Во вто́рникъ г҃-ѧ седми́цы на ᲂу҆́трени,
трⷪ҇чны гла́са. По а҃-мъ стїхосло́вїи сѣда́льны ᲂу҆мили́тєльны ѻ҆смогла́сника. По в҃-мъ же стїхосло́вїи сѣда́ленъ господи́на і҆ѡ́сифа, гла́съ а҃.
Подо́бенъ: Ка́мени запеча́танꙋ:
Посто́мъ и҆ моле́нїемъ себѐ ѡ҆чи́стимъ, и҆ ѡ҆ ᲂу҆бо́гихъ промышле́нїемъ бг҃ꙋ ᲂу҆годи́мъ. воздо́хнемъ, воспла́чемсѧ те́плѣ, ꙗ҆́кѡ и҆́мамы вре́мѧ ѡ҆браще́нїѧ: да пла́ча вѣ́чнагѡ сꙋ́щагѡ въ пла́мени гее́нны и҆зба́вимсѧ, сла́вꙋ возсыла́юще хрⷭ҇тꙋ̀, покаѧ́нїе ѡ҆предѣли́вшемꙋ человѣ́кѡмъ всѣ̑мъ, ѡ҆браща́ющымсѧ мы́сли пра́востїю. [Два́жды.]
Бг҃оро́диченъ: Рꙋ́цѣ твоѝ бж҃е́ственнїи, и҆́миже содѣ́телѧ носи́ла є҆сѝ дв҃о прест҃а́ѧ, воплоще́нна бж҃ество́мъ, просте́рши ᲂу҆молѝ, и҆зба́витисѧ на́мъ ѿ и҆скꙋше́нїй, и҆ страсте́й, и҆ бѣ́дъ, восхвалѧ́ющымъ тѧ̀ любо́вїю и҆ вопїю́щымъ тебѣ̀: сла́ва все́льшемꙋсѧ въ тѧ̀, сла́ва проше́дшемꙋ и҆з̾ тебѐ, сла́ва свободи́вшемꙋ на́съ ржⷭ҇тво́мъ твои́мъ.
По г҃-мъ стїхосло́вїи сѣда́ленъ господи́на ѳео́дѡра, гла́съ г҃.
Подо́бенъ: Да веселѧ́тсѧ:
Посто́мъ веселѧ́щесѧ, пѣ́сньми ра́дꙋющесѧ, и҆ мл҃твами держа́вꙋ на всѧ̑ стра̑сти ѡ҆бносѧ́ще, попере́мъ ловлє́нїѧ велїа́рѡва, возопїи́мъ хрⷭ҇тꙋ̀ послѣ́дꙋюще: крⷭ҇тъ тво́й ви́дѣти сподо́би на́съ, ꙗ҆́кѡ ще́дръ, подаѧ̀ на́мъ ве́лїю млⷭ҇ть. [Два́жды.]
Бг҃оро́диченъ: Подо́бенъ: Красотѣ̀ дѣ́вства:
Бг҃обл҃же́ннаѧ мт҃и безневѣ́стнаѧ, болѣ́знꙋющꙋю мою̀ дꙋ́шꙋ ᲂу҆врачꙋ́й, ꙗ҆́кѡ содержи́мь є҆́смь лю́тѣ прегрѣше́ньми бцⷣе. ѿѻнꙋ́дꙋже и҆ взыва́ю тѝ воздыха́нїемъ се́рдца моегѡ̀: прїимѝ мѧ̀ всенепоро́чнаѧ, многосогрѣши́вшаго, да дерзнове́нїемъ вопїю̀ тѝ: ра́дꙋйсѧ бж҃їе жили́ще.
Канѡ́нъ въ мине́и, и҆ настоѧ́щїй трипѣ́снецъ, господи́на і҆ѡ́сифа.
И҆ стїхосло́витсѧ пѣ́снь. Гла́съ а҃.
Пѣ́снь в҃.
І҆рмо́съ: Ви́дите ви́дите, ꙗ҆́кѡ бг҃ъ а҆́зъ є҆́смь, порабощє́ныѧ лю́ди і҆и҃лєвы, мѡѷсе́ю народоводи́ти въ пꙋсты́ни повелѣ́вый, и҆ сп҃сы́й ꙗ҆́кѡ си́ленъ вла́стїю мое́ю.
Присво́илъ мѧ̀ є҆сѝ ба́нею креще́нїѧ, пребл҃гі́й ѻ҆́ч҃е, бога́тствомъ всѧ́кимъ ᲂу҆краси́въ до́брыхъ: но порабо́тахъ хотѧ̀ неплѡ́днымъ помыслѡ́мъ, тѣ́мже ѡ҆бнища́хъ.
Млⷭ҇тивъ, млⷭ҇тивъ, млⷭ҇тивъ бꙋ́ди мѝ гдⷭ҇и, сꙋдѝ сꙋ́дъ мо́й мнѣ̀, пра́ведный сꙋдїѐ, ма́лое моѐ воздыха́нїе за млⷭ҇ть ве́лїю прїе́мъ хрⷭ҇тѐ, и҆ не пре́зри менѐ.
Совле́кшесѧ скве́рныѧ ѻ҆де́жды невоздержа́нїѧ, ѡ҆блече́мсѧ въ свѣ́тлꙋю ри́зꙋ воздержа́нїѧ, и҆ свѣ́тли бы́вше, свѣ́тлое и҆зба́вителѧ дости́гнемъ воста́нїе.
Бг҃оро́диченъ: Сп҃сѝ мѧ̀, сп҃сѝ мѧ̀ сп҃са ро́ждшаѧ: ви́ждь ско́рбь мою̀ чⷭ҇таѧ, ю҆́же мно́жество безмѣ́рныхъ мои́хъ ѕѡ́лъ притворѧ́етъ по всѧ̑ дни̑, ѻ҆каѧ́ннѣй мое́й дꙋшѝ, ѿ неча́ѧнїѧ.
И҆́ный господи́на ѳео́дѡра, гла́съ г҃.
І҆рмо́съ: Ви́дите ви́дите:
Ви́дите ви́дите, ꙗ҆́кѡ а҆́зъ є҆́смь, сп҃се́нїе ва́мъ и҆сточи́вый, ꙗ҆́кѡ бг҃ъ, є҆́же воздержа́нїемъ всѝ земні́и почерпи́те.
Ви́дите ви́дите, ꙗ҆́кѡ а҆́зъ є҆́смь, вре́мѧ ѡ҆предѣли́вый сщ҃е́нное, ст҃о́е ва́мъ, во ᲂу҆чрежде́нїе дꙋше́вное, поста̀ по́прище.
Сла́ва: Трⷪ҇цꙋ просла́вимъ, є҆ди́ницѣ поклони́мсѧ, безнача́льномꙋ безнача́льнагѡ ѻ҆ц҃а̀ сн҃ꙋ є҆диноро́дномꙋ, дх҃ꙋ сопресто́льномꙋ, и҆ ѻ҆ц҃ꙋ̀ соприсносꙋ́щномꙋ.
Бг҃оро́диченъ: Молѝ непреста́ннѡ сп҃са всенепоро́чнаѧ, тѧ̀ бг҃ꙋ ᲂу҆сты̀ и҆ дꙋше́ю и҆сповѣ́дающымъ, ѿ всѧ́кагѡ ѡ҆бстоѧ́нїѧ и҆зба́витисѧ.
Сла́ва тебѣ̀ бж҃е на́шъ, сла́ва тебѣ̀.
Ве́лїй є҆сѝ гдⷭ҇и и҆ чꙋ̑дна дѣла̀ твоѧ̑, ꙗ҆́кѡ въ ро́вѣ неснѣде́на показа́лъ є҆сѝ и҆ногда̀ данїи́ла ѿ львѡ́въ, посто́мъ ѡ҆гражда́ема.
І҆рмо́съ: Ви́дите ви́дите, ꙗ҆́кѡ а҆́зъ є҆́смь сп҃съ мі́ра, свѣ́тъ и҆́стинный, и҆сто́чникъ жи́зни, сн҃ъ бж҃їй.
Пѣ́снь и҃.
І҆рмо́съ: Є҆гѡ́же ᲂу҆жаса́ютсѧ:
Пла́чꙋ и҆ рыда́ю, ча́съ помышлѧ́ѧ, во́ньже и҆́мамъ предста́ти престо́лꙋ стра́шномꙋ, мꙋче́нїємъ пови́ненъ мно́гихъ мои́хъ ѕѡ́лъ, ꙗ҆̀же въ невѣ́дѣнїи сотвори́хъ, и҆ ра́зꙋмѣ.
Мѡѷсе́й ѡ҆чисти́лище по́стъ ѡ҆брѣ́тъ, бг҃а разꙋмѣ̀ є҆ди́наго чи́стаго: дꙋшѐ моѧ̀ посто́мъ ѡ҆чи́стисѧ, да прибли́жишисѧ бг҃ꙋ чл҃вѣколю́бцꙋ.
По́стъ возлю́бимъ, ма́терь добродѣ́телей: пи́щꙋ возненави́димъ, роди́тельницꙋ страсте́й, и҆ воззове́мъ: ѻ҆́ч҃е, и҆́же на нб҃сѣ́хъ, сп҃сѝ на́съ, сп҃сѝ мл҃твами ст҃ы́хъ твои́хъ.
Бг҃оро́диченъ: Сꙋдїю̀, є҆го́же родила̀ є҆сѝ дв҃о марїа́мъ, ᲂу҆молѝ въ ча́съ мѧ̀ сꙋда̀ ᲂу҆ще́дрити чⷭ҇таѧ, и҆ сп҃стѝ ѡ҆сꙋжде́ннаго, є҆ди́на предста́тельнице ро́дꙋ человѣ́ческомꙋ.
И҆́ный. І҆рмо́съ: Въ пла́мень ко ѻ҆трокѡ́мъ:
Постѡ́въ пресвѣ́тлꙋю бл҃года́ть прїе́мше, добродѣ́тельми ѡ҆блиста́имсѧ, ти̑хаѧ ли́ца, ти̑хїѧ и҆ ѻ҆бы́чаи показꙋ́юще, дꙋше́внагѡ ᲂу҆строе́нїѧ.
Пости́всѧ є҆лїссе́й, ѻ҆́трока сѡмані́тїдѣ подадѐ жи́ва. ѡ҆ се́мъ разꙋмѣ́имъ бра́тїе, по́стъ ко́ль до́бръ, ко́ль вели́къ, ко́ль бг҃одарова́ннаѧ бл҃года́ть.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Со ѻ҆ц҃е́мъ сн҃ꙋ поклони́мсѧ, и҆ дх҃ꙋ ст҃о́мꙋ въ трⷪ҇цѣ є҆ди́нѣй, со а҆́гг҃лы зовꙋ́ще бре́нными ᲂу҆сты̀: сла́ва въ вы́шнихъ бг҃ꙋ, и҆́же въ трⷪ҇цѣ.
Бг҃оро́диченъ: Ѻ҆троча̀ ражда́еши, дѣ́вствꙋющи є҆ди́на бг҃ора́дованнаѧ, та́йна вели́каѧ, ᲂу҆жа́сное чꙋ́до: бг҃а бо родила̀ є҆сѝ воплоще́нна, сп҃са мі́рꙋ.
Сла́ва тебѣ̀ бж҃е на́шъ, сла́ва тебѣ̀.
Да никто́же на́съ ᲂу҆ны́нїемъ и҆ лѣ́ностїю ѡ҆бложи́тсѧ, ѽ бра́тїе! вре́мѧ дѣ́ланїѧ, ча́съ торжества̀: кто̀ премꙋ́дръ ᲂу҆́бѡ во є҆ди́нъ де́нь прїѡбрѣстѝ всѧ̑ вѣ́ки;
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго, бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Свѣтоно́сный ѻ҆́блакъ:
Въ грѣхо́внꙋю пꙋчи́нꙋ, во ѿча́ѧнїѧ глꙋбинꙋ̀, въ треволнє́нїѧ помышле́нїй, и҆ страсте́й бꙋ́ри впа́дъ вопїю̀: млⷭ҇ти бе́здно, помозѝ мѝ, и҆ твои́мъ бл҃гоꙋтро́бїемъ ѡ҆дождѝ мѝ ѡ҆чище́нїе грѣхѡ́въ.
Поще́нїемъ тѣ́ло, воздержа́нїемъ дꙋ́хъ, слеза́ми дꙋ́шꙋ ѡ҆чи́стимъ вѣ́рнїи, и҆ чи́сти чи́стагѡ свѣ́тлѡ ᲂу҆срѧ́щемъ, зрѧ́ще сп҃си́тєльныѧ стрⷭ҇ти, ꙗ҆̀же претерпѣ̀ на́съ ра́ди и҆зба́витель.
Ꙗ҆́кѡ мыта́рь стеню̀, ꙗ҆́коже блꙋдни́ца слезю̀, ꙗ҆́кѡ разбо́йникъ вопїю̀: помѧнѝ мѧ̀ ще́дре, ꙗ҆́кѡ слѣпы́й зовꙋ̀ тѝ: сн҃е бж҃їй, ѿве́рзи ѻ҆́чи дꙋшѝ моеѧ̀, ѡ҆слѣплє́нныѧ ѕло́бою льсти́вагѡ запина́телѧ.
Бг҃оро́диченъ: Несѣко́мꙋю го́рꙋ, непроходи́мꙋю две́рь, вы́шшꙋю нб҃сѐ и҆ тва́ри всеѧ̀, добро́тꙋ і҆а́кѡвлю, рꙋ́чкꙋ всезлатꙋ́ю, и҆ мо́стъ, и҆ мт҃рь зижди́телѧ, дв҃ꙋ ᲂу҆бл҃жи́мъ вѣ́рнїи.
И҆́ный. І҆рмо́съ: На сїна́йстѣй горѣ̀:
Настоѧ́щыѧ дни̑ поразꙋмѣ́вше, па́че всѣ́хъ сщ҃е́нныхъ, мл҃твы бг҃ꙋ возсле́мъ, со́вѣстїю чи́стою, ча́стѡ прекланѧ́юще колѣ̑на, и҆ глаго́люще: гдⷭ҇и, прїимѝ молє́нїѧ и҆ мл҃твы рабѡ́въ твои́хъ при́снѡ.
Лю́дїе сѣдо́ша, ꙗ҆́коже пи́шетсѧ, ꙗ҆́сти же и҆ пи́ти, и҆ воста́ша и҆гра́ти, слꙋжа́ще и҆стꙋка́нномꙋ веельфегѡ́рꙋ: ви́ждь ѡ҆б̾ѧде́нїѧ лю̑тыѧ вѡ́лны. мы́ же пости́мсѧ, и҆ просла́вимсѧ, ꙗ҆́кѡ вели́кїй мѡѷсе́й.
Сла́ва: Сꙋщество́мъ є҆ди́ница є҆́сть несѣко́ма, пребж҃е́ственнаѧ трⷪ҇ца, соединѧ́ема є҆стество́мъ, дѣли́тсѧ ли́цы сво́йственнѡ: несѣко́ма бо сѣче́тсѧ, є҆ди́но сꙋ́щи трои́тсѧ: сїѧ̀ ѻ҆ц҃ъ є҆́сть, сн҃ъ, и҆ дх҃ъ живы́й соблюда́ющаѧ всѐ.
И҆ ны́нѣ: Ѻ҆трокороди́тельницꙋ дв҃ꙋ кто̀ слы́ша, и҆ мт҃рь без̾ мꙋ́жа; мр҃і́е соверша́еши чꙋ́до: но скажи́ ми, ка́кѡ, не и҆спытꙋ́й глꙋбины̀ бг҃орожде́нїѧ моегѡ̀, сїѐ всеи́стинное па́че человѣ́ческагѡ ᲂу҆ма̀ постиже́нїе.
Сла́ва тебѣ̀ бж҃е на́шъ, сла́ва тебѣ̀.
Ꙗ҆́кѡ тво́й гнѣ́въ нестерпи́мый на грѣ́шники, кто̀ про́чее стерпи́тъ гдⷭ҇и, ѿ сегѡ̀ преще́нїѧ; безмѣ́рнꙋю и҆мѣ́ѧй млⷭ҇ть, сп҃сѝ мѧ̀ бл҃гоꙋтро́бїемъ твои́мъ не по дѣлѡ́мъ мои̑мъ мнѡ́гимъ и҆ лю̑тымъ.
І҆рмо́съ: На сїна́йстѣй горѣ̀, ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ, данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова.
Свѣти́ленъ гла́са.
На стїхо́внѣ самогла́сенъ днѐ, два́жды. Гла́съ з҃:
Согрѣши́хъ, и҆сповѣ́даюсѧ тебѣ̀ гдⷭ҇и, блꙋ́дный а҆́зъ, не смѣ́ю на нб҃о воззрѣ́ти ѻ҆чи́ма, ѿтꙋ́дꙋ бо ѿпа́дъ, бы́хъ ѻ҆каѧ́ненъ: согрѣши́хъ на нб҃о и҆ пред̾ тобо́ю, и҆ нѣ́смь досто́инъ нарещи́сѧ сы́нъ тво́й, самого̀ себѐ ѿрица́ю, не тре́бꙋю ѡ҆глаго́льникѡвъ, нижѐ па́ки свидѣ́телей: и҆́мамъ ѡ҆блича́ющїй мѧ̀ блꙋ́дъ, и҆́мамъ ѡ҆блича́ющее ѕло́е житїѐ, и҆́мамъ посрамлѧ́ющꙋю ѡ҆держа́щꙋю мою̀ наготꙋ̀, къ срамотѣ́ же рꙋ̑бы, и҆́миже ѡ҆дѣ́ѧнъ є҆́смь. бл҃гоꙋтро́бне ѻ҆́ч҃е, сн҃е є҆диноро́дный, дш҃е ст҃ы́й, ка́ющасѧ мѧ̀ прїимѝ, и҆ поми́лꙋй мѧ̀.
Мч҃нченъ: Посредѣ̀ сꙋди́ща законопрестꙋ̑пникъ, ра́дꙋющесѧ вопїѧ́хꙋ страстоте́рпцы твоѝ: гдⷭ҇и сла́ва тебѣ̀.
Сла́ва, и҆ ны́нѣ, бг҃оро́диченъ.
Подо́бенъ:
Роди́лсѧ є҆сѝ ѿ дв҃ы несказа́ннѡ хрⷭ҇тѐ, и҆ просвѣти́лъ є҆сѝ сꙋ́щыѧ во тьмѣ̀, вопїю́щыѧ: гдⷭ҇и сла́ва тебѣ̀.
На ѕ҃-мъ часѣ̀ тропа́рь прⷪ҇ро́чества, гла́съ з҃:
Сп҃се́нїе на́ше є҆сѝ гдⷭ҇и, и҆ защи́титель въ де́нь печа́ли, поми́лꙋй на́съ по вели́цѣй млⷭ҇ти твое́й чл҃вѣколю́бче.
Прокі́менъ, ѱало́мъ м҃є, гла́съ д҃: Гдⷭ҇ь си́лъ съ на́ми, застꙋ́пникъ на́шъ бг҃ъ і҆а́кѡвль. Сті́хъ: Бг҃ъ на́мъ прибѣ́жище и҆ си́ла.
Прⷪ҇ро́чества и҆са́їина чте́нїе. [Глава̀ ѳ҃, ст. ѳ҃- к҃а. глава̀ і҃, ст. а҃-д҃.]
Та́кѡ глаго́летъ гдⷭ҇ь: ᲂу҆разꙋмѣ́ютъ всѝ лю́дїе є҆фре́мѡвы, и҆ живꙋ́щїи въ самарі́и, въ досажде́нїи и҆ высо́комъ се́рдцѣ глаго́люще: Плі̑нѳы падо́ша, но прїиди́те, и҆зсѣче́мъ ка́менїе, и҆ посѣче́мъ черни́чїе и҆ ке́дры, и҆ сози́ждемъ себѣ̀ сто́лпъ. И҆ разрꙋши́тъ бг҃ъ востаю́щыѧ на го́рꙋ сїѡ́ню, и҆ врагѝ є҆гѡ̀ разсы́плетъ: Сѷрі́ю ѿ востѡ́къ со́лнца, и҆ є҆́ллины ѿ за́пада со́лнца, поѧда́ющыѧ і҆и҃лѧ всѣ́ми ᲂу҆сты̀, во всѣ́хъ си́хъ не ѿврати́сѧ ꙗ҆́рость є҆гѡ̀, но є҆щѐ рꙋка̀ є҆гѡ̀ высока̀. И҆ лю́дїе не ѡ҆брати́шасѧ, до́ндеже ꙗ҆́звени бы́ша, и҆ гдⷭ҇а не взыска́ша. И҆ ѿѧ́тъ гдⷭ҇ь ѿ і҆и҃лѧ главꙋ̀ и҆ ѻ҆́шибъ, вели́ка и҆ ма́ла, во є҆ди́нъ де́нь: Ста́рца, и҆ чꙋдѧ́щихсѧ ли́цамъ, сїѐ нача́ло: и҆ прⷪ҇ро́ка ᲂу҆ча́ща беззакѡ́ннаѧ, се́й ѻ҆́шибъ. И҆ бꙋ́дꙋтъ блажа́щїи люде́й си́хъ льстѧ́ще, и҆ льстѧ́тъ, ꙗ҆́кѡ да поглотѧ́тъ ѧ҆̀. Сегѡ̀ ра́ди ѡ҆ ю҆́ношахъ и҆́хъ не возвесели́тсѧ гдⷭ҇ь, и҆ сиро́тъ и҆́хъ, и҆ вдови́цъ и҆́хъ не поми́лꙋетъ: ꙗ҆́кѡ всѝ беззако́ннїи и҆ лꙋка́вїи, и҆ всѧ̑каѧ ᲂу҆ста̀ глаго́лютъ непра́вдꙋ. во всѣ́хъ си́хъ не ѿврати́сѧ ꙗ҆́рость є҆гѡ̀, но є҆щѐ рꙋка̀ є҆гѡ̀ высока̀. И҆ разгори́тсѧ ꙗ҆́кѡ ѻ҆́гнь беззако́нїе, и҆ ꙗ҆́кѡ тро́скотъ сꙋхі́й поѧде́нъ бꙋ́детъ ѻ҆гне́мъ: и҆ разгори́тсѧ въ ча́щахъ дꙋбра́вныхъ, и҆ поѧ́стъ, ꙗ҆̀же ѻ҆́крестъ холмѡ́въ всѧ̑. За ꙗ҆́рость гнѣ́ва гдⷭ҇нѧ сгорѣ̀ всѧ̀ землѧ̀, и҆ бꙋ́дꙋтъ лю́дїе, ꙗ҆́кѡ ѻ҆гне́мъ пожже́ни: человѣ́къ бра́та своегѡ̀ не поми́лꙋетъ. Но ᲂу҆клони́тсѧ на де́сно, ꙗ҆́кѡ вза́лчетъ, и҆ снѣ́сть ѿ шꙋ́їихъ, и҆ не насы́титсѧ человѣ́къ ꙗ҆ды́й плѡ́ти мы́шцы своеѧ̀: снѣ́сть бо манассі́й є҆фре́мово, и҆ є҆фре́мъ манассі́ино, ꙗ҆́кѡ вкꙋ́пѣ повою́ютъ і҆ꙋ́дꙋ. Во всѣ́хъ си́хъ не ѿврати́сѧ ꙗ҆́рость [є҆гѡ̀] но є҆щѐ рꙋка̀ є҆гѡ̀ высока̀. Го́ре пи́шꙋщымъ лꙋка́вство: пи́шꙋщїи бо, лꙋка́вство пи́шꙋтъ: Оу҆клонѧ́юще сꙋ́дъ ᲂу҆бо́гихъ, восхища́юще сꙋ́дъ ни́щихъ люде́й мои́хъ, ꙗ҆́кѡ бы́ти и҆̀мъ вдови́цѣ въ расхище́нїе, и҆ сиротѣ̀ въ разграбле́нїе. И҆ что̀ сотворѧ́тъ въ де́нь посѣще́нїѧ; ско́рбь бо ва́мъ ѿдале́че прїи́детъ, и҆ къ комꙋ̀ прибѣ́гнете, да помо́жетъ ва́мъ; и҆ гдѣ̀ ѡ҆ста́вите сла́вꙋ ва́шꙋ, Є҆́же не впа́сти въ плѣне́нїе; и҆ под̾ ᲂу҆бїе́нными падꙋ́тъ: и҆ во всѣ́хъ си́хъ не ѿврати́сѧ гнѣ́въ є҆гѡ̀, но є҆щѐ рꙋка̀ є҆гѡ̀ высока̀.
Прокі́менъ, ѱало́мъ м҃ѕ, гла́съ г҃: По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми: