Во ст҃ꙋ́ю и҆ вели́кꙋю сꙋббѡ́тꙋ,

кле́плетъ ко ᲂу҆́трени въ седмы́й ча́съ но́щи. Начина́емъ ᲂу҆́треню по ѻ҆бы́чаю. И҆ по шестоѱа́лмїи є҆ктенїа̀ вели́каѧ.

На Бг҃ъ гдⷭ҇ь: тропа́рь, гла́съ в҃:

Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ, и҆ вонѧ́ми во гро́бѣ но́вѣ покры́въ положѝ.

Сла́ва: Є҆гда̀ снизше́лъ є҆сѝ къ сме́рти, животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀. є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.

И҆ ны́нѣ: Мѷроно́сицамъ жена́мъ, при гро́бѣ предста́въ а҆́гг҃лъ вопїѧ́ше: мѵ̑ра мє́ртвымъ сꙋ́ть прили́чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь.

И҆ начина́емъ пѣ́ти непоро́чны со сладкопѣ́нїемъ, та́кожде по стїхꙋ̀, и҆ похвалы̑ возглаша́етъ пѣве́цъ, во гла́съ є҃:

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

[сⷯ а҃] Бл҃же́ни непоро́чнїи въ пꙋ́ть, ходѧ́щїи въ зако́нѣ гдⷭ҇ни.

И҆ похвалы̑, во гла́съ є҃:

Жи́знь во гро́бѣ положи́лсѧ є҆сѝ хрⷭ҇тѐ, и҆ а҆́гг҃льскаѧ вѡ́инства ᲂу҆жаса́хꙋсѧ, снизхожде́нїе сла́вѧще твоѐ.

[в҃] Бл҃же́ни и҆спыта́ющїи свидѣ̑нїѧ є҆гѡ̀, всѣ́мъ се́рдцемъ взы́щꙋтъ є҆го̀.

Животѐ, ка́кѡ ᲂу҆мира́еши; ка́кѡ и҆ во гро́бѣ ѡ҆бита́еши; сме́рти же ца́рство разрꙋша́еши, и҆ ѿ а҆́да мє́ртвыѧ возставлѧ́еши;

[г҃] Не дѣ́лающїи бо беззако́нїѧ, въ пꙋте́хъ є҆гѡ̀ ходи́ша.

Велича́емъ тѧ̀ і҆и҃се цр҃ю̀, и҆ чте́мъ погребе́нїе и҆ страда̑нїѧ твоѧ̑, и҆́миже спа́слъ є҆сѝ на́съ ѿ и҆стлѣ́нїѧ.

[д҃] Ты̀ заповѣ́далъ є҆сѝ за́пѡвѣди твоѧ̑ сохрани́ти ѕѣлѡ̀.

Мѣ̑ры землѝ положи́вый, въ ма́ломъ ѡ҆бита́еши і҆и҃се всецр҃ю̀ гро́бѣ дне́сь, ѿ гробѡ́въ мє́ртвыѧ возставлѧ́ѧй.

[є҃] Дабы̀ и҆спра́вилисѧ пꙋтїѐ моѝ, сохрани́ти ѡ҆правда̑нїѧ твоѧ̑.

І҆и҃се хрⷭ҇тѐ мо́й, цр҃ю̀ всѣ́хъ, что̀ и҆щѧ̀ къ сꙋ́щымъ во а҆́дѣ прише́лъ є҆сѝ; и҆лѝ ро́дъ ѿрѣши́ти человѣ́ческїй;

[ѕ҃] Тогда̀ не постыжꙋ́сѧ, внегда̀ призрѣ́ти мѝ на всѧ̑ за́пѡвѣди твоѧ̑.

Влⷣка всѣ́хъ зри́тсѧ ме́ртвъ, и҆ во гро́бѣ но́вѣмъ полага́етсѧ, и҆стощи́вый гро́бы ме́ртвыхъ.

[з҃] И҆сповѣ́мсѧ тебѣ̀ въ пра́вости се́рдца, внегда̀ наꙋчи́ти ми сѧ сꙋдьба́мъ пра́вды твоеѧ̀.

Животѐ, во гро́бѣ положи́лсѧ є҆сѝ хрⷭ҇тѐ, и҆ сме́ртїю твое́ю сме́рть погꙋби́лъ є҆сѝ, и҆ и҆сточи́лъ є҆сѝ мі́рови жи́знь.

[и҃] Ѡ҆правда̑нїѧ твоѧ̑ сохраню̀, не ѡ҆ста́ви менѐ до ѕѣла̀.

Со ѕлодѣ́и ꙗ҆́кѡ ѕлодѣ́й хрⷭ҇тѐ вмѣни́лсѧ є҆сѝ, ѡ҆правда́ѧ на́съ всѣ́хъ, ѿ ѕлодѣ́йства дре́внѧгѡ запина́телѧ.

[ѳ҃] Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти словеса̀ твоѧ̑.

Кра́сный добро́тою па́че всѣ́хъ человѣ̑къ, ꙗ҆́кѡ беззра́ченъ ме́ртвъ ꙗ҆влѧ́етсѧ, є҆стество̀ ᲂу҆краси́вый всѣ́хъ.

[і҃] Всѣ́мъ се́рдцемъ мои́мъ взыска́хъ тебѐ, не ѿри́ни менѐ ѿ за́повѣдей твои́хъ.

А҆́дъ ка́кѡ стерпи́тъ сп҃се прише́ствїе твоѐ, а҆ не па́че болѣ́знꙋетъ ѡ҆мрача́емь, блиста́нїѧ свѣ́та твоегѡ̀ заре́ю ѡ҆слѣпле́нъ.

[а҃і] Въ се́рдцѣ мое́мъ скры́хъ словеса̀ твоѧ̑, ꙗ҆́кѡ да не согрѣшꙋ̀ тебѣ̀.

І҆и҃се сла́дкїй мо́й, и҆ сп҃си́тельный свѣ́те, во гро́бѣ ка́кѡ те́мномъ скры́лсѧ є҆сѝ; ѽ несказа́ннагѡ и҆ неизрече́ннагѡ терпѣ́нїѧ!

[в҃і] Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

Недоꙋмѣва́етъ и҆ є҆стество̀ ᲂу҆́мное, и҆ мно́жество безпло́тное хрⷭ҇тѐ, та́инства несказа́ннагѡ, и҆ неизрече́ннагѡ твоегѡ̀ погребе́нїѧ.

[г҃і] Оу҆стна́ма мои́ма возвѣсти́хъ всѧ̑ сꙋдьбы̑ ᲂу҆́стъ твои́хъ.

Ѽ чꙋде́съ стра́нныхъ! ѽ веще́й но́выхъ! дыха́нїѧ моегѡ̀ пода́тель бездыха́ненъ но́ситсѧ, погреба́емь рꙋка́ма і҆ѡ́сифовыма.

[д҃і] На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ.

И҆ во гро́бъ заше́лъ є҆сѝ, и҆ нѣ́дръ хрⷭ҇тѐ ѻ҆те́ческихъ ника́коже ѿлꙋчи́лсѧ є҆сѝ: сїѐ стра́нное и҆ пресла́вное кꙋ́пнѡ.

[є҃і] Въ за́повѣдехъ твои́хъ поглꙋмлю́сѧ, и҆ ᲂу҆разꙋмѣ́ю пꙋти̑ твоѧ̑.

И҆́стинный нб҃сѐ и҆ землѝ цр҃ю̀, а҆́ще и҆ во гро́бѣ малѣ́йшемъ заключи́лсѧ є҆сѝ, позна́лсѧ є҆сѝ все́й тва́ри і҆и҃се.

[ѕ҃і] Во ѡ҆правда́нїихъ твои́хъ поꙋчꙋ́сѧ, не забꙋ́дꙋ слове́съ твои́хъ.

Тебѣ̀ положе́нꙋ во гро́бѣ созда́телю хрⷭ҇тѐ, а҆́дскаѧ подвиза́шасѧ ѡ҆снова̑нїѧ, и҆ гро́би ѿверзо́шасѧ человѣ́кѡвъ.

[з҃і] Возда́ждь рабꙋ̀ твоемꙋ̀, живи́ мѧ, и҆ сохраню̀ словеса̀ твоѧ̑.

Зе́млю содержа́й дла́нїю, ᲂу҆мерщвле́нъ пло́тїю под̾ земле́ю ны́нѣ содержи́тсѧ, мє́ртвыѧ и҆збавлѧ́ѧ а҆́дова содержа́нїѧ.

[и҃і] Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀.

И҆з̾ и҆стлѣ́нїѧ возше́лъ є҆сѝ животѐ сп҃се мо́й, тебѣ̀ ᲂу҆ме́ршꙋ, и҆ къ мє́ртвымъ прише́дшꙋ, и҆ сломи́вшꙋ а҆́дѡвы верєѝ.

[ѳ҃і] Пришле́цъ а҆́зъ є҆́смь на землѝ, не скры́й ѿ менѐ за́пѡвѣди твоѧ̑.

Ꙗ҆́коже свѣ́та свѣти́льникъ, ны́нѣ пло́ть бж҃їѧ, под̾ зе́млю ꙗ҆́кѡ под̾ спꙋ́дъ кры́етсѧ, и҆ ѿгонѧ́етъ сꙋ́щꙋю во а҆́дѣ тьмꙋ̀.

[к҃] Возлюбѝ дꙋша̀ моѧ̀ возжела́ти сꙋдьбы̑ твоѧ̑ на всѧ́кое вре́мѧ.

Оу҆́мныхъ стека́етсѧ во́инствъ мно́жество со і҆ѡ́сифомъ и҆ нїкоди́момъ, погребсти́ тѧ невмѣсти́маго во гро́бѣ ма́лѣ.

[к҃а] Запрети́лъ є҆сѝ гѡ́рдымъ, про́клѧти ᲂу҆клонѧ́ющїисѧ ѿ за́повѣдей твои́хъ.

Оу҆мерщвле́нъ во́лею, и҆ положе́нъ под̾ земле́ю, жизното́чне і҆и҃се мо́й, ѡ҆живи́лъ є҆сѝ ᲂу҆мерщвле́на мѧ̀ престꙋпле́нїемъ го́рькимъ.

[к҃в] Ѿимѝ ѿ менѐ поно́съ и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ.

И҆змѣнѧ́шесѧ всѧ̀ тва́рь стрⷭ҇тїю твое́ю, всѧ̑ бо тебѣ̀, сло́ве сострада́хꙋ, содержи́телѧ тѧ̀ вѣ́дꙋще всѣ́хъ.

[к҃г] И҆́бо сѣдо́ша кнѧ́зи, и҆ на мѧ̀ клевета́хꙋ: ра́бъ же тво́й глꙋмлѧ́шесѧ во ѡ҆правда́нїихъ твои́хъ.

Живота̀ ка́мень во чре́вѣ прїе́мъ а҆́дъ всеѧ́децъ, и҆зблева̀, ѿ вѣ́ка ꙗ҆̀же поглотѝ мє́ртвыѧ.

[к҃д] И҆́бо свидѣ̑нїѧ твоѧ̑ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̑.

Во гро́бѣ но́вѣ положи́лсѧ є҆сѝ хрⷭ҇тѐ, и҆ є҆стество̀ человѣ́ческое ѡ҆бнови́лъ є҆сѝ, воскре́съ бг҃олѣ́пнѡ и҆з̾ ме́ртвыхъ.

[к҃є] Прильпѐ землѝ дꙋша̀ моѧ̀, живи́ мѧ по словесѝ твоемꙋ̀.

На зе́млю сше́лъ є҆сѝ, да спасе́ши а҆да́ма, и҆ на землѝ не ѡ҆брѣ́тъ сегѡ̀ влⷣко, да́же до а҆́да снизше́лъ є҆сѝ и҆щѧ́й.

[к҃ѕ] Пꙋти̑ моѧ̑ возвѣсти́хъ, и҆ ᲂу҆слы́шалъ мѧ̀ є҆сѝ, наꙋчѝ мѧ̀ ѡ҆правда́нїємъ твои̑мъ.

Сотрѧсе́сѧ стра́хомъ, сло́ве, всѧ̀ землѧ̀, и҆ денни́ца лꙋчы̀ скры̀, велича́йшемꙋ въ землѝ сокрове́нномꙋ твоемꙋ̀ свѣ́тꙋ.

[к҃з] Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ въ чꙋдесѣ́хъ твои́хъ.

Ꙗ҆́кѡ человѣ́къ ᲂу҆́бѡ ᲂу҆мира́еши во́лею сп҃се, ꙗ҆́кѡ бг҃ъ же смє́ртныѧ возста́вилъ є҆сѝ ѿ гробѡ́въ, и҆ глꙋбины̀ грѣхо́вныѧ.

[к҃и] Воздрема̀ дꙋша̀ моѧ̀ ѡ҆ ᲂу҆ны́нїѧ, ᲂу҆тверди́ мѧ въ словесѣ́хъ твои́хъ.

Слезотѡ́чнаѧ рыда̑нїѧ, на тебѐ чи́стаѧ мт҃рски, ѽ і҆и҃се накраплѧ́ющи вопїѧ́ше: ка́кѡ погребꙋ́ тѧ сн҃е;

[к҃ѳ] Пꙋ́ть непра́вды ѿста́ви ѿ менѐ, и҆ зако́номъ твои́мъ поми́лꙋй мѧ̀.

Ꙗ҆́коже пшени́чное зе́рно, заше́дъ въ нѣ̑дра земна̑ѧ, многопе́рстный возда́лъ є҆сѝ кла́съ, возста́вивъ человѣ́ки, ꙗ҆̀же ѿ а҆да́ма.

[л҃] Пꙋ́ть и҆́стины и҆зво́лихъ, и҆ сꙋдьбы̑ твоѧ̑ не забы́хъ.

Под̾ земле́ю скры́лсѧ є҆сѝ ꙗ҆́кѡ сл҃нце ны́нѣ, и҆ но́щїю сме́ртною покрове́нъ бы́лъ є҆сѝ: но возсїѧ́й свѣтлѣ́йше сп҃се.

[л҃а] Прилѣпи́хсѧ свидѣ́нїємъ твои̑мъ, гдⷭ҇и, не посрамѝ менѐ.

Ꙗ҆́коже со́лнечный крꙋ́гъ лꙋна̀ сп҃се сокрыва́етъ, и҆ тебѐ ны́нѣ гро́бъ скры̀, сконча́вшагосѧ сме́ртїю пло́тски.

[л҃в] Пꙋ́ть за́повѣдей твои́хъ теко́хъ, є҆гда̀ разшири́лъ є҆сѝ се́рдце моѐ.

Живо́тъ сме́рти вкꙋси́вый хрⷭ҇то́съ, ѿ сме́рти смє́ртныѧ свободѝ, и҆ всѣ̑мъ ны́нѣ да́рꙋетъ живо́тъ.

[л҃г] Законоположѝ мнѣ̀ гдⷭ҇и пꙋ́ть ѡ҆правда́нїй твои́хъ, и҆ взыщꙋ̀ и҆̀ вы́нꙋ.

Оу҆мерщвле́на дре́вле а҆да́ма зави́стнѡ, возво́диши къ животꙋ̀ ᲂу҆мерщвле́нїемъ твои́мъ, но́вый, сп҃се, во пло́ти ꙗ҆вле́йсѧ а҆да́мъ.

[л҃д] Вразꙋми́ мѧ, и҆ и҆спыта́ю зако́нъ тво́й, и҆ сохраню̀ и҆̀ всѣ́мъ се́рдцемъ мои́мъ.

Оу҆́мнїи тѧ̀ чи́ни, просте́рта ме́ртва зрѧ́ще на́съ ра́ди, ᲂу҆жаса́хꙋсѧ, покрыва́еми крилы̀ сп҃се.

[л҃є] Наста́ви мѧ̀ на стезю̀ за́повѣдей твои́хъ, ꙗ҆́кѡ тꙋ́ю восхотѣ́хъ.

Сне́мъ тѧ̀ сло́ве ѿ дре́ва ме́ртва, во гро́бѣ і҆ѡ́сифъ ны́нѣ положѝ: но воста́ни сп҃са́ѧй всѧ̑ ꙗ҆́кѡ бг҃ъ.

[л҃ѕ] Приклонѝ се́рдце моѐ во свидѣ̑нїѧ твоѧ̑, а҆ не въ лихои́мство.

А҆́гг҃льскаѧ сп҃се ра́дость бы́въ, ны́нѣ и҆ печа́ли си̑мъ бы́лъ є҆сѝ вино́венъ, ви́димь пло́тїю бездыха́ненъ ме́ртвъ.

[л҃з] Ѿвратѝ ѻ҆́чи моѝ, є҆́же не ви́дѣти сꙋеты̀, въ пꙋтѝ твое́мъ живи́ мѧ.

Возне́слсѧ є҆сѝ на дре́вѣ, и҆ живꙋ́щыѧ человѣ́ки совозно́сиши: под̾ земле́ю же бы́въ, лежа́щыѧ под̾ не́ю воскреша́еши.

[л҃и] Поста́ви рабꙋ̀ твоемꙋ̀ сло́во твоѐ въ стра́хъ тво́й.

Ꙗ҆́коже ле́въ сп҃се ᲂу҆снꙋ́въ пло́тїю, ꙗ҆́кѡ нѣ́кїй скѵ́менъ ме́ртвъ востае́ши, ѿложи́въ ста́рость плотскꙋ́ю.

[л҃ѳ] Ѿимѝ поноше́нїе моѐ, є҆́же непщева́хъ, ꙗ҆́кѡ сꙋдьбы̑ твоѧ̑ бла́ги.

Въ ре́бра прободе́нъ бы́лъ є҆сѝ, ребро̀ взе́мый а҆да́мле, ѿ негѡ́же є҆́ѵꙋ созда́лъ є҆сѝ, и҆ и҆сточи́лъ є҆сѝ то́ки чисти́тєльныѧ.

[м҃] Сѐ возжела́хъ за́пѡвѣди твоѧ̑, въ пра́вдѣ твое́й живи́ мѧ.

Та́йнѡ ᲂу҆́бѡ дре́вле жре́тсѧ а҆́гнецъ: ты́ же ꙗ҆́вѣ жре́нъ бы́въ неѕло́биве, всю̀ тва́рь ѡ҆чи́стилъ є҆сѝ сп҃се.

[м҃а] И҆ да прїи́детъ на мѧ̀ млⷭ҇ть твоѧ̀ гдⷭ҇и, сп҃се́нїе твоѐ по словесѝ твоемꙋ̀.

Кто̀ и҆зрече́тъ ѡ҆́бразъ стра́шный вои́стиннꙋ но́вый; влады́чествꙋѧй бо тва́рїю, дне́сь стрⷭ҇ть прїе́млетъ, и҆ ᲂу҆мира́етъ на́съ ра́ди.

[м҃в] И҆ ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̑.

Живота̀ сокро́вище, ка́кѡ зри́тсѧ ме́ртвый; ᲂу҆жаса́ющесѧ а҆́гг҃ли взыва́хꙋ: ка́кѡ же во гро́бѣ заключа́етсѧ бг҃ъ;

[м҃г] И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀, ꙗ҆́кѡ на сꙋдьбы̑ твоѧ̑ ᲂу҆пова́хъ.

Копїе́мъ прободе́ннагѡ сп҃се и҆з̾ ребра̀ твоегѡ̀, живо́тъ живото́мъ и҆з̾ живота̀ спа́сшагѡ мѧ̀ и҆ска́паеши, и҆ живи́ши мѧ̀ съ ни́мъ.

[м҃д] И҆ сохраню̀ зако́нъ тво́й вы́нꙋ въ вѣ́къ, и҆ въ вѣ́къ вѣ́ка.

Распросте́ртъ на дре́вѣ, собра́лъ є҆сѝ человѣ́ки: въ ре́бра же прободе́нъ, живото́чное всѣ̑мъ ѡ҆ставле́нїе и҆сточа́еши і҆и҃се.

[м҃є] И҆ хожда́хъ въ широтѣ̀, ꙗ҆́кѡ за́пѡвѣди твоѧ̑ взыска́хъ.

Бл҃гоѡбра́зный сп҃се ѡ҆бразꙋ́етъ стра́шнѡ, и҆ погреба́етъ тѧ̀ ꙗ҆́кѡ ме́ртва бл҃гоѡбра́знѡ, и҆ ᲂу҆жаса́етсѧ твоегѡ̀ ѡ҆́браза стра́шнагѡ.

[м҃ѕ] И҆ глаго́лахъ ѡ҆ свидѣ́нїихъ твои́хъ пред̾ царѝ, и҆ не стыдѧ́хсѧ.

Под̾ земле́ю хотѣ́нїемъ низше́дъ ꙗ҆́кѡ ме́ртвъ, возво́диши ѿ землѝ къ нбⷭ҇нымъ, ѿтꙋ́дꙋ па́дшыѧ і҆и҃се.

[м҃з] И҆ поꙋча́хсѧ въ за́повѣдехъ твои́хъ, ꙗ҆̀же возлюби́хъ ѕѣлѡ̀.

А҆́ще и҆ ме́ртвъ ви́дѣнъ бы́лъ є҆сѝ, но живы́й ꙗ҆́кѡ бг҃ъ, возво́диши ѿ землѝ къ нбⷭ҇нымъ, ѿтꙋ́дꙋ па́дшыѧ і҆и҃се.

[м҃и] И҆ воздвиго́хъ рꙋ́цѣ моѝ къ за́повѣдемъ твои̑мъ, ꙗ҆̀же возлюби́хъ.

А҆́ще и҆ ме́ртвъ ви́дѣнъ бы́лъ є҆сѝ, но жи́въ ꙗ҆́кѡ бг҃ъ, ᲂу҆мерщвлє́ныѧ человѣ́ки ѡ҆живи́лъ є҆сѝ, моего̀ ᲂу҆мертви́въ ᲂу҆мертви́телѧ.

[м҃и] И҆ глꙋмлѧ́хсѧ во ѡ҆правда́нїихъ твои́хъ.

Ѽ ра́дости ѻ҆́ныѧ! ѽ мно́гїѧ сла́дости! и҆̀хже во а҆́дѣ напо́лнилъ є҆сѝ, во дна́хъ мра́чныхъ свѣ́тъ возсїѧ́въ.

[м҃ѳ] Помѧнѝ словеса̀ твоѧ̑ рабꙋ̀ твоемꙋ̀, и҆́хже ᲂу҆пова́нїе да́лъ мѝ є҆сѝ.

Покланѧ́юсѧ стрⷭ҇ти, воспѣва́ю погребе́нїе, велича́ю твою̀ держа́вꙋ чл҃вѣколю́бче, и҆́миже свободи́хсѧ страсте́й тлетво́рныхъ.

[н҃] То́ мѧ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ.

На тѧ̀ ме́чь ѡ҆бнажи́сѧ хрⷭ҇тѐ, и҆ ме́чь крѣ́пкагѡ ᲂу҆́бѡ притꙋплѧ́етсѧ, и҆ ме́чь же ѡ҆браща́етсѧ є҆де́мскїй.

[н҃а] Го́рдїи законопрестꙋпова́хꙋ до ѕѣла̀, ѿ зако́на же твоегѡ̀ не ᲂу҆клони́хсѧ.

А҆́гница а҆́гнца зрѧ́щи въ заколе́нїи, ѻ҆́стрїемъ пробода́ема рыда́ше, сподви́гши и҆ ста́до вопи́ти.

[н҃в] Помѧнꙋ́хъ сꙋдьбы̑ твоѧ̑ ѿ вѣ́ка гдⷭ҇и, и҆ ᲂу҆тѣ́шихсѧ.

А҆́ще и҆ во гро́бѣ погреба́ешисѧ, а҆́ще и҆ во а҆́дъ и҆́деши: но и҆ гро́бы и҆стощи́лъ є҆сѝ, и҆ а҆́дъ ѡ҆бнажи́лъ є҆сѝ хрⷭ҇тѐ.

[н҃г] Печа́ль прїѧ́тъ мѧ̀ ѿ грѣ̑шникъ, ѡ҆ставлѧ́ющихъ зако́нъ тво́й.

Во́лею снизше́лъ є҆сѝ сп҃се, под̾ зе́млю, ᲂу҆мерщвлє́ныѧ человѣ́ки ѡ҆живи́лъ є҆сѝ, и҆ возве́лъ є҆сѝ во сла́вѣ ѻ҆́ч҃ей.

[н҃д] Пѣ́та бѧ́хꙋ мнѣ̀ ѡ҆правда̑нїѧ твоѧ̑ на мѣ́стѣ прише́льствїѧ моегѡ̀.

Трⷪ҇цы є҆ди́нъ во пло́ти, на́съ ра́ди поно́снꙋю претерпѣ̀ сме́рть, ᲂу҆жаса́етсѧ же со́лнце, и҆ трепе́щетъ землѧ̀.

[н҃є] Помѧнꙋ́хъ въ нощѝ и҆́мѧ твоѐ гдⷭ҇и, и҆ сохрани́хъ зако́нъ тво́й.

Ꙗ҆́кѡ ѿ и҆сто́чника го́рькагѡ, і҆ꙋ́дова колѣ́на и҆сча̑дїѧ въ ро́вѣ положи́ша, пита́телѧ маннода́вца і҆и҃са.

[н҃ѕ] Се́й бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ.

Сꙋдїѧ̀ ꙗ҆́кѡ сꙋди́мь пред̾ пїла́томъ сꙋдїе́ю, и҆ предста̀, и҆ сме́ртїю непра́ведною ѡ҆сꙋжде́нъ бы́сть, дре́вомъ кре́стнымъ.

[н҃з] Ча́сть моѧ̀ є҆сѝ, гдⷭ҇и: рѣ́хъ сохрани́ти зако́нъ тво́й.

Го́рдый і҆и҃лю, ᲂу҆бі́йственнїи лю́дїе, что̀ пострада́вше, вара́ввꙋ свободи́сте, и҆ сп҃са преда́сте крⷭ҇тꙋ̀;

[н҃и] Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ: поми́лꙋй мѧ̀ по словесѝ твоемꙋ̀.

Рꙋко́ю твое́ю созда́вый а҆да́ма ѿ землѝ, тогѡ̀ ра́ди є҆стество́мъ бы́лъ є҆сѝ человѣ́къ, и҆ распѧ́лсѧ є҆сѝ во́лею твое́ю.

[н҃ѳ] Помы́слихъ пꙋти̑ твоѧ̑ и҆ возврати́хъ но́зѣ моѝ во свидѣ̑нїѧ твоѧ̑.

Послꙋ́шавъ сло́ве, ѻ҆ц҃а̀ твоегѡ̀, да́же до а҆́да лю́тагѡ соше́лъ є҆сѝ, и҆ воскр҃си́лъ є҆сѝ ро́дъ человѣ́ческїй.

[ѯ҃] Оу҆гото́вихсѧ и҆ не смꙋти́хсѧ сохрани́ти за́пѡвѣди твоѧ̑.

Оу҆вы̀ мнѣ̀ свѣ́те мі́ра! ᲂу҆вы̀ мнѣ̀ свѣ́те мо́й, і҆и҃се мо́й возжелѣ́нный! вопїѧ́ше дв҃а, рыда́ющи го́рькѡ взыва́ше.

[ѯ҃а] Оу҆́жѧ грѣ̑шникъ ѡ҆бѧза́шасѧ мнѣ̀, и҆ зако́на твоегѡ̀ не забы́хъ.

Зави́стливїи, ᲂу҆бі́йственнїи и҆ го́рдїи лю́дїе, понѐ плащани́цы и҆ сꙋдарѧ̀ самагѡ̀ да стыдѧ́тсѧ, воскре́сшꙋ хрⷭ҇тꙋ̀.

[ѯ҃в] Полꙋ́нощи воста́хъ и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀.

Прїидѝ ᲂу҆́бѡ скве́рный ᲂу҆бі́йце ᲂу҆ченичѐ, и҆ нра́въ ѕло́бы твоеѧ̀ покажи́ ми, и҆́мже бы́лъ є҆сѝ преда́тель хрⷭ҇то́въ.

[ѯ҃г] Прича́стникъ а҆́зъ є҆́смь всѣ̑мъ боѧ́щымсѧ тебє̀ и҆ хранѧ́щымъ за́пѡвѣди твоѧ̑.

Ꙗ҆́кѡ человѣколюби́въ нѣ́кто притворѧ́ешисѧ бꙋ́е, и҆ слѣ́пе всегꙋби́тельнѣйшїй, невѣ́рный, мѵ́ро прода́вый на цѣнѣ̀.

[ѯ҃д] Млⷭ҇ти твоеѧ̀, гдⷭ҇и, и҆спо́лнь землѧ̀: ѡ҆правда́нїємъ твои̑мъ наꙋчи́ мѧ.

Нбⷭ҇нагѡ мѵ́ра кꙋ́ю и҆мѣ́лъ є҆сѝ цѣ́нꙋ многоцѣ́ннагѡ; ко́е прїѧ́лъ є҆сѝ противодосто́йное; неи́стовство ѡ҆брѣ́лъ є҆сѝ проклѧ́тѣйшїй сатано̀.

[ѯ҃є] Бл҃гость сотвори́лъ є҆сѝ съ рабо́мъ твои́мъ гдⷭ҇и, по словесѝ твоемꙋ̀.

А҆́ще нищелю́бецъ є҆сѝ, и҆ ѡ҆ мѵ́рѣ печа́лꙋеши и҆стоща́емомъ во ѡ҆чище́нїе дꙋшѝ, ка́кѡ на зла́тѣ продае́ши свѣтоза́рна;

[ѯ҃ѕ] Бл҃гости и҆ наказа́нїю и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои̑мъ вѣ́ровахъ.

Ѽ бж҃їй сло́ве! ѽ ра́досте моѧ̀! ка́кѡ претерплю̀ тридне́вное твоѐ погребе́нїе; ны́нѣ терза́юсѧ ᲂу҆тро́бою мт҃рски.

[ѯ҃з] Пре́жде да́же не смири́ти ми сѧ, а҆́зъ прегрѣши́хъ, сегѡ̀ ра́ди сло́во твоѐ сохрани́хъ.

Кто̀ да́стъ мѝ во́дꙋ и҆ сле́зъ и҆сто́чники, бг҃оневѣ́стнаѧ дв҃а взыва́ше, да воспла́чꙋ сла́дкаго мѝ і҆и҃са;

[ѯ҃и] Бл҃гъ є҆сѝ ты̀ гдⷭ҇и, и҆ бл҃гостїю твое́ю наꙋчи́ мѧ ѡ҆правда́нїємъ твои̑мъ.

Ѽ го́ры и҆ хо́лми, и҆ человѣ́кѡвъ мно́жєства! воспла́читесѧ, и҆ всѧ̑ рыда́йте со мно́ю бг҃а ва́шегѡ мт҃рїю!

[ѯ҃ѳ] Оу҆мно́жисѧ на мѧ̀ непра́вда го́рдыхъ, а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ̑.

Когда̀ ви́ждꙋ тѧ̀ сп҃се, безлѣ́тнаго свѣ́та, ра́дость и҆ сла́дость се́рдца моегѡ̀; дв҃а го́рькѡ вопїѧ́ше.

[ѻ҃] Оу҆сыри́сѧ ꙗ҆́кѡ млеко̀ се́рдце и҆́хъ, а҆́зъ же зако́нꙋ твоемꙋ̀ поꙋчи́хсѧ.

А҆́ще и҆ ꙗ҆́кѡ ка́мень сп҃се, краесѣко́мый, ты̀ прїѧ́лъ є҆сѝ сѣче́нїе, но и҆сточи́лъ є҆сѝ живꙋ́ю стрꙋю̀, ꙗ҆́кѡ и҆сто́чникъ сы́й жи́зни.

[ѻ҃а] Бл҃го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ.

Ꙗ҆́кѡ ѿ и҆сто́чника є҆ди́нагѡ сꙋгꙋ́бою рѣко́ю ре́брѡмъ твои̑мъ и҆злива́ющымъ напаѧ́ющесѧ, безсме́ртнꙋю прїѡбрѣта́емъ жи́знь.

[ѻ҃в] Бл҃гъ мнѣ̀ зако́нъ ᲂу҆́стъ твои́хъ, па́че ты́сѧщъ зла́та и҆ сребра̀.

Во́лею ꙗ҆ви́лсѧ є҆сѝ сло́ве во гро́бѣ ме́ртвъ, но живе́ши, и҆ человѣ́ки, ꙗ҆́коже предре́клъ є҆сѝ, воскрⷭ҇нїемъ твои́мъ сп҃се мо́й, воздвиза́еши.

Сла́ва: Воспѣва́емъ сло́ве, тебѐ всѣ́хъ бг҃а, со ѻ҆ц҃е́мъ и҆ ст҃ы́мъ твои́мъ дх҃омъ, и҆ сла́вимъ бж҃е́ственное твоѐ погребе́нїе.

И҆ ны́нѣ, бг҃оро́диченъ: Бл҃жи́мъ тѧ̀ бцⷣе чⷭ҇таѧ, и҆ почита́емъ тридне́вное погребе́нїе сн҃а твоегѡ̀ и҆ бг҃а на́шегѡ вѣ́рнѡ.

И҆ па́ки пе́рвый припѣ́въ ѻ҆́ба ли̑ка вкꙋ́пѣ. Та́же, є҆ктенїа̀ ма́лаѧ.

И҆ возгла́съ на пе́рвꙋю статїю̀:

Ꙗ҆́кѡ бл҃гослови́сѧ твоѐ и҆́мѧ, и҆ просла́висѧ твоѐ црⷭ҇тво, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

И҆ покади́въ, начина́етъ вторꙋ́ю статїю̀.