога́ма свои́ма не уцѣлѣ́етъ, и ко́нникъ не спасе́тъ души́ своея́,

и крѣ́пкiй не обря́щетъ се́рдца своего́ въ си́лахъ, на́гъ побѣ́гнетъ въ то́й де́нь, глаго́летъ Госпо́дь.

Слы́шите сло́во сiе́, е́же глаго́ла Госпо́дь на вы́, до́ме Изра́илевъ, и на все́ пле́мя, е́же изведо́хъ изъ земли́ Еги́петскiя, рекі́й:

ва́съ то́чiю позна́хъ от всѣ́хъ племе́нъ на земли́, сего́ ра́ди отмщу́ на ва́съ вся́ грѣхи́ ва́шя.

Еда́ по́йдутъ два́ вку́пѣ вся́ко, а́ще не позна́ютъ себе́?

или́ возреве́тъ ле́въ изъ дубра́вы своея́, лови́твы не имы́й? или́ испу́ститъ гла́съ сво́й льви́чищь изъ ло́жа своего́ вся́ко, а́ще не похи́титъ чесого́?

или́ паде́тъ пти́ца на зе́млю безъ ловца́? или́ спаде́тъ пругло́ на зе́млю, а́ще не и́метъ ничесо́же?

или́ возгласи́тъ труба́ во гра́дѣ, и не убоя́тся лю́дiе? или́ бу́детъ зло́ во гра́дѣ, е́же Госпо́дь не сотвори́?

Поне́же не сотвори́тъ Госпо́дь Бо́гъ дѣ́ла, а́ще не откры́етъ наказа́нiя своего́ къ рабо́мъ свои́мъ проро́комъ.

Ле́въ возреве́тъ, и кто́ не убои́тся? Госпо́дь Бо́гъ глаго́ла, и кто́ не прорече́тъ?

Повѣ́дите страна́мъ во Ассирі́анѣхъ и во страна́хъ Еги́петскихъ и рцы́те: собери́теся на го́ру самарі́йскую и ви́дите чуде́сная мно́га средѣ́ ея́ и наси́льство е́же въ не́й.

И не уразумѣ́, я́же бу́дутъ проти́ву е́й, глаго́летъ Госпо́дь, сокро́вищствующiи непра́вду и стра́сть въ се́лѣхъ свои́хъ.

Сего́ ра́ди сiя́ глаго́летъ Госпо́дь Бо́гъ: ти́ре, о́крестъ земля́ твоя́ опустѣ́етъ, и отъи́метъ от тебе́ крѣ́пость твою́, и разгра́бятся страны́ твоя́.

Сiя́ глаго́летъ Госпо́дь: я́коже пасту́хъ, егда́ исто́ргнетъ от у́стъ льво́выхъ двѣ́ го́лени, или́ обу́шiе у́ха, та́ко исто́ргнутся сы́нове Изра́илевы живу́щiи въ самарі́и пря́мо пле́мене и въ дама́сцѣ.

Жерцы́, послу́шайте и засвидѣ́телствуйте до́му Иа́ковлю, глаго́летъ Госпо́дь Бо́гъ Вседержи́тель:

поне́же въ де́нь, егда́ отмщу́ нече́стiя Изра́илева на не́мъ, и отмщу́ на тре́бищихъ Веѳи́лихъ, и раскопа́ю ро́ги тре́бища, и паду́тся на зе́млю:

сокрушу́ и поражу́ до́мъ съ преклѣ́ты съ до́момъ лѣ́тнимъ, и поги́бнутъ до́мове ко́сти слоно́выя, и потребя́тся и друзі́и до́мове мно́зи, глаго́летъ Госпо́дь.