Въ пѧто́къ г҃-ѧ седми́цы на ᲂу҆́трени,

трⷪ҇чны гла́са. По а҃-мъ стїхосло́вїи глаго́лемъ сѣда́льны крⷭ҇тны ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ господи́на і҆ѡ́сифа. Гла́съ є҃.

Подо́бенъ: Собезнача́льное:

Снѣ́ди дре́вомъ, дре́вле ᲂу҆ме́ршїи человѣ́цы, крⷭ҇то́мъ твои́мъ ще́дре, ѡ҆жи́хомъ, є҆гѡ́же си́лою бл҃же, на́съ ᲂу҆крѣпѝ, воздержа́нїѧ вре́мѧ во ᲂу҆миле́нїи прейтѝ, творѧ́щыѧ во́лю твою̀, и҆ де́нь ви́дѣти свѣтоно́снагѡ воскрⷭ҇нїѧ.

Сла́ва, то́йже.

И҆ ны́нѣ, крⷭ҇тобг҃оро́диченъ: На крⷭ҇тѣ̀ тѧ̀ ви́дѧщи хрⷭ҇тѐ мт҃и твоѧ̀, во́лею посредѣ̀ разбо́йникѡвъ ви́сѧща, и҆ бїю́щи мт҃рски ᲂу҆тро́бꙋ, глаго́лаше: безгрѣ́шный сн҃е, ка́кѡ непра́веднѡ на крⷭ҇тѣ̀ ꙗ҆́кѡ ѕлодѣ́й водрꙋже́нъ є҆сѝ, человѣ́ческїй хотѧ̀ ѡ҆живи́ти ро́дъ, ꙗ҆́кѡ бл҃гоꙋтро́бенъ.

По г҃-мъ стїхосло́вїи сѣда́ленъ господи́на ѳео́дѡра. Гла́съ а҃.

Подо́бенъ: Ка́мени запеча́танꙋ:

Пло́ть ѡ҆чи́стившихъ ѿ воздержа́нїѧ, и҆ въ мл҃твахъ просвѣти́вшихъ дꙋ́шы на́шѧ гдⷭ҇и, чⷭ҇тны́й крⷭ҇тъ тво́й и҆ ст҃ы́й сподо́би на́съ ви́дѣти, и҆ со стра́хомъ поклони́тисѧ въ пѣ́снехъ пою́щихъ, и҆ глаго́лющихъ: сла́ва живоно́сномꙋ крⷭ҇тꙋ̀, сла́ва бж҃е́ственномꙋ копїю̀ твоемꙋ̀, и҆́мже ѡ҆жи́хомъ, є҆ди́не чл҃вѣколю́бче.

Сла́ва, то́йже.

И҆ ны́нѣ, крⷭ҇тобг҃оро́диченъ: А҆́гнца на дре́вѣ а҆́гница ви́дѧщи, съ разбо́йники долготерпѣли́ве распина́ема тѧ̀ сло́ве, и҆ копїе́мъ въ ре́бра пробода́ема, рыда́ше вопїю́щи мт҃рски: что̀ стра́нное и҆ ᲂу҆жа́сное і҆и҃се мо́й та́инство; ка́кѡ покрыва́етсѧ гро́бомъ неѡпи́санный бг҃ъ; несказа́нно є҆́сть содѣва́емое: не ѡ҆ста́ви мѧ̀ є҆ди́нꙋ тѧ̀ ро́ждшꙋю, і҆и҃се мо́й сладча́йшїй.

Канѡ́нъ мине́и, и҆ настоѧ́щыѧ трипѣ́снцы, господи́на і҆ѡ́сифа. И҆ стїхосло́витсѧ пѣ́снь. Гла́съ є҃.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою.

И҆сцѣли́ мѧ гдⷭ҇и, и҆ и҆сцѣлю́сѧ ꙗ҆́звою твое́ю, дꙋшѝ моеѧ̀ ѡ҆чи́стивъ ꙗ҆́звы, пло́тїю стрⷭ҇ти хрⷭ҇тѐ прїе́мый.

Тебѐ ꙗ҆́коже ви́дѣ пло́тїю ви́сима хрⷭ҇тѐ на дре́вѣ, свѣ́тъ во тьмꙋ̀ прелага́ше со́лнце, и҆ землѧ̀ подви́жесѧ, и҆ ка́менїе распадо́шасѧ.

Те́рнїемъ ѡ҆бра́стшꙋю и҆ ѡ҆лѧденѣ́вшꙋю мою̀ дꙋ́шꙋ, всѧ́кихъ страсте́й ви́ды, гдⷭ҇и ѡ҆чи́сти, вѣнча́выйсѧ те́рнїемъ, за кра́йнюю бл҃гость.

Бг҃оро́диченъ: Но́вѡ породила̀ є҆сѝ ꙗ҆́кѡ младе́нца всечⷭ҇таѧ содѣ́телѧ моего̀: є҆го́же молѝ, ѡ҆бетша́вшаго мѧ̀ во мно́зѣ ѕло́бѣ ѡ҆бнови́ти влⷣчце.

И҆́ный господи́на ѳео́дѡра. Гла́съ а҃.

І҆рмо́съ: Ѿ но́щи ᲂу҆́тренююще:

На мѣ́стѣ ло́бнѣмъ і҆ꙋдє́и тебѐ распѧ́ша хрⷭ҇тѐ, покива́ша глава́ми свои́ми, смѣю́щесѧ и҆ рꙋга́ющесѧ: ты́ же терпѣ́лъ є҆сѝ во є҆́же сп҃стѝ на́съ.

На ті́тлѣ крⷭ҇та̀ твоегѡ̀, написа́въ пїла́тъ трегꙋ́бѡ, є҆ди́наго ѿ трⷪ҇цы тѧ̀, во́лею пострада́вша ꙗ҆влѧ́ше, за всѣ́хъ сп҃се́нїе хрⷭ҇тѐ.

Трⷪ҇ченъ: Пресвѣ́тлыѧ трⷪ҇цы, трисо́лнечное воспои́мъ вѣ́рнїи, свѣ́тъ ѻ҆ц҃а̀ чтꙋ́ще, свѣ́тъ сн҃а сла́вѧще, свѣ́тъ и҆ дх҃а возвѣща́юще.

Бг҃оро́диченъ: А҆́гг҃лъ вы́шшꙋю, и҆з̾ тебѐ рожде́йсѧ показа́ тѧ чⷭ҇таѧ: є҆гѡ́же бо ѻ҆нѝ трепе́щꙋтъ ꙗ҆́кѡ бг҃а зрѣ́ти, ты̀ на рꙋ́кꙋ но́сиши ꙗ҆́кѡ сн҃а твоего̀ чⷭ҇таѧ.

Сла́ва тебѣ̀ бж҃е на́шъ, сла́ва тебѣ̀.

Крⷭ҇те всечⷭ҇тны́й, сп҃си́тельный, мі́рꙋ храни́телю, соблюдѝ мѧ̀ постѧ́щасѧ, и҆ досто́йна покажѝ твоегѡ̀ честна́гѡ поклоне́нїѧ.

І҆рмо́съ: Ѿ но́щи ᲂу҆́тренююще, воспѣва́емъ тѧ̀ хрⷭ҇тѐ бж҃е, ѡ҆бнища́вшаго на́съ ра́ди, и҆ крⷭ҇тъ и҆ сме́рть пло́тїю претерпѣ́вшаго.

Пѣ́снь и҃.

І҆рмо́съ: Тебѐ вседѣ́телю:

Просте́рлъ є҆сѝ на крⷭ҇тѣ̀ хрⷭ҇тѐ твоѝ дла̑ни, рꙋкѝ пра́ѻтца невоздержа́нное потреблѧ́ѧ: дре́вомъ же дре́ва и҆сцѣли́лъ є҆сѝ клѧ́твꙋ. тѣ́мже тѧ̀ пое́мъ во всѧ̑ вѣ́ки.

Тебѣ̀ воли́телю сп҃се́нїѧ сло́ве припа́даю, хотѣ́нїѧ лꙋка̑ваѧ ᲂу҆ста́ви вско́рѣ ѿ моегѡ̀ се́рдца, крⷭ҇тъ и҆ страда́нїе во́лею претерпѣ́вый.

Блꙋ́днꙋю жи́знь и҆ ѡ҆скверне́ное житїѐ возжела́въ, ѡ҆мрачи́хсѧ а҆́зъ блꙋ́дный: ѡ҆сїѧ́й мѝ лꙋчꙋ̀ ѡ҆браще́нїѧ сло́ве, со́лнца сїѧ́нїе въ страда́нїи ѡ҆мрачи́вый.

Бг҃оро́диченъ: Оу҆ста́ви мою̀ многоболѣ́зненнꙋю всю̀ серде́чнꙋю ѕло́бꙋ, мт҃и хрⷭ҇та̀ бг҃а, сокрꙋшѝ стрѣ́лы и҆ лꙋ́ки бѣсѡ́въ, борю́щихъ смире́ннꙋю дꙋ́шꙋ мою̀.

И҆́ный. І҆рмо́съ: Пѣсносло́вцы въ пещѝ:

Что̀ тебѣ̀ пострада́вшемꙋ принесе́мъ, всѣ́хъ влⷣцѣ мы̀ ѻ҆каѧ́ннїи: на́съ бо ра́ди крⷭ҇тъ претерпѣ́лъ є҆сѝ хрⷭ҇тѐ. пое́мъ безмѣ́рныѧ млⷭ҇ти твоеѧ̀ бл҃года́ть.

На дре́вѣ воздвиго́ша хрⷭ҇тѐ і҆ꙋде́є, за́вистїю ᲂу҆би́вшїи тѧ̀, не ᲂу҆ма́лиша держа́вы сла́вы твоеѧ̀ беззако́ннїи: є҆си́ бо всѣ́хъ влⷣка во́лею пострада́вый.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Пресꙋ́щественнагѡ бж҃ества̀ трѝ лица̀ почита́ю: ѻ҆ц҃а̀ безнача́льна, сн҃а, и҆ дх҃а ст҃а́го, є҆стество́мъ несѣко́мое сꙋщество̀ сла́влю во вѣ́ки.

Бг҃оро́диченъ: Нб҃съ вы́шшꙋю, и҆ херꙋві̑мъ превы́шшꙋю, ст҃опе́рвꙋю и҆ нескве́рнꙋю ѻ҆трокови́цꙋ всѣ́хъ бг҃а пое́мъ, и҆ превозно́симъ во всѧ̑ вѣ́ки.

Сла́ва тебѣ̀ бж҃е на́шъ, сла́ва тебѣ̀.

Пребл҃же́нне крⷭ҇те хрⷭ҇то́въ, нб҃опи́саннаѧ побѣ́до, ѿ землѝ на́мъ прозѧ́блъ є҆сѝ, твоегѡ̀ поклоне́нїѧ достѡ́йны покажи́ ны всѧ̑, посто́мъ ѡ҆чи́стившыѧсѧ.

Хва́лимъ, бл҃гослови́мъ, покланѧ́емсѧ гдⷭ҇ви.

І҆рмо́съ: Пѣсносло́вцы въ пещѝ сп҃сшаго дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: И҆са́їе ликꙋ́й:

Ѡ҆камене́нное ѡ҆жесточе́нїе дꙋшѝ моеѧ̀ бл҃гоꙋтро́бне сп҃се ѡ҆мы́й, и҆ и҆сто́чникъ да́ждь мѝ бл҃же, бж҃е́ственнагѡ ᲂу҆миле́нїѧ, и҆з̾ ре́бръ и҆сточи́вый мнѣ̀ жи́знь, беззакѡ́нїѧ моегѡ̀ пото́ки потреблѧ́ющꙋю.

Самаго̀ себѐ вве́ргъ во глꙋбины̑ грѣхѡ́въ, высѡты̀ ѡ҆ста́вивъ добродѣ́телей: но привлецы̀ и҆ сп҃си́ мѧ возше́дый на крⷭ҇тъ, и҆ человѣ́чество привлекі́й къ себѣ̀ гдⷭ҇и.

Сла́дость сы́й гдⷭ҇и и҆ наслажде́нїе, ꙗ҆́кѡ содѣ́тель, же́лчи вкꙋси́лъ є҆сѝ хрⷭ҇тѐ, ѿ сла́дости сꙋ́щее ѿпаде́нїе, є҆́же и҆з̾ а҆да́ма ты̀ и҆справлѧ́ѧ: тѣ́мже тѧ̀ пое́мъ сп҃сшїисѧ твои́ми страстьмѝ.

Бг҃оро́диченъ: Всечⷭ҇таѧ влⷣчце, ᲂу҆пова́нїе моѐ и҆ прибѣ́жище, ꙗ҆́звы дꙋшѝ моеѧ̀ и҆сцѣлѝ, ᲂу҆́мъ мо́й ᲂу҆мирѝ. да и҆ а҆́зъ ра́дꙋѧсѧ, воспою̀ вели́чїѧ твоѧ̑ бцⷣе приснодв҃о.

И҆́ный. І҆рмо́съ: Тѧ̀ ю҆́же ви́дѣ:

Тебѐ, є҆го́же беззако́ннїи хрⷭ҇тѐ, ѡ҆дѣ́ѧша рꙋга́тельнѡ въ порфѵ́рꙋ и҆ вѣне́цъ, ꙗ҆́кѡ цр҃ю̀ рꙋга́ющесѧ, тро́стїю главꙋ̀ твою̀ ᲂу҆дарѧ́юще, распина́юще за́вистїю, и҆ же́лчїю напаѧ́юще, пѣ́сньми всѝ вѣ́рнїи велича́емъ.

Тѧ̀, є҆го́же со́лнце ви́дѧщее стра́ждꙋща на крⷭ҇тѣ̀, свѣ́тъ сокры̀, все́й вкꙋ́пѣ тва́ри, влⷣчнимъ досажде́нїемъ преклонѧ́ющейсѧ и҆ распа́дающымсѧ ка́менїємъ, пѣ́сньми хрⷭ҇тѐ сп҃се велича́емъ.

Трⷪ҇ченъ: Свѣ́тъ и҆ жи́знь и҆ вседѣ́тель, трисо́лнечное є҆ди́нство, бг҃ъ же и҆ гдⷭ҇ь, є҆ди́нѣмъ свѣ́томъ сїѧ́ѧ, соѡблиста́ѧ тремѝ начерта́ньми во є҆ди́номъ бж҃ествѣ̀, сего̀ всѝ вѣ́рнїи велича́емъ.

Бг҃оро́диченъ: Тебѐ ю҆́же дв҃дъ пѣве́цъ проповѣ́да сїѡ́нъ, въ ню́же всели́сѧ нб҃сы̀ невмѣсти́мый, и҆ созда̀ ѿ ᲂу҆тро́бы твоеѧ̀, мі́рꙋ ѡ҆чище́нїе, пѣ́сньми мт҃и чⷭ҇таѧ велича́емъ.

Сла́ва тебѣ̀ бж҃е на́шъ, сла́ва тебѣ̀.

Тво́й сп҃си́тельный крⷭ҇тъ, просвѣти́телѧ вѣ́рныхъ, сподо́би гдⷭ҇и воздержа́нїемъ текꙋ́щыѧ предвари́ти, ви́дѣти, и҆ поклони́тисѧ, во ѡ҆сщ҃е́нїе на́ше, да тѧ̀ и҆́мъ велича́емъ.

І҆рмо́съ: Тѧ̀ ю҆́же ви́дѣ мѡѷсе́й неѡпали́мꙋю кꙋпинꙋ̀, и҆ лѣ́ствицꙋ ѡ҆дꙋшевле́ннꙋю, ю҆́же і҆а́кѡвъ ви́дѣ, и҆ две́рь нбⷭ҇нꙋю, є҆́юже про́йде хрⷭ҇то́съ бг҃ъ на́шъ, пѣ́сньми мт҃и чⷭ҇таѧ велича́емъ.

Свѣти́ленъ гла́са.

На стїхо́внѣ самогла́сенъ днѐ, два́жды. Гла́съ ѕ҃.

Ѻ҆те́ческагѡ да́ра расточи́хъ бога́тство, въ блꙋдѣ̀ и҆жди́хъ житїѐ, лꙋка́вными по́мыслы, грѣха̀ моегѡ̀ соѿве́дсѧ, и҆ сла́достїю стра́сти наслажда́емь, несмы́слєннымъ скотѡ́мъ ᲂу҆подо́бихсѧ, сп҃си́тельныхъ за́повѣдей престꙋпле́нїемъ: но бл҃говоли́вый на крⷭ҇тѣ̀ повѣ́ситисѧ менѐ ра́ди хрⷭ҇тѐ бж҃е, не ѿри́ни менѐ твоегѡ̀ сыноположе́нїѧ, но ѡ҆браща́ющасѧ прїимѝ, ꙗ҆́кѡ блꙋ́днаго сы́на, и҆ сп҃сѝ мѧ̀.

Мч҃ниченъ: Гдⷭ҇и, въ па́мѧть ст҃ы́хъ твои́хъ, всѧ̀ тва́рь пра́зднꙋетъ, нб҃са̀ ра́дꙋютсѧ со а҆́гг҃лы, и҆ землѧ̀ весели́тсѧ съ человѣ́ки. тѣ́хъ мл҃твами поми́лꙋй на́съ.

Сла́ва, и҆ ны́нѣ, крⷭ҇тобг҃оро́диченъ, гла́съ то́йже.

Подо́бенъ: Тридне́венъ:

Всечⷭ҇таѧ, ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й, и҆ бж҃е мо́й, сладча́йшее моѐ ча́до, ка́кѡ терпи́ши стра́сть поно́снꙋю.

На ѕ҃-мъ часѣ̀ тропа́рь прⷪ҇ро́чества, гла́съ и҃:

Сло́вомъ всѧ̑ твое́ю соверши́лъ є҆сѝ си́лою бж҃е, и҆ ѿ небытїѧ̀ въ бытїѐ приве́лъ є҆сѝ на́съ, не преда́ждь на́съ беззако́нїємъ на́шымъ, безгрѣ́шне гдⷭ҇и, мо́лимсѧ.

Прокі́менъ, ѱало́мъ н҃з, гла́съ ѕ҃: Возвесели́тсѧ пра́ведникъ, є҆гда̀ ᲂу҆ви́дитъ ѿмще́нїе. Сті́хъ: А҆́ще вои́стиннꙋ ᲂу҆́бѡ пра́вдꙋ глаго́лете.

Прⷪ҇ро́чества и҆са́їина чте́нїе. [Глава̀ г҃і, ст. в҃- г҃і.]

Та́кѡ глаго́летъ гдⷭ҇ь: на горѣ̀ по́льнѣй воздви́гните зна́менїе, вознеси́те гла́съ и҆̀мъ, не бо́йтесѧ: поꙋща́йте рꙋко́ю, ѿве́рзите кнѧ́зи. А҆́зъ повелѣва́ю, ѡ҆свѧще́ни сꙋ́ть: и҆ а҆́зъ ведꙋ̀ и҆́хъ, и҆споли́ни и҆́дꙋтъ и҆спо́лнити ꙗ҆́рость мою̀ ра́дꙋющесѧ, вкꙋ́пѣ и҆ ᲂу҆карѧ́юще. Гла́съ ꙗ҆зы́кѡвъ мно́гихъ, на гора́хъ, подо́бенъ ꙗ҆зы́кѡвъ мно́гихъ, гла́съ царе́й, и҆ ꙗ҆зы́кѡвъ собра́вшихсѧ. гдⷭ҇ь саваѡ́ѳъ заповѣ́да ꙗ҆зы́кꙋ ѻ҆рꙋжебо́рцꙋ, Прїитѝ ѿ землѝ и҆здале́ча, ѿ кра́ѧ ѡ҆снова́нїѧ нб҃сѐ, гдⷭ҇ь и҆ ѻ҆рꙋжебо́рцы є҆го̀, растли́ти всю̀ вселе́ннꙋю. Рыда́йте: бли́зъ бо де́нь гдⷭ҇нь, и҆ сокрꙋше́нїе ѿ бг҃а прїи́детъ. Сегѡ̀ ра́ди всѧ́ка рꙋка̀ разслабѣ́етъ, и҆ всѧ́ка дꙋша̀ человѣ́ча ᲂу҆бои́тсѧ: И҆ смѧтꙋ́тсѧ послы̀, и҆ болѣ̑зни прїи́мꙋтъ ѧ҆̀ ꙗ҆́кѡ жены̀ ражда́ющїѧ: и҆ поскорбѧ́тъ дрꙋ́гъ ко дрꙋ́гꙋ, и҆ ᲂу҆жа́снꙋтсѧ, и҆ лицѐ своѐ ꙗ҆́кѡ пла́мень и҆змѣнѧ́тъ. Се́ бо де́нь гдⷭ҇нь грѧде́тъ неисцѣ́льный ꙗ҆́рости и҆ гнѣ́ва, положи́ти вселе́ннꙋю [всю̀] пꙋ́стꙋ, и҆ грѣ́шники погꙋби́ти ѿ неѧ̀. Ѕвѣ́зды бо нбⷭ҇ныѧ и҆ ѻ҆рі́ѡнъ, и҆ всѐ ᲂу҆краше́нїе нбⷭ҇ное, свѣ́та своегѡ̀ не дадѧ́тъ, и҆ помрачи́тсѧ со́лнце возсїѧва́ющее, и҆ лꙋна̀ не да́стъ свѣ́та своегѡ̀. И҆ заповѣ́мъ все́й вселе́ннѣй ѕла̑ѧ, и҆ нечести̑вымъ грѣхѝ и҆́хъ: и҆ погꙋблю̀ ᲂу҆кори́знꙋ беззако́нныхъ, и҆ ᲂу҆кори́знꙋ го́рдыхъ смирю̀. И҆ бꙋ́дꙋтъ ѡ҆ста́вшїи честні́и па́че, не́жели зла́то нежже́нное: и҆ человѣ́къ че́стенъ бꙋ́детъ па́че, не́жели ка́мень, и҆́же ѿ сꙋфі́ра. Раз̾ѧри́тсѧ бо нб҃о, и҆ землѧ̀ потрѧсе́тсѧ ѿ ѡ҆снова́нїй свои́хъ, за ꙗ҆́рость гнѣ́ва гдⷭ҇а саваѡ́ѳа въ де́нь, во́ньже прїи́детъ ꙗ҆́рость є҆гѡ̀.

Прокі́менъ, ѱало́мъ н҃и, гла́съ з҃: Бж҃е застꙋ́пникъ мо́й є҆сѝ ты̀ и҆ млⷭ҇ть твоѧ̀ предвари́тъ мѧ̀. Сті́хъ: И҆зми́ мѧ ѿ вра̑гъ мои́хъ бж҃е: