Неделя четвертой седмицы, Иоанна Лествичника
Недѣ́лѧ четве́ртаѧ ст҃ы́хъ постѡ́въ.
Въ сꙋббѡ́тꙋ ве́чера стїхи̑ры воскрⷭ҇ны г҃, и҆ а҆натѡ́лїевы д҃: и҆ мине́и г҃. И҆́нїи же послѣ́днѣйшїи ѡ҆предѣли́ша пѣ́тисѧ послѣ́дованїю ст҃а́гѡ і҆ѡа́нна лѣ́ствичника.
Стїхи̑ры, гла́съ и҃.
Подо́бенъ: Ѽ пресла́внагѡ чꙋдесѐ!
Ѻ҆́тче і҆ѡа́нне прпⷣбне, всегда̀ вои́стиннꙋ бж҃їѧ возношє́нїѧ въ горта́ни носи́лъ є҆сѝ, поꙋча́ѧсѧ дѣ́тельнѣйше бг҃одꙋхновє́ннымъ словесє́мъ, всемꙋ́дре: и҆ ѿтꙋ́дꙋ и҆стека́ющею бл҃года́тїю ѡ҆богати́лсѧ є҆сѝ, бы́въ бл҃же́нъ, нечести́выхъ всѣ́хъ совѣ́тѡванїѧ разрꙋша́ѧ.
Подо́бенъ:
Ѻ҆́тче і҆ѡа́нне пресла́вне, сле́зными и҆стѡ́чники дꙋ́шꙋ ѡ҆чища́ѧ и҆ всено́щными стоѧ̑нїи бг҃а ᲂу҆милостивлѧ́ѧ, воскриле́нъ бы́лъ є҆сѝ̀, бл҃же́нне, къ сегѡ любле́нїю и҆ красотѣ̀: є҆ѧ́же досто́йнѡ ны́нѣ наслажда́ешисѧ, безконе́чнѡ ра́дꙋѧсѧ, со сподви̑жники твои́ми, бг҃омꙋ́дре прпⷣбне.
Подо́бенъ:
Ѻ҆́тче і҆ѡа́нне прпⷣбне, воскрели́въ ᲂу҆́мъ къ бг҃ꙋ вѣ́рою, непостоѧ́нства мїрска́гѡ смѣше́нїѧ возгнꙋша́лсѧ є҆сѝ: и҆ крⷭ҇тъ тво́й воспрїи́мъ, всеви́дцꙋ послѣ́довалъ є҆сѝ, тѣ́ло неѡбꙋзда́нное пѡ́двиги по́стничества по́мыслꙋ порабо́тивъ си́лою бж҃е́ственнагѡ дх҃а.
Сла́ва, гла́съ є҃: Прпⷣбне ѻ҆́тче, гла́са є҆ѵⷢ҇лїа гдⷭ҇нѧ послꙋ́шавъ, мі́ръ ѡ҆ста́вилъ є҆сѝ, бога́тство и҆ сла́вꙋ ни во что́же вмѣни́въ. ѿѻнꙋ́дꙋже всѣ̑мъ вопїѧлъ є҆сѝ: возлюби́те бг҃а, и҆ ѡ҆брѧ́щете бл҃года́ть вѣ́чнꙋю: ничто́же предпочти́те па́че любвѐ є҆гѡ̀, да є҆гда̀ прїи́детъ во сла́вѣ свое́й, ѡ҆брѧ́щете ᲂу҆покое́нїе со всѣ́ми ст҃ы́ми. и҆́хже мл҃твами, хрⷭ҇тѐ, сохранѝ и҆ сп҃сѝ дꙋ́шы на́шѧ.
И҆ ны́нѣ, бг҃оро́диченъ а҃-й гла́са. На стїхо́внѣ стїхи̑ры ѻ҆смогла́сника. Сла́ва, прпⷣбнагѡ,гла́съ в҃. Самогла́сенъ:
На землѝ а҆́гг҃ла и҆ нб҃сѣ́хъ человѣ́ка бж҃їѧ, мі́ра бл҃гоꙋкраше́нїе, наслажде́нїе бл҃гъ и҆ добродѣ́телей, по́стникѡмъ похвалꙋ̀, і҆ѡа́нна почти́мъ: насажде́нъ бо въ домꙋ̀ бж҃їи, процвѣтѐ пра́веднѡ, и҆ ꙗ҆́кѡ ке́дръ въ пꙋсты́ни ᲂу҆мно́жи стада̀ хрⷭ҇то́выхъ слове́сныхъ ѻ҆ве́цъ, въ преподо́бїи и҆ пра́вдѣ.
И҆ ны́нѣ, бг҃оро́диченъ, гла́съ то́йже: Ѽ чꙋдесѐ но́вагѡ:
Ны́нѣ ѿпꙋща́еши:
Тропа́рь, гла́съ а҃:
Пꙋсты́нный жи́тель и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ, бг҃оно́се ѻ҆́тче на́шъ і҆ѡа́нне: посто́мъ, бдѣ́нїемъ, мл҃твою нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ и҆ дꙋ́шы вѣ́рою притека́ющихъ къ тебѣ̀: сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.
На ᲂу҆́трени
по ѡ҆бы́чнѣмъ послѣ́дованїи канѡ́ны: воскрⷭ҇ный съ бг҃оро́дичнымъ, на ѕ҃: и҆ настоѧ́щїй трїѡ́ди, на д҃: и҆ ст҃а́гѡ на д҃.
Канѡ́нъ трїѡ́ди, гла́съ є҃.
Пѣ́снь а҃.
І҆рмо́съ: Сп҃си́телю бг҃ꙋ:
Оу҆подо́бихсѧ, хрⷭ҇тѐ, въ рꙋ́цѣ разбо́йникѡвъ впа́дшемꙋ и҆ бїе́ньми є҆́ле жи́вꙋ ѿ си́хъ ѡ҆ста́вленномꙋ, сп҃се: и҆ а҆́зъ си́це ᲂу҆ѧ́звленъ є҆́смь грѣхмѝ мои́ми.
Не пре́зри менѐ недꙋ́гꙋюща лю́тѡ, сп҃се, вопїѧ́ше рыда́ѧ на разбо́йники твоѐ бога́тство расточи́вый. и҆ а҆́зъ си́це молю́сѧ: ᲂу҆ще́дри и҆ сп҃си́ мѧ.
Оу҆врачева́вый мѧ̀ ᲂу҆́момъ ᲂу҆ра́нена грѣхмѝ, въ ра́нахъ ѿ разбо́йникъ непра́ведныхъ и҆ лꙋка́выхъ помышле́нїй, хрⷭ҇тѐ сп҃се, сп҃си́ мѧ ꙗ҆́кѡ многомлⷭ҇тивъ.
Бг҃оро́диченъ: Пречⷭ҇таѧ мт҃и хрⷭ҇то́ва, вопло́щшагосѧ и҆з̾ тебє̀ и҆ ѿ нѣ́дръ роди́телѧ не ѿлꙋ́чшагосѧ бг҃а непреста́ннѡ молѝ, ѿ всѧ́кагѡ ѡ҆бстоѧ́нїѧ сп҃стѝ, ꙗ҆̀же созда̀.
И҆́ный канѡ́нъ прпⷣбнагѡ. Гла́съ и҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ:
Во свѣ́тъ невеще́ственный и҆ мы́сленный ѿ печа́ли веще́ственныѧ восте́къ, і҆ѡа́нне прпⷣбне, мл҃твами твои́ми ко гдⷭ҇ꙋ просвѣти́ мѧ.
Ꙗ҆́кѡ воздержа́нїѧ сла́дость соса́въ, ѿри́нꙋлъ є҆сѝ го́ресть сласте́й, ѻ҆́тче: тѣ́мже па́че ме́да и҆ со́та ᲂу҆слажда́еши чꙋ̑вства на̑ша.
Возше́дъ на высотꙋ̀ добродѣ́телей и҆ до́лꙋ влек ꙋ́щыѧ ѡ҆плева́въ сла̑сти, сла́дость сп҃се́нїѧ ста́дꙋ твоемꙋ̀ ꙗ҆ви́лсѧ є҆сѝ, прпⷣбне ѻ҆́тче.
Бг҃оро́диченъ: Премꙋ́дрость и҆ сло́во ѻ҆́ч҃ее несказа́ннѡ ро́ждшаѧ, дꙋшѝ моеѧ̀ лю́тꙋю ᲂу҆врачꙋ́й ꙗ҆́звꙋ и҆ се́рдца болѣ́знь ᲂу҆кротѝ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃.
І҆рмо́съ: Оу҆твердѝ ны, бж҃е:
Пꙋте́мъ житїѧ̀ лю́тѣ пꙋтеше́ствꙋѧ, ᲂу҆ѧ́звленъ є҆́смь ѿ разбѡ́йникъ страстьмѝ: но возста́ви мѧ̀, хрⷭ҇тѐ, молю́сѧ.
Ѡ҆крадо́ша ᲂу҆́мъ мо́й разбо́йницы и҆ ѡ҆ста́виша мѧ̀ є҆́ле жи́ва въ ꙗ҆́звахъ прегрѣше́нїй мои́хъ: но и҆сцѣли́ мѧ, гдⷭ҇и.
Стра̑сти ѡ҆бнажи́ша мѧ̀, сп҃се хрⷭ҇тѐ, ѿ за́повѣдей твои́хъ, и҆ сластьмѝ ᲂу҆ѧзви́хсѧ: но и҆зле́й на мѧ̀ млⷭ҇ть.
Бг҃оро́диченъ: Молѝ непреста́ннѡ, чтⷭ҇аѧ, произше́дшаго и҆з̾ чре́слъ твои́хъ, и҆зба́витисѧ ѿ прельще́нїѧ дїа́волѧ воспѣва́ющымъ тѧ̀, бг҃оневѣ́сто.
И҆́ный.
І҆рмо́съ: Ты̀ є҆сѝ ᲂу҆твержде́нїе:
Попали́лъ є҆сѝ ᲂу҆́глемъ по́стничества, прпⷣбне, страсте́й те́рнїе, и҆ согрѣва́еши мона́шествꙋющихъ собра̑нїѧ.
Мѵ́ро ѡ҆сщ҃е́нїѧ, прпⷣбне, ѿ по́стническихъ а҆рѡма́тъ ве́сь сложи́лсѧ є҆сѝ въ воню̀ бл҃гоꙋха́нїѧ бж҃їѧ.
Въ зако́нѣхъ по́стничества поꙋча́ѧсѧ, стра̑сти ꙗ҆́коже и҆ны̑ѧ дрє́внїѧ фараѡні́ты тече́нїемъ сле́зъ твои́хъ потопи́лъ є҆сѝ.
Бг҃оро́диченъ: Оу҆ста́ви, чтⷭ҇аѧ, моѐ непостоѧ́нное помышле́нїй смꙋще́нїе мт҃и бж҃їѧ, къ сн҃ꙋ твоемꙋ̀ направлѧ́ющи движе́нїе.
Сѣда́ленъ, гла́съ є҃:
Подо́бенъ: Стра́нное дв҃ы:
Пречтⷭ҇ый крⷭ҇тъ тво́й, сп҃се на́шъ, ꙗ҆́кѡ ѡ҆рꙋ́жїе сп҃се́нїѧ содержа́ще, тѣ́мъ тебѣ̀ вопїе́мъ: сп҃си́ ны, пострада́вый во́лею за на́съ, всѣ́хъ бж҃е, ꙗ҆́кѡ многомлⷭ҇тивъ.
Сла́ва, прпⷣбнагѡ, гла́съ д҃.
Подо́бенъ: Вознесы́йсѧ на крⷭ҇тъ:
Добродѣ́тельми, къ нб҃сѝ возсїѧ́вый, водрꙋже́нъ ꙗ҆́вѣ, возше́лъ є҆сѝ къ бг҃овидѣ́нїѧ неизмѣ́римѣй глꙋбинѣ̀ бл҃гоче́стнѡ: всѧ̑ ᲂу҆́бо де́мѡнскїѧ кѡ́зни ѡ҆бличи́въ, покрыва́еши человѣ́ки ѿ вре́да си́хъ, і҆ѡа́нне, лѣ́ствице добродѣ́телей: и҆ ны́нѣ мо́лишисѧ сп҃сти́сѧ рабѡ́мъ твои̑мъ.
И҆ ны́нѣ, бг҃оро́диченъ, подо́бенъ:
На прⷭ҇то́лѣ херꙋві́мстѣмъ сѣдѧ́й и҆ въ нѣ́дрѣхъ ѻ҆́ч҃ихъ водворѧ́ѧйсѧ, ꙗ҆́кѡ на престо́лѣ сѣди́тъ ст҃ѣ́мъ свое́мъ, влⷣчце, въ нѣ́дрѣхъ твои́хъ пло́тски: бг҃ъ бо воцр҃и́выйсѧ та́кѡ над̾ всѣ́ми ꙗ҆зы̑ки, и҆ разꙋ́мнѡ ны́нѣ пое́мъ є҆мꙋ̀: є҆го́же и҆ ты̀, чтⷭ҇аѧ, молѝ сп҃сти́сѧ рабѡ́мъ твои̑мъ.
Пѣ́снь д҃.
І҆рмо́съ: Оу҆слы́шахъ, гдⷭ҇и, слꙋ́хъ тво́й:
Разбо́йницы ѡ҆крадо́ша моѐ дѣѧ́нїе бж҃е́ственное и҆ ѡ҆ста́виша мѧ̀ ꙗ҆́звами мꙋ́чима.
Совлеко́ша мѧ̀, сп҃се, ѿ за́повѣдей твои́хъ непостоѧ̑ннаѧ помышлє́нїѧ моѧ̑, ѿѻнꙋ́дꙋже ᲂу҆ѧ́звленъ є҆́смь прегрѣше́ньми.
Леѵі́тъ є҆гда̀ ви́дѣ мѧ̀ ра́нами ᲂу҆ѧ́звленна, мимои́де, сп҃се мо́й: но ты́ мѧ сп҃сѝ.
Бг҃оро́диченъ: Вои́стиннꙋ прославлѧ́емъ тѧ̀, бцⷣе безневѣ́стнаѧ, и҆ ко твоемꙋ̀ приста́нищꙋ вѣ́рнїи прибѣга́емъ.
И҆́ный.
І҆рмо́съ: Оу҆слы́шахъ, гдⷭ҇и:
Ꙗ҆́кѡ лꙋгъ бл҃гово́ннѣйшїй и҆ добродѣ́телей ра́й ѡ҆дꙋшевле́нный, воздержа́нїе произрасти́лъ є҆сѝ, и҆́мже напита́лъ є҆сѝ всѧ̑ чтꙋ́щыѧ тѧ̀.
Законоположи́телѧ по́стничества и҆ мона́хѡвъ пра́вило кротча́йшее, ꙗ҆́кѡ мѡѷсе́а и҆ дв҃да тѧ вои́стиннꙋ стѧжа́вше, ѻ҆́тче, ᲂу҆бл҃жа́емъ.
Насажде́нъ на вода́хъ воздержа́нїѧ, ꙗ҆ви́лсѧ є҆сѝ, бл҃же́нне ѻ҆́тче, розга̀ бл҃гоцвѣтꙋ́щаѧ, бл҃гоче́стїѧ гро́зды производѧ́щаѧ.
Бг҃оро́диченъ: Во вре́мени ꙗ҆́вльшасѧ на́мъ родила̀ є҆сѝ ѿ ѻ҆ц҃а̀ невре́меннѡ возсїѧ́вшаго,бг҃омт҃и: є҆го́же молѝ сп҃стѝ пою́щыѧ тѧ̀.
Пѣ́снь є҃.
І҆рмо́съ: Оу҆́тренююще вопїе́мъ тѝ:
І҆и҃се, при́зри на ра̑ны дꙋшѝ моеѧ̀, ꙗ҆́коже дре́вле въ рꙋ́цѣ разбо́йничи впа́дшагѡ, и҆ ᲂу҆врачꙋ́й болѣ́знь мою̀, хрⷭ҇тѐ, молю́сѧ.
Болѣ́зненнѡ ꙗ҆́звами прегрѣше́нїй и҆знемо́же дꙋша̀ моѧ̀, хрⷭ҇тѐ мо́й, и҆ ѿтꙋ́дꙋ лежꙋ̀ на́гъ ѿ добродѣ́телей бж҃е́ственныхъ: молю̀, сп҃си́ мѧ.
І҆ере́й є҆гда̀ ви́дѣ мѧ̀ и҆ леѵі́тъ, не возмо́же ꙗ҆́вѣ, мимоидо́ша бо ѿ менє̀: но ты, ꙗ҆́кѡ бл҃госердъ, ны́нѣ сп҃се́нїе по́далъ и҆ сп҃слъ є҆сѝ.
Бг҃оро́диченъ: Не пре́зри, влⷣко, ѡ҆каѧ́ннагѡ менє̀, молю́сѧ, ᲂу҆ра́неннагѡ ᲂу҆мо́мъ болѣ́зненнѡ ѿ разбо́йникъ: но ᲂу҆ще́дри, сп҃се, мл҃твами ро́ждшїѧ тѧ̀.
И҆́ный.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Погаси́въ всѧ̑ стра̑сти росо́ю подвигѡ́въ твои́хъ, ѻ҆́тче бл҃же́нне, ѻ҆би́льнѡ возже́глъ є҆сѝ ѻ҆гне́мъ любвѐ и҆ вѣ́ры свѣти́льникъ воздержа́нїѧ и҆ просвѣще́нїе безстра́стїѧ и҆ днѐ сы́нъ бы́лъ є҆сѝ.
Вѣ́ры гро́здъ бж҃е́ственнымъ земледѣ́лїемъ твои́мъ, ѻ҆́тче, воспита́лъ є҆сѝ, и҆ въ точи̑ла вложи́лъ є҆сѝ, и҆ трꙋдо́мъ по́стничества и҆згне́лъ є҆си, и҆ напо́лнивъ ча́шꙋ дꙋхо́внꙋю воздержа́нїѧ, весели́ши сердца̀ ста́да твоегѡ̀.
Претерпѣ́въ до́блественнѣ прило́ги и҆ ꙗ҆́звы проти́вныхъ врагѡ́въ, ꙗ҆ви́лсѧ є҆сѝ сто́лпъ терпѣ́нїѧ, ᲂу҆твержда́ѧ ста́до твоѐ па́лицею бж҃е́ственною на па́житехъ воздержа́нїѧ и҆ на водѣ̀ воспитова́ѧ, бл҃же́нне.
Бг҃оро́диченъ: Рѣ́чемъ твои́хъ ᲂу҆сте́нъ послѣ́дꙋюще, всечⷭ҇таѧ, тѧ̀ ᲂу҆бл҃жа́емъ: съ тобо́ю бо вои́стиннꙋ вели̑чїѧ сотвори́вый гдⷭ҇ь возвели́чи тѧ̀, и҆ роди́всѧ и҆з̾ чре́ва твоегѡ̀, и҆́стиннꙋю бж҃їю мт҃рь показа̀.
Пѣ́снь ѕ҃.
І҆рмо́съ: Ѡ҆бы́де мѧ̀ бе́здна:
Страстьмѝ и҆жди́хъ житїѐ бж҃е́ственное, влⷣко, и҆ ве́сь прегрѣше́ньми лю́тѣ ᲂу҆ѧ́звлѧ́емъ,прибѣго́хъ къ тебѣ̀: ᲂу҆ще́дри мѧ̀, молю́сѧ.
Расхи́тиша бога́тство моѐ и҆ ꙗ҆́коже ме́ртва мѧ̀ ѡ҆ста́виша разбо́йницы, страстьмѝ ᲂу҆́мъ мо́й ᲂу҆ѧзви́вше: но ᲂу҆ще́дривъ сп҃си́ мѧ, гдⷭ҇и.
Є҆гда̀ леві́тъ мои́хъ ра̑нъ болѣ́знь, ꙗ҆́звъ не терпѧ̀, мимои́де ѿ менє̀: ты̀ же, чл҃вѣколю́бче, и҆злїѧ́лъ мѝ є҆сѝ бога́тꙋю твою̀ млⷭ҇ть.
Бг҃оро́диченъ: Кꙋпинꙋ́ тѧ неѡпали́мꙋю, и҆ го́рꙋ, и҆ лѣ́ствицꙋ ѡ҆дꙋшевле́ннꙋю, и҆ две́рь нбⷭ҇нꙋю,досто́йнѡ сла́вимъ, мр҃і́е пресла́внаѧ, правосла́вныхъ похвало̀.
И҆́ный.
І҆рмо́съ: Ѡ҆чи́сти мѧ̀, сп҃се:
Прїѧ́лъ є҆сѝ въ дꙋшѝ бж҃е́ственное бога́тство дх҃а, непоро́чнꙋю мл҃твꙋ, чистотꙋ̀, че́стность, бдѣ́нїе неѡсла́бное, воздержа́нїѧ трꙋды̀, и҆́миже до́мъ бж҃їй позна́лсѧ є҆сѝ.
Вещества̀ до́льнѧгѡ, хꙋ́дость прете́клъ є҆сѝ, премꙋ́дре, невеще́ственною же мл҃твою ᲂу҆́мъ воскрили́лъ є҆си, и҆ вы́шнѧгѡ жре́бїѧ ꙗ҆ви́лсѧ є҆сѝ наслѣ́дникъ, соверше́нства ра́ди житїѧ̀.
Пѡ́ты по́стническими ᲂу҆́глїе стрѣ́лъ вра́жїихъ ᲂу҆гаси́лъ є҆сѝ вои́стиннꙋ, и҆ ѻ҆́гнь вѣ́ры возже́гъ, попали́лъ є҆сѝ невѣ́рїѧ є҆ресе́й шата̑нїѧ.
Бг҃оро́диченъ: Возсїѧ̀ ѿ сїѡ́на вы́шнѧгѡ бл҃голѣ́пїе, ѡ҆де́ждою пло́ти по соедине́нїю неизрече́нномꙋ ѡ҆блече́нное и҆з̾ тебє̀, неискꙋсобра́чнаѧ, и҆ мі́ръ просвѣтѝ.
Конда́къ, гла́съ д҃.
Подо́бенъ: Ꙗ҆ви́лсѧ є҆сѝ дне́сь:
На высотѣ̀ воздержа́нїѧ гдⷭ҇ь и҆́стинна тѧ̀ положѝ, ꙗ҆́коже ѕвѣздꙋ̀ нело́жнꙋю, свѣтоводѧ́щꙋю концы̀, наста́вниче і҆ѡа́нне, ѻ҆́тче на́шъ.
І҆́косъ: До́мъ бж҃їй вои́стиннꙋ тебѐ самаго̀ содѣ́лалъ є҆сѝ, ѻ҆́тче, бж҃е́ственными твои́ми добродѣ́тельми, ꙗ҆́вѣ ᲂу҆краси́въ, ꙗ҆́кѡ зла́то свѣ́тлое, вѣ́рꙋ, наде́ждꙋ и҆ любо́вь и҆́стиннꙋю, бж҃е́ствєнныѧ зако́ны и҆злага́ѧ, воздержа́нїемъ подвиза́всѧ ꙗ҆́кѡ безпло́тенъ, ра́зꙋмъ, мꙋ́жество, цѣломꙋ́дрїе стѧжа́въ, смире́нїе, и҆́мже возвы́силсѧ є҆сѝ. тѣ́мже и҆ просвѣти́лсѧ є҆сѝ мл҃твами непреста́нными, и҆ нбⷭ҇наѧ прїѧ́лъ є҆сѝ селє́нїѧ, наста́вниче і҆ѡа́нне, ѻ҆́тче на́шъ.
Та́же чте́тсѧ сѷнаѯа́рїи дневны́й.
Посе́мъ житїѐ прпⷣбнагѡ ѻ҆тца̀ на́шегѡ і҆ѡа́нна лѣ́ствичника, въ ми́рѣ сконча́вшагѡсѧ.
Стїхѝ: И҆́ живы́й, пло́тїю ме́ртвъ бѣ̀ і҆ѡа́ннъ:
Тѣ́́мже вѣ́чнѡ живе́тъ, и҆ ме́ртвъ ꙗ҆́ви́всѧ бездыха́ненъ.
Писа́нїе ѡ҆ста́вль лѣ́ствицꙋ восхожде́нїѧ,
Своегѡ̀ восхожде́нїѧ пꙋ́ть показꙋ́етъ.
Въ сі́й ден́ъ недѣ́ли четве́ртыѧ постѡ́въ па́мѧть твори́мъ прпⷣобнагѡ ѻ҆тца на́шегѡ і҆ѡа́нна, написа́телѧ лѣ́ствицы. Сей і҆ѡа́ннъ, бл҃горазꙋ́менъ сы́й, шестина́десѧти лѣ́тъ принесѐ себѐ бг҃ꙋ же́ртвꙋ сщ҃е́ннѣйшꙋю, на сїна́йскꙋю го́рꙋ возше́дъ. Та́же по девѧтина́десѧтихъ лѣ́тѣхъ воста́въ, и҆́детъ въ по́прище безмо́лвїѧ, ѿстоѧ́щее на пѧ́ть зна́менїй ѿ пале́стры кѷрїа́ка, и҆ во ѡ҆би́тель дости́гъ, на мѣ́сто глаго́лемое ѳѡ́ла, четы́редесѧть лѣ́тъ тꙋ́ поживѐ, при́снѡ разжига́емь жела́нїемъ и҆ ѻ҆гне́мъ бж҃е́ственныѧ любвѐ. Ꙗ҆дѧ́ше ᲂу҆́бѡ всѧ̑, ꙗ҆̀же разрѣша́ютсѧ за́повѣдїю, но ᲂу҆мѣ́реннѡ ѕѣлѡ̀ и҆ не въ пресыще́нїе: и҆ въ се́мъ, мню̀, ро́гъ го́рдости сокрꙋша́ше всепремꙋ́дрѡ. Но и҆сто́чникъ сле́зъ є҆гѡ̀ кі́й ᲂу҆́мъ и҆зре́клъ бы; Сна̀ же причаща́шесѧ, є҆ли́кѡ ᲂу҆ма̀ сꙋществꙋ̀ бдѣ́нїемъ не вреди́тисѧ. Всѧ̀ жи́знь є҆гѡ̀ бѧ́ше мл҃тва при́снаѧ и҆ къ бг҃ꙋ любы̀ безмѣ́рнаѧ. Во всѣ́хъ си́хъ по́двизѣхъ бг҃оꙋго́днѡ пожи́въ, и҆ лѣ́ствицꙋ написа́въ, словеса̀ ᲂу҆че́нїѧ и҆спо́лнєна бл҃гости и҆зложи́въ, мнѡ́га и҆ и҆на̑ѧ писа̑нїѧ ѡ҆ста́вивъ,досто́йнѡ ᲂу҆поко́исѧ въ гдⷭ҇ѣ ма́рта въ тридесѧ́тый де́нь.
Тогѡ̀ мл҃твами, бж҃е, поми́лꙋй и҆ сп҃сѝ на́съ. Ами́нь.
Пѣ́снь з҃.
І҆рмо́съ: Превозноси́мый ѻ҆тцє́въ:
Разбо́йницы нападо́ша на мѧ̀ ѡ҆каѧ́ннаго, и҆ би́вше ѡ҆ста́виша мѧ̀ ме́ртва, ꙗ҆́коже бездыха́нна. тѣ́мже молю́сѧ тѝ: бж҃е, посѣти́ мѧ.
Оу҆́мъ мо́й ѡ҆крадо́ша помышлє́нїѧ непостоѧ̑ннаѧ и҆, ᲂу҆ѧзви̑вша страстьмѝ, ме́ртва мѧ̀ ѡ҆ста́виша ѿ мно́жества прегрѣше́нїй, но и҆сцѣли́ мѧ, сп҃се.
є҆гда̀ леѵі́тъ ви́дѣ мѧ̀ ра́нами болѧ́ща, не терпѧ̀ ꙗ҆́звъ неисцѣ́льности ра́ди, мимои́де мѧ̀,сп҃се мо́й: но ты̀ ᲂу҆врачꙋ́й мѧ̀.
Бг҃оро́диченъ: Ты̀, ѿ дв҃ы воплоти́выйсѧ, сп҃слъ мѧ̀ є҆сѝ, ꙗ҆́звамъ мои̑мъ возлива́ѧ бога́тꙋю млⷭ҇ть щедрѡ́тъ твои́хъ, хрⷭ҇тѐ: сегѡ̀ ра́ди тѧ̀ сла́влю.
И҆́ный.
І҆рмо́съ: Ѿ і҆ꙋде́и доше́дше:
На ѕла́цѣ вы́шнѧгѡ црⷭ҇твїѧ ста́до воспита́лъ є҆сѝ, ѻ҆́тче, и҆ жезло́мъ догма̑тъ ѿгна́въ ѕвѣ̑ри є҆ресе́й, воспѣва́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.
Въ го́рнїй вше́лъ є҆сѝ бра́чный пи́ръ цр҃ѧ̀ хрⷭ҇та̀, ѡ҆блече́нъ ѡ҆де́ждою досто́йною зва́вшагѡ, въ не́мже и҆ возле́глъ є҆сѝ, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.
Нешꙋмѧ́щаѧ грѣхмѝ рѣка̀ воздержа́нїѧ ꙗ҆ви́лсѧ є҆сѝ, ѻ҆́тче, по́мыслы потоплѧ́ѧ и҆ скве́рнꙋ ѡ҆чища́ѧ вопїю́щихъ вѣ́рою: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ: И҆з̾ чре́ва твоегѡ̀, дв҃о, произы́де воплоти́всѧ всѣ́хъ гдⷭ҇ь. тѣ́мже тѧ̀ бцⷣꙋ мꙋ́дрствꙋюще правосла́внѡ, сн҃ꙋ твоемꙋ̀ зове́мъ: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃.
І҆рмо́съ: Тебѣ̀ вседѣ́телю:
Ѿ разбо́йникъ по́мыслѡвъ мои́хъ, сп҃се, растли́хъ житїѐ моѐ согрѣше́нїй ꙗ҆́звами. тѣ́мже бж҃е́ственнагѡ ѡ҆бнажи́хсѧ ѡ҆́браза тебє̀ чл҃вѣколюби́вагѡ бг҃а: но ᲂу҆ще́дри мѧ̀.
Прише́лъ є҆сѝ на зе́млю ѿ вы́шнихъ, сп҃се, ᲂу҆ще́дривъ мѧ̀ всего̀ бїе́ньми ᲂу҆ра́неннаго, прегрѣше́нїй ꙗ҆́звами, ще́дре, и҆ и҆злїѧ́лъ є҆сѝ на мѧ̀, хрⷭ҇тѐ, млⷭ҇ть твою̀.
Тѣ́ло и҆ дꙋ́шꙋ ты̀, влⷣко сп҃се, во и҆скꙋпле́нїе да́лъ є҆сѝ за мѧ̀, и҆ сп҃слъ мѧ̀ є҆сѝ, мно́жествомъ грѣхѡ́въ ᲂу҆ѧзвле́ннаго, въ неисцѣ́льныхъ ꙗ҆́звахъ, ꙗ҆́кѡ млⷭ҇тивъ.
Бг҃оро́диченъ: Тѧ̀, па́че ᲂу҆ма̀ бг҃омꙋ́жнымъ ра́зꙋмомъ ро́ждшꙋю гдⷭ҇а и҆ дѣ́вствꙋющꙋю, всѧ̑ дѣла̀, дв҃о, бл҃гослови́мъ и҆ превозно́симъ во всѧ̑ вѣ́ки.
И҆́ный.
І҆рмо́съ: Цр҃ѧ̀ нбⷭ҇нагѡ:
Сто́лпъ ѡ҆дꙋшевле́нный вои́стиннꙋ и҆ ѡ҆́бразъ воздержа́нїѧ стѧжа́вше тѧ̀, ѻ҆́тче, всѝ твою̀ па́мѧть почита́емъ, і҆ѡа́нне.
Ли́къ мона́хѡвъ ра́дꙋетсѧ, и҆ ликꙋ́етъ собо́ръ прпⷣбныхъ и҆ првⷣныхъ: вѣне́цъ бо досто́йнѡ съ ни́ми прїѧ́лъ є҆сѝ.
Оу҆кра́шенъ добродѣ́тельми, въ черто́гъ неизрече́нныѧ сла́вы совше́лъ є҆сѝ, пѣ́снь воспѣва́ѧ хрⷭ҇тꙋ̀ во вѣ́ки.
Бг҃оро́диченъ: По́мощи ѿ тебє̀ просѧ́щыѧ не пре́зри, дв҃о, пою́щыѧ и҆ превозносѧ́щыѧ тѧ̀, ѻ҆трокови́це, во вѣ́ки.
Пѣ́снь ѳ҃.
І҆рмо́съ: И҆са́їе, ликꙋ́й:
За́пѡвѣди твоѧ̑, влⷣко, не сохрани́въ ра́зꙋмомъ мои́мъ, въ стра̑сти вше́дъ сласте́й, ѡ҆бнажи́хсѧ бл҃года́ти и҆ въ ꙗ҆́звахъ пове́рженъ є҆́смъ на́гъ. тѣ́мже молю́ тѧ: сп҃се, сп҃си́ мѧ.
Леѵі́тъ не возмо́же ѡ҆чи́стити стрꙋ́пы моѧ̑: но прише́лъ є҆сѝ ко мнѣ̀, бл҃же, сострада́тельнѡ, и҆ и҆злїѧ́лъ є҆сѝ млⷭ҇ть твои́хъ щедро́тъ, сп҃се, на мѧ̀, ꙗ҆́кѡ всеизрѧ́дный вра́чь и҆сцѣли́въ мѧ̀.
Ꙗ҆́кѡ сы́й бл҃госе́рдъ, ᲂу҆ще́дривъ сп҃слъ є҆сѝ, хрⷭ҇тѐ, ꙗ҆́звами лю́тѣ ѿ разбо́йникъ, сп҃се, и҆збїе́на мѧ̀: дꙋ́шꙋ же и҆ тѣ́ло твоѐ, ꙗ҆́кѡ дїна̑рїѧ два̀, да́лъ є҆сѝ во и҆скꙋпле́нїе.
Бг҃оро́диченъ: Превы́ше ᲂу҆ма̀ є҆́сть ржⷭ҇тво̀ твоѐ, бг҃омт҃и: без̾ мꙋ́жа бо зача́тїе въ тебѣ̀, и҆ дв҃и́чески рожде́нїе бы́сть: и҆́бо бг҃ъ є҆́сть роди́выйсѧ. є҆го́же велича́юще, тѧ̀, дв҃о, ᲂу҆бл҃жа́емъ.
И҆́ный.
І҆рмо́съ: Чтⷭ҇ꙋю сла́внѡ почти́мъ:
Вра́чь болѧ́щымъ въ прегрѣше́нїихъ, бл҃же́нне, ѿ бг҃а ꙗ҆ви́лсѧ є҆сѝ, гꙋби́тель же и҆ прогони́тель лꙋка́выхъ дꙋхѡ́въ: тѣ́мже тѧ̀ ᲂу҆бл҃жа́емъ.
Зе́млю, ꙗ҆́коже тлѣ́нїѧ жили́ще, ѡ҆ста́вилъ є҆сѝ, ѻ҆́тче, и҆ въ землѝ кро́ткихъ всели́лсѧ є҆сѝ, и҆ съ ни́ми весели́шисѧ, бж҃е́ственныѧ наслажда́ѧсѧ сла́дости.
Дне́сь де́нь пра́зднственный, созыва́етъ бо всѧ̑ мона́шествꙋющихъ стада̀ въ ли́къ дх҃о́вный, на трапе́зꙋ и҆ снѣ́дь нетлѣ́нныѧ жи́зни.
Бг҃оро́диченъ: Пре́жде родонача́льники ѕлонра́внѡ запе́ншаго человѣкоꙋбі́йцꙋ низложи́вый, въ тебѣ̀ всели́всѧ, всенепоро́чнаѧ, роди́сѧ, и҆ всѧ̑ ны̀ сп҃сѐ.
Є҆ѯапостїла́рїй воскрⷭ҇нъ, и҆ прпⷣнагѡ.
Подо́бенъ: Жєны̀ ᲂу҆слы́шите:
Мїрска́гѡ сладостра́стїѧ ꙗ҆́кѡ тѧ́жкагѡ ᲂу҆клони́лсѧ є҆сѝ, и҆ неѧде́нїемъ пло́ть ᲂу҆вѧди́въ,ѡ҆бнови́лъ є҆сѝ дꙋшѝ крѣ́пость, прпⷣбне, и҆ сла́вою ѡ҆богати́лсѧ є҆сѝ нбⷭ҇ною, пресла́вне. тѣ́мже не преста́й молѧ́сѧ ѡ҆ на́съ, і҆ѡа́нне.
Бг҃оро́диченъ: Вои́стиннꙋ бцⷣꙋ тѧ̀ и҆сповѣ́дꙋемъ, влⷣчце, тобо́ю сп҃се́ннїи: и҆́бо бг҃а родила̀ є҆сѝ неизрече́ннѡ, разрꙋши́вшаго крⷭ҇то́мъ сме́рть, къ себѣ́ же привле́кшаго прпⷣбныхъ собо́ры: съ ни́миже тѧ̀ восхвалѧ́емъ, дв҃о.
На хвали́техъ воскрⷭ҇ны ѻ҆смогла́сника, и҆ а҆натѡ́лїєвы.
Та́же глаго́лемъ сті́хъ: Воскреснѝ, гдⷭ҇и бж҃е мо́й, да вознесе́тсѧ рꙋка̀ твоѧ̀:
И҆ пое́мъ самогла́сенъ, гла́съ а҃:
Прїиди́те, дѣ́лаимъ въ та́инственнѣмъ вїногра́дѣ, плоды̀ покаѧ́нїѧ въ не́мъ творѧ́ще, не въ бра́шнѣхъ и҆ питїи́хъ трꙋжда́ющесѧ, но въ мл҃твахъ и҆ постѣ́хъ добродѣ́тєли соверша́юще: си́ми ᲂу҆гожда́емый гдⷭ҇ь за дѣ́ло пѣ́нѧзь подае́тъ, и҆́мже дꙋ́шы и҆збавлѧ́етъ ѿ до́лга грѣхо́внагѡ, є҆ди́нъ многомлⷭ҇тивый.
Сла́ва, па́ки то́йже. И҆ ны́нѣ: Пребл҃гослове́нна є҆сѝ: Славосло́вїе вели́кое, и҆ ѿпꙋ́стъ.Сла́ва, и҆ ны́нѣ: стїхи́ра є҆ѵⷢ҇льскаѧ, и҆ ѡ҆глаше́нїе, и҆ ча́съ а҃-й, и҆ про́чее послѣ́дованїе ꙗ҆́кѡ ѡ҆бы́чно.
На лїтꙋргі́и: И҆з̾ѡбрази́тєльныѧ и҆ бл҃жє́нны гла́са. Прокі́менъ а҆пⷭ҇ла, рѧдова́гѡ гла́са: и҆ прпⷣбнагѡ, гла́съ и҃: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. Сті́хъ: Воспо́йте гдⷭ҇еви пѣ́снь но́вꙋ. А҆пⷭ҇лъ днѐ, ко є҆вре́ємъ, зача́ло тд҃і. И҆ дрꙋгі́й прпⷣбнагѡ, ко є҆фесе́ємъ, зача́ло ск҃ѳ. А҆ллилꙋ́їа гла́са, и҆ прпⷣбнагѡ. Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе ѿ ма́рка, зача́ло м҃. И҆ прпⷣбнагѡ, ѿ матѳе́а, зача́ло і҃. Кїнѡні́къ: Хвали́те гдⷭ҇а съ нб҃съ: Дрꙋгі́й: Въ па́мѧть вѣ́чнꙋю:
Въ недѣ́лю ве́чера,
по предначина́тельнѣмъ ѱалмѣ̀, на Гдⷭ҇и воззва́хъ, поста́вимъ стїхѡ́въ і҃. И҆ пое́мъ стїхи̑ры ᲂу҆мили́тєльныѧ ѻ҆смогла́сника д: и҆ трїѡ́ди подѡ́бны господи́на і҆ѡ́сифа, гла́съ г҃.
Подо́бенъ: Ве́лїѧ крⷭ҇та̀ твоегѡ̀:
Вели̑кїѧ трꙋды̀ во вре́мѧ воздержа́нїѧ пока́жемъ, вѣ́рнїи, ꙗ҆́кѡ да сла́вꙋ вели́кꙋю полꙋчи́мъ,млⷭ҇тїю вели́кагѡ бг҃а и҆ цр҃ѧ̀ и҆збавлѧ́еми ѿ пла́мене гее́нскагѡ.
Вре́мѧ поще́нїѧ ны́нѣ преполови́вше, нача́ло бж҃е́ственнагѡ нра́ва ꙗ҆́вѣ пока́жемъ, и҆ въ коне́цъ добродѣ́тельнагѡ жи́тельства дости́гнꙋти те́плѣ потщи́мсѧ, ꙗ҆́кѡ да прїи́мемъ сла́дость нестарѣ́ющꙋю.
И҆́ный, господи́на ѳео́дѡра, гла́съ з҃.
Подо́бенъ: Под̾ кро́въ тво́й.
Преполови́вше се́й сщ҃е́нный поще́нїѧ пꙋ́ть, къ бꙋ́дꙋщемꙋ въ ра́дости пра́вѡ потеце́мъ,бл҃готворе́нїѧ є҆ле́емъ дꙋ́шы помазꙋ́юще, ꙗ҆́кѡ да сподо́бимсѧ и҆ бж҃е́ствєннымъ стрⷭ҇те́мъ хрⷭ҇та̀ бг҃а на́шегѡ поклони́тисѧ, дости́гнꙋти и҆ стра́шнагѡ и҆ ст҃агѡ воскрⷭ҇нїѧ.
И҆ мине́и г҃. Сла́ва, и҆ ны́нѣ, бг҃оро́диченъ. Вхо́дъ. Прокі́менъ, гла́съ и҃: Не ѿвратѝ лица̀ твоегѡ̀:
На стїхо́внѣ самогла́сенъ днѐ, гла́съ з҃:
Вїногра́дъ насади́вый и҆ дѣ́латєли призва́вый, бли́зъ є҆́сть сп҃съ: прїиди́те, поще́нїѧ подви̑жницы, мздꙋ̀ воспрїи́мемъ, ꙗ҆́кѡ бога́тъ є҆́сть деѧ́тель и҆ млⷭ҇тивъ: ма́лѡ дѣ́лавше, прїи́мемъ дꙋше́внꙋю млⷭ҇ть.
И҆́нъ самогла́сенъ, гла́съ ѕ҃:
Въ разбо́йники, въ по́мыслы впа́дъ а҆да́мъ, ѡ҆кра́денъ бы́сть ᲂу҆мо́мъ, и҆ ᲂу҆ѧзви́всѧ дꙋше́ю, лежа́ше лише́нъ застꙋпле́нїѧ: нижѐ сщ҃е́нникъ пре́жде зако́на внѧ́тъ є҆мꙋ̀, нижѐ леѵі́тъ по зако́нѣ воззрѣ́ на́нь, то́кмѡ ты̀, бж҃е, прише́дый не ѿ самарі́и, но ѿ бцⷣы. гдⷭ҇и, сла́ва тебѣ̀.
Мч҃нченъ: Мч҃нцы твоѝ, гдⷭ҇и, не ѿверго́шасѧ тебє̀, ни ѿстꙋпи́ша ѿ за́повѣдей твои́хъ: тѣ́хъ мл҃твами поми́лꙋй на́съ.
Сла́ва, и҆ ны́нѣ, бг҃оро́диченъ, гла́съ ѕ҃:
А҆рха́гг҃льски воспои́мъ, вѣ́рнїи, нбⷭ҇ный черто́гъ и҆ две́рь запеча́таннꙋю вои́стиннꙋ: ра́дꙋйсѧ,ꙗ҆́кѡ тобо́ю ѿрастѐ на́мъ сп҃съ всѣ́хъ хрⷭ҇то́съ, жизнода́вецъ и҆ бг҃ъ: низложѝ, влⷣчце, мꙋчи́тєли, безбѡ́жныѧ врагѝ на́шѧ, рꙋко́ю твое́ю, пречⷭ҇таѧ, ᲂу҆пова́нїе хрⷭ҇тїа́нъ.
И҆ про́чее послѣ́дованїе по ѡ҆бы́чаю.
На повече́рїи пое́мъ слꙋ́жбꙋ ст҃а́гѡ прилꙋчи́вшагѡсѧ въ четверто́къ вели́кагѡ канѡ́на.