Во ст҃ы́й и҆ вели́кїй понедѣ́льникъ на ᲂу҆́трени,
по шестоѱа́лмїи пое́мъ а҆ллилꙋ́їа, на гла́съ и҃, велегла́снѡ, и҆ со сладкопѣ́нїемъ А҆ллилꙋ́їа, и҆ пое́мъ тропа́рь ко́снѡ и҆ велегла́снѡ, и҆ со сладкопѣ́нїемъ равнѡ̀. Гла́съ и҃:
Сѐ жени́хъ грѧде́тъ въ полꙋ́нощи, и҆ бл҃же́нъ ра́бъ, є҆го́же ѡ҆брѧ́щетъ бдѧ́ща: недосто́инъ же па́ки, є҆го́же ѡ҆брѧ́щетъ ᲂу҆ныва́юща. блюдѝ ᲂу҆́бѡ дꙋшѐ моѧ̀, не сно́мъ ѡ҆тѧготи́сѧ, да не сме́рти предана̀ бꙋ́деши, и҆ црⷭ҇твїѧ внѣ̀ затвори́шисѧ, но воспрѧнѝ зовꙋ́щи: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ. Три́жды.
Та́же ѻ҆бы́чное стїхосло́вїе съ покло́ны.
По а҃-мъ стїхосло́вїи сѣда́ленъ, гла́съ а҃.
Подо́бенъ: Гро́бъ тво́й:
Страда̑нїѧ чⷭ҇тна̑ѧ настоѧ́щїй де́нь, ꙗ҆́коже свѣти̑ла совершє́ннаѧ, возсїѧва́ютъ мі́рꙋ: хрⷭ҇то́съ бо грѧде́тъ страда́ти бл҃гостїю, всѧ̑ содержа́й дла́нїю, и҆зволѧ́етъ простре́тисѧ на дре́вѣ, є҆́же сп҃стѝ человѣ́ка.
Сла́ва, и҆ ны́нѣ, то́йже.
По в҃-мъ стїхосло́вїи сѣда́ленъ, гла́съ а҃. Подо́бенъ:
Неви́димый сꙋдїѐ, въ пло́ти ка́кѡ ви́дѣнъ бы́лъ є҆сѝ, и҆ и҆́деши ѿ мꙋже́й беззако́нныхъ ᲂу҆бїе́нъ бы́ти, на́ше ѡ҆сꙋжде́нїе ѡ҆сꙋжда́ѧй стрⷭ҇тїю твое́ю; тѣ́мже хвалꙋ̀, вели́чїе и҆ сла́вꙋ возсыла́юще вла́сти твое́й сло́ве, согла́снѡ прино́симъ.
Сла́ва, и҆ ны́нѣ, то́йже.
По г҃-мъ стїхосло́вїи сѣда́ленъ, гла́съ и҃.
Подо́бенъ: Премꙋ́дрости:
Стрⷭ҇те́й гдⷭ҇нихъ нача́тки, настоѧ́щїй де́нь свѣтлоно́ситъ. прїиди́те ᲂу҆́бѡ празднолю́бцы, ᲂу҆срѧ́щимъ пѣ́сньми: созда́тель бо грѧде́тъ крⷭ҇тъ прїѧ́ти, и҆спыта̑нїѧ и҆ ра̑ны, пїла́томъ сꙋди́мь. тѣ́мже и҆ ѿ раба̀ ᲂу҆да́ренъ бы́въ по главѣ̀, всѧ̑ терпи́тъ, да сп҃се́тъ человѣ́ка. сегѡ̀ ра́ди возопїи́мъ є҆мꙋ̀: чл҃вѣколю́бче хрⷭ҇тѐ бж҃е, прегрѣше́нїй да́рꙋй ѡ҆ставле́нїе, покланѧ́ющымсѧ вѣ́рою пречⷭ҇тымъ стрⷭ҇те́мъ твои̑мъ.
Сла́ва, и҆ ны́нѣ, то́йже. И҆ а҆́бїе посе́мъ чте́нїе въ толкова́нїи є҆ѵⷢ҇лїа є҆́же ѿ матѳе́а. И҆ Сло́во і҆ѡа́нна златоꙋ́стагѡ ѡ҆ и҆зсо́хшей смоко́вницѣ, є҆мꙋ́же нача́ло: Ꙗ҆́коже ᲂу҆́бѡ ви́дѧ: И҆ сло́во дамаски́ново ѡ҆ и҆зсо́хшей смоко́вницѣ, и҆ ѡ҆ при́тчи вїногра́да. Та́же, И҆ ѡ҆ сподо́битисѧ на́мъ: Є҆ѵⷢ҇лїе ѿ матѳе́а, зача́ло п҃д, без̾ престꙋ́пки: Во вре́мѧ ѻ҆́но, возвра́щьсѧ і҆и҃съ во гра́дъ, взалка̀: Коне́цъ, въ зача́лѣ п҃и-мъ: И҆ да́стсѧ ꙗ҆зы́кꙋ творѧ́щемꙋ плоды̀ є҆гѡ̀. Посе́мъ ѱало́мъ н҃. Та́же, Сп҃сѝ бж҃е лю́ди твоѧ̑: Гдⷭ҇и поми́лꙋй, в҃і.
Трипѣ́снецъ, творе́нїе господи́на космы̀, є҆гѡ́же краестро́чїе: Тѝ деѵте́ра, си́ є҆сть: во вторы́й де́нь, є҆́же є҆́сть понедѣ́льникъ. І҆рмо́съ по два́жды, тропарѝ на в҃і.
Припѣ́въ: Сла́ва тебѣ̀ бж҃е на́шъ, сла́ва тебѣ̀.
[Се́й во всю̀ седми́цꙋ]. Послѣдѝ і҆рмо́съ, ѻ҆́ба ли̑ка вкꙋ́пѣ. Гла́съ в҃.
Пѣ́снь а҃.
[Т] І҆рмо́съ: Непроходи́мое волнѧ́щеесѧ мо́ре, бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇ви пои́мъ, сла́внѡ бо просла́висѧ.
[И] Неизрече́нное сло́ва бж҃їѧ схожде́нїе, є҆́же хрⷭ҇то́съ то́йжде є҆́сть бг҃ъ и҆ человѣ́къ, є҆́же бг҃ъ невосхище́нїемъ бы́ти непщева́въ, внегда̀ воѡбража́тисѧ рабѡ́мъ, показꙋ́етъ ᲂу҆ч҃нкѡ́мъ, сла́внѡ бо просла́висѧ.
[Д] Послꙋжи́ти са́мъ прїидо́хъ, є҆гѡ́же зра́комъ созда́тель во́лею ѡ҆бложе́нъ є҆́смь, ѡ҆бнища́вшемꙋ а҆да́мꙋ, бога́тствꙋѧй бж҃ество́мъ, положи́ти хотѧ́й мою̀ дꙋ́шꙋ и҆збавле́нїе за́нь, и҆́же безстра́стный бж҃ество́мъ.
Конда́къ, гла́съ и҃.
Подо́бенъ: Ꙗ҆́кѡ нача́тки.
І҆а́кѡвъ рыда́ше і҆ѡ́сифова лише́нїѧ, и҆ до́блїй сѣдѧ́ше на колесни́цѣ, ꙗ҆́кѡ ца́рь почита́емь: є҆гѵ́птѧныни бо тогда̀ сласте́мъ не порабо́тавъ, воспрославлѧ́шесѧ ѿ вѣ́дꙋщагѡ человѣ́чєскаѧ сердца̀, и҆ посыла́ющагѡ вѣне́цъ нетлѣ́нный.
І҆́косъ: На рыда́нїе ны́нѣ приложи́мъ рыда́нїе, и҆ и҆злїе́мъ сле́зы со і҆а́кѡвомъ, пла́чꙋщесѧ і҆ѡ́сифа приснопа́мѧтнагѡ и҆ цѣломꙋ́дреннагѡ, порабоще́ннагѡ ᲂу҆́бѡ тѣ́ломъ, дꙋ́шꙋ же непорабоще́нꙋ соблю́дшагѡ, и҆ є҆гѵ́птомъ всѣ́мъ ца́рствовавшагѡ: бг҃ъ бо подае́тъ рабѡ́мъ свои̑мъ вѣне́цъ нетлѣ́нный.
Сѷнаѯа́рїй. Стїхѝ на і҆ѡ́сифа прекра́снаго:
Цѣломꙋ́дренный і҆ѡ́сифъ, првⷣный держи́тель ꙗ҆ви́сѧ:
И҆ пшеницода́вецъ, ѽ до́брыхъ сто́же!
Стїхѝ на и҆зсо́хшꙋю смоко́вницꙋ:
Собо́рище смоко́вницꙋ хрⷭ҇то́съ є҆вре́йское,
Плодѡ́въ чꙋждꙋ́ю дх҃о́вныхъ воѡбразꙋ́ѧй,
Клѧ́твою ᲂу҆сꙋша́етъ: є҆ѧ́же бѣжи́мъ стра́сти.
Во ст҃ы́й и҆ вели́кїй понедѣ́льникъ па́мѧть твори́мъ бл҃же́ннагѡ і҆ѡ́сифа прекра́снагѡ, и҆ и҆зсо́хшїѧ смоко́вницы: зане́же нача́ло ѿсю́дꙋ прїе́млютъ ст҃ы́ѧ стрⷭ҇ти гдⷭ҇а на́шегѡ і҆и҃са хрⷭ҇та̀: і҆ѡ́сифъ же во ѡ҆́бразъ сегѡ̀ пе́рвѣе прїе́млетсѧ. Се́й ᲂу҆́бѡ сы́нъ послѣ́днїй бѧ́ше патрїа́рха і҆а́кѡва, ѿ рахи́ли є҆мꙋ̀ рожде́нный, ѿ свои́хъ же бра́тїй позави́дѣнъ бы́въ нѣ́кихъ ра́ди во снѣ̀ видѣ́нїй. Пре́жде ᲂу҆́бѡ во и҆скопа́нїе ро́ва скрыва́етсѧ: и҆ ѻ҆те́цъ є҆гѡ̀ ѿ дѣте́й пре́лестїю ѡ҆кровавле́нною ри́зою ᲂу҆крада́етсѧ, ꙗ҆́кѡ ѿ ѕвѣ́рѧ и҆з̾ѧде́нъ бы́сть. Та́же на три́десѧтихъ сре́бреницѣхъ про́данъ быва́етъ і҆смаилі́тѡмъ, и҆́же па́ки продаю́тъ є҆го̀ пентефрі́ю, нача́льникꙋ скопце́й царѧ̀ є҆гѵ́петскагѡ фараѡ́на. Неи́стовствовавшей же госпожѣ̀ є҆гѡ̀ на цѣломꙋ́дрїе ю҆́ноши, поне́же беззако́нїѧ содѣ́ѧти не восхотѣ̀, ри́зꙋ ѡ҆ста́вль ѿбѣжѐ: ѻ҆на́ же господи́нꙋ є҆гѡ̀ ѡ҆болга́етъ є҆го̀, и҆ ᲂу҆́зы и҆ темни́ца го́рькаѧ сего̀ прїе́млетъ. Та́же разрѣше́нїемъ снѡ́въ и҆зво́дитсѧ, и҆ царю̀ ꙗ҆влѧ́етсѧ, и҆ господи́нъ всеѧ̀ землѝ є҆гѵ́петскїѧ поставлѧ́етсѧ. Па́ки же пшеницода́тельствомъ бра́тїѧмъ ꙗ҆вле́нъ быва́етъ, и҆ всѧ́ческое своегѡ̀ живота̀ до́брѣ препроводи́въ, во є҆гѵ́птѣ ᲂу҆мира́етъ, вели́кїй ѡ҆ цѣломꙋ́дрїи при и҆нѣ́хъ є҆гѡ̀ до́брыхъ познава́емый. Ѡ҆́бразъ же се́й хрⷭ҇то́въ: занѐ и҆ хрⷭ҇то́съ ѿ є҆диноплеме́нныхъ і҆ꙋдє́й зави́ствꙋемь быва́етъ, и҆ ѿ ᲂу҆ченика̀ на три́десѧти сре́бреницѣхъ продае́тсѧ, и҆ во мра́чный и҆ те́мный ро́въ, гро́бъ, заключа́етсѧ, и҆ ѿтꙋ́дꙋ самовла́стнѡ восторгнꙋ́всѧ, ца́рствꙋетъ над̾ є҆гѵ́птомъ: ꙗ҆́вѣ на всѧ́кїй грѣ́хъ, и҆ до конца̀ сего̀ побѣжда́етъ, мі́ромъ же всѣ́мъ ѡ҆блада́етъ, и҆ человѣколю́бнѡ и҆скꙋпꙋ́етъ на́съ та́инственнымъ пшеницода́тельствомъ, ꙗ҆́кѡ са́мъ себѐ за на́съ да́вый, и҆ ꙗ҆́кѡ пита́етъ на́съ небе́снымъ хлѣ́бомъ, свое́ю живоно́сною пло́тїю. По семꙋ̀ ᲂу҆́бѡ словесѝ, прекра́сный і҆ѡ́сифъ ны́нѣ прїе́млетсѧ. Здѣ́ же и҆ ѡ҆ и҆зсо́хшей смоко́вницѣ па́мѧть твори́мъ: зане́же бж҃е́ственнїи є҆ѵⷢ҇лі́сти, сі́есть, матѳе́й и҆ ма́рко, по по́вѣсти ѡ҆ ва́їахъ прино́сѧтъ: во ᲂу҆́трїе же и҆зше́дшымъ и҆̀мъ ѿ виѳа́нїи, взалка̀. Дрꙋгі́й же ᲂу҆́трꙋ же возвра́щьсѧ во гра́дъ глаго́летъ, взалка̀, и҆ ви́дѣвъ смоко́вницꙋ, ли́ствїе то́кмѡ и҆мꙋ́щꙋю, не бѣ́ бо вре́мѧ смо́квамъ, прїи́де къ не́й, и҆ є҆лма̀, плода̀ не ѡ҆брѣ́те на не́й, речѐ: да не ктомꙋ̀ пло́дъ ѿ тебѐ бꙋ́детъ въ вѣ́къ: и҆ и҆́зсше а҆́бїе смоко́вница. Смоко́вница ᲂу҆́бѡ є҆́сть, со́нмище і҆ꙋде́йское, на не́мже плода̀ подо́бнагѡ сп҃съ не ѡ҆брѣ́тъ, то́чїю ѡ҆сѣнѧ́ющее зако́на, и҆ сїѐ ѿѧ́тъ ѿ ни́хъ, пра́здное всѧ́чески содѣ́ѧвъ. А҆́ще ли же кто̀ рече́тъ: почто̀ бездꙋ́шное дре́во сꙋ́хо бы́сть, клѧ́твꙋ взе́мшее не согрѣши́вшее; Да навы́кнетъ, ꙗ҆́кѡ і҆ꙋде́є ви́дѧще хрⷭ҇та̀ при́снѡ всѣ́хъ бл҃годѣ́тельствꙋюща, никомꙋ́же ключи́мое ско́рбно содѣ́лавша, непщева́хꙋ, ꙗ҆́кѡ си́лꙋ и҆́мать то́чїю бл҃годѣ́тельствовати, ѕлотвори́ти же нѝ. Человѣколюби́въ же влⷣка сы́й, не восхотѣ̀ на человѣ́цѣ сїѐ показа́ти, и҆ семꙋ̀ бы́ти: да ᲂу҆́бѡ ᲂу҆вѣ́ритъ небл҃года̑рныѧ лю́ди, ꙗ҆́кѡ и҆́мать си́лꙋ и҆ къ мꙋ́цѣ дово́льнꙋю: ꙗ҆́кѡ бл҃гъ же не хо́щетъ, на бездꙋ́шномъ и҆ нечꙋ́вственномъ є҆стествѣ̀ мꙋче́нїе содѣ́ловаетъ. Вкꙋ́пѣ же нѣ́кое и҆ неизглаго́ланное сло́во є҆́сть, ѿ ста́рєцъ премꙋ́дрыхъ къ на́мъ прише́дшее. Ꙗ҆́коже глаго́летъ і҆сі́дѡръ пилꙋсїѡ́тъ: ꙗ҆́кѡ дре́во престꙋпле́нїѧ сїѐ бы́сть, є҆гѡ́же и҆ ли́ствїе въ покро́въ престꙋ́пльшїи ᲂу҆потреби́ша. тѣ́мже и҆ проклѧ́тсѧ ѿ хрⷭ҇та̀ человѣколю́бнѡ, поне́же тогда̀ сїѐ не пострада̀, ктомꙋ̀ плода̀ не принестѝ вино́вна грѣхꙋ̀. А҆ ꙗ҆́коже грѣ́хъ смо́кви ᲂу҆подоблѧ́етсѧ, бл҃гоѧвле́нно: и҆́мать бо ᲂу҆слажда́ющее сла́сти, прилѣплѧ́емое грѣха̀, и҆ ѡ҆жесточава́ющее послѣдѝ и҆ полютѣва́ющее со́вѣстїю. Ѻ҆ба́че ѿ ѻ҆тє́цъ смоко́вничнаѧ по́вѣсть здѣ̀ ᲂу҆миле́нїѧ ра́ди положи́сѧ, ꙗ҆́коже і҆ѡ́сифа ра́ди, за є҆́же носи́ти ѡ҆́бразъ хрⷭ҇то́въ. Є҆́сть же смоко́вница всѧ́ка дꙋша̀, всѧ́кагѡ дх҃о́внагѡ пло́да неприча́стна: въ не́йже ᲂу҆́трꙋ, по настоѧ́щей ꙗ҆́вѣ жи́зни, не ѡ҆брѣта́ѧ гдⷭ҇ь поко́ѧ ᲂу҆ неѧ̀, ᲂу҆сꙋша́етъ ю҆̀ клѧ́твою, и҆ въ вѣ́чный посыла́етъ ѻ҆́гнь, и҆ сто́лпъ нѣ́кїй стои́тъ ᲂу҆сꙋше́нный, ᲂу҆страша́ѧй не дѣ́лающихъ прикла́днагѡ добродѣ́телей плода̀. Прекра́снагѡ і҆ѡ́сифа мл҃твами хрⷭ҇тѐ бж҃е поми́лꙋй на́съ.
Пѣ́снь и҃.
[Е] І҆рмо́съ: Оу҆страши́сѧ ѻ҆трокѡ́въ бл҃гочести́выхъ, соѡбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀, неꙋтрꙋжде́нъ ѻ҆́гнь: присноживꙋ́щꙋ же и҆з̾ꙋвѧ́дшꙋ пла́меню, вѣ́чнꙋющаѧ пѣ́снь воспѣва́шесѧ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
[Ѵ] Ва́съ тогда̀ мои́хъ ᲂу҆ч҃нкѡ́въ позна́ютъ всѝ, а҆́ще моѧ̑ за́пѡвѣди соблюдетѐ, глаго́летъ сп҃съ дрꙋгѡ́мъ, ко стрⷭ҇ти и҆ды́й: ми́ръ и҆мѣ́йте въ себѣ̀, и҆ во всѣ́хъ, и҆ смирє́ннаѧ мꙋ́дрствꙋюще возвы́ситесѧ: и҆ гдⷭ҇а зна́юще мѧ̀ по́йте, и҆ превозноси́те во всѧ̑ вѣ́ки.
[Т] Чи́на сопроти́вна ва́мъ ꙗ҆зы́ческа, да є҆́сть держа́ва кꙋпноро́дныхъ: не жре́бїй бо мо́й, мꙋчи́тельство же ра́зꙋмъ самоизбра́нный. и҆́же ᲂу҆́бѡ пред̾изѧ́щный въ ва́съ бы́ти хотѧ́й дрꙋги́хъ, да є҆́сть всѣ́хъ послѣ́днѣйшїй: и҆ гдⷭ҇а зна́юще мѧ̀ по́йте, и҆ превозноси́те во всѧ̑ вѣ́ки.
Хва́лимъ, бл҃гослови́мъ:
И҆ па́ки і҆рмо́съ. Чⷭ҇тнѣ́йшꙋю не пое́мъ.
Пѣ́снь ѳ҃.
[Е] І҆рмо́съ: Возвели́чилъ є҆сѝ хрⷭ҇тѐ ро́ждшꙋю тѧ̀ бцⷣꙋ, ѿ неѧ́же созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на́шихъ прегрѣше́нїй рѣши́тельное: сїю̀ ᲂу҆бл҃жа́юще всѝ ро́ди, тебѐ велича́емъ.
[Р] Скве́рнꙋ всю̀ страстнꙋ́ю ѿри́нꙋвше, досто́йный бж҃е́ственнагѡ ца́рствїѧ ра́зꙋмъ воспрїи́мемъ бл҃гомꙋ́дрственный, твои̑мъ а҆пⷭ҇лѡмъ предре́клъ є҆сѝ, всѣ́хъ премꙋ́дросте: въ не́мже просла́витесѧ, свѣтѧ́щесѧ со́лнца свѣтоза́рнѣе.
[А] Взира́юще на мѧ̀, ре́клъ є҆сѝ гдⷭ҇и твои̑мъ ᲂу҆ч҃нкѡ́мъ, не мꙋ́дрствꙋйте высѡ́каѧ, но соѿведи́тесѧ смире́нными: мою̀, ю҆́же пїю̀, пі́йте ча́шꙋ, ꙗ҆́кѡ да во црⷭ҇твїи ѻ҆ц҃а̀ со мно́ю просла́витесѧ.
Та́же і҆рмо́съ: Возвели́чилъ є҆сѝ хрⷭ҇тѐ: И҆ покло́нъ до землѝ.
Є҆ѯапостїла́рїй глаго́лемъ три́жды, ко́снѡ и҆ со сладкопѣ́нїемъ. Се́й же глаго́летсѧ до вели́кагѡ четвертка̀, пое́тсѧ же посредѣ̀ це́ркве ѿ пѣвца̀, и҆ проти́вꙋ глаша́етсѧ ѿ на́съ:
Черто́гъ тво́й ви́ждꙋ сп҃се мо́й, ᲂу҆краше́нный, и҆ ѻ҆де́жды не и҆́мамъ, да вни́дꙋ во́нь: просвѣтѝ ѡ҆дѣѧ́нїе дꙋшѝ моеѧ̀ свѣтода́вче, и҆ сп҃си́ мѧ.
На хвали́техъ стїхи̑ры самогла́сны на д҃, гла́съ а҃:
Грѧды́й гдⷭ҇ь къ во́льной стрⷭ҇ти, а҆пⷭ҇лѡмъ глаго́лаше на пꙋтѝ: сѐ восхо́димъ во і҆ерⷭ҇ли́мъ, и҆ преда́стсѧ сн҃ъ чл҃вѣ́ческїй, ꙗ҆́коже є҆́сть пи́сано ѡ҆ не́мъ. прїиди́те ᲂу҆̀бо и҆ мы̀, ѡ҆чище́нными смы́слы, сше́ствꙋимъ є҆мꙋ̀, и҆ сраспне́мсѧ, и҆ ᲂу҆мертви́мсѧ є҆гѡ̀ ра́ди житє́йскимъ сласте́мъ, да и҆ ѡ҆живе́мъ съ ни́мъ, и҆ ᲂу҆слы́шимъ вопїю́ща є҆го̀: не ктомꙋ̀ въ земны́й і҆ерⷭ҇ли́мъ, за є҆́же страда́ти, но восхождꙋ̀ ко ѻ҆ц҃ꙋ̀ моемꙋ̀, и҆ ѻ҆ц҃ꙋ̀ ва́шемꙋ, и҆ бг҃ꙋ моемꙋ̀, и҆ бг҃ꙋ ва́шемꙋ, и҆ совозвы́шꙋ ва́съ въ го́рнїй і҆ерⷭ҇ли́мъ, въ црⷭ҇тво нбⷭ҇ное. Два́жды.
Гла́съ є҃: Дости́гше вѣ́рнїи сп҃си́тельнꙋю стрⷭ҇ть хрⷭ҇та̀ бг҃а, неизрече́нное є҆гѡ̀ долготерпѣ́нїе просла́вимъ: ꙗ҆́кѡ да бл҃гоꙋтро́бїемъ свои́мъ совоздви́гнетъ и҆ на́съ ᲂу҆мерщвле́нныхъ грѣхо́мъ, ꙗ҆́кѡ бл҃гъ и҆ чл҃вѣколю́бецъ. Два́жды.
Сла́ва, и҆ ны́нѣ, гла́съ то́йже: Гдⷭ҇и, грѧды́й къ страда́нїю, твоѧ̑ ᲂу҆твержда́ѧ ᲂу҆ч҃нкѝ, глаго́лалъ є҆сѝ ѻ҆со́бь прїе́мъ и҆̀хъ: ка́кѡ глагѡ́лъ мои́хъ не по́мните, ꙗ҆̀же пре́жде реко́хъ ва́мъ; ꙗ҆́кѡ всѧ́комꙋ прⷪ҇ро́кꙋ нѣ́сть пи́сано, то́кмѡ во і҆ерⷭ҇ли́мѣ ᲂу҆бїе́нꙋ бы́ти. ны́нѣ ᲂу҆́бѡ вре́мѧ настои́тъ, є҆́же реко́хъ ва́мъ: се́ бо предаю́сѧ рꙋка́ма грѣ́шныхъ порꙋ́ганъ бы́ти, и҆̀же и҆ крⷭ҇тꙋ́ мѧ пригвозди́вше, и҆ погребе́нїю преда́вше, ѡ҆ме́рзена вмѣнѧ́тъ ꙗ҆́кѡ ме́ртва. ѻ҆ба́че дерза́йте: тридне́венъ бо воста́нꙋ въ ра́дость вѣ́рныхъ, и҆ жи́знь вѣ́чнꙋю.
На стїхо́внѣ самогла́сенъ. Гла́съ є҃:
Гдⷭ҇и, къ та́инствꙋ неизглаго́ланномꙋ твоегѡ̀ смотре́нїѧ, не довлѣ́ющи сынѡ́въ зеведе́овыхъ ма́ти, проша́ше тѧ̀, вре́меннагѡ ца́рства по́чести дарова́тисѧ ча́дѡмъ є҆ѧ̀: но вмѣ́стѡ тоѧ̀, ча́шꙋ сме́рти ѡ҆бѣща́лъ є҆сѝ пи́ти дрꙋгѡ́мъ твои̑мъ, ю҆́же ча́шꙋ пре́жде си́хъ пи́ти са́мъ глаго́лалъ є҆сѝ, грѣхѡ́въ ѡ҆чище́нїе. тѣ́мже тебѣ̀ вопїе́мъ: сп҃се́нїе дꙋ́шъ на́шихъ, сла́ва тебѣ̀.
Сті́хъ: И҆спо́лнихомсѧ заꙋ́тра ми́лости твоеѧ̀ гдⷭ҇и:
Гдⷭ҇и, совершє́ннѣйшаѧ мꙋ́дрствовати, твоѧ̑ наказꙋ́ѧ ᲂу҆ч҃нкѝ, не ᲂу҆подо́битисѧ ꙗ҆зы́кѡмъ глаго́лалъ є҆сѝ, во є҆́же ѡ҆блада́ти ме́ньшими: не та́кѡ бо бꙋ́детъ ва́мъ мои̑мъ ᲂу҆ч҃нкѡ́мъ, ꙗ҆́кѡ ни́щїй хотѧ̀ є҆́смь. пе́рвый ᲂу҆́бѡ ва́съ, да бꙋ́детъ всѣ̑мъ слꙋга̀: нача́льствꙋѧй же ꙗ҆́кѡ нача́льствꙋемый, пред̾изѧ́щный же ꙗ҆́кѡ послѣ́днѣйшїй. и҆́бо прїидо́хъ са́мъ ѡ҆бнища́вшемꙋ а҆да́мꙋ послꙋжи́ти, и҆ и҆збавле́нїе да́ти за мно́гихъ дꙋ́шꙋ мою̀, вопїю́щихъ мѝ: сла́ва тебѣ̀.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ на на́съ:
Гла́съ и҃: И҆зсо́хшїѧ смоко́вницы за непло́дїе, преще́нїѧ ᲂу҆боѧ́вшесѧ бра́тїе, плоды̀ достѡ́йны покаѧ́нїѧ принесе́мъ хрⷭ҇тꙋ̀, подаю́щемꙋ на́мъ ве́лїю млⷭ҇ть.
Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ є҆гѵ́птѧныню ѡ҆брѣ́тъ ѕмі́й глаго́лы, тща́шесѧ ласка́ньми запѧ́ти і҆ѡ́сифа, но то́й ѡ҆ста́вивъ ри́зꙋ, бѣжа̀ грѣха̀: и҆ на́гъ не стыдѧ́шесѧ, ꙗ҆́коже первозда́нный пре́жде преслꙋша́нїѧ. тогѡ̀ мл҃твами хрⷭ҇тѐ поми́лꙋй на́съ.
Та́же: Бл҃го є҆́сть: И҆ прѡ́чаѧ по ѻ҆бы́чаю съ покло́ны. Та́же ѿпꙋ́стъ: Грѧды́й гдⷭ҇ь на во́льнꙋю стрⷭ҇ть, на́шегѡ ра́ди сп҃се́нїѧ, хрⷭ҇то́съ и҆́стинный: Се́й же ѿпꙋ́стъ глаго́летсѧ во вто́рникъ и҆ въ сре́дꙋ.
[зрѝ] Вѣ́домо же бꙋ́ди, ꙗ҆́кѡ на а҃-мъ часѣ̀ и҆ ѳ҃-мъ ѱалти́рь не глаго́лемъ въ вели́кꙋю седми́цꙋ: но то́чїю глаго́лютсѧ триѱа́лмны, по ѻ҆бы́чаю. Тре́тїй же ча́съ и҆ шесты́й пое́мъ со ѱалти́ремъ. Чте́тсѧ же и҆ четвероеѵⷢ҇лїе, въ понедѣ́льникъ, во вто́рникъ и҆ въ сре́дꙋ соверша́етсѧ.
При часѣ̀ г҃-мъ днѐ ᲂу҆дарѧ́етъ параекклисїа́рхъ въ би́ло, ꙗ҆́кѡ же є҆́сть ѻ҆бы́чай. И҆ собра́вшесѧ въ це́рковь, пое́мъ г҃-й ча́съ, съ каѳі́смою: и҆ творѧ́ще ѻ҆бы̑чныѧ покло́ны. Та́же тропа́рь: Гдⷭ҇и, и҆́же прест҃а́го твоего̀ дх҃а: и҆ Бцⷣе ты̀ є҆сѝ лоза̀: покло́ны г҃. И҆ а҆́бїе ᲂу҆кра́шенꙋ а҆нало́гїю, положа́тъ на не́мъ верхꙋ̀ ст҃о́е четвероеѵⷢ҇лїе, и҆ двѣма̀ лампа́дома возжже́ннома. Всѣ̑мъ же стоѧ́щымъ ѿкрове́нными глава́ми. Сщ҃е́нникъ же кади́тъ хра́мъ ве́сь, и҆ бра́тїю. А҆ на ѕ҃-мъ часѣ̀ кади́тъ то́кмѡ є҆ѵⷢ҇лїе. На ѳ҃-мъ же часѣ̀ є҆ѵⷢ҇лїе кади́тъ, и҆ хра́мъ ве́сь, и҆ бра́тїю: И҆ та́кѡ чте́тъ є҆ѵⷢ҇лїе. По сконча́нїи же чте́нїѧ є҆ѵⷢ҇лїа глаго́лемъ: Гдⷭ҇ь бг҃ъ бл҃гослове́нъ: И҆ про́чее послѣ́дованїе. Глаго́летсѧ и҆ конда́къ днѐ: І҆а́кѡвъ рыда́ше: И҆ ѻ҆бы̑чныѧ покло́ны. И҆ а҆́бїе начина́емъ шесты́й ча́съ. Прїиди́те поклони́мсѧ: три́жды, и҆ ѱалмы̀ ѻ҆бы̑чныѧ: Каѳі́смꙋ рѧдовꙋ́ю. Та́же тропа́рь: И҆́же въ шесты́й де́нь же и҆ ча́съ: и҆ бг҃оро́диченъ: Ꙗ҆́кѡ не и҆́мамы дерзнове́нїѧ: и҆ покло́ны г҃.
Та́же тропа́рь прⷪ҇ро́чества, гла́съ ѕ҃:
Дꙋше́ю сокрꙋше́нною припа́даемъ тебѣ̀, и҆ мо́лимъ тѧ̀ сп҃се мі́ра: ты́ бо є҆сѝ бг҃ъ ка́ющихсѧ.
Сла́ва, и҆ ны́нѣ, то́йже:
Прокі́менъ, ѱало́мъ рк҃є, гла́съ д҃: Внегда̀ возврати́ти гдⷭ҇ꙋ плѣ́нъ сїѡ́нь. Сті́хъ: Тогда̀ и҆спо́лнишасѧ ра́дости ᲂу҆ста̀ на̑ша.
Прⷪ҇ро́чества і҆езекі́илева чте́нїе. [Глава̀ а҃, ст. а҃- к҃.]
Бы́сть въ тридесѧ́тое лѣ́то, въ четве́ртый мцⷭ҇ъ, въ пѧ́тый де́нь мцⷭ҇а, и҆ а҆́зъ бы́хъ посредѣ̀ плѣне́нїѧ при рѣцѣ̀ хова́ръ: и҆ ѿверзо́шасѧ нб҃са̀, и҆ ви́дѣхъ видѣ̑нїѧ бж҃їѧ. Въ пѧ́тый де́нь мѣ́сѧца, сїѐ лѣ́то пѧ́тое плѣне́нїѧ царѧ̀ і҆ѡакі́ма: И҆ бы́сть сло́во гдⷭ҇не ко і҆езекі́илю сы́нꙋ вꙋзі́евꙋ, сщ҃е́нникꙋ въ землѝ халде́йстѣй при рѣцѣ̀ хова́ръ. и҆ бы́сть на мнѣ̀ рꙋка̀ гдⷭ҇нѧ. И҆ ви́дѣхъ, и҆ сѐ дх҃ъ воздвиза́ѧйсѧ, грѧдѧ́ше ѿ сѣ́вера, и҆ ѻ҆́блакъ вели́кїй въ не́мъ, и҆ свѣ́тъ ѻ҆́крестъ є҆гѡ̀ и҆ ѻ҆́гнь блиста́ѧйсѧ: И҆ посредѣ̀ є҆гѡ̀ ꙗ҆́кѡ видѣ́нїе и҆ле́ктра посредѣ̀ ѻ҆гнѧ̀, и҆ свѣ́тъ въ не́мъ: посредѣ̀ ꙗ҆́кѡ подо́бїе четы́рехъ живо́тныхъ: и҆ сїѐ видѣ́нїе и҆́хъ, ꙗ҆́кѡ подо́бїе человѣ́ка въ ни́хъ. И҆ четы́ре ли́ца є҆ди́номꙋ, и҆ четы́ре кри́ла є҆ди́номꙋ: И҆ го́лєни и҆́хъ пра́вы, и҆ перна́ты но́ги и҆́хъ, и҆ и҆́скры ꙗ҆́кѡ блиста́ющаѧсѧ мѣ́дь, и҆ лє́гка кри́ла и҆́хъ: И҆ рꙋка̀ человѣ́ча под̾ кри́лами и҆́хъ на четы́рехъ страна́хъ и҆́хъ. И҆ ли́ца и҆́хъ и҆ кри́ла и҆́хъ четы́рехъ держа́щаѧсѧ дрꙋ́гъ дрꙋ́га, ли́ца же и҆́хъ четы́рехъ не ѡ҆браща́хꙋсѧ, внегда̀ ходи́ти и҆̀мъ: ко́еждо прѧ́мѡ лица̀ своегѡ̀ хожда́хꙋ. И҆ подо́бїе ли́цъ и҆́хъ, лицѐ человѣ́чее, и҆ лицѐ льво́во ѡ҆деснꙋ́ю четы́ремъ, и҆ лицѐ те́льчее ѡ҆шꙋ́юю четы́ремъ, и҆ лицѐ ѻ҆́рлее четы́ремъ. [И҆ ли́ца и҆́хъ] и҆ кри́ла и҆́хъ просте́рты свы́ше четы́ремъ, коемꙋ́ждо два̀ сопрѧже́на дрꙋ́гъ ко дрꙋ́гꙋ, и҆ два̀ покрыва́хꙋ верхꙋ̀ тѣлесѐ и҆́хъ, и҆ ко́еждо прѧ́мѡ лицꙋ̀ своемꙋ̀ и҆дѧ́ше: И҆дѣ́же а҆́ще бѧ́ше дꙋ́хъ ше́ствꙋѧй, и҆дѧ́хꙋ, и҆ не ѡ҆браща́хꙋсѧ. И҆ посредѣ̀ живо́тныхъ видѣ́нїе ꙗ҆́кѡ ᲂу҆́глїѧ ѻ҆гнѧ̀ горѧ́щагѡ, ꙗ҆́кѡ видѣ́нїе свѣ́щъ соѡбраща́ющихсѧ посредѣ̀ живо́тныхъ, и҆ свѣ́тъ ѻ҆гнѧ̀, и҆ ѿ ѻ҆гнѧ̀ и҆схожда́ше ꙗ҆́кѡ мо́лнїѧ. И҆ живѡ́тнаѧ теча́хꙋ, и҆ ѡ҆браща́хꙋсѧ, ꙗ҆́кѡ видѣ́нїе ꙾везе́ково꙾꙾блиста́нїѧ꙾: И҆ ви́дѣхъ, и҆ сѐ ко́ло є҆ди́но на землѝ держа́щеесѧ живо́тныхъ четы́рехъ: И҆ видѣ́нїе коле́съ, и҆ сотворе́нїе и҆́хъ, ꙗ҆́кѡ видѣ́нїе ѳарсі́са, и҆ подо́бїе є҆ди́но четы́ремъ: и҆ дѣ́ло и҆́хъ бѧ́ше, ꙗ҆́коже а҆́ще бы бы́ло ко́ло въ колесѝ. На четы́ри страны̑ и҆́хъ ше́ствовахꙋ: не ѡ҆браща́хꙋсѧ, внегда̀ ше́ствовати и҆̀мъ, Нижѐ хребты̀ и҆́хъ, и҆ высота̀ бѧ́ше и҆̀мъ: и҆ ви́дѣхъ та̑, и҆ плещѝ и҆́хъ и҆спо́лнены ѻ҆че́съ ѻ҆́крестъ четы́ремъ. И҆ внегда̀ ше́ствовати живѡ́тнымъ, ше́ствовахꙋ и҆ коле́са держа́щесѧ и҆́хъ: и҆ внегда̀ воздвиза́тисѧ живѡ́тнымъ ѿ землѝ, воздвиза́хꙋсѧ и҆ коле́са. И҆дѣ́же а҆́ще бѧ́ше ѻ҆́блакъ, та́мѡ бѧ́ше и҆ дх҃ъ, є҆́же ше́ствовати: ше́ствовахꙋ и҆ живѡ́тнаѧ, и҆ коле́са воздвиза́хꙋсѧ съ ни́ми, занѐ дх҃ъ жи́зни бѧ́ше въ колесѣ́хъ.
Прокі́менъ, ѱало́мъ рк҃ѕ, гла́съ д҃: А҆́ще не гдⷭ҇ь сози́ждетъ до́мъ, всꙋ́е трꙋди́шасѧ зи́ждꙋщїи. Сті́хъ: А҆́ще не гдⷭ҇ь сохрани́тъ гра́дъ всꙋ́е бдѣ̀ стрегі́й. И҆ чте́тсѧ є҆ѵⷢ҇лїе по предпи́санномꙋ чи́нꙋ. По чте́нїи же, Ско́рѡ да предварѧ́тъ ны̀ щедро́ты твоѧ̑ гдⷭ҇и: Трист҃о́е, съ покло́ны. По Ѻ҆́ч҃е на́шъ: Конда́къ днѐ. Гдⷭ҇и поми́лꙋй, м҃. И҆ про́чее по ѻ҆бы́чаю, и҆ ѿпꙋ́стъ.
[зрѝ] Вѣ́домо же бꙋ́ди: Ꙗ҆́кѡ є҆ѵⷢ҇лїе ѿ матѳе́а всѐ чте́тсѧ, подо́бнѣ и҆ ѿ ма́рка, и҆ ѿ лꙋкѝ: ѿ і҆ѡа́нна же чте́тсѧ до нача́ла ст҃ы́хъ стрⷭ҇те́й, ꙗ҆́вѣ ꙗ҆́кѡ до Ны́нѣ просла́висѧ сн҃ъ чл҃вѣ́ческїй: Чте́тсѧ же та́кѡ въ тре́хъ дне́хъ, си́рѣчь, въ понедѣ́льникъ, во вто́рникъ, въ сре́дꙋ: И҆ соверша́етсѧ въ сре́дꙋ на ѳ҃- мъ часѣ̀. Быва́ютъ же ѿ лꙋкѝ чте́нїѧ трѝ. Прѡ́чаѧ же по два̀. Вкꙋ́пѣ всѣ́хъ чте́нїй де́вѧть, и҆ вѧ́щше ничто́же. Девѧ́тый же ча́съ тре́хъ дне́й стїхосло́вїѧ не и҆́мать, ꙗ҆́коже рече́сѧ. Но по триѱа́лмїи пое́тсѧ ѿ ᲂу҆чине́ннагѡ мона́ха: И҆́же въ девѧ́тый ча́съ: Сла́ва, и҆ ны́нѣ: И҆́же на́съ ра́ди рожде́йсѧ ѿ дв҃ы: И҆ быва́етъ чте́нїе въ четвероеѵⷢ҇лїи: По не́мже глаго́лемъ: Не преда́ждь на́съ до конца̀: Трист҃о́е съ покло́ны. По Ѻ҆́ч҃е на́шъ: Конда́къ днѐ. Во црⷭ҇твїи твое́мъ: И҆ про́чее послѣ́дованїе, ꙗ҆́кѡ ѻ҆бы́чно. Глаго́лемъ же и҆ конда́къ днѐ. Присовокꙋплѧ́емъ же и҆ вече́рню.