Въ понедѣ́льникъ д҃-ѧ седми́цы,
на ᲂу҆́трени трⷪ҇чны слꙋчи́вшагѡсѧ гла́са. По а҃-мъ стїхосло́вїи глаго́лемъ сѣда́льны ᲂу҆мили́тельны ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ, гла́съ и҃, господи́на і҆ѡ́сифа.
Подо́бенъ: Воскре́слъ є҆сѝ:
Всечестно́мꙋ вѣ́рнїи поклони́мсѧ дре́вꙋ, на не́мже творе́цъ всѣ́хъ вознесе́сѧ. предлежи́тъ ѡ҆свѧща́ѧ пристꙋпа́ющыѧ дꙋше́ю и҆ тѣ́ломъ, скве́рнꙋ ѡ҆чища́ѧ грѣха̀, постѧ́щихсѧ вѣ́рнѡ, и҆ воспѣва́ющихъ всегда̀ хрⷭ҇та̀, є҆ди́наго бл҃годѣ́телѧ.
Сла́ва, то́йже.
И҆ ны́нѣ, бг҃оро́диченъ. Подо́бенъ:
Сло́во ѻ҆́ч҃ее на зе́млю сни́де, и҆ а҆́гг҃лъ свѣ́та бцⷣѣ вопїѧ́ше: ра́дꙋйсѧ бл҃гослове́ннаѧ, черто́гъ є҆ди́на сохра́ншаѧ, зача́тїе прїе́мшаѧ превѣ́чнагѡ бг҃а и҆ гдⷭ҇а: да ѿ пре́лести сп҃се́тъ ꙗ҆́кѡ бг҃ъ, ро́дъ человѣ́ческїй.
По г҃-мъ стїхосло́вїи сѣда́ленъ, гла́съ г҃.
Подо́бенъ: Красотѣ̀ дѣ́вства:
Преполови́вше ны́нѣ воздержа́нїе, и҆ на поклоне́нїе хрⷭ҇тѐ предвари́вше живоно́снагѡ твоегѡ̀ крⷭ҇та̀, припа́дающе вопїе́мъ тѝ: ве́лїй є҆сѝ чл҃вѣколю́бче, и҆ вє́лїѧ дѣла̀ твоѧ̑, ꙗ҆́кѡ ꙗ҆ви́лъ є҆сѝ крⷭ҇тъ тво́й чⷭ҇тны́й, є҆мꙋ́же со стра́хомъ покланѧ́ющесѧ взыва́емъ: сла́ва кра́йнемꙋ бл҃гоꙋтро́бїю твоемꙋ̀.
Сла́ва, то́йже.
И҆ ны́нѣ, бг҃оро́диченъ. Подо́бенъ:
Ꙗ҆́коже недѣ́ланнаѧ дв҃о лоза̀, прекра́снѣйшїй гро́здъ прозѧбла̀ є҆сѝ, и҆сточа́ющїй на́мъ вїно̀ сп҃си́тельное, веселѧ́щее всѣ́хъ дꙋ́шы и҆ тѣлеса̀. тѣ́мже ꙗ҆́кѡ вино́внꙋю тѧ̀ до́брыхъ ᲂу҆блажа́юще, при́снѡ со а҆́гг҃ломъ вопїе́мъ тѝ: ра́дꙋйсѧ бл҃года́тнаѧ.
Канѡ́нъ мине́и, и҆ настоѧ́щїй трипѣ́снецъ, и҆ стїхосло́витсѧ пѣ́снь.
Гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ:
Свѣтоно́сное крⷭ҇та̀ поклоне́нїе всѣ̑мъ ꙗ҆ви́сѧ, со́лнечнꙋю зарю̀ сп҃се́нїѧ и҆спꙋща́ющее, и҆ всѣ́хъ ѡ҆зарѧ́ющее страсте́й ѡ҆мраче́нїемъ ѡ҆держи́мыхъ: стеце́мсѧ се́й чи́стѣ ѡ҆блобыза́ти.
Поста̀ ѡ҆чи́стившесѧ бл҃года́тїю, чи́стымъ ᲂу҆мо́мъ, чи́стомꙋ є҆ди́номꙋ, прїиди́те, возопїи́мъ гла́сомъ бл҃годаре́нїѧ: ты̀ кро́вь твою̀ сло́ве за ны̀ всѧ̑ да́лъ є҆сѝ, ты̀ и҆ крⷭ҇то́мъ ѡ҆свѧща́еши ны̀.
Запе́нсѧ прило́ги ѕмїи́ными, паде́нїемъ ᲂу҆жа́снымъ всегда̀ лежꙋ̀, сп҃се, паде́нїе первозда́ннагѡ стрⷭ҇тїю твое́ю и҆ крⷭ҇то́мъ и҆спра́вивый, и҆спра́ви, и҆ наста́ви къ хотѣ́нїй твои́хъ и҆сполне́нїю.
Бг҃оро́диченъ: Предстоѧ́щи крⷭ҇тꙋ̀ твоемꙋ̀ гдⷭ҇и, неискꙋсобра́чнаѧ, и҆ твоѧ̑ ꙗ҆́звы зрѧ́щи влⷣко, ᲂу҆ѧзвлѧ́ема глаго́лаше: ᲂу҆вы̀ мнѣ̀ ча́до, болѣ̑зни и҆збѣ́гши въ ржⷭ҇твѣ̀ твое́мъ, ны́нѣ болѣ́зненнѡ ᲂу҆ѧзвлѧ́юсѧ.
И҆́ный, господи́на ѳео́дѡра. Гла́съ г҃.
І҆рмо́съ: Пои́мъ гдⷭ҇ви сотво́ршемꙋ ди̑внаѧ чꙋдеса̀:
Седми́ца ст҃а́ѧ сїѧ̀ и҆ свѣтоно́снаѧ: крⷭ҇тъ всечⷭ҇тны́й предлага́етъ мі́рови: прїиди́те, поклони́мсѧ, стра́хомъ же и҆ любо́вїю дꙋ́шы просвѣти́вше, на не́мъ пригвозди́вшагосѧ хрⷭ҇та̀ въ пѣ́снехъ сла́вѧще.
Крⷭ҇тꙋ̀ твоемꙋ̀ всѝ покланѧ́емсѧ хрⷭ҇тѐ, предпровожде́нїе творѧ́ще воскрⷭ҇нїѧ твоегѡ̀: пое́мъ гвѡ́здїѧ твоѧ̑, чти́мъ и҆ копїѐ твоѐ, ᲂу҆стна́ма и҆ ѻ҆чи́ма, дꙋше́ю же и҆ тѣ́ломъ си́ми ѡ҆чища́еми.
Сла́ва, трⷪ҇ченъ: Трⷪ҇це во є҆ди́номъ сꙋществѣ̀ пѣва́емаѧ, ѻ҆́ч҃е, сн҃е, со дх҃омъ ст҃ы́мъ, безнача́льное, присносꙋ́щное, несозда́нное бж҃ество̀, свѣ́та и҆сто́чниче и҆ жи́зни: тебѣ̀ покланѧ́емсѧ всѝ человѣ́цы, всѐ ѡ҆сꙋществи́вшемꙋ.
Бг҃оро́диченъ: Пое́мъ тѧ̀ дв҃о бцⷣе чⷭ҇таѧ, херꙋві́мскꙋю колесни́цꙋ, и҆з̾ неѧ́же бг҃ъ роди́сѧ: ты̀ бо є҆ди́на была̀ є҆сѝ и҆сто́чникъ нетлѣ́нїѧ, и҆сточа́ющїй всѣ̑мъ жи́знь, и҆з̾ негѡ́же почерпа́юще и҆сцѣле́нїе прїе́млемъ.
Сла́ва тебѣ̀ бж҃е на́шъ, сла́ва тебѣ̀.
Четы́редесѧте по́стныхъ ста́дїй преполовлѧ́юще, прїиди́те любо́вїю со хрⷭ҇то́мъ и҆́демъ къ бж҃е́ственнѣй стрⷭ҇ти, да сраспе́ншесѧ є҆мꙋ̀, ѻ҆́бщницы бꙋ́демъ тогѡ̀ воскрⷭ҇нїю.
І҆рмо́съ: Пои́мъ гдⷭ҇ви, сотво́ршемꙋ ди̑внаѧ чꙋдеса̀ въ чермнѣ́мъ мо́ри: по́нтомъ бо покры̀ проти̑вныѧ, и҆ сп҃се і҆и҃лѧ. томꙋ̀ є҆ди́номꙋ пои́мъ, ꙗ҆́кѡ просла́висѧ.
Пѣ́снь и҃.
І҆рмо́съ: Седмери́цею пе́щь:
Ꙗ҆дови́тыми страстьмѝ и҆ дꙋ́шꙋ и҆ мы́сль ᲂу҆ѧ́звленꙋ стѧжа́вшаго, гдⷭ҇и поми́лꙋй, ᲂу҆ще́дри твои́мъ крⷭ҇то́мъ. защитѝ и҆ ѿ ре́бръ твои́хъ и҆злїѧ́нными ка́плѧми, да ᲂу҆се́рднѡ пою̀: сщ҃е́нницы бл҃гослови́те, лю́дїе превозноси́те во всѧ̑ вѣ́ки.
На горѣ̀ дре́вле тебѐ мѡѷсе́й проѡбразѝ, рꙋ́цѣ возвы́сивъ, и҆ а҆мали́ка побѣжда́ѧ, крⷭ҇те всечестны́й, є҆мꙋ́же кла́нѧющесѧ дне́сь, побѣжда́емъ де́мѡнѡвъ и҆ноплемє́нныѧ полкѝ, и҆ вѣ́рою пое́мъ: сщ҃е́нницы бл҃гослови́те, лю́дїе превозноси́те во всѧ̑ вѣ́ки.
Страстьмѝ преклоне́на, врагѝ запина́ема, ѻ҆бы́чаемъ лꙋка́вымъ влеко́ма, ᲂу҆ще́дри бл҃гоꙋтро́бне, твои́мъ крⷭ҇то́мъ защитѝ, ꙗ҆́кѡ да пою̀ неꙋкло́ннымъ се́рдцемъ: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Бг҃оро́диченъ: Болѣ́зненнѡ стенѧ́щи, мт҃рски восклица́ющи, и҆ ѿ внꙋ́треннихъ ско́рби не терпѧ́щи, на крⷭ҇тъ взира́ла є҆сѝ къ рожде́нномꙋ и҆з̾ твоегѡ̀ чре́ва, ча́до, вопїю́щи, что̀ видѣ́нїе сїѐ; ка́кѡ стра́ждеши, є҆стество́мъ безстра́стный, всѧ́кѡ хотѧ̀ ро́дъ человѣ́ческїй ѿ тлѝ свободи́ти;
И҆́ный. І҆рмо́съ: А҆́гг҃льми немо́лчнѡ:
Въ цр҃кви предложе́нный крⷭ҇тъ хрⷭ҇то́въ ви́дѧще, стра́хомъ и҆ вѣ́рою бра́тїе прише́дше поклони́мсѧ, томꙋ̀ вопїю́ще: ты̀ жи́знь процвѣ́лъ є҆сѝ человѣ́кѡмъ свѣтоно́сне.
Побѣдоно́сна въ бра́нехъ, нб҃о тѧ̀ показа̀ животво́рный на́мъ крⷭ҇те, ѻ҆рꙋ́жїе непобѣди́мое, врагѡ́мъ низложе́нїе, цр҃квамъ ро́гъ, и҆ вѣ̑рнымъ сп҃се́нїе.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ѻ҆ц҃а̀ ст҃а́го сла́влю, и҆ сн҃а ст҃а́го чтꙋ̀, и҆ дх҃а ст҃а́го пою̀, є҆диносꙋ́щнꙋю трⷪ҇цꙋ про́стꙋю, бг҃а коего́ждо си́хъ, свѣ́ты и҆ свѣ́тъ, ꙗ҆́кѡ ѿ со́лнца є҆ди́нагѡ происходѧ́ща.
Бг҃оро́диченъ: Ра́дꙋйсѧ две́ре непроходи́маѧ: ра́дꙋйсѧ кꙋпино̀ неѡпали́маѧ: ра́дꙋйсѧ рꙋ́чко злата́ѧ: ра́дꙋйсѧ горо̀ несѣко́маѧ: ра́дꙋйсѧ бцⷣе, ᲂу҆пова́нїе нерꙋши́мое, и҆ стѣно̀ на тѧ̀ надѣ́ющымсѧ.
Сла́ва тебѣ̀ бж҃е на́шъ, сла́ва тебѣ̀.
По́стъ преполови́вше, дерза́имъ дх҃омъ на грѧдꙋ́щее ю҆́ношески, бл҃готекꙋ́ще съ бг҃омъ бра́тїе, ꙗ҆́кѡ да и҆ па́схꙋ ра́достнѡ ᲂу҆́зримъ хрⷭ҇тꙋ̀ воскре́сшꙋ.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: А҆́гг҃льми немо́лчнѡ въ вы́шнихъ сла́вимаго бг҃а, нб҃са̀ нб҃съ, землѧ̀, и҆ го́ры, и҆ хо́лми, и҆ глꙋбина̀, и҆ ве́сь ро́дъ человѣ́ческїй, пѣ́сньми того̀ ꙗ҆́кѡ созда́телѧ, и҆ и҆зба́вителѧ бл҃гослови́те, и҆ превозно́сите во всѧ̑ вѣ́ки.
Пѣ́снь ѳ҃.
І҆рмо́съ: Оу҆страши́сѧ всѧ́къ:
Внꙋ́чата дре́вле і҆а́кѡвъ бл҃гословлѧ́ѧ, проѡбража́ше свѣ́тлѡ крⷭ҇тъ чⷭ҇тны́й, и҆́мже ще́дре на́съ бл҃гословѝ, ѡ҆сщ҃е́нїѧ пода́тельнꙋю бл҃года́ть подаѧ̀ покланѧ́ющымсѧ є҆мꙋ̀ и҆ всѣ́хъ и҆зба́вителѧ тѧ̀ прославлѧ́ющымъ.
Поще́нїѧ водо́ю вѣ́рнїи ѡ҆чи́стившесѧ, и҆ дꙋше́ю и҆ мы́слїю, животода́тельное и҆ бж҃е́ственное дре́во ѡ҆блобыза́имъ: предлежи́тъ бо ꙗ҆́вѣ всѣ̑мъ, и҆сточа́ѧ бж҃е́ственное ѡ҆ставле́нїе, и҆ свѣ́тъ нбⷭ҇ный, и҆ жи́знь, и҆ и҆́стинное ра́дованїе.
Сꙋдїю́ тѧ вѣ́мъ стра́шна, грѧдꙋ́ща во сла́вѣ бж҃ества̀, всѣ́хъ сокровє́ннаѧ ѡ҆бличи́ти тогда̀ хотѧ́ща гдⷭ҇и. тѣ́мже тебѣ̀ зовꙋ̀ бл҃же: согрѣши́хъ, простѝ, не ѡ҆бличѝ моѧ̑ мнѡ́гаѧ и҆ лю̑таѧ согрѣшє́нїѧ.
Бг҃оро́диченъ: А҆́гнца дре́вле а҆́гница зрѧ́щи на крⷭ҇тѣ̀ пригвожде́на, и҆ ѡ҆мрача́емꙋ со́лнечномꙋ сїѧ́нїю, пла́чꙋщи глаго́лаше: сл҃нце сла́вы і҆и҃се, заше́лъ є҆сѝ ᲂу҆мерщвлѧ́емь: но возсїѧ́й воста́нїѧ свѣ́тъ лю́бѧщымъ тѧ̀.
И҆́ный. І҆рмо́съ: На сїна́йстѣй горѣ̀:
На мѣ́стѣ, и҆дѣ́же но́зѣ стоѧ́стѣ [тебѐ] влⷣки и҆ бг҃а, поклони́мсѧ всѝ дне́сь крⷭ҇тꙋ̀ всечестно́мꙋ, ꙗ҆́коже дв҃дъ взыва́етъ бг҃огла́снѣйшїй: и҆́бо всѧ̑ содержа́й го́рстїю, на се́мъ вознесе́сѧ.
На землѝ живꙋ́щїи пристꙋпи́те, посто́мъ чи́стїи, и҆ предлежа́щїй ви́дѧще дне́сь всечⷭ҇тны́й крⷭ҇тъ, поклони́тесѧ стра́хомъ и҆ вѣ́рою, весели́тесѧ и҆ сра́дꙋйтесѧ, ѡ҆свѧще́нїе дꙋша́мъ почерпа́юще.
Трⷪ҇ченъ: Сꙋщество́мъ є҆ди́ница є҆́сть несѣко́ма, пребж҃е́ственнаѧ трⷪ҇ца, соединѧ́ема є҆стество́мъ, дѣли́тсѧ ли́цы сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ. сїѧ̑ ѻ҆ц҃ъ є҆́сть, сн҃ъ, и҆ дх҃ъ живы́й, соблюда́ющаѧ всѐ.
Бг҃оро́диченъ: Дѣторо́днꙋю дв҃ꙋ кто̀ слы́ша; и҆ мт҃рь без̾ мꙋ́жа; мр҃і́е, соверша́еши чꙋ́до: но скажи́ ми, ка́кѡ; не и҆спытꙋ́й глꙋбины̀ бг҃орожде́нїѧ моегѡ̀. сїѐ всеи́стинное, па́че человѣ́ческагѡ ᲂу҆ма̀ постиже́нїе.
Сла́ва тебѣ̀ бж҃е на́шъ, сла́ва тебѣ̀.
Бл҃года́рнꙋю хвалꙋ̀ принесе́мъ бг҃ꙋ всѝ лю́дїе, ꙗ҆́кѡ ви́дѧще ны́нѣ ѡ҆блобыза́емъ всест҃ы́й крⷭ҇тъ. разꙋмѣ́йте ᲂу҆̀бо и҆ покарѧ́йтесѧ въ се́мъ де́мѡни: ꙗ҆зы́цы ва́рварстїи разꙋмѣ́йте, и҆ покарѧ́йтесѧ, и҆́мже съ на́ми бг҃ъ.
І҆рмо́съ: На сїна́йстѣй горѣ̀, ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю: же́злъ прозѧ́бшїй, и҆са́їа взыва́ше, ѿ ко́рене дв҃дова.
Свѣти́ленъ гла́са.
На стїхо́внѣ самогла́сенъ, два́жды, гла́съ ѕ҃:
И҆зрѧ́дный пꙋ́ть возноше́нїѧ хрⷭ҇тѐ, смире́нїе показа́лъ є҆сѝ, са́мъ себѐ и҆стощи́въ, и҆ зра́къ раба̀ прїи́мъ: фарїсе́а велехва́льныѧ мл҃твы не послꙋ́шавъ, мытарѧ́ же сокрꙋше́нное стена́нїе, ꙗ҆́кѡ же́ртвꙋ непоро́чнꙋю въ вы́шнихъ прїе́мъ. тѣ́мже и҆ а҆́зъ вопїю́ ти: ѡ҆чи́сти бж҃е, ѡ҆чи́сти сп҃се мо́й, и҆ сп҃си́ мѧ.
Мꙋ́чениченъ: Гдⷭ҇и, въ па́мѧть ст҃ы́хъ твои́хъ всѧ̀ тва́рь пра́зднꙋетъ, нб҃са̀ ра́дꙋютсѧ со а҆́гг҃лы, и҆ землѧ̀ весели́тсѧ съ человѣ́ки. тѣ́хъ мл҃твами поми́лꙋй на́съ.
Сла́ва, и҆ ны́нѣ, гла́съ то́йже: А҆рха́гг҃льское сло́во прїѧ́ла є҆сѝ, и҆ херꙋві́мскїй прⷭ҇то́лъ показа́ласѧ є҆сѝ, и҆ на ѡ҆б̾ѧ́тїихъ твои́хъ носи́ла є҆сѝ бцⷣе, наде́ждꙋ дꙋ́шъ на́шихъ.
На пе́рвомъ часѣ̀ твори́мъ поклоне́нїе чⷭ҇тно́мꙋ крⷭ҇тꙋ̀ ꙗ҆́коже и҆ въ недѣ́лю, по напи́санномꙋ ѡ҆́бразꙋ, пою́ще вмѣ́стѡ, Стѡпы̀ моѧ̑: Крⷭ҇тꙋ̀ твоемꙋ̀ покланѧ́емсѧ влⷣко: На часѣ́хъ же по Ѻ҆́ч҃е на́шъ: Конда́къ: Не ктомꙋ̀ пла́менное ѻ҆рꙋ́жїе:
Та́кожде и҆ въ сре́дꙋ и҆ пѧто́къ, четы́ре сїѧ̑ дни̑: въ пѧто́къ же сохранѧ́емъ крⷭ҇тъ ꙗ҆́коже та́мѡ положи́сѧ.
На ѕ҃-мъ часѣ̀ тропа́рь прⷪ҇ро́чества, гла́съ з҃:
Гдⷭ҇и, да не ꙗ҆́ростїю твое́ю ѡ҆бличи́ши лю́ди согрѣши́вшыѧ, нижѐ гнѣ́вомъ твои́мъ нака́жеши на́съ бл҃гъ сы́й: тебе́ бо сла́витъ всѧ̀ землѧ̀, и҆ мо́лимсѧ, пощадѝ на́съ ст҃ы́й.
Прокі́менъ, ѱало́мъ ѯ҃а, гла́съ ѕ҃: Ѡ҆ бз҃ѣ сп҃се́нїе моѐ, и҆ сла́ва моѧ̀. Сті́хъ: Не бг҃ꙋ ли повине́тсѧ дꙋша̀ моѧ̀;
Прⷪ҇ро́чества и҆са́їина чте́нїе. [Глава̀ д҃і, ст. к҃д- л҃в.]
Та́кѡ глаго́летъ гдⷭ҇ь саваѡ́ѳъ: ꙗ҆́коже глаго́лахъ, та́кѡ бꙋ́детъ, и҆ ꙗ҆́коже совѣща́хъ, та́кѡ пребꙋ́детъ: Є҆́же погꙋби́ти а҆ссѷрі́анъ на землѝ мое́й, и҆ на гора́хъ мои́хъ: и҆ бꙋ́дꙋтъ въ попра́нїе, и҆ ѿи́метсѧ ѿ ни́хъ ꙗ҆ре́мъ и҆́хъ, и҆ сла́ва и҆́хъ ѿ ра́менъ и҆́хъ ѿи́метсѧ. Се́й совѣ́тъ, є҆го́же совѣща̀ гдⷭ҇ь на всю̀ вселе́ннꙋю, и҆ сїѧ̀ рꙋка̀ на всѧ̑ ꙗ҆зы́ки вселе́нныѧ. Ꙗ҆̀же бо бг҃ъ ст҃ы́й совѣща̀, кто̀ разори́тъ; и҆ рꙋ́кꙋ є҆гѡ̀ высо́кꙋю кто̀ ѿврати́тъ; Въ лѣ́то, въ не́же ᲂу҆́мре а҆ха́зъ ца́рь, бы́сть глаго́лъ се́й: Не ра́дꙋйтесѧ всѝ и҆ноплемє́нницы, сокрꙋши́сѧ бо ꙗ҆ре́мъ бїю́щагѡ вы̀: ѿ сѣ́мене бо ѕмїи́на и҆зы́дꙋтъ и҆сча̑дїѧ а҆́спїдѡвъ, и҆ и҆сча̑дїѧ и҆́хъ и҆зы́дꙋтъ ѕмїи̑ парѧ́щїи. И҆ ᲂу҆пасꙋ́тсѧ ᲂу҆бо́зїи и҆́мъ: ни́щїи же человѣ́цы въ ми́рѣ почі́ютъ: и҆ потреби́тъ гла́домъ сѣ́мѧ твоѐ, и҆ ѡ҆ста́нокъ тво́й и҆збїе́тъ. Воспла́читесѧ врата̀ градѡ́въ, да возопїю́тъ гра́ды смѧте́ннїи, и҆ноплемє́нницы всѝ: занѐ ды́мъ ѿ сѣ́вера и҆́детъ, и҆ нѣ́сть, и҆́же пребꙋ́детъ. И҆ что̀ ѿвѣща́ютъ ца́рїе ꙗ҆зы́кѡвъ, ꙗ҆́кѡ гдⷭ҇ь ѡ҆снова̀ сїѡ́на, и҆ тѣ́мъ сп҃сꙋ́тсѧ смире́ннїи люде́й є҆гѡ̀.
Прокі́менъ, ѱало́мъ ѯ҃в, гла́съ д҃: Та́кѡ бл҃гословлю́ тѧ въ животѣ̀ мое́мъ. Сті́хъ: Бж҃е бж҃е мо́й, къ тебѣ̀ ᲂу҆́тренюю, возжада̀ тебѐ дꙋша̀ моѧ̀.