Статїѧ̀ втора́ѧ
Начина́етъ лѣ́вый ли́къ бл҃гочи́ннѡ тропа́рь:
Досто́йно є҆́сть велича́ти тѧ̀ жизнода́вца, на крⷭ҇тѣ̀ рꙋ́цѣ просте́ршаго, и҆ сокрꙋ́шшаго держа́вꙋ вра́жїю.
[ѻ҃в] Рꙋ́цѣ твоѝ сотвори́стѣ мѧ̀, и҆ созда́стѣ мѧ̀: вразꙋми́ мѧ, и҆ наꙋчꙋ́сѧ за́повѣдемъ твои̑мъ.
Досто́йно є҆́сть велича́ти тѧ̀ всѣ́хъ зижди́телѧ: твои́ми бо страда́ньми и҆́мамы безстра́стїе, и҆зба́вльшесѧ тлѣ́нїѧ.
[ѻ҃д] Боѧ́щїисѧ тебѐ ᲂу҆́зрѧтъ мѧ̀ и҆ возвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ.
Оу҆жасе́сѧ землѧ̀, и҆ со́лнце сп҃се скры́сѧ, тебѣ̀ невече́рнемꙋ свѣ́тꙋ хрⷭ҇тѐ, заше́дшꙋ во гро́бѣ пло́тски.
[ѻ҃є] Разꙋмѣ́хъ гдⷭ҇и, ꙗ҆́кѡ пра́вда сꙋдьбы̑ твоѧ̑, и҆ вои́стиннꙋ смири́лъ мѧ̀ є҆сѝ.
Оу҆снꙋ́лъ є҆сѝ хрⷭ҇тѐ, є҆стественноживо́тнымъ сно́мъ во гро́бѣ, и҆ ѿ тѧ́жкагѡ сна̀ грѣхо́внагѡ воздви́глъ є҆сѝ ро́дъ человѣ́ческїй.
[ѻ҃ѕ] Бꙋ́ди же млⷭ҇ть твоѧ̀, да ᲂу҆тѣ́шитъ мѧ̀, по словесѝ твоемꙋ̀ рабꙋ̀ твоемꙋ̀.
Є҆ди́на же́нъ, кромѣ̀ болѣ́зней роди́хъ тѧ̀ ча́до, болѣ̑зни же ны́нѣ терплю̀ стрⷭ҇тїю твое́ю нестерпи̑мыѧ, глаго́лаше чⷭ҇таѧ.
[ѻ҃з] Да прїи́дꙋтъ мнѣ̀ щедрѡ́ты твоѧ̑, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть.
Горѣ́ тѧ сп҃се, неразлꙋ́чнѡ со ѻ҆ц҃е́мъ сꙋ́ща, до́лѣ же ме́ртва просте́рта на землѝ, ᲂу҆жаса́ютсѧ зрѧ́ще серафі́ми.
[ѻ҃и] Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀, а҆́зъ же поглꙋмлю́сѧ въ за́повѣдехъ твои́хъ.
Раздира́етсѧ цр҃ко́внаѧ завѣ́са твои́мъ распѧ́тїемъ, покрыва́ютъ свѣти̑ла сло́ве свѣ́тъ, тебѣ̀ скры́вшꙋсѧ сл҃нцꙋ под̾ зе́млю.
[ѻ҃ѳ] Да ѡ҆братѧ́тъ мѧ̀ боѧ́щїисѧ тебѐ, и҆ вѣ́дѧщїи свидѣ̑нїѧ твоѧ̑.
Землѝ и҆знача́ла є҆ди́нѣмъ ма́нїемъ водрꙋзи́вый крꙋ́гъ, бездыха́ненъ ꙗ҆́кѡ человѣ́къ за́йде под̾ зе́млю: ᲂу҆жасни́сѧ видѣ́нїемъ нб҃о.
[п҃] Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ.
Заше́лъ є҆сѝ под̾ зе́млю, рꙋко́ю твое́ю созда́вый человѣ́ка, да воздви́гнеши ѿ паде́нїѧ собо́ры человѣ́чєскїѧ всеси́льною держа́вою.
[п҃а] И҆счеза́етъ во сп҃се́нїе твоѐ дꙋша̀ моѧ̀, на словеса̀ твоѧ̑ ᲂу҆пова́хъ.
Пла́чь свѧще́нный прїиди́те воспои́мъ хрⷭ҇тꙋ̀ ᲂу҆ме́ршемꙋ, ꙗ҆́кѡ дре́вле жєны̀ мѷронѡ́сицы, да и҆ ра́дꙋйсѧ ᲂу҆слы́шимъ съ ни́ми.
[п҃в] И҆счезо́ша ѻ҆́чи моѝ въ сло́во твоѐ, глаго́люще: когда̀ ᲂу҆тѣ́шиши мѧ̀;
Мѵ́ро вои́стиннꙋ є҆сѝ ты̀ сло́ве неистощи́мое: тѣ́мже тѝ и҆ мѵ́ра приноша́хꙋ, ꙗ҆́кѡ ме́ртвꙋ живо́мꙋ, жєны̀ мѷронѡ́сицы.
[п҃г] Занѐ бы́хъ ꙗ҆́кѡ мѣ́хъ на сла́нѣ, ѡ҆правда́нїй твои́хъ не забы́хъ.
А҆́дѡва ᲂу҆́бѡ погребе́нъ ца̑рствїѧ хрⷭ҇тѐ сокрꙋша́еши, сме́ртїю же сме́рть ᲂу҆мерщвлѧ́еши, и҆ тлѣ́нїѧ свобожда́еши земнорѡ́дныѧ.
[п҃д] Коли́кѡ є҆́сть дне́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сꙋ́дъ;
То́ки жи́зни пролива́ющаѧ бж҃їѧ премꙋ́дрость, во гро́бъ заходѧ́щи, животвори́тъ сꙋ́щыѧ въ незаходи́мыхъ а҆́довыхъ мѣ́стѣхъ.
[п҃є] Повѣ́даша мнѣ̀ законопрестꙋ̑пницы глꙋмлє́нїѧ, но не ꙗ҆́кѡ зако́нъ тво́й гдⷭ҇и.
Да человѣ́ческое ѡ҆бновлю̀ сокрꙋше́нное є҆стество̀, ᲂу҆ѧ́звленъ є҆́смь сме́ртїю хотѧ̀ пло́тїю: мт҃и моѧ̀, не терза́йсѧ рыда́ньми.
[п҃ѕ] Всѧ̑ за́пѡвѣди твоѧ̑ и҆́стина, непра́веднѡ погна́ша мѧ̀, помози́ ми.
Заше́лъ є҆сѝ под̾ зе́млю свѣтоно́сецъ пра́вды, и҆ мє́ртвыѧ ꙗ҆́коже ѿ сна̀ воздви́глъ є҆сѝ, ѿгна́въ всѧ́кꙋю тьмꙋ̀ сꙋ́щꙋю во а҆́дѣ.
[п҃з] Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдей твои́хъ.
Зе́рно двоера́сленное є҆стественожи́зненное, въ бока̀ земна̑ѧ сѣ́етсѧ со слеза́ми дне́сь: но прозѧ́бше, мі́ръ радостносотвори́тъ.
[п҃и] По млⷭ҇ти твое́й живи́ мѧ, и҆ сохраню̀ свидѣ̑нїѧ ᲂу҆́стъ твои́хъ.
Оу҆боѧ́сѧ а҆да́мъ, бг҃ꙋ ходѧ́щꙋ въ раѝ: ра́дꙋетсѧ же, ко а҆́дꙋ соше́дшꙋ, пады́й пре́жде, и҆ ны́нѣ воздвиза́емь.
[п҃ѳ] Во вѣ́къ гдⷭ҇и, сло́во твоѐ пребыва́етъ на нб҃сѝ.
Жре́тъ тебѣ̀ жє́ртвы слє́зныѧ ро́ждшаѧ тѧ̀ хрⷭ҇тѐ, пло́тїю положе́нꙋ во гро́бѣ, вопїю́щи: воста́ни ча́до, ꙗ҆́коже предре́клъ є҆сѝ.
[ч҃] Въ ро́дъ и҆ ро́дъ и҆́стина твоѧ̀, ѡ҆снова́лъ є҆сѝ зе́млю, и҆ пребыва́етъ.
Во гро́бѣ і҆ѡ́сифъ бл҃гоговѣ́йнѡ тѧ̀ но́вѣмъ сокрыва́ѧ пѣ̑сни и҆схѡ́дныѧ бг҃олѣ̑пныѧ пое́тъ тебѣ̀, смѣшє́ныѧ рыда́ньми сп҃се.
[ч҃а] Оу҆чине́нїемъ твои́мъ пребыва́етъ де́нь, ꙗ҆́кѡ всѧ́чєскаѧ рабѡ́тна тебѣ̀.
Гвоздьми́ тѧ крⷭ҇тꙋ̀ пригвожде́на, мт҃и твоѧ̀ сло́ве зрѧ́щи, гвоздьмѝ печа́ли го́рькїѧ пронза́етъ, и҆ стрѣла́ми дꙋ́шꙋ.
[ч҃в] Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ.
Тѧ̀ всѣ́хъ наслажде́нїе мт҃и зрѧ́щи, питїе́мъ напаѧ́ема го́рькимъ, слеза́ми лицѐ ѡ҆мака́етъ го́рцѣ.
[ч҃г] Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ.
Оу҆ѧзвлѧ́юсѧ лю́тѣ, и҆ растерза́юсѧ ᲂу҆тро́бою сло́ве, зрѧ́щи непра́ведное твоѐ заколе́нїе, глаго́лаше пречⷭ҇таѧ съ пла́чемъ.
[ч҃д] Тво́й є҆́смь а҆́зъ, сп҃си́ мѧ, ꙗ҆́кѡ ѡ҆правда́нїй твои́хъ взыска́хъ.
Ѻ҆́ко сла́дкое, и҆ ᲂу҆стнѣ̀ твоѝ ка́кѡ заключꙋ̀ сло́ве; ка́кѡ же тѧ̀ мертволѣ́пнѡ погребꙋ̀; ᲂу҆жаса́юсѧ, вопїѧ́ше і҆ѡ́сифъ.
[ч҃є] Менѐ жда́ша грѣ̑шницы погꙋби́ти мѧ̀, свидѣ̑нїѧ твоѧ̑ разꙋмѣ́хъ.
Пѣ̑сни і҆ѡ́сифъ и҆ нїкоди́мъ надгрѡ́бныѧ пою́тъ хрⷭ҇тꙋ̀ ᲂу҆ме́ршемꙋ ны́нѣ, пою́тъ же съ ни́ми и҆ серафі́ми.
[ч҃ѕ] Всѧ́кїѧ кончи́ны ви́дѣхъ коне́цъ, широка̀ за́повѣдь твоѧ̀ ѕѣлѡ̀.
Захо́диши под̾ зе́млю сп҃се, сл҃нце пра́вды: тѣ́мже ро́ждшаѧ тѧ̀ лꙋна̀ печа́льми ѡ҆скꙋдѣва́етъ, ви́да твоегѡ̀ лиша́ема.
[ч҃з] Ко́ль возлюби́хъ зако́нъ тво́й гдⷭ҇и, ве́сь де́нь поꙋче́нїе моѐ є҆́сть.
Оу҆жасе́сѧ а҆́дъ сп҃се, зрѧ́ тѧ жизнода́вца, бога́тство ѻ҆́нагѡ ᲂу҆пражднѧ́юща, и҆ ꙗ҆̀же ѿ вѣ́ка мє́ртвыѧ возставлѧ́юща.
[ч҃и] Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть.
Со́лнце свѣ́тъ возсїѧва́етъ по но́щи сло́ве: и҆ ты́ же воскр҃съ, просїѧва́еши по сме́рти ꙗ҆́снѡ, ꙗ҆́кѡ ѿ черто́га.
[ч҃ѳ ] Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ̑нїѧ твоѧ̑ поꙋче́нїе моѐ є҆́сть.
Землѧ́ тѧ созда́телю, въ нѣ́дра прїе́мши, тре́петомъ содержи́ма сп҃се трѧсе́тсѧ, ᲂу҆спи́вши мє́ртвыѧ трѧсе́нїемъ.
[р҃] Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̑ взыска́хъ.
Мѵ́ры тѧ̀ хрⷭ҇тѐ, нїкоди́мъ и҆ бл҃гоѡбра́зный, ны́нѣ новолѣ́пнѡ помазꙋ́юще, ᲂу҆жасни́сѧ, вопїѧ́хꙋ, всѧ̀ землѧ̀.
[р҃а] Ѿ всѧ́кагѡ пꙋтѝ лꙋка́ва возбрани́хъ нога́мъ мои̑мъ, ꙗ҆́кѡ да сохраню̀ словеса̀ твоѧ̑.
Заше́лъ є҆сѝ свѣтотво́рче, и҆ съ тобо́ю за́йде свѣ́тъ со́лнца: тре́петомъ же тва́рь содержи́тсѧ, всѣ́хъ тѧ̀ проповѣ́дающи творца̀.
[р҃в] Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ.
Ка́мень ᲂу҆глажде́нный, краеꙋго́льный покрыва́етъ ка́мень: человѣ́къ же сме́ртный ꙗ҆́кѡ сме́ртна, бг҃а покрыва́етъ ны́нѣ во гро́бѣ: ᲂу҆жасни́сѧ землѐ.
[р҃г] Ко́ль сладка̀ горта́ни моемꙋ̀ словеса̀ твоѧ̑, па́че ме́да ᲂу҆стѡ́мъ мои̑мъ.
Ви́ждь ᲂу҆ч҃нка̀, є҆го́же люби́лъ є҆сѝ, и҆ твою̀ мт҃рь ча́до, и҆ вѣща́нїе да́ждь сладча́йшее, взыва́ше пла́чꙋщи чⷭ҇таѧ.
[р҃д] Ѿ за́повѣдей твои́хъ разꙋмѣ́хъ, сегѡ̀ ра́ди возненави́дѣхъ всѧ́къ пꙋ́ть непра́вды.
Ты̀ сло́ве, ꙗ҆́кѡ сы́й живота̀ да́тель, і҆ꙋде́ѡвъ, на крⷭ҇тѣ̀ простры́йсѧ, не ᲂу҆мертви́лъ є҆сѝ, но воскреси́лъ є҆сѝ и҆ си́хъ мє́ртвыѧ.
[р҃є] Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои̑мъ.
Добро́ты сло́ве пре́жде не и҆мѣ́лъ є҆сѝ, нижѐ ви́да, є҆гда̀ страда́лъ є҆сѝ, но воскр҃съ провозсїѧ́лъ є҆сѝ, ᲂу҆добри́въ человѣ́ки бж҃е́ственными зарѧ́ми.
[р҃ѕ] Клѧ́хсѧ, и҆ поста́вихъ сохрани́ти сꙋдьбы̑ пра́вды твоеѧ̀.
Заше́лъ є҆сѝ пло́тїю въ зе́млю невече́рнїй свѣтоно́сецъ, и҆ не терпѧ̀ зрѣ́ти со́лнце поме́рче, полꙋ́дни є҆щѐ сꙋ́щꙋ.
[р҃з] Смири́хсѧ до ѕѣла̀ гдⷭ҇и, живи́ мѧ по словесѝ твоемꙋ̀.
Со́лнце вкꙋ́пѣ и҆ лꙋна̀ поме́ркше сп҃се, рабѡ́мъ бл҃горазꙋ̑мнымъ ѡ҆бразова́хꙋсѧ, и҆̀же въ чє́рныѧ ѻ҆дє́жды ѡ҆блача́тсѧ.
[р҃и] Вѡ́льнаѧ ᲂу҆́стъ мои́хъ бл҃говоли́ же гдⷭ҇и, и҆ сꙋдьба́мъ твои̑мъ наꙋчи́ мѧ.
Ви́дѣ тѧ̀ бг҃а со́тникъ, а҆́ще и҆ ᲂу҆мертви́лсѧ є҆сѝ: ка́кѡ тѧ̀ ᲂу҆́бѡ бж҃е мо́й, ѡ҆сѧжꙋ̀ рꙋка́ма; ᲂу҆жаса́юсѧ, вопїѧ́ше і҆ѡ́сифъ.
[р҃ѳ] Дꙋша̀ моѧ̀ въ рꙋкꙋ̀ твоє́ю вы́нꙋ, и҆ зако́на твоегѡ̀ не забы́хъ.
Оу҆снꙋ̀ а҆да́мъ, но сме́рть и҆з̾ ре́бръ и҆зво́дитъ: ты́ же ны́нѣ ᲂу҆снꙋ́лъ є҆сѝ сло́ве бж҃їй, и҆сточа́еши ѿ ре́бръ твои́хъ мі́рови жи́знь.
[р҃і] Положи́ша грѣ̑шницы сѣ́ть мнѣ̀, и҆ ѿ за́повѣдей твои́хъ не заблꙋди́хъ.
Оу҆снꙋ́лъ є҆сѝ ма́лѡ, и҆ ѡ҆живи́лъ є҆сѝ ᲂу҆ме́ршыѧ, и҆ воскр҃съ, воскр҃си́лъ є҆сѝ спѧ́щыѧ ѿ вѣ́ка бл҃же.
[ра҃і] Наслѣ́довахъ свидѣ̑нїѧ твоѧ̑ во вѣ́къ, ꙗ҆́кѡ ра́дованїе се́рдца моегѡ̀ сꙋ́ть.
Взѧ́тъ є҆сѝ ѿ землѝ, но и҆сточи́лъ є҆сѝ сп҃се́нїѧ вїно̀, живото́чнаѧ лозо̀: прославлѧ́ю стрⷭ҇ть и҆ крⷭ҇тъ.
[рв҃і] Приклони́хъ се́рдце моѐ, сотвори́ти ѡ҆правда̑нїѧ твоѧ̑ въ вѣ́къ за воздаѧ́нїе.
Ка́кѡ ᲂу҆́мнаѧ чинонача̑лїѧ тѧ̀ сп҃се пою́тъ, на́га, ѡ҆кровавле́на, ѡ҆сꙋжде́на, терпѧ́ще де́рзость распина́телей;
[рг҃і] Законопрестꙋ̑пныѧ возненави́дѣхъ, зако́нъ же тво́й возлюби́хъ.
Ѡ҆брꙋче́нный, стропо́тнѣйшїй ро́де є҆вре́йскїй, вѣ́далъ є҆сѝ воздвиже́нїе хра́ма, почто̀ ѡ҆сꙋди́лъ є҆сѝ хрⷭ҇та̀;
[рд҃і] Помо́щникъ мо́й, и҆ застꙋ́пникъ мо́й є҆сѝ ты̀, на словеса̀ твоѧ̑ ᲂу҆пова́хъ.
Во ѻ҆де́ждꙋ порꙋга́нїѧ ᲂу҆краси́телѧ всѣ́хъ ѡ҆блека́еши, и҆́же нб҃о ᲂу҆твердѝ, и҆ зе́млю ᲂу҆красѝ чꙋ́днѡ.
[рє҃і] Оу҆клони́тесѧ ѿ менѐ лꙋка́внꙋющїи, и҆ и҆спыта́ю за́пѡвѣди бг҃а моегѡ̀.
Ꙗ҆́коже неѧ́сыть ᲂу҆ѧ́звленъ въ ре́бра твоѧ̑ сло́ве, ѻ҆́троки твоѧ̑ ᲂу҆ме́ршыѧ ѡ҆живи́лъ є҆сѝ, и҆ска́павъ живѡ́тныѧ и҆̀мъ то́ки.
[рѕ҃і] Застꙋпи́ мѧ по словесѝ твоемꙋ̀: и҆ жи́въ бꙋ́дꙋ, и҆ не посрамѝ менѐ ѿ ча́ѧнїѧ моегѡ̀.
Со́лнце пре́жде ᲂу҆ста́ви і҆исꙋ́съ, и҆ноплеме́нники сѣкі́й: ты́ же скры́лсѧ є҆сѝ низлага́ѧ тьмы̀ нача́льника.
[рз҃і] Помози́ ми, и҆ сп҃сꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ.
Нѣ́дръ ѻ҆ч҃ескихъ неисхо́денъ пребы́въ ще́дре, и҆ человѣ́къ бы́ти бл҃говоли́лъ є҆сѝ, и҆ во а҆́дъ снизше́лъ є҆сѝ хрⷭ҇тѐ.
[ри҃і] Оу҆ничижи́лъ є҆сѝ всѧ̑ ѿстꙋпа́ющїѧ ѿ ѡ҆правда́нїй твои́хъ, ꙗ҆́кѡ непра́ведно помышле́нїе и҆́хъ.
Взѧ́тсѧ распны́йсѧ, и҆́же на вода́хъ зе́млю повѣ́шей, и҆ ꙗ҆́кѡ бездыха́ненъ въ не́й ны́нѣ возлега́етъ: ꙗ҆́же не терпѧ́щи трѧса́шесѧ лю́тѣ.
[рѳ҃і] Престꙋпа́ющыѧ непщева́хъ всѧ̑ грѣ̑шныѧ землѝ: сегѡ̀ ра́ди возлюби́хъ свидѣ̑нїѧ твоѧ̑.
Оу҆вы̀ мнѣ̀, ѽ сн҃е, неискꙋсомꙋ́жнаѧ рыда́ше глаго́лющи: є҆го́же бо ꙗ҆́кѡ цр҃ѧ̀ надѣ́ѧхсѧ, ѡ҆сꙋжде́на зрю̀ ны́нѣ на крⷭ҇тѣ̀.
[р҃к] Пригвоздѝ стра́хꙋ твоемꙋ̀ плѡ́ти моѧ̑, ѿ сꙋде́бъ бо твои́хъ ᲂу҆боѧ́хсѧ.
Сїѧ̑ гаврїи́лъ мнѣ̀ возвѣстѝ, є҆гда̀ слетѣ̀, и҆́же црⷭ҇тво вѣ́чное речѐ, сн҃а моегѡ̀ і҆и҃са.
[рк҃а] Сотвори́хъ сꙋ́дъ и҆ пра́вдꙋ, не преда́ждь менѐ ѡ҆би́дѧщымъ мѧ̀.
Оу҆вы̀, сѷмеѡ́ново соверши́сѧ прⷪ҇ро́чество: тво́й бо ме́чь про́йде се́рдце моѐ, є҆мманꙋ́иле.
[рк҃в] Воспрїимѝ раба̀ твоего̀ во бл҃го, да не ѡ҆клевета́ютъ менѐ го́рдїи.
Понѐ сꙋ́щихъ ѿ ме́ртвыхъ постыди́тесѧ, ѽ і҆ꙋде́є! и҆̀хже животода́вецъ возста́ви, є҆го́же вы̀ ᲂу҆би́сте зави́стнѡ.
[рк҃г] Ѻ҆́чи моѝ и҆счезо́стѣ во сп҃се́нїе твоѐ, и҆ въ сло́во пра́вды твоеѧ̀.
Оу҆жасе́сѧ ви́дѣвшее, неви́димый свѣ́те, тебѐ хрⷭ҇тѐ мо́й во гро́бѣ сокрыва́ема, бездыха́нна же, и҆ помрачѝ со́лнце свѣ́тъ.
[рк҃д] Сотворѝ съ рабо́мъ твои́мъ по млⷭ҇ти твое́й, и҆ ѡ҆правда́нїємъ твои̑мъ наꙋчи́ мѧ.
Пла́каше го́рькѡ пренепоро́чнаѧ мт҃и твоѧ̀ сло́ве, є҆гда̀ во гро́бѣ ви́дѣ тебѐ неизрече́ннаго и҆ безнача́льнаго бг҃а.
[рк҃є] Ра́бъ тво́й є҆́смь а҆́зъ, вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̑.
Ме́ртвость твою̀ нетлѣ́ннаѧ хрⷭ҇тѐ, мт҃и твоѧ̀ зрѧ́щи, го́рькѡ къ тебѣ̀ вѣща́ше: не коснѝ животѐ въ ме́ртвыхъ.
[рк҃ѕ] Вре́мѧ сотвори́ти гдⷭ҇ви, разори́ша зако́нъ тво́й.
А҆́дъ лю́тый потрепета̀, є҆гда́ тѧ ви́дѣ сл҃нце сла́вы безсме́ртне, и҆ и҆здава́ше ю҆́зники тща́тельнѡ.
[рк҃з] Сегѡ̀ ра́ди возлюби́хъ за́пѡвѣди твоѧ̑ па́че зла́та и҆ топа́зїѧ.
Ве́лїе и҆ ᲂу҆жа́сное видѣ́нїе ны́нѣ зри́тсѧ: живота̀ сы́й вино́вный, сме́рть под̾ѧ́тъ, ѡ҆живи́ти хотѧ̀ всѣ́хъ.
[рк҃и] Сегѡ̀ ра́ди ко всѣ̑мъ за́повѣдемъ твои̑мъ направлѧ́хсѧ, всѧ́къ пꙋ́ть непра́вды возненави́дѣхъ.
Пробода́ешисѧ въ ре́бра, и҆ пригвожда́ешисѧ влⷣко рꙋка́ми, ꙗ҆́звꙋ ѿ ребра̀ ты̀ и҆сцѣлѧ́ѧ, и҆ невоздержа́нїе рꙋ́къ пра́ѻтєцъ.
[рк҃ѳ] Ди̑вна свидѣ̑нїѧ твоѧ̑, сегѡ̀ ра́ди и҆спыта̀ ѧ҆̀ дꙋша̀ моѧ̀.
Пре́жде рахи́лина сы́на пла́каше всѧ́къ и҆́же въ домꙋ̀, и҆ сн҃а дв҃ыѧ рыда́хꙋ ᲂу҆чєни́къ ли́къ съ мт҃рїю.
[р҃л] Ꙗ҆вле́нїе слове́съ твои́хъ просвѣща́етъ, и҆ вразꙋмлѧ́етъ младе́нцы.
Оу҆даре́нїе рꙋ́къ да́ша хрⷭ҇то́вой лани́тѣ, рꙋко́ю человѣ́ка созда́вшагѡ, и҆ чє́люсти ѕвѣ́рѧ сокрꙋши́вшагѡ.
[рл҃а] Оу҆ста̀ моѧ̑ ѿверзо́хъ, и҆ привлеко́хъ дꙋ́хъ, ꙗ҆́кѡ за́повѣдей твои́хъ жела́хъ.
Пѣ́сньми твоѐ хрⷭ҇тѐ, ны́нѣ распѧ́тїе и҆ погребе́нїе, всѝ вѣ́рнїи пра́зднꙋемъ, и҆зба́вльшесѧ сме́рти погребе́нїемъ твои́мъ.
Сла́ва, трⷪ҇ченъ: Безнача́льне бж҃е, соприсносꙋ́щне сло́ве, и҆ дш҃е ст҃ы́й, лю́ди правосла́вныѧ въ вѣ́рѣ ᲂу҆крѣпѝ на ра̑тныѧ ꙗ҆́кѡ бл҃гъ.
И҆ ны́нѣ, бг҃оро́диченъ: Жи́знь ро́ждшаѧ, пренепоро́чнаѧ чⷭ҇таѧ дв҃о, ᲂу҆толѝ церкѡ́вныѧ собла́зны, и҆ пода́ждь ми́ръ ꙗ҆́кѡ бл҃га́ѧ.
И҆ па́ки пе́рвый тропа́рь ѻ҆́ба ли̑ка. Та́же є҆ктенїа̀ ма́лаѧ.
Возгла́съ во вторꙋ́ю статїю̀: Ꙗ҆́кѡ ст҃ъ є҆сѝ бж҃е на́шъ, и҆́же на прⷭ҇то́лѣ сла́вы херꙋві́мстѣмъ почива́ѧй, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
И҆ начина́емъ тре́тїю статїю̀, кадѧ́щꙋ сщ҃е́нникꙋ.