Статїѧ̀ тре́тїѧ.
Начина́етъ па́ки со сладкопѣ́нїемъ десны́й, си́рѣчь пе́рвый ли́къ на гла́съ г҃-й.
Ро́ди всѝ пѣ́снь погребе́нїю твоемꙋ̀ прино́сѧтъ, хрⷭ҇тѐ мо́й.
[рл҃в] При́зри на мѧ̀, и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ.
Сне́мъ съ дре́ва и҆́же ѿ а҆рїмаѳе́а, плащани́цею ѡ҆бви́въ во гро́бѣ тѧ̀ погреба́етъ.
[рл҃г] Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе.
Мѷронѡ́сицы прїидо́ша, мѵ́ра тебѣ̀ хрⷭ҇тѐ мо́й носѧ́щыѧ премꙋ́дрѡ.
[рл҃д] И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑.
Грѧдѝ всѧ̀ тва́рь, пѣ̑сни и҆схѡ́дныѧ принесе́мъ зижди́телю.
[рл҃є] Лицѐ твоѐ просвѣтѝ на раба̀ твоего̀ и҆ наꙋчи́ мѧ ѡ҆правда́нїємъ твои̑мъ.
Ꙗ҆́кѡ ме́ртва жива́го съ мѷроно́сицами, всѝ мѷропома́жемъ мꙋ́дреннѡ.
[рл҃ѕ] И҆схѡ́дища водна̑ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀.
І҆ѡ́сифе требл҃же́нне, погребѝ тѣ́ло хрⷭ҇та̀ жизнода́вца.
[рл҃з] Пра́веденъ є҆сѝ гдⷭ҇и, и҆ пра́ви сꙋдѝ твоѝ.
И҆̀хже воспита̀ ма́нною, воздвиго́ша пѧ́тꙋ на бл҃годѣ́телѧ.
[рл҃и] Заповѣ́далъ є҆сѝ пра́вдꙋ, свидѣ̑нїѧ твоѧ̑, и҆ и҆́стинꙋ ѕѣлѡ̀.
И҆̀хже воспита̀ ма́нною, прино́сѧтъ сп҃сꙋ же́лчь кꙋ́пнѡ и҆ ѻ҆́цетъ.
[рл҃ѳ] И҆ста́ѧла мѧ̀ є҆́сть ре́вность твоѧ̀, ꙗ҆́кѡ забы́ша словеса̀ твоѧ̑ вразѝ моѝ.
Ѽ пребезꙋ́мїѧ, и҆ хрⷭ҇тоꙋбі́йства прⷪ҇рокоꙋбі́йцъ!
[р҃м] Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀.
Ꙗ҆́коже безꙋ́мный слꙋжи́тель, предадѐ ᲂу҆чени́къ бе́зднꙋ премꙋ́дрости.
[рм҃а] Ю҆нѣ́йшїй а҆́зъ є҆́смь и҆ ᲂу҆ничиже́нъ, ѡ҆правда́нїй твои́хъ не забы́хъ.
И҆зба́вителѧ ѡ҆ста́вивъ, плѣ́нникъ ѡ҆ста́висѧ льсти́вый і҆ꙋ́да.
[рм҃в] Пра́вда твоѧ̀ пра́вда во вѣ́къ, и҆ зако́нъ тво́й и҆́стина.
По соломѡ́нꙋ, ро́въ глꙋбо́кїй, ᲂу҆ста̀ є҆врє́й беззако́нныхъ.
[рм҃г] Скѡ́рби и҆ нꙋ́жди ѡ҆брѣто́ша мѧ̀, за́пѡвѣди твоѧ̑ поꙋче́нїе моѐ.
Въ стропо́тныхъ ше́ствїихъ є҆вре́ѡвъ беззако́нныхъ, волчцы̀ и҆ сѣ̑ти.
[рм҃д] Пра́вда свидѣ̑нїѧ твоѧ̑ въ вѣ́къ: вразꙋми́ мѧ, и҆ жи́въ бꙋ́дꙋ.
І҆ѡ́сифъ погреба́етъ съ нїкоди́момъ мертволѣ́пнѡ зижди́телѧ.
[рм҃є] Воззва́хъ всѣ́мъ се́рдцемъ мои́мъ, ᲂу҆слы́ши мѧ̀ гдⷭ҇и, ѡ҆правда̑нїѧ твоѧ̑ взыщꙋ̀.
Жизнода́вче сп҃се, сла́ва держа́вѣ твое́й, а҆́дъ разо́ршей.
[рм҃ѕ] Воззва́хъ тѝ, сп҃си́ мѧ, и҆ сохраню̀ свидѣ̑нїѧ твоѧ̑.
Лежа́ща тѧ̀ пречⷭ҇таѧ ви́дѧщи, сло́ве, матеролѣ́пнѡ пла́каше.
[рм҃з] Предвари́хъ въ безго́дїи, и҆ воззва́хъ, на словеса̀ твоѧ̑ ᲂу҆пова́хъ.
Ѽ сладча́йшаѧ моѧ̀ весно̀, сладча́йшее моѐ ча́до! гдѣ̀ твоѧ̀ за́йде добро́та;
[рм҃и] Предвари́стѣ ѻ҆́чи моѝ ко ᲂу҆́трꙋ, поꙋчи́тисѧ словесє́мъ твои̑мъ.
Пла́чь сподвиза́ше всечⷭ҇таѧ твоѧ̀ мт҃и, тебѣ̀ сло́ве ᲂу҆ме́ршꙋ.
[рм҃ѳ] Гла́съ мо́й ᲂу҆слы́ши гдⷭ҇и, по млⷭ҇ти твое́й, по сꙋдьбѣ̀ твое́й живи́ мѧ.
Жєны̀ съ мѵ́ры прїидо́ша пома́зати хрⷭ҇та̀ бж҃е́ственнаго мѵ́ра.
[р҃н] Прибли́жишасѧ гонѧ́щїи мѧ̀ беззако́нїемъ, ѿ зако́на же твоегѡ̀ ᲂу҆дали́шасѧ.
Сме́рть сме́ртїю ты̀ ᲂу҆мерщвлѧ́еши бж҃е мо́й, бж҃е́ственною си́лою твое́ю.
[рн҃а] Бли́зъ є҆сѝ ты̀ гдⷭ҇и, и҆ всѝ пꙋтїѐ твоѝ и҆́стина.
Прельсти́сѧ преле́стникъ, прельсти́выйсѧ и҆збавлѧ́етсѧ, премꙋ́дростїю твое́ю бж҃е мо́й.
[рн҃в] И҆спе́рва позна́хъ ѿ свидѣ́нїй твои́хъ, ꙗ҆́кѡ во вѣ́къ ѡ҆снова́лъ ѧ҆̀ є҆сѝ.
Во дно̀ а҆́дово низведе́нъ бы́сть преда́тель, въ кла́денецъ и҆стлѣ́нїѧ.
[рн҃г] Ви́ждь смире́нїе моѐ, и҆ и҆зми́ мѧ, ꙗ҆́кѡ зако́на твоегѡ̀ не забы́хъ.
Волчцы̀ и҆ сѣ̑ти пꙋтїѐ треѻкаѧ́ннагѡ безꙋ́мнагѡ і҆ꙋ́ды.
[рн҃д] Сꙋдѝ сꙋ́дъ мо́й, и҆ и҆зба́ви мѧ̀, словесѐ ра́ди твоегѡ̀ живи́ мѧ.
Всѝ спогиба́ютъ распина́телїе твоѝ сло́ве, сн҃е бж҃їй всецр҃ю̀.
[рн҃є] Дале́че ѿ грѣ̑шникъ сп҃се́нїе, ꙗ҆́кѡ ѡ҆правда́нїй твои́хъ не взыска́ша.
Въ кла́денецъ и҆стлѣ́нїѧ всѝ спогиба́ютъ мꙋ́жїе крове́й.
[рн҃ѕ] Щедрѡ́ты твоѧ̑ мно́ги гдⷭ҇и, по сꙋдьбѣ̀ твое́й живи́ мѧ.
Сн҃е бж҃їй всецр҃ю̀ бж҃е мо́й, созда́телю мо́й, ка́кѡ стрⷭ҇ть под̾ѧ́лъ є҆сѝ;
[рн҃з] Мно́зи и҆згонѧ́щїи мѧ̀ и҆ стꙋжа́ющїи мѝ, ѿ свидѣ́нїй твои́хъ не ᲂу҆клони́хсѧ.
Ю҆́ница тельца̀ на дре́вѣ повѣ́шена взыва́ше зрѧ́щи.
[рн҃и] Ви́дѣхъ неразꙋмѣва́ющыѧ и҆ и҆ста́ѧхъ, ꙗ҆́кѡ слове́съ твои́хъ не сохрани́ша.
Тѣ́ло живоно́сное і҆ѡ́сифъ погреба́етъ съ нїкоди́момъ.
[рн҃ѳ] Ви́ждь, ꙗ҆́кѡ за́пѡвѣди твоѧ̑ возлюби́хъ гдⷭ҇и, по млⷭ҇ти твое́й живи́ мѧ.
Взыва́ше ѻ҆трокови́ца те́плѣ сле́зы точа́щи, ᲂу҆тро́бою пробода́ема.
[р҃ѯ] Нача́ло слове́съ твои́хъ и҆́стина, и҆ во вѣ́къ всѧ̑ сꙋдьбы̑ пра́вды твоеѧ̀.
Свѣ́те ѻ҆́чїю моє́ю, сладча́йшее моѐ ча́до, ка́кѡ во гро́бѣ ны́нѣ покрыва́ешисѧ;
[рѯ҃а] Кнѧ́зи погна́ша мѧ̀ тꙋ́не, и҆ ѿ слове́съ твои́хъ ᲂу҆боѧ́сѧ се́рдце моѐ.
А҆да́ма и҆ є҆́ѵꙋ свободи́ти, мт҃и не рыда́й, сїѧ̑ страждꙋ̀.
[рѯ҃в] Возра́дꙋюсѧ а҆́зъ ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ.
Прославлѧ́ю твоѐ, сн҃е мо́й, кра́йнее бл҃гоꙋтро́бїе, є҆гѡ́же ра́ди сїѧ̑ стра́ждеши.
[рѯ҃г] Непра́вдꙋ возненави́дѣхъ и҆ ѡ҆мерзи́хъ зако́нъ же тво́й возлюби́хъ.
Ѻ҆́цтомъ напое́нъ бы́лъ є҆сѝ и҆ же́лчїю ще́дре, дре́внее разрѣша́ѧ вкꙋше́нїе.
[рѯ҃д] Седмери́цею дне́мъ хвали́хъ тѧ̀, ѡ҆ сꙋдьба́хъ пра́вды твоеѧ̀.
На крⷭ҇тѣ̀ пригвозди́лсѧ є҆сѝ, дре́вле лю́ди твоѧ̑ столпо́мъ ѻ҆́блачнымъ покрыва́ѧй.
[рѯ҃є] Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.
Мѷронѡ́сицы сп҃се ко гро́бꙋ прише́дшыѧ, мѵ́ра принесо́ша тебѣ̀.
[рѯ҃ѕ] Ча́ѧхъ сп҃се́нїѧ твоегѡ̀ гдⷭ҇и, и҆ за́пѡвѣди твоѧ̑ возлюби́хъ.
Воста́ни ще́дре, ѿ про́пастей а҆́дскихъ возставлѧ́ѧй на́съ.
[рѯ҃з] Сохранѝ дꙋша̀ моѧ̀ свидѣ̑нїѧ твоѧ̑, и҆ возлюбѝ ѧ҆̀ ѕѣлѡ̀.
Воскреснѝ жизнода́вче, ро́ждшаѧ тѧ̀ мт҃и сле́зы точа́щи глаго́летъ.
[рѯ҃и] Сохрани́хъ за́пѡвѣди твоѧ̑ и҆ свидѣ̑нїѧ твоѧ̑, ꙗ҆́кѡ всѝ пꙋтїѐ моѝ пред̾ тобо́ю гдⷭ҇и.
Потщи́сѧ воскрⷭ҇нꙋти, печа́ль разрѣша́ѧ сло́ве, чи́стѡ ро́ждшїѧ тѧ̀.
[рѯ҃ѳ] Да прибли́житсѧ моле́нїе моѐ пред̾ тѧ̀ гдⷭ҇и, по словесѝ твоемꙋ̀ вразꙋми́ мѧ.
Нбⷭ҇ныѧ си̑лы ᲂу҆жасо́шасѧ стра́хомъ, ме́ртва тѧ̀ зрѧ́ще.
[р҃ѻ] Да вни́детъ проше́нїе моѐ пред̾ тѧ̀ гдⷭ҇и, по словесѝ твоемꙋ̀ и҆зба́ви мѧ̀.
Любо́вїю же и҆ стра́хомъ стрⷭ҇ти твоѧ̑ почита́ющымъ, да́ждь прегрѣше́нїй разрѣше́нїе.
[рѻ҃а] Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои̑мъ.
Ѽ ᲂу҆жа́снагѡ и҆ стра́ннагѡ видѣ́нїѧ, бж҃їй сло́ве! ка́кѡ землѧ́ тѧ спокрыва́етъ;
[рѻ҃в] Провѣща́етъ ѧ҆зы́къ мо́й словеса̀ твоѧ̑, ꙗ҆́кѡ всѧ̑ за́пѡвѣди твоѧ̑ пра́вда.
Носѧ́й тѧ̀ дре́вле сп҃се, і҆ѡ́сифъ бѣ́гаетъ, и҆ ны́нѣ тѧ̀ и҆ны́й погреба́етъ.
[рѻ҃г] Да бꙋ́детъ рꙋка̀ твоѧ̀ є҆́же сп҃сти́ мѧ, ꙗ҆́кѡ за́пѡвѣди твоѧ̑ и҆зво́лихъ.
Пла́четъ и҆ рыда́етъ тѧ̀ пречⷭ҇таѧ мт҃и твоѧ̀, сп҃се мо́й ᲂу҆мерщвле́наго.
[рѻ҃д] Возжела́хъ сп҃се́нїе твоѐ гдⷭ҇и, и҆ зако́нъ тво́й поꙋче́нїе моѐ є҆́сть.
Оу҆жаса́ютсѧ ᲂу҆мы̀ стра́ннагѡ, и҆ ᲂу҆жа́снагѡ тебѐ всѣ́хъ созда́телѧ, погребе́нїѧ.
[рѻ҃є] Жива̀ бꙋ́детъ дꙋша̀ моѧ̀, и҆ восхва́литъ тѧ̀, и҆ сꙋдьбы̑ твоѧ̑ помо́гꙋтъ мнѣ̀.
И҆злїѧ́ша на гро́бъ мѷронѡ́сицы мѵ̑ра, ѕѣлѡ̀ ра́нѡ прише́дшыѧ.
[рѻ҃ѕ] Заблꙋди́хъ ꙗ҆́кѡ ѻ҆вча̀ поги́бшее, взыщѝ раба̀ твоего̀, ꙗ҆́кѡ за́повѣдей твои́хъ не забы́хъ.
Ми́ръ цр҃кви, лю́демъ твои̑мъ сп҃се́нїе да́рꙋй воста́нїемъ твои́мъ.
Сла́ва: Ѽ трⷪ҇це бж҃е мо́й, ѻ҆́ч҃е, сн҃е и҆ дш҃е, поми́лꙋй мі́ръ.
И҆ ны́нѣ: Ви́дѣти твоегѡ̀ сн҃а воскрⷭ҇нїе, дв҃о, сподо́би твоѧ̑ рабы̑.
И҆ а҆́бїе пое́мъ тропарѝ сїѧ̑, во гла́съ є҃:
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.
А҆́гг҃льскїй собо́ръ ᲂу҆диви́сѧ, зрѧ̀ тебѐ въ ме́ртвыхъ вмѣни́вшасѧ, сме́ртнꙋю же сп҃се крѣ́пость разори́вша, и҆ съ собо́ю а҆да́ма воздви́гша, и҆ ѿ а҆́да всѧ̑ свобо́ждша.
Бл҃гослове́нъ є҆сѝ гдⷭ҇и:
Почто̀ мѵ̑ра съ ми́лостивными слеза́ми, ѽ ᲂу҆чєни́цы растворѧ́ете; блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: ви́дите вы̀ гро́бъ, и҆ ᲂу҆разꙋмѣ́йте, сп҃съ бо воскр҃се ѿ гро́ба.
Бл҃гослове́нъ є҆сѝ гдⷭ҇и:
Ѕѣлѡ̀ ра́нѡ мѷронѡ́сицы теча́хꙋ ко гро́бꙋ твоемꙋ̀, рыда́ющыѧ, но предста̀ къ ни̑мъ а҆́гг҃лъ и҆ речѐ: рыда́нїѧ вре́мѧ преста̀, не пла́чите: воскрⷭ҇нїе же а҆пⷭ҇лѡмъ рцы́те.
Бл҃гослове́нъ є҆сѝ гдⷭ҇и:
Мѷронѡ́сицы жєны̀, съ мѵ́ры прише́дшыѧ ко гро́бꙋ твоемꙋ̀ сп҃се, рыда́хꙋ: а҆́гг҃лъ же къ ни̑мъ речѐ, глаго́лѧ: что̀ съ ме́ртвыми жива́го помышлѧ́ете; ꙗ҆́кѡ бг҃ъ бо воскр҃се ѿ гро́ба.
Сла́ва, трⷪ҇ченъ: Поклони́мсѧ ѻ҆ц҃ꙋ̀, и҆ є҆гѡ̀ сн҃ови, и҆ ст҃о́мꙋ дх҃ꙋ, ст҃ѣ́й трⷪ҇цѣ во є҆ди́номъ сꙋществѣ̀, съ серафі́мы зовꙋ́ще: ст҃ъ, ст҃ъ, ст҃ъ є҆сѝ гдⷭ҇и.
И҆ ны́нѣ, бг҃оро́диченъ: Жизнода́вца ро́ждши, грѣха̀ дв҃о а҆да́ма и҆зба́вила є҆сѝ, ра́дость же є҆́ѵѣ въ печа́ли мѣ́сто подала̀ є҆сѝ: па́дшыѧ же ѿ жи́зни къ се́й напра́ви, и҆з̾ тебѐ воплоти́выйсѧ бг҃ъ и҆ чл҃вѣ́къ.
А҆ллилꙋ́їа, три́жды.
Та́же, є҆ктенїа̀ ма́лаѧ.
Возгла́съ: Ты́ бо є҆сѝ цр҃ь ми́ра, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
И҆ пое́мъ сѣда́ленъ днѐ, гла́съ а҃.
Подо́бенъ: Гро́бъ тво́й сп҃се:
Плащани́цею чи́стою, и҆ а҆рѡма́ты бж҃е́ственными тѣ́ло чⷭ҇тно́е, и҆спроси́въ ᲂу҆ пїла́та мѷропомазꙋ́етъ, и҆ полага́етъ і҆ѡ́сифъ въ но́вомъ гро́бѣ. тѣ́мже ᲂу҆ра́нше мѷронѡ́сицы жєны̀, возопи́ша покажѝ на́мъ, ꙗ҆́коже предре́клъ є҆сѝ хрⷭ҇тѐ, воскрⷭ҇нїе.
Сла́ва, коне́цъ.
И҆ ны́нѣ, дрꙋгі́й подо́бенъ:
Оу҆жасо́шасѧ ли́цы а҆́гг҃льстїи, зрѧ́ще сѣдѧ́щаго въ нѣ́дрѣхъ ѻ҆́ч҃ихъ: ка́кѡ во гро́бъ полага́етсѧ ꙗ҆́кѡ ме́ртвъ безсме́ртный! є҆го́же чи́ни а҆́гг҃льстїи ѡ҆крꙋжа́ютъ и҆ сла́вѧтъ съ ме́ртвыми во а҆́дѣ, ꙗ҆́кѡ зижди́телѧ и҆ гдⷭ҇а.
Та́же быва́етъ чте́нїе въ толкова́нїи є҆ѵⷢ҇лїа на матѳе́а, зача́ло рд҃і: Во ᲂу҆́трїй же де́нь, и҆́же є҆́сть по пѧтцѣ̀: Воскрⷭ҇нїе хрⷭ҇то́во не глаго́лемъ. Но а҆́бїе ѱало́мъ н҃. И҆ пое́мъ канѡ́нъ, і҆рмо́съ по два́жды, а҆ тропарѝ на в҃і. И҆ па́ки послѣдѝ і҆рмо́съ ѻ҆́ба ли̑ка вкꙋ́пѣ. Є҆́сть же канѡ́нъ, ѿ пе́рвыѧ пѣ́сни до шесты́ѧ, творе́нїе ма́рка мона́ха, є҆пⷭ҇кпа і҆дрꙋ́итскагѡ: і҆рмосы́ же творе́нїе жены̀ нѣ́кїѧ, кассі́и и҆менꙋ́емыѧ. Ѿ ѕ҃-й же пѣ́сни до конца̀ творе́нїе господи́на космы̀. Краегране́сїе же канѡ́на: Каі̀ си́мерон дѐ са́вватон ме́лпѡ ме́га. Сі́есть: И҆ дне́сь же сꙋббѡ́тꙋ пою̀ вели́кꙋю. Гла́съ ѕ҃.
Пѣ́снь а҃.
І҆рмо́съ: Волно́ю морско́ю скры́вшаго дре́вле, гони́телѧ мꙋчи́телѧ под̾ земле́ю скры́ша сп҃се́нныхъ ѻ҆́троцы: но мы̀ ꙗ҆́кѡ ѻ҆трокови̑цы, гдⷭ҇ви пои́мъ, сла́внѡ во просла́висѧ.
[К] Гдⷭ҇и бж҃е мо́й, и҆схо́дное пѣ́нїе, и҆ надгро́бнꙋю тебѣ̀ пѣ́снь воспою̀, погребе́нїемъ твои́мъ жи́зни моеѧ̀ вхо́ды ѿве́рзшемꙋ, и҆ сме́ртїю сме́рть и҆ а҆́дъ ᲂу҆мертви́вшемꙋ.
[А] Горѣ́ тѧ на прⷭ҇то́лѣ и҆ до́лѣ во гро́бѣ, премі̑рнаѧ и҆ подзє́мнаѧ, помышлѧ́ющаѧ сп҃се мо́й, зы́блѧхꙋсѧ ᲂу҆мерщвле́нїемъ твои́мъ: па́че ᲂу҆ма́ бо ви́дѣнъ бы́лъ є҆сѝ ме́ртвъ, живонача́льниче.
[І] Да твоеѧ̀ сла́вы всѧ̑ и҆спо́лниши, сше́лъ є҆сѝ въ ни̑жнѧѧ землѝ: ѿ тебе́ бо не скры́сѧ соста́въ мо́й и҆́же во а҆да́мѣ, и҆ погребе́нъ, и҆стлѣ́вша мѧ̀ ѡ҆бновлѧ́еши чл҃вѣколю́бче.
Пѣ́снь г҃.
І҆рмо́съ: Тебѐ на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ᲂу҆́жасомъ мно́гимъ содрога́шесѧ, нѣ́сть ст҃ъ, ра́звѣ тебѐ гдⷭ҇и, взыва́ющи.
[С] Ѡ҆́бразы погребе́нїѧ твоегѡ̀ показа́лъ є҆сѝ, видѣ̑нїѧ ᲂу҆мно́живъ: ны́нѣ же сокровє́ннаѧ твоѧ̑ бг҃омꙋ́жнѡ ᲂу҆ѧсни́лъ є҆сѝ, и҆ сꙋ́щымъ во а҆́дѣ влⷣко, нѣ́сть ст҃ъ, ра́звѣ тебѐ гдⷭ҇и, взыва́ющымъ.
[И] Просте́рлъ є҆сѝ дла̑ни, и҆ соедини́лъ є҆сѝ дре́вле разстоѧ̑щаѧсѧ: ѡ҆дѣѧ́нїемъ же сп҃се, є҆́же въ плащани́цѣ и҆ во гро́бѣ, ѡ҆кова̑нныѧ разрѣши́лъ є҆сѝ, нѣ́сть ст҃ъ, ра́звѣ тебѐ гдⷭ҇и, взыва́ющыѧ.
[М] Гро́бомъ и҆ печа́тьми, невмѣсти́ме, содержи́мь бы́лъ є҆сѝ хотѣ́нїемъ: и҆́бо си́лꙋ твою̀ дѣ́йствы показа́лъ є҆сѝ, бг҃одѣ́йственнѡ пою́щымъ: нѣ́сть ст҃ъ, ра́звѣ тебѐ гдⷭ҇и, чл҃вѣколю́бче.
Сѣда́ленъ, гла́съ а҃: Гро́бъ тво́й сп҃се, во́ини стрегꙋ́щїи, ме́ртви ѿ ѡ҆блиста́нїѧ ꙗ҆́вльшагѡсѧ а҆́гг҃ла бы́ша, проповѣ́дающа жена́мъ воскрⷭ҇нїе. тебѐ сла́вимъ тлѝ потреби́телѧ: тебѣ̀ припа́даемъ воскрⷭ҇шемꙋ и҆з̾ гро́ба, и҆ є҆ди́номꙋ бг҃ꙋ на́шемꙋ.
Сла́ва, и҆ ны́нѣ, то́йже.
Пѣ́снь д҃.
І҆рмо́съ: На крⷭ҇тѣ̀ твоѐ бж҃е́ственное и҆стоща́нїе прови́дѧ а҆ввакꙋ́мъ, ᲂу҆жа́ссѧ, вопїѧ́ше: ты̀ си́льныхъ пресѣ́клъ є҆сѝ держа́вꙋ бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.
[Е] Седьмы́й де́нь дне́сь ѡ҆ст҃и́лъ є҆сѝ, є҆го́же дре́вле бл҃гослови́лъ є҆сѝ ᲂу҆покое́нїемъ дѣ́лъ: прево́диши бо всѧ́чєскаѧ и҆ ѡ҆бновлѧ́еши, сꙋббѡ́тствꙋѧ сп҃се мо́й, и҆ назида́ѧ.
[Р] Си́лою лꙋ́чшагѡ, побѣди́вшагѡ тебѐ, ѿ пло́ти дꙋша̀ твоѧ̀ раздѣли́сѧ: растерза́ющи бо ѻ҆боѧ̀ ᲂу҆́зы, сме́рти и҆ а҆́да, сло́ве, держа́вою твое́ю.
[О] А҆́дъ сло́ве срѣ́тъ тѧ̀ ѡ҆горчи́сѧ, чл҃вѣ́ка зрѧ̀ ѡ҆боже́на, ᲂу҆ѧ́звлена ра́нами, и҆ всесильнодѣ́телѧ, стра́шнымъ же зра́комъ поги́бе.
Пѣ́снь є҃.
І҆рмо́съ: Бг҃оѧвле́нїѧ твоегѡ̀ хрⷭ҇тѐ, къ на́мъ ми́лостивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскрⷭ҇нꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.
[Н] Новотвори́ши земны̑ѧ созда́телю, пе́рстенъ бы́въ, и҆ плащани́ца и҆ гро́бъ ꙗ҆влѧ́ютъ є҆́же въ тебѣ̀ сло́ве, та́инство: бл҃гоѡбра́зный бо совѣ́тникъ, тебѐ ро́ждшагѡ совѣ́тъ ѡ҆бразꙋ́етъ, въ тебѣ̀ велелѣ́пнѡ новотворѧ́щагѡ мѧ̀.
[Д] Сме́ртїю сме́ртное, погребе́нїемъ тлѣ́нное прелага́еши, нетлѣ́нно твори́ши бо, бг҃олѣ́пнѡ безсме́ртно творѧ̀ прїѧ́тїе: пло́ть бо твоѧ̀ и҆стлѣ́нїѧ не ви́дѣ влⷣко, нижѐ дш҃а̀ твоѧ̀ во а҆́дѣ страннолѣ́пнѡ ѡ҆ста́влена бы́сть.
[Е] И҆з̾ небра́чныѧ проше́дъ, и҆ прободе́нъ въ ре́бра содѣ́телю мо́й, и҆з̾ неѧ̀ содѣ́лалъ є҆сѝ ѡ҆бновле́нїе є҆́ѵино, а҆да́мъ бы́въ, ᲂу҆снꙋ́въ па́че є҆стества̀ сно́мъ є҆сте́ственнымъ, и҆ жи́знь воздви́гнꙋвъ ѿ сна̀ и҆ тлѣ́нїѧ, ꙗ҆́кѡ всеси́ленъ.
Пѣ́снь ѕ҃.
[С] І҆рмо́съ: Ꙗ҆́тъ бы́сть, но не ᲂу҆держа́нъ въ пе́рсѣхъ ки́товыхъ і҆ѡ́на: тво́й бо ѡ҆́бразъ носѧ̀, страда́вшагѡ, и҆ погребе́нїю да́вшагѡсѧ, ꙗ҆́кѡ ѿ черто́га ѿ ѕвѣ́рѧ и҆зы́де: приглаша́ше же кꙋстѡді́и, хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.
[А] Бїе́нъ бы́лъ є҆сѝ, но не раздѣли́лсѧ є҆сѝ сло́ве, є҆ѧ́же причасти́лсѧ є҆сѝ пло́ти: а҆́ще бо и҆ разори́сѧ тво́й хра́мъ во вре́мѧ стрⷭ҇ти, но и҆ та́кѡ є҆ди́нъ бѣ̀ соста́въ бж҃ества̀ и҆ пло́ти твоеѧ̀. во ѻ҆бои́хъ бо є҆ди́нъ є҆сѝ сн҃ъ, сло́во бж҃їе, бг҃ъ и҆ чл҃вѣ́къ.
[В] Человѣкоꙋбі́йственно, но не бг҃оꙋбі́йственно бы́сть прегрѣше́нїе а҆да́мово: а҆́ще бо и҆ пострада̀ твоеѧ̀ пло́ти пе́рстное сꙋщество̀, но бж҃ество̀ безстра́стно пребы́сть: тлѣ́нное же твоѐ на нетлѣ́нїе преложи́лъ є҆сѝ, и҆ нетлѣ́нныѧ жи́зни показа́лъ є҆сѝ и҆сто́чникъ воскрⷭ҇нїемъ.
[В] Ца́рствꙋетъ а҆́дъ, но не вѣ́чнꙋетъ над̾ ро́домъ человѣ́ческимъ: ты́ бо поло́жсѧ во гро́бѣ держа́вне, живонача́льною дла́нїю, сме́рти ключѝ разве́рглъ є҆сѝ, и҆ проповѣ́далъ є҆сѝ ѿ вѣ́ка та́мѡ спѧ́щымъ, и҆збавле́нїе нело́жное бы́въ сп҃се, мє́ртвымъ пе́рвенецъ.
Конда́къ, гла́съ ѕ҃: Бе́зднꙋ заключи́вый, ме́ртвъ зри́тсѧ, и҆ смѵ́рною и҆ плащани́цею ѡ҆бви́всѧ, во гро́бѣ полага́етсѧ ꙗ҆́кѡ сме́ртный безсме́ртный: жєны́ же прїидо́ша пома́зати є҆го̀ мѵ́ромъ, пла́чꙋщыѧ го́рькѡ и҆ вопїю́щыѧ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ, воскре́снетъ тридне́венъ.
І҆́косъ: Содержа́й всѧ̑ на крⷭ҇тъ вознесе́сѧ, и҆ рыда́етъ всѧ̀ тва́рь, того̀ ви́дѧщи на́га ви́сѧща на дре́вѣ, со́лнце лꙋчы̀ сокры̀, и҆ ѕвѣ́зды ѿложи́ша свѣ́тъ: землѧ́ же со мно́гимъ стра́хомъ поколеба́сѧ, и҆ мо́ре побѣжѐ, и҆ ка́менїе распаде́сѧ, гро́би же мно́зи ѿверзо́шасѧ, и҆ тѣлеса̀ воста́ша ст҃ы́хъ мꙋже́й. а҆́дъ ни́зꙋ сте́нетъ, и҆ і҆ꙋде́є совѣ́тꙋютъ ѡ҆клевета́ти хрⷭ҇то́во воскрⷭ҇нїе. жєны́ же взыва́ютъ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ, воскрⷭ҇нетъ тридне́венъ.
Сѷнаѯа́рь. Стїхѝ:
Всꙋ́е храни́ши гро́бъ кꙋстѡді́е:
Не бо̀ содержи́тъ ра́ка саможиво́тїѧ.
Во ст҃ꙋ́ю и҆ вели́кꙋю сꙋббѡ́тꙋ, бг҃отѣле́сное погребе́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀, и҆ є҆́же во а҆́дъ соше́ствїе пра́зднꙋемъ: и҆́миже ѿ тлѝ на́шъ ро́дъ воззва́нъ бы́въ, къ вѣ́чной жи́зни пре́йде. Всѣ́хъ бо дне́й ст҃а́ѧ четыредесѧ́тница превосхо́дитъ: сеѧ́ же па́ки, сїѧ̀ ст҃а́ѧ и҆ вели́каѧ седми́ца бо́льши: и҆ вели́кїѧ седми́цы па́ки бо́льши сїѧ̀ вели́каѧ и҆ ст҃а́ѧ сꙋббѡ́та. Глаго́летсѧ же вели́каѧ седми́ца, не ꙗ҆́кѡ бо́льши сꙋ́ть дні́е сі́и, и҆лѝ часы̀, но ꙗ҆́кѡ вели̑каѧ и҆ преесте́ствєннаѧ чꙋдеса̀, и҆ и҆зрѧ̑днаѧ сп҃са на́шегѡ дѣла̀ въ не́й содѣ́ѧшасѧ, и҆ наипа́че дне́сь. Ꙗ҆́коже бо въ пе́рвомъ мїротворе́нїи, всѧ́кое дѣ́ло содѣ́лавъ бг҃ъ, и҆ послѣдѝ гдⷭ҇ьственнѣйшее въ шесты́й де́нь созда́въ человѣ́ка, въ седмы́й почѝ ѿ всѣ́хъ дѣ́лъ свои́хъ, и҆ ѡ҆ст҃ѝ є҆го̀, сꙋббѡ́тꙋ и҆менова́въ, ꙗ҆́же ᲂу҆́бѡ ᲂу҆покое́нїе толкꙋ́етсѧ: си́це и҆ во ᲂу҆́мнагѡ мі́ра дѣ́ланїи и҆зрѧ́днѣ всѧ̑ содѣ́лавый, и҆ въ шесты́й назда́въ па́ки и҆стлѣ́вшаго человѣ́ка, и҆ ѡ҆бнови́въ живоно́снымъ крⷭ҇то́мъ и҆ сме́ртїю, въ настоѧ́щїй па́ки седмы́й де́нь ᲂу҆поко́и, соверше́ннымъ дѣ́лъ ᲂу҆покое́нїемъ, животоесте́ственнымъ и҆ сп҃си́тельнымъ ᲂу҆снꙋ́въ сно́мъ. Снизхо́дитъ ᲂу҆́бѡ бж҃їе сло́во съ пло́тїю во гро́бъ, схо́дитъ же и҆ во а҆́дъ съ нетлѣ́нною и҆ бж҃е́ственною свое́ю дꙋше́ю, раздѣ́льшеюсѧ сме́ртїю ѿ тѣлесѐ, ю҆́же и҆ въ рꙋ́цѣ предадѐ ѻ҆ц҃ꙋ̀, є҆мꙋ́же и҆ свою̀ кро́вь принесѐ, не проси́вшꙋ, и҆збавле́нїе на́ше бы́вшꙋю. Не бо̀ во а҆́дѣ гдⷭ҇нѧ дꙋша̀, ꙗ҆́коже дрꙋги́хъ ст҃ы́хъ дꙋ́шы, ᲂу҆держа́на. ка́кѡ бо; ничто́же прароди́тельнѣй наноси́мѣ клѧ́твѣ, ꙗ҆́коже ѻ҆́ны. Но ни кро́ви же взѧ́тъ вра́гъ на́шъ дїа́волъ, а҆́ще и҆ на́съ держа́ше, є҆́юже кꙋ́плени бы́хомъ. ка́кѡ бо а҆́ще не то́чїю ѿ бг҃а, но и҆ бг҃а є҆го̀ разбо́йникъ дїа́волъ ꙗ҆́ти и҆мѧ́ше; Ѻ҆ба́че тѣле́снѣ и҆ съ бж҃ество́мъ всели́сѧ во гро́бъ гдⷭ҇ь на́шъ і҆и҃съ хрⷭ҇то́съ, кра́йнѣ пло́ти соедини́вшимсѧ. бѧ́ше же съ разбо́йникомъ и҆ въ раѝ, и҆ во а҆́дѣ бѧ́ше, ꙗ҆́коже рече́сѧ, со ѡ҆боже́нною свое́ю дꙋше́ю. преесте́ственнѡ же и҆ со ѻ҆ц҃е́мъ бѣ̀, и҆ дх҃ꙋ сосѣдѧ́й, ꙗ҆́кѡ бг҃ъ неѡпи́санный, вездѣ́ же бѣ̀, ничто́же бж҃ествꙋ̀ во гро́бѣ стра́ждꙋщꙋ, ꙗ҆́коже нижѐ на крⷭ҇тѣ̀. И҆ тлѣ́нїе ᲂу҆́бѡ гдⷭ҇ьское тѣ́ло претерпѣ̀, є҆́же є҆́сть разрѣше́нїе дꙋшѝ ѿ тѣ́ла: растлѣ́нїѧ же, си́рѣчь разрꙋше́нїѧ пло́ти и҆ ᲂу҆де́съ, соверше́ннагѡ погꙋбле́нїѧ ника́коже. Но і҆ѡ́сифъ ᲂу҆́бѡ ст҃о́е тѣ́ло гдⷭ҇не сне́мъ, во гро́бѣ но́вѣ погреба́етъ, и҆ бли́зъ і҆ꙋдє́й въ вертогра́дѣ ка́мень ве́лїй ѕѣлѡ̀ над̾ вхо́домъ гро́ба положѝ. і҆ꙋде́є же ᲂу҆́бѡ по пѧтцѣ̀, пристꙋпи́вше глаго́лютъ пїла́тꙋ: го́споди, помѧнꙋ́хомъ, ꙗ҆́кѡ льсте́цъ ѻ҆́ный речѐ, є҆гда̀ жи́въ бѣ̀, ꙗ҆́кѡ по трїе́хъ дне́хъ воста́нꙋ: мни́тсѧ ᲂу҆́бѡ на́мъ добро̀ бы́ти, да твоѧ̀ вла́сть повели́тъ во́инствꙋ затверди́ти гро́бъ. Ѿвѣща̀ пїла́тъ: а҆́ще ᲂу҆́бѡ льсте́цъ, что̀ ѡ҆ глаго́лѣхъ є҆гѡ̀ пече́тесѧ; є҆гда̀ бѣ̀ жи́въ, ꙗ҆́кѡ и҆сповѣ́даемый ᲂу҆́мре. Когда́ же речѐ, воста́нꙋ; Не́гли ѿ і҆ѡ́нина ᲂу҆каза́нїѧ собира́хꙋ то̀. Всѧ́кѡ же а҆́ще ᲂу҆тверди́тсѧ гро́бъ, не ᲂу҆кра́детсѧ. ѽле ка́кѡ безꙋ́мнїи, є҆ли̑ка ѡ҆ себѣ̀ творѧ́хꙋ, на сѧ̀ дѣ́юще не разꙋмѣва́хꙋ! Пїла́тꙋ же повелѣ́вшꙋ, са́ми съ во́инскимъ чи́номъ, и҆ ѻ҆па́снымъ запечатлѣ́нїемъ затверди́ша гро́бъ, да не чꙋжде́й сꙋ́щей стра́жи и҆ печа́ти, воскрⷭ҇нїе гдⷭ҇не ѡ҆бо́лгано бы́ло бы. Но а҆́дъ ѿсе́лѣ совраща́етсѧ и҆ и҆з̾ꙋмѣва́етсѧ, твердѣ́йшꙋю си́лꙋ ѡ҆щꙋща́ѧ: и҆зблю́етъ ᲂу҆́бѡ пома́лѣ непра́веднымъ поглоще́нїемъ, хрⷭ҇та̀ твердѣ́йшагѡ и҆ краеꙋго́льнагѡ ка́мене: и҆ ꙗ҆̀же ѿ вѣ́ка положѝ во чре́вѣ, снѣ́дь сотвори́въ. Неизрече́ннымъ снизхожде́нїемъ твои́мъ, хрⷭ҇тѐ бж҃е на́шъ, поми́лꙋй на́съ, а҆ми́нь.
Пѣ́снь з҃.
[А] І҆рмо́съ: Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е бл҃гослове́нъ є҆сѝ.
[Т] Оу҆ѧзви́сѧ а҆́дъ, въ се́рдцѣ прїе́мъ ᲂу҆ѧ́звенаго копїе́мъ въ ре́бра, и҆ воздыха́етъ ѻ҆гне́мъ бж҃е́ственнымъ и҆ждива́емь, во сп҃се́нїе на́съ пою́щихъ: и҆зба́вителю бж҃е бл҃гослове́нъ є҆сѝ.
[О] Бога́тъ гро́бъ, въ себѣ́ бо прїи́мъ ꙗ҆́кѡ спѧ́ща содѣ́телѧ, жи́зни бж҃е́ственное сокро́вище показа́сѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
[Н] Зако́номъ ᲂу҆ме́ршихъ є҆́же во гро́бѣ положе́нїе, всѣ́хъ прїе́млетъ жи́знь, и҆ сего̀ и҆сто́чника показꙋ́етъ воста́нїѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
[М] Є҆ди́но бѧ́ше неразлꙋ́чное, є҆́же во а҆́дѣ, и҆ во гро́бѣ, и҆ во є҆де́мѣ, бж҃ество̀ хрⷭ҇то́во, со ѻ҆ц҃е́мъ, и҆ дх҃омъ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
Пѣ́снь и҃.
[Е] І҆рмо́съ: Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
[Л] Разрꙋши́сѧ пречⷭ҇тый хра́мъ, па́дшꙋю же совозставлѧ́етъ ски́нїю: а҆да́мꙋ бо пе́рвомꙋ вторы́й, и҆́же въ вы́шнихъ живы́й, сни́де да́же до а҆́довыхъ сокро́вищъ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
[П] Преста̀ де́рзость ᲂу҆ч҃нкѡ́въ, а҆рїмаѳе́й же и҆зрѧ́дствꙋетъ і҆ѡ́сифъ: ме́ртва бо и҆ на́га зрѧ̀, над̾ всѣ́ми бг҃а, про́ситъ и҆ погреба́етъ, зовы́й: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
[Ѡ] Ѽ чꙋде́съ но́выхъ! ѽ бл҃гости! ѽ неизрече́ннагѡ терпѣ́нїѧ! во́лею бо под̾ земле́ю печатлѣ́етсѧ, и҆́же въ вы́шнихъ живы́й, и҆ ꙗ҆́кѡ льсте́цъ, бг҃ъ ѡ҆клевета́етсѧ. є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Пѣ́снь ѳ҃.
[М] І҆рмо́съ: Не рыда́й менѐ мт҃и, зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ и҆ вознесꙋ̀ со сла́вою, непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.
[Е] Въ стра́ннѣмъ твое́мъ ржⷭ҇твѣ̀, болѣ́зней и҆збѣжа́вше па́че є҆стества̀, ᲂу҆бл҃жи́хсѧ безнача́льне сн҃е: ны́нѣ же тѧ̀ бж҃е мо́й, бездыха́нна зрѧ́щи ме́ртва, ѻ҆рꙋ́жїемъ печа́ли растерза́юсѧ лю́тѣ: но воскрⷭ҇нѝ, ꙗ҆́кѡ да возвели́чꙋсѧ.
[Г] Землѧ̀ покрыва́етъ мѧ̀ хотѧ́ща, но ᲂу҆страша́ютсѧ а҆́дѡвы вра́тницы, ѡ҆дѣ́ѧна ви́дѧще ѻ҆де́ждею ѡ҆кровавле́ною, мт҃и, ѿмще́нїѧ: враги́ бо крⷭ҇то́мъ порази́въ ꙗ҆́кѡ бг҃ъ, воскрⷭ҇нꙋ па́ки, и҆ возвели́чꙋ тѧ̀.
[А] Да ра́дꙋетсѧ тва́рь, да веселѧ́тсѧ всѝ земноро́днїи, вра́гъ бо плѣни́сѧ а҆́дъ: съ мѵ́ры жєны̀ да срѣта́ютъ, а҆да́ма со є҆́ѵою и҆збавлѧ́ю всеро́дна, и҆ въ тре́тїй де́нь воскрⷭ҇нꙋ.
Є҆ѯапостїла́рїй, гла́съ в҃: Ст҃ъ гдⷭ҇ь бг҃ъ на́шъ: Три́жды.
На хвали́техъ поста́вимъ стїхѝ д҃, и҆ пое́мъ стїхи̑ры самогла́сны гла́съ в҃:
Дне́сь содержи́тъ гро́бъ содержа́щаго дла́нїю тва́рь, покрыва́етъ ка́мень покры́вшаго добродѣ́телїю нб҃са̀: спи́тъ живо́тъ, и҆ а҆́дъ трепе́щетъ, и҆ а҆да́мъ ѿ ᲂу҆́зъ разрѣша́етсѧ. сла́ва твоемꙋ̀ смотре́нїю, и҆́мже соверши́въ всѐ ᲂу҆покое́нїе вѣ́чное, дарова́лъ є҆сѝ на́мъ бж҃е, всест҃о́е и҆з̾ ме́ртвыхъ твоѐ воскрⷭ҇нїе.
Что̀ зри́мое видѣ́нїе; ко́е настоѧ́щее ᲂу҆покое́нїе; цр҃ь вѣкѡ́въ, и҆́же стрⷭ҇тїю соверши́въ смотре́нїе, во гро́бѣ сꙋббѡ́тствꙋетъ, но́вое на́мъ подаѧ̀ сꙋббѡ́тство. томꙋ̀ возопїи́мъ: воскрⷭ҇нѝ бж҃е, сꙋдѧ́й землѝ, ꙗ҆́кѡ ты̀ црⷭ҇твꙋеши во вѣ́ки, неизмѣ́рнꙋю и҆мѣ́ѧй ве́лїю млⷭ҇ть.
Прїиди́те ви́димъ живо́тъ на́шъ во гро́бѣ лежа́щъ, да во гробѣ́хъ лежа́щыѧ ѡ҆живи́тъ. прїиди́те дне́сь и҆̀же и҆з̾ і҆ꙋ́ды спѧ́ща зрѧ́ще, прⷪ҇ро́чески є҆мꙋ̀ возопїи́мъ: возле́гъ ᲂу҆снꙋ́лъ є҆сѝ ꙗ҆́кѡ ле́въ, кто̀ воздви́гнетъ тѧ̀ цр҃ю̀; но воста́ни самовла́стнѡ, да́вый себѐ ѡ҆ на́съ во́лею, гдⷭ҇и сла́ва тебѣ̀.
Гла́съ ѕ҃: Просѝ і҆ѡ́сифъ тѣ́ло і҆и҃сово, и҆ положѝ є҆̀ въ но́вѣмъ свое́мъ гро́бѣ: подоба́ше бо є҆мꙋ̀ и҆з̾ гро́ба, ꙗ҆́кѡ и҆з̾ черто́га проитѝ. сокрꙋши́вый держа́вꙋ сме́рти, и҆ ѿве́рзый врата̀ ра̑йскаѧ человѣ́кѡмъ, гдⷭ҇и сла́ва тебѣ̀.
Сла́ва, гла́съ ѕ҃: Дне́шнїй де́нь та́йнѡ вели́кїй мѡѷсе́й проѡбразова́ше, глаго́лѧ: и҆ бл҃гословѝ бг҃ъ де́нь седьмы́й, сїѧ́ бо є҆́сть бл҃гослове́ннаѧ сꙋббѡ́та. се́й є҆́сть ᲂу҆покое́нїѧ де́нь, во́ньже почѝ ѿ всѣ́хъ дѣ́лъ свои́хъ є҆диноро́дный сн҃ъ бж҃їй, смотре́нїемъ є҆́же на сме́рть, пло́тїю сꙋббѡ́тствовавъ: и҆ во є҆́же бѣ̀, па́ки возвра́щьсѧ воскрⷭ҇нїемъ, дарова̀ на́мъ живо́тъ вѣ́чный, ꙗ҆́кѡ є҆ди́нъ бл҃гъ и҆ чл҃вѣколю́бецъ.
И҆ ны́нѣ, бг҃оро́диченъ, гла́съ в҃: Пребл҃гослове́нна є҆сѝ бцⷣе дв҃о:
Славосло́вїе вели́кое. Сщ҃е́нникъ же ѡ҆блачи́тсѧ во всю̀ сщ҃е́нническꙋю ѻ҆де́ждꙋ, и҆ вхо́дитъ со ст҃ы́мъ є҆ѵⷢ҇лїемъ. По трист҃о́мъ же глаго́летъ сщ҃е́нникъ: Во́нмемъ. Ми́ръ всѣ̑мъ. Премꙋ́дрость. И҆ мы̀ тропа́рь є҆ди́ножды: Бл҃гоѡбра́зный і҆ѡ́сифъ:
И҆ глаго́лемъ тропа́рь прⷪ҇ро́чества, гла́съ в҃:
Содержа́й концы̀, гро́бомъ содержа́тисѧ и҆зво́лилъ є҆сѝ хрⷭ҇тѐ, да ѿ а҆́дова поглоще́нїѧ и҆зба́виши человѣ́чество и҆ воскр҃съ ѡ҆живи́ши на́съ, ꙗ҆́кѡ бг҃ъ безсме́ртный.
Сла́ва, коне́цъ. И҆ ны́нѣ, ве́сь.
Та́же прокі́менъ, гла́съ д҃: Воскрⷭ҇нѝ гдⷭ҇и, помозѝ на́мъ, и҆ и҆зба́ви на́съ и҆́мене ра́ди твоегѡ̀. Сті́хъ: Бж҃е, ᲂу҆ши́ма на́шима ᲂу҆слы́шахомъ и҆ ѻ҆тцы̀ на́ши возвѣсти́ша на́мъ.
Прⷪ҇ро́чества і҆езекі́илева чте́нїе. [Глава̀ л҃з, ст. а҃-д҃і]
Бы́сть на мнѣ̀ рꙋка̀ гдⷭ҇нѧ, и҆ и҆зведе́ мѧ въ дс҃ѣ гдⷭ҇ни, и҆ поста́ви мѧ̀ средѣ̀ по́лѧ, се́ же бѧ́ше по́лно косте́й человѣ́ческихъ. И҆ ѡ҆бведе́ мѧ ѻ҆́крестъ и҆̀хъ ѻ҆́колѡ, и҆ сѐ мнѡ́ги ѕѣлѡ̀ на лицы̀ по́лѧ, и҆ сѐ сꙋ́хи ѕѣлѡ̀. И҆ речѐ ко мнѣ̀: сы́не человѣ́чь, ѡ҆живꙋ́тъ ли кѡ́сти сїѧ̑; и҆ реко́хъ: гдⷭ҇и бж҃е, ты̀ вѣ́си сїѧ̑. И҆ речѐ ко мнѣ̀: сы́не человѣ́чь, прорцы̀ на кѡ́сти сїѧ̑, и҆ рече́ши и҆̀мъ: кѡ́сти сꙋхі̑ѧ, слы́шите сло́во гдⷭ҇не. Сѐ глаго́летъ а҆дѡнаі̀ гдⷭ҇ь косте́мъ си̑мъ: сѐ а҆́зъ введꙋ̀ въ ва́съ дх҃ъ живо́тенъ. И҆ да́мъ на ва́съ жи̑лы, и҆ возведꙋ̀ на ва́съ пло́ть, и҆ прострꙋ̀ по ва́мъ ко́жꙋ, и҆ да́мъ дх҃ъ мо́й въ ва́съ, и҆ ѡ҆живетѐ, и҆ ᲂу҆вѣ́сте, ꙗ҆́кѡ а҆́зъ є҆́смь гдⷭ҇ь. И҆ прореко́хъ, ꙗ҆́коже заповѣ́да мѝ гдⷭ҇ь: и҆ бы́сть гла́съ внегда́ ми прⷪ҇ро́чествовати, и҆ сѐ трꙋ́съ, и҆ совокꙋплѧ́хꙋсѧ кѡ́сти, ко́сть къ ко́сти, ка́ѧждо къ соста́вꙋ своемꙋ̀. И҆ ви́дѣхъ, и҆ сѐ бы́ша и҆̀мъ жи̑лы, и҆ пло́ть растѧ́ше, и҆ восхожда́ше, [и҆ протѧже́сѧ] и҆̀мъ ко́жа верхꙋ̀, дх҃ъ же не бѧ́ше въ ни́хъ. И҆ речѐ ко мнѣ̀: прорцы̀ ѡ҆ дс҃ѣ, прорцы̀ сы́не человѣ́чь, и҆ рцы̀ дх҃ови: сїѧ̑ глаго́летъ а҆дѡнаі̀ гдⷭ҇ь, ѿ четы́рехъ вѣ́трѡвъ прїидѝ дш҃е, и҆ вдꙋ́ни на мє́ртвыѧ сїѧ̑, и҆ да ѡ҆живꙋ́тъ. И҆ прореко́хъ, ꙗ҆́коже повелѣ̀ мѝ: и҆ вни́де въ нѧ̀ дх҃ъ жи́зни, и҆ ѡ҆жи́ша, и҆ ста́ша на нога́хъ свои́хъ, собо́ръ мно́гъ ѕѣлѡ̀. И҆ речѐ гдⷭ҇ь ко мнѣ̀, глаго́лѧ: сы́не человѣ́чь, сїѧ̑ кѡ́сти ве́сь до́мъ і҆и҃левъ є҆́сть, ті́и бо глаго́лютъ: сꙋ́хи бы́ша кѡ́сти на́шѧ, поги́бе наде́жда на́ша, ᲂу҆бїе́ни бы́хомъ. Тогѡ̀ ра́ди прорцы̀ [сы́не человѣ́чь], и҆ рцы̀ къ ни̑мъ, сїѧ̑ глаго́летъ а҆дѡнаі̀ гдⷭ҇ь: сѐ а҆́зъ ѿве́рзꙋ гро́бы ва́шѧ, и҆ и҆зведꙋ̀ ва́съ ѿ грѡ́бъ ва́шихъ, лю́дїе моѝ, и҆ введꙋ̀ вы̀ въ зе́млю і҆и҃левꙋ. И҆ ᲂу҆вѣ́сте, ꙗ҆́кѡ а҆́зъ є҆́смь гдⷭ҇ь, внегда̀ ѿве́рсти мѝ гро́бы ва́шѧ, є҆́же возвести́ ми ва́съ ѿ гробѡ́въ ва́шихъ, лю́дїе моѝ: и҆ да́мъ дх҃ъ мо́й въ ва́съ, и҆ жи́ви бꙋ́дете. И҆ поста́влю вы̀ на землѝ ва́шей, и҆ ᲂу҆вѣ́сте, ꙗ҆́кѡ а҆́зъ гдⷭ҇ь: глаго́лахъ, и҆ сотворю̀, глаго́летъ а҆дѡнаі̀ гдⷭ҇ь.
Прокі́менъ, гла́съ з҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀. Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
А҆по́столъ, къ корі́нѳѧнѡмъ, зача́ло рл҃г.
Бра́тїе, ма́лъ ква́съ всѐ смѣше́нїе ква́ситъ. Ѡ҆чи́стите ᲂу҆̀бо ве́тхїй ква́съ, да бꙋ́дете но́во смѣше́нїе, ꙗ҆́коже є҆стѐ безква́сни: и҆́бо па́сха на́ша за ны̀ пожре́нъ бы́сть, хрⷭ҇то́съ. Тѣ́мже да пра́зднꙋемъ, не въ ква́сѣ ве́тсѣ, ни въ ква́сѣ ѕло́бы и҆ лꙋка́вства, но въ безква́сїихъ чистоты̀ и҆ и҆́стины. Гал. зач. с҃ѕ Хрⷭ҇то́съ ны̀ и҆скꙋпи́лъ є҆́сть ѿ клѧ́твы зако́нныѧ, бы́въ по на́съ клѧ́тва. пи́сано бо є҆́сть: про́клѧтъ всѧ́къ ви́сѧй на дре́вѣ: Да въ ꙗ҆зы́цѣхъ бл҃гослове́нїе а҆враа́мле бꙋ́детъ ѡ҆ хрⷭ҇тѣ̀ і҆и҃сѣ, да ѡ҆бѣтова́нїе дх҃а прїи́мемъ вѣ́рою.
А҆ллилꙋ́їа, гла́съ є҃: Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀, и҆ да бѣжа́тъ ѿ лица̀ є҆гѡ̀ ненави́дѧщїи є҆го̀. Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ, ꙗ҆́кѡ та́етъ во́скъ ѿ лица̀ ѻ҆гнѧ̀. Сті́хъ: Та́кѡ да поги́бнꙋтъ грѣ́шницы ѿ лица̀ бж҃їѧ, а҆ првⷣницы да возвеселѧ́тсѧ.
Є҆ѵⷢ҇лїе ѿ матѳе́а, зача́ло рд҃і: Во ᲂу҆́трїй де́нь, и҆́же є҆́сть по пѧтцѣ̀: Коне́цъ: Съ кꙋстѡді́ею. Та́же є҆ктенїа̀: Рце́мъ всѝ: И҆ прѡ́чаѧ ꙗ҆́кѡ ѻ҆бы́чно. И҆спо́лнимъ ᲂу҆́треннюю мл҃твꙋ на́шꙋ: Та́кожде и҆ прѡ́чаѧ ꙗ҆́кѡ ѻ҆бы́чно. И҆ быва́етъ ѿпꙋ́стъ.
И҆ быва́етъ цѣлова́нїе плащани́цы, а҆ и҆дѣ́же нѣ́сть плащани́цы, цѣлꙋ́ютъ ѡ҆́бразъ: пѣвцы́ же пою́тъ стїхи́рꙋ, гла́съ є҃:
Прїиди́те ᲂу҆бл҃жи́мъ і҆ѡ́сифа приснопа́мѧтнаго, въ нощѝ къ пїла́тꙋ прише́дшаго, и҆ живота̀ всѣ́хъ и҆спроси́вшаго: да́ждь мѝ сего̀ стра́ннаго, и҆́же не и҆мѣ́етъ гдѣ̀ главы̀ подклони́ти: Да́ждь мѝ сего̀ стра́ннаго, є҆го́же ᲂу҆чени́къ лꙋка́вый на сме́рть предадѐ: да́ждь мѝ сего̀ стра́ннаго, є҆го́же мт҃и зрѧ́щи на крⷭ҇тѣ̀ ви́сѧща, рыда́ющи вопїѧ́ше, и҆ мт҃рски восклица́ше: ᲂу҆вы̀ мнѣ̀, ча́до моѐ! ᲂу҆вы̀ мнѣ̀, свѣ́те мо́й, и҆ ᲂу҆тро́ба моѧ̀ возлю́бленнаѧ! сѷмеѡ́номъ бо предрече́нное въ цр҃кви дне́сь собы́стсѧ: моѐ се́рдце ѻ҆рꙋ́жїе про́йде, но въ ра́дость воскрⷭ҇нїѧ твоегѡ̀ пла́чь преложѝ. покланѧ́емсѧ страсте́мъ твои̑мъ хрⷭ҇тѐ, покланѧ́емсѧ страсте́мъ твои̑мъ хрⷭ҇тѐ, покланѧ́емсѧ страсте́мъ твои̑мъ хрⷭ҇тѐ, и҆ ст҃о́мꙋ воскрⷭ҇нїю.
Пе́рвый же ча́съ пое́тсѧ въ притво́рѣ: тре́тїй же ча́съ, шесты́й и҆ девѧ́тый, пою́тсѧ вкꙋ́пѣ про́стѡ въ притво́рѣ съ бл҃же́ннами во своѐ вре́мѧ.