Въ четверто́къ тре́тїѧ седми́цы ве́чера.

На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ настоѧ́щыѧ подѡ́бны г҃, трипѣ́снца, и҆ мине́и г҃. Стїхи̑ры господи́на і҆ѡ́сифа, гла́съ є҃.

Подо́бенъ: Ра́дꙋйсѧ по́стникѡвъ:

Сп҃се и҆́стиннаѧ сла́досте, го́рькїѧ ме́рры дре́вле во́ды ᲂу҆слади́вый ѡ҆́бразомъ тогда̀ дре́ва, бж҃е́ственнагѡ крⷭ҇та̀, просте́рсѧ на не́мъ, ꙗ҆́коже бл҃говоли́лъ є҆сѝ: же́лчи же вкꙋси́лъ є҆сѝ, въ ре́бра прободе́нъ, и҆з̾ ни́хже мі́рꙋ вода̀ и҆злїѧ́сѧ ѡ҆ставле́нїѧ, на ѡ҆бновле́нїе земна́гѡ смѣше́нїѧ. тѣ́мже славосло́вимъ твою̀ неизрече́ннꙋю си́лꙋ, и҆ мо́лимсѧ: пода́ждь на́мъ стра́хъ тво́й гдⷭ҇и, во вре́мѧ поще́нїѧ, и҆ проще́нїе согрѣше́нїй, и҆ ве́лїю млⷭ҇ть.

Сло́ве простры́йсѧ на крⷭ҇тѣ̀, собира́ѧ дале́че ѿстоѧ́щыѧ ѿ тебѐ, возне́съ помышле́нїе моѐ ѿ гно́ѧ страсте́й, добродѣ́тельми всѧ́ческими ѡ҆богатѝ, подава́ѧ се́рдцꙋ моемꙋ̀ чистѣ́йшїй стра́хъ тво́й и҆ дꙋшѝ мое́й соверше́ннꙋю любо́вь, плотскі́ѧ мѧ̀ любвѐ ѿсѣца́ющꙋю: ꙗ҆́кѡ да воздержа́нїемъ тебѣ̀, мл҃твою и҆ моле́нїемъ, въ настоѧ́щыѧ дни̑ ᲂу҆гождꙋ̀, и҆ ᲂу҆зрю̀ тво́й свѣ́тлый де́нь воскрⷭ҇нїѧ, прїе́млѧ ве́лїю млⷭ҇ть.

И҆́на стїхи́ра господи́на ѳео́дѡра, гла́съ а҃.

Подо́бенъ: Ѻ҆́блакъ тѧ̀ свѣ́тлый:

Тре́тїю честны́хъ постѡ́въ седми́цꙋ хрⷭ҇тѐ сло́ве, преше́дшихъ, дре́во живоно́снагѡ крⷭ҇та̀ твоегѡ̀ ви́дѣти сподо́би на́съ, и҆ че́стнѣ поклони́тисѧ, и҆ пѣ́ти по достоѧ́нїю и҆ сла́вити держа́вꙋ твою̀, воспѣ́ти стрⷭ҇ти твоѧ̑, предвари́ти сла́вное чи́стѣ и҆ ст҃о́е воскрⷭ҇нїе, па́схꙋ та́йнꙋю, є҆́юже а҆да́мъ па́ки вни́де въ ра́й.

И҆ въ мине́и г҃. Сла́ва, и҆ ны́нѣ, бг҃оро́диченъ.

Прокі́менъ, ѱало́мъ н҃є, гла́съ ѕ҃: Поми́лꙋй мѧ̀ бж҃е, ꙗ҆́кѡ попра́ мѧ человѣ́къ. Сті́хъ: Попра́ша мѧ̀ вразѝ моѝ ве́сь де́нь.

Бытїѧ̀ чте́нїе. [Глава̀ з҃, ст. а҃і-к҃д. глава̀ и҃, ст. а҃- г҃.]

Бы́сть въ шестьсо́тное лѣ́то въ житїѝ нѡ́евѣ, втора́гѡ мцⷭ҇а, въ два́десѧть седмы́й де́нь мцⷭ҇а, въ де́нь то́й разверзо́шасѧ всѝ и҆сто́чницы бе́здны, и҆ хлѧ̑би небє́сныѧ ѿверзо́шасѧ. И҆ бы́сть до́ждь на зе́млю четы́редесѧть дне́й, и҆ четы́редесѧть ноще́й. Въ де́нь то́й вни́де нѡ́е, си́мъ, ха́мъ, і҆а́феѳъ, сы́нове нѡ́евы, и҆ жена̀ нѡ́ева, и҆ трѝ жєны̀ сынѡ́въ є҆гѡ̀ съ ни́мъ въ ковче́гъ. И҆ всѝ ѕвѣ́рїе земні́и по ро́дꙋ, и҆ всѝ ско́ти по ро́дꙋ, и҆ всѧ́кїй га́дъ дви́жꙋщїйсѧ на землѝ по ро́дꙋ, и҆ всѧ́каѧ пти́ца перна́таѧ по ро́дꙋ своемꙋ̀: Внидо́ша къ нѡ́ю въ ковче́гъ два̀ два̀, мꙋ́жескїй по́лъ и҆ же́нскїй, ѿ всѧ́кїѧ пло́ти, въ не́йже є҆́сть дꙋ́хъ живо́тный. И҆ входѧ́щаѧ мꙋ́жескїй по́лъ и҆ же́нскїй ѿ всѧ́кїѧ пло́ти внидо́ша къ нѡ́ю въ ковче́гъ, ꙗ҆́коже заповѣ́да гдⷭ҇ь бг҃ъ нѡ́ю: и҆ затворѝ гдⷭ҇ь бг҃ъ ковче́гъ ѿвнѣ̀ є҆гѡ̀. И҆ бы́сть пото́пъ четы́редесѧть дне́й, и҆ четы́редесѧть ноще́й на землѝ, и҆ ᲂу҆мно́жисѧ вода̀, и҆ взѧ̀ ковче́гъ, и҆ возвы́сисѧ ѿ землѝ: И҆ возмога́ше вода̀, и҆ ᲂу҆множа́шесѧ ѕѣлѡ̀ на землѝ, и҆ ноша́шесѧ ковче́гъ верхꙋ̀ воды̀. Вода́ же возмога́ше ѕѣлѡ̀ ѕѣлѡ̀ на землѝ: и҆ покры̀ всѧ̑ го́ры высѡ́кїѧ, ꙗ҆̀же бѧ́хꙋ под̾ нб҃се́мъ: Пѧтьна́десѧть лакте́й горѣ̀ возвы́сисѧ вода̀, и҆ покры̀ всѧ̑ го́ры высѡ́кїѧ. И҆ ᲂу҆́мре всѧ́каѧ пло́ть дви́жꙋщаѧсѧ по землѝ, пти́цъ и҆ скотѡ́въ и҆ ѕвѣре́й, и҆ всѧ́кїй га́дъ дви́жꙋщїйсѧ на землѝ, и҆ всѧ́кїй человѣ́къ. И҆ всѧ̑ є҆ли̑ка и҆́мꙋтъ дыха́нїе жи́зни, и҆ всѐ є҆́же бѣ̀ на сꙋ́ши, ᲂу҆́мре. И҆ потреби́сѧ всѧ́кое воста́нїе, є҆́же бѧ́ше на лицѣ̀ всеѧ̀ землѝ, ѿ человѣ́ка да́же до скота̀, и҆ гадѡ́въ, и҆ пти́цъ небе́сныхъ, и҆ потреби́шасѧ ѿ землѝ: и҆ ѡ҆ста̀ нѡ́е є҆ди́нъ, и҆ и҆̀же съ ни́мъ въ ковче́зѣ. И҆ возвы́сисѧ вода̀ над̾ земле́ю дне́й сто̀ пѧтьдесѧ́тъ. И҆ помѧнꙋ̀ бг҃ъ нѡ́а, и҆ всѧ̑ ѕвѣ́ри, и҆ всѧ̑ скоты̀, и҆ всѧ̑ пти̑цы, и҆ всѧ̑ га́ды пресмыка́ющыѧсѧ, є҆ли̑ка бѣ́хꙋ съ ни́мъ въ ковче́зѣ: и҆ наведѐ бг҃ъ дꙋ́хъ на зе́млю, и҆ преста̀ вода̀. И҆ заключи́шасѧ и҆сто́чницы бе́здны, и҆ хлѧ̑би нбⷭ҇ныѧ: и҆ ᲂу҆держа́сѧ до́ждь ѿ нб҃сѐ. И҆ вспѧ́ть по́йде вода̀, и҆дꙋ́щаѧ ѿ землѝ: и҆ ᲂу҆малѧ́шесѧ вода̀, по стѣ̀ пѧти́десѧтихъ дне́хъ.

Прокі́менъ ѱало́мъ н҃ѕ, гла́съ з҃: Поми́лꙋй мѧ̀ бж҃е, поми́лꙋй мѧ̀, ꙗ҆́кѡ на тѧ̀ ᲂу҆пова̀ дꙋша̀ моѧ̀. Сті́хъ: И҆ на сѣ́нь крилꙋ̀ твоє́ю надѣ́юсѧ.

При́тчей чте́нїе. [Глава̀ і҃, ст. а҃-к҃в.]

Сы́нъ премꙋ́дръ весели́тъ ѻ҆тца̀: сы́нъ же безꙋ́менъ печа́ль ма́тери. Не по́льзꙋютъ сокрѡ́вища беззако́нныхъ, пра́вда же и҆зба́витъ ѿ сме́рти. Не ᲂу҆бїе́тъ гла́домъ гдⷭ҇ь дꙋ́шꙋ пра́веднꙋю, живо́тъ же нечести́выхъ низврати́тъ. Нищета̀ мꙋ́жа смирѧ́етъ: рꙋ́цѣ же мꙋ́жественныхъ ѡ҆богаща́ютсѧ. Сы́нъ нака́занъ премꙋ́дръ бꙋ́детъ, безꙋ́мный же слꙋго́ю ᲂу҆потреби́тсѧ: спасе́тсѧ ѿ зно́ѧ сы́нъ разꙋ́мный, вѣтротлѣ́ненъ же быва́етъ на жа́твѣ сы́нъ беззако́нный. Бл҃гослове́нїе гдⷭ҇не на главѣ̀ пра́веднагѡ: ᲂу҆ста́ же нечести́выхъ покры́етъ пла́чь безвре́менный. Па́мѧть пра́ведныхъ съ похвала́ми: и҆́мѧ же нечести́выхъ ᲂу҆гаса́етъ. Премꙋ́дръ се́рдцемъ прїи́метъ за́пѡвѣди: непокрове́нный же ᲂу҆стна́ма ѡ҆строптѣва́ѧ запне́тсѧ. И҆́же хо́дитъ про́стѡ, хо́дитъ надѣ́ѧсѧ: развраща́ѧ же пꙋти̑ своѧ̑, позна́нъ бꙋ́детъ. Намиза́ѧй ѻ҆́комъ съ ле́стїю, собира́етъ мꙋжє́мъ печа̑ли: ѡ҆блича́ѧй же со дерзнове́нїемъ, миротвори́тъ. И҆сто́чникъ жи́зни въ рꙋцѣ̀ пра́веднагѡ: ᲂу҆ста́ же нечести́вагѡ покры́етъ па́гꙋба. Не́нависть воздвиза́етъ ра́спрю: всѣ́хъ же нелюбопри́тельныхъ покрыва́етъ любо́вь. И҆́же ѿ ᲂу҆сте́нъ произно́ситъ премꙋ́дрость, жезло́мъ бїе́тъ мꙋ́жа безсерде́чна. Премꙋ́дрїи скры́ютъ чꙋ́вство, ᲂу҆ста́ же проде́рзагѡ приближа́ютсѧ сокрꙋше́нїю. Стѧжа́нїе бога́тыхъ гра́дъ тве́рдъ: сокрꙋше́нїе же нечести́выхъ нищета̀. Дѣла̀ пра́ведныхъ живо́тъ творѧ́тъ, пло́дове же нечести́выхъ грѣхѝ. Пꙋти̑ жи́зни храни́тъ наказа́нїе: наказа́нїемъ же не ѡ҆бличе́нный заблꙋжда́етъ. Покрыва́ютъ враждꙋ̀ ᲂу҆стнѣ̀ пра̑выѧ: и҆зносѧ́щїи же ᲂу҆кори́знꙋ безꙋ́мнѣйшїи сꙋ́ть. Ѿ многосло́вїѧ не и҆збѣжи́ши грѣха̀: щадѧ́й же ᲂу҆стнѣ̀, разꙋ́менъ бꙋ́деши. Сребро̀ разжже́нное ѧ҆зы́къ пра́веднагѡ: се́рдце же нечести́вагѡ и҆сче́знетъ. Оу҆стнѣ̀ пра́ведныхъ вѣ́дѧтъ высѡ́каѧ: безꙋ́мнїи же въ скꙋ́дости скончава́ютсѧ. Бл҃гослове́нїе гдⷭ҇не на главѣ̀ пра́веднагѡ: сїѐ ѡ҆богаща́етъ, и҆ не и҆́мать приложи́тисѧ є҆мꙋ̀ печа́ль въ се́рдцы.

На стїхо́внѣ самогла́сенъ днѐ, два́жды. Гла́съ ѕ҃:

На дре́вѣ крⷭ҇тнѣмъ ѡ҆бѣ́шена жи́знь всѣ́хъ хрⷭ҇тѐ бж҃е, ѡ҆живѝ мою̀ дꙋ́шꙋ ᲂу҆мерщвле́ннꙋю прегрѣше́ньми: и҆ да не всеконе́чнѡ поги́бнꙋти ѡ҆ста́виши твоѐ ѻ҆вча̀, па́стырю до́брый. ѿстꙋпи́хъ ѿ твои́хъ за́повѣдей, и҆ безгрѣ́шїѧ бога́тство, є҆́же дарова́лъ мѝ є҆сѝ, расточи́хъ грѣхолю́бнымъ произволе́нїемъ, растлѣ́хъ же и҆ ѡ҆мерзи́хсѧ въ блꙋ́дныхъ начина́нїихъ: но ѡ҆бновѝ мѧ̀ къ покаѧ́нїю привле́къ, є҆ди́не многомлⷭ҇тиве.

Мч҃нченъ: Мч҃ницы твоѝ гдⷭ҇и, не ѿверго́шасѧ тебѐ, ни ѿстꙋпи́ша ѿ за́повѣдей твои́хъ: тѣ́хъ мл҃твами поми́лꙋй на́съ.

Сла́ва, и҆ ны́нѣ, крⷭ҇тобг҃оро́диченъ.

Подо́бенъ: Тридне́вный:

Ви́дѧщи тѧ̀ распина́ема хрⷭ҇тѐ тебѐ ро́ждшаѧ, вопїѧ́ше: что̀ стра́нное є҆́же ви́ждꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;