Въ недѣ́лю ве́чера.
На Гдⷭ҇и воззва́хъ, поста́вимъ стїхѡ́въ і҃, и҆ пое́мъ д҃ стїхи̑ры ѻ҆смогла́сника ᲂу҆мили́тельны, гла́са: и҆ трипѣ́снца г҃, подѡ́бны господи́на і҆ѡ́сифа. Гла́съ и҃. Подо́бенъ: Гдⷭ҇и, а҆́ще и҆ на сꙋди́щи:
Гдⷭ҇и, на крⷭ҇тѣ̀ во́лею просте́рлъ є҆сѝ дла̑ни твоѧ̑, семꙋ̀ ᲂу҆миле́нїемъ се́рдца поклони́тисѧ и҆ на́съ сподо́би, просвѣще́нныхъ до́брѣ посто́мъ и҆ мл҃твами, и҆ воздержа́нїемъ и҆ бл҃готворе́нїемъ, ꙗ҆́кѡ бла́гъ и҆ чл҃вѣколю́бецъ.
Подо́бенъ:
Гдⷭ҇и, грѣхѡ́въ мои́хъ мно́жєства, по мно́жествꙋ ѡ҆чи́сти щедро́тъ твои́хъ всеще́дре, и҆ крⷭ҇тъ тво́й сподо́би чи́стою дꙋше́ю ви́дѣти, и҆ цѣлова́ти, въ настоѧ́щей седми́цѣ воздержа́нїѧ, ꙗ҆́кѡ чл҃вѣколю́бецъ.
И҆́на стїхи́ра господи́на ѳео́дѡра гла́съ г҃. Подо́бенъ: Ве́лїе чꙋ́до:
Ве́лїе чꙋ́до, дре́во ви́дитсѧ, на не́мже хрⷭ҇то́съ во́лею распѧ́тсѧ пло́тїю: поклонѧ́етсѧ мі́ръ, и҆ просвѣща́емь взыва́етъ: ѽ крⷭ҇та̀ си́ло, и҆ зри́мый де́мѡны пали́тъ, и҆ воѡбража́емь си́хъ палѧ̀ ꙗ҆влѧ́етсѧ! ᲂу҆блажа́ю тѧ̀ пречи́стое дре́во, почита́ю и҆ покланѧ́юсѧ со стра́хомъ, и҆ бг҃а сла́влю, тобо́ю дарова́вшаго мнѣ̀ жи́знь безконе́чнꙋю.
И҆ мине́и г҃. Сла́ва, и҆ ны́нѣ, бг҃оро́диченъ. Вхо́дъ. Свѣ́те ти́хїй:
Прокі́менъ, гла́съ и҃: Да́лъ є҆сѝ достоѧ́нїе боѧ́щымсѧ тебѐ гдⷭ҇и. Сті́хъ: Ѿ конє́цъ землѝ къ тебѣ̀ воззва́хъ. Сті́хъ: Покры́юсѧ въ кро́вѣ кри́лъ твои́хъ. Сті́хъ: Та́кѡ воспою̀ и҆́мени твоемꙋ̀.
На стїхо́внѣ самогла́сенъ днѐ, два́жды. Гла́съ и҃:
Воззрѣ́ти ѻ҆чи́ма на нб҃о не смѣ́ю ѻ҆каѧ́нный а҆́зъ, ѿ лꙋка́выхъ мои́хъ дѣѧ́нїй: но ꙗ҆́кѡ мыта́рь стенѧ̀ взыва́ю тѝ: бж҃е, ѡ҆чи́сти мѧ̀ грѣ́шнаго, и҆ фарїсе́йскагѡ лицемѣ́рїѧ и҆зба́ви мѧ̀, ꙗ҆́кѡ є҆ди́нъ бл҃гоꙋтро́бенъ.
Сті́хъ а҃: Къ тебѣ̀ возведо́хъ ѻ҆́чи моѝ:
Сті́хъ в҃: Поми́лꙋй на́съ гдⷭ҇и:
Мꙋ́чениченъ: Мч҃нцы гдⷭ҇ни всѧ́кое мѣ́сто ѡ҆свѧща́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ сѣ́тей вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже: Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ: и҆ мы̀ славосло́вимъ неизслѣ́дованное твоѐ ржⷭ҇тво̀, бцⷣе, молѝ сп҃сти́сѧ дꙋша́мъ на́шымъ.