Въ сꙋббѡ́тꙋ д҃-ѧ седми́цы на ᲂу҆́трени:
А҆ллилꙋ́їа, и҆ тропарѝ, гла́съ в҃: А҆пⷭ҇ли, мч҃нцы: Сла́ва: Помѧнѝ гдⷭ҇и: И҆ ны́нѣ: Мт҃и ст҃а́ѧ: И҆ стїхосло́вїе. Та́же мч҃нчны сѣда́льны гла́са. По непоро́чныхъ же пое́мъ тропарѝ: Ст҃ы́хъ ли́къ: И҆ по є҆ктенїѝ сѣда́ленъ ме́ртвенъ, гла́съ є҃: Поко́й сп҃се на́шъ съ првⷣными: Сла́ва, коне́цъ: И҆ ны́нѣ, бг҃оро́диченъ: Ѿ дв҃ы возсїѧ́вый: Та́же канѡ́нъ мине́и, и҆ свѧта́гѡ ѻ҆би́тели, и҆ настоѧ́щыѧ четверопѣ́снцы по чи́нꙋ и҆́хъ. Четверопѣ́снецъ, є҆гѡ́же краегране́сїе: Пѣ́снь на мч҃нки, господи́на і҆ѡ́сифа. И҆ стїхосло́вѧтсѧ пѣ̑сни. Гла́съ д҃.
Пѣ́снь ѕ҃.
І҆рмо́съ: Пꙋчи́ною жите́йскою:
Преидо́сте предѣ́лы плѡтскі́ѧ страда́льцы мно́гимъ терпѣ́нїемъ, претерпѣ́вше мꙋ̑ки и҆ бѡлѣ́зни. тѣ́мже всѧ́кꙋю болѣ́знь и҆ ско́рбь ѡ҆блегча́ете, ва́съ воспѣва́ющихъ.
Тьма́мъ а҆́гг҃лъ во́инство совокꙋпи́сѧ ст҃ы́хъ страстоте́рпєцъ, и҆ мо́литъ всебл҃га́го бг҃а, согрѣше́нїй тьмочи́сленныхъ на́съ и҆зба́вити, ꙗ҆́кѡ хрⷭ҇тꙋ̀ ᲂу҆годи́вшїи.
Оу҆мертви́всѧ и҆ во гро́бѣ хрⷭ҇тѐ ᲂу҆снꙋ́въ, возста́вилъ є҆сѝ мє́ртвыѧ, и҆ въ вѣ́рѣ ᲂу҆ме́ршымъ дае́ши бл҃гости бога́тство хрⷭ҇тѐ, поко́й ѧ҆̀ со всѣ́ми ст҃ы́ми.
Бг҃оро́диченъ: Бж҃їе бг҃ъ сло́во, и҆скі́й ѡ҆божи́ти человѣ́ка чⷭ҇таѧ, и҆з̾ тебѐ воплоща́етсѧ, и҆ зе́мленъ ви́дитсѧ: є҆го́же непреста́ннѡ молѝ, ѡ҆брѣстѝ на́мъ млⷭ҇ть во вре́мѧ ѿвѣ́та.
И҆́ный господи́на ѳео́дѡра, гла́съ то́йже.
І҆рмо́съ: Бꙋ́рею грѣхо́вною:
Пло́ти и҆ кро́ве ст҃і́и не пощадѣ́вше, ко всѧ́комꙋ мꙋче́нїю ста́сте небоѧ́зненни, хрⷭ҇та̀ не ѿмета́ющесѧ: тѣ́мже съ нб҃съ низпосла̀ хрⷭ҇то́съ ва́мъ вѣнцы̀.
Мꙋ́чєникъ торжество̀ ᲂу҆срѧ́щимъ, просвѣти́вшесѧ дѣ́тельми, и҆ возопїи́мъ бг҃одꙋхнове́нными пѣ́сньми: вы̀ є҆стѐ вои́стиннꙋ денни̑цы на землѝ, хрⷭ҇тѡ́вы мꙋ́чєницы.
Трⷪ҇ченъ: Трⷪ҇це ст҃а́ѧ сла́влю тѧ̀, є҆стество̀ безнача́льное, є҆ди́наго бг҃а, є҆ди́наго гдⷭ҇а, трѝ ли́ца, ѻ҆ц҃а̀, сн҃а и҆ дх҃а: нерожде́нна, рожде́нна, и҆схо́дна, тꙋ́южде и҆ присносꙋ́щнꙋ.
Бг҃оро́диченъ: Ѽ бл҃же́ннаѧ бг҃оневѣ́сто, ка́кѡ родила̀ є҆сѝ без̾ мꙋ́жа, и҆ пребыла̀ є҆сѝ ꙗ҆́коже пре́жде; бг҃а бо родила̀ є҆сѝ, чꙋ́до стра́шное: но молѝ сп҃сти́сѧ пою́щымъ тѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Оу҆сѣчє́нїѧ ᲂу҆дѡ́въ ва́шихъ зрѧ́ще, наслажда́стесѧ кровьмѝ ра́дꙋющесѧ: но моли́те ѡ҆ на́съ прилѣ́жнѡ гдⷭ҇а, мꙋ́чєницы присносла́внїи.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Ѿ землѝ созда́вый мѧ̀, и҆ ѡ҆живи́вый мѧ̀, и҆ въ зе́млю возврати́тисѧ мнѣ̀ па́ки рекі́й, ꙗ҆̀же прїѧ́лъ є҆сѝ рабы̑ твоѧ̑ ᲂу҆поко́й, и҆ ѿ тлѝ сме́ртныѧ возведѝ гдⷭ҇и.
І҆рмо́съ: Бꙋ́рею грѣхо́вною погрꙋжа́емь, ꙗ҆́кѡ во чре́вѣ ки́товѣ содержи́мь, съ прⷪ҇ро́комъ зовꙋ́ ти: возведѝ ѿ тлѝ живо́тъ мо́й гдⷭ҇и, и҆ сп҃си́ мѧ.
Конда́къ: Со ст҃ы́ми ᲂу҆поко́й: І҆́косъ: Са́мъ є҆ди́нъ є҆сѝ безсме́ртный: Ли́стъ к҃ ѡ҆бор.
Пѣ́снь з҃.
І҆рмо́съ: Ѡ҆́бразꙋ злато́мꙋ:
Ѡ҆бо́лкшесѧ страда́льцы въ нетлѣ́нїе бж҃е́ственное, ѡ҆бнаже́нїемъ тлѣ́нныѧ пло́ти, на́съ ра́ди пло́ть ѿ нетлѣ́нныѧ прїе́мшемꙋ жены̀, ны́нѣ предстоитѐ свѣ́тлїи: сегѡ̀ ра́ди мѧ̀ ѡ҆блецы́те во ѻ҆де́ждꙋ сщ҃е́ннꙋю ѡ҆бнаже́ннаго ѕло́бою.
Воздержа́нїемъ пожи́вый, страда́льческїй собо́ръ, воздержа́нїѧ на́съ по́прище ᲂу҆крѣпи́те тещѝ невозбра́ннѡ, ꙗ҆́кѡ проповѣ́давый хрⷭ҇та̀ на по́прищи мꙋ́жественнѡ, и҆ предстоѧ́й прⷭ҇то́лꙋ вѣнцено́сный, въ наслажде́нїе мы́сленнѡ со а҆́гг҃лы.
Мл҃твами бж҃е твои́хъ ст҃ы́хъ мч҃нкъ, ᲂу҆со́пшыѧ вѣ́рнѡ рабы̑ твоѧ̑, раѧ̀ жи́тели покажѝ, и҆ свѣ́та мы́сленнагѡ сподо́би ѧ҆̀, непреста́ннѡ вопїю́щыѧ тебѣ̀: бл҃гослове́нъ бг҃ъ ѻ҆тцє́въ на́шихъ.
Бг҃оро́диченъ: Тѧ̀ є҆ди́нꙋ бл҃гꙋ́ю мо́лимъ дв҃о, ѡ҆ѕло́блєнныѧ ны̀ ᲂу҆бл҃жѝ, и҆ прилѣ́жнѡ хрⷭ҇та̀ молѝ є҆стество́мъ сꙋ́ща бл҃га́го, воздержа́нїѧ вре́мѧ, бл҃га̑ѧ дѣ́ющымъ, и҆спо́лнити на́мъ пою́щымъ є҆го̀: бл҃гослове́нъ бг҃ъ ѻ҆тцє́въ на́шихъ.
И҆́ный. І҆рмо́съ: Глаго́лавый на горѣ̀:
Возвели́чивый ст҃ы̑ѧ твоѧ̑ всѧ̑, зна́меньми ᲂу҆диви́въ ѧ҆̀ въ мі́рѣ: бл҃гослове́нъ є҆сѝ во вѣ́ки гдⷭ҇и бж҃е ѻ҆тцє́въ на́шихъ.
Всѧ́кїй ви́дъ ра́нъ проше́дше, и҆ колѣ̑на ваа́лꙋ не поко́ршесѧ преклони́ти, вѣнцы̀ сла́вы взѧ́сте ѿ бг҃а хрⷭ҇тѡ́вы мч҃нцы.
Трⷪ҇ченъ: Во є҆ди́ницѣ трⷪ҇це, покланѧ́емое сꙋщество̀, ѻ҆́ч҃е, сн҃е и҆ дш҃е, воспѣва́ющыѧ тѧ̀ сохранѧ́й, бж҃е ѻ҆тцє́въ на́шихъ.
Бг҃оро́диченъ: Дв҃о мт҃и ѻ҆трокови́це всесвѣ́тлаѧ, є҆ди́на къ бг҃ꙋ хода́тайство, не преста́й влⷣчце моли́ти сп҃сти́сѧ на́мъ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь:
Безсме́ртномꙋ цр҃ю̀ во́инствовавше, и҆ вѣ́рꙋ къ немꙋ̀ показа́вше соверше́ннꙋю, кро́вь свою̀ мч҃нцы за него̀ и҆злїѧ́сте.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.
И҆дѣ́же свѣ́тъ тво́й жи́зни и҆стека́етъ, преложѝ ꙗ҆̀же преста́вилъ є҆сѝ ѿ вре́менныхъ, вѣ̑рныѧ твоѧ̑ рабы̑, гдⷭ҇и бж҃е ѻ҆тє́цъ на́шихъ.
І҆рмо́съ: Глаго́лавый на горѣ̀ съ мѡѷсе́емъ, и҆ ѡ҆́бразъ дѣ́вства ꙗ҆вле́й въ кꙋпинѣ̀, бл҃гослове́нъ є҆сѝ бж҃е ѻ҆тє́цъ на́шихъ.
Пѣ́снь и҃.
І҆рмо́съ: Во ѻ҆гнѝ пла́меннѣмъ:
Великоимени́тїи хрⷭ҇тѡ́вы страда́льцы, и҆ честні́и въ бз҃ѣ, всѧ̑ воспѣва́ющыѧ па̑мѧти ва́шѧ, вели́кихъ согрѣше́нїй, и҆ та́мошнихъ мꙋ́къ и҆зба́вите ны̀, къ немꙋ̀ ва́шими вели́кими мл҃твами.
Ст҃оизбра́нное хрⷭ҇та̀ бг҃а, и҆ тве́рдое вои́стиннꙋ во́инство, мч҃нкъ собо́ры ѡ҆ст҃и́те на́шъ ᲂу҆́мъ и҆ се́рдце, въ сїѧ̑ ст҃ы̑ѧ дни̑ пѡ́стныѧ, ва́шими ст҃ы́ми мл҃твами.
И҆зба́ви че́рвїѧ мꙋ́чащагѡ, и҆ скре́жета зꙋ́бнагѡ, гдⷭ҇и, и҆ внѣ́шнїѧ тьмы̀ несвѣти́мыѧ, всѧ̑ ꙗ҆̀же вѣ́рою прїѧ́лъ є҆сѝ: и҆ ᲂу҆чинѝ сїѧ̑, и҆дѣ́же свѣ́тъ лица̀ твоегѡ̀ хрⷭ҇тѐ, сїѧ́етъ во вѣ́ки.
Бг҃оро́диченъ: Крⷭ҇тъ хрⷭ҇то́въ чⷭ҇тны́й, бцⷣе чⷭ҇таѧ, ви́дѣвшыѧ и҆ ѿ се́рдца поклони́вшыѧсѧ ны̀, твои́ми ко влⷣцѣ сподо́би мл҃твами, ви́дѣти и҆ стра̑сти честны̑ѧ, страсте́й ѡ҆чище́нныхъ.
И҆́ный. І҆рмо́съ: Землѧ̀, и҆ всѧ̑ ꙗ҆̀же на не́й:
Ѽ до́брагѡ и҆змѣне́нїѧ, и҆́мже ѡ҆брѣто́сте сме́ртїю живо́тъ, сщ҃енномч҃нцы хрⷭ҇тѡ́вы, ѻ҆гнѧ̀ и҆ меча̀, мра́за и҆ ѕвѣре́й ника́коже ᲂу҆боѧ́вшесѧ, и҆ вопїю́ще: по́йте гдⷭ҇а, и҆ превозноси́те во всѧ̑ вѣ́ки.
Горѣ̀ ли́къ а҆́гг҃льскїй, до́лѣ же мы̀ земні́и, хва́лимъ мч҃нцы хрⷭ҇тѡ́вы, стра̑ннаѧ страда̑нїѧ, и҆ по́двиги ва́шегѡ мꙋ́жества, бл҃гословѧ́ще, пою́ще гдⷭ҇а, и҆ превозносѧ́ще во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Свѣ́тъ, живо́тъ же и҆ животы̀, почита́ю тѧ̀ ѻ҆ц҃а̀, и҆ сн҃а, и҆ дх҃а и҆схо́дна, є҆стество̀ є҆ди́но, трѝ ѵ҆поста̑си, бг҃а є҆ди́наго поѧ̀, бл҃гословлю́ тѧ, пою́ тѧ гдⷭ҇а, и҆ превозношꙋ́ тѧ во всѧ̑ вѣ́ки.
Бг҃оро́диченъ: Кто̀ не воспое́тъ тѧ̀ ѿ земноро́дныхъ, нескве́рнаѧ чⷭ҇таѧ голꙋби́ца; ты́ бо родила̀ є҆сѝ на́мъ свѣ́тъ вели́кїй, жи́зни бога́тство, і҆и҃са сп҃са: є҆го́же пое́мъ хва́лѧще ꙗ҆́кѡ гдⷭ҇а, и҆ превозно́симъ во всѧ̑ вѣ́ки.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
По́двиги чꙋ̑дныѧ, мч҃нцы, сла́вѧще ва́шѧ, бл҃годѣ́телѧ и҆ бг҃а бл҃гослови́мъ и҆ покланѧ́емсѧ, на по́прище по́двигѡвъ ва́съ ᲂу҆крѣпи́вшаго: є҆го́же превозно́симъ во всѧ̑ вѣ́ки.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Ты̀ сме́рти и҆ живота̀ гдⷭ҇ь сы́й и҆ бг҃ъ, преста́вльшихсѧ бл҃гоче́стнѡ воздвиза́ѧй, та́мѡ преложѝ въ селе́нїихъ првⷣныхъ, бл҃гословѧ́щыѧ, пою́щыѧ тѧ̀ гдⷭ҇и, и҆ превозносѧ́щыѧ во всѧ̑ вѣ́ки.
І҆рмо́съ: Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ, свѣ́тъ и҆ тьма̀, мра́зъ и҆ зно́й, сы́нове человѣ́честїи, сщ҃е́нницы бл҃гослови́те гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃.
І҆рмо́съ: Ꙗ҆́кѡ сотворѝ мнѣ̀:
Свѣти́льницы сꙋ́ще неле́стнїи, хрⷭ҇тѡ́вы страда́льцы, просвѣти́те на́шѧ по́мыслы, ᲂу҆тверди́те твори́ти свѣтоза̑рнаѧ и҆ чⷭ҇таѧ бж҃їѧ хотѣ̑нїѧ.
Ѻ҆рꙋ̑жїѧ зрите́сѧ закала́ющаѧ врагѝ, до́блїи хрⷭ҇тѡ́вы страда́льцы: но и҆зба́вите на́съ ѿ стрѣ́лъ лꙋка́вагѡ предста́тельствы ва́шими.
Поко́й ще́дре въ нѣ́дрѣхъ а҆враа́мовыхъ рабы̑ твоѧ̑, вѣ́рою ѿ на́съ ѿше́дшыѧ, къ тебѣ̀ всѧ́ческихъ зижди́телю и҆ пребл҃го́мꙋ.
Бг҃оро́диченъ: Пло́ти моеѧ̀ ᲂу҆мертвѝ движє́нїѧ, бг҃а пло́тїю ро́ждшаѧ па́че ᲂу҆ма̀, и҆ пода́ждь просвѣще́нїе мы́сли мое́й, чи́стый ѻ҆́блакъ сꙋ́щи свѣ́та.
И҆́ный. І҆рмо́съ: Велича́емъ всѝ:
Воспѣва́емъ всѝ па̑мѧти ва́шѧ, мч҃нцы прехва́льнїи, по́двиги ви́дѧще сщ҃е́нныхъ ва́шихъ страда́нїй, и҆ ᲂу҆диви́вшесѧ хрⷭ҇та̀ велича́емъ.
Дрꙋ́гъ ко дрꙋ́гꙋ стра́ждꙋще глаго́лахꙋ стрⷭ҇тоте́рпцы: пло́ти не пощади́мъ, прїиди́те, ᲂу҆́мремъ ѡ҆ хрⷭ҇тѣ̀, да во всѧ̑ вѣ́ки поживе́мъ ликꙋ́ющѣ непреста́ннѡ.
Трⷪ҇ченъ: Ѽ трⷪ҇це во є҆ди́номъ є҆стествѣ̀, тѧ̀ воспѣва́ющыѧ, ѻ҆́ч҃е нерожде́нный, и҆ рожде́нный сн҃е, и҆ дш҃е и҆схо́дный, твое́ю млⷭ҇тїю невреди́мы соблюдѝ.
Бг҃оро́диченъ: Ра́дꙋйсѧ всечⷭ҇тна́ѧ чⷭ҇таѧ, двⷭ҇тва похвало̀, ма́терей ᲂу҆твержде́нїе, человѣ́кѡвъ по́моще, и҆ мі́ра ра́досте, мр҃і́е мт҃и, и҆ рабо̀ бг҃а на́шегѡ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Ли́че ст҃ы́хъ, прїимѝ мольбꙋ̀ мою̀: и҆ ꙗ҆́кѡ сподо́билъ мѧ̀ є҆сѝ крⷭ҇тъ цѣлова́ти, и҆ сп҃си́тельнѣй стрⷭ҇ти поклони́тисѧ мнѣ̀, хрⷭ҇та̀ моли́те.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.
Ѡ҆сла́би, ѡ҆ста́ви ще́дре, къ тебѣ̀ чл҃вѣколю́бцꙋ преста́влєннымъ, и҆ си́хъ поко́й въ селе́нїихъ и҆збра́нныхъ: ты́ бо є҆сѝ жи́знь и҆ воскрⷭ҇нїе.
І҆рмо́съ: Велича́емъ всѝ чл҃вѣколю́бїе твоѐ, хрⷭ҇тѐ сп҃се на́шъ, сла́во ра̑бъ твои́хъ, и҆ вѣ́нче вѣ́рныхъ, возвели́чивый па́мѧть ро́ждшїѧ тѧ̀.
Є҆ѯапостїла́рїи, пи́саны въ сꙋббѡ́тꙋ в҃-ю поста̀. Ли́стъ рп҃г ѡ҆бор. На хвали́техъ мч҃нчны гла́са. На стїхо́внѣ же подо́бны господи́на ѳеофа́на. На лїтꙋргі́и и҆з̾ѡбрази́тєльнаѧ, и҆ бл҃жє́нны гла́са. Прокі́менъ, а҆пⷭ҇ла ме́ртвенъ. А҆по́столъ, зача́ло тг҃і. И҆ за ᲂу҆поко́й: къ корі́нѳѧнѡмъ, зача́ло рѯ҃г. А҆ллилꙋ́їа, ме́ртвенъ. Є҆ѵⷢ҇лїе ма́рка, зача́ло л҃а. И҆ за ᲂу҆поко́й, ѿ і҆ѡа́нна, зача́ло ѕ҃і. Прича́стенъ: Ра́дꙋйтесѧ првⷣнїи: Дрꙋгі́й за ᲂу҆поко́й: Бл҃же́ни, ꙗ҆̀же и҆збра́лъ: