Въ недѣ́лю ве́чера,

Повече́рїе глаго́лемъ ма́лое, на не́мже пое́мъ трипѣ́снецъ господи́на а҆ндре́а кри́тскагѡ. І҆рмо́съ по два́жды. Тропарѝ коли́кѡ и҆́хъ є҆́сть. И҆ послѣдѝ і҆рмо́съ ѻ҆́ба ли̑ка вкꙋ́пѣ. Та́кожде твори́мъ и҆ въ про́чыѧ вели́кїѧ седми́цы ве́черы, на повече́рїи. Гла́съ и҃.

Пѣ́снь а҃.

І҆рмо́съ: Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀ ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.

І҆ѡ́сифово цѣломꙋ́дрїе подража́имъ вѣ́рнїи, разꙋмѣ́имъ поче́тшаго человѣ́ческое слове́сное сꙋщество̀, всѧ́цѣмъ хране́нїемъ пожи́вше добродѣ́телїю дѣйстви́тельною.

До́брыхъ недѣ́ланїе ᲂу҆подо́бисѧ смоко́вницѣ: сегѡ̀ ᲂу҆́бѡ ᲂу҆клони́мсѧ, да не и҆́зсхнемъ ꙗ҆́коже ѻ҆на̀ тогда̀, собо́рище ли́ствїемъ покрыва́ющеесѧ преднаписꙋ́ющаѧ.

Ѡ҆́бразъ влⷣчень подписꙋ́ѧ і҆ѡ́сифъ, въ ро́въ вве́рженъ быва́етъ, продае́тсѧ ѿ срѡ́дникъ, всѧ̑ терпи́тъ приснопа́мѧтный, во ѡ҆́бразъ пои́стиннѣ хрⷭ҇то́въ.

Смоко́вницы безпло́дствїѧ ᲂу҆бѣжа́вше бра́тїе, разꙋмѣ́имъ ѡ҆́бразъ, да не и҆́зсхнемъ ꙗ҆́коже ѻ҆на̀ тогда̀, є҆гда̀ возвраща́ѧсѧ чл҃вѣколю́бецъ прїи́де къ не́й а҆́лчѧ.

І҆и҃съ за мі́ръ тща́сѧ пострада́ти во́лею, и҆́детъ со ᲂу҆ч҃нкѝ свои́ми во гра́дъ і҆ерⷭ҇ли́мъ къ во́льнѣй стрⷭ҇ти, ю҆́же прїи́де пострада́ти.

Прилѣпи́вшесѧ гдⷭ҇ви всѧ̑ тща́щемꙋсѧ пострада́ти, гото́ви бꙋ́демъ на ѡ҆плева́нїе, на порꙋга̑нїѧ, и҆ на ᲂу҆ничижє́нїѧ: ꙗ҆́кѡ да пречⷭ҇тыми є҆гѡ̀ стрⷭ҇тьмѝ спросла́вимсѧ вѣ́рнїи.

Стрⷭ҇тьмѝ стра̑сти и҆сцѣлѧ́етъ, пострада́вый ѡ҆ на́съ: хотѧ́ бо произво́дитъ, на на́ше сꙋщество̀ человѣ́ческое, животвѡ́рнаѧ своѧ̑ страда̑нїѧ, да мы̀ сп҃се́мсѧ.

Сла́ва: Трѝ безнача́льна прославлѧ́ю, трѝ ст҃а пою̀, трѝ соприсносꙋ́щна во є҆ди́номъ сꙋществѣ̀ проповѣ́даю: є҆ди́нъ бо во ѻ҆ц҃ѣ̀, сн҃ѣ и҆ дх҃ѣ славосло́витсѧ бг҃ъ.

И҆ ны́нѣ, бг҃оро́диченъ: Же́злъ ᲂу҆́бѡ мѡѷсе́овъ, и҆ же́злъ а҆арѡ́новъ, стра́нное претворе́нїе, и҆ па́че ᲂу҆ма̀ смотре́нїе и҆мѣ́ша: твое́ же чре́во бг҃ороди́тельнице, ржⷭ҇тво̀ ѡ҆бновлѧ́етъ но́вое.

Сѣда́ленъ, гла́съ д҃.

Подо́бенъ: Ꙗ҆ви́лсѧ є҆сѝ:

Смоко́вницы ѡ҆сꙋжде́нїе да не предвари́тъ тѧ̀: но бл҃гі̑ѧ плоды̀ потщи́сѧ се́рдца брозда́ми дꙋшѐ творцꙋ̀ твоемꙋ̀ хрⷭ҇тꙋ̀ возвестѝ, въ покаѧ́нїи є҆мꙋ̀ приносѧ́щи.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Цѣломꙋ́дрїемъ ᲂу҆краси́вше житїѐ, и҆ мꙋ́дростїю сохрани́вше вѣ́рꙋ, пра́вды нра́вы взы́щемъ, да въ мꙋ́жествѣ послѣ́дꙋюще, хрⷭ҇то́ви сраспне́мсѧ.

Дрꙋгꙋ́ю є҆́ѵꙋ ѡ҆брѣ́тъ є҆гѵ́птѧныню, не побѣди́сѧ къ неподо́бномꙋ дѣѧ́нїю патрїа́рхъ і҆ѡ́сифъ, но ста̀ ꙗ҆́коже нѣ́кїй а҆дама́нтъ, ѿ страсте́й не ꙗ҆́тъ грѣхо́вныхъ.

Преходѧ̀ житє́йскаѧ шє́ствїѧ сп҃се мо́й, взалка́лъ є҆сѝ во́лею, сп҃се́нїѧ всѣ́хъ жела́ѧ: сегѡ́ бо взалка́лъ є҆сѝ, ѡ҆браще́нїѧ ѿ тебѐ ᲂу҆дале́нныхъ.

Пра́ѻтецъ вкꙋ́шъ ѿ дре́ва, ꙗ҆́кѡ позна́сѧ на́гъ и҆ посра́мленъ, ли́ствїе смоко́вное взе́мъ препоѧ́сасѧ: собо́рище бо ѡ҆бнаже́нное хрⷭ҇та̀ проѡбража́шесѧ.

Гото́висѧ дꙋшѐ пре́жде и҆схо́да, ᲂу҆стро́й себѐ ко ѻ҆́номꙋ житїю̀: и҆ хрⷭ҇тꙋ̀ тебѐ ра́ди пострада́ти тща́щемꙋсѧ, да тѧ̀ просла́витъ, потщи́сѧ спострада́ти, и҆ сраспѧ́тисѧ, и҆ ᲂу҆мре́ти.

Ка́кѡ не ᲂу҆жа́снетсѧ сме́рть, сп҃се мо́й; ка́кѡ не ᲂу҆бои́тсѧ а҆́дъ срѣты́й тѧ̀, по бл҃гоизволе́нїю къ стрⷭ҇ти тща́щагосѧ, и҆ ѡ҆ непра́ведныхъ пра́ведна тѧ̀ зрѧ̀ пострада́ти прише́дша;

Ла́зарево воста́нїе ви́дѣвше і҆ꙋдє́и, сщ҃е́нницы и҆ леѵі́ти клѧ́твенное согла́сїе за́вистїю ᲂу҆гото́вльше, ле́стїю преда́тельства, хрⷭ҇та̀ преда́ша на сме́рть пїла́тꙋ.

А҆́гница твоѧ̀ и҆ раба̀ и҆ дв҃а, къ стрⷭ҇ти тѧ̀ ᲂу҆стремлѧ́ющасѧ ви́дѧщи, и҆ дꙋ́шꙋ ѡ҆ на́съ полага́юща, до́браго па́стырѧ, ᲂу҆тро́бою мт҃рнею по тебѣ̀ рыда́ше.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Ꙗ҆́кѡ є҆ди́ницꙋ сꙋщество́мъ пою́ тѧ, ꙗ҆́кѡ трⷪ҇цꙋ ли́цы тѧ̀ чтꙋ̀, ѻ҆́ч҃е, и҆ сн҃е, и҆ дш҃е прест҃ы́й: безнача́льнꙋю держа́вꙋ твоегѡ̀ црⷭ҇твїѧ сла́влю во вѣ́ки.

И҆ ны́нѣ, бг҃оро́диченъ: Мо́литъ тѧ̀ хрⷭ҇тѐ бцⷣа, мо́литъ ᲂу҆чєни́къ твои́хъ собо́ръ: тво́й ми́ръ да́рꙋй мі́рови твоемꙋ̀, и҆ щедрѡ́ты твоѧ̑ пода́ждь на́мъ бога́тнѡ во вѣ́ки.

Хва́лимъ, бл҃гослови́мъ:

І҆рмо́съ: На горѣ̀ ст҃ѣ́й просла́вльшасѧ:

Пѣ́снь ѳ҃.

І҆рмо́съ: Чꙋ́жде ма́терємъ дѣ́вство, и҆ стра́нно дѣ́вамъ дѣторожде́нїе: на тебѣ̀ бцⷣе ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.

Чꙋ́жде є҆́сть нечести̑вымъ цѣломꙋ́дрїе, и҆ стра́нно пра́ведникѡмъ законопрестꙋпле́нїе, і҆ѡ́сифъ же вели́кїй ᲂу҆клони́сѧ грѣха̀, и҆ цѣломꙋ́дрїѧ бы́сть ѡ҆́бразъ, и҆ подо́бїе вои́стиннꙋ хрⷭ҇то́во.

Чꙋ́жде є҆́сть беззако́нникѡмъ бл҃гозако́нїе, и҆ стра́нно невѣ̑рнымъ бг҃оразꙋ́мїе: і҆ꙋде́є же сїѧ̑ ѿри́нꙋша за беззако́нїе. тѣ́мже и҆ є҆ди́ни са́ми наслѣ́доваша, ꙗ҆́коже смоко́вница, клѧ́твꙋ.

Взалка̀ человѣ́ческагѡ сп҃се́нїѧ, хлѣ́бъ сы́й жи́зни, хрⷭ҇то́съ и҆ бг҃ъ мо́й. тѣ́мже смоко́вницꙋ предвари́въ, безпло́дное собо́рище, ли́ствїемъ ѡ҆бра́стшꙋю зако́ннѡ, ꙗ҆́кѡ ви́дѣ, проклѧ́тъ.

Зако́нное непло́дїе проклѧ́лъ є҆сѝ, ꙗ҆́кѡ ли́ствїе процвѣта́ющее писменосѣ́нный ра́зꙋмъ, плодѡ́въ же дѣ́лъ не и҆мꙋ́щее за беззако́нїе: на́съ же всѣ́хъ бл҃года́ти сынѡ́въ, сп҃се бл҃гословѝ.

Же́злъ ᲂу҆́бѡ мѡѷсе́овъ дре́вле въ ѕмїю̀, а҆арѡ́новъ же же́злъ въ зе́лено преложи́сѧ, и҆ процвѣтѐ ли́ствїе: непло́дное же и҆зсо́хшее собо́рище законопрестꙋ́пное, въ непло́днꙋю преложи́сѧ смоко́вницꙋ.

Гото́ви і҆ꙋде́е сщ҃е́нники твоѧ̑, и҆ ᲂу҆стро́й рꙋ́цѣ къ бг҃оꙋбі́йствꙋ: се́ бо прїи́де кро́ткїй и҆ молчали́вый на стрⷭ҇ть, а҆́гнецъ сы́й и҆ па́стырь на́шъ, хрⷭ҇то́съ цр҃ь і҆и҃левъ.

Прїимѝ і҆ꙋде́е цр҃ѧ̀, се́ бо на стрⷭ҇ть прихо́дитъ во́лею, да постра́ждетъ, и҆ сп҃се́тъ зовꙋ́щыѧ непреста́ннѡ: бл҃гослове́нъ грѧды́й сп҃стѝ крⷭ҇то́мъ всѧ́чєскаѧ.

Ѡ҆брати́лъ є҆́сть і҆ꙋде́е, пра́здники твоѧ̑ въ пла́чь влⷣка, по прⷪ҇ро́чествꙋ: бг҃оꙋбі́йца бо показа́ласѧ є҆сѝ ѡ҆бра́щшагѡ дре́вле ка́мень, и҆ несѣко́мый во и҆сто́чники водны̑ѧ и҆ є҆зє́ра, ꙗ҆́коже пое́тъ дв҃дъ.

Сла́ва: Чꙋ́жде є҆́сть беззакѡ́ннымъ, є҆́же тѧ̀ сла́вити безнача́льное сꙋщество̀, ѻ҆ц҃а̀, и҆ сн҃а, и҆ ст҃а́гѡ дх҃а, несозда́нное вседержи́тельство, и҆́мже ве́сь мі́ръ содѣ́ласѧ, ма́нїемъ бж҃е́ственныѧ держа́вы твоеѧ̀.

И҆ ны́нѣ: Приво́димъ въ мл҃твꙋ бцⷣꙋ: тоѧ̀ мл҃твами и҆ а҆пⷭ҇лъ твои́хъ, ѻ҆́бщники ны̀ сотворѝ влⷣко бл҃ги́хъ твои́хъ, и҆ свѣ́тлости сподо́би сп҃се воскрⷭ҇нїѧ твоегѡ̀.

И҆ па́ки і҆рмо́съ то́йже: Чꙋ́жде ма́терємъ: Та́же и҆ про́чее ѻ҆бы́чно. И҆ ѿпꙋ́стъ.

Вѣ́домо бꙋ́ди, ꙗ҆́кѡ въ сїю̀ ст҃ꙋ́ю вели́кꙋю седми́цꙋ є҆ди́ною соверша́емъ ѱалти́рь, и҆ глаго́лемъ на ᲂу҆́трени каѳі́смы трѝ, и҆ на часѣ́хъ, г҃-мъ и҆ ѕ҃- мъ, двѣ̀. И҆ соверша́ютсѧ въ сре́дꙋ. Въ вели́кꙋю же сꙋббѡ́тꙋ стїхосло́вѧтсѧ непоро́чны, въ вече́рнѧхъ же глаго́лемъ ѻ҆бы́чнѡ. Ко гдⷭ҇ꙋ внегда̀ скорбѣ́ти мѝ: