Акафист Искуплению

Конда́къ а҃

Возбра́нный воево́до, Хрⷵте́ бж҃е на́шъ, пре́жде сложе́нȉѧ мі́ра на сп҃сенȉе ѡ҆предѣле́нный, воплоти́тисѧ ѿ приснодв҃ы мр҃і́и изво́лилъ є҆҆сѝ, да принесеши себѐ, ѩ҆́кѡ жертв непоро́чн, и кро́вȉю твое́ю примири́ши на́съ роди́телю твоем̀. Мы́ же, ѩ҆́́кѡ искпи́телю на́шем, бл҃года́рнѣ взыва́емъ тѝ: І̑и҃се, и҆скпи́телю мі́ра, сп҃се, сп҃сѝ на́съ.

І̑́косъ а҃.

А҆́гг҃льскихъ во́инствъ и҆ мі́ра тво́рче, въ непристꙋ́пнѣй сѣдѧ́й славѣ на прⷵто́лѣ бжⷵтва̀, любвѐ ра́ди къ человѣ́ческомꙋ ро́дꙋ, по ѻ҆́бразꙋ твоемꙋ̀ созда́нномꙋ во сла́вѣ, воплоти́всѧ, себѐ самого̀ оу҆ма́лил є҆сѝ. Мы́ же, сла́вѣ твое́й дивѧ́щесѧ, оу҆ничиже́нȉю же па́че и҆зꙋмлѧ́ющесѧ, славосло́вимъ тѧ̀ си́це:

І̑и҃се, бж҃е предвѣ́чный, е҆ди́нъ сы́й присносꙋ́щныѧ трⷪ҇цы.

І̑и҃се, сне бжȉй е҆диноро́дный, ѻ҆ц҃ꙋ̀ и дх҃ꙋ соприсносла́вный.

І̑и҃се, а҆́гг҃лѡмъ недомы́слимый, человѣ́кѡмъ непостижи́мый.

І̑и҃се, всеѧ̀ тва́ри превысоча́йшȉй, бжⷵтво́мъ непристꙋ́пный.

І̑и҃се, сло́ве ѻ҆́ч҃ȉй, ѿ дв҃ы воплоти́тисѧ бл҃говоли́вый.

І̑и҃се, сн҃е бг҃а жива́гѡ, сн҃ъ чл҃вѣ́ческȉй бы́вый.

І̑и҃се, содѣ́телю мі́ра, себѣ́ самомꙋ̀ пло́ть дх҃омъ сотвори́вый.

І̑и҃се, грѣхѝ на́шѧ прȉе́мый, крⷵто́мъ свои́мъ на́съ и҆скꙋпи́вый.

І̑и҃се, ѻ҆ц҃а̀ въ трⷪ҇цѣ сла́вимаго си́мъ оу҆ми́лостивый.

І̑и҃се, до зра́ка ра́бȉѧ оу҆ма́ленный, вы́ше небесѐ вознесы́йсѧ.

І̑и҃се, на прⷵто́лѣ трⷪ҇цы возсѣ́дый, дх҃а ѿ ѻ҆ц҃а̀ на́мъ ниспосла́вый.

І̑и҃се, во смире́нȉи сше́дый, во сла́вѣ сꙋди́ти всемꙋ̀ мі́рꙋ грѧды́й.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́к в҃

Го́рдостнѣ пе́рвый человѣ́къ, бо́гъ бы́ти возжелѣ́в, ѿ бл҃года́тныѧ жи́зни, ѿ тебѐ, бг҃а и҆ творца̀ своегѡ̀, ѿпа́дый безꙋ́мнѣ, не ѡста́вленъ бы́сть тоб́ою, гдⷵи, но а҆́ще и҆ и҆згна́лъ є҆сѝ е҆го̀ и҆зⸯ раѧ̀ сла́дости, ѻ҆ба́че бжⷵтвеннѣ сп҃стѝ предⸯѡпредѣли́лъ е҆сѝ, да поми́лованȉи тобо́ю, па́ки зове́мъ: Аллилꙋ́ȉа.

І҆́косъ в҃.

Никто́же взы́де на нб҃о, то́кмѡ ты́, сн҃е бж҃ȉй, сше́дый съ нб҃с̀е, ви́дѧ человѣ́ка ѿ жи́зни бжⷵтвенныѧ правосꙋ́днѣ ѿлꙋче́ннаго, ѿ дȉа́вола же неисцѣ́льнѣ мꙋ́чима. Не терпѧ̀ созда́нȉѧ рꙋкꙋ̀ твое́ю зрѣ́ти ги́блема, сни́ти на зе́млю человѣколю́бнѣ бл҃говоли́лъ е҆сѝ, да примири́ши роди́телю зовꙋ́щыѧ тѝ си́це:

І̑и҃се, ꙗ҆́кѡ бг҃ъ бл҃ги́й, ѿпа́дшихъ млⷵтȉю твое́ю не ѡ҆ста́вивый.

І̑и҃се, па́ки на́съ сп҃стѝ хотѧ́й, премⷣростȉю свое́ю взыска́вый.

І̑и҃се, пра́вды и҆ милосе́рдȉѧ ра́ди, да не до конца̀ поги́бнемъ, и҆зⸯ раѧ̀ человѣ́ка и҆згна́вый.

І̑и҃се, дȉа́воломъ прельще́нныхъ, въ ра́бствѣ томꙋ̀ на́мъ бы́ти попꙋсти́вый.

І̑и҃се, го́рькою сме́ртȉю, грѣхѡ́въ на́шихъ ра́ди, промысли́тельнѣ на́съ наказа́вый.

І̑и҃се, въ по́тѣ лица́ трꙋди́тисѧ и҆ въ ско́рбехъ жи́ти человѣколю́бнѣ на́съ наста́вивый.

І̑и҃се, зако́нъ і҆ꙋде́ѡмъ, не́мѡщи ѡ҆блича́вый, рꙋко́ю мѡѷсе́евою дарова́вый.

І̑и҃се, прⷪ҇ро́ки пресла́вными и҆ вожди̑ мꙋ́дрыми тѣ́хъ рꙋководи́вый.

І̑и҃се, ꙗ҆зы́чники заблꙋ́ждшыѧ творе́ньми мі́ра просвѣща́ѧй и҆ со́вѣстȉю наста́влѧѧй.

І̑и҃се, напослѣ́докъ лѣ́тъ всемꙋ́ мі́рꙋ себе́ тѣле́снѣ ꙗ҆ви́вый.

І̑и҃се, ѻ҆ц҃а́ своего̀ въ тебѣ̀ самѣ́мъ мі́рꙋ ѿкры́вый.

І̑и҃се, дх҃а ст҃а́го ѿ ѻ҆ц҃а́ посла́ти па́ки бл҃говоли́вый.

І̑и҃се, и҆скꙋпи́тел. Мі́ра, сп҃се, сп҃сѝ на́съ.

Конда́къ г҃.

Чл҃вѣ́къ бы́въ, хрⷵтѐ бж҃е, да человѣ́кѡвъ бо́ги по бл҃года́ти содѣ́лаеши: сегѡ̀ ра́ди неизрече́ннѡ себѐ плототвори́ши, да на́съ ѡ҆бг҃отвори́ши, тѝ со а҆́гг҃лы подвиза́ѧ вопи́ти: бг҃ꙋ въ вы́шнихъ сла́ва, на земли́ съ бг҃омъ ми́ръ, въ человѣ́цѣхъ сегѡ̀ ра́ди бл҃говоле́нȉе. Тѣ́мже зове́мъ въ трⷪ҇цѣ сла́вимомꙋ бг҃ꙋ: А̑ллилꙋ́ȉа.

І̑́косъ г҃.

Е҆́ѵы немощно́е, ѿ тва́ри и҆ска́вшȉѧ ѡ҆боже́нȉѧ, и҆справлѧ́ѧ, во оу҆тро́бꙋ смире́нныѧ дв҃ы всели́лсѧ є҆сѝ, бжⷵтво́мъ селовѣ́чество растворѧ́ѧ. Пречⷵтаѧ же, ѿ дх҃а ст҃а́гѡ зача́тȉе воспрȉе́мши, бг҃а во чре́вѣ свое́мъ и҆мꙋ́щи, наꙋчѝ на́съ зва́ти воплоти́вшемꙋсѧ та́кѡ:

І̑и҃се, ѻ҆ц҃ꙋ̀ твоемꙋ̀ нбⷵномꙋ послꙋшанȉе всецѣ́лое ꙗ҆ви́вый.

І̑и҃се, ѿ ст҃а́гѡ дх҃а воплоти́выйсѧ, въ же́ртвꙋ себѐ бл҃говоли́вый.

І̑и҃се, а҆́гнче бж҃ȉй, въ же́ртвꙋ за грѣхи́ на́ша ѻ҆ц҃ꙋ̀ себѐ приведы́й.

І̑и҃се, клѧ́твꙋ ѿлꙋче́нȉѧ за грѣхопаде́нȉе на́ше си́мъ ѿѧ́вый.

І̑и҃се, и҆ а҆́гг҃льскȉѧ оу҆мы̀ та́йною домострои́тельства оу҆диви́вый.

І̑и҃се, и҆ само́й мт҃ри твое́й ѻ҆́бразъ воплоще́нȉѧ не ѿкры́вый.

І̑и҃се, по смире́ннѣмъ глаго́лѣ дв҃ы: сѐ, раба̀ сдⷵнѧ, воплоти́выйсѧ.

І̑и҃се, ма́терȉю і҆ѡа́нна въ до́мѣ заха́рȉи ра́достнѣ велича́нный.

І̑и҃се, го́рькꙋю держа́вꙋ врагѡ́въ на́шихъ смире́нȉемъ посрами́вшȉй.

І̑и҃се, ꙗ҆́кѡ ѻ҆́трокъ і҆и҃лѧ, ѿ негѡ́же произошла́ е҆́сть, мт҃рь твою̀ оу҆бл҃жи́вшȉй.

І̑и҃се, е҆лȉсаве́тою, ꙗ҆́кѡ мр҃і́а мт҃и твоѧ̀, гдⷵи, оу҆бл҃же́нный.

І̑и҃се,прⷣте́чею і҆ѡа́нномъ во чре́вѣ мт҃ре чꙋднѣ просла́вленный.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ д҃.

Чл҃вѣ́къ бы́въ, бг҃ъ сы́й, ѡ҆брѣ́затисѧ въ ѻ҆смы́й де́нь не возгнꙋша́лсѧ е҆сѝ, зако́нъ ꙗ҆́кѡ законода́вецъ и҆сполнѧ́ѧ, завѣ́тъ же но́вый предначина́ѧй. Сегѡ̀ ра́ди, сȉѐ зна́менȉе ѡ҆брꙋче́нȉѧ съ цр҃ковȉю твое́ю восхвалѧ́юще, сп҃си́тельное и҆́мѧ і҆и҃съ прославлѧ́емъ, глаго́люще со а҆рха́гг҃ломъ: А̑ллилꙋ́ȉа.

І̑́косъ д҃.

Е҆ѵⷢ҇льскꙋю бл҃года́ть предначина́ѧ, дре́внȉй зако́нъ ѡ҆брѣ́занȉемъ свои́мъ запечатлѣ́лъ е҆сѝ: же́ртвы крⷵтныѧ проѻ́бразъ и҆сполнѧ́ѧ, въ завѣ́тъ вѣ́чный но́вымъ ѡ҆брѣ́занȉемъ кр҃ще́нȉѧ ко ѻ҆ц҃ꙋ̀ на́съ приве́лъ є҆҆сѝ. Мы́ же на тѧ̀, сп҃стѝ на́съ прише́дшаго, оу҆пова́юще, бл҃гонаде́жнѡ вопȉе́мъ:

І̑и҃се, бж҃е и҆́стинный и҆ чл҃вѣ́къ соверше́нный, кромѣ̀ грѣха̀ бы́вый.

І̑и҃се, всѧ̑ зако́ны и҆спо́лнивый и҆ ни е҆ди́ныѧ непра́вды не сотвори́вый.

І̑и҃се, завѣ́тъ но́вый, бл҃года́тȉю ст҃а́гѡ дх҃а оу҆станови́вый.

І̑и҃се, кро́вь пречⷵтꙋю во ѡ҆брѣ́занȉи твое́мъ проли́вый.

І̑и҃се, и҆скꙋпи́тельнꙋю же́ртвꙋ е҆щѐ въ младе́нчествѣ предⸯѡбрази́вый.

І̑и҃се, немощны́й зако́нъ за́повѣдей бл҃года́тȉю замѣни́вый.

І̑и҃се, цр҃ковь твою̀, ꙗ҆́кѡ невѣ́стꙋ, себѣ́ предⸯѡбрꙋчи́вый.

І̑и҃се, и҆́менемъ свои́мъ, сп҃си́телѧ е҆ѧ̀, чл҃вѣколю́бнѡ ю҆̀ прȉꙋсво́ивый.

І̑и҃се, наде́ждо сп҃се́нȉѧ на́шегѡ, си́лꙋ и҆́мене твоегѡ̀ на́мъ дарова́вый.

І̑и҃се, ко ѡ҆брѣ́занȉю страсте́й на́шихъ страда́ньми свои́ми призва́вый.

І̑и҃се, мл҃твѣ и҆́менемъ твои́мъ на́съ грѣ́шныхъ наꙋчи́вый.

І̑и҃се, сн҃е бж҃ȉй: поми́лꙋй на́съ по млⷵти твое́й, моли́тисѧ просвѣти́вый.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ е҃.

Жи́знȉю сокрове́нною съ пречⷵтою мт҃рȉю въ до́мѣ і҆ѡ́сифовѣ жи́вый, и҆ въ бл҃года́ти оу҆ бг҃а и҆ человѣ̑къ преꙋспѣ́вый, прише́лъ е҆сѝ ко і҆ѡа́ннꙋ крⷵти́тисѧ ѿ негѡ̀, не вѣ́дый грѣха̀ же возбранѧ́ше тѝ, оу҆ тебѐ просѧ̀ кр҃ще́нȉѧ. Повелѣ́нный же тобо́ю, во і҆ѻрда́нѣ крⷵти́ тѧ, со стра́хомъ зовы́й: Аллилꙋ́ȉа.

І̑́косъ е҃.

Е҆го́же оу҆́зриши въ водѣ̀ кр҃ща́ема, дх҃а съ нб҃сѐ сходѧ́ща и҆ на не́мъ пребыва́юща, то́й е҆́сть сн҃ъ мо́й возлю́бленный: и҆ се́й е҆́сть крⷵтѧ́й дх҃омъ ст҃ы́мъ, сего̀ ви́дѣвъ, рече́ши лю́демъ: се а҆́гнецъ бж҃ȉй, взе́млѧй грѣхѝ мі́ра, е҆мꙋ́же нѣ́смь досто́инъ ѿреши́ти реме́нь сапогꙋ е҆гѡ̀. Мы́ же, чрезⸯ негѡ̀ бл҃говоле́нȉе полꙋчи́вше, глаго́лемъ съ вѣ́рою:

І̑и҃се, во і҆ѻрда́нѣ кр҃ща́ющꙋсѧ тебѣ̀, гдⷵи, трⷪ҇цꙋ ꙗ҆ви́вый.

І̑и҃се, про́повѣдь ѡ҆ не́й ꙗ҆вле́нȉемъ свои́мъ ѿкры́вый.

І̑и҃се, ѻ҆ц҃е́мъ свидѣ́тельствованный и҆ дх҃омъ ст҃ы́мъ пома́занный.

І̑и҃се, црⷵтво прест҃ы́ѧ трⷪ҇цы возстанови́ти предꙋка́занный.

І̑и҃се, держа́вꙋ дȉа́волю разрꙋша́ти начина́ѧ, погрꙋже́нȉем и҆зⸯ воды̀ того̀ и҆згна́вый.

І̑и҃се, и҆ на́съ крⷵти́ти повелѣ́вый, ѿрещи́сѧ ѿ негѡ̀ наꙋча́ѧй.

І̑и҃се, ѿ пра́ведныѧ клѧ́твы человѣ́ки и҆збавлѧ́ѧй, на́съ ра́ди оу҆ничижи́выйсѧ.

І̑и҃се, на́шꙋ безѻ́бразнꙋю наготꙋ̀ покрыва́ѧй, во і҆ѻрда́нѣ ѻ҆бнажи́выйсѧ.

І̑и҃се, грѣха̀ не вѣ́дый и҆ на́ша грѣхѝ понесы́й, ѿ ни́хъ ѡ҆мы́выйсѧ.

І̑и҃се, всю̀ тва́рь ѡ҆бнови́ти хотѧ́й, ѡ҆бнови́тельнꙋю бл҃года́ть водѣ̀ дарова́вый.

І̑и҃се, зна́менȉемъ крⷵтны́мъ непостижи́мою си́лою во́дꙋ ѡ҆сщ҃а́ѧй.

І̑и҃се, въ рѣка́хъ и҆ е҆зе́рахъ стрꙋи̑ всемогꙋ́щею бл҃года́тȉю ѡ҆бновлѧ́ѧй.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ ѕ҃.

Сла́вꙋ бжⷵтва̀ въ преѡбраже́нȉи твое́мъ на горѣ́ ѳавѡ́ръ а҆пⷵлѡмъ показа́лъ є҆сѝ, хрⷵтѐ сп҃се, да не то́кмѡ распѧ́тȉе твое́ оу҆разꙋмѣ́ютъ во́льное, но и҆ црⷵтвȉе бж҃ȉе прише́дшее въ си́лѣ оу҆́зрѧтъ, и҆ та́кѡ съ мѡѷсе́емъ и҆ и҆лȉе́ю тебѣ̀, ꙗ҆́кѡ бг҃ꙋ, покло́нѧтсѧ и҆ со стра́хомъ и҆ ра́достȉю возопȉю́тъ: Аллилꙋ́ȉа.

І̑́косъ ѕ҃.

Прѡбрази́вшагосѧ тѧ̀ бжⷵтвенною сла́вою оу҆чн҃кѡвъ лꙋ́чшȉи ви́дѣвше, со стра́хомъ ни́цъ падо́ша. Пе́тръ же восхище́нный взыва́ше: гдⷵи, добро̀ е҆́сть на́мъ здѣ̀ бы́ти. Мѡѷсе́й же и҆ и҆лȉа̀ ѡ҆бⸯ и҆схо́дѣ твое́мъ бесѣ́доваша. Мы́ же, а҆́ще и҆ послѣ́днѣйшȉи ѿ оу҆ч҃ни̑къ твои́хъ е҆смы̀, вхыва́емъ тѝ те́плѣ:

І̑и҃се, е҆щѐ пре́жде воскрⷵнȉѧ и҆ вознесе́нȉѧ сла́вꙋ бжⷵтва̀ ꙗ҆ви́вый.

І̑и҃се, оу҆ч҃нкѝ твоѧ̑ зрѣ́ти крⷵтное распѧ́тȉе оу҆крѣпи́вый.

І̑и҃се, бжⷵтвеннꙋю сла́вꙋ твою́ ꙗ҆́вѣ тѣ̑мъ показа́вый.

І̑и҃се, и҆лȉю̀ съ нб҃сѐ, мѡѷсе́а и҆зⸯ ме́ртвыхъ, ꙗ҆́кѡ всеси́льный, воззва́вый.

І̑и҃се, лице́мъ свои́мъ, ꙗ҆́кѡ со́лнце, свѣ́тлѡ возсȉѧ́вый.

І̑и҃се, и҆ тва́рь блиста́нȉемъ ѡ҆дѣѧ́нȉй твои́хъ сла́внѡ просла́виввый.

І̑и҃се, ра́йское бл҃женство, человѣ́кѡмъ предназна́ченное, показа́вый.

І̑и҃се, терпѣ́ти крⷵтъ сво́й на землѝ и҆ на́съ всѣ́хъ призва́вый.

І̑и҃се, црⷵтвꙋ несозда́нномꙋ присносꙋ́щномꙋ земны́хъ наꙋча́ѧй.

І̑и҃се, бл҃года́тномꙋ созерца́нȉю црⷵтвȉѧ бж҃ȉѧ просвѣща́ѧй.

І̑и҃се, пре́лєстныѧ пꙋти̑ позна́нȉѧ преѡбраже́нȉемъ твои́мъ ѡ҆бличи́вый.

І̑и҃се, ѿ сꙋ́етныѧ сла́вы и҆ тлѣ́ннагѡ бога́тства на́съ ѿврати́вый.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ з҃.

А҆́гг҃лами на превознесе́ннѣмъ прⷵто́лѣ носи́мый, и҆ на ѳавѡ́рѣ сла́вꙋ црⷵтвȉѧ твоегѡ̀ ꙗ҆ви́вый, на подⸯѧре́мное жребѧ̀, а҆́гнче бж҃ȉй, возсѣ́лъ є҆сѝ, да го́рькое ца́рство врага̀ крⷵто́мъ побѣди́ши. Дѣ́ти же є҆вре́йстȉи, при́снѡ хлѣ́ба тлѣ́ннагѡ и҆ ца́рства земна́гѡ и҆́щꙋще воспѣва́ти ꙗ҆́кѡ бг҃ꙋ: Аллилꙋ́ȉа.

І̑́косъ з҃.

Сле́зы пролива́лъ є҆сѝ, сп҃си́телю мі́ра, къ і҆ерⷵли́мꙋ грѧды́й и҆ ꙗ҆́кѡ цр҃ь і҆и҃левъ сла́вимый: ви́дѣлъ бо є҆сѝ, ꙗ҆́кѡ и҆ въ се́й ча́съ и҆збра́нный наро́дъ не позна́лъ є҆́сть посѣще́нȉѧ мессі́и своегѡ̀ и҆ гдⷵа. Мы́ же, вѣ́дѧще тѧ̀ цр҃ѧ̀ нбⷵнаго, и҆скꙋпи́ти крⷵто́мъ грѧдꙋ́щаго лю́ди своѧ̑ ѿ держа́вы вра́жȉѧ, вопȉе́мъ вѣ́рнѡ:

І̑и҃се, гдⷵи госпо́дствꙋющихъ, херꙋві́мами носи́мый.

І̑и҃се, а҆́гнче бж҃ȉй, на закла́нȉе ѻ҆слѧ́темъ вози́мый.

І̑и҃се, во своѧ̑ прише́дый и҆ свои́ми ѡ҆сꙋжде́нный.

І̑и҃се, на во́льное распѧ́тȉе за грѣхѝ мі́ра ѡ҆брече́нный.

І̑и҃се, ѽса́нна, ꙗ҆́кѡ царю̀ земно́мꙋ, въ слꙋ́хъ прȉѧ́вый.

І̑и҃се, распни́ є҆го̀, ꙗ҆́кѡ сн҃а бж҃ȉѧ: претерпѣ́вый.

І̑и҃се, наро́дъ и҆збра́нный, ꙗ҆́кѡ ѻ҆сли́цꙋ оу҆по́рнꙋю, ѡ҆ста́вивый.

І̑и҃се, ꙗ҆зы́чники, ꙗ҆́кѡ жребѧ̀ младо́е, въ црⷵтвȉе и҆збра́вый.

І̑и҃се, и҆ тѣ̑мъ къ концꙋ̀ мі́ра ѿпаде́нȉе предрека́вый.

І̑и҃се, и҆́стиннымъ є҆вре́ємъ, є҆гда̀ рекꙋ́тъ: бл҃гослове́нъ грѧды́й, ѡ҆браще́нȉе ѡ҆бѣща́вый.

І̑и҃се, да всѧ̑ по млⷵти поми́лꙋеши, въ противле́нȉе всѣ́хъ затвори́вый.

І̑и҃се, врата̀ ра̑йскаѧ всѣ̑мъ лю́демъ крⷵто́мъ ѿвори́вый.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ и҃.

И҆́же хо́щетъ въ ва́съ бы́ти бо́льшȉй, да бꙋ́детъ всѣ̑мъ слꙋга́, глаго́лалъ є҆сѝ оу҆ч҃нкѡ́мъ свои̑мъ, ѻ҆́бразъ себѐ показꙋ́ѧй и҆ но́ги всѣ̑мъ оу҆мы́вый, пото́мъ же на ве́чери та́йнѣй же́ртвꙋ ѻ҆ц҃ꙋ̀ тѣ́ломъ и҆ кро́вȉю себѐ принесы́й, и҆ на́мъ препода́вый, и҆ то́ю ѻ҆ц҃а̀ оу҆ми́лостивый, во є҆́же па́ки въ ѻ҆бще́нȉе своѐ прȉѧ́ти, да зове́мъ є҆мꙋ̀: Аллилꙋ́ȉа.

І̑́косъ и҃.

Мои́ ли оу҆мы́еши но́зѣ, гдⷵи, ре́вностный въ любвѝ пе́тръ глаго́лаше. Ты́ же: а҆ще не оу҆мы́ю кого̀, не и҆́мать то́й ча́сти со мно́ю: оу҆казꙋ́ѧ, ꙗ҆́кѡ никто́же чи́стъ бꙋ́детъ, а҆́ще не ты̀ ѡ҆чи́стиши є҆го̀, грѣхѝ тѣ́хъ взе́мъ и҆ дх҃омъ ст҃ы́мъ и҆змы́въ. И̑ мы̀ со а҆пⷵломъ вопȉе́мъ: ѡ҆мы́й не то́кмѡ но́зѣ, но и҆ главꙋ̀, да досто́йни бꙋ́демъ прича̑стницы ве́чери твоеѧ̀ та́йныѧ, зовꙋ́ще вѣ́рою:

І̑и҃се, гдⷵб сы́й всѣ́хъ, смире́ннѡ но́зъ рабѡ́мъ оу҆мывый.

І̑и҃се, смире́нȉе, пꙋ́ть къ любвѝ, любо́вь къ є҆диномы́слȉю, ꙗ҆ви́вый.

І̑и҃се, любо́вь, ꙗ҆́коже зна́менȉе, оу҆ч҃нкѡ́мъ твои̑мъ оу҆каза́вый.

І̑и҃се, ѡ҆ любви́ ѻ҆́ч҃ей и҆ къ дрꙋгѡ́мъ твои̑мъ въ мл҃твѣ свое́й предвѣща́вый.

І̑и҃се, съ же́ртвою къ ѻ҆ц҃ꙋ̀ восходѧ́й, же́ртвꙋ та́йнꙋю оу҆станови́вый.

І̑и҃се, хлѣ́бъ и҆ вȉно̀ въ тѣ́ло и҆ кро́вь свою̀ непостижи́мѡ претвори́вый.

І̑и҃се, премі́рный свѣ́те, преесте́ственнѡ ѿ дв҃ы рожде́нный.

І̑и҃се, въ та́йнахъ тѣ́ло и҆ кро́вь дх҃омъ ст҃ы́мъ претворѧ́ѧй, несотворе́нный.

І̑и҃се, сло́ве воплоти́вшеесѧ, человѣ́кѡвъ въ та́йнахъ себѣ̀ соедини́вый.

І̑и҃се, лозо̀ вȉногра́днаѧ, ꙗ҆́кѡ вѣ̑тви своѧ̑, на́съ къ себѣ̀ приви́вый.

І̑и҃се, рекі́й: ꙗ҆ды́й мою̀ пло́ть и҆ пȉѧ́й мою̀ кро́вь, во мнѣ̀ пребыва́етъ.

І̑и҃се, ѡ҆бѣтова́вый: и҆ а҆́зъ въ не́мъ, со ѻ҆ц҃е́мъ и҆ дх҃омъ, ѻ҆би́тель сотвори́мъ.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ ѳ҃.

Ꙗ҆́кѡ а҆́гнца, на ве́чери оу҆гото́вивъ себѐ на закла́нȉе во́льное, въ геѳсима́нȉю но́щȉю вше́лъ є҆сѝ, лꙋ́чшыѧ оу҆ч҃нкѝ взе́мъ съ собо́ю, сла́вꙋ твою̀ на ѳавѡ́рѣ ви́дѣвшыѧ. И̑ здѣ̀ на́чалъ є҆сѝ ѕѣлѡ̀ тꙋжи́ти, да́же до по́тꙋ крова́вагѡ, молѧ́сѧ ѻ҆ц҃ꙋ̀ своемꙋ̀: а҆́ще возмо́жно, ми́мѡ несѝ ча́шꙋ сȉю̀, ѻ҆ба́че не ꙗ҆́коже а҆́зъ хощꙋ̀, но ꙗ҆́коже ты̀. А҆́зъ же зовꙋ̀: Аллилꙋ́ȉа.

І̑́косъ ѳ҃.

Геѳсимані́йскꙋю зе́млю крова́выми ка́плѧми ѡ҆роси́лъ є҆сѝ, сн҃е чл҃вѣ́ческȉй, ꙗ҆́кѡ не то́кмѡ крⷵтныхъ страда́нȉй дꙋша̀ и҆ тѣ́ло твоѝ оу҆жаса́хꙋсѧ, но и҆ са́мое є҆стество̀ человѣ́ческое, къ безсме́ртȉю призва́нное, сме́ртȉю возмꙋща́шесѧ, є҆ще́ же и҆ грѣсѝ всегѡ̀ мі́ра на тебѣ̀ возлежа́хꙋ. Мы́ же, ꙗ҆́кѡ оу҆ч҃нцы̀ спѧ́шȉи, не мо́жемъ тѝ зва́ти:

І̑и҃се, бж҃е безстра́стный, ꙗ҆́кѡ чл҃вѣ́къ страда́вый.

І̑и҃се, є҆ди́нымъ лице́мъ въ двꙋ́хъ є҆стества́хъ пребыва́вый.

І̑и҃се, грѣхѝ всегѡ̀ мі́ра на себѐ воспрȉѧ́вый.

І̑и҃се, ра́ди всѣ́хъ страда́ти и҆ оу҆мре́ти и҆зво́ливый.

І̑и҃се, прȉѧ́тȉемъ крⷵта̀ ꙗ҆́кѡ ѻ҆гне́мъ, ѕѣ́льнѣ пали́мый.

І̑и҃се, мꙋ́кою сме́ртною, ꙗ҆́кѡ чл҃вѣ́къ, тѧжцѣ томи́мый.

І̑и҃се, въ ча́съ стра́шный въ мл҃твѣ оу҆крѣпле́нȉѧ и҆ска́вый.

І̑и҃се, и҆ ѿ немощны́хъ оу҆ч҃нкѡ́въ оу҆тѣше́нȉѧ себѣ̀ ѡ҆жида́вый.

І̑и҃се, ѡ҆бⸯ и҆збавле́нȉи ѿ ча́ши сеѧ̀ ѻ҆ц҃ꙋ̀ трикра́ты моли́выйсѧ.

І̑и҃се, на во́лю є҆гѡ̀ послꙋ́шнѣ возложи́выйсѧ.

І̑и҃се, всѣ́ми ѡ҆ста́вленный, є҆ди́нъ въ нощѝ всѧ̑ терпѣ́вый.

І̑и҃се, а҆́гг҃ла, въ оу҆тѣше́нȉе ѿ ѻ҆ц҃а̀ по́сланнаго, оу҆зрѣ́вый.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ і҃.

Распѧ́тȉе прȉѧ́ти мл҃твою въ геѳсима́нȉи оу҆гото́вленный, ми́рнѣ на крⷵтъ ше́лъ є҆сѝ, непра́ведный сꙋ́дъ, хꙋлє́нȉѧ, бȉє́нȉѧ, заꙋшє́нȉѧ претерпѣ́вый, да и҆скꙋ́пиши на́съ ѿ клѧ́твы зако́нныѧ и҆ примири́въ со ѻ҆ц҃е́мъ, приведе́ши къ немꙋ̀ всеро́днаго а҆да́ма, бл҃года́рственнѣ со є҆́ѵою и҆ всѣ́ми на́ми зовꙋ́щаго: А̑ллилꙋ́ȉа.

І̑́косъ і҃.

Ѣ҆́здѧй на колесни́цѣхъ херꙋві́мскихъ во сла́вѣ, на́гъ и҆ порꙋ́ганъ на крⷵтѣ̀ ви́ситъ цр҃ь сла́вы, на́ше безче́стȉе на то́мъ пригвозди́въ, да бл҃говоленȉе ѻ҆́ч҃ее на́мъ и҆схода́тайствꙋетъ же́ртвою свое́ю. Мы́ же, въ твое́мъ распѧ́тȉи пови́ннȉи, крⷵтꙋ̀ твоемꙋ̀ покланѧ́емсѧ, хрⷵтѐ, и҆ зове́мъ тѝ сицева̑ѧ:

І̑и҃се, со ѻ҆ц҃е́мъ безнача́льнымъ и҆ дх҃омъ присноспребыва́ѧй.

І̑и҃се, и҆ на крⷵтѣ̀ ви́сѧ, прⷵто́ла бжⷵтва не ѡ҆ставлѧ́ѧй.

І̑и҃се, и҆скꙋпи́тель мі́ра ꙗ҆ви́сѧ и҆ а҆́гг҃лѡмъ неизрече́нный.

І̑и҃се, въ нѣ́дрѣхъ прест҃ы́ѧ трⷪ҇цы ꙗ҆́кѡ бг҃ъ бы́въ неизмѣ́ннѡ.

І̑и҃се, ꙗ҆́кѡ є҆ди́нъ ѿ трⷪ҇цы себѣ̀ самомꙋ̀ принесе́сѧ непостижимѡ.

І̑и҃се, бл҃говолѣ́нȉе трⷪ҇чное лю́демъ возврати́ непоколеби́мо.

І̑и҃се, бл҃года́ть дх҃а ст҃а́гѡ ѿ ѻ҆ц҃а̀ низпосла́вый.

І̑и҃се, сме́ртȉю свое́ю сме́рть на́шꙋ попра́вый.

І̑и҃се, держа́вꙋ дȉа́волю и҆ а҆́дъ ѕло́бный сокрꙋши́вый.

І̑и҃се, разбо́йника пока́ѧвшагосѧ въ ра́й пе́рваго введы́й.

І̑и҃се, пра́ѻтцєвъ, съ вѣ́рою тѧ̀ ѡ҆жида́вшихъ, и҆зⸯ а҆́да и҆зведы́й.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ а҃і.

Шестокрила́тȉи херꙋві́ми и҆ многоѻчи́тȉи серафі́ми, зрѧ́ще своего̀ влⷣкꙋ, ꙗ҆́кѡ мертвеца́, во гро́бѣ лежа́ща, оу҆жаса́хꙋсѧ, ли́ца закрыва́юще. Тва́рь, є҆гда̀ ре́клъ є҆сѝ: соверши́шасѧ, сп҃се́нȉю ра́довашесѧ. Человѣ́ческȉй же ро́дъ, возсозда́нȉе съ преизбы́ткомъ оу҆лꙋчи́въ, взыва́етъ тѝ: А̑ллилꙋ́ȉа.

І̑́косъ а҃і.

Нетлѣ́нȉѧ свѣ́тъ и҆зⸯ гро́ба всѣ̑мъ возсȉѧ̀, тебѣ̀, хрⷵтѐ, воскрⷵшꙋ и҆зⸯ ме́ртвыхъ: ро́дъ человѣ́ческȉй ѡ҆бнови́сѧ, сме́рть оу҆мертви́сѧ, всѧ̀ тва́рь весели́тсѧ, а҆́дъ лю́тѣ стене́тъ, вѣ́чнаѧ жи́знь ца́рствꙋетъ, нбⷵныѧ си̑лы ликꙋ́ютъ, пра́зднꙋетъ же мі́ръ ви́димый и҆ неви́димый. И̑ мы̀ и҆гра́юще, воспѣва́емъ си́це:

І̑и҃се, бж҃е нетлѣ́нный, пло́тȉю и҆зⸯ ме́ртвыхъ воскр҃сы́й.

І̑и҃се, хрⷵтѐ сп҃се, и҆зги́бшȉй мі́ръ воскрⷵнȉемъ сп҃сы́й.

І̑и҃се, сме́ртȉю сме́рть попра́вый, воскрⷵнȉе на́мъ оу҆лꙋчи́вый.

І̑и҃се, дȉа́вола сокрꙋши́въ, держа́вꙋ є҆гѡ̀ разори́вый.

І̑и҃се, па́сха та́инственнаѧ, человѣ́ка па́дшаго ѡ҆бновлѧ́ющаѧ.

І̑и҃се, па́сха кра́снаѧ, двє́ри ра̑йскȉѧ на́мъ ѿверза́ющаѧ.

І̑и҃се, нб҃а и҆ землѝ соедине́нȉе, бг҃а съ человѣ̑ки примире́нȉе.

І̑и҃се, сп҃се на́шъ, живо́е и҆ неже́ртвенное заколе́нȉе.

І̑и҃се, а҆́гнче бж҃ȉй, за всѣ́хъ закла́нный, же́ртва жива́ѧ.

І̑и҃се, на́шъ искꙋпи́тель, мі́рꙋ сп҃си́тель, па́сха ст҃а́ѧ.

І̑и҃се, ꙗ҆́кѡ бг҃ъ, са́мъ себѐ во́лею ко ѻ҆ц҃ꙋ̀ за всѣ́хъ приведы́й.

І̑и҃се, на́съ совоскр҃си́вый, пꙋ́ть крⷵто́мъ показа́вый.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ в҃і.

Ада́мовъ ро́дъ воскрⷵнȉемъ ѡбнови́въ и҆ оу҆ч҃нки́ твоѧ̑ црⷵтвȉю бж҃ȉю наста́вивъ, возне́слсѧ є҆сѝ во сла́вѣ, хрⷵтѐ бж҃е на́шъ, ѿѻнꙋ́дꙋже и҆ снизше́лъ є҆сѝ, и҆ спосади́въ въ себѣ́ є҆стество̀ человѣ́ческое ѡ҆деснꙋ́ю ѻ҆ц҃а̀, дх҃а ст҃а́го посла́лъ є҆сѝ, дѣ́ло своѐ сконча́лъ є҆сѝ сп҃се́нȉѧ, оу҆тѣ́шителю преда́въ, да и҆ мы̀ всегда̀ зове́мъ тѝ: А̑ллилꙋ́ȉа.

І̑́косъ в҃і.

Гдⷵь се́й, глаго́лахꙋ оу҆ч҃нкѡ́мъ бѣлоно́снȉи а҆́гг҃ли, вознесы́йсѧ ѿ ва́съ на нб҃о, та́кожде во сла́вѣ прȉидетъ сꙋди́ти живы̑мъ и҆ мєртвымъ. И̑́мже ѡ҆бра́дованнȉи и҆ ѡ҆бѣтова́нȉемъ дх҃а оу҆тѣ́шеннȉи, съ ра́достȉю вели́кою въ земны́й і҆ерⷵли́мъ нбⷵнагѡ ждꙋ́ще, на сꙋ́дъ себѐ оу҆гото́вимъ, зовꙋ́ще:

І̑и҃се, всѧ̑ ко сп҃се́нȉю на́шемꙋ сотвори́вый, прȉимѝ хвалꙋ̀ на́шꙋ.

І̑и҃се, на́съ ра́ди воплоти́выйсѧ, ѡ҆бж҃е́нȉе бл҃года́тȉю сотворѝ въ на́съ.

І̑и҃се, въ кр҃ще́нȉи трⷪ҇цꙋ́ ꙗ҆ви́вый, ѿ са́мости и҆сцѣлѝ на́съ.

І̑и҃се, вѣ́рѣ въ тѧ̀ дх҃омъ ст҃ы́мъ просвѣтѝ на́съ.

І̑и҃се, дх҃омъ ст҃ы́мъ, твои́ми содѣ́лай на́съ.

І̑и҃се, и҆зⸯ ме́ртвыхъ воскр҃сы́й, смє́ртнаѧ тѣла̀ на̑ша дх҃омъ ст҃ы́мъ ѡ҆живѝ въ на́съ.

І̑и҃се, дх҃омъ бж҃ȉимъ, ѻ҆ц҃ꙋ̀, ѡ҆ не́мже взыва́ти: а҆́вва ѻ҆ч҃е, оу҆сыновѝ на́съ.

І̑и҃се, сонаслѣ̑дницы тебѣ̀ чрезⸯ страда̑нȉѧ, просла́ви на́съ.

І̑и҃се, плоды̀ дх҃а: любы̀, ра́дость, ми́ръ покажи́ въ на́съ.

І̑и҃се, моли́тисѧ дх҃омъ въ на́шихъ не́мощехъ оу҆крѣпѝ на́съ.

І̑и҃се, свобо́дꙋ на́мъ да́вый, и҆ тва́рь свободи́ всю̀.

І̑и҃се, и҆скꙋпи́телю на́шъ и҆ ѡ҆деснꙋ́ю бг҃а сѣды́й, всегда̀ хода́тайствꙋй ѡ҆ на́съ.

І̑и҃се, и҆скꙋпи́телю мі́ра, сп҃се, сп҃сѝ на́съ.

Конда́къ г҃і.

Ꙍ̑҇ преслав́ный и҆ многомлⷵтивый і҆и҃се хрⷵтѐ, сн҃е бж҃ȉй! ѻ҆ц҃ꙋ̀ себѐ въ же́ртвꙋ ѡ҆ на́съ приведы́й и҆ пꙋ́ть крⷵта̀ и҆ покаѧ́нȉѧ на́мъ оу҆каза́вый, са́мъ застꙋпѝ на́съ и҆ поми́лꙋй твое́ю бл҃года́тȉю, и҆ и҆́миже вѣ́си сꙋдьба́ми, сп҃си́ ны, недостѡ́йныѧ рабы̀ твоѧ̑, да ны́нѣ и҆ при́снѡ зове́мъ тѝ: А̑ллилꙋ́ȉа. Три́жды.

Се́й конда́къ глаго́ли три́жды. И̑ па́ки чте́тсѧ а҃_й і҆́косъ: А҆́гг҃льскихъ во́инствъ и҆ мі́ра тво́рче: и҆ а҃_й конда́къ: Возбра́нный воево́до, хрⷵтѐ бж҃е на́шъ:

Мл҃тва а҃, ко гдⷵꙋ і҆и҃сꙋ хрⷵтꙋ̀.

Къ тебѣ̀, є҆ди́номꙋ сп҃си́телю мі́ра и҆ и҆скꙋпи́телю на́шемꙋ, прибѣга́емъ, і҆и҃се, сн҃е бж҃ȉй: вѣ́мы бо, вои́стиннꙋ вѣ́мы, ꙗ҆́кѡ нѣ́сть и҆но́гѡ и҆́мене подⸯ нб҃се́мъ, ѡ҆ не́мже возмо́жемъ сп҃сти́сѧ. Сегѡ̀ ра́ди то́кмѡ на тѧ̀ оу҆пова́емъ, грѣ́шныхъ, а҆ не првⷣныхъ сп҃стѝ прише́дшаго. Тебѐ є҆ди́наго хода́таѧ ѡ҆ на́съ къ бг҃ꙋ и҆сповѣ́дꙋемъ, къ твое́й всеси́льнѣй бл҃года́ти прибѣга́емъ: не ѡ҆ста́ви на́съ си́рыхъ, гдⷵи, ꙗ҆́коже оу҆ч҃нкѡ́мъ твои̑мъ ѡ҆бѣща́лъ є҆сѝ. Вселѝ въ на́съ оу҆тѣ́шителѧ дх҃а твоего̀, всѧ̑ сквє́рны на́ша ѡ҆чища́ющаго и҆ въ не́мощехъ оу҆тѣша́ющаго. И̑ са́мъ, ꙗ҆́коже ре́клъ є҆сѝ, пребꙋ́ди съ на́ми до сконча́нȉѧ вѣ́ка. Мы́ же, ꙗ҆́кѡ сп҃си́телѧ на́шего вѣ́дꙋще, прест҃ꙋ́ю же застꙋ́пницꙋ бцⷣꙋ со всѣ́ми ст҃ы́ми твои́ми призыва́юще, ве́сь живо́тъ на́шъ тебѣ́, хрⷵтꙋ̀ бг҃ꙋ и҆ и҆скꙋпи́телю на́шемꙋ, съ наде́ждою предади́мъ во вѣ́ки вѣкѡвъ. А̑ми́нь.

Мл҃тва в҃, а҆ѳѡ́нскагѡ и҆́нока ѻ҆тца̀ а҆рсе́нȉа.

Гдⷵи і҆и҃се хрⷵтѐ, сн҃е бж҃ȉй, поми́лꙋй мѧ̀!

Гдⷵи, собери́ разсѣ̀ѧнный мо́й оу҆́мъ, дабы̀ ѻ҆́нъ ве́сь оу҆стреми́лся къ тебѣ̀, своемꙋ̀ созда́телю и҆ сп҃си́телю.

Сокрꙋшѝ стрѣ́лы лꙋка́вагѡ, ѿрева́ющыѧ мѧ̀ ѿ тебє̀.

Погасѝ пла́мень по́мыслѡвъ, пожига́ющихъ мѧ̀ во вре́мѧ мл҃твы.

Ѡ̑сѣни́ мѧ бл҃года́тȉю твое́ю, дабы̀ мнѣ̀, до сконча́нȉѧ дні́й мои́хъ, тебѐ є҆ди́наго люби́ти все́мъ се́рдцемъ и҆ все́ю дꙋше́ю мое́ю.

Въ ча́съ же кончи́ны моеѧ̀ предста́ни мнѣ̀, кро́ткѡ дꙋ́шꙋ мою̀ ѿ тѣ́ла ѿдѣлѝ и҆ въ црⷵтво ст҃ы́ѧ трⷪ҇цы вселѝ, за мл҃твы пребл҃гослове́нныѧ бцⷣы и҆ всѣ́хъ ст҃ы́хъ.

А̑ми́нь.

Мл҃тва г҃,

Ст҃и́телѧ і҆ѡаса́фа бѣлогра́дскагѡ.

Бꙋ́ди бл҃гослове́нъ де́нь же и҆ ча́съ, во́ньже гдⷵь мо́й і҆и҃съ хрⷵтосъ менє̀ ра́ди роди́сѧ, распѧ́тȉе претерпѣ̀ и҆ сме́ртȉю пострада̀. Ѽ гдⷵи и҆и҃се хрⷵтѐ, въ ча́съ кончи́ны моеѧ̀ предста́ни мнѣ̀ и҆ дꙋ́шꙋ раба̀ твоегѡ̀ и҆́мⷬ҇къ, въ стра́нствȉи сꙋ́щꙋю, въ рꙋ́цѣ твоѝ прȉимѝ, за мл҃твы пречⷵтыѧ твоеѧ̀ мт҃ре и҆ всѣ́хъ ст҃ы́хъ твои́хъ, ꙗ҆́кѡ бл҃гослове́нъ є҆сѝ во вѣ́ки вѣкѡ́въ.

А̑ми́нь.

Мл҃тва д҃, сп҃си́телю.

Мно́зи скѡ́рби ѡ҆бꙋрева́ютъ дꙋ́шꙋ мою̀, и҆ нѣ́сть мнѣ̀ наде́жды на сп҃се́нȉе: ѿвсю́дꙋ бо не́мощенъ є҆́смь, и҆ никто́же мо́жетъ помощѝ мнѣ̀, ꙗ҆́кѡ и҆ ті́и та́кожде не́мощни сꙋ́ть. Оу҆скорѝ на совѣ́ты своѧ̑, дабы̀ а҆́зъ нꙋждѣю побꙋди́хъ дꙋ́шꙋ, да сотворю́, є҆́же до́лженъ є҆́смь. Ѻ҆ба́че съ па́ѵломъ глаго́лю: ѻ҆каѧ́ненъ а҆́зъ є҆́смь человѣ́къ: не то творю̀, є҆́́же хощꙋ̀, а҆ є҆́́же ненави́ждꙋ, то соверша́ю.

И то́кмѡ оу҆ тебє̀ сп҃се́нȉѧ и҆щꙋ̀, на тебѐ, сп҃се, надѣ́юсѧ, и҆ тебѐ, ꙗ҆́кѡ а҆пⷵли въ мо́ри, призыва́ю: гдⷵи, сп҃сѝ на́съ, погиба́емъ!

Ты́ же запрети́лъ є҆сѝ мор́ю: и҆ бы́сть вели́каѧ тишина́.

Та́кожде мно́гажды помога́ше мнѣ̀ млⷵть твоѧ̀, и҆ въ се́рдцѣ мое́мъ водворѧ́шесѧ ве́лȉѧ и҆ чꙋ́днаѧ тишина́.

И҆ оу҆разꙋмѣ́въ, ꙗ҆́кѡ человѣ́къ ничто́женъ є҆́сть, къ тебѣ̀ припа́даю, и҆ тебѣ̀ ꙗ҆́кѡ бг҃ꙋ покланѧ́юсѧ, и҆ съ несꙋмнѣ́нною вѣ́рою и҆ любо́вȉю глаго́лю тѝ: ты̀ бг҃ъ мо́й є҆сѝ, ꙗ҆́кѡ бл҃ги́хъ ѿ менє̀ не тре́бꙋеши! Но са́мъ сп҃са́еши мѧ̀, и҆ ми́ръ дꙋшѝ мое́й да́рꙋеши.

Сегѡ̀ ра́ди, тебѐ бл҃годарю̀, на тебѐ надѣ́юсѧ и҆ славосло́влю тѧ̀: сп҃си́телю мо́й, сла́ва тебѣ̀! Ты́ же ѿвѣща́еши мѝ: не бо́йсѧ, то́кмѡ вѣ́рꙋй: а҆́зъ є҆́смь сп҃си́тель тво́й. А̑ми́нь.

Тропа́рь и҆скꙋпле́нȉю, гла́съ и҃.

Созда́ннȉи во сла́вꙋ прест҃ы́ѧ трⷪ҇цы, за́вистȉю же дȉа́волею соблазне́ннȉи, прароди́телȉе преслꙋша́нȉемъ падо́ша: сегѡ̀ ра́ди ѿлꙋче́нȉю ѿ бг҃а пови́нни бѣ́ша. Сн҃омъ же бж҃ȉимъ и҆скꙋпле́ннȉи, свобо́дꙋ ѿ ра́бства вра́жȉѧ всѝ полꙋчи́ша, и҆ па́ки бл҃года́ть ѿ ѻ҆ц҃а̀ прȉѧ́ша, бл҃года́рнѣ зовꙋ́ще и҆скꙋпи́телю своемꙋ̀: сла́ва тебѣ̀, і҆и҃се, бж҃е премлⷵрдый.

Конда́къ, гла́съ є҃.

Въ ра́бство ѕмі́ево впадо́ша, и҆ и҆зⸯ раѧ̀ и҆згна́нии бы́ша, па́ки въ црⷵтво бж҃ȉе введо́шасѧ, а҆да́мъ всеро́дный съ є҆́ѵою, и҆скꙋпи́телю хрⷵтꙋ̀ вопȉѧ́хꙋ: бл҃гослове́нъ є҆сѝ, гдⷵи, сп҃се на́шъ, сла́ва тебѣ̀.

Велича́нȉе.

Велича́емъ тѧ̀, живода́вче хрⷵтѐ, на́съ ра́ди крⷵтъ прȉѧ́вый и҆ си́мъ ѻ҆ц҃а̀ ѡ҆ на́съ оу҆ми́лостивый, чл҃вѣколю́бче, сла́ва тебѣ̀!