Въ недѣ́лю ве́чера,
по предначина́тельномъ ѱалмѣ̀ на Гдⷭ҇и воззва́хъ, поста́вимъ стїхѡ́въ і҃. И҆ пое́мъ стїхи̑ры ᲂу҆мили́тєльныѧ: ѻ҆смогла́сника д҃, и҆ трипѣ́снца подѡ́бны господи́на і҆ѡ́сифа. Гла́съ г҃.
Подо́бенъ: Ве́лїѧ крⷭ҇та̀:
Вели̑кїѧ вѣ́рнїи во вре́мѧ пока́жемъ воздержа́нїѧ трꙋды̀: ꙗ҆́кѡ да сла́вꙋ вели́кꙋю полꙋчи́мъ, млⷭ҇тїю вели́кагѡ бг҃а и҆збавлѧ́еми пла́мене гее́нскагѡ.
Вре́мѧ поще́нїѧ ны́нѣ преполови́вше, нача́ло бж҃е́ственнагѡ житїѧ̀ ꙗ҆́вѣ пока́жемъ, и҆ въ коне́цъ добродѣ́тельнагѡ жи́тельства дости́гнꙋти те́плѣ потщи́мсѧ: ꙗ҆́кѡ да прїи́мемъ сла́дость нестарѣ́емꙋю.
И҆́ный господи́на ѳео́дѡра. Гла́съ з҃. Подо́бенъ: Под̾ кро́въ тво́й.
Преполови́вше се́й сщ҃е́нный поще́нїѧ пꙋ́ть, къ бꙋ́дꙋщемꙋ ра́достїю потеце́мъ, бл҃готворе́нїѧ є҆ле́емъ дꙋ́шы пома́завше, ꙗ҆́кѡ да сподо́бимсѧ хрⷭ҇та̀ бг҃а на́шегѡ, и҆ бж҃е́ствєннымъ стрⷭ҇те́мъ поклони́тисѧ, предвари́ти и҆ стра́шное и҆ ст҃о́е воскрⷭ҇нїе.
И҆ мине́и г҃. Сла́ва, и҆ ны́нѣ, бг҃оро́диченъ. Вхо́дъ. Прокі́менъ, гла́съ и҃: Не ѿвратѝ лица̀ твоегѡ̀: [Ли́стъ ѻ҃з.]
На стїхо́внѣ самогла́сенъ днѐ. Гла́съ з҃:
Вїногра́дъ насади́вый, и҆ дѣ́латели призва́вый, бли́зъ є҆́сть сп҃съ: прїиди́те поще́нїѧ подви̑жницы мздꙋ̀ воспрїи́мемъ, ꙗ҆́кѡ бога́тъ є҆́сть да́вецъ и҆ млⷭ҇тивъ: ма́лѡ дѣ́лавше, прїи́мемъ дꙋше́внꙋю млⷭ҇ть.
И҆́нъ самогла́сенъ. Гла́съ ѕ҃:
Въ разбо́йничєскїѧ по́мыслы впа́дъ а҆да́мъ, прельсти́сѧ ᲂу҆мо́мъ, и҆ ᲂу҆ѧзви́всѧ дꙋше́ю, лежа́ше на́гъ застꙋпле́нїѧ: ни сщ҃е́нникъ же пре́жде зако́на внѧ́тъ є҆мꙋ̀, нижѐ леѵі́тъ по зако́нѣ воззрѣ́въ на́нь: то́кмѡ ты̀ прише́дый бж҃е, не ѿ самарі́и, но ѿ бцⷣы: гдⷭ҇и сла́ва тебѣ̀.
Мч҃нченъ: Мч҃нцы твоѝ гдⷭ҇и, не ѿверго́шасѧ тебѐ, ни ѿстꙋпи́ша ѿ за́повѣдей твои́хъ тѣ́хъ мл҃твами поми́лꙋй на́съ.
Сла́ва, и҆ ны́нѣ, бг҃оро́диченъ, гла́съ ѕ҃: А҆рха́гг҃льски воспои́мъ вѣ́рнїи нбⷭ҇ный черто́гъ, и҆ две́рь запеча́таннꙋ вои́стиннꙋ. ра́дꙋйсѧ, є҆ѧ́же ра́ди ѿрастѐ на́мъ сп҃съ всѣ́хъ хрⷭ҇то́съ, жизнода́вецъ и҆ бг҃ъ: низложѝ влⷣчце мꙋчи́тели, безбѡ́жныѧ врагѝ на́шѧ, рꙋко́ю твое́ю пречⷭ҇таѧ, ᲂу҆пова́нїе хрⷭ҇тїа́нъ.
И҆ про́чее послѣ́дованїе по ѻ҆бы́чаю.
На повече́рїи пое́мъ слꙋ́жбꙋ прилꙋчи́вшагѡсѧ ст҃а́гѡ, въ четверто́къ вели́кагѡ канѡ́на.