Въ четверто́къ г҃-ѧ седми́цы, на ᲂу҆́трени трⷪ҇чны.
По а҃-мъ стїхосло́вїи глаго́лемъ сѣда́льны а҆пⷭ҇льскїѧ ѻ҆смогла́сника.
По в҃-мъ же стїхосло́вїи глаго́лемъ настоѧ́щїй сѣда́ленъ, господи́на і҆ѡ́сифа. Гла́съ ѕ҃.
Подо́бенъ: Наде́жде мі́ра:
Свѣти̑ла мі́ра непрелє́стнаѧ, ᲂу҆ч҃нцы̀ сп҃сѡвы, просвѣти́те мою̀ дꙋ́шꙋ грѣхо́мъ ѡ҆слѣ́пшꙋю, и҆ покажи́те бж҃е́ственнагѡ днѐ ѡ҆́бщника, хранѧ́ща сп҃си́тєльныѧ за́пѡвѣди, и҆ тьмы̀ мѧ̀ и҆зба́вите ѻ҆́ныѧ несвѣти́мыѧ, ꙗ҆́кѡ да ва́съ прославлѧ́ю.
Сла́ва, то́йже.
И҆ ны́нѣ, бг҃оро́диченъ: Ст҃а́ѧ влⷣчце бцⷣе, хрⷭ҇та̀ бг҃а на́шегѡ мт҃и, ꙗ҆́кѡ всѣ́хъ творца̀ неизрече́ннѡ ро́ждшаѧ, моли́сѧ со а҆пⷭ҇лы сщ҃е́нными всегда̀ бл҃гости є҆гѡ̀, страсте́й на́съ и҆зба́вити, и҆ ѡ҆ставле́нїе на́мъ да́ти грѣхѡ́въ.
По г҃-мъ же стїхосло́вїи дрꙋгі́й сѣда́ленъ господи́на ѳео́дѡра.
Гла́съ ѕ҃.
Подо́бенъ: А҆́гг҃льскїѧ:
Мїросвѣ̑тлаѧ свѣти̑ла бж҃е́ственнїи а҆пⷭ҇ли, просвѣти́те пѣвцы̀ ва́шѧ, возме́здїе творѧ́ще вре́мени поста̀, досто́йнѡ молѧ́щесѧ, всѣ̑мъ ви́дѣти дре́во живоно́снагѡ крⷭ҇та̀, и҆ лобыза́ти нескве́рныма ᲂу҆стна́ма и҆ ѻ҆чи́ма, вопїю́щымъ ѱало́мски: гдⷭ҇и сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ: Наде́жде мі́ра бл҃га́ѧ бцⷣе дв҃о, твоѐ и҆ є҆ди́но стра́шное предста́тельство дви́жемъ, ᲂу҆милосе́рдисѧ на безпомѡ́щныѧ лю́ди, ᲂу҆молѝ млⷭ҇тивнаго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.
Канѡ́нъ мине́и, и҆ настоѧ́щїй трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ ѕ҃.
Пѣ́снь д҃.
І҆рмо́съ: Хрⷭ҇то́съ моѧ̀ си́ла:
По́стъ, сле́зы, мл҃твы, ми́лостыню, бл҃гоꙋмиле́нный нра́въ, мы́сль пра́вꙋю, житїѧ̀ чистотꙋ̀, пока́жемъ вѣ́рнїи, ꙗ҆́кѡ да сла́вы наслади́мсѧ.
Свѣти́льницы свѣтѧ́щїи на тве́рди честны́ѧ цр҃кве, пресвѣ́тлѡ ꙗ҆ви́стесѧ а҆пⷭ҇ли: тѣ́мже просвѣти́те на̑ша сердца̀ бж҃е́ственнымъ дх҃омъ.
Ꙗ҆́кѡ бж҃е́ственное ᲂу҆́глїе вже́гшесѧ ѻ҆гне́мъ невеще́ственнымъ, страстна̑ѧ вещєства̀ попали́те серде́цъ на́шихъ, мꙋ́дрїи бг҃а на́шегѡ а҆пⷭ҇толи.
Бг҃оро́диченъ: Свѣ́щниче негаси́мый, черто́же всесвѣ́тлый, серафі̑мъ превы́шшаѧ, херꙋві́мскаѧ колесни́це всенепоро́чнаѧ, грѣхѡ́въ мѧ̀ лю́тыхъ и҆ бѣ́дъ свободѝ.
И҆́ный господи́на ѳео́дѡра. Гла́съ то́йже.
І҆рмо́съ: Оу҆слы́ша прⷪ҇ро́къ:
Свѣти́льницы бг҃оѧвле́нїѧ, а҆пⷭ҇толи сп҃сѡвы ꙗ҆ви́вшесѧ, невѣ́дѣнїѧ но́щь разрꙋши́сте, и҆ цр҃ковь ᲂу҆ѧсни́вше, просвѣща́ете вселе́ннꙋю ѻ҆гневѣща́нными ᲂу҆че́ньми ва́шими.
Мі́ръ проте́кше, и҆́ный ᲂу҆́бѡ во и҆́нꙋю странꙋ̀, во є҆ди́нꙋ вѣ́рꙋ всѧ̑ собра́сте а҆пⷭ҇ли, и҆ ᲂу҆лꙋчи́вше нбⷭ҇наѧ, ликꙋ́ете, хрⷭ҇та̀ непреста́ннѡ молѧ́ще, сп҃сти́сѧ всѣ̑мъ на́мъ.
Трⷪ҇ченъ: Сн҃а ѿ ѻ҆ц҃а̀, и҆ дх҃а сла́влю, ꙗ҆́кѡ ѿ со́лнца свѣ́тъ и҆ лꙋчꙋ̀: ѻ҆́ваго ᲂу҆́бѡ рожде́ственнѣ, занѐ и҆ рожде́нїе: ѻ҆́ваго же происхо́днѣ, занѐ и҆ происхожде́нїе, собезнача́льнꙋю бж҃е́ственнꙋю трⷪ҇цꙋ, покланѧ́емꙋю ѿ всѧ́кїѧ тва́ри.
Бг҃оро́диченъ: Дв҃а млⷣнца роди́вшаѧ, и҆ чистотꙋ̀ соблю́дшаѧ чⷭ҇таѧ, ты̀ ꙗ҆ви́ласѧ є҆сѝ, бг҃а ро́ждши и҆ человѣ́ка, є҆ди́наго того̀ во ѻ҆бою̀ зра́кꙋ, чꙋ́до твоѐ дв҃о мт҃и, ᲂу҆жаса́етъ всѧ́кїй слꙋ́хъ и҆ по́мыслъ.
Сла́ва тебѣ̀ бж҃е на́шъ, сла́ва тебѣ̀.
Мл҃твами ва́шими свѧты́ми, а҆пⷭ҇ли гдⷭ҇ни, да сподо́бимсѧ животворѧ́щїй крⷭ҇тъ ѡ҆блобыза́ти чи́стыми ᲂу҆стна́ми и҆ ѻ҆чи́ма, предлежа́щїй сꙋ́щымъ въ мі́рѣ, и҆ покланѧ́емый.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, сла́ва си́лѣ твое́й гдⷭ҇и.
Пѣ́снь и҃.
І҆рмо́съ: И҆з̾ пла́мене прпⷣбнымъ:
Мѡѷсе́а по́стъ бг҃ови́дца показа̀, и҆ и҆лїю̀ ѻ҆́гненною колесни́цею взѧ́тъ: потщи́сѧ, помышле́нїй вре́дныхъ ᲂу҆держи́сѧ, ꙗ҆́кѡ да долꙋвлекꙋ́щїѧ, дꙋшѐ, и҆зба́вишисѧ пре́лести.
Поползнꙋ́всѧ въ гѡ́ршаѧ впадо́хъ, и҆ ꙗ҆́звѣ стрꙋ́пъ прилага́ю: и҆сцѣлѝ хрⷭ҇тѐ, ѡ҆камене́нное моегѡ̀ се́рдца ѡ҆жесточе́нїе, а҆пⷭ҇льскими ще́дре мл҃твами.
Мі́ра свѣти̑ла бг҃оза̑рнаѧ, страсте́й на́шихъ ѻ҆́блаки разори́те, и҆ покло́нники свѣ́тлагѡ воскрⷭ҇нїѧ покажи́те, пою́щыѧ сл҃нца сла́вы.
Бг҃оро́диченъ: Ро́дове родѡ́въ тѧ̀ бг҃обл҃же́ннаѧ ᲂу҆бл҃жа́ютъ, ꙗ҆́коже дре́вле прорекла̀ є҆сѝ: є҆ди́на бо человѣ́кѡмъ бл҃же́нное родила̀ є҆сѝ сло́во несказа́ннѡ, и҆з̾ тебѐ воплоще́нное.
И҆́ный. І҆рмо́съ: Преподо́бнїи твоѝ ѻ҆́троцы:
Во глꙋбинѣ̀ пре́лести пла́вающыѧ ᲂу҆лови́вше тро́стїю вѣ́ры а҆пⷭ҇ли, гдⷭ҇ви приведо́сте сїѧ̑, бл҃гословѧ́щыѧ, пою́щыѧ и҆ превозносѧ́щыѧ гдⷭ҇а во вѣ́ки.
Ве́лїѧ крѣ́пость твоѧ̀ во а҆пⷭ҇лѣхъ ꙗ҆́кѡ сѣ̑ни и҆ сꙋда̑рїѧ и҆́хъ и҆сцѣлева́ютъ болѧ́щыѧ, бл҃гословѧ́щыѧ, пою́щыѧ и҆ превозносѧ́щыѧ гдⷭ҇а во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Безнача́льнымъ и҆ ржⷭ҇тво́мъ же и҆ происхожде́нїемъ ѻ҆ц҃ꙋ̀ покланѧ́юсѧ ро́ждшемꙋ, сн҃а прославлѧ́ю ро́ждшасѧ, и҆ воспѣва́ю совозсїѧ́вша ѻ҆ц҃ꙋ́ же и҆ сн҃ꙋ дх҃а ст҃а́го.
Бг҃оро́диченъ: Є҆го́же родила̀ є҆сѝ дв҃о несказа́ннѡ, всегда̀ ꙗ҆́кѡ чл҃вѣколю́бца не преста́й молѧ́щи, да бѣ́дъ сп҃се́тъ къ тебѣ̀ прибѣга́ющыѧ.
Сла́ва тебѣ̀ бж҃е на́шъ, сла́ва тебѣ̀.
Двоенадесѧ́тице ст҃ы́хъ а҆пⷭ҇лъ, чⷭ҇тно́мꙋ крⷭ҇тꙋ̀ сподо́би неѡсꙋжде́ннѡ поклони́тисѧ мѧ̀, бл҃гословѧ́ща, пою́ща и҆ превозносѧ́ща во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Преподо́бнїи твоѝ ѻ҆́троцы, въ пещѝ херꙋві́мы подража́хꙋ, трист҃ꙋ́ю пѣ́снь воспѣва́юще: бл҃гослови́те, по́йте и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Бг҃а человѣ́кѡмъ:
Бж҃е и҆ гдⷭ҇и многомлⷭ҇тиве, моегѡ̀ се́рдца ѡ҆чи́сти ꙗ҆́звы, покаѧ́нїѧ мнѣ̀ прилага́ѧ лѣчбы̀: согрѣши́хъ, согрѣши́хъ тебѣ̀, ᲂу҆ще́дри, сп҃сѝ мѧ̀ а҆пⷭ҇лъ твои́хъ мл҃твами, ꙗ҆́кѡ многомлⷭ҇тивъ.
Стремле́нїємъ безмѣ̑стнымъ послѣ́довахъ ᲂу҆мовре́днѡ, и҆ внѣ̀ себѐ ве́сь бы́хъ, сластьмѝ жесто́кими пита́емь, и҆ сп҃си́тельныѧ лиша́емь снѣ́ди блꙋ́дный: хрⷭ҇тѐ ᲂу҆ще́дри, и҆ сп҃сѝ мѧ̀.
Дꙋшѐ ѕло́бы не ѡ҆чи́стившаѧсѧ, и҆ сласте́й тлетво́рныхъ себѐ не ᲂу҆дали́вшаѧ, что̀ безвре́меннѡ ра́дꙋешисѧ постѧ́щисѧ: сегѡ́ бо поста̀ не и҆збра̀ гдⷭ҇ь, є҆ди́нъ на́шегѡ хотѧ́й и҆справле́нїѧ.
Бг҃оро́диченъ: Свѣ́томъ бж҃е́ственнымъ менѐ просвѣтѝ, дв҃о бцⷣе, свѣ́та роди́тельнице, и҆ дꙋшѝ моеѧ̀ мглꙋ̀ ѿженѝ, ꙗ҆́кѡ да бл҃жꙋ̀ тѧ̀, ю҆́же бл҃жа́тъ всѝ человѣ́честїи ро́ди, ꙗ҆́коже предрекла̀ є҆сѝ.
И҆́ный. І҆рмо́съ: Безсѣ́меннагѡ зача́тїѧ:
Сло́вомъ невѣ̑жи, премꙋ́дри ꙗ҆ви́стесѧ ра́зꙋмомъ, плетє́нїѧ слове́съ мꙋдрецѡ́въ разрꙋши́вше, вѣті́ѧмъ сꙋгꙋ̑бствїѧ, и҆ число̀ ѕвѣздоче́тцѡвъ. тѣ́мъ а҆пⷭ҇ли хрⷭ҇тѡ́вы є҆ди́ни, всеѧ̀ вселе́нныѧ показа́стесѧ ᲂу҆чи́телїе.
Пе́тръ вѣті́йствꙋетъ, и҆ платѡ́нъ ᲂу҆молчѐ: ᲂу҆чи́тъ па́ѵелъ, пѷѳаго́ръ постыдѣ́сѧ: про́чїй а҆пⷭ҇льскїй бг҃осло́вѧй собо́ръ, є҆́ллинское ме́ртвое вѣща́нїе погреба́етъ, и҆ мі́ръ совозставлѧ́етъ къ слꙋ́жбѣ хрⷭ҇то́вѣ.
Сла́ва, трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не є҆ди́нагѡ, свѣ́те свѣ́та сїѧ́нїе: и҆ є҆ди́ный є҆ди́нѣ, є҆ди́нагѡ бг҃а ст҃ы́й дш҃е, гдⷭ҇а, гдⷭ҇ь вои́стиннꙋ сы́й. ѽ трⷪ҇це є҆ди́нице ст҃а́ѧ, сп҃сѝ мѧ̀ бг҃осло́вѧща тѧ̀.
Бг҃оро́диченъ: Чꙋ́до ржⷭ҇тва̀ твоегѡ̀ ᲂу҆дивлѧ́етъ мѧ̀ всенепоро́чнаѧ, ка́кѡ зачина́еши безсѣ́меннѡ неѡбыме́ннаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; є҆́же па́че є҆стества̀ вѣ́рою прїе́мъ, рожде́нномꙋ поклони́сѧ: є҆ли̑ка хо́щетъ бо, и҆ мо́жетъ.
Сла́ва тебѣ̀ бж҃е на́шъ, сла́ва тебѣ̀.
Крⷭ҇тъ чⷭ҇тны́й дре́во всест҃о́е, є҆́же мі́рꙋ сп҃се́нїе процвѣтѐ, ви́дѣти и҆ поклони́тисѧ всѝ да сподо́бимсѧ, чи́стыми ᲂу҆стна́ми и҆ дꙋше́ю, мл҃твами всѣ́хъ ва́съ ст҃ы́хъ а҆пⷭ҇лъ хрⷭ҇то́выхъ.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь правосла́внѡ велича́емъ.
Свѣти́ленъ гла́са.
На стїхо́внѣ, самогла́сенъ, два́жды. Гла́съ ѕ҃:
Сн҃оположе́нїѧ ѿпа́дъ блꙋ́дный а҆́зъ, раболѣ́пнѡ съ свинїѧ́ми пита́ѧсѧ, и҆ нижѐ тѣ́хъ пи́щи насыща́ѧсѧ, прихождꙋ̀ къ тебѣ̀ ѻ҆ц҃ꙋ̀ бл҃гоꙋтро́бномꙋ, ѿѻнꙋ́дꙋже и҆зыдо́хъ ѕлѣ̀, возвраща́юсѧ до́брѣ въ покаѧ́нїи зовы́й: согрѣши́хъ на нб҃о и҆ пред̾ тобо́ю, ѻ҆́ч҃е пода́ждь мѝ во ѡ҆браще́нїи вели́кꙋю млⷭ҇ть.
Мч҃нченъ: И҆збра̑нныѧ ᲂу҆дивѝ и҆ ст҃ы̑ѧ бг҃ъ на́шъ, ра́дꙋйтесѧ и҆ весели́тесѧ всѝ рабѝ є҆гѡ̀, ва́мъ бо ᲂу҆гото́ва вѣнцы̀, и҆ црⷭ҇твїе своѐ: но мо́лимъ, и҆ на́съ не забꙋ́дите
Сла́ва, и҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀: тебѣ̀ мо́лимсѧ, моли́сѧ влⷣчце, со ст҃ы́ми а҆пⷭ҇лы [и҆ всѣ́ми ст҃ы́ми,] поми́ловати дꙋ́шы на́шѧ.
На ѕ҃-мъ часѣ̀ тропа́рь прⷪ҇ро́чества. Гла́съ г҃:
А҆́ще беззакѡ́нїѧ на́зриши чл҃вѣколю́бче, ка́ѧ сп҃се́нїѧ наде́жда на́мъ; но твою̀ свы́ше по́мощь, ꙗ҆́кѡ ще́дръ, лю́демъ твои̑мъ низпослѝ гдⷭ҇и.
Прокі́менъ, ѱало́мъ н҃г, гла́съ д҃: Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми. Сті́хъ: Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ.
Прⷪ҇ро́чества и҆са́їина чте́нїе. [Глава̀ а҃і ст. і҃- ѕ҃і. глава̀ в҃і ст. а҃-в҃.]
Та́кѡ глаго́летъ гдⷭ҇ь: бꙋ́детъ въ де́нь ѻ҆́ный ко́рень і҆ессе́овъ, и҆ востаѧ́й владѣ́ти ꙗ҆зы́ки, на того̀ ꙗ҆зы́цы ᲂу҆пова́ти бꙋ́дꙋтъ: и҆ бꙋ́детъ поко́й є҆гѡ̀, че́сть. И҆ бꙋ́детъ въ де́нь ѻ҆́ный, приложи́тъ гдⷭ҇ь показа́ти рꙋ́кꙋ свою̀, є҆́же возревнова́ти по ѡ҆ста́нкꙋ про́чемꙋ люде́й, и҆́же а҆́ще ѡ҆ста́нетъ ѿ а҆ссѷрі́ѡвъ, и҆ ѿ є҆гѵ́пта, и҆ вавѷлѡ́на, и҆ ѿ є҆ѳїо́пїи, и҆ ѿ є҆ламі́тѡвъ, и҆ ѿ восто́кѡвъ со́лнца, и҆ ѿ а҆раві́и, и҆ ѿ ѻ҆стровѡ́въ морски́хъ. И҆ воздви́гнетъ зна́менїе въ ꙗ҆зы́ки, и҆ собере́тъ поги́бшыѧ і҆и҃лєвы, и҆ расточє́нныѧ і҆ꙋ̑дины собере́тъ ѿ четы́рехъ кри́лъ землѝ. И҆ ѿи́метсѧ ре́вность є҆фре́мова, и҆ вразѝ і҆ꙋ̑дины поги́бнꙋтъ: є҆фре́мъ не возревнꙋ́етъ і҆ꙋ́дѣ, и҆ і҆ꙋ́да не ѡ҆скорби́тъ є҆фре́ма. И҆ полетѧ́тъ въ кораблѧ́хъ и҆ноплеме́нничихъ, мо́ре кꙋ́пнѡ плѣнѧ́тъ, и҆ сꙋ́щихъ ѿ востѡ́къ со́лнца, и҆ і҆дꙋме́ю: и҆ на мѡа́ва пе́рвѣе рꙋ́ки возложа́тъ, сы́нове же а҆ммѡ́ни пе́рвїи покорѧ́тсѧ. И҆ ѡ҆пꙋстоши́тъ гдⷭ҇ь мо́ре є҆гѵ́петское, и҆ возложи́тъ рꙋ́кꙋ свою̀ на рѣкꙋ̀ дꙋ́хомъ преси́льнымъ: и҆ порази́тъ на се́дмь де́брїй, ꙗ҆́коже преходи́ти ю҆̀ во ѡ҆бꙋве́нїи: И҆ бꙋ́детъ проше́ствїе лю́демъ мои̑мъ ѡ҆ста́вльшымъ во є҆гѵ́птѣ, и҆ бꙋ́детъ і҆и҃лю, ꙗ҆́коже въ де́нь, є҆гда̀ и҆зы́де ѿ землѝ є҆гѵ́петскїѧ. И҆ рече́ши въ де́нь ѻ҆́ный: бл҃гословлю̀ тѧ̀, гдⷭ҇и, ꙗ҆́кѡ разгнѣ́валсѧ є҆сѝ на мѧ̀, и҆ ѿврати́лъ є҆сѝ ꙗ҆́рость твою̀ [ѿ менѐ,] и҆ поми́ловалъ мѧ̀ є҆сѝ. Сѐ бг҃ъ мо́й, сп҃съ мо́й, ᲂу҆пова́ѧ бꙋ́дꙋ на него̀, и҆ не ᲂу҆бою́сѧ: занѐ сла́ва моѧ̀ и҆ похвала̀ моѧ̀ гдⷭ҇ь, и҆ бы́сть мѝ во сп҃се́нїе.
Прокі́менъ, ѱало́мъ н҃д. Гла́съ з҃: Внꙋшѝ бж҃е, мл҃твꙋ мою̀, и҆ не пре́зри моле́нїѧ моегѡ̀. Сті́хъ: Вонми́ ми, и҆ ᲂу҆слы́ши мѧ̀.