На ᲂу҆́трени,
по ѻ҆бы́чномъ послѣ́дованїи канѡ́ны: воскрⷭ҇ный съ бг҃оро́дичнымъ, на ѕ҃: и҆ настоѧ́щїй трїѡ́ди, на д҃: и҆ ст҃а́гѡ на д҃. Канѡ́нъ трипѣ́снца, гла́съ є҃.
Пѣ́снь а҃.
І҆рмо́съ: Сп҃си́телю бг҃ꙋ:
Оу҆подо́бихсѧ хрⷭ҇тѐ въ рꙋ́цѣ разбо́йникѡвъ впа́дшемꙋ, и҆ бїе́ньми є҆́ле жи́вꙋ ѿ си́хъ ѡ҆ста́вленномꙋ сп҃се: и҆ а҆́зъ си́це ᲂу҆ѧ́звленъ є҆́смь грѣхѝ мои́ми.
Не пре́зри менѐ недꙋ́гꙋюща лю́тѡ, вопїѧ́ше сп҃се рыда́ѧ, на разбѡ́йники бога́тство и҆знꙋри́вый твоѐ. и҆ а҆́зъ си́це молю́сѧ: ᲂу҆ще́дри и҆ сп҃си́ мѧ.
Оу҆врачева́вый мѧ̀ ᲂу҆бїе́нъ и҆мꙋ́ща ᲂу҆́мъ грѣхѝ въ ꙗ҆́звахъ, ѿ разбо́йникѡвъ непра́ведныхъ и҆ лꙋка́выхъ помышле́нїй, хрⷭ҇тѐ сп҃се, сп҃си́ мѧ ꙗ҆́кѡ многоми́лостивый.
Бг҃оро́диченъ: Пречⷭ҇таѧ мт҃и хрⷭ҇то́ва, вопло́щшагосѧ и҆з̾ тебѐ, и҆ ѿ нѣ́дръ роди́телѧ не ѿлꙋ́чшасѧ бг҃а, непреста́ннѡ молѝ, ѿ всѧ́кагѡ ѡ҆бстоѧ́нїѧ сп҃стѝ, ꙗ҆̀же созда̀.
И҆́ный канѡ́нъ прпⷣбнагѡ, гла́съ и҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ:
Во свѣ́тъ невеще́ственный и҆ ᲂу҆́мный, ѿ печа́ли веще́ственныхъ восте́къ і҆ѡа́нне прпⷣбне, мл҃твами твои́ми ко гдⷭ҇ꙋ просвѣти́ мѧ.
Ꙗ҆́кѡ воздержа́нїѧ сла́дость сса́въ, ѿри́нꙋлъ є҆сѝ го́ресть сласте́й: тѣ́мже па́че ме́да и҆ со́та ᲂу҆слажда́еши ѻ҆́тче, чꙋ̑вства на̑ша.
Возше́дъ на высотꙋ̀ добродѣ́телей, до́лѣ плѣ́жꙋщыѧ поплева́въ сла̑сти, сла́дость ꙗ҆ви́лсѧ є҆сѝ сп҃се́нїѧ, прпⷣбне ѻ҆́тче, ста́дꙋ твоемꙋ̀.
Бг҃оро́диченъ: Премꙋ́дрость и҆ сло́во ѻ҆́ч҃ее несказа́ннѡ ро́ждшаѧ, дꙋшѝ моеѧ̀ лю́тꙋю ᲂу҆врачꙋ́й ꙗ҆́звꙋ, и҆ се́рдца болѣ́знь ᲂу҆кротѝ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃.
І҆рмо́съ: Оу҆твердѝ ны̀ бж҃е:
Пꙋте́мъ житїѧ̀ хрⷭ҇тѐ, лю́тѣ пꙋтеше́ствꙋѧ, ᲂу҆ѧ́звленъ є҆́смь ѿ разбѡ́йникъ въ страсте́хъ: но возста́ви мѧ̀ молю́сѧ.
Разби́ша ᲂу҆́мъ мо́й разбо́йницы, и҆ ѡ҆ста́виша мѧ̀ въ ꙗ҆́звахъ є҆́ле жи́ва прегрѣше́нїй мои́хъ: но и҆сцѣли́ мѧ гдⷭ҇и.
Ѡ҆бнажи́ша мѧ̀ сп҃се хрⷭ҇тѐ, за́повѣдей твои́хъ стра̑сти, и҆ сластьмѝ ᲂу҆ѧзви́хсѧ: но и҆зле́й на мѧ̀ млⷭ҇ть.
Бг҃оро́диченъ: Молѝ непреста́ннѡ чⷭ҇таѧ, проше́дшаго и҆з̾ чре́слъ твои́хъ, и҆зба́витисѧ ле́сти дїа́воли, пою́щымъ тѧ̀ мт҃рь бж҃їю.
И҆́ный. І҆рмо́съ: Ты̀ є҆сѝ ᲂу҆твержде́нїе:
Попали́лъ є҆сѝ ᲂу҆́глемъ ѡ҆бꙋче́нїѧ пресла́внѡ страсте́й те́рнїе, и҆ согрѣва́еши мона́шествꙋющихъ состоѧ̑нїѧ.
Мѵ́ро ѡ҆сщ҃е́нїѧ ѿ по́стническихъ преподо́бне а҆рѡма̑тъ, ве́сь сложи́лсѧ є҆сѝ въ воню̀ бл҃гоꙋха́нїѧ бж҃їѧ.
Въ зако́нѣхъ ѡ҆бꙋче́нїѧ поꙋча́ѧсѧ, стра̑сти потопи́лъ є҆сѝ, ꙗ҆́коже и҆ны̑ѧ ны́нѣ фараѡні́ты, тече́нїемъ сле́зъ твои́хъ.
Бг҃оро́диченъ: Оу҆ста́ви моѐ непостоѧ́нное помышле́нїй, чⷭ҇таѧ, смꙋще́нїе, мт҃и бж҃їѧ, къ сн҃ꙋ твоемꙋ̀ направлѧ́ющи движе́нїе.
Сѣда́ленъ, гла́съ є҃.
Подо́бенъ: Стра́нное:
Пречи́стый крⷭ҇тъ тво́й, сп҃се на́шъ, ꙗ҆́кѡ ѻ҆рꙋ́жїе сп҃се́нїѧ содержа́ще, тѣ́мъ тебѣ̀ вопїе́мъ: сп҃си́ ны пострада́вый во́лею ѡ҆ на́съ, всѣ́хъ бж҃е, ꙗ҆́кѡ многомлⷭ҇тивый.
Сла́ва, прпⷣбнагѡ, гла́съ д҃.
Подо́бенъ: Вознесы́йсѧ:
Добродѣ́тельми къ нб҃сѝ возсїѧ́вый, водрꙋже́нъ ꙗ҆́вѣ, возше́лъ є҆сѝ къ бг҃овидѣ́нїѧ неизмѣ́римой глꙋбинѣ̀ бл҃гоче́стнѡ: всѧ̑ ᲂу҆́бѡ побѣди́въ де́мѡнскїѧ кѡ́зни, покрыва́еши же человѣ́ки ѿ вре́да си́хъ, і҆ѡа́нне, лѣ́ствице добродѣ́телей: и҆ ны́нѣ мо́лишисѧ сп҃сти́сѧ рабѡ́мъ твои̑мъ.
И҆ ны́нѣ, бг҃оро́диченъ. Подо́бенъ:
На престо́лѣ херꙋві́мскомъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧйсѧ, ꙗ҆́кѡ на престо́лѣ сѣди́тъ ст҃ѣ́мъ свое́мъ влⷣчце, въ нѣ́дрѣхъ твои́хъ пло́тски: бг҃ъ бо воцр҃и́выйсѧ та́кѡ над̾ всѣ́ми ꙗ҆зы́ки, и҆ разꙋ́мнѡ ны́нѣ пое́мъ є҆мꙋ̀: є҆го́же и҆ ты̀ чⷭ҇таѧ молѝ, сп҃сти́сѧ рабѡ́мъ твои̑мъ.
Пѣ́снь д҃.
І҆рмо́съ: Оу҆слы́шахъ гдⷭ҇и слꙋ́хъ тво́й:
Разбѡ́йницы ѡ҆крадо́ша моѐ дѣѧ́нїе бж҃е́ственное, и҆ ѡ҆ста́виша мѧ̀ ꙗ҆́звами мꙋ́чима.
И҆звлеко́ша мѧ̀ сп҃се за́повѣдей твои́хъ, непостоѧ̑ннаѧ помышлє́нїѧ моѧ̑, ѿѻнꙋ́дꙋже ᲂу҆ѧ́звленъ є҆́смь прегрѣше́ньми.
Леѵі́тъ ра́нами ᲂу҆ѧ́звленна, ꙗ҆́кѡ ви́дѣ мѧ̀, ми́мѡ и҆́де, сп҃се мо́й: но ты́ мѧ сп҃сѝ.
Бг҃оро́диченъ: Гдⷭ҇ственнѡ прославлѧ́емъ тѧ̀ бцⷣе безневѣ́стнаѧ, и҆ къ твоемꙋ̀ приста́нищꙋ вѣ́рнїи прибѣга́емъ.
И҆́ный. І҆рмо́съ: Оу҆слы́шахъ гдⷭ҇и:
Ꙗ҆́кѡ цвѣ́тникъ бл҃гово́ннѣйшїй, и҆ добродѣ́телей ра́й ѡ҆дꙋшевле́нный, воздержа́нїе процвѣ́лъ є҆сѝ, и҆́мже всѧ̑ напита́лъ є҆сѝ чтꙋ́щыѧ тѧ̀.
Законоположи́телѧ ѡ҆бꙋче́нїѧ, и҆ мона́хѡвъ пра́вило кротча́йшее, ꙗ҆́кѡ мѡѷсе́а тѧ̀ и҆ дв҃да вои́стиннꙋ, стѧжа́вше ѻ҆́тче, ᲂу҆бл҃жа́емъ.
Насажде́нъ на вода́хъ воздержа́нїѧ, ꙗ҆ви́лсѧ є҆сѝ бл҃же́нне, розга̀ ѻ҆́тче бл҃гоцвѣтꙋ́щаѧ, бл҃гоче́стїѧ гро́зды произносѧ́щаѧ.
Бг҃оро́диченъ: Под̾ лѣ́томъ быва́ема, ѿ ѻ҆ц҃а̀ безлѣ́тнѡ возсїѧ́вша, бг҃омт҃и на́мъ родила̀ є҆сѝ: є҆го́же молѝ сп҃стѝ пою́щыѧ тѧ̀.
Пѣ́снь є҃.
І҆рмо́съ: ᲂу҆́тренююще вопїе́мъ тѝ:
І҆и҃се, посѣтѝ ра̑ны дꙋшѝ моеѧ̀, ꙗ҆́коже дре́вле въ рꙋ́цѣ впа́дшагѡ разбѡ́йничи, и҆ ᲂу҆врачꙋ́й болѣ́знь мою̀ хрⷭ҇тѐ, молю́сѧ.
Болѣ́зненнѡ ꙗ҆́звами и҆знемого́хъ, хрⷭ҇тѐ мо́й, прегрѣше́нїй, и҆ ѿтꙋ́дꙋ на́гъ лежꙋ̀ добродѣ́телей бж҃е́ственныхъ: молю̀, сп҃си́ мѧ.
І҆ере́й ꙗ҆́коже ви́дѣ мѧ̀, и҆ леѵі́тъ не возмо́же ꙗ҆́вѣ, мимоидо́ша бо мѧ̀: но са́мъ ꙗ҆́кѡ бл҃гоꙋтро́бенъ, ны́нѣ сп҃се́нїе по́далъ, и҆ сп҃слъ є҆сѝ.
Бг҃оро́диченъ: Не пре́зри влⷣко ѻ҆каѧ́ннагѡ менѐ, молю́сѧ, ᲂу҆ѧ́звленнагѡ ᲂу҆мо́мъ болѣ́зненнѡ ѿ разбѡ́йникъ: но ᲂу҆ще́дри мл҃твами сп҃се, ро́ждшїѧ тѧ̀.
И҆́ный. І҆рмо́съ: Вскꙋ́ю мѧ̀ ѿри́нꙋлъ є҆сѝ:
Погаси́въ всѧ̑ стра̑сти, росо́ю подвигѡ́въ твои́хъ ѻ҆́тче бл҃же́нне, ѻ҆би́льнѡ возже́гъ ѻ҆гне́мъ любвѐ и҆ вѣ́ры, воздержа́нїѧ свѣти́льникъ, и҆ просвѣще́нїе безстра́стїѧ, и҆ днѐ сы́нъ бы́лъ є҆сѝ.
Вѣ́ры гро́здъ, бж҃е́ственнымъ земледѣ́лїемъ твои́мъ ѻ҆́тче воспита́лъ є҆сѝ, и҆ въ точи̑ла вложи́лъ є҆сѝ, и҆ воздѣ́лалъ є҆сѝ трꙋды̀ ѡ҆бꙋче́нїѧ,и҆ ча́шꙋ и҆спо́лнь дх҃о́внꙋю воздержа́нїѧ: весели́ши сердца̀ ста́да твоегѡ̀.
Претерпѣ́въ до́брѣ прило́ги и҆ ꙗ҆́звы проти́вныхъ врагѡ́въ, ꙗ҆ви́лсѧ є҆сѝ сто́лпъ терпѣ́нїѧ, ᲂу҆твержда́ѧ ста́до твоѐ па́лицею бж҃е́ственною, на па́жити воздержа́нїѧ, и҆ на водѣ̀ воспитова́ѧ бл҃же́нне.
Бг҃оро́диченъ: Рѣ́чемъ твои́хъ ᲂу҆сте́нъ всечⷭ҇таѧ послѣ́дꙋюще, тѧ̀ ᲂу҆бл҃жа́емъ: съ тобо́ю бо вои́стиннꙋ вели̑чїѧ сотвори́вый гдⷭ҇ь возвели́чи тѧ̀, и҆ и҆́стиннꙋю бж҃їю мт҃рь, рожде́йсѧ и҆з̾ чре́ва твоегѡ̀ показа̀.
Пѣ́снь ѕ҃.
І҆рмо́съ: Ѡ҆бы́де мѧ̀ бе́здна:
Страстьмѝ и҆жди́хъ житїѐ бж҃е́ственное влⷣко, и҆ всѧ́кѡ прегрѣше́ньми лю́тѣ ᲂу҆ѧ́звенъ, прибѣго́хъ къ тебѣ̀: ᲂу҆ще́дри мѧ̀, молю́сѧ.
Расхи́тиша бога́тство моѐ, и҆ ꙗ҆́коже ме́ртва мѧ̀ ѡ҆ста́виша разбѡ́йницы, страстьмѝ ᲂу҆́мъ мо́й ᲂу҆ѧзви́вше: но ᲂу҆ще́дривъ сп҃си́ мѧ гдⷭ҇и.
Ꙗ҆́кѡ ви́дѣ леѵі́тъ мою̀ ра̑нъ болѣ́знь, ꙗ҆́звъ не терпѧ̀, мимои́де мѧ̀: са́мъ же чл҃вѣколю́бче, и҆злїѧ́лъ мѝ є҆сѝ бога́тꙋю твою̀ млⷭ҇ть.
Бг҃оро́диченъ: Кꙋпинꙋ́ тѧ неѡпали́мꙋю, и҆ го́рꙋ, и҆ лѣ́ствицꙋ ѡ҆дꙋшевле́ннꙋю, и҆ две́рь нбⷭ҇нꙋю, досто́йнѡ сла́вимъ, мр҃і́е пресла́внаѧ, правосла́вныхъ похвало̀.
И҆́ный. І҆рмо́съ: Ѡ҆чи́сти мѧ̀ сп҃се:
Прїѧ́лъ є҆сѝ въ дꙋшѝ бж҃е́ственное бога́тство дх҃а, непоро́чнꙋю мл҃твꙋ, чистотꙋ̀, че́стность, бдѣ́нїе всегда́шнее, воздержа́нїѧ трꙋды̀, и҆́миже до́мъ позна́лсѧ є҆сѝ бж҃їй.
Вещества̀ є҆́же до́лѣ, премꙋ́дре, прете́клъ є҆сѝ хꙋ́дость, невеще́ственною же мл҃твою ᲂу҆́мъ воспери́въ, и҆ вы́шнѧгѡ ᲂу҆покое́нїѧ ꙗ҆ви́лсѧ є҆сѝ наслѣ́дникъ, соверше́нства ра́ди житїѧ̀.
По́тами по́стническими ᲂу҆́глїе стрѣ́лъ вра́жїихъ ᲂу҆гаси́лъ є҆сѝ вои́стиннꙋ, и҆ ѻ҆́гнь вѣ́ры возсїѧ́въ, попали́лъ є҆сѝ невѣ́рїѧ, є҆ресе́й шата̑нїѧ.
Бг҃оро́диченъ: Возсїѧ̀ ѿ сїѡ́на вы́шнѧгѡ бл҃голѣ́пїе, предложе́нїемъ пло́ти по соедине́нїю неизрече́нномꙋ, и҆з̾ тебѐ неискꙋсобра́чнаѧ ѡ҆бложе́нное, и҆ мі́ръ просвѣтѝ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
На высотѣ̀ гдⷭ҇ь воздержа́нїѧ и҆́стинна тѧ̀ положѝ, ꙗ҆́коже ѕвѣздꙋ̀ неле́стнꙋю, свѣтоводѧ́щꙋю концы̀, наста́вниче і҆ѡа́нне ѻ҆́тче на́шъ.
І҆́косъ: До́мъ бж҃їй ꙗ҆́кѡ вои́стиннꙋ, самаго̀ себѐ содѣ́лалъ є҆сѝ ѻ҆́тче, бж҃е́ственными твои́ми добродѣ́тельми: ꙗ҆́вѣ ᲂу҆краси́въ ꙗ҆́кѡ зла́то свѣ́тлое, вѣ́рꙋ, наде́ждꙋ, и҆ любо́вь и҆́стиннꙋю: бж҃е́ствєнныѧ зако́ны и҆злага́ѧ, воздержа́нїемъ ѡ҆бꙋчи́всѧ ꙗ҆́кѡ безпло́тный: ра́зꙋмъ, мꙋ́жество, цѣломꙋ́дрїе стѧжа́въ, смире́нїе, и҆́мже возне́слсѧ є҆сѝ. тѣ́мже и҆ просвѣти́лсѧ є҆сѝ мл҃твами непреста́нными, и҆ нбⷭ҇наѧ прїѧ́лъ є҆сѝ селє́нїѧ, наста́вниче і҆ѡа́нне ѻ҆́тче на́шъ.
Та́же чте́тсѧ сѷнаѯа́рїи дневны́й.
Посе́мъ житїѐ прпⷣбнагѡ ѻ҆тца̀ на́шегѡ і҆ѡа́нна лѣ́ствичника, въ ми́рѣ сконча́вшагѡсѧ. Стїхѝ:
И҆́же пло́тїю и҆ живы́й, ме́ртвъ сы́й і҆ѡа́ннъ,
Вѣ́чнѡ живе́тъ, и҆ ме́ртвъ ꙗ҆́вльсѧ бездыха́нный:
Списа́нїе ѡ҆ста́вль лѣ́ствицꙋ восхожде́нїѧ,
Показꙋ́етъ своегѡ̀ пꙋ́ть восхожде́нїѧ.
І҆ѡа́ннъ ᲂу҆́мре въ тридесѧ́тый де́нь.
И҆́же шестина́десѧти лѣ́тъ сы́й, и҆ ѻ҆строꙋ́мный сы́й, принесѐ себѐ бг҃ꙋ же́ртвꙋ сщ҃е́ннѣйшꙋю, на сїна́йскꙋю го́рꙋ возше́дъ. Та́же по девѧтина́десѧтихъ лѣ́тѣхъ воста́въ прихо́дитъ въ безмо́лвїѧ по́прище ѿ пѧтѝ зна́менїи кѷрїа́ка: во ѻ҆би́тель пале́стры дости́гъ, на мѣ́сто глаго́лемое ѳѡ́ла, четы́редесѧть лѣ́тъ пожи́въ, при́снѡ разжига́емь любо́вїю, и҆ ѻ҆гне́мъ бж҃е́ственныѧ любвѐ. Ꙗ҆дѧ́ше ᲂу҆́бѡ всѧ̑, ꙗ҆̀же непоро́чнѡ присто́ѧхꙋ за́повѣди, но ᲂу҆мѣ́реннѡ ѕѣлѡ̀, и҆ въ се́мъ го́рдости ро́гъ сломлѧ́ѧ всепремꙋ́дрѡ. Но и҆сто́чникъ сле́зъ є҆гѡ̀ кі́й ᲂу҆́мъ и҆зре́клъ бы; Сна́ же причаща́шесѧ, є҆ли́кѡ ᲂу҆ма̀ сꙋществꙋ̀ бдѣ́нїемъ не вреди́тисѧ. Тече́нїе же є҆гѡ̀ мл҃тва бѧ́ше при́снаѧ, и҆ къ бг҃ꙋ любо́вь безмѣ́рнаѧ. Си́ми всѣ́ми бг҃оꙋго́днѡ пожи́въ и҆справле́ньми, и҆ лѣ́ствицꙋ списа́вый, словеса̀ ᲂу҆че́нїѧ и҆зложи́въ, и҆ и҆спо́лненъ бл҃гости досто́йнѡ ᲂу҆поко́исѧ въ гдⷭ҇ѣ, мнѡ́га и҆ и҆на̑ѧ списа̑нїѧ ѡ҆ста́вивъ. Є҆гѡ́же мл҃твами бж҃е поми́лꙋй, и҆ сп҃сѝ на́съ.
Пѣ́снь з҃.
І҆рмо́съ: Превозноси́мый ѻ҆тцє́въ:
Разбѡ́йницы ѡ҆бпадо́ша на мѧ̀ ѻ҆каѧ́ннаго, и҆ ꙗ҆́звами ѡ҆ста́виша ме́ртва, ꙗ҆́коже бездыха́нна мѧ̀, тѣ́мже молю́сѧ тѝ: бж҃е, посѣти́ мѧ.
Оу҆́мъ мо́й плѣни́ша помышлє́нїѧ непостоѧ̑ннаѧ, и҆ ᲂу҆ѧзви́вше страстьмѝ, ме́ртва мѧ̀ ѡ҆ста́виша, мно́жествомъ прегрѣше́нїй, но сп҃се, и҆сцѣли́ мѧ.
Ꙗ҆́кѡ ви́дѣ леѵі́тъ мѧ̀ ра́нами болѧ́ща, не терпѧ̀ ꙗ҆́звъ неисцѣ́льнагѡ ра́ди, мимои́де мѧ̀, сп҃се мо́й: но са́мъ ᲂу҆врачꙋ́й мѧ̀.
Бг҃оро́диченъ: Ты̀ ѿ дв҃ы воплоти́выйсѧ, спа́слъ мѧ̀ є҆сѝ, ꙗ҆́звамъ мои̑мъ возлива́ѧ бога́тꙋю млⷭ҇ть, хрⷭ҇тѐ щедрѡ́тъ твои́хъ: сегѡ̀ ра́ди тѧ̀ сла́влю.
И҆́ный. І҆рмо́съ: Ѿ і҆ꙋде́и доше́дше:
На ѕла́цѣ вы́шнѧгѡ црⷭ҇твїѧ, ста́до ѻ҆́тче воспита́лъ є҆сѝ и҆ жезло́мъ догма̑тъ ѕвѣ́ри ѿгна́въ є҆ресе́й, воспѣ́лъ є҆сѝ: ѻ҆тє́цъ на́шихъ бж҃е бл҃гослове́нъ є҆сѝ.
Въ го́рнїй вше́лъ є҆сѝ и҆ невѣ́стническїй черто́гъ црⷭ҇тва хрⷭ҇то́ва, ѻ҆де́ждею ѡ҆блече́нъ досто́йною зва́вшагѡ, въ не́мже и҆ возле́глъ є҆сѝ, вопїѧ̀: ѻ҆тє́цъ на́шихъ бж҃е бл҃гослове́нъ є҆сѝ.
Невла́жнаѧ грѣхмѝ, рѣка̀ ꙗ҆ви́лсѧ є҆сѝ воздержа́нїѧ ѻ҆́тче, по́мыслы потоплѧ́ѧ, и҆ скве́рнꙋ ѡ҆чища́ѧ, вопїю́щихъ вѣ́рою: ѻ҆тє́цъ на́шихъ бж҃е бл҃гослове́нъ є҆сѝ.
Бг҃оро́диченъ: И҆з̾ чре́ва твоегѡ̀ про́йде воплоти́выйсѧ дв҃о, всѣ́хъ гдⷭ҇ь: тѣ́мже тѧ̀ бцⷣꙋ мꙋ́дрствꙋюще правосла́внѡ, сн҃ꙋ твоемꙋ̀ зове́мъ: ѻ҆тє́цъ на́шихъ бж҃е бл҃гослове́нъ є҆сѝ.
Пѣ́снь и҃.
І҆рмо́съ: Тебѣ̀ вседѣ́телю:
Ѿ разбѡ́йникъ по́мыслѡвъ мои́хъ сп҃се, растли́хъ житїѐ моѐ согрѣше́нїй ꙗ҆́звами. тѣ́мже бж҃е́ственнагѡ ѡ҆бнажи́хсѧ ѡ҆́браза, тебѐ чл҃вѣколюби́вагѡ бг҃а: но ᲂу҆ще́дри мѧ̀.
Прише́лъ є҆сѝ на зе́млю ѿ вы́шнихъ сп҃се, ᲂу҆ще́дривъ бїе́ньми ᲂу҆ра́неннаго мѧ̀ всего̀ прегрѣше́нїй ꙗ҆́звами ще́дре, и҆ и҆злїѧ́лъ є҆сѝ на мѧ̀ хрⷭ҇тѐ, млⷭ҇ть твою̀.
Тѣ́ло и҆ дꙋ́шꙋ ты̀ влⷣко сп҃се, и҆зба́вꙋ да́лъ є҆сѝ за мѧ̀, и҆ сп҃слъ мѧ̀ є҆сѝ, мече́мъ грѣхѡ́въ ᲂу҆ѧзвле́наго, въ неисцѣ́льныхъ ꙗ҆́звахъ, ꙗ҆́кѡ млⷭ҇тивый.
Бг҃оро́диченъ: Тѧ̀ па́че ᲂу҆ма̀ бг҃омꙋ́жнымъ сло́вомъ ро́ждшꙋю гдⷭ҇а и҆ дв҃ствꙋющꙋю, всѧ̑ дѣла̀ дв҃о бл҃гослови́мъ и҆ превозно́симъ во всѧ̑ вѣ́ки.
И҆́ный. І҆рмо́съ: Цр҃ѧ̀ нбⷭ҇нагѡ:
Сто́лпъ тѧ̀ ѡ҆дꙋшевле́нный ꙗ҆́кѡ вои́стиннꙋ, и҆ ѡ҆́бразъ воздержа́нїѧ ѻ҆́тче стѧжа́вше, всѝ твою̀ па́мѧть почита́емъ і҆ѡа́нне.
Мно́жество ра́дꙋетсѧ мона́хѡвъ, и҆ ликꙋ́етъ прпⷣбныхъ собо́ръ и҆ првⷣныхъ вѣне́цъ бо досто́йнѡ съ ни́ми прїѧ́лъ є҆сѝ.
Оу҆кра́шенъ добродѣ́тельми, въ невѣ́стникъ неизрече́нныѧ сла́вы соше́лъ є҆сѝ, пѣ́снь воспѣва́ѧ хрⷭ҇тꙋ̀ во вѣ́ки.
Бг҃оро́диченъ: По́мощи ꙗ҆́же ѿ тебѐ тре́бꙋющыѧ не пре́зри дв҃о, пою́щыѧ и҆ превозносѧ́щыѧ тѧ̀ во вѣ́ки.
Пѣ́снь ѳ҃.
І҆рмо́съ: И҆са́їе ликꙋ́й:
За́пѡвѣди твоѧ̑ влⷣко, не сохрани́въ ра́зꙋмомъ мои́мъ, въ стра̑сти вше́дъ сласте́й, ѡ҆бнажи́хсѧ бл҃года́ти, и҆ ꙗ҆́звами и҆зве́рженъ на́гъ. тѣ́мже молю́ тѧ сп҃се, сп҃си́ мѧ.
Нижѐ леѵі́тъ возмо́же ѿмы́ти стрꙋ́пы моѧ̑: но прише́лъ є҆сѝ ко мнѣ̀ бл҃же сострада́тельнѡ, и҆ и҆злїѧ́лъ є҆сѝ млⷭ҇ть твои́хъ щедрѡ́тъ сп҃се на мѧ̀, ꙗ҆́кѡ всеизрѧ́дный вра́чь и҆сцѣлѧ́ѧ мѧ̀.
Ꙗ҆́кѡ сы́й бл҃гоꙋтро́бенъ, ᲂу҆ще́дривъ сп҃слъ є҆сѝ хрⷭ҇тѐ, ꙗ҆́звами лю́тѣ ѿ разбѡ́йникъ сп҃се ᲂу҆бїе́на мѧ̀: дꙋ́шꙋ же и҆ тѣ́ло своѐ, ꙗ҆́кѡ дїнарѧ̀ два̀ да́лъ є҆сѝ и҆збавле́нїе.
Бг҃оро́диченъ: Па́че ᲂу҆ма̀ ржⷭ҇тво̀ твоѐ бг҃омт҃и, без̾ мꙋ́жа бо зача́тїе въ тебѣ̀, и҆ дѣ́вственно рожде́нїе бы́сть: и҆́бо бг҃ъ є҆́сть рожде́йсѧ, є҆го́же велича́юще, тѧ̀ дв҃о ᲂу҆бл҃жа́емъ.
И҆́ный. І҆рмо́съ: Чⷭ҇тꙋю сла́внѡ почти́мъ:
Вра́чь болѧ́щихъ въ прегрѣше́нїихъ, ѿ бг҃а бл҃же́нне, гꙋби́тель же ꙗ҆ви́лсѧ є҆сѝ и҆ прогони́тель лꙋка́выхъ дꙋхѡ́въ: тѣ́мже тѧ̀ ᲂу҆бл҃жа́емъ.
Зе́млю, ꙗ҆́коже тлѝ жили́ще, ѡ҆ста́вилъ є҆сѝ ѻ҆́тче, и҆ въ землѝ всели́лсѧ є҆сѝ кро́ткихъ, и҆ съ ни́ми весели́шисѧ, бж҃е́ственныѧ наслажда́ѧсѧ сла́дости.
Дне́сь де́нь пра́зднственный, всѧ̑ бо созыва́етъ мона́шествꙋющихъ стада̀, въ ли́къ дх҃о́вный, на трапе́зꙋ и҆ снѣ́дь нетлѣ́нныѧ жи́зни.
Бг҃оро́диченъ: Въ тебѣ̀ всели́всѧ всенепоро́чнаѧ, пре́жде родонача́льники ѕлонра́внѡ прельсти́вшаго человѣкоꙋбі́йцꙋ низложи́вый, роди́сѧ, и҆ всѧ̑ ны̀ сп҃сѐ.
Є҆ѯапостїла́рїй воскрⷭ҇нъ, и҆ прпⷣнагѡ. Подо́бенъ: Жєны̀ ᲂу҆слы́шите:
Мі́ра бл҃гостра́стїѧ, ꙗ҆́коже вре́днагѡ ᲂу҆клони́лсѧ є҆сѝ, и҆ безбра́шїемъ пло́ть ᲂу҆вѧди́въ, ѡ҆бнови́лъ є҆сѝ дꙋшѝ крѣ́пость прпⷣбне, и҆ сла́вою ѡ҆богати́лсѧ є҆сѝ нбⷭ҇ною пресла́вне. тѣ́мже не преста́й молѧ́сѧ ѡ҆ на́съ і҆ѡа́нне.
Бг҃оро́диченъ: Гдⷭ҇ственнѡ бцⷣꙋ тѧ̀ и҆сповѣ́дꙋемъ влⷣчце, тобо́ю сп҃се́ни: и҆́бо бг҃а родила̀ є҆сѝ неизрече́ннѡ, разо́ршаго крⷭ҇то́мъ сме́рть, къ себѣ́ же привле́кшаго прпⷣбныхъ собо́ры: съ ни́миже тѧ̀ восхвалѧ́емъ дв҃о.
На хвали́техъ воскрⷭ҇ны ѻ҆смогла́сника, и҆ а҆натѡ́лїевы.
Та́же глаго́лемъ сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀:
И҆ пое́мъ самогла́сенъ, гла́съ а҃: Прїиди́те дѣ́лаимъ въ та́йномъ вїногра́дѣ, плоды̀ покаѧ́нїѧ въ не́мъ творѧ́ще, не въ бра́шнѣхъ и҆ питїи́хъ трꙋжда́ющесѧ, но въ мл҃твахъ и҆ постѣ́хъ добродѣ́тєли и҆справлѧ́юще: си́ми ᲂу҆гожда́емый гдⷭ҇ь дѣ́ла, дїна́рь подае́тъ, и҆́мже дꙋ́шы и҆збавлѧ́етъ до́лга грѣхо́внагѡ, є҆ди́нъ многомлⷭ҇тивый.
Сла́ва, па́ки то́йже. И҆ ны́нѣ: Пребл҃гослове́нна є҆сѝ: Славосло́вїе вели́кое, и҆ ѿпꙋ́стъ. Сла́ва, и҆ ны́нѣ: стїхи́ра є҆ѵⷢ҇льскаѧ: и҆ ѡ҆глаше́нїе, и҆ ча́съ а҃-й, и҆ про́чее послѣ́дованїе ꙗ҆́кѡ ѻ҆бы́чно.
На лїтꙋргі́и и҆з̾ѡбрази́тєльныѧ, и҆ бл҃же́нны гла́са. Прокі́менъ а҆пⷭ҇ла, рѧдова́гѡ гла́са, и҆ прпⷣбнагѡ. Гла́съ з҃. Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Воспо́йте гдⷭ҇ви пѣ́снь но́вꙋ.
А҆пⷭ҇лъ днѐ, ко є҆вре́ємъ, зача́ло тд҃і. И҆ дрꙋгі́й прпⷣбнагѡ ко є҆фесе́ємъ, зача́ло ск҃ѳ. А҆ллилꙋ́їа, гла́са, и҆ прпⷣбнагѡ. Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе ѿ ма́рка, зача́ло м҃. И҆ прпⷣбнагѡ, ѿ матѳе́а, зача́ло і҃. Кїнѡні́къ: Хвали́те гдⷭ҇а съ нб҃съ: Дрꙋгі́й: Въ па́мѧть вѣ́чнꙋю: