Суббота четвертой седмицы
Въ сꙋббѡ́тꙋ д҃-ѧ седми́цы на ᲂу҆́трени,
А҆ллилꙋ́їа и҆ тропарѝ, гла́съ в҃: А҆пⷭ҇ли, мч҃нцы: Сла́ва: Помѧнѝ, гдⷭ҇и: И҆ ны́нѣ: Мт҃и ст҃а́ѧ: И҆ стїхосло́вїе. Та́же мч҃нчны сѣда́льны гла́са. По непоро́чныхъ же пое́мъ тропарѝ: Ст҃ы́хъ ли́къ: И҆ по є҆ктенїѝ сѣда́ленъ ме́ртвенъ, гла́съ є҃: Поко́й, сп҃се на́шъ, съ првⷣными: Сла́ва, коне́цъ: И҆ ны́нѣ, бг҃оро́диченъ: Ѿ дв҃ы возсїѧ́вый: Та́же канѡ́нъ мине́и, и҆ свѧта́гѡ ѡ҆би́тели, и҆ настоѧ́щыѧ четверопѣ́снцы по чи́нꙋ и҆́хъ. Четверопѣ́снецъ, є҆гѡ́же краестро́чїе: Пѣ́снь на мч҃нки. Творе́нїе господи́на і҆ѡ́сифа.
И҆ стїхосло́вѧтсѧ пѣ̑сни. Гла́съ д҃.
Пѣ́снь ѕ҃.
І҆рмо́съ: Пꙋчи́ною жите́йскою:
Преидо́сте предѣ́лы пло́ти мно́гимъ терпѣ́нїемъ, страда́льцы, поне́сше мꙋ̑ки и҆ бѡлѣ̑зни: тѣ́мже всѧ́кꙋю болѣ́знь и҆ ско́рбь ва́съ воспѣва́ющихъ ѡ҆блегча́ете.
Тьма́мъ а҆́гг҃лъ совокꙋпи́сѧ во́инство ст҃ы́хъ стрⷭ҇тоте́рпєцъ, и҆ мо́литъ всест҃а́го бг҃а, ѿ согрѣше́нїй тьмочи́сленныхъ на́съ и҆зба́вити, ꙗ҆́кѡ хрⷭ҇тꙋ̀ ᲂу҆годи́вшїи.
Оу҆мерщвле́нъ бы́въ и҆ во гро́бѣ ᲂу҆снꙋ́въ, хрⷭ҇тѐ, возста́вилъ є҆сѝ мє́ртвыѧ, и҆ въ вѣ́рѣ ᲂу҆ме́ршымъ дае́ши бл҃гости бога́тство, хрⷭ҇тѐ, ᲂу҆покое́нїе со всѣ́ми ст҃ы́ми.
Бг҃оро́диченъ: Бж҃їе бг҃ъ сло́во, и҆скі́й ѡ҆божи́ти человѣ́ка чтⷭ҇аѧ, и҆з̾ тебє̀ воплоща́етсѧ и҆ человѣ́къ ꙗ҆влѧ́етсѧ: є҆го́же непреста́ннѡ молѝ, ѡ҆брѣстѝ на́мъ млⷭ҇ть во вре́мѧ ѿвѣ́та.
И҆́ный, господи́на ѳео́дѡра, гла́съ то́йже.
І҆рмо́съ: Бꙋ́рею грѣхо́вною:
Пло́ти и҆ кро́ве не пощадѣ́вше, ст҃і́и, ко всѧ́комꙋ мꙋче́нїю ста́сте небоѧ́знени, хрⷭ҇та̀ не ѿмета́ющесѧ: тѣ́мже съ нб҃съ низпосла̀ хрⷭ҇то́съ ва́мъ вѣнцы̀.
Мꙋ́чєникъ торжество̀ срѣта́имъ, просвѣти́вшесѧ дѣѧ́ньми, и҆ возопїи́мъ бг҃одꙋхнове́нными пѣ́сньми: вы̀ є҆стѐ вои́стиннꙋ денни̑цы на землѝ, хрⷭ҇тѡ́вы мч҃нцы.
Трⷪ҇ченъ: Трⷪ҇це ст҃а́ѧ, сла́влю тѧ̀, є҆стество̀ безнача́льное, є҆ди́наго бг҃а, є҆ди́наго гдⷭ҇а, трѝ лица̑, ѻ҆ц҃а̀, сн҃а и҆ дх҃а, нерожде́нна, рожде́нна, и҆сходѧ́ща, тꙋ́южде и҆ присносꙋ́щнꙋ.
Бг҃оро́диченъ: Ѽ бл҃же́ннаѧ бг҃оневѣ́сто, ка́кѡ родила̀ є҆сѝ без̾ мꙋ́жа, и҆ пребыла̀ є҆сѝ,ꙗ҆́коже пре́жде; бг҃а бо родила̀ є҆сѝ, чꙋ́до стра́шное. но молѝ сп҃са́тисѧ пою́щымъ тѧ̀.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Мч҃нченъ: Оу҆сѣчє́нїѧ ᲂу҆дѡ́въ ва́шихъ зрѧ́ще; наслажда́стесѧ кровьмѝ ра́дꙋющесѧ: но моли́те ѡ҆ на́съ прилѣ́жнѡ гдⷭ҇а, мч҃нцы присносла́внїи.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Ѿ землѝ созда́вый мѧ̀, и҆ ѡ҆живи́вый мѧ̀, и҆ въ зе́млю возврати́тсѧ мнѣ̀ па́ки рекі́й, ꙗ҆̀же прїѧ́лъ є҆сѝ рабы̑ твоѧ̑ ᲂу҆поко́й, и҆ ѿ тлѣ́нїѧ сме́ртнагѡ возведѝ, гдⷭ҇и.
І҆рмо́съ: Бꙋ́рею грѣхо́вною погрꙋжа́емь, ꙗ҆́кѡ во чре́вѣ ки́товѣ содержи́мь, съ прⷪ҇ро́комъ зовꙋ́ ти: возведѝ ѿ тлѣ́нїѧ жи́знь мою, гдⷭ҇и, и҆ сп҃си́ мѧ.
Конда́къ: Со ст҃ы́ми ᲂу҆поко́й: І҆́косъ: Са́мъ є҆ди́нъ є҆сѝ безсме́ртенъ:
Пѣ́снь з҃.
І҆рмо́съ: Ѡ҆́бразꙋ злато́мꙋ:
Ѡ҆блече́ни въ нетлѣ́нїе бж҃е́ственное ѡ҆бнаже́нїемъ тлѣ́нныѧ пло́ти, ны́нѣ свѣ́тли предстоитѐ на́съ ра́ди пло́ть ѿ нетлѣ́нныѧ жены̀ прїе́мшемꙋ, страда́льцы: сегѡ̀ ра́ди во ѡ҆де́ждꙋ сщ҃е́ннꙋю мѧ̀ ѡ҆блецы́те, ѕлѣ̀ ѡ҆бнаже́ннаго.
Въ воздержа́нїи пожи́вый, стрⷭ҇тоте́рпєцъ собо́ръ ᲂу҆крѣплѧ́етъ на́съ воздержа́нїѧ по́прище тещѝ невозбра́ннѡ, ꙗ҆́кѡ проповѣ́давый хрⷭ҇та̀ на по́прищи мꙋ́жественнѡ, и҆ предстоѧ́й прⷭ҇то́лꙋ вѣнцено́сенъ наслажда́етсѧ мы́сленнѡ со а҆́гг҃лы.
Мл҃твами твои́хъ ст҃ы́хъ мч҃нкъ, бж҃е, ᲂу҆со́пшыѧ вѣ̑рныѧ рабы̑ твоѧ̑ раѧ̀ жи́тєли покажѝ, и҆ свѣ́та мы́сленнагѡ сподо́би ѧ҆̀, непреста́ннѡ вопїю́щыѧ тебѣ̀: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ: Тѧ̀ є҆ди́нꙋ бл҃гꙋ́ю мо́лимъ, дв҃о, ѡ҆ѕло́блєнныѧ ны̀ бл҃ги ꙗ҆вѝ, и҆ хрⷭ҇та̀ є҆стество́мъ сꙋ́ща бл҃га́го прилѣ́жнѡ молѝ, воздержа́нїѧ вре́мѧ, бл҃га̑ѧ дѣ́ющымъ, и҆спо́лнити на́мъ пѣсносло́вѧщымъ є҆го̀: бл҃гослове́нъ бг҃ъ ѻ҆тє́цъ на́шихъ.
И҆́ный.
І҆рмо́съ: Глаго́лавый на горѣ̀:
Возвели́чивый ст҃ы̑ѧ твоѧ̑ всѧ̑ и҆ зна́меньми ᲂу҆диви́вый ѧ҆̀ въ мі́рѣ, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Всѧ́кїй ви́дъ ра́нъ проше́дше и҆ колѣ̑на ваа́лꙋ не поко́ршесѧ преклони́ти, вѣнцы̀ сла́вы взѧ́сте ѿ бг҃а, хрⷭ҇тѡ́вы мч҃нцы.
Трⷪ҇ченъ: Во є҆ди́ницѣ трⷪ҇це, покланѧ́емое сꙋщество̀, ѻ҆́ч҃е, сн҃е и҆ дш҃е, воспѣва́ющыѧ тѧ̀ сохранѧ́й, бж҃е ѻ҆тє́цъ на́шихъ.
Бг҃оро́диченъ: Дв҃о мт҃и ѻ҆трокови́це всесвѣ́тлаѧ, є҆ди́на къ бг҃ꙋ хода́таице, не преста́й, влⷣчце, моли́ти сп҃сти́сѧ на́мъ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀:
Безсме́ртномꙋ цр҃ю̀ во́инствовавше и҆ вѣ́рꙋ къ немꙋ̀ показа́вше соверше́ннꙋю, мч҃нцы, кро́вь свою̀ за него̀ и҆злїѧ́сте.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и.
И҆дѣ́же жи́зни свѣ́тъ тво́й и҆стека́етъ, вселѝ вѣ̑рныѧ твоѧ̑ рабы̑, ꙗ҆̀же преста́вилъ є҆сѝ ѿ вре́менныхъ, гдⷭ҇и бж҃е ѻ҆тє́цъ на́шихъ.
І҆рмо́съ: Глаго́лавый на горѣ̀ съ мѡѷсе́емъ, и҆ ѡ҆́бразъ дв҃ы показа́вый кꙋпинꙋ̀, бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.
Пѣ́снь и҃.
І҆рмо́съ: Во ѻ҆гнѝ пла́меннѣмъ:
Великоимени́тїи хрⷭ҇тѡ́вы страда́льцы и҆ чтⷭ҇ні́и въ бз҃ѣ, всѧ̑ воспѣва́ющыѧ па̑мѧти ва́шѧ ѿ вели́кихъ согрѣше́нїй и҆ та́мошнихъ мꙋ́къ и҆зба́вите ва́шими вели́кими къ немꙋ̀ мл҃твами.
Ст҃оизбра́нное и҆ тве́рдое вои́стиннꙋ во́инство хрⷭ҇та̀ бг҃а, мч҃нкъ собо́ри, ѡ҆ст҃и́те на́шъ ᲂу҆́мъ и҆ се́рдце въ сїѧ̑ ст҃ы̑ѧ дни̑ пѡ́стныѧ ва́шими ст҃ы́ми мл҃твами.
И҆зба́ви, гдⷭ҇и ѿ че́рвїѧ мꙋ́чащагѡ и҆ скре́жета зꙋ́бнагѡ, и҆ кромѣ́шнїѧ тьмы̀ несвѣти́мыѧ, всѧ̑ ꙗ҆̀же вѣ́рою прїѧ́лъ є҆сѝ: и҆ ᲂу҆чинѝ сїѧ̑, и҆дѣ́же свѣ́тъ лица̀ твоегѡ̀, хрⷭ҇тѐ, сїѧ́етъ во вѣ́ки.
Бг҃оро́диченъ: Крⷭ҇тъ хрⷭ҇то́въ чтⷭ҇ны́й ви́дѣвшымъ и҆ ѿ се́рдца поклони́вшымсѧ сподо́би, бцⷣе чтⷭ҇аѧ, твои́ми ко влⷣцѣ мл҃твами, ви́дѣти на́мъ и҆ стрⷭ҇ти честны̑ѧ, ѿ страсте́й ѡ҆чищє́ннымъ.
И҆́ный.
І҆рмо́съ: Землѧ̀ и҆ всѧ̑ ꙗ҆̀же на не́й:
Ѽ до́брыѧ мѣ́ны! є҆́юже ѡ҆брѣто́сте сме́ртїю жи́знъ, сщ҃енномч҃нцы хрⷭ҇тѡ́вы, ѻ҆гнѧ̀ и҆ меча̀, мра́за и҆ ѕвѣре́й ника́коже ᲂу҆боѧ́вшесѧ и҆ вопїю́ще: по́йте гдⷭ҇а и҆ превозноси́те во всѧ̑ вѣ́ки.
Горѣ̀ ли́къ а҆́гг҃льскїй, до́лꙋ же мы̀ земні́и хва́лимъ, мч҃нцы хрⷭ҇тѡ́вы, ди̑внаѧ страда̑нїѧ и҆ по́двиги ва́шегѡ мꙋ́жества, бл҃гословѧ́ще, пою́ще гдⷭ҇а и҆ превозносѧ́ще во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Свѣ́тъ, жи́знъ и҆ жи̑зни почита́ю тѧ̀, ѻ҆ц҃а̀ и҆ сн҃а, и҆ дх҃а и҆схо́дна, є҆стество̀ є҆ди́но, трѝ ѵ҆поста̑си, бг҃а є҆ди́наго поѧ̀: бл҃гословлѧю́ тѧ̀, пою́ тѧ гдⷭ҇а, и҆ превозношꙋ́ тѧ во всѧ̑ вѣ́ки.
Бг҃оро́диченъ: Кто̀ ѿ земноро́дныхъ не воспое́тъ тѧ̀, нескве́рнаѧ чтⷭ҇аѧ голꙋби́це; ты́ бо родила̀ є҆сѝ на́мъ свѣ́тъ вели́кїй, жи́зни бога́тство, і҆и҃са сп҃са: є҆го́же пое́мъ хва́лѧще ꙗ҆́кѡ гдⷭ҇а, и҆ превозно́симъ во всѧ̑ вѣ́ки.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
По́двиги чꙋ̑дныѧ ва́шѧ сла́вѧще, мч҃нцы, бл҃годѣ́телѧ и҆ бг҃а бл҃гослови́мъ и҆ покланѧ́емсѧ, на по́прище подвигѡ́въ ва́съ ᲂу҆крѣпи́вшаго: є҆го́же превозно́симъ во всѧ̑ вѣ́ки.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Ты̀, сме́рти и҆ жи́зни гдⷭ҇ь сы́й и҆ бг҃ъ, преста́вльшыѧсѧ бл҃гоче́стнѡ воздвиза́ѧй, положѝ та́мѡ въ селе́нїихъ првⷣныхъ, бл҃гословѧ́щыѧ, пою́щыѧ тѧ̀, гдⷭ҇и, и҆ превозносѧ́щыѧ во всѧ̑ вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Землѧ̀ и҆ всѧ̑ ꙗ҆̀же на не́й, морѧ̀ и҆ всѝ и҆сто́чницы, небеса̀ небе́съ, свѣ́тъ и҆ тьма̀, мра́зъ и҆ зно́й, сы́нове человѣ́честїи, сщ҃е́нницы, бл҃гослови́те гдⷭ҇а и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ꙗ҆́кѡ сотворѝ мнѣ̀:
Свѣти́льницы сꙋ́ще неле́стнїи, хрⷭ҇тѡ́вы страда́льцы, просвѣти́те на́шѧ по́мыслы ᲂу҆тверди́те твори́ти свѣтоза̑рнаѧ и҆ чтⷭ҇аѧ бж҃їѧ хотѣ̑нїѧ.
Ѡ҆рꙋ̑жїѧ закала̑ющаѧ врагѝ зрите́сѧ, до́блїи хрⷭ҇тѡ́вы страда́льцы: но и҆зба́вите на́съ ѿ стрѣ́лъ лꙋка́вагѡ предста́тельствы ва́шими.
Поко́й, ще́дре, въ нѣ́дрѣхъ а҆враа́мовыхъ рабы̑ твоѧ̑, вѣ́рою ѿ на́съ ѿше́дшыѧ къ тебѣ̀, всѧ́ческихъ зижди́телю и҆ пребл҃го́мꙋ.
Бг҃оро́диченъ: Пло́ти моеѧ̀ ᲂу҆мертвѝ движє́нїѧ, бг҃а пло́тїю ро́ждшаѧ па́че ᲂу҆ма̀, и҆ пода́ждь просвѣще́нїе мы́сли мое́й, чтⷭ҇аѧ, сꙋ́щи ѡ҆́блакъ свѣ́та.
И҆́ный.
І҆рмо́съ: Велича́емъ всѝ:
Воспѣва́емъ всѝ па̑мѧти ва́шѧ, мч҃нцы прехва́льнїи, ви́дѧще по́двиги сщ҃е́нныхъ ва́шихъ страда́нїй, и҆ ᲂу҆диви́вшесѧ хрⷭ҇та̀ велича́емъ.
Стра́ждꙋще дрꙋ́гъ ко дрꙋ́гꙋ глаго́лютъ стрⷭ҇тоте́рпцы: пло́ти не пощади́мъ: прїиди́те, ᲂу҆́мремъ за хрⷭ҇та, да во всѧ̑ вѣ́ки поживе́мъ ликꙋ́юще безконе́чнѡ.
Трⷪ҇ченъ: Ѽ трⷪ҇це во є҆ди́номъ є҆стествѣ̀, ѻ҆́ч҃е нерожде́нный, и҆ рожде́нный сн҃е, и҆ дш҃е и҆сходѧ́й, тѧ̀ воспѣва̑ющыѧ твое́ю млⷭ҇тїю невреди̑мы соблюдѝ.
Бг҃оро́диченъ: Ра́дꙋйсѧ, всечⷭ҇тна́ѧ, чтⷭ҇аѧ: дѣ́вства похвало̀, ма́терей ᲂу҆твержде́нїе,человѣ́кѡмъ по́мощь и҆ мі́ра ра́дость, мр҃і́е, мт҃и и҆ рабо̀ бг҃а на́шегѡ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Ли́че ст҃ы́хъ, прїимѝ мольбꙋ̀ мою̀: и҆ ꙗ҆́коже сподо́бихсѧ крⷭ҇тъ ѡ҆блобыза́ти, ᲂу҆ хрⷭ҇та̀ и҆спроси́те и҆ сп҃си́тельнѣй стрⷭ҇ти мнѣ̀ поклони́тисѧ.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и.
Ѡ҆сла́би, ѡ҆ста́ви, ще́дре, къ тебѣ̀ чл҃вѣколю́бцꙋ преста́вльшымсѧ, и҆ сїѧ̑ ᲂу҆поко́й въ селе́нїихъ и҆збра́нныхъ: ты́ бо є҆сѝ жи́знь и҆ воскрⷭ҇нїе.
І҆рмо́съ: Велича́емъ всѝ чл҃вѣколю́бїе твоѐ, хрⷭ҇тѐ сп҃се на́шъ, сла́во ра̑бъ твои́хъ и҆ вѣ́нче вѣ́рныхъ, возвели́чивый па́мѧть ро́ждшїѧ тѧ̀.
Є҆ѯапостїла́рїи, пи́саны въ сꙋббѡ́тꙋ в҃-ю поста̀. На хвали́техъ мч҃нчны гла́са. На стїхо́внѣ же подо́бны господи́на ѳеофа́на.
На лїтꙋргі́и: И҆з̾ѡбрази́тєльнаѧ и҆ бл҃жє́нны гла́са. Прокі́менъ а҆пⷭ҇ла ме́ртвенъ. А҆пⷭ҇лъ, зача́ло тг҃і. И҆ за ᲂу҆поко́й, къ корі́нѳѧнѡмъ, зача́ло рѯ҃г. А҆ллилꙋ́їа, ме́ртвенъ. Є҆ѵⷢ҇лїе ѿ ма́рка, зача́ло л҃а. И҆ за ᲂу҆поко́й, ѿ і҆ѡа́нна, зача́ло ѕ҃і. Прича́стенъ: Ра́дꙋйтесѧ, првⷣнїи: Дрꙋгі́й, за ᲂу҆поко́й: Бл҃же́ни, ꙗ҆̀же и҆збра́лъ: