На вели́цѣй вече́рни,

бл҃гословлѧ́етъ сщ҃е́нникъ, и҆ пое́мъ ꙗ҆́кѡ ѻ҆бы́чно предначина́тельный ѱало́мъ. Та́же стїхосло́вїе, пе́рваѧ каѳі́сма.

На Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры воскрⷭ҇ны ѻ҆смогла́сника г҃, и҆ а҆натѡ́лїевы г҃, и҆ чⷭ҇тна́гѡ крⷭ҇та̀ д҃, гла́съ є҃:

Подо́бенъ: Ра́дꙋйсѧ по́стникѡвъ:

Возсїѧ́й гдⷭ҇нь крⷭ҇те, свѣтолꙋ̑чныѧ мѡ́лнїѧ твоеѧ̀ бл҃года́ти, въ сердца̀ чтꙋ́щихъ тѧ̀, и҆ бг҃опрїѧ́тною любо́вїю прїе́млющихъ, мїровожделѣ́нне, и҆́мже сле́зное потреби́сѧ сѣ́тованїе, и҆ сме́ртныхъ сѣ́тей и҆зба́вихомсѧ, и҆ къ при́сномꙋ весе́лїю прїидо́хомъ. покажѝ красоты̀ твоеѧ̀ бл҃голѣ́пїе, воздаѧ́нїе пода́ждь воздержа́нїѧ рабѡ́мъ твои̑мъ, вѣ́рнѡ просѧ́щымъ твоѐ бога́тное застꙋпле́нїе, и҆ ве́лїю млⷭ҇ть.

Ра́дꙋйсѧ живоно́сный крⷭ҇те, цр҃кве кра́сный раю̀, дре́во нетлѣ́нїѧ, прозѧ́бшее на́мъ вѣ́чныѧ сла́вы наслажде́нїе: и҆́мже бѣсо́встїи ѿгонѧ́ютсѧ полцы̀, и҆ а҆́гг҃льстїи свеселѧ́тсѧ чи́нове, и҆ совокꙋплє́нїѧ вѣ́рныхъ пра́зднꙋютъ. ѻ҆рꙋ́жїе непобѣди́мое, ᲂу҆твержде́нїе нерꙋши́мое, вѣ́рныхъ побѣ́до, сщ҃е́нникѡвъ похвало̀, хрⷭ҇то́вы ны́нѣ стрⷭ҇ти и҆ на́мъ пода́ждь дости́гнꙋти, и҆ ве́лїю млⷭ҇ть.

Ра́дꙋйсѧ живоно́сный крⷭ҇те, бл҃гоче́стїѧ непобѣди́маѧ побѣ́да, две́рь ра́йскаѧ, вѣ́рныхъ ᲂу҆твержде́нїе, цр҃кве ѡ҆гражде́нїе: и҆́мже тлѧ̀ разори́сѧ и҆ ᲂу҆праздни́сѧ, и҆ попра́сѧ сме́ртнаѧ держа́ва, и҆ вознесо́хомсѧ ѿ землѝ къ нбⷭ҇нымъ: ѻ҆рꙋ́жїе непобѣди́мое, бѣсѡ́въ сопротивобо́рче, сла́во мч҃нкѡвъ, прпⷣбныхъ ꙗ҆́кѡ вои́стиннꙋ ᲂу҆добре́нїе, приста́нище сп҃се́нїѧ, да́рꙋѧй мі́рꙋ ве́лїю млⷭ҇ть.

Грѧдѝ первозда́ннаѧ дво́ице, ли́ка ѿпа́дшаѧ го́рнихъ, за́вистїю человѣкоꙋбі́йцы, го́рькою сла́стїю дре́ва, дре́вле вкꙋше́нїемъ. сѐ всечестно́е вои́стиннꙋ дре́во предгрѧде́тъ, къ немꙋ́же прите́кше ра́достїю ѡ҆блобыза́йте, и҆ возопі́йте къ немꙋ̀ съ вѣ́рою: ты̀ на́ше воззва́нїе, крⷭ҇те всечестны́й, дре́во бг҃обл҃же́нное, са́де нбⷭ҇ный: є҆гѡ́же плода̀ причасти́вшесѧ, нетлѣ́нїе ᲂу҆лꙋчи́хомъ, є҆де́ма пе́рваго прїе́мше и҆звѣ́стнѡ, и҆ ве́лїю млⷭ҇ть.

Сла́ва, гла́съ г҃: Хрⷭ҇тѐ бж҃е на́шъ, во́льное распѧ́тїе во ѻ҆́бщее воскрⷭ҇нїе ро́да человѣ́ческагѡ воспрїе́мый, и҆ тро́стїю крⷭ҇та̀, ѡ҆багре́нїемъ червле́нымъ своѧ̑ пе́рсты ѡ҆кровави́вый, ѡ҆ста́витєльнаѧ на́мъ ца́рски подписа́ти чл҃вѣколю́бствовавый, не пре́зри на́съ бѣ́дствꙋющихъ, и҆ па́ки ѿ тебѐ разстоѧ́нїе: но ᲂу҆ще́дри є҆ди́не долготерпѣли́ве, во ѡ҆бстоѧ́нїи лю́ди твоѧ̑, и҆ воста́ни, поборѝ борю́щыѧ ны̀, ꙗ҆́кѡ всеси́ленъ.

И҆ ны́нѣ, бг҃оро́диченъ гла́са. Вхо́дъ. Свѣ́те ти́хїй:

Прокі́менъ: Гдⷭ҇ь воцр҃и́сѧ:

Є҆ктенїа̀, и҆ про́чее ꙗ҆́кѡ ѻ҆бы́чно.

На лїті́и стїхи́ра хра́ма.

Сла́ва, и҆ ны́нѣ, гла́съ є҃: Зрѧ́щи тѧ̀ тва́рь всѧ̀ на крⷭ҇тѣ̀ на́га ви́сѧща, содѣ́телѧ и҆ зижди́телѧ всѣ́хъ, и҆змѣнѧ́шесѧ стра́хомъ, и҆ рыда́ше: со́лнце же свѣ́тъ ѡ҆мрачѝ, и҆ землѧ̀ колеба́шесѧ, ка́менїе же разсѣда́шесѧ, и҆ хра́ма свѣ́тлость раздира́шесѧ. ме́ртвїи воста́ша ѿ гробѡ́въ, и҆ а҆́гг҃льскїѧ си̑лы ᲂу҆жасо́шасѧ, глаго́люще: ѽ чꙋдесѐ! сꙋдїѧ̀ сꙋ́дитсѧ, и҆ стра́ждетъ хотѧ̀ за сп҃се́нїе мі́ра, и҆ ѡ҆бновле́нїе.

На стїхо́внѣ стїхи̑ры ѻ҆смогла́сника, ꙗ҆̀же по а҆лфави́тꙋ.

Сла́ва, и҆ ны́нѣ, гла́съ д҃: Пособи́вый гдⷭ҇и кро́ткомꙋ дв҃дꙋ побѣди́ти и҆ноплеме́нника, вѣ̑рнымъ лю́демъ на́шимъ спобо́рствꙋй, и҆ ѻ҆рꙋ́жїемъ крⷭ҇та̀ низложѝ врагѝ на́шѧ: покажѝ бл҃гоꙋтро́бне на на́съ дрє́внїѧ млⷭ҇ти твоѧ̑, и҆ да разꙋмѣ́ютъ вои́стиннꙋ, ꙗ҆́кѡ ты̀ є҆сѝ бг҃ъ: и҆ на тѧ̀ надѣ́ющїисѧ побѣжда́емъ, молѧ́щїисѧ ѻ҆бы́чнѡ пречи́стѣй твое́й мт҃ри, дарова́тисѧ на́мъ вели́цѣй млⷭ҇ти.

Тропа́рь, Бцⷣе Дв҃о: два́жды: и҆ крⷭ҇тный є҆ди́ножды. Гла́съ а҃: Сп҃сѝ гдⷭ҇и лю́ди твоѧ̑.

И҆ про́чее послѣ́дованїе бдѣ́нїѧ: ꙗ҆́кѡ ѻ҆бы́чно.