На ᲂу҆́трени по шестоѱа́лмїи,
Бг҃ъ гдⷭ҇ь, во гла́съ ѻ҆смогла́сника, и҆ глаго́лемъ тропа́рь воскрⷭ҇ный, два́жды. Сла́ва, крⷭ҇тный: Сп҃сѝ гдⷭ҇и лю́ди твоѧ̑: И҆ ны́нѣ, бг҃оро́диченъ: Гаврїи́лꙋ вѣща́вшꙋ: И҆ ѻ҆бы́чное стїхосло́вїе. Сѣда́льны глаго́лемъ воскрⷭ҇ны. По полѷеле́и, [а҆́ще гдѣ̀ хра́мъ чⷭ҇тна́гѡ крⷭ҇та̀] сѣда́ленъ крⷭ҇та̀, гла́съ и҃.
Подо́бенъ: Повелѣ́нное та́йнѡ:
Въ раѝ ᲂу҆́бѡ пре́жде дре́вомъ ѡ҆бнажѝ ѡ҆ вкꙋше́нїи вра́гъ, наносѧ̀ ᲂу҆мерщвле́нїе: крⷭ҇та́ же дре́во, живота̀ ѡ҆дѣѧ́нїе человѣ́кѡмъ носѧ̀, наведѐ на землѝ, и҆ мі́ръ ве́сь и҆спо́лнисѧ всѧ́кїѧ ра́дости. є҆го́же ви́дѧще покланѧ́ема, бг҃ꙋ въ вѣ́рѣ лю́дїе согла́снѡ воззове́мъ: и҆спо́лнь хра́мъ сла́вы є҆гѡ̀. [Два́жды.]
Степє́нна гла́са. Є҆ѵⷢ҇лїе ᲂу҆́треннее. Воскрⷭ҇нїе хрⷭ҇то́во: ѱало́мъ н҃.
Сла́ва, гла́съ и҃: Покаѧ́нїѧ ѿве́рзи мѝ: И҆ ны́нѣ: На сп҃се́нїѧ стєзѝ: Та́же, гла́съ ѕ҃: Поми́лꙋй мѧ̀ бж҃е: Мно́жєства содѣ́ѧнныхъ мно́ю лю́тыхъ:
Канѡ́нъ воскрⷭ҇нъ, и҆ бцⷣы, на ѕ҃: та́же трїѡ́ди на и҃, творе́нїе господи́на ѳео́дѡра стꙋді́та. Гла́съ а҃.
Пѣ́снь а҃.
І҆рмо́съ: Воскрⷭ҇нїѧ де́нь, просвѣти́мсѧ лю́дїе.
Торжества̀ де́нь, воста́нїемъ хрⷭ҇то́вымъ, сме́рть безвѣ́стна показа́сѧ, жи́зни возсїѧ̀ зарѧ̀, а҆да́мъ воста́въ ликꙋ́етъ ра́достїю: тѣ́мже воскли́кнемъ, побѣ́днꙋю пою́ще.
Поклоне́нїѧ де́нь чⷭ҇тна́гѡ крⷭ҇та̀, прїиди́те къ семꙋ̀ всѝ: воста́нїѧ бо хрⷭ҇то́ва зари̑, свѣтосїѧ́ѧй предлага́етъ ны́нѣ, того̀ ѡ҆блобыза́имъ дꙋше́внѡ ра́дꙋющесѧ.
Ꙗ҆ви́сѧ вели́кїй гдⷭ҇нь крⷭ҇те, покажѝ мѝ зра́къ бж҃е́ственный красоты̀ твоеѧ̀ ны́нѣ, досто́йнѡ покло́нника хвалы̀ твоеѧ̀: и҆́бо ꙗ҆́кѡ ѡ҆дꙋшевле́ннꙋ тебѣ̀, и҆ возглаша́ю, и҆ ѡ҆блобыза́ю тѧ̀.
Да восхва́лѧтъ согла́снѡ нб҃о и҆ землѧ̀, ꙗ҆́кѡ предлежи́тъ всѣ̑мъ всебл҃же́ннѣйшїй крⷭ҇тъ, на не́мже пригвожде́нъ тѣле́снѣ пожре́сѧ хрⷭ҇то́съ: того̀ лобыза́имъ дꙋше́внѡ ра́дꙋющесѧ.
Сла́ва, трⷪ҇ченъ: ѽ трⷪ҇це начерта́ньми! ѽ є҆ди́нице зра́комъ! ѻ҆́ч҃е, сн҃е, и҆ дш҃е, є҆диноси́льнаѧ є҆ди́нице, въ совѣ́тѣ и҆ хотѣ́нїи, и҆ держа́вы нача́лѣ, мі́ръ тво́й сохранѝ, ми́ръ подаю́щи.
Бг҃оро́диченъ: И҆скꙋ́са ника́коже вѣ́дꙋщи мꙋ́жеска дв҃о, безсѣ́меннѡ ражда́еши младе́нца, чи́сто но́сиши рожде́нїе, мі́ра творца̀ хрⷭ҇та̀ бг҃а: того̀ молѝ ᲂу҆мири́ти всѧ́чєскаѧ.
Катава́сїа: Бж҃е́ственнѣйшїй проѡбразѝ дре́вле мѡѷсе́й, въ чермнѣ́мъ мо́ри прове́дъ і҆и҃лѧ крⷭ҇то́мъ твои́мъ, во́дꙋ жезло́мъ пресѣ́къ, пѣ́снь тебѣ̀ и҆схо́днꙋю воспѣва́ѧ хрⷭ҇тѐ бж҃е.
Пѣ́снь г҃.
І҆рмо́съ: Прїиди́те, пи́во пїе́мъ:
Прїиди́те, пѣ́снь пои́мъ но́вꙋ, разрꙋше́нїе а҆́дово торжествꙋ́юще: и҆з̾ гро́ба бо хрⷭ҇то́съ воскр҃се, сме́рть плѣни́въ, и҆ сп҃сѐ всѧ́чєскаѧ.
Прїиди́те, почерпе́мъ вѣ́рнїи, не ѿ и҆сто́чника и҆сточа́ющагѡ во́дꙋ тлѣ́ннꙋю, но ѿ и҆сто́чника просвѣще́нїѧ, крⷭ҇та̀ хрⷭ҇то́ва поклоне́нїемъ, ѡ҆ не́мже и҆ хва́лимсѧ.
Дре́вле є҆го́же проѡбразова́ше мѡѷсе́й дла́ньма, крⷭ҇тъ тво́й ны́нѣ ѡ҆блобыза́юще, ᲂу҆́мнаго а҆мали́ка побѣжда́емъ, влⷣко хрⷭ҇тѐ, и҆́мже и҆ сп҃са́емсѧ.
Ѻ҆чи́ма и҆ ᲂу҆стна́ма чи́стыма пою́ще пѣ́снь ра́дованїѧ, гдⷭ҇ню крⷭ҇тꙋ̀ ра́достїю поклони́мсѧ вѣ́рнїи, пле́щꙋще пѣ́сньми.
Сла́ва, трⷪ҇ченъ: Є҆ди́наго въ тре́хъ ѵ҆поста́сехъ бг҃а безнача́льнаго чтꙋ̀: нераздѣ́льнаго сꙋщества̀ зра́комъ, ѻ҆ц҃а̀, сн҃а, и҆ дх҃а жива́го, въ ни́хже крⷭ҇ти́хомсѧ.
Бг҃оро́диченъ: Въ кꙋпинѣ̀ мѡѷсе́й твоѐ ѡ҆бра́знѡ та́инство дре́вле чи́стаѧ ви́дѣ: ꙗ҆́коже бо ѻ҆́ныѧ пла́мень, ѻ҆́гнь бж҃ества̀ твою̀ ᲂу҆тро́бꙋ не ѡ҆палѝ.
Катава́сїа: Оу҆твердѝ влⷣко хрⷭ҇тѐ крⷭ҇то́мъ на ка́мени мѧ̀ вѣ́ры, не поколеба́тисѧ ᲂу҆мꙋ̀ прилѡ́ги врага̀ ѕла́гѡ: є҆ди́нъ бо є҆сѝ ст҃ъ.
Сѣда́ленъ, гла́съ ѕ҃: Крⷭ҇тъ тво́й, гдⷭ҇и, ѡ҆ст҃и́сѧ: въ не́мъ бо быва́ютъ и҆сцѣлє́нїѧ болѧ́щымъ во грѣсѣ́хъ: и҆́мже тебѣ̀ припа́даемъ, поми́лꙋй на́съ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ, на мѣ́сто, и҆дѣ́же стоѧ́стѣ но́зѣ твоѝ гдⷭ҇и: и҆ дре́ва спасе́нїѧ вкꙋси́вше, грѣхо́вныхъ страсте́й свобо́дꙋ ᲂу҆лꙋчи́хомъ, мл҃твами бцⷣы, є҆ди́не чл҃вѣколю́бче.
Сла́ва: То́кмѡ водрꙋзи́сѧ дре́во хрⷭ҇тѐ крⷭ҇та̀ твоегѡ̀, ѡ҆снова̑нїѧ поколеба́шасѧ сме́рти гдⷭ҇и: є҆го́же бо поглотѝ жела́нїемъ а҆́дъ ѿпꙋстѝ тре́петомъ. ꙗ҆ви́лъ є҆сѝ на́мъ сп҃се́нїе твоѐ ст҃ы́й, и҆ славосло́вимъ тѧ̀ сн҃е бж҃їй, поми́лꙋй на́съ.
И҆ ны́нѣ, бг҃оро́диченъ: Бцⷣе дв҃о, молѝ сн҃а твоего̀ пригво́ждшагосѧ во́лею на крⷭ҇тѣ̀, и҆ воскре́сша и҆з̾ ме́ртвыхъ, хрⷭ҇та̀ бг҃а на́шего, сп҃сти́сѧ дꙋша́мъ на́шымъ.
Пѣ́снь д҃.
І҆рмо́съ: На бж҃е́ственнѣй стра́жи:
Сѐ воскре́се хрⷭ҇то́съ, мѷроно́сицамъ жена́мъ а҆́гг҃лъ речѐ: не рыда́йте, ше́дше рцы́те а҆по́столѡмъ: ра́дꙋйтесѧ, дне́сь сп҃се́нїе мі́рꙋ, мꙋчи́тельство врага̀ сме́ртїю разрꙋши́сѧ.
Живоно́снагѡ твоегѡ̀ крⷭ҇та̀, покло́ннꙋю ра́дость дне́сь хрⷭ҇тѐ срѣта́юще, предсрѣ́тенїе твори́мъ всест҃ы́ѧ стрⷭ҇ти твоеѧ̀, ю҆́же во сп҃се́нїе мі́ра содѣ́лалъ є҆сѝ сп҃се, ꙗ҆́кѡ всеси́ленъ.
Дне́сь быва́етъ ра́дость на нб҃сѝ и҆ на землѝ, ꙗ҆́кѡ хрⷭ҇то́во зна́менїе мі́рꙋ ꙗ҆влѧ́етсѧ крⷭ҇тъ требл҃же́нный: се́й бо предложе́нъ бы́въ, и҆сточа́етъ кла́нѧющымсѧ є҆мꙋ̀ ра́дость приснотекꙋ́щꙋю.
Что́ ти принесе́мъ хрⷭ҇тѐ, ꙗ҆́кѡ честно́мꙋ крⷭ҇тꙋ̀ да́лъ є҆сѝ на́мъ поклони́тисѧ; на не́мже всест҃а́ѧ кро́вь твоѧ̀ и҆злїѧ́сѧ, и҆дѣ́же и҆ пло́ть твоѧ̀ гвоздьмѝ водрꙋзи́сѧ, є҆го́же ѡ҆блобыза́юще ны́нѣ бл҃годари́мъ тѧ̀.
Трⷪ҇ченъ: Є҆ди́нагѡ бж҃ества̀ пою̀ трѝ ѵ҆поста̑си, нераздѣ́льнѡ, є҆сте́ственнѣ про́стѡ проповѣ́даѧ, ѻ҆ц҃а̀ безнача́льна, сн҃а, и҆ дх҃а ст҃а́го сопрⷭ҇то́льна, гдⷭ҇ство є҆ди́но, и҆ є҆ди́но црⷭ҇тво, є҆ди́нꙋ держа́вꙋ присносꙋ́щнꙋю.
Бг҃оро́диченъ: Є҆ди́на въ жена́хъ ꙗ҆ви́ласѧ є҆сѝ ве́щь пречꙋ́дна чи́стаѧ, слы́шанїе стра́шное: є҆стество́ бо ты̀ ѡ҆бнови́ла є҆сѝ, без̾ сѣ́мене ро́ждши, пребыва́ющи па́ки ꙗ҆́коже пре́жде дв҃а: роди́выйсѧ бо и҆з̾ тебѐ, бг҃ъ є҆́сть и҆́стинный.
Катава́сїа: На крⷭ҇тѣ́ тѧ си́льне, свѣти́ло вели́кое ви́дѣвъ, тре́петомъ взѧ́тсѧ, лꙋчы̀ сопрѧ́тавъ скры̀, всѧ́ же тва́рь воспѣ̀ со стра́хомъ твоѐ долготерпѣ́нїе: и҆́бо и҆спо́лнисѧ землѧ̀ твоегѡ̀ хвале́нїѧ.
Пѣ́снь є҃.
І҆рмо́съ: Оу҆́тренюемъ ᲂу҆́треннюю:
Возсїѧ́лъ є҆сѝ ѿ гро́ба незаходи́мый свѣ́те, мі́рꙋ ѡ҆блиста́ѧ нетлѣ́нїе, потреби́лъ є҆сѝ гдⷭ҇и сме́ртный пла́чь ѿ конє́цъ, ꙗ҆́кѡ бл҃гоꙋтро́бенъ.
Пристꙋ́пимъ ѡ҆чище́ннїи воздержа́нїемъ, те́плѣ ѡ҆блобыза́юще во хвале́нїи дре́во всест҃о́е, на не́мже хрⷭ҇то́съ распина́емь, сп҃сѐ мі́ръ, ꙗ҆́кѡ бл҃гоꙋтро́бенъ.
Ликꙋ́ютъ въ весе́лїи а҆́гг҃льстїи чи́ни, дне́сь крⷭ҇та̀ твоегѡ̀ поклоне́нїемъ: тѣ́мъ бо низложи́лъ є҆сѝ бѣсѡ́вскїѧ полкѝ, сп҃сы́й хрⷭ҇тѐ человѣ́чество.
Ра́й дрꙋгі́й позна́сѧ цр҃ковь, ꙗ҆́коже пре́жде дре́во и҆мꙋ́щаѧ живоно́сное, крⷭ҇тъ тво́й гдⷭ҇и, и҆з̾ негѡ́же прикоснове́нїемъ безсме́ртїю причасти́хомсѧ.
Сла́ва, трⷪ҇ченъ: Собезнача́льны трѝ сла́влю, є҆ди́нагѡ сꙋщества̀: бг҃а ѻ҆ц҃а̀, сн҃а, и҆ дх҃а, свѣ́тъ є҆ди́нъ трисїѧ́тельный, кꙋ́пнѡ держа́вное црⷭ҇тво, въ неслїѧ́нномъ то́ждествѣ.
Бг҃оро́диченъ: Родила̀ є҆сѝ є҆стества̀ зако́номъ, но па́че зако́на: тебе́ бо є҆ди́ныѧ безсѣ́менно ржⷭ҇тво̀, стра́шный и҆ помышлѧ́емый нра́въ, и҆ глаго́лемый рожде́нїѧ твоегѡ̀, всенепоро́чнаѧ.
Катава́сїа: Оу҆́тренююще тѧ̀ воспѣва́емъ сп҃се ще́дре, ми́ръ ѡ҆брѣ́тше крⷭ҇то́мъ твои́мъ, и҆́мже ѡ҆бнови́лъ є҆сѝ ро́дъ человѣ́ческїй ко свѣ́тꙋ невече́рнемꙋ вводѧ̀ на́съ.
Пѣ́снь ѕ҃.
І҆рмо́съ: Снизше́лъ є҆сѝ:
Воскре́слъ є҆сѝ сме́рть ᲂу҆праздни́въ хрⷭ҇тѐ, ꙗ҆́коже вели́кїй цр҃ь, ѿ а҆́довыхъ сокро́вищъ воззва́лъ є҆сѝ на́съ въ наслажде́нїе црⷭ҇тва нбⷭ҇нагѡ, въ зе́млю безсме́ртїѧ.
Пле́щꙋще пѣ́сньми бж҃е́ственными вѣ́рнїи, воскли́кнемъ бг҃ꙋ, крⷭ҇тъ гдⷭ҇нь цѣлꙋ́юще: ѡ҆сщ҃е́нїѧ бо и҆сточа́етъ и҆сто́чникъ, всѣ̑мъ сꙋ́щымъ въ мі́рѣ.
И҆сполнѧ́етсѧ пѣснописа́тельный гла́съ: се́ бо покланѧ́емсѧ пречи́стыхъ но́гъ твои́хъ подно́жїю всеси́льне, крⷭ҇тꙋ̀ твоемꙋ̀ честно́мꙋ, тривожделѣ́нномꙋ дре́вꙋ.
Є҆́же ви́дѣ дре́во въ тво́й хлѣ́бъ вложе́ное, во проро́цѣхъ рыда́тель, крⷭ҇тъ тво́й ще́дре ѡ҆блобыза́юще, воспѣва́емъ твоѧ̑ ᲂу҆́зы, и҆ погребе́нїе, копїе́ же и҆ гвѡ́здїѧ.
На ра́мѣхъ є҆го́же и҆зво́лилъ є҆сѝ хрⷭ҇тѐ носи́ти ст҃ы́й крⷭ҇тъ, и҆ на се́мъ вознести́сѧ, и҆ распѧ́тисѧ пло́тїю, ѡ҆блобыза́юще собира́емъ крѣ́пость на врагѝ неви̑димыѧ.
Трⷪ҇ченъ: Є҆ди́ницꙋ въ тре́хъ начерта́нїихъ пою̀, и҆ трⷪ҇цꙋ во є҆ди́номъ є҆стествѣ̀ покланѧ́емꙋю, бг҃а тро́е кꙋ́пнѡ, свѣ́тъ трисо́лнечный, ѻ҆ц҃а̀, и҆ сн҃а, и҆ ст҃а́го дх҃а.
Бг҃оро́диченъ: Чꙋде́съ вели́кое чꙋ́до въ тебѣ̀ ꙗ҆ви́сѧ нескве́рнаѧ а҆́гнице, взе́млющаго бо мі́ра грѣ́хъ, а҆́гнца родила̀ є҆сѝ: є҆го́же молѝ прилѣ́жнѡ ѡ҆ пою́щихъ тѧ̀.
Катава́сїа: Ѡ҆́бразъ бж҃е́ственнагѡ крⷭ҇та̀, і҆ѡ́на во чре́вѣ ки́товѣ просте́ртыма дла́ньма проначерта̀, и҆ взира́ше сп҃се́нъ ѿ ѕвѣ́рѧ си́лою твое́ю сло́ве.
Конда́къ, гла́съ з҃. Самогла́сенъ:
Не ктомꙋ̀ пла́менное ѻ҆рꙋ́жїе храни́тъ вра́тъ є҆де́мскихъ: на ты̑ѧ бо на́йде пресла́вный соꙋ́зъ дре́во кре́стное, сме́ртное жа́ло, и҆ а҆́дова побѣ́да прогна́сѧ. предста́лъ бо є҆сѝ сп҃се мо́й, вопїѧ̀ сꙋ́щымъ во а҆́дѣ: вни́дите па́ки въ ра́й.
І҆́косъ: Трѝ крⷭ҇ты̀ водрꙋзѝ на голго́ѳѣ пїла́тъ, два̀ разбо́йникѡвъ, и҆ є҆ди́нъ жизнода́вца. є҆го́же ви́дѣ а҆́дъ, и҆ речѐ сꙋ́щымъ до́лѣ: ѽ слꙋги̑ моѝ, и҆ си̑лы моѧ̑! кто̀ водрꙋзи́въ гво́здїе въ се́рдце моѐ, древѧны́мъ мѧ̀ копїе́мъ внеза́пꙋ прободѐ; и҆ растерза́юсѧ, внꙋ́тренними мои́ми болю̀, ᲂу҆тро́бою ᲂу҆ѧзвлѧ́юсѧ, чꙋ̑вства моѧ̑ смꙋща́ютъ дꙋ́хъ мо́й, и҆ понꙋжда́ютсѧ и҆зрыга́ти а҆да́ма, и҆ сꙋ́щыѧ ѿ а҆да́ма, дре́вомъ да̑нныѧ мѝ: дре́во бо сїѧ̑ вво́дитъ па́ки въ ра́й.
Сѷнаѯа́рїй. Стїхѝ:
Крⷭ҇тꙋ̀ всѧ̀ землѧ̀ да покланѧ́етсѧ:
И҆́мже позна́ла тебѣ̀ покланѧ́тисѧ, сло́ва.
Въ то́йже де́нь, въ недѣ́лю тре́тїю постѡ́въ, поклоне́нїе пра́зднꙋемъ чⷭ҇тна́гѡ и҆ животворѧ́щагѡ крⷭ҇та̀, вины̀ ра́ди сицевы̀: Поне́же бо четыредесѧтодне́внымъ посто́мъ, ѡ҆́бразомъ нѣ́кимъ и҆ мы̀ распина́емсѧ, ᲂу҆мерщвлѧ́еми ѿ страсте́й, го́рести же чꙋ́вство и҆́мамы, ᲂу҆ныва́юще и҆ низпада́юще: предлага́етсѧ честны́й и҆ животворѧ́щїй крⷭ҇тъ, ꙗ҆́кѡ ᲂу҆́бѡ прохлажда́ѧ и҆ ᲂу҆твержда́ѧ на́съ, и҆ воспомина́ѧ на́мъ стрⷭ҇ти гдⷭ҇а на́шегѡ і҆и҃са хрⷭ҇та̀, и҆ ᲂу҆тѣша́ѧ. А҆́ще бг҃ъ на́шъ на́съ ра́ди распѧ́тсѧ, коли́кѡ подоба́етъ на́мъ є҆гѡ̀ ра́ди дѣ́ѧти, ѡ҆блегча́ѧ же болѣ̑зни на́шѧ предложе́нїемъ влⷣчнихъ скорбе́й, и҆ воспомина́нїемъ и҆ ᲂу҆пова́нїемъ, крⷭ҇то́мъ сла́вы; Ꙗ҆́кѡ бо сп҃съ на́шъ на крⷭ҇тъ возше́дъ, просла́висѧ безче́стнымъ жи́тельствомъ и҆ ѡ҆горче́нїемъ: си́це подоба́етъ и҆ на́мъ дѣ́ѧти, да и҆ спросла́вимсѧ є҆мꙋ̀, а҆́ще и҆ нѣ́что нѣ́когда стра́ждемъ печа́льное. И҆ и҆́накѡ: ꙗ҆́коже до́лгїй и҆ жесто́кїй пꙋ́ть проходѧ́щїи, и҆ трꙋдо́мъ ѡ҆тѧгча́вшїи, а҆́ще гдѣ̀ дре́во благосѣнноли́ственное ѡ҆брѧ́щꙋтъ, ма́лѡ сѣ́дше ᲂу҆покоѧ́ютсѧ, и҆ ꙗ҆́кѡ ᲂу҆́бѡ ю҆́ни бы́вше про́чее пꙋ́ть прохо́дѧтъ: та́кѡ и҆ ны́нѣ въ по́стное вре́мѧ и҆ приско́рбный пꙋ́ть и҆ по́двигъ, насади́сѧ посредѣ̀ ѿ ст҃ы́хъ ѻ҆тє́цъ живоно́сный крⷭ҇тъ, ѡ҆сла́бꙋ и҆ прохлажде́нїе на́мъ подаѧ́й бл҃гомꙋ́жествєнны же и҆ ле́гки къ про́чемꙋ трꙋдꙋ̀ ᲂу҆трꙋди́вшыѧсѧ ᲂу҆строѧ́ѧ. И҆лѝ ꙗ҆́коже є҆́сть при царе́вѣ прише́ствїи, предхо́дѧтъ ѻ҆́нагѡ зна́мєнїѧ и҆ ски́птры: та́же и҆ са́мъ прихо́дитъ, ра́дꙋѧсѧ ѡ҆ побѣ́дѣ, и҆ веселѧ́сѧ, свесели́тсѧ же вкꙋ́пѣ и҆ послꙋ́шное. Та́кѡ и҆ гдⷭ҇ь на́шъ і҆и҃съ хрⷭ҇то́съ, хотѧ̀ є҆ли́кѡ неꙋкло́ннѡ на сме́рть показа́ти побѣ́дꙋ, и҆ со сла́вою произы́ти воскре́снымъ дне́мъ, предпосла̀ ски́птръ сво́й, ца́рское зна́менїе, животворѧ́щїй крⷭ҇тъ, ѡ҆бра́дованїѧ и҆ прохлажде́нїѧ на́съ, ꙗ҆́кѡ мнѡ́жайша и҆сполнѧ́ющїй, и҆ ᲂу҆строѧ́ющїй на́съ гото́выхъ бы́ти, и҆ самаго̀ є҆ли́кѡ мо́щно цр҃ѧ̀ воспрїѧ́ти, и҆ восхвали́ти свѣ́тлѡ побѣжда́юща. Посредѣ́ же ст҃ы́ѧ четыредесѧ́тницы седми́цы: занѐ го́рькомꙋ и҆сто́чникꙋ подо́бна є҆́сть ст҃а́ѧ четыредесѧ́тница, сокрꙋше́нїѧ ра́ди, и҆ сꙋ́щїѧ на́мъ ѿ поста̀ го́рести и҆ печа́ли. Ꙗ҆́коже ᲂу҆́бѡ во ѻ҆́нагѡ средꙋ̀ бж҃е́ственный мѡѷсе́й дре́во вложѝ, и҆ ᲂу҆сладѝ є҆го̀, та́кѡ и҆ проведы́й на́съ бг҃ъ ᲂу҆́мнагѡ чермна́гѡ мо́рѧ, и҆ фараѡ́на, животворѧ́щимъ дре́вомъ честна́гѡ и҆ животворѧ́щагѡ крⷭ҇та̀, ᲂу҆слажда́етъ го́ресть посто́мъ ѿ четыредесѧ́тницы: и҆ ᲂу҆тѣша́ѧ на́съ ꙗ҆́кѡ въ пꙋсты́ни пребыва́ющихъ, до́ндеже ко ᲂу҆́мномꙋ і҆ерⷭ҇ли́мꙋ возведе́тъ свои́мъ воскрⷭ҇нїемъ. И҆лѝ поне́же крⷭ҇тъ дре́во живота̀ глаго́летсѧ и҆ є҆́сть, ѻ҆́но же дре́во посредѣ̀ раѧ̀ є҆де́ма насажде́но бѧ́ше: прили́чнѡ и҆ бж҃е́ственнїи ѻ҆тцы̀ кре́стное дре́во посредѣ̀ ст҃ы́ѧ четыредесѧ́тницы насади́ша, вкꙋ́пѣ ᲂу҆́бѡ и҆ а҆да́мово ла́комство помина́юще, вкꙋ́пѣ же и҆ ѻ҆́нагѡ ѿѧ́тїѧ прописꙋ́юще настоѧ́щимъ дре́вомъ, сего́ бо вкꙋша́юще не ктомꙋ̀ ᲂу҆мира́емъ, но па́че и҆ ѡ҆живлѧ́емсѧ. Тогѡ̀ си́лою хрⷭ҇тѐ бж҃е и҆ на́съ сохранѝ ѿ лꙋка́вагѡ и҆скꙋше́нїй: и҆ бж҃е́ствєннымъ твои̑мъ стрⷭ҇те́мъ и҆ живоно́сномꙋ воскрⷭ҇нїю поклони́тисѧ сподо́би, четыредесѧтодне́вное бл҃госвѣ́тлѣ преше́дшымъ по́прище, и҆ поми́лꙋй на́съ ꙗ҆́кѡ є҆ди́нъ бл҃гъ и҆ чл҃вѣколю́бецъ, а҆ми́нь.
Пѣ́снь з҃.
І҆рмо́съ: Ѻ҆́троки ѿ пе́щи:
Воскре́слъ є҆сѝ и҆з̾ гро́ба тридне́внѡ, ꙗ҆́кѡ спѧ́й гдⷭ҇и, а҆́дѡвы вра́тари порази́въ бж҃е́ственною си́лою, и҆ дрє́внїѧ воздви́гъ пра́ѻтцы є҆ди́не бл҃гослове́нный ѻ҆тцє́въ бж҃е, и҆ препросла́вленный.
Цѣвни́цею пѣ́сней ликꙋ́юще возра́дꙋемсѧ дне́сь лю́дїе кре́стнымъ поклоне́нїемъ на се́мъ пригвозди́вшагосѧ хрⷭ҇та̀ сла́вѧще, є҆ди́наго бл҃гослове́ннаго ѻ҆тцє́въ бг҃а, и҆ препросла́вленнаго.
Показа́вый ᲂу҆мерщвле́нїѧ ѻ҆рга́нъ, жи́зни дѣ́лателище, мі́рꙋ ѡ҆блобыза́тельное, тво́й крⷭ҇тъ всеще́дре, томꙋ̀ покланѧ́ющыѧсѧ ѡ҆ст҃ѝ, є҆ди́не бл҃гослове́нный ѻ҆тцє́въ бж҃е и҆ препросла́вленный.
Є҆ди́не ми́лостиве и҆ бл҃гоꙋтро́бне, просвѣтѝ, ѡ҆свѧтѝ є҆ди́не і҆и҃се, покланѧ́ющыѧсѧ вѣ́рнѡ твоемꙋ̀ крⷭ҇тꙋ̀, и҆ бж҃е́ствєннымъ страда́нїємъ, є҆ди́не бл҃гослове́нный ѻ҆тцє́въ бж҃е, и҆ препросла́вленный.
Сла́ва, трⷪ҇ченъ: Є҆ди́ницꙋ въ тре́хъ ѵ҆поста́сехъ, пою̀ бж҃ество̀: свѣ́тъ бо ѻ҆ц҃ъ, свѣ́тъ сн҃ъ, свѣ́тъ дх҃ъ, свѣ́тꙋ нераздѣ́льнꙋ пребыва́ющꙋ, є҆ди́нствомъ є҆сте́ственнымъ, и҆ тремѝ лꙋча́ми ли́цъ сїѧ́ющꙋ.
Бг҃оро́диченъ: Всѣ́хъ прⷪ҇рѡ́къ многоимени́тое ты̀ є҆сѝ проповѣ́данїе, врата́ бо бж҃їѧ, рꙋ́чка злата́ѧ, землѧ̀ ст҃а́ѧ, ꙗ҆ви́ласѧ є҆сѝ дв҃о бг҃оневѣ́стнаѧ, ро́ждшаѧ пло́тїю і҆и҃са хрⷭ҇та̀, ѻ҆тцє́въ бг҃а, и҆ препросла́вленна.
Катава́сїа: И҆з̾ пла́мене ѻ҆́троки и҆збавле́й, пло́ть прїи́мъ прише́лъ є҆сѝ на зе́млю, и҆ на крⷭ҇тѣ̀ пригвожде́нъ, сп҃се́нїе на́мъ дарова́лъ є҆сѝ хрⷭ҇тѐ, є҆ди́нъ бл҃гослове́нъ ѻ҆тцє́въ бж҃е, и҆ препросла́вленъ.
Пѣ́снь и҃.
І҆рмо́съ: Се́й нарече́нный:
Мѵ́ро въ рꙋка́хъ что̀ держитѐ всѧ́кѡ; кого́ же взыскꙋ́ете; ны́нѣ ꙗ҆вле́йсѧ ю҆́ноша во гро́бѣ, вопїѧ̀: воскре́се хрⷭ҇то́съ и҆ бг҃ъ на́шъ, возста́вивый є҆стество̀ человѣ́кѡвъ ѿ а҆́довыхъ сокро́вищъ.
Ра́дꙋйсѧ требога́тое дре́во и҆ бж҃е́ственное, крⷭ҇те, свѣ́те сꙋ́щымъ во тьмѣ̀, четвероконе́чный мі́ръ сїѧ́нїемъ твои́мъ, воста́нїѧ хрⷭ҇то́ва проѧвле́й зарѝ, сподо́би всѧ̑ вѣ̑рныѧ дости́гнꙋти па́схꙋ.
Въ сі́й де́нь бл҃гоꙋха́ютъ мѵ́ра бж҃е́ствєнныѧ мѷрополо́жницы, живомѵ́рственное дре́во крⷭ҇тъ хрⷭ҇то́въ: ѡ҆бонѧ́имъ є҆гѡ̀ бг҃одꙋхновє́нныѧ вони̑, томꙋ̀ покланѧ́ющесѧ вѣ́рнѡ во вѣ́ки.
Грѧдѝ є҆лїссе́е прⷪ҇ро́че, рцы̀ ꙗ҆́вѣ, что̀ дре́во ѻ҆́ное, є҆́же въ во́дꙋ вложи́лъ є҆сѝ; крⷭ҇тъ хрⷭ҇то́въ, и҆́мже ѿ глꙋбины̀ тлѝ и҆звлеко́хомсѧ, томꙋ̀ покланѧ́ющесѧ вѣ́рнѡ во вѣ́ки.
Дре́вле і҆а́кѡвъ проѡбразꙋ́ѧ крⷭ҇тъ тво́й хрⷭ҇тѐ, і҆ѡ́сифъ покланѧ́шесѧ бж҃е́ственнагѡ жезла̀ кра́еви, ски́птръ се́й стра́шный црⷭ҇твїѧ твоегѡ̀ предви́дѣвъ: є҆мꙋ́же ны́нѣ покланѧ́емсѧ вѣ́рнѡ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Є҆ди́но въ тре́хъ начерта́нїихъ сꙋщество̀ сла́вѧ, не слива́ю є҆диноли́чнѡ тре́хъ, нижѐ пресѣца́ю зра́ка, ѻ҆ц҃а̀, и҆ сн҃а, со дх҃омъ: є҆ди́нъ бо над̾ всѣ́ми бг҃ъ въ трⷪ҇цѣ.
Бг҃оро́диченъ: Є҆ди́на въ ма́терехъ ꙗ҆ви́ласѧ є҆сѝ дв҃а бг҃оневѣ́сто мр҃і́е, без̾ мꙋ́жа роди́вши хрⷭ҇та̀ сп҃са, чистоты̀ зна́менїе сохрани́вши: тебѐ ᲂу҆бл҃жа́емъ вѣ́рнїи во вѣ́ки.
Катава́сїа: Рꙋ́цѣ въ ро́въ ве́рженый львѡ́въ, и҆ногда̀ вели́кїй во прⷪ҇ро́цѣхъ, крⷭ҇тоѡбра́знѡ просте́ръ данїи́лъ, неврежде́нъ ѿ си́хъ снѣ́ди сп҃се́сѧ, бл҃гословѧ̀ хрⷭ҇та̀ бг҃а во вѣ́ки.
Пѣ́снь ѳ҃.
І҆рмо́съ: Свѣти́сѧ, свѣти́сѧ:
Во гро́бъ соше́лъ є҆сѝ жизнода́вче и҆ бж҃е, и҆ сокрꙋши́лъ є҆сѝ всѧ̑ закле́пы же и҆ верєѝ, и҆ мє́ртвыѧ воскреси́лъ є҆сѝ, сла́ва воста́нїю твоемꙋ̀, вопїю́щыѧ, хрⷭ҇тѐ сп҃се всеси́льне.
Гро́бъ тво́й жи́знь мнѣ̀ хрⷭ҇тѐ и҆сточѝ, содержа́й бо жи́знь, предста́въ возопи́лъ є҆сѝ живꙋ́щымъ во гробѣ́хъ: сꙋ́щїи во ᲂу҆́захъ разрѣши́тесѧ, а҆́зъ бо мі́ра и҆збавле́нїе прїидо́хъ.
Пѣ́сньми да взыгра́ютъ всѧ̑ древа̀ дꙋбра̑внаѧ, тезоимени́тое дре́во крⷭ҇та̀ зрѧ́ще ѡ҆блобыза́емое дне́сь: на не́мже хрⷭ҇то́съ вознесѐ главꙋ̀, ꙗ҆́коже прⷪ҇ро́чествꙋетъ бж҃е́ственный дв҃дъ.
Дре́вомъ ᲂу҆ме́рый, дре́во тѧ̀ ѡ҆брѣто́хъ жи́зни хрⷭ҇тоно́сне крⷭ҇те мо́й, храни́телю мо́й нерꙋши́мый, на де́мѡны крѣ́пкаѧ держа́во, тебѣ̀ покланѧ́ѧйсѧ дне́сь зовꙋ̀: ѡ҆ст҃ѝ мѧ̀ сла́вою твое́ю.
Весели́сѧ, ра́дꙋйсѧ цр҃ковь бж҃їѧ, дре́вꙋ требога́тномꙋ покланѧ́ющисѧ дне́сь, всест҃а́гѡ крⷭ҇та̀ хрⷭ҇то́ва: є҆мꙋ́же слꙋ́жатъ чи́нове а҆́гг҃льстїи, и҆ со стра́хомъ предстоѧ́тъ.
Трⷪ҇ченъ: Трⷪ҇цѣ ли́цы, є҆ди́ницѣ є҆стество́мъ покланѧ́юсѧ, тебѣ̀ бж҃ество̀ ст҃о́е, ѻ҆ц҃ꙋ̀, и҆ сн҃ꙋ, со ст҃ы́мъ же дх҃омъ, є҆ди́номꙋ нача́лꙋ, є҆ди́номꙋ црⷭ҇твꙋ, всѣ́ми влады́чествꙋющемꙋ.
Бг҃оро́диченъ: Гора̀ вели́каѧ въ ню́же всели́сѧ хрⷭ҇то́съ, ты̀ ꙗ҆ви́ласѧ є҆сѝ дв҃о, ꙗ҆́коже бж҃е́ственный дв҃дъ вопїе́тъ: є҆́юже мы̀ вознесо́хомсѧ къ нб҃сѝ, всыни́вшесѧ дх҃омъ всебл҃же́ннаѧ.
Катава́сїа: Ѽ мт҃и дв҃о, и҆ бцⷣе нело́жнаѧ, ро́ждшаѧ безсѣ́меннѡ хрⷭ҇та̀ бг҃а на́шего, на крⷭ҇тъ возне́сшагосѧ пло́тїю, тѧ̀ вѣ́рнїи всѝ досто́йнѡ съ ни́мъ ны́нѣ велича́емъ.
Є҆ѯапостїла́рїй воскре́сенъ. И҆ крⷭ҇та̀.
Подо́бенъ: Со ᲂу҆ченикѝ:
Крⷭ҇тъ хрⷭ҇то́въ честны́й дне́сь предложе́нный ви́дѣвше поклони́мсѧ, и҆ вѣ́рнѡ возвесели́мсѧ, ѡ҆блобыза́юще любо́вїю, на се́мъ во́лею распе́ншагосѧ просѧ́ще гдⷭ҇а, сподо́бити всѣ́хъ на́съ, и҆ крⷭ҇тꙋ̀ чⷭ҇тно́мꙋ поклони́тисѧ, и҆ дости́гнꙋти воскрⷭ҇нїе неѡсꙋжде́ннѡ.
И҆ ны́нѣ, бг҃оро́диченъ: Дре́вꙋ, на не́мже всечⷭ҇таѧ, пречⷭ҇тѣи дла̑ни ѡ҆ на́съ прострѐ, пригвозди́выйсѧ сн҃ъ тво́й, ны́нѣ бл҃гоче́стнѡ покланѧ́ющымсѧ, да́ждь на́мъ ми́ръ, и҆ мїроспаси́тєльныѧ всечⷭ҇тны̑ѧ стрⷭ҇ти предвари́ти, и҆ свѣ́тлой мїрора́достной гдⷭ҇оимени́той па́сцѣ поклони́тисѧ, и҆ свѣтоно́сномꙋ дню̀.
На хвали́техъ поста́вимъ стїхѡ́въ и҃: и҆ пое́мъ стїхи̑ры воскрⷭ҇ны, ѻ҆смогла́сника д҃: и҆ трипѣ́снца подѡ́бны г҃, повторѧ́юще а҃, гла́съ д҃.
Подо́бенъ: Ꙗ҆́кѡ до́блѧ:
Во гла́сѣхъ воскли́кнемъ, въ пѣ́снехъ возвели́чимъ, крⷭ҇тъ честны́й ѡ҆блобыза́юще, и҆ къ немꙋ̀ возопїи́мъ: крⷭ҇те всече́стне, ѡ҆ст҃ѝ на́шѧ дꙋ́шы и҆ тѣлеса̀ си́лою твое́ю, и҆ ѿ всѧ́кагѡ вре́да сопроти́вныхъ соблюдѝ неврежде́ны, бл҃гоче́стнѡ покланѧ́ющыѧсѧ тебѣ̀.
Пристꙋпи́вше почерпи́те неистоща́емыхъ во́дъ, крⷭ҇та̀ бл҃года́тїю пролива́емыхъ: сѐ предлежа́щее ви́дѧще дре́во ст҃о́е, дарова́нїй и҆сто́чникъ, напое́ное кро́вїю и҆ водо́ю влⷣки всѣ́хъ, на то́мъ во́лею возне́сшагѡсѧ, и҆ зємны́ѧ воздви́гшагѡ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Цр҃кве ᲂу҆твержде́нїе, мона́шествꙋющихъ похвала̀ и҆ сп҃се́нїе, ты̀ є҆сѝ крⷭ҇те всече́стне: тѣ́мже покланѧ́ющесѧ тебѣ̀, и҆ се́рдцемъ и҆ дꙋше́ю просвѣща́емсѧ дне́сь, бж҃е́ственною бл҃года́тїю на тебѣ̀ пригвозди́вшагѡсѧ, и҆ держа́вꙋ льсти́вагѡ разори́вшагѡ, и҆ клѧ́твꙋ потре́бльшагѡ.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
И҆ повторѧ́юще пе́рвꙋю стїхи́рꙋ, та́же глаго́лемъ сті́хъ:
Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ, гла́съ и҃:
Высокомꙋ́драгѡ ра́зꙋма ѕлы́хъ фарїсе́євъ, всѣ́хъ гдⷭ҇ь при́тчею ᲂу҆бѣжа́ти сегѡ̀ наꙋчѝ: и҆ не высокомꙋ́дрствовати па́че, є҆́же подоба́етъ мꙋ́дрствовати, всѣ́хъ наказа̀, прописа́нїе и҆ ѡ҆́бразъ са́мъ бы́въ, да́же до распѧ́тїѧ и҆ сме́рти, са́мъ себѐ и҆злїѧ́въ. бл҃годарѧ́ще ᲂу҆̀бо съ мытаре́мъ рце́мъ: пострада́вый за ны̀, и҆ безстра́стенъ пребы́вый бж҃е, ѿ страсте́й на́съ и҆зба́ви, и҆ сп҃сѝ дꙋ́шы на́шѧ.
Сла́ва, па́ки то́йже. И҆ ны́нѣ: Пребл҃гослове́нна є҆сѝ: Славосло́вїе вели́кое. Є҆гда́ же начина́емъ пѣ́ти: Сла́ва въ вы́шнихъ: Тогда̀ прїи́детъ і҆ере́й ѡ҆болче́нъ во всѧ̑ сщ҃е́нничєскїѧ ѻ҆дє́жды, [и҆лѝ а҆́ще гдѣ̀ бꙋ́детъ ста́рѣй, то ѿ пе́рвѣйшагѡ въ свои́хъ и҆̀мъ мѣ́стѣхъ до́лжно є҆́сть семꙋ̀ бы́ти]. И҆ взе́мъ кади́льницꙋ, кади́тъ ст҃ꙋ́ю трапе́зꙋ, и҆ чⷭ҇тны́й крⷭ҇тъ, та́же под̾е́млетъ є҆го̀ на ді́скосѣ со храни́льницею на главꙋ̀ свою̀, и҆ и҆схо́дитъ ѿ лѣ́выѧ страны̀ престо́ла сѣ́верными две́рьми, пред̾идꙋ́щымъ є҆мꙋ̀ свѣща́мъ двꙋ́мъ, и҆ кади́льницѣ, и҆ ѿхо́дитъ до црⷭ҇кихъ вра́тъ. Сконча́нꙋ же бы́вшꙋ славосло́вїю, и҆ трист҃о́мꙋ, глаго́летъ сщ҃е́нникъ: Премⷣрость про́сти. И҆ начина́емъ тропа́рь: Сп҃сѝ гдⷭ҇и лю́ди твоѧ̑: три́жды. И҆ прихо́дитъ і҆ере́й носѧ̀ чⷭ҇тны́й крⷭ҇тъ пред̾ ст҃ы̑ѧ двє́ри: и҆ та́мѡ ᲂу҆гото́ванꙋ четвероно́жникꙋ, и҆ полага́етсѧ верхꙋ̀ є҆гѡ̀ чⷭ҇тны́й крⷭ҇тъ, и҆ ѿве́рзъ храни́льницꙋ, кади́тъ крⷭ҇тоѡбра́знѡ ѿ четы́рехъ стра́нъ.
И҆ а҆́бїе пое́мъ тропа́рь, гла́съ ѕ҃:
Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ. Три́жды.
И҆ начина́ютъ покланѧ́тисѧ, а҆́ще гдѣ̀ во ѻ҆би́тели, и҆гꙋ́менъ, и҆лѝ и҆́нъ пе́рвенствꙋѧй во сщ҃е́нныхъ, та́кожде и҆ про́чїи сщ҃е́нницы покланѧ́ющесѧ пред̾ чⷭ҇тны́мъ крⷭ҇то́мъ два́жды: цѣлꙋ́ютъ же пре́жде старѣ́шїи, и҆ по цѣлова́нїи, па́ки покланѧ́ютсѧ є҆ди́ножды: та́кожде творѧ́тъ и҆ про́чїи сщ҃е́нницы, десна́ѧ страна̀ и҆ лѣ́ваѧ. та́кожде прихо́дитъ и҆ бра́тїѧ два̀ два̀ покланѧ́ющесѧ по чи́нꙋ и҆́хъ.
Кла́нѧющымсѧ же бра́тїѧмъ пое́мъ самогла́сны сїѧ̑, гла́съ в҃:
Прїиди́те вѣ́рнїи, животворѧ́щемꙋ дре́вꙋ поклони́мсѧ, на не́мже хрⷭ҇то́съ цр҃ь сла́вы во́лею рꙋ́цѣ распросте́ръ, вознесѐ на́съ на пе́рвое бл҃же́нство, и҆́хже пре́жде сла́стїю ᲂу҆кра́дъ вра́гъ, и҆згна́ны ѿ бг҃а сотворѝ. прїиди́те вѣ́рнїи, дре́вꙋ поклони́мсѧ, и҆́мже сподо́бихомсѧ неви́димыхъ вра̑гъ сокрꙋши́ти главы̑. прїиди́те всѧ̑ ѻ҆те́чєствїѧ ꙗ҆зы̑къ, крⷭ҇тъ гдⷭ҇нь пѣ́сньми почти́мъ: ра́дꙋйсѧ крⷭ҇те, па́дшагѡ а҆да́ма соверше́нное и҆збавле́нїе! ѡ҆ тебѣ̀ вѣ́рнїи хва́лѧтсѧ, ꙗ҆́кѡ твое́ю си́лою і҆сма́ильтєскїѧ лю́ди держа́внѡ покарѧ́ющїи. тебѐ ны́нѣ со стра́хомъ хрⷭ҇тїа́не цѣлꙋ́емъ: на тебѣ̀ пригвозди́вшагосѧ бг҃а сла́вимъ, глаго́люще: гдⷭ҇и на то́мъ пригвозди́выйсѧ поми́лꙋй на́съ, ꙗ҆́кѡ бл҃гъ и҆ чл҃вѣколю́бецъ.
Гла́съ и҃: Дне́сь влⷣка тва́ри, и҆ гдⷭ҇ь сла́вы, на крⷭ҇тѣ̀ пригвожда́етсѧ и҆ въ ре́бра пробода́етсѧ, же́лчи и҆ ѻ҆́цта вкꙋша́етъ, сла́дость цр҃ко́внаѧ: вѣнце́мъ ѿ те́рнїѧ ѡ҆блага́етсѧ: покрыва́ѧй нб҃о ѻ҆́блаки, ѻ҆де́ждею ѡ҆блачи́тсѧ порꙋга́нїѧ: и҆ заꙋша́етсѧ бре́нною рꙋко́ю, рꙋко́ю созда́вый человѣ́ка. по плеще́ма бїе́нъ быва́етъ, ѡ҆дѣва́ѧй не́бо ѻ҆́блаки. заплева̑нїѧ и҆ ра̑ны прїе́млетъ, поношє́нїѧ и҆ заꙋшє́нїѧ: и҆ всѧ̑ терпи́тъ менѐ ра́ди ѡ҆сꙋжде́ннагѡ, и҆зба́витель мо́й и҆ бг҃ъ, да сп҃се́тъ мі́ръ ѿ пре́лести, ꙗ҆́кѡ бл҃гоꙋтро́бенъ.
Сла́ва, гла́съ и҃: Дне́сь неприкоснове́нный сꙋщество́мъ, прикоснове́нъ мнѣ̀ быва́етъ, и҆ стра́ждетъ стрⷭ҇ти, свобожда́ѧй мѧ̀ ѿ страсте́й. свѣ́тъ подава́ѧй слѣпы̑мъ, ѿ беззако́нныхъ ᲂу҆сте́нъ ѡ҆плева́етсѧ, и҆ дае́тъ плещѝ за плѣнє́нныѧ на ра̑ны. сего̀ чⷭ҇таѧ дв҃а и҆ мт҃и на крⷭ҇тѣ̀ зрѧ́щи, болѣ́зненнѡ вѣща́ше: ᲂу҆вы̀ мнѣ̀ ча́до моѐ, что̀ сїѐ сотвори́лъ є҆сѝ; кра́сный добро́тою па́че всѣ́хъ человѣ́къ, бездыха́нный, беззра́чный ꙗ҆влѧ́ешисѧ, не и҆мѣ́ѧ ви́да, нижѐ добро́ты. ᲂу҆вы̀ мнѣ̀ мо́й свѣ́те! не могꙋ̀ спѧ́ща зрѣ́ти тѧ̀, ᲂу҆тро́бою ᲂу҆ѧзвлѧ́юсѧ, и҆ лю́тое ѻ҆рꙋ́жїе се́рдце моѐ прохо́дитъ. воспѣва́ю твоѧ̑ стрⷭ҇ти, покланѧ́юсѧ бл҃гоꙋтро́бїю твоемꙋ̀, долготерпѣли́ве сла́ва тебѣ̀.
И҆ ны́нѣ, гла́съ то́йже: Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ гдⷭ҇и: и҆ дре́ва сп҃се́нїѧ вкꙋси́вше, грѣхо́вныхъ страсте́й свобо́дꙋ ᲂу҆лꙋчи́хомъ, мл҃твами бцⷣы, є҆ди́не чл҃вѣколю́бче.
Та́же є҆ктенїѝ, и҆ ѿпꙋ́стъ. Сла́ва, и҆ ны́нѣ, стїхи́ра є҆ѵⷢ҇льскаѧ, въ притво́рѣ: и҆ чте́тсѧ ѡ҆глаше́нїе стꙋді́тово, и҆ ча́съ пе́рвый, и҆ соверше́нный ѿпꙋ́стъ. На лїтꙋргі́и и҆з̾ѡбрази́тєльнаѧ. Бл҃жє́нна гла́са, на ѕ҃: и҆ ѿ канѡ́на крⷭ҇та̀ пѣ́снь г҃-ѧ на д҃.
Вмѣ́стѡ же трист҃а́гѡ пое́мъ: Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ.
Прокі́менъ а҆пⷭ҇ла, гла́съ ѕ҃: Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ. Сті́хъ: Въ тебѣ̀ гдⷭ҇и воззовꙋ̀, бж҃е мо́й, да не премолчи́ши ѿ менѐ. А҆по́столъ ко є҆вре́ємъ, зача́ло та҃і. А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ. Є҆ѵⷢ҇лїе ѿ ма́рка, зача́ло л҃з. Прича́стный: Зна́менасѧ на на́съ свѣ́тъ лица̀ твоегѡ̀ гдⷭ҇и.