Повече́рїе же пое́мъ въ ке́ллїахъ,

на не́мже пое́мъ канѡ́нъ, ѡ҆ распѧ́тїи гдⷭ҇ни, и҆ на пла́чь прест҃ы́ѧ бцⷣы: і҆рмо́съ по два́жды, тропарѝ на д҃. Послѣди́ же і҆рмо́съ ѻ҆́ба ли̑ка вкꙋ́пѣ. Творе́нїе сѷмеѡ́на логоѳе́та. Гла́съ ѕ҃:

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Запѣ́въ: Сла́ва тебѣ̀ бж҃е на́шъ, сла́ва тебѣ̀.

Ѡ҆бѣ́шена ꙗ҆́кѡ ви́дѣ на крⷭ҇тѣ̀, сн҃а и҆ гдⷭ҇а, дв҃аѧ чⷭ҇таѧ, терза́ющисѧ вопїѧ́ше го́рцѣ, со дрꙋги́ми жена́ми стенѧ́щи глаго́лаше.

Ви́жꙋ тѧ̀ ны́нѣ возлю́бленное моѐ ча́до и҆ люби́мое, на крⷭ҇тѣ̀ ви́сѧща, и҆ ᲂу҆ѧзвлѧ́юсѧ го́рцѣ се́рдцемъ, речѐ чⷭ҇таѧ: но да́ждь сло́во бл҃гі́й рабѣ̀ твое́й.

Сла́ва: Во́лею сн҃е мо́й и҆ тво́рче терпи́ши на дре́вѣ лю́тꙋю сме́рть, дв҃а глаго́лаше предстоѧ́щи ᲂу҆ крⷭ҇та̀ со возлю́бленнымъ ᲂу҆ч҃нко́мъ.

И҆ ны́нѣ: Ны́нѣ моегѡ̀ ча́ѧнїѧ, ра́дости и҆ весе́лїѧ, сн҃а моегѡ̀ и҆ гдⷭ҇а лише́на бы́хъ: ᲂу҆вы̀ мнѣ̀, болѣ́знꙋю се́рдцемъ, чⷭ҇таѧ пла́чꙋщи глаго́лаше.

Пѣ́снь г҃.

І҆рмо́съ: Нѣ́сть ст҃ъ ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Стра́ха ра́ди і҆ꙋде́йска пе́тръ скры́сѧ, и҆ всѝ ѿбѣго́ша вѣ́рнїи, ѡ҆ста́вльше хрⷭ҇та̀, дв҃а рыда́ющи глаго́лаше.

Ѡ҆ стра́шномъ твое́мъ ржⷭ҇твѣ̀ и҆ стра́нномъ, сн҃е мо́й, па́че всѣ́хъ ма́терей возвели́чена бы́хъ а҆́зъ: но ᲂу҆вы̀ мнѣ̀, ны́нѣ тѧ̀ ви́дѧщи на дре́вѣ, распала́юсѧ ᲂу҆тро́бою.

Сла́ва: Хощꙋ̀ ᲂу҆тро́бꙋ мою̀ на рꙋкꙋ̀, и҆́маже ꙗ҆́кѡ младе́нца держа́хъ, съ дре́ва прїѧ́ти, вѣща́ше чⷭ҇таѧ: но никто́же, ᲂу҆вы̀ мнѣ̀, сего̀ дадѐ.

И҆ ны́нѣ: Сѐ свѣ́тъ мо́й сла́дкїй, наде́жда и҆ живо́тъ мо́й бл҃гі́й, бг҃ъ мо́й ᲂу҆гасѐ на крⷭ҇тѣ̀, распала́юсѧ ᲂу҆тро́бою, дв҃а стенѧ́щи глаго́лаше.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ це́рковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

Со́лнце не заходѧ́й бж҃е превѣ́чный, и҆ тво́рче всѣ́хъ тва́рей гдⷭ҇и, ка́кѡ терпи́ши стрⷭ҇ть на крⷭ҇тѣ̀, чи́стаѧ пла́чꙋщи глаго́лаше.

Пла́чꙋщи глаго́лаше браконеискꙋ́снаѧ, ко бл҃гоѡбра́зномꙋ: потщи́сѧ і҆ѡ́сифе къ пїла́тꙋ пристꙋпи́ти, и҆ и҆спросѝ снѧ́ти со дре́ва ᲂу҆чи́телѧ твоего̀.

Сла́ва: Ви́дѣвъ пречⷭ҇тꙋю го́рцѣ слезѧ́щꙋ, і҆ѡ́сифъ смꙋти́сѧ, и҆ пла́часѧ пристꙋпѝ къ пїла́тꙋ, да́ждь мѝ, вопїѧ̀ съ пла́чемъ, тѣ́ло бг҃а моегѡ̀.

И҆ ны́нѣ: Оу҆ѧ́звена тѧ̀ ви́дѧщи, и҆ без̾ сла́вы, на́га на дре́вѣ, ча́до моѐ, ᲂу҆тро́бою распала́юсѧ, рыда́ющи ꙗ҆́кѡ мт҃и, дв҃а провѣщава́ше.

Пѣ́снь є҃.

І҆рмо́съ: Бж҃їимъ свѣ́томъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ молю́сѧ, тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Растерза́ѧсѧ и҆ рыда́ѧ, и҆ дивѧ́сѧ вкꙋ́пѣ съ нїкоди́момъ снѧ́тъ і҆ѡ́сифъ, и҆ ᲂу҆цѣлова́въ пречи́стое тѣ́ло, рыда́ше, и҆ стенѧ́ше, и҆ поѧ̀ є҆го̀ ꙗ҆́кѡ бг҃а.

Прїи́мши є҆го̀ съ пла́чемъ мт҃и неискꙋсомꙋ́жнаѧ, положѝ на колѣ́нꙋ, молѧ́щи є҆го̀ со слеза́ми, и҆ ѡ҆блобыза́ющи, го́рцѣ же рыда́ющи и҆ восклица́ющи.

Сла́ва: Є҆ди́нꙋ наде́ждꙋ и҆ живо́тъ, влⷣко сн҃е мо́й и҆ бж҃е, во ѻ҆́чїю свѣ́тъ раба̀ твоѧ̀ и҆мѣ́хъ, ны́нѣ же лише́на бы́хъ тебѐ, сла́дкое моѐ ча́до и҆ люби́мое.

И҆ ны́нѣ: Болѣ̑зни и҆ скѡ́рби, и҆ воздыха̑нїѧ ѡ҆брѣто́ша мѧ̀, ᲂу҆вы̀ мнѣ̀ чⷭ҇таѧ го́рцѣ рыда́ющи глаго́лаше, ви́дѧщи тѧ̀ ча́до моѐ возлю́бленное, на́га и҆ ᲂу҆едине́на, и҆ вонѧ́ми пома́зана мертвеца̀.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ вопїю́ ти: возведѝ ѿ тлѝ живо́тъ мо́й, многомлⷭ҇тиве.

Ме́ртва тѧ̀ зрю̀ чл҃вѣколю́бче, ѡ҆живи́вшаго мє́ртвыѧ, и҆ содержа́ща всѧ̑, ᲂу҆ѧзвлѧ́юсѧ лю́тѣ ᲂу҆тро́бою. хотѣ́ла бы́хъ съ тобо́ю ᲂу҆мре́ти, пречⷭ҇таѧ глаго́лаше: не терплю́ бо без̾ дыха́нїѧ ме́ртва тѧ̀ ви́дѣти.

Дивлю́сѧ зрѧ́щи тѧ̀ пребл҃гі́й бж҃е, и҆ преще́дрый гдⷭ҇и, без̾ сла́вы, и҆ без̾ дыха́нїѧ, и҆ без̾ѡбра́зна, и҆ пла́чꙋсѧ держа́щи тѧ̀, ꙗ҆́кѡ не надѣ́ѧхсѧ ᲂу҆вы̀ мнѣ̀, ви́дѣти тѧ̀ сн҃е мо́й и҆ бж҃е.

Сла́ва: Не и҆зглаго́леши ли рабѣ̀ твое́й сло́ва, сло́ве бж҃їй; не ᲂу҆ще́дриши ли влⷣко, тебѐ ро́ждшꙋю, глаго́лаше чⷭ҇таѧ, рыда́ющи и҆ пла́чꙋщи, ѡ҆блобыза́ющи тѣ́ло гдⷭ҇а своегѡ̀;

И҆ ны́нѣ: Помышлѧ́ю влⷣко, ꙗ҆́кѡ ктомꙋ̀ сла́дкагѡ твоегѡ̀ не ᲂу҆слы́шꙋ гла́са, ни добро́ты лица̀ твоегѡ̀ ᲂу҆зрю̀, ꙗ҆́коже пре́жде раба̀ твоѧ̀: и҆́бо заше́лъ є҆сѝ сн҃е мо́й ѿ ѻ҆́чїю моє́ю.

Конда́къ, гла́съ и҃: На́съ ра́ди распѧ́таго прїиди́те всѝ воспои́мъ, того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ, и҆ бг҃ъ мо́й.

І҆́косъ: Своего̀ а҆́гнца а҆́гница зрѧ́щи, къ заколе́нїю влеко́ма, послѣ́доваше мр҃і́а просте́ртыми власы̀ со и҆нѣ́ми жена́ми, сїѧ̑ вопїю́щи: ка́мѡ и҆́деши ча́до, чесѡ̀ ра́ди ско́рое тече́нїе соверша́еши; є҆да̀ дрꙋгі́й бра́къ па́ки є҆́сть въ ка́нѣ, и҆ та́мѡ ны́нѣ тщи́шисѧ, да ѿ воды̀ и҆̀мъ вїно̀ сотвори́ши; и҆дꙋ́ ли съ тобо́ю ча́до, и҆лѝ па́че пождꙋ̀ тебѐ; да́ждь мѝ сло́во сло́ве, не молча̀ мимоидѝ менѐ чи́стꙋ соблюды́й мѧ̀: ты́ бо є҆сѝ сн҃ъ, и҆ бг҃ъ мо́й.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.

Гдѣ̀ сн҃е мо́й и҆ бж҃е бл҃говѣ́щенїе дре́внее, є҆́же мѝ гаврїи́лъ глаго́лаше; цр҃ѧ́ тѧ, сн҃а и҆ бг҃а вы́шнѧго нарица́ше: ны́нѣ же ви́жꙋ тѧ̀, свѣ́те мо́й сла́дкїй, на́га и҆ ᲂу҆ѧ́звена мертвеца̀.

И҆збавлѧ́ѧй болѣ́зни, ны́нѣ прїими́ мѧ съ тобо́ю сн҃е мо́й и҆ бж҃е, да сни́дꙋ влⷣко во а҆́дъ съ тобо́ю и҆ а҆́зъ, не ѡ҆ста́ви менѐ є҆ди́нꙋ: ᲂу҆же́ бо жи́ти не терплю̀, не ви́дѧщи тебѐ сла́дкагѡ моегѡ̀ свѣ́та.

Сла́ва: Съ дрꙋги́ми жена́ми мѷроно́сицами, рыда́ющи непоро́чнаѧ го́рцѣ, и҆ носи́ма ви́дѧщи хрⷭ҇та̀, глаго́лаше: ᲂу҆вы̀ мнѣ̀, что̀ ви́жꙋ! ка́мѡ и҆́деши ны́нѣ сн҃е мо́й, а҆ менѐ є҆ди́нꙋ ѡ҆ставлѧ́еши;

И҆ ны́нѣ: И҆знемога́ющи и҆ рыда́ющи непоро́чнаѧ, мѷроно́сицамъ глаго́лаше: срыда́йте мѝ, и҆ спла́читесѧ го́рцѣ: се́ бо свѣ́тъ мо́й сла́дкїй, и҆ ᲂу҆чи́тель ва́шъ гро́бꙋ предае́тсѧ.

Пѣ́снь и҃.

І҆рмо́съ: И҆з̾ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.

Дв҃ꙋ рыда́ющꙋ і҆ѡ́сифъ ви́дѣвъ, растерза́шесѧ ве́сь, и҆ вопїѧ́ше го́рькѡ: ка́кѡ тѧ̀, ѽ бж҃е мо́й, ны́нѣ погребꙋ̀ ра́бъ тво́й; каки́ми плащани́цами ѡ҆бвїю̀ тѣ́ло твоѐ;

Па́че ᲂу҆ма̀ превзы́де стра́нное твоѐ видѣ́нїе носѧ́щагѡ тва́рь всю̀ гдⷭ҇а: сегѡ̀ ра́ди і҆ѡ́сифъ ꙗ҆́кѡ ме́ртва тѧ̀ на рꙋкꙋ̀ своє́ю, и҆ съ нїкоди́момъ но́ситъ и҆ погреба́етъ.

Сла́ва: Стра́ннꙋю ви́жꙋ и҆ пресла́внꙋю та́йнꙋ, дв҃а вопїѧ́ше сн҃ꙋ и҆ гдⷭ҇ꙋ: ка́кѡ въ хꙋдо́мъ гро́бѣ полага́ешисѧ, мє́ртвыѧ повелѣ́нїемъ возставлѧ́ѧй во гробѣ́хъ;

И҆ ны́нѣ: Ни ѿ гро́ба твоегѡ̀ воста́нꙋ ча́до моѐ, ни сле́зы точа́щи преста́нꙋ раба̀ твоѧ̀, до́ндеже и҆ а҆́зъ сни́дꙋ во а҆́дъ: не могꙋ́ бо терпѣ́ти разлꙋче́нїѧ твоегѡ̀, сн҃е мо́й.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными во́и тѧ̀ ᲂу҆бл҃жа́емъ.

Ра́дость мнѣ̀ николи́же ѿсе́лѣ прико́снетсѧ, рыда́ющи глаго́лаше непоро́чнаѧ: свѣ́тъ мо́й и҆ ра́дость моѧ̀ во гро́бъ за́йде: но не ѡ҆ста́влю є҆го̀ є҆ди́наго, здѣ́ же ᲂу҆мрꙋ̀, и҆ спогребꙋ́сѧ є҆мꙋ̀.

Дꙋше́внꙋю мою̀ ꙗ҆́звꙋ ны́нѣ и҆сцѣлѝ ча́до моѐ, пречⷭ҇таѧ вопїѧ́ше слезѧ́щи: воскрⷭ҇нѝ, и҆ ᲂу҆толѝ мою̀ болѣ́знь и҆ печа́ль, мо́жеши бо влⷣко, є҆ли́кѡ хо́щеши, и҆ твори́ши, а҆́ще и҆ погре́блсѧ є҆сѝ во́лею.

Сла́ва: Ѽ ка́кѡ ᲂу҆таи́ласѧ тебѐ є҆́сть бе́здна щедро́тъ, мт҃ри въ та́йнѣ и҆зречѐ гдⷭ҇ь; тва́рь бо мою̀ хотѧ̀ спастѝ, и҆зво́лихъ ᲂу҆мре́ти. но и҆ воскре́снꙋ, и҆ тебѐ возвели́чꙋ, ꙗ҆́кѡ бг҃ъ нб҃сѐ и҆ землѝ.

И҆ ны́нѣ: Воспою̀ милосе́рдїе твоѐ чл҃вѣколю́бче, и҆ покланѧ́юсѧ бога́тствꙋ млⷭ҇ти твоеѧ̀ влⷣко: созда́нїе бо твоѐ хотѧ̀ спастѝ, сме́рть под̾ѧ́лъ є҆сѝ, речѐ пречⷭ҇таѧ: но воскрⷭ҇нїемъ твои́мъ сп҃се, поми́лꙋй всѣ́хъ на́съ.

Та́же за Досто́йно, і҆рмо́съ: Бг҃а человѣ́кѡмъ не возмо́жно ви́дѣти: Трист҃о́е. По Ѻ҆́ч҃е на́шъ: конда́къ: На́съ ра́ди распѧ́таго: Гдⷭ҇и поми́лꙋй, м҃. И҆́же на всѧ́кое вре́мѧ: Гдⷭ҇и поми́лꙋй, три́жды. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче. І҆ере́й: Мл҃твами ст҃ы́хъ ѻ҆тє́цъ на́шихъ: И҆ мл҃тва: Нескве́рнаѧ, небла́знаѧ: И҆ ѿпꙋ́стъ.

Полꙋ́нощницꙋ же пое́мъ въ ке́ллїахъ.