Недѣ́лѧ втора́ѧ ст҃ы́хъ постѡ́въ.
Пое́тсѧ настоѧ́щее послѣ́дованїе, во ст҃ы́хъ ѻ҆тца̀ на́шегѡ григо́рїа а҆рхїепі́скопа, ѳессалоні́тскагѡ чꙋдотво́рца, пала́мы. Сложе́нное ѡ҆ всест҃ѣ́йшагѡ патрїа́рха фїлоѳе́а.
Въ сꙋббѡ́тꙋ ве́чера поста́вимъ стїхѡ́въ і҃. И҆ пое́мъ стїхи̑ры воскрⷭ҇ны г҃, и҆ а҆натѡ́лїевы г҃: и҆ настоѧ́щыѧ ст҃а́гѡ на д҃, гла́съ в҃.
Подо́бенъ: Кі́ими похва́льными пѣ́сньми:
Кі́ими бл҃гопохвале́нїй пѣ́сньми воспои́мъ і҆ера́рха, бг҃осло́вїѧ трꙋбꙋ̀, ѻ҆гнедохновє́ннаѧ ᲂу҆ста̀ бл҃года́ти, честно́е дх҃а прїѧ́телище, столпа̀ цр҃кве непоколеби́маго, вели́кое вселе́нныѧ ᲂу҆краше́нїе, рѣкꙋ̀ премꙋ́дрости, свѣ́та свѣти́льника, ѕвѣздꙋ̀ ꙗ҆́снꙋю, тва́рь просвѣща́ющꙋю;
Кі́ими пѣснопѣ́нїй цвѣта́ми вѣнча́имъ і҆ера́рха, бл҃гоче́стїѧ побо́рника, и҆ нече́стїѧ проти́вника, те́плаго вѣ́ры предста́телѧ, вели́каго наста́вника и҆ ᲂу҆чи́телѧ, цѣвни́цꙋ всекра́снꙋю дх҃а, златосїѧ́ющїй ѧ҆зы́къ, и҆сто́чникъ кипѧ́щїй то́ки и҆сцѣле́нїй вѣ̑рнымъ, вели́каго и҆ досточꙋ́днаго григо́рїа;
Кі́ими земноро́днїи ᲂу҆стна́ми восхва́лимъ і҆ера́рха, цр҃кве ᲂу҆чи́телѧ, свѣ́та бж҃е́ственнагѡ проповѣ́дника, нбⷭ҇нотаи́нника трⷪ҇цы, ве́лїе мона́шествꙋющихъ ᲂу҆краше́нїе, дѣѧ́нїемъ и҆ видѣ́нїемъ просїѧ́вшаго, ѳессалоні́тскꙋю похвалꙋ̀, сограждани́на и҆мꙋ́щаго, мѷрото́чнаго на нб҃сѣ́хъ бж҃е́ственнаго и҆ пречꙋ́днаго дими́трїа;
Сла́ва, гла́съ ѕ҃: Прпⷣбне, требл҃же́нне, ст҃ѣ́йшїй ѻ҆́тче, па́стырю до́брый, и҆ а҆рхїпа́стырѧ хрⷭ҇та̀ ᲂу҆ч҃нчѐ, положи́вый дꙋ́шꙋ ѡ҆ ѻ҆вца́хъ: са́мъ и҆ ны́нѣ ѻ҆́тче на́шъ бг҃оно́се григо́рїе, и҆спросѝ мл҃твами твои́ми, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ пе́рвый гла́са. На лїті́и стїхи́ра хра́ма. Сла́ва, и҆ ны́нѣ, бг҃оро́диченъ. На стїхо́внѣ по а҆лфави́тꙋ.
Сла́ва, гла́съ и҃: Бо́дрый ꙗ҆зы́къ тво́й ко ᲂу҆чи́тельствꙋ, во ᲂу҆шесѣ́хъ серде́чныхъ возглаша́ѧ, лѣни́выхъ дꙋ́шы возставлѧ́етъ, и҆ бг҃овѣща́нными словесы̀ твои́ми лѣ́ствица ѡ҆брѣта́етсѧ, ѿ землѝ къ бг҃ꙋ возносѧ́щаѧ. тѣ́мже григо́рїе, ѳесса́лїи чꙋ́до, не преста́й молѧ́сѧ хрⷭ҇тꙋ̀, просвѣти́ти бж҃е́ственнымъ свѣ́томъ чтꙋ́щыѧ тѧ̀.
И҆ ны́нѣ, бг҃оро́диченъ: Безневѣ́стнаѧ дв҃о: Ны́нѣ ѿпꙋща́еши: Трист҃о́е. тропа́рь, Бцⷣе дв҃о: три́жды.
И҆ про́чее послѣ́дованїе бдѣ́нїѧ.
На ᲂу҆́трени по шестоѱа́лмїи, Бг҃ъ гдⷭ҇ь:
Тропа́рь воскрⷭ҇нъ два́жды. Сла́ва, ст҃а́гѡ гла́съ и҃:
Правосла́вїѧ свѣти́льниче, цр҃кве ᲂу҆твержде́нїе и҆ ᲂу҆чи́телю, мона́хѡвъ добро́то, бг҃осло́вѡвъ побо́рниче непребори́мый, григо́рїе чꙋдотво́рче, ѳессалоні́тскаѧ похвало̀, проповѣ́дниче бл҃года́ти, моли́сѧ вы́нꙋ сп҃сти́сѧ дꙋша́мъ на́шымъ.
И҆ ны́нѣ, бг҃оро́диченъ въ то́йже гла́съ: И҆́же на́съ ра́ди рожде́йсѧ: И҆ ѻ҆бы́чное стїхосло́вїе. И҆ чте́нїе въ шестодне́вцѣ. Степє́нна гла́са. Всѧ́кое дыха́нїе: Є҆ѵⷢ҇лїе ᲂу҆́треннее. Воскрⷭ҇нїе хрⷭ҇то́во: ѱало́мъ н҃. Сла́ва: Покаѧ́нїѧ ѿве́рзи мѝ двє́ри: И҆ ны́нѣ, подо́бенъ: На сп҃се́нїѧ стєзѝ: Та́же, на гла́съ ѕ҃: Поми́лꙋй мѧ̀ бж҃е: Та́же, Мно́жєства содѣ́ѧнныхъ мно́ю лю́тыхъ:
Канѡ́нъ ѻ҆смогла́сника воскрⷭ҇нъ, со і҆рмосо́мъ на д҃, и҆ трїѡ́ди на д҃, и҆ ст҃а́гѡ на ѕ҃. Гла́съ и҃.
Пѣ́снь а҃.
І҆рмо́съ: Колесницегони́телѧ фараѡ́нѧ погрꙋзѝ:
Воспрїе́мше те́плыми слеза́ми, блꙋ́днагѡ гла́съ, тебѣ̀ ѻ҆ц҃ꙋ̀ всѣ́хъ и҆ бг҃ꙋ припа́даемъ, вопїю́ще: ꙗ҆́кѡ согрѣши́хомъ ѿ тебѐ ᲂу҆дали́вшесѧ, и҆ блꙋдꙋ̀ рабо́тавше, прїимѝ на́ше покаѧ́нїе.
Ца́рское преѡби́дѣвъ бл҃горо́дїе, є҆́же дарова́лъ є҆сѝ мнѣ̀, менѐ ра́ди сло́ве, человѣ́къ бы́вый: лю́тѣ ѡ҆сꙋди́хсѧ ᲂу҆годи́ти свинїѧ́мъ, грѣхо́внымъ вкꙋ́сомъ: но пощадѝ мѧ̀ сп҃се, млⷭ҇рдїемъ твои́мъ.
На колѣ́нꙋ па́дающа мѧ̀, ꙗ҆́коже пе́рвѣе блꙋ́днаго влⷣко гдⷭ҇и, ты̀ прите́къ прїимѝ, и҆ рꙋка́ма ѡ҆б̾е́мъ, пода́ждь мѝ ѡ҆́бразы твоегѡ̀ сп҃се́нїѧ, вмѣ́стѡ нае́мника человѣколю́бче, па́ки твоего̀ сы́на сотворѧ́ѧ.
Бг҃оро́диченъ: Бг҃оѧвле́нїѧ тобо́ю сподо́бисѧ бг҃ора́дованнаѧ, человѣ́ческое є҆стество̀: є҆ди́на бо хода́таица дв҃о, была̀ є҆сѝ бг҃ꙋ и҆ человѣ́кѡмъ. тѣ́мъ ꙗ҆́кѡ бж҃їю тѧ̀ роди́тельницꙋ всѝ досто́йнѡ сла́вимъ.
И҆́ный канѡ́нъ ст҃а́гѡ гла́съ д҃.
І҆рмо́съ: Ѿве́рзꙋ ᲂу҆ста̀ моѧ̑:
Ри́торѡвъ бж҃е́ственнїи, и҆ бг҃осло́вѡвъ и҆зрѧ́днїи, и҆ ѧ҆зы́цы бг҃овѣща́ннїи, прїиди́те сни́дитесѧ въ соедине́нїе, воспѣ́ти по достоѧ́нїю дх҃ори́тора, бж҃е́ственнаго григо́рїа.
Сто́лпъ вѣ́ры, цр҃кве побо́рникъ, вели́кїй григо́рїй да восхва́литсѧ мно́ю, всеизрѧ́дный па́стырь ѳессалоні́тскїй, красота̀ чи́на і҆ера́ршескагѡ вои́стиннꙋ.
Ѿ младе́нства возжела́лъ є҆сѝ лꙋ́чшее житїѐ, и҆ соверше́нное ѻ҆́тче ѿ ю҆́ности возлюби́лъ є҆сѝ мꙋдрова́нїе, и҆ кꙋпнонра́венъ, и҆ є҆диномꙋ́дренъ показа́лсѧ є҆сѝ тезоиме́нствꙋющагѡ тебѣ̀ ѻ҆́тче григо́рїе.
Бг҃оро́диченъ: Бꙋ́ди мѝ всенепоро́чнаѧ живота̀ пꙋ́ть, наставлѧ́ющїй мѧ̀ къ бж҃е́ствєннымъ селе́нїємъ: прельсти́хсѧ бо, и҆ къ про́пастємъ ѕло́бы поползнꙋ́хсѧ, ѿ ни́хже мѧ̀ возведѝ хода́тайствомъ твои́мъ.
Пѣ́снь г҃.
І҆рмо́съ: Нбⷭ҇нагѡ крꙋ́га:
Оу҆боѧ́всѧ мои́хъ дѣ́лъ, и҆ дале́чнагѡ ѿше́ствїѧ, и҆ расточе́ннагѡ твоегѡ̀ бога́тства, є҆го́же и҆жди́хъ въ блꙋ́дныхъ стремле́нїихъ, въ покаѧ́нїи къ тебѣ̀ зовꙋ̀, ѻ҆ц҃ꙋ̀ и҆ бг҃ꙋ моемꙋ̀: согрѣши́хъ, сп҃сѝ мѧ̀.
На землѝ согрѣша́ѧ, нб҃сѐ ᲂу҆боѧ́хсѧ: си́це бо мѝ бꙋ́детъ сꙋ́дъ тогда̀ препира́ѧй, є҆гда̀ всѧ́чєскаѧ предста́нꙋтъ сло́ве, првⷣнымъ сꙋдо́мъ твои́мъ сꙋди̑маѧ.
Мра̑чнаѧ и҆ сквє́рнаѧ мѧ̀ помышлє́нїѧ пита́хꙋ, є҆гда̀ ѿ тебѐ сп҃се, дале́че бы́хъ блꙋ́дный, ны́нѣ же зовꙋ́ ти: согрѣши́хъ, согрѣши́хъ, сп҃сѝ те́плѣ прибѣга́ющаго млⷭ҇рдїю твоемꙋ̀.
Бг҃оро́диченъ: Ѡ҆божи́сѧ дв҃о а҆да́мово смѣше́нїе: и҆з̾ чре́ва бо твоегѡ̀ бг҃ъ плотоно́сецъ ꙗ҆ви́сѧ, и҆́мже воззва́ни бы́хомъ ѿ дре́внѧгѡ ѡ҆сꙋжде́нїѧ, солга́ни наде́ждею дре́вле ѡ҆боже́нїѧ.
И҆́ный. І҆рмо́съ: Твоѧ̀ пѣсносло́вцы бцⷣе:
Стрꙋи̑ бж҃е́ственныхъ ᲂу҆че́нїй твои́хъ сохранѧ́ющїи, всѧ́кїѧ ко́зни ѕлосла́вныхъ и҆збѣга́емъ, и҆ всѧ̑ и҆збива́емъ твои́ми сщ҃е́нными списа́ньми полкѝ си́хъ григо́рїе.
Премꙋ́дрѡсти бꙋ̑їѧ ѕлосла́вныхъ разрꙋши́лъ є҆сѝ блаже́нне, премꙋ́дрость бж҃їю ѵ҆поста́снꙋю и҆мѣ́ѧ въ се́рдцѣ твое́мъ, є҆́юже съ шꙋ́момъ порази́лъ є҆сѝ гнила̑ѧ си́хъ шата̑нїѧ.
Оу҆мертви́въ пло́ти тлѣ́емыѧ всѧ́кое сладостра́стїе премꙋ́дре, по́стнически ѡ҆живи́лъ є҆сѝ дꙋшѝ твоеѧ̀ движє́нїѧ, и҆ сїю̀ бж҃е́ственный ѻ҆рга́нъ бг҃осло́вїѧ показа́лъ є҆сѝ.
Бг҃оро́диченъ: Въ ра́зꙋмѣ ᲂу҆ма̀ и҆ произволе́нїи, стꙋ́дное же и҆ блꙋ́дное житїѐ прилѣ́жнѡ возлюби́хъ: но любо́вїю бж҃е́ственною мѧ̀ свѧжѝ, мл҃твами твои́ми, дв҃о бг҃оневѣ́стнаѧ.
Конда́къ, гла́съ д҃: Ны́нѣ вре́мѧ дѣ́лательное ꙗ҆ви́сѧ, при две́рехъ сꙋ́дъ, воста́немъ ᲂу҆́бѡ постѧ́щесѧ, принесе́мъ сле́зы ᲂу҆миле́нїѧ, ми́лостынѧми, зовꙋ́ще: согрѣши́хомъ па́че песка̀ морска́гѡ. но ѡ҆сла́би содѣ́телю всѣ́хъ, ꙗ҆́кѡ да прїи́мемъ нетлѣ̑нныѧ вѣнцы̀.
Сѣда́ленъ, гла́съ д҃:
Подо́бенъ: Ско́ро предварѝ:
Пре́лесть попали́лъ є҆сѝ ѕлосла́вныхъ премꙋ́дре, вѣ́рꙋ и҆з̾ѧсни́лъ є҆сѝ правосла́вныхъ до́брѣ, и҆ мі́ръ просвѣти́лъ є҆сѝ. ѿѻнꙋ́дꙋже побѣдоно́сный побѣди́тель показа́лсѧ є҆сѝ, сто́лпъ це́ркве, и҆́стинный і҆ера́рхъ, молѧ́сѧ не преста́й хрⷭ҇тꙋ̀, сп҃сти́сѧ всѣ̑мъ на́мъ.
Сла́ва, то́йже.
И҆ ны́нѣ, бг҃оро́диченъ: Ско́рѡ прїимѝ влⷣчце молє́нїѧ на̑ша, и҆ сїѧ̑ принесѝ сн҃ꙋ твоемꙋ̀ и҆ бг҃ꙋ, гпⷭ҇жѐ всенепоро́чнаѧ: погасѝ ѡ҆бстоѧ̑нїѧ ѕлосла́вныхъ ѧ҆зыковре́дныхъ, ᲂу҆кротѝ кѡ́зни, и҆ низложѝ де́рзость воѡрꙋжа́ющихсѧ безбо́жныхъ пречⷭ҇таѧ, на рабы̑ твоѧ̑.
Пѣ́снь д҃.
І҆рмо́съ: Ты̀ моѧ̀ крѣ́пость гдⷭ҇и:
Ѿмета́тельное ѻ҆те́ческихъ мѝ повелѣ́нїй бога́тство, є҆́же мѝ дарова́лъ є҆сѝ, въ сладостра́стїи и҆жди́въ, бы́хъ бж҃е́ственныхъ дарова́нїй ни́щъ ѡ҆каѧ́нный. тѣ́мже ка́ющасѧ со и҆сповѣ́данїемъ не ѡ҆мерзѝ менѐ влⷣко гдⷭ҇и.
Бг҃олѣ́пнѡ воспрїи́мъ нищетꙋ̀ менѐ, дале́че тебѐ дре́вле бы́вшагѡ, собо́ю къ себѣ̀ присвоѧ́еши, и҆ ѡ҆сщ҃а́еши мѧ̀ къ весе́лїю чл҃вѣколю́бче: тѣ́ло твоѐ бж҃е́ственное сло́ве, воззва́нїе моѐ, весе́лїѧ творѧ̀.
Да дале́че слеза́ми непреста́нными, вѣ́чныѧ мꙋ́ки и҆зба́вимсѧ, ю҆́же ᲂу҆гото́ва бг҃ъ лꙋка̑вымъ дꙋховѡ́мъ, ꙗ҆́кѡ блꙋ́дный, вопїе́мъ: согрѣши́хомъ тѝ ѻ҆́тче, но прїимѝ всѧ̑ прибѣга́ющыѧ ны̀ къ твое́й млⷭ҇ти.
Бг҃оро́диченъ: Собезнача́льное ѻ҆ц҃ꙋ̀ сло́во сы́й и҆ дх҃ꙋ, ѿ неискꙋсомꙋ́жныѧ дв҃ы ражда́етсѧ кромѣ̀ зако́на: пребы́въ ᲂу҆́бѡ є҆́же бѣ̀, пребы́въ же па́ки є҆́же ѿ на́съ прїѧ́тъ. во двою́ бо є҆стєствꙋ̀ є҆ди́нъ сн҃ъ є҆́сть, во ѻ҆бою̀ хранѧ̀ є҆сте́ственное.
И҆́ный. І҆рмо́съ: Неизслѣ́дный бж҃їй совѣ́тъ:
Ѿве́рзъ ᲂу҆ста̀ твоѧ̑ ѻ҆́тче премꙋ́дре, бж҃е́ственнꙋю премꙋ́дрость проповѣ́далъ є҆сѝ, є҆́йже поꙋча́лсѧ є҆сѝ въ се́рдцѣ твое́мъ при́снѡ, и҆ варлаа́ма сꙋ́етнаго несмы́сленна и҆ безꙋ́мна показа́лъ є҆сѝ.
Заше́лъ є҆сѝ сладча́йшїй въ зе́млю, со́лнце зако́номъ є҆стества̀, возсїѧ́еши же ᲂу҆́трѡ со хрⷭ҇то́мъ со́лнце невече́рнее, всѧ̑ назира́ѧ мл҃твами твои́ми.
Ꙗ҆вѝ бл҃года́ть тебѐ бл҃же́нне бж҃їй, похвалꙋ̀ и҆ ᲂу҆твержде́нїе преве́лїе правосла́вныхъ, и҆ па́стырѧ бл҃га́го, и҆ бг҃осло́ва втора́го, и҆ ста́да бо́драго храни́телѧ.
Бг҃оро́диченъ: Оу҆шеса̀ мнѣ̀ ѿве́рзи дꙋшє́вныѧ мт҃и бж҃їѧ, роди́вшаѧ пре́жде ᲂу҆шеса̀ ѿве́рзшаго глꙋхо́мꙋ, и҆ бж҃е́ствєннымъ внима́ти словесє́мъ, и҆ и҆сполнѧ́ти сподо́би.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Бога́тства и҆ дарова́нїй бж҃е́ственныхъ лиши́хсѧ, и҆ въ странꙋ̀ прїидо́хъ бл҃ги́хъ живо́тныхъ гла́домъ та́ѧ: но ты̀ мѧ̀ ѻ҆́ч҃е ꙗ҆́кѡ бл҃гі́й, дре́внїѧ сла́вы и҆ сла́дости, бл҃госе́рдїѧ ра́ди твоегѡ̀, и҆спо́лни.
По́мыслъ блꙋ́днагѡ, въ блꙋдѣ̀ житїѐ и҆жди́вша прїи́мше, ѻ҆ц҃ꙋ̀ млⷭ҇тивомꙋ притеце́мъ, несꙋмнѣ́нною вѣ́рою, и҆ сокрꙋше́нїемъ се́рдца, ꙗ҆́кѡ да согрѣше́нїй ѡ҆ставле́нїе прїи́мемъ.
Не коснѝ дꙋшѐ моѧ̀, въ да́льнѣй странѣ̀ пребыва́ющи: но тецы̀ вско́рѣ, бг҃ꙋ и҆ ѻ҆ц҃ꙋ̀ и҆сповѣ́дающисѧ, да прїи́меши разрѣше́нїе, и҆̀хже ѕлѣ̀ содѣ́лала є҆сѝ житїѐ и҆знꙋри́вши.
Бг҃оро́диченъ: Свѣ́тлый тѧ̀ ѻ҆́блакъ, носѧ́й со́лнце пра́вды, въ тебѣ̀ носи́мое, пречⷭ҇таѧ дв҃о вѣ́мы, неразꙋ́мїѧ тьмꙋ̀ і҆́дѡльскꙋю ѿгонѧ́ющее, и҆ ра́зꙋмомъ и҆́стиннымъ просвѣща́ющее.
И҆́ный. І҆рмо́съ: Оу҆жасо́шасѧ всѧ́чєскаѧ:
Серпо́мъ слове́съ твои́хъ, и҆ сщ҃е́нными списа́ньми посѣ́клъ є҆сѝ є҆́рєси тернови̑дныѧ, и҆ пле́велъ лѡ́жнаѧ прозѧбє́нїѧ, правосла́вїѧ же бл҃гочести̑ваѧ положи́лъ є҆сѝ сѣ́мена, сщ҃еннонача́льне григо́рїе.
Словеса̀ твоѧ̑ всемꙋ́дре, и҆ чєстна́ѧ списа̑нїѧ сꙋ́ть роса̀ нбⷭ҇наѧ, ме́дъ ка́менный, хлѣ́бъ а҆́гг҃льскїй притека́ющымъ, питїѐ, бра́шно, сла́дость, наслажде́нїе, григо́рїе, и҆ и҆сто́чникъ живы́ѧ воды̀.
Ѻ҆́бщаго тѧ̀ ᲂу҆чи́телѧ познава́етъ землѧ̀ и҆ мо́ре, сто́лпъ сщ҃е́нный правосла́вїѧ, и҆ ѻ҆рꙋжеполо́жницꙋ бж҃е́ственныхъ догма̑тъ честнꙋ́ю, премꙋ́драго бг҃осло́ва сщ҃е́ннаго, сожи́телѧ, соприча́стника, а҆пⷭ҇лѡмъ є҆динонра́внаго.
Бг҃оро́диченъ: Стрꙋѧ́ми ᲂу҆миле́нїѧ, сквє́рны се́рдца моегѡ̀ непоро́чнаѧ ѿмы́й дв҃о, и҆ покаѧ́нїѧ ѡ҆́бразы мнѣ̀ да́рꙋй, твои́ми къ ще́дромꙋ бг҃ꙋ сщ҃е́нными моле́нїи, є҆го́же неизрече́ннѡ родила̀ є҆сѝ.
Пѣ́снь ѕ҃.
І҆рмо́съ: Мл҃твꙋ пролїю̀:
Ю҆нѣ́йшїй бы́хъ сы́нъ тво́й, и҆ бога́тство твоѐ ѕлѣ̀ и҆жди́хъ, ᲂу҆дале́нїемъ ѕла́гѡ житїѧ̀, и҆ бл҃ги́хъ твои́хъ лиша́ѧсѧ чл҃вѣколю́бче, прихождꙋ̀ тебѣ̀ ѻ҆ц҃ꙋ̀ и҆ бг҃ꙋ моемꙋ̀, и҆ прошꙋ̀ проще́нїѧ.
Стра́нничество безчеловѣ́чное полꙋчи́хъ, и҆ пастѝ свинїи̑ ѡ҆сꙋжде́нъ бы́хъ, ꙗ҆́кѡ моѐ расточи́хъ бога́тство, є҆́же ми́лостивнѡ вско́рѣ пода́лъ є҆сѝ, и҆ бы́хъ ѿ всѣ́хъ на́гъ: но ты̀ ꙗ҆́кѡ бг҃ъ мо́й ᲂу҆ще́дри.
Не и҆́мамъ дерзнове́нїѧ чл҃вѣколю́бче, воззрѣ́ти и҆ ви́дѣти, согрѣши́въ на нб҃о, безмѣ́рнꙋю высотꙋ̀, ни нарещи́сѧ сы́нъ тво́й, блꙋ́дный: но ᲂу҆ще́дри мѧ̀ тꙋ́не, и҆мѣ́ѧй безмѣ́рнꙋю млⷭ҇ть.
Бг҃оро́диченъ: Несказа́нное твоѐ ржⷭ҇тво̀, и҆ неизрече́нный ржⷭ҇тва̀ твоегѡ̀ ѡ҆́бразъ дв҃и́це, ꙗ҆́кѡ бг҃а вы́ше ᲂу҆ма̀ ражда́еши, дв҃ство нескве́рное и҆мꙋ́щи: тѣ́мъ тѧ̀ всѝ и҆́стиннꙋю бцⷣꙋ досто́йнѡ сла́вимъ.
И҆́ный. І҆рмо́съ: Бж҃е́ственное сїѐ и҆ всечⷭ҇тно́е:
Растерза́сѧ сꙋ́етное шата́нїе, и҆ ѧ҆зы́къ варлаа́ма безꙋ́мнагѡ, словесы̀ и҆ велѣ́нїи, и҆ ра́зꙋма ѻ҆строто́ю премꙋ́драгѡ цр҃ѧ̀, и҆ твое́ю, григо́рїе.
Бж҃е́ственнꙋю цѣвни́цꙋ дх҃а, трꙋбꙋ̀ ꙗ҆́вѣ проповѣ́дающꙋю бж҃е́ствєнныѧ та̑йны, ѳессалоні́тскаго предсѣда́телѧ, бг҃осло́вскїй ѧ҆зы́къ, пѣ́сньми почти́мъ.
Лю́демъ и҆ногда̀ предводи́тель, ꙗ҆́кѡ сто́лпъ ѻ҆́гненный, вѣ́ры врагѝ попали́лъ є҆сѝ, вѣ́рныхъ же состоѧ̑нїѧ просвѣти́лъ є҆сѝ, бг҃омꙋ́дре ѻ҆́тче григо́рїе.
Бг҃оро́диченъ: Бꙋ́ди мѝ всечⷭ҇таѧ влⷣчце, тишина̀ и҆ приста́нище ᲂу҆тѣше́нїѧ, преводѧ́щее къ бж҃е́ственномꙋ приста́нищꙋ невла́емомꙋ, бꙋ́рю страсте́й мои́хъ ᲂу҆кроти́вши.
Конда́къ ст҃о́мꙋ, гла́съ и҃.
Подо́бенъ: Взбра́нной:
Премꙋ́дрости сщ҃е́нный и҆ бж҃е́ственный ѻ҆рга́нъ, бг҃осло́вїѧ свѣ́тлꙋю согла́снѡ трꙋбꙋ̀, воспѣва́емъ тѧ̀ григо́рїе бг҃оглаго́льниче: но ꙗ҆́кѡ ᲂу҆́мъ ᲂу҆мꙋ̀ пе́рвомꙋ предстоѧ́й, къ немꙋ̀ ᲂу҆́мъ на́шъ ѻ҆́тче наста́ви, да зове́мъ: ра́дꙋйсѧ проповѣ́дниче бл҃года́ти.
І҆́косъ. Подо́бенъ: А҆́гг҃лъ предста́тель:
А҆́гг҃лъ ꙗ҆ви́лсѧ є҆сѝ на землѝ, неизречє́ннаѧ бж҃їѧ человѣ́кѡмъ возвѣща́ѧ: безпло́тныхъ бо гла́сы, ѿ человѣ́ческихъ сы́й, и҆ пло́тїю ᲂу҆потреблѧ́ѧсѧ, ᲂу҆диви́лъ є҆сѝ на́съ, и҆ вопи́ти тебѣ̀ бг҃оглаго́ливе ᲂу҆вѣща́лъ є҆сѝ сїѧ̑: ра́дꙋйсѧ, и҆́мже тьма̀ сокры́сѧ: ра́дꙋйсѧ, и҆́мже свѣ́тъ взы́де. ра́дꙋйсѧ, несозда́ннагѡ бж҃ества̀ а҆́гг҃ле: ра́дꙋйсѧ, созда́ннагѡ и҆ бꙋ́ѧгѡ вои́стиннꙋ ѡ҆бличи́телю. ра́дꙋйсѧ, высотꙋ̀ невосходи́мꙋю, бж҃е́ственное є҆стество̀ рекі́й: ра́дꙋйсѧ, глꙋбинꙋ̀ неꙋдо́бь ви́димꙋю, дѣ́йство рекі́й: ра́дꙋйсѧ. ꙗ҆́кѡ сла́вꙋ бж҃їю до́брѣ ре́клъ є҆сѝ: ра́дꙋйсѧ, ꙗ҆́кѡ мнѣ̑нїѧ ѕлодѣ́євъ ѿре́клъ є҆сѝ. ра́дꙋйсѧ свѣти́льниче, показа́вый со́лнце: ра́дꙋйсѧ ча́ше, питїѧ̀ бж҃е́ственнагѡ пода́тельнице. ра́дꙋйсѧ, и҆́мже и҆́стина просїѧва́етъ: ра́дꙋйсѧ, и҆́мже помрачи́сѧ лжа̀. ра́дꙋйсѧ, проповѣ́дниче бл҃года́ти.
Сѷнаѯа́рїй. Стїхѝ:
Свѣ́та свѣ́тлаго проповѣ́дника ны́нѣ вои́стиннꙋ ве́лїѧ,
И҆сто́чникъ свѣ́та, къ незаходи́момꙋ во́дитъ свѣ́тꙋ.
Се́й бж҃е́ственнагѡ и҆ невече́рнѧгѡ свѣ́та сы́нъ, и҆́стинный вои́стиннꙋ бж҃їй человѣ́къ, и҆ чꙋ́дный бж҃е́ственныхъ слꙋга̀ и҆ слꙋжи́тель, ѻ҆те́чество ᲂу҆́бѡ и҆мѣ́ѧше всѣ́хъ градѡ́въ ца́рствꙋющее, роди́тели же пресвѣ́тлыѧ и҆ сла́вныѧ: не внѣ́шнѧго то́кмѡ и҆ по чꙋ́вствꙋ человѣ́ка, но мно́гѡ па́че внꙋ́треннѧго и҆ неви́димаго, добродѣ́телїю и҆ наказа́нїемъ ᲂу҆краси́ти тща́шесѧ. Ма́лꙋ же сꙋ́щꙋ ѕѣлѡ̀ во́зрастомъ томꙋ̀, ѻ҆те́цъ сконча́сѧ: ма́ти же є҆го̀, и҆ бра́тїю, и҆ сєстры̀ въ наказа́нїи и҆ зако́нѣ и҆ сщ҃е́нныхъ пи́сменѣхъ пита́ше же и҆ наказа́ше, и҆ внѣ́шнѣй мꙋ́дрости ко ᲂу҆чи́телємъ посыла́ше, до́брѣ навыка́ти разꙋмѣ̀. То́й ѻ҆строто́ю є҆стества̀ тща́нїе со ᲂу҆че́нїемъ смѣси́въ, вма́лѣ же всѧ́кꙋю слове́снꙋю хи́трость полꙋчѝ. Є҆гда́ же бѣ̀ два́десѧти лѣ́тъ, всѧ̑ земна̑ѧ и҆ со́нїй хꙋ̑ждшаѧ вмѣни́въ, къ вино́вномꙋ всѧ́кїѧ мꙋ́дрости и҆ пода́телю бг҃ꙋ востещѝ и҆ска́ше, и҆ соверше́ншимъ житїе́мъ всего̀ себѐ томꙋ́жде возложи́ти. Ѿѻнꙋ́дꙋже и҆ ѿкрыва́етъ бг҃олюбе́зное намѣ́ренїе ма́тери, и҆ мно́гꙋю любо́вь къ бг҃ꙋ своемꙋ̀, и҆ разжже́нное жела́нїе: и҆ ѻ҆́нꙋю подо́бнѣ ѡ҆брѣта́етъ си́ми болѧ́щꙋю ѿ до́лга вре́мене, и҆ ѡ҆ ра́вныхъ томꙋ̀ ра́дꙋющꙋюсѧ. А҆́бїе ᲂу҆́бѡ ма́ти дѣ́ти къ себѣ̀ собра́вши, и҆ сѐ, а҆́зъ и҆ дѣ́ти, съ весе́лїемъ ре́кши, ꙗ҆́же мѝ дадѐ бг҃ъ: мы́сль же и҆́хъ и҆скꙋша́етъ, ю҆́же и҆́мꙋтъ ѡ҆ до́брыхъ, и҆ намѣ́ренїе вели́кагѡ григо́рїа и҆̀мъ ѿкрыва́етъ. Ѻ҆́нъ же поꙋща́тєльнаѧ словеса̀ къ ни̑мъ ᲂу҆потреби́въ, вма́лѣ всѧ̑ поко́рны и҆мѧ́ше, и҆ къ подо́бнѣй є҆мꙋ̀ любвѝ и҆ бѣжа́нїю житїѧ̀ послѣ́дꙋющыѧ прилѣ́жнѡ. Ѿѻнꙋ́дꙋже и҆ сꙋ̑щаѧ ᲂу҆бѡ́гимъ є҆ѵⷢ҇льски разда́въ, любо́вь же ца́рскꙋю, и҆ чє́сти, и҆ плеска́нїе сꙋ́щее въ ца́рскихъ, бл҃годꙋ́шнѡ ѡ҆ста́вивъ, хрⷭ҇тꙋ̀ послѣ́дова. Ма́терь ᲂу҆́бѡ и҆ сєстры̀ въ дѣ́вственницѣ сочини́въ, бра́тїю же взе́мъ, и҆ ст҃ы́ни тезоимени́тꙋю го́рꙋ а҆ѳѡ́нскꙋю дости́гъ: но бра́тїю ᲂу҆́бѡ тогда̀ во и҆ны́хъ ѻ҆би́телехъ пребы́ти ᲂу҆вѣщава́етъ, и҆ поне́же вре́мени не даю́щꙋ соединє́нымъ дрꙋ́гъ дрꙋ́гꙋ бы́ти, и҆ житїѐ по бг҃ꙋ соверши́ти. Са́мъ же въ покоре́нїе чꙋ́днагѡ нѣ́коегѡ мꙋ́жа, съ безмо́лвїемъ є҆ди́номꙋ бг҃ꙋ живꙋ́щагѡ предае́тсѧ, и҆́менемъ нїкоди́ма. Оу҆ негѡ́же всѧ́кой за́повѣди, всѧ́кой добродѣ́тели, во смире́нїи дꙋшѝ дѣ́лы наꙋчи́всѧ, и҆ застꙋпле́нїе всечⷭ҇тыѧ бцⷣы, и҆ ко всѣ̑мъ непобори́мꙋю по́мощь во ѿкрове́нїи та́йномъ та́мѡ прїи́мъ, по ѿше́ствїи ѻ҆́нагѡ къ бг҃ꙋ, и҆ въ вели́цѣй ла́ѵрѣ лѣ̑та нѣ́каѧ пожи́въ, съ вели́кимъ тща́нїемъ и҆ соверше́ннымъ ра́зꙋмомъ, любо́вїю безмо́лвїѧ, ѿ ла́ѵры ѿхо́дитъ, и҆ пꙋсты́ню лобыза́етъ. Любо́вь же при́снѡ къ любвѝ приложи́въ, и҆ съ бг҃омъ бы́ти вы́нꙋ жела́ѧ, кра́йнемꙋ жестоковожде́нїю себѐ и҆здае́тъ, и҆ внима́нїемъ ᲂу҆́бѡ прилѣ́жнымъ всегда̀ чꙋ̑вства ᲂу҆держа́въ, къ бг҃ꙋ же ᲂу҆́мъ возвы́сивъ, и҆ во всѐ вре́мѧ мл҃твы ᲂу҆пражне́нїе, и҆ ѡ҆ бж҃е́ственныхъ поꙋче́нїе сотвори́въ, и҆ житїѐ ᲂу҆пра́вивъ и҆зрѧ́днѡ. Де́мѡнскїѧ бра̑ни по́мощїю бж҃їею всѧ́чески побѣжда́етъ, и҆ всено́щными стоѧ́ньми и҆сто́чники сле́зъ дꙋ́шꙋ ѡ҆чи́стивъ, сосꙋ́дъ и҆збра́нный дарѡ́въ бж҃їѧгѡ дх҃а бы́сть, и҆ бг҃овидѣ́нїѧ ча̑стаѧ ви́дѣ. И҆ чꙋ́днѣйше, ꙗ҆́кѡ и҆ прехожде́нїе ра́ди і҆сма́ильтескихъ нахожде́нїй на ѳессалоні́кꙋ, и҆ въ ве́рскїй ски́тъ ѿше́дъ, и҆ съ нѣ́кими гра́жданы понꙋжда́емь бесѣ́довати. Та́же по жи́тельствꙋ прилѣ́жнѡ прехожда́ше, въ не ма́лыхъ ᲂу҆́бѡ лѣ́тѣхъ, соверше́ннѡ и҆ тѣ́ло и҆ дꙋ́шꙋ ѡ҆чи́стивъ, и҆ бж҃їимъ велѣ́нїемъ ве́лїе пома́занїе сщ҃е́нства прїѧ́тъ, и҆ ꙗ҆́кѡ нѣ́кїй невеще́ственный, и҆ ꙗ҆́кѡ рещѝ внѣ̀ себѐ бы́въ, та̑йнаѧ сегѡ̀ соверши́въ, ꙗ҆́кѡ то́кмѡ зри́мь, дꙋша́мъ зрѧ́щихъ ᲂу҆милѧ́тисѧ. Ве́лїй вои́стиннꙋ бѣ̀, и҆ по бг҃ꙋ живꙋ́щымъ дꙋхоно́сецъ познава́шесѧ, ꙗ҆влѧ́шесѧ же сицевы́й сы́й, и҆ внѣ̑шнѧѧ зрѧ́щымъ: держа́вꙋ и҆мы́й на де́мѡны, и҆ ѿ и҆́хъ пре́лести и҆ кова́рства ѡ҆блада́ємыѧ и҆збавлѧ́ѧ: непло́дїе древе́съ, въ бл҃гопло́дїе преложи́въ. бꙋ̑дꙋщаѧ прови́дѣ, и҆ и҆ны́ми бж҃е́ственнагѡ дх҃а дарова́ньми же и҆ плоды̀ ᲂу҆краша́шесѧ. Поне́же є҆́же ᲂу҆́бѡ добродѣ́тєли дѣ́йствовати, въ на́шей вла́сти лежи́тъ: а҆ є҆́же во и҆скꙋшє́нїѧ впа́сти, нѣ́сть въ на́съ. Кромѣ́ же си́хъ нѣ́сть соверше́нїе, и҆лѝ ꙗ҆вле́нїе вѣ́ры къ бг҃ꙋ, [сше́дшее бо, глаго́летъ, дѣѧ́нїе и҆ стра́сть, въ бла́зѣ соверша́етъ по бг҃ꙋ человѣ́ка] въ разли̑чнаѧ и҆ ча̑стаѧ и҆скꙋшє́нїѧ па́сти, вели́кїй се́й попꙋща́етсѧ, да всѣ́ми, и҆ соверше́нъ вои́стиннꙋ ꙗ҆ви́тсѧ. А҆ ꙗ҆̀же ѿвсю́дꙋ, кі́й ᲂу҆́мъ помы́слитъ; ко́е и҆зрещѝ возмо́жетъ сло́во; ꙗ҆̀же пре́жнихъ бѡ́льшїѧ кѡ́зни лю́тагѡ бори́телѧ: и҆ ꙗ҆̀же новоѧвле́нныхъ бг҃обо́рцѡвъ на него̀ навѣ́ты, и҆ клевєты̀, и҆ є҆ли́кѡ ѡ҆ бл҃гоче́стїи подвиза́сѧ, во всѣ́хъ тре́хъ ко два́десѧтимъ лѣ́тѣхъ, ѿ тѣ́хъ претерпѣ̀ ѡ҆ѕлоблє́нїѧ и҆ скѡ́рби разли̑чныѧ. І҆та́льскїй бо ѕвѣ́рь, калаврі́йскїй варлаа́мъ, внѣ́шнею мꙋ́дростїю велемꙋ́дрствꙋетъ, и҆ сꙋето́ю свои́хъ помышле́нїй, всѧ̑ помышлѧ́ѧ вѣ́дати, лю́тꙋю воздвиза́етъ бра́нь на цр҃ковь хрⷭ҇то́вꙋ, и҆ на бл҃гочести́вꙋю на́шꙋ вѣ́рꙋ, и҆ на держа́щыѧ сїю̀ и҆звѣ́стнѡ. Ѻ҆́бщꙋю бо бл҃года́ть ѻ҆ц҃а̀, сн҃а, и҆ ст҃а́гѡ дх҃а, и҆ свѣ́тъ бꙋ́дꙋщагѡ вѣ́ка, ꙗ҆́коже и҆ првⷣнїи возсїѧ́ютъ ꙗ҆́кѡ со́лнце, ꙗ҆́кѡ и҆ хрⷭ҇то́съ предпоказа̀ на горѣ̀ возсїѧ́вый: и҆ про́стѡ, всю̀ си́лꙋ и҆ дѣ́йство трїѷпоста́снагѡ бж҃ества̀ и҆ всѐ ра́знствꙋющее каково́либо бꙋ́ди бж҃е́ственнагѡ є҆стества̀, созда́нное бы́ти ᲂу҆мовре́днѡ наꙋчѝ, и҆ бл҃гоче́стнѡ несозда́нный мꙋ́дрствꙋющыѧ бж҃е́ственнѣйшїй ѻ҆́ный свѣ́тъ, и҆ всю̀ си́лꙋ и҆ дѣ́йство, ꙗ҆́кѡ ниеди́номꙋ сꙋ́щꙋ но́вомꙋ ѿ пребыва́ющихъ є҆сте́ственнѣ въ бз҃ѣ, словесы́ же и҆ списа́ньми простра́ннѣйшими, двобѡ́жныѧ и҆менова̀, и҆ многобѡ́жныѧ, ꙗ҆́коже і҆ꙋдє́и, саве́ллїй же, и҆ а҆́рїй и҆менꙋ́ютъ на́съ. Си́хъ ра́ди ᲂу҆́бѡ бж҃е́ственный григо́рїй, ꙗ҆́кѡ бл҃гоче́стїѧ побо́рникъ, и҆ предста́тель пресвѣ́тлый, и҆ пре́жде всѣ́хъ ѡ҆ се́мъ и҆ предборѧ́сѧ и҆ ѡ҆клевета́емь, по́сланъ бы́въ ѿ це́ркве въ кѡнстантїнопо́ль, и҆ прихо́дитъ. Бж҃е́ственнѣйшемꙋ ᲂу҆́бѡ царю̀ а҆ндроні́кꙋ ѡ҆ бл҃гоче́стїи предзащища́ющꙋ, четве́ртомꙋ ѿ палеоло́гѡвъ, собо́ръ сщ҃е́нный собира́етсѧ. И҆ варлаа́мꙋ прише́дшꙋ, и҆ є҆гѡ̀ пред̾ѿмє́тнымъ ѕлосла̑внымъ ᲂу҆че́нїємъ, и҆ на бл҃гоче́стїе ѡ҆глаго́ланїємъ, дх҃а бж҃їѧ и҆спо́лнисѧ вели́кїй григо́рїй, и҆ въ си́лꙋ неѡбори́мꙋю ѡ҆бле́ксѧ свы́ше, ᲂу҆ста̀ є҆гѡ̀ на бг҃а ѿвє́рстаѧ заградѝ, и҆ до конца̀ посрамѝ: и҆ ѻ҆гнедꙋхнове́нными словесы́ же и҆ списа́ньми, є҆гѡ̀ хвра̑стныѧ є҆́рєси, ꙗ҆́кѡ пе́пелъ сотворѝ. Тѣ́мже и҆ стꙋда̀ не претерпѣ́въ бл҃гоче́стїѧ ра́тникъ, къ латі́нѡмъ, ѿѻнꙋ́дꙋже прїи́де, бѣ́гомъ ѿи́де: по ѻ҆́номъ же а҆́бїе многобѣ́дствїи собо́рнѣ и҆з̾ѡблича́етъ, и҆ списа̑нїѧ сегѡ̀ словесы̀ сопроти́вными разсыпа́етъ. А҆ и҆̀же ѻ҆́ныхъ причасти́вшесѧ па́гꙋбы, нижѐ та́кѡ преста́ша бори́ти на цр҃ковь бж҃їю. Ѿѻнꙋ́дꙋже и҆ нꙋ́ждею мно́гою сщ҃е́ннагѡ собо́ра, и҆ самагѡ̀ царѧ̀, и҆ пре́жде бж҃е́ственнымъ велѣ́нїемъ ᲂу҆вѣ́ривсѧ григо́рїй на а҆рхїере́йскїй престо́лъ возво́дитсѧ, и҆ ѳессалоні́тскїѧ сщ҃е́нныѧ це́ркве па́стырь поставлѧ́етсѧ. Тѣ́мже и҆ вѧ́щшыѧ по́двиги, мно́гихъ пре́жднихъ ѡ҆ правосла́внѣй вѣ́рѣ до́блественнѣ соверша́етъ и҆ терпѣли́вѣ. Лꙋка̑выѧ бо прее́мники а҆кїндѵ́на, и҆ варлаа́ма, мнѡ́гїѧ ꙗ҆́вльшыѧсѧ и҆ лю̑тыѧ, и҆ лю́тыхъ ѕвѣре́й лю̑таѧ рождє́нїѧ, и҆ си́хъ ᲂу҆чє́нїѧ же и҆ списа̑нїѧ ни є҆ди́ножды, и҆лѝ два́жды, и҆лѝ три́жды, но мно́гажды и҆ мно́гими, нижѐ при є҆ди́номъ царѣ̀, и҆лѝ патрїа́рсѣ: но при трїе́хъ по прее́мствꙋ ски́птрѡвъ держа́щихъ, и҆ патрїа́рсѣхъ равночи́сленныхъ, и҆ собо́рѣхъ неꙋдобосчислѧ́емыхъ, словесы́ же и҆ писа́ньми бг҃одꙋхнове́нными, многови́днѡ возвраща́етъ, и҆ до конца̀ побѣжда́етъ. И҆ нѣ́цыи непрело́жнѡ и҆мꙋ́ще, нивочто́же полага́юще го́рнїй сꙋ́дъ, та́кѡ пребы́ша: и҆ всѣ́хъ бо є҆ресе́й сꙋ́ть є҆щѐ ѡ҆ста́тки безстꙋ́дствꙋющїи на побѣди́вшихъ ѧ҆̀ ст҃ы́хъ, да не глаго́лю вседе́рзый ро́дъ і҆ꙋде́йскїй, да́же и҆ до ны́нѣ и҆мы́й неи́стовство на хрⷭ҇та̀: таковы̑ѧ ᲂу҆́бѡ ꙗ҆́кѡ вкра́тцѣ и҆ толи̑кїѧ вели́кагѡ григо́рїа побѣ̑ды на нечести̑выѧ. Бг҃ъ же неизрече́нными ѡ҆́бразы, и҆ къ восто́кꙋ сего̀ ѿсыла́етъ ᲂу҆чи́телѧ. Посыла́етсѧ ᲂу҆́бѡ ꙗ҆́кѡ старѣ́йшина ѿ ѳессалонїкі́и въ кѡнстанті́нь гра́дъ, примири́ти ра́знствꙋющыѧ царѝ. Пое́млетсѧ же ѿ а҆га́рѧнѡвъ, и҆ держи́тсѧ во всѐ лѣ́то, мѣста̀ ѿ мѣ́стъ, и҆ гра́ды ѿ градѡ́въ, страда́льчески преходѧ̀, и҆ ᲂу҆чѧ̀ небоѧ́зненнѡ хрⷭ҇то́вꙋ є҆ѵⷢ҇лїю. И҆ ѻ҆́выѧ ᲂу҆́бѡ ᲂу҆твержда́ѧ и҆ ᲂу҆вѣщава́ѧ, є҆щѐ и҆ молѧ̀ въ вѣ́рѣ пребы́ти, коле́блющыѧсѧ же въ не́й, и҆ нѣ́каѧ недоꙋмѣ́нїѧ и҆ взыска̑нїѧ ѡ҆ бы́вшихъ тогда̀ предлага́ющыѧ, бг҃омꙋ́дреннѡ ᲂу҆твержда́ѧ, и҆ и҆сцѣле́нїе, въ ни́хже глаго́лахꙋ, дово́льнѣйшее ѿдаѧ́ше. Про́чымъ же невѣ̑рнымъ и҆ ѻ҆каѧ́ннѡ ѿто́ргшымсѧ хрⷭ҇тїа́нѡмъ, и҆ ѿлꙋчи́вшымсѧ ко ѻ҆́нымъ и҆ влекꙋ́щымъ на́ша ѡ҆ воплоще́нномъ смотре́нїи гдⷭ҇а и҆ бг҃а на́шегѡ, и҆ ѡ҆ поклоне́нїи ѿ на́съ чⷭ҇тна́гѡ крⷭ҇та̀, и҆ ст҃ы́хъ і҆кѡ́нъ, мно́гажды не ѡ҆бинꙋ́ѧсѧ глаго́лаше. Є҆ще́ же ѡ҆ мѡаме́ѳѣ, и҆ мно́гихъ и҆ны́хъ взыска́нїихъ ѿ ни́хъ предложе́нныхъ, ѻ҆́выѧ ᲂу҆́бѡ и҆мѧ́ше ѡ҆ себѣ̀ дивѧ́щыѧсѧ, ѻ҆́выѧ же на себѐ неи́стовствꙋющыѧ, и҆ рꙋ́ки простира́ющыѧ, и҆̀же и҆ мꙋ́ченически сконча́ли бы є҆го̀, а҆́ще бы не бж҃їимъ про́мысломъ, наде́ждею пѣ́нѧзей, ю҆́же и҆мѧ́хꙋ ѡ҆ не́мъ, пощадѣ́нъ бы́въ. Та́же ѿ хрⷭ҇толюби́выхъ свобожда́шесѧ вели́кїй, и҆ къ своемꙋ̀ ста́дꙋ мч҃нкъ безкро́вный свѣ́тлѡ па́ки ѿхо́дитъ. Ко и҆ны̑мъ мнѡ́гимъ и҆ вели̑кимъ дарова́нїємъ же и҆ пе́рвенствѡмъ, ꙗ҆̀же и҆мѧ́ше, ра́нами хрⷭ҇то́выми и҆ то́й ᲂу҆краси́сѧ, и҆ ꙗ҆̀же хрⷭ҇тѡ́ва, по па́ѵлꙋ, и҆мы́й въ себѣ̀ лишє́нїѧ. И҆ да пока́жемъ нѣ̑каѧ ѻ҆́наго начертава́ющаѧ, сїѧ̀ бѧ́хꙋ є҆гѡ̀ свѡ́йства: є҆́же со превосхожде́нїемъ кро́ткое и҆ смире́нное, [здѣ̀ не ѡ҆ бз҃ѣ и҆ бж҃е́ственныхъ сло́во: и҆́бо въ си́хъ и҆ ѕѣлѡ̀ бѣ̀ побо́рникъ.] непамѧтоѕло́бїе ѕѣлѡ̀ и҆ неѕло́бїе, є҆́же тща́тисѧ по си́лѣ, бла́гшымъ возда́ти, къ немꙋ̀ въ нѣ́кихъ ꙗ҆́вльшымсѧ ѕлы̑мъ. є҆́же ѿню́дъ ᲂу҆до́бнѡ на нѣ̑кїѧ не прїима́ти словеса̀. є҆́же къ грѧдꙋ́щымъ всегда̀ напа́стемъ терпѣли́вое и҆ великодꙋ́шное. є҆́же всѧ́кїѧ сла́сти, и҆ тщесла́вїѧ вы́шшее. є҆́же хꙋдо́мꙋ при́снѡ бы́ти, и҆ неизбы́точественномꙋ во всѣ́хъ потре́бахъ тѣле́сныхъ, и҆́бо въ толи́кое вои́стиннꙋ вре́мѧ не и҆знемо́гшꙋ. Є҆́же терпѣ́нїѧ безмо́лвное же и҆ ти́хое, и҆ при́снѡ бл҃года́тное, та́кѡ до кра́ѧ є҆мꙋ̀ сотворе́но, ꙗ҆́кѡ и҆ ѿ внѣ́шнихъ ꙗ҆́вѣ бы́ти ви́дѧщымъ всѣ̑мъ, є҆́же разꙋ́мное при́снѡ, и҆ внима́тельное же и҆ неразлива́тельное. и҆́мже послѣ́довательное, є҆́же никогда̀ ѻ҆чесє́мъ є҆гѡ̀ бы́ти тщы́мъ сле́зъ, но болѣ́зновати си̑мъ по и҆сто́чникѡмъ сле́зъ. Та́кѡ ᲂу҆́бѡ и҆з̾ нача́ла да́же до конца̀ на стра̑сти и҆ де́мѡны страда́льчески подвиза́всѧ, и҆ ѿ хрⷭ҇то́вы цр҃кве дале́че є҆ретїкѝ и҆згна́въ, и҆ правосла́внꙋю вѣ́рꙋ словесы́ же и҆ списа́ньми и҆з̾ѧсни́въ, и҆ тѣ́ми ꙗ҆́коже печа́тїю всѐ писа́нїе бг҃одꙋхнове́нное запечатлѣ́въ, ꙗ҆́кѡ є҆гѡ̀ житїѐ и҆ сло́во ꙗ҆́коже сло́вꙋ нѣ́коемꙋ бы́ти и҆ печа́ти житїѧ̀ и҆ сло́ва ст҃ы́хъ. Є҆ще́ же своѐ ста́до ѡ҆ тре́хъ и҆ десѧтѝ лѣ́тѣхъ а҆пⷭ҇льски и҆ бг҃оꙋго́днѡ ᲂу҆па́съ, и҆ нра́вными словесы̀ ᲂу҆краси́въ, и҆ ко ѡ҆гра́дѣ нбⷭ҇нѣй ᲂу҆пра́вивъ: и҆ ꙗ҆́кѡ рещѝ, ѻ҆́бщїй дѣ́латель ꙗ҆ви́всѧ живы́хъ же и҆ пото́мъ бꙋ́дꙋщихъ правосла́вныхъ всѣ́хъ, къ премі́рнѣй жи́зни прелага́етсѧ: пожи́въ всѣ́хъ лѣ́тъ, трѝ ко шести́десѧтимъ. И҆ дꙋ́хъ ᲂу҆́бѡ въ рꙋ́цѣ бж҃їи предлага́етъ, тѣ́ло же па́ствѣ ѡ҆ставлѧ́етъ, и҆зрѧ́днѡ въ коне́цъ просвѣще́нное же и҆ просла́вленное ꙗ҆́кѡ нѣ́кїй жре́бїй и҆ сокро́вище пречестно́е. Чꙋдесы́ бо хрⷭ҇то́съ на кі́йждо де́нь вѣ́рнѡ приходѧ́щыѧ бл҃годѣ́йствꙋетъ и҆ недꙋ́гѡвъ всѧ́ческихъ и҆змѣне́нїе да́рꙋетъ, ѿ ни́хже нема́лѡ і҆сто́рїа ѡ҆ не́мъ повѣ́даетъ. тогѡ̀ ᲂу҆́бѡ моли́твами бж҃е поми́лꙋй на́съ, а҆ми́нь.
Пѣ́снь з҃.
І҆рмо́съ: Ѿ і҆ꙋде́и доше́дше:
Дерзнове́нїѧ не и҆́мамъ, є҆́же нарещи́сѧ сы́нъ тво́й, ѻ҆́ч҃е чл҃вѣколю́бче, ꙗ҆́кѡ є҆ди́нагѡ ѿ нає́мникъ твои́хъ бы́ти молю́сѧ, не гнꙋша́йсѧ менѐ зовꙋ́ща: ѻ҆тє́цъ на́шихъ бж҃е бл҃гослове́нъ є҆сѝ.
Ѡ҆скверни́вше пе́рвымъ житїе́мъ жи́знь, и҆ погꙋби́вше бл҃горо́дїе пе́рвое, притеце́мъ є҆ди́номꙋ ѻ҆ц҃ꙋ̀ и҆ бг҃ꙋ на́шемꙋ, покаѧ́нїемъ те́плымъ прїѧ́ти сп҃се́нїе.
Же́стокъ граждани́нъ, є҆мꙋ́же рабо́тати ѻ҆каѧ́нный ѡ҆сꙋди́хсѧ: гла́дъ же, є҆го́же под̾ѧ́хъ, свинїѧ́мъ ᲂу҆гожда́ѧ, крѣ́покъ и҆ нестерпи́мь: но ѡ҆бра́щьсѧ прошꙋ̀, сп҃се, поми́лꙋй мѧ̀.
Бг҃оро́диченъ: Оу҆мерщвле́нное є҆стество̀ ѡ҆живи́ла є҆сѝ, є҆ди́на живо́тъ ро́ждшаѧ дв҃о бцⷣе: тѣ́мже тѧ̀ сп҃се́нїе вѣ́рнїи свѣ́мы, ѻ҆тє́цъ на́шихъ бг҃а пло́тїю ро́ждшꙋю.
И҆́ный. І҆рмо́съ: Не послꙋжи́ша тва́ри:
Словесє́мъ бесѣ́дꙋющїи, и҆ списа́нїємъ твои̑мъ григо́рїе, ра́зꙋмꙋ поꙋча́ютсѧ бж҃їю, и҆ по́лны ꙗ҆влѧ́ютсѧ премꙋ́дрости бж҃їѧ дх҃о́вныѧ, и҆ несозда́ннꙋю бл҃года́ть, и҆ дѣ́йство бж҃їе бг҃осло́вствꙋютъ.
Ме́чь и҆ стрѣ́лы ѕлосла́вныхъ сокрꙋши́лъ є҆сѝ, и҆ го́рдость варлаа́мовꙋ, и҆ всѧ́кꙋю си́лꙋ є҆реті́ческꙋю, ꙗ҆́кѡ тка́нїе паꙋчи́ны расточи́лъ є҆сѝ, а҆́ки ка́мень превели́кїй і҆ера́рше.
Запечатлѣ́сѧ твои́ми словесы̀ и҆ догма́ты вѣ́ра бл҃гочести́выхъ, и҆ де́рзость є҆́реси ста̀ григо́рїе, и҆ низложе́нїе правосла́вїѧ преста̀, и҆ крѣ́пость ѕлосла́вныхъ.
Бг҃оро́диченъ: Стрꙋи̑ тѧ̀ и҆сто́чника, ᲂу҆со́хшїи страсте́й болѣ́зньми, вѣ́дꙋще вои́стиннꙋ, почерпа́емъ сп҃се́нїе, и҆ бж҃е́ствєнныѧ стрꙋи̑, и҆ взыва́емъ: бл҃гослове́нъ всечⷭ҇таѧ, пло́дъ твоегѡ̀ чре́ва.
Пѣ́снь и҃.
І҆рмо́съ: Седмери́цею пе́щь:
Безмѣ́рнагѡ влⷣко, и҆ мно́гагѡ милосе́рдїѧ твоегѡ̀, вѣ́мы бога́тство въ тѧ̀ вѣ́ровавшїи. тѣ́мже тѝ припа́даемъ съ блꙋ́днымъ всѝ те́плѣ: прїимѝ согрѣши́вшыѧ, и҆ къ тебѣ̀ прибѣ́гшыѧ: нѣ́сть бо, нѣ́сть грѣ́хъ ще́дре, твоѐ чл҃вѣколю́бїе побѣди́ти могі́й.
Млⷭ҇рдїѧ ра́ди влⷣко себѐ смири́въ, па́дшымъ твои̑мъ сынѡ́мъ прибли́жилсѧ є҆сѝ: са́мъ бо чл҃вѣколю́бче срѣ́лъ є҆сѝ па́дшихъ, и҆ ѡ҆блобыза́еши, и҆ сп҃се́нїе да́рꙋеши: а҆́ще кто̀ и҆ до́лꙋ па́днетъ, млⷭ҇тивъ сы́й не гнѣ́ваешисѧ, ꙗ҆́кѡ чл҃вѣколю́бецъ.
Стра́шнѣйшїй сꙋ́дъ менѐ ᲂу҆срѧ́щетъ ѽ влⷣко, ꙗ҆́кѡ тѧ̀ чл҃вѣколю́бца и҆ неѕло́бива зрѧ̀, не притека́ю къ тебѣ̀, блꙋ́днагѡ зовы́й гла́сомъ, но въ лѣ́ности житїѐ препровожда́ю: ты̀ ᲂу҆́бѡ млⷭ҇тивъ бꙋ́ди мѝ, и҆ ѡ҆сꙋжде́нїѧ ѻ҆́нагѡ и҆схитѝ ще́дре, покаѧ́нїѧ ра́ди.
Трⷪ҇ченъ: Не трѝ бо́ги сла́вимъ, но є҆ди́но бж҃ество̀, три́ же вои́стиннꙋ ѵ҆поста̑си чти́мъ, ѻ҆ц҃а̀ нерожде́нна, и҆ рожде́нна сн҃а ѿ ѻ҆ц҃а̀, и҆ и҆схо́дна ѿ ѻ҆ц҃а̀ ст҃а́го дх҃а, бг҃а є҆ди́наго трѝ, а҆́ще и҆ зва́нїе ко́еждо, ꙗ҆́коже бг҃ъ є҆́сть вѣ́рнѡ сла́вимаѧ.
Бг҃оро́диченъ: Ѿ мно́гихъ мѧ̀ всенепоро́чнаѧ напа́стей преклоне́на, и҆ печа́лей бꙋ́рею потоплѧ́ема приста́нище сп҃се́нїѧ, твое́ю мл҃твою пречⷭ҇таѧ и҆зба́ви, и҆ ѿ всѣ́хъ и҆схити́вши сп҃сѝ: да тѧ̀ досто́йнѡ ꙗ҆́кѡ те́плꙋю предста́тельницꙋ, сла́влю бцⷣꙋ во всѧ̑ вѣ́ки.
И҆́ный. І҆рмо́съ: Ѻ҆́троки бл҃гочєсти́выѧ въ пещѝ:
Предстои́ши ны́нѣ престо́лꙋ всеще́драгѡ, ꙗ҆́кѡ бг҃осло́вѡвъ подо́бный, и҆ си̑мъ є҆динонра́вный всемꙋ́дре григо́рїе, ѳессалоні́тскїй предсѣда́телю, і҆ера́рхѡвъ добро́то, свѣ́тлѡ ᲂу҆краси́всѧ сла́вою сщ҃еннонача́лїѧ, бг҃ꙋ и҆ ны́нѣ слꙋжа̀.
Вѣ́дый чи́стое твоегѡ̀ помышле́нїѧ бг҃ъ, и҆ пре́жде чре́ва, и҆ пре́жде зача́тїѧ, вѣ́рномꙋ возглаго́ла бж҃е́ственномꙋ цр҃ю̀ ꙗ҆́вѣ, цр҃кве неѡбори́маго бы́ти тѧ̀ побо́рника: тѣ́мже пра́вильнымъ и҆звѣ́ствомъ, мѵ́ромъ запечатлѣ́нъ є҆сѝ сщ҃еннонача́льства.
Побѣжда́етсѧ ꙗ҆́вѣ и҆ бѣ́дствꙋетъ собра́нїе полѷкїндѵ́на дла́нїю твое́ю, и҆ мꙋ́дрыми твои́ми глаго́лы, пресла́вне григо́рїе, ѳессалоні́тскїй предсѣда́телю: и҆ ꙗ҆́кѡ и҆счеза́етъ ды́мъ, и҆счезѐ гнило́е безꙋ́мїе, твои́мъ громогла́снымъ и҆ бг҃осло́внымъ ѧ҆зы́комъ.
Бг҃оро́диченъ: Сло́во бж҃їе въ тебѣ̀ дв҃о, человѣ́ческое є҆стество̀ погрꙋжа́емое страстьмѝ, воз̾ѡбразѝ кра́йнею бл҃госты́нею: и҆ всѐ ѡ҆бновѝ и҆ посвѧтѝ: тѣ́мже тобо́ю сп҃се́ни, тѧ̀ славосло́вимъ во всѧ̑ вѣ́ки.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о:
Ра́дости и҆ весе́лїѧ ны́нѣ, менѐ ра́ди закла́вшемꙋсѧ твоемꙋ̀ тельцꙋ̀, и҆спо́лни сегѡ̀ ѿ тебѐ ча́ющꙋю мою̀ дꙋ́шꙋ бж҃е: заблꙋжде́на прїими́ мѧ, и҆ ᲂу҆мерщвле́на къ жи́зни возведѝ, и҆ въ бж҃е́ственнꙋю ѻ҆де́ждꙋ сп҃се́нїѧ, въ нетлѣ́нїе мѧ̀ ѡ҆блецы̀.
Дꙋ́шы ᲂу҆далє́ныѧ ѿ бг҃а, и҆ бж҃е́ственныхъ дарова́нїй лишє́ныѧ, прїиди́те те́плѣ, и҆ блꙋ́днагѡ ѡ҆браще́нїе воспрїи́мше зове́мъ: ѻ҆́ч҃е бл҃гі́й, и҆́же на нб҃сѣ́хъ, согрѣши́хомъ тѝ всѝ, ѡ҆чи́сти и҆ сп҃сѝ прибѣга́ющыѧ къ млⷭ҇ти твое́й.
Ꙗ҆́кѡ и҆мы́й млⷭ҇рдїѧ мно́жество мно́гое, не гнꙋша́йсѧ менѐ гдⷭ҇и гдⷭ҇и, во мно́гихъ сласте́хъ бога́тство и҆жди́вша, и҆ прибѣга́юща ны́нѣ, и҆ зовꙋ́ща блꙋ́днагѡ гла́сомъ: согрѣши́хъ тѝ, сп҃сѝ прибѣга́ющаго къ млⷭ҇ти твое́й.
Бг҃оро́диченъ: Сп҃се́нїѧ приста́нище и҆ наставле́нїе, и҆ предста́тельницꙋ тѧ̀ и҆́мамъ ра́бъ тво́й, лю́тыхъ всѣ́хъ препѧ́тїй, ꙗ҆́кѡ бл҃га́ѧ къ бг҃ꙋ мольба́ми твои́ми влⷣчце да и҆зба́влюсѧ: ꙗ҆́кѡ на тѧ̀ всю̀ мою̀ наде́ждꙋ возложи́хъ любо́вїю, да вѣ́рою велича́ю тѧ̀.
И҆́ный. І҆рмо́съ: Всѧ́къ земноро́дный:
Зерца́ло бж҃їе бы́лъ є҆сѝ григо́рїе: є҆́же бо по ѡ҆́бразꙋ нескве́рное соблю́лъ є҆сѝ, ᲂу҆́мъ же влⷣкꙋ на стра̑сти плотскі̑ѧ мꙋ́жески поста́вивъ, є҆́же по подо́бїю воспрїѧ́лъ є҆сѝ. ѿѻнꙋ́дꙋже до́мъ бы́лъ є҆сѝ ст҃ы́ѧ трⷪ҇цы свѣтлѣ́йшїй.
Ца́рь бл҃гочести́вый крила́таго тѧ̀ воздꙋ́хоходна показꙋ́етъ, семꙋ̀ спобо́рствꙋюща, ꙗ҆́кѡ всегѡ̀ и҆спо́лнена бж҃е́ственнагѡ дх҃а, на сꙋемꙋ́дреннаго неи́стовствꙋющаго варлаа́ма, глаго́лющаго на высотꙋ̀ непра́вєднаѧ бг҃ꙋ, є҆го́же пра́веднѡ побѣди́лъ є҆сѝ.
Ве́сь бы́въ премꙋ́дрости лꙋ́чшїѧ и҆спо́лненъ пресла́вне, свѣ́тъ мі́рови просвѣти́лъ є҆сѝ, правосла́вїѧ и҆сточи́въ догма́ты: дрꙋ́жествомъ бо и҆зрѧ́днагѡ любомꙋ́дрїѧ премꙋ́дре, бж҃е́ственный стра́хъ во чре́вѣ зача́лъ є҆сѝ, и҆ словеса̀ дх҃а породи́лъ є҆сѝ.
Бг҃оро́диченъ: Пѣ́снь тебѣ̀ вѣ́рнїи согла́снѡ прино́симъ бл҃годаре́нїѧ: ты́ бо дре́внюю разрꙋши́ла є҆сѝ на́шꙋ клѧ́твꙋ бг҃ороди́тельнице, и҆ бл҃гослове́нїе всѝ бж҃е́ственное прїе́млемъ, сп҃се́нїе, просвѣще́нїе, и҆ млⷭ҇ть тобо́ю, и҆ ра́дость вѣ́чнꙋю.
Є҆ѯапостїла́рїй воскрⷭ҇нъ.
Сла́ва, ст҃а́гѡ. Подо́бенъ: Со ᲂу҆ч҃нкѝ:
Ра́дꙋйсѧ ѻ҆тцє́въ похвало̀, бг҃осло́вѡвъ ᲂу҆ста̀, безмо́лвїѧ селе́нїе, премꙋ́дрости до́ме, ᲂу҆чи́телей кра́йность, пꙋчи́но сло́ва. ра́дꙋйсѧ дѣѧ́нїѧ ѻ҆рга́не, видѣ́нїѧ кра́йность, и҆ и҆сцѣли́телю недꙋ́гѡвъ человѣ́ческихъ. ра́дꙋйсѧ дх҃а хра́ме, и҆ ᲂу҆ме́рый и҆ живы́й ѻ҆́ч҃е.
И҆ ны́нѣ, бг҃оро́диченъ: Влⷣчце, всѣ́хъ влⷣчце, и҆ всѣ́хъ вы́шшаѧ, всѣ́хъ же превосходѧ́щаѧ го́рнихъ во́инствъ, прострѝ рꙋ́кꙋ держа́внꙋ, и҆ сохранѝ мі́ръ, сщ҃е́нники бл҃гословѝ тебѣ̀ сщ҃еннодѣ́йствꙋющыѧ, мона́хи же простѝ, молѧ́щыѧ тебѐ. лю́ди всѧ̑ ᲂу҆мирѝ, и҆ сꙋ́щыѧ въ пала́тѣ: во́инство же ᲂу҆крѣпѝ во вре́мѧ бра́ни: се́й гра́дъ соблюдѝ, ст҃а́ѧ бцⷣе. и҆ ны́нѣ на́съ сподо́би ви́дѣти нбⷭ҇ное црⷭ҇тво, и҆ ра́йскꙋю две́рь, є҆гда̀ сѧ́детъ сꙋдїѧ̀ сꙋди́ти вселе́ннѣй, во второ́мъ и҆ стра́шномъ сꙋди́лищи, влⷣчце а҆́гг҃лѡвъ.
На хвали́техъ поста́вимъ стїхѡ́въ и҃, и҆ пое́мъ стїхи̑ры воскрⷭ҇ны є҃: и҆ настоѧ́щыѧ г҃. Гла́съ а҃.
Подо́бенъ: Нбⷭ҇ныхъ чинѡ́въ:
Бл҃же́ннꙋю въ мі́рѣ жи́знь соверши́въ, и҆ ны́нѣ бл҃же́нныхъ сра́дꙋешисѧ собо́рѡмъ, и҆ на землѝ кро́ткихъ, ꙗ҆́кѡ кро́ткїй живе́ши і҆ера́рше григо́рїе: бл҃года́тїю же чꙋде́съ богатѣ́еши ѿ бг҃а, ю҆́же подае́ши чтꙋ́щымъ тѧ̀.
Правосла́вїѧ догма́ты насади́лъ є҆сѝ, ѕлосла́вїѧ бл҃же́нне ѿсѣка́ѧ те́рнїе и҆ вѣ́ры сѣ́мѧ ᲂу҆множа́ѧ до́брѣ, ѡ҆дожде́нїемъ слове́съ твои́хъ, стокра́тный кла́съ, ꙗ҆́кѡ дѣ́ѧтельный земледѣ́латель бг҃ꙋ прине́слъ є҆сѝ.
Непоро́чнагѡ твоегѡ̀ житїѧ̀ бл҃же́нне свѣ́тлости ᲂу҆диви́шасѧ а҆́гг҃лъ и҆ человѣ̑къ собо́ри: и҆́бо произволе́нїемъ тве́рдый страда́лецъ и҆ по́стникъ ꙗ҆ви́лсѧ є҆сѝ, и҆ і҆ера́рхъ, и҆ досто́йный слꙋжи́тель бж҃їй, и҆ дрꙋ́гъ и҆́скреннїй.
И҆ глаго́лемъ сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ, гла́съ ѕ҃:
Во тьмѣ̀ согрѣше́нїй ходѧ́щымъ, свѣ́тъ возсїѧ́лъ є҆сѝ хрⷭ҇тѐ вре́менемъ воздержа́нїѧ, и҆ бл҃гоꙋха́нный де́нь стра́сти твоеѧ̀ покажѝ на́мъ, да вопїе́мъ тебѣ̀: воста́ни бж҃е, поми́лꙋй на́съ.
Сла́ва, то́йже. И҆ ны́нѣ: Пребл҃гослове́нна є҆сѝ: Славосло́вїе вели́кое: И҆ ѿпꙋ́стъ. На лїтꙋргі́и, Бл҃жє́нны гла́са, на ѕ҃. И҆ ст҃а́гѡ пѣ́снь г҃, на д҃. Прокі́менъ, гла́съ є҃: Ты̀ гдⷭ҇и сохрани́ши ны̀, и҆ соблюде́ши ны̀ ѿ ро́да сегѡ̀ и҆ во вѣ́къ. Сті́хъ: Сп҃си́ мѧ гдⷭ҇и, ꙗ҆́кѡ ѡ҆скꙋдѣ̀ прпⷣбный. А҆по́столъ ко є҆вре́ємъ, зача́ло т҃д. А҆ллилꙋ́їа гла́са. Є҆ѵⷢ҇лїе ѿ ма́рка, зача́ло з҃. И҆ ст҃о́мꙋ всѧ̀ слꙋ́жба ст҃и́тельскаѧ. Прича́стенъ: Хвали́те гдⷭ҇а съ нб҃съ: