Во вто́рникъ г҃-ѧ седми́цы ве́чера.
На Гдⷭ҇и воззва́хъ, поста́вимъ стїхѡ́въ ѕ҃. И҆ пое́мъ подо́бны трипѣ́снца г҃, и҆ мине́и г҃.
Подо́бенъ господи́на і҆ѡ́сифа. Гла́съ г҃:
Поста́виша три́десѧть сре́брєникъ:
Гдⷭ҇и, крⷭ҇то́мъ ᲂу҆би́вый льсти́ваго, ѿ пре́лести є҆гѡ̀ и҆зба́ви мѧ̀ согрѣша́ющаго, и҆ прельща́ема: и҆ посто́мъ ѡ҆чи́стивъ мѧ̀, да́ждь мѝ твоѧ̑ хотѣ̑нїѧ соверши́ти, ꙗ҆́кѡ да ви́ждꙋ влⷣко, ра́дꙋѧсѧ, чⷭ҇тны̑ѧ стрⷭ҇ти твоѧ̑.
Подо́бенъ:
Оу҆ѧзви́хсѧ сла́дости ѻ҆рꙋ́жїемъ, гдⷭ҇и, и҆ лю́тѣ ве́сь ᲂу҆мертви́хсѧ, и҆сцѣлѝ, и҆ ѡ҆живѝ смире́ннꙋю мою̀ дꙋ́шꙋ, копїе́мъ прободы́йсѧ влⷣко: и҆ ᲂу҆ѧ́звена стрѣло́ю врага̀, ꙗ҆́кѡ ще́дръ и҆сцѣлѝ, и҆ чⷭ҇тны́хъ твои́хъ страсте́й прича́стника мѧ̀ покажѝ.
И҆́на стїхи́ра господи́на ѳео́дѡра, гла́съ в҃.
Подо́бенъ: Да ра́спнетсѧ:
Поще́нїемъ гдⷭ҇и, дꙋ́шы просвѣти́вше, да сподо́бимсѧ неѡсꙋжде́ннѡ крⷭ҇тъ тво́й ви́дѣти въ ра́дости, и҆ поклони́тисѧ стра́хомъ и҆ любо́вїю: просвѣща́етъ бо то́й стрⷭ҇ти твоѧ̑ вѡ́льныѧ, ꙗ҆̀же бл҃говолѝ дости́гнꙋти на́мъ, ꙗ҆́кѡ чл҃вѣколю́бецъ.
И҆ въ мине́и г҃. Сла́ва, и҆ ны́нѣ, бг҃оро́диченъ.
Прокі́менъ, ѱало́мъ м҃з, гла́съ г҃: Ве́лїй гдⷭ҇ь, и҆ хва́ленъ ѕѣлѡ̀, во гра́дѣ бг҃а на́шегѡ. Сті́хъ: Во гра́дѣ гдⷭ҇а си́лъ, во гра́дѣ бг҃а на́шегѡ.
Бытїѧ̀ чте́нїе. [Глава̀ з҃ ст. а҃-є҃.]
Речѐ гдⷭ҇ь бг҃ъ къ нѡ́ю: вни́ди ты̀ и҆ ве́сь до́мъ тво́й въ ковче́гъ, ꙗ҆́кѡ тѧ̀ ви́дѣхъ пра́ведна предо мно́ю въ ро́дѣ се́мъ. Ѿ скотѡ́въ же чи́стыхъ введѝ къ себѣ̀ се́дмь се́дмь, мꙋ́жескїй по́лъ и҆ же́нскїй: ѿ скотѡ́въ же нечи́стыхъ два̀ два̀, мꙋ́жескїй по́лъ и҆ же́нскїй. И҆ ѿ пти́цъ нбⷭ҇ныхъ чи́стыхъ се́дмь се́дмь, мꙋ́жескїй по́лъ и҆ же́нскїй, и҆ ѿ всѣ́хъ пти́цъ нечи́стыхъ двѣ̀ двѣ̀, мꙋ́жескїй по́лъ и҆ же́нскїй, препита́ти сѣ́мѧ по все́й землѝ. Є҆ще́ бо дне́й се́дмь, а҆́зъ наведꙋ̀ до́ждь на зе́млю четы́редесѧть дне́й и҆ четы́редесѧть ноще́й: и҆ потреблю̀ всѧ́кое воста́нїе, є҆́же сотвори́хъ, ѿ лица̀ всеѧ̀ землѝ. И҆ сотворѝ нѡ́е всѧ̑ є҆ли̑ка заповѣ́да є҆мꙋ̀ гдⷭ҇ь бг҃ъ.
Прокі́менъ, ѱало́мъ м҃и, гла́съ в҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы.
При́тчей чте́нїе. [Глава̀ и҃, ст. л҃в-л҃ѕ. глава̀ ѳ҃, ст. а҃- а҃і.]
Сы́не, послꙋ́шай менѐ: и҆ бл҃же́ни, и҆̀же пꙋти̑ моѧ̑ сохранѧ́тъ. Оу҆слы́шите премꙋ́дрость, и҆ ᲂу҆мꙋдри́тесѧ, и҆ не ѿмещи́те. Бл҃же́нъ мꙋ́жъ, и҆́же послꙋ́шаетъ менѐ, и҆ человѣ́къ, и҆́же пꙋти̑ моѧ̑ сохрани́тъ, бдѧ́й при мои́хъ две́рехъ при́снѡ, соблюда́ѧй пра́ги мои́хъ вхо́дѡвъ: И҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Согрѣша́ющїи же въ мѧ̀, нече́ствꙋютъ на своѧ̑ дꙋ́шы: и҆ ненави́дѧщїи мѧ̀, лю́бѧтъ сме́рть. Премꙋ́рость созда̀ себѣ̀ до́мъ, и҆ ᲂу҆твердѝ столпѡ́въ се́дмь: закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀: И҆ тре́бꙋющымъ ᲂу҆ма̀, речѐ прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: да во вѣ́ки воцарите́сѧ: и҆ взыщи́те ра́зꙋма да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, поро́чна сотвори́тъ себѐ: [ѡ҆бличє́нїѧ бо нечести́вомꙋ ра̑ны є҆мꙋ̀]. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇нь, и҆ совѣ́тъ ст҃ы́хъ ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀ твоегѡ̀.
На стїхо́внѣ самогла́сенъ днѐ, два́жды. Гла́съ в҃:
Ѻ҆ц҃а̀ тѧ̀ созда́телѧ написа́ти дерза́ю гдⷭ҇и, живо́тное сы́й земноро́дное, твоегѡ̀ причаща́ѧсѧ ѡ҆́браза, а҆́ще и҆ сыно́вства погрѣши́хъ, блꙋ́днѡ пожи́въ, и҆ забве́нїемъ твои́хъ дарѡ́въ и҆жди́въ бога́тство. да не ᲂу҆́бѡ ѿрече́ши мѧ̀, твоемꙋ̀ бл҃говоли́вый сн҃ꙋ є҆диноро́дномꙋ, крⷭ҇тъ менѐ ра́ди пло́тїю и҆ сме́рть претерпѣ́ти: но ᲂу҆бл҃жи́въ присво́й къ себѣ̀ чл҃вѣколю́бче.
Мч҃нченъ: Ли́цы мч҃никъ проти́вишасѧ мꙋчи́телємъ, глаго́люще: мы̀ во́инствꙋемъ цр҃ю̀ си́лъ: а҆́ще и҆ ѻ҆гню̀ и҆ мꙋ́камъ преда́сте на́съ, не ѿмета́емсѧ трⷪ҇ческїѧ си́лы.
Сла́ва, и҆ ны́нѣ, крⷭ҇тобг҃оро́диченъ, гла́съ то́йже.
Подо́бенъ: Є҆гда̀ ѿ дре́ва:
Є҆гда̀ тѧ̀ беззако́ннїи лю́дїе, сп҃се, живота̀ всѣ́хъ на дре́вѣ ѡ҆бѣ́сиша, тогда̀ и҆ всечⷭ҇таѧ а҆́гница и҆ мт҃и твоѧ̀, предстоѧ́щи рыда́ше пла́чꙋщи: ча́до моѐ сладча́йшее, свѣ́те моє́ю ѻ҆́чїю, ᲂу҆вы̀ мнѣ̀, ка́кѡ посредѣ̀ ѕлодѣ́евъ къ дре́вꙋ пригвозди́тисѧ претерпѣ́лъ є҆сѝ, зе́млю повѣ́сивый на вода́хъ;