Въ недѣ́лю ве́чера,
во свѣти́льничное поста́вимъ стїхѡ́въ і҃: и҆ пое́мъ ᲂу҆мили́тельны ѻ҆смогла́сника д҃, и҆ трипѣ́снца подѡ́бны господи́на і҆ѡ́сифа. Гла́съ и҃,
Подо́бенъ: Неизче́тенъ:
Безчи́слєннаѧ тѝ прегрѣши́въ, безчи́сленныѧ мꙋ́ки ѡ҆жида́ю: скре́жета зꙋ́бнагѡ, и҆ пла́ча неꙋтѣ́шимагѡ, гее́нны ѻ҆́гненныѧ, и҆ тьмы̀ и҆ та́ртара, сꙋдїѐ пра́веднѣйшїй: сле́зы мѝ ᲂу҆́бѡ да́рꙋй, и҆́миже ѡ҆брѧ́щꙋ ѡ҆ставле́нїе и҆ ѕлы́хъ мои́хъ разрѣше́нїе, постѧ́сѧ и҆ зовы́й тѝ: влⷣко хрⷭ҇тѐ, ᲂу҆ще́дри мѧ̀ за вели́кꙋю и҆ бога́тꙋю млⷭ҇ть.
Подо́бенъ:
Менѐ заблꙋ́ждшаго на гора́хъ лю́тыхъ престꙋпле́нїй, взыщѝ сло́ве, и҆ къ тебѣ̀ воззовѝ, ѻ҆бы́чаи лꙋка̑выѧ ᲂу҆ма̀ моегѡ̀ дале́че ѿгонѧ́ѧ, ᲂу҆ме́рша па́ки ѡ҆живѝ, и҆ посто́мъ ѡ҆чи́сти, въ пла́чѣ непреста́нномъ вопїю́ща и҆ глаго́люща: влⷣко хрⷭ҇тѐ, ᲂу҆ще́дри мѧ̀ за вели́кꙋю и҆ бога́тꙋю млⷭ҇ть.
И҆́на стїхи́ра господи́на ѳео́дѡра, гла́съ то́йже.
Подо́бенъ: Пресла́вное:
Поста̀ наче́нше седми́цꙋ тре́тїю, трⷪ҇цꙋ чⷭ҇тнꙋ́ю восхва́лимъ вѣ́рнїи, про́чее ра́достнѡ преходѧ́ще, плотскі̑ѧ же стра̑сти ᲂу҆вѧди́вше ѿ дꙋ́шъ на́шихъ, цвѣ́ты бж҃е́ствєнныѧ пожне́мъ, вѣнцы̀ и҆спле́тше нача́льницѣ дне́й, да всѝ хрⷭ҇та̀ ꙗ҆́кѡ побѣди́телѧ, вѣнцы̀ носѧ́ще воспои́мъ.
И҆ мине́и г҃: Сла́ва, и҆ ны́нѣ, бг҃оро́диченъ.
Свѣ́те ти́хїй: По вхо́дѣ, прокі́менъ, гла́съ и҃: Не ѿвратѝ лица̀ твоегѡ̀ ѿ ѻ҆́трока твоегѡ̀: [Зрѝ ли́стъ ѻ҃з]
На стїхо́внѣ самогла́сенъ днѐ, два́жды.
Гла́съ и҃: Брозды̑ и҆сплюва́хъ ѻ҆те́чєскїѧ, непостоѧ́ннымъ ᲂу҆мо́мъ, со ско́тскими грѣха̀ помышле́ньми пожи́хъ, всѐ моѐ житїѐ и҆жди́въ блꙋ́днѡ ѻ҆каѧ́нный а҆́зъ, пи́щи лише́нъ ᲂу҆твержда́ющїѧ се́рдце, вре́меннѡ ᲂу҆тꙋчнѧ́ющею сла́стїю насы́тихсѧ: но ѻ҆́ч҃е бл҃гі́й, не затвори́ ми человѣколю́бныѧ ᲂу҆тро́бы, но ѿве́рзъ прїими́ мѧ ꙗ҆́кѡ блꙋ́днаго сы́на, и҆ сп҃си́ мѧ.
Мч҃ниченъ: Мч҃ницы гдⷭ҇ни всѧ́ко мѣ́сто ѡ҆свѧща́ете, и҆ всѧ́къ недꙋ́гъ врачꙋ́ете: и҆ ны́нѣ моли́те и҆зба́витисѧ сѣте́й вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже: Нбⷭ҇наѧ пою́тъ тѧ̀, ѡ҆бра́дованнаѧ мт҃и безневѣ́стнаѧ, и҆ мы̀ славосло́вимъ неизслѣ́дованное твоѐ ржⷭ҇тво̀ бцⷣе, молѝ сп҃сти́сѧ дꙋша́мъ на́шымъ.
И҆ про́чее послѣ́дованїе, ꙗ҆́кѡ пред̾ѧви́сѧ.