Въ понедѣ́льникъ г҃-ѧ седми́цы ве́чера.

На Гдⷭ҇и воззва́хъ поста́вимъ стїхѡ́въ ѕ҃, и҆ пое́мъ настоѧ́щыѧ подѡ́бны трипѣ́снца: и҆ мине́и г҃.

Стїхи̑ры подѡ́бны господи́на і҆ѡ́сифа. Гла́съ а҃.

Подо́бенъ: Всехва́льнїи мч҃ницы:

По́стъ возлю́бимъ, дꙋшѝ стра̑сти лютѣ́йшыѧ дѣ́йствомъ дх҃а ᲂу҆вѧда́ющїй, и҆ бж҃е́ствєннаѧ дѣѧ̑нїѧ дѣ́ѧти ᲂу҆крѣплѧ́ющїй, и҆ ᲂу҆́мъ на нб҃о возсыла́ющїй, и҆ проще́нїе хода́тайствꙋющїй, ѡ҆ ни́хже согрѣши́хомъ, да́рꙋемое ѿ бг҃а ще́драгѡ.

Подо́бенъ:

Всѐ житїѐ моѐ стꙋ́днѡ и҆жди́въ гдⷭ҇и, со блꙋдни́цами ѻ҆каѧ́нный, ꙗ҆́коже блꙋ́дный ᲂу҆миле́нїемъ зовꙋ̀: ѻ҆́ч҃е нбⷭ҇ный, согрѣши́хъ, ѡ҆чи́сти и҆ сп҃си́ мѧ, и҆ не ѿри́ни менѐ самогѡ̀ ѿ тебѐ ᲂу҆дали́вшасѧ, и҆ бж҃е́ственными дѣ́лы ны́нѣ ѡ҆бнища́вшагѡ.

И҆́на стїхи́ра подо́бна господи́на ѳео́дѡра, гла́съ г҃: Прїиди́те всѝ:

Прїиди́те всѝ въ кѷмва́лѣхъ ѱало́мскихъ, честно́е воздержа́нїе цѣлꙋ́юще, возгласи́мъ: въ не́мъ бо мы́сленнѡ ѕмі́ѧ ѕлонача́льнаго расто́ргнемъ. тѣ́мже со дерзнове́нїемъ возопїи́мъ хрⷭ҇тꙋ̀: пода́ждь сп҃се неѡсꙋжде́ннѡ всест҃ы́й тво́й крⷭ҇тъ ви́дѣти, и҆ поклони́тисѧ, во ѱалмѣ́хъ и҆ пѣ́нїихъ пра́здновати свѣ́тлѡ.

И҆ мине́и г҃. Сла́ва и҆ ны́нѣ, бг҃оро́диченъ:

Прокі́менъ, ѱало́мъ м҃г, гла́съ д҃: Ѡ҆ бз҃ѣ похва́лимсѧ ве́сь де́нь, и҆ ѡ҆ и҆́мени твое́мъ и҆сповѣ́мысѧ во вѣ́къ. Сті́хъ: Бж҃е, ᲂу҆ши́ма на́шима ᲂу҆слы́шахомъ:

Бытїѧ̀ чте́нїе. [Глава̀ ѕ҃, ст. ѳ҃-к҃в.]

Нѡ́е человѣ́къ пра́веденъ, соверше́нъ сы́й въ ро́дѣ свое́мъ, бг҃ꙋ ᲂу҆годѝ нѡ́е. Роди́ же нѡ́е трѝ сы́ны, си́ма, ха́ма, і҆а́феѳа. Растлѣ́сѧ же землѧ̀ пред̾ бг҃омъ, и҆ напо́лнисѧ землѧ̀ непра́вды. И҆ ви́дѣ гдⷭ҇ь бг҃ъ зе́млю, и҆ бѣ̀ растлѣ́нна: ꙗ҆́кѡ растлѝ всѧ́ка пло́ть пꙋ́ть сво́й на землѝ: И҆ речѐ гдⷭ҇ь бг҃ъ нѡ́ю: вре́мѧ всѧ́кагѡ человѣ́ка прїи́де пред̾ мѧ̀, ꙗ҆́кѡ и҆спо́лнисѧ землѧ̀ непра́вды ѿ ни́хъ: и҆ сѐ а҆́зъ погꙋблю̀ и҆́хъ и҆ зе́млю. Сотворѝ ᲂу҆̀бо себѣ̀ ковче́гъ ѿ дре́въ [негнїю́щихъ] четвероꙋго́льныхъ: гнѣ́зда сотвори́ши въ ковче́зѣ, и҆ посмоли́ши є҆го̀ внꙋтрьꙋ́дꙋ и҆ внѣꙋ́дꙋ смоло́ю. И҆ та́кѡ сотвори́ши ковче́гъ: тре́хъ сѡ́тъ лакте́й долгота̀ ковче́га, и҆ пѧти́десѧти лакте́й широта̀, и҆ три́десѧти лакте́й высота̀ є҆гѡ̀. Собира́ѧ сво́домъ сотвори́ши ковче́гъ, и҆ въ ла́коть сверши́ши є҆го̀ свы́ше: две́рь же ковче́га сотвори́ши ѿ страны̀: ѡ҆бита̑лища двокрѡ́вна и҆ трекрѡ́вна сотвори́ши въ не́мъ. А҆́зъ же сѐ наведꙋ̀ пото́пъ, во́дꙋ на зе́млю, погꙋби́ти всѧ́кꙋ пло́ть, въ не́йже є҆́сть дꙋ́хъ жи́зни под̾ нб҃се́мъ: и҆ є҆ли̑ка сꙋ́ть на землѝ, сконча́ютсѧ. И҆ поста́влю завѣ́тъ мо́й съ тобо́ю: вни́деши же въ ковче́гъ ты̀, и҆ сы́нове твоѝ, и҆ жена̀ твоѧ̀ и҆ жєны̀ сынѡ́въ твои́хъ съ тобо́ю. И҆ ѿ всѣ́хъ скотѡ́въ, и҆ ѿ всѣ́хъ га̑дъ, и҆ ѿ всѣ́хъ ѕвѣре́й, и҆ ѿ всѧ́кїѧ пло́ти, два̀ два̀ ѿ всѣ́хъ введе́ши въ ковче́гъ, да пита́еши съ собо́ю: мꙋ́жескїй по́лъ и҆ же́нскїй бꙋ́дꙋтъ. Ѿ всѣ́хъ пти́цъ перна́тыхъ по ро́дꙋ, и҆ ѿ всѣ́хъ скотѡ́въ по ро́дꙋ, и҆ ѿ всѣ́хъ гадѡ́въ по́лзающихъ по землѝ по ро́дꙋ и҆́хъ, два̀ два̀ ѿ всѣ́хъ вни́дꙋтъ къ тебѣ̀, пита́тисѧ съ тобо́ю, мꙋ́жескїй по́лъ и҆ же́нскїй. Ты́ же возмѝ себѣ̀ ѿ всѣ́хъ бра́шенъ, ꙗ҆̀же и҆́мате ꙗ҆́сти, и҆ собере́ши къ себѣ̀, и҆ бꙋ́дꙋтъ тебѣ̀ и҆ ѻ҆́нымъ бра́шно. И҆ сотворѝ нѡ́е всѧ̑, є҆ли̑ка заповѣ́да є҆мꙋ̀ гдⷭ҇ь бг҃ъ, та́кѡ сотворѝ.

Прокі́менъ, ѱало́мъ м҃д, гла́съ ѕ҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Ѿры́гнꙋ се́рдце моѐ сло́во бла́го:

При́тчей чте́нїе. [Глава̀ и҃, ст. а҃-к҃а]

Сы́не, ты̀ премꙋ́дрость проповѣ́ждь, да ра́зꙋмъ послꙋ́шаетъ тебѐ. На высо́кихъ бо крае́хъ є҆́сть, посредѣ́ же сте́зь стои́тъ: При вратѣ́хъ бо си́льныхъ присѣди́тъ, во вхо́дѣхъ же пое́тсѧ. Ва́съ ѽ человѣ́цы, молю̀, и҆ вдаю̀ мо́й гла́съ сынѡ́мъ человѣ́чєскимъ. Оу҆разꙋмѣ́йте неѕло́бивїи кова́рство, ненака́заннїи же приложи́те се́рдце. Послꙋ́шайте менѐ: честна̑ѧ бо рекꙋ̀, и҆ и҆знесꙋ̀ ѿ ᲂу҆сте́нъ пра̑ваѧ. Ꙗ҆́кѡ и҆́стинѣ поꙋчи́тсѧ горта́нь мо́й, ме́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ, ничто́же въ ни́хъ стро́потно, нижѐ развраще́нно: Всѧ̑ пра̑ва разꙋмѣва́ющымъ, и҆ пра̑ва ѡ҆брѣта́ющымъ ра́зꙋмъ. Прїими́те наказа́нїе, а҆ не сребро̀, и҆ ра́зꙋмъ па́че зла́та и҆скꙋше́на: и҆збира́йте же вѣ́дѣнїе па́че зла́та чи́ста. Лꙋ́чше бо премꙋ́дрость ка́менїй многоцѣ́нныхъ, всѧ́кое же честно́е недосто́йно є҆ѧ̀ є҆́сть. А҆́зъ премꙋ́дрость всели́хъ совѣ́тъ и҆ ра́зꙋмъ, и҆ смы́слъ а҆́зъ призва́хъ. Стра́хъ гдⷭ҇нь ненави́дитъ непра̑вды, досаждє́нїѧ же и҆ горды̑ни, и҆ пꙋти̑ лꙋка́выхъ: возненави́дѣхъ же а҆́зъ развращє́нныѧ пꙋти̑ ѕлы́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. Мно́ю ца́рїе ца́рствꙋютъ, и҆ си́льнїи пи́шꙋтъ пра́вдꙋ. Мно́ю вельмѡ́жи велича́ютсѧ, и҆ власти́тели мно́ю держа́тъ зе́млю. А҆́зъ лю́бѧщыѧ мѧ̀ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Бога́тство и҆ сла́ва моѧ̀ є҆́сть, и҆ стѧжа́нїе мно́гихъ и҆ пра́вда. Лꙋ́чше є҆́сть плоди́ти менѐ па́че зла́та и҆ ка́менїѧ дра́га: мои́ же плоды̀ лꙋ́чше сребра̀ и҆збра́нна. Въ пꙋте́хъ пра́вды хождꙋ̀, и҆ посредѣ̀ сте́зь ѡ҆правда́нїѧ живꙋ̀: Да раздѣлю̀ лю́бѧщымъ мѧ̀ и҆мѣ́нїе, и҆ сокрѡ́вища и҆́хъ и҆спо́лню бл҃ги́хъ.

На стїхо́внѣ самогла́сенъ днѐ, два́жды. Гла́съ в҃:

Ѻ҆́ч҃е бл҃гі́й, ѿ всѣ́хъ ꙗ҆̀же да́лъ мѝ є҆сѝ, ѡ҆бнажѝ мѧ̀ безꙋ́мїе моѐ: ᲂу҆дали́хсѧ ѿ тебѐ, и҆ порабо́тахъ стра́нномꙋ граждани́нꙋ, живѡ́тнаѧ мє́рзкаѧ пасо́хъ, и҆ ни тѣ́хъ пи́щи насы́тихсѧ. тѣ́мже притеко́хъ къ тебѣ̀, вѣ́дый твоѐ бл҃гоꙋтро́бїе: покры́й мою̀ наготꙋ̀ человѣколю́бїемъ твои́мъ, и҆ сп҃сѝ мѧ̀.

Мꙋ́чениченъ: Ст҃ы̑мъ мч҃нкѡмъ молѧ́щымсѧ ѡ҆ на́съ, и҆ хрⷭ҇та̀ пою́щымъ, всѧ́каѧ пре́лесть преста̀, и҆ человѣ́ческїй ро́дъ вѣ́рою сп҃са́етсѧ.

Сла́ва, и҆ ны́нѣ, бг҃оро́диченъ, гла́съ то́йже: Ѿ ложе́снъ твои́хъ дв҃и́ческихъ свѣ́тъ мі́рови возсїѧ̀, сло́вомъ сло́во: того̀ молѝ чⷭ҇таѧ всест҃а́ѧ дв҃о, и҆зба́витисѧ дꙋша́мъ на́шымъ ѿ сѣ́тей вра́жїихъ.