Въ сꙋббѡ́тꙋ вторы́ѧ седми́цы на ᲂу҆́трени.
А҆ллилꙋ́їа, и҆ тропарѝ, гла́съ в҃:
А҆пⷭ҇ли, мч҃нцы и҆ прⷪ҇ро́цы, ст҃и́телїе, прпⷣбнїи и҆ првⷣнїи, до́брѣ по́двигъ соверши́вшїи, и҆ вѣ́рꙋ соблю́дшїи, дерзнове́нїе и҆мꙋ́щїи ко сп҃сꙋ, ѡ҆ на́съ того̀ ꙗ҆́кѡ бл҃га моли́те сп҃сти́сѧ, мо́лимсѧ, дꙋша́мъ на́шымъ. [Два́жды.]
Сла́ва, ме́ртвенъ: Помѧнѝ гдⷭ҇и ꙗ҆́кѡ бл҃гъ рабы̑ твоѧ̑, и҆ є҆ли̑ка въ житїѝ согрѣши́ша простѝ: никто́же бо безгрѣ́шенъ, то́кмѡ ты̀ могі́й и҆ преста́влєннымъ да́ти поко́й.
И҆ ны́нѣ, бг҃оро́диченъ: Мт҃и ст҃а́ѧ неизрече́ннагѡ свѣ́та, а҆́гг҃льскими тѧ̀ пѣ́сньми почита́юще, бл҃гоче́стнѡ велича́емъ.
И҆ стїхосло́вимъ є҆ди́нꙋ каѳі́смꙋ: Речѐ гдⷭ҇ь гдⷭ҇ви моемꙋ̀:
Та́же сѣда́льны мч҃ничны ѻ҆ктѡ́иха трѝ, и҆ ме́ртвенъ, и҆ бг҃оро́диченъ. И҆ чте́нїе въ шестодне́вцѣ. Та́же, Бл҃же́ни непоро́чнїи: пое́мъ на двѣ̀ статїи̑: и҆ помина́етъ сщ҃е́нникъ ᲂу҆со́пшыѧ, ꙗ҆́коже ѻ҆бы́чно. Въ коне́цъ же каѳі́смы пое́мъ: Бл҃гослове́нъ є҆сѝ гдⷭ҇и: Ст҃ы́хъ ли́къ: и҆ прѡ́чаѧ. Во Сла́вꙋ же и҆ ны́нѣ: є҆ктенїа̀ ѡ҆ ᲂу҆со́пшихъ: Мл҃твꙋ: Бж҃е дꙋхѡ́въ и҆ всѧ́кїѧ пло́ти:
И҆ а҆́бїе сѣда́ленъ, гла́съ є҃: Поко́й сп҃се на́шъ съ првⷣными рабы̑ твоѧ̑, и҆ сїѧ̑ вселѝ во дворы̀ твоѧ̑, ꙗ҆́коже є҆́сть пи́сано, презира́ѧ ꙗ҆́кѡ бл҃гъ прегрѣшє́нїѧ и҆́хъ, вѡ́льнаѧ, и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи чл҃вѣколю́бче.
Сла́ва, коне́цъ.
И҆ ны́нѣ, бг҃оро́диченъ: Ѿ дв҃ы возсїѧ́вый мі́рꙋ хрⷭ҇тѐ бж҃е, сы́ны свѣ́та то́ю показа́вый, поми́лꙋй на́съ.
Канѡ́нъ мине́и со і҆рмосо́мъ на ѕ҃: и҆ ст҃а́гѡ ѻ҆би́тели на д҃: глаго́летсѧ бо і҆рмо́съ и҆ тропа́рь без̾ стїхѡ́въ, и҆ держи́мъ стїхѝ ѿ Тогда̀ потща́шасѧ влады́ки: Не стїхосло́вимъ бо пѣ́сней ѿ нача́ла до ѕ҃-ѧ пѣ́сни, во всѣ́хъ сꙋббѡ́тахъ ст҃ы́ѧ четыредесѧ́тницы, до а҆ка́ѳїста: ѿ шесты́ѧ же пѣ́сни начина́ютсѧ трипѣ́снцы, и҆ пое́тсѧ мине́и по дню̀ ст҃а́гѡ, и҆ трипѣ́снцы: стїхосло́вѧтсѧ же и҆ пѣ̑сни. Четверопѣ́снецъ господи́на і҆ѡ́сифа, є҆гѡ́же краегране́сїе: Пѣ́нїе сїѐ і҆ѡ́сифово. Гла́съ и҃.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ:
Ст҃і́и мно́жайшими мꙋ́ками, мнѡ́гїѧ врагѡ́въ тьмы̑ низложи́ти сподо́бишасѧ сп҃се, и҆ мно́гихъ бл҃гъ твои́хъ ᲂу҆лꙋчи́ша мл҃твами и҆́хъ ꙗ҆́кѡ бл҃гъ, мнѡ́гаѧ моѧ̑ ѡ҆чи́сти прегрѣшє́нїѧ.
Воспои́мъ хрⷭ҇тѡ́вы стрⷭ҇тоте́рпцы, и҆ возопїи́мъ къ ни̑мъ є҆диномꙋ́дреннѡ: влⷣчнимъ подѡ́бницы стрⷭ҇те́мъ, дꙋ́шъ на́шихъ стра̑сти и҆сцѣли́те, пости́тисѧ же ѿ ѕла́гѡ ѻ҆бы́чаѧ на́съ ᲂу҆крѣпи́те.
Преложи́лъ є҆сѝ сме́рть на со́нъ, болѣ́зненнѡ во гро́бѣ поспа́лъ є҆сѝ, и҆ мє́ртвымъ живо́тъ дарова́лъ є҆сѝ: преста́вльшыѧсѧ ᲂу҆́бѡ сп҃се сподо́би стоѧ́нїѧ и҆збра́нныхъ, стрⷭ҇тоте́рпєцъ ст҃ы́хъ мольба́ми.
Бг҃оро́диченъ: Пости́тисѧ мѝ, и҆ ѿстꙋпи́ти ѿ всѧ́кагѡ грѣха̀ ᲂу҆крѣпѝ ѻ҆трокови́це, си́льнаго и҆ безгрѣ́шнаго сло́ва, воплоще́нна неизрече́ннѡ ро́ждшаѧ, и҆ да́ждь мѝ чисти́тельнꙋю ѡ҆скверне́нїй, всенепоро́чнаѧ, сле́зꙋ.
И҆́ный господи́на ѳео́дѡра. Гла́съ г҃.
І҆рмо́съ: Глꙋбина̀ страсте́й:
Мч҃нкѡвъ па́мѧть соверша́емъ бж҃е́ственнѡ мч҃нколю́бцы, прїиди́те возра́дꙋемсѧ, пѣ́сньми ты̑ѧ вѣнча́юще, подвигополо́жника хрⷭ҇та̀ бл҃гослови́мъ.
Ра́нъ пе́рвѣе и҆скꙋ́съ прїе́мше, пото́мъ же ка́менїемъ побїе́ни бы́вше, претре́ни бы́вше, ѕвѣрє́мъ на снѣ́дь да́ни бы́сте, и҆ закла́ни бы́сте ꙗ҆́кѡ а҆́гнцы хрⷭ҇тѡ́вы: но живе́те при́снѡ стрⷭ҇тоте́рпцы.
Сла́ва, трⷪ҇ченъ: Трѝ є҆ди́нымъ є҆стество́мъ совокꙋплѧ́ѧ, є҆ди́но же тремѝ разсѣка́ѧ ли́цы, ꙗ҆́же бж҃ество̀ є҆́сть: саве́ллїа же и҆ а҆́рїа, равномѣ́рныѧ стремни́ны ѿбѣга́ю.
И҆ ны́нѣ, бг҃оро́диченъ: Дв҃а ꙗ҆ви́ласѧ є҆сѝ и҆ по ржⷭ҇твѣ̀, чисто́тствꙋеши во ѻ҆бою̀, и҆ ражда́еши: страннолѣ́пное видѣ́нїе, глаго́лемое и҆ разꙋмѣва́емое, содѣ́ѧнное въ тебѣ̀ бг҃омт҃и.
Сла́ва тебѣ̀ бж҃е на́шъ, сла́ва тебѣ̀.
И҆лѝ сті́хъ: Ди́венъ бг҃ъ во ст҃ы́хъ свои́хъ:
Мꙋ́чениченъ: Кро́вь ва́шегѡ терпѣ́нїѧ, гдⷭ҇ꙋ мо́литсѧ непреста́ннѡ ѡ҆ на́съ, мч҃нцы: тѣ́мже и҆ ны́нѣ помоли́тесѧ пости́тисѧ на́мъ ѿ страсте́й безче́стїѧ.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Поко́инъ: Всемꙋ̀ хотѧ́й сꙋди́ти мі́рꙋ, предстоѧ́щымъ тьма́мъ а҆́гг҃лѡвъ, неѡсꙋжде́ннѡ тогда̀ предста́ти тебѣ̀ сподо́би ᲂу҆со́пшыѧ, вѣ́рнѡ всеще́дрый.
І҆рмо́съ: Глꙋбина̀ страсте́й воста̀ на мѧ̀, и҆ бꙋ́рѧ проти́вныхъ вѣ́трѡвъ: но предвари́въ мѧ́ ты сп҃сѝ сп҃се, и҆ и҆зба́ви ѿ тлѝ, ꙗ҆́кѡ сп҃слъ є҆сѝ ѿ ѕвѣ́рѧ прⷪ҇ро́ка.
Конда́къ: Со ст҃ы́ми ᲂу҆поко́й: І҆́косъ: Са́мъ є҆ди́нъ є҆сѝ безсме́ртный: Ли́стъ к҃, на ѡ҆боро́тѣ.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ:
Тꙋ́чами крове́й ᲂу҆гаси́сте пресла́внїи пла́мень пре́лести: ѻ҆гнѧ̀ ᲂу҆́бѡ бꙋ́дꙋщагѡ на́съ мл҃твами ꙗ҆̀же ко хрⷭ҇тꙋ̀ и҆зба́вите, гдⷭ҇ни стрⷭ҇тоте́рпцы.
Оу҆ста̀ загради́вше львѡ́въ, мꙋ́къ же ѡ҆палє́нїѧ претерпѣ́вше стрⷭ҇тоте́рпцы, сла́дость лꙋ́чшꙋю наслѣ́довасте: є҆ѧ́же ᲂу҆лꙋчи́ти моли́тесѧ, и҆ на́мъ во вѣ́ки.
Всѣ́мъ свѣ́томъ просвѣти́вшесѧ дх҃а до́блїи стрⷭ҇тоте́рпцы, преста́вльшымсѧ вѣ̑рнымъ ѡ҆сла́бꙋ проси́те, и҆ раѧ̀ вхо́дъ, и҆ жи́зни прича́стїе.
Бг҃оро́диченъ: Пѣ́снь приношꙋ̀ тѝ дв҃о, не пре́зри менѐ ѕлы́ми ѡ҆держи́маго, но да́ждь чⷭ҇таѧ и҆справле́нїе соверше́нное посто́мъ, и҆ всѣ́мъ житїе́мъ бл҃гонра́внымъ.
И҆́ный. І҆рмо́съ: Пла́мень ѡ҆роси́вый пе́щный:
Ѻ҆́гнь, и҆ ме́чь, и҆ ѕвѣ́ри, стрⷭ҇тоте́рпцы, ꙗ҆́кѡ сла́дость вмѣни́вше, внегда̀ страда́ти ᲂу҆диви́сте ᲂу҆бі̑йцы ва́шѧ, воспѣва́юще бг҃а ѻ҆тє́цъ на́шихъ.
На ᲂу҆́ды разсѣка́еми, и҆ ѡ҆палѧ́еми, бг҃ꙋ принесо́стесѧ же́ртва бл҃гово́ннаѧ, хрⷭ҇тѡ́вы мч҃нцы: но того̀ ѡ҆ на́съ при́снѡ моли́те.
Трⷪ҇ченъ: Въ трⷪ҇цѣ є҆ди́наго бг҃а сла́влю, ѻ҆ц҃а̀, сн҃а и҆ дх҃а: є҆ди́ницꙋ про́стꙋю, трⷪ҇цꙋ чⷭ҇тнꙋ́ю, нача́ло преднача́льное и҆ є҆диносꙋ́щное.
Бг҃оро́диченъ: Всест҃а́ѧ влⷣчце бцⷣе, мл҃твы рабѡ́въ твои́хъ прїе́млющи, принесѝ всѣ́хъ бг҃ꙋ, да сп҃се́тъ на́съ ѿ всѧ́кагѡ и҆скꙋше́нїѧ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.
Мꙋ́чениченъ: Мч҃нкѡвъ собо́ри, съ нб҃сѐ предста́вше, ва́съ воспѣва́ющыѧ бл҃гослови́те, ѡ҆ст҃и́те, ᲂу҆се́рднѡ постѡ́въ вре́мѧ сконча́ти.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.
Ме́ртвенъ: Вѣ́рою къ тебѣ̀ преста́вльшыѧсѧ, вѣ́дый дѣла̀ человѣ́кѡвъ, вѡ́льнаѧ и҆ невѡ́льнаѧ прегрѣшє́нїѧ проща́ѧ, ᲂу҆поко́й ꙗ҆́кѡ бг҃ъ.
І҆рмо́съ: Пла́мень ѡ҆роси́вый пе́щный и҆ ѻ҆́троки неѡпали́мы сп҃сы́й, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пѣ́снь и҃.
І҆рмо́съ: Побѣди́тели мꙋчи́телѧ:
Мꙋ́къ ви́ды не́мощїю тѣ́ла претерпѣ́вше, вра́чевє болѧ́щымъ стрⷭ҇тоте́рпцы ꙗ҆ви́стесѧ. тѣ́мже зовꙋ̀: мою̀ недꙋ́гꙋющꙋю дꙋ́шꙋ и҆сцѣли́те, во вре́мѧ поста̀ покаѧ́нїемъ.
Оу҆вы̀ мнѣ̀, ка́кѡ преидо́ша всѝ дні́е моѝ въ лѣ́ности! и҆ сѐ коне́цъ приближа́етсѧ, вари́тъ несоверше́нна до́брыми дѣ́лы прїѧ́ти мѧ̀: до́брѣ сконча́вшїи тече́нїе мч҃нцы, да мѝ коне́цъ бл҃гі́й бꙋ́детъ, моли́тесѧ.
Ка́плѧми крове́й запалє́нїѧ безбо́жїѧ ᲂу҆гаси́сте, бж҃е́ственнїи стрⷭ҇тоте́рпцы, и҆ ѿше́дшымъ ѿ сегѡ̀ житїѧ̀ и҆спроси́те вои́стиннꙋ бж҃е́ственный поко́й, и҆ содѣ́ѧнныхъ разрѣше́нїе во вѣ́ки.
Бг҃оро́диченъ: І҆езекі́иль тѧ̀ две́рь непроходи́мꙋю чⷭ҇таѧ прови́дѣ, покаѧ́нїѧ врата̀ всѣ̑мъ ѿверза́ющꙋю ѿча̑ѧннымъ. тѣ́мже молю̀ тѧ̀: стєзѝ мнѣ̀ ѿве́рзи, ко ѻ҆́нымъ ведꙋ́щыѧ ᲂу҆покое́нїємъ.
И҆́ный. І҆рмо́съ: И҆з̾ безнача́льна ѻ҆ц҃а̀:
Многострада̑льныѧ ра̑ны разли́чнѡ претерпѣ́вше, ѻ҆́вїи ᲂу҆́бѡ сгорѣ́вше, дрꙋзі́и сожже́ни бы́вше, и҆ні́и же посѣка́еми, веселите́сѧ страда́льцы воспѣва́юще хрⷭ҇тꙋ̀: по́йте, бл҃гослови́те и҆ превозноси́те во всѧ̑ вѣ́ки.
Кровьмѝ ва́шими ѡ҆сщ҃а́ете концы̀, ма́лыми кропле́ньми, стрꙋи̑ и҆сцѣле́нїй всѣ̑мъ и҆сточа́юще, всехва́льнїи мч҃нцы. тѣ́мже вопїетѐ при́снѡ: по́йте, бл҃гослови́те и҆ превозноси́те во всѧ̑ вѣ́ки.
Бл҃гослови́мъ ѻ҆ц҃а̀ и҆ сн҃а, и҆ ст҃а́го дх҃а, гдⷭ҇а.
Трїѷпоста́снаѧ є҆ди́нице, ѻ҆́ч҃е, сн҃е и҆ дш҃е живы́й, є҆ди́но бж҃ество̀, є҆ди́но ца́рство: тебѐ хва́лѧтъ незаходи́маго свѣ́та а҆́гг҃льскаѧ вѡ́инства, и҆ мы̀ сꙋ́щїи на землѝ пое́мъ, бл҃гослови́мъ и҆ превозно́симъ во всѧ̑ вѣ́ки.
Бг҃оро́диченъ: Сѐ всѝ ро́ди бл҃жи́мъ тѧ̀ пречⷭ҇таѧ, вели̑чїѧ твоѧ̑ зрѧ́ще: ты́ бо ражда́еши преесте́ственнѡ всѣ́хъ творца̀, бг҃а сꙋ́ща и҆ чл҃вѣ́ка. тѣ́мже тѧ̀ бл҃гослови́мъ, и҆ превозно́симъ во всѧ̑ вѣ́ки.
Сті́хъ: Ди́венъ бг҃ъ во ст҃ы́хъ свои́хъ:
Стрⷭ҇тоте́рпцєвъ ли́че, моли́тесѧ ко сп҃сꙋ сп҃сти́ ны, мл҃твы и҆ ны́нѣ творѧ́ще, слꙋжи́ти чи́стѣ воздержа́нїемъ є҆мꙋ̀: по́йте, бл҃гослови́те и҆ превозноси́те во всѧ̑ вѣ́ки.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Оу҆со́пшыѧ бл҃гоче́стнѡ наде́ждею воскрⷭ҇нїѧ, къ вѣ́чной жи́зни воста́ти гдⷭ҇и сподо́би, хвали́ти тѧ̀ чи́стѣ, и҆ сла́вити ѱало́мски: по́йте, бл҃гослови́те, и҆ превозноси́те во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: И҆з̾ безнача́льнагѡ ѻ҆ц҃а̀ рожде́ннаго пре́жде вѣ̑къ бг҃а, и҆ въ послѣ̑днѧѧ ѿ бцⷣы въ пло́ть ѡ҆бле́кшасѧ, ꙗ҆́кѡ соверше́нна человѣ́ка и҆ бг҃а и҆́стинна, по́йте, бл҃гослови́те и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Оу҆ста́вы прешла̀ є҆сѝ:
Ꙗ҆ви́стесѧ бж҃е́ственнїи ꙗ҆́кѡ ᲂу҆́глїе, вещество̀ лꙋка́вое безбо́жїе попали́вше, и҆ мече́мъ бѣсѡ́вскїѧ полкѝ посѣ́кше, до́блїи стрⷭ҇тоте́рпцы, свѣтово́дцы серде́цъ на́шихъ.
Тьмꙋ̀ мꙋче́нїй проидо́сте, и҆ къ свѣ́тꙋ мы́сленномꙋ пресели́стесѧ, до́блїи стрⷭ҇тоте́рпцы: тѣ́мже просвѣти́те смире́ннꙋю дꙋ́шꙋ мою̀, ѡ҆мраче́ннꙋю согрѣше́ньми.
Поболѣ́ша болѣ̑зни преносѧ́ще пресла́внїи стрⷭ҇тоте́рпцы тѣлесѐ, и҆ ны́нѣ преста́вльшымсѧ вѣ̑рнымъ, неболѣ́зненный поко́й про́сѧтъ, и҆ раѧ̀ наслажде́нїе.
Бг҃оро́диченъ: Ꙗ҆ви́сѧ чⷭ҇таѧ влⷣчце бж҃е́ственнаѧ помо́щница, непотрє́бнымъ рабѡ́мъ твои̑мъ, во вре́мѧ воздержа́нїѧ, мл҃твы на́шѧ приносѧ́щи гдⷭ҇ви, вѣ́ки ца́рствꙋющемꙋ.
И҆́ный. І҆рмо́съ: Тебѐ безсме́ртный и҆сто́чникъ:
Ꙗ҆́коже ѻ҆́гнь вложе́ни бы́вше ѿ бг҃а въ зе́млю, попали́сте всѧ́кꙋю ле́сть і҆́дѡльскꙋю, вже́гше свѣти́ло въ концы̀ бл҃гоче́стїѧ стрⷭ҇тоте́рпцы хрⷭ҇тѡ́вы.
Ва́съ ни пла́мень, ни заколе́нїе, ни коле́са, ни стѧгнꙋ̑тїѧ, ни ѡ҆палє́нїѧ, ни и҆на́ѧ мꙋ́ка го́рькаѧ, разлꙋчѝ ѿ любвѝ хрⷭ҇то́вы, стрⷭ҇тоте́рпцы.
Трⷪ҇ченъ: Є҆ди́но и҆ трѝ воспѣва́ю бл҃гоче́стнѡ бж҃ество̀ зра́комъ, ли́цы совокꙋплѧ́ѧ и҆ раздѣлѧ́ѧ: ѻ҆ц҃ъ, сн҃ъ, и҆ ст҃ы́й дх҃ъ, сїѧ̑ є҆ди́но сꙋ́ть.
Бг҃оро́диченъ: Тѧ̀ ѿ ко́рене і҆ессе́ова, и҆ дв҃да пра́ѻтца прозѧ́бшїи же́злъ, всепречⷭ҇таѧ чⷭ҇таѧ велича́емъ, ꙗ҆́кѡ сп҃са́еши дꙋ́шы на́шѧ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀:
Мно́жество мч҃нкъ честно́е, хрⷭ҇та̀ моли́те, въ ми́рѣ и҆сполнѧ́ющымъ на́мъ тече́нїе постѡ́въ, ви́дѣти и҆ поклони́тисѧ и҆ стрⷭ҇те́мъ є҆гѡ̀.
Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.
Ме́ртвыхъ и҆ живы́хъ ꙗ҆́кѡ бг҃ъ, ᲂу҆мертви́вый сме́рть, и҆ жи́знь воста́нїемъ твои́мъ всѣ̑мъ подаѧ́й хрⷭ҇тѐ, ᲂу҆поко́й и҆ рабы̑ твоѧ̑, ꙗ҆̀же преста́вилъ є҆сѝ.
І҆рмо́съ: Тебѐ безсме́ртный и҆сто́чникъ, и҆ ст҃ы́хъ и҆сцѣлє́нїѧ человѣ́чꙋ ро́дꙋ подаю́ща, при́снѡ велича́емъ, ꙗ҆́кѡ сп҃са́еши дꙋ́шы на́шѧ.
Є҆ѯапостїла́рїй: Нб҃о ѕвѣзда́ми ᲂу҆краси́вый ꙗ҆́кѡ бг҃ъ, и҆ твои́ми ст҃ы́ми всю̀ зе́млю просвѣти́вый, содѣ́телю всѣ́хъ пою́щыѧ тѧ̀ сп҃са́й.
Сла́ва: Живы́ми и҆ ме́ртвыми ѡ҆блада́ѧй ꙗ҆́кѡ бг҃ъ, ᲂу҆поко́й твоѧ̑ рабы̑ въ селе́нїихъ и҆збра́нныхъ а҆́ще бо и҆ согрѣши́ша сп҃се, но не ѿстꙋпи́ша ѿ тебѐ.
И҆ ны́нѣ: Сла́дость а҆́гг҃лѡвъ, скорбѧ́щихъ ра́дость, хрⷭ҇тїа́нъ предста́тельнице, дв҃о мт҃и гдⷭ҇нѧ, застꙋпѝ на́съ, и҆ и҆зба́ви вѣ́чныхъ мꙋ́къ.
На хвали́техъ мꙋ́ченичны гла́са.
Сла́ва, самогла́сенъ за ᲂу҆поко́й. И҆ ны́нѣ, бг҃оро́диченъ. На стїхо́внѣ ме́ртвены стїхи̑ры господи́на ѳеофа́на, прилꙋчи́вшагѡсѧ гла́са. Сла́ва, и҆ ны́нѣ, бг҃оро́диченъ. На лїтꙋргі́и бл҃же́нны гла́са, на ѕ҃. По вхо́дѣ тропарѝ: А҆пⷭ҇ли, мч҃нцы: Помѧнѝ гдⷭ҇и: Сла́ва: Со ст҃ы́ми ᲂу҆поко́й: И҆ ны́нѣ, Тебѐ и҆ стѣ́нꙋ: Прокі́менъ, Весели́тесѧ ѡ҆ гдⷭ҇ѣ: Сті́хъ: Бл҃же́ни, и҆́хже ѡ҆ста́вишасѧ беззакѡ́нїѧ: Дрꙋгі́й: Дꙋ́шы и҆́хъ во бл҃ги́хъ водворѧ́тсѧ. А҆по́столъ днѐ, зача́ло т҃ѳ. И҆ ме́ртвенъ, къ солꙋ́нѧнѡмъ зача́ло с҃ѻ. А҆ллилꙋ́їа: Воззва́ша првⷣнїи: Сті́хъ: Бл҃же́ни, ꙗ҆̀же и҆збра́лъ: Є҆ѵⷢ҇лїе ѿ ма́рка, зача́ло ѕ҃. И҆ ѿ і҆ѡа́нна, зача́ло ѕ҃і Прича́стенъ: Ра́дꙋйтесѧ првⷣнїи ѡ҆ гдⷭ҇ѣ: Дрꙋгі́й: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
Си́це ᲂу҆́бѡ быва́етъ слꙋ́жба за ᲂу҆поко́й, въ трѝ сꙋббѡ́ты ст҃а́гѡ и҆ вели́кагѡ поста̀, є҆гда̀ ни є҆ди́нъ є҆́сть пра́здникъ ѿ трїе́хъ: предте́чевъ: ст҃ы́хъ четы́редесѧти мч҃никѡвъ: и҆лѝ бл҃говѣ́щенїѧ.