Въ сре́дꙋ г҃-ѧ седми́цы на ᲂу҆́трени трⷪ҇чны.
По а҃-мъ стїхосло́вїи сѣда́льны крє́стныѧ ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ господи́на і҆ѡ́сифа, гла́съ г҃.
Подо́бенъ: Красотѣ̀ дѣ́вства:
Дре́вомъ ᲂу҆вѧди́лъ є҆сѝ пла́мень влⷣко престꙋпле́нїѧ на крⷭ҇тъ возвыша́емь, и҆ ᲂу҆мертви́лъ є҆сѝ врага̀, ᲂу҆мертви́всѧ во́лею. тѣ́мже тѧ̀ молю̀, пло́ти моеѧ̀ хотѣ̑нїѧ ᲂу҆мертвѝ, и҆ ѡ҆живѝ ѻ҆каѧ́нное се́рдце моѐ, посто́мъ страстоꙋбі́йственнымъ, ѡ҆чи́стивъ мѧ̀ ѿ всѧ́кїѧ скве́рны, ꙗ҆́кѡ бл҃гоꙋтро́бенъ.
Сла́ва, то́йже.
И҆ ны́нѣ, крⷭ҇тобг҃оро́диченъ. Подо́бенъ:
Поно́снꙋю ще́дре сме́рть, распѧ́тїемъ, во́лею претерпѣ́лъ є҆сѝ: є҆го́же ро́ждшаѧ тѧ̀ хрⷭ҇тѐ, зрѧ́щи ᲂу҆ѧзвлѧ́шесѧ, ᲂу҆тро́бою терза́шесѧ, ма́терски рыда́ше. є҆ѧ́же мл҃твами, за милосе́рдїе млⷭ҇ти твоеѧ̀ ᲂу҆ще́дри, и҆ сп҃сѝ мі́ръ, взе́млѧй сегѡ̀ грѣ́хъ.
По г҃-мъ стїхосло́вїи сѣда́ленъ, гла́съ в҃.
Подо́бенъ: Воскре́съ ѿ гро́ба:
Свѣ́тлꙋю преходѧ́ще по́стнꙋю трапе́зꙋ, вопїи́мъ: всѧ̑ соблюдѝ гдⷭ҇и въ ми́рѣ, всѧ́кагѡ кова́рства вра́жїѧ и҆збавлѧ́ѧ, и҆ сподо́би на́съ ꙗ҆́кѡ пребл҃гі́й, крⷭ҇тъ тво́й чⷭ҇тны́й любо́вїю лобыза́ти, и҆́мже млⷭ҇ти твоѧ̑ подаѧ̀ вселе́ннѣй, є҆ди́не многомлⷭ҇тиве.
Сла́ва, то́йже.
И҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Милосе́рдїѧ:
Дв҃а и҆ мт҃и твоѧ̀ хрⷭ҇тѐ, на дре́вѣ зрѧ́щи тѧ̀ ме́ртва просте́рта, пла́чꙋщи го́рькѡ, вопїю́щи глаго́лаше: что̀ стра́шное сїѐ та́инство; всѣ̑мъ да́рꙋѧй жи́знь вѣ́чнꙋю, во́лею на крⷭ҇тѣ̀ ка́кѡ ᲂу҆мира́еши сме́ртїю поно́сною;
Канѡ́нъ въ мине́и, и҆ настоѧ́щїй трипѣ́снецъ господи́на і҆ѡ́сифа.
И҆ стїхосло́витсѧ пѣ́снь. Гла́съ г҃.
Пѣ́снь г҃.
І҆рмо́съ: Оу҆твержде́нїе:
Сраспина́ема на́съ ра́ди распе́ншемꙋсѧ, ᲂу҆мертви́мъ всѧ̑ плѡтскі́ѧ ᲂу҆́ды въ постѣ́хъ, и҆ мл҃твахъ, и҆ моле́нїихъ.
Те́рнїе грѣха̀ и҆скорени́вый крⷭ҇то́мъ твои́мъ гдⷭ҇и, тернѡ́внаѧ помышлє́нїѧ ᲂу҆ма̀ моегѡ̀ и҆сто́ргни.
Воѡрꙋжи́вше мы̑сли посто́мъ, побѣжда́имъ чꙋжді̑ѧ полкѝ бѣсѡ́вскїѧ, си́лою крⷭ҇та̀ ѡ҆гражда́еми.
Бг҃оро́диченъ: Воплоща́емое и҆з̾ тебѐ про́йде сло́во, паде́нїе пречⷭ҇таѧ пра́ѻтєцъ, за милосе́рдїе щедро́тъ, и҆справлѧ́ѧ.
И҆́ный господи́на ѳео́дѡра, гла́съ в҃.
І҆рмо́съ: Оу҆твердѝ на́съ въ тебѣ̀ гдⷭ҇и:
Тво́й животво́рный крⷭ҇тъ гдⷭ҇и, печа́ть мнѣ̀ є҆́сть во сп҃се́нїе: тѣ́мъ бо сопротивоборца̀ ᲂу҆пражнѧ́ѧ, воспѣва́ю тѧ̀ ꙗ҆́кѡ бг҃а всеси́льнаго.
Дре́во кре́стное пло́дъ принесѐ мі́рꙋ, ѡ҆живле́нїѧ присносꙋ́щнагѡ: є҆гѡ́же мы̀ вкꙋша́юще, ѿ сме́рти хрⷭ҇тѐ и҆збавлѧ́емсѧ.
Трⷪ҇ченъ: Трѝ є҆ди́нагѡ зра́ка ли́ца сла́влю, ѻ҆ц҃а̀, сн҃а, и҆ дх҃а є҆ди́нꙋ держа́вꙋ бж҃ества̀: ца́рствꙋющи бо и҆ є҆динонача́льствꙋетъ ꙗ҆́кѡ бг҃ъ.
И҆ ны́нѣ, бг҃оро́диченъ: Ржⷭ҇тво̀ твоѐ чⷭ҇таѧ, стра́шно є҆́сть: бг҃ъ бо є҆́сть вочл҃вѣ́чивыйсѧ, безлѣ́тнѡ ѿ ѻ҆ц҃а̀ рожде́йсѧ, и҆ и҆з̾ тебѐ въ послѣ̑днѧѧ без̾ мꙋ́жа роди́всѧ.
Сла́ва тебѣ̀ бж҃е на́шъ, сла́ва тебѣ̀.
Бл҃года́ть крⷭ҇та̀ предпросїѧ́вши мі́рꙋ къ бж҃е́ствєннымъ твои̑мъ страсте́мъ ще́дре, призыва́етъ всѧ̑ ны̀: и҆́мже вѣ́рнѡ поклони́тисѧ сподо́би.
І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.
Пѣ́снь и҃.
І҆рмо́съ: Нестерпи́момꙋ ѻ҆гню̀:
Крⷭ҇то́мъ нача̑ла побѣди́вый, и҆ вла̑сти тє́мныѧ, свѣтода́вче, є҆гда̀ прїи́деши со вла́стїю сꙋди́ти мі́рꙋ всемꙋ̀, да не моѧ̑ сло́ве ѡ҆б̾ѧви́ши та̑йнаѧ, да мно́гое твоѐ прославлѧ́ю бл҃гоꙋтро́бїе.
Сꙋди́мь сꙋдїѧ̀ пред̾ сꙋди́щемъ ста́лъ є҆сѝ, ѡ҆сꙋжда́ѧ враждꙋ̀ крⷭ҇то́мъ твои́мъ, долготерпѣли́ве правосꙋ́де. тѣ́мже ѡ҆сꙋжде́нїѧ вѣ́чнагѡ и҆зба́ви, стра́хомъ зовꙋ́щыѧ и҆ превозносѧ́щыѧ твоѐ чл҃вѣколю́бїе.
Поста̀ ѻ҆гне́мъ ѡ҆бостри́вшесѧ дѣ́ти бл҃гочести́вїи, возвыше́ный дре́вле пла́мень, бж҃е́ственною росо́ю ᲂу҆гаси́ша вои́стиннꙋ. и҆ мы̀ постѧ́щесѧ, пє́щи всѣ́хъ страсте́й ᲂу҆гаси́мъ, ꙗ҆́кѡ да гее́нскагѡ и҆збѣ́гнемъ пла́мене.
Бг҃оро́диченъ: И҆з̾ тебѐ бж҃їѧ мꙋ́дрость хра́мъ себѣ̀ созда́вши, воплоти́сѧ неизрече́ннымъ снизхожде́нїемъ, ѻ҆трокови́це неискꙋсобра́чнаѧ: ты́ бо є҆ди́на ѿ всѣ́хъ родѡ́въ и҆збра́нна є҆сѝ нетлѣ́ннаѧ, нетлѣ́ннагѡ въ жили́ще сло́ва.
И҆́ный. І҆рмо́съ: Въ кꙋпинѣ̀ мѡѷсе́ю:
Носѧ́й всѧ̑ сло́вомъ, менѐ ра́ди всѧ̑ терпи́ши, заꙋшє́нїѧ, и҆ ѡ҆плева̑нїѧ, и҆ распѧ́тїе хрⷭ҇тѐ: хвалю̀ вели̑чїѧ твоегѡ̀ чл҃вѣколю́бїѧ во всѧ̑ вѣ́ки.
Закала́ешисѧ хрⷭ҇тѐ ꙗ҆́кѡ а҆́гнецъ, прободе́нъ въ ре́бра твоѧ̑, да мѧ̀ ѻ҆вча̀ заблꙋ́ждшее сп҃се́ши ѿ сѣ́ти дїа́воли, и҆ до́брѣй твое́й ѡ҆гра́дѣ причте́ши во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Бж҃ество̀ є҆ди́но трⷪ҇це, нераздѣ́льное є҆стество̀, раздѣ́льно же ли́цы, присносꙋ́щнаѧ держа́во, ѻ҆́ч҃е, сн҃е, и҆ дш҃е ст҃ы́й, тѧ̀ пѣсносло́вимъ во всѧ̑ вѣ́ки.
Бг҃оро́диченъ: Бг҃ороди́тельнице чⷭ҇таѧ, нб҃снаѧ две́ре, сп҃си̑тельнаѧ врата̀, всѣ́хъ хрїстїа́нъ мольбꙋ̀ прїимѝ, тебѐ бл҃жа́щихъ во всѧ̑ вѣ́ки.
Сла́ва тебѣ̀ бж҃е на́шъ, сла́ва тебѣ̀.
Ѡ҆ крⷭ҇тѣ̀ твое́мъ хрⷭ҇тѐ, сщ҃е́нницы хва́лѧтсѧ, и҆́ноки ᲂу҆крѣплѧ́ютсѧ, всѧ́кїй просвѣща́етсѧ вѣ́рный: сподо́би мѧ̀ сего̀ ви́дѣти, и҆ поклони́тисѧ, и҆ пѣ́ти во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви, пою́ще и҆ превозносѧ́ще во всѧ̑ вѣ́ки.
І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Въ зако́нѣ сѣ́ни:
Ѕмі́ѧ мѡѷсе́й на дре́во возне́съ, ѡ҆бразова́ше тѧ̀ і҆и҃се на крⷭ҇тѣ̀ во́лею вознесе́на, и҆ лꙋка́вагѡ ꙗ҆дови́тꙋю ѕло́бꙋ и҆згна́вшаго, къ себѣ́ же человѣ́ки привле́кша, чл҃вѣколю́бче.
Ѻ҆гне́мъ мѧ̀ твоегѡ̀ стра́ха ѡ҆чи́сти, возжига́ѧ въ мое́й дꙋшѝ бж҃е́ственнꙋю твою̀ любо́вь, и҆ крⷭ҇то́мъ твои́мъ ѡ҆гради́ мѧ, є҆́же прельстѝ ве́тхїй запина́тель, сластьмѝ ѡ҆мрачи́въ моѐ хрⷭ҇тѐ помышле́нїе.
Скве́рныхъ помышле́нїй, и҆ дѣѧ́нїй ѕлы́хъ, пости́мсѧ бра́тїе, ѡ҆чи́стимъ сердца̀, впери́мсѧ бж҃е́ственными добродѣ́тельми, и҆ долѣре́вностныѧ ѕло́бы стремле́нїй ᲂу҆клони́мсѧ, да па́схꙋ вели́кꙋю свѣтоно́снїи ᲂу҆́зримъ.
Бг҃оро́диченъ: И҆з̾ тебѐ въ на́шꙋ нищетꙋ̀ дв҃о, хотѧ̀ ѡ҆блече́сѧ, бога́тый є҆стество́мъ, ви́димь же на́мъ бы́сть неви́димый вы́шними ли́ки пѣва́емый, сокрꙋше́нный ѡ҆́бразъ ѡ҆бновлѧ́ѧ бл҃госты́нею.
И҆́ный. І҆рмо́съ: Тебѐ мы́сленнꙋю:
Тебѐ на крⷭ҇тѣ̀ рꙋ́цѣ распросте́рша и҆ четвероконє́чнаѧ присво́ивша, и҆́мже ко ѻ҆ц҃ꙋ̀ ѡ҆брѣто́хомъ вхо́дъ, сн҃е бж҃їй, всѝ велича́емъ.
Тебѐ те́рнїемъ хрⷭ҇тѐ вѣнча́вше, беззако́ннїи бїѧ́хꙋ, и҆ распѧ́ша, є҆гѡ́же ра́ди поднебє́снаѧ колеба́шасѧ всѧ̑: мы́ же сп҃сшесѧ тѧ̀ велича́емъ.
Трⷪ҇ченъ: Тѧ̀ трисвѣ́тлое ст҃о́е бж҃ество̀, всѐ содержа́щее, и҆ хранѧ́щее при́снѡ, ѻ҆ц҃а̀, сн҃а же, и҆ дх҃а жива́го, пѣ́сньми немо́лчными велича́емъ.
Бг҃оро́диченъ: Тѧ̀ свѣ́тлый ѻ҆́блакъ дх҃а, и҆з̾ негѡ́же на́мъ возсїѧ̀ свѣ́тъ непристꙋ́пный, хрⷭ҇то́съ, пра́вды вели́кое сл҃нце, пѣ́сньми бцⷣе велича́емъ.
Сла́ва тебѣ̀ бж҃е на́шъ, сла́ва тебѣ̀.
Ты̀ на́мъ свѣ́тъ, ст҃о́е сложе́нїе, ѡ҆долѣ́нїе побѣ́ды, хрⷭ҇то́въ крⷭ҇те, ты̀ на́мъ воздержа́нїе ᲂу҆сладѝ, и҆ тебѣ̀ поклони́тисѧ сподо́би.
І҆рмо́съ: Тебѐ мы́сленнꙋю и҆ ѡ҆дꙋшевле́ннꙋю лѣ́вствицꙋ, на не́йже бг҃ъ на́шъ ᲂу҆тверди́сѧ, є҆́юже къ небесѝ ѡ҆брѣто́хомъ восхожде́нїе, пѣ́сньми бцⷣе велича́емъ.
Свѣти́ленъ гла́са.
На стїхо́внѣ самогла́сенъ днѐ, два́жды, гла́съ в҃:
Въ че́сти сы́й сыновства̀, ѻ҆ц҃а̀ бл҃га́гѡ несмы́сленный а҆́зъ не разꙋмѣ́хъ: но себѐ сла́вы лиши́хъ, бога́тство ѕлѣ̀ и҆жди́въ бл҃года́ти. недоста́точествꙋемь же бж҃е́ственныѧ пи́щи, ласка́тель бы́хъ скве́рномꙋ граждани́нꙋ, ѿ негѡ́же по́сланъ бы́хъ въ дꙋшетлѣ́нное є҆гѡ̀ село̀, живы́й блꙋ́днѡ, пасо́мь бы́хъ со скоты̀, и҆ сласте́мъ рабо́таѧ не насыща́хсѧ: но ѡ҆бра́щьсѧ вопїю̀ бл҃гоꙋтро́бномꙋ и҆ ще́дромꙋ ѻ҆ц҃ꙋ̀: на нб҃о и҆ пред̾ тобо́ю согрѣши́хъ, поми́лꙋй мѧ̀.
Мч҃нченъ: Ст҃ы́хъ твои́хъ мно́жєства мо́лѧтъ тѧ̀ хрⷭ҇тѐ, поми́лꙋй ны̀, ꙗ҆́кѡ чл҃вѣколю́бецъ.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Є҆гда̀ ѿ дре́ва:
Болѣ̑зни претерпѣ́вшаѧ мнѡ́гїѧ въ распѧ́тїи сн҃а и҆ бг҃а твоегѡ̀ пречⷭ҇таѧ, воздыха́ла є҆сѝ слезѧ́щи, и҆ вопїѧ́ла є҆сѝ го́рькѡ: ᲂу҆вы̀ мнѣ̀ ча́до сладча́йшее! непра́веднѡ ка́кѡ стра́ждеши, хотѧ́й и҆зба́вити сꙋ́щыѧ ѿ а҆да́ма земнорѡ́дныѧ; тѣ́мъ всест҃а́ѧ дв҃о, тѧ̀ мо́лимъ вѣ́рою, ми́лостива на́мъ сего̀ сотворѝ.
На ѕ҃-мъ часѣ̀ тропа́рь прⷪ҇ро́чества. Гла́съ и҃:
Соста́ва дѣ́лъ въ на́съ нѣ́сть гдⷭ҇и: ми́лостивъ є҆сѝ чл҃вѣколю́бче, дѣ́лъ рꙋ́къ твои́хъ не пре́зри безгрѣ́шне.
Прокі́менъ, ѱало́мъ м҃ѳ. Гла́съ д҃: Пожрѝ бг҃ови же́ртвꙋ хвалы̀, и҆ возда́ждь вы́шнемꙋ мл҃твы твоѧ̑. Сті́хъ: Бг҃ъ богѡ́въ гдⷭ҇ь глаго́ла, и҆ призва̀ зе́млю:
Прⷪ҇ро́чества и҆са́їина чте́нїе. [Глава̀ і҃, ст. в҃і-к҃]
Бꙋ́детъ, є҆гда̀ сконча́етъ гдⷭ҇ь всѧ̑ творѧ̀ въ горѣ̀ сїѡ́ни, во і҆ерꙋсали́мѣ, наведе́тъ на ᲂу҆́мъ вели́кїй, на кнѧ́зѧ а҆ссѷрі́йска, и҆ на высотꙋ̀ сла́вы ѻ҆́чїю є҆гѡ̀. Рече́ бо: крѣ́постїю рꙋкѝ моеѧ̀ сотворю̀, и҆ премꙋ́дростїю ра́зꙋма [моегѡ̀] ѿимꙋ̀ предѣ́лы ꙗ҆зы́кѡвъ, и҆ си́лꙋ и҆́хъ плѣню̀: И҆ сотрѧсꙋ̀ гра́ды населє́ныѧ, и҆ вселе́ннꙋю всю̀ ѡ҆б̾имꙋ̀ рꙋко́ю мое́ю ꙗ҆́кѡ гнѣздо̀, и҆ ꙗ҆́кѡ ѡ҆ста́влєнаѧ ꙗ҆́ица возмꙋ̀, и҆ нѣ́сть, и҆́же ᲂу҆бѣжи́тъ менѐ, и҆лѝ проти́вꙋ мнѣ̀ рече́тъ, и҆ ѿве́рзетъ ᲂу҆ста̀, и҆ глꙋми́тъ. Є҆да̀ просла́витсѧ сѣки́ра без̾ сѣкꙋ́щагѡ є҆́ю; и҆лѝ вознесе́тсѧ пила̀ без̾ влекꙋ́щагѡ ю҆̀; та́кожде а҆́ще кто̀ во́зметъ же́злъ, и҆лѝ дре́во: и҆ не та́кѡ. Но по́слетъ гдⷭ҇ь саваѡ́ѳъ на твою̀ че́сть безче́стїе, и҆ на твою̀ сла́вꙋ ѻ҆́гнь горѧ̀ возгори́тсѧ. И҆ бꙋ́детъ свѣ́тъ і҆и҃левъ во ѻ҆́гнь, и҆ ѡ҆свѧти́тъ є҆го̀ ѻ҆гне́мъ горѧ́щимъ, и҆ поѧ́стъ ꙗ҆́кѡ сѣ́но вещество̀. Въ то́й де́нь ᲂу҆га́снꙋтъ го́ры и҆ хо́лми, и҆ дꙋбра̑вы, и҆ поѧ́стъ ѿ дꙋшѝ да́же до пло́тей: и҆ бꙋ́детъ бѣжа́й, ꙗ҆́кѡ бѣжа́й ѿ пла́мене горѧ́ща. И҆ ѡ҆ста́вльшїисѧ ѿ ни́хъ бꙋ́дꙋтъ въ число̀, и҆ ѻ҆троча̀ ма́лое напи́шетъ ѧ҆̀. И҆ бꙋ́детъ въ то́й де́нь, не приложи́тсѧ къ томꙋ̀ ѡ҆ста́нокъ і҆и҃левъ, и҆ сп҃се́ннїи і҆а́кѡвли не бꙋ́дꙋтъ ктомꙋ̀ ᲂу҆пова́юще на ѡ҆би́дѣвшыѧ и҆́хъ: но бꙋ́дꙋтъ ᲂу҆пова́юще на бг҃а ст҃а́го і҆и҃лева и҆́стиною.
Прокі́менъ, ѱало́мъ н҃, гла́съ ѕ҃: Поми́лꙋй мѧ̀ бж҃е, по вели́цѣй млⷭ҇ти твое́й. Сті́хъ: Се́рдце чи́сто сози́жди во мнѣ̀ бж҃е.