Недѣ́лѧ тре́тїѧ ст҃ы́хъ постѡ́въ,

поклоне́нїе пра́зднꙋемъ чⷭ҇тна́гѡ и҆ животворѧ́щагѡ крⷭ҇та̀.

Въ сꙋббѡ́тꙋ ве́чера на ма́лѣй вече́рни, стїхи̑ры на д҃. Гла́съ ѕ҃.

Подо́бенъ: А҆́гг҃льскїѧ:

Ны́нѣ а҆́гг҃льскаѧ вѡ́инства копїено́сѧтъ дре́во чⷭ҇тно́е, бл҃гоговѣ́йнѡ ѡ҆крꙋжа́ющѧ, и҆ всѧ̑ созыва́ющѧ вѣ̑рныѧ на поклоне́нїе. прїиди́те ᲂу҆̀бо посто́мъ просвѣти́вшїисѧ, припаде́мъ є҆мꙋ̀ ра́достїю и҆ стра́хомъ, вѣ́рнѡ зовꙋ́ще: ра́дꙋйсѧ чⷭ҇тны́й крⷭ҇те, мі́рꙋ ᲂу҆твержде́нїе. [Два́жды.]

Да а҆да́мовꙋ потреби́ши клѧ́твꙋ, пло́ть на́шꙋ прїе́млеши кромѣ̀ скве́рны, распина́ешисѧ же и҆ ᲂу҆мира́еши, і҆и҃се пребл҃гі́й: тѣ́мже крⷭ҇тъ тво́й, и҆ копїѐ, гꙋ́бꙋ же и҆ тро́сть, гво́здїе вѣ́рнѡ почита́емъ, и҆ воскрⷭ҇нїе твоѐ ви́дѣти про́симъ.

Заключа́етъ є҆де́мъ дре́вомъ дре́вле ѕмі́й, дре́во же крⷭ҇та̀ ѿверза́етъ се́й всѣ̑мъ хотѧ́щымъ посто́мъ и҆ слеза́ми ѡ҆чи́ститисѧ. прїиди́те ᲂу҆̀бо предлежа́щее ви́дѧще, томꙋ̀ припаде́мъ со стра́хомъ вѣ́рнїи зовꙋ́ще: ѿве́рзи врата̀ нбⷭ҇наѧ крⷭ҇те, лю́бѧщымъ тѧ̀.

Сла́ва, и҆ ны́нѣ.

Подо́бенъ:

Є҆гда̀ крⷭ҇тꙋ̀ пригвожде́на ви́дѣ сло́ве бж҃їй, безсѣ́меннѡ тебѐ ро́ждшаѧ, взыва́ше вопїю́щи: ᲂу҆вы̀ мнѣ̀ ча́до сладча́йшее, ко́е твоѐ смире́нїе бж҃е мо́й; ка́кѡ безстра́стный стра́сть терпи́ши, непра́веднымъ сꙋдо́мъ; пѣсносло́влю твоѐ стра́шное кра́йнее снизхожде́нїе.

На стїхо́внѣ стїхи̑ры подо́бны. Гла́съ в҃:

Подо́бенъ: До́ме є҆ѵфра́ѳовъ:

Разрѣши́вшесѧ ᲂу҆́зъ дре́внѧгѡ ѡ҆сꙋжде́нїѧ, вѣ́рнїи дре́вомъ крⷭ҇та̀, на не́мъ пригвожде́ннаго хрⷭ҇та̀ славосло́вимъ.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

Прїидѝ ны́нѣ съ на́ми дв҃де, цѣвни́цꙋ дви́жи, хрⷭ҇та̀ возноси́те поѧ̀, вѣ́рнїи поклони́тесѧ є҆гѡ̀ подно́жїю.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.

Вознесе́мъ лю́дїе предлежа́щее дре́во, и҆́мже сп҃се́нїе на́мъ хрⷭ҇то́съ подае́тъ, и҆ вѣ́рою цѣлꙋ́емъ.

Сла́ва, и҆ ны́нѣ, то́йже:

Крⷭ҇тобг҃оро́диченъ: Вознесе́на на крⷭ҇тѣ̀, за человѣ́ки, ви́дѧщи твоего̀ сн҃а дв҃о, вопїѧ́ше рыда́ющи: сла́ва бл҃гоꙋтро́бїю твоемꙋ̀.

Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ:

Тропа́рь, гла́съ а҃: Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ, побѣ̑ды правосла̑внымъ хрⷭ҇тїа́нѡмъ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

И҆ быва́етъ ѿпꙋ́стъ. По ѿпꙋ́стѣ же вхо́дитъ сщ҃е́нникъ со є҆кклисїа́рхомъ въ сосꙋдохрани́льницꙋ, и҆ взе́млютъ чⷭ҇тно́е дре́во, пред̾идꙋ́щꙋ свѣ́щникꙋ и҆ кади́лꙋ, пою́щымъ тропа́рь: Сп҃сѝ гдⷭ҇и лю́ди твоѧ̑: И҆ прино́сѧтъ на ст҃ꙋ́ю трапе́зꙋ, и҆ вжига́ютъ свѣщꙋ̀ на всю̀ но́щь.