Въ сре́дꙋ г҃-ѧ седми́цы ве́чера.

На Гдⷭ҇и воззва́хъ, поста́вимъ стїхѡ́въ і҃. И҆ пое́мъ самогла́сенъ два́жды: и҆ мч҃нченъ, и҆ трѝ подѡ́бны трипѣ́снца.

Самогла́сенъ, гла́съ д҃:

Блꙋ́днѡ расточи́хъ ѻ҆ч҃еское моѐ бога́тство, пꙋ́стъ бы́хъ, во странѣ̀ всели́хсѧ лꙋка́выхъ гра́жданъ, и҆ безсловє́снымъ ᲂу҆подо́бихсѧ несмы́слєннымъ скотѡ́мъ, и҆ всѧ́кїѧ ѡ҆бнажи́хсѧ бж҃е́ственныѧ бл҃года́ти. тѣ́мже ѡ҆бра́щьсѧ вопїю̀ тебѣ̀ бл҃гоꙋтро́бномꙋ и҆ ще́дромꙋ ѻ҆ц҃ꙋ̀: согрѣши́хъ, прїимѝ мѧ̀ ка́ющасѧ бж҃е, и҆ поми́лꙋй мѧ̀.

Мч҃нченъ: Жє́ртвы ѡ҆дꙋшевлє́нныѧ, всесожжє́нїѧ словє́снаѧ, мꙋ́чєницы гдⷭ҇ни, заколє́нїѧ совершє́ннаѧ бж҃їѧ, бг҃а зна̑ющаѧ, и҆ бг҃омъ зна́ємаѧ ѻ҆вча́та, и҆́хже ѡ҆гра́да волкѡ́мъ невхо́дна, моли́тесѧ и҆ на́мъ ᲂу҆пасє́ннымъ бы́ти съ ва́ми на водѣ̀ поко́ѧ.

Дрꙋгі́ѧ стїхи̑ры господи́на і҆ѡ́сифа. Гла́съ ѕ҃.

Подо́бенъ: Всю̀ ѿложи́вше:

Со́лнца мы́сленнагѡ зари̑ ꙗ҆́вльшесѧ бг҃ови́дцы а҆пⷭ҇ли, просвѣще́нїе и҆спроси́те дꙋша́мъ на́шымъ, и҆ страсте́й и҆зба́витисѧ мра́чныѧ тьмы̀, и҆ де́нь сп҃си́тельный ви́дѣти помоли́тесѧ, посто́мъ и҆ моле́ньми сердца̀ ѡ҆чи́стившымъ, ꙗ҆̀же лꙋка́вый ᲂу҆ѧзвѝ, ꙗ҆́кѡ да ва́съ вѣ́рою сп҃са́еми чти́мъ при́снѡ, всемꙋ́дрымъ проповѣ́данїемъ мі́ръ спа́сшыѧ.

Подо́бенъ:

Въ странꙋ̀ блꙋ́дный ѿше́дъ ѕло́бы, ѕлѣ̀ и҆жди́хъ є҆́же мѝ ѻ҆́ч҃е бл҃гоꙋтро́бне, бога́тство да́лъ є҆сѝ, и҆ гла́домъ та́ю бл҃ги́хъ дѣ́лъ, и҆ стꙋдо́мъ престꙋпле́нїѧ сѐ ѡ҆дѣ́ѧхсѧ, бл҃года́ти бж҃їѧ ѡ҆бнажа́ѧсѧ, и҆ зовꙋ́ ти: согрѣши́хъ, вѣ́мъ бо твою̀ бл҃гость, прїимѝ мѧ̀ ꙗ҆́кѡ є҆ди́наго, ще́дре, ѿ нае́мникѡвъ твои́хъ хрⷭ҇тѐ, а҆пⷭ҇тѡлъ моле́ньми возлю́бльшихъ тѧ̀.

И҆́на стїхи́ра подо́бна господи́на ѳео́дѡра.

Гла́съ то́йже.

Подо́бенъ: Ѡ҆деснꙋ́ю сп҃са:

А҆пⷭ҇ли сп҃сѡвы, свѣти̑ла вселе́нныѧ и҆ бл҃годѣ́телїе и҆ сп҃си́телїе, бж҃їѧ сла́вы ꙗ҆́кѡ небеса̀ повѣ́дателїе, и҆ преꙋкраше́ннїи ѕвѣзда́ми чꙋде́съ, и҆ зна́меньми и҆сцѣле́нїй, прилѣ́жнѡ ѡ҆ на́съ мл҃твы гдⷭ҇ви принеси́те, въ воню̀ чⷭ҇тꙋю, мл҃твы прїѧ́ти на́шѧ, и҆ сподо́битисѧ всѣ̑мъ живоно́снагѡ крⷭ҇та̀ и҆ цѣлова́ти, и҆ ви́дѣти стра́хомъ. тогѡ̀ поклоне́нїемъ низпослѝ на́мъ млⷭ҇ти твоѧ̑ сп҃се, ꙗ҆́кѡ чл҃вѣколю́бецъ.

И҆ въ мине́и д҃.

Сла́ва, и҆ ны́нѣ, бг҃оро́диченъ:

Прокі́менъ, ѱало́мъ н҃а, гла́съ д҃: Оу҆пова́хъ на млⷭ҇ть бж҃їю во вѣ́ки, и҆ въ вѣ́къ вѣ́ка. Сті́хъ: Что̀ хва́лишисѧ во ѕло́бѣ си́льне;

Бытїѧ̀ чте́нїе. [Глава̀ з҃, ст. ѕ҃-ѳ҃.]

Нѡ́е бѣ̀ лѣ́тъ шестѝ сѡ́тъ, и҆ пото́пъ во́дный бы́сть на землѝ. Вни́де же нѡ́е, и҆ сы́нове є҆гѡ̀, и҆ жена̀ є҆гѡ̀, и҆ жєны̀ сынѡ́въ є҆гѡ̀ съ ни́мъ въ ковче́гъ, воды̀ ра́ди пото́па. И҆ ѿ пти́цъ чи́стыхъ, и҆ ѿ пти́цъ нечи́стыхъ, и҆ ѿ скѡ́тъ чи́стыхъ, и҆ ѿ скѡ́тъ нечи́стыхъ, [и҆ ѿ ѕвѣре́й,] и҆ ѿ всѣ́хъ гадѡ́въ пресмыка́ющихсѧ по землѝ: Два̀ два̀ внидо́ша къ нѡ́ю въ ковче́гъ, мꙋ́жескїй по́лъ и҆ же́нскїй, ꙗ҆́коже заповѣ́да [гдⷭ҇ь] бг҃ъ нѡ́ю.

Прокі́менъ, ѱало́мъ н҃в, гла́съ д҃: Внегда̀ возврати́тъ гдⷭ҇ь плѣне́нїе люде́й свои́хъ. Сті́хъ: Речѐ безꙋ́мный въ се́рдцѣ свое́мъ: нѣ́сть бг҃ъ.

При́тчей чте́нїе. [Глава̀ ѳ҃, ст. в҃і-и҃і.]

Сы́не, а҆́ще премꙋ́дръ бꙋ́деши, себѣ̀ премꙋ́дръ бꙋ́деши, и҆ и҆́скрєннимъ твои̑мъ: а҆́ще же ѕо́лъ бꙋ́деши, є҆ди́нъ почерпне́ши ѕла̑ѧ. сы́нъ нака́занъ премꙋ́дръ бꙋ́детъ, безꙋ́мный же слꙋго́ю ᲂу҆потреби́тсѧ. и҆́же ᲂу҆твержда́етсѧ на лжа́хъ, се́й пасе́тъ вѣ́тры, то́й же пожене́тъ пти̑цы парѧ́щыѧ: ѡ҆ста́ви бо пꙋти̑ своегѡ̀ вїногра́да, въ стезѧ́хъ же своегѡ̀ земледѣ́ланїѧ заблꙋдѝ: прохо́дитъ же сквозѣ̀ пꙋсты́ню безво́днꙋю, и҆ зе́млю ѡ҆предѣле́ннꙋю въ жа́ждѣхъ, собира́етъ же рꙋка́ма непло́дїе. Жена̀ безꙋ́мнаѧ и҆ проде́рзаѧ скꙋдна̀ хлѣ́бомъ быва́етъ, ꙗ҆́же не вѣ́сть стыдѣ́нїѧ. Сѣ́де при две́рехъ до́мꙋ своегѡ̀, на столцѣ̀ ꙗ҆́вѣ на сто́гнахъ, Призыва́ющаѧ мимоходѧ́щихъ, и҆ и҆справлѧ́ющихъ пꙋти̑ своѧ̑: И҆́же є҆́сть ѿ ва́съ безꙋ́мнѣйшїй, да ᲂу҆клони́тсѧ ко мнѣ̀: и҆ лишє́ннымъ ра́зꙋма повелѣва́ю, глаго́лющи: Хлѣ́бѡмъ сокровє́ннымъ въ сла́дость прикосни́тесѧ, и҆ во́дꙋ татьбы̀ сла́дкꙋю пі́йте. Ѻ҆́нъ же не вѣ́сть, ꙗ҆́кѡ земноро́днїи ᲂу҆ неѧ̀ погиба́ютъ, и҆ во днѣ̀ а҆́да ѡ҆брѣта́ютсѧ. но ѿскочѝ, не заме́дли на мѣ́стѣ є҆ѧ̀, нижѐ наста́ви ѻ҆́ка своегѡ̀ къ не́й: та́кѡ бо про́йдеши во́дꙋ чꙋждꙋ́ю, и҆ пре́йдеши рѣкꙋ̀ чꙋждꙋ́ю. ѿ воды́ же чꙋжді́ѧ ѡ҆ша́йсѧ, и҆ ѿ и҆сто́чника чꙋжда́гѡ не пі́й: да мно́гое вре́мѧ поживе́ши, и҆ приложа́тсѧ тебѣ̀ лѣ̑та живота̀.

И҆ а҆́бїе бж҃е́ственнаѧ слꙋ́жба преждесщ҃е́нныхъ.