Во ст҃ы́й и҆ вели́кїй понедѣ́льникъ ве́чера,

По предначина́тельномъ ѱалмѣ̀ ѻ҆бы́чное стїхосло́вїе: Ко гдⷭ҇ꙋ внегда̀ скорбѣ́ти мѝ, воззва́хъ: На Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры самогла́сны днѐ д҃ по два́жды, а҆ два̀ по є҆ди́ножды, гла́съ а҃:

Грѧды́й гдⷭ҇ь къ во́льнѣй стрⷭ҇ти, а҆пⷭ҇лѡмъ глаго́лаше на пꙋтѝ: сѐ восхо́димъ во і҆ерⷭ҇ли́мъ, и҆ преда́стсѧ сн҃ъ чл҃вѣ́ческїй, ꙗ҆́коже є҆́сть пи́сано ѡ҆ не́мъ. прїиди́те ᲂу҆̀бо и҆ мы̀, ѡ҆чище́нными смы́слы, сше́ствꙋимъ є҆мꙋ̀, и҆ сраспне́мсѧ, и҆ ᲂу҆мертви́мсѧ є҆гѡ̀ ра́ди житє́йскимъ сласте́мъ, да и҆ ѡ҆живе́мъ съ ни́мъ, и҆ ᲂу҆слы́шимъ вопїю́ща є҆го̀: не ктомꙋ̀ въ земны́й і҆еросолѵ́мъ за є҆́же страда́ти: но восхождꙋ̀ ко ѻ҆ц҃ꙋ̀ моемꙋ̀ и҆ ѻ҆ц҃ꙋ̀ ва́шемꙋ, и҆ бг҃ꙋ моемꙋ̀ и҆ бг҃ꙋ ва́шемꙋ, и҆ совозвы́шꙋ ва́съ въ го́рнїй і҆еросолѵ́мъ, въ црⷭ҇тво нбⷭ҇ное. Два́жды.

Гла́съ є҃: Дости́гше вѣ́рнїи сп҃си́тельнꙋю стрⷭ҇ть хрⷭ҇та̀ бг҃а, неизрече́нное є҆гѡ̀ долготерпѣ́нїе просла́вимъ: ꙗ҆́кѡ да бл҃гоꙋтро́бїемъ свои́мъ совоздви́гнетъ и҆ на́съ ᲂу҆мерщвле́нныхъ грѣхо́мъ, ꙗ҆́кѡ бл҃гъ и҆ чл҃вѣколю́бецъ. Два́жды.

Гдⷭ҇и грѧды́й къ страда́нїю, твоѧ̑ ᲂу҆твержда́ѧ ᲂу҆ч҃нкѝ, глаго́лалъ є҆сѝ ѻ҆со́бь прїе́мъ и҆̀хъ: ка́кѡ глагѡ́лъ мои́хъ не по́мните, ꙗ҆̀же пре́жде реко́хъ ва́мъ; ꙗ҆́кѡ всѧ́комꙋ прⷪ҇ро́кꙋ нѣ́сть пи́сано, то́кмѡ во і҆еросолѵ́мѣ ᲂу҆бїе́нꙋ бы́ти. ны́нѣ ᲂу҆́бѡ вре́мѧ настои́тъ, є҆́же реко́хъ ва́мъ: се́ бо предаю́сѧ рꙋка́ма грѣ́шныхъ порꙋ́ганъ бы́ти, и҆̀же и҆ крⷭ҇тꙋ́ мѧ пригвозди́вше, и҆ погребе́нїю преда́вше, ѡ҆ме́рзена вмѣнѧ́тъ ꙗ҆́кѡ ме́ртва. ѻ҆ба́че дерза́йте, тридне́венъ бо воста́нꙋ, въ ра́дость вѣ́рныхъ, и҆ жи́знь вѣ́чнꙋю. Два́жды.

Гдⷭ҇и, къ та́инствꙋ неизглаго́ланномꙋ твоегѡ̀ смотре́нїѧ, не довлѣ́ющи сынѡ́въ зеведе́овыхъ ма́ти, проша́ше тѧ̀, вре́меннагѡ црⷭ҇тва по́чести дарова́тисѧ ча́дѡмъ є҆ѧ̀: но вмѣ́стѡ тоѧ̀, ча́шꙋ сме́рти ѡ҆бѣща́лъ є҆сѝ пи́ти дрꙋгѡ́мъ твои̑мъ: ю҆́же ча́шꙋ пре́жде си́хъ пи́ти са́мъ глаго́лалъ є҆сѝ, грѣхѡ́въ ѡ҆чище́нїе. тѣ́мже тебѣ̀ вопїе́мъ: сп҃се́нїе дꙋ́шъ на́шихъ, сла́ва тебѣ̀. Два́жды.

Гдⷭ҇и, совершє́ннѣйшаѧ мꙋ́дрствовати, твоѧ̑ наказꙋ́ѧ ᲂу҆ч҃нкѝ, не ᲂу҆подо́битисѧ ꙗ҆зы́кѡмъ глаго́лалъ є҆сѝ, во є҆́же ѡ҆блада́ти ме́ньшими: не та́кѡ бо бꙋ́детъ ва́мъ мои̑мъ ᲂу҆ч҃нкѡ́мъ, ꙗ҆́кѡ ни́щїй хотѧ̀ є҆́смь. пе́рвый ᲂу҆́бѡ ва́съ, да бꙋ́детъ всѣ̑мъ слꙋга̀: нача́льствꙋѧй же, ꙗ҆́кѡ нача́льствꙋемый: пред̾изѧ́щный же, ꙗ҆́кѡ послѣ́днѣйшїй. и҆́бо прїидо́хъ са́мъ ѡ҆бнища́вшемꙋ а҆да́мꙋ послꙋжи́ти, и҆ и҆збавле́нїе да́ти за мно́гихъ дꙋ́шꙋ мою̀, вопїю́щихъ мѝ: сла́ва тебѣ̀.

Гла́съ и҃: И҆зсо́хшїѧ смоко́вницы за непло́дїе, преще́нїѧ ᲂу҆боѧ́вшесѧ бра́тїе, плоды̀ достѡ́йны покаѧ́нїѧ принесе́мъ хрⷭ҇тꙋ̀, подаю́щемꙋ на́мъ ве́лїю млⷭ҇ть.

Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ є҆гѵ́птѧныню ѡ҆брѣ́тъ ѕмі́й глаго́лы, тща́шесѧ ласка́ньми запѧ́ти і҆ѡ́сифа: но то́й ѡ҆ста́вивъ ри́зꙋ, бѣжа̀ грѣха̀, и҆ на́гъ не стыдѧ́шесѧ, ꙗ҆́коже первозда́нный пре́жде преслꙋша́нїѧ. тогѡ̀ мл҃твами хрⷭ҇тѐ поми́лꙋй на́съ.

Та́же вхо́дъ со є҆ѵⷢ҇лїемъ. Свѣ́те ти́хїй:

Прокі́менъ, ѱало́мъ рк҃з. Гла́съ ѕ҃: Бл҃гослови́тъ тѧ̀ гдⷭ҇ь ѿ сїѡ́на, и҆ ᲂу҆́зриши бл҃га̑ѧ і҆ерⷭ҇ли́ма. Сті́хъ: Бл҃же́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀.

И҆схо́да чте́нїе. [Глава̀ а҃, ст. а҃-к҃.]

Сїѧ̑ и҆мена̀ сынѡ́въ і҆и҃левыхъ, входѧ́щихъ во є҆гѵ́петъ вкꙋ́пѣ со і҆а́кѡвомъ ѻ҆тце́мъ и҆́хъ, кі́йждо со всѣ́мъ до́момъ свои́мъ внидо́ша: Рꙋві́мъ, сѷмеѡ́нъ, леві́й, і҆ꙋ́да, І҆ссаха́ръ, завꙋлѡ́нъ и҆ венїамі́нъ, Да́нъ и҆ нефѳалі́мъ, га́дъ и҆ а҆си́ръ: і҆ѡ́сифъ же бѧ́ше во є҆гѵ́птѣ. Бѧ́ше же всѣ́хъ дꙋ́шъ и҆зше́дшихъ и҆з̾ і҆а́кѡва, се́дмьдесѧтъ пѧ́ть. Оу҆́мре же і҆ѡ́сифъ, и҆ всѧ̑ бра́тїѧ є҆гѡ̀, и҆ ве́сь ро́дъ ѻ҆́ный. Сы́нове же і҆и҃лєвы возрасто́ша, и҆ ᲂу҆мно́жишасѧ, и҆ мно́зи бы́ша, и҆ ᲂу҆крѣпи́шасѧ ѕѣлѡ̀ ѕѣлѡ̀: ᲂу҆мно́жи же и҆̀хъ землѧ̀. Воста́ же ца́рь и҆́нъ во є҆гѵ́птѣ, и҆́же не зна́ше і҆ѡ́сифа. Рече́ же ꙗ҆зы́кꙋ своемꙋ̀: сѐ ро́дъ сынѡ́въ і҆и҃левыхъ вели́кое мно́жество, и҆ ᲂу҆крѣплѧ́етсѧ па́че на́съ. Прїиди́те ᲂу҆̀бо прехи́тримъ и҆̀хъ, да не когда̀ ᲂу҆мно́жатсѧ: и҆ є҆гда̀ а҆́ще приключи́тсѧ на́мъ бра́нь, приложа́тсѧ и҆ сі́и къ сꙋпоста́тѡмъ, и҆ ѡ҆долѣ́вше на́мъ, и҆зы́дꙋтъ и҆з̾ землѝ [на́шеѧ]. И҆ приста́ви над̾ ни́ми приста́вники дѣ́лъ, да ѡ҆ѕло́бѧтъ и҆̀хъ въ дѣ́лѣхъ: и҆ созда́ша гра́ды тве́рды фараѡ́нꙋ, пиѳѡ̀, и҆ рамессі̀, и҆ ѡ҆́нъ, и҆́же є҆́сть и҆лїѻпо́ль. Поели́кꙋ же и҆̀хъ смирѧ́хꙋ, толи́кѡ мно́жайшїи быва́хꙋ, и҆ ᲂу҆крѣплѧ́хꙋсѧ ѕѣлѡ̀ ѕѣлѡ̀. и҆ гнꙋша́хꙋсѧ є҆гѵ́птѧне сынмѝ і҆и҃левыми: И҆ наси́лїе творѧ́хꙋ є҆гѵ́птѧне сынѡ́мъ і҆и҃лєвымъ нꙋ́ждею. И҆ болѣ́зненнꙋ тѣ̑мъ жи́знь творѧ́хꙋ въ дѣ́лѣхъ жесто́кихъ, бре́нїемъ, и҆ плїнѳодѣ́ланїемъ, и҆ всѣ́ми дѣ́лы, ꙗ҆̀же въ полѧ́хъ, во всѣ́хъ дѣ́лѣхъ, и҆́миже порабоща́хꙋ и҆̀хъ съ нꙋ́ждею. И҆ речѐ ца́рь є҆гѵ́петскїй ба́бамъ є҆врє́йскимъ: є҆ди́ной и҆́хъ и҆́мѧ, сепфѡ́ра, и҆ и҆́мѧ второ́й, фꙋ́а. И҆ речѐ [и҆̀мъ]: є҆гда̀ ба́бите є҆вре́анынѧмъ, и҆ сꙋ́ть къ рожде́нїю, а҆́ще ᲂу҆́бѡ мꙋ́жескїй по́лъ бꙋ́детъ, ᲂу҆бива́йте є҆го̀: а҆́ще же же́нскїй, снабдѣва́йте є҆го̀. Оу҆боѧ́шасѧ же ба̑бы бг҃а, и҆ не сотвори́ша, ꙗ҆́коже повелѣ̀ и҆̀мъ ца́рь є҆гѵ́петскїй, и҆ живлѧ́хꙋ мꙋ́жескїй по́лъ. Призва́ же ца́рь є҆гѵ́петскїй ба̑бы, и҆ речѐ и҆̀мъ: что̀ ꙗ҆́кѡ сотвори́сте ве́щь сїю̀, и҆ ѡ҆живлѧ́ете мꙋ́жескїй по́лъ; Реко́ша же ба̑бы фараѡ́нꙋ: не ꙗ҆́кѡ жєны̀ є҆гѵ́птѧныни, та́кѡ и҆ жєны̀ є҆вре́аныни: ражда́ютъ бо пре́жде не́же вни́ти къ ни̑мъ ба́бамъ, и҆ ражда́хꙋ. Бл҃го же творѧ́ше бг҃ъ ба́бамъ, и҆ мно́жахꙋсѧ лю́дїе, и҆ ᲂу҆крѣплѧ́хꙋсѧ ѕѣлѡ̀.

Прокі́менъ, ѱало́мъ рк҃и, гла́съ ѕ҃: Бл҃гослови́хомъ вы̀ во и҆́мѧ гдⷭ҇не. Сті́хъ: Мно́жицею бра́шасѧ со мно́ю ѿ ю҆́ности моеѧ̀.

І҆́ѡва чте́нїе. [Глава̀ а҃, ст. а҃-в҃і.]

Человѣ́къ нѣ́кїй бѧ́ше во странѣ̀ а҆ѵсїтїді́йстѣй, є҆мꙋ́же и҆́мѧ і҆́ѡвъ: и҆ бѣ̀ человѣ́къ ѻ҆́нъ и҆́стиненъ, непоро́ченъ, првⷣнъ, бг҃очести́въ, ᲂу҆далѧ́ѧйсѧ ѿ всѧ́кїѧ лꙋка́выѧ ве́щи. Бы́ша же є҆мꙋ̀ сы́нове се́дмь, и҆ дщє́ри трѝ. И҆ бѧ́хꙋ ско́ти є҆гѡ̀, ѻ҆ве́цъ се́дмь ты́сѧщъ, вельблю́дѡвъ трѝ ты́сѧщы: сꙋпрꙋ̑гъ волѡ́въ пѧ́ть сѡ́тъ, и҆ ѡ҆сли́цъ пасо́мыхъ пѧ́ть сѡ́тъ, и҆ слꙋ́гъ мно́гѡ ѕѣлѡ̀, и҆ дѣла̀ вє́лїѧ бѧ́хꙋ є҆мꙋ̀ на землѝ: и҆ бѣ̀ человѣ́къ ѻ҆́ный бл҃горо́днѣйшїй сꙋ́щихъ ѿ востѡ́къ со́лнца. Сходѧ́щесѧ же сы́нове є҆гѡ̀ дрꙋ́гъ ко дрꙋ́гꙋ, творѧ́хꙋ пи́ръ на кі́йждо де́нь, спое́млюще вкꙋ́пѣ и҆ трѝ сєстры̀ своѧ̑, ꙗ҆́сти и҆ пи́ти съ ни́ми. И҆ є҆гда̀ скончава́шасѧ дні́е пи́ра, посыла́ше і҆́ѡвъ и҆ ѡ҆чища́ше и҆̀хъ, востаѧ̀ заꙋ́тра: и҆ приноша́ше ѡ҆ ни́хъ жє́ртвы по числꙋ̀ и҆́хъ, и҆ тельца̀ є҆ди́наго ѡ҆ грѣсѣ̀, ѡ҆ дꙋша́хъ и҆́хъ. глаго́лаше бо і҆́ѡвъ: не́гли когда̀ сы́нове моѝ согрѣши́ша, и҆ въ мы́сли свое́й ѕла̑ѧ помы́слиша проти́вꙋ бг҃а; та́кѡ ᲂу҆̀бо творѧ́ше і҆́ѡвъ всѧ̑ дни̑. И҆ бы́сть ꙗ҆́кѡ де́нь се́й, и҆ сѐ прїидо́ша а҆́гг҃ли бж҃їи предста́ти пред̾ гдⷭ҇емъ: и҆ дїа́волъ прїи́де съ ни́ми. И҆ речѐ гдⷭ҇ь дїа́волꙋ: ѿкꙋ́дꙋ прише́лъ є҆сѝ; и҆ ѿвѣща́въ дїа́волъ гдⷭ҇ви, речѐ: ѡ҆бше́дъ зе́млю, и҆ проше́дъ поднбⷭ҇нꙋю сѐ є҆́смь. И҆ речѐ є҆мꙋ̀ гдⷭ҇ь: внѧ́лъ ли є҆сѝ мы́слїю твое́ю на раба̀ моего̀ і҆́ѡва; занѐ нѣ́сть ꙗ҆́кѡ ѻ҆́нъ, на землѝ человѣ́къ непоро́ченъ, и҆́стиненъ, бг҃очести́въ, ᲂу҆далѧ́ѧйсѧ ѿ всѧ́кїѧ лꙋка́выѧ ве́щи. Ѿвѣща́ же дїа́волъ, и҆ речѐ пред̾ гдⷭ҇емъ: Є҆да̀ тꙋ́не і҆́ѡвъ чти́тъ гдⷭ҇а; не ты́ ли ѡ҆гради́лъ є҆сѝ внѣ̑шнѧѧ є҆гѡ̀, и҆ внꙋ́трєннѧѧ до́мꙋ є҆гѡ̀, и҆ ꙗ҆̀же внѣ̀ всѣ́хъ сꙋ́щихъ є҆гѡ̀ ѻ҆́крестъ; дѣла́ же рꙋкꙋ̀ є҆гѡ̀ бл҃гослови́лъ є҆сѝ, и҆ скоты̀ є҆гѡ̀ мнѡ́ги сотвори́лъ є҆сѝ на землѝ. Но послѝ рꙋ́кꙋ твою̀, и҆ косни́сѧ всѣ́хъ, ꙗ҆̀же и҆́мать: а҆́ще не въ лице́ тѧ бл҃гослови́тъ. Тогда̀ речѐ гдⷭ҇ь дїа́волꙋ: сѐ всѧ̑ є҆ли̑ка сꙋ́ть є҆мꙋ̀, даю̀ въ рꙋ́кꙋ твою̀, но самогѡ̀ да не косне́шисѧ. и҆ и҆зы́де дїа́волъ ѿ гдⷭ҇а.

Та́же, Да и҆спра́витсѧ мл҃тва моѧ̀: И҆ посе́мъ є҆ѵⷢ҇лїе ѿ матѳе́а, зача́ло ч҃и: Во вре́мѧ ѻ҆́но, сѣдѧ́щꙋ і҆и҃сꙋ: и҆ про́чее послѣ́дованїе преждеѡсщ҃е́нныхъ, по ѻ҆бы́чаю. Та́кѡ до́лженствꙋетъ бы́ти и҆ въ вели́кїй вто́рникъ, и҆ въ вели́кꙋю сре́дꙋ. А҆́ще же нѣ́сть преждеѡсщ҃е́нныѧ: Пое́мъ на Гдⷭ҇и воззва́хъ, полови́нꙋ ѿ стїхи́ръ, на ѕ҃. Стїхи́ра, гла́съ а҃: Грѧды́й гдⷭ҇ь къ во́льной стрⷭ҇ти: два́жды. Дости́гше вѣ́рнїи: два́жды. Гдⷭ҇и, къ та́инствꙋ неизглаго́ланномꙋ: два́жды. Сла́ва, и҆ ны́нѣ: Гдⷭ҇и грѧды́й къ страда́нїю: По си́хъ вхо́дъ съ є҆ѵⷢ҇лїемъ: и҆ Свѣ́те ти́хїй: Та́же прокі́менъ, и҆ парємїѝ, и҆ є҆ѵⷢ҇лїе. Та́же, Сподо́би гдⷭ҇и: И҆ є҆ктенїа̀: И҆спо́лнимъ вече́рнюю: На стїхо́внѣ, ѿ тѣ́хже стїхи́ръ, стїхи́ра, гла́съ є҃: Гдⷭ҇и совершє́ннѣйшаѧ мꙋ́дрствовати: Сті́хъ: Къ тебѣ̀ возведо́хъ ѻ҆́чи моѝ: И҆ па́ки тꙋ́южде стїхи́рꙋ. Сті́хъ: Поми́лꙋй на́съ гдⷭ҇и: Гла́съ и҃: И҆зсо́хшаѧ смоко́вницы: Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ: Та́же, Ны́нѣ ѿпꙋща́еши: И҆ прѡ́чаѧ ѻ҆бы̑чнаѧ съ покло́ны. И҆ по коне́чномъ трист҃о́мъ, и҆ по Ѻ҆́ч҃е на́шъ: Гдⷭ҇и поми́лꙋй, в҃і. Та́же, мл҃тва, Всест҃а́ѧ трⷪ҇це: и҆ Бꙋ́ди и҆́мѧ гдⷭ҇не: И҆ ѿпꙋ́стъ.

Си́це ᲂу҆́бѡ твори́мъ во вто́рникъ и҆ въ сре́дꙋ.

[зрѝ] На трапе́зѣ же ꙗ҆ди́мъ сꙋхоѧде́нїе, и҆ си́мъ ᲂу҆довлѧ́емсѧ. И҆ ꙗ҆́коже въ пе́рвꙋю недѣ́лю ст҃а́гѡ сегѡ̀ поста̀: си́це и҆ въ сїѧ̑ дни̑, въ вели́кїй понедѣ́льникъ, во вто́рникъ и҆ въ сре́дꙋ пости́тисѧ подоба́етъ.

[зрѝ] Вѣ́дати бо подоба́етъ, ꙗ҆́кѡ и҆ шесты́й вели́кїй собо́ръ повелѣ̀, сп҃си́тельныѧ стрⷭ҇ти дни̑ въ постѣ̀, и҆ мл҃твѣ, и҆ ᲂу҆миле́нїи се́рдца сотворѧ́ти вѣ̑рнымъ: въ полꙋ́нощи же вели́кїѧ сꙋббѡ́ты, ѡ҆ставлѧ́ти по́стъ, бж҃е́ствєннымъ є҆ѵⷢ҇лі́стѡмъ матѳе́ю и҆ лꙋцѣ̀: ѻ҆́вомꙋ ᲂу҆́бѡ по́здѣ въ сꙋббѡ́тꙋ глаго́ланїемъ, ѻ҆́вомꙋ же ᲂу҆́тромъ глꙋбо́кимъ, ме́длемое на́мъ но́щи написꙋ́ющымъ.