[глⷡ҇а н҃з] Бг҃оро́дичны и҆ крⷭ҇тобг҃оро́дичны ѿпꙋсти́тельнїи. На и҃ гласѡ́въ, пое́мїи во всѐ лѣ́то, въ вече́рни же, и҆ на Бг҃ъ гдⷭ҇ь на ᲂу҆́трени, и҆ въ коне́цъ ᲂу҆́трени

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ а҃:

Чꙋ́до чꙋде́съ бл҃года́тнаѧ, въ тебѣ̀ зрѧ́щи тва́рь ра́дꙋетсѧ: зачала́ бо є҆сѝ безсѣ́меннѡ, и҆ родила̀ є҆сѝ неизрече́ннѡ: є҆го́же чинонача̑лїѧ а҆́гг҃лѡвъ ви́дѣти не мо́гꙋтъ. того̀ молѝ ѡ҆ дꙋша́хъ на́шихъ.

Въ коне́цъ ᲂу҆́трени:

Пречⷭ҇таѧ бцⷣе, на нб҃сѣ́хъ бл҃гослове́ннаѧ, и҆ на землѝ славосло́вимаѧ: ра́дꙋйсѧ невѣ́сто неневѣ́стнаѧ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Заче́ншаѧ неѡпа́льнѡ ѻ҆́гнь бж҃е́ственный, и҆ ро́ждшаѧ безсѣ́меннѡ и҆сто́чника жи́зни гдⷭ҇а, бл҃года́тнаѧ бцⷣе, сп҃са́й тѧ̀ велича́ющыѧ.

Въ коне́цъ ᲂу҆́трени:

Безма́тернѧго на нб҃сѝ па́че мы́сли и҆ слꙋ́ха, на землѝ без̾ ѻ҆ц҃а̀ родила̀ є҆сѝ: того̀ бцⷣе молѝ ѡ҆ дꙋша́хъ на́шихъ.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Твоѐ предста́тельство и҆мꙋ́ще пречⷭ҇таѧ, и҆ твои́ми мл҃твами лю́тыхъ и҆збавлѧ́еми, крⷭ҇то́мъ сн҃а твоегѡ̀ вездѣ̀ соблюда́еми, по до́лгꙋ тѧ̀ всѝ бл҃гоче́стнѡ велича́емъ.

Въ коне́цъ ᲂу҆́трени: Пречⷭ҇таѧ бцⷣе:

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Заче́ншаѧ неѡпа́льнѡ ѻ҆́гнь бж҃е́ственный:

Въ коне́цъ ᲂу҆́трени: Безма́тернѧго на нб҃сѝ:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Твоѐ предста́тельство и҆мꙋ́ще:

Въ коне́цъ ᲂу҆́трени:

Пречⷭ҇таѧ бцⷣе:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Гаврїи́лꙋ вѣща́вшꙋ тебѣ̀ дв҃о: Ли́стъ фг҃і ѡ҆б.

Въ коне́цъ ᲂу҆́трени:

Безма́тернѧго на нб҃сѝ:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ в҃:

Бл҃гоꙋтро́бїѧ сꙋ́щи и҆сто́чникъ, млⷭ҇ти сподо́би на́съ бцⷣе, при́зри на лю́ди согрѣши́вшыѧ, ꙗ҆вѝ ꙗ҆́кѡ при́снѡ си́лꙋ твою̀: на тѧ́ бо ᲂу҆пова́юще, ра́дꙋйсѧ, вопїе́мъ тѝ, ꙗ҆́коже и҆ногда̀ гаврїи́лъ, безпло́тныхъ а҆рхїстрати́гъ.

Въ коне́цъ ᲂу҆́трени:

Мт҃и ст҃а́ѧ неизрече́ннагѡ свѣ́та: Ли́стъ фк҃є ѡ҆б.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Бж҃е́ственнагѡ бы́хомъ ѻ҆́бщницы є҆стества̀: Ли́стъ фк҃г ѡ҆б.

Въ коне́цъ ᲂу҆́трени:

Тѧ̀ велича́емъ бцⷣе, вопїю́ще: ра́дꙋйсѧ незаходи́магѡ свѣ́та ѻ҆́блаче, того̀ носи́вши въ нѣ́дрѣхъ сла́вы гдⷭ҇а.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Препросла́влена є҆сѝ бцⷣе дв҃о, пое́мъ тѧ̀: крⷭ҇то́мъ во сн҃а твоегѡ̀ низложи́сѧ а҆́дъ, и҆ сме́рть ᲂу҆мертви́сѧ, ᲂу҆мерщвле́ннїи воста́хомъ, и҆ живота̀ сподо́бихомсѧ, ра́й воспрїѧ́хомъ дре́внее наслажде́нїе. тѣ́мъ бл҃годарѧ́ще славосло́вимъ, ꙗ҆́кѡ держа́внаго хрⷭ҇та̀ бг҃а на́шего, и҆ є҆ди́наго многомлⷭ҇тиваго.

Въ коне́цъ ᲂу҆́трени:

Тѧ̀ велича́емъ бцⷣе вопїю́ще: ра́дꙋйсѧ же́зле, ѿ негѡ́же безсѣ́меннѡ бг҃ъ прозѧбы́й, погꙋбѝ на дре́вѣ сме́рть.

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Бж҃е́ственнагѡ бы́хомъ ѻ҆́бщницы: Ли́стъ фк҃г ѡ҆б.

Въ коне́цъ ᲂу҆́трени:

Тѧ̀ велича́емъ бцⷣе вопїю́ще: ра́дꙋйсѧ незаходи́магѡ:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Препросла́влена є҆сѝ бцⷣе дв҃о:

Въ коне́цъ ᲂу҆́трени:

Тѧ̀ велича́емъ бцⷣе вопїю́ще: ра́дꙋйсѧ же́зле:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Всѧ̑ па́че смы́сла, всѧ̑ пресла̑внаѧ твоѧ̑ бцⷣе та̑инства: Ли́стъ фд҃і ѡ҆б.

Въ коне́цъ ᲂу҆́трени:

Мт҃и ст҃а́ѧ неизрече́ннагѡ свѣ́та:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ г҃:

Красотѣ̀ дв҃ства твоегѡ̀, и҆ пресвѣ́тлой чистотѣ̀ твое́й гаврїи́лъ ᲂу҆диви́всѧ, вопїѧ́ше тѝ бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ бл҃года́тнаѧ.

Въ коне́цъ ᲂу҆́трени:

Кі́йждо и҆дѣ́же сп҃са́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀ бцⷣе, покрыва́ющее дꙋ́шы на́шѧ;

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Прибѣ́жище и҆ си́ла на́ша бцⷣе, держа́внаѧ по́мощь мі́ра, мл҃твами твои́ми покры́й рабы̑ твоѧ̑, ѿ всѧ́кїѧ нꙋ́жды, є҆ди́на бл҃гослове́ннаѧ.

Въ коне́цъ ᲂу҆́трени:

Кі́йждо и҆дѣ́же сп҃са́етсѧ:

Во вто́рникъ ве́чера, и҆ въ сре́дꙋ на Бг҃ъ гдⷭ҇а:

Же́злъ си́лы стѧжа́вшїи крⷭ҇тъ сн҃а твоегѡ̀ бцⷣе: тѣ́мъ низлага́емъ врагѡ́въ шата̑нїѧ, любо́вїю тѧ̀ непреста́ннѡ велича́юще.

Въ коне́цъ ᲂу҆́трени:

Прибѣ́жище и҆ си́ла на́ша бцⷣе:

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Прⷪ҇ро́цы проповѣ́даша, а҆пⷭ҇ли наꙋчи́ша, мч҃нцы и҆сповѣ́даша: и҆ мы̀ вѣ́ровахомъ бцⷣꙋ тѧ̀ вои́стиннꙋ сꙋ́щꙋю. тѣ́мъ и҆ велича́емъ ржⷭ҇тво̀ твоѐ неизрече́нное.

Въ коне́цъ ᲂу҆́трени:

Кі́йждо и҆дѣ́же сп҃са́етсѧ:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Же́злъ си́лы стѧжа́вшїи:

Въ коне́цъ ᲂу҆́трени:

Прибѣ́жище и҆ си́ла на́ша бцⷣе:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Тѧ̀ хода́тайствовавшꙋю сп҃се́нїе ро́да на́шегѡ: Ли́стъ фє҃і.

Въ коне́цъ ᲂу҆́трени:

Прⷪ҇ро́цы проповѣ́даша:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ д҃:

Воспита́вшейсѧ во хра́мѣ: Ли́стъ фк҃ѕ.

Въ коне́цъ ᲂу҆́трени:

Ꙗ҆́кѡ всѣ́хъ є҆сѝ творе́нїй вы́шшаѧ, воспѣва́ти тѧ̀ досто́йнѡ недоꙋмѣва́юще бцⷣе, тꙋ́не мо́лимъ тѧ̀, поми́лꙋй на́съ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Къ бцⷣѣ прилѣ́жнѡ ны́нѣ притеце́мъ грѣ́шнїи, и҆ смире́ннїи, и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце, помозѝ на ны̀ милосе́рдовавши, потщи́сѧ, погиба́емъ ѿ мно́жества прегрѣше́нїй, не ѿвратѝ твоѧ̑ рабы̑ тщы̀: тѧ́ бо и҆ є҆ди́нꙋ наде́ждꙋ и҆́мамы.

Въ коне́цъ ᲂу҆́трени:

Тѧ̀ велича́емъ бцⷣе, вопїю́ще: ты̀ є҆сѝ кꙋпина̀, въ не́йже неѡпа́льнѡ мѡѷсе́й ви́дѣ ꙗ҆́кѡ пла́мень ѻ҆́гнь бж҃ества̀.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же бл҃гослове́ннаѧ молѧ́щи не преста́й, проще́нїе прегрѣше́нїй на́мъ дарова́ти.

Въ коне́цъ ᲂу҆́трени:

Тѧ̀ велича́емъ бцⷣе, вопїю́ще: ты̀ є҆сѝ гора̀, ѿ неѧ́же неизглаго́ланнѡ ѿсѣче́сѧ ка́мень, и҆ врата̀ а҆́дѡва сокрꙋшѝ.

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Сло́во ѻ҆́ч҃ее, хрⷭ҇та̀ бг҃а на́шего: Ли́стъ фк҃д ѡ҆б.

Въ коне́цъ ᲂу҆́трени:

Ꙗ҆́кѡ всѣ́хъ є҆сѝ творе́нїй:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Дв҃о пренепоро́чнаѧ мт҃и:

Въ коне́цъ ᲂу҆́трени:

Тѧ̀ велича́емъ бцⷣе, вопїю́ще: ты̀ є҆сѝ гора̀:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Є҆́же ѿ вѣ́ка ᲂу҆тае́ное: Ли́стъ фє҃і ѡ҆б.

Въ коне́цъ ᲂу҆́трени:

Тѧ̀ велича́емъ бцⷣе, вопїю́ще: ты̀ є҆сѝ кꙋпина̀:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ є҃:

Со а҆́гг҃лы нбⷭ҇наѧ, съ человѣ́ки земна̑ѧ, гла́сомъ ра́дованїѧ бцⷣы вопїе́мъ тѝ: ра́дꙋйсѧ врата̀ нб҃съ ши̑ршаѧ, ра́дꙋйсѧ є҆ди́на земноро́дныхъ сп҃се́нїе, ра́дꙋйсѧ чⷭ҇таѧ бл҃года́тнаѧ, ро́ждшаѧ бг҃а воплоти́вшагосѧ.

Въ коне́цъ ᲂу҆́трени:

Ѿ дв҃ы возсїѧ́вый мі́рꙋ хрⷭ҇тѐ бж҃е, сы́ны свѣ́та то́ю показа́вый, поми́лꙋй на́съ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Ско́рый тво́й покро́въ, и҆ по́мощь, и҆ млⷭ҇ть, покажѝ на рабы̑ твоѧ̑, и҆ во́лны чⷭ҇таѧ ᲂу҆кротѝ сꙋ́етныхъ помыслѡ́въ, и҆ па́дшꙋю мою̀ дꙋ́шꙋ возста́ви бцⷣе: вѣ́мъ бо, вѣ́мъ дв҃о, ꙗ҆́кѡ мо́жеши, є҆ли̑ка и҆ хо́щеши.

Въ коне́цъ ᲂу҆́трени:

Мт҃и бж҃їѧ прест҃а́ѧ, стѣно̀ хрⷭ҇тїа́нъ, и҆зба́ви лю́ди твоѧ̑ ѻ҆бы́чнѡ, зовꙋ́щыѧ тѝ прилѣ́жнѡ: сопроти́висѧ сра̑мнымъ и҆ гѡ́рдымъ помыслѡ́мъ, да вопїе́мъ тѝ: ра́дꙋйсѧ приснодв҃о.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Крⷭ҇то́мъ сн҃а твоегѡ̀ бг҃обл҃года́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ: сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ бл҃гослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.

Въ коне́цъ ᲂу҆́трени:

Ѿ дв҃ы возсїѧ́вый мі́рꙋ хрⷭ҇тѐ бж҃е:

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Стра́нное дв҃ы та́инство мі́рꙋ показа́сѧ сп҃си́тельное: ѿ неѧ́ бо роди́лсѧ є҆сѝ без̾ сѣ́мене, и҆ пло́тїю показа́лсѧ є҆сѝ без̾ и҆стлѣ́нїѧ, всѣ́хъ ра́досте, гдⷭ҇и сла́ва тебѣ̀.

Въ коне́цъ ᲂу҆́трени:

Мт҃и бж҃їѧ прест҃а́ѧ:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Крⷭ҇то́мъ сн҃а твоегѡ̀:

Въ коне́цъ ᲂу҆́трени:

Ѿ дв҃ы возсїѧ́вый мі́рꙋ:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Ра́дꙋйсѧ две́ре гдⷭ҇нѧ непроходи́маѧ; Ли́стъ фѕ҃і.

Въ коне́цъ ᲂу҆́трени:

Ѿ дв҃ы возсїѧ́вый мі́рꙋ хрⷭ҇тѐ бж҃е:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ ѕ҃:

Нача́ло спасе́нїѧ, гаврїи́лово провѣща́нїе къ дв҃ѣ бы́сть: слы́ша бо, є҆́же ра́дꙋйсѧ, и҆ не ᲂу҆бѣжѐ цѣлова́нїѧ. не ᲂу҆сꙋмнѣ́сѧ ꙗ҆́кѡ са́рра въ сѣ́ни, но си́це глаго́лаше: сѐ раба̀ гдⷭ҇нѧ, бꙋ́ди мнѣ̀ по глаго́лꙋ твоемꙋ̀.

Въ коне́цъ ᲂу҆́трени:

А҆рха́гг҃льское сло́во прїѧ́ла є҆сѝ, и҆ херꙋві́мскїй прⷭ҇то́лъ показа́ласѧ є҆сѝ, и҆ на ѡ҆б̾ѧ́тїихъ твои́хъ носи́ла є҆сѝ бцⷣе, наде́ждꙋ дꙋ́шъ на́шихъ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Оу҆пова́нїе мі́ра бл҃га́ѧ бцⷣе дв҃о, твоѐ и҆ є҆ди́но держа́вное предста́тельство про́симъ, ᲂу҆млⷭ҇рдисѧ на безпредста́тельствєнныѧ лю́ди, молѝ млⷭ҇тиваго бг҃а, и҆зба́витисѧ дꙋша́мъ на́шымъ ѿ всѧ́кагѡ преще́нїѧ, є҆ди́на бл҃гослове́ннаѧ.

Въ коне́цъ ᲂу҆́трени: Никто́же притека́ѧй къ тебѣ̀, посра́мленъ ѿ тебѐ и҆схо́дитъ, пречⷭ҇таѧ бцⷣе дв҃о, но про́ситъ бл҃года́ти, и҆ прїе́млетъ дарова́нїе къ поле́зномꙋ проше́нїю.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Бцⷣе дв҃о, молѝ сн҃а твоего̀, во́лею пригвозди́вшагосѧ на крⷭ҇тѣ̀, и҆ мі́ръ ѿ пре́лести свобо́ждшаго, хрⷭ҇та̀ бг҃а на́шего, поми́ловати дꙋ́шы на́шѧ.

Въ коне́цъ. ᲂу҆́трени:

Пре́жде вѣ̑къ ѿ ѻ҆ц҃а̀ без̾ мт҃ре рожде́нна сн҃а, и҆ сло́ва бж҃їѧ, въ послѣ̑днѧѧ лѣ̑та родила̀ є҆сѝ, воплоти́вшагосѧ ѿ чⷭ҇тыхъ крове́й твои́хъ бг҃ороди́тельнице без̾ мꙋ́жа: є҆го́же молѝ дарова́тисѧ на́мъ грѣхѡ́въ ѡ҆ставле́нїю пре́жде конца̀.

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Ст҃а́ѧ влⷣчце, чⷭ҇таѧ бг҃а на́шегѡ мт҃и, всѣ́хъ творца̀ неизрече́ннѡ ро́ждшаѧ, молѝ со а҆пⷭ҇лы сщ҃е́нными всегда̀ бл҃гость є҆гѡ̀, страсте́й на́съ и҆зба́вити, и҆ ѡ҆ставле́нїе на́мъ да́ти грѣхѡ́въ.

Въ коне́цъ ᲂу҆́трени:

Вели́кихъ дарова́нїй, чⷭ҇таѧ дв҃о бг҃омт҃и, ты̀ сподо́биласѧ є҆сѝ: ꙗ҆́кѡ родила̀ є҆сѝ пло́тїю є҆ди́наго ѿ трⷪ҇цы хрⷭ҇та̀ жизнода́вца, во сп҃се́нїе дꙋ́шъ на́шихъ.

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Бцⷣе дв҃о, молѝ сн҃а твоего̀:

Въ коне́цъ ᲂу҆́трени:

Пре́жде вѣ̑къ ѿ ѻ҆тца̀ без̾ мт҃ре:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Предповѣствꙋ́етъ гедеѡ́нъ зача́тїе, и҆ сказꙋ́етъ дв҃дъ ржⷭ҇тво̀ твоѐ бцⷣе: сни́де бо ꙗ҆́кѡ до́ждь на рꙋно̀, сло́во во чре́во твоѐ, и҆ прозѧбла̀ є҆сѝ без̾ сѣ́мене землѐ ст҃а́ѧ, мі́ра сп҃се́нїе, хрⷭ҇та̀ бг҃а на́шего, бл҃года́тнаѧ.

Въ коне́цъ ᲂу҆́трени:

Пре́жде вѣ̑къ ѿ ѻ҆тца̀ без̾ мт҃ре:

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ з҃:

Бцⷣе дв҃о нескве́рнаѧ, сн҃а твоего̀ молѝ съ го́рними си́лами, проще́нїю прегрѣше́нїй на́мъ пре́жде конца̀ дарова́тисѧ, вѣ́рнѡ тѧ̀ сла́вѧщымъ.

Въ коне́цъ ᲂу҆́трени:

Превозшла̀ є҆сѝ си̑лы нбⷭ҇ныѧ, занѐ хра́мъ показа́ласѧ є҆сѝ бж҃е́ственный, бл҃гослове́ннаѧ бцⷣе, ꙗ҆́кѡ ро́ждшаѧ хрⷭ҇та̀, сп҃са дꙋ́шъ на́шихъ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Ра́дꙋйсѧ, тебѣ̀ приво́димъ бцⷣе, а҆́гг҃лѡвъ бо вы́шшаѧ показа́ласѧ є҆сѝ, бг҃а ро́ждшаѧ.

Въ коне́цъ ᲂу҆́трени:

Оу҆мирѝ мл҃твами бцⷣы жи́знь на́шꙋ, вопїю́щихъ тѝ, млⷭ҇тиве: гдⷭ҇и сла́ва тебѣ̀.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

Распе́ншагосѧ за ны̀ хрⷭ҇та̀ бг҃а, и҆ разрꙋши́вшаго сме́рти держа́вꙋ, непреста́ннѡ молѝ бцⷣе дв҃о: да сп҃се́тъ дꙋ́шы на́шѧ.

Въ коне́цъ ᲂу҆́трени:

И҆зба́ви бцⷣе ѿ содержа́щихъ на́съ грѣхѡ́въ, ꙗ҆́кѡ и҆но́гѡ ᲂу҆пова́нїѧ вѣ́рнїи не и҆́мамы, ра́звѣ тебѐ, и҆ ѿ тебѐ ро́ждшагѡсѧ бг҃а.

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Пло́дъ чре́ва твоегѡ̀ пречⷭ҇таѧ, прⷪ҇ро́кѡвъ є҆́сть и҆ зако́на и҆сполне́нїе. тѣ́мъ тѧ̀ бцⷣꙋ въ вѣ́дѣнїи сла́вѧще, бл҃гоче́стнѡ велича́емъ.

Въ коне́цъ ᲂу҆́трени:

Пло́дъ чре́ва твоегѡ̀ бг҃оневѣ́сто, человѣ́кѡмъ показа́сѧ сп҃се́нїѧ хода́тайственный, тѣ́мъ тѧ̀ бцⷣꙋ, ра́зꙋмомъ и҆ ѧ҆зы́комъ сла́вѧще вѣ́рнїи велича́емъ.

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

Распе́ншагосѧ за ны̀ хрⷭ҇та̀ бг҃а:

Въ коне́цъ ᲂу҆́трени:

И҆зба́ви бцⷣе:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

Ꙗ҆́кѡ на́шегѡ воскрⷭ҇нїѧ сокро́вище: Ли́стъ фѕ҃і ѡ҆б.

Въ коне́цъ ᲂу҆́трени:

Ра́дꙋйсѧ, невмѣсти́маго въ нб҃сѣ́хъ, вмѣсти́вшаѧ во ᲂу҆тро́бѣ, твое́й. ра́дꙋйсѧ дв҃о, прⷪ҇ро́кѡвъ проповѣ́данїе, є҆́юже возсїѧ̀ є҆мманꙋ́илъ. ра́дꙋйсѧ мт҃и хрⷭ҇та̀ бг҃а.

Въ недѣ́лю ве́чера, и҆ въ понедѣ́льникъ на Бг҃ъ гдⷭ҇ь, гла́съ и҃:

Ра́дꙋйсѧ, а҆́гг҃ломъ ра́дость мі́ра прїе́мшаѧ: ра́дꙋйсѧ, ро́ждшаѧ творца̀ твоего̀ и҆ гдⷭ҇а: ра́дꙋйсѧ, сподо́бльшаѧсѧ бы́ти мт҃и бж҃їѧ.

Въ коне́цъ ᲂу҆́трени:

Ра́дꙋйсѧ, врата̀ цр҃ѧ̀ сла́вы, ꙗ҆̀же вы́шнїй є҆ди́нъ про́йде, и҆ є҆ди́нꙋ запечатлѣ́ннꙋ сохранѝ, во сп҃се́нїе дꙋ́шъ на́шихъ.

Въ понедѣ́льникъ ве́чера, и҆ во вто́рникъ на Бг҃ъ гдⷭ҇ь:

Недви́жимое ᲂу҆твержде́нїе вѣ́ры, и҆ чⷭ҇тны́й да́ръ дꙋ́шъ на́шихъ бцⷣꙋ пѣ́сньми велича́емъ вѣ́рнїи: ра́дꙋйсѧ, ка́мень жи́зни во чре́вѣ твое́мъ вмѣсти́вшаѧ. ра́дꙋйсѧ, конце́й наде́ждо, скорбѧ́щихъ застꙋпле́нїе. ра́дꙋйсѧ невѣ́сто неневѣ́стнаѧ.

Въ коне́цъ ᲂу҆́трени:

Дв҃о пречⷭ҇таѧ, сп҃си́ ны мл҃твами твои́ми, дви́жꙋщи ᲂу҆тро́бꙋ мт҃рнюю сн҃ꙋ твоемꙋ̀ и҆ бг҃ꙋ на́шемꙋ.

Во вто́рникъ ве́чера, и҆ въ сре́дꙋ на Бг҃ъ гдⷭ҇ь:

А҆́гнца, и҆ па́стырѧ, и҆ сп҃са мі́ра, на крⷭ҇тѣ̀ зрѧ́щи ро́ждшаѧ [тѧ̀], глаго́лаше слезѧ́щи: мі́ръ ᲂу҆́бѡ ра́дꙋетсѧ, прїе́млѧ и҆збавле́нїе: ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же за всѣ́хъ терпи́ши сн҃е и҆ бж҃е мо́й.

Въ коне́цъ ᲂу҆́трени:

Пло́дъ чре́ва твоегѡ̀ пречⷭ҇таѧ: Ли́стъ фл҃г.

Въ сре́дꙋ ве́чера, и҆ въ четверто́къ на Бг҃ъ гдⷭ҇ь:

Мы́слєннаѧ врата̀ жи́зни пречⷭ҇таѧ бцⷣе, притека́ющыѧ тебѣ̀ вѣ́рнѡ и҆зба́ви ѿ бѣ́дъ: да сла́вимъ прест҃о́е ржⷭ҇тво̀ твоѐ во сп҃се́нїе дꙋ́шъ на́шихъ.

Въ коне́цъ ᲂу҆́трени:

Дв҃о пречⷭ҇таѧ, сп҃си́ ны:

Въ четверто́къ ве́чера, и҆ въ пѧто́къ на Бг҃ъ гдⷭ҇ь:

А҆́гнца и҆ па́стырѧ:

Въ коне́цъ ᲂу҆́трени:

Пло́дъ чре́ва твоегѡ̀ пречⷭ҇таѧ:

Въ пѧто́къ ве́чера, и҆ въ сꙋббѡ́тꙋ на Бг҃ъ гдⷭ҇ь:

И҆́же на́съ ра́ди рожде́йсѧ ѿ дв҃ы: Ли́стъ фз҃і ѡ҆б.

Въ коне́цъ ᲂу҆́трени:

Дв҃о пречⷭ҇таѧ, сп҃си́ ны мл҃твами твои́ми:

Коне́цъ бг҃оро́дичныхъ.