Пятая седмица (с понедельника по пяток)

Въ понедѣ́льникъ пѧ́тыѧ седми́цы на ᲂу҆́трени,

трⷪ҇чны слꙋчи́вшагѡсѧ гла́са. По а҃-мъ стїхосло́вїи пое́мъ сѣда́льны ᲂу҆мили́тєльныѧ ѻ҆смогла́сника, два̀, съ бг҃оро́дичнымъ.

По в҃-мъ же стїхосло́вїи сѣда́ленъ господи́на і҆ѡ́сифа, гла́съ г҃. Подо́бенъ: Красотѣ̀ дѣ́вства:

Краснѣ́йшее вре́мѧ наста̀, достохва́льный де́нь воздержа́нїѧ возсїѧ̀: бра́тїе, потщи́мсѧ ѡ҆чи́ститисѧ, ꙗ҆́кѡ да ꙗ҆ви́мсѧ чи́сти сотво́ршемꙋ, и҆ красотꙋ̀ є҆гѡ̀ полꙋчи́мъ, мл҃твами того̀ ро́ждшїѧ, є҆ди́ныѧ чтⷭ҇ыѧ бг҃омт҃ре.

Сла́ва, то́йже.

И҆ ны́нѣ, бг҃оро́диченъ: Красотѣ̀ дѣ́вства твоегѡ̀, и҆ пресвѣ́тлѣй чистотѣ̀ твое́й ᲂу҆диви́всѧ,гаврїи́лъ вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; ка́кѡ наименꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже, ꙗ҆́коже мѝ повелѣ́но бы́стъ, вопїю́ ти: ра́дꙋйсѧ бл҃года́тнаѧ.

По г҃-мъ стїхосло́вїи сѣда́ленъ господи́на ѳео́дѡра, гла́съ з҃.

Подо́бенъ: Гдⷭ҇и, мы̀ є҆смы̀:

Гдⷭ҇и, да́вый на́мъ дости́гнꙋти дне́шнѧгѡ днѐ, предсїѧ́ющꙋю свѣ́тлѡ седми́цꙋ ст҃ꙋ́ю ла́зарева ѿ ме́ртвыхъ воста́нїѧ стра́шнагѡ сподо́би рабы̑ твоѧ̑ стра́хомъ твои́мъ ходи́ти, по́прище поще́нїѧ всѐ соверша́ющыѧ. [Два́жды].

Бг҃оро́диченъ: Чтⷭ҇нѣ́йши сла́вныхъ херꙋві̑мъ є҆сѝ, прест҃а́ѧ дв҃о: ѻ҆ни́ бо, бж҃е́ственныѧ не терпѧ́ще си́лы, кри́лы покры́тымъ лице́мъ, слꙋ́жбꙋ соверша́ютъ: ты́ же воплоще́нна сло́ва, самови́днѡ зрѧ́щи, но́сиши: є҆го́же непреста́ннѡ молѝ ѡ҆ дꙋша́хъ на́шихъ.

Канѡ́нъ въ мине́и, и҆ трипѣ́снецъ господи́на і҆ѡ́сифа.

И҆ стїхосло́витсѧ пѣ́снь. Гла́съ г҃.

Пѣ́снь а҃.

І҆рмо́съ: Во́ды дре́вле:

На̑ша помышлє́нїѧ бж҃е́ственнымъ ра́ломъ воздѣ́лавше бж҃е́ственнагѡ поще́нїѧ, добродѣ́телей кла́съ плодопринесе́мъ, ꙗ҆́кѡ да не вза́лчемъ во вѣ́ки, наслажда́ющесѧ сла́достїю неиждива́емою ра́дꙋющесѧ.

Многолѣ̑тныѧ стра̑сти внꙋ́трь ношꙋ̀, ѡ҆мрача́ющыѧ ѡ҆каѧ́ннꙋю дꙋ́шꙋ мою̀. безлѣ́тне сло́ве безнача́льнагѡ ѻ҆ц҃а̀, ко твое́й си́лѣ непобѣди́мѣй сокрꙋше́ннымъ се́рдцемъ припа́даю и҆ молю́сѧ: ᲂу҆ще́дри и҆ сп҃си́ мѧ.

До́брое поще́нїе пита́етъ сердца̀, ᲂу҆маща́ѧ помышлє́нїѧ бг҃оꙋгѡ́днаѧ, и҆ страсте́й бе́зднꙋ и҆зсꙋша́ѧ, дожде́мъ ᲂу҆миле́нїѧ ѡ҆чища́етъ вѣ́рою хвалꙋ̀ приносѧ́щихъ вседержи́телю.

Бг҃оро́диченъ: Многоимени́таѧ ѻ҆трокови́це, ра́дꙋйсѧ, ст҃а́ѧ дв҃о, бг҃ороди́тельнице мр҃і́е, вѣ́рныхъ похвало̀, ѿ клѧ́твы и҆збавле́нїе, лѣ́ствице нбⷭ҇наѧ, недомы́сленное чꙋ́до, кꙋпино̀ неѡпали́маѧ, землѐ невоздѣ́ланнаѧ.

И҆́ный, господи́на ѳео́дѡра, гла́съ з҃.

І҆рмо́съ: Пои́мъ гдⷭ҇еви:

Живоно́сномꙋ дре́вꙋ поклони́вшесѧ, ѿсю́дꙋ и҆́демъ пꙋте́мъ поще́нїѧ ко стрⷭ҇ти хрⷭ҇то́вѣ ра́дꙋющесѧ.

Хрⷭ҇тꙋ̀ послѣ́дꙋюще, ѿве́ржемсѧ мі́ра, и҆ во́зьмемъ крⷭ҇тъ на ра́мо, соѡбразꙋ́ющесѧ є҆гѡ̀ бж҃е́ствєннымъ стрⷭ҇те́мъ.

Трⷪ҇ченъ: Въ тре́хъ ли́цахъ пресꙋ́щное є҆ди́но бж҃ество̀ воспои́мъ всѝ, ѻ҆ц҃а̀, и҆ сн҃а, и҆ ст҃а́го дх҃а.

Бг҃оро́диченъ: Є҆го́же недомы́сленнѡ родила̀ є҆сѝ, тлѣ́нїѧ не позна́вши, чтⷭ҇аѧ, і҆и҃са сп҃са ᲂу҆ми́лостиви ны́нѣ ѡ҆ рабѣ́хъ твои́хъ.

Сла́ва тебѣ̀, бж҃е на́шъ, сла́ва тебѣ̀.

Є҆гда̀ прїи́деши во сла́вѣ со а҆́гг҃лы, сꙋди́ти всѧ́чєскимъ, до́брый ѿвѣ́тъ да́ти тебѣ̀, хрⷭ҇тѐ,на́съ сподо́би.

І҆рмо́съ: Пои́мъ гдⷭ҇еви, погрꙋзи́вшемꙋ всю̀ си́лꙋ фараѡ́новꙋ въ мо́ри, побѣ́днꙋю пѣ́снь, ꙗ҆́кѡ просла́висѧ.

Пѣ́снь и҃.

І҆рмо́съ: Вавѷлѡ́нскаѧ пе́щь:

Вре́дными ѕмі́ѧ прельще́ньми влеко́мь и҆ прельща́емь ᲂу҆мо́мъ по всѧ̑ дни̑, ко ꙗ҆́звѣ мое́й прилага́ю ꙗ҆́звꙋ, сп҃се. тѣ́мже зовꙋ́ ти: врачꙋ̀ болѧ́щихъ, ѡ҆братѝ и҆ сп҃си́ мѧ.

Пости́всѧ є҆лїссе́й дре́вле воскр҃сѝ ѻ҆троча̀ сѡмані́тѧныни, ᲂу҆крѣплѧ́емь дх҃омъ ꙗ҆́вѣ: мы́ же,вѣ́рнїи, ᲂу҆мерщвле́ни бы́вше сла́стїю страсте́й, живоно́снымъ посто́мъ ѡ҆живи́мсѧ.

Нїнеѵі́тѧны сп҃слъ є҆сѝ, гдⷭ҇и чл҃вѣколю́бче, дре́вле пока́ѧвшыѧсѧ въ пла́чи и҆ постѣ̀, ꙗ҆́кѡ бл҃госе́рдъ: на́съ же млⷭ҇тїю твое́ю ᲂу҆ще́дри, недоꙋмѣ́ющихъ дѣ́лы и҆сповѣ́датисѧ тебѣ̀.

Бг҃оро́диченъ: По ржⷭ҇твѣ̀ нетлѣ́нна пребы́вшаѧ, всенепоро́чнаѧ, и҆зба́ви, мо́лимсѧ, чтⷭ҇аѧ, ѿ тлѣ́нїѧ рабы̑ твоѧ̑, вѣ́рнѡ пою́щыѧ є҆диномы́слїемъ дꙋшѝ: бл҃гослови́те, дѣла̀ гдⷭ҇нѧ, гдⷭ҇а.

И҆́ный.

І҆рмо́съ: Стра́шнаго херꙋві́мѡмъ:

Воздержа́нїѧ съ бг҃омъ преполове́нїе и҆мꙋ́ще, вѣ́рнїи, про́чее ю҆́ношески претеце́мъ ст҃о́е по́прище, и҆ вѣнцы̀ прїи́мемъ.

Безпло́дїе зрѧ̀ многоболѣ́зненныѧ моеѧ̀ дꙋшѝ, є҆щѐ потерпѝ, хрⷭ҇тѐ, и҆ не посѣцы̀ менѐ ꙗ҆́коже смоко́вницꙋ ѻ҆́нꙋю проклѧ́тꙋю.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Є҆динонача́льнѣйшаѧ трⷪ҇це и҆ трїѷпоста́снаѧ є҆ди́нице, ѻ҆́ч҃е, сн҃е и҆ дш҃е, ѿ всѧ́кихъ и҆скꙋше́нїй и҆ бѣ́дъ и҆зба́ви тѧ̀ воспѣва́ющыѧ.

Бг҃оро́диченъ: Ра́дꙋйсѧ, горо̀ бж҃їѧ: ра́дꙋйсѧ, присносвѣ́тлаѧ свѣщѐ: ра́дꙋйсѧ, но́вое нб҃о: ра́дꙋйсѧ, ᲂу҆́ме блиста́ѧйсѧ: ра́дꙋйсѧ, хра́ме гдⷭ҇ень: ра́дꙋйсѧ всепѣ́таѧ.

Сла́ва тебѣ̀, бж҃е на́шъ, сла́ва тебѣ̀.

Стра́шное твоѐ и҆спыта́нїе помышлѧ́ѧ, хрⷭ҇тѐ, ᲂу҆жаса́юсѧ, трепе́щꙋ и҆ вопїю̀: безмѣ́рнꙋю и҆мѣ́ѧй ве́лїю млⷭ҇ть, сп҃си́ мѧ ѡ҆каѧ́ннаго.

Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: Стра́шнаго херꙋві́мѡмъ, и҆ чꙋ́днаго серафі́мѡмъ, и҆ мі́рꙋ творца̀, свѧще́нницы, и҆ рабѝ, и҆ дꙋ́си првⷣныхъ, по́йте, бл҃гослови́те и҆ превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Но́вое чꙋ́до:

Поще́нїѧ бл҃года́ть, ча́шꙋ бж҃е́ственнꙋю и҆спо́лнивши ны́нѣ ᲂу҆миле́нїѧ, ꙗ҆́вѣ созыва́етъ всѧ̑ вѣ̑рныѧ, вопїю́щи съ весе́лїемъ: прїиди́те, наслади́тесѧ, пїѧ́нство страсте́й ѿложи́вше, да бꙋ́дꙋщагѡ сподо́битесѧ ᲂу҆тѣше́нїѧ.

Бли́зъ сꙋ́дъ: внемлѝ, дꙋшѐ, со́вѣстїю попецы́сѧ, и҆ дѣ́лай до́брѣ, тебѐ неѡсꙋжде́нꙋ при́снѡ соблюда́ющи: а҆́ще бо себѐ здѣ̀ разсꙋ́димъ, ника́коже ѡ҆сꙋ́димсѧ та́мѡ, и҆дѣ́же пови́ннїи ѡ҆сꙋжда́ютсѧ без̾ свидѣ́телей.

Нача̑ла, си̑лы, прⷭ҇то́ли, серафі́ми, гдⷭ҇ства, и҆ вла̑сти, и҆ херꙋві́ми, а҆́гг҃ли, а҆рха́гг҃ли,бг҃а моли́те, поще́нїѧ вре́мѧ преитѝ на́мъ, томꙋ̀ ᲂу҆гѡ́днаѧ творѧ́щымъ, да ꙗ҆́кѡ рабѝ бл҃гоꙋгоди́вшїи сла́вꙋ полꙋчи́мъ.

Бг҃оро́диченъ: Съ мч҃нки, съ прⷪ҇рѡ́ки, съ прпⷣбными всѣ́ми прїимѝ, хрⷭ҇тѐ, ро́ждшꙋю тѧ̀,молѧ́щꙋюсѧ при́снѡ ѡ҆ рабѣ́хъ прогнѣ́вавшихъ тѧ̀, є҆ди́наго чл҃вѣколю́бца влⷣкꙋ, є҆гѡ́же нбⷭ҇нїи чи́нове трепе́щꙋтъ.

И҆́ный.

І҆рмо́съ: Па́че є҆стества̀:

Ти́хое пла́ванїе поще́нїѧ преплы́вше дыха́нїемъ дх҃а, ко приста́нищꙋ стрⷭ҇те́й хрⷭ҇то́выхъ дости́гнꙋти помо́лимсѧ.

Ханане́и поревнова́въ, вопїю́ ти: поми́лꙋй мѧ̀, сн҃е дв҃довъ бж҃е, и҆ и҆сцѣлѝ мою̀ болѧ́щꙋю дꙋ́шꙋ, ꙗ҆́коже ѻ҆́ныѧ дще́рь.

Трⷪ҇ченъ: Бж҃ества̀ є҆стество̀мъ є҆дини́мꙋю є҆ди́ницꙋ, и҆ ѡ҆́бразы тремѝ трои́мꙋю: ѻ҆ц҃а̀, и҆ сн҃а, и҆ дх҃а воспои́мъ.

Бг҃оро́диченъ: Во чре́вѣ заче́ншаѧ неѡб̾ѧ́тнаго сло́ва и҆ сего̀ без̾ сѣ́мене пло́тїю ро́ждшаѧ, молѝ прилѣ́жнѡ сп҃сти́сѧ дꙋша́мъ на́шымъ.

Сла́ва тебѣ̀, бж҃е на́шъ, сла́ва тебѣ̀.

Ѡ҆правда́вый мытарѧ̀, млⷭ҇тивъ бꙋ́ди мѝ, вопїю́ща: и҆ мнѣ̀ грѣ́шномꙋ млⷭ҇тивъ бꙋ́ди, всѣ́хъ сꙋдїѐ, проща́ѧ моѧ̑ согрѣшє́нїѧ.

І҆рмо́съ: Па́че є҆стества̀ мт҃рь и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми, вѣ́рнїи, бцⷣꙋ велича́емъ.

Свѣти́ленъ гла́са.

На стїхо́внѣ самогла́сенъ, два́жды, гла́съ и҃:

Впа́дшемꙋ въ разбо́йники ᲂу҆подо́бихсѧ а҆́зъ, влⷣко всѣ́хъ, прегрѣшє́нїѧ моѧ̑ впа́дъ, и҆ ѿ ни́хъ неми́лостивнѡ ᲂу҆ѧзви́хсѧ. но не ѡ҆ста́ви менѐ неисцѣ́льна, не ѿ самарі́и, но ѿ пречⷭ҇тыѧ дв҃ы прише́дый: і҆и҃се сп҃си́тельное и҆́мѧ, поми́лꙋй мѧ̀.

Мч҃нченъ: Что̀ ва́съ нарече́мъ, ст҃і́и; херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ.серафі́мы ли; ꙗ҆́кѡ непреста́ннѡ просла́висте є҆го̀. а҆́гг҃лы ли; тѣ́ла бо ѿврати́стесѧ. си̑лы ли;дѣ́йствꙋете бо чꙋдесы̀. мнѡ́га ва̑ша и҆мена̀, и҆ бѡ́льша дарова̑нїѧ: моли́те сп҃сти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ:

Нбⷭ҇ныѧ си̑лы пою́тъ тѧ̀, бл҃года́тнаѧ мт҃и безневѣ́стнаѧ: и҆ мы̀ славосло́вимъ неизслѣ́димое твоѐ ржⷭ҇тво̀. бцⷣе, молѝ сп҃сти́сѧ дꙋша́мъ на́шымъ.

На ѕ҃-мъ часѣ̀, тропа́рь прⷪ҇ро́чества, гла́съ г҃:

Поне́же беззакѡ́нїѧ на̑ша воста́ша на ны̀, воскреснѝ, гдⷭ҇и, помозѝ на́мъ: ты́ бо є҆сѝ ѻ҆ц҃ъ на́шъ, и҆ кромѣ̀ тебє̀ и҆но́гѡ не зна́емъ.

Прокі́менъ, ѱало́мъ п҃г, гла́съ д҃: Ѻ҆лтари̑ твоѧ̑, гдⷭ҇и си́лъ, цр҃ю̀ мо́й и҆ бж҃е мо́й. Сті́хъ: Ко́ль возлю́блєнна селє́нїѧ твоѧ̑, гдⷭ҇и си́лъ!

Прⷪ҇ро́чества и҆са́їина чте́нїе.

[Глава̀ л҃з, ст. л҃г-л҃и: гл. л҃и, ст. а҃-ѕ҃].

Та́кѡ глаго́летъ гдⷭ҇ь на царѧ̀ а҆ссѷрі́йска: не вни́детъ въ се́й гра́дъ, нижѐ пꙋ́ститъ на́нь стрѣлꙋ̀, нижѐ возложи́тъ на́нь щита̀, нижѐ ѡ҆гради́тъ ѡ҆́крестъ є҆гѡ̀ ѡ҆гражде́нїѧ: но пꙋте́мъ,и҆́мже прїи́де, тѣ́мже возврати́тсѧ, и҆ въ гра́дъ се́й не вни́детъ. Сїѧ̑ глаго́летъ гдⷭ҇ь: защищꙋ̀ гра́дъ се́й, є҆́же сп҃стѝ є҆го̀ менє̀ ра́ди и҆ ра́ди дв҃да раба̀ моегѡ̀. И҆ и҆зы́де а҆́гг҃лъ гдⷭ҇ень, и҆ и҆збѝ ѿ полка̀ а҆ссѷрі́йска сто̀ ѻ҆́смьдесѧтъ пѧ́ть ты́сѧщъ: и҆ воста́вше заꙋ́тра,ѡ҆брѣто́ша всѧ̑ тѣлеса̀ мє́ртва. И҆ ѿи́де возвра́щьсѧ сеннахирі́мъ ца́рь а҆ссѷрі́йскїй, и҆ всели́сѧ въ нїнеѵі́и. И҆ внегда̀ покланѧ́тисѧ є҆мꙋ̀ въ домꙋ̀ насара́хꙋ ѻ҆течествонача́льникꙋ своемꙋ̀,а҆драмеле́хъ и҆ сараса́ръ сы́нове є҆гѡ̀ ᲂу҆би́ша є҆го̀ мечмѝ, са́ми же ᲂу҆бѣжа́ша во а҆рме́нїю, и҆ воцари́сѧ а҆сорда́нъ сы́нъ є҆гѡ̀ вмѣ́стѡ є҆гѡ̀. Бы́сть же въ то̀ вре́мѧ, разболѣ́сѧ є҆зекі́а до сме́рти, и҆ прїи́де къ немꙋ̀ и҆са́їа прⷪ҇ро́къ, сы́нъ а҆мѡ́совъ, и҆ речѐ къ немꙋ̀: сїѧ̑ глаго́летъ гдⷭ҇ь: ᲂу҆стро́й ѡ҆ домꙋ̀ твое́мъ, ᲂу҆мира́еши бо ты̀, и҆ не бꙋ́деши жи́въ. И҆ ѡ҆братѝ є҆зекі́а лицѐ своѐ къ стѣнѣ̀, и҆ помоли́сѧ къ гдⷭ҇еви, глаго́лѧ: помѧнѝ, гдⷭ҇и, ка́кѡ ходи́хъ пред̾ тобо́ю со и҆́стиною и҆ се́рдцемъ и҆́стиннымъ, и҆ ᲂу҆гѡ́днаѧ пред̾ тобо́ю сотвори́хъ. И҆ пла́касѧ є҆зекі́а пла́чемъ вели́кимъ. И҆ бы́сть сло́во гдⷭ҇не ко и҆са́їи, глаго́лѧ: и҆дѝ, и҆ рцы̀ є҆зекі́и: та́кѡ глаго́летъ гдⷭ҇ь бг҃ъ дв҃да ѻ҆ц҃а̀ твоегѡ̀: ᲂу҆слы́шахъ мл҃твꙋ твою̀ и҆ ви́дѣхъ сле́зы твоѧ̑: сѐ прилага́ю къ лѣ́тѡмъ твои̑мъ лѣ́тъ пѧтьна́десѧть, и҆ ѿ рꙋкѝ царѧ̀ а҆ссѷрі́йска и҆зба́влю тѧ̀ и҆ гра́дъ се́й, и҆ защищꙋ̀ ѡ҆ гра́дѣ се́мъ.

Прокі́менъ, ѱало́мъ к҃д, гла́съ и҃: Ꙗ҆вѝ на́мъ, гдⷭ҇и, млⷭ҇ть твою̀, и҆ сп҃се́нїе твоѐ да́ждь на́мъ. Сті́хъ: Бл҃говоли́лъ є҆сѝ, гдⷭ҇и, зе́млю твою̀, возврати́лъ є҆сѝ плѣ́нъ і҆а́кѡвль.

[Зрѝ] Въ сїю̀ седми́цꙋ, ради четвертка̀ вели́кагѡ канѡ́на, каѳі̑смы чтꙋ́тсѧ, ꙗ҆̀коже ᲂу҆каза́сѧ ни́же, въ слꙋ́жбахъ коегѡ́ждо днѐ.

Въ понедѣ́льникъ є҃-ѧ седми́цы ве́чера,

стїхосло́вимъ, вмѣ́стѡ Ко гдⷭ҇ꙋ: рѧдовꙋ́ю каѳі́смꙋ ѱалти́ри, сі́есть і҃-ю. На Гдⷭ҇и воззва́хъ поста́вимъ стїхѡ́въ ѕ҃: и҆ пое́мъ настоѧ́щыѧ подѡ́бны трїѡ́ди, господи́на і҆ѡ́сифа, гла́съ г҃.

Подо́бенъ: Крⷭ҇тоѧвле́ннѡ:

Да́вый на́мъ поще́нїѧ вре́мѧ, во є҆́же ѡ҆брати́тисѧ, и҆ живы̑мъ бы́ти, и҆ ника́коже поги́бнꙋти, сло́ве бж҃їй, сподо́би всѣ́хъ бл҃гоꙋгоди́ти тебѣ̀ до́брѣ и҆ въ те́плѣмъ ᲂу҆миле́нїи послꙋжи́ти тебѣ̀, хрⷭ҇тѐ, ꙗ҆́коже блꙋдни́ца ѻ҆́наѧ цѣломꙋ́дреннаѧ и҆ честна́ѧ, нѣ́когда мѵ́ромъ и҆ и҆злїѧ́ньми те́плыхъ сле́зъ прїи́мшаѧ прегрѣше́нїй ѡ҆ставле́нїе.

Ꙗ҆́коже слѣпы́й, ѿ се́рдца зовꙋ́ ти: сн҃е бж҃їй, просвѣтѝ моѝ ѻ҆́чи сердє́чныѧ. ꙗ҆́коже вѣ́рнаѧ ханане́а, вопїю́ ти: поми́лꙋй мѧ̀, ще́дре, и҆́бо дꙋ́шꙋ бѣснꙋ́ющꙋюсѧ сластьмѝ: ю҆́же и҆зба́вивъ ѿ тьмы̀ страсте́й, про́чее жи́ти чи́стѣ сотворѝ, да сла́влю твою̀ мно́гꙋю бл҃госты́ню.

И҆́ный, господи́на ѳео́дѡра. Гла́съ в҃.

Подо́бенъ: Бг҃озва́ннаѧ мч҃нца:

Бг҃освѣ́тлаѧ бл҃года́ть воздержа́нїѧ, возсїѧ́вши на́мъ дне́сь со́лнца свѣтлѣ́е, дꙋ́шы на́шѧ просвѣща́етъ, ꙗ҆́коже ѡ҆́блаки стра̑сти грѣхѡ́вныѧ ѿгонѧ́ющи. сегѡ̀ ра́ди всѝ притеце́мъ, ѡ҆дꙋшевле́́ннѡ сїѐ лобыза́юще. ра́дꙋющесѧ соверша́имъ бж҃е́ственное по́прище тогѡ̀, въ є҆гѡ́же весе́лїихъ ᲂу҆гоща́ющесѧ возопїи́мъ хрⷭ҇тꙋ̀: ѡ҆ст҃ѝ, бл҃же, сїѐ соверша́ющыѧ вѣ́рнѡ.

И҆ въ мине́и г҃. Сла́ва, и҆ ны́нѣ, бг҃оро́диченъ.

Прокі́менъ, ѱало́мъ п҃є, гла́съ д҃: Наста́ви мѧ̀, гдⷭ҇и, на пꙋ́ть тво́й, и҆ пойдꙋ̀ во и҆́стинѣ твое́й. Сті́хъ: Приклонѝ, гдⷭ҇и, ᲂу҆́хо твоѐ, и҆ ᲂу҆слыши мѧ.

Бытїѧ̀ чте́нїе. [Глава̀ г҃і, ст. в҃і-и҃і].

А҆вра́мъ всели́сѧ въ землѝ ханаа́нстѣй: лѡ́тъ же всели́сѧ во гра́дѣ ѡ҆кре́стныхъ стра́нъ, и҆ всели́сѧ въ содо́мѣ. Человѣ́цы же сꙋ́щїи въ содо́мѣ ѕлѝ и҆ грѣ́шни пред̾ бг҃омъ ѕѣлѡ̀. Бг҃ъ же речѐ а҆вра́мꙋ, повнегда̀ разлꙋчи́тисѧ лѡ́тꙋ ѿ негѡ̀: воззрѝ ѻ҆чи́ма твои́ма, и҆ ви́ждь ѿ мѣ́ста, и҆дѣ́же ты̀ ны́нѣ є҆сѝ, къ сѣ́верꙋ, и҆ ꙾лі́вѣ,꙾ и҆ къ восто́кꙋ, и҆ мо́рю: ꙗ҆́кѡ всю̀ зе́млю, ю҆́же ты̀ ви́диши, тебѣ̀ да́мъ ю҆̀ и҆ сѣ́мени твоемꙋ̀ во вѣ́ки. И҆ сотворю̀ сѣ́мѧ твоѐ ꙗ҆́кѡ песо́къ земны́й: а҆́ще кто̀ мо́жетъ и҆счестѝ песо́къ земны́й, то и҆ сѣ́мѧ твоѐ и҆зочте́тъ. Воста́въ пройдѝ зе́млю въ долготꙋ̀ є҆ѧ̀ и҆ въ широтꙋ̀, ꙗ҆́кѡ тебѣ̀ да́мъ ю҆̀ и҆ сѣ́мени твоемꙋ̀ во вѣ́къ. И҆ ѿсели́всѧ а҆вра́мъ, прише́дъ всели́сѧ ᲂу҆ дꙋ́ба мамврі́йскагѡ, и҆́же бѧ́ше въ хеврѡ́нѣ: и҆ созда̀ тꙋ̀ же́ртвенникъ гдⷭ҇ꙋ.

Прокі́менъ, ѱало́мъ п҃ѕ, гла́съ д҃: Лю́битъ гдⷭ҇ь врата̀ сїѡ́нѧ па́че всѣ́хъ селе́нїй і҆а́кѡвлихъ. Сті́хъ: Ѡ҆снова̑нїѧ є҆гѡ̀ на гора́хъ ст҃ы́хъ.

При́тчей чте́нїе. [Глава̀ д҃і, ст. к҃з-л҃є: гл. є҃і, ст. а҃-д҃].

Стра́хъ гдⷭ҇ень и҆сто́чникъ жи́зни, твори́тъ же ᲂу҆клонѧ́тисѧ ѿ сѣ́ти сме́ртныѧ. Во мно́зѣ ꙗ҆зы́цѣ сла́ва царю̀: во ѡ҆скꙋдѣ́нїи же лю́дстѣ сокрꙋше́нїе си́льномꙋ. Долготерпѣли́въ мꙋ́жъ мно́гъ въ ра́зꙋмѣ: малодꙋ́шный же крѣ́пкѡ безꙋ́менъ. Кро́ткїй мꙋ́жъ се́рдцꙋ вра́чь: мо́ль же косте́́мъ се́рдце чꙋ́вственно. Ѡ҆клевета́ѧй ᲂу҆бо́гаго раздража́етъ сотво́ршаго и҆̀: почита́ѧй же є҆го̀ ми́лꙋетъ ни́щаго. Во ѕло́бѣ свое́й ѿри́нетсѧ нечести́вый: надѣ́ѧй же сѧ на гдⷭ҇а свои́мъ преподо́бїемъ пра́веденъ. Въ се́рдцѣ бла́зѣ мꙋ́жа почі́етъ премꙋ́дрость: въ се́рдцы же безꙋ́мныхъ не познава́етсѧ. Пра́вда возвыша́етъ ꙗ҆зы́къ: ᲂу҆малѧ́ютъ же племена̀ грѣсѝ. Прїѧ́тенъ царе́ви слꙋга̀ разꙋ́мный, свои́мъ же бл҃гоѡбраще́нїемъ ѿе́млетъ безче́стїе. Гнѣ́въ гꙋби́тъ и҆ разꙋ̑мныѧ: ѿвѣ́тъ же смире́нъ ѿвраща́етъ ꙗ҆́рость: а҆ сло́во же́стоко воздвиза́етъ гнѣ́вы. Ѧ҆зы́къ мꙋ́дрыхъ дѡ́браѧ свѣ́сть: ᲂу҆ста́ же безꙋ́мныхъ возвѣща́ютъ ѕла̑ѧ. На всѧ́комъ мѣ́стѣ ѻ҆́чи гдⷭ҇ни сматрѧ́ютъ ѕлы̑ѧ же и҆ бл҃гі̑ѧ. И҆сцѣле́нїе ѧ҆зы́ка дре́во жи́зни: хранѧ́й же є҆го̀ и҆спо́лнитсѧ дх҃а.

На стїхо́внѣ самогла́сенъ, гла́съ з҃, є҆ди́ножды:

Ꙗ҆́коже впады́й въ разбо́йники и҆ ᲂу҆ѧ́звленъ, та́кѡ и҆ а҆́зъ впадо́хъ во моѧ̑ грѣхѝ, и҆ ᲂу҆ѧ́звлена є҆́сть дꙋша̀ моѧ̑. къ комꙋ̀ прибѣ́гнꙋ и҆сцѣли́тисѧ, а҆́ще не къ тебѣ̀ врачꙋ̀ дꙋ́шъ и҆ тѣле́съ; и҆зле́й на мѧ̀, бж҃е, вели́кꙋю твою̀ млⷭ҇ть.

И҆́ный самогла́сенъ, є҆ди́ножды, гла́съ д҃:

Лиши́вшесѧ престꙋпле́нїемъ пре́жнїѧ ра́йскїѧ сла́дости и҆ наслажде́нїѧ, введе́ни бы́хомъ въ безче́стнѣйшꙋю жи́знь: совлече́ни бо подоба́ющагѡ и҆ хва́льнагѡ житїѧ̀ добродѣ́тельнагѡ. въ прегрѣшє́нїѧ ꙗ҆́кѡ въ разбо́йники впадо́хомъ: и҆ и҆́сполꙋ ме́ртви є҆смы̀, прегрѣши́вше ѿ сп҃си́тельныхъ ᲂу҆че́нїй твои́хъ. но мо́лимъ тѧ̀ ѿ мр҃і́и ꙗ҆ви́вшагосѧ и҆ безстра́стнѡ стрⷭ҇те́мъ прїѻбщи́вшагосѧ влⷣкꙋ: превѧжѝ на́шѧ ѿ грѣха̀ прибы́вшыѧ стрꙋ́пы, и҆ безмѣ́рное твоѐ милосе́рдїе и҆злива́й на ны̀, твоѐ и҆сцѣли́тельное попече́нїе, ꙗ҆́кѡ чл҃вѣколю́бецъ.

Мч҃нченъ: Ст҃ы́хъ мч҃нкъ прїе́мый терпѣ́нїе, и҆ ѿ на́съ прїимѝ пѣ́нїе, чл҃вѣколю́бче, да́рꙋѧ на́мъ тѣ́хъ мл҃твами ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Ѿ всѧ́кихъ бѣ́дъ рабы̑ твоѧ̑ сохранѧ́й, бл҃гослове́ннаѧ бцⷣе, да тѧ̀ сла́вимъ, наде́ждꙋ дꙋ́шъ на́шихъ.

Во вто́рникъ є҃-ѧ седми́цы на ᲂу҆́трени,

трⷪ҇чны. Та́же стїхологисꙋ́емъ каѳі̑смы а҃і, в҃і, г҃і. По а҃-мъ стїхосло́вїи глаго́лемъ сѣда́льны ᲂу҆мили́тєльныѧ ѻ҆смогла́сника в҃, съ бг҃оро́дичнымъ.

По в҃-мъ же стїхосло́вїи сѣда́ленъ господи́на і҆ѡ́сифа, гла́съ г҃.

Подо́бенъ: Бж҃е́ственныѧ вѣ́ры:

Теплото́ю вѣ́ры, воздержа́нїемъ попали́мъ стра̑сти невоздержа́нїѧ, и҆ ѿ про́пасти грѣха̀ ᲂу҆бѣжи́мъ, и҆ сле́зными тѡ́ки погаси́мъ вѣ́чнꙋющїй пла́мень, зовꙋ́ще: пребл҃гі́й, согрѣши́хомъ тѝ, млⷭ҇тивъ бꙋ́ди и҆ да́рꙋй на́мъ ве́лїю млⷭ҇ть. [Два́жды].

Бг҃оро́диченъ, подо́бенъ:

Бж҃е́ственнаѧ ски́нїѧ сло́ва ꙗви́ласѧ є҆сѝ, є҆ди́на всечⷭ҇таѧ дв҃о мт҃и, чистото́ю а҆́гг҃лы превозше́дшаѧ: менѐ, па́че всѣ́хъ пе́рсть ꙗ҆́вльшасѧ, ѡ҆скверне́на плотски́ми согрѣше́ньми, ѡ҆чи́сти бж҃е́ственными вода́ми, мл҃твами твои́ми, подаю́щи, чтⷭ҇аѧ, ве́лїю млⷭ҇ть.

По г҃-мъ стїхосло́вїи сѣда́ленъ, господи́на ѳео́дѡра, гла́съ в҃.

Подо́бенъ: Пребл҃гослове́на є҆сѝ:

Препросла́влена бл҃года́ть всечестна́гѡ поста̀: тѣ́мъ и҆лїа̀ прⷭ҇ро́къ ѡ҆брѣта́етъ колесни́цꙋ ѻ҆́гненнꙋю, и҆ мѡѷсе́й скрижа̑ли прїе́млетъ, данїи́лъ чꙋ́денъ бы́сть, є҆лїссе́й ме́ртваго воздви́же, ѻ҆́троцы ѻ҆́гнь ᲂу҆гаси́ша и҆ всѧ́къ къ бг҃ꙋ присво́исѧ. тѣ́мъ наслажда́ющесѧ возопїи́мъ: бл҃гослове́нъ хрⷭ҇то́съ бг҃ъ на́шъ, та́кѡ бл҃говоли́вый, сла́ва тебѣ̀. [Два́жды].

Сла́ва, и҆ ны́нѣ, бг҃оро́диченъ:

Подо́бенъ: Пречⷭ҇томꙋ ѡ҆́бразꙋ твоемꙋ̀:

Неѡбори́мꙋю мл҃твꙋ твою̀ стѧжа́въ въ лю́тыхъ, ѿ ѡ҆скорблѧ́ющихъ мѧ̀ и҆збавлѧ́юсѧ па́че наде́жды чꙋ́днѡ, ѽ мт҃и бж҃їѧ! предварѧ́еши бо всегда̀ просѧ́щымъ тѧ̀ вѣ́рнѡ и҆ разрꙋша́еши ѡ҆бдержа̑щаѧ и҆скꙋшє́нїѧ врагѡ́въ. тѣ́мъ бл҃года́рственнѡ вопїю́ ти: прїимѝ, влⷣчце, кра̑ткаѧ бл҃годарє́нїѧ, занѐ є҆сѝ мнѣ̀ во всѣ́хъ по́мощь.

Канѡ́нъ мине́и, и҆ настоѧ́щїй трипѣ́снецъ господи́на і҆ѡ́сифа.

И҆ стїхосло́витсѧ пѣ́снь. Гла́съ г҃.

Пѣ́снь в҃.

І҆рмо́съ: Вонмѝ, землѐ и҆ нб҃о, и҆ ᲂу҆слы́ши глаго́лы моѧ̑: возглаго́лю бо сꙋ́щымъ на землѝ бж҃їѧ чꙋдеса̀.

Непреста́нными мл҃твами и҆ воздержа́нїемъ и҆ видѣ́нїемъ ѡ҆крили́мъ дꙋ́шы къ бж҃е́ственнѣй любвѝ.

Невоздержа́нїѧ мра́за ᲂу҆бѣжа́вше, согрѣ́имсѧ всѝ воздержа́нїѧ свѣ́томъ въ бж҃е́ственнѣмъ дс҃ѣ.

Со́лїю бж҃е́ственныхъ добродѣ́телей гное́нїе грѣха̀ ѿложи́вши, дꙋшѐ, бг҃ꙋ прилѣпи́сѧ.

Бг҃оро́диченъ: Почѝ хрⷭ҇то́съ въ тебѣ̀ є҆ди́нѣй бл҃гослове́ннѣй, и҆ пло́ть свою̀ ѿ тебє̀ понесѐ.

И҆́ный, гла́съ в҃.

І҆рмо́съ: Внемли́те, лю́дїе, зна́менїємъ:

Поще́нїе чи́стое, мл҃твы, сле́зы, попече́нїе ѡ҆ бж҃е́ственныхъ и҆ всѧ́кꙋю и҆нꙋ́ю добродѣ́тель собра́вше, влⷣцѣ хрⷭ҇тꙋ̀ ны́нѣ принесе́мъ.

Є҆́ѵа плѣне́на бы́сть плодо́мъ: ви́ждь, дꙋшѐ моѧ̀, не прельща́йсѧ, а҆́ще прибли́зитсѧ къ тебѣ̀ ѕмі́й когда̀, совѣ́тꙋѧ снѣ́сти тебѣ̀ сла́сти плоды̀.

Трⷪ҇ченъ: Трѝ лица̑ є҆ди́нагѡ зра́ка сла́влю, ѻ҆ц҃а̀, сн҃а и҆ дх҃а, є҆ди́нꙋ держа́вꙋ бж҃ества̀, црⷭ҇тво всѣ́хъ и҆ свѣ́тлость.

Бг҃оро́диченъ: Ржⷭ҇тво̀ твоѐ, чтⷭ҇аѧ, стра́шно бы́сть: бг҃ъ бо є҆́сть вочл҃вѣ́чивыйсѧ, безнача́льнѡ ѿ ѻ҆ц҃а̀ рожде́нный и҆ и҆з̾ тебє̀ въ послѣ̑днѧѧ без̾ мꙋ́жа роди́выйсѧ.

Сла́ва тебѣ̀, бж҃е на́шъ, сла́ва тебѣ̀.

Кровоточи́вꙋю прикоснове́нїемъ ѡ҆ме́тъ твои́хъ и҆сцѣли́лъ є҆сѝ, хрⷭ҇тѐ мо́й: и҆ менѐ, вѣ́рою каса́ющасѧ млⷭ҇ти твоеѧ̀, здра́ва ѿ страсте́й возста́ви.

І҆рмо́съ: Внемли́те, лю́дїе, зна́менємъ дѣ́лъ бж҃е́ственныѧ моеѧ̀ си́лы, и҆ ѡ҆ се́мъ ᲂу҆разꙋмѣ́йте, ꙗ҆́кѡ є҆ди́нъ а҆́зъ є҆́смь бг҃ъ всѣ́хъ.

Пѣ́снь и҃.

І҆рмо́съ: А҆́гг҃лми немо́лчнѡ:

Въ та́йнѣ ловле́нїе творѧ̀ по всѧ̑ дни̑, вселꙋка́вый и҆́щетъ мѧ̀ поѧ́ти и҆ снѣ́дь сотвори́ти: ѿ тогѡ̀ ѕло́бы и҆зба́ви мѧ̀, сп҃се, сп҃сы́й і҆ѡ́нꙋ ѿ ки́та.

Поще́нїемъ ѡ҆чища́еми, къ горѣ̀ добродѣ́телей пристꙋ́пимъ, и҆ ᲂу҆слы́шимъ ꙗ҆́снѡ, что̀ возглаго́летъ въ на́съ бг҃ъ: возглаго́летъ бо ми́ръ и҆ просвѣще́нїе, и҆ и҆сцѣле́нїе дꙋше́вныхъ сокрꙋше́нїй.

Грѣхѡ́въ ѡ҆мраче́нїемъ всегда̀ ѡ҆слѣплѧ́емь, не могꙋ̀ разꙋмѣ́ти чꙋдеса̀ твоѧ̑, гдⷭ҇и: тѣ́мже ѻ҆́чи се́рдца моегѡ̀ ѿве́рзи, і҆и҃се свѣтода́вче.

Бг҃оро́диченъ: Щедро́тъ твои́хъ ѡ҆кропле́ньми, приснодв҃о нескве́рнаѧ, ѡ҆сквернє́нїѧ стра̑стнаѧ се́рдца моегѡ̀ ѿмы́й, сле́зъ то́ки мнѣ̀ да́рꙋющи, пода́тєльныѧ ѡ҆чище́нїѧ дꙋше́внагѡ.

И҆́ный.

І҆рмо́съ: Дре́вле ѡ҆роси́вшаго:

Ѻ҆́гнь не ᲂу҆га́снетъ, и҆ че́рвь, рече́но є҆́сть, не конча́етсѧ: ᲂу҆бо́йсѧ преще́нїѧ, ѽ дꙋшѐ моѧ̀, и҆ слꙋжѝ хрⷭ҇тꙋ̀, да ѡ҆брѧ́щеши наслажде́нїе, и҆дѣ́же є҆́сть всѣ̑хъ веселѧ́щихсѧ жили́ще.

Ѡ҆пале́нїемъ похотѣ́нїй разжига́емꙋю дꙋ́шꙋ мою̀ возста́ви, гдⷭ҇и, молю́сѧ, прикоснове́нїемъ твои́мъ, ꙗ҆́коже петро́вꙋ те́щꙋ, да ѡ҆брѧ́щетсѧ порабо́тати тебѣ̀ бл҃гоꙋго́днѡ, и҆сповѣ́дающисѧ во всѧ̑ вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Присносꙋ́щна, безнача́льна ѻ҆ц҃а̀ воспои́мъ, вѣ́рнїи, сн҃а же собезнача́льна и҆ дх҃а сопросїѧ́вша и҆з̾ ѻ҆ц҃а̀, є҆диносꙋ̑щна ли́ца, є҆ди́нагѡ сꙋ̑щаѧ всеси́льнагѡ нача́ла, и҆ вла́сти.

Бг҃оро́диченъ: Мр҃і́е бг҃озва́ннаѧ, ѡ҆чисти́лище вои́стиннꙋ вѣ́рныхъ, и҆з̾ тебє̀ бо ѡ҆ставле́нїе подае́тсѧ всѣ̑мъ бога́тнѡ: сн҃а твоего̀ и҆ гдⷭ҇а не преста́й молѧ́щи ѡ҆ пою́щихъ тѧ̀.

Сла́ва тебѣ̀, бж҃е на́шъ, сла́ва тебѣ̀.

Дꙋшѝ моеѧ̀ ᲂу҆́ши ѡ҆гло́хнꙋвшыѧ ѿве́рзи, хрⷭ҇тѐ, и҆ ѧ҆зы́къ мо́й ᲂу҆ѧснѝ, ꙗ҆́коже дре́вле гꙋгни́вагѡ и҆ глꙋха́гѡ: да слы́шѧ твоѧ̑ гла́сы пою̀ и҆ ѧ҆зы́комъ хвалю́ тѧ во вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: Дре́вле ѡ҆роси́вшаго є҆врє́йскїѧ ѻ҆́троки въ пла́мени и҆ ѡ҆пали́вшаго халдє́и пресла́внѡ въ не́мъ, воспои́мъ гдⷭ҇а, глаго́люще: бл҃гослови́те и҆ превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Тебѐ неѡпали́мꙋю:

Пла́мень ѻ҆гнѧ̀ негаси́магѡ во ᲂу҆мѣ̀ и҆мꙋ́ще, теплѣ́йшею мы́слїю ко ѻ҆гню̀ покаѧ́нїѧ ны́нѣ пристꙋ́пимъ, стра̑сти попалѧ́юще.

Из̾ ᲂу҆́стъ постѧ́щихсѧ и҆зше́дшее дре́вле сло́во, разжига́емое ре́вностїю, преклонѧ́етъ стїхі̑и: семꙋ̀ ревнꙋ́й, дꙋшѐ, и҆ до́брѣ поживѝ.

Сꙋди́лище стра́шное помышлѧ́ющи, всеѡкаѧ́ннаѧ дꙋшѐ моѧ̀, шє́ствїѧ твоѧ̑ при́снѡ ко и҆сполне́нїю хотѣ́нїй и҆зба́вителѧ ᲂу҆готовлѧ́й.

Бг҃оро́диченъ: Ѡ҆мраче́ннꙋю сласте́й ѡ҆черне́нїемъ дꙋ́шꙋ мою̀ просвѣтѝ, чтⷭ҇аѧ, свѣ́тъ ро́ждшаѧ: да со стра́хомъ и҆ вѣ́рою при́снѡ велича́ю тѧ̀.

И҆́ный.

І҆рмо́съ: Преесте́ственнѡ пло́тїю:

Оу҆́дъ всѧ́къ пло́ти на́шеѧ предста́вимъ хрⷭ҇тꙋ̀ во ѡ҆рꙋ̑жїѧ пра́вды, рꙋ́цѣ, речѐно є҆́сть, воздѣ́юще преподѡ́бныѧ без̾ гнѣ́ва и҆ размышле́нїй.

Ты̀ нѣ́когда ᲂу҆ченикѡ́мъ въ кораблѝ предста́въ, ᲂу҆кроти́лъ є҆сѝ, хрⷭ҇тѐ мо́й, неи́стовствꙋющеесѧ мо́ре: и҆ мои́хъ помышле́нїй треволнє́нїѧ ᲂу҆тишѝ.

Трⷪ҇ченъ: Є҆ди́номꙋ є҆стествꙋ̀ покланѧ́юсѧ, трѝ лица̑ пою̀, є҆ди́наго бг҃а всѣ́хъ, ѻ҆ц҃а̀, и҆ сн҃а, и҆ ст҃а́го дх҃а, присносꙋ́щное нача́ло.

Бг҃оро́диченъ: Чтⷭ҇аѧ ѻ҆троча̀ ражда́еши, дв҃а млеко́мъ пита́еши: ка́кѡ вкꙋ́пѣ ѻ҆боѧ̀, дѣ́вствꙋеши ражда́ющи; бг҃ъ є҆́сть содѣ́ѧвый, не взыскꙋ́й ѿ менє̀, ка́кѡ.

Сла́ва тебѣ̀, бж҃е на́шъ, сла́ва тебѣ̀.

Ѿ разбо́ѧ страсте́й мѧ̀ дꙋше́ю ѡ҆скверне́на и҆сцѣлѝ, крⷭ҇тѐ мо́й, и҆злива́ѧ твою̀ млⷭ҇ть, ꙗ҆́коже впа́дшемꙋ въ рꙋ́цѣ разбо́йникѡвъ.

І҆рмо́съ: Преесте́ственнѡ пло́тїю заче́ншꙋю во чре́вѣ сло́во, ѿ ѻ҆ц҃а̀ безлѣ́тнѡ предвозсїѧ́вшее, въ пѣ́снехъ немо́лчныхъ велича́емъ вѣ́рнїи.

Свѣти́ленъ гла́са.

На стїхо́внѣ самогла́сенъ днѐ, два́жды, гла́съ з҃:

Оу҆ѧ́звленнꙋю и҆ ᲂу҆ничиже́ннꙋю мою̀ дꙋ́шꙋ посѣтѝ, гдⷭ҇и, врачꙋ̀ болѧ́щихъ и҆ приста́нище ѿча́ѧнныхъ неѡбꙋрева́емое, ты́ бо є҆сѝ и҆зба́витель мі́ра, прише́дый воздви́гнꙋти и҆з̾ тлѣ́нїѧ па́дшаго: и҆ менѐ припа́дающа возста́ви, вели́кїѧ ра́ди твоеѧ̀ млⷭ҇ти.

Мч҃нченъ: Посредѣ̀ сꙋди́лища законопрестꙋ̑пникъ ра́дꙋющесѧ вопїѧ́хꙋ стрⷭ҇тоте́рпцы: гдⷭ҇и,сла́ва тебѣ̀.

Сла́ва, и҆ ны́нѣ, бг҃оро́диченъ: Пое́мъ тѧ̀, пречⷭ҇таѧ бцⷣе, и҆ сла́вимъ рожде́ннаго тобо́ю бг҃а сло́ва, зовꙋ́ще: сла́ва тебѣ̀.

На а҃-мъ часѣ̀, стїхологисꙋ́емъ каѳі́смꙋ д҃і. На г҃-мъ часѣ̀, є҃і.

На ѕ҃-мъ часѣ̀, ѕ҃і. На ѕ҃-мъ же часѣ̀, тропа́рь прⷪ҇ро́чества, гла́съ г҃:

Застꙋ́пникъ на́шъ бг҃ъ і҆а́кѡвль, и҆ защи́титель є҆́сть въ де́нь печа́ли.

Прокі́менъ, ѱало́мъ п҃з, гла́съ ѕ҃: Ни́щъ є҆́смь а҆́зъ, и҆ въ трꙋдѣ́хъ ѿ ю҆́ности моеѧ̀. Сті́хъ: Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю.

Прⷪ҇ро́чества и҆са́їина чте́нїе. [Глава̀ м҃, ст. и҃і-л҃а].

Та́кѡ глаго́летъ гдⷭ҇ь: комꙋ̀ ᲂу҆подо́бисте гдⷭ҇а, и҆ ко́емꙋ подо́бїю ᲂу҆подо́бисте є҆го̀; Є҆да̀ ѡ҆́бразъ сотворѝ древодѣ́латель, и҆лѝ зла́тарь слїѧ́въ зла́то позлатѝ є҆го̀, и҆лѝ подо́бїемъ сотворѝ є҆го̀; Дре́во бо негнїю́щее и҆збира́етъ древодѣ́латель, и҆ мꙋ́дрѣ и҆́щетъ, ка́кѡ поста́витъ ѡ҆́бразъ є҆гѡ̀, и҆ да не поколе́блетсѧ. Не разꙋмѣ́сте ли; не слы́шасте ли; не возвѣсти́сѧ ли ва́мъ и҆спе́рва; не разꙋмѣ́сте ли ѡ҆снова́нїѧ землѝ; Содержа́й крꙋ́гъ землѝ и҆ живꙋ́щыѧ на не́й а҆́ки прꙋ́ги: поста́вивый нб҃о ꙗ҆́кѡ кама́рꙋ, и҆ просте́ръ є҆̀, ꙗ҆́кѡ ски́нїю ѡ҆бита́ти: даѧ́й кнѧ́зи а҆́ки ничто́же владѣ́ти, и҆ зе́млю а҆́ки ничто́же сотворѝ. Не насадѧ́тъ бо, нижѐ насѣ́ютъ, и҆ не вкорени́тсѧ въ землѝ коре́нїе и҆́хъ: дхнѐ на ни́хъ вѣ́тръ, и҆ и҆зсхо́ша, и҆ бꙋ́рѧ а҆́ки сте́блїе во́зьметъ и҆̀хъ. Ны́нѣ ᲂу҆̀бо комꙋ̀ мѧ̀ ᲂу҆подо́бисте, и҆ вознесꙋ́сѧ, речѐ ст҃ы́й. Воззри́те на высотꙋ̀ ѻ҆чи́ма ва́шима, и҆ ви́дите, кто̀ сотворѝ сїѧ̑ всѧ̑; носѧ́й по числꙋ̀ ᲂу҆́тварь свою̀, и҆ всѧ̑ по и҆́мени прозове́тъ ѿ мно́гїѧ сла́вы и҆ въ держа́вѣ крѣ́пости своеѧ̀: ничто́же ᲂу҆таи́сѧ ѿ тебє̀. Є҆да́ бо рече́ши, і҆а́кѡве, и҆ что̀ глаго́лалъ є҆сѝ, і҆и҃лю; ᲂу҆таи́сѧ пꙋ́ть мо́й ѿ бг҃а, и҆ бг҃ъ мо́й сꙋ́дъ ѿѧ̀, и҆ ѿстꙋпѝ. И҆ ны́нѣ не ᲂу҆разꙋмѣ́лъ ли є҆сѝ; ни лѝ слы́шалъ є҆сѝ; бг҃ъ вѣ́чный, бг҃ъ ᲂу҆стро́ивый концы̀ землѝ, не вза́лчетъ, нижѐ ᲂу҆трꙋди́тсѧ, нижѐ є҆́сть и҆з̾ѡбрѣ́тенїе премꙋ́дрости є҆гѡ̀, даѧ́й а҆́лчꙋщымъ крѣ́пость, и҆ неболѣ́знєннымъ печа́ль. Вза́лчꙋтъ бо ю҆нѣ́йшїи, и҆ ᲂу҆трꙋдѧ́тсѧ ю҆́нѡты, и҆ и҆збра́ннїи некрѣ́пцы бꙋ́дꙋтъ: терпѧ́щїи же гдⷭ҇а и҆змѣнѧ́тъ крѣ́пость.

Прокі́менъ, ѱало́мъ п҃и, гла́съ ѕ҃: Бл҃же́ни лю́дїе вѣ́дꙋщїи воскликнове́нїе. Сті́хъ: Гдⷭ҇и, во свѣ́тѣ лица̀ твоегѡ̀ по́йдемъ.

На ѳ҃-мъ часѣ̀, каѳі́смꙋ и҃і.

Во вто́рникъ є҃-ѧ седми́цы ве́чера,

стїхосло́вимъ, вмѣ́стѡ Ко Гдⷭ҇ꙋ: каѳі́смꙋ ѳ҃і. На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ стїхи̑ры подѡ́бны трїѡ́ди, господи́на і҆ѡ́сифа, гла́съ и҃:

Подо́бенъ: Что́ ва́съ нарече́мъ:

Любо́вь ꙗ҆́кѡ бра́шно творѧ́ще, воздержа́нїемъ стра̑сти ᲂу҆держи́мъ, вѣ́рнїи, и҆ бг҃ꙋ, на́съ ра́ди вознесе́нномꙋ на крⷭ҇тъ и҆ копїе́мъ въ ре́бра прободе́нномꙋ, пожи́ти благоꙋго́днѡ потщи́мсѧ, да сла́дости наслади́мсѧ вѣ́чныѧ и҆ лꙋ́чшїѧ, сла́вѧще сп҃са дꙋ́шъ на́шихъ.

Дре́вомъ дре́вле сме́рть ѡ҆брѣто́хомъ, ны́нѣ же па́ки жи́знь дре́вомъ крⷭ҇тнымъ: страсте́й ᲂу҆́бо стремлє́нїѧ ᲂу҆мертви́мъ, вѣ́рнїи, и҆ дости́гнꙋти сп҃си́тельнагѡ воскрⷭ҇нїѧ всѣ́хъ бл҃годѣ́телѧ ᲂу҆мо́лимъ, дѣѧ́ньми бж҃е́ственными сїѧ́юще и҆ добродѣ́тельми ᲂу҆краша́еми, сла́вѧще сп҃са дꙋ́шъ на́шихъ.

И҆́нъ, господи́на ѳео́дѡра, гла́съ в҃.

Подо́бенъ: Па́че ᲂу҆ма̀ бл҃ги́хъ:

Живоно́сный тво́й крⷭ҇тъ похвалѧ́емъ, гдⷭ҇и, и҆ на́съ ра́ди сщ҃є́ннаѧ пло́ти твоеѧ̀ страда̑нїѧ,копїѐ и҆ заколе́нїе, посмѣѧ̑нїѧ, ѡ҆плева̑нїѧ, бїє́нїѧ и҆ заꙋшє́нїѧ съ багрѧни́цею, и҆ вѣне́цъ терноплете́нный, и҆́миже ѿ клѧ́твы всѧ̑ и҆зба́вивъ сп҃слъ є҆сѝ ны̀. тѣ́мже мо́лимъ тѧ̀: постѡ́въ вре́мѧ ми́рнѡ сконча́ти пода́ждь на́мъ.

Прокі́менъ, ѱало́мъ п҃ѳ, гла́съ д҃: Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. Сті́хъ: Пре́жде да́же гора́мъ не бы́ти, и҆ созда́тисѧ землѝ и҆ вселе́ннѣй.

Бытїѧ̀ чте́нїе. [Глава̀ є҃і, ст. а҃-є҃і].

Бы́сть сло́во гдⷭ҇не ко а҆вра́мꙋ въ видѣ́нїи но́щїю, глаго́лѧ: не бо́йсѧ, а҆вра́ме: а҆́зъ защища́ю тѧ̀, мзда̀ твоѧ̀ мно́га бꙋ́детъ ѕѣлѡ̀. Глаго́ла же а҆вра́мъ: влⷣко гдⷭ҇и, что́ ми да́си; а҆́зъ же ѿпꙋща́юсѧ безча́денъ: сы́нъ же масе́къ домоча́дицы моеѧ̀, се́й дама́скъ є҆лїе́зеръ. И҆ речѐ а҆вра́мъ: поне́же мнѣ̀ не да́лъ є҆сѝ сѣ́мене, домоча́децъ же мо́й наслѣ́дникъ мо́й бꙋ́детъ. И҆ а҆́бїе гла́съ гдⷭ҇ень бы́сть къ немꙋ̀, глаго́лѧй: не бꙋ́детъ се́й наслѣ́дникъ тво́й, но и҆́же и҆зы́детъ и҆з̾ тебє̀, то́й бꙋ́детъ наслѣ́дникъ тебѣ̀. И҆зведе́ же є҆го̀ во́нъ, и҆ речѐ є҆мꙋ̀: воззрѝ на не́бо, и҆ и҆зочтѝ ѕвѣ́зды, а҆́ще возмо́жеши и҆счестѝ ѧ҆̀. И̑ речѐ: та́кѡ бꙋ́детъ сѣ́мѧ твоѐ. И҆ вѣ́рова а҆вра́мъ бг҃ꙋ, и҆ вмѣни́сѧ є҆мꙋ̀ въ пра́вдꙋ. Рече́ же къ немꙋ̀: а҆́зъ [є҆́смь] бг҃ъ и҆зведы́й тѧ̀ ѿ страны̀ халде́йскїѧ, ꙗ҆́кѡ да́ти тебѣ̀ зе́млю сїю̀ наслѣ́довати. И҆ речѐ: влⷣко гдⷭ҇и, по чесомꙋ̀ ᲂу҆разꙋмѣ́ю, ꙗ҆́кѡ наслѣ́дити ю҆̀ и҆́мамъ; Рече́ же къ немꙋ̀: возмѝ мнѣ̀ ю҆́ницꙋ трилѣ́тнꙋ, и҆ ко́зꙋ трилѣ́тнꙋ, и҆ ѻ҆вна̀ трилѣ́тна, и҆ го́рлицꙋ, и҆ го́лꙋбѧ. Взѧ́ же ѻ҆́нъ всѧ̑ сїѧ̑, и҆ раздѣлѝ ѧ҆̀ на по́лы, и҆ положѝ ѧ҆̀ противоли̑чна є҆ди̑на къ дрꙋго́мꙋ: пти́цъ же не раздѣлѝ. Слетѣ́ша же пти̑цы на тѣлеса̀ растє́саннаѧ и҆́хъ: и҆ сѣ́де бли́зꙋ и҆́хъ а҆вра́мъ. Заходѧ́щꙋ же со́лнцꙋ, ᲂу҆́жасъ нападѐ на а҆вра́ма, и҆ сѐ стра́хъ те́менъ ве́лїй нападѐ на́нь. И҆ рече́но бы́сть ко а҆вра́мꙋ: вѣ́дый ᲂу҆вѣ́си, ꙗ҆́кѡ пресе́льно бꙋ́детъ сѣ́мѧ твоѐ въ землѝ не свое́й, и҆ порабо́тѧтъ ѧ҆̀, и҆ ѡ҆ѕло́бѧтъ ѧ҆̀, и҆ смирѧ́тъ ѧ҆̀ лѣ́тъ четы́реста. Ꙗ҆зы́кꙋ же, є҆мꙋ́же порабо́таютъ, сꙋждꙋ̀ а҆́зъ: по си́хъ же и҆зы́дꙋтъ сѣ́мѡ со и҆мѣ́нїемъ мно́гимъ. Ты́ же ѿи́деши ко ѻ҆тцє́мъ твои̑мъ въ ми́рѣ, препита́нъ въ ста́рости до́брѣй.

Прокі́менъ, ѱало́мъ ч҃, гла́съ д҃: Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. Сті́хъ: Рече́тъ гдⷭ҇еви: застꙋ́пникъ мо́й є҆сѝ.

При́тчей чте́нїе. [Глава̀ є҃і, ст. з҃-ѳ҃і].

Ꙋстнѣ̀ мꙋ́дрыхъ свѧзꙋ́ютсѧ чꙋ́вствомъ: сердца́ же безꙋ́мныхъ не твє́рда. Жє́ртвы нечести́выхъ ме́рзость гдⷭ҇еви: ѡ҆бѣ́ты же правоходѧ́щихъ прїѧ́тни є҆мꙋ̀. Ме́рзость гдⷭ҇еви пꙋтїѐ нечести́выхъ: гонѧ́щыѧ же пра́вдꙋ лю́битъ. Наказа́нїе неѕло́бивагѡ познава́етсѧ ѿ мимоходѧ́щихъ: ненави́дѧщїи же ѡ҆бличє́нїѧ скончава́ютсѧ сра́мнѡ. А҆́дъ и҆ па́гꙋба ꙗ҆́вна пред̾ гдⷭ҇емъ: ка́кѡ не и҆ сердца̀ человѣ́кѡвъ; Не возлю́битъ ненака́занный ѡ҆блича́ющихъ є҆го̀, съ мꙋ́дрыми же не побесѣ́дꙋетъ. Се́рдцꙋ веселѧ́щꙋсѧ, лицѐ цвѣте́тъ: въ печа́лехъ же сꙋ́щꙋ, сѣ́тꙋетъ. Се́рдце пра́вое и҆́щетъ чꙋ́вства: ᲂу҆ста́ же ненака́занныхъ ᲂу҆разꙋмѣ́ютъ ѕла̑ѧ. На всѧ́ко вре́мѧ ѻ҆́чи ѕлы́хъ прїе́млютъ ѕла̑ѧ: до́брїи же безмо́лвствꙋютъ при́снѡ. Лꙋ́чше части́ца ма́лаѧ со стра́хомъ гдⷭ҇нимъ, не́жели сокрѡ́вища вє́лїѧ без̾ боѧ́зни. Лꙋ́чше ᲂу҆чрежде́нїе ѿ ѕе́лїй съ любо́вїю и҆ бл҃года́тїю, не́жели представле́нїе тельцє́въ со враждо́ю. Мꙋ́жъ ꙗ҆́рый ᲂу҆строѧ́етъ бра̑ни: долготерпѣли́вый же и҆ бꙋ́дꙋщꙋю ᲂу҆кроща́етъ. Терпѣли́вый мꙋ́жъ ᲂу҆гаси́тъ сꙋды̀: нечести́вый же воздвиза́етъ па́че. Пꙋтїѐ пра́здныхъ по́стлани те́рнїемъ: мꙋ́жественныхъ же ᲂу҆гла́ждени.

На стїхо́внѣ самогла́сенъ, гла́съ є҃, є҆ди́ножды:

И҆згна́нъ бы́въ страстьмѝ ѿ пра́вагѡ пꙋтѝ твоегѡ̀, хрⷭ҇тѐ, низве́рженъ бы́хъ а҆́зъ ѡ҆каѧ́нный въ ро́въ. леѵі́тъ ᲂу҆́бѡ со сщ҃е́нникомъ соше́дшесѧ презрѣ́ша: ты́ же поми́ловалъ є҆сѝ мѧ̀, и҆ ѡ҆рꙋ́жїемъ крⷭ҇та̀ рꙋкописа́нїе грѣха̀ растерза́въ, безстра́стїемъ просвѣти́лъ є҆сѝ, и҆ ѻ҆ц҃ꙋ̀ сосѣда́льника сотвори́лъ є҆сѝ. тѣ́мже зовꙋ̀ тебѣ̀: непостижи́ме гдⷭ҇и, сла́ва тебѣ̀.

И҆́нъ самогла́сенъ, гла́съ и҃, є҆ди́ножды:

И҆з̾ і҆ерⷭ҇ли́ма снидо́хъ, поползнꙋ́всѧ, ѿ напи́санныхъ въ не́мъ ꙗ҆зы́комъ за́повѣдей твои́хъ: воі҆ерїхѡ́нъ же и҆ды́й, стремѧ́сѧ подража́ти дре́вле въ не́мъ тобо́ю ра́ди ѕло́бы прє́даннымъ наро́дꙋ твоемꙋ́ на ᲂу҆бїе́нїе, срѣто́хсѧ преслꙋша́нїемъ съ дꙋшетлѣ́нными страстьмѝ, ꙗ҆́коже съ разбо́йники. ѿ ни́хъ ᲂу҆ѧ́звлена и҆ и҆́сполꙋ ᲂу҆мерщвле́на, и҆сцѣли́ мѧ, гдⷭ҇и, гвоздьмѝ и҆ копїе́мъ пло́тїю ᲂу҆ѧ́звленный во́лею, грѣха̀ ра́ди человѣ́ча, и҆ ѻ҆́бщее сп҃се́нїе соверши́вый крⷭ҇то́мъ во і҆ерꙋсали́мѣ, и҆ сп҃си́ мѧ.

Мч҃нченъ: Мч҃нцы твоѝ, гдⷭ҇и, забы́вше сꙋ̑щаѧ въ житїѝ, презрѣ́вше и҆ мꙋ̑ки, ра́ди бꙋ́дꙋщїѧ жи́зни, сеѧ̀ наслѣ̑дницы ꙗ҆ви́шасѧ: тѣ́мже и҆ со а҆́гг҃лы ра́дꙋютсѧ. тѣ́хъ мл҃твами, да́рꙋй лю́демъ твои̑мъ ве́лїю млⷭ҇ть.

Сла́ва, и҆ ны́нѣ, крⷭ҇тобг҃оро́диченъ: Гдⷭ҇и, є҆гда̀ со́лнце ви́дѣ на дре́вѣ ви́сѧща тѧ сл҃нца пра́вды, лꙋчы̀ сокры̀, и҆ лꙋна̀ свѣ́тъ во тьмꙋ̀ преложѝ: всенепоро́чнаѧ же мт҃и твоѧ̀ ᲂу҆тро́бою ᲂу҆ѧзвлѧ́шесѧ.

Въ сре́дꙋ є҃-ѧ седми́цы на ᲂу҆́трени,

трⷭ҇чны. Та́же, каѳі̑смы к҃, а҃, в҃. По а҃-мъ стїхосло́вїи сѣда́льны крⷭ҇тныѧ ѻ҆смогла́сника два̀, съ крⷭ҇тобг҃оро́дичнымъ. По в҃-мъ же стїхосло́вїи настоѧ́щїй сѣда́ленъ господи́на і҆ѡ́сифа, гла́съ и҃.

Подо́бенъ: Повелѣ́нное та́йнѡ:

Ѿ дре́ва вкꙋси́въ а҆да́мъ неподо́бнѡ, невоздержа́нїѧ плоды̀ го́рцѣ ѡ҆б̾ѧ́тъ: ты̀ же вознесе́нъ на дре́во, ще́дре, сего̀ и҆зба́вилъ є҆сѝ ѿ ѡ҆сꙋжде́нїѧ лю́тагѡ. тѣ́мже тѝ вопїе́мъ: да́ждь на́мъ воздержава́тисѧ, влⷣко, ѿ плода̀ тлетво́рнагѡ и҆ твори́ти во́лю твою̀, ꙗ҆́кѡ да ѡ҆брѧ́щемъ млⷭ҇ть. [Два́жды].

Крⷭ҇тобг҃оро́диченъ: Ѿ крове́й твои́хъ чи́стыхъ воплоще́ннаго, и҆ па́че смы́сла ѿ тебє̀ рожде́ннаго, чтⷭ҇аѧ, на дре́вѣ ви́сѧща посредѣ̀ ѕлодѣ̑ю ви́дѧщи, ᲂу҆тро́бою болѣ́зновала є҆сѝ и҆ мт҃рски рыда́ющи вопїѧ́ла є҆сѝ: ᲂу҆вы̀ мнѣ̀, ча́до моѐ! ко́е бж҃е́ственное и҆ неизрече́нное смотре́нїе твоѐ, и҆́мже ѡ҆живи́лъ є҆сѝ созда́нїе твоѐ; воспѣва́ю твоѐ бл҃госе́рдїе.

По а҃-мъ стїхосло́вїи сѣда́ленъ, господи́на ѳео́дѡра, гла́съ в҃.

Подо́бенъ: Пречⷭ҇томꙋ ѡ҆́бразꙋ твоемꙋ̀:

Дре́во всест҃о́е крⷭ҇тное воспѣва́юще, кра́йней бл҃гости твое́й покланѧ́емсѧ при́снѡ, хрⷭ҇тѐ бж҃е: на се́мъ бо посрами́лъ є҆сѝ си̑лы вра̑жїѧ и҆ да́лъ є҆сѝ зна́менїе вѣ́рꙋющымъ въ тѧ̀. тѣ́мже бл҃года́рнѡ вопїе́мъ тѝ: всѣ́хъ сподо́би, бл҃годꙋ́шнѡ ми́рнѡ живꙋ́щихъ, и҆спо́лнити поще́нїѧ вре́мѧ. [Два́жды].

Крⷭ҇тобг҃оро́диченъ: Непоро́чнаго па́стырѧ тѧ̀ на дре́вѣ пригвожда́ема зрѧ́щи, а҆́гница рыда́ющи мт҃рски вопїѧ́ше: сн҃е, на сме́рть тѧ̀ ѡ҆сꙋди́ша неблагода́рнїи лю́дїе за сїѐ, ꙗ҆́кѡ ѡ҆́блакъ просте́рлъ є҆сѝ въ прехожде́нїе и҆́хъ: ᲂу҆вы̀ мнѣ̀, безча́дствꙋюсѧ безмꙋ́жнаѧ! но воста́ни и҆ возсїѧ́й, сл҃нце, и҆ просла́влюсѧ въ сынѣ́хъ земноро́дныхъ.

Канѡ́нъ мине́и, и҆ настоѧ́щїй трипѣ́снецъ, господи́на і҆ѡ́сифа.

И҆ стїхосло́витсѧ пѣ́снь. Гла́съ и҃.

Пѣ́снь г҃.

І҆рмо́съ: Нбⷭ҇нагѡ крꙋ́га:

Ѡ҆сꙋди́въ враждꙋ̀, на крⷭ҇тѣ̀ просте́рлъ є҆сѝ твоѧ̑, правосꙋ́де, дла̑ни: ны́нѣ же ѡ҆сꙋжде́нна мѧ̀ сꙋ́ща прегрѣше́ньми, сп҃сѝ блꙋ́днаго, сп҃се, ѡ҆горчи́вшаго тѧ̀ долготерпѣли́ваго.

Ско́тскагѡ возжелѣ́въ страстотво́рнагѡ житїѧ, ѿ твои́хъ за́повѣдей ᲂу҆дали́хсѧ, сп҃се пребл҃гі́й, порабоща́емь чꙋжди́ми и҆ нечи́стыми гра̑жданы: ны́нѣ же ѡ҆браща́ющасѧ прїими и҆ сп҃си́ мѧ.

Ꙗ҆́коже гꙋгни́вомꙋ дре́вле слꙋ́хъ ѿве́рзлъ є҆сѝ, ѿве́рзи дꙋшѝ моеѧ̀ ᲂу҆шеса̀ мнѣ́нїемъ ѡ҆глꙋшє́нна, и҆ слꙋ́шати твоѐ сп҃си́тельное сло́во, і҆и҃се, сподо́би мѧ̀, є҆ди́не чл҃вѣколю́бче.

Бг҃оро́диченъ: Сп҃си́тєльнаѧ врата̀, къ бг҃ꙋ мо́сте, хрⷭ҇тїа́нъ предста́тельнице пречⷭ҇таѧ влⷣчце, ѡ҆бстои́ма мѧ̀ напа́стьми житїѧ̀ и҆ ѡ҆бꙋрева́ема ᲂупра́ви, ѻ҆трокови́це.

И҆́ный, господи́на ѳео́дѡра. Гла́съ в҃.

І҆рмо́съ: Непло́дный мо́й ᲂу҆́мъ:

Милосе́рдїѧ ра́ди щедро́тъ возше́дъ на крⷭ҇тъ, и҆звле́клъ є҆си́ мѧ и҆з̾ про́пасти страсте́й, и҆ возне́слъ є҆сѝ, хрⷭ҇тѐ, въ нбⷭ҇наѧ.

Просте́ръ на крⷭ҇тѣ̀ дла̑ни твоѧ̑, хрⷭ҇тѐ, ꙗ҆зы́ки всѧ̑ ᲂу҆далє́нныѧ ѿ тебє̀ ѡ҆б̾ѧ́лъ є҆сѝ, бли́зъ ста́ти держа́вы твоеѧ̀.

Трⷪ҇ченъ: Трїѷпоста́снаѧ є҆ди́нице, пресꙋ́щнаѧ трⷪ҇це, бж҃ество̀ є҆ди́но, ѻ҆́ч҃е, и҆ сн҃е, и҆ дш҃е пра́вый, сп҃сѝ чтꙋ́щыѧ тѧ̀.

Бг҃оро́диченъ: Кто̀ ѿ земны́хъ хвали́ти тѧ̀ по достоѧ́нїю возмо́жетъ, мт҃и дв҃о; ты́ бо въ жена́хъ є҆ди́на ꙗ҆ви́ласѧ є҆сѝ и҆збра́ннаѧ и҆ всебл҃же́ннаѧ.

Сла́ва тебѣ̀, бж҃е на́шъ, сла́ва тебѣ̀.

Вознесе́нъ бы́лъ є҆сѝ на крⷭ҇тѣ̀, прободе́нъ бы́лъ є҆сѝ въ ре́бра, же́лчи вкꙋси́лъ є҆сѝ менѐ ра́ди, і҆и҃се, ѡ҆слꙋша́нїемъ преѡгорчи́вшагѡ тѧ̀.

І҆рмо́съ: Непло́дный мо́й ᲂу҆́мъ плодоно́сенъ покажи́ ми, бж҃е, дѣ́лателю до́брыхъ, насади́телю бл҃ги́хъ, бл҃госе́рдїемъ твои́мъ.

Пѣ́снь и҃.

І҆рмо́съ: Седмери́цею пе́щь:

Неꙋсы́пнымъ ѻ҆́комъ воззрѣ́въ на мѧ̀, лѣ́ности дрема́нїемъ ѡ҆держи́ма и҆ снꙋ̀ рабо́тающа сла̑стномꙋ на ѻ҆дрѣ̀ страсте́й, ᲂуще́дри, на крⷭ҇тѣ̀ главꙋ̀ твою̀ преклони́вый и҆ во́лею ᲂу҆снꙋ́вый, и҆ но́щь грѣха̀ разори́вый, хрⷭ҇тѐ, свѣ́тъ сы́й пра́вды.

Богатотво́рными дарова̑нїи ᲂу҆краси́всѧ ѿ креще́нїѧ, па́че нищетꙋ̀ ѕлы́хъ возлюби́хъ, и҆ чꙋ́ждь бы́хъ добродѣ́телей ѡ҆каѧ́нный а҆́зъ, во странꙋ̀ ѕло́бы дале́че ѿше́дъ. тѣ́мже ѡ҆брати́въ ѡ҆б̾ими́ мѧ, сп҃се, твои́мъ крⷭ҇то́мъ ѡ҆гражда́ѧ во всѧ̑ вѣ́ки.

Пїѧ́нство страсте́й ѿри́ни, дꙋшѐ, и҆ поще́нїемъ чисти́тельное вїно̀ сле́зъ взыщѝ, се́рдце веселѧ́щее и҆ сла̑сти ᲂу҆вѧда́ющее, и҆ плѡтскі̑ѧ пє́щи и҆спепелѧ́ющее: и҆ потщи́сѧ пригвожде́нномꙋ тебѣ̀ ра́ди на дре́вѣ хрⷭ҇тꙋ̀ сраспѧ́тисѧ и҆ жи́ти во вѣ́ки.

Бг҃оро́диченъ: Бг҃ороди́тельнице всечⷭ҇таѧ, дꙋшѝ моеѧ̀ ꙗ҆́звы и҆ грѣхѡ́внаѧ гноє́нїѧ ѡ҆чи́сти, ѡ҆мыва́ющи тече́ньми ѿ ре́бръ ржⷭ҇тва̀ твоегѡ̀ и҆ ѿ ни́хъ стрꙋѧ́ми ѡ҆чища́ющи: къ тебѣ́ бо взыва́ю, и҆ къ тебѣ̀ прибѣга́ю, и҆ тѧ̀ призыва́ю бл҃года́тнꙋю.

И҆́ный.

І҆рмо́съ: Гла̑сы а҆́гг҃льскими:

Распе́ншагосѧ пло́тски и҆ бжⷭ҇ество́мъ не пострада́вшаго і҆и҃са пою́тъ а҆́гг҃ли и҆ мы̀ земноро́днїи во всѧ̑ вѣ́ки.

Въ распѧ́тїи твое́мъ, хрⷭ҇тѐ, поноси́тельнꙋю сме́рть прїе́мъ проклѧ́тꙋю, сп҃слъ ны̀ є҆сѝ, ѿ тлѣ́нїѧ и҆зба́вивъ.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Херꙋві́мски тѧ̀, ѽ трⷪ҇це, пою̀: ст҃ъ, ст҃ъ, ст҃ъ, є҆ди́но бж҃ество̀ безнача́льное, про́стое и҆ всѣ́ми непостижи́мое.

Бг҃оро́диченъ: Похвала́ми тѧ̀, чтⷭ҇аѧ, свѣ́тлѡ почита́ютъ всѝ ро́ди: зижди́телѧ бо родила̀ є҆сѝ. ѽ чꙋ́до стра́шное и҆ дѣ́ло всебл҃же́нное!

Сла́ва тебѣ̀, бж҃е на́шъ, сла́ва тебѣ̀.

Всѧ̑ претерпѣ́лъ є҆сѝ пострада́ти є҆ди́нагѡ ра́ди, да а҆́зъ сп҃сꙋ́сѧ, хрⷭ҇тѐ: пою̀ твоѐ распѧ́тїе гво́зди и҆ заколе́нїе во всѧ̑ вѣ́ки.

Хва́лимъ, бл҃гослови́мъ, покланѧ́емсѧ гдⷭ҇еви:

І҆рмо́съ: Гла̑сы а҆́гг҃льскими на нб҃сѣ́хъ сла́вимаго бг҃а восхва́лимъ, всѝ земноро́днїи, во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о:

Зрѧ́ тѧ просте́рта на крⷭ҇тѣ̀, лꙋчы̀ сокры̀ со́лнце, всѧ́ же землѧ̀ тре́петомъ колеба́шесѧ, всецр҃ю̀, ви́дѧщи тѧ во́лею стра́ждꙋща, є҆стество́мъ безстра́стна. тѣ́мже тѧ̀ молю̀: стра̑сти дꙋшѝ моеѧ̀, ꙗ҆́кѡ вра́чь, хрⷭ҇тѐ, и҆сцѣлѝ.

Пꙋти̑ сп҃си́тєльныѧ ѡ҆ста́вивъ, во а҆́дъ ведꙋ́щими ше́ствовахъ, тьмꙋ̀ глꙋбо́кꙋю и҆мѣ́ѧ ѡ҆́крестъ, сла̑сти и҆ страсте́й поползнове́́нїе, и҆ бꙋ́рю и҆скꙋше́нїй. тѣ́мже тѧ̀ молю̀: твои́мъ крⷭ҇то́мъ сп҃си́ мѧ, хрⷭ҇тѐ, ꙗ҆́кѡ є҆ди́нъ многомлⷭ҇тивъ.

Зимо́ю и҆скꙋше́нїй содержи́мь и҆ страсте́й треволнє́нїи потоплѧ́емь, и҆ сласте́й бꙋ́рею ѡ҆бꙋрева́емь лю́тѣ, поще́нїѧ пꙋчи́ны достиго́хъ кро́ткїѧ и҆ ти́хїѧ, въ не́йже мѧ̀ ᲂупра́вивъ твои́мъ крⷭ҇то́мъ, ще́дре, ко сп҃се́нїю ᲂу҆стремѝ.

Бг҃оро́диченъ: Зачала̀ є҆сѝ, дв҃о, без̾ сѣ́мене, без̾ хотѣ́нїй плотски́хъ, всѧ́чєскаѧ содѣ́лавшаго сло́ва бж҃їѧ: без̾ и҆стлѣ́нїѧ же родила̀ є҆сѝ, без̾ болѣ́зней ма́тернихъ. тѣ́мже тѧ̀ бцⷣꙋ и҆ ѧ҆зы́комъ и҆ се́рдцемъ и҆сповѣ́дающе, велича́емъ.

И҆́ный.

І҆рмо́съ: Дѣ́вство твоѐ, бцⷣе:

Во́лею претерпѣ́лъ є҆сѝ распѧ́тисѧ, сп҃се на́шъ, да пода́си всѣ̑мъ жи́знь, ѿ сме́рти и҆зба́вивъ.

Дре́вомъ ᲂу҆мертви́хсѧ, и҆ крⷭ҇тнымъ дре́вомъ ѡ҆жи́хъ, на не́мже хрⷭ҇то́съ мо́й пригвожде́нъ, врага̀ моего̀ ᲂу҆мертвѝ.

Трⷪ҇ченъ: Ꙗ҆́кѡ сꙋ́щꙋ сн҃ꙋ съ роди́телемъ, и҆ дх҃ꙋ ст҃о́мꙋ соприсꙋ́щꙋ, є҆диномꙋ́дреннѡ поклони́мсѧ.

Бг҃оро́диченъ: Чꙋ́до пресла́вное и҆ ᲂу҆жа́сное слы́шанїе! ка́кѡ и҆ ꙗ҆́кѡ мт҃и ражда́еши, чтⷭ҇аѧ, и҆ ꙗ҆́кѡ дв҃а не позна́ла є҆сѝ тлѣ́нїѧ;

Сла́ва тебѣ̀, бж҃е на́шъ, сла́ва тебѣ̀.

Пою̀ копїѐ твоѐ, воспѣва́ю и҆ гво́зди твоѧ̑, гꙋ́бꙋ, тро́сть, крⷭ҇тъ, и҆́миже сп҃слъ мѧ̀ є҆сѝ,і҆и҃се бж҃е.

І҆рмо́съ: Дѣ́вство твоѐ, бцⷣе нескве́рнаѧ, є҆́же не ѡ҆палѝ ѻ҆́гнь бж҃е́ственный, велича́емъ.

Свѣти́ленъ гла́са.

На стїхо́внѣ самогла́сенъ, гла́съ г҃:

Высотꙋ̀ добродѣ́телей ѡ҆ста́вивши, дꙋшѐ моѧ̀, во глꙋбинꙋ̀ грѣхо́внꙋю снизшла̀ є҆сѝ, въ лꙋка̑вныѧ разбо́йники впа́дши: стрꙋ́пѡвъ же смердѧ́щихъ полна̀ сꙋ́щи, лежи́ши пове́ржена безпомо́щна. тѣ́мже возопі́й хрⷭ҇тꙋ̀ бг҃ꙋ, за тѧ̀ распе́ншемꙋсѧ и҆ ра̑ны во́лею прїе́мшемꙋ: попецы́сѧ ѡ҆ мнѣ̀, гдⷭ҇и, и҆ сп҃си́ мѧ.

И҆́ный, гла́съ и҃: Разбо́йническими пѡ́мыслы ᲂу҆ѧ́звленъ ѡ҆каѧ́нный, є҆́ле жи́въ бы́хъ, гдⷭ҇и: прⷪ҇ро́ческїй же ли́къ презрѣ̀ мѧ, ви́дѣвъ є҆́ле жи́ва сꙋ́ща и҆ хитростьмѝ человѣ́ческими неисцѣ́льна. тѣ́мже лю́тѣ болѧ̀, во смире́нїи се́рдца зовꙋ́ ти, хрⷭ҇тѐ бж҃е: и҆зле́й, ꙗ҆́кѡ бл҃госе́рдъ, на мѧ̀ вели́кꙋю твою̀ млⷭ҇ть.

Мч҃нченъ: Мч҃нцы хрⷭ҇тѡ́вы непобѣди́мїи, побѣди́вше прельще́нїе си́лою крⷭ҇тною, воспрїѧ́сте бл҃года́ть вѣ́чныѧ жи́зни: преще́нїѧ мꙋчи́телей не ᲂу҆боѧ́стесѧ мꙋ́ками ᲂу҆ранѧ́еми веселисте́сѧ: и҆ ны́нѣ крѡ́ви ва́шѧ бы́ша и҆сцѣлє́нїѧ дꙋ́шъ на́шихъ. моли́те сп҃сти́сѧ дꙋша́мъ на́шымъ.

Сла́ва, и҆ ны́нѣ, крⷭ҇тобг҃оро́диченъ.

Всечⷭ҇таѧ є҆гда̀ ви́дѣ тѧ̀, сло́ве, пло́тїю ви́сѧща на дре́вѣ, се́рдцемъ ᲂу҆ѧзвлѧ́шесѧ и҆ восклица́ше слезѧ́щи: ка́мѡ заше́лъ є҆сѝ ѿ менє̀, вселюбе́знѣйшїй і҆и҃се, сн҃е мо́й и҆ гдⷭ҇и; не ѡ҆ста́ви мѧ̀ є҆ди́нꙋ, хрⷭ҇тѐ, ро́ждшꙋю тѧ̀.

На а҃-мъ часѣ̀ каѳі́сма г҃-ѧ, на г҃-мъ часѣ̀ д҃-ѧ, на ѕ҃-мъ часѣ̀ є҃-ѧ. На ѕ҃-мъ часѣ̀ тропа́рь прⷪ҇ро́чества, гла́съ а҃:

Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди, гдⷭ҇и, и҆ всѧ̑ на́ша болѣ̑зни и҆сцѣлѝ, человѣколю́бче, мо́лимсѧ.

Прокі́менъ, ѱало́мъ ч҃а, гла́съ д҃. Бл҃го є҆́сть и҆сповѣ́датисѧ гдⷭ҇еви, и҆ пѣ́ти и҆́мени твоемꙋ̀, вы́шнїй. Сті́хъ: Возвѣща́ти заꙋ́тра млⷭ҇ть твою̀, и҆ и҆́стинꙋ твою̀ на всѧ́кꙋ но́щь.

Прⷪ҇ро́чества и҆са́їина чте́нїе. [Глава̀ м҃а, ст. д҃-д҃і].

Та́кѡ глаго́летъ гдⷭ҇ь: а҆́зъ бг҃ъ пе́рвый, и҆ въ грѧдꙋ̑щаѧ а҆́зъ є҆́смь. Ви́дѣша ꙗ҆зы́цы и҆ ᲂу҆боѧ́шасѧ, концы̀ земні́и прибли́жишасѧ и҆ прїидо́ша вкꙋ́пѣ. Сꙋдѧ́й кі́йждо бли́жнемꙋ, и҆ бра́тꙋ помощѝ, и҆ рече́тъ: превозмо́же мꙋ́жъ древодѣ́латель, и҆ кова́чь бїѧ́й мла́томъ, вкꙋ́пѣ прокова́ѧй: ѻ҆вогда̀ ᲂу҆́бѡ рече́тъ: спаѧ́нїе добро̀ є҆́сть, ᲂу҆тверди́ша ѧ҆̀ гвоздьмѝ, положа́тъ ѧ҆̀, и҆ не подви́гнꙋтсѧ. Ты́ же, і҆и҃лю, ра́бе мо́й і҆а́кѡве, є҆го́же и҆збра́хъ, сѣ́мѧ а҆враа́мле, є҆го́же возлюби́хъ, є҆го́же поѧ́хъ ѿ конє́цъ землѝ, и҆ ѿ стра́жбъ є҆ѧ̀ призва́хъ тѧ̀, и҆ реко́хътѝ: ра́бъ мо́й є҆сѝ, и҆збра́хъ тѧ̀, и҆ не ѡ҆ста́вихъ тебѐ. Не бо́йсѧ, съ тобо́ю бо є҆́смь, не прельща́ю: а҆́зъ бо є҆́смь бг҃ъ тво́й, ᲂу҆крѣпи́вый тѧ̀, и҆ помого́хъ тѝ, и҆ ᲂу҆тверди́хъ тѧ̀ десни́цею мое́ю пра́ведною. Сѐ постыдѧ́тсѧ и҆ посра́мѧтсѧ всѝ сопротивлѧ́ющїисѧ тебѣ̀, бꙋ́дꙋтъ бо ꙗ҆́кѡ не сꙋ́щїи, и҆ поги́бнꙋтъ всѝ сопє́рницы твоѝ. Взы́щеши и҆̀хъ, и҆ не ѡ҆брѧ́щеши человѣ́кѡвъ, и҆̀же порꙋга́ютсѧ тебѣ̀: бꙋ́дꙋтъ бо а҆́ки не бы́вшїи, и҆ не бꙋ́дꙋтъ ра́тꙋющїи тебѐ. Ꙗ҆́кѡ а҆́зъ бг҃ъ тво́й держа́й десни́цꙋ твою̀, глаго́лѧй тебѣ̀: не бо́йсѧ, і҆а́кѡве, ма́лый і҆и҃лю, а҆́зъ помого́хъ тѝ, глаго́летъ бг҃ъ тво́й, и҆збавлѧ́ѧй тѧ̀ ст҃ы́й і҆и҃левъ.

Прокі́менъ, ѱало́мъ ч҃в, гла́съ ѕ҃: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. Сті́хъ: Ѡ҆блече́сѧ гдⷭ҇ь въ си́лꙋ и҆ препоѧ́сасѧ.

На ѳ҃-мъ часѣ̀ каѳі́сма ѕ҃.

Въ сре́дꙋ ве́чера,

стїхосло́вимъ, вмѣ́стѡ: Ко гдⷭ҇ꙋ, внегда̀ скорбѣ́ти мѝ: каѳі́смꙋ з҃. На Гдⷭ҇и воззва́хъ, стїхи́ра самогла́сна, ю҆́же глаго́лемъ два́жды. Начина́емъ же стїхѝ ѿ: Впадꙋ́тъ во мре́жꙋ свою̀:

Гла́съ и҃:

Мои́ми помышлє́нїи въ разбо́йники впа́дъ, ѡ҆кра́денъ бы́хъ ѡ҆каѧ́нный ᲂу҆мо́мъ, и҆ лю́тѣ ᲂу҆ѧзвленъ, всею̀ мое́ю дꙋше́ю ᲂу҆ра́ненъ бы́хъ, и҆ ѿтꙋ́дꙋ лежꙋ̀ на жите́йстѣмъ пꙋтѝ ѡ҆бнаже́нъ добродѣ́телей. сщ҃е́нникъ ᲂу҆́бѡ ви́дѣвъ мѧ̀ ра́нами болѧ́ща, неисцѣ́льности ра́ди презира́ѧ не воззрѣ̀ на мѧ̀: леѵі́тъ же па́ки не терпѧ̀ дꙋшетлѣ́нныѧ болѣ́зни, и҆ то́й ви́дѣвъ мѧ̀ мимои́де. ты́ же, бл҃говоли́вый не ѿ самарі́и, но ѿ мр҃і́и воплоти́тисѧ, хрⷭ҇тѐ бж҃е, чл҃вѣколю́бїемъ твои́мъ пода́ждь мѝ и҆сцѣле́нїе, и҆злива́ѧ на мѧ̀ вели́кꙋю твою̀ млⷭ҇ть.

Сті́хъ: Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ.

Па́ки тꙋ́южде.

Сті́хъ: Пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀.

Мч҃нченъ: А҆́ще ка́ѧ добродѣ́тель и҆ а҆́ще ка́ѧ похвала̀, подоба́етъ ст҃ы̑мъ: мечє́мъ бо преклони́ша вы̑и, тебє̀ ра́ди прекло́ньшагѡ нб҃са̀ и҆ соше́дшагѡ: и҆злїѧ́ша крѡ́ви своѧ̑, тебє̀ ра́ди и҆стощи́вшагѡ себѐ и҆ зра́къ раба̀ прїи́мшагѡ: смири́шасѧ да́же до сме́рти, нищетѣ̀ твое́й подража́юще. и҆́хже мл҃твами, по мно́жествꙋ щедро́тъ твои́хъ, бж҃е, поми́лꙋй на́съ.

Сті́хъ: Внегда̀ и҆счеза́ти ѿ менє̀ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑.

И҆́ны стїхи̑ры, господи́на і҆ѡ́сифа, гла́съ и҃.

Подо́бенъ: Гдⷭ҇и, а҆́ще и҆ на сꙋди́лищи:

Гдⷭ҇и, ты̀ сщ҃є́нныѧ ᲂу҆ч҃нкѝ твоѧ̑ разꙋ̑мнаѧ нб҃са̀ показа́лъ є҆сѝ. си́хъ сщ҃е́нными хода́тайствы, ѿ земны́хъ ѕѡ́лъ мѧ̀ и҆зба́ви, воздержа́нїемъ возносѧ̀ всегда̀ помышле́нїе моѐ ѿ манове́нїѧ ко страсте́мъ, ꙗ҆́кѡ ще́дръ и҆ чл҃вѣколю́бецъ.

Сті́хъ: На пꙋтѝ се́мъ, по немꙋ́же хожда́хъ, скры́ша сѣ́ть мнѣ̀.

И҆мꙋ́ще всѝ вре́мѧ поще́нїѧ, ꙗ҆́кѡ содѣ́йственника бж҃е́ствєннымъ дѣѧ́нїємъ, пла́чимъ ѿ всегѡ̀ се́рдца, и҆ сп҃сꙋ возопїи́мъ: твои́хъ ра́ди ᲂу҆ч҃нкъ, гдⷭ҇и многомлⷭ҇тиве, сп҃сѝ со стра́хомъ воспѣва́ющыѧ мно́гое чл҃вѣколю́бїе твоѐ.

И҆́на стїхи́ра, господи́на ѳео́дѡра, гла́съ то́йже.

Подо́бенъ: Сла́внꙋю и҆ пречⷭ҇тꙋю:

Сті́хъ: Смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менѐ.

А҆пⷭ҇ли прехва́льнїи, мі́рꙋ мл҃твєнницы, немощны́хъ вра́чеве, здра́вїѧ храни́телїе, во ѻ҆бое́мъ на́съ соблюди́те, поще́нїѧ вре́мѧ преходѧ́щыѧ: да дрꙋ́гъ ко дрꙋ́гꙋ бж҃е́ственнѡ ми́рствꙋюще, ᲂу҆́мъ несмꙋще́нъ ѿ страсте́й хранѧ́ще, воспое́мъ всѝ пѣ́снь хрⷭ҇тꙋ̀ воскре́сшемꙋ, ꙗ҆́кѡ побѣди́телю.

И҆́ны стїхи̑ры по а҆лфави́тꙋ, к҃д, вели́кагѡ канѡ́на. Творе́нїе господи́на а҆ндре́а кри́тскагѡ, гла́съ д҃.

Подо́бенъ: Хотѣ́хъ слеза́ми:

Сті́хъ: Поги́бе бѣ́гство ѿ менє̀, и҆ нѣ́сть взыска́ѧй дꙋ́шꙋ мою̀.

А Всѐ житїѐ моѐ со блꙋдни́цами и҆ мытари̑ и҆жди́сѧ: ᲂу҆̀бо возмогꙋ́ ли понѐ въ ста́рости пока́ѧтисѧ, ꙗ҆́же согрѣши́хъ; содѣ́телю всѣ́хъ и҆ врачꙋ̀ недꙋ́гꙋющихъ, гдⷭ҇и, пре́жде да́же до конца̀ не поги́бнꙋ, сп҃си́ мѧ.

И҆ твори́мъ на кі́йждо сті́хъ по г҃ покло́ны.

Сті́хъ: Воззва́хъ къ тебѣ̀, гдⷭ҇и, рѣ́хъ: ты̀ є҆сѝ ᲂу҆пова́нїе моѐ, ча́стъ моѧ̀ є҆сѝ на землѝ живы́хъ.

В Тѧ́жестїю небреже́нїѧ содержи́мь, въ ти́нѣ валѧ́юсѧ, стрѣло́ю ᲂу҆стрѣле́нъ велїа́ра, и҆ ѡ҆сквернѧ́ю моѐ є҆́же по ѡ҆́бразꙋ. ѡ҆брати́телю небрегꙋ́щихъ и҆ и҆зба́вителю прегрѣши́вшихъ, гдⷭ҇и,пре́жде да́же до конца̀ не поги́бнꙋ, сп҃си́ мѧ.

Сті́хъ: Вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀.

Г Ꙗви́хсѧ преткнове́нїе человѣ́кѡмъ, воздѣ́лавъ ꙗ҆́кѡ земноро́дный земна̑ѧ: бра́кꙋ сопрѧго́хсѧ твои́мъ повелѣ́нїемъ, и҆ престꙋпи́хъ ѡ҆скверни́въ ло́же моѐ. ѿ землѝ созда́вый, не пре́зри созда́нїѧ твоегѡ̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: И҆зба́ви мѧ̀ ѿ гонѧ́щихъ мѧ̀, ꙗ҆́кѡ ᲂу҆крѣпи́шасѧ па́че менѐ.

Д Оу҆бі́йца бы́хъ дꙋшѝ мое́й, ѡ҆ пло́ти мое́й промышле́нїе творѧ̀: де́монѡмъ и҆гра́лище поста́лвленъ бы́хъ, сласте́мъ рабо́таѧ и҆ безмѣ́стїємъ. бл҃госе́рдїемъ твои́мъ пощадѝ, прогони́телю де́монѡвъ: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.

Е Во́лею согрѣши́хъ па́че всѣ́хъ, сегѡ̀ ра́ди ѡ҆ста́вленъ є҆́смь: и҆́мамъ проти́вника дꙋшѝ мое́й пло́ти мꙋдрова́нїе, и҆ помрача́етъ мѧ̀. просвѣще́нїе сꙋ́щихъ во тьмѣ̀ и҆ наста́вниче заблꙋжда́ющихъ, гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Менѐ ждꙋ́тъ првⷣницы, до́ндеже возда́си мнѣ̀.

З Жива̀ бꙋ́детъ, глаго́лаше прⷪ҇ро́къ, дꙋша̀ моѧ̀, гдⷭ҇и, и҆ восхва́литъ тѧ̀: взыщѝ мѧ̀ ѻ҆вча̀ заблꙋ́ждшее, и҆ сопричти́ мѧ ста́дꙋ твоемꙋ̀: да́ждь мѝ вре́мѧ покаѧ́нїѧ, да стенѧ̀ вопїю́ ти: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: И҆з̾ глꙋбины̀ воззва́хъ къ тебѣ̀, гдⷭ҇и: гдⷭ҇и, ᲂу҆слы́ши гла́съ мо́й.

И Согрѣши́хъ, согрѣши́хъ, ѿве́ргъ повелѣ̑нїѧ твоѧ̑, хрⷭ҇тѐ бж҃е. млⷭ҇тивъ бꙋ́ди мѝ, бл҃годѣ́телю, да прозрю̀ внꙋ́треннима ѻ҆чи́ма, и҆ ᲂу҆бѣ́гнꙋ ѿ тьмы̀, и҆ со стра́хомъ возопїю̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Да бꙋ́дꙋтъ ᲂу҆́ши твоѝ вне́млющѣ гла́сꙋ моле́нїѧ моегѡ̀.

Ѳ Ѕвѣ́рїе ди́вїи мѧ̀ ѡ҆бдержа́ша, но ѿ ни́хъ мѧ̀ и҆схитѝ, влⷣко: хо́щеши бо всѣ̑мъ человѣ́кѡмъ сп҃сти́сѧ и҆ въ позна́нїе и҆́стины прїитѝ, ꙗ҆́кѡ созда́тель. со всѣ́ми и҆ менѐ сп҃сѝ: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: А҆́ще беззакѡ́нїѧ на́зриши, гдⷭ҇и, гдⷭ҇и, кто̀ постои́тъ; ꙗ҆́кѡ ᲂу҆ тебє̀ ѡ҆чище́нїе є҆́сть.

І Цѣли́тель бꙋ́ди мѝ, бл҃годѣ́телю, и҆зба́вителю, сп҃се мо́й, и҆ не ѿри́ни менє̀. ви́ждь мѧ̀ лежа́ща въ беззако́нїихъ, и҆ возста́ви мѧ̀ ꙗ҆́кѡ всеси́ленъ, да и҆ а҆́зъ возвѣщꙋ̀ дѣѧ̑нїѧ моѧ̑ и҆ возопїю́ ти: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: И҆́мене ра́ди твоегѡ̀ потерпѣ́хъ тѧ̀, гдⷭ҇и, потерпѣ̀ дꙋша̀ моѧ̀ въ сло́во твоѐ: ᲂу҆пова̀ дꙋша̀ моѧ̀ на гдⷭ҇а.

К Сокры́въ тала́нтъ да́нный мѝ, ꙗ҆́кѡ несмы́сленный ра́бъ, въ зе́млю закопа́хъ, и҆ ꙗ҆́коже непотре́бный ѡ҆сꙋди́хсѧ, и҆ ᲂужѐ не дерза́ю проси́ти тѧ̀. ꙗ҆́кѡ неѕло́бивый ᲂу҆ще́дри мѧ̀, да и҆ а҆́зъ воззовꙋ̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Ѿ стра́жи ᲂу҆́треннїѧ до но́щи, ѿ стра́жи ᲂу҆́треннїѧ да ᲂу҆пова́етъ і҆и҃ль на гдⷭ҇а.

Л Є҆́зеро страсте́й кровоточи́выѧ и҆зсꙋши́лъ є҆сѝ прикоснове́нїемъ ѡ҆ме́тъ твои́хъ: да́ждь мѝ ѡ҆ставле́нїе согрѣше́нїй, несꙋмнѣ́нною вѣ́рою къ тебѣ̀ притека́ющемꙋ. прїими́ и҆ менѐ ꙗ҆́коже ѻ҆́нꙋю, и҆ и҆сцѣлѝ мою̀ болѣ́знь: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Ꙗ҆́кѡ ᲂу҆ гдⷭ҇а млⷭ҇ть, и҆ мно́гое ᲂу҆ негѡ̀ и҆збавле́нїе: и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.

М И҆́маши сѣдѣ́ти на прⷭ҇то́лѣ, сотвори́вый сло́вомъ нб҃о и҆ зе́млю: и҆́мамы всѝ предста́ти, повѣ́дающе тебѣ̀ грѣхѝ на́шѧ. пре́жде днѐ ѻ҆́нагѡ, въ покаѧ́нїи мѧ̀ прїимѝ: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Хвали́те гдⷭ҇а, всѝ ꙗ҆зы́цы: похвали́те є҆го̀, всѝ лю́дїе.

Н При́зри ѻ҆́комъ бл҃госе́рдымъ, и҆ бꙋ́ди мнѣ̀ млⷭ҇тивъ, є҆ди́не сп҃се: то́ки и҆сцѣле́нїй да́рꙋй бѣ́днѣй мое́й и҆ ѡ҆каѧ́ннѣй дꙋшѝ, и҆змы́й ѿ скве́рны дѣ́лъ мои́хъ, да воспою̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.

Ѯ Мечи̑ ᲂу҆гото́ва велїа́ръ, ᲂу҆лови́ти тща́сѧ смире́ннꙋю мою̀ дꙋ́шꙋ: чꙋ́жда содѣ́ла мѧ просвѣще́нїѧ ра́зꙋма лица̀ твоегѡ̀, ще́дре. держа́вный въ крѣ́пости, ѿ сосꙋ́дѡвъ сегѡ̀ и҆схити́ мѧ: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.

О Ве́сь страсте́мъ порабо́тихсѧ, ѡ҆ста́вивъ зако́нъ и҆ бж҃е́ствєннаѧ писа̑нїѧ. всего́ мѧ и҆сцѣлѝ, бл҃годѣ́телю, менє̀ ра́ди по мнѣ̀ бы́въ, бл҃же: ѡ҆брати́ мѧ, ще́дре, страсте́й потреби́телю: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Поми́лꙋй на́съ, гдⷭ҇и, поми́лꙋй на́съ: ꙗ҆́кѡ помно́гꙋ и҆спо́лнихомсѧ ᲂу҆ничиже́нїѧ, наипа́че напо́лнисѧ дꙋша̀ на́ша поноше́нїѧ гобзꙋ́ющихъ и҆ ᲂу҆ничиже́нїѧ го́рдыхъ.

П Блꙋдни́ца слеза́ми ѡ҆моча́етъ пречⷭ҇тѣи и҆ чтⷭ҇нѣ́и но́зѣ твоѝ, всѧ̑ ᲂу҆вѣщава́ющи притека́ти и҆ прїима́ти разрѣше́нїе согрѣше́нїй свои́хъ. тоѧ̀ вѣ́рꙋ пода́ждь и҆ мнѣ̀, сп҃се, вопи́ти тебѣ̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Припѣва́емъ къ про́чымъ:

Сла́ва тебѣ̀, бж҃е на́шъ, сла́ва тебѣ̀.

Р Скве́рнꙋ дꙋшѝ моеѧ̀ ѡ҆чи́сти, менє̀ ра́ди ѡ҆бнища́вый и҆ младе́нствовавый пло́тїю, ка́плю млⷭ҇ти твоеѧ̀ низпосла́въ немощно́мꙋ и҆ сокрꙋше́нномꙋ, хрⷭ҇тѐ: ѿмы́й ѿ скве́рны, ᲂу҆врачꙋ́й недꙋ́гꙋюща: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

С Оу҆твердѝ, влⷣко, дꙋ́шꙋ мою̀, къ тебѣ̀ притека́ти и҆ тебѣ̀ рабо́тати при́снѡ: покро́въ бо мо́й є҆сѝ и҆ храни́тель, и҆ застꙋпле́нїе и҆ по́мощь. сподо́би мѧ̀, бж҃їй сло́ве, вопи́ти со дерзнове́нїемъ: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

Т Стѣна̀ нерꙋши́маѧ бꙋ́ди на́мъ, і҆и҃се сп҃се и҆ млⷭ҇тивый бж҃е, нра̑вы бо и҆ дѣ́лы прельсти́тельными падо́хомъ: но возста́ви ꙗ҆́кѡ бл҃годѣ́тель созда́нїе, и҆ примири́сѧ ꙗ҆́кѡ ще́дръ. гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

У Сы́нъ блꙋ́дный бы́хъ: расточи́въ бога́тство, гла́домъ ны́нѣ и҆стаѧва́ю. под̾ кро́въ тво́й прибѣга́ю, ꙗ҆́коже ѻ҆́наго прїими́ мѧ, ѻ҆́ч҃е бл҃гі́й, и҆ прича́стника трапе́зы сподо́би, вопи́ти тебѣ̀: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

Ф За́вистїю изве́рже первозда́ннаго и҆з̾ раѧ̀ ѕлонача́льникъ: разбо́йникъ же рекі́й на дре́вѣ, помѧнѝ, прїѧ́тъ ра́й. и҆ а҆́зъ вѣ́рою и҆ стра́хомъ вопїю́ ти: помѧни́ мѧ, гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

Х Рꙋ́кꙋ мѝ прострѝ ꙗ҆́кѡ петро́ви, и҆ возведѝ и҆з̾ глꙋбины̀, бж҃е: бл҃года́ть и҆ млⷭ҇ть мѝ пода́ждь, мл҃твами всенепоро́чныѧ мт҃ре, тебѐ ро́ждшїѧ безсѣ́меннѡ, и҆ ст҃ы́хъ твои́хъ всѣ́хъ. гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сті́хъ: Сла́ва тебѣ̀, бж҃е на́шъ, сла́ва тебѣ̀.

Ѱ Пою́ща прїими́ мѧ на всѧ́къ де́нь, а҆́гнче взе́млѧй грѣ́хъ мо́й. дꙋ́шꙋ и҆ тѣ́ло моѐ всецѣ́льнѡ въ рꙋ́цѣ твоѝ предлага́ю, и҆ въ нощѝ и҆ во днѝ до́лгꙋ вопїю́ ти: гдⷭ҇и, пре́жде да́же до конца̀ не поги́бнꙋ, сп҃си́ мѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Ѡ Ѽ неизрече́ннагѡ твоегѡ̀ бл҃госе́рдїѧ, пребл҃гі́й: неѕло́бивый гдⷭ҇и! ѽ безгрѣ́шный и҆ ще́дрый! не ѿри́ни менє̀ ѿ лица̀ твоегѡ̀, ꙗ҆́кѡ да и҆ а҆́зъ бл҃года́рственнѡ, ра́дꙋѧсѧ и҆ поѧ̀,вопїю́ ти: гдⷭ҇и, пре́жде да́же до конца̀ не поги́бнꙋ, сп҃си́ мѧ.

И҆ ны́нѣ, бг҃оро́диченъ:

Ѽ неизрече́ннагѡ снисхожде́нїѧ! ѽ стра́ннагѡ ржⷭ҇тва̀ преди́вности! ѽ ка́кѡ дв҃а млⷣнца тѧ̀ но́ситъ во ѡ҆б̾ѧ́тїихъ свои́хъ творца̀ и҆ бг҃а! и҆з̾ неѧ̀ воплоти́тисѧ и҆зво́ливый, бл҃годѣ́телю, гдⷭ҇и, пре́жде да́же до конца̀ не поги́бнꙋ, сп҃си́ мѧ.

Вхо́дъ. Свѣ́те ти́хїй: Прокі́менъ, ѱало́мъ ч҃г. Гла́съ д҃: Бг҃ъ ѿмще́нїй гдⷭ҇ь, бг҃ъ ѿмще́нїй, не ѡ҆бинꙋ́лсѧ є҆́сть. Сті́хъ: Вознеси́сѧ, сꙋдѧ́й землѝ, возда́ждь воздаѧ́нїе гѡ́рдымъ.

Бытїѧ̀ чте́нїе. [Глава̀ з҃і, ст. а҃-ѳ҃].

Бы́сть а҆вра́мꙋ лѣ́тъ де́вѧтьдесѧтъ де́вѧть: и҆ ꙗ҆ви́сѧ гдⷭ҇ь а҆вра́мꙋ, и҆ речѐ є҆мꙋ̀: а҆́зъ є҆́смь бг҃ъ тво́й, бл҃гоꙋгожда́й предо мно́ю, и҆ бꙋ́ди непоро́ченъ: и҆ положꙋ̀ завѣ́тъ мо́й междꙋ̀ мно́ю и҆ междꙋ̀ тобо́ю, и҆ ᲂу҆мно́жꙋ тѧ̀ ѕѣлѡ̀. И҆ падѐ а҆вра́мъ на лицы̀ свое́мъ, и҆ речѐ є҆мꙋ̀ бг҃ъ, глаго́лѧ: и҆ а҆́зъ, сѐ завѣ́тъ мо́й съ тобо́ю, и҆ бꙋ́деши ѻ҆те́цъ мно́жества ꙗ҆зы́кѡвъ. И҆ не нарече́тсѧ ктомꙋ̀ и҆́мѧ твоѐ а҆вра́мъ, но бꙋ́детъ и҆́мѧ твоѐ а҆враа́мъ: ꙗ҆́кѡ ѻ҆тца̀ мно́гихъ ꙗ҆зы́кѡвъ положи́хъ тѧ̀. И҆ возращꙋ́ тѧ ѕѣлѡ̀ ѕѣлѡ̀, и҆ положꙋ́ тѧ въ наро́ды, и҆ ца́рїе и҆з̾ тебє̀ и҆зы́дꙋтъ. И҆ поста́влю завѣ́тъ мо́й междꙋ̀ мно́ю и҆ междꙋ̀ тобо́ю, и҆ междꙋ̀ сѣ́менемъ твои́мъ по тебѣ̀ въ ро́ды и҆́хъ, въ завѣ́тъ вѣ́ченъ, да бꙋ́дꙋ тебѣ̀ бг҃ъ, и҆ сѣ́мени твоемꙋ̀ по тебѣ̀. И҆ да́мъ тебѣ̀ и҆ сѣ́мени твоемꙋ̀ по тебѣ̀ зе́млю, въ не́йже ѡ҆бита́еши, всю̀ зе́млю ханаа́ню во ѡ҆держа́нїе вѣ́чное, и҆ бꙋ́дꙋ и҆̀мъ бг҃ъ. И҆ речѐ бг҃ъ ко а҆враа́мꙋ: ты́ же завѣ́тъ мо́й соблюде́ши, ты̀ и҆ сѣ́мѧ твоѐ по тебѣ̀ въ ро́ды и҆́хъ.

Прокі́менъ, ѱало́мъ ч҃є, гла́съ д҃: Воспо́йте гдⷭ҇еви пѣ́снь но́вꙋ. Сті́хъ: Воспо́йте гдⷭ҇еви,бл҃гослови́те и҆́мѧ є҆гѡ̀.

При́тчей чте́нїе. [Глава̀ є҃і, ст. к҃-л҃г: глава̀ ѕ҃і, ст. а҃-ѳ҃].

Сы́нъ премꙋ́дръ весели́тъ ѻ҆тца̀: сы́нъ же безꙋ́менъ раздража́етъ ма́терь свою̀. Несмы́сленнагѡ стєзѝ скꙋ̑дны ᲂу҆ма̀: мꙋ́жъ же разꙋ́менъ и҆справлѧ́ѧ хо́дитъ. Ѿлага́ютъ помышлє́нїѧ не чтꙋ́щїи со́нмищъ: въ сердца́хъ же совѣ́тныхъ пребыва́етъ совѣ́тъ. Не послꙋ́шаетъ ѕлы́й є҆гѡ̀, нижѐ рече́тъ поле́зно что̀ и҆ добро̀ ѻ҆́бщемꙋ. Пꙋтїѐ живота̀ помышлє́нїѧ разꙋ́мнагѡ, да ᲂу҆клони́всѧ ѿ а҆́да сп҃се́тсѧ. До́мы досади́телей разорѧ́етъ гдⷭ҇ь: ᲂу҆тверди́ же предѣ́лъ вдови́цы. Ме́рзость гдⷭ҇еви по́мыслъ непра́ведный: чи́стыхъ же глаго́лы че́стни. Гꙋби́тъ себѐ мздои́мецъ: ненави́дѧй же дарѡ́въ прїѧ̑тїѧ сп҃се́тсѧ. Ми́лостынѧми и҆ вѣ́рами ѡ҆чища́ютсѧ грѣсѝ: стра́хомъ же гдⷭ҇нимъ ᲂу҆клонѧ́етсѧ всѧ́къ ѿ ѕла̀. Сердца̀ пра́ведныхъ поꙋча́ютсѧ вѣ́рѣ: ᲂу҆ста́ же нечести́выхъ ѿвѣща́ютъ ѕла̑ѧ. Прїѧ́тни пред̾ гдⷭ҇емъ пꙋтїѐ мꙋже́й пра́ведныхъ, и҆́миже и҆ вразѝ дрꙋ́зи быва́ютъ.Дале́че ѿстои́тъ бг҃ъ ѿ нечести́выхъ: мл҃твы же пра́ведныхъ послꙋ́шаетъ. Лꙋ́чше ма́лое прїѧ́тїе съ пра́вдою, не́жели мнѡ́гаѧ жи̑та съ непра́вдою. Се́рдце мꙋ́жа да мы́слитъ пра́вєднаѧ, да ѿ бг҃а и҆спра́вѧтсѧ стѡпы̀ є҆гѡ̀. Ви́дѧщее ѻ҆́ко дѡ́браѧ весели́тъ се́рдце: сла́ва же бл҃га́ѧ ᲂу҆тꙋчнѧ́етъ кѡ́сти. Слꙋ́шаѧй ѡ҆бличе́нїй живота̀ посредѣ̀ премꙋ́дрыхъ водвори́тсѧ. И҆́же ѿмета́етъ наказа́нїе, ненави́дитъ себѐ: соблюда́ѧй же ѡ҆бличє́нїѧ лю́битъ свою̀ дꙋ́шꙋ. Стра́хъ гдⷭ҇ень наказа́нїе и҆ премꙋ́дрость, и҆ нача́ло сла́вы ѿвѣща́етъ є҆́й: [пред̾и́детъ же смирє́ннымъ сла́ва.] Человѣ́кꙋ предложе́нїе се́рдца: и҆ ѿ гдⷭ҇а ѿвѣ́тъ ѧ҆зы́ка. Всѧ̑ дѣла̀ смире́ннагѡ ꙗ҆влє́нна пред̾ бг҃омъ: и҆ ᲂу҆крѣплѧ́ѧй дꙋ́хи гдⷭ҇ь. Прибли́жи къ гдⷭ҇ꙋ дѣла̀ твоѧ̑, и҆ ᲂу҆твердѧ́тсѧ помышлє́нїѧ твоѧ̑. Всѧ̑ содѣ́ла гдⷭ҇ь себє̀ ра́ди: нечести́вїи же въ де́нь ѕо́лъ поги́бнꙋтъ. Нечи́стъ пред̾ бг҃омъ всѧ́къ высокосе́рдый: въ рꙋ́кꙋ же рꙋ́цѣ влага́ѧй непра́веднѡ, не ѡ҆безвини́тсѧ. Нача́ло пꙋтѝ бл҃га, є҆́же твори́ти пра́вєднаѧ, прїѧ̑тна же пред̾ бг҃омъ па́че, не́жели жре́ти жє́ртвы. И҆ща́й гдⷭ҇а ѡ҆брѧ́щетъ ра́зꙋмъ съ пра́вдою: пра́вѣ же и҆́щꙋщїи є҆гѡ̀, ѡ҆брѧ́щꙋтъ ми́ръ. Всѧ̑ дѣла̀ гдⷭ҇нѧ съ пра́вдою: храни́тсѧ же нечести́вый на де́нь ѕо́лъ.

Та́же, Да и҆спра́витсѧ мл҃тва моѧ̀: И҆ про́чее послѣ́дованїе преждеѡсщ҃е́нныхъ. А҆́ще ли не бꙋ́детъ преждеѡсщ҃е́нныѧ, на Гдⷭ҇и воззва́хъ, пое́мъ трїѡ́ди подо́бны трѝ: и҆ стїхи̑ры к҃д, вели́кагѡ канѡ́на. На стїхо́внѣ самогла́сенъ днѐ, два́жды, и҆ мч҃нченъ. Сла́ва, и҆ ны́нѣ, бг҃оро́диченъ: и҆ про́чее. Прокі́менъ. И҆ чтє́нїѧ.

На трапе́зѣ разрѣша́емъ на є҆ле́й и҆ вїна̀ причаща́емсѧ, трꙋда̀ ра́ди бдѣ́ннагѡ, хотѧ́щагѡ бы́ти.Внима́ющїи же сп҃сти́сѧ воздержа́нїю прилѣжа́тъ: мно́жайшїи же постꙋ̀ нелицемѣ́рнꙋ.

Повече́рїе же глаго́лемъ ма́лое въ ке́ллїахъ без̾ покло́нѡвъ. По трист҃о́мъ конда́къ а҆ндре́ева канѡ́на. Та́кожде и҆ полꙋ́нощницꙋ.

Въ четверто́къ пѧ́тыѧ седми́цы ст҃ы́хъ постѡ́въ,

кле́плетъ въ д҃-й ча́съ но́щи. И҆ собра́вшымсѧ на́мъ въ цр҃ковь, быва́етъ нача́ло ѿ і҆ере́а, по ѡ҆бы́чаю. И҆ глаго́лемъ: Цр҃ю̀ нбⷭ҇ный: Трист҃о́е, и҆ Ѻ҆́ч҃е на́шъ: Гдⷭ҇и, поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: И҆ два̀ ѱалма̑, ѳ҃і и҆ к, и҆ ѡ҆бы̑чныѧ тропарѝ: и҆ є҆ктенїа̀. И҆ посе́мъ глаго́лемъ шестоѱа́лмїе, и҆ по ѱалмѣ́хъ пое́мъ А҆ллилꙋ́їа, и҆ тро́ичны гла́са, ꙗ҆́коже ѡ҆бы́чай. И҆ стїхосло́вимъ каѳі́смꙋ є҆ди́нꙋ и҃-ю. Та́же глаго́лемъ сѣда́льны ѻ҆смогла́сника. И чте́мъ житїѐ прпⷣбныѧ марі́и, на двѣ̀ статїи̑. Та́же ѱало́мъ н҃. Пѣ́сней не стїхосло́вимъ. И҆ а҆́бїе начина́емъ вели́кїй канѡ́нъ ко́снѡ, и҆ съ сокрꙋше́ннымъ се́рдцемъ и҆ гла́сомъ, творѧ́ще на кі́йждо тропа́рь мета̑нїѧ трѝ.

Канѡ́нъ вели́кїй, творе́нїе ст҃а́гѡ а҆ндре́а кри́тскагѡ і҆ерⷭ҇ли́мскагѡ.

Гла́съ ѕ҃.

Пѣ́снь а҃.

І҆рмо́съ: Помо́щникъ и҆ покрови́тель бы́сть мнѣ̀ во сп҃се́нїе се́й мо́й бг҃ъ, и҆ просла́влю є҆го̀: бг҃ъ ѻ҆тца̀ моегѡ̀, и҆ вознесꙋ̀ є҆го̀: сла́вно бо просла́висѧ:

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿкꙋ́дꙋ начнꙋ̀ пла́кати ѡ҆ дѣѧ́нїихъ ѡ҆каѧ́ннагѡ житїѧ̀ моегѡ̀; и҆лѝ ко́е положꙋ̀ нача́ло ны́нѣшнемꙋ рыда́нїю; но ты̀, хрⷭ҇тѐ, ꙗ҆́кѡ бл҃госе́рдъ, да́ждь мѝ прегрѣше́нїй ѡ҆ставле́нїе.

Грѧдѝ, ѡ҆каѧ́ннаѧ дꙋшѐ, съ пло́тїю твое́ю, и҆сповѣ́ждьсѧ зижди́телю всѣ́хъ, и҆ ѿста́ни коне́чнѣ ѿ пре́жнѧгѡ неразꙋ́мїѧ, и҆ принесѝ бг҃ꙋ въ покаѧ́нїи сле́зы.

Первозда́нномꙋ а҆да́мꙋ престꙋпле́нїемъ поревнова́въ, позна́хъ себѐ ѿ бг҃а и ѿ присносꙋ́щнагѡ црⷭ҇твїѧ и҆ сла́дости ѡ҆бнаже́на, грѣ̑хъ ра́ди мои́хъ.

Оу҆вы̀ мнѣ̀, ѡ҆каѧ́ннаѧ дꙋшѐ! что̀ ᲂу҆подо́биласѧ є҆сѝ пе́рвѣй є҆́ѵѣ; ви́дѣла бо є҆сѝ ѕлѣ̀, и҆ ᲂу҆ѧзви́ласѧ є҆сѝ го́рцѣ, и҆ коснꙋ́ласѧ є҆сѝ дре́ва и҆ вкꙋси́ла є҆сѝ де́рзостнѡ неразꙋ́мныѧ снѣ́ди.

Вмѣ́стѡ є҆́ѵы чꙋ́вственныѧ, мы́сленнаѧ мѝ бы́сть є҆́ѵа, во пло́ти страстны́й по́мыслъ, показꙋ́ѧй сла̑дкаѧ, и҆ во вкꙋше́нїи при́снѡ го́рькимъ напаѧ́ѧй.

Досто́йно и҆з̾ є҆де́ма и҆згна́нъ бы́сть а҆да́мъ, ꙗ҆́кѡ не сохрани́вый є҆ди́ныѧ твоеѧ̀, сп҃се, за́повѣди: а҆́зъ же что̀ постраждꙋ̀, ѿмета́ѧ всегда̀ живѡтвѡ́рнаѧ твоѧ̑ словеса̀;

Ка́їново преше́дъ ᲂу҆бі́йство, произволе́нїемъ бы́хъ ᲂу҆бі́йца со́вѣсти дꙋше́внѣй, ѡ҆живи́въ пло́ть и҆ воева́въ на ню̀ лꙋка́выми мои́ми дѣѧ́ньми.

А҆́велевѣ пра́вдѣ не ᲂу҆подо́бихсѧ, і҆и҃се, дарѡ́въ тебѣ̀ прїѧ́тныхъ не принесо́хъ когда̀, ни дѣѧ́нїй бж҃е́ственныхъ, ни же́ртвы чи́стыѧ, ни житїѧ̀ непоро́чнагѡ.

Ꙗ҆́кѡ ка́їнъ и҆ мы̀, дꙋшѐ ѡ҆каѧ́ннаѧ, всѣ́хъ содѣ́телю дѣѧ̑нїѧ сквє́рнаѧ и҆ же́ртвꙋ поро́чнꙋю и҆ непотре́бное житїѐ принесо́хомъ вкꙋ́пѣ: тѣ́мже и҆ ѡ҆сꙋди́хомсѧ.

Бре́нїе, ꙗ҆́кѡ скꙋде́льникъ, живосозда́въ, вложи́лъ є҆сѝ въ мѧ̀ пло́ть и҆ кѡ́сти, и҆ дыха́нїе и҆ жи́знь: но, ѽ тво́рче мо́й, и҆зба́вителю мо́й и҆ сꙋдїѐ, ка́ющасѧ прїими́ мѧ.

И҆сповѣ́даю тѝ, сп҃се, грѣхѝ, ꙗ҆̀же содѣ́ѧхъ, и҆ дꙋшѝ и҆ тѣ́ла моегѡ̀ ꙗ҆́звы, ꙗ҆̀же внꙋ́трь ᲂу҆бі́йственнїи по́мыслы разбо́йнически на мѧ̀ возложи́ша.

А҆́ще и҆ согрѣши́хъ, сп҃се, но вѣ́мъ, ꙗ҆́кѡ чл҃вѣколю́бецъ є҆сѝ, наказꙋ́еши ми́лостивнѡ, и҆ милосе́рдствꙋеши те́плѣ: слезѧ́ща зри́ши, и҆ притека́еши ꙗ҆́коже ѻ҆ц҃ъ, призыва́ѧ блꙋ́днаго.

Пове́ржена менѐ пред̾ враты̀ твои́ми, сп҃се, понѐ на ста́рости не ѿри́ни во а҆́дъ тща̀, но пре́жде конца̀, ꙗ҆́кѡ чл҃вѣколю́бецъ, да́ждь мѝ прегрѣше́нїй ѡ҆ставле́нїе.

Въ разбо́йники впады́й а҆́зъ є҆́смь помышле́ньми мои́ми, ве́сь ѿ ни́хъ ᲂу҆ѧзви́хсѧ ны́нѣ, и҆ и҆спо́лнихсѧ ра́нъ: но са́мъ мѝ предста́въ, хрⷭ҇тѐ сп҃се, и҆сцѣлѝ.

Сщ҃е́нникъ мѧ̀ пре́жде ви́дѣвъ мимои́де, и҆ леѵі́тъ ви́дѧ въ лю́тыхъ на́га презрѣ̀: но ты̀, и҆з̾ мр҃і́и возсїѧ́вый і҆и҃се, предста́въ ᲂу҆ще́дри мѧ̀.

А҆́гнче бж҃їй, взе́млѧй грѣхѝ всѣ́хъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдъ, да́ждь мѝ сле́зы ᲂу҆миле́нїѧ.

Покаѧ́нїѧ вре́мѧ: прихождꙋ́ къ тебѣ̀ созда́телю моемꙋ̀, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдъ, да́ждь мѝ сле́зы ᲂу҆миле́нїѧ.

Не возгнꙋша́йсѧ менє̀, сп҃се, не ѿри́ни ѿ твоегѡ̀ лица̀, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдъ, да́ждь мѝ прегрѣше́нїй ѡ҆ставле́нїе.

Вѡ́льнаѧ, сп҃се, и҆ невѡ́льнаѧ прегрѣшє́нїѧ моѧ̑, ꙗ҆влє́ннаѧ и҆ сокровє́ннаѧ, и҆ вѣ́дѡмаѧ и҆ невѣ́дѡмаѧ всѧ̑, прости́въ ꙗ҆́кѡ бг҃ъ, ѡ҆чи́сти и҆ сп҃си́ мѧ.

Ѿ ю҆́ности, хрⷭ҇тѐ, за́повѣди твоѧ̑ престꙋпи́хъ, небрегі́й, лѣнѧс́ѧ, стра́стнѡ преидо́хъ всѐ житїѐ. тѣ́мже зовꙋ́ ти, сп҃се: понѐ при концѣ̀ сп҃си́ мѧ.

Бога́тство моѐ, сп҃се, расточи́въ въ блꙋдѣ̀, пꙋ́стъ є҆́смь плодѡ́въ бл҃гочести́выхъ, гла́денъ же зовꙋ̀: ѻ҆́ч҃е щедро́тъ, предвари́въ ты́ мѧ ᲂу҆ще́дри.

Тебѣ̀ припа́даю, і҆и҃се: согрѣши́хъ тѝ, бꙋ́ди млⷭ҇тивъ мѝ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рдый бг҃ъ, ка́ющасѧ прїимѝ мѧ.

Не вни́ди со мно́ю въ сꙋ́дъ, носѧ̀ моѧ̑ дѣѧ̑нїѧ, словеса̀ и҆зыскꙋ́ѧ, и҆ ѡ҆блича́ѧ стремлє́нїѧ: но въ щедро́тахъ твои́хъ презира́ѧ моѧ̑ лю̑таѧ, сп҃си́ мѧ, всеси́льне.

И҆́ный канѡ́нъ, прпⷣбныѧ ма́тере на́шеѧ марі́и є҆гѵ́петскїѧ, въ то́йже гла́съ и҆ і҆рмо́съ. [Є҆гѡ́же краестро́чїе: Ты̀, прпⷣбнаѧ марі́е, помога́й.]

Запѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Ты́ да́ждь мѝ, марі́е, свѣтоза́рнꙋю бл҃года́ть, ѿ бж҃е́ственнагѡ свы́ше промышле́нїѧ, и҆збѣжа́ти ѡ҆мраче́нїѧ страсте́й и҆ пѣ́ти ᲂу҆се́рднѡ кра̑сныѧ пѡ́вѣсти житїѧ̀ твоегѡ̀.

Прикло́ньшисѧ къ бж҃е́ствєннымъ зако́нѡмъ хрⷭ҇та̀, къ семꙋ̀ пристꙋпи́ла є҆сѝ, сла́достей неꙋдержи̑маѧ стремлє́нїѧ ѡ҆ста́вивши, и҆ всѧ́кꙋю добродѣ́тель ꙗ҆́кѡ є҆ди́нꙋ всебл҃гоговѣ́йнѡ и҆спра́вила є҆сѝ.

А҆ндре́ю: Прпⷣбне ѻ҆́тче а҆ндре́е, молѝ бг҃а ѡ҆ на́съ.

Мл҃твами твои́ми а҆ндре́е, и҆зба́ви на́съ ѿ страсте́й безче́стныхъ, и҆ црⷭ҇твїѧ хрⷭ҇то́ва ѻ҆́бщники ны́нѣ покажѝ, вѣ́рою и҆ любо́вїю воспѣва́ющыѧ тѧ̀, сла́вне, мо́лимсѧ.

Сла́ва, трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ бл҃госе́рда, да́ждь мѝ сле́зы ᲂу҆миле́нїѧ.

Бг҃оро́диченъ: Бцⷣе, наде́ждо и҆ предста́тельство тебѐ пою́щихъ, возьмѝ ѿ менє̀ бре́мѧ тѧ́жкое грѣхо́вное, и҆ ꙗ҆́кѡ влⷣчца чтⷭ҇аѧ, ка́ющасѧ прїими́ мѧ.

Пѣ́снь в҃.

І҆рмо́съ: Вонмѝ, нб҃о, и҆ возглаго́лю, и҆ воспою̀ хрⷭ҇та̀, ѿ дв҃ы пл҃тїю прише́дшаго.

Вонмѝ, нб҃о, и҆ возглаго́лю: землѐ, слы́ши гла́съ, ка́ющїйсѧ бг҃ꙋ и҆ воспѣва́ющїй є҆го̀.

Вонми́ ми, бж҃е сп҃се мо́й, млⷭ҇тивнымъ твои́мъ ѻ҆́комъ, и҆ прїимѝ моѐ те́плое и҆сповѣ́данїе.

Согрѣши́хъ па́че всѣ́хъ человѣ̑къ, є҆ди́нъ согрѣши́хъ тебѣ̀: но ᲂу҆ще́дри ꙗ҆́кѡ бг҃ъ, сп҃се,творе́нїе твоѐ.

Бꙋ́рѧ ѕлы́хъ ѡ҆бдержи́тъ мѧ̀, бл҃госе́рде гдⷭ҇и: но ꙗ҆́кѡ петрꙋ̀, и҆ мнѣ̀ рꙋ́кꙋ прострѝ.

Сле́зы блꙋдни́цы и҆ а҆́зъ предлага́ю, ще́дре: млⷭ҇тивъ бꙋ́ди мѝ, сп҃се, бл҃госе́рдїемъ твои́мъ.

Ѡ҆черни́хъ дꙋше́внꙋю красотꙋ̀ сластьми страсте́й̀, и҆ всѧ́чески ве́сь ᲂу҆́мъ пе́рсть сотвори́хъ.

Раздра́хъ ны́нѣ ѡ҆де́ждꙋ мою̀ пе́рвꙋю, ю҆́же мѝ и҆зтка̀ зижди́тель и҆з̾ нача́ла, и҆ ѿтꙋ́дꙋ лежꙋ̀ на́гъ.

Ѡ҆блеко́хсѧ въ раздра́ннꙋю ри́зꙋ, ю҆́же и҆зтка́ ми ѕмі́й совѣ́томъ, и҆ стыждꙋ́сѧ.

Воззрѣ́хъ на красотꙋ̀ дре́ва, и҆ прельсти́хсѧ ᲂу҆мо́мъ: и҆ ѿтꙋ́дꙋ лежꙋ̀ на́гъ, и҆ срамлѧ́юсѧ.

Дѣ́лаша на хребтѣ̀ мое́мъ всѝ нача̑льницы страсте́й, продолжа́юще на мнѣ̀ беззако́нїе и҆́хъ.

Погꙋби́хъ первозда́ннꙋю добро́тꙋ и҆ бл҃голѣ́пїе моѐ: и҆ ны́нѣ лежꙋ̀ на́гъ, и҆ стыждꙋ́сѧ.

Сшива́ше кѡ́жныѧ ри̑зы грѣ́хъ и҆ мнѣ̀, ѡ҆бнажи́въ мѧ̀ ѿ пе́рвыѧ бг҃отка́нныѧ ѡ҆де́жды.

Ѡ҆бложе́нъ є҆́смь ѡ҆дѣѧ́нїемъ стꙋда̀, ꙗ҆́коже ли́ствїемъ смоко́внымъ, во ѡ҆бличе́нїе мои́хъ самовла́стныхъ страсте́й.

Ѡ҆дѣ́ѧхсѧ въ ри́зꙋ сра́мнꙋю и҆ ѡ҆кровавле́ннꙋю стꙋ́днѡ, тече́нїемъ стра́стнагѡ и҆ любосла́стнагѡ житїѧ̀.

Ѡ҆скверни́хъ ри́зꙋ пло́ти моеѧ̀, сп҃се, и҆ ѡ҆калѧ́хъ є҆́же по ѡ҆́бразꙋ и҆ по подо́бїю.

Впадо́хъ въ па́гꙋбꙋ стра́сте́й и҆ въ веще́ственное тлѣ́нїе, и҆ ѿто́лѣ ны́нѣ вра́гъ мнѣ̀ досажда́етъ.

Любове́щное и҆ любостѧжа́тельное житїѐ нестѧжа́нїю предпоче́тъ, ны́нѣ, сп҃се, тѧ́жкимъ бре́менемъ ѡ҆бложе́нъ є҆́смь.

Оу҆краси́хъ пло́ти и҆стꙋка́нъ пе́стрымъ ѡ҆дѣѧ́нїемъ скве́рныхъ помышле́нїй, и҆ ѡ҆сꙋжда́юсѧ.

Ѡ҆ внѣ́шнемъ бл҃гоꙋкраше́нїи є҆ди́номъ прилѣ́жнѡ попеко́хсѧ, презрѣ́въ внꙋ́треннюю бг҃оѡбра́знꙋю ски́нїю.

Воѡбрази́въ во мнѣ̀ страсте́й без̾ѡбра́зїе, любосла́стными стремле́ньми ѡ҆скверни́хъ ᲂу҆ма̀ красотꙋ̀.

Погребо́хъ страстьмѝ добро́тꙋ пе́рвагѡ ѡ҆́браза, ю҆́же, сп҃сѐ, ꙗ҆́коже нѣ́когда дра́хмꙋ, взыска́въ ѡ҆брѧ́щи.

Согрѣши́хъ, ꙗ҆́коже блꙋдни́ца вопїю́ ти: є҆ди́нъ согрѣши́хъ тебѣ̀: ꙗ҆́коже мѵ́ро прїимѝ, сп҃се, и҆ моѧ̑ сле́зы.

Поползо́хсѧ ꙗ҆́кѡ дв҃дъ невозде́ржнѡ, и҆ ѡ҆скверни́хсѧ: но ѡ҆мы́й и҆ менѐ, сп҃се, слеза́ми мои́ми.

Млⷭ҇тивъ бꙋ́ди, ꙗ҆́коже мыта́рь вопїю́ ти, сп҃се: млⷭ҇тивъ бꙋ́ди мѝ: никто́же бо ѿ сꙋ́щихъ и҆з̾ а҆да́ма, ꙗ҆́коже а҆́зъ, согрѣшѝ тебѣ̀.

Ни сле́зъ, нижѐ покаѧ́нїѧ и҆́мамъ, нижѐ ᲂу҆миле́нїѧ: са́мъ мѝ сїѧ̑ сп҃се, ꙗ҆́кѡ бг҃ъ да́рꙋй.

Две́рь твою̀ не затворѝ мнѣ̀ тогда̀, гдⷭ҇и, гдⷭ҇и: но сїю̀ ѿве́рзи мѝ ка́ющемꙋсѧ тебѣ̀.

Чл҃вѣколю́бче, хотѧ́й всѣ̑мъ сп҃сти́сѧ, ты̀ воззови́ мѧ, и҆ ꙗ҆́кѡ бл҃гъ прїимѝ мѧ ка́ющасѧ.

Оу҆слы́ши воздыха̑нїѧ дꙋшѝ моеѧ̀, сп҃се, и҆ прїимѝ ка̑пли ѻ҆́чїю моє́ю, и҆ сп҃си́ мѧ.

Бг҃оро́диченъ: Пречⷭ҇таѧ бцⷣе дв҃о, є҆ди́на всепѣ́таѧ, молѝ прилѣ́жнѡ сп҃сти́сѧ на́мъ.

И҆́ный.

І҆рмо́съ: Ви́дите, ви́дите, ꙗ҆́кѡ а҆́зъ є҆́смь бг҃ъ, ма́ннꙋ ѡ҆дожди́вый и҆ во́дꙋ и҆з̾ ка́мене и҆сточи́вый дре́вле въ пꙋсты́нѣ лю́демъ мои̑мъ, десни́цею є҆ди́ною и҆ крѣ́постїю мое́ю.

Ви́дите, ви́дите, ꙗ҆́кѡ а҆́зъ є҆́смь бг҃ъ: слы́ши, дꙋшѐ моѧ̀, гдⷭ҇а вопїю́ща, и҆ ᲂу҆дали́сѧ ѿ пре́жнѧгѡ грѣха̀, и҆ бо́йсѧ ꙗ҆́кѡ сꙋдїѝ и҆ ꙗ҆́кѡ мздовозда́телѧ и҆ бг҃а.

Комꙋ̀ ᲂу҆подо́биласѧ є҆сѝ, многогрѣ́шнаѧ дꙋшѐ; ᲂу҆вы̀, пе́рвомꙋ ка́їнꙋ и҆ ламе́хꙋ ѻ҆́номꙋ, ꙗ҆́коже ка́менїемъ поби́вшаѧ тѣ́ло ѕлодѣ́йствы и҆ ᲂу҆би́вшаѧ ᲂу҆́мъ неразꙋ́мными стремле́ньми.

Всѧ̑, бы́вшыѧ пре́жде зако́на, проше́дши, ѽ дꙋшѐ, си́ѳꙋ не ᲂу҆подо́биласѧ є҆сѝ, ни є҆нѡ́сꙋ подража́ла є҆сѝ, ни є҆нѡ́хꙋ преложе́нїемъ, ни нѡ́еви: но ꙗ҆ви́ласѧ є҆сѝ скꙋ́дна жи́зни првⷣныхъ.

Є҆ди́на ѿве́рзла є҆сѝ хлѧ̑би гнѣ́ва бг҃а твоегѡ̀, дꙋшѐ моѧ̀, и҆ потопи́ла є҆сѝ, ꙗ҆́коже зе́млю, всю̀ пло́ть и҆ дѣѧ̑нїѧ и҆ житїѐ, и҆ пребыла̀ є҆сѝ внѣ̀ сп҃си́тельнагѡ ковче́га.

Мꙋ́жа ᲂу҆би́хъ въ ꙗ҆́звꙋ мнѣ̀ и҆ ю҆́ношꙋ въ стрꙋ́пъ, ламе́хъ рыда́ѧ вопїѧ́ше, ꙗ҆́коже рече́но є҆́сть: ты̀ же не трепе́щеши, ѽ дꙋшѐ моѧ̀, ѡ҆калѧ́вши пло́ть и҆ ᲂу҆́мъ ѡ҆скверни́вши.

Ѽ ка́кѡ поревнова́хъ ламе́хꙋ, дре́внемꙋ ᲂу҆бі́йцѣ, дꙋ́шꙋ ꙗ҆́кѡ мꙋ́жа, ᲂу҆́мъ ꙗ҆́кѡ ю҆́ношꙋ, тѣ́ло же моѐ ꙗ҆́кѡ бра́та ᲂу҆би́въ, ꙗ҆́кѡ ка́їнъ ᲂу҆бі́йца, любосла́стными стремле́ньми!

Сто́лпъ ᲂу҆мы́слила є҆сѝ созда́ти, ѽ дꙋшѐ, и҆ ᲂу҆твержде́нїе водрꙋзи́ти твои́ми похотьмѝ, а҆́ще не бы̀ зижди́тель смѣси́лъ совѣ́ты твоѧ̑ и҆ низве́рглъ на зе́млю ᲂу҆хищрє́нїѧ твоѧ̑.

Оу҆ѧ́звленъ, ра́ненъ бы́хъ: сѐ стрѣ́лы вра̑жїѧ и҆з̾ѧзви́вшыѧ мою̀ дꙋ́шꙋ и҆ тѣ́ло: сѐ стрꙋ́пи,гноє́нїѧ, повреждє́нїѧ вопїю́тъ ѡ҆ ра́нахъ самово́льныхъ мои́хъ страсте́й.

Ѡ҆дождѝ гдⷭ҇ь ѿ гдⷭ҇а ѻ҆́гнь нѣ́когда, беззако́нїе неи́стовствꙋющее содо́ма попали́въ: ты́ же, ѽ дꙋшѐ, вжегла̀ є҆сѝ ѻ҆́гнь гее́нскїй, въ не́мже и҆́маши го́рцѣ сожже́на бы́ти.

Разꙋмѣ́йте и҆ ви́дите, ꙗ҆́кѡ а҆́зъ є҆́смь бг҃ъ, и҆спыта́ѧй сердца̀ и҆ ᲂу҆мѣрѧ́ѧй мы̑сли, ѡ҆блича́ѧй дѣѧ̑нїѧ, и҆ попалѧ́ѧй грѣхѝ, и҆ сꙋдѧ́й си́рꙋ и҆ смире́нꙋ и҆ ни́щꙋ.

Марі́и: Просте́рла є҆сѝ рꙋ́цѣ твоѝ къ ще́дромꙋ бг҃ꙋ, марі́е, въ бе́зднѣ ѕѡ́лъ погрꙋжа́емаѧ: и҆ ꙗ҆́коже петрꙋ̀, чл҃вѣколю́бнѡ се́й рꙋ́кꙋ по́мощи прострѐ, твоегѡ̀ ѡ҆браще́нїѧ всѧ́чески и҆скі́й.

Марі́и: Всѣ́мъ ᲂу҆се́рдїемъ и҆ любо́вїю притекла̀ є҆сѝ ко хрⷭ҇тꙋ̀, ѿ пре́жнѧгѡ грѣхо́внагѡ пꙋтѝ ѿвра́щшисѧ, и҆ въ пꙋсты́нѧхъ непроходи́мыхъ пита́ющисѧ, и҆ тогѡ̀ бж҃е́ствєнныѧ за́пѡвѣди чи́стѣ соверша́ющи.

А҆ндре́ю: Ви́димъ, ви́димъ, ѽ дꙋшѐ, чл҃вѣколю́бїе бг҃а и҆ влⷣки. сегѡ̀ ра́ди пре́жде конца̀ томꙋ̀ со слеза́ми припаде́мъ, вопїю́ще: а҆ндре́а мл҃твами, сп҃се, поми́лꙋй на́съ.

Трⷪ҇ченъ: Безнача́льнаѧ, несозда́ннаѧ трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ,согрѣши́вша сп҃сѝ. твоѐ є҆́смь созда́нїе, не пре́зри: но пощадѝ мѧ и҆ и҆зба́ви ѿ ѻ҆́гненнагѡ ѡ҆сꙋжде́нїѧ.

Бг҃оро́диченъ: Пречⷭ҇таѧ влⷣчце, бг҃ороди́тельнице, наде́ждо къ тебѣ̀ прибѣга́ющихъ и҆ приста́нище сꙋ́щихъ въ бꙋ́ри! млⷭ҇тиваго и҆ созда́телѧ и҆ сн҃а твоего̀ ᲂу҆ми́лостиви и҆ мнѣ̀ мл҃твами твои́ми.

Пѣ́снь г҃.

І҆рмо́съ: На недви́жимѣмъ ка́мени за́повѣдей твои́хъ, хрⷭ҇тѐ, ᲂу҆твердѝ моѐ помышле́нїе.

Ѻ҆́гнь ѿ гдⷭ҇а нѣ́когда ѡ҆дожди́въ, зе́млю содо́мскꙋю пре́жде гдⷭ҇ь попалѝ.

На го́рꙋ спаса́йсѧ, дꙋшѐ, ꙗ҆́коже лѡ́тъ ѻ҆́ный, и҆ въ сигѡ́ръ ᲂу҆бѣга́й.

Бѣ́гай запале́нїѧ, ѽ дꙋшѐ, бѣ́гай содо́мскагѡ горѣ́нїѧ, бѣ́гай и҆стребле́нїѧ бжⷭ҇е́твеннагѡ пла́мене.

И҆сповѣ́даюсѧ тебѣ̀, сп҃се: согрѣши́хъ, согрѣши́хъ тѝ. но ѡ҆сла́би, ѡ҆ста́ви мѝ, ꙗ҆́кѡ бл҃госе́рдъ.

Согрѣши́хъ тебѣ̀ є҆ди́нъ а҆́зъ, согрѣши́хъ па́че всѣ́хъ, хрⷭ҇тѐ сп҃се: да не пре́зриши менє̀.

Ты̀ є҆сѝ па́стырь до́брый: взыщѝ менѐ а҆́гнца, и҆ заблꙋ́ждшагѡ да не пре́зриши менє̀.

Ты̀ є҆сѝ, сла́дкїй і҆и҃се, ты̀ є҆сѝ созда́тель мо́й: въ тебѣ̀, сп҃се, ѡ҆правда́юсѧ.

Трⷪ҇ченъ: Ѽ трⷪ҇це є҆ди́нице бж҃е! сп҃сѝ на́съ ѿ пре́лести, и҆ и҆скꙋше́нїй, и҆ ѡ҆бстоѧ́нїй.

Бг҃оро́диченъ: Ра́дꙋйсѧ, бг҃а прїи́мшаѧ ᲂу҆тро́бо: ра́дꙋйсѧ, прⷭ҇то́ле гдⷭ҇нь: ра́дꙋйсѧ, мт҃и жи́зни на́шеѧ.

И҆́ный.

І҆рмо́съ: Оу҆твердѝ, гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ гдⷭ҇ь.

И҆сто́чникъ жи́зни стѧжа́хъ тебѐ, сме́рти низложи́телѧ, и҆ вопїю́ ти ѿ се́рдца моегѡ̀ пре́жде конца̀: согрѣши́хъ, млⷭ҇тивъ бꙋ́ди и҆ сп҃си́ мѧ.

При нѡ́и блꙋ́дствовавшымъ подража́хъ, сп҃се, ѻ҆́нѣхъ наслѣ́дствовавъ ѡ҆сꙋжде́нїе, въ пото́пѣ погрꙋже́нїѧ.

Согрѣши́хъ, гдⷭ҇и, согрѣши́хъ тебѣ̀, млⷭ҇тивъ бꙋ́ди мѝ: нѣ́сть бо и҆́же согрѣшѝ въ человѣ́цѣхъ, є҆гѡ́же не превзыдо́хъ прегрѣше́ньми.

Ха́мꙋ ѻ҆́номꙋ ѻ҆тцеꙋбі́йцѣ подража́вши, дꙋшѐ, не покры́ла є҆сѝ сра́ма бли́жнѧгѡ, вспѧ́ть лице́мъ ѡ҆брати́вшисѧ.

Бл҃гослове́нїѧ си́мова не наслѣ́довала є҆сѝ, дꙋшѐ ѡ҆каѧ́ннаѧ: и҆ простра́нногѡ ѡ҆блада́нїѧ, ꙗ҆́коже і҆а́феѳъ, не прїѧ́ла є҆сѝ на землѝ ѡ҆ставле́нїѧ.

Ѿ землѝ харра́нскїѧ грѣха̀ и҆зы́ди, дꙋшѐ моѧ̀, грѧдѝ въ зе́млю точа́щꙋю присножи́зненное нетлѣ́нїе, ю҆́же а҆враа́мъ наслѣ́дствова.

Ѡ҆ а҆враа́мѣ слы́шала є҆сѝ, дꙋшѐ моѧ̀, дре́вле ѡ҆ста́вльшемъ зе́млю ѻ҆те́чества и҆ бы́вшемъ пресе́льницѣ: сегѡ̀ произволе́нїю подража́й.

Оу҆ дꙋ́ба мамврі́йскагѡ ᲂу҆гости́въ а҆́гг҃лы, патрїа́рхъ наслѣ́дствова по ста́рости лови́твꙋ ѡ҆бѣтова́нїѧ.

І҆саа́ка разꙋмѣ́вши, ѡ҆каѧ́ннаѧ дꙋшѐ моѧ̀, ꙗ҆́коже но́вꙋю же́ртвꙋ, та́инственнѡ всесожига́емꙋю гдⷭ҇еви, подража́й є҆гѡ̀ произволе́нїю.

Ѡ҆ і҆сма́илѣ и҆згна́ннѣмъ, ꙗ҆́кѡ рабы́нино порожде́нїе, слы́шала є҆сѝ, дꙋшѐ моѧ̀: трезви́сѧ, блюдѝ, да не ка́кѡ подо́бно что̀ постра́ждеши сластолю́бствꙋющи.

А҆га́ри дре́вней є҆гѵ́птѧныни ᲂу҆подо́биласѧ є҆сѝ, дꙋшѐ, порабо́тивши произволе́нїе своѐ и҆ ро́ждши но́ваго і҆сма́ила, презо́рство.

Лѣ́ствицꙋ і҆а́кѡвлю ᲂу҆вѣ́дѣла є҆сѝ, дꙋшѐ моѧ̀, ꙗ҆влѧ́емꙋю ѿ землѝ къ нб҃сє́мъ, почто̀ не стѧжа́ла є҆сѝ восхо́да тве́рда, бл҃гоче́стїѧ;

Сщ҃е́нникꙋ бж҃їю и҆ цр҃ю̀ ᲂу҆едине́нꙋ, подо́бїю хрⷭ҇то́ва въ мі́рѣ житїѧ̀ въ человѣ́цѣхъ подража́й.

Не бꙋ́ди сто́лпъ сла́ный, дꙋшѐ, возврати́вшисѧ вспѧ́ть: да ᲂу҆страши́тъ тѧ̀ ѡ҆́бразъ содо́мскїй: горѣ̀ въ сигѡ́ръ сп҃са́йсѧ.

Запале́нїѧ грѣхо́внагѡ, ꙗ҆́коже лѡ́тъ, бѣ́гай, дꙋшѐ моѧ̀: бѣ́гай содо́мы и҆ гомо́рры: бѣ́гай пла́мене всѧ́кагѡ безслове́снагѡ жела́нїѧ.

Поми́лꙋй, гдⷭ҇и, поми́лꙋй мѧ̀, вопїю́ ти, є҆гда̀ прїи́деши со а҆́гг҃лы твои́ми, возда́ти всѣ̑мъ по достоѧ́нїю дѣѧ́нїй.

Моле́нїѧ воспѣва́ющихъ тѧ не ѿве́ржи, влⷣко: но ᲂу҆ще́дри, чл҃вѣколю́бче, и҆ пода́ждь вѣ́рою просѧ́щымъ ѡ҆ставле́нїе.

Марі́и: Содержи́мь є҆́смь бꙋ́рею и҆ треволне́нїемъ согрѣше́нїй: но ты, ма́ти, ны́нѣ мѧ̀ сп҃сѝ, и҆ ко приста́нищꙋ бж҃е́ственнагѡ покаѧ́нїѧ приведѝ.

Марі́и: Оу҆се́рдное моле́нїе и҆ ны́нѣ прине́сши ко бл҃госе́рдѣй мл҃твами твои́ми бцⷣѣ, ѿве́рзи мѝ, прпⷣбнаѧ, бж҃е́ствєнныѧ вхо́ды.

А҆ндре́ю: Твои́ми мл҃твами да́рꙋй и҆ мнѣ̀ ѡ҆ставле́нїе долгѡ́въ, ѽ а҆ндре́е, кри́тскїй предстоѧ́телю! покаѧ́нїѧ бо ты̀ таи́нникъ преизрѧ́дный.

Трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ ѵ҆поста́сей воспѣва́емое, сп҃си́ ны, вѣ́рою покланѧ́ющыѧсѧ держа́вѣ твое́й.

Бг҃оро́диченъ: Ѿ ѻ҆ц҃а̀ безлѣ́тна сн҃а, неискꙋсомꙋ́жнѡ въ лѣ́то родила̀ є҆сѝ, бг҃ороди́тельнице,стра́нное чꙋ́до, пребы́вши дв҃а млеко́мъ пита́ющи.

І҆рмо́съ: Оу҆твердѝ, гдⷭ҇и, на ка́мени:

Сѣда́ленъ господи́на і҆ѡ́сифа, гла́съ и҃.

Подо́бенъ: Воскре́слъ є҆сѝ:

Свѣти̑ла бг҃оза̑рнаѧ, сп҃сѡвы самови́дцы, просвѣти́те на́съ сꙋ́щихъ во тьмѣ̀ житїѧ̀, да ꙗ҆́кѡ во дни̑ ны́нѣ бл҃гоѡбра́знѡ хо́димъ, свѣ́томъ воздержа́нїѧ мра̑чныѧ стра̑сти ѿгонѧ́юще, и҆ свѣ̑тлыѧ стрⷭ҇ти хрⷭ҇тѡ́вы да ᲂу҆́зримъ ра́дꙋющесѧ.

Сла́ва, дрꙋгі́й сѣда́ленъ, гла́съ и҃.

Подо́бенъ: Повелѣ́нное та́йнѡ:

А҆пⷭ҇льскаѧ двоенадесѧ́тице бг҃оизбра́ннаѧ, мольбꙋ̀ хрⷭ҇тꙋ̀ ны́нѣ принесѝ, поста̀ по́прище всѣ̑мъ прейтѝ, соверша́ющымъ во ᲂу҆миле́нїи мл҃твы, творѧ́щымъ ᲂу҆се́рднѡ добродѣ́тєли: ꙗ҆́кѡ да си́це дости́гнемъ ви́дѣти хрⷭ҇та̀ бг҃а сла́вное воскрⷭ҇нїе, сла́вꙋ и҆ хвалꙋ̀ приносѧ́ще.

И҆ ны́нѣ, бг҃оро́диченъ: Подо́бенъ:

Непостижи́магѡ бж҃їѧ сн҃а и҆ сло́во, несказа́ннѡ па́че ᲂу҆ма̀ и҆з̾ тебє̀ ро́ждшасѧ, молѝ, бцⷣе со а҆пⷭ҇лы ми́ръ вселе́ннѣй и҆́стинный пода́ти, и҆ согрѣше́нїй да́ти на́мъ пре́жде конца̀ проще́нїе, и҆ црⷭ҇твїѧ нбⷭ҇нагѡ, кра́йнїѧ ра́ди бл҃гости, сподо́бити рабы̑ твоѧ̑.

Та́же трипѣ́снецъ, без̾ покло́нѡвъ, гла́съ и҃.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Воздержа́нїемъ пожи́вше просвѣще́ннїи хрⷭ҇тѡ́вы а҆пⷭ҇ли, воздержа́нїѧ вре́мѧ на́мъ хода́тайствы бж҃е́ственными ѡ҆блегча́ютъ.

Двоенадесѧтострꙋ́нный ѻ҆рга́нъ, ᲂу҆ченикѡ́въ ли́къ бж҃е́ственный воспѣ̀ пѣ́снь сп҃си́тельнꙋю,лꙋка̑ваѧ смѣси́въ гласова̑нїѧ.

Ѡ҆дожде́нїемъ дх҃а всю̀ подсо́лнечнꙋю напои́сте, сꙋ́хость многобо́жїѧ ѿгна́вше, всебл҃же́ннїи.

Бг҃оро́диченъ: Смири́вши сп҃си́ мѧ, высокомꙋ́дреннѡ пожи́вшаго, ро́ждшаѧ возне́сшаго смире́нное є҆стество̀, дв҃о всечⷭ҇таѧ.

И҆́ный. Гла́съ то́йже.

І҆рмо́съ: Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ просла́вихъ держа́вꙋ твою̀, влⷣко.

А҆пⷭ҇льское всечⷭ҇тно́е ликостоѧ́нїе, зижди́телю всѣ́хъ молѧ́сѧ, просѝ поми́ловати ны̀ восхвалѧ́ющыѧ тѧ̀.

Ꙗ҆́кѡ дѣ́лателє сꙋ́ще хрⷭ҇тѡ́вы а҆пⷭ҇ли, ве́сь мі́ръ бж҃е́ственнымъ сло́вомъ воздѣ́лавшїи, прино́сите плоды̀ є҆мꙋ̀ всегда̀.

Вїногра́дъ бы́сте хрⷭ҇тꙋ̀ вои́стиннꙋ возлю́бленномꙋ: вїно́ бо дх҃о́вное и҆сточи́сте мі́рꙋ,а҆пⷭ҇ли.

Трⷪ҇ченъ: Пренача́льнаѧ, соѡбра́знаѧ, всеси́льнѣйшаѧ трⷪ҇це ст҃а́ѧ, ѻ҆́ч҃е, сло́ве и҆ дш҃е ст҃ы́й, бж҃е, свѣ́те и҆ жи́знь, сохранѝ ста́до твоѐ.

Бг҃оро́диченъ: Ра́дꙋйсѧ, прⷭ҇то́ле ѻ҆гнезра́чный: ра́дꙋйсѧ, свѣти́льниче свѣщено́сный: ра́дꙋйсѧ,горо̀ ѡ҆сщ҃е́нїѧ, ковче́же жи́зни, ст҃ы́хъ ст҃а́ѧ ски́нїе.

И҆́ный.

І҆рмо́съ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ. Сла́ва си́ле твое́й, гдⷭ҇и.

Дѣ́лъ твои́хъ да не пре́зриши, созда́нїѧ твоегѡ̀ да не ѡ҆ста́виши, правосꙋ́де. а҆́ще и҆ є҆ди́нъ согрѣши́хъ ꙗ҆́кѡ человѣ́къ, па́че всѧ́кагѡ человѣ́ка, чл҃вѣколю́бче: но и҆́маши, ꙗ҆́кѡ гдⷭ҇ь всѣ́хъ, вла́сть ѡ҆ставлѧ́ти грѣхѝ.

Приближа́етсѧ коне́цъ, дꙋшѐ, приближа́етсѧ, и҆ неради́ши, не гото́вишисѧ: вре́мѧ сокраща́етсѧ,воста́ни, бли́зъ при две́рехъ сꙋдїѧ̀ є҆́сть: ꙗ҆́кѡ со́нїе, ꙗ҆́кѡ цвѣ́тъ, вре́мѧ житїѧ̀ тече́тъ: что̀ всꙋ́е мѧте́мсѧ;

Воспрѧнѝ, ѽ дꙋшѐ моѧ̀! помышлѧ́й ѡ҆ дѣѧ̑нїихъ твои́хъ, ꙗ҆̀же содѣ́лала є҆сѝ, и҆ сїѧ̑ пред̾ лицѐ твоѐ принесѝ, и҆ ка̑пли сле́зъ твои́хъ и҆ска́пай: рцы̀ хрⷭ҇тꙋ̀ со дерзнове́нїемъ дѣѧ̑нїѧ и҆ помышлє́нїѧ, и҆ ѡ҆правда́йсѧ.

Не бы́сть въ житїѝ грѣха̀, ни дѣѧ́нїѧ, ни ѕло́бы, и҆́миже а҆́зъ не согрѣши́хъ, сп҃се: во ᲂу҆мѣ̀, и҆ сло́вѣ, и҆ произволе́нїи, и҆ предложе́нїи, и҆ мы́сли, и҆ дѣѧ́нїи согрѣши́хъ а҆́зъ, ꙗ҆́кѡ и҆́нъ никто́же когда̀.

Тогѡ̀ ра́ди и҆ ѡ҆сꙋжде́нъ бы́хъ, тогѡ̀ ра́ди препрѣ́нъ бы́хъ а҆́зъ ѡ҆каѧ́нный ѿ своеѧ̀ со́вѣсти, є҆ѧ́же ничто́же є҆́сть въ мі́рѣ нꙋ́ди́тельнѣйше. сꙋдїѐ, и҆зба́вителю мо́й и҆ вѣ́дче, пощадѝ, и҆ и҆зба́ви, и҆ сп҃си́ мѧ раба̀ твоего̀.

Лѣ́ствица, ю҆́же ви́дѣ дре́вле вели́кїй въ патрїа́рсѣхъ, ᲂу҆каза́нїе є҆́сть, дꙋшѐ моѧ̀,дѣ́ѧтельнагѡ восхожде́нїѧ, разꙋ́мнагѡ возше́ствїѧ: а҆́ще ᲂу҆̀бо хо́щеши пожи́ти, дѣѧ́нїемъ и҆ ра́зꙋмомъ и҆ видѣ́нїемъ ѡ҆бнови́сѧ.

Зно́й дневны́й претерпѣ̀ въ лише́нїи патрїа́рхъ, и҆ мра́зъ нощны́й понесѐ, на всѧ́къ де́нь ᲂу҆хищрє́нїѧ творѧ̀, пасы́й, трꙋжда́ѧйсѧ, рабо́таѧй, да двѣ̀ жєны̀ прїѡбрѧ́щетъ.

Жєны́ ми двѣ̀ разꙋмѣ́й, дꙋшѐ, дѣѧ́нїе и҆ ра́зꙋмъ въ видѣ́нїи: лі́ю ᲂу҆́бѡ дѣѧ́нїе, ꙗ҆́кѡ многоча́днꙋю: рахи́ль же ра́зꙋмъ, ꙗ҆́кѡ многотрꙋ́днꙋю. и҆́бо кромѣ̀ трꙋдѡ́въ, ни дѣѧ́нїе, ни видѣ́нїе ᲂу҆стро́итсѧ.

Бдѝ, ѽ дꙋшѐ моѧ̀! подвиза́йсѧ ꙗ҆́коже дре́вле вели́кїй въ патрїа́рсѣхъ, да стѧ́жеши дѣѧ́нїе съ вѣ́дѣнїемъ, да бꙋ́деши ᲂу҆́мъ зрѧ́й бг҃а, и҆ дости́гнеши непристꙋ́пнагѡ мра́ка въ видѣ́нїи, и҆ бꙋ́деши вели́кїй кꙋпе́цъ.

Двана́десѧть патрїа́рхѡвъ породи́въ, вели́кїй въ патрїа́рсѣхъ та́инственнѡ ᲂу҆твердѝ тебѣ̀, дꙋшѐ моѧ̀, лѣ́ствицꙋ дѣ́ѧтельнагѡ восхожде́нїѧ: дѣ́ти ꙗ҆́кѡ степє́ни, шє́ствїѧ ꙗ҆́кѡ восхождє́нїѧ, премꙋ́дреннѡ подложи́въ.

И҆са́ѵꙋ возненави́дѣнномꙋ ревнꙋ́ющи, дꙋшѐ ѡ҆каѧ́ннаѧ, ѿдала̀ є҆сѝ запина́телю твоемꙋ̀ пе́рвыѧ добро́ты пе́рвенство, и҆ ѻ҆те́ческїѧ мл҃твы ѿпа́ла є҆сѝ, и҆ два́жды поползнꙋ́ласѧ є҆сѝ, дѣѧ́нїемъ и҆ вѣ́дѣнїемъ: тѣ́мже ны́нѣ пока́йсѧ.

Є҆дѡ́мъ и҆са́ѵъ нарече́сѧ, кра́йнѧгѡ ра́ди женонеи́стовнагѡ смѣше́нїѧ: невоздержа́нїемъ бо при́снѡ разжига́емь и҆ сластьмѝ ѡ҆сквернѧ́емь, є҆дѡ́мъ и҆менова́сѧ, є҆́же глаго́летсѧ разжже́нїе дꙋшѝ любогрѣхо́вныѧ.

І҆́ѡва на гно́ищи ѡ҆правда́на слы́шавши, ѽ дꙋшѐ моѧ̀, тогѡ̀ мꙋ́жествꙋ не поревнова́ла є҆сѝ,крѣ̀пости и҆зволе́нїѧ не и҆мѣ́ла є҆сѝ во всѣ́хъ, ꙗ҆̀же позна́ла є҆сѝ, ꙗ҆́же вѣ́си, и҆ и҆́миже и҆скꙋси́ласѧ є҆сѝ, но ꙗ҆ви́ласѧ є҆сѝ не и҆мꙋ́щи терпѣнїѧ.

Пре́жде на престо́лѣ, ны́нѣ на́гъ на гно́ищи гно́енъ: мно́гїй въ ча́дѣхъ и҆ сла́вный, внеза́пꙋ безча́денъ и҆ бездо́мокъ: гно́ище во пала́тꙋ и҆ стрꙋ́пы би́серїе вмѣнѧ́ше.

Ца́рскимъ досто́инствомъ, вѣнце́мъ и҆ багрѧни́цею ѡ҆дѣ́ѧнъ, многоимѣ́нный человѣ́къ и҆ пра́ведный,бога́тствомъ ѻ҆би́лꙋѧ и҆ ста́ды, внеза́пꙋ бога́тства, сла́вы, ца́рства ѡ҆бнища́въ лиши́сѧ.

А҆́ще пра́веденъ бѧ́ше ѻ҆́нъ и҆ непоро́ченъ па́че всѣ́хъ, и҆ не ᲂу҆бѣжѐ ловле́нїѧ льсти́вагѡ и҆ сѣ́ти: ты́ же грѣхолюби́ва сꙋ́щи, ѡ҆каѧ́ннаѧ дꙋшѐ, что̀ сотвори́ши, а҆́ще чесом ꙋ̀ ѿ недовѣ́домыхъ слꙋчи́тсѧ наитѝ на тѧ̀;

Тѣ́ломъ ѡ҆скверни́хсѧ, дꙋ́хомъ ѡ҆калѧ́хсѧ, ве́сь ѡ҆стрꙋпи́хсѧ: но ты̀, хрⷭ҇тѐ, ꙗ҆́кѡ вра́чь, ѻ҆боѧ̀ покаѧ́нїемъ мои́мъ ᲂу҆врачꙋ́й, ѿмы́й, ѻчи́сти, ᲂубѣлѝ, покажѝ, сп҃се мо́й, па́че снѣ́га чистѣ́йша.

Тѣ́ло твоѐ и҆ кро́вь положи́лъ є҆сѝ за всѣ́хъ, сло́ве, распина́емь: тѣ́ло ᲂу҆́бѡ, да мѧ̀ ѡ҆бнови́ши: кро́вь, да ѡ҆мы́еши мѧ̀: дꙋ́хъ же пре́далъ є҆сѝ, да мѧ̀ приведе́ши, хрⷭ҇тѐ, ко твоемꙋ̀ роди́телю.

Содѣ́лалъ є҆сѝ сп҃се́нїе посредѣ̀ землѝ, ще́дре, да сп҃се́мсѧ: во́лею на дре́вѣ распѧ́лсѧ є҆си: є҆де́мъ затворе́нный ѿве́рзесѧ: го́рнѧѧ, дѡ́льнѧѧ, тва́рь, ꙗ҆зы́цы всѝ сп҃се́ни покланѧ́ютсѧ тебѣ̀.

Кро́вь и҆з̾ ре́бръ твои́хъ да бꙋ́детъ мѝ кꙋпѣ́ль, вкꙋ́пѣ и҆ питїѐ, и҆сточи́вшее во́дꙋ ѡ҆ставле́нїѧ, да ѻ҆бою́дꙋ ѡ҆чища́юсѧ, помазꙋ́ѧсѧ и҆ пїѧ̀: ꙗ҆́кѡ пома́занїе и҆ питїѐ, сло́ве,животѡ́чнаѧ твоѧ̑ словеса̀.

Лиши́хсѧ черто́га, лиши́хсѧ и҆ бра́ка, кꙋ́пнѡ и҆ ве́чери: свѣти́льникъ ᲂу҆гасѐ, ꙗ҆́кѡ без̾еле́йный, черто́гъ заключи́сѧ мнѣ̀ спѧ́щꙋ, ве́черѧ снѣде́сѧ: а҆́зъ же по рꙋкꙋ̀ и҆ нѡ́гꙋ свѧ́занъ, во́нъ низве́рженъ є҆́смь.

Ча́шꙋ цр҃ковь стѧжа̀, рє́бра твоѧ̑ живонѡ́снаѧ, сп҃се на́шъ, и҆з̾ ни́хже и҆злїѧ́сѧ на́мъ сꙋгꙋ́бый и҆сто́чникъ ѡ҆ставле́нїѧ и҆ вѣ́дѣнїѧ, во ѡ҆́бразъ двои́хъ вкꙋ́пѣ завѣ́тѡвъ, ве́тхагѡ и҆ но́вагѡ.

Вре́мѧ житїѧ̀ моегѡ̀ ма́ло и҆ и҆спо́лнено болѣ́зней и҆ лꙋка́вства: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.

Высокоглаго́ливъ ны́нѣ є҆́смь, де́рзостенъ же и҆ се́рдцемъ, вотщѐ и҆ всꙋ́е: да не съ фарїсе́емъ ѡ҆сꙋ́диши мѧ̀, па́че же мытаре́во смире́нїе пода́ждь мѝ, є҆ди́не ще́дре, правосꙋ́де, и҆ семꙋ́ мѧ сочислѝ.

Согрѣши́хъ, досади́въ сосꙋ́дꙋ пло́ти моеѧ̀, вѣ́мъ, ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.

Кꙋмі́ра мѧ себѣ̀ сотвори́хъ, страстьмѝ дꙋ́шꙋ мою̀ ѡ҆скверни́въ, ще́дре: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.

Не послꙋ́шахъ гла́са твоегѡ̀, преслꙋ́шахъ писа́нїе твоѐ законополо́жника: но въ покаѧ́нїи мѧ̀ прїимѝ, и҆ въ ра́зꙋмъ призовѝ, да не бꙋ́дꙋ стѧжа́нїе, ни бра́шно чꙋжде́мꙋ: сп҃се, са́мъ мѧ̀ ᲂу҆ще́дри.

Марі́и: Безпло́тныхъ жи́тельство въ пло́ти преше́дши, бл҃года́ть къ бг҃ꙋ ве́лїю вои́стиннꙋ прїѧ́ла є҆сѝ, прпⷣбнаѧ, ѡ҆ чтꙋ́щихъ тѧ̀ вѣ́рнѡ предста́тельствовати. тѣ́мже мо́лимъ тѧ̀: ѿ всѧ́кихъ напа́стей и҆ на́съ мл҃твами твои́ми и҆зба́ви.

Марі́и: Во глꙋбинꙋ̀ вели́кихъ безмѣ́стїй низве́дшисѧ, не ᲂу҆держа́на была̀ є҆сѝ, марі́е, но по́мысломъ лꙋ́чшимъ ꙗ҆́вѣ востекла̀ є҆сѝ дѣѧ́ньми къ кра́йнѣй добродѣ́тели, пречꙋ́днѡ а҆́гг҃льское є҆стество̀ ᲂу҆диви́вши.

А҆ндре́ю: А҆ндре́е, ѻ҆тцє́мъ похвало̀, мл҃твами твои́ми не забꙋ́ди молѧ́сѧ, предстоѧ̀ трⷪ҇цѣ пребж҃е́ственнѣй, ꙗ҆́кѡ да и҆зба́вимсѧ мꙋче́нїѧ, любо́вїю предста́телѧ тѧ̀ бж҃е́ственнаго призыва́ющїи, кри́тꙋ ᲂу҆краше́нїе.

Трⷪ҇ченъ: Нераздѣ́льное сꙋщество́мъ, несли́тное ли̑цы бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопрⷭ҇то́льное: вопїю́ ти пѣ́снь вели́кꙋю, въ вы́шнихъ трикра́тнѡ пѣсносло́вимꙋю.

Бг҃оро́диченъ: И҆ ражда́еши и҆ дѣ́вствꙋеши, и҆ пребыва́еши во ѻ҆бои́хъ є҆стество́мъ дв҃а: рожде́йсѧ ѡ҆бновлѧ́етъ зако́ны є҆стества̀, ᲂу҆тро́ба же ражда́етъ неискꙋсомꙋ́жнаѧ. и҆дѣ́же хо́щетъ бг҃ъ, побѣжда́етсѧ є҆стества̀ чи́нъ: твори́тъ бо, є҆ли̑ка хо́щетъ.

Пѣ́снь є҃.

І҆рмо́съ: Ѿ но́щи ᲂу҆́тренююща, чл҃вѣколю́бче, просвѣтѝ, молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ, сп҃се, твори́ти во́лю твою̀.

Въ нощѝ житїѐ моѐ преидо́хъ при́снѡ: тьма́ бо бы́сть мнѣ̀ и҆ глꙋбока̀ мгла̀, но́щь грѣха̀: но ꙗ҆́кѡ сы́на днѐ, сп҃се, покажи́ мѧ.

Рꙋві́мꙋ подража́ѧ, содѣ́ѧхъ ѡ҆каѧ́нный а҆́зъ беззако́нный и҆ законопрестꙋ́пный совѣ́тъ на бг҃а вы́шнѧго, ѡ҆скверни́въ ло́же моѐ, ꙗ҆́коже ѻ҆́тчее ѻ҆́нъ.

И҆сповѣ́даюсѧ тебѣ̀, хрⷭ҇тѐ цр҃ю̀: согрѣши́хъ, согрѣши́хъ, ꙗ҆́коже пре́жде бра́тїѧ прода́вшїи і҆ѡ́сифа, пло́дъ чистоты̀ и҆ цѣломꙋ́дрїѧ.

Ѿ срѡ́дникъ пра́веднаѧ дꙋша̀ свѧза́сѧ, прода́сѧ въ ра́бство сла́дкїй, во ѡ҆́бразъ гдⷭ҇ень: ты́ же всѧ̀, дꙋшѐ, продала́сѧ є҆сѝ ѕлы̑мъ твои̑мъ.

І҆ѡ́сифовꙋ пра́ведномꙋ и҆ цѣломꙋ́дренномꙋ ᲂу҆мꙋ̀ подража́й, ѡ҆каѧ́ннаѧ и҆ неискꙋ́снаѧ дꙋшѐ, и҆ не ѡ҆сквернѧ́йсѧ безслове́сными стремле́ньми, при́снѡ беззако́ннꙋющи.

А҆́ще и҆ въ ро́вѣ поживѐ нѣ́когда̀ і҆ѡ́сифъ, но во ѡ҆́бразъ погребе́нїѧ и҆ воскрⷭ҇нїѧ твоегѡ̀, влⷣко гдⷭ҇и: а҆́зъ же что̀ сицево́е тебѣ̀ когда̀ принесꙋ̀;

Ѡ҆ мѡѷсе́овѣ ковче́жцѣ слы́шала є҆сѝ, дꙋшѐ, носи́мѣмъ вода́ми, волна́ми рѣ́чными, ꙗ҆́кѡ въ черто́зѣ дре́вле ᲂу҆бѣжа́вшемъ ѿ го́рькагѡ ловле́нїѧ совѣ́та фараѡні́тска.

А҆́ще слы́шала є҆сѝ, дꙋшѐ ѡ҆каѧ́ннаѧ, ѡ҆ ба́бахъ ᲂу҆бива́вшихъ нѣ́когда безвозра́стное мꙋ́жеское,цѣломꙋ́дрїѧ дѣѧ́нїе: ны́нѣ, ꙗ҆́кѡ вели́кїй мѡѷсе́й, ссѝ премꙋ́дрость.

Ꙗ҆́коже мѡѷсе́й вели́кїй, є҆гѵ́петскїй ᲂу҆́мъ порази́вши, не ᲂу҆би́ла є҆сѝ, дꙋшѐ ѡ҆каѧ́ннаѧ: и҆ ка́кѡ всели́шисѧ, глаго́ли, въ пꙋсты́ню страсте́й покаѧ́нїемъ;

Въ пꙋсты́ню всели́сѧ вели́кїй мѡѷсе́й, грѧдѝ ᲂу҆́бо, дꙋшѐ, подража́й тогѡ̀ житїю̀, да и҆ бг҃оѧвле́нїе въ кꙋпинѣ̀ ви́дѣти сподо́бишисѧ.

Мѡѷсе́овъ же́злъ, ᲂу҆дарѧ́ющь мо́ре и҆ ѡ҆гꙋстѣва́ющь глꙋбинꙋ̀, воѡбража́й, дꙋшѐ, во ѡ҆́бразъ крⷭ҇та̀ бж҃е́ственнагѡ: и҆́мже мо́жеши и҆ ты̀ вели̑каѧ соверши́ти.

А҆арѡ́нъ приноша́ше бг҃ꙋ ѻ҆́гнь непоро́чный, неле́стный: но ѻ҆фні̀ и҆ фїнее́съ, ꙗ҆́коже ты̀, дꙋшѐ, принесо́ша чꙋжде́е бг҃ꙋ, ѡ҆скверне́нное житїѐ.

Нра́вомъ бы́хъ, гдⷭ҇и, ꙗ҆́кѡ тѧ́жкїй во ѡ҆ѕлобле́нїи фараѡ́нъ, дꙋше́ю и҆ тѣ́ломъ, ꙗ҆́кѡ і҆анні́й и҆ і҆амврі́й, и҆ погрꙋже́нъ ᲂу҆мо́мъ: но помози́ ми.

Бре́нїю примѣси́хсѧ а҆́зъ ѡ҆каѧ́нный ᲂу҆мо́мъ: молю́ тѧ, влⷣко, ѡ҆мы́й мѧ̀ ба́нею мои́хъ сле́зъ,ѡ҆де́ждꙋ пло́ти моеѧ̀ ᲂу҆бѣли́въ ꙗ҆́кѡ снѣ́гъ.

А҆́ще и҆спыта́ю моѧ̑ дѣла̀, сп҃се, зрю̀ себѐ превозше́дша грѣхмѝ всѧ́каго человѣ́ка, занѐ въ ра́зꙋмѣ мꙋ́дрствꙋѧ согрѣши́хъ, не въ невѣ́дѣнїи.

Пощадѝ, пощадѝ, гдⷭ҇и, созда́нїе твоѐ: согрѣши́хъ, ѡ҆сла́би мѝ, ꙗ҆́кѡ є҆стество́мъ чи́стъ ты̀ є҆сѝ є҆ди́нъ, и҆ и҆́ный ра́звѣ тебє̀ никто́же є҆́сть без̾ скве́рны.

Менє̀ ра́ди бг҃ъ сы́й, воѡбрази́лсѧ є҆сѝ въ мѧ̀, сп҃се, показа́лъ є҆сѝ чꙋдеса̀, и҆сцѣли́въ прокажє́нныѧ, и҆ разсла́бленнаго стѧгнꙋ́въ, и҆ то́къ кровоточи́выѧ ᲂу҆ста́вилъ прикоснове́нїемъ ри́зъ.

Кровоточи́вѣй подража́й, ѡ҆каѧ́ннаѧ дꙋшѐ. притецы̀, ᲂу҆держѝ ѡ҆ме́ты хрⷭ҇тѡ́вы, да и҆зба́вишисѧ ѿ ра́нъ и҆ ᲂу҆слы́шиши ѿ негѡ̀: вѣ́ра твоѧ̀ сп҃се́ тѧ.

Ни́зꙋ согбе́ннѣй подража́й, ѽ дꙋшѐ: прїидѝ, припадѝ къ нога́ма і҆и҃совыма, да тѧ̀ и҆спра́витъ, и҆ да хо́диши пра́вѡ стєзѧ́ми гдⷭ҇ними.

А҆́ще и҆ кла́дѧзь глꙋбо́къ є҆сѝ, влⷣко, и҆сточи́ ми во́дꙋ и҆з̾ пречⷭ҇тыхъ твои́хъ жи́лъ, да ꙗ҆́кѡ самарѧны́нѧ, пїѧ́й николи́же возжа́ждꙋ: жи́зни бо стрꙋи̑ и҆сточа́еши.

Сїлѡа́мъ да бꙋ́дꙋтъ мѝ сле́зы моѧ̑, влⷣко гдⷭ҇и, да ᲂу҆мы́ю и҆ а҆́зъ зѣ̑ницы се́рдца, и҆ ви́ждꙋ тѧ̀ мы́сленнѡ, свѣ́та превѣ́чна.

Марі́и: Несравне́нною любо́вїю, всебога́таѧ, дре́вꙋ крⷭ҇тномꙋ возжелѣ́вши поклони́тисѧ, сподо́биласѧ є҆сѝ жела́емагѡ: сподо́би ᲂу҆́бо и҆ менѐ полꙋчи́ти вы́шнюю сла́вꙋ.

Марі́и: Стрꙋѝ і҆орда̑нскїѧ преше́дши, ѡ҆брѣла̀ є҆сѝ поко́й безболѣ́зненный, плотскі́ѧ сла́сти и҆збѣжа́вши, ѿ неѧ́же и҆ на́съ и҆зьмѝ твои́ми мл҃твами, прпⷣбнаѧ.

А҆ндре́ю: Ꙗ҆́кѡ па́стырей и҆зрѧ́днѣйша, а҆ндре́е премꙋ́дре, и҆збра́нна сꙋ́ща тѧ̀, любо́вїю ве́лїею и҆ стра́хомъ молю̀, твои́ми мл҃твами полꙋчи́ти сп҃се́нїе и҆ жи́знь вѣ́чнꙋю.

Трⷪ҇ченъ: Тѧ̀, трⷪ҇це, сла́вимъ, є҆ди́наго бг҃а: ст҃ъ, ст҃ъ, ст҃ъ є҆сѝ, ѻ҆́ч҃е, сн҃е и҆ дш҃е, про́стое сꙋщество̀, є҆ди́нице при́снѡ покланѧ́емаѧ.

Бг҃оро́диченъ: И҆з̾ тебє̀ ѡ҆блече́сѧ въ моѐ смѣше́нїе, нетлѣ́ннаѧ безмꙋ́жнаѧ мт҃и дв҃о, бг҃ъ созда́вый вѣ́ки, и҆ соединѝ съ собо́ю человѣ́ческое є҆стество̀.

Пѣ́снь ѕ҃.

І҆рмо́съ: Возопи́хъ всѣ́мъ се́рдцемъ мои́мъ къ ще́дромꙋ бг҃ꙋ, и҆ ᲂу҆слы́ша мѧ̀ ѿ а҆́да преиспо́днѧгѡ, и҆ возведѐ ѿ тлѝ живо́тъ мо́й.

Сле́зы ѻ҆́чїю моє́ю и҆ и҆з̾ глꙋбины̀ воздыха̑нїѧ, сп҃се, чи́стѣ приношꙋ̀, вопїю́щꙋ се́рдцꙋ: бж҃е, согрѣши́хъ тѝ, млⷭ҇тивъ бꙋ́ди мѝ.

Оу҆клони́ласѧ є҆сѝ, дꙋшѐ, ѿ гдⷭ҇а твоегѡ̀, ꙗ҆́коже даѳа́нъ и҆ а҆вїрѡ́нъ: но пощадѝ, воззовѝ и҆з̾ а҆́да преиспо́днѧгѡ, да про́пасть земна́ѧ тебѐ не покры́етъ.

Ꙗ҆́кѡ ю҆́ница разсвирѣ́пѣвшаѧ, дꙋшѐ, ᲂу҆подо́биласѧ є҆сѝ є҆фре́мꙋ: ꙗ҆́кѡ се́рна ѿ тене́тъ спасѝ житїѐ, ѡ҆крили́вшисѧ дѣѧ́нїемъ и҆ ᲂу҆́мо́мъ, и҆ видѣ́нїемъ.

Рꙋка̀ мѡѷсе́ова да ᲂу҆вѣ́ритъ на́съ, дꙋшѐ, ка́кѡ мо́жетъ бг҃ъ прокаже́нное житїѐ ᲂу҆бѣли́ти и҆ ѡ҆чи́стити: и҆ не ѿча́йсѧ сама̀ себє̀, а҆́ще и҆ прокаже́на є҆сѝ.

Во́лны прегрѣше́нїй мои́хъ, сп҃се, ꙗ҆́кѡ въ мо́ри чермнѣ́мъ возвра́щшѧсѧ, покры́ша мѧ̀ внеза́пꙋ,ꙗ҆́коже нѣ́когда є҆гѵ́птѧны и҆ трїста́ты.

Неразꙋ́мное произволе́нїе стѧжа́ла є҆сѝ, дꙋшѐ, ꙗ҆́коже пре́жде і҆и҃ль: бж҃е́ственнѣй бо ма́ннѣ несмы́сленнѡ предпочла̀ є҆сѝ любосла́стное страсте́й ѡ҆б̾ѧде́нїе.

Кла́дѧзи ханане́йскихъ мы́слей предпочла̀ є҆сѝ, дꙋшѐ, жи́лѣ ка́мене, и҆з̾ негѡ́же ꙗ҆́кѡ ча́ша премꙋ́дрости и҆злива́етъ то́ки бг҃осло́вїѧ.

Свина̑ѧ мѧса̀ и҆ котлы̀ и҆ є҆гѵ́петскꙋю пи́щꙋ предпочла̀ є҆сѝ нбⷭ҇нѣй, дꙋшѐ моѧ̀, ꙗ҆́коже дре́вле неразꙋ́мнїи лю́дїе въ пꙋсты́ни.

є҆гда̀ ᲂу҆да́ри мѡѷсе́й ра́бъ тво́й жезло́мъ ка́мень, ѡ҆бра́знѡ животвори̑ваѧ ре́бра твоѧ̑, сп҃се,проѡбразова́ше, и҆з̾ ни́хже всѝ питїѐ жи́зни почерпа́емъ.

И҆спыта́й, дꙋшѐ, и҆ смотрѧ́й, ꙗ҆́коже и҆ і҆исꙋ́съ наѵи́нъ, ѡ҆бѣтова́нїѧ зе́млю, какова̀ є҆́сть,и҆ всели́сѧ въ ню̀ бл҃гозако́нїемъ.

Противꙋста́ни и҆ поборѝ, ꙗ҆́коже і҆исꙋ́съ а҆мали́ка, плотскі̑ѧ стра̑сти, и҆ гаваѡні́ты,прельсти́тєльныѧ по́мыслы, при́снѡ побѣжда́ющи.

Преидѝ, дꙋшѐ, текꙋ́щее є҆стество̀ вре́мене, ꙗ҆́коже пре́жде, ковче́гъ, и҆ землѝ ѻ҆́ныѧ ѡ҆бѣтова́нныѧ бꙋ́ди во ѡ҆держа́нїи: бг҃ъ повелѣва́етъ.

Ꙗ҆́коже сп҃слъ є҆сѝ петра̀, возопи́вша сп҃сѝ: предвари́въ мѧ̀, сп҃се, ѿ ѕвѣ́рѧ и҆зба́ви, просте́ръ твою̀ рꙋ́кꙋ, и҆ возведѝ и҆з̾ глꙋбины̀ грѣхо́вныѧ.

Приста́нище ти́хое вѣ́мъ тѧ̀, влⷣко, влⷣко, хрⷭ҇тѐ: но ѿ безмѣ́рныхъ глꙋби́нъ грѣха̀ и҆ ѿча́ѧнїѧ мѧ̀ предвари́въ и҆зба́ви.

А҆́зъ є҆́смь, сп҃се, ца́рскаѧ дра́хма, ю҆́же погꙋби́лъ є҆сѝ дре́вле: но вже́гъ свѣти́льникъ прⷣте́чꙋ твоего̀, сло́ве, взыщѝ и҆ ѡ҆брѧ́щи тво́й ѡ҆́бразъ.

Марі́и: Да страсте́й пла́мень ᲂу҆гаси́ши, сле́зъ то́ки и҆сточа́ла є҆сѝ при́снѡ, марі́е, дꙋше́ю распала́ема: и҆́хже бл҃года́ть пода́ждь и҆ мнѣ̀ твоемꙋ̀ рабꙋ̀.

Марі́и: Безстра́стїе нбⷭ҇ное стѧжа́ла є҆сѝ, высо́кимъ на землѝ житїе́мъ, ма́ти. тѣ́мже моли́сѧ, тѧ̀ воспѣва́ющымъ и҆зба́витисѧ ѿ страсте́й мл҃твами твои́ми.

А҆ндре́ю: Кри́тскаго тѧ̀ па́стырѧ, и҆ предстоѧ́телѧ, и҆ вселе́нныѧ мл҃твенника вѣ́дый, прибѣга́ю,а҆ндре́е, и҆ вопїю́ ти: и҆зьми́ мѧ, ѻ҆́тче, и҆з̾ глꙋбины̀ грѣха̀.

Трⷪ҇ченъ: Трⷪ҇ца є҆́смь про́ста, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆ц҃ъ глаго́летъ, и҆ сн҃ъ, и҆ бж҃е́ственный дх҃ъ.

Бг҃оро́диченъ: Оу҆тро́ба твоѧ̀ бг҃а на́мъ родѝ, воѡбраже́на по на́мъ: є҆го́же ꙗ҆́кѡ созда́телѧ всѣ́хъ молѝ, бцⷣе, да мл҃твами твои́ми ѡ҆правди́мсѧ.

Конда́къ, гла́съ ѕ҃:

Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ.воспрѧнѝ, ᲂу҆́бо, да пощади́тъ тѧ̀ хрⷭ҇то́съ бг҃ъ, вездѣ̀ сы́й и҆ всѧ̑ и҆сполнѧ́ѧй.

І҆́косъ: Хрⷭ҇то́вꙋ враче́бницꙋ ви́дѧ ѿве́рстꙋ и҆ ѿ сеѧ̀ а҆да́мꙋ и҆стека́ющее здра́вїе, пострада̀, ᲂу҆ѧзви́сѧ дїа́волъ, и҆ ꙗ҆́кѡ бѣ́дствꙋѧ рыда́ше, и҆ свои̑мъ дрꙋгѡ́мъ возопѝ: что̀ сотворю̀ сн҃ꙋ мр҃і́инꙋ; ᲂу҆бива́етъ мѧ̀ виѳлее́млѧнинъ, вездѣ̀ сы́й и҆ всѧ̑ и҆сполнѧ́ѧй.

Сѷнаѯа́рїй пе́рвѣе мине́и, та́же настоѧ́щїй.

Стїхѝ: Ѡ҆́бразы ᲂу҆миле́нїѧ да́ждь, хрⷭ҇тѐ мо́й,

Пою́щымъ тебѣ̀ ны́нѣ канѡ́нъ вели́кїй.

Въ сі́й де́нь, въ четверто́къ пѧ́тыѧ седми́цы постѡ́въ, по дре́внемꙋ преда́нїю пое́мъ послѣ́дованїе вели́кагѡ канѡ́на. Се́й вои́стиннꙋ всѣ́хъ канѡ́нѡвъ велича́йшїй и҆зрѧ́днѡ и҆ и҆скꙋ́снѡ сочинѝ и҆ написа̀ и҆́же во ст҃ы́хъ ѻ҆те́цъ на́шъ а҆ндре́й, а҆рхїепⷭ҇кпъ кри́тскїй, и҆ і҆ерⷭ҇ли́мскїй и҆менꙋ́емый. То́й бѧ́ше ᲂу҆́бѡ и҆з̾ дама́ска: ѡ҆ четыренадесѧ́тѣмъ же лѣ́тѣ своегѡ̀ во́зраста наꙋче́нїю грамматі́ческомꙋ вда́нъ бы́въ, и҆ крꙋ́гъ ѡ҆бꙋче́нїѧ соверши́въ, и҆ во і҆ерⷭ҇ли́мѣ бы́въ, мона́шеское житїѐ прїе́млетъ. Преподо́бнѣ же и҆ бг҃олюбе́знѣ живѧ̀ въ безмо́лвнѣмъ и҆ немѧте́жнѣмъ житїѝ, мнѡ́га и҆ и҆́на писа̑нїѧ житїю̀ полє́знаѧ ѡ҆ставлѧ́етъ бж҃їей цр҃кви, словеса́ и҆ канѡ́ны, наипа́че си́ленъ показꙋ́ѧсѧ въ торже́ственныхъ словесѣ́хъ. Со мно́гими же и҆ны́ми, сочинѝ и҆ настоѧ́щїй вели́кїй канѡ́нъ, ᲂу҆миле́нїе неисче́тно и҆мꙋ́щъ: всѧ̑ бо ве́тхагѡ и҆ но́вагѡ завѣ́та пѡ́вѣсти и҆зслѣ́довавъ и҆ собра́въ, ѿ а҆да́ма да́же и҆ до самагѡ̀ хрⷭ҇то́ва вознесе́нїѧ и҆ а҆пⷭ҇льскїѧ про́повѣди, настоѧ́щее сочинѝ сладкопѣ́нїе. Побꙋжда́етъ ᲂу҆́бо си́мъ всѧ́кꙋю дꙋ́шꙋ, є҆ли̑ка сꙋ́тъ бл҃га̑ѧ въ по́вѣсти, си̑мъ ревнова́ти и҆ поража́ти по си́лѣ, є҆ли̑ка же ѕла̑ѧ, си́хъ ѿбѣга́ти, и҆ при́снѡ къ бг҃ꙋ востека́ти покаѧ́нїемъ, слеза́ми и҆ и҆сповѣ́данїемъ и҆ и҆ны́мъ бл҃гоꙋгожде́нїемъ. Ѻ҆ба́че канѡ́нъ се́й толи́кѡ є҆́сть широ́къ и҆ сладкогла́сенъ, ꙗ҆́кѡ и҆ самꙋ̀ жесточа́йшꙋю дꙋ́шꙋ дово́ленъ є҆́сть ᲂу҆мѧгчи́ти и҆ ко прїѧ́тїю бл҃га воздви́гнꙋти, а҆́ще то́чїю съ сокрꙋше́ннымъ се́рдцемъ и҆ внима́нїемъ подо́бающимъ пое́тсѧ.Сочинѝ же се́й канѡ́нъ, є҆гда̀ и҆ патрїа́рхъ і҆ерⷭ҇ли́мскїй, вели́кїй сѡфро́нїй, є҆гѵ́птѧныни марі́и житїѐ написа̀. И҆ сїѐ бо житїѐ предлага́етъ ᲂу҆миле́нїе безчи́сленно и҆ дае́тъ мно́гое ᲂу҆тѣше́нїе прегрѣши́вшымъ и҆ согрѣша́ющымъ, а҆́ще то́чїю ѿ ѕлы́хъ ѿстꙋпи́ти хотѧ́тъ.

Оу҆чине́но же бѣ̀҆ въ настоѧ́щїй де́нь пѣ́ти и҆ прочита́ти сїѧ̑ сицевы́ѧ ра́ди вины̀. Поне́же къ концꙋ̀ приближа́етсѧ ст҃а́ѧ четыредесѧ́тница, и҆ человѣ́цы легкомы́сленнѣ да не ѡ҆сла́бнꙋтъ къ дх҃ѡ́внымъ подвигѡ́мъ, и҆ цѣломꙋ́дрствовати да не преста́нꙋтъ: вели́кїй а҆ндре́й, ꙗ҆́коже нѣ́кїй наста́вникъ, повѣстьмѝ вели́кагѡ канѡ́на, глаго́лѧ ѡ҆ добродѣ́тели вели́кихъ мꙋже́й и҆ ѡ҆ прегрѣше́нїи па́ки ѕлы́хъ, ᲂу҆строѧ́етъ трꙋжда́ющихсѧ до́блѣйшихъ мꙋ́жественнѣ на прє́днѧѧ простира́тисѧ. Сщ҃е́нный же сѡфро́нїй преесте́ственнымъ свои́мъ сло́вомъ та́кожде, цѣломꙋ́дрєны бы́ти твори́тъ, и҆ къ бг҃ꙋ воздвиза́етъ, и҆ не низпа́дати, нижѐ ѿчаѧва́тисѧ, а҆́ще и҆ногда̀ нѣ́кими прегрѣше́ньми ꙗ҆́ти бы́ша: по́вѣсть бо ѡ҆ є҆гѵ́птѧныни представлѧ́етъ, ко́ль вели́ко Є҆́сть бж҃їе чл҃вѣколю́бїе и҆ млⷭ҇ть произволѧ́ющымъ вседꙋ́шнѡ ѿ пе́рвыхъ прегрѣше́нїй ѡ҆брати́тисѧ. Вели́къ же нарица́етсѧ канѡ́нъ, а҆́ще кто̀ ре́клъ бы, и҆ по тѣ̑мъ мы́слемъ и҆ воспомина́нїємъ: ꙗ҆́кѡ плодови́тъ є҆́сть сегѡ̀ творе́цъ, и҆зрѧ́днѡ та̑ сложи́вый, и҆ ꙗ҆́кѡ про́чїи канѡ́ни по три́десѧти и҆ ма́лѡ что̀ вѧ́щше тропаре́й и҆мꙋ́тъ, се́й же на с҃н простира́етсѧ, є҆ди́номꙋ коемꙋ́ждо и҆́хъ и҆ска́пающꙋ неизрече́ннꙋю сла́дость. Прили́чно ᲂу҆́бо є҆́сть и҆ подоба́етъ канѡ́нꙋ семꙋ̀ вели́комꙋ и҆ вели́ко ᲂу҆миле́нїе и̑мꙋ́щемꙋ и҆ въ вели́цѣй четыредесѧ́тницѣ ᲂу҆чини́тисѧ.

Се́й и҆зрѧ́дный и҆ вели́кїй канѡ́нъ и҆ ѡ҆ прпⷣбнѣй марі́и сло́во то́йже ѻ҆те́цъ на́шъ а҆ндре́й пе́рвый въ кѡнстанті́нь гра́дъ принесѐ, є҆гда̀, ѿ патрїа́рха і҆ерⷭ҇ли́мскагѡ ѳео́дѡра на шесты́й сбо́ръ по́сланъ, въ по́мощь прїи́де. Тогда́ же и҆зрѧ́днѡ на монофели́ты [є҆диново́льники] подвиза́всѧ, є҆щѐ пребыва́ѧ въ мона́шествꙋющихъ, кли́рꙋ цр҃кве въ кѡнстанті́нѣ гра́дѣ причита́етсѧ: та́же дїа́конъ и҆ сиротопита́тель въ се́й поставлѧ́етсѧ. И҆ по ма́лѣ а҆рхїепⷭ҇кпъ кри́тскїй бы́въ, пото́мъ дости́же мїтѷли́ны, и҆ та́мѡ нѣ́гдѣ бли́з̾ глаго́лемагѡ і҆ері́са ко гдⷭ҇ꙋ ѿи́де, дово́льное вре́мѧ сво́й престо́лъ ᲂу҆пра́вивъ.

Тогѡ мл҃твами, бж҃е, поми́лꙋй на́съ. А҆ми́нъ.

Та́же бл҃жє́нны съ поклѡ́ны. Гла́съ ѕ҃:

Во црⷭ҇твїи твое́мъ помѧнѝ на́съ, гдⷭ҇и:

Разбо́йника, хрⷭ҇тѐ, раѧ̀ жи́телѧ сотвори́лъ є҆сѝ, на крⷭ҇тѣ̀ тебѣ̀ возопи́вша: помѧни́ мѧ. тогѡ̀ покаѧ́нїѧ сподо́би и҆ менѐ недосто́йнаго.

Сті́хъ: Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное.

Манѡ́а, дꙋшѐ моѧ̀, слы́шиши, дре́вле въ бг҃оѧвле́нїи бы́вша и҆ ѿ непло́дове тогда̀ прїе́мша пло́дъ ѡ҆бѣтова́нїѧ. тогѡ̀ бл҃гоче́стїю подража́имъ.

Сті́хъ: Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.

Самѱѡ́новѣ лѣ́ности поревнова́вши, сла́вꙋ дѣ́лъ твои́хъ ѡ҆стри́гла є҆сѝ, дꙋшѐ, любосла́стїемъ преда́вши и҆ноплеме́нникѡмъ цѣломꙋ́дреннꙋю жи́знь и҆ бл҃же́ннꙋю.

Сті́хъ: Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.

Пре́жде че́люстїю ѻ҆́слею побѣди́вый и҆ноплеме́нники, ны́нѣ плѣ́нникъ сластолю́бїю стра́стномꙋ ѡ҆брѣ́тесѧ: но и҆збѣ́гни, дꙋшѐ моѧ̀, подража́нїѧ, дѣѧ́нїѧ и҆ сла́бости.

Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.

Вара́къ и҆ і҆ефѳа́й военача́льницы, сꙋдїи̑ і҆и҃лєвы предпочте́ни бы́ша, съ ни́миже дево́рра мꙋжеꙋ́мнаѧ: тѣ́хъ до́блестьми, дꙋшѐ, вмꙋжи́вшисѧ ᲂу҆крѣпи́сѧ.

Бл҃же́ни ми́лостивїи, ꙗ҆́кѡ ті́и поми́ловани бꙋ́дꙋтъ.

І҆аи́ли мꙋ́жество позна́ла є҆сѝ, дꙋшѐ моѧ̀, сїса́рꙋ дре́вле пробо́дшїѧ и҆ сп҃се́нїе содѣ́лавшїѧ дре́вомъ ѻ҆́стрымъ, слы́шиши, и҆́мже тебѣ̀ крⷭ҇тъ и҆з̾ѡбразꙋ́етсѧ.

Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.

Принесѝ, дꙋшѐ, же́ртвꙋ хвале́нїѧ: приведѝ дѣѧ́нїе ꙗ҆́кѡ дще́рь, і҆ефѳа́евы чистѣ́йшꙋю: и҆ заколѝ стра̑сти плотскі̑ѧ, ꙗ҆́кѡ же́ртвꙋ гдⷭ҇еви твоемꙋ̀.

Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.

Ѡ҆ гедеѡ́новѣ рꙋнѣ̀ помышлѧ́й, дꙋшѐ моѧ̀, съ нб҃сѐ ро́сꙋ прїимѝ, и҆ прини́кни ꙗ҆́коже пе́съ, и҆ пі́й во́дꙋ, ѿ зако́на текꙋ́щꙋю, писа́нїѧ и҆згнете́нїемъ.

Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

И҆лі́а сщ҃е́нника ѡ҆сꙋжде́нїе воспрїѧ́ла є҆сѝ, дꙋшѐ моѧ̀, лише́нїемъ ᲂу҆ма̀ прїѡбрѣ́тши стра̑сти себѣ̀, ꙗ҆́коже ѻ҆́нъ ча̑да, дѣ́лати беззакѡ́ннаѧ.

Бл҃же́ни є҆стѐ, є҆гда̀ поно́сѧтъ ва́мъ и҆ и҆зженꙋ́тъ, и҆ рекꙋ́тъ всѧ́къ зо́лъ глаго́лъ на вы̀ лжꙋ́ще менє̀ ра́ди.

Въ сꙋдїѧ́хъ леѵі́тъ, согла́сїѧ ра́ди, свою̀ женꙋ̀ двана́десѧтимъ колѣ́нѡмъ раздѣлѝ, дꙋшѐ моѧ̀, да скве́рнꙋ ѡ҆бличи́тъ ѿ венїамі́на беззако́ннꙋю.

Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Любоцѣломꙋ́дреннаѧ а҆́нна молѧ́щисѧ, ᲂу҆стнѣ̀ ᲂу҆́бѡ двиза́ше ко хвале́нїю, гла́съ же є҆ѧ̀ не слы́шашесѧ: но ѻ҆ба́че непло́дна сꙋ́щи, сы́на мл҃твы ражда́етъ досто́йна.

Помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.

Въ сꙋдїѧ́хъ и҆збра́нъ ꙗ҆ви́сѧ а҆́ннино порожде́нїе, вели́кїй самꙋ́илъ, є҆го́же воспита̀ а҆рмаѳе́ма въ домꙋ̀ гдⷭ҇ни: томꙋ̀ поревнꙋ́й, дꙋшѐ моѧ̀, и҆ сꙋдѝ пре́жде и҆нѣ́хъ дѣла̀ твоѧ̑.

Помѧнѝ на́съ, влⷣко, є҆гда̀ прїи́деши во црⷭ҇твїи твое́мъ.

Дв҃дъ, на ца́рство и҆збра́нъ, ца́рски пома́засѧ ро́гомъ бж҃е́ственнагѡ мѵ́ра: ты̀ ᲂу҆́бо, дꙋшѐ моѧ̀, а҆́ще хо́щеши вы́шнѧгѡ црⷭ҇твїѧ, мѵ́ромъ пома́жисѧ слеза́ми.

Помѧнѝ, на́съ ст҃ы́й, є҆гда̀ прїи́деши во црⷭ҇твїи твое́мъ.

Поми́лꙋй созда́нїе твоѐ, млⷭ҇тиве, ᲂу҆ще́дри рꙋкꙋ̀ твоє́ю творе́нїе: и҆ пощадѝ всѧ̑ согрѣши́вшыѧ и҆ менѐ, па́че всѣ́хъ твоѧ̑ повелѣ̑нїѧ презрѣ́вшаго.

Сла́ва, трⷪ҇ченъ: И҆ безнача́льномꙋ, и҆ ржⷭ҇твꙋ̀, и҆ происхожде́нїю: ѻ҆ц҃ꙋ̀ покланѧ́юсѧ ро́ждшемꙋ, сн҃а прославлѧ́ю рожде́ннаго, воспева́ю совозсїѧ́вшаго ѻ҆ц҃ꙋ́ и҆ сн҃ꙋ дх҃а ст҃а́го.

Бг҃оро́диченъ: Преесте́ственномꙋ ржⷭ҇твꙋ̀ твоемꙋ̀ покланѧ́емсѧ, по є҆стествꙋ̀ сла́вы млⷣнца твоегѡ̀ не раздѣлѧ́юще, бг҃ороди́тельнице: є҆ди́ный бо лице́мъ, сꙋгꙋ́бъ є҆стествы̀ и҆сповѣ́дꙋетсѧ.

Пѣ́снь з҃.

І҆рмо́съ: Согрѣши́хомъ, беззако́нновахомъ, непра́вдовахомъ пред̾ тобо́ю, нижѐ соблюдо́хомъ,нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆тцє́въ бж҃е.

Согрѣши́хъ, беззако́нновахъ, и҆ ѿверго́хъ за́повѣдь твою̀: занѐ во грѣсѣ́хъ произведо́хсѧ, и҆ приложи́хъ ꙗ҆́звамъ стрꙋ́пы себѣ̀. но са́мъ мѧ̀ поми́лꙋй, ꙗ҆́кѡ бл҃госе́рдъ, ѻ҆тцє́въ бж҃е.

Та̑йны се́рдца моегѡ̀ и҆сповѣ́дахъ тебѣ̀ сꙋдїѝ моемꙋ̀: ви́ждь моѐ смире́нїе, ви́ждь и҆ ско́рбь мою̀, и҆ вонмѝ сꙋдꙋ̀ моемꙋ̀ ны́нѣ, и҆ са́мъ мѧ̀ поми́лꙋй, ꙗ҆́кѡ бл҃госе́рдъ, ѻ҆тцє́въ бж҃е.

Саꙋ́лъ дре́вле, є҆гда̀ погꙋбѝ ѻ҆слѧ́та ѻ҆тца̀ своегѡ̀, внеза́пꙋ ѡ҆брѣ́те на ца́рство провозглаше́нїе: но ты̀ блюдѝ, дꙋшѐ, не забыва́й себѐ, скѡ́тскїѧ по́хѡти твоѧ̑ произволѧ́ющи па́че црⷭ҇тва хрⷭ҇то́ва.

Дв҃дъ бг҃оѻте́цъ а҆́ще нѣ́когда и҆ согрѣшѝ сꙋгꙋ́бѡ, стрѣло́ю ᲂу҆́бѡ ᲂу҆стрѣле́нъ бы́въ прелюбодѣ́йства, копїе́мъ же плѣне́нъ бы́въ ᲂу҆бі́йства томле́нїемъ: но ты̀, дꙋшѐ моѧ̀, сама̀ тѧжча́йшими дѣ́лы недꙋ́гꙋеши, самохо́тными стремле́ньми.

Совокꙋпѝ ᲂу҆́бѡ нѣ́когда дв҃дъ беззако́нїю беззако́нїе, со ᲂу҆бі́йствомъ любодѣ́йство раствори́въ, покаѧ́нїе же сꙋгꙋ́бое показа̀ а҆́бїе: но ты̀, дꙋшѐ, лꙋка́внѣйшее содѣ́лала є҆сѝ, не пока́ѧвшисѧ бг҃ꙋ.

Дв҃дъ нѣ́когда и҆з̾ѡбразѝ, ꙗ҆́кѡ на і҆кѡ́нѣ написа́въ пѣ́снь, є҆́юже сверше́нное и҆́мъ дѣѧ́нїе ѡ҆блича́етъ, зовы́й: поми́лꙋй мѧ̀, тебѣ́ бо є҆ди́номꙋ согрѣши́хъ всѣ́хъ бг҃ꙋ, са́мъ ѡ҆чи́сти мѧ̀.

Кївѡ́тъ внегда̀ ноша́шесѧ на колесни́цѣ, ѻ҆за̀ ѻ҆́ный, є҆гда̀ совра́щшꙋсѧ тельцꙋ̀, то́чїю коснꙋ́сѧ, и҆скꙋше́нъ бы́сть бж҃їимъ гнѣ́вомъ: но тогѡ̀ дерзнове́нїѧ ᲂу҆бѣжа́вши, дꙋшѐ, почита́й бж҃е́ствєннаѧ до́брѣ.

Слы́шала є҆сѝ ѡ҆ а҆вессалѡ́мѣ, ка́кѡ на є҆стество̀ воста̀: позна́ла є҆сѝ тогѡ̀ сквє́рнаѧ дѧ̑нїѧ, и҆́миже ѡ҆сквернѝ ло́же дв҃да ѻ҆тца̀. но ты̀ подража́ла є҆сѝ тогѡ̀ стра̑стнымъ и҆ любосла̑стнымъ стремле́нїємъ.

Покори́ла є҆сѝ непоработи́мое твоѐ досто́инство тѣ́лꙋ твоемꙋ̀: и҆но́го бо а҆хїтофе́ла ѡ҆брѣ́тши врага̀, дꙋшѐ, послꙋ́шала є҆сѝ тогѡ̀ совѣ́тѡвъ: но сїѧ̑ разсы́па са́мъ хрⷭ҇то́съ, да ты̀ всѧ́кѡ сп҃се́шисѧ.

Соломѡ́нъ чꙋ́дный и҆ бл҃года́ти премꙋ́дрости и҆спо́лненный, се́й лꙋка́вое нѣ́когда пред̾ бг҃омъ сотвори́въ, ѿстꙋпѝ ѿ негѡ̀: є҆мꙋ́же ты̀, дꙋшѐ, проклѧ́тымъ твои́мъ житїе́мъ, ᲂу҆подо́биласѧ є҆сѝ.

Сластьмѝ страсте́й свои́хъ влеко́мь ѡ҆сквернѧ́шесѧ: ᲂу҆вы̀ мнѣ̀, рачи́тель премꙋ́дрости рачи́тель блꙋ́дныхъ же́нъ ꙗ҆ви́сѧ, и҆ чꙋ́ждь ѿ бг҃а: є҆мꙋ́же ты̀ подража́ла є҆сѝ ᲂу҆мо́мъ, ѽ дꙋшѐ, сладостра́стьми стꙋ́дными.

Ровоа́мꙋ поревнова́ла є҆сѝ, дꙋшѐ, не послꙋ́шавшемꙋ совѣ́та ѻ҆́ч҃а, кꙋ́пнѡ же и҆ ѕлѣ́йшемꙋ рабꙋ̀ і҆еровоа́мꙋ, пре́жнемꙋ ѿстꙋ́пникꙋ. но бѣ́гай подража́нїѧ, и҆ зовѝ бг҃ꙋ: согрѣши́хъ, ᲂу҆ще́дри мѧ̀.

А҆хаа́вꙋ поревнова́ла є҆сѝ во скве́рнахъ, дꙋшѐ моѧ̀, ᲂу҆вы̀ мнѣ̀! была̀ є҆сѝ плотски́хъ скве́рнъ пребыва́лище и҆ сосꙋ́дъ сра́мленъ страсте́й: но и҆з̾ глꙋбины̀ твоеѧ̀ воздохнѝ, и҆ глаго́ли бг҃ꙋ грѣхѝ твоѧ̑.

Попалѝ и҆лїа̀ нѣ́когда два́жды пѧтьдесѧ́тъ і҆езаве́линыхъ, є҆гда̀ стꙋ̑дныѧ прⷪ҇ро́ки погꙋбѝ, во ѡ҆бличе́нїе а҆хаа́вово: но избѣга́й подража́нїѧ ѻ҆бои́мъ, дꙋшѐ, и҆ ᲂу҆крѣпи́сѧ.

Заключи́сѧ тебѣ̀ нб҃о, дꙋшѐ, и҆ гла́дъ бж҃їй пости́же тѧ̀, ꙗ҆́коже є҆гда̀ а҆хаа́въ словесє́мъ и҆лїѝ ѳесві́тѧнина не покори́сѧ нѣ́когда: но вдови́цѣ саре́птстѣй ᲂу҆подо́бисѧ, напита́й проро́чꙋ дꙋ́шꙋ.

Манассі́єва согрѣшє́нїѧ собрала̀ є҆сѝ, дꙋшѐ, и҆зволе́нїемъ, поста́вльши ꙗ҆́кѡ і҆́дѡлы стра̑сти,и҆ ᲂу҆мно́живши ме́рзѡсти: но тогѡ̀ покаѧ́нїю ревнꙋ́ющи те́плѣ, стѧжѝ ᲂу҆миле́нїе.

Припа́даю тѝ, и҆ приношꙋ̀ тебѣ̀ ꙗ҆́коже сле́зы глаго́лы моѧ̑: согрѣши́хъ, ꙗ҆́коже не согрѣшѝ блꙋдни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри влⷣко, творе́нїе твоѐ, и҆ призови́ мѧ.

Погребо́хъ ѡ҆́бразъ тво́й, сп҃се, и҆ разори́хъ за́повѣдь твою: помрачи́сѧ всѧ̀ добро́та, и҆ страстьмѝ ᲂу҆гаси́сѧ, свѣща̀. но ᲂу҆ще́дривъ возда́ждь мѝ, ꙗ҆́коже пое́тъ дв҃дъ, ра́дованїе.

Ѡ҆брати́сѧ, дꙋшѐ, пока́йсѧ, ѿкры́й сокровє́ннаѧ, глаго́ли бг҃ꙋ всѧ̑ вѣ́дꙋщемꙋ: ты̀ вѣ́си моѧ̑ та̑йнаѧ, є҆ди́не сп҃се: но са́мъ мѧ̀ поми́лꙋй, ꙗ҆́коже пое́тъ дв҃дъ, по млⷭ҇ти твое́й.

И҆счезо́ша дні́е моѝ ꙗ҆́кѡ со́нїе востаю́щагѡ: тѣ́мже ꙗ҆́кѡ є҆зекі́а пролива́ю сле́зы на ло́жи мое́мъ, приложи́тисѧ мнѣ̀ лѣ́тѡмъ житїѧ̀. но кі́й и҆са́їа предста́нетъ тебѣ̀ дꙋшѐ, а҆́ще не всѣ́хъ бг҃ъ;

Марі́и: Возопи́вши дре́вле ко пречⷭ҇тѣй бг҃омт҃ри, ѿри́нꙋла є҆сѝ неи́стовство страсте́й, жесто́цѣ стꙋжа́ющихъ, и҆ посрами́ла є҆сѝ врага̀ запе́ншаго: но да́ждь ны́нѣ по́мощь ѿ ско́рби и҆ мнѣ̀ рабꙋ̀ твоемꙋ̀.

Марі́и: Є҆го́же возлюби́ла є҆сѝ, є҆го́же возжелѣ́ла є҆сѝ, є҆гѡ́же ра́ди пло́ть и҆знꙋри́ла є҆сѝ, прпⷣбнаѧ, молѝ ны́нѣ хрⷭ҇та̀ ѡ҆ рабѣ́хъ: ꙗ҆́кѡ да млⷭ҇тивъ бы́въ всѣ̑мъ на́мъ, ми́рное состоѧ́нїе да́рꙋетъ почита́ющымъ є҆го̀.

А҆ндре́ю: На ка́мени вѣ́ры мл҃твами твои́ми ᲂу҆твердѝ мѧ̀, ѻ҆́тче, стра́хомъ бж҃е́ственнымъ мѧ̀ ѡ҆гражда́ѧ, и҆ покаѧ́нїе, а҆ндре́е, пода́ждь мѝ, ны́нѣ молю́сѧ тѝ: и҆ и҆зба́ви мѧ̀ ѿ сѣ́ти врагѡ́въ и҆́щꙋщихъ мѧ̀.

Трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋ́щнаѧ, є҆ди́ница ст҃а́ѧ, свѣ́тове и҆ свѣ́тъ, и҆ ст҃а трѝ и҆ є҆ди́но ст҃о, пое́тсѧ бг҃ъ трⷪ҇ца. но ты̀, дꙋшѐ, воспо́й, просла́ви жи́знь и҆ жи̑зни, всѣ́хъ бг҃а.

Бг҃оро́диченъ: Воспѣва́емъ тѧ̀, бл҃гослови́мъ тѧ̀, покланѧ́емсѧ тѝ, бг҃ороди́тельнице: ꙗ҆́кѡ є҆ди́наго ѿ нераздѣ́льныѧ трⷪ҇цы породила̀ є҆сѝ сн҃а и҆ бг҃а, и ѿве́рзла є҆сѝ на́мъ сꙋ́щымъ на землѝ нбⷭ҇наѧ.

Трипѣ́снецъ. Гла́съ и҃.

Пѣ́снь и҃.

І҆рмо́съ: Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте сщ҃е́нницы, лю́дїе превозноси́те во всѧ̑ вѣ́ки.

Ꙗ҆́кѡ ᲂу҆́глїе невеще́ственнагѡ ѻ҆гнѧ̀, а҆пⷭ҇ли, попали́те веще́ствєнныѧ стра̑сти моѧ̑,возжиза́юще ны́нѣ во мнѣ̀ жела́нїе бж҃е́ственныѧ любвѐ.

Трꙋбы̑ бл҃гогла̑сныѧ сло́ва почти́мъ, и҆́миже падо́ша стѣ́ны неꙋтверждє́ны вра̑жїѧ, и҆ ᲂу҆тверди́шасѧ забра̑ла бг҃овѣ́дѣнїѧ.

Стра̑стныѧ кꙋмі́ры дꙋшѝ моеѧ̀ сокрꙋши́те, а҆пⷭ҇ли гдⷭ҇ни, и҆̀же хра́мы и҆ столпы̀ врага̀ сокрꙋши́сте, хра́мове ѡ҆сщ҃е́ннїи.

Бг҃оро́диченъ: Вмѣсти́ла є҆сѝ невмѣсти́маго є҆стество́мъ: носи́ла є҆сѝ носѧ́щаго всѧ̑: млеко́мъ пита́ла є҆сѝ, чтⷭ҇аѧ, пита́ющаго тва́рь, хрⷭ҇та̀ жизнода́вца.

И҆́ный трипѣ́снецъ. І҆рмо́съ то́йже.

Дх҃а хꙋдо́жествомъ созда́вше всю̀ цр҃ковь, а҆пⷭ҇ли хрⷭ҇тѡ́вы, въ не́й бл҃гослови́те хрⷭ҇та̀ во вѣ́ки.

Вострꙋби́вше трꙋбо́ю ᲂу҆че́нїй, низверго́ша а҆пⷭ҇ли всю̀ ле́сть і҆́дѡльскꙋю, хрⷭ҇та̀ превозносѧ́ще во всѧ̑ вѣ́ки.

А҆пⷭ҇ли, до́брое сожи́тельство, назира́телїе мі́ра и҆ нбⷭ҇нїи жи́телїе, ва́съ при́снѡ восхвалѧ́ющыѧ и҆зба́вите ѿ бѣ́дъ.

Трⷪ҇ченъ: Трисо́лнечное всесвѣ́тлое бг҃онача́лїе, є҆диносла́вное и҆ є҆динопрⷭ҇то́льное є҆стество̀, ѻ҆́ч҃е вседѣ́телю, сн҃е и҆ бж҃е́ственный дш҃е, пою́ тѧ во вѣ́ки.

Бг҃оро́диченъ: Ꙗ҆́кѡ честны́й и҆ превы́шшїй прⷭ҇то́лъ, воспои́мъ бж҃їю мт҃рь непреста́ннѡ, лю́дїе, є҆ди́нꙋ по ржⷭ҇твѣ̀ мт҃рь и҆ дв҃ꙋ.

И҆́ный.

І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те и҆ превозноси́те во всѧ̑ вѣ́ки.

Согрѣши́вша мѧ, сп҃се, поми́лꙋй, воздви́гни мо́й ᲂу҆́мъ ко ѡ҆браще́нїю, прїими́ мѧ ка́ющасѧ,ᲂу҆ще́дри вопїю́ща: согрѣши́хъ тѝ, сп҃сѝ, беззако́нновахъ, поми́лꙋй мѧ̀.

Колесни́чникъ и҆лїа̀, колесни́цꙋ добродѣ́тельми вше́дъ, на нб҃са̀, возноша́шесѧ нѣ́когда ѿ земны́хъ: сегѡ̀ ᲂу҆̀бѡ, дꙋшѐ моѧ̀, восхожде́нїе помышлѧ́й.

І҆орда́нова стрꙋѧ̀ дре́вле, ми́лѡтїю и҆лїино́ю, чрез̾ є҆лїссе́а, ста̀ сю́дꙋ и҆ сю́дꙋ: ты́ же, ѽ дꙋшѐ моѧ̀, сеѧ̀ бл҃года́ти не причасти́ласѧ є҆сѝ за невоздержа́нїе.

Є҆лїссе́й нѣ́когда, прїе́мъ ми́лѡть и҆лїинꙋ̀, прїѧ́тъ сꙋгꙋ́бꙋю бл҃года́ть ѿ бг҃а: ты́ же, ѽ дꙋшѐ моѧ̀, сеѧ̀ бл҃года́ти не причасти́ласѧ є҆сѝ за невоздержа́нїе.

Сѡмані́тѧнынѧ нѣ́когда пра́веднаго ᲂу҆чредѝ, нра́вомъ бл҃ги́мъ: ты́ же, ѽ дꙋшѐ, не ввела̀ є҆сѝ въ до́мъ, ни стра́нна, ни пꙋ́тника, тѣ́мже ѿ черто́га и҆зри́нешисѧ во́нъ, рыда́ющи.

Гїезі́евꙋ ра́зꙋмꙋ скве́рномꙋ подража́ла є҆сѝ всегда̀, ѡ҆каѧ́ннаѧ дꙋшѐ, є҆гѡ́же сребролю́бїѧ ѿве́ржи понѐ на ста́рость: бѣ́гай гее́нскагѡ ѻ҆гнѧ̀, ѿстꙋпи́вши ѿ ѕлы́хъ твои́хъ.

Ты̀, дꙋшѐ, ѻ҆зі́и поревнова́вши, сегѡ̀ прокаже́нїе въ себѣ̀ стѧжа́ла є҆сѝ сꙋгꙋ́бѡ: безмѣ̑стнаѧ бо мы́слиши, беззакѡ́ннаѧ же дѣ́еши. ѡ҆ста́ви ꙗ҆̀же и҆́маши, и҆ притецы̀ къ покаѧ́нїю.

Ѡ҆ нїнеѵі́тѧнѣхъ, дꙋшѐ, слы́шала є҆сѝ, ка́ющихсѧ бг҃ꙋ во вре́тищи и҆ пе́пелѣ: си̑мъ не подража́ла є҆сѝ, но ꙗ҆ви́ласѧ є҆сѝ ѕлѣ́йши всѣ́хъ, пре́жде зако́на и҆ по зако́нѣ прегрѣши́вшихъ.

Слы́шала є҆сѝ ѡ҆ і҆еремі́и, дꙋшѐ, въ ро́вѣ ти́ннѣмъ ѡ҆ гра́дѣ сїѡ́нѣ рыда́ньми вопїю́щемъ и҆ сле́зъ и҆́щꙋщемъ: подража́й сегѡ̀ плаче́вномꙋ житїю̀ и҆ сп҃се́шисѧ.

І҆ѡ́на въ ѳарсі́съ ѿбѣжѐ, проразꙋмѣ́въ ѡ҆браще́нїе нїнеѵі́тѧнъ, разꙋмѣ́ бо ꙗ҆́кѡ прⷪ҇ро́къ бж҃їе бл҃госе́рдїе: тѣ́мже ревнова́ше прⷪ҇ро́чествꙋ не солга́тисѧ.

Ѡ҆ данїи́лѣ въ ро́вѣ слы́шала є҆сѝ, ѽ дꙋшѐ, ка́кѡ заградѝ ᲂу҆ста̀ ѕвѣре́й: ᲂу҆вѣ́дѣла є҆сѝ,ка́кѡ ѻ҆́троцы со а҆за́рїею погаси́ша вѣ́рою пла́мень пе́щи горѧ́щїй.

Ѿ ве́тхагѡ завѣ́та всѧ̑ приведо́хъ тѝ, дꙋшѐ, къ подо́бїю: подража́й бг҃олюби̑вымъ дѣѧ́нїємъ првⷣныхъ, и҆збѣ́гни же па́ки грѣхѡ́въ лꙋка́выхъ.

Правосꙋ́де сп҃се, поми́лꙋй и҆ и҆зба́ви мѧ̀ ѿ ѻ҆гнѧ̀ и҆ преще́нїѧ, є҆́же и҆́мамъ на сꙋдѣ̀ пра́веднѡ под̾ѧ́ти: ѡ҆сла́би мѝ пре́жде конца̀, добродѣ́телїю и҆ покаѧ́нїемъ.

Ꙗ҆́кѡ разбо́йникъ вопїю́ ти: помѧни́ мѧ. ꙗ҆́кѡ пе́тръ пла́чꙋ го́рцѣ. ѡ҆сла́би мѝ, сп҃се: зовꙋ̀ ꙗ҆́кѡ мыта́рь, слезю̀ ꙗ҆́кѡ блꙋдни́ца. прїимѝ моѐ рыда́нїе, ꙗ҆́коже нѣ́когда ханане́ино.

Гное́нїе смире́нныѧ моеѧ̀ дꙋшѝ, сп҃се, и҆сцѣлѝ: є҆ди́не врачꙋ̀, пла́стырь мнѣ̀ наложѝ, и҆ є҆ле́й и҆ вїно̀, дѣла̀ покаѧ́нїѧ, ᲂу҆миле́нїе со слеза́ми.

Ханане́и подража́ѧ, и҆ а҆́зъ вопїю̀ сн҃ꙋ дв҃довꙋ: поми́лꙋй мѧ̀. каса́юсѧ кра́ѧ ри́зы, ꙗ҆́коже кровоточи́ваѧ: пла́чꙋ, ꙗ҆́коже ма́рѳа и҆ марі́а над̾ ла́заремъ.

Сле́знꙋю стклѧ́ницꙋ и҆стощава́ѧ ꙗ҆́кѡ мѵ́ро на главꙋ̀, взыва́ю тѝ, сп҃се, ꙗ҆́коже блꙋдни́ца, млⷭ҇ти и҆́щꙋщаѧ, мольбꙋ̀ приношꙋ̀, и҆ ѡ҆ставле́нїе прошꙋ̀ прїѧ́ти мѝ.

А҆́ще и҆ никто́же ꙗ҆́коже а҆́зъ согрѣшѝ тебѣ̀, но ѻ҆ба́че прїимѝ и҆ менѐ, бл҃госе́рдый сп҃се,стра́хомъ ка́ющасѧ и҆ любо́вїю зовꙋ́ща: согрѣши́хъ тебѣ̀ є҆ди́номꙋ, беззако́нновахъ, поми́лꙋй мѧ̀.

Пощадѝ, сп҃се, твоѐ созда́нїе, и҆ взыщѝ ꙗ҆́кѡ па́стырь поги́бшее ѻ҆вча̀: заблꙋ́ждшаго и҆схитѝ ѿ во́лка, сотвори́ мѧ а҆́гнца во ста́дѣ твои́хъ ѻ҆ве́цъ.

Є҆гда̀ сѧ́деши, сꙋдїѐ, ꙗ҆́кѡ бл҃госе́рдъ, и҆ пока́жеши стра́шнꙋю сла́вꙋ твою̀, хрⷭ҇тѐ: ѽ кі́й стра́хъ тогда̀, пе́щи горѧ́щей, и҆ всѣ̑мъ боѧ́щымсѧ нестерпи́магѡ сꙋди́ща твоегѡ̀!

Марі́и: Свѣ́та незаходи́магѡ мт҃и тѧ̀ просвѣти́вши, ѿ ѡ҆мраче́нїѧ страсте́й разрѣшѝ: тѣ́мже воспрїи́мши дх҃а бл҃года́ть, просвѣтѝ, марі́е, тѧ̀ вѣ́рнѡ восхвалѧ́ющыѧ.

Марі́и: Чꙋ́до но́во вои́стиннꙋ ви́дѣвъ въ тебѣ̀, ма́ти, ᲂу҆жаса́шесѧ бж҃е́ственный зѡсі́ма: а҆́гг҃ла бо зрѧ́ше во пло́ти, и҆ ᲂу҆́жасомъ ве́сь и҆сполнѧ́шесѧ, воспѣва́ѧ хрⷭ҇та̀ во вѣ́ки.

А҆ндре́ю: Ꙗ҆́кѡ дерзнове́нїе и҆мы́й ко гдⷭ҇ꙋ, а҆ндре́е, кри́тꙋ честна́ѧ похвало̀, молю̀, моли́сѧ разрѣше́нїе ѿ ᲂу҆́зъ беззако́нїѧ ны́нѣ ѡ҆брѣстѝ мнѣ̀ мл҃твами твои́ми, покаѧ́нїѧ ᲂу҆чи́телю и҆ преподо́бныхъ сла́во.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Безнача́льне ѻ҆́ч҃е, сн҃е собезнача́льне, ᲂу҆тѣ́шителю бл҃гі́й, дш҃е пра́вый: сло́ва бж҃їѧ роди́телю, ѻ҆ц҃а̀ безнача́льна сло́ве, дш҃е живы́й и҆ зи́ждѧй, трⷪ҇це є҆ди́нице, поми́лꙋй мѧ̀.

Бг҃оро́диченъ: Внꙋ́трь во чре́вѣ твое́мъ, пречⷭ҇таѧ, мы́сленнаѧ порфѵ́ро є҆мманꙋ́илева, ꙗ҆́кѡ ѿ ѡ҆багре́нїѧ червлени́цы, пло́ть сои҆стка́сѧ: сегѡ̀ ра́ди тѧ бцⷣꙋ вои́стиннꙋ почита́емъ.

Хва́лимъ, бл҃гослови́мъ, покланѧ́емсѧ гдⷭ҇еви:

И҆ па́ки і҆рмо́съ.

Трипѣ́снецъ. Гла́съ и҃.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ сп҃се́ннїи тобо́ю, дв҃о чтⷭ҇аѧ, съ безпло́тными ли́ки тѧ̀ велича́юще.

И҆сто́чницы спаси́тельныѧ воды̀ ꙗ҆́вльшесѧ, а҆пⷭ҇ли, дꙋ́шꙋ мою̀ ѡ҆роси́те, и҆ста́ѧвшꙋю грѣха̀ жа́ждою.

Пла́вающаго въ пꙋчи́нѣ поги́бели, и҆ въ погрꙋже́нїи ᲂу҆жѐ сꙋ́ща, твое́ю десни́цею, ꙗ҆́коже петра̀, гдⷭ҇и, сп҃си́ мѧ.

Ꙗ҆́кѡ со́ль вкꙋ́сныхъ ᲂу҆че́нїй сꙋ́ще, гни́льство ᲂу҆ма̀ моегѡ̀ и҆зсꙋши́те, и҆ невѣ́дѣнїѧ тьмꙋ̀ ѿгони́те.

Бг҃оро́диченъ: Ꙗ҆́кѡ ра́дость роди́вшаѧ, влⷣчце, пла́чь мнѣ̀ пода́ждь, и҆́мже бж҃е́ственное ᲂу҆тѣше́нїе въ бꙋ́дꙋщемъ днѝ ѡ҆брѣстѝ возмогꙋ̀.

И҆́ный.

І҆рмо́съ: Тѧ̀ нб҃сѐ и҆ землѝ хода́таицꙋ:

Тѧ̀, бл҃госла́вное а҆пⷭ҇ль собра́нїе, пѣ́сньми велича́емъ: вселе́ннѣй бо свѣти̑ла свѣ̑тлаѧ ꙗ҆ви́стесѧ, прельще́нїе ѿгонѧ́юще.

є҆ѵⷢ҇льскою мре́жею ва́шею словє́сныѧ ры̑бы ᲂу҆ловлѧ́юще, сїѧ̑ приноси́те всегда̀ вь снѣ́дь хрⷭ҇тꙋ̀, а҆пⷭ҇ли бл҃же́ннїи.

Въ ва́шемъ къ бг҃ꙋ проше́нїи помѧни́те на́съ, а҆пⷭ҇ли, ѿ всѧ́кагѡ и҆скꙋше́нїѧ и҆зба́витисѧ, мо́лимсѧ, любо́вїю воспѣва́ющымъ ва́съ.

Трⷪ҇ченъ: Тѧ̀ трїѷпоста́снꙋю є҆ди́ницꙋ, ѻ҆́ч҃е и҆ сн҃е со дх҃омъ, є҆ди́наго бг҃а є҆диносꙋ́щна пою̀, трⷪ҇цꙋ є҆диноси́льнꙋю и҆ безнача́льнꙋю.

Бг҃оро́диченъ: Тѧ̀ дѣтороди́тельницꙋ и҆ дв҃ꙋ всѝ ро́ди ᲂу҆бл҃жа́емъ, ꙗ҆́кѡ тобо́ю и҆зба́влени ѿ клѧ́твы: ра́дость бо на́мъ родила̀ є҆сѝ гдⷭ҇а.

Вели́кагѡ канѡ́на.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нно є҆́сть, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.

Оу҆́мъ ѡ҆стрꙋпи́сѧ, тѣ́ло ѡ҆болѣ́знисѧ, недꙋ́гꙋетъ дꙋ́хъ, сло́во и҆знемо́же, житїѐ ᲂу҆мертви́сѧ, коне́цъ при две́рехъ. тѣ́мже, моѧ̀ ѡ҆каѧ́ннаѧ дꙋшѐ, что̀ сотвори́ши, є҆гда̀ прїи́детъ сꙋдїѧ̀ и҆спыта́ти твоѧ̑;

Мѡѷсе́ово приведо́хъ тѝ, дꙋшѐ, мїротворе́нїе, и҆ ѿ тогѡ̀ всѐ завѣ́тное писа́нїе, повѣ́дающее тебѣ̀ пра́вєдныѧ и҆ непра́вєдныѧ: ѿ ни́хже вторы̑мъ, ѽ дꙋшѐ, подража́ла є҆сѝ, а҆ не пє́рвымъ, пред̾ бг҃омъ согрѣши́вши.

Зако́нъ и҆знемо́же, пра́здно є҆́сть є҆ѵⷢ҇лїе, писа́нїе же всѐ въ тебѣ̀ небре́жно бы́сть, прⷪ҇ро́цы и҆знемого́ша, и҆ всѧ́кое пра́ведное сло́во: стрꙋ́пи твоѝ, ѽ дꙋшѐ, ᲂу҆мно́жишасѧ, не сꙋ́щꙋ врачꙋ̀ и҆сцѣлѧ́ющꙋ тѧ̀.

Но́вагѡ писа́нїѧ привождꙋ́ ти ᲂу҆каза̑нїѧ, вводѧ̑щаѧ тѧ̀, дꙋшѐ, ко ᲂу҆миле́нїю: пра́вєднымъ ᲂу҆́бо поревнꙋ́й, грѣ́шныхъ же ѿвраща́йсѧ, и҆ ᲂу҆ми́лостиви хрⷭ҇та̀ мл҃твами и҆ поще́ньми, и҆ чистото́ю, и҆ бл҃гоговѣ́нїемъ.

Хрⷭ҇то́съ вочл҃вѣ́чисѧ, призва́въ къ покаѧ́нїю разбо́йники и҆ блꙋдни̑цы: дꙋшѐ, пока́йсѧ, две́рь црⷭ҇твїѧ ѿве́рзесѧ ᲂу҆жѐ, и҆ предвосхища́ютъ є҆̀ фарїсе́є и҆ мытарѝ и҆ прелюбодѣ́и ка́ющїисѧ.

Хрⷭ҇то́съ вочл҃вѣ́чисѧ, пло́тїю прїѻбщи́всѧ мѝ, и҆ всѧ̑, є҆ли̑ка сꙋ́ть є҆стества̀, хотѣ́нїемъ и҆спо́лни, грѣха̀ кромѣ̀, поредпоказꙋ́ѧ тебѣ̀, ѽ дꙋшѐ, подо́бїе и҆ ѡ҆́бразъ своегѡ̀ снизхожде́нїѧ.

Хрⷭ҇то́съ волхвы̀ сп҃сѐ, па́стыри созва̀, младе́нєцъ мно́жєства показа̀ мч҃ники, ста́рцы просла́ви, и҆ ста́рꙋю вдови́цꙋ, и҆́хже не поревнова́ла є҆сѝ, дꙋшѐ, ни дѣѧ́нїємъ, ни житїю̀: но го́ре тебѣ̀, є҆гда̀ бꙋ́деши сꙋди́тисѧ.

Пости́всѧ гдⷭ҇ь дні́й четы́редесѧть въ пꙋсты́ни, послѣдѝ взалка̀, показꙋ́ѧ чл҃вѣ́ческое. дꙋшѐ, да не ᲂу҆ны́еши, а҆́ще тебѣ̀ приложи́тсѧ вра́гъ: мл҃твою же и҆ посто́мъ ѿ но́гъ твои́хъ да ѿрази́тсѧ.

Хрⷭ҇то́съ и҆скꙋша́емь быва́ше, дїа́волъ и҆скꙋша́ше, показꙋ́ѧ ка́менїе, да хлѣ́би бꙋ́дꙋтъ: на го́рꙋ возведѐ ви́дѣти всѧ̑ ца̑рствїѧ мі́ра во мгнове́нїи. бо́йсѧ, ѽ дꙋшѐ, ловле́нїѧ, трезви́сѧ, моли́сѧ на всѧ́кїй ча́съ бг҃ꙋ.

Го́рлица пꙋстынолю́бнаѧ возгласѝ, гла́съ вопїю́щагѡ, хрⷭ҇то́въ свѣти́льникъ, проповѣ́дꙋѧй покаѧ́нїе: но и҆́рѡдъ беззако́ннова со и҆рѡдїа́дою. блюдѝ, дꙋшѐ моѧ̀, да не ᲂу҆вѧ́знеши въ сѣ́ти беззако́нныхъ, но ѡ҆блобыза́й покаѧ́нїе.

Въ пꙋсты́ню всели́сѧ прⷣте́ча бл҃года́ти, и҆ і҆ꙋде́а всѧ̀ и҆ самарі́а слы́шавше и҆дѧ́хꙋ и҆ и҆сповѣ́дахꙋ грѣхѝ своѧ̑, креща́ющесѧ ᲂу҆се́рднѡ: и҆́мже ты̀ не подража́ла є҆сѝ, дꙋшѐ.

Бра́къ ᲂу҆́бѡ че́стенъ, и҆ ло́же нескве́рно: ѻ҆боѧ̑ бо хрⷭ҇то́съ пре́жде бл҃гословѝ, пло́тїю ꙗ҆ды́й, и҆ въ ка́нѣ на бра́цѣ во́дꙋ вїно̀ соверша́ѧ, и҆ показꙋ́ѧ пе́рвое чꙋ́до: да ты̀ и҆змени́шисѧ, ѽ дꙋшѐ.

Разсла́бленнаго стѧгнꙋ̀ хрⷭ҇то́съ, ѻ҆́дръ взе́мша: и҆ ю҆́ношꙋ ᲂу҆ме́рша воздви́же, вдови́че рожде́нїе, и҆ со́тнича ѻ҆́трока: и҆ самарѧны́ни ꙗ҆вле́й́сѧ, въ дꙋ́сѣ слꙋ́жбꙋ тебѣ̀, дꙋшѐ, предживописа̀.

Кровоточи́вꙋю и҆сцѣлѝ прикоснове́нїемъ кра́ѧ ри́зна гдⷭ҇ь: прокажє́нныѧ ѡ҆чи́сти: слѣпы̑ѧ и҆ хромы̑ѧ просвѣти́въ, и҆спра́ви: глꙋхі̑ѧ же и҆ нѣмы̑ѧ и҆ нича́щꙋю ни́зꙋ и҆сцѣлѝ сло́вомъ: да ты̀ сп҃се́шисѧ, ѡ҆каѧ́ннаѧ дꙋшѐ.

Недꙋ́ги и҆сцѣлѧ́ѧ, ни́щымъ бл҃говѣствова́ше хрⷭ҇то́съ сло́во: хромы̑ѧ ᲂу҆врачева̀, съ мытарѝ ꙗ҆дѧ́ше, со грѣ̑шники бесѣ́доваше: і҆аі́ровы дще́ре дꙋ́шꙋ пред̾ꙋме́ршꙋю возвратѝ прикоснове́нїемъ рꙋкѝ.

Мыта́рь сп҃са́шесѧ, и҆ блꙋдни́ца цѣломꙋ́дрствоваше, фарїсе́й же хвалѧ́сѧ ѡ҆сꙋжда́шесѧ. ѻ҆́въ ᲂу҆́бѡ млⷭ҇тивъ бꙋ́ди мѝ: ѻ҆́ва же: поми́лꙋй мѧ̀. се́й же велича́шесѧ, вопїѧ̀: бж҃е, бл҃годарю́ тѧ: и҆ про́чыѧ безꙋ̑мныѧ глаго́лы.

Закхе́й мыта́рь бѣ̀, но ѻ҆ба́че сп҃са́шесѧ, и҆ фарїсе́й сі́мѡнъ соблажнѧ́шесѧ, и҆ блꙋдни́ца прїи́мше ѡ҆ста́витєльнаѧ разрѣшє́нїѧ ѿ и҆мꙋ́щагѡ си́лꙋ ѡ҆ставлѧ́ти грѣхѝ: то́й потщи́сѧ, дꙋшѐ, подража́ти.

Блꙋдни́цѣ, ѽ ѡ҆каѧ́ннаѧ дꙋшѐ моѧ̀, не поревнова́ла є҆сѝ, ꙗ҆́же прїи́мши мѵ́ра а҆лава́стръ, со слеза́ми пома́за и҆ власмѝ ѡ҆трѐ но́зѣ гдⷭ҇ꙋ, пре́жнихъ согрѣше́нїй є҆ѧ̀ рꙋкописа́нїе раздира́ющемꙋ.

Гра́ды, и҆̀мже дадѐ хрⷭ҇то́съ бл҃говѣ́стїе, дꙋшѐ моѧ̀, ᲂу҆вѣ́дала є҆сѝ, ка́кѡ про́клѧти бы́ша. ᲂу҆бо́йсѧ ᲂу҆каза́нїѧ, да не бꙋ́деши ꙗ҆́коже ѻ҆́ни: ты̑ѧ, бо содо́млѧнѡмъ ᲂу҆подо́бивъ, влⷣка да́же до а҆́да ѡ҆сꙋдѝ.

Да не го́ршаѧ, ѽ дꙋшѐ моѧ̀, ꙗ҆ви́шисѧ ѿча́ѧнїемъ, ѡ҆ вѣ́рѣ ханане́и слы́шавшаѧ, є҆ѧ́же ра́ди дщѝ сло́вомъ бж҃їимъ и҆сцѣли́сѧ. сн҃е дв҃довъ, сп҃сѝ и҆ менѐ, воззовѝ и҆з̾ глꙋбины̀ се́рдца, ꙗ҆́коже ѻ҆на̀ хрⷭ҇тꙋ̀.

Оу҆милосе́рдисѧ, сп҃си́ мѧ, сн҃е дв҃довъ, поми́лꙋй, бѣснꙋ́ющыѧсѧ сло́вомъ и҆сцѣли́вый, гла́съ же бл҃госе́рдый ꙗ҆́кѡ разбо́йникꙋ мнѣ̀ рцы̀: а҆ми́нь глаго́лю тебѣ̀, со мно́ю бꙋ́деши въ раѝ, є҆гда̀ прїидꙋ̀ во сла́вѣ мое́й.

Разбо́йникъ хꙋ́лѧше тѧ̀, разбо́йникъ бг҃осло́вѧше тѧ̀, ѻ҆́ба бо на крⷭ҇тѣ̀ съ тобо́ю ви́сѧста: но,ѽ многомлⷭ҇тиве, ꙗ҆́кѡ вѣ́рномꙋ разбо́йникꙋ твоемꙋ̀, позна́вшемꙋ тѧ̀ бг҃а, и҆ мнѣ̀ ѿве́рзи две́рь сла́внагѡ црⷭ҇твїѧ твоегѡ̀.

Тва́рь содрога́шесѧ распина́ема тѧ̀ ви́дѧщи, го́ры и҆ ка́мєнїѧ стра́хомъ распада́хꙋсѧ, и҆ землѧ̀ сотрѧса́шесѧ, и҆ а҆́дъ ѡ҆бнажа́шесѧ, и҆ соѡмрача́шесѧ свѣ́тъ во днѝ, зрѧ̀ тебѐ, і҆и҃се, пригвожде́нна пло́тїю.

Досто́йныхъ покаѧ́нїѧ плодѡ́въ не и҆стѧжѝ ѿ менє̀, и҆́бо крѣ́пость моѧ̀ во мнѣ̀ ѡ҆скꙋдѣ̀: се́рдце мнѣ̀ да́рꙋй при́снѡ сокрꙋше́нное, нищетꙋ́ же дх҃о́внꙋю, да сїѧ̑ тебѣ̀ принесꙋ̀, ꙗ҆́кѡ прїѧ́тнꙋю же́ртвꙋ, є҆ди́не сп҃се.

Сꙋдїѐ мо́й и҆ вѣ́дче мо́й, хотѧ́й па́ки прїитѝ со а҆́гг҃лы сꙋди́ти мі́рꙋ всемꙋ̀, млⷭ҇тивнымъ твои́мъ ѻ҆́комъ тогда̀ ви́дѣвъ мѧ̀ пощадѝ, и҆ ᲂу҆ще́дри мѧ̀, і҆и҃се, па́че всѧ́кагѡ є҆стества̀ человѣ́ча согрѣши́вша.

Марі́и: Оу҆диви́ла є҆сѝ стра́ннымъ житїе́мъ твои́мъ всѧ̑ а҆́гг҃лѡвъ чи́ны и҆ человѣ́кѡвъ собо́ры, невеще́ственнѡ пожи́вши, и҆ є҆стество̀ превозше́дши: сегѡ̀ ра́ди, ꙗ҆́кѡ невеще́ственнаѧ марі́е, нога́ма вше́дши і҆орда́нъ прешла̀ є҆сѝ.

Марі́и: Оу҆ми́лостиви созда́телѧ ѡ҆ хва́лѧщихъ тѧ̀, прпⷣбнаѧ ма́ти, и҆зба́витисѧ ѿ ѡ҆ѕлобле́нїй и҆ скорбе́й, ѡ҆́крестъ напа́дающихъ, да и҆зба́вившесѧ ѿ напа́стей, непреста́ннѡ велича́емъ просла́вившаго тѧ̀ гдⷭ҇а.

А҆ндре́ю: А҆ндре́е честны́й и҆ ѻ҆́тче требл҃же́ннѣйшїй, па́стырю кри́тскїй, не преста́й молѧ́сѧ ѡ҆ воспѣва́ющихъ тѧ̀, да и҆зба́вимсѧ всѝ ѿ гнѣ́ва и҆ ско́рби и҆ тлѣ́нїѧ, свободи́мсѧ ѿ прегрѣше́нїй, чтꙋ́щїи твою̀ па́мѧть вѣ́рнѡ.

Трⷪ҇ченъ: Трⷪ҇це є҆диносꙋ́щнаѧ, є҆ди́нице трїѷпоста́снаѧ, тѧ̀ воспѣва́емъ, ѻ҆ц҃а̀ сла́вѧще, сн҃а велича́юще и҆ дх҃ꙋ покланѧ́ющесѧ, є҆ди́номꙋ є҆стество́мъ вои́стиннꙋ бг҃ꙋ, жи́зни и҆ жи́знемъ, црⷭ҇твꙋ безконе́чномꙋ.

Бг҃оро́диченъ: Гра́дъ тво́й сохранѧ́й, бг҃ороди́тельнице пречⷭ҇таѧ: въ тебѣ́ бо се́й вѣ́рнѡ ца́рствꙋѧ, въ тебѣ̀ и҆ ᲂу҆твержда́етсѧ, и҆ тобо́ю побѣжда́ѧ, побѣжда́етъ всѧ́кое и҆скꙋше́нїе, и҆ плѣнѧ́етъ сꙋпоста́ты, и҆ ᲂу҆строѧ́етъ владѡ́мыѧ.

И҆ а҆́бїе і҆рмо́съ. Свѣти́ленъ, ꙗ҆́кѡ ѡ҆бы́чно.

На стїхо́внѣ самогла́сенъ, два́жды, гла́съ и҃:

Въ разбо́йничєскаѧ нападє́нїѧ впа́дши, дꙋшѐ моѧ̀, лю́тѣ ᲂу҆ѧ́звлена є҆сѝ, ѿ свои́хъ согрѣше́нїй предана́ бы́вши неразꙋ̑мнымъ врагѡ́мъ. но ꙗ҆́кѡ и҆мꙋ́щаѧ вре́мѧ во ᲂу҆миле́нїи возопі́й: ᲂу҆пова́нїе ненаде́жныхъ, жи́знь ѿча́ѧвшихсѧ, сп҃се, возста́ви и҆ сп҃си́ мѧ.

Мч҃нченъ: Во брѡнѧ̀ вѣ́ры ѡ҆бо́лкшесѧ до́брѣ и҆ ѡ҆́бразомъ крⷭ҇та̀ воѡрꙋжи́вше себѐ, во́ини бл҃гомо́щнїи показа́стесѧ: мꙋчи́телємъ мꙋ́жески проти́вистесѧ, и҆ дїа́воле прельще́нїе потреби́сте: побѣди́телє бы́вше, вѣнцє́въ сподо́бистесѧ. моли́тесѧ при́снѡ ѡ҆ на́съ сп҃сти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ:

Прїимѝ гла́сы ра̑бъ твои́хъ, всечⷭ҇таѧ бцⷣе дв҃о, и҆ молѝ непреста́ннѡ, грѣхѡ́въ разрѣше́нїю и҆ ми́рꙋ дарова́тисѧ на́мъ.

Совокꙋплѧ́емъ же и҆ а҃-й ча́съ, без̾ стїхосло́вїѧ. По трист҃о́мъ, на всѣ́хъ часѣ́хъ конда́къ: Дꙋшѐ моѧ̀, дꙋшѐ моѧ̀:

На г҃-мъ часѣ̀ каѳі́сма ѳ҃-ѧ, на ѕ҃-мъ і҃-ѧ.

На ѕ҃-мъ же часѣ̀, тропа́рь прⷪ҇ро́чества, гла́съ ѕ҃:

Бл҃госе́рде, долготерпѣли́ве, вседержи́телю гдⷭ҇и, низпослѝ млⷭ҇ть твою̀ на лю́ди твоѧ̑.

Прокі́менъ, ѱало́мъ ч҃ѕ, гла́съ ѕ҃: Гдⷭ҇ь воцр҃и́сѧ, да ра́дꙋетсѧ землѧ̀.

Сті́хъ: Да веселѧ́тсѧ ѻ҆́строви мно́зи.

Прⷪ҇ро́чества и҆са́їина чте́нїе. [Глава̀ м҃в, ст. є҃-ѕ҃і].

Та́кѡ глаго́летъ гдⷭ҇ь бг҃ъ, сотвори́вый нб҃о и҆ водрꙋзи́вый є҆̀, ᲂу҆твержде́й зе́млю и҆ ꙗ҆̀же на не́й, и҆ даѧ́й дыха́нїе лю́демъ, и҆̀же на не́й, и҆ дꙋ́хъ ходѧ́щымъ на не́й: а҆́зъ гдⷭ҇ь бг҃ъ призва́хъ тѧ̀ въ пра́вдѣ, и҆ ᲂу҆держꙋ̀ за рꙋ́кꙋ твою̀, и҆ ᲂу҆крѣплю̀ тѧ̀: и҆ да́хъ тѧ̀ въ завѣ́тъ ро́да і҆и҃лева, во свѣ́тъ ꙗ҆зы́кѡвъ, ѿве́рсти ѻ҆́чи слѣпы́хъ, и҆звестѝ ѿ ᲂу҆́зъ свѧ̑занныѧ, и҆ и҆з̾ до́мꙋ темни́цы, и҆ сѣдѧ́щыѧ во тьмѣ̀. А҆́зъ гдⷭ҇ь бг҃ъ, сїѐ моѐ є҆́сть и҆́мѧ: сла́вы моеѧ̀ и҆но́мꙋ не да́мъ, нижѐ добродѣ́телей мои́хъ и҆стꙋка̑ннымъ. Ꙗ҆̀же и҆з̾ нача́ла, сѐ прїидо́ша: и҆ нѡ́ваѧ, ꙗ҆̀же а҆́зъ возвѣщꙋ̀, и҆ пре́жде не́же возвѣсти́ти, ꙗ҆ви́шасѧ ва́мъ. Воспо́йте гдⷭ҇еви пѣ́снь но́вꙋ: нача́льство є҆гѡ̀, просла́вите и҆́мѧ є҆гѡ̀ ѿ конє́цъ землѝ, сходѧ́щїи въ мо́ре и҆пла́вающїи по немꙋ̀, ѻ҆́строви и҆ живꙋ́щїи на ни́хъ. Возвесели́сѧ, пꙋсты́не, и҆ вє́си є҆ѧ̀, придвѡ́рїѧ, и҆ живꙋ́щїи въ кида́рѣ: возвеселѧ́тсѧ живꙋ́щїи на ка́мени, ѿ кра́ѧ го́ръ возопїю́тъ.Дадѧ́тъ бг҃ꙋ сла́вꙋ, добродѣ́тєли є҆гѡ̀ во ѻ҆́стровѣхъ возвѣстѧ́тъ. Гдⷭ҇ь бг҃ъ си́лъ и҆зы́детъ и҆ сокрꙋши́тъ ра́ть, воздви́гнетъ рве́нїе и҆ возопїе́тъ на врагѝ своѧ̑ съ крѣ́постїю. Молча́хъ, є҆да̀ и҆ всегда̀ ᲂу҆молчꙋ̀ и҆ потерплю̀; Терпѣ́хъ ꙗ҆́кѡ ражда́ющаѧ, и҆стреблю̀ и҆ и҆зсꙋшꙋ̀ вкꙋ́пѣ: ѡ҆пꙋстошꙋ̀ го́ры и҆ хо́лмы, и҆ всѧ́кꙋ травꙋ̀ и҆́хъ и҆зсꙋшꙋ̀, и҆ положꙋ̀ рѣ́ки во ѻ҆́стровы, и҆ лꙋ́ги и҆зсꙋшꙋ̀. И҆ наведꙋ̀ слѣпы̑ѧ на пꙋ́ть, є҆го́же не ви́дѣша, и҆ по стезѧ́мъ, и҆́хже не зна́ша, ходи́ти сотворю̀ и҆̀мъ: сотворю̀ и҆̀мъ тьмꙋ̀ во свѣ́тъ, и҆ стро́пѡтнаѧ въ пра̑ваѧ: сїѧ̑ глаго́лы сотворю̀, и҆ не ѡ҆ста́влю и҆́хъ.

Прокі́менъ, ѱало́мъ ч҃з, гла́съ ѕ҃: Воспо́йте гдⷭ҇еви пѣ́снь но́вꙋ, ꙗ҆́кѡ ди̑вна сотворѝ гдⷭ҇ь, сп҃сѐ є҆го̀ десни́ца є҆гѡ̀. Сті́хъ: Ви́дѣша всѝ концы̀ землѝ сп҃се́нїе бг҃а на́шегѡ.

На ѳ҃-мъ часѣ̀ каѳі́сма а҃і.

Въ четверто́къ ве́чера,

по предначина́тельнѣмъ стїхосло́вимъ, вмѣ́стѡ: Ко гдⷭ҇ꙋ, внегда̀ скорбѣ́ти мѝ: каѳі́смꙋ в҃і.Кле́плетъ же свѣти́льничное поско́рѡ, трꙋда̀ ра́ди бдѣ́ннагѡ. На Гдⷭ҇и воззва́хъ, поста́вимъ стїхѡ́въ і҃.

И҆ пое́мъ самогла́сенъ, два́жды, гла́съ и҃:

Самовла́стнѡ совлеко́хсѧ, пе́рвымъ мои́мъ престꙋпле́нїемъ, добродѣ́телей бл҃голѣ́пїѧ: ѡ҆блеко́хсѧ же въ сїѐ па́ки, снизхожде́нїемъ твои́мъ ко мнѣ̀, сло́ве бж҃їй. не презрѣ́лъ бо мѧ̀ є҆сѝ въ лю́тыхъ страсте́хъ и҆з̾ѧ́звлена и҆ разбо́йнически на пꙋтѝ попра́на: но всекрѣ́пкою твое́ю си́лою снабдѣ́въ мѧ̀, застꙋпле́нїѧ сподо́билъ є҆сѝ, многомлⷭ҇тиве.

Мч҃нченъ: Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ ѿ сѣте́й вра́жїихъ дꙋша́мъ на́шымъ, мо́лимсѧ.

И҆́ны стїхи̑ры, гла́съ а҃.

Подо́бенъ: Прехва́льнїи мч҃нцы:

Пригвожда́емь на крⷭ҇тѣ̀, гдⷭ҇и, а҆да́мово рꙋкописа́нїе бж҃е́ственнымъ копїе́мъ раздра́лъ є҆сѝ: тѣ́мже расто́ргни ᲂу҆́зы моѧ̑, сло́ве, ꙗ҆́кѡ да принесꙋ̀ тебѣ̀ вѣ́рою же́ртвꙋ хвале́нїѧ, ра́дꙋѧсѧ,вре́мѧ бл҃гопрїѧ́тное поста̀ ны́нѣ ѡ҆брѣ́тъ, є҆́же всѣ́мъ во сп҃се́нїе показа́лъ є҆сѝ.

Поще́нїѧ свѣ́тлостїю сїѧ́ѧ, дре́вле мѡѷсе́й сла́вꙋ бж҃їю ви́дѣ: семꙋ̀ поревнова́вши смире́ннаѧ дꙋшѐ моѧ̀, на крⷭ҇тѣ̀ распросте́ршемꙋ дла̑ни тебє̀ ра́ди бл҃гостїю ᲂу҆годѝ дѣ́лы воздержа́нїѧ и҆ мл҃твы, ꙗ҆́кѡ да полꙋчи́ши бж҃е́ственное наслажде́нїе.

И҆́на стїхи́ра, гла́съ ѕ҃.

Подо́бенъ: А҆рха́гг҃льски воспои́мъ:

Животворѧ́щемꙋ покланѧ́ющесѧ твоемꙋ̀ крⷭ҇тꙋ̀, неизрече́нныѧ къ на́мъ безмѣ́рныѧ твоеѧ̀ бл҃гости,хрⷭ҇тѐ, и҆ тѣ́мъ просвѣти́вше дꙋ́шы, воспѣва́емъ тѧ̀ непреста́ннѡ, просѧ́ще бл҃годꙋ́шнѡ, въ ра́дости сконча́ти по́прище поще́нїѧ и҆ дости́гнꙋти стрⷭ҇ти твоѧ̑ воспѣ́ти, гдⷭ҇и, и҆́миже спа́слъ є҆сѝ ны̀.

И҆ въ мине́и, д҃. Сла́ва, и҆ ны́нѣ, крⷭ҇тобг҃оро́диченъ.

Вхо́дъ. Свѣ́те ти́хїй:

Прокі́менъ, ѱало́мъ ч҃и, гла́съ з҃: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть. Сті́хъ: Гдⷭ҇ь воцр҃и́сѧ, да гнѣ́ваютсѧ лю́дїе.

Бытїѧ̀ чте́нїе. [Глава̀ и҃і, ст. к҃-л҃г].

Речѐ гдⷭ҇ь: во́пль содо́мскїй и҆ гомо́ррскїй ᲂу҆мно́жисѧ ко мнѣ̀, и҆ грѣсѝ и҆́хъ вели́цы ѕѣлѡ̀: соше́дъ ᲂу҆̀бо ᲂу҆зрю̀, а҆́ще по во́плю и҆́хъ грѧдꙋ́щемꙋ ко мнѣ̀, соверша́ютсѧ: а҆́ще же нѝ, да разꙋмѣ́ю. И҆ ѡ҆брати́вшесѧ ѿтꙋ́дꙋ мꙋ́жїе, прїидо́ша въ содо́мъ: а҆враа́мъ же є҆щѐ бѧ́ше стоѧ́й пред̾ гдⷭ҇емъ. И҆ прибли́живсѧ а҆враа́мъ речѐ: погꙋби́ши ли првⷣнаго съ нечести́вымъ, и҆ бꙋ́детъ првⷣникъ ꙗ҆́кѡ нечести́вый; А҆́ще бꙋ́дꙋтъ пѧтьдесѧ́тъ првⷣницы во гра́де погꙋби́ши ли ѧ҆̀; не пощади́ши ли всегѡ̀ мѣ́ста пѧти́десѧти ра́ди првⷣныхъ, а҆́ще бꙋ́дꙋтъ въ не́мъ; Ника́коже ты̀ сотвори́ши по глаго́лꙋ семꙋ̀, є҆́же ᲂу҆би́ти првⷣника съ нечести́вымъ: и҆ бꙋ́детъ првⷣникъ ꙗ҆́кѡ нечести́вый: ника́коже. Сꙋдѧ́й все́й землѝ, не сотвори́ши ли сꙋда̀; Рече́ же гдⷭ҇ь: а҆́ще бꙋ́дꙋтъ въ содо́мѣхъ пѧтьдесѧ́тъ првⷣницы во гра́дѣ, ѡ҆ста́влю ве́сь гра́дъ и҆ всѐ мѣ́сто и҆́хъ ра́ди. И҆ ѿвѣща́въ а҆враа́мъ речѐ: ны́нѣ нача́хъ глаго́лати ко гдⷭ҇ꙋ моемꙋ̀, а҆́зъ же є҆́смь землѧ̀ и҆ пе́пелъ: а҆́ще же ᲂу҆ма́лѧтсѧ пѧтьдесѧ́тъ првⷣницы въ четы́редесѧть пѧ́ть, погꙋби́ши ли четы́редесѧти пѧти́хъ ра́ди ве́сь гра́дъ; и҆ речѐ: не погꙋблю̀, а҆́ще ѡ҆брѧ́щꙋ та́мѡ четы́редесѧть пѧ́ть. И҆ приложѝ є҆щѐ глаго́лати къ немꙋ̀, и҆ речѐ: а҆́ще же ѡ҆брѧ́щꙋтсѧ та́мѡ четы́редесѧть; И҆ речѐ: не погꙋблю̀ ра́ди четы́редесѧти. И҆ речѐ: что̀, гдⷭ҇и, а҆́ще возглаго́лю: а҆́ще же ѡ҆брѧ́щетсѧ та́мѡ три́десѧть; И҆ речѐ: не погꙋблю̀ три́десѧтихъ ра́ди. И҆ речѐ: поне́же и҆́мамъ глаго́лати ко гдⷭ҇ꙋ: а҆́ще же ѡ҆брѧ́щꙋтсѧ та́мѡ два́десѧть; И҆ речѐ: не погꙋблю̀, а҆́ще ѡ҆брѧ́щꙋтсѧ та́мѡ два́десѧть. И҆ речѐ: что̀, гдⷭ҇и, а҆́ще возглаго́лю є҆щѐ є҆ди́ною; а҆́ще же ѡ҆брѧ́щꙋтсѧ та́мѡ де́сѧть; И҆ речѐ: не погꙋблю̀ десѧти́хъ ра́ди. Ѿи́де же гдⷭ҇ь, ꙗ҆́кѡ преста̀ глаго́лѧ ко а҆враа́мꙋ: и҆ а҆враа́мъ возврати́сѧ на мѣ́сто своѐ.

Прокі́менъ, ѱало́мъ ч҃ѳ, гла́съ ѕ҃: Воскли́кните гдⷭ҇еви, всѧ̀ землѧ̀. Сті́хъ: Рабо́тайте гдⷭ҇еви въ весе́лїи.

При́тчей чте́нїе. [Глава̀ ѕ҃і, ст. з҃і-л҃г: глава̀ з҃і, ст. а҃-з҃і].

Прїе́млѧй наказа́нїе во бл҃ги́хъ бꙋ́детъ: хранѧ́й же ѡ҆бличє́нїѧ, ᲂу҆мꙋдри́тсѧ. И҆́же храни́тъ своѧ̑ пꙋти̑, соблюда́етъ свою̀ дꙋ́шꙋ: любѧ́й же живо́тъ сво́й, щади́тъ своѧ̑ ᲂу҆ста̀. Пре́жде сокрꙋше́нїѧ предварѧ́етъ досажде́нїе, пре́жде же паде́нїѧ, ѕлопомышле́нїе. Лꙋ́чше кроткодꙋ́шенъ со смире́нїемъ, не́жели и҆́же раздѣлѧ́етъ коры̑сти съ досади́тельми. Разꙋ́мный въ ве́щехъ ѡ҆брѣта́тель бл҃ги́хъ: надѣ́ѧйсѧ же на гдⷭ҇а бл҃же́нъ. Премꙋ̑дрыѧ и҆ разꙋ̑мныѧ ѕлы́ми нари́чꙋтъ: сла́дцїи же въ словесѝ, мно́жае ᲂу҆слы́шани бꙋ́дꙋтъ. И҆сто́чникъ живо́тенъ ра́зꙋмъ стѧжа́вшымъ: наказа́нїе же безꙋ́мныхъ ѕло̀. Се́рдце премꙋ́драгѡ ᲂу҆разꙋмѣ́етъ ꙗ҆̀же ѿ свои́хъ є҆мꙋ̀ ᲂу҆́стъ, во ᲂу҆стна́хъ же но́ситъ ра́зꙋмъ. Со́тове медо́внїи, словеса̀ дѡ́браѧ, сла́дость же и҆́хъ и҆сцѣле́нїе дꙋшѝ. Сꙋ́ть пꙋтїѐ мнѧ́щїисѧ пра́ви бы́ти мꙋ́жꙋ, ѻ҆ба́че послѣ̑днѧѧ и҆́хъ зрѧ́тъ во дно̀ а҆́дово. Мꙋ́жъ въ трꙋдѣ́хъ трꙋжда́етсѧ себѣ̀ и҆ и҆знꙋжда́етъ поги́бель свою̀: стропти́вый во свои́хъ ᲂу҆стѣ́хъ но́ситъ поги́бель. Мꙋ́жъ безꙋ́менъ копа́етъ себѣ̀ ѕла̑ѧ и҆ во ᲂу҆стна́хъ свои́хъ сокро́виществꙋетъ ѻ҆́гнь. Мꙋ́жъ стропти́вый разсыла́етъ ѕла̑ѧ, и҆ свѣти́льникъ льстѝ вжига́етъ ѕлы̑мъ, и҆ разлꙋча́етъ дрꙋ́ги. Мꙋ́жъ законопрестꙋ́пенъ прельща́етъ дрꙋ́ги и҆ ѿво́дитъ и҆́хъ въ пꙋти̑ не бла̑ги. ᲂу҆твержда́ѧй ѻ҆́чи своѝ мы́слитъ развращє́ннаѧ, грызы́й же ᲂу҆стнѣ̀ своѝ ѡ҆предѣлѧ́етъ всѧ̑ ѕла̑ѧ: се́й пе́щь є҆́сть ѕло́бы. Вѣне́цъ хвалы̀ ста́рость: на пꙋте́хъ же пра́вды ѡ҆брѣта́етсѧ. Лꙋ́чше мꙋ́жъ долготерпѣли́въ па́че крѣ́пкагѡ, [и҆ мꙋ́жъ ра́зꙋмъ и҆мѣ́ѧй па́че земледѣ́льца вели́кагѡ]: ᲂу҆держава́ѧй же гнѣ́въ, па́че взе́млющагѡ гра́дъ. Въ нѣ̑дра вхо́дѧтъ всѧ̑ непра́вєднымъ: ѿ гдⷭ҇а же всѧ̑ пра́вєднаѧ. Лꙋ́чше ᲂу҆крꙋ́хъ хлѣ́ба съ сла́стїю въ ми́рѣ, не́жели до́мъ и҆спо́лненъ мно́гихъ бл҃ги́хъ и҆ непра́ведныхъ же́ртвъ съ бра́нїю. Ра́бъ смы́сленъ ѡ҆блада́етъ влады̑ки безꙋ́мными: въ бра́тїѧхъ же раздѣли́тъ [и҆мѣ́нїе] на ча̑сти. Ꙗ҆́коже и҆скꙋша́етсѧ въ пещѝ сребро̀ и҆ зла́то, та́кѡ и҆збра̑ннаѧ сердца̀ ᲂу҆ гдⷭ҇а. Ѕлы́й послꙋ́шаетъ ѧ҆зы́ка законопрестꙋ́пныхъ: првⷣный же не внима́етъ ᲂу҆стна́мъ лжи̑вымъ. Рꙋга́ѧйсѧ ᲂу҆бо́гомꙋ раздража́етъ сотво́ршаго є҆го̀: ра́дꙋѧйсѧ же ѡ҆ погиба́ющемъ не ѡ҆безвини́тсѧ: ми́лꙋѧй же поми́лованъ бꙋ́детъ. Вѣне́цъ ста́рыхъ ча̑да ча̑дъ: похвала́ же ча́дѡмъ ѻ҆тцы̀ и҆́хъ. Вѣ́рномꙋ ве́сь мі́ръ бога́тство, невѣ́рномꙋ же нижѐ пѣ́нѧзь. Не прили̑чны сꙋ́ть безꙋ́мномꙋ ᲂу҆стнѣ̀ вѣ̑рны, нижѐ првⷣномꙋ ᲂу҆стнѣ̀ лжи̑вы. Мзда̀ бл҃года́тей наказа́нїе ᲂу҆потреблѧ́ющымъ: и҆ а҆́може а҆́ще ѡ҆брати́тсѧ, ᲂу҆спѣ́етъ. И҆́же таи́тъ ѡ҆би̑ды, и҆́щетъ любвѐ: а҆ и҆́же ненави́дитъ скрыва́ти, разлꙋча́етъ дрꙋ́ги и҆ дома̑шнїѧ. Сокрꙋша́етъ преще́нїе се́рдце мꙋ́драгѡ: безꙋ́мный же бїе́мь не чꙋ́вствꙋетъ [ра̑нъ]. Прекослѡ́вїѧ воздви́жетъ всѧ́къ ѕлы́й: гдⷭ҇ь же а҆́гг҃ла неми́лостива по́слетъ на́нь. Впаде́тъ попече́нїе мꙋ́жꙋ смы́сленнꙋ: безꙋ́мнїи же размышлѧ́ютъ ѕла̑ѧ. Не воздае́тъ ѕла̑ѧ за бл҃га̑ѧ, не подви́гнꙋтсѧ ѕла̑ѧ и҆з̾ до́мꙋ є҆гѡ̀. Вла́сть дае́тъ словесє́мъ нача́ло пра́вды: предводи́тельствꙋетъ же скꙋ́дости прѧ̀ и҆ бра́нь. И҆́же сꙋ́дитъ првⷣнаго непра́веднымъ, непра́веднаго же првⷣнымъ, нечи́стъ и҆ ме́рзокъ ᲂу҆ гдⷭ҇а. Вскꙋ́ю бѧ́ше и҆мѣ́нїе безꙋ́мномꙋ, стѧжа́ти бо премꙋ́дрости безсе́рдый не мо́жетъ. и҆́же высо́къ твори́тъ сво́й до́мъ,и҆́щетъ сокрꙋше́нїѧ: ѡ҆строптѣва́ѧй же ᲂу҆чи́тисѧ впаде́тъ въ ѕла̑ѧ. На всѧ́кое вре́мѧ дрꙋ́гъ да бꙋ́детъ тебѣ̀, бра́тїѧ же въ нꙋ́ждахъ поле́зни да бꙋ́дꙋтъ.

И҆ про́чее послѣ́дованїе преждеѡсщ҃е́нныхъ, въ не́мже причаща́емсѧ и҆ ст҃ы́хъ хрⷭ҇то́выхъ та́инствъ.

На трапе́зѣ же ꙗ҆ди́мъ є҆ле́й и҆ вїно̀ пїе́мъ, трꙋда̀ ра́ди бдѣ́ннагѡ.

Въ Стꙋді́товъ же ᲂу҆ста́въ повелѣва́етъ сꙋ́хо ꙗ҆́сти всю̀ тꙋ́ю седми́цꙋ, па́че и҆ны́хъ, ꙗ҆́кѡ дні́е пла́ча сꙋ́ть, а҆ не пра́здника: въ си́хъ бо пѣ́ти до́лжно є҆́сть и҆ а҆ллилꙋ́їа. Ст҃ы́ѧ же горы̀ тѵ́пїкъ разсꙋжда́етъ, на ст҃ы́хъ мч҃нкъ м҃, на прⷣте́чевы главы̀ ѡ҆брѣ́тенїе, и҆ въ сре́дꙋ крⷭ҇топокло́ннꙋю, и҆ на вели́кїй канѡ́нъ, и҆ на несѣда́льное, ꙗ҆́сти два̀ варє́нїѧ съ є҆ле́емъ, и҆ и҆спива́ти по двѣ̀ ча̑ши вїна̀. Сїѧ̑ же назна́меновахомъ любвѝ ва́шей ѿ ѻ҆бои́хъ, да произволѧ́ѧй сп҃сти́сѧ бл҃гоꙋго́днѣйшее пред̾ бг҃омъ и҆збира́етъ.

[зрѝ] Подоба́етъ вѣ́дати, ꙗ҆́кѡ а҆́ще слꙋчи́тсѧ бл҃говѣ́щенїе прест҃ы́ѧ бцⷣы въ се́й де́нь, пое́тсѧ послѣ́дованїе вели́кагѡ канѡ́на пре́жде, съ понедѣ́льника во вто́рникъ, си́рѣчь въ понедѣ́льникъ ве́чера. Пра́здникъ же быва́етъ непрело́жный.

Въ пѧто́къ є҃-ѧ седми́цы на ᲂу҆́трени,

трⷪ҇чны гла́са. Та́же каѳі̑смы: г҃і, д҃і, є҃і. По а҃-мъ стїхосло́вїи, глаго́лемъ сѣда́льны крⷭ҇тныѧ ѻ҆смогла́сника, два̀, и҆ съ бг҃оро́дичнымъ. По в҃-мъ же стїхосло́вїи, глаго́лемъ настоѧ́щїй сѣда́ленъ, гла́съ а҃.

Подо́бенъ: Гро́бъ тво́й:

Просте́рлъ є҆сѝ, хрⷭ҇тѐ, дла̑ни на дре́вѣ, и҆сцѣлѧ́ѧ ꙗ҆́звꙋ а҆да́мовꙋ, ꙗ҆́звами твои́ми. тѣ́мже молю́ тѧ: ꙗ҆́звы моѧ̑ и҆сцѣлѝ, ꙗ҆̀же наложѝ дꙋшѝ мое́й льсте́цъ, и҆ сподо́би въ мл҃твѣ и҆ постѣ̀, сп҃се, послꙋжи́ти тебѣ̀. [Два́жды.]

Крⷭ҇тобг҃оро́диченъ, подо́бенъ:

Зрѧ́щи тѧ̀, хрⷭ҇тѐ, ме́ртва на крⷭ҇тѣ̀ просте́рта, всенепоро́чнаѧ мт҃и вопїѧ́ше: сн҃ е мо́й, собезнача́льне ѻ҆ц҃ꙋ̀ и҆ дх҃ови, ко́е неизрече́нное смотре́нїе твоѐ сїѐ, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе.

По г҃-мъ стїхосло́вїи, сѣда́ленъ, гла́съ ѕ҃.

Подо́бенъ: Оу҆пова́нїе мі́ра:

Крⷭ҇те, мі́ра храни́телю, де́монѡвъ прогони́телю, тѧ̀ стѧжа́вшихъ во все́мъ предста́тельство неѡбори́мое сподо́би про́чее вре́мѧ поще́нїѧ прейтѝ въ со́вѣсти чи́стѣй, и҆справлѧ́ѧ дꙋ́шы на́шѧ пред̾ хрⷭ҇то́мъ, дре́во бл҃гослове́нное. [Два́жды.]

Крⷭ҇тобг҃оро́диченъ, подо́бенъ:

Чтⷭ҇аѧ дв҃о и҆ чтⷭ҇на́ѧ, а҆́гг҃лѡвъ сла́во, є҆гда̀ предстоѧ́ла є҆сѝ крⷭ҇тꙋ̀ сн҃а и҆ бг҃а твоегѡ̀, не терпѧ́щи зрѣ́ти порꙋга́нїѧ врагѡ́въ, взыва́ла є҆сѝ болѧ́щи мт҃рски: ка́кѡ терпи́ши, ѽ чл҃вѣколю́бче, всѣ́хъ прещє́нїѧ; сла́ва долготерпѣ́нїю твоемꙋ̀.

Трипѣ́снецъ господи́на і҆ѡ́сифа. И҆ стїхосло́витсѧ пѣ́снь. Гла́съ а҃.

Пѣ́снь є҃.

І҆рмо́съ: Просвѣти́вый сїѧ́нїемъ прише́ствїѧ твоегѡ̀:

Простры́й нб҃о ꙗ҆́кѡ ко́жꙋ, просте́рлъ є҆сѝ дла̑ни на крⷭ҇тѣ̀, і҆и҃се пребл҃гі́й. тѣ́мже молю́ тѧ: просте́рта вра́жїими и҆скꙋше́нїи, мѧ̀ ᲂу҆ще́дри.

Оу҆снꙋ́лъ є҆сѝ на крⷭ҇тѣ̀, і҆и҃се пребл҃гі́й, бо́дрость сп҃се́нїѧ подаѧ̀ на́мъ, гдⷭ҇и, лежа́щымъ въ до́льнѣйшей поги́бели: тѣ́мже тѧ̀ вѣ́рою сла́вимъ.

Стрⷭ҇ти твоеѧ̀ де́нь ви́дѣти сподо́би рабы̑ твоѧ̑ просвѣщє́ны се́рдца свѣ́тлостїю, и҆ живоно́сное твоѐ, сп҃се, воскрⷭ҇нїе, воспѣва́ющыѧ держа́вꙋ црⷭ҇твїѧ твоегѡ̀.

Бг҃оро́диченъ: Зрѧ́щи тѧ̀ пригвожде́на на крⷭ҇тѣ̀, всечⷭ҇таѧ восклица́ше, ᲂу҆ѧ́звлена ᲂу҆тро́бою,и҆ глаго́лаше: милосе́рдїѧ ра́ди твои́хъ щедро́тъ, пострада́ти претерпѣ́лъ є҆сѝ, гдⷭ҇и, всѣ́мъ подаѧ̀ безстра́стїе.

И҆́ный, господи́на ѳео́дѡра, гла́съ ѕ҃.

І҆рмо́съ: Ѿ но́щи ᲂу҆́тренююща, чл҃вѣколю́бче:

На крⷭ҇тѣ̀ рꙋ́цѣ твоѝ, чл҃вѣколю́бче, распростро́ша і҆ꙋде́є, и҆ гвоздьмѝ пригвозди́ша, ре́бра копїе́мъ пробо́дше: и҆ терпи́ши всѧ̑, хрⷭ҇тѐ, да мы̀ сп҃се́мсѧ.

Дре́ва снѣ́дїю ᲂу҆́мре нѣ́когда̀ а҆да́мъ, па́ки же ѡ҆брѣ́те дре́вомъ крⷭ҇тнымъ жи́знь, и҆́мже, ще́дре, наслажда́етсѧ сла́дости внꙋ́трь раѧ̀.

Трⷪ҇ченъ: Є҆ди́ницꙋ є҆стество́мъ тѧ̀, трⷪ҇це, воспѣва́ю, безнача́льнꙋю, непости́жнꙋю,нача́льственное, ца́рское, пресоверше́нное є҆ди́нство, бг҃а, и҆ свѣ́тъ, и҆ жи́знь, содѣ́телѧ мі́рꙋ.

Бг҃оро́диченъ: Въ рождествѣ̀ твое́мъ па́че є҆стества̀, чтⷭ҇аѧ, зако́ни є҆стества̀ тебє̀ ра́ди разорѧ́ютсѧ ꙗ҆́вѣ: и҆́бо без̾ сѣ́мене ражда́еши превѣ́чнаго бг҃а, ѿ ѻ҆ц҃а̀ рожде́ннаго.

Сла́ва тебѣ̀, бж҃е на́шъ, сла́ва тебѣ̀.

Крⷭ҇тъ, копїѐ и҆ гво́зди твоѧ̑ почита́емъ, влⷣко: тѣ́ми бо ѿ тлѣ́нїѧ на́съ и҆зба́вилъ є҆сѝ,хрⷭ҇тѐ, твое́ю стрⷭ҇тїю ѡ҆безсме́ртствѡванныѧ.

І҆рмо́съ: Ѿ но́щи ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑, и҆ наꙋчи́ мѧ сп҃се, твори́ти во́лю твою̀.

Пѣ́снь и҃.

І҆рмо́съ: Чꙋ́да преесте́ственнагѡ:

Притꙋпи́лъ є҆сѝ лꙋка́вагѡ жа̑ла, сп҃се, пригвожде́нъ гвоздьмѝ на дре́вѣ: терно́внымъ вѣнце́мъ ѡ҆дѣ́ѧлсѧ є҆сѝ порꙋга́тельнѡ, и҆скоренѧ́ѧ престꙋпле́нїѧ те́рнїе. тѣ́мже воспѣва́юще тебѣ̀ зове́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Просте́рлъ є҆сѝ на крⷭ҇тѣ̀ дла̑ни, хрⷭ҇тѐ, человѣ́чество собира́ѧ ко твоемꙋ̀ позна́нїю, и҆ копїе́мъ твоѧ̑ ре́бра пробостѝ претерпѣ́лъ є҆сѝ, и҆сточи́въ на́мъ и҆сто́чникъ просвѣще́нїѧ, воспѣва́ющымъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Стрꙋѧ́ми бл҃госе́рдїѧ твоегѡ̀, ще́дре, ѡ҆чи́сти моѐ се́рдце, грѣхо́внымъ ᲂу҆грызе́нїемъ ѡ҆скверне́нное, и҆ рѣ́ки ᲂу҆миле́нїѧ и҆сточи́ти сподо́би мѧ̀, хрⷭ҇тѐ і҆и҃се, да зовꙋ̀ тебѣ̀: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ: Ста́мнꙋ тѧ̀ бж҃е́ственнꙋю, и҆мꙋ́щꙋю ма́ннꙋ бж҃ества̀, позна́хомъ, ѻ҆трокови́це, ковче́гъ и҆ трапе́зꙋ и҆ свѣ́щникъ прⷭ҇то́лъ бж҃їй и҆ пала́тꙋ, и҆ мо́стъ, преводѧ́щїй къ бж҃е́ственнѣй жи́зни, воспѣва́ющыѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

И҆́ный.

І҆рмо́съ: Ѻ҆трокѡ́въ пѣ́снь:

Распина́етсѧ хрⷭ҇то́съ, и҆ ѡ҆живлѧ́емь а҆́зъ пою̀ со ѻ҆́троки: бл҃гослови́те дѣла̀ гдⷭ҇нѧ гдⷭ҇а, и҆ превозноси́те є҆го̀ во вѣ́ки.

Мі́ръ, ѿ тлѣ́нїѧ распѧ́тїемъ твои́мъ и҆зба́вленный, пое́тъ со ѻ҆́трѡки: бл҃гослови́те, дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Трⷪ҇це равносла́внаѧ, є҆диносꙋ́щнаѧ є҆ди́нице, ѻ҆́ч҃е, и҆ сн҃е, и҆ дш҃е, сп҃сѝ мѧ вѣ́рою пою́ща тѧ̀.

Бг҃оро́диченъ: Ржⷭ҇твꙋ̀ чтⷭ҇ыѧ бцⷣы покланѧ́юсѧ, поѧ̀ со ѻ҆́трѡки: бл҃гослови́те, дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.

Сла́ва тебѣ̀, бж҃е на́шъ, сла́ва тебѣ̀.

Пою̀ тво́й крⷭ҇тъ, и҆́мже сп҃се́нъ бы́хъ, хрⷭ҇тѐ, поѧ̀ со ѻ҆́трѡки: бл҃гослови́те, дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.

І҆рмо́съ: Ѻ҆трокѡ́въ пѣ́снь воспои́мъ хрⷭ҇тꙋ̀, пою́ще съ ни́ми: бл҃гослови́те дѣла̀ гдⷭ҇нѧ, гдⷭ҇а, и҆ превозно́сите є҆го̀ во вѣ́ки.

Пѣ́снь ѳ҃.

І҆рмо́съ: Ѡ҆́бразъ чи́стагѡ:

Ви́дѣ и҆лїа̀ гдⷭ҇а въ то́нцѣ хла́дѣ, и҆стончи́въ пе́рвѣе пло́ть напрѧже́ньми мл҃твы и҆ поста̀: є҆мꙋ́же ревнꙋ́ющи, дꙋшѐ моѧ̀, ѿве́ржи сласте́й дебельство̀, ꙗ҆́кѡ да ᲂу҆́зриши жела́емаго.

На дре́во возне́съ дре́вле ѕмі́ѧ, мѡѷсе́й и҆з̾ѡбража́ше твоѐ на крⷭ҇тъ воздви́женїе, сп҃се пребл҃гі́й, и҆́мже ѿ ꙗ҆дови́тыѧ ѕло́бы ѕмі́евы и҆зба́вилъ є҆сѝ всѧ̑ ꙗ҆зы́ки, покланѧ́ющыѧсѧ тебѣ̀.

Во гро́бѣ лѣ́ности лежа̀, ѡ҆тѧгча́ющїй и҆мѣ́ѧ ка́мень ѡ҆мраченїѧ, не разꙋмѣ́ю присножи́зненнагѡ сло́ва твоегѡ̀, сп҃се, и҆ стра́ха твоегѡ̀ не чꙋ́вствꙋю: ᲂу҆ще́дри мѧ̀ и҆ сп҃сѝ твое́ю бл҃гостїю, многомлⷭ҇тиве.

Бг҃оро́диченъ: Всѣ́хъ превы́шшаѧ влⷣчце, покажѝ страсте́й ѕло́бы вы́шша мѧ̀, сла́вѧща тѧ̀ всеи́стиннꙋю бцⷣꙋ и҆ пою́ща ржⷭ҇тво̀ твоѐ, пречⷭ҇таѧ, непостиже́нїемъ, бг҃ора́дованнаѧ,почита́емое.

И҆́ный.

І҆рмо́съ: Безсѣ́меннагѡ зача́тїѧ:

Распина́ешисѧ, и҆ сп҃са́еши мѧ̀: ᲂу҆мира́еши, и҆ ѡ҆живлѧ́еши мѧ̀. ѽ бл҃госе́рдїѧ, ѽ чл҃вѣколю́бїѧ твоегѡ̀! кто̀ ви́дѣ, кто̀ слы́ша влⷣкꙋ, за рабы̑ прїе́млюща сме́рть поноси́тельнꙋю; но сла́ва неизрече́ннѣй бл҃гости твое́й, гдⷭ҇и.

Со́лнце за́йде, є҆гда̀ ви́дѣ тѧ̀ распина́ема: ка́кѡ бо не бы̀ зашло̀, ви́дѧ досажде́нїе зижди́телѧ своегѡ̀; ꙗ҆́кѡ и҆ тва́рь всѧ̀ подвиза́ема, распина́телємъ молча́щи вопїѧ́ше, ꙗ҆́кѡ ты̀ є҆сѝ бг҃ъ всѣ́хъ, а҆́ще и҆ пло́тїю стрⷭ҇тенъ.

Трⷪ҇ченъ: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е: и҆ є҆ди́не свѣ́те, є҆ди́нагѡ свѣ́та сїѧ́нїе: и҆ є҆ди́ный є҆ди́нственне є҆ди́нагѡ бг҃а ст҃ы́й дш҃е, гдⷭ҇а гдⷭ҇ь вои́стиннꙋ сы́й: ѽ трⷪ҇це є҆ди́нице ст҃а́ѧ! сп҃си́ мѧ бг҃осло́вѧща тѧ̀.

Бг҃оро́диченъ: Чꙋ́до рождества̀ твоегѡ̀ ᲂу҆дивлѧ́етъ мѧ̀, всенепоро́чнаѧ: ка́кѡ зачина́еши безсѣ́меннѡ неѡб̾е́млемаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; па́че є҆стества̀ бы́вшее вѣ́рою прїе́мъ, рожде́нномꙋ поклони́сѧ: є҆ли̑ка бо хо́щетъ, и҆ мо́жетъ.

Сла́ва тебѣ̀, бж҃е на́шъ, сла́ва тебѣ̀.

На́съ ра́ди кі́йждо ᲂу҆́дъ тво́й под̾ѧ́тъ стрⷭ҇ть: глава̀ ᲂу҆даре́нїе, лани̑ты заꙋше́нїе, рꙋ́цѣ пригвожде́нїе, и҆ ре́бра копїѐ, и҆зрѧ́днѣе же крⷭ҇тъ. но сла́ва неизрече́нномꙋ бл҃госе́рдїю твоемꙋ̀, сп҃се на́шъ.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нно є҆́сть, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.

Свѣти́ленъ гла́са.

На стїхо́внѣ самогла́сенъ, два́жды, гла́съ и҃:

Съ разбѡ́йники на крⷭ҇тѣ̀ пригвожде́нный, хрⷭ҇тѐ бж҃е, и҆ ꙗ҆́звою твое́ю человѣ́ческое є҆стество̀ и҆сцѣли́вый, не пре́зри менѐ, въ мы́слєнныѧ пꙋтедержа́тєли и҆ въ разбо́йники безплѡ́тныѧ впа́дшаго, и҆ добродѣ́тели ѿ ни́хъ совлече́ннаго, и҆ лю́тѣ ᲂу҆ѧ́звленнаго, и҆ ни ѿ є҆ди́нагѡ ѿ преподо́бныхъ и҆сцѣли́тисѧ возмо́гшаго и҆́сполꙋ бо ме́ртвъ є҆́смь, кратча́йшїй и҆мѣ́ѧ жи́зни ѡ҆ста́нокъ, є҆ди́нꙋ наде́ждꙋ и҆мѣ́ѧ на тѧ̀, и҆ мє́ртвымъ жи́знь подаю́щаго: но ѡ҆бвѧжи́ ми стрꙋ́пы, и҆ска́павъ мнѣ̀ твою̀ бл҃гость, є҆ди́не чл҃вѣколю́бче.

Мч҃нченъ: Что́ ва́съ нарече́мъ, ст҃і́и; херꙋві́мы ли; ꙗ҆́кѡ на ва́съ почи́лъ є҆́сть хрⷭ҇то́съ.серафі́мы ли; ꙗ҆́кѡ непреста́ннѡ просла́висте є҆го̀. а҆́гг҃лы ли; тѣ́ла бо ѿврати́стесѧ. си̑лы ли;дѣ́йствꙋете бо чꙋдесы̀. Мнѡ́га ва̑ша и҆мена̀, и҆ бѡ́льша дарова̑нїѧ: моли́те сп҃сти́сѧ дꙋша́мъ на́шымъ.

Сла́ва, и҆ ны́нѣ, крⷭ҇тобг҃оро́диченъ, гла́съ то́йже.

Подо́бенъ: Ѽ пресла́внагѡ чꙋдесѐ!

Ѽ пресла́внагѡ чꙋдесѐ! ѽ та́инства но́вагѡ! ѽ ᲂу҆жа́снагѡ начина́нїѧ! дв҃а глаго́лаше, є҆гда̀ ви́дѣ тѧ̀ на крⷭ҇тѣ̀ посредѣ̀ двою̀ разбѡ́йникꙋ повѣ́шена, є҆го́же неболѣ́зненнѡ чꙋ́днѡ породѝ, и҆ пла́каше глаго́лющи: ᲂу҆вы̀ мнѣ̀, ча́до любе́знѣйшее! ка́кѡ лю́тый и҆ небл҃года́рный наро́дъ тѧ̀ ко крⷭ҇тꙋ̀ пригвоздѝ;

На а҃-мъ часѣ̀, каѳі́смы нѣ́сть. На г҃-мъ часѣ̀, каѳі́сма ѳ҃і.

На ѕ҃-мъ часѣ̀, к҃. На ѕ҃-мъ же часѣ̀ тропа́рь прⷪ҇ро́чества, гла́съ и҃:

Препѣ́тый є҆сѝ, хрⷭ҇тѐ бж҃е на́шъ, коле́блѧй зе́млю, во є҆́же ѡ҆брати́ти и҆ сп҃стѝ живꙋ́щыѧ на не́й, и҆ па́ки ᲂу҆твержда́ѧй ю҆̀ своею̀ бл҃гостїю и҆ неизрече́ннымъ милосе́рдїемъ: мл҃твами бцⷣы поми́лꙋй на́съ.

Прокі́менъ, ѱало́мъ р҃, гла́съ д҃: Млⷭ҇ть и҆ сꙋ́дъ воспою̀ тебѣ̀, гдⷭ҇и. Сті́хъ: Пою̀ и҆ разꙋмѣ́ю въ пꙋтѝ непоро́чнѣ.

Прⷪ҇ро́чества и҆са́їина чте́нїе. [Глава̀ м҃є, ст. а҃і-зі҃].

Та́кѡ глаго́летъ гдⷭ҇ь бг҃ъ, ст҃ы́й і҆и҃левъ, сотвори́вый грѧдꙋ̑щаѧ: вопроси́те менѐ ѡ҆ сынѣ́хъ мои́хъ, и҆ ѡ҆ дще́рехъ мои́хъ, и҆ ѡ҆ дѣ́лѣхъ рꙋкꙋ̀ моє́ю заповѣ́дите мнѣ̀. А҆́зъ сотвори́хъ зе́млю и҆ человѣ́ка на не́й, а҆́зъ рꙋко́ю мое́ю ᲂу҆тверди́хъ нб҃о, а҆́зъ всѣ̑мъ ѕвѣзда́мъ заповѣ́дахъ. А҆́зъ возста́вихъ є҆го̀ съ пра́вдою цр҃ѧ̀, и҆ всѝ пꙋтїѐ є҆гѡ̀ пра̑вы: се́й сози́ждетъ гра́дъ мо́й, и҆ плѣне́нїе люде́й мои́хъ возврати́тъ, не по мздѣ̀, ни по дарѡ́мъ: речѐ гдⷭ҇ь саваѡ́ѳъ. Та́кѡ глаго́летъ гдⷭ҇ь саваѡ́ѳъ: ᲂу҆трꙋди́сѧ є҆гѵ́петъ и҆ кꙋ̑пли є҆ѳїѡ́пскїѧ, и҆ саваі́мстїи мꙋ̑жи высо́цыи къ тебѣ̀ пре́йдꙋтъ, и҆ тебѣ̀ бꙋ́дꙋтъ рабѝ, и҆ вслѣ́дъ тебє̀ по́йдꙋтъ свѧ́зани ᲂу҆́зами рꙋчны́ми, и҆ пре́йдꙋтъ къ тебѣ̀, и҆ покло́нѧтсѧ тебѣ̀, и҆ въ тебѣ̀ помо́лѧтсѧ, ꙗ҆́кѡ въ тебѣ̀ бг҃ъ є҆́сть, и҆ рекꙋ́тъ: нѣ́сть бг҃а ра́звѣ тебє̀. Ты́ бо є҆сѝ бг҃ъ, и҆ не вѣ́дѣхомъ, бг҃ъ і҆и҃левъ сп҃съ. Постыдѧ́тсѧ и҆ посра́мѧтсѧ всѝ проти́вѧщїисѧ є҆мꙋ̀, и҆ по́йдꙋтъ въ стꙋдѣ̀. Ѡ҆бновлѧ́йтесѧ ко мнѣ̀, ѻ҆́строви. І҆и҃ль сп҃са́етсѧ ѿ гдⷭ҇а сп҃се́нїемъ вѣ́чнымъ: не постыдѧ́тсѧ, ни посра́мѧтсѧ да́же до вѣ́ка ктомꙋ̀.

Прокі́менъ, ѱало́мъ р҃а, гла́съ д҃: Гдⷭ҇и, ᲂу҆слы́ши мл҃твꙋ мою̀, и҆ во́пль мо́й къ тебѣ̀ да прїи́детъ. Сті́хъ: Не ѿвратѝ лица̀ твоегѡ̀ ѿ менѐ.

На ѳ҃-мъ часѣ̀ каѳі́смы нѣ́сть.

Въ пѧто́къ ве́чера,

стїхосло́вимъ каѳі́смꙋ и҃і. По ѡ҆бы́чнѣмъ же стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ самогла́сенъ, гла́съ ѕ҃, два́жды:

Ꙗ҆́кѡ ѿ і҆ерⷭ҇ли́ма, ѿ твои́хъ бж҃е́ственныхъ за́повѣдей и҆сходѧ̀, и҆ ко страсте́мъ і҆ерїхѡ̑нскимъ дости́гъ, сла́вою безче́стїѧ жите́йскихъ попече́нїй ᲂу҆влече́нъ, въ разбо́йники помыслѡ́въ впадо́хъ, ри́зы бл҃года́тнагѡ сыноположе́нїѧ ѿ ни́хъ совлече́нъ, и҆ въ ра́нахъ ꙗ҆́кѡ бездыха́ненъ лежꙋ̀. сщ҃е́нникъ же прише́дъ и҆ трꙋ́пъ ви́дѣвъ не внѧ́тъ: и҆ леѵі́тъ, и҆ то́й возгнꙋша́всѧ преминꙋ̀ менѐ. ты́ же, гдⷭ҇и, ѿ дв҃ы неизрече́ннѡ воплоти́выйсѧ, и҆злїѧ́нїемъ сп҃си́тельныѧ ѿ ребра̀ твоегѡ̀ во́льнѣ и҆злїѧ́нныѧ кро́ве и҆ воды̀, ꙗ҆́коже є҆ле́й и҆ска́павъ, хрⷭ҇тѐ бж҃е, стрꙋ́пы ꙗ҆́звъ мои́хъ ѡ҆бѧза́нїемъ стѧгнѝ, и҆ къ нбⷭ҇номꙋ ли́кꙋ совокꙋпѝ, ꙗ҆́кѡ милосе́рдъ.

Мч҃нченъ: Мч҃нцы твоѝ, гдⷭ҇и, не ѿверго́шасѧ тебє̀, ни ѿстꙋпи́ша ѿ за́повѣдей твои́хъ: тѣ́хъ мл҃твами поми́лꙋй на́съ.

Та́же пое́мъ стїхи̑ры подѡ́бны прест҃ы́ѧ бцⷣы г҃,

творѧ́ще ѧ҆̀ з҃,

гла́съ ѕ҃.

Подо́бенъ: Всю̀ ѿложи́вше:

Совѣ́тъ превѣ́чный ѿкрыва́ѧ тебѣ̀, ѻ҆трокови́це, гаврїи́лъ предста̀, тебѐ лобза́ѧ и҆ вѣща́ѧ: ра́дꙋйсѧ, землѐ ненасѣ́ѧннаѧ: ра́дꙋйсѧ, кꙋпино̀ неѡпали́маѧ: ра́дꙋйсѧ, глꙋбино̀ неꙋдобозри́маѧ: ра́дꙋйсѧ мо́сте, къ нб҃сє́мъ преводѧ́й, и҆ лѣ́ствице высо́каѧ, ю҆́же і҆а́кѡвъ ви́дѣ: ра́дꙋйсѧ, бж҃е́ственнаѧ ста́мно ма́нны. ра́дꙋйсѧ, разрѣше́нїе клѧ́твы: ра́дꙋйсѧ, а҆да́мово воззва́нїе, съ тобо́ю гдⷭ҇ь. Ꙗ҆влѧ́ешисѧ мѝ ꙗ҆́кѡ человѣ́къ, глаго́летъ нетлѣ́ннаѧ ѻ҆трокови́ца ко а҆рхїстрати́гꙋ, и҆ ка́кѡ вѣща́еши глаго́лы вы́ше человѣ́ка; со мно́ю бо, ре́клъ є҆си,̀ бг҃ъ бꙋ́детъ, и҆ всели́тсѧ во ᲂу҆тро́бꙋ мою̀: и҆ ка́кѡ, глаго́ли мѝ, бꙋ́дꙋ село̀ простра́нное и҆ мѣ́сто сщ҃е́нїѧ, на херꙋві́мѣхъ восходѧ́щагѡ; да не прельсти́ши менѐ ле́стїю: не позна́хъ бо сла́сти,бра́кꙋ є҆́смь неприча́стна: ка́кѡ ᲂу҆̀бо ѻ҆троча̀ рождꙋ̀;

И҆дѣ́же хо́щетъ бг҃ъ, побѣжда́етсѧ є҆стества̀ чи́нъ, глаго́летъ безпло́тный, и҆ ꙗ҆̀же вы́ше человѣ́ка содѣва́ютсѧ: мои̑мъ вѣ́рꙋй и҆́стиннымъ глаго́лѡмъ, всест҃а́ѧ, пренепоро́чнаѧ. ѻ҆на́ же возопѝ: бꙋ́ди мнѣ̀ ны́нѣ по глаго́лꙋ твоемꙋ̀, и҆ рождꙋ̀ безпло́тнаго, пло́ть ѿ менє̀ заи́мствовавшаго, ꙗ҆́кѡ да срастворе́нїемъ возведе́тъ человѣ́ка въ пе́рвое досто́инство, ꙗ҆́кѡ є҆ди́нъ си́ленъ.

Сла́ва, и҆ ны́нѣ, гла́съ в҃:

Сꙋ́щее ѿ вѣ́ка та́инство ѿкрыва́етсѧ дне́сь, и҆ сн҃ъ бж҃їй сн҃ъ чл҃вѣ́чь быва́етъ, да хꙋ́ждшее воспрїи́мъ, пода́стъ мѝ лꙋ́чшее. прельсти́сѧ дре́вле а҆да́мъ, и҆ бг҃ъ вожделѣ́въ бы́ти, не бы́сть: бг҃ъ чл҃вѣ́къ быва́етъ, да а҆да́ма бг҃а содѣ́лаетъ. да весели́тсѧ тва́рь, да ликовствꙋ́етъ є҆стество̀, ꙗ҆́кѡ а҆рха́гг҃лъ дв҃ѣ со стра́хомъ предстои́тъ, и҆ ра́дꙋйсѧ прино́ситъ, печа́ли сопроти́вное. милосе́рдїѧ ра́ди млⷭ҇ти вочеловѣ́чивыйсѧ, бж҃е на́шъ, сла́ва тебѣ̀.

А҆́ще же не соверша́етсѧ послѣ́дованїе преждеѡсщ҃е́нныхъ: пое́мъ стїхи̑ры бцⷣы на и҃. На стїхо́внѣ самогла́сенъ днѐ, два́жды, и҆ мч҃нченъ. Сла́ва, и҆ ны́нѣ: Ѧ҆зы́къ, є҆гѡ́же не вѣ́дѧше: пи́санъ на хвали́техъ въ сꙋббѡ́тꙋ.

Вхо́дъ. Свѣ́те ти́хїй:

Прокі́менъ, ѱало́мъ р҃в, гла́съ д҃: Ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ.Сті́хъ: Бл҃гословѝ, дꙋшѐ моѧ̀, гдⷭ҇а, и҆ всѧ̑ внꙋ́трєннѧѧ моѧ̑, и҆́мѧ ст҃о́е є҆гѡ̀.

Бытїѧ̀ чте́нїе. [Глава̀ к҃в, ст. а҃-и҃і].

Бы́сть по глаго́лѣхъ си́хъ, бг҃ъ и҆скꙋша́ше а҆враа́ма, и҆ речѐ є҆мꙋ̀: а҆враа́ме, а҆враа́ме. И҆ речѐ: сѐ а҆́зъ. И҆ речѐ: поймѝ сы́на твоего̀ возлю́бленнаго, є҆го́же возлюби́лъ є҆сѝ, і҆саа́ка, и҆ и҆дѝ на зе́млю высо́кꙋ, и҆ вознесѝ є҆го̀ та́мѡ во всесожже́нїе, на є҆ди́нꙋ ѿ го́ръ, и҆̀хже тѝ рекꙋ̀. Воста́въ же а҆враа́мъ ᲂу҆́трѡ, ѡ҆сѣдла̀ ѻ҆слѧ̀ своѐ, поѧ́тъ же съ собо́ю два̀ ѻ҆́трѡчища и҆ і҆саа́ка сы́на своего̀: и҆ растни́въ дрова̀ во всесожже́нїе, воста́въ и҆́де, и҆ прїи́де на мѣ́сто,є҆́же речѐ є҆мꙋ̀ бг҃ъ, въ тре́тїй де́нь. И҆ воззрѣ́въ а҆враа́мъ ѻ҆чи́ма свои́ма, ви́дѣ мѣ́сто и҆здале́че. И҆ речѐ а҆враа́мъ ѻ҆трокѡ́мъ свои̑мъ: сѧ́дите здѣ̀ со ѻ҆слѧ́темъ: а҆́зъ же и҆ дѣ́тищъ по́йдемъ до ѻ҆́ндѣ, и҆ поклони́вшесѧ возврати́мсѧ къ ва́мъ. Взѧ́ же а҆враа́мъ дрова̀ всесожже́нїѧ, и҆ возложѝ на і҆саа́ка сы́на своего̀: взѧ́ же въ рꙋ́ки и҆ ѻ҆́гнь и҆ но́жъ, и҆ и҆до́ста ѻ҆́ба вкꙋ́пѣ. Рече́ же і҆саа́къ ко а҆враа́мꙋ ѻ҆тцꙋ̀ своемꙋ̀: ѻ҆́тче. Ѻ҆́нъ же речѐ: что́ є҆сть, ча́до; Речѐ же: сѐ ѻ҆́гнь и҆ дрова̀, гдѣ́ є҆сть ѻ҆вча̀ є҆́же во всесожже́нїе; Рече́ же а҆враа́мъ: бг҃ъ ᲂу҆́зритъ себѣ̀ ѻ҆вча̀ во всесожже́нїе, ча́до. Ше́дше же ѻ҆́ба вкꙋ́пѣ, прїидо́ста на мѣ́сто, є҆́же речѐ є҆мꙋ̀ бг҃ъ: и҆ созда̀ та́мѡ а҆враа́мъ же́ртвенникъ, и҆ возложѝ дрова̀: и҆ свѧза́въ і҆саа́ка сы́на своего̀, возложѝ є҆го̀ на же́ртвенникъ верхꙋ̀ дро́въ. И҆ прострѐ а҆враа́мъ рꙋ́кꙋ свою̀ взѧ́ти но́жъ, закла́ти сы́на своего̀. И҆ воззва̀ и҆̀ а҆́гг҃лъ гдⷭ҇ень съ нб҃сѐ, и҆ речѐ: а҆враа́ме, а҆враа́ме. Ѻ҆́нъ же речѐ: сѐ а҆́зъ. И҆ речѐ: да не возложи́ши рꙋкѝ твоеѧ̀ на ѻ҆́трочища, нижѐ да сотвори́ши є҆мꙋ̀ что̀: ны́нѣ бо позна́хъ, ꙗ҆́кѡ бои́шисѧ ты̀ бг҃а и҆ не пощадѣ́лъ є҆сѝ сы́на твоегѡ̀ возлю́бленнагѡ менє̀ ра́ди. И҆ воззрѣ́въ а҆враа́мъ ѻ҆чи́ма свои́ма ви́дѣ, и҆ сѐ ѻ҆ве́нъ є҆ди́нъ держи́мый рога́ма въ са́дѣ саве́къ: и҆ и҆́де а҆враа́мъ, и҆ взѧ̀ ѻ҆вна̀, и҆ вознесѐ є҆го̀ во всесожже́нїе вмѣ́стѡ і҆саа́ка сы́на своегѡ̀. И҆ наречѐ а҆враа́мъ и҆́мѧ мѣ́стꙋ томꙋ̀: гдⷭ҇ь ви́дѣ: да рекꙋ́тъ дне́сь: на горѣ̀ гдⷭ҇ь ꙗ҆ви́сѧ. И҆ воззва̀ а҆́гг҃лъ гдⷭ҇ень а҆враа́ма втори́цею съ нб҃сѐ, глаго́лѧ: мно́ю самѣ́мъ клѧ́хсѧ, глаго́летъ гдⷭ҇ь, є҆гѡ́же ра́ди сотвори́лъ є҆сѝ глаго́лъ се́й, и҆ не пощадѣ́лъ є҆сѝ сы́на твоегѡ̀ возлю́бленнагѡ менє̀ ра́ди: вои́стиннꙋ бл҃гословѧ̀ бл҃гословлю́ тѧ, и҆ ᲂу҆множа́ѧ ᲂу҆мно́жꙋ сѣ́мѧ твоѐ, ꙗ҆́кѡ ѕвѣ́зды небє́сныѧ и҆ ꙗ҆́кѡ песо́къ вскра́й мо́рѧ: и҆ наслѣ́дитъ сѣ́мѧ твоѐ гра́ды сꙋпоста́тѡвъ: и҆ бл҃гословѧ́тсѧ ѡ҆ сѣ́мени твое́мъ всѝ ꙗ҆зы́цы земні́и: зане́же послꙋ́шалъ є҆сѝ гла́са моегѡ̀.

Прокі́менъ, ѱало́мъ р҃г, гла́съ д҃: Ꙗ҆́кѡ возвели́чишасѧ дѣла̀ твоѧ̑, гдⷭ҇и, всѧ̑ премꙋ́дростїю сотвори́лъ є҆сѝ. Сті́хъ: Бл҃гословѝ, дꙋшѐ моѧ̀, гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀.

При́тчей чте́нїе. [Глава̀ з҃і, ст. з҃і-к҃и: глава̀ и҃і, ст. а҃-є҃].

Бра́тїѧ въ нꙋ́ждахъ поле́зни да бꙋ́дꙋтъ: сегѡ́ бо ра́ди ражда́ютсѧ. Мꙋ́жъ безꙋ́менъ пле́щетъ и҆ ра́дꙋетсѧ себѣ̀, ꙗ҆́коже порꙋча́ѧйсѧ и҆спорꙋ́читъ дрꙋ́га своего̀, на свои́хъ же ᲂу҆стна́хъ ѻ҆́гнь сокро́виществꙋетъ. Грѣхолю́бецъ ра́дꙋетсѧ сва́рѡмъ, а҆ жестокосе́рдый не ᲂу҆срѧ́щетъ бл҃ги́хъ. Мꙋ́жъ ᲂу҆добопрело́жный ѧ҆зы́комъ, впаде́тъ въ ѕла̑ѧ: се́рдце же безꙋ́мнагѡ болѣ́знь стѧжа́вшемꙋ є҆̀. Не весели́тсѧ ѻ҆те́цъ ѡ҆ сы́нѣ ненака́заннѣмъ: сы́нъ же мꙋ́дръ весели́тъ ма́терь свою̀. Се́рдце веселѧ́щеесѧ бл҃гоимѣ́тисѧ твори́тъ: мꙋ́жꙋ же печа́льнꙋ засы́шꙋтъ кѡ́сти. Прїе́млющемꙋ да́ры непра́веднѡ въ нѣ̑дра не пред̾ꙋспѣва́ютъ пꙋтїѐ: нечести́вый же ᲂу҆клонѧ́етъ пꙋти̑ пра́вды. Лицѐ разꙋ́мно мꙋ́жа премꙋ́дра, ѻ҆́чи же безꙋ́мнагѡ на конца́хъ землѝ. Гнѣ́въ ѻ҆тцꙋ̀ сы́нъ безꙋ́менъ, и҆ болѣ́знь ро́ждшей є҆го̀. Тщєты̀ твори́ти мꙋ́жꙋ пра́веднꙋ не добро̀: нижѐ преподо́бно навѣ́товати власте́мъ пра́вєднымъ. И҆́же щади́тъ глаго́лъ произнестѝ же́стокъ, разꙋ́менъ: долготерпѣли́вый же мꙋ́жъ премꙋ́дръ, лꙋ́чше и҆́щꙋщагѡ наꙋ́ки. Несмы́сленномꙋ вопроси́вшꙋ ѡ҆ мꙋ́дрости, мꙋ́дрость вмѣни́тсѧ: нѣ́ма же кто̀ себѐ твори́тъ, возмни́тсѧ разꙋ́менъ бы́ти. Вины̀ и҆́щетъ мꙋ́жъ хотѧ̀ ѿлꙋчи́тисѧ ѿ дрꙋгѡ́въ, на всѧ́кое же вре́мѧ поноси́мь бꙋ́детъ. Не тре́бꙋетъ премꙋ́дрости мꙋ́жъ скꙋдоꙋ́менъ, занѐ па́че во́дитсѧ безꙋ́мїемъ. Є҆гда̀ прїи́детъ нечести́вый во глꙋбинꙋ̀ ѕѡ́лъ, неради́тъ: нахо́дитъ же є҆мꙋ̀ безче́стїе и҆ поноше́нїе. Вода̀ глꙋбока̀ сло́во въ се́рдцѣ мꙋ́жа, рѣка́ же и҆зска́чꙋщаѧ и҆ и҆сто́чникъ жи́зни. Чꙋди́тисѧ лицꙋ̀ нечести́вагѡ не добро̀, нижѐ преподо́бно ᲂу҆клонѧ́ти пра́ведное на сꙋдѣ̀.

И҆ про́чее послѣ́дованїе преждеѡсщ҃е́нныхъ. На трапе́зѣ пїе́мъ вїно̀, трꙋда̀ ра́ди бдѣ́ннагѡ хотѧ́щагѡ бы́ти.

Повече́рїе же ма́лое, и҆ полꙋ́нощницꙋ пое́мъ въ ке́ллїахъ. Канѡ́нъ ме́ртвенъ гла́са пое́мъ во гробни́цѣ.