Недѣ́лѧ четве́ртаѧ ст҃ы́хъ постѡ́въ.
Въ сꙋббѡ́тꙋ ве́чера стїхи̑ры воскрⷭ҇ны г҃, и҆ а҆натѡ́лїевы д҃, и҆ мине́и г҃. И҆́нїи же послѣ́днѣйшїи ѡ҆предѣли́ша пѣ́тисѧ послѣ́дованїю ст҃а́гѡ і҆ѡа́нна лѣ́ствичника. Стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Ѻ҆́тче і҆ѡа́нне прпⷣбне, вы́нꙋ вои́стиннꙋ бж҃їѧ въ горта́ни возношє́нїѧ носи́лъ є҆сѝ поꙋча́ѧсѧ дѣ́тельнѣйшымъ, бг҃одꙋхновє́ннымъ словесє́мъ всемꙋ́дре, и҆ ѿтꙋ́дꙋ и҆стека́емою бл҃года́тїю ѡ҆богати́лсѧ є҆сѝ, бы́въ бл҃же́нъ, нечести́выхъ всѣ́хъ совѣ́тѡванїѧ низвраща́ѧ.
Подо́бенъ:
Ѻ҆́тче і҆ѡа́нне пресла́вне, сле́зъ и҆сто́чники дꙋ́шꙋ ѡ҆чи́стивъ, и҆ всено́щными стоѧ́нїи бг҃а ᲂу҆млⷭ҇тививъ, воспери́лсѧ є҆сѝ къ любле́нїю сегѡ̀ бл҃же́нне и҆ красотѣ̀: є҆ѧ́же досто́йнѡ ны́нѣ наслажда́ешисѧ, непреста́ннѡ ра́дꙋѧсѧ, со страда́льцы твои́ми бг҃омꙋ́дре прпⷣбне.
Подо́бенъ:
Ѻ҆́тче і҆ѡа́нне прпⷣбне, воспери́въ ᲂу҆́мъ къ бг҃ꙋ вѣ́рою, мїрска́гѡ смѣше́нїѧ ѡ҆мерзи́лъ є҆сѝ непостоѧ́нное: и҆ крⷭ҇тъ тво́й воспрїи́мъ, всеви́дцꙋ послѣ́довалъ є҆сѝ: тѣ́ло неѡбꙋзда́нное, по́двигами ѡ҆бꙋче́нїѧ, по́мыслꙋ порабо́тивъ, крѣ́постїю бж҃е́ственнагѡ дх҃а.
Сла́ва, гла́съ є҃: Прпⷣбне ѻ҆́тче, гла́са є҆ѵⷢ҇лїа гдⷭ҇нѧ послꙋ́шавъ, мі́ръ ѡ҆ста́вилъ є҆сѝ, бога́тство и҆ сла́вꙋ нивочто́же вмѣни́въ. ѿѻнꙋ́дꙋже всѣ̑мъ возопи́лъ є҆сѝ: возлюби́те бг҃а, и҆ ѡ҆брѧ́щете бл҃года́ть вѣ́чнꙋю. ничто́же предпочти́те па́че любвѐ є҆гѡ̀, да є҆гда̀ прїи́детъ во сла́вѣ свое́й, ѡ҆брѧ́щете ᲂу҆покое́нїе со всѣ́ми ст҃ы́ми, и҆́хже мл҃твами хрⷭ҇тѐ сохранѝ, и҆ сп҃сѝ дꙋ́шы на́шѧ.
И҆ ны́нѣ, бг҃оро́диченъ а҃-й гла́са. На стїхо́внѣ стїхи̑ры ѻ҆смогла́сника. Сла́ва, прпⷣбнагѡ, гла́съ в҃. Самогла́сенъ:
На землѝ а҆́гг҃ла, и҆ на нб҃сѣ́хъ человѣ́ка бж҃їѧ, мі́ра бл҃гоꙋкраше́нїе, наслажде́нїе бл҃ги́хъ, добродѣ́телей по́стническихъ похвалꙋ̀, і҆ѡа́нна почти́мъ: насажде́нъ бо въ домꙋ̀ бж҃їи, процвѣтѐ пра́веднѡ, и҆ ꙗ҆́кѡ ке́дръ въ пꙋсты́ни ᲂу҆мно́жи стада̀ хрⷭ҇тѡ́ва слове́сныхъ ѻ҆ве́цъ, въ преподо́бїи и҆ пра́вдѣ.
И҆ ны́нѣ, бг҃оро́диченъ, гла́съ то́йже: Ѽ чꙋдесѐ но́вагѡ: Ны́нѣ ѿпꙋща́еши:
Тропа́рь, гла́съ а҃:
Пꙋсты́нный жи́тель и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ бг҃оно́се ѻ҆́тче на́шъ і҆ѡа́нне: посто́мъ, бдѣ́нїемъ, мл҃твою нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ тѝ. сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.